المساعد الشخصي الرقمي

مشاهدة النسخة كاملة : (.. أحبج يا ريما..) قصة من تاليف الحلم الوردي


الحـلم الوردي
05-10-2004, 09:16 AM
السلام عليكم ورحمة الله وبركاته



اخواني اعضاء المنتدى ,, حبيت اشارك معاكم بثاني قصه اكتبها ,, ولكن اول قصها اكتبها هنيه

والقصه بعدني ماخلصتها ,, يعني ان شا الله راح احطلكم كل جزء بين فتره وفتره



.....................

القصه راح تكون مختلفه شويه ,, يعني ابي اطلع عن النطاق المحلي وتكون غربيه ,, بس المفروض اكتب باللغه الفصحي ولكن للاسف مب متمكنه باللغه الفصحى بعدني ,, وعسب جيه استخدمت لغتنا المحليه:)



وان شااالله اشوفكم متفاعلين مع القصه ,, وعلى فكره كل جزء راح اطرح عليكم اسئله تجاوبني عليها@83@



......................
الحـلم الوردي
05-10-2004, 09:19 AM
أدور أحداث القصه على شخصيه أساسيه و الي هي شخصية ريما. ريما إنسانة طيبة و حساسة بشكل كبير, تحب الخير للكل. مواصفاتها: بيضا, عينها كبار وعسلية,,,,,, لها ابتسامه مميزه وحلوه, شعرها طويل وغليظ, لونه بني فاتح,يعني هي حلوه بصفاتها و باخلاقها.... ريما عايشه مع أفضل صديقه لها "ميمي" والسبب قصة طويلة, بس بشكل مختصر "اليزابيث", ام ريما, كانت من أغنياء المنطقة,,, وكانت وايد حلوه, وعلى فكره ريما تشبه امها ,,, المهم " مايكل" هو ابو ريما , خطط مع أخته جانيت انه يحب اليزابيث ويتزوجها عسب بيزاتها, والمسكينة حبته صدق, بس بعد ماتزوجته عذبها ورواها الويل خاصة بعد ماحولت أملاكها باسمه , بعد فتره يابت منه ريما, وبعد مايابتها ماتت على طول. تمت ريما عايشة في بيت أبوها عسب الوصية الي كتبتها اليزابيث, هي ان المولود اليديد يشل املاك أبوها يعني يد ريما , وهالشي كانت خاشتنه عن مايكل , لانها كانت خايفة في يوم يطردها من البيت ومابيتم عندها الا بيزات أبوها, ومذكور في الوصية ان الطفل او الطفله يحصل الورث يوم يبلغ عمر 16 سنه, واذا مات هالطفل قبل ال16 سنه, تتحول كل املاكه للفقراء والايتام!! بعد ما كملت ريما 16 سنه , حاولت عمتها جانيت انها تجتلها اكثر عن مره , و هالشي خلا ريما تشرد من بيتها ابوها , لانها ذاقت العذاب هناك. و من ذاك اليوم هي عايشه مع ربيعتها ميمي.....


بس هي مستغربه من شي واحد, ان في شخص يرسلها مبلغ من البيزات كل شهر!! منهو يا ترى؟! " ان شا الله راح نعرفه في الاجزاء القادمة".


الحينه راح اتكلم عن ميمي. ميمي انسانه طيبه وحبووبه ومرحة, اجتماعيه عكس ريما , فريما تحب تيلس روحها بين بين فتره وفتره تذكر أحزانها و ألامها. أما ميمي فهي دايما تحاول اطلع ريما من عزلتها, وتفرحها. أمنية ريما هي انها تلتقي بفارس أحلامها, ويحبها وايد و تعيش معاه أحلى عيشه, لكن ميمي فهي تكره سوالف الحب لانها تظن ان الحب كل لعب في لعب,,, خاصة الحب في هالايام!


الحينه ريما وميمي عمرهم 18 سنه و يدرسون اول سنه في الكليه, توها اجازة نص السنة باديه


.................................................. ...........


ميمي : ياااي وناسه أخيرا يت الاجازه


ريما: صدقج الحينه على الأقل بنرتاح ماشي بروجكتات ولا امتحانات


ميمي : مابغي هالثلاثين يوم يمرون بسرعة,,,و مممممم روووعه الاسبوع الياي بنروح عند يدتي ماري, كشخه صح هناك خاصة يوم انش الصبح ونروح صوب الجبال ونشوف الشمس و هي تشرق


ريما: حلو الجو هناك , يساعدني على القرايه


ميمي: افف ذكرتيني بالكليه, انتي دومج تحبين تقرين مره قصص ومره ادب, لكن انا احب اسمع موسيقى كلاسيكية و أكل كيك مممممم


ريما: هههههه يالدبه


ميمي: صدق وناسه , حتى طعم الكيك يكون الذ


ريما: زين انتي ماتخليني اكل معاج


ميمي: تبين!!؟؟؟


ريما باستهبال: اكيد مابقول لا


ترد عليها ميمي وهي محرجه: يعني انتي ناسية ان فيج ربو , وان الدكتور مانعنج تاكلين سويت عسب الكحه, كل مره تنسين!!


ريما: ههههههههههههههه زين نسيت , الواحد ماينسى شو


ميمي: شوفي انا جادة ماتمصخر


ريما: زين زين بلاج مره وحده انجلبتي عليه , من ساعه تسولفين


ميمي: مادري عنج!! تعرفين اني أخاف عليج, وانتي بالمره ماديرين بالج على نفسج


تبتسم ريما: لاتخافين عليه انا مافيني الا العافيه ان شا الله , بس كنت اتمخصر


ميمي: زين والحينه العصر مب الدكتور قالج كل يوم العصر شربيلج عصير برتقال؟ نسيتي صح؟


ريما: هههه هيه, الحينه بروح اشرب بس لاتحرجين


تبتسم ميمي : اوكيه





ريما وهي راده من المطبخ مقهوره





ريما: افففف ماحب عصير برتقال, حشى مب قلاص هاهالكبر جيك!!


ميمي: والله مشكتلج حبيبتي يوم ماتحبين عصير برتقال


ريما: ادريبج بالعمالة مسوتلي وايد


ميمي: هيه حق مصلحتج, يلا بسرعة جدامي,,, بشوف في كم دقيقة بتشربين العصير,, صبري بتم احسب من الساعه


ريما: تقهرييييييييين


ميمي: هههههههههه عادي ( و طلع لسانها)


شويه ولا يسمعون حد يزاقر عليهم من برع





----------: ريماااااا , ميميييييي


ميمي: منو هاي الي جيه أزاقر؟؟


ريما: مادري!


----------: ميميييي و ريمااااا


ميمي: ويييييه ,, الحينه عرفتها, هاي روز الهبله


ريما: هههههه


" روز ربيعة ميمي و ريما, تعرفوا عليها الكورس الي طاف. روز انسانه حبوبة و هبلة, كل اتم تتمصخر, ما تاخذ الامور بجد بالمره, و مب بس جيه, تكره الدراسة بشكل يعني لو نجحت على الحفة بعد وايد زين,, و ميمي كل اتحب تتمصخر معاها وتقفطها"


روز داشه وهي يالسه تغني: اليوم اول يوم إجازة وناسه صح؟


ميمي: بصراحه ما كنت اعرف , علبالي اليوم دوام


روز: افففف اسكتي عني , انتي كل اتقفطيني


ريما: ههههه و انتوا كل تضاربون


روز: ماعليج ميمي تغار مني


تبتسم ميمي : شقايل عرفتي ( وتغمز بعينها)


روز: اعرف نفسي حلوه ومميزه , الله انا بعد أبي عصير برتقال


ريما: تبينه؟ بعطيج اياه


ميمي: لا لا أنا بروح اييبلج , ما تصدق هاي, تتريا هالفرصه


روز: صدق انا لو بدالج بستانس كل يوم حد يسويلي عصير برتقال. تعرفين يخلي بشرتج أحلى


ميمي: ما شي فايدة منها هاي ماتفهم هالسوالف


ريما: اقول , مب جنكم قمتوا عليه مره وحده؟


ميمي: تستاهلين,,,, زين عيل بروح اييبلج العصير


روز: اوكيه


وتنش عنهم ميمي , وتروح المطبخ


روز : شو برنامجج ريما حق الاجازة؟


ريما: مممممم بصراحة مادري, بس الحينه ناوية أروح المكتبة العامة استعيرلي بعض الكتب


روز: وعععع , انتي ماتملين من القراية؟! ما يسدج الي يعطونا في الكلية؟!!!


ريما: لا ما امل, بالعكس احب القراية واايد,,, احب اتعلم


روز: ما يسدج الي نتعلمه في الكلية؟


ريما: لا,,, بعدين انتي ماشي فايدة منج , يعني لو يلست اقولج فوايد القراية ما بتفهمينها


روز: هيه صدقج , انتي الحينه شويه كلمتيني عن القراية , راسي عورني


ميمي و هي راده من المطبخ وفي يديها قلاص عصير برتقال: و انتي يا روز شو ناوية تسوين في هالاجازه؟ بعدج مصرة انج تدخلين النادي؟
الحـلم الوردي
05-10-2004, 09:21 AM
روز: لا لأنكم ما بتشتركون ويايه, وانا شو اسوي روحي هناك


ريما: بتتعرفين على حد هناك


روز: تعرفون انا قايلة كل يوم بروح الكافيه شوب, هناك بتم اتعرف


ريما: ليش هناك بالذات؟


روز: هناك شي كمبيوترات, يعني ادشين الجات و تتعرفين على ناس مختلفين من دول مختلفه


ميمي: شي ممل بمعنى الكلمة

روز: بالعكس وناسه و روعه


ريما: هههه انتي كل شي بتقولين عنه روعه و وناسه


روز: بس الجات غيير, تعرفين في بنات يتعرفون على شباب ومرات يحبون بعض و يتزوجون بعض


ميمي و هي متحمسه: حبيبتي الجات ما وراه الا المشاكل والخراب


روز: اففف انتي دومج تشوفين الحب من جانب سلبي


ميمي: على الاقل احسن من اني اكون مدمغة و ينقص عليه


طول هالفتره ريما تسمعهم باهتمام


روز: شوفي مب بس في الجات الناس يقصون عليج


ميمي: بس في الجات أكثر بوايد, لانج ترابعين ناس ماتعرفينهم ولا تشوفينهم, حتى عادي الولد يدش ويخلي عمره بنت او حتى العكس


روز: بس وايد ناس حبوا بعض من الجات


ميمي: والله هالناس متخبلين و ماعندهم سالفة


تنش روز من مكانها واتم حاضنه المخده ومغمضه عينها


روز: يااااي يمكن التقي بفارس أحلامي


ميمي: مالت عليج, بسج أحلام يقظة, ما بتلقين من الجات الا المشاكل و عوار راس


روز: ما عندي سالفة ارمسج, شورايج ريما؟


ريما: بصراحة انا ماعرف عن الجات, بس احس راي ميمي أصح


روز: ما عليج منها ميمي وايد تبالغ, بعدين وايدين دشوا الجات ماستوت لهم مشاكل, الا الي يبون المشاكل, يعني الناس الي يصدقون كل الي ينقال لهم, و يثقون في كل حد


ريما: ------------------------------


ميمي: شوفي تسولفين و تتمصخرين هيه , بس حب ما حب ما شي


ريما: انتي اصلا رافضة فكرة الحب مب بس في الجات, في كل شي


روز: صدقج, ما تخيل في يوم من الايام تحبين حد!؟


ميمي: لا امي بعيد عن هالسوالف


روز: يعني محد فيكم بيي ويايه؟


ميمي: شو نسوي, انتي دايما تروحين أماكن غريبة


روز: يعني بتم بروحي؟


ريما: لا تزعلين, مب انتي قايلة انج بتتعرفين على ناس هناك, يعني ما بتكونين روحج


روز: اوكيه برايه باجر بروح وبرد بروحي


ريما: زين عيل انا بروح المكتبه الحينه


روز: تعرفين شي مكتبه في الكافيه بعد


ميمي: ههههههه لا تحاولين وياها مابتي وياج


روز وهي امبوزه: افففف ماحب اروح بروحي


ريما: زين لا تزعلين دامنه في مكتبه, بيي وياج


روز: يااااي وناسه, الحينه فرحت


ريما: ههههه وياويهج


ميمي: بس لادشين جات


ريما: هيه صح فكرة بعد بدش الجات


ميمي وهي معصبه : ريمااااا!!!


ريما: ههههههههه احبج يوم تحرجين, زين عيل بروح الحينه


ميمي: عن تنسين عمرج, وانتي تقرين الكتب, الساعه 8:30 موعد دواج لا تتاخرين


ريما: اوكي بحاول اني ايي من وقت, يلا باي


روز: باي


تطلع ريما عنهم


تبتسم ميمي: ادري انها بتنسى,,, و ادري اني بتصل وبذكرها


روز: ميمي,,, شوفيها ريما؟ كل اشوفها تاكل أدوية


تتنهد ميمي: هي نفسيتها وايد تعبانة,,, وايد عانت في بيت أبوها, و ما قامت تعتني بعمرها, فيها ربو وفيها فقر دم حاد, حتى الدكتور قالي لو هي تعتني بعمرها بتتحسن حالتها وايد


روز: الحينه عرفت يعني الأمراض الي فيها سببها عامل نفسي؟


ميمي: هيه عسب جيه , احاول اني افرحها


روز: ان شا الله بتتحسن أوضاعها


ميمي: أتمنى


روز: بقولج شي يمكن مابيعيبج


ميمي: شو؟


روز: تعرفين أحس لو حبت حد بتنسى كل أحزانها


ميمي: أدري بس إذا حبت حد صادق مب لعاب,,, و هالزمن ما تحصلين حد صادق, استوى الحب لعبة, نادر ما تحصلين حد يحب لانه صدق يحب


روز: أنا بصراحة مب فاهمة عليج, كيف يعني حد يحب لانه صدق يحب؟!!


ميمي : اووه صح نسيت انتي الفلسفة ماتنفع وياج ( و اطلع لسانها)


روز: هاهاهاااي ماتنكتين


ميمي : ههههه شورايج تساعديني ابي اسوي بيتزا


روز: ما بقول لا , يلا بنبدا


و راحوا يسوون العشا
البدوي الحبوب
05-10-2004, 10:55 PM
الحلم الوردي

في البدايه انرحب فيج في منتدى الكتبي ونتمنى انه اتفيدين وتستفيدين من تواجدج معانا

ونشكرج كل الشكر على اختيار منتدى الكتبي مكان لنقل مشاركاتك فيه

ونحن في انتظارج ونتمنى منج التواصل :)
الغلا
05-10-2004, 11:25 PM
اختي الفاضله الحلم الوردي

تسلمين على هاي القصه والابداع الجميل منج ...
بصراحه بدايه موفقه .. والى الامام

طبعا بانتظار الاجزاء القادمه ...

اختج
الغلا
الحـلم الوردي
06-10-2004, 09:27 AM
البدوي الحبوب



الغلا



تسلمووون على ردودكم المشجعه لي:),, وان شا الله راح يزيد التفاعل مع القصه

ودام التواصل



...............

تقبل تحيتي

الحلم الوردي
البدوي الحبوب
07-10-2004, 01:06 AM
مرحبا والله .. ونحن في انتظارج .. الى الامام والله ايوفقج
دلوعة أمها
28-10-2004, 11:57 PM
مشكوووره على القصه الروعه
بس مو جنج طولتي
وين البقيه ؟؟؟
أختج : دلوعة أمها
كل الحب
29-10-2004, 01:06 PM
الحلم الوردي


القصة بالفعل حلوه


وبانتظار الأجزاءء الباقيية


لج مني كل الشكر



اختج


كل الحب
الحـلم الوردي
13-11-2004, 10:08 AM
السموحه على التاخير

وكاني احطلكم الجزء الثاني وان شا الله يعجبكم
الحـلم الوردي
13-11-2004, 10:10 AM
الجزء الثاني








في المكتبة العامة, ريما يالسه تفكر في كلام روز,, وتمت تذكر رمستها يوم قالت انها يمكن تلتقي بفارس أحلامها, وتقول في في خاطرها " انا بعد خاطري التقي بفارس احلامي " فجاه تبتسم ريما ويقفط ويهها,,, وتكمل " بس ميمي تقول ان الجات ما وراه الا المشاكل ,, وانا بصراحه اخاف تصيرلي مشاكل,, بس انا صدق ابي التقي بفارس أحلامي و احبه ويحبني و نعيش مع بعض حياه سعيده,, ممممممممم ميمي تكبر المواضيع شويه, وبعدين هي ماتعرف الجات عدل كيف تحكم عليه؟! او يمكن سمعت من حد مايداني الجات رامس عنه,, مممم اول شي بشوف روز كيف ترمس في الجات, اذا شفت ان صدق مصخرة مابدش".





فجأة يرن تلفون ريما , ويقطع حبل أفكارها,, فتطلع من المكتبه وترد على التلفون





ريما: الو بلاج خرعتيني


ميمي: ساعة 8 الا ربع لين توصلين نص ساعه,, يلا تعالي نسيتي موعد الدوا؟


تبتسم ريما: اوكيه الحينه يايه


ميمي: اترياج, مسويين بيتزا


ريما: اوكي, باي


ميمي: باي


.................................................





الساعة 12:30 فليل, ميمي يالسه اطالع فيلم رعب,, وريما يالسه عدالها بس في عالم ثاني ,, يالسه تقرا كتاب عن الادب الفرنسي,, " تراها تحب الفلسفه"





ميمي: صدق انج متفيجه , حد يودر هالفلم الغاوي, وييلس يقرا كتاب عن الفلسفه و الخرابيط!!


ريما: هههههه هيه أنا


ميمي: صدق شوفي الفلم قصته وايد حلوه


ريما: تعرفيني ماحب اشوف افلام وايد , خاصة افلام رعب,, وبعدين في فلم قلتي انه قصته مب حلوه!!


ميمي: اوف منج, انتي انسانه غريبه,, ماحس ان في حد شراتج,, انا و روز الي مانتفق على شي , فيه اشيا متشابه من بينا


ريما: امبلا في حد شراتي,, انا شرات امي





لحظاات صمت مرت ,, وميمي مب عارفه شو تقول, حست ان ريما فيها صيحه بس ميودتها,,, و ريما منزله راسها و مبتسمه ويالسه تقرا الكتاب





ميمي: كيف عرفتي انج شرات امج في هالشي؟


ريما: جين, كانت كل يوم تقولي اشياء عن امي


ميمي: منو هاي جين؟


ريما: جين هي نفس المربية الي كانت مسؤؤلة عن امي, عاشت مع امي فترة طويلة, وكانت حسبة امها, وبعد ما توفت امي, كانت هي الي تجابلني


ميمي: وينها هي الحينه؟


ريما وهي خلاص مب قادرة ترمس: ماعرف,, طردها ابويه يوم كان عمري 10 سنوات





وتموا فتره ساكتين





ريما: زين عيل, بروح ارقد


ميمي: يلسي ويايه, ماحب ايلس بروحي


ريما: سوري بس شويه مصدعة, بروح أرتاح


ميمي: اوكيه





تنش ريما بسرعة , وتروح حجرتها,, وتمت ميمي تفكر في ريما,, فهي تعرف ان ريما مب رايحه ترقد, رايحه تسترجع شريط ذكرياتها الحزينه , واتم اتصيح








" مايكل: بصراحة نحن الحينه مب محتاجيلج,, وانا مابيج تشتغلين عندنا


جانيت: يلا روحي شلي اغراضج واطلعي من البيت بأقرب وقت, مابي اشوف ويهج النحس





جين واقفه وميودها عمرها ماتبي تصيح, وريما هلكانه من الصياح, يالسه عند ريل ابوها تترجاه


ريما: ابويه ,, الله يخليكم خلوها هنيه , انا ابيها, ماعندي غيرها, خذ مني الي تبغيه, بس خل جين عندي


جانيت وهي تصارخ: هاي ما وراها الا الخساير, لازم اناكلها و انشربها, تراها مب عايشه ببلاش


ريما: برايه , انا ما باكل شي , عطوها حصتي, انا راضيه





هنيه جين ما قدرت تيود عمرها فصاحت,, لكن جانيت تقوم تمط شعر ريما بالقو وتصارخ: تتحرين ان نحن معيشينج في البيت لان نحبج!!؟ نحن صابرين عليج عسب وصية هذيج الحقيرة,,, ( وتفرها على الارض)


جين وقلبها متقطع: زين منو بيشتغل؟


مايكل: لا تحاتين, ريما بتشتغل, بتنش من الصبح وبتسوي كل الاشغال


جين: بس هي بعدها صغيره


جانيت: انتي مايخصج,, بعدين هاي مب ياهل ,, هاي عفريته رصيدها في البنك 4 ميلايين, مب هينه


جين وهي تصيح: خلاص انا بروح الحينه


مايكل: روحي فراقج عيد





تنش ريما بسرعه , واتم اصارخ وتصيح: لالا جين لاتروحين عني وتخليني بروحي,, لاتروحين,, الله يخليج ,, انا ابييييييج."





ادمع عين ريما يوم اذكرت الموقف,, اذكرت كيف كانت حاسه بوحدة مخيفة. وتقول في خاطرها" خاطري اشوفج مره ثانية يا جين, خاطري,, بس اتمنى انج بخير" وتمت تصيح لين مارقدت. ( طبعا هاي مب اول مره, تقريبا استوت عندها عاده انها ترقد من الصياح!!)


.....................................





في اليوم الثاني الصبح, الساعه 9, حد متصل على تلفون ريما كم مره ,, وهي من التعب ماردت على اول مكالمتين, بس ثالث مره نشت وهي تعبااااانه, وردت على الاتصال





ريما: الو!!


-----: ------------------------------------


ريما: الووو!!!


-----: -----------------------------------


ريما: افففف ( واصك التلفون)





ريما حاسه بصداااع, مب قادره تفتح عينها , فتم تصارخ مره وحده : شو هالنااس يقهروون, ما يخلوني ارقد على راحتي, خل يتصلون بذبحهم". وتمت تجلب يمين ويسار تبي ترقد بس ماشي فايده ,, اخر شي قررت انها تنش. بعد مانشت وتغسلت, سمعت صوت التلفون يرن مره ثانيه, وقالت في بالها" لا يكون هالرقم الغريب؟!!, اففف ابي اعرف منو هالي يلعوزني". وتروح ترد على التفون





ريما: الو


-----: -----------------


ريما: الو, الو, الو , الو


----:-------------------


ريما: يا ترمسون أو بالمره لا تتصلون, بسكم ازعاج و صدعه ( واصك التلفون)





ادش عليها ميمي وهي مستغربه


ميمي: بلاج ازاعجين من الصبح؟!


ريما: تحيدين الرقم الغريب الي اييني من فتره؟


ميمي: هيه!!


ريما: ردوا أتصلوا اليوم, والله قاهريني خربوا عليه رقادي


ميمي: ليش مانودي الرقم عند الشرطه؟


ريما: ماشي فايده, لان مره سالت عن الرقم الي ظهرلي, طلع لي رقم مال شارع


ميمي: تعرفين فيني فضول, ابي اعرف منو هالي يتصل؟


ريما: حتى انا,, خاطري اجتلهم





( ياترى منو الي يتصل بريما بين فتره وفتره؟!! ان شا الله راح نعرف في الاجزاء اليايه)





ميمي: بلاج من الصبح صايره عدوانيه


ريما: شو اسوي من القهر


مره وحده ميمي تصارخ: اويييييييه الساعه 10 الا ربع,, يعني ماكلتي دواج مال الساعه 8 ونص,, ياربي كيف نسييت


ريما: ماعليج كلت الدوا


ميمي: صدق!!!!!!!!


ريما: هيه صدق


ميمي: لا جذابه


ريما: هيه والله كلت


ميمي: ماصدق ,, ماصدق!!
الحـلم الوردي
13-11-2004, 10:14 AM
ريما: امبلا كلته صدقيني,, اتصلتلي روز الساعه 8 ونص الا شويه, وذكرتني اني اكل الدوا





هنيه ميمي حست براحه





ميمي: اشوى انها اتصلت وذكرتج,, حليلها ماتوقعت انها جيه


ريما: روز طيبه وحبوبه, بس هي شويه هبله


ميمي باستنكار: شويه؟! انا بصراحه اشك انه شويه


ريما: هههههه وياويهج


ميمي: هههه يلا قومي سوي كوفي, وانا بسوي سندويشات لازم تاكلين شي بعد الدوا


ريما: ان شا الله عمتيه


ميمي: هههههههه


.................................................. .......





العصر روز يايه تركض عند ريما وميمي,,, وريما كالعاده يالسه تقرا , وميمي يالسه تخيط بدلتها


روز: ريما يلا بسرعه بنروح


ميمي: وين بتروحون؟!!


روز: بنروح انا وريما الكافيه , لايكون نسيتوا؟


ريما: اووبس سوري نسيت....... ( ومناك هي مب ناسيه , بس ماتحب تبين انها مهتمه)


ميمي: مابغيتي , جان ريما بتذكر


ريما: زين عطيني عشر دقايق, بروح البس وبيي


روز: زين بسرعه لان وايد ايون هناك , يمكن ما نحصل مكان


ريما: اوكيه


ميمي: انتي من صدقج بتروحين هالمكان؟


ريما: هيه, روز تقولي في مكتبه هناك


ميمي: بصراحه انا اشك في هالاماكن مخلين أماكن حق القرايه والمطالعه!؟


روز: هي في في, يلا ريما روحي تلبسي بسرعه


ريما: زين زين ,, ليش جيه مستعيله





وتروح حجرتها اتبدل





روز: مابتين ويانا؟


ميمي: لا انا مااروح لهالاماكن


روز باستهزاء: زين عيل يلسي روحج


ميمي: عادي





يرن تلفون ميمي





ميمي: هلا ماريو


ماريو: اهلين , انتي في البيت؟


ميمي: هيه,, ليش؟


ماريو: انا عند الباب


ميمي: زين تعال, اترياك داخل


ماريو: اوكي, باي


ميمي: باي





" ماريو, صدق ميمي من الطفوله, يحب ميمي وااايد بس لين الحينه ماعترفلها بحبه,, لانه دايما يسمع انتقاداتها عن الحب ,, فعسب جيه مايبي يخسر صداقتها,, اما ميمي فهي تحترم ماريو وايد وتعزه,, بس عمرها مافكرت انها تحبه أو هو يحبها"





روز: منو ياي؟


ميمي: ماريو, الحينه مابتم روحي ( واطلع لسانها)





يدش ماريو وفي يده علبة حلاوه





ماريو: هالحلاوه لج


ميمي: مشكوووور


يبتسم ماريو: العفو





تطلع ريما من حجرتها





روز: يلا بنروح


ريما: اوكيه ,,, باي ميمي ,, باي ماريو


روز: ميمي عطيني دواها عسب اعطيها لو تأخرنا ولاشي


ميمي: اوكي





( وتروح وتعطيها الدوا)





ميمي: لاتنسين تيبينه وياج


روز: اوكي, باي


ميمي: باي





( وتطلع ريما مع روز)





ماريو: جيه وين رايحين هم؟


ميمي: رايحين الكافيه شوب


ماريو وهو مستغرب: ليش!!؟


ميمي: تقول روز تبغي تقضي اجازتها على الجات , تتعرف على ناس


ماريو: وريما؟!


ميمي: اصلا ريما ما كانت تبي تروح,, بس لان روز ماتبي تروح بروحها, وهي قايله ان في الكافيه شوب في مكتبه عامه


ماريو: بصراحه ماظن ان في مكتبه هناك!!


ميمي: ولا انا


ماريو: بس يمكن الحينه شي مكتبات


ميمي: شورايك في هالمكان؟ مادري ليش احس انه مكان قذر


ماريو: لا بالعكس,, هو مكان عادي مافيه شي,, بس مرات الناس يستخدمونه بطريقه غلط, انا كنت اروح هناك يوم عندي بحث ولا بروجكت, ووايد ناس يروحون لأشيا علميه


ميمي: بس روز تبغي ادش الجات


ماريو: حتى الجات مافيه مشاكل, المشاكل تستوي يوم الواحد يعق عمره بين المشاكل ويصدق ناس مايعرفهم,, ,,,انتي لا تحاتينهم مابيصير الا الخير ان شا الله


ميمي: الحينه ارتحت


يبتسم ماريو: انتي مرات تكبرين الموضوع, واتمين تحاتين


ميمي: صدقك,, بس لاني اخاف عليهم وايد


ماريو: لاتخافين عليهمن, هم كبار الحينه و يعرفون مصلحتهم


ميمي: تعرف ,, مب قادره انسى الي استوى اليوم,, وايد قاعده الوم نفسي


ماريو: ليش شو صار؟


ميمي: نسيت موعد دوا ريما, ونشيت متاخره


ماريو: شو صار بعديين؟!!


ميمي: الحمدلله روز كانت مذكره, وعت ريما و قالتلها تاكل الدوا


ماريو: اشوى , الحمدلله ما صار شي,, جيه شو بيصيرلها لو ماكلت هالدوا


ميمي: ها اهم دوا,, لو ما كلته يمكن اييها انهيار ويغمى عليها


ماريو: ان شا الله مايصيرلها شي


ميمي: مادري كيف نسيت


ماريو: ميمي لاتسوين جيه بعمرج, مرات الواحد ينسى, بس مب معناته انه ارتكب جريمه


ميمي: صدقك ,,, بصراحه انا ملانه ابي اطلع


ماريو: شورايج نروح صوب الكرنيش؟


ميمي: يااااي ونااسه مابقول لا


ماريو: هههه زين يلا بنروح


ميمي: عطني دقيقتين, بروح ابدل و ايي


ماريو: اوكي


................................





في الكافيه شوب, روز يالسه على الكمبيوتر , داشه الجات, و ريما يالسه عدالها ماتدري شو السالفه





ريما: روز


روز: صبري شويه مشغوله


ريما: انتي من متى مشغوله!؟ شو تسوي؟ بعدين وين المكتبه الي تكلمتي عنها


روز: سوري, قصيت عليج كنت ابيج تين معايه


ريما: زين ييت وياج,, بس مخلتني بروحي ولابستني


روز: زين دشي سولفي مثلي


ريما: انا فاهمه شي اصلا!!؟


روز: قربي براويج,, شوفي ادشين هالصفحه و ترمسين عادي, بعدين تشوفين هالخط,, هنيه صفحتج الخاصه , هنيه بس يرمسونج انتي


ريما: والله سالفه,, تعرفتي على كم واحد؟


روز: تعرفت على اربع شباب


ريما: خيييبه اربع مره وحده


روز: هيه ها شويه


ريما: زين شو تقولون؟!


روز: انسولف,, انتم انقطع بعض,, خاصة هالي داش باسم bad boy حلوه سوالفه,,, خبله شراتي


ريما: بصراحه لاعت جبدي


روز: شوفي هالي اسمه King of Love اونه مودب و محترم,, يالسه اسبه و هو يقولي "عيب بنيه شراتج اتسب" ههههههههههههه


ريما: انتي هبله هههههه


روز: تبين تتعرفين عليه؟ بصراحه ها يصلحلج, ماعنده هالسوالف البايخه


ريما: وانتي كيف حكمتي عليه انه ماعنده سوالف بايخه


روز: شوفي, تخيلي واحد بنت بتسبه سب قوي,, شو بتكون ردة فعله؟


ريما: مادري


روز: تعرفين شي منهم خذوا السالفه بمصخره وردوا عليه , يعني هذيل اصلا جيه مال مصخره وسوالف,, وشي منهم حرجوا وردوا عليه بسبات اكبر, ها يعني هم مال عصابه لان سبهم بالمره مب لايق,, وشي منهم فضلوا السكوت, ها يعني انهم ناس محترمين وما يحبون يوصخون لسانهم عسب ناس مايستاهلون


ريما: مممممممم صح كلامج


روز: زين شورايج اعرفج عليه؟


ارتبكت ريما: لالا , ماعرف اصلا ادش هالصفحه واتم ارمسه


روز: زين شورايج اعطيه ايميلج وتتعرفون على بعض على المسنجر؟


ريما: لالا انا ماعرف هالسوالف, بتشوفيني ساكته ما ارمس


روز: ماعليج الرمسه بتطلع


ريما: لالا , انا بروح البيت احسنلي, اوكي باي





وتطلع ريما من الكافيه شوب,, كان الارتباك واضح عليها,, بس روز قررت انها تعرفهم على بعض





في غرفة المحادثة, روز داشه باسم Crazy Girl " صدق انها هبله ههههه"





Crazy Girl: اقول King ابي اقولك شي


King of Love: زين بس رجاءا بدون سب


Crazy Girl: هههههه اوكي,, ابي اعرفك على ربيعتي


King of Love: ليش!!!؟


Crazy Girl: لانها ماتعرف سوالف الجات, فقلت اعرفها على واحد طيب شراتك


King of Love: زين وينها هي؟ خلها ادش برمسها


Crazy Girl: هي يوم شافت صفحة الجات راسها دار, مافهمت شي


King of Love: هههههه اوكيه , عطيني ايميلها بضيفها عندي


Crazy Girl: اوكيه يود ------------@hotmail.com (------------@hotmail.com)


………………………………………….


( راح نشوف شو بيصير في الاجزاء اليايه
الحـلم الوردي
13-11-2004, 10:16 AM
شو السالفه؟
ابي اعرف ليش تظهر مسافات بين الرمسه
...........

وسوالي عن هالجزء شو تتوقعون راح يصير عقب
البدوي الحبوب
15-11-2004, 02:28 PM
تسلم يمناج اختي وكل عام وانتي بخير ومبروك عليج العيد
الحـلم الوردي
15-11-2004, 08:42 PM
البدوي الحبوب



تسلم اخويه على ردك والمتابعه... بس مارديت على السوال



........

الحلم الوردي
البدوي الحبوب
04-12-2004, 05:52 PM
الحلم الوردي

طولتي اختي ونحن في انتظارج ... عسى المانع خير

ربي ايحفظج
الغلا
04-12-2004, 09:50 PM
اختي الغاليه ...

فعلا انحن في انتظارج؟؟؟ عسى ان يكون المانع خير....

طمنينا ...


اختك
الغلا
الحـلم الوردي
13-12-2004, 11:26 AM
ابد ماكان في مانع اني ادش واحط القصه الا من التفاعل الي حصلته من القصه
الظاهر القصه مالها شعبيه

مب مشكله
والسموحه
الغلا
08-01-2005, 11:13 PM
الغاليه ابد ما اتوقعت منج هالرد ,...

يعني انا ما اكفيج اني امتابعه القصه ... :(

بصارحه اترياج بفااارغ الصبر .....

ان شاء الله خير

اختج
الغلا
دلوعة بوظبي
18-02-2005, 02:29 AM
تسلمين على البارت @126@




ونترياج لا تبطين علينا




وخليج واثقة من عمرج



القصة حلوة



بس سوري ما رديت عليج



ولا مرة بس كنت اقراها


وبقولج شو اتوقع يستوي




اول شي ريما بتتعرف على King of Love

واللي يتصل في ريما اتوقع جين
@54@


ماريو بيعترف بحبه لميمي وميمي لانها اتعزه بتحس عمرها اتبادله نفس

الشعور وبس


@54@
الصراحة هذي توقعاتي للقصة


وياله نترياج
@101@

نزلينا البارت اليديد
@92@
@96@


والسموحة منج