هل تقبل بالزواج من فتاه عرفتها من قبل واحببتها ؟

[عسولة]

السلام عليكم ..
شحالكم شخباركم ؟؟
اخواني اعضاء منتدى الكتبي

اليوم بطرحلكم موضوع للنقاش

السؤال هو

هل تقبل بالزواج من فتاه عرفتها من قبل واحببتها ؟

*a29*
واتمنى رايكم وبكل صراحه ...

[الغزال العنيد]

موضوووع روووووعه الصراحه ويستاهل النقاش

أنا ابا ارز ابويهي اشوي بس اشوي:d

أنا من رأيي اشوف انه اذا حبها ويبا ياخذها ما فيها اي عيب مشى بطريج الصحيح
اخير له من انه يمشي بطريقه غير الصحيحه
وافضل شي فالسالفه انه حبهاا

والسموحه منج عسوله

[اسيرة_الزعابي]

مشكوره اختيه ع المشاركه الحلوه

امابالنسبه عن السؤال فانا من رايي اذا الولد حب البنت وشاريها ما فيها شي لان الحب مب عيب ولا حرام بس انه يكون حب صادق وطاهر وعفيف واذا كانت نيته صافيه .وبعدين كلنا بشر وكلنا نحب بس حب في الله لانه ماشي اقوى من الحب في الله

وتسلمين ع السؤال ولج تحياتي

[عسولة]

العفوووو
ومشكورين على مروركم للموضوع :)

ونتريا الباقي

[الشوق الحزينة]

هالسؤال ينطرح الكم يا الشباب شو رايكم ؟؟؟؟؟؟

[مــــــيـــــاس]

يا سلامي على اللي يأيدون الحب

.
.

الحب شي جميل والاجمل يوم يكون لله ورسوله

.
.

أما بالنسبه للأجابه

أوكيه عادي بتزوج اللي حبيتها بس بشرط لازم اكون على قناعه واحسب ألف احساب على الطريقه اللي حبيتها فيها البنت

يعني

أول شي اللحظه التي تعرفت عليها لازم اكون مقتنع فيها

يعني مثلاً هل انا مقتنع من حبي لفتاه جاء من وراء :-

1- ترقيمها

2- التعرف عليها في الجات

3-التعرف عليها من خلال المنتدى

4-الصدفه (في السوق , البت (بيتنا) , الجامعه, المستشفى , ... الخ)

وبعد ما اقتنع بطريقة معرفتي بهذه الفتاه يأتي هنا اقتناعي بالزاوج منها...

يعني اللي مقتنع من وحده رقمها ومقتنع من سالفة الترقيم ومن ثم حبها وتزوجها

مافي اي مشكله والله يوفقه

بس بشرط لا يقول للبنت بعد الزواج والله مثل مارضيتي تأخذين رقمي بترضين تأخذين رقم غيري (ويبتدي بالشكوك) لانه هو اللي اقتنع بالبنت هذي


وكذلك الحال ينطبق على الامثله السابقه

.
.


ونصيحه من عندي

ويسمحولي الشباب عليها لانه في الوقت الحالي لم تعد هناك حواجز تمنع من الحب

لكن اقولها ابكل صراحه وعفويه لكل بنت تحب او تسمع ان فلان حبها

تتأكد ان هالفلان بالفعل مقتنع بالطريقة التي تم التعرف عليها

طبعاً بعد ذلك تسأل نفسها هل هيه بعد مقتنعه

وإذا رأت ذلك

مبروك لها @60@ ومبروك له
.
.
.

[عسولة]

هلا مياس
مشكوور على صراحتك وردك المقنع :)

[اكتبي متغرب]

السلام عليكم
اشحالكم
عساكم بخير


يا مرحبا الساااااااااااااااااااااااااااااااااع


احم احم


صبروا بفكر انزين
ياخي يدق قلبي بسرعه

اووووووووووووف


ماروم


يلا بقول


صراحه وفي الواقع والمنطق يقول
يقول


اقول شو يقول ولاا



خلاص خلاص بقول يا عسوله

لا انضرب

هههههههههههههههههههههههههه



الي يبينا عيت النفس تبغيه و الي نبيه عيا البخت لا يجيبه


الحب سنه عند الاشراف
ولا يضر ان عرفتها بالعكس انا عرفت شخصيتها
وعرفت منطوقها وعرف كل خيرها وشرها
عليه طلاق العزوبيه اني اخذها و انا مرتاح بعد


بس الانسان يوم يختار مب كل وحده تنفعلك تحبها و تاخذها
خذ الي تفهم منطوقك و سنعك و منك وفيك
لي يت عند اهلك ريتها وياهم و لقيت معانيها من معانيهم
مب تسير تاخذلي وحده لا ثوبها من ثوبك ولا هيه منك وفيك
يعني بالاصح ما تصلح لك

لكل شي في هالدنيا مقومات
يعني لابد تكون في مقومات
مثلن اذا هوه بدوي ما يسير ياخذلي حضريه
واذا هوه حضري مب يسير ياخذلي بدويه
لانه الانسان على البيئه الي تربى فيها



ثاني شي الوقت الحالي تغير
والحب مب مثل حب قبل صراحه
مع احترامي لكل النقاشات
انا من الي يقدس الحب
لكن الحب الحين حب مصالح
لك حايه عند البنت و لها حايه عندك
هذا الواقع مابي اتكلم برى الواقع لكن مب كله

الواحد يوم بيكلم وحده يرمسها و يقول حق فلان وعلان
يعني مفضحنها بين العرب
وين تبينه ياخذها و هوه جيه قايل عنها

يا بويه ريال يوم يبا الشي ما يرده شي لكن

لي يبا صلاه ما تفوته
وناس الحين ما تفكر مثل قبل
الشباب يابويه يقولك ليش اعرس وابتلي
دام شي متوفر مع احترامي للجميع
هذا واقع مجتمعنا
طبعن مب الكل
لكن موجود وتشوفونه انتوا اكثر عني انا



الحب شي كبير
اكبر عن تصورنا الشخص
الحب له قداسته
له منطوقه
له حياته

اذا عشت في الحب ما ودك تتركه
لانه له طعم غير في حياه
يخليك اتشوف كل شي جميل
والحب بالنسبه لي كل الحياه
كل شي في حياتك اقدر اسميه حب
وان حبيت الشي قدرت تعطيه بلا نهايه



في ذمتي ذمه لو ريت الي تشل القلب
اني ادش بالباب و ادقه
و الي يطلب القهوه تيه الدله


شكلي طولت


الو انا ياخذها ولا عليه
ويافتديها بكل مافيه يعلي رفجه انها تسوى دنيا كلها
دامنها شلت القلب و ش بقى بعد اغليه


يلا يلا


بسكم


ههههههههههههههههه


حبي ماريتها
يوم القاها بخبركم تون عرسي




اكتبي متغرب

[عسولة]

صح كلامك ومشكوور اكتبي متغرب على المشاركه
ولا تحرمنا من ردودك :)

[king]

واللهي انا ما اقدر اقول في هذا الموضوع شي علشان المراقب فوق راسي
<<< يقصد خطيبته
ما اقول الله يخلي الافلام الهنديه ...
طع طع طع

نقبل بحاله وحده اني اكون اعرفها صح يعني ادب اخلاق و الباقي
<< ما يقدر يكمل خايف من التعبير

مشكور عسوله على الموضوع المهضوم
تحياتي لك غاليتي
عبادي

[الجتبية]

خخخخخخخخخ والله وناسه ردودكم

مشكورة عسوله على هالموضوع الوناسه *_^

[حبي بدر]

صدق رد ميااااااااااس كشخة كل كلمة قالها صح ماشاء الله عليه يالله نتريا بقية

[اسيرة_الزعابي]

هيه والله انا اايد اخويه مياس واخويه كتبي مغترب

[عسولة]

العفو
ومشكورين على المرور :)

[الغزال العنيد]

عيبتني الصراحه ردود الشباب

بس حبيت اعلق على كلام اكتبي مغترب
واسمحيلينا عسوله ع التدخل

أنا ما اشوف فيها شي لو واحد حضري يأخذ وحده ابدويه والعكس
لانه وايد اتصير افمجتمعنا وما اشوف فيها اي عائق

والسموحه منج عسوله

وينكم يا شباب نتريا رأيكم

[مــــــيـــــاس]

صح السانج يالغزال

وسبقتيني على التعليق

وهو بالفعل

لا توجد اي مشكله من زواج البدوي من الحضريه

وما يحتاي الدليل

نحن بدو

وكثير منا ما خذو بنات اعمامهم واتزوج من ابوظبي ومن الشمال وعادي عايشين

ومتأقلمين مع بعض @54@

وبعدين شو البدوي @17@ @9@ لايكون يريد وحده *a10* اتسير تحطبله "خهخهخهخهخهخ"

خلاص ابوي مافي بدوي والا حضري مثل برنامج قناة الواحه *a13*

ألحين مكس وريمكس @109@

بدو وحضر

انقرضوا البدوا تعرفون ليش ... لانهم اتطور وماعادوا يرتحلون مثل الاول واستقروا فالمدن ...

حتى سوالف العادات والتقاليد بدأت بالتمحور شيئً فشيئً

يعني

جان تروم اتزوج بناتك زوجهن

لكن احسن الاختيار

فمهما تلاشت عدات وتقاليد

الا ان الاخلاق والسمعه الحسنه مطلوبه من قبل الزوجه والزوج ....


.
.


وتحياتي

.
.


(أنا دورولي 3 ابدويات واحضريه خخخخخخخخخخخخخخ)

ترا عادي بعد لو بتشوفولي بالمره مغربيه @67@ خخخخخخخخخ

.
.

[اكتبي متغرب]

مع احترامي لردودكم لكن انا يوم حطيت هالشي كمثال
وانا ما عبت لا بدو ولا الحضر ولا قولكم الشي هذا غلط
بس نظام القبلي صعب و خص عندنا في بدوان
ما قولكم مافي زواج ناجح
واعتقد اني قلت بعض
ومع احترامي لرايكم ان وجد الحب فكل هالعوائق اتزيل
لكن اذا هله يرضوبها و اقتنعوا فيها و لا بيقتنعون فيها الا اذا لقو فيها الي يرضونه لعمارهم


الغزال العنيد و مياس
عطوني نسبه للزواج الناجح من البدوان الي مزوجين على حب


وانت يوم قلت من شمال يا مياس
ما شاف رقعت ويها ولا يعرفها
و لا يا هوه ودورها

يكون في علمك انه الشي الصح في مجتمع
وانت ما ظن تمشي عكس المجتمع
انت ترضى تاخذ وحده رافضينها اهلك
وانتي يا الغزال بترضين تاخذين واحد بليا شور اهلج

خلونا مع الواقع شوي
اذا ما توافق تفكير الاهل مع تفكير الولد صعبه يقضب اهله على زواج
لكن بالمحاوله كل شي يصير


وثاني شي يا مياس
ما بتيبلي وحده متعوده تلبس فري و بناطلين وطلعات و سيرات
وبتقولي اهلك بيقتنعون فيها

خلنا واقعين شوي

انا بدوي و اعرف شو نحن نيا
وشو مجتمع البدوي يبا

لا تقولي مب ممكن تختار وحده بها الاسلوب
بقولك يمكن تحبها
ربك خلا قلبك ينبض الها

لا تقولي مافي بدو ولا حضر
البدو بعدهم موجودين ولا جان ما يو اهل ابوظبي و العين وردوا ياخذون بدويات من الشمال

و البدوي في وقتنا هذا معروف من سنعه ومنطوقه

والشي الي قصدته انا وانتوا فهمتوه ضد الحضر او ضد البدو
انه الانسان يلبس من ثوبه يعني الي تناسبه و عارف انه اهله ومجتمع المحيط به بيتقبلها
ما له داعي يحب و ينصدم برفض الي حوله
لاتقولي باخذها غصب لانك بتمشي عكس الموج

العقل يخليك تعرف من تحت و تحب الشخص الي تقدر انك تكمل حياتك معاه
وتعيش بهنيه
وياما ناس استوتلهم مشاكل بسبت الحب
يا انه فارق الي يحبها
يا انه انصدم من اهله


تبون قصص عندي
واقعيه وصدقوني نحن عاداتنا اضمحلت بالنسبه لتشدد
لكن الشخص المناسب هوه الي يختارونه
يعني الي منك و ينفعلك

واعرف الناس الي مستوتلهم
لكن الحب للشخص المناسب

اذا تبا الصح فكر صح و ابني صح عشان تكمل دربك صح
لا تعلق بنت ناس في حب اخرته مرفوض

الشي بواقع مب بخيال يا عرب
اذا تبا تغير مش على اطراف موج
لا تمشي عكسه

والي يبينا عيت النفس تبغيه و الي نبيه عيا البخت لا يجيبه


هذا رد في بيت واحد

كل العرب تعرفه


مشكورين على مناقشكم
ومشكورين على تعقيبكم

لكن انتوا اسالتوا الفهم



مشكورين


واتمنى انكم ما تعمومون افكاري
لكن كل شي صحيح يحتمل الخطأ وكل شي خطا يحتمل ان يكون صوابن



مشكورين


اكتبي متغرب

[الغزال العنيد]

سلام عليك اكتبي

اسمحلي اخويه اقولك؟..
انته اللي فهمنتا غلط احنا ما قصدنا نغلط ولا حطينا افبالنا انك غلط عليهم

وبس اشوف تعقيبك اللحينه هو الغلط
وانتي يا الغزال بترضين تاخذين واحد بليا شور اهلج
أكيد لا ما شي وحده مينونه تأخذ واحد واهلها رافضينه

اذا ما توافق تفكير الاهل مع تفكير الولد صعبه يقضب اهله على زواج
لكن بالمحاوله كل شي يصير

شي حلو انه بيكون بحاوله مب غصبن ع أهله
بعدين الحب بيتم هو الحب بس اذا كان شي نصيب كل شي بيصير
سبحان الله الله كاتب النصيب
بس حتى لو ما خذهاا بس بيتم شي ابقلوبهم(الحب)
[ها الحب كان زمان اول يعني كان بين اجدادنا بس اللحينه الله يخليكم لو الواحد حب وحده وهي ما وافقت عليه
يلعن ابصيرهاا ويفضحهاا وما يخليها ابحالها ونفس الشي البنات لو الولد ما يه يأخذها شو اتسوي به بتأكله ابقشوره]

ما بتيبلي وحده متعوده تلبس فري و بناطلين وطلعات و سيرات
وبتقولي اهلك بيقتنعون فيها
و البدوي في وقتنا هذا معروف من سنعه ومنطوقه


يا الشيخ يا طويل العمر تراك يالس تغلط
لازم اتحاسب نفسك وانته تكتب

شو يعني محد الحشيم غير البدو والباجي امفاصيخ يدامك
اسمحلي اقولك غلطان غلطان غلطان


وبعدين احنا ما قلنا شي >>>> انته اللي فهمتنا غلط

اذا تبا الصح فكر صح و ابني صح عشان تكمل دربك صح
لا تعلق بنت ناس في حب اخرته مرفوض

يا الشيخ الحب ما يدل البدوي من الحضري

ترا مثل ما قلت>>>>ربك خلا قلبك ينبض الها


والسموحه منك يا الشيخ

الغزال العنيد

[عسولة]

مشكورين على المناقشه

[اكتبي متغرب]

اوكي انا بعقب عليج

انا ما قصدت انه الحضر فيهم شي
واعتقد قلت هالشي


بس كان ردي على مياس انه بدو محد و محد بدوي الحين

و اذا انتي قصدج الحب

الانسان يحاول

و يوم قلت شي قلتلج مثال على سبيل المجاز لا اكثر
لا غلط عليج و لا انه اقصدج انتي بالذات

اوكي مثل ما قلت انا
بس الانسان يوم يحب يفكر بعقله بعد
هل في هالحب انه يستمر للابد او لا

على عموم انا ما قصدت الحضر بشي
بس انا قلت على سبيل المجاز
واذا الاختلاف في منطقه وحده كيف على سبيل دوله
واذا انسان توافق مع انسانه واخر شي انرفضت من قبل اهله

بقولج شي اذا كان في حب في وقتنا هذا فهو نادر
والاول يوم انتي تطرينه
هذاك عيب يسمونه
ونحن نعرفه هالشي
الاول ما يعيبونه
والحين كل العرب تعيبه ليش
انا بقولج ليش
لانه اختلط مفهوم حب الحايه بحب الصادق
الحب اصبح غطاء لشهوات و افكار مالها اول ولا تالي

على عموم انا ما فرقت بين الحضر وبدو
لكن انتي فهمتي غلط
ولك مجتمع عادات و تقاليد
ولكل مجتمع افكار يرفضها و يتقبلها


ولج افكارج يا الغزال
لكن فكري في مجتمعج الي انتي فيه
خليج واقعيه اكثر

ما حد ما يتمنى يحب
ولا حد ما يتمني يعيش في حب
لكن صعبه حد يتقبله ليش اعيش في وهم وعذاب
الي فيها النصيب ربي كاتبنها لي بيبها لي

قلب يدق لكن العقل يقدر يوقفه
الانسان مب بس عواطف

اذا حبينا في يوم لازم نفكر امية خطوه جدام
عشان نقدر نكمل طريق الحب و نعيش بهنيه


كل شي في دنيا يمشي بالعقل و عمرها العواطف و الانحياز ما ودى دار
الانسان ياخذ شي ويبنيه صح من اساسه صح بتلاقينه قايم و العرب تشوفه
يوم الاساس عوي لو بتي تعدله في عمره ما يعتدل

والغصن الاخضر لين و اليابس تعدله ينكسر


لا يغرج المظهر يا الغزال العنيد خلي عينج على ساس

انتي وايد فهمتيني غلط يا الغزال
وصدقيني انا فكرتي تتماشا مع الواقع
تتماشا مع افكار مجتمعنا
انا مثل لو حبيت وحده
ماهمني احضريه و لا بدويه
لكن الي افكر فيه
هل منطوقها ومنطوق اهلها يناسبني ولا
يناسب مجتمع المحيط بي ولا
لاني اعرف كيف اقنع اهلي بها
لكن هل هيه بتقدر تعيش معايه ولا لا
مابي ايب شخص ويصبح منبوذ من مجتمع المحيط بي
ما بي اعذب بنت بحياتها
لو تحبني كم بتصبر
لابد اني افكر في كل نواحي و احسبها صح

ولا تحسبين للشي انه كل شي بيكون مقبول من قلب الاهل
احسبي الشي انه امية سبب للرفض
ولكل سبب لازم يكون عندك له حل
عشان تقدر تخلي الحب هذا واقع في حياتك طول العمر


على عموم فكري بعقل ولا تاخذج العواطف شوي
والافكار الخياليه

ادري بتقولين اغلط
لكن اسمحيلي

لا اني اقصدج بها الشي
ولا اني ابي اغلط عليج

الامثله الي طرحتهن على سبيل المجاز


مشكوره



اكتبي متغرب

[الجتبية]

بس حتى لو ما خذهاا بس بيتم شي ابقلوبهم(الحب)

القصد من كل هالكلام يا الغزال العنيد ان ليش نبدا علاقه مصيرها تنتهي فالانسان يختار الشخص المناسب اللي يقدر يرتبط فيه مستقبلا ، وترا الحب اللي بيتم في القلوب عقب الفراااااااق مب حب هذااااااااااا عذاب

[مــــــيـــــاس]

اكتبي متغرب .... @60@

انته رقم واحد ومافيك حيله @70@

ولا تضايج ولاتعصب ولايحزنون @109@

خخخخخههههههههخخخخخخـ

انا مابرد للكلام اللي قلته في ردي الاول

بس بقولك حقائق (وانا انسان اللي في قلبي على لساني)

اولاً الحب شي طاهر وسامي وبالاخص حب الله عز وجل

وحب البشر للبشر مش محرم بس يكون حرام لو استغليت هذا الحب في اشياء محرمه يعني :-

طلعات

وسيرات

وييات


وشوف


وتليفونات ..


طبعاً بدون ملجه او(عقد قران )



هذا واحد

.
.

الشي الثاني

انا مابتكلم عن الحضرية ولا بحط عليها في شو تلبس والا في شو تتستر

.
.

لكن دامك قلت البدويه حشيمه

راح انبهك على شغله

ان في بدويات مش مربايات تربيه عدله يعني يلبسن اللي انته امعارض عليه

وكذالك في نفس الوقت يوجد حضريات يلبسن اللي انته راضي به

.
.

يعني يا عزيزي

في حضريات وسبعة انعام وفي ابدويات بعد وسبعة انعام

وفي ابدويات الله لا يراويك منكرهن وحضريات الله بعد لا يراويك منكرهن

.
.


ونحن نعرف مثل منته تعرف


البدوي عااااااااااااااااااااااااادي ياخذ حضريه


والحضري عادي ياخذ بدويه


.
.


وبعدين اشوف كل واحد هاليومين صالبلي انا ابدوي *a13* انا ابدوي *a13* ....

لايكون ساكنين في خيمه وكل يوم تغزون *a37* لكم قبيله وكل يوم مرتحلين في بلاد تتبعون المراعي @9@

.
.

يابوي ترا البدوي مامن ربى بوش وهوش وسوى عزبه وقال انا ابدوي @9@ @9@ @9@ @9@

ولا في نفس الوقت ساكن في فله *a14* ويسوق سيارة @79@ ويدرس @6@ والايشتغل في دائرة حكوميه @13@

يعني 24 ساعة فالمدينه

.
.

اكتبي متغرب ترا صح يدي ويدك واجدادنا كانوا بدوووووووو *a23*

لأنهم بالفعل كانوا ساكني فالباديه ويغزون ويرتحلون وكانوا بدائيين بمعنى الكلمه في حياتهم

( *a23* وحليلهم عانوا معاناه والحياة كانت قاسيه وياهم *a23* )

ولن انسى ان لهم عدات وتقاليد نفتخربها نحن الآن ونتمسك بها

ولكن

لا نستطيع ان نقول انت بدوي والا فلان بدوي فالوقت الحاضر

وخاصه عيال هذا الجيل @103@ @16@ @39@ @114@ @93@

لأنهم مش بدائيين في حياتهم

.
.

واتحدى اي شخص من عيال اليوم لو يستطيع ان يعيش حيات الباديه لمدة اسبوع فقط @109@ يعني ... يرعى ويحطب ويصيد ويغزو ويرتحل ويصبر على فقره ويتحمل اليوع يومين

والله مافي حد يقدر ... بعد هذا الترف والرخاء

والحمدلله على النعمه


.
.

نعم اخوي

قول انا من اصل بدوي ومازلت اتمسك بعادات البدواه مثل الكرم والجود والمراجل والحشيمه وغيرها

لأن في ناس من اصل بدو خلاص ماعادوا يتمسكون بهذه العادات

.
.

اكتب متغرب


تعرف انا اعرف شباب اشترولهم على طير من هالطيور التعبانه قوم بوالحلج وربعه @18@

وحاطولك يومين فالسيوح وردوا يرمسون عن الطيور والحباري .... واحلا شي سوالف اليرابيع (من حباري ليرابيع)

وقالوا والله نحن بدووووووووووووو

×××خهخهخهخهخهخهخهخهخه×××

استوو بدو خلال يومين


.
.
.

والله سالفة

.
.

المهم خلك تكت ايزي

ولاتشد على منطوقك

ترا البدوي معروف لومايقول على عمره ابدوي

وانت حشيم يا ولد لشرافي


.
.


الغزال العنيد


مرحبابج مره اخرى اختي


.
.

اخوكم سيف @73@ النعيمي بدوي مطور

.
.

[الجتبية]

هههههههههههههههههههههههههههههههههههههههههههههههههه ههههههههههههههههههههه

حلوة هاي بدوي مطور خلاص انا بدويه مطورة بعد خخخخخخخخخخخخخخخخخخخخخخخخخخخخخخخ وين ابا

اقول بس لا تحبون ولاشي شوووووو ها احس اني عايشه في جو مسلسل مكسيكي خخخخخخخخ

يالله برايكم

الجتبيه @73@ بدويه مطورة خخخ تلبس برقع استريج خخخخ

[اكتبي متغرب]

انا معاك يا خويه
وانا يوم قلت بدوي وحضري وغيره
مب قصدي انهم ما يتوافقون في كل شي
ولا قلت اني اعيب عليهم
وادري انه اصبوع يدي هب متساويه


في شين وفي الزين
لكن فكره بالعقل ياخويه
انه الي يرضوبه اهلي ارضابه انا ادوره
يعني تحبلك وحده وانت عارف انه اهلك بيرفضونها


على عموم بداوتنا بالمعاني الي فينا يا خويه
وانا اقولك انا نحن مب بدو لانا طورنا
لكن الي فينا من بداوه معانينا و طبايعنا واحترامنا للعرب
وهذا هيه بداوه
بداوه مب طير و لا ركض ارجاب ولا كلام شرات بعض الناس الي غصب يبون يستون بدو

لكن ياخويه الشي الي يناسبك دوره
و تحب الي عربك يرضوبه
وهذا الشي الي قصدته




مشكور


اكتبي متغرب

[الغزال العنيد]

أكتبي مغترب

اسمحلي اخويه>>>> ادري وايد اتفلسفت عليك

أنا وياك في كل كلمه قلتها بس حبيت اعلق على هاي الجمله


ما حد ما يتمنى يحب
ولا حد ما يتمني يعيش في حب
لكن صعبه حد يتقبله ليش اعيش في وهم وعذاب
الي فيها النصيب ربي كاتبنها لي بيبها لي
المشكله الانسان ما يقول للحب تعال ابغي احب
سبحان الله الحب روحه ينولد فالانسان...

ولا امنو الغبي يبا يتعذب ابحياتيه ويحب....ترا الحب روحه ايك...صح ولا لاء


أخويه مياس
صح السانك يا الشيخ

ان في بدويات مش مربايات تربيه عدله يعني يلبسن اللي انته امعارض عليه

وكذالك في نفس الوقت يوجد حضريات يلبسن اللي انته راضي به

أنا عن نفسي امرابعه البداو الحضريات والله شي منهن الشي وشي منهن الزين شي في الطرفين

ومثل ما قال اكتبي اصابع ايدنا مب كلهن متساويات

أختي الجتبيه

القصد من كل هالكلام يا الغزال العنيد ان ليش نبدا علاقه مصيرها تنتهي فالانسان يختار الشخص المناسب اللي يقدر يرتبط فيه مستقبلا ، وترا الحب اللي بيتم في القلوب عقب الفراااااااق مب حب هذااااااااااا عذاب

ترا مثل ما قلت الحب روحه ينولد فينا يعني يكون من عند الله ( بس طبعن ما يعدي حب الله ورسوله)


والسموحه منكم

[مــــــيـــــاس]

الجتبيه ... المطوره

خخخخخخخ

ليش انتووووووو كنتوووووووو هب مطورين

خخخخخخخخ

يا سلام اطورنا قبلكم

.
.

المتغرب

فديت روحك انت تفهمني
وانا افهمك بعد ...


.
.

الغزال

تسلمين ... ولاتتفلسفين على المتغرب خخخخخخ


.
.

تعرفون اخواني هاي فائدة المنتديات .. اتعلم واتثقف
والحمدلله
نحن قاعدين نتبادل الآراء
ومهما اختلفنا ... سنخرج بفائده ..


.
.

تحياتي لكم

.
.

[الطـرف الذبوحـي]

.............................

[اكتبي متغرب]

مشكوره على تعليقج يا طرف

لكن يا طرف بقولج بيت واحد


الي يبينا عيت النفس تبغيه والي نبيه عيا البخت لا يجيبه

وهذا ردي على كلامج العذب

واسلوبج الروعه
صدقيني قلب ما يعرف الا الي يحبه
بس لابد تفكر الي الي تحبه
هل انه يقدر يكلمل معاك ولا

وتعذبنا كثير و انجرحنا كثير وجرح القلب صعب يلتم


مشكوره على منطوقج السنع
لي متى بنتم نتبع القلب و نربع وراه

لي متى تعشق انسان ما بيكون من نصيبك

لي متى بنبقى نروح ورى عواطفنا والواقع يصدمنا

ماقول شي ما يصير

بس يوم ظروف تحكم علينا ماشي بيدينا


يلا على عموم مشكوره على كلامج الي يشرح البال


مشكوره



اكتبي متغرب

[مــــــيـــــاس]

ههههههههههههههههههههههه

الكتبي المتغرب

ياويلي على الحب

.
.

ياخطير طلعت تحب ونحن ماندري

آهااااااااااااااااااااااااااااا

صدناك

تعالووووووووووووووووووووووووااااااااااا

المتغرب يحب المتغرب يحب

.
.

خخخخخخخخخخخخخخخخخخخخخخ

فضوحي

.
.

الي يجيبه عيا النفس تبغيه والي نبيه عيت البخت لايبينا

عععععععععععخخخخخخخخخخخخخخههههههههههههه

[الطـرف الذبوحـي]

......................

[مــــــيـــــاس]

انت قاصد اسم على مسمى

ولا

قاصد جداهم حافي حلوين المشم

هههههههههههه

.
.


الله يهديك

أنزين علق اشويه عن الموضوع

قولنا شو رايك فالحب.... !!!


.
.


والله تعرف أسمك عاجبني


قاصد

.
.

المهم والاهم أنا بروح ألحين


وأتمنى من كل شخص يبغي يشارك في اي موضوع مش هذا الموضوع فقط

أن تكون مشاركتة


في حدود الموضوع المسموحه


وعدم التدخل في الأمور الجانبيه


وإذا كان الفضول زايد شوي

أتمنى المنقاشات الفضوليه تكون على الخاص


مع احترامي للجميع


ما نريد أي موضوع إذا خرج عن سياقه يتمحور لمشكله


.
.


والخروج من الموضوع في سبيل الدعابه مرغوب نوعاً ما أم المقصود والمتعمد لن نرضاه نحن كأعضاء ...

.
.


وتحياتي.
.

[الطـرف الذبوحـي]

................................

[بيرلا]

ممكن أعلق تعليق بسيط واللي هو

الحب مـــايعترف بالحواجز ولا غيره
اللي يحب يكـــافح من أجل الطرف الثـــاني
لكن إذا حس بانقطــاع الأمل يتراجــع قبل لا ياكله العذاب

هذا واحد

ثنين ... مب معناته انرفضت تفقد الأمل ،، الدنيــا ماتوقف عند شخص واحد
بيدور فخواطركم يعني ندور ع حب ثــاني؟!

خواني ،،، شو اتدورون ما اتدورون!!!
جيه الحب ف الشـــارع واتدورون عنه؟

يعني بالذمة الحين كيف تسمونه حب وهوه أســـاسه غلط؟!

زين وين أيـــام اللولييين يوم امّه ولا اخته تخطب له وتقوله فلانه مشاء الله عليها فنانه وماعليها قصور ،،، والشــاب من خلال وصف ومدح امه للبنت بينعجب بهــا وبيوافق عليهـــا

مب أيــامنا الحين البنت والولد بطروا تبون الصراحه ،، انا مابـــاخذ الا اللي أنا اختارها ،، لا ومرات يقولون نبا نشوفهـــا ،، شوفها بس عقب ما تكون حلال عليك مب قبل وعقب يوم ماتعيبك تفج الملجة!

البنت والولد قــاموا يتبعون الطريج الغلط صوب الحب ،، وفي حـــال حدث اللي يبونه ،،، كيف تعرفون أنه صادق؟! ...... لا تعليق ....... بينعرف الصـــادق والطاهر من الجذب او خل نقول وهم وسراب

مثال
واحد مشاء الله عليه ميمّع كل ساعه يتعرف ع وحدة هيه والله هاي يعيبني فيها جذه وجذه ،،، مممم يمكن هيه المنــاسبة لي ... وعقب مدة من الزمن لا والله القفل ما ناسب المفتاح (الشيخ يستخدم آلية القفل والمفتاح) بدور على غيرهـــا .. وإيزي هالايـــام بيحصل غيرهـــا وبيبدأ الفلم الهندي عنده لين مـــا يوهم عمره وهكذا يستمر شريطه الرومنسي .... ويعذب عمره وكل مرة يتحجج ويطلع فيها عله وعله ويعذبهن وياه ..... بالله عليكم هذا تسمونه حب الحين؟؟؟ ولا لعب!!

أنـــا أعرف انه معظم الشباب والبنات هالايـــام نفس الموال والسبب الرئيسي هوه
مـــاشي وازع ديني ... الرضـــا بقلب يسكنه أشخـــاص مب شخص (شو خلى لحرمته المسكينه وكل من هبت ودبت دشت قلبه) .. والسبب الآخر هوعدم فهم مصداقية الحب سواء كــانت عن طريق الأهل أو غيره .. الحب يبقى حب مب لعبـــة يلعبون به !! عجيب والله

عمومـــــا ... انتو تطرقتوا لموضوع البدو والحضر وهل عادي التناسب بينهم ...

هالأيــــام كل شي عــــادي .... لأنه اضمحلت العادات والتقاليد والله البنت لبن عمها غصبن عنهـــا ...
الحين شي اسمه الشاب من دينه وصفاته واخلاقه لا نسب ولا مـــال ولا غيره كله مايهم
والدليل .... في من بنـــاتنا خذن أردنيين ومصريين وسوريين وعــــادي ... ( عاد مدري بشور اهلهن ولا ... مـــايخصني لوووووووول)

:)

بدوي يـــاخذ حضرية ولا العكس كله نفس الشي ... مـــايخالف

والسموحه ع الجريدة

;
بيرلا

[اكتبي متغرب]

مرحبا يا خويه قاصد

مشكور على رمسك العذبه

لكن بغيت اقولك لا ني بعنز تنقاد
ولا اني اتبع العرب يكون في علمك يا خوي
الانسان له كرامه ولا له داعي هالرمسه
ثاني شي لا ني هب صيده عشان اكون صيده يديه و لا جديمه

جانك عرفت الحر بتعرفني
لي عرفت البدوان بتعرفني

يها يا قاصد
ما عزيتني عنها هالرمسه
وقمت ترمس بشرق و غرب
وتفر الرمسه ما ثمنها

احب اقولك شي واحد

ما له داعي يا خويه هالرمسه كلها
لا تنغز فلان ولا علانه
اول شي طرف ان رمست ترمس لعمرها
وان تكلمت باسلوبها هذا اسلوبها
ما اقولك مب عذب ولا رقص
لكن هذا اسلوبها
وكلن باسلوبه يا خويه
مثل ما انا اقرض و ارمس و احط
في ناس تسولف و تحب تكون سوالفها رومنسيه

اما عن طرف
تراني ماشفت منها غير كل خير
ما كد انطقت بشي
كنت من فتره في منتدى
وغبت ورديت
وهيه اسلوبها ويا الجميع نفس الشي
خلك واقعي يا خويه
طرف لو تخصني انا
حان ما كتبت في منتدى قبل لا ادش

ولا يدش غيري

على عموم هذا سوء الفهم يا خويه ما له داعي
واذا في شي بينك وبيتها تراه بينك وبينها

ولا له داعي يظهر في منتدى
ارجو انه يكون خالي منتدى من هالسوالف الي مالها داعي


اعرف انه الذيب في عمره ما ينصاد

يلا ما بغي اطول سالفه
ومشكور مره ثانيه على هالكلام
لكن من طلب القهوه يته الدله



حبيت استسمح من طرف الذبوحي
السموحه على كلام الي انقال
ولا في شي يستاهل انه ينقال
يمكن قاصد ما كان يقصد
او كان يشجع العين ومعصب على خسارة الدوري
ولا يمكن يشجع الوحده وفرحان وايد وانحرف


مشكوره على اسلوبج العذب
الي تبينه سويه

يوم بينكرون عليج الربع شي ترى مشرفين موجودين
بيكون لهم تفاهم وياج او ويا اي شخص في منتدى


مشكورين


اكتبي متغرب

[عسولة]

تم حذف رد قاصد
جابو على قد السؤال

ومشكور مياس
اكتبي متغرب
الطرف الذبوحي
بيرلا
على المناقشه

[قاصد]

مرحبا اسمحلي اكتبي متغرب فديت رووووحك أنا ماعنيتك في شي

محشوووووووم وبعيد عن خشمك هالظوايا .....

عسولة احذفي مثل ماتبين ما أعتقد قلت شي ...

وإذا على الطرف الذبوحي هيه يابت الرمسه لعمرها ...

وتدري بهالشي بس حركات

[عراقيه وبكل فخر]

عسوله يمكن هالسؤال المفروض يردون عليه الشباب بس مب مشكله احنا نشارك بعد

طبعا الحب مب شي عيب ولا حرام بس بشرط يكون طاهر وعفيف وبطريق الصحيح واذ حبها وحبتها قبل الازواج يمكن يكونون اسعد ما هو بعد الازواج على الاقل يكونون متفاهمين ويحبون بعض مب ماخذها غصب او ماخذته غصب ومشكوره اختي على الموظوع

[عسولة]

مشكووره عراقيه وافتخر على المشاركه

ولا تحرمينا من ردودج :)

[عذووب]

الله يعطيكم العافية ..

[shy6oona]

مرحبــــــــا

الصراحه الموظووع حلوو وقريت رد الشباب و البنوتات وعيبتني ردودكم >> اكتبي متغرب..الغزال العنيد..عسوله ..مياس ..

جني داخله برنامج الاتجاه المعاكس خخخخخخخخخخخخخخخخخخخخخخخخخخخخخخخخخ على منتدى الكتبي ..

ههههههه

انا راي من رايكم .. الحب مب عيب ولا حرام ..

بس على حسب كل واحد وكيف فاهم الحب ..

يعني مب تقوول وحده احبه ويحبني وترمسه عالتلفون ..ومادري شو >> إذا يحبج كيف يرضى يرمسج ويطلع وياج !!ليش هو يرضى على خواته هالشي !! اكييد لا ..وهي مصدقه يحبني و يحبني !!

ومثل ماقال اخوي اجتبي متغرب :
الحب شي كبير
اكبر عن تصورنا الشخص
الحب له قداسته
له منطوقه
له حياته

محد فهالدنيا مايبا يحب ..
بس على حسب الريال إذا كان ماخذ السالفه جد من البدايه ولا كن بس يبى يتسلى ..

والسمووووحه