المساعد الشخصي الرقمي

مشاهدة النسخة كاملة : اشحفان القطو


الوعد
06-06-2002, 04:35 AM
البارحه يلست اتطالع اشحفان ... واستانست عليه وايد ... وهذي اول مره اتابعه باهتمام .... ضحكني ... وتونست وياه ... حبيت انكم تتونسون انتوا بعد ... عشان جيه .... يلست اسجل لكم الحوار ... وهذا هو

في القهوة :

الكراني : مـاكديت .. ماكديت

ماكديت : مرحبا الكراني ..ياهلاااااااااااااااا ياهلا

(( يتخاشمون .. وعقب يسيرون محل بوطبر ))

الكراني + ماكديت : السلام عليك يابوطبر ..جيف حالك ؟

بوطبر : ياهلا .. حياالله من يانا .. يامرحبا

الكراني : الا بتخبّركم ياجماعه .. اشحفان اشحقه ضرب ولده ؟

ماكديت : يعني تسوي روحك ماتدري !!

الكراني : لاوالله ياماكديت

ماكديت : عشان كسر الكروه

بوطبر : كسر الكروة !! وعشان كسر الكروة الحشره بتتم شهرين ترقى وتنحدر

الكراني : مستعجب .. مستعجب من هالانسان .. فلوس وعنده .. وبيوت وعنده .. والله منعم عليه .. هالبخل بعد

اشحقه !!؟

ماكديت : آآآآآآآآآآآه يالكراني .. ماتشوف حالة عياله .. ماتشوف مرته المسكينه .. من اليوع صايره جنها هيكل

عظمي !!
بوطبر : تصدقون ياجماعه .. اشحفان هذا كل اسبوع يشتري من عندي جيس جاس طحين وجاس شعير ، ويتم

يساومني مساوم .. يأذّيني ويصدعبي عشان هذا المساوم .. وفي الآخر ينقص لي نص الجيمه

(( تتعالى الضحكات وتتعالى ))

ماكديت : انتوا ماسمعتوا عن آخر نكته !؟

الكراني وبوطبر : لاوالله

ماكديت : هالايام الناس يتسابقون على السيارات ،كل حد منهم يدوّر له على أحسن نوع من السيارات..وهذا شي طبيعي ..

بوطبر : صحيح

ماكديت :لكن اشحفان هذا موصني على وصاه .. ماتخطر على بال حد
بوطبر :اكيد على سيكل

ماكديت : لااااااااااااااااااا

بوطبر والكراني : عيل !!؟

ماكديت : لااااااا ، موصني على حمار

وتتعالى الضحكات والقهقهات مرة أخرى .

بوطبر : حمـــــــار !!!؟

ماكديت : وله شروط معينه

الكراني : شو شروطه بعد !؟

ماكديت : الشرط الاساسي انه ماياكل ..


بوطبر ..: هاهاهاهاهاهاي .. معلوم .. حتى مايخسره ، وعساك لقيت له !؟

ماكديت : هيه والله .. سمعت محمد القعود عنده حمار مريض من شهرين ، وصار له اسبوع ماياكل .. ويبا يتخلص منه

بوطبر : وانت اكيد تبا تعقه في جبده

ماكديت : وانا اشعندي غير هالاشيا هذي

هاهاهاهاهاهاهاهاهاهاي

ماكديت : يالله عيل .. من رخصتك يابوطبر

بوطبر : ويـــن !؟

الكراني : وين بتسير ؟

ماكديت : بسير عند محمد القعود ، وباييك اهنيه عشام تسير ويايه عند اشحفان القطو

الركاني .. زيــــن..هع هع هع هع هع هع هع هع هع هع هع هع هع

(( يلتقي ماكديت بمحمد القعود .. ويدور من بينهم هذا الحوار ))

ماكديت : طيعني يالقعود وبيعه طيعني ،

القعود : شو ابيعه ياماكديت .. حماري مريض من شهرين

ماكديت : هذا هو عز الطلب

القعود : انت من صدقك والا اتمصخر

ماكديت : شو تشوفني اقوللك انا !!؟ .. اتكلم وياك لندني !!؟.. اقوللك هذا هو عز الطلب .. بلاك انت !؟

القعود : ومنو هذا الخبله اللي بيشتري حمار مريض وهزيل !!؟

ماكديت : وانت شو عليك منو بيشتري ؟؟..اللي عليك انك تقبض الفلوس وبس ، بيعه والمشتري عليّه انا

القعود : انا ماعندي مانع ، وودي افتك منه اليوم قبل باجر ، بس من اللي بيشتريه ؟؟

ماكديت : هذا اللي حارنّك انت ، اشحفان القطو

القعود : اعوووووذ بالله .. البخيل هذا .. لا لا لا لا ياريال ..اخاف اذا استوى شي بالحمار ساعتها شو بيفكني منه ؟؟



هذي نص الحلقه ... اذا حبيتوا اكمل لكم اياهااااااااا .. قولوا ...



تابعوا مغامرات اشحفان القطوووووووووو مع الوعد
(hi) (hi)
شروق الشمس
06-06-2002, 10:34 AM
تسلمين الوعد

ومسلسل شحفان لو شو ماتابعينه ماتملين منه

كله فكاهة ومقالب مضحكة :)
عــيـ دبـي ــون
06-06-2002, 02:39 PM
الوعد تسلمين أختي

وهذا المسلسل لو يعيدونة كل سنة الناس ماتمل منة :)

وكملي اختي ..مادام هذي الشي يرسم البسمة على شفاة كل عضو:)
عيون العين
06-06-2002, 04:32 PM
هههههه:D
تسلمين اختي الوعد
طبعا اتكملين هههههههه

مشكوره اختي الوعد ويزاج الله الف خير ... تحياتي لج (hi) (hi) أضربك) (أضربك) عيـــــــــــــــــــــــــــون العيـــــــــــــــــــــــــــــن (أضربك) (أضربك)
زهـرة الـوادي
06-06-2002, 08:46 PM
يعطيج الف عافيه يالـــوعد على سردج لنا
لحلقات هذا المسلسل المحلي و التراثي
تسلمين أختي
الوعد
07-06-2002, 02:46 AM
شرووووووووق الشمس


هيـــــــــه والله


تدريــــــــن .. يوم كنت صغيره كنت اشوف ابويه مايرقد الا اذا تطالع اشحفان القطو ودرب الزلق ... واستعجب .. واحس انه ممل .. مع اني ماكنت اتابعه ...


لكن يوكبرت شويه .. اونه ... صرت احبه


والحيـــــــــن احبه واااااااااااااااااااااااااااايد ... عيال اختي الصغار يوم يباتون عندنا احطلهم اياه ... يتمووون افففففففف .. مانبى هااااااااا ... حطي لنا مسرحيه ...

مره جبريتهم يطالعونه ... والحين ... كل ماييون ... يقولون لي حطيلنا اشحفان
الوعد
07-06-2002, 02:47 AM
عيـــ دبي ــــــون ..

تسلم اخويه .. فالك طيب
الوعد
07-06-2002, 02:47 AM
العفوووووو اخويــــــه عيون العين ...

مايصير خاطرك الا الطيب
الوعد
07-06-2002, 02:49 AM
زهوووووووره

الله يسلّمج من كل شر ... مشكوره على التواصل
الوعد
07-06-2002, 02:52 AM
بنــــــــــاءً على طلبكم ... وطلبكم عندي بالدنيا ...


بكمّل لكم الحلقه ... تابعوا الصفحه باستمرار ... عشان تشوفون التتمه



لكم من كل الحـــــــــــب (h)
عيون_المها
08-06-2002, 10:16 AM
مشكور أختي الوعد ....

الصراحه مسلسل أشحفان القطو أحلى المسلسلات اللي شفتها....

وأتمني أني أشوفه مرة ثانية ...

الله يعطيج العافية

عيون_المها
الوعد
08-06-2002, 11:04 AM
هلا عيون المها .... اطرّش لج الشريط ؟؟؟



انشاء الله اليوم بسجّل لكم باقي الحلقه .... زوروووووووا الصفحه باستمرار اذا حبيتوا ...


لكم كل الحب
الوعد
09-06-2002, 07:59 AM
التتمه

هذي انا ورديت لكم من اول ويديد لمغامرات السيد اشحفان [/COLOR;)


ماكديت : انت ماعليك منه .. ماعليك .. بيع انت وانا شاهد

القعود : جان جذه .. عيل نتوكل على الله

ماكديت : من رخصتك عيل .. في امان الله

القعود : حيـّــاك الله .. حيّاك الله

ماكديت : اسمع يالقعود

القعود: نعم ؟

ماكديت : تعال تعال بخبرك .. اسمع .. انا الحينه بسير اييب اشحفان .. بس اللي اباه منك تطلّع الحمار.. وتنظفه وترتبه زيـن .. سمعت ياالقعود ؟

القعود : هيه نعم … سمعت

ميثوه : هات القعود .. وانا عندي القطوه .. وانا والقطوه بنركب فوق القعود

ماكديت : هههههههههههه ((ويهم بالذهاب))
القعود : سيري .. سيري انت يالخبله .. سيري يله

(( اشحفان في البيت .. يدق حطبه .. وينشد بعض الاشعار ))

مرته : ماتقول لي انت شو يالس تسوي من الصبح الين الحينه ؟

اشحفان : مثل ماتشوفين

مرته : اللي اشوفه مايسويه ريال عاجل
اشحفان : يالس اسوي كراج

مرته :/ كراج اشحقه ؟؟ بتشتري موتر؟؟

اشحفان : لا .. بشتري حمار

مرته : حمـــــــــار!!!؟.. الله واكبر عليك يااشحفان.. حد يشتري حمار هالايام !؟..يوم انت تبغي تربي .. ربّ غنم ..ربّ نوق .. اشتر دياي ..مب حمار يالخبله

اشحفان : هذا انتوا يالحريم .. ماوراكم الا الخساير .. تدرين انا ليش بشتري حمار ؟

مرته : لا.. اشحقه ؟

اشحفان : احسن عن السياره ..بنسير وبني عليه .. لاداعم ولامدعوم .. وان طحتوا ..الارض حذالكم

مرته : عجايب هالزمان

اشحفان : هيــــه يالزمان .. .. ..عجايبكم

(( حد يدق الباب ))

اشحفان : حرُّووووب .. .. حرُّوووووب .. .. وصَلَي يصليك

حارب : ها ابويه

اشحفان : اتطالع منو عند الباب

حارب : ان شاء الله

اشحفان :تعال تعال تعال .. .. شوف .. اذا حسن بورطبه .. قول له ابويه محّد

حارب : اقول له محّد وانت هنيه !!؟

اشحفان : انطب طبّك الله .. لابركتن فيك ولافي يومك

حارب : ان شاء الله

اشحفان : تعال .. واذا قاللك متى بيي .. قول له ابويه خلاص .. سار ومابيي موليه

حارب : ان شاء الله

مرته : وهذا شو يبا بك بعد ؟

اشحفان : هذا يبا سلف بيزات .. خمسمية ربيه .. وانا ماابغي اعطيه بيزات .. ماابغي اسلّفه

((يرجع حارب ))

حارب : ابويه هذا ماكديت عند الباب .. اقول له يدخل الميلس ؟
اشحفان : اقول له يدخل الميلس :mad: ؟.. ..الميلس اشحقه ؟؟.. .. حق الخسر ؟.. هذا ولدج هذا طالع عليج .. ..انتي

وهو .. ماتحبون الا الخساير ..بيدخله الميلس ..يبا قهوه .. يبا مادري شو .. اشحقه الميلس ..؟عوذ بالله منكم ومن

يومكم .. قبل بشوفه عند الباب .. وعقب خل يدخل ..افففففف (( ويطلع ))

اشحفان : السلام عليك ماكديت

ماكديت : وعليك السلالالالالام .. ياهلا ويامرحبا اشحفان

اشحفان : اشحالك؟

ماكديت : الحمدلله الله يحييك

اشحفان : هاه .. بشّر .. حصلت المطلوب

ماكديت : عند ويهك .. موجود

اشحفان : لاوالله ؟؟..( ويتلفت حوله ) .:rolleyes: . وينوه عيل ؟..مايبته وياك

ماكديت : افا .. افا عليك يااشحفان .. معقوله اييبه ويايه قبل ماتشوفه انت ؟؟.. المفروض انك تطالعه ..وتطمأن عليه وعلى صحته وتشوف اصله وفصله .. والمشترى خلاف

اشحفان : هااااااه .. هذا جوابك .. لان شي من الحمير فيهن اصل وفصل .. مب كلهن واحد

ماكديت : معلوم

اشحفان : عيل الحينه تباني اسير وياك ؟

ماكديت : هيه .. الريال مستعيل ..يترياك الحينه

اشحفان : انزين ماعليه عيل .. انا باييب الدسمال مالي .. داخل .. مايبته ..ترياني ها

ماكديت : لاتتأخر

اشحفان : لالا .. ياينّك الحينه

ماكديت : حيــّـاك الله .. حيـّـاك الله (( بسخريه )) ههههههههههههاي:D ;) ;)


[COLOR=royalblue]ولنا عودة
رأس الحية
09-06-2002, 02:22 PM
السلالالام عليكم ..

تسلمين اختي على هالمشاركه الجميله ..

وربي يوفقج ان شاء الله ..

تحياتي ..
الوعد
10-06-2002, 03:15 AM
راس الحيـــــــه


الله يسلّمج من كل شر الغاليه ..

مشكووووووووره على التواصل
عيون العين
14-06-2002, 05:38 AM
:D :D تسلمين اختي الوعد على المشاركة الحلوووووه ما قصرتي تحياتي لج (hi) (hi) (أضربك) عيـــــــــــــــــــون العيــــــــــــــــــن (أضربك)
الرحـ2000ــال
14-06-2002, 07:15 AM
مشكورة الوعد
على هالموضوع
ويعطيج الف عافية
مع تحياتي
ما كديت



ههههههههههه




الرحال
الوعد
15-06-2002, 03:34 AM
تسلم اخويــــــــه عيون العين



الله يعطيك العافيـــــــــــــــــــــــــــــــــــه
الوعد
15-06-2002, 03:36 AM
هههههههههههههههههههههه


الرحــــــــــــــــــــال ;)



عيل انا رويـــــّــــــــــــــه اشحفان القطو ... احم احم ... والنعم




تسلم اخويه على التواصل
خيال
27-06-2002, 06:34 PM
مشكوره الوعد انا ستانست وايد من الحلقات

ههههههههههه

والله يرحم الكرانى:(
الوعد
27-06-2002, 06:55 PM
ان شاء الله دووووووم تستانس ..العفو .. لاشكر على واجب .. ويعل ايامك كلها وناسه

والله يرحم الكل برحمته ..
الغلا
27-06-2002, 07:02 PM
هههههههههههههههههه الوعد والله انج خطييييييييييييييييييييييره


مواضيعج دائما مميزه ......


مشكوره الغاليه .... الله يوفقج


تحياتي
الغلا
الوعد
27-06-2002, 09:29 PM
هلا ياكل الغلا ..

اشكرج الغاليه .. وجودج هو التميز بعينه ... دايما تسعديني بردودج ...

تسلمين ..


ودمتي سالمه