مافادني عذرك!!

[أنا]

بدايه،،

ربما تكون هذه اول قصه اكتبها بالعاميه والتي اتمنى ان تنال رضى القراء
اعتبرها تجربه ولكل شي أول مره!!



نبذه قصيره حول القصه..

هي قصه اجتماعيه قريبه من الواقع تعتمد على عامل الحظ في الحياه
وحين يكتب القدر أن تدوره دائرة الدنيا للسنين..
أما وقائعها فهي تدور بين شاب وفتاة من بلدين مختلفين تجمع بينهما الصدف
وتقع الاحداث مع الايام بينهما بين الحلو و المر..


أبطال القصه:

أحمد شاب من الكويت
شما فتاه شابه من الامارات

عبدالله .. شيخه.. أم عبدالله وموزه صديقة شما

ضيوف الحلقات..
يوسف.. حصه وآخرين


.................................................. .........................


مافادني عذرك!!....



الجزء الاول،،


المنبه يصيح وفجأه اتيه ضربه قويه تسكته .. شوي ويرن التلفون
شما(وبصوت انسان بسابع نومه ): ممممم ....................
مواز: بسج رقاد .. شو هالبرود الي فيج النتايج اليوم بتظهر
شما: ويعني شو اسوي انا.. اقولج خليني ارقد ونتايجي حلال عليج
مواز: الرمسه ضايعه وياج في امان الله

تسكر مواز التلفون وترجع شما للرقاد.. مب هاين عليها تقطع الحلم.. تدخل عليها امها فجأه..

أم عبدالله: شمامي نشي فديتج شو هالرقاد حشى مب كسل .. نشي يا بنتي اباج توصليني الدختر
شما: شكلكم اليوم مب ناوين تخلوني ارقد .. ماصدقت افتكيت من الامتحان و الدراسه... انشاءالله هاااا نشيت
أم عبدالله: يالله بارك الله فيج البسي بسرعه ووصليني .. تدرينبهم اذا تحيرنا شوي قالولنا خذو موعد ثاني...
شما: انشاءالله امايه من العين عشر دقايق واكون عندج تحت

تنش شما تتغسل وتلبس ع السريع.. وتنزل تحت طبعا الوالده وشويخ يالسات يتريقن .. تاخذ شما كوب الحليب من جدام شويخ بدو اذن
شما: سمحيلي شواخي بس مستعيله وتدرين لين اقولج ممكن اخذ كوب الحليب من جدامج ولا موعد الوالده طاف.. وانتي امايه يالله انا سايره اسخن السياره واترياج .. لا تبطين

شويخ: ليش ياربي مارزقتني باخت شرات الاوادم.. انتي شو بشر ولا شو بالضبط .. عنبوه لسان مطوله ولا بفالحه افشي
شما: هييه هييه انتي ترمسين منو حضرتج.. اقول سيري اقريلج كلمتين ابركلح قوم بو مدارس وبعد يرمسون
شويخ: ع الاقل الحمدالله قوم بومدارس يفتحون الكتاب ويقرونه للامتحان مب يلسون ينحتون في هالبراشيم...!!!
شما: ومنو قالج اسمونها براشيم هاي.. هاي اصلا استرجاع للمعلومات بطريقه سريعه

وتمسك شما ايد امها وتستعيلها قبل لا اختها تفضحها بسوالفها... ويسيرون المستشفى وهناك ... شما تطلب من امها بطاقتها الصحيه وورقة الموعد... وتعطيها للموظف عشان يظهر ملفها..
الموظف: اختي ممكن البطاقه وورقة الموعد
شما: انشاءالله اخوي انشاءالله
تاخذ الورقه وتعطيه.. يطالعها الموظف بنظره استغراب
ويقولها: بس هاي بطاقة حرمه عوده !!
شما(بعصبيه): اخوي موعد الوالده..ولا بعد تبا تشوف ويهاا عشان تتاكد
الموظف: خير اختي بلاج كلتينا آسفين انزين اسمحلينا

لفت شما على امها وقالتلها يالله انسير غرفة الانتظار..........
وتمر ساعه لين ايهم الدور.. يرن موبايل شما..ترد ولا مواز تبلغها ان النتايج ظهرت ويوم درت انهم في المستشفى ماطاعت اتقول النتيجه.. هني شما حست ان نتيجتها مب مشرفه بالمره.. وبنفس اللحظه تزقر الممرضه باسم ام عبدالله ..ويدخلون عند الدكتوره..
الدكتوره: كيف حالك ماما انشاءالله الحين شوي احسن
أم عبدالله : شوفت عينج .. الريل بعدها متورمه عليه .. مب رايمه امشي عليها
الدكتوره: انزين ماما هذا دوى مافي يخف( pain ) .. هذا الم يعني
ام عبدالله: لا والله . كل ما اييه ويزيد عليه .. يالله بستر بس
الدكتوره: شوفي ماما انا الحين يكتب ورقه دوى سيم سيم .. ويسوي ورقه ثاني حق سكان اوكي ماما
أم عبدالله: ياحليلج يا دختوره.. الحين انا اقولج ماروم امشي عليها تقوليلي ورقه حق سكان.. شلي في السواقه.. انا يالله رمت ايي المستشفى بعد سكان وموتر... هااا عندج شمامي عطيها هي ام السكان
شما( وتضحك بصوت عالي): امااااااايه اتقلوج سكان يعني اشعه مب سكان موتر .. الله يهديج فشلتينا جدام الدكتوره
الدكتوره( وهي تطالع شما و امها): شو مشكل ..؟؟ شو فيه؟؟
شما( وتظهر فلسفتها: no thing
الدكتوره: ok

ويظهرهن من عند الدكتوره .. راجعات البيت.. وشما بعدها يالسه تحاتي النتيجه..واول ماتوصل تربع ع حجرتها وادق على مواز...
شما: هلا مواز ها بشري شو النتيجه
مواز: والله شو اقولج فتحي النت وشوفي بعينج نتيجتج
شما: اوووه يا مواز لا تطولينها عاد وخبريني
مواز: الله يسلمج فيييل في مساق التخصص ودي بلاس في الترجمه وسي ماينس في النظريات
شما: افااااااا.. حلفي .. الله يغربل هالجامعه .. ويغربل الي يسير لها.. والله حرام ما يستاهلون التعب الي نتعبه
مواز: بذمتج عاد اونج تعبتي في دراستج ؟؟ انتي حياتج كلها غش.. عمرج ما يودتي الكتاب وقريتيلج كلمتين
شما: والغش مب تعب يعني.. تدرين ان الي يبرشم يتعب اكثر من الي يذاكر.. انتو بس تقرون لكن نحن نقرى ونلخص ونكتب....الحين هزرج منو يتعب اكثرانا ولا انتو؟؟
مواز: انزين خلج ع تعبج هذا وبنشوف .. يوم بتحج البقر ع قرونها بتخرجين
شما: عادي سارن خمس سنوات وما باقي شي ع سنتين... وبعدين انتي ماتعرفين نظرية شمامي شو تقول؟
مواز : لا والله ماعرفت نوريني بنظرياتج يا ام النظريات..
شما: احم احم يقولج معظم العباقره كانو فاشلين دراسيا.. وهذا نبأ يبشر باني ساكون ضمن العباقره انشاءالله في المستقبل

مواز: هاهاهااااااااااااااااي حلفي انتي بس

بالفعل كانت شما برغم تعثرها في الدراسه الا انها كانت نبيهه وطموحه لدرجه كبيره .. كانت تحلم بانها اتكون شخصيه معروفه... افيوم من الايام.. ويمكن هالشي خلاها تستغل وقتها في ممارسة هوايتها المفضله وهي الغنا.. ولان اخوها عبدالله من النوع الشديد .. تضطر شما انها تترياه يظهر عشان تمسك المايكرفون ..وعارفه بيي يوم وبيتكنسل المايك الي عندها مثل ماتكنسل الي قبله بفضل ايد اخوها..
وفي يوم من الايام .. كانت يالسه ويا اختها شويخ يسقن الزرع ويسولفن عن فلانه وعلانه وبييت حصه بنت يرانهم من شافوها غيرن السالفه يدرونبها مشخلة معاريس ما يبات الخبر عندها ولازم يتحذرن منها .................

تقرب حصه من شما وشويخ.. وهن مسويات عمارهن ما يشوفنها ..
حصه: سلام عليكم .. والسلام لله
شما: هلا هلا حصيص عليج السلام شحالج الغاليه
حصه : طيبه .. ماشاءالله شو تسون .. ماحيدكن مهتمات في الزرع ولا هاي هوايه يديده؟؟
شويخ: شو نسوي فراغه تعرفين اجازه وما عندنا شي نسويه .. يعني نيلس في البيت ونقفل علينا الباب
حصه: ماقلت جي بس يعني استغربت...
شما : لا تستغربين ولا شي.. وصلي ع النبي علينا دامنا بصحه وعافيه نسوي شي فيه خير..

وتتلفت حصه يمين ويسار وتسال شويخ ..
حصه: الا اقول الغاليه شواخي.. ماشوف سياير عند البيت .. شو السالفه جي محد افبيتكم؟؟
شويخ (وتغمز لحصه): سياير ولا قصدج راعي الستيشن
حصه (وهي ويها محمر): الحين حد ياب طاريه.. انا قلت بيتكم ما حددت.. يالله برخصتكن انا سايره ...
شما: افا وين تو الناس ..ما صارلج خمس دقايق من يايه ولــ..........
شويخ (وتقطع على شما):ماعليه شمامي الظاهر حصيص مشغوله .. حياج ولا تقطعين عاده..
حصيص : لاانشاءالله وانا اروم اقطع

وتسير حصه .. وتكفخ شما أختها ع راسها
شما: شويخ صدق ويهج لوح.. طيرتي البنت.. والله فشله... عاد صح انها لوعه بس مب جي والله عيب عليج
شويخ: ماعليج منها لااااااه.. هاي يايه حق عبود مب حقنا.. ماتشوفينها بس عرفت انه مب هني جلبت ويها
شما: صدق والله.. وياليت بعد عبود عاطنها ويه الا لبسنها لبس الصوف في الصيف...
شويخ وهي تطالع شما: شمامي شو هالمثل بعد .. اول مره اسمعبه.. كيف يعني لبس الصوف في الصيف
شما: غبيه .. يعني في الصيف تحيدين عمرج تلبسين صوف.. اووف كم بفهم انااا.. معناه انه مووول مب عاطنها ويه ..عرفتي ولاااااااااا.. يا غبغب

وفي اللحظه يوصل عبدالله اخوهم يبركن السياره وينزل ياي صوبهن

عبدالله: سلام عليكم...
شويخ: هلا هلا عليك السلام و الرحمه هلا والله بعبودي
عبدالله يشد اذن شويخ: استحي ع ويهج شو هاي بعد عبودي شو شايفتني اصغر عيالج تقوليلي عبودي
شما: تستاهلين بعد من وراه نقول ماعليه مب جدامه
عبدالله: شو شو .. من ورايه .. ياسلام اونج عاد بتعدلينا .. هيييه انتو احترمو ولا بييكن اليرز ع رووسكن صدق ما تعطن ويه.
شويخ: بسم الله بلاك .. انسولف وياك عافاني الله .. الله يعين الحرمه الي بتاخذك.. مب وغاده عليك
عبدالله: لا الغاليه الوغاده عليكن بس الحرمه تدلل عاد
شما: هوب هووووووب عبود مب هين طلع .. ياويلي عليك ياخوي
شويخ:والله اموت من القهر لو خذته هاي ام الدويس
عبدالله: منو ام الدويس ؟؟ منو تطرين انتي
شما وتضيع السالفه: لاالاا ولاشي .. هاي شويخ تعرف بسوالفها دومها الا تخورط.. انزين اقولك تعال الخيمه نقهوي.. عشان اباك بسالفه
عبدالله: يالله انزين .. وهالمره عن التوقف عند الزرع و الباب مشرع جي .. ولا يويلكن مني
شويخ : انشاءالله (سير) عبدالله...

ويسرون رباعه للخيمه شويخ وعبدالله وشما.. طبعا عبدالله متجدمنهن وشما وشويخ يالسات يتغامزن ويتصاصرن..
شويخ: انتي يالخبله الحين من صدق ناويه تخبرينه انج تبين تشتغلين؟؟
شما: هي والله برمسه والي فيها فيها ..
شويخ: شموم.. صلي ع النبي والله مافينا ع الهزاب
شما: ماعليج انا قدها وقدوووود.. حسب الخطه الخماسيه لازم اقوله ونبط البرمه

عبدالله وبعد ما دخل الخيمه ويلس ..اطالعهن وقال: شو عندكن ؟؟ طول الوقت تتصاصرن من ورايه..
شما : ماشي ياخوي بس انت اتقهوى قبل ووخلاف بنخربك
شويخ: انا مب يالسه .. بوقف حق الشرده مافيه الصراحه ايي الضرب فيه اول شي
عبدالله: جي السالفه فيها ضرب بعد.. لا الظاهر شي جايد
شما: ماااااااعليك منها لاااااه.. اسمع بقولك.. بصراحه بصراااااااحه بصرااااااااااااااحه
عبدالله: انزين قولي .......شو عقب الصراحه... بلاج تبلعمتي
شما: آآآآآآ آآآآ آآآآآ بصراااااااااااااااااحه.......... نباك تعرس
شويخ من الصدمه: هههههههههههههههههه الله عليج يا ام الخطط الخماسيه..
عبدالله: تبوني اعرس.. ليش يالس ع قلوبكن انا؟؟
شما : وويها ماتم فيه شي: هي اخوي يعني عشان نفرح فيك ونستانس ونعيش بسعاده وهناء وهذه سنة الحياه و الرسول وصى بسابع جار .. واجر وعافيه للجميع .. والدراسه صعبه و الدنيا دوار .. ووووووويالله حياكم انا اترخص مع السلامه

وتظهر شما من الخيمه بسرعه وتتخرص بعدها شويخ من عبدالله ويتم عبدالله روحه في الخيمه وهو مستغرب من خواته .. لان شكلهن ابدا مش طبيعي .. والظاهر في شي بس شو هذا الي تم عبدالله يفكر فيه .. تدخل شما حجرتها وشويخ وياها..

شويخ: اسميج بدعتي.. شو ياب العرس للشغل.. اونج بتبطين البرمه وحالتج ع الله.. اشوفج من الزياغ صرتي انتي البرمه..
شما: صخي عني والله مادريتي شو صابني .. تيبست عروقي .. حشى هذا وبنرمسه عن الشغل وجي صابني.. لو عيل اقوله عن الريل جان شو صار فيه
شويخ:آآآخ ياشموم والله ضحكتيني..الحين هزرج عبود بيقتنع بانها هاي هي السالفه.. تعالي اخاف الا صدق ييلس يفكر في العرس
شما: جان زين والله يعرس ربي يوفقه.. الي قده عرسو وعندهم عيال قدهم .. وهو غناتي للحين يالس.. عايش فوق عمره بعشرين سنه ومتحمل المسؤليه بعد رحمة الوالد..
شويخ : هي والله فديته .. بس يابوج .. اخاف ياخذ وحده شرى حصيص ام الدويس تصير لناعله ..
شما: شويخ عن الانانيه.. لو انشاءالله ام الديفان بعد .. خليه يشوف مستقبله

وتزقر الوالده عليهم يتعشون.. تنزل شويخ وتتحير شما شوي.. يستغل الفرصه عبدالله ويسير لها الحجره

عبدالله: جي مانزلتي تتعشين؟؟
شما : ماشي قلت برتب شوي الحجره و بنزل..ليش في شي اخوي
عبدالله: آآآآآ شما
شما وتطالعه باستغراب: هلااا
عبدالله: شو السالفه صدق.. انتو مرشحين لي حد ولا شو بالضبط
شما وهي مبتسمه: فديتك والله.. قول انك تبا تعرس حق شو بعد تتريانا نفتح الموضوع عشان ترمس
عبدالله( وينحرج من رد اخته): لالا اصلا انا مافكرت في هالسالفه بعدني.. وبعدين مايهمني ...يالله برخصتج بسير اكل عشاى .. ولا تتحيرين نزلي يالله
شما: عبوووود .. اوووه عبدالله.. عبدالله تعال وين ساير ما كملنا السالفه...
وينزل عبددالله بدون أي كلمه منه... واتم شما تفكر فيه .. وهو غامضنها ع حاله ... لانه قرب الثلاثين وهو منشغل في هموهم وشايل شغل البيت والمزرعه غير مداراته لتجارته ...وتدعيله ربها يوفقه ويرزقه بالحرمه الي تستاهله..وتظهر من حجرتها وتسير تتعشى وياهم

................................................


اتمنى ان يكون الجزء الاول قد نال أعجابكم...

وترقبوووا الجزء الثاني منـــــــ (مافادني عذرك!!)


ولكم تحياتي ملاك الكون ( أنا) *a9*

[الساحره]

انوووه

لي الشرف ان احجز اول المقاعد هنا

بداية جميلة .. !

واعجبتني المقدمه وشوقتنا نعرف شو سالفه شما و أحمد .. وكيف ستدير الحياه اقدارهم


حليلها شما غمضتني يوم يا بت فيل .. :rolleyes: بس دواها يمكن اتووب من نقش البراشيم

.
.


دمت ِ بخير
:)

[الغلا]

بصراحه حتى انا لي الشرف بان احجز ثاااني مقعد عندج ...

الله يعطيج العافيه اختي الغاليه .. بداااايه رووووعه
وصياغه حلوه .. :)

بانتظار الجزء المقبل بفاااااارغ الصبر ... الى الامام دائما

اختكم
الغلا

[أنا]

غاليتي الساحره..غاليتي الغلا

الشرف لي ان تكونوا اول من سجل حضوره في صفحاتي

واتمنى ان اتلقى ملاحظاتكم على كل جزء بشكل عام
وبوجهة نظركم ماهو الجيد و السيء بجميع النواحي
وهذا طلب لكل من يقرأ يمر على هذا القصه ويعطيني من وقته لقراءة سطوري:)

اشكر هذا التواجد مره ثانيه



ملاحظه: اذا كان الجزء طويل بامكاني ان اقسمه.. لاني اضطررت الى دمج كل جزئين بحكم طول القصه!



وتقبلو تحياتي وسلااااامي أنا:)

[مــــــيـــــاس]

http://www.alremshweb.com/fh/anoooo/myas4.gif

رائعه أنتي ...

[أنا]

أخي الكريم مياس...

مرورك هو الاروع

لك تحياتي أنا :)

[أنا]

الجزء الثاني::


يمر يومين وثلاث وعبدالله بعده يفكر بالسالفه .. وافكاره تودي وتيب ..
ومره وهو في المكتب يراجع الملفات وبعد ما انتهى ورتب كل شي كالعاده
يلس يفكر في الموضوع نفسه ...
عبدالله: ((صدق انا غبي.. قربت الثلاثين ليش ما عرست للحين..
جان عندي ولد يسندني وانا الي يالس اسويه حق منو ؟؟ لا سند ولا ولد....
بس شو يضمنلي الي باخذها بكون سعيد وياها .. يمكن تعيشني بنكد وهم زياده
و كل يوم ضرابه ومشاكل مثل حريم بعض الربع.. لالالا ياعبدالله اصابع ايديك ماهي سويه
ويمكن تكون العكس تكون راعية بيت وتسعدني وتربي عيالنا تربيه صالحه...
اوووووه يمكن ويمكن.. شوف عبدالله اذا ناوي تعرس لازم تختار وحده باختيارك
مب حد يرشحلك.. بس تعال كيف وين بحصلها وبتعرفها...!!!
ربنا كريم بسك عاد وصل ع النبي وتوكل ع الله...))

وينش يقفل المكتب ويركب السياره ويسير عند صديقه يوسف ..
طبعا يوسف في عمر عبدالله بس عقله عقل واحد عمره خمسين يعني عقل تجاري بحت..
وصل عبدالله عند يوسف في القهوه هو والربع كلهم يالسين ..

عبدالله: السلام عليكم
يوسف: هلا هلا والله عليك السلام
عبدالله: اووف انتو ما تملون من هالورقه اربع وعشرين ساعه تلعبون ما تيبس ايدكم من الخبص فيها؟؟
يوسف: صل ع النبي ياخي ... طول النهار نشقى بعد ما يحق لنا نستانس شوي..
بس ما تنلام تراك لا حسيب ولا رقيب عليك
عبدالله: عوذ بالله منك شو هالحسد.. والله محد قالكم ...جان تميت شراتي حر
يوسف: لا يابوك خلني جي ابركلي.. عيل حياتك تسميها حياه!!
عبدالله: المهم ماعلينا.. شو الاخبار وياك .. يقولون السوق واقف هالايام
يوسف: طال عمرك هو واقف واقف.. بس ويا اخوك مايوقف
عبدالله: كيف يعني ..؟؟ يسوووف ليكون رجعت لسوالفك؟
يوسف: رجعت بس ع الخفيف.. ياخي الي يمشي سيده ..آخرتها بييلس عند باب المسيد
يتريا حسنه من الناس
عبدالله: بس يوسف مب زين .. لا تنسى ان عندك عيال وتلقمهم من الي تكسبه
يوسف: جي شوقالولك مالي مال حرام ولا مال حرام.. المساله كلها اني ادور رزقي..
اقول دوك دوخ شيشه ووسع صدرك علينا ...وفكنا من هالارشادات والنصايح
عبدالله: مشكور وخل الشيشه لك .. انا مالي فيها .. يالله فداعة الله اشوفك على خير
يوسف: وين وين تو الناس.. ويين ساير....صبر عبود صبر ياي وياك

ويترك يوسف القهوه ويترخص من الربع ويسير ويا عبدالله يتمشون ع الكورنيش
ويكملون سوالفهم..كان عبدالله على سوالف ربيعه يوسف الا انه يعزه وايد ..
لانه الوحيد الي كان يفهمه ووقت الشده دايم يشوفه واقف وياه..
مع انه الكل يقول عنه انتهازي وعوي ومحد يثق فيه
بس عبدالله كانت له معامله خاصه عند يوسف

يوسف: انزين قولي شو بلاك انت من فتره وحالك ترى مب عاجبني
عبدالله: سلامتك بس تدري في سالفه شاغلتني شوي
يوسف : شو سالفته بعد .. خبرني انت بس وانا بشل السالفه من بالك
عبدالله: لا دخيلك الا انك تشلها ماصدقت أتي في بالي بعد تشلها الله لا يقول..
يوسف: انزين يابوك ما بنشلها بساعدك فيها يالله عاد خبرني
عبدالله: اقول يسووف
يوسف: هلا
عبدالله: انت صارلك معرس 7 سنين يعني ما شاءالله عليك صرت راعي خبره
يوسف: هههههه اقول عطني الزبده .. ولا تبيع خبزك على خباز ..
الحين راعي الف والدوران ياي بتلف عليه .. قول الي عندك
عبدالله: عوذ بالله.. انزين بقولك ياخي ناوي اعرس و.....
يوسف: زين زين بشارة خير يابوك .. ما بغيت اخيراً...
عبدالله: انزين خلني اكمل رمستي..
يوسف: انزين كمل
عبدالله: المشكله في الي بتزوجها...
يوسف: انزين يوم فيها مشكله لا تاخذها وخذ غيرها
عبدالله: يسوووف لا تيلس تتمصخر اقولك في الي باخذها يعني الي ابا اختارهااااااااا
يوسف: بلاك انزين معصب اسولف وياك... انزين شو المشكله بالضبط عطنا جمله مفيده
عبدالله: المشكله اني ابا اختاراها بنفسي.. يعني ماتكون من ترشيح الاهل.. بس كيف اختارها ..
يعني مستحيل وحده احكم عليها من شكلها الا بعد ما اكلمها واعرف طريقة تفكيرها
وهاي اصعب كيف اكلمها
يوسف: عادي دق على رقمها وكلمها هههه
عبدالله: شوف والله ان يلست تتمصخر زياده اهدك واسير عنك .. وخلى ريولك تتقطع لين توصل لبيتكم
يوسف: بعد شو اسويلك انت شروط غير شروط .. تبا تختارها انت
وما تبا ترمسها وتباها تناسبك .. مايصير ..عشان تعرف طريقة تفكيرها
لازم يكون في بينكم حديث.. وبرايي الي بترضى ترمسك
ماتصلح تكون زوجه لانها رضت ترمس شخص غريب عنها..
وان ما رمستها باجر يمكن تطلع مب مناسبه وتفكيرها غير عنك
عبدالله: ترى هني المشكله .. شو الحل برايك...؟؟
يوسف: انا بخبرك شي.. قبل لا اخذ ام البنات كانت صديقة الرضيعه ..
يوم شفتها عيبتني وتميت اتحرى عنها عند الرضيعه يعني ماصدق اتيب طاريها
وشوي شوي وبّلواااااته الي تعرفها قدرت ايمع معلومات عنها وعرفتها بدون مارمسها ...
عبدالله: انزين حالتك هاي شاذه .. يعني انا يالله ايلس ويا الاهل ولا اسمعهم ييبون طاري حد
يوسف: عاد ماعليك الحين الا تغير طبعك شوي.. وحاول تتيلس وياهم زياده ..
يمكن وحده من معارفكم تنفعلك وانت ما تدري عنها انت جرب وشوف
عبدالله: انزبن يسوف.. هزرك بينفع يعني هالشي
يوسف: انت جرب وشوف ما بتخسر شي .. خلك وياهم ع الخط واسمع سوالفهم يمكن تلقط شي
عبدالله : شورك وهداية الله..

ويرجع عبدالله البيت وهو حاط افباله رمسة يوسف.. يدخل يغير ملابسه ويرجع ييلس ويا امه وخواته
في الصاله
ماسك جريده بيده.. واذنه تاركنها عندهم.. ينفذ الخطه.........
شويخ: امايه الغاليه طلبتج لا ترديني
ام عبدالله: جانه شي ينقدر عليه مارديتج فديتج ..
شويخ: لا امايه الا ينقدر عليه وينقدر عليه بس اذا طاعوا عاد(وتأشر على عبدالله)
شما: احلمي عيل
شويخ :امايه تدرين الغاليه نحن اجازه وماصدقنا نفتك من الامتحانات و الدراسه..
يعني نبا نشم شوية هوى.. مايصير جي حاكرينا في البيت
ام عبدالله: انزين فديتج سيري ع السطح وشمي احسن هوى
شويخ: اماااااااايه عاد اقولج هوى ..مب هوى بيتكم .. دخيلج خلينا نسير يوم الاربع
ويا ربيعاتنا ع البحر.. وتدرين هاليوم بس للحريم يعني ماشي ريايل
شما: وين وين .. لا يابوج الا هالسيره اسمحيلي .. هالدرجه من الناس ماحب اختلط فيها
شويخ: وليش انشاءالله ياصاحبة الجلالة؟؟ .. بلاهن هالطبقه .. ولا عشان اصغر عنج ماتحبينهم يالعيوز
شما: لا والله.. وانتي ادرى ليش.. بعد هالقاصر اسير امشي بين بنات جنهن اولاد
شويخ: شمووم عن حركاتج هاي الماصخه واقبضي لسانج
شما: لا ما بقبضه .. عشان يخلونج تسيرين .. انا اصلا مب راضيه بعد ع هالسيره..
شويخ: وليش انشاءالله .. انتي تدرين منو ربيعاتي.. وانجان في بنات عويات انا مالي شغل فيهن
شما: صح .. بس يقولج من عاشر قوما صار منهم.. وسيراتج ماتمنع تتعرفين على وحده منهن..
لااتينا اليوم الثاني مقرعه راسج وتسرقين كنادير عبود وتلبسينهن .. وتستوين من بنات البوي
شويخ: زودتيها عاد .. جي شو قالولج.. وانا مب ياهل ينلعب براسي
ام عبدالله: بسكن ضرابه .. حشى ماتحشمن حد .. اسير عند وليدي ابركلي من اليلسه هني

طبعا عبدالله سمع السالفه كلها وهو بعيد .. وافتر راسه 360 درجه ..
عبدالله يرجع يفكر: افاااا بنات بوي.. كيف مافكرت فيها
ولو تزوجت وحده منهن الحين وانا مادري .. باجر منو يربي العيال ولا يطبخ ..
و اتي بعد تلبس غتره وعقال ولا على قولة شموه تسرق كناديري ..
ولااااااا وتيلس بعد ويا يسووف وربعه تخبص ورقه ولا ادوخ شيشه..
الحمدالله يوم سمعت رمستك يا يوسف ويلست القط رمسه الظاهر ماخفي كان اعظم ..
لاااه يحتاي ايلس اكثر واسمع اكثر عشان اختار شي صح

وفي اليوم الثاني يخبر يوسف عن سالفة البنات البوي.. وهو مصدوم.. يضحك يوسف
ويقوله: عبود قلنالك اسمع شي منه فايده .. شو بنات بوي وماعرف شوو
ياخي اسمع شي يفيدك يعني عن بنت فلان ولا علان .. مب تيلس تتصوخ رمسات الاهل كلها ..
ترى في اشيا مب زين تسمعها

عبدالله: ياخي انت قلتلي اسمع وانا سمعت ومالقط غير هالشي
يوسف: انزين عبود انا عندي لك فكره جربها ويمكن هااي تعرفك بنوعيات البنات ..
بس عاد هاي الطريقه يعني تعرف انواعهن مب تختار وحده منهن
عبدالله: شو هي عاد هالطريقه
يوسف: اسمع .. يقولك البنات هالايام قامن يغازلن بالحلال تعرف شقايل؟؟
عبدالله: يغازلن بالحلال؟؟ كيف هاي
يوسف: يعني خذ لك كورس في الانترنت وادخل .. وبتشوف مليون نوع من البنات
وكل وحده بتطلعلك بسالفه ثانيه .. بس دير بالك دييير بالك يقصن عليك ترى كلهن نفس الشي ..
مب تتعلق افوحده منهن بعدين
عبدالله: بنات من الانترنت؟؟؟

ويبدا يوسف يفهم عبدالله ويفصله تفصيل في كل شي .. لين عبدالله خلاص
صار على استعداد تام لدخوله الشبكه العنكبوتيه.. ويسيرون رباعه لمحل الكمبيوتر
ويشتري كمبيوتر ويسجل اشتراك في الانترنت وبخطوات سهله يعلمه يوسف طريقة الجات
والمواقع المطلوبه بالغرض.. واول شي يحط اميله في موقع تقديم طلبات الزواج ..
وطبعا يخليه فووول اوبشن في الموصفات و الاختيارات يعني في زمانه امير بفارس ابيض ........

وهني يبتدي عبدالله بدائره ثانيه .. يدور فيها مثل الدوامه .. بعد ما بدو يضيفون اميله ...
وهو قام كل يوم يضيف وحده ويكلمها .. في البدايه كانت عشر دقايق ويمل ..
وبعدين كمل الساعه والساعتين وبعد فتره قام ييلس بالساعات وهو يكلم البنات..
وكل وحده تعرض شخصيتها ومواصفاتها باحسن ما يكون .. كان عبدالله الغايه من تجربته هاي
يكون معرفه اعمق عن انواع البنات وطريقة تفكيرهن .. بس الاهل لاحظو جلوسه لفتره طويل
ه على الكمبيوتر بشكل غير مطمئن..
شما: شويخ ماتلاحظين شي غريب في عبود
شويخ: ادري بتقولين سالفة الكمبيوتر
شما: وانتي مقتنعه في هالشي
شويخ: لا .. بس هو مب صغير ويعرف الصح من الغلط
شما: مادري بس افكر اني اكلمه
شويخ: شموم مالج شغل.. ليش حاشره نفسج .. خليه يمكن يحصل بنت الحلال
شما: بنت حلال بتي من النت .. هاي يبالها ذبح حلال
شويخ: انتي دومج الا تفكيرج متشائم.. يعني الي ييلسن ع النت كلهن يبالهن ذبح؟هاذيه انتي
دومج ميلسه ماشوف حد قالج تبين ذبح
شما : انا ايلس صح... بس جد مره شفتيني اسوي شي غلط.. والسكرين مجابلنج ماعندي شي اخشه..
واذا يلست عليه فالاني ابا استفيد منه مب اخربط عليه
شويخ: امحق استفاده.. كل يوم يايه بدرس يديد في ( كيف تصبح مطرب ناجح)
واطرين اذنا وانتي تعاويين بصوتج ..
شما: والله عاد هاي هوايه وبكيفي.. برخصتج انا سايره لعبود وبرمسه
شويخ: سيري وعساه ياربي يردج بدون راس.. ولا مكسر لج ضلوعج


وتسير شما لاخوها عبدالله.. ادق اعليه الباب وهي مرتبكه مب عارفه شو تقول..
لانه عصبي وتخافه برمستها تحصل منه كف... بس شجعت عمرها والتزمت موقعها ....

عبدالله: منو.. دخلو دخلو
شما: هلا عبدالله ..بعدك ما رقدت
عبدالله وهو لاهي ع النت: لالا بعدني.. شوي وبرقد .. ليش في شي
شما: لالا بس كنت يايه اسولف وياك
عبدالله ماصدق وانتهزها فرصه ..يمكن اتيب طاري حد : حياج حياج تعالي يلسي
ويودر الكمبيوتر ويلتفت لشما.. كانت هي روحها مستغربه من ردة فعله..
وترحيبه على غير عادته الرسميه

شما: زين والله .. يا مغير الاحوال.. تبا الصراحه كنت حاطه افبالي بنطرد
عبدالله: لااااااافا عليج وانا انقدر اطرد شمامي .. انتي اختي الغاليه العزيزه..
بعدين مافيها شي شوي ندردش ويا بعض ولا شو تقولين؟
شما: ياسلام وينج ياشويخ تعالي سمعي. واتقولي بيردج بدون راس..
دامك بهالرواقه عيل برمس وانا مطمنه..
عبدالله: مطمنه.!!!!
شما : هي اخويه بصراحه كنت برمسك عن النت . يعني واايد اشوفك تيلس عليه ..
انشاءالله يكون في شغل او بشي تستفيد منه ..
عبدالله: تبين الصدق عاد.. والله مب يالس استفيد الا يالس اخربط.. يقولون النت له
فوايد بس ماشوف غير المصخره عليه..
شما: منو قالك ما منه فايده بالعكس انت لو تيلس على مواقع مفيده بتعرف انه ينفع ..
بس لانك مب يالس تستفيد ولا عندك هدف معين من اليلسه عليه تشوفه للمصخره ع قولتك
عبدالله: انزين انتي تيلسين عليه قوليلي أي مواقع هاي الي تفيد
شما وهني تتوهق لانها ما تدخل الا مواقع دروس تعليميه لهواة الغناء: آآآآ هااا هي يعني ادخل
مواقع تجاريه او شوف ميولك غير التجاره انت شو تحب ودور معلومات
واذا تحب بعطيك لستة مواقع كلها رووووعه بس ادخل وشوف انت بنفسك..

عبدالله: زين عيل على ايديج با شمامي..
شما: اقول عبدالله
عبدالله : هلا
شما: في شي ثاني كنت برمسك فيه بس حاول تفهم يعني وبدون عصبيه
عبدالله: انا اقول شي وراج .. قولي وعليج الامان
شما: آآآ ك ك كنت مفكره اني اشتغل
عبدالله: شووووه ..!!!
شما: هي اخوي والله شوف يعني..انا مب صغيره الحين وبعدين باقيلي سنتين لين اتخرج
شو فيها لو اشتغلت
عبدالله: شوفي هالسالفه خوزيها من بالج وماشي شغل قبل ماتتخرجين دامج في هالبيت
و تحت شوري
شما: انشاءالله.. يالله تصبح على خير بسير ارقد
عبدالله : وانتي من اهله ولا تنسين تسكرين الباب وراج

وترجع شما وخاطرها مكسور من هالصوب وعبدالله من الصوب الثاني انتبه لنفسه شوي
وحس بساخفة الي يسويه لانه اكتشف كل معلومه يحصلها من الجات كانت تخليه يغير رايه اكثر
عن الزواج وهالشي ما بيفيده ..فسكر الكمبيوتر واتعوذ من الشيطان وحط راسه ورقد........

.................................................. .................


وترقبوا الجزء الثالث منـــ ( مافادني عذرك)


ولكم تحياتي ملاك الكون ( انا) *a9*

[دمــ اللؤلؤــوع]

.
.

الغااااااليه .. انـــــــا

أي ملاحظات .. وأي انتقادات ..؟!!!

ما شاء الله عليج .. أثرج مب هينه والله ..

أنا دخلت بالصدفه .. بس بصراحه .. ما قدرت أظهر بدون لا أقرا القصه ..

روووووووووووووووعه .. ولا تتأخرين بالجزء الثالث .. ترانا نتريا ..

ونبا انعرف شو بيصير بين شما وأحمد .. ومنو هذا أحمد .. :rolleyes:

أما بالنسبه للطول .. فاعتقد انه اوكي .. :)

تسلم يمينج الغاليه ..

.
.

[الغلا]

تسلمييييييين الغاليه "أنا"
على هالجزء ,,,

يعطيج العافيه .. بانتظار البقيه


اختكم
الغلا

[البدوي الحبوب]

أ نـــا


الله يعطيج العافيه اختي .... دومج مبدعه بشهادة كل من عرفج

لاتحرمينا من روعة ماتكتبين ونحن في انتظارج

تحياتي

[أنا]

غاليتي دموع اللؤلؤ...

تسرني رؤيتك هنا ...وان تكوني من حضور هذه القصاصات

غاليتي الغلا.. اخي البدوي الحبوب
ان متابعتكم لصفحتي لهي شهادة فخر واعتزاز بما اخطه


سلمتم اخواني ولا عدمناكم

ولكم تحياتي وسلااااامي أنا :)

[أنا]

الجزء الثالث...

العصر يت ام حميد بيت ام عبدالله تتقهوى عندهم وتسال عن اخبارهم
خاصه انها بعد يومين بتسافر الهند وحبت تسلم عليهم قبل لا تسير وتستسمح منهم
والدنيا فيها حياه وممات... دخلت ام حميد وقربت فيها ام عبدالله
ويلسن يسولفن وخذتهن الرمسه بسوالف اول ويوم يسيرون يقيضون في غمضه
ام عبدالله: الا تقولين ام حميد هاي ايام عيل الصديق مايدري عن ربيعه..
وين ايام قبل واللمه تفرح الصغير والعود
ام حميد: صدقتي يا ام عبدالله ..يوم نسير اولي القيض غمضه
ونيلس في العريش الحريم برد يطبخن ويعابلن و الريايل برد سماري كل ليله ..
محلاتها من ايام ..
ام عبدالله: هي يابوج بس الحين منو يسير عاد خبرني انتي هااا.. يوم الا انقول
بنسير نتقشت قالو حر مانروم ع السيره ..باركين تحت هالكنديشنات جنهم دياي مثلج
ام حميد: ههههههه غربل الله عدوج اسميج سوالف ام عبدالله انتي...
جاني تميت وياج ولا بيظهر شي من ايديه .. يالله عاد الغاليه اسمحيلي بسير..
يالله يمديني اسيّر على ام علي حليلها مريضه بعد.. و بسلم عليها خطافي..
ام عبدالله: حياج الغاليه واسمحيلينا .. عاد ما اوصيج ع دهن عود الكمبودي
ام حميد:فالج طيب الغاليه الكمبودي والعود الزين بيوصلج انشاءالله كم ام عبدالله عندنا..
ام عبدالله: تسلمين ختيه يالله تسيرون وتردون بالسلامه سلمي على بو عبدالله والعيال

وتسير ام حميد .. و اطب شما على امها..ماصدقت الحرمه تسير هي وشويخ
يتملقن ويتمسحن عليها

شما: امايه فديتج خلينا نسافر في الاجازه..
شويخ: هي والله خاطرنا مره نظهر من الامارات نشوف الدنيا
شما: والله فشله الناس وصلو القمر ونحن للحين الطياره مانعرف شكلها من داخل ..
عيزنا من كثر الجذب
شويخ: اسمي عاد جذبج شموم غير انتي.. ماخليتي بلاد الا سرتيها الصيف
على سور الصين وتقيضين تحت ظلال برج ايفل..
شكلج تبين تاخذين صوره تذكاريه قبل لا يطيح على راسج ههههههه
شما: عاد انتي الي فالحه.. اونه اول ما اركب الطياره بفتح الجامه ابا ايمع غيم ..
الناس ايمعون شي فيه خير وهاي الخديه بتشل خريطه بتحط فيها غيم ..
غير اطيح الطياره نحن ودريول الطياره وياناخخخخخ
شويخ:دريول يدرول راسج أسمه كابتن فضحتينا.. شو راكبه كرولا أم دبه ويا بابو ؟؟
شما: بس تدرين مب غامضني الا الناس الي بنطيح عليهم نحن وكشارنا ههههههه
ام عبدالله: اسميكن بعد انتن غير نمونه بسوالفكن... خلاص خلاص بخبر غناتي عبدالله
وبشوفه جانه يروم ياخذ اجازه
شما: تعيش الوالده والله تعيش يا ياياااااااااااااااااا احلى ام عبووود اممممموح...
شويخ يالله جهزي اغراضج
شويخ: اييه انتي بلاج جنج بقره شايفه حريجه .. اتقولج بتشووفه
يعني يمكن هي ويمكن لا وعلى الاغلب لااا لان عبود ماله بارض يتفيج ويسفرنا ..
شما: فال الله ولا فالج انشاءالله بيوافق.. بس تعالو وين بنسير؟؟
ام عبدالله: عاد شوفن بلاد قوم بوعيون زرق انا هب سايره
تبون بنسير صلاله ولا السعوديه ولا شوفن مكان قريب
شما: اووو هوووووو..
شويخ : حمدي ربج اذا سرنا سكمكم بعد مب صلاله ولا السعوديه
شما: خلاص عيل اذا مصرين ماشي غير هالاماكن بنسير الكويت
هالوقت بيكون عندهم مهرجان ع الاقل نستفيد من سفرتنا
شويخ: صدقج ...هي امايه بنسير الكويت
أم عبدالله: خير انشاءالله خلى ايي اخوكم وبنتفاهم



وتفتح ام عبدالله الموضوع لولدها عبدالله وتشور عليه بالسفره في الاجازه
منها البنات يغيرن جو ومنها هو بعد يريح من الشغل شوي..
طبعا عبدالله في البدايه ماكان مقتنع بس مع بمحاولات الوالده
ماحب يردها وقالها تم يعني وافق بس سفرهم يكون عشرة ايام ع الكثير
لانه مرتبط بمواعيد ومايروم يتاخر . وتبشر ام عبدالله بناتها بالموافقه ..

ام عبدالله: اقول بناااااات. ابشرن خلاص بنسافر
شما:والله... حلفي انزين
شويخ: صدق امايه
ام عبدالله:سود الله رقاعكن .. شو شايفني جذوب ولا شو
شما وتبوس راس امها: السموحه الوالده بس من الفرحه اختبصنا بالرمسه
ام عبدالله: انزين ماعلينا.. بس ترى اخوكم يقول عشرة ايام يعني ما بنطول
شويخ: انشاءالله لو يوم .. لو بس نركب الطياره ساير ياي بدون ماننزل بس تنحل عقدتنا
شما: لقعه صدق عيال فقر .. اييه انتي فشلتنينا شو هاااا ...ع الاقل قولي ترانزيت ..

تظهر عنهن الوالده وتمسك شما التلفون من هني وعلى طول ادق لمواز تخبرها

شما: الو مواز باركيلنا بنسافر
مواز: والله ومتى وين؟؟
شما: بنسير الكويت بس متى عاد نتريا الاخو العزيز الله يطول بعمره
ويخليه ذخر يرد علينا يوم بيرجع فليل
مواز: يعني كلكم بتسيرون كلكم؟؟
شما: شو كلكم!! .. لا بنسير انا وشويخ بس... طبعا كلنا....
صدق انج انتي بعد اسالتج مثل ويهج...
مواز: لا ماقصدت جي .. بس احيد اخوج ما يهد شغله عشان سفر وغيره
شما: مواااااااااااااااااااااااز .. لا تحاتينه عشرة ايام وياين
مواز: جب لااااه باي انتي اصلا ما تنعطين ويه
شما: الحين انا ما انعطى ويه .. اوكي اوكي ... بنشوف منو يحتاي للثاني
مواز: باي وعساج بزلقه نص المطار.. عشان يحترق هالويه
شما: ههههههه والله مادريت القهر يظهر دعاوي حلوه جي.. اوكي باي ارمسج خلاف

ويوم ايي عبدالله المسا.. يخبرهن انه حجز ليوم السبت والرده بالثلاث الي بعده..
وبس يسمعن شما وشويخ ان التذاكر انقصت.. يطيحن في حاله
ومب عارفات شو يحطن في الشنطه

شويخ: شموم شمووم شوفي شو رايج في هالمغربيه زينه
شما: ههههههههههه ايه انتي شو مغربيه ليكون بتمين بتلي والفصوص مالج
هناك يتويلن بين الناس
شويخ: جي بلاه التلي والمخاوير.. زينة البنت بخوارهااا
شما: والله انتي الي قمتي تخووووورين برمستج هاي ..اقول بابا بسج عاد
نحن سايرين نغير جو يعني بلا المخاوير خلينا شوي نغير ..

وتراوي شما اختها الي الملابس الي بتحطها في الشنطه..
شويخ: شموووووم حسيبج الله ... تبين عبود يقص رقبتج انتي.. شو هاااا..
ليكون حاطه افبالج بتلبسين هالسوالف
شما: بلاج جنه مس كهربا ياج.. ومنو قالج اصلا بنتوح العبايه عشان عبود يشوف..
يعني عبينا مسكرات مره جنهن جلابيات وين بعد بيبان
شويخ: انزين يوم اننهن جي مسكرات ليش ما نلبس مخاوير
ترى في الحالتين محد بيشوف شو لابسات
شما: يالذكيه يكفي انج قبل لا تظهرين تشوفين نفسج في المرايه وتتميليحن جدامها بلبسج
شويخ: ويااااااااااااااااااااازينه عاد من تميليح.. لوفيج طول وشيفه
جان بعد يمكن بنقول مليكان .. بس لاشيء يذكر يتبارك فيه..
بس عن خرابيطج وانا بحطلي جلابيات سنعات
شما: اقول شواخي لا تنسين عيل البادله والزري بعد حطيه وياج..هههههههه

وتمر الايام وايي يوم السبت وموعد الطياره الساعه 6 العصر
والحين الصبح الساعه 11 شما تسّير على مواز تسلم عليها قبل لا تسير
طبعا بسرعه لان وراها الف شغله تسويها وياالوالده واختها في البيت قبل السفر..
يعني بيلمن الاغراض .. وينظفن البيت.. وشوي سوالف لازم يسونها قبل السفر في البيت

مواز: شماامي ديري بالج ع روحج ما اوصيج ..
والله هاي اول مره افارقج فيها ماتعودت اتهديني روحي في البلاد
شما: فديتج والله مواز تصدقين بتوحشيني وايد وبفتقد هزابج بعد...
مواز: هي والله حتى انا بفتقد صوت هزيبي لج .. آآآ شما
شما: هلا
شويخ: ديري بالج ع الوالده وهلج
شما: الوالده.... وهلي.؟؟

وتمسح مواز دموعها وتحضن شما وكل وحده تبدا المرازيب عندها يصبن دموع
وتنتبه شما انها تاخرت لازم ترجع .. تسلم على مواز وترد البيت ..


الساعه خمس يوصلون المطار ويخلص عبدالله اجراءات المطار ..
يستغلن شما وشويخ الفرصه عشان يسيرن يتسوقن في سوق الحره..
والام تحاتيهن تخاف يضيعن.. فيردن بسرعه على صوت الكول ...
وقت اقلاع الطياره .. يحصولون شوي رمسه من عبدالله
لانهن هادات الوالده بريحاتها يالسه .... وعقبها ياخذون بعضهم ويتوكلون على الله
في الطياره ييلس عبدالله و الوالده حذال بعض وشما وشويخ ويا بعض..
وعبدالله طول الوقت عينه على خواته .. يعرفهن غجج .. ويمكن يحتايون شي..
اتي المضيفة وتقدم لقم عبدالله الوجبه.. وبعدها تسير عند شما وشويخ ...
وهني يتوهقن مايعرفن يرمسونها.......

المضيفة:
u wana beef or chicken ?
شويخ مسويه عمرها ماسمعت لين تفكر في الاجابه:
Sory
تنغزها شما وتقولها: شواخ مثل عبود مثل عبود .. وتبسميلها عشان تتحراج فاهمه
طبعا شويخ مالقطت من الكلمه الي قالها عبدالله للمضيفه
غير حرف ( الاييه و الأف ) جان ترد:Vef

والظاهر المضيفه بعد ما سمعت عدل وعطتهن البيف...وسارت للي احذالهن
كان شاب .. وياه شيبه .. سالتهم المضيفه
ورد عليها الشاب وهو يضحك:Sure I wanavef

المضيفه هني عاد انتبهت:Sory what’s meaning of vef

جان يرد عليها:This is perfect food
هزت المضيفه راسها وضحكت وعرفت انه يقصد البيف فعطته ومشت ..
طبعا شويخ حزتها كانت تغلي لانها تعرف يالس يضحك عليها
وشما من الصوب الثاني كملتها وتضحك على شويخ .. مسكينه قطعوها....
شويخ وهي معصبه: ويا ويهج بدل ماتسيرين تصفقينه ع ويهه تضحكين عليه؟؟
شما: دخيلج صخي .. تراني والله بالغصب ماسكه عمري ما اضحك صوت عالي
شويخ: ماعليه ماعليه مب منج.. ضحكي وعساج بشرقه
شما:آآآخ يا شويخ والله انج تحفه .. عاد فيف وين يبيتها هاي من أي معجم..
جان شاورتي بيدج
شويخ: يوم مسويه عمرج اونج عاد فالحه.. جان رمستها انتي .. بس ..
اشوفج بلعتي لسانج يوم كانت الحرمه هني
شما: والله انا جامعيه وافهم .. بس قلت اعطيج فرصه تعبرين عن مشاعرج بالانجليزي
شويخ: شموم صخي عني ولا والله افرج من الجامه
شما: زين زين خلاص ..

وطول الوقت كان الشاب يالس يطالعهن ومستغرب بتحرطيمهن على بعض..

شويخ: عمى بهالعين .. شو يالس يطالع هذا بعد..
شما: منو؟؟
شويخ: هذا ربيعج راعي الفيف
شما: أهاااا .. تدرين شكله ناوي ياخذ عندج دورة انجليزي ومستحي
شويخ: ه ه ه هاااااا ما يضحك

ويشاور عبدالله عليهن .بيده اذا في شي.. ويردن عليه لا..
وشوي المضيفه تعلن عن الوصول.. عشان يربطون الاحزمه....
وتهبط الطياره بمطار الكويت الدولي...وبعد ماتوقف.. الكل ينش ويجهز عمره للنزول..
عبدالله جدم امه وخواته قبل الزحمه ونزلو من الطياره ...



بعد ما يستلمون الشنط ويخلصون .. يظهرون من المطار ويتوجهون للفندق
طبعا الدنيا كانت ليل و الوقت متاخر .. بالرغم من التعب الا ان شويخ وشما
كانو مصرين مايتنازلون عن العشا...
شويخ: شو السالفه ماتعشينا..... ولا تبونا نرقد بيوعنا؟؟
أم عبدالله: ماشاءالله عليج شواخي فيج شده للاكل .. حطي راسج وخمدي ابركلج
شما: حتى انا والله يوعانه ابا اكل شي
عبدالله: حطن راسكن واخمدن ولا والله افركن وحده ورى والثانيه من الشباك

وتمت شما ويا شويخ يتحرطمن عليهم .. بس طبعا بالمصاصر ..

شويخ: شو هالحاله يايبينا يذبحونا يوع
شما: اشدراني عنهم... بس تصدقين مادري متى يستوي الصبح عشان نحوم في السيقان
شويخ: هي والله .. يا سلام .. اسمي بنستمتع.. بس عاد اذا ما غصص علينا عبود
شما: لا ماعليج .. هو اكيد بيسير روحه مب معقوله ييلس يتسوق ويانا
شويخ: انزين يالله خمدي عشان انش من وقت

والصبح اتنش ام عبدالله وتوعي عيالها وطبعا بغت اتزهب ريوقهم بس مافي شي تزهبه ..
ينش عبدالله ويسير اييبلهم ريوق سنع من اقرب مطعم.. طبعا كل هذا وشويخ وشما بعدهن رقود..

عبدالله: هاااا هاذيل بناتج... مالت عليهن بس فالحات لسان مطوله .. لا يهشن ولا ينشن
ام عبدالله وتحاول توعيهن: شمامي.. شويخ نشن بارك الله فيكن .. بسكن رقاد
شويخ: انا واعيه...
عبدالله: وهاي الصخله وعوها رقادها رقاد فيل .. شموم اييييه نشي ولا بتيج رفسه افبطنج ترى


وتنش شما بسرعه قبل تنفيذالتهديد.. وبعدها ييلسون يتريقون يميع
وبعد ما يخلصون يسالهم عبدالله وين يبون يسيرون

شما: بنسير نتسوق شوف شو السناتر الي عندهم وبنسيرهن
عبدالله: انزين عيل بسير اتنشدهم تحت في الرسبشن وبشوف مكان عدل نسيره...
وانتو اتزهبو لين ارجع..

ويترخص عبدالله ... وام عبدالله وبناتها بدو يستعدن ويتلبسن .. وهني عاد بدت معركة ثانيه..

شما: شيخووه وين الكوايه .. ابا اكوي العبايه .. شوفي شقايل مجسفه
شويخ: اشدراني .. شوفي في أي شنطه حاطينها..
شما:ياربي شو هالعفسه... ماحصلت شي..
شويخ:شموووم لا تحشرينا.. تبين شي دوريه بروحج محد متفيج لج.
ام عبدالله: شمامي دوج الغاليه... حصلتها لج..
شما: فديتج والله .. تسلمين مامي..
شويخ: الوالده.. شو السالفه للحين محد قبضنا خرده؟
شما: هي والله.. ليكون بتقولون لنا اشترو ونحن بندفع.. لااااا كلاً بيزاته افجيبه..
ام عبدالله: عووذ بالله منكن.. حشى مب بنات الا عله...
انا بقبضكن بس والله وانا اقول ان اشريتن خرابيط لاردكن باجر البلاد ..
شما: شووو..يعني شو بناخذ؟؟.. انتي عطينا .. وصلي ع النبي بس

وتعطي ام عبدالله بناتها البيزات.. وايي عبدالله يستعيلهن .. السياره جاهزه..
وطبعا للحين هم مب عارفين وين متجهين.. وكل الي يعروفنه انه سنتر..
وبعد ما وصلوا دخلو السنتر وخذو جوله فيه..
شما: شويخ شويخ...شوفي
شويخ: شووووو
شما:شوفي محل ادوات موسيقى.. دخيلج طوفي انسير
شويخ: هبله انتي.. والله عبود يذبحج..
شما: اووه بلاج بنقوله بنسير محل الملابس
شويخ: كيفج انا مالي خص
شما وتكلم عبدالله: عبدالله انا وشويخ بنسير شوي الطابق الثاني
شي محلات ملابس وشنط.. بنلف عليهم وبنرجع
عبدالله: انزين بس مب تضيعن.. نحن بتشوفونا هني تحت نتمشى
شما وتسحب شويخ: انشاءالله انشاءالله...مابنتاخر

ويصعدن الطابق الثاني.. ويتجهوون ع طووول على محل الموسيقى..
كان محل كبير ومزدحم بالناس.. ويلفت انتباه شما. .. قسم المايكرفونات وهالسوالف..
وكان فيه دعايه لمايك مع شاشة عرض لكلمات الاغنيه والموسيقى ..
.ويلست اتجرب واحد من المعروضين.. وتمت تغني بس طبعا بصوت واطي..
شويخ: غربل الله عدوج انتي اييه .. شو ماشي حيا... شو بيقولون عنا الناس دقاقات ياين؟؟
شما: بلاج تحرطمين.. تدرين سيري انتي هناك شي طبول وطيران هههههه

واتم شما مستمره وكل ساعه تغني الكلمات المعروضه جدامها للاغنيه..
ومن اغنيه لثانيه.. ومكيفه ع الاخر.. طبعا كان الصوت مب عالي .. ومحد منتبه.. وفجأه..

....: ماشاءالله عليج أختي صوتج حلو
شما..واتم مصدوومه ومتيبسه مكانها يوم تشوفه جدامهااا..
نفس الشخص الي كان وياهم في الطياره
شويخ: شلك انته.. صدق قواة ويه
....: اسمحلي اختي بس انتو زباين وياي اشوف شو تبون.

وهني ينتبهن انه من يشتغل في المحل.. وكل وحده تدفر الثانيه ويظهرن من المحل..
وينزلن على طوول الطابق الاول يدورن عبدالله و الوالده.. وماصدقن شافوهم..
عبدالله: هااا شوو انشاءالله عيبكن شي؟
شما: لالا شو مب شي سناترهم
عبدالله: كل هااا ومب شي.. الله يستر بس.
ام عبدالله: زين ماشفتن محل عطورات عربيه؟
شويخ: بلى شي كم محل فوق.
شما وتسكت شويخ: لالا هاذيل مب شي عطورهم.
عبدالله: انزين خلنا نسير نشوف يمكن الوالده يعيبها.
شما: عبدالله صدقني مب شي خلنا نسير
عبدالله: صدق انج انانيه الحين انتي تسوقتي ويوم شبعتي قلتي نسير..

ويسرون الطابق الثاني مره ثانيه وهناك كان الشاب واقف على باب المحل..
عبدالله: جني الا بسير اسال هالريال الي واقف هناك..شكله راعي البلاد ويعرف ..
بنخليه يدلينا..
وهني شما وشويخ جنه حد جب عليهن ماي حار... وماتن من الزياغ ..
يمكن يقول شي لعبدالله..

عبدالله: السلام عليك اخوي
....: عليك السلام و الرحمه...امر اخوي
عبدالله: ما يامر عليك عدو.. بصراحه نحن ضيوف من دبي وماندل مكان..
اذا تقولنا وين نحصل عطور عربيه؟
....: هلا اخوي وهاي دريتكم افا عليك.. وانشاءالله بس تعيبكم ديرتنا ..
ولا يهمك ادليك على خووش محل للعطور.
عبدالله: تسلم اخوي .. الله يخليك
الشاب: شوف هذا المجابل محل واحد.. وبتلقى في عقبه بجم محل بعد محل وماعلى عطوره كلام...
وان احتجت لشي .. هاك هذا رقمي ودقلي وفالك طيب..
عبدالله: والله ماقصرت ...
الشاب: افا عليك اخوي هذا واجب.. الا ماتعرفنا بالاسم الكريم؟
عبدالله : معاك اخوك عبدالله الفلاسي من دبي
الشاب: عاشت الاسامي ياعبدالله .. وانا أحمد الكندي من الكويت
عبدالله : تشرفنا اخوي أحمد..وتسلم ع الخدمه مره ثانيه

ويرجع عبدالله لاهله يخبرهن عن المحلات الي وصفها له الشاب..


ام عبدالله: هاا عسى بس دلك على محل؟
عبدالله: هي الغاليه ..بصراحه شبابهم بياض ويه ما يقصرون..
ويتمن شما وشويخ يطالعن بعض وصاخااااااااات

يكملون مشترى من السنتر وياخذون الي يبونه ويرجعون الفندق....
وهناك كل وحده منهن مستغربه من الي صار..
شما: حرام ضلمناه شويخ تصدقين
شويخ: ماعليج منه انا احس انه اتعمد يسوي جي .. عشان يقولنا انه شهم
شما: لالا ما اضن .. كان يقدر من البدايه انه يفشلنا ونحن في المحل بس صخ عنا

وتمن يتناقشن في السالفه لين حطت كل وحده راسها وخمدت



في اليوم الثاني.. بعد ما خلصو حواطة الصبح و وتغدو..
عبدالله: شو رايكم انسير نشوف برهم في الكويت.. يعني نطلع شوي من المدينه.
ام عبدالله: هي والله .. يبالنا الصراحه نغير .. جان سيقان شبعنا منهاااا بسنا هيامه فيها
شويخ: انزين وانا موافقه
شما: وانا بعد ماعندي مانع بس لازم نجهز اكلناااا من هني
عبدالله: زين عيل ... تدرون بتصل في الريال الي عطاني رقمه وبخليه يشور عليه وين نسير ..
احسن من روحتنا ونحن لا دليل ولا شي

وهني حست شما قلبها انقبض ودها تقول لاخوها بلاهااا
بس صخت وتمت تناظر شويخ... ويتصل عبدالله في احمد ويكلمه ..
ويدله احمد ويقوله اذا يحتاج مساعده يروح وياه يدلهم الطريق..
وهني عبدالله تلوم في احمد وشكره .. بس احمد لزم انه ع الاقل يدلهم الطريق بنفسه
لانهم غرب ويمكن يضيعون .. وكان هذا من باب شهامته ولانهم ضيوف
يعني اكيد ما يعرفون شي في المنطقه..وبعد تصميم من احمد
يوافق عبدالله ويعطي احمد عنوان الفندق.. وبعد فتره يوووصل وينزل عبدلله لاحمد

شما: شو هاي رحله بذمتكم الحين.. لا بنستانس ولا شي .. اسميه رزه هذااا بعد
شويخ: هي والله .. صدق لي قالو لزقة عنزرووت .. اوووف
شما: امايه خلاص انا مب سايره سيري انتي وعبدالله تكشتو وارجعو..
انا و شويخ بنتم في الفندق
ام عبدالله: قصوركن بعد اتمن رواحكن .. ماشي يالله طوفن جدامي اشوف..
وعن هالمصاخه الزايده ..

عبدالله: هاااا خلصتوو ترا الريال يتريانا تحت
شما: انزين عبدالله كيف بنسير جي سياره وحده والله نحن نستحي
عبدالله: ويا ويهج منو قالج سياره وحده.. هو بيدلينا الطريق وبيرجع ما بيزمر ويانااا
شما: ممم اذا جي هانت عيل
عبدالله: يالله يالله انزين لا تحيروونا انا اترياكم تحت

وتنزل شما وشويخ وام عبدالله بعد عبدالله بشوي..
احمد كان واقف عند سيارته يرمس عبدالله ويوم شافهن خاطافات نزل راسه ..
وترخصه عبدالله وسار ركب سيارتهم ( طبعا سيارة اجار) حرك احمد سيارته
وهم وتموو يمشوون وراه ..
لين وصلو للطريق الخارجي وهناك صفت احمد حذال سيارة قوم عبدالله ورمسه قبل لا يسير
أحمد: هااا اخوي عبدالله.. شوف هاذي هي المنطفه تروح سيده..
و موولازم تكمل للاخر ..اييك طريق داخلي تقدر تمشي عليه..
وان احتجت شي كاني اقولك من الحين مووو تتردد .. دق متى ما بغيت ..
عبدالله: تسلم و الله يالشيخ ماقصرت اخوي احمد ..
ويسلم احمد ويرجع رييوس وهني اطيح عينه بعين شما الي كانت منزله الجامه شوي..
وعلى طوول رفعتهااا بس احمد تمت النظره بعينه ومشى كمل طريقه وهو لا زال يلمح نظرة شما.
. يحاول يشغل نفسه ولا تزال نظرتها مرسوومه يدامه....
من الصوب الثاني شما واهلها كانو يستمتعون بيومهم وماخلو مكان ما ساروه في البر...
ضحك وسوالف طوول الرحله.. والحلو كان الجو مغيم ويساعد على الرحلات
وفليل اتصل احمد يطمن عليهم اذا وصلو ولا ...

أحمد: قوه اخوي عبدالله
عبدالله : هلا احمد
أحمد: هااا بشر انشاءالله استانستو..؟؟
عبدالله: بصراحه .. اليوم كان راااائع يعني الجو و البر شي رهيب ..
ماقصرت مااقصرت يااحمد يوم دليتنا ع هالمكان الحلو
أحمد: شدعوه اناا الي مسوويه. يبا هذا من الله .. وانشاءالله بس ضيوفنا يرضون عنا
عبدالله: افا يا احمد والله كفيت ووفيت يا خوك
احمد: المهم اخوي ..آنه متصل اعزمكم باجر ع الغدى عندنا بالبيت
عبدالله: لااااااا والله .. لا تكلفون على عماركم مافي داعي ..
احمد: لالا ما اقبل أي اعتذار باجر انت و الاهل تتفضلون عندنا وبدون أي كلام زياده
عبدالله: والله ياخوي انا ماعليه بس عاد الاهل ثرهم يستحون..
وادريبهم ما بيطيعون.. ماعليه انشاءالله المره اليايه.
احمد:ههههه أي المره اليايه .. موو كل يووم راح انشوفكم ونعزمكم..
خلاص عيل باجر امرك الفندق واخذك ع البيت...
مع اني والله كنت اتمنى الاهل يتعرفون على بعض بس يالله .. في اليايات انشاءالله..

وفي اليوم الثاني يسير عبدالله عند احمد يتغدى واتم ام عبدالله وبناتها في الفندق..
ومره وحده يندق عليهم باب الغرفه..وتسير شويخ تطالع منوو
وحطت في بالها انهم عمال التنظيف ..بس تتفاجأ شخص ثاني يسالها
اذا هاي غرفة عبدالله الفلاسي وتجوابه هيه بس منوو ..
ويقولها تسوي درب عشان يدخل الاغراض.. وهني تزقر شويخ ع شما وامها ان ريال بيدخل..
وللحين شويخ مب فاهمه وتصرفت بدون وعي.. شوي
ولا يدخل ريال شال صينيه وحده ورى الثانيه ومدخلنه الغرفه.. ويظهر..
تسكر شويخ الباب وتسير لامها وشما ويتمون مستغربين من الي يصير منو يايب هالاغراض ..
هم مايعرفون حد .. شو السالفه ؟؟ يمكن بالغلط ..
المهم يكشفون عن الصياني ولا عيش ولحم ومحاشي وسويت وخضره يعني من كل الاصناف..
شويخ: ياربي شو السالفه .. والله يذكروني برسوم سالي يوم يابولها اكل
شما: قلنا بنت فقر.. اقول خلونا ناكل قبل لا ايي حد ويقول بالغلط وياخذونه
شويخ: هي والله خلنا نضرب ع الصينيه بالخمس وماعلينا منو يايبنه
ام عبدالله: حسيبكم الله اصبرن .. يمكن لحد ثاني.. ياربي من هالبنات اصبرن .

وطبعا ام عبدالله استسلمت في النهايه للامر و الواقع وشاركتهن بعد ماشافت محد بين ..
يعني الوليمه ميووبتلهن .... وبعد ما خلصو يلسو يسولفن لين المسا..

طبعاً عبدالله ظهر من عند احمد وهو يحاتي هله .. اكيد ما صرفو عمارهن وماتغدو..
بس يوم وصل اتفاجأ بلي سمعه واول شي خطر بباله يكون احمد موصي هله يطرشون هالوليمه..
وفعلا بعد اتنشد احمد قاله انهم هم طرشووه بما انهم ما اتفضلو عندهم في البيت..
وتلوم عبدالله زياده.. وحس ان هالريال صدق ما قصر وغرقهم بكرمة...
وتمر الايام مابين سيراتهم ويياتهم لين يحين وقت السيره و الروجووع للوطن..........

شويخ: اخيرا بنرجع للامارات والله اشتقنالها ووووايد صدق هوى داري غير
شما: هي والله غير غير بس بعد الكويت تراها حلوه
ام عبدالله: انزين يالله زهبن اغراضكن من الحين مب تحيروونا باجر الصبح..
عبدالله: شوفو ترى الساعه 12 لازم نكون في المطار ويبالنا وقت لين نوصل ..
شما : انا ماعندي شي .. اغراضي كلها زاهبه شوفوو هاي اللووث ..
شويخ : محد لوث غيرج .. خس الله
عبدالله (وهو معصب):والله بسطركن طراقات لو ما صخيتن.

والساعه عشر ونص يتحركون من الفندق متجهين للمطار..
وهناك يلقون احمد ياي يودعهم...
عبدالله: يالله اخوي احمد واسمحلنا ... جانا غثيناك...
احمد: شدعووه اخوي عبدالله افا عليك .. بالعكس نحن اخوان ومابينا هالسوالف..
يالله وخلونا انشوفكم مره ثانيه بديرتنااا..

وهني كانت شما وشويخ يالسات يرتبن الشنط وفجأه رفعت شما راسها وللمره الثانيه
اطيح عينها بعين احمد.. بس هالمره شما حست بنظره احمد تقولها : بتوحشني هالعين...
نزلت شما راسها وخذت باييد امها متوجهين للطياره..................



انتهى الجزء الثالت وترقبوا الجزء الرابع منـــ ( مافادني عذرك!)


ولكم تحياتي ملاك الكون ( انا) *a9*

[البدوي الحبوب]

تسلم يمناج اختي والله يعطيج العافيه

ونحن في انتظارج

[الغلا]

تسلميييييييييييييييييييييييييييين الغاليه على هالجزء الروووووووووعه

بانتظار التكمله .... يعطيج العافيه


اختكم
الغلا

[أنا]

اخواني البدوي الحبوب.. الغلا..

اشكر لكم المتابعه


متمنيه ان تنال اعجابكم


ولكم تحياتي وسلاااااامي انا :)

[أنا]

الجزء الرابع:

يوصولون الامارات بحفظ الله .. مشتاقين لهالارض الطيبه لبلادهم الحبيبه..

شما: فديت الامارات وفديت ريحتهااااا.. ياني ولهانه عليها
شويخ: آآخ اخيراً وصلنا.. والله حتى انا جاسني الوله ع بيتنا الي مافارقته من ولدت ههههه

وهني تذكر شما مواز ربيعتها وتظهر الموبايل من الشنطه وتشغله..
شما: حشى شكله نسى الارسال تلفوني من يوم ماسرت مارن ولازن..
بتصل لمواز فديتهاااا والله مادري عن علومها من يوم ماسرت...

وتتصل شما وماحد يرد... وترد تتصل مره ثانيه وبعد محد رد عليها
رجعت وقالت اكيد مواز مشغوله ولا بعيد عن التلفون..
يوصولون البيت وينزلون الشنط من السياره..
وطبعا يبدون يهوون البيت الي تسكرت ابوابه من يوم ماسافرو...

وفاليوم الثاني .. طبعا كل الاهل يوهم يتحمدون لهم بالسلامه
ويلسون وماشي سوالف غير عن السفر .. وتتفاجأ شما بزيارة مواز
شما( وهي تحضن مواز): مواااااااااااااز
مواز: هلا هلا والله بشمامي هلا بالغايبه.. تولهت عليج ويا ويهج
شما : فديتج والله حتى انا ...ولهت عليج العافيه..
اقول مواز امشي فوق افحجرتي ترى قوم خالوه عندنا وحشره تحت
مواز: صار يالله .. وتدرينبي ماداني الحشره

وتيلس شما تخبر مواز كل صغيره وكبيره صارت في السفر
ومواز تسمعها وتضحك على سوالفها هي وشويخ..
وطبعا ضمن هالاشياء كان الموقف الاخير الي صار في السنتر ويا احمد

شما: تصدقين مواز والله افتشلت اتخيلي شويخ هزبت الريال
حسبالها بيتحرش وهو حليله يشتغل هناك.
مواز: يشتغل في محل ادوات موسيقيه؟؟ جي هو مب راعي البلاد؟؟
شما: بلى . بيني وبينج انا استغربت بس مادري والله شو سالفته..
تصدقين وايد كان مهتم وماقصر ويانا
حتى آخر لحظه ياي المطار يسلم ع عبود..حليله والله
مواز: احم احم.. شمووه اشوفج وااايد ترمسين عنه شو السالفه؟
شما: سيري لااااااه شو شوسالفته ريال ساعدنا وانا يالسه اخبرج..
اووه تعالي تعالي انزين اراويج الي خذناه

وتيلس شما تراوي مواز الي شرته من الكويت وتعطيها السفره بالمره
واتي شويخ تشاركهم السوالف وبعدها ينزلن تحت شوي وييلسن وياخالتها وبناتها...
وبعد العشا تستسمح مواز منهم لان الوقت تاخر ولازم ترجع البيت..

شما: يالله مواز ماتميتي .. والله عاد انا هاي ماسميها زياره لازم تعوضينها
مواز: فالج طيب شمامي.. تدرين انا ودي بس عاد الوقت متاخر
وادريبهم البيت بيحتشرون عليه الحين.
شما : انزين بس وعد مب تنسين

وهني يوصل عبدالله ..يدخل سيارته البيت وبالصدفه يلمح اخته شما وربيعتها
ويعصب لان الباب كان مفتوح وشما واقفه ويا ربيعتهاااا..
ويتم في السياره لين ربيعة شما تسير.. ويستلم اخته
عبدالله: شمووووووووووووه
شما: ( اووويه)....هلا هلا عبدالله
عبدالله: شو موقفنج ؟؟ تشوفين الباب مشرع واقفه جيه لا مستحه ولا شي
شما: انزين كنت يالسه اسلم ع ربيعتي بتسير كانت .. وبعدين متغطيه و الا هم دقايق
عبدالله: دقايق ولا ساعات.. ان شفتج مره ثانيه جي والله ماتلومين الا نفسج..

ويدخل عبدالله وشما الفيلا وطبعا شما كانت معصبه من اخوهااا
لانه سوالها سالفه من ولا شي... وتمت ساكته لا تسولف ولا ترمس . .
لين سارو قوم خالتها دخلت على طوول حجرتها عشان ترقد..
ويتها شويخ تشوف شو سالفتها

شويخ: بلاج حايسه البوز؟
شما: سالي اخوج
شويخ: ليش شو صار؟ اكيد سويتي شي وهزبج
شما: بس لااه والله مالي بارض له..دخيلج سكري الباب والليت وخليني ارقد
شويخ: انزين انزين براحتج انا سايره.

واتم شما بغيضها وشوي شوي تسرح مره ثانيه بكلام مواز و سوالف السفر
وتذكر احمد ونظراته آخر مره يوم كانو في المطار...
وتمت تسال نفسها شو سبب هالنظرات ؟؟ وبعد شوي يوصلها مسج..
تاخذ التلفون تشوف منو يتذكرها هالحزه ومطرش هالمسج ..
وتقرا المسج( شمامي لو مارقدتي دقيلي)
شما: وانا اقوول محد متفيج غيرها هالعيوز..خلني ادق اشوفهل شو تباا..... الو
مواز: هلا شمامي ..
شما: هلا ..شو هالكثر تولهتي عليه ؟؟
مواز: شفتي عاد .. ما شبعت من شوفج
شما:ها ها هاا ادريبج عاد حبي مطفح عندج..
مواز: فديتج والله .. ونحن كم شمامي عندنا
شما: انزين قولي شو عندج .. وخلج من هالخريط..
مواز: شو عندي .. ماعندي شي بس كنت ابا اسولف وياج
شما: تصدقين مواز عاد قبل لايوصلني المسج كنت افكر افسوالفنا اليوم..
مواز: سوالفنا..عن؟
شما: ماشي ماشي
مواز: شموووم ليكون بس
شما: اووه شو يعني حرام ولا حرام...ترى انتي بعد حبيتي عبود يعني مب بس انا
مواز( وتحس بالسقف يطيح عليها من صدمة كلام شما): شموووه شو تقولين
شما: والله اسفه مواز ماكنت اقصد .. اسفه تدرين بي لساني متبري مني احيانا
مواز: لا عادي شمامي ولا عليج.. المهم بخليج الحين ترقدين ونتكلم وقت ثاني
شما: لا والله ماسكرت .. ادريج زعلانه مني .. اووف مني والله اني غبيه..
مواز والله ماكنت اقصد لا تزعلين مني
مواز( وماقدرت تتحمل اكثر وبدت تصيح): ............
شما: مواز موواز .. ياربي انزين ردي عليه .. عشان خاطري مواز
مواز: شو تبيني اقولج ..دخيلج خليني اسكر
شما: مواز فديتج لا تضايجين بنفسج اكثر.. صدقيني مرده عبدالله يحس فيج..
مواز: يحس؟؟ هزرج اخوج يعرف يحس...شما انا اموت تعرفين شو يعني اموت
وهو لاهبحاس فيه.. ادري اني انقش افماي بس احبه مب بيدي والله مب بيدي.
شما: ولي متى بتمين ع هالحال خافيه حبج..انا ما اقولج زخيه قوليله احبك..
بس ع الاقل اعفيني عن هالحلف الي خليتيني فيه ماروم انطق بكلمه.
صدقيني مواز عبدالله يفكر بهالموضوع بس مب لاقي الي يباهااا
ولو انا رمست يمكن اكون ساعدته وساعدتج بعد..
مواز: لا لا شما حلفتج ما تبطلين حلجج بهالسر.. واذا هو من نفسه مافكربي..
مابا حد يقوله يفكر فيه
شما: انزين قوليلي كيف تبينه يفكر فيج وهو اصلا مايعرفج؟
مواز: مادري مادري..بس انتي وعدتيني ماترمسين
شما: مابرمس وبتم صاخه وبشوف نهايتها وياج
مواز: انزين شمووه خليني ارقد الحين .. تصبحين ع خير
شما: وانتي من اهله باي
موزا: باي


وهني تفكر شما انها ترمس اخوهااا عبدالله وترشح له مواز ..
وعسى الله يكتب نصيب ومب ضروري تقوله انها تحبه وغيره
بس كترشيح واقتراح وتعزم باليوم الثاني تتحرك شوي
لانها تحب مواز ربيعتها ومايهون عليها تشوفها خمس سنين
وهي تتعذب بهالحب الي من طرف واحد.. وفعلا اليوم الثاني
وهم متيمعين في الصاله اتريت لين الضروف تسمح واتم ويا عبدالله رواحهم بترمسه ..
بس صار الي ماكان في الحسبان..

ام عبدالله: هافديتك عبدالله.. مب ناوي تعرس .. ترانا صبرنا عليك وايد. بس عاد نبا نفرح فيك.
عبدالله( وشكله ماصدق): يالله الوالده ع ايديج بس عاد منو ترضى تاخذ واحد شيبه!!
ام عبدالله: شاب عدوك ... فديتك انت تشاور بس ..
منو هاي الي تروم بس ترد عبدالله ولد ام عبدالله قولي عاد منو؟؟
شويخ: والله وااايد مستانسين بعماركم .. الوالده طلعتي مب هينه
لو درى عنج البنتاجون بتروحين فيها ترى بتهديداتج هاي
شما: جي عاده .. حبيتبي صدقها الوالده تحمد ربها الي بتاخذ عبادي
شويخ: كيفكم والله .. انا سايره عنكم وخربطو ع كفيكم
ام عبدالله: انزين عبدالله قولي شو رايك تتوكل وتخليني اشوفلك بنت الحلال؟
عبدالله: الوالده شكلج شايفه ومخلصه!!
ام عبدالله: فيدتك عارف مويمتك عدل...... دام انك فاهمني عيل بقولك..
انا اطري حصيص بنت يرانااا شو رايك فيها
شما: انصعقت
عبدالله: والله مادري انا ماعرفها بس اذا توشفينها زينه . توكلي الوالده
شما: بس عبدالله....
عبدالله:بس شو شمااا. جي البنت بلاها شي
ام عبدالله : منو يروم يقول كلمه عنها .. لاغناتي هاذيل ناس نعرفهم
يرانا من عشرين سنه وزوود .. ماجد شفنا عليهم شي ولا على بناتهم ونعم التربيه
شما: انا ماقلت شي .. من رخصتكم والي تشوفنه زين سوووه

وتسير شما لشويخ تخبرها بالسالفه وشويخ من الصوب الثاني تشتط
لانها ماداني حصه ولا تواطنها بعيشة الله..
شويخ: اتهبي الا هاي تاخذ عبوود .. هاي ماتسوى ظفره
شما: شو بتقولين عاد. الوالده الله يهداهااا بس تبا تعرسه ..
ولايهمها شي ثاني.. وحتى لو قلتيلها بتعاشي وبتقول لا وما بصدق حد
شويخ: صدق وهقه .. تخيلي حصيص تعيش ويانااا ... والله انتحر
شما( وترمس وهي مقهوره ): صدق غصه شو ياب هاي لمواز .. الا قهر وبطت جبد بعد
شويخ: مواز؟؟؟
شما: هااا..
شويخ: انتي تقولين شو ياب هاي لمواز .. ليش يعني مواز.. ليش في شي؟
شما: لالا اقصد يعني لو كنا مرشحين له مواز ..احسن عن هاي
شويخ: هي والله مواز شزينها ولا عليها رمسه.. ماشاءالله عليها ادب واخلاق وذوق
مب مويهه مثل ام دويس حصووه
شما: انزين الحين شو نسوي.. فرضي الوالده سارت تخطبها ووافقو
شويخ: والله مادري بس انسوي أي شي ولا ياخذها.. وانا بحاول ارمس الوالده
شما: رمسيها بس اشك انها تقتنع برمستج ولا تغير رايها.. واخوج شكله ماعنده مانع.

وتيلس شما تفكر شو تقول اذا سالتها مواز ..
وتدعي ربها ان شاءالله مايصير شي.. ولا تم خطبة حصه لعبدالله..

..................................................


انتهى الجزء الرابع وترقبوا الجزء الخامس منـــ ( مافادني عذرك!)


ولكم تحياتي ملاك الكون ( انا) *a9*

[البدوي الحبوب]

انــا


تسلمين اختي والله يعطيج العافيه على الجزء

ونحن في انتظارج

[الغلا]

الغاليه .. أنا


تسلميييييييييييييين على هالجزء والله يعطيج العافيه ...

بانتظار الجزء القااادم ...

اختكم
الغلا

[أنا]

الجزء الخامس..


تروح محاولات شما واختها شويخ سدى يعني اتم خطبة عبدالله لحصه بنت يرانهم تسير ام عبدالله تخطبها وطبعا رحبوبهم وهم وين يحصلون احسن عن عبدالله.. وحصه طبعا كان مثل الحلم عندها عبدالله يخطبها .. شما وشويخ كانو موجودات وبعد ما رجعو البيت سالهم عبدالله شو صار وشكله كان راضي وقابل بكل شي.. كل هذا ومواز ماكانت تدري ولا خبرتها شما عن أي شي لانها اصلا مب عارفه كيف اتقولها..بس مافي شي يتم سر ع طوول.. وفيوم تزورهم مواز البيت بعد فتره طويله ماشافت فيها شما

مواز: شمووووه يالقاطعه .. لا تسالين ولا شي.. لازم ارز بفيسي وايي اشوفج يعني!!
شما: لا الغاليه بس تدرين مشغوله ويعني قلت بعد ما بحشرج وياي..اريحج شوي من حشرتي
مواز: فديتج والله .. حشرتج تعودت عليها.. المهم شو اخباركم
شما: يسرج الحال.. لا جديد تحت الشمس

وهني اتي شويخ وتسمع شما جي تقول لمواز وبدون ما تقصد تقاطعهم
شويخ: شموه كل هالقهر و الغصه وتقولين لا شي تحت الشمس!!
شما: (وتاشر لشويخ تسكت بس شويخ ماتفهم شو تقصد شما)
شويخ: شو بلاج.. عادي مواز اختنا .. مواز دريتي عبود خطب حصوه ام الدويس
وهني مواز تطالع شما منصدمه من الي تسمعه وشما ساكته مب عارفه شو تقولها..

شويخ : بلاكن صاخات ارمسكن انا..
مواز( وهي تتصنع الابتسامه): شويخ شو ام الدويس مب زين هاي حرمة اخوج اتقوليلها جي..
شويخ: فديتج والله ليتج لو كنتي انتي حرمة اخويه بدالها .. كيف بتم انا وهي تحت سقف واحد مب عارفه .. يارب اعرس قبل لا تدخل بيتنا
مواز:هههه ..اسميج سوالف شويخ.. المهم من رخصتكم .. انا بسير بس حبيت امر اسلم عليكم
شما: مواز وين تو الناس..
مواز : ماعليه اليايات اكثر عن الرايحات

وتسلم مواز على شويخ وبعدها تسلم ع شما .. وهني تحضنها شما وحاسه بمواز .. ومواز حاسه انها مب قادره تحبس دموعها أكثر ولا تصلب نفسها و الدنيا تدور فيها ..تتركهم وتسير.. وبس تركب السياره تنفجر من الصياح ولا تهتم لوجود السايق.. صد عليها وهو خايف
السايق: ماما تعبان سير هوسبيتل..
وتاشر له مواز : لا..
وتحاول تسكت مواز بس مب قادره ..وطول الوقت تلفونها يرن شما تتصلبها بس ماترد عليهااا.. ومن الصوب الثاني شما تحاتيها وتبا تطمن .. لكن اخرها استسلمت وردت عليها..
شما: مواز حبيبتي
مواز: شما خلاص .. دخيلج لا ترمسين بالسالفه.
شما: مواز بس
مواز: خلاص شما خلاص ارجووج .. خليني الحين
شما: خلاص ماعليه باجر بنرمس... بس ديري بالج ع روحج..
مواز: انشاءالله

وتسكر مواز عن شما وهي تحس بسجاجين بصدرها .. مب عارفه تصيح ولا تعاتب ولا شو تسوي..ويمر يوم ويومين وثلاث .. والاخبار مقطوعه عن مواز . وكل ماحاولت شما تتصل تشوفه مغلق.. اخرها قررت تزورها وتطمن عليها..ويوم سارت.. اتفاجات ان مواز سارت العين بيت عمها.. غريبه ماخبرتها مواز..بس شافت شما ان روحتها افضل يمكن تهدي من نفسها شوي.. ونفس الفتره يتحدد موعد ملجة عبدالله على حصه.. ويوم الملجه عبدالله كان فرحان انه اخيرا بيستقر.. ويملج ويوم يرجع يباركون له خواته ويتمنون له حياه سعيده.. ويباركون للعروس ..

شويخ: فديت عبود.. كيف بيروم يعيش وياهاااا ..
شما: شويخ .. عبود الي بياخذها مب انتي
شويخ: بذمتج انت راضيه عاد .. والله اني اتمنيتله وحده احسن منها.. عبود غالي والله ويستاهل الاحسن
شما: تدرين شويخ بقولج شي بس توعديني ماتخبرين حد..
شويخ :بدون ما اوعدج .. قولي
شما: صح شي ما منه فايده نذكره الحين بس بعد بقولج..


وتيلس شما تخبر شويخ عن سالفة مواز وعن حبها لعبدالله .. وتتحسر شويخ انها ماكانت تدري ولا جان ما قبضت لسانها وقالت لعبدالله..
وبعد اسبوعين تبدا الدراسه وترجع مواز من العين .. بس محاولتها للنسيان كانت فاشله لانها اول ماشافت شما تذكرت كل شي ورجعت صورة عبدالله جدامها.. اما عبدالله فكان عايش عالم ثاني في اول فترة الملجه لكن بعد شهر..

عبدالله: سلام عليج حصه
حصه: عليك السلام وينك من الصبح لا تلفون ولا غيره
عبدالله: والله كنت مشغول شوي ويا العمال
حصه: شو عماله بعد.. وانت ما تخلص من الشغل..حشى مب حال كله شغل وشغل
عبدالله: فديتج شو اسوي تراني لازم اشتغل
حصه: هي هي تشتغل حقهم وهم ولابحاسين فيك .. بس يعرفون ياخذون الفلوس
عبدالله :منو العمال؟؟.. يابوج مانباهم يحسون نباهم بس يشتغلون
حصه: انا اطري هلك مب العمال..
عبدالله: انزين شو فيها تراهم هلي ولازم البيلهم مطالبهم .. ولاتنسين اني مسؤل عنهم
حصه: زين بس عاد مب جي.. باجر لي تزوجنا انا الي بوقفهم عند حدودهم ماشي لعبه يعني
عبدالله: حصه الله يهديج .. شو توقفينهم عند حدودهم وغيره .. جي داخلين حرب نحن
حصه: هااا اشوفك مارضيت عليهم .. لازم ولد امك حبيب خواتك تراك
عبدالله: الوو .. الووو

تسكر حصه افويه عبدالله وهي معصبه .. وهني مايعيبه عبدالله تصرفها ويطرش لها مسج( عيب هالحركه) وبعدها اتم تتصل بس مايرد عليها..كان عبدالله ابدا مايحس بالراحه مع حصه .. معظم الوقت ضرابه ومشاكل..حاول انه يغير من اسلوبها بس حصه كانت لا تطاق ..تسوي أي شي بس تضارب وتحاول تكون هي صاحبة الراي دايماً .. عبدالله تعب وياها وااايد وبعد ما يأس مالقى غير شما يكلمها محاوله اخيره انها ترمس حصه علا وعسى يفيد وتسمع منها..
عبدالله: هلا شمامي .. ها شو عندج.. مشغوله
شما: لاابدا .. حياك..
عبدالله: شو هااا عندج في الكمبيوتر
شما: برنامج للصوت.. اباغم و اسجل صوتي نفس الوقت .. شو رايك اتجرب؟
عبدالله: حشى مالي في هالسوالف.. وانتي يعني ماتيوزين عن هالخرابيط مالج
شما: شو اسوي اخوي والله احب هالاشياء .. وناسه هذا اصلا نوع من الابداع
عبدالله: انزين تركي هالخرابيط عنج واباج بسالفه
شما : ان شاءالله و تامرني امر

وييلس عبدالله يشكي لشما عن اسلوب حصه .. وانه خلاص ماعاد فيه حيل يصبر على هالطريقه في التعامل .. وطلب منها ترمس حصه وتفهمها انهم اذا مب متافهمين وبيتمون بين الضرابه والمشاكل من اولها ينفصولون دامهم ع البر... بس شما حاولت ويا اخوها تقنعه ان حصه بتتغير بعد الزواج وان شاءالله بتختفي هالخلافات.. وانها امور عاديه تحصل في بداية كل حياه زوجيه
ورغم هذا وعدته انها ترمس حصه .. وفعلا زارت شما حصه افبيتهم ويلست وياها وبطريقه بدون ماتحس حصه ان عبدالله مشتكي لاخته .. حاولت شما توصل رسالة عبدالله.. وهني ثارت حصه.. وقامت تعق رمسه سم على شما وانها تدخل بينها وبين ريلها

حصه: شمووه عن هالرمسه .. وبعدين انتي مالج حايه توصيني ع ريلي
شما: حصه انا ما ادخل بينكم .. وانتي حره ويا ريلج
حصه: قولي انج مقهوره مني يالعانس.. صدق الناس حسد
شما: تدرين . انا ماعندي سالفه يوم زرتج.. واكليها بروحج.. ع العموم انا اسفه ومن رخصتج
حصه: مع السلامه وسلمي ع الوالده

ويوم ترجع تلتقي بعبدالله .. وطبعا هو شافها يايه من بيت قوم حصه.. وتنشدها اذا رمستها.. بس طبعا شما ماقالتله شي من الي سمعته من حصه وانها اصلا ما حشمتها.... وطمنت اخوها.. لكن عبدالله شاف معاملة حصه تسوء يوم عن يوم

حصه: شحالك عبدالله
عبدالله: الحمدالله بخير شحالج انتي
حصه: الحمدالله... وينهن عيل خواتك بعدهن مسترغدات في السناتر؟
عبدالله: خواتي مب مال هالسوالف .. شويخ في المدرسه وشما في الجامعه
حصه: هي في الجامعه.. بتلقاها الحين سايره ويا ربيعاتها السينما
عبدالله: لا الغاليه خواتي عارفات حدودهن ومالهن في هالسيرات
حصه: عيل شو رايك ربيعتي شايفه من يومين شمووه في السنتر
عبدالله: مستحيييييل . ربيعتج جذابه
حصه: هي صح نسيت انك حبيب خواتك.. زين عيل سير واتنشدها بروحك
عبدالله: حصه انتي ليش كل مابترمسين بتحولينها لمصيبه ومشكله.. ودي مره ارمسج عنا .. لازم يعني تيبين طاري فلان وعلان.. تراني والله تعبت انا.. بس مليت
حصه: ملييييييييييت؟؟.. زين عبدالله دامك مليت حتى انا مليت جي عاد طايحه انا ولا شايف نفسك احسن عني..... سير والي يبيعني مره ابيعه بتراب مليون مره
عبدالله: انا ماقلت بايعنج بس شوفي اسلوبج كيف.. يابنت الناس شكلنا مابنتفاهم وانا اشوف دامنا ع البر ننفصل احسن
حصه: ابركها من ساعه..( وتسكر في ويه عبدالله )

وهني ينقهر عبدالله منهاا ويقرر انه ينفصل عنها..ويحلف يمين ما يرجع بقراره هذا لو تنطبق السما ع الارض لانها انسانه مالها اسلوب في التعامل ابداً.

عبدالله: الوالده ........ شوفي بقولج رمسه ووصليها لاصحابها
ام عبدالله: خير فديتك بلاك معصب .؟؟ شو السالفه؟؟
عبدالله: خلاص انا وحصه بننفصل .. وبلغيهم بهالشي
ام عبدالله: شووو ؟؟ شوو تقول ؟؟؟ ليش شو صار..؟؟
عبدالله: ماصار شي .. بس نحن ما بنتفق ويا بعض وننفصل الحين دامنا ع البر اشوف احسن ترى
ام عبدالله : ياويلي عليك اوليدي.. شو تباهم يقولون عنا الناس طلق حرمته وهم بعدهم مالجين
عبدالله: الوالده الله يخليج الي سمعتيه وصليه وخلاص .. تراني مب ناقص انا

ويطلع عبدالله من هني وتسير ام عبدالله لبناتها تخبرهن بلي قاله لها عبدالله..وهي تصيح مب عارفه شو تسوي... تتريا يمكن الله يهديه ويغير رايه ولا توصل الرمسه لاصحابها.. وحتى لو سالوها ماتعرف ترد عليهم لانها ماتعرف شو السبب... وهني تبدا شما تخبرها عن السبب الي خلى عبدالله ياخذ هالقرار.. بس ماقتنعت ام عبدالله واصرت انها تتريا ولدها عبدالله لين يرجع ويخبرها بنفسه بالسبب وفعلاً يوم رجع سارتله ونشدته ورد عليها بنفس الرد الي قالته شما.. وهني قالتله الوالده اصبر ع الاقل اسبوعين يمكن تغير رايك .. لكن عبدالله اصر ان الموضوع ينتهي باسرع وقت.. وبجذي سارت الامور وتم طلاق عبدالله وحصه ..
عبدالله ماكان يحب حصه بس رغم هذا أثر عليه هالانفصال .. وتم منزوي ع نفسه لا ييلس وياهم ودومه مب مشتهي الاكل.. حاولت امه تيلس وياه تاخذ من خاطره بس بدون فايده... واخيرا نجحت تقنعه ييلس ويا خواته خاصه شويخ عندها امتحانات ثانويه عامه ولازم يوفرون لها جو مناسب ويخلونها تحس بان كل الامور بخير... وهني قدرت ام عبدالله تخلي عبدالله ينزل وييلس وياهم...

شويخ: شموه شموه شوفي .. عبدالله نازل ..
شما( وهي يالسه تقرا المجله ): يمكن بيظهر
شويخ (تكفخ شما): فقدتج حد يظهر بجلابيه...
شما وهني تنتبه : هاااااااا.. هيه والله شكله ياي ييلس ويانا . غريبه!!!
شويخ : انزين صخي بس .. عن يسمعنا

وهني يوصل عبدالله وياه الوالده
عبدالله: هلا بعيايز خيبر
شويخ: نحن عيايز خيبر ياشيبة البصره!!
شما: ههههه لا والله شواخي شكلج صدق ينفع عيوز خيبر
شويخ: شوفي عمرج قبل ويا ويهج
ام عبدالله: بلاكن غاديات شرى الديج والديايه ...
عبدالله: الوالده .. هاذيل لو ما تضاربو يموتون..
ام عبدالله: زين انا سايرة ازهب العشا..
شما : وانا يايه وياج.. اليلسه ويا عيوز النار تقصر العمر
شويخ: نار تحرق عدوج .. صدق ماتستحين
عبدالله: انتووو ايييييييييييييييييه شو هالرمسه.. سيري يالله يا ام اللسان طويل وانتي الثانيه سكتي ولا هالسان بينقص..

وتسير شما ويا ام عبدالله ويتم عبدالله ويا شويخ رواحهم في الصاله.. يطالعون التلفزيون
عبدالله: زين شويخ متى تبدا امتحاناتج؟
شويخ: مم ماباقي شي بعد ثلاث اسابيع ويومين ان شاءالله
عبدالله : زين والله حاسبتنهم بالتمام..
شويخ: شو اسوي كل يوم يمر محسوب علينا .. الله يفكنا بس .. صدق هم وبينزاح
عبدالله: هيه بس عاد نبا نسبه تشرف .. مب تستوين مثل هالفاشله شمووه.. ماخلت شي ماجربته رسوب دور ثاني نجاح جوازاً .. كل شي مررره . مب مخليه شي بخاطرها يمعت طماط السوق وحطته بشهادتها ..
شويخ: ههههههههه وينها اتي تسمع.. والله تقطعك بمخالبهااااااا..
عبدالله: وانا صادق والله حتى الجامعه مافلحت فيها كل يومين مطرشين لنا رساله يؤسفنا .. خاطري مره يقولون يسعدنا .. الا من قرادتهااا بس فالحه حق هالخرابيط مالهاا
شويخ: اسميك يا عبوود استلمتها عدل..
عبدالله: شو عبوود ... شيخوه كم مره قايلج لا تقولين عبدوود اصغر عيالج انا!!
ويرن موبايل عبدالله ويطالعه ولا يشوف مكالمه..
عبدالله: اووه مكالمه هاي... خلى اشوف . خير اللهم اجعله خير.. ألوووو
أحمد: الوو ..قوه عبدالله شلونك انا احمد من الكويت
عبدالله: هلا هلا احمد .. طيب الله يخليك.. شخبارك انت .. عساك بخير؟
احمد: الحمدالله بخير.. اسمحلي والله ادري مقصر في سؤالي..
عبدالله: والله ياخوي انت الي اسمحلنا.. شخبار الكويت واهل الكويت؟
أحمد: يسلمون عليك.. وانشاءالله قريب راح اييكم الامارات ..
عبدالله: والله .. زين زين متى عاد خبرنا لازم نضيفك .. ونكرمك.
احمد: ع الاسبوع الياي ان شاءالله .. ولما اوصل راح نكون ع اتصال..
عبدالله : خلاص تم
أحمد: زين اخوي عبدالله ماتامر بشي من الكويت؟
عبدالله: مايامر عليك عدو وتكفينا شوفتك بدار بو خليفه ( الله يرحمه)..
أحمد: ايه والله من يوم ماتوفى وما مازت الامارات ..

ويسكر عبدالله .. وتم شويخ تاكل بنفسها كان يرمس منو .. ومنو هذا الي بيي من الكويت وتسال عبدلله..

شويخ: عبدالله ماحيد عندك معارف في الكويت
عبدالله: وانتي شلج صدق ملقووفه.. لازم تحشرين نفسج افكل شي
أم عبدالله : بلاك عبدالله محتشر .. شو سوت شويخ
عبدالله: الوالده صدق الله عطاج بنات كل وحده اردى عن الثانيه .. لو يبتيني انا بس جان اسد..
شويخ: صدق مغرور..
عبدالله: زين الوالده نسيت اخبرج .. تذكرين الريال الي حشمنا يوم كنا في الكويت.. ؟
ام عبدالله: الا اذكره .. حليله ماقصر صراحه .. بس بلاه؟
عبدالله: من شوي داق عليه .. يسلم والاسبوع الياي بيي الامارات
ام عبدالله: حياه الله .. لازم عاد تعزمه ونوجبه
عبدالله: انشاءالله ... الا وين العشا متنا يوع..
شويخ ( تستغل الفرصه عشان تسير تخبر شما) : انا بسير اشوف شمووه اساعدها

وتسير المطبخ.. وشما كانت يالسه تسخن الحليب.. واتيها شويخ
شويخ: شموه شموه شموه لحقي لحقي
شما: بسم الله بلاج .. عفريت يركض وراج .. بلاااااااج؟؟
شويخ: شمووه تذكرين هاك الريال؟؟
شما : هيه اذكره ... ويا ويهج أي ريال شي مليون ريال..
شويخ: شمووه الريال الي في الكويت .. اوووه هاك الي شفناه في الطياره .. شمووه عاد اذكري
شما: زين بلاه؟
شويخ: توه اتصل لعبووود يقول بيي الامارات
شما (وينجب عليها الحليب وهو حار) : آآآآآخ..احترقت
شويخ : خيييبه تخيب العدو...هذا وهو ماوصل وجي .. هذا شكله عفريت مب ادمي.. حووباته شموه حوباته..
شما: بس لااااه ..انتي بعد..
شويخ: الحين هذا يزاي؟؟ بس انا سايره مابكملج السالفه انزين..
شما: لالا شواخي انا اسفه .. يالله بسرعه كملي انزين
شويخ: شو هالعياره توج ماتبين تسمعين.. انزين خلينا نتعشا وبعدين بخبرج.. ترى عبوود ميت يوع وماصدقنا ييلس ياكل لقمه ويانا..

وتيلس شما فكرهاااااا سارح وحاسه بسعاده غريبه ... ودها تسال عبدالله متى بيي وودها تتكلم بس تمت ساكته وتحاول تبين عدم المبالاه بهالمووضوع.. وتنتظر تسمع أي كلمة من عبدالله بطاري احمد..



.................................................. .................


وترقبوا الجزء السادس منـــ ( مافادني عذرك)



ولكم كل التحيه و السلام

ملاك الكون

[أنا]

الجزء السادس..



أحمد يعجل اموره هناك وياخذ اجازه .. ويحجز على اقرب وقت لمطار دبي .. ولحظه وصوله يلمح نظرة شما له.. يبتسم ويقول بخاطره: والله اشتقت ...
وطبعاً يستقبله عبدالله في المطار ويحلف عليه ينزل عنده في البيت بس احمد رفض وقاله انه مب روحه وربعه وياه .. هني عذره عبدالله بس رغم هذا حلف عليه يتفضل عنده الغدى

عبدالله ( يتصل فالبيت ): شو السالفه محد يرد عليه .. وين سارو اهل البيت ؟؟
أحمد: خير عبدالله
عبدالله : ماشي والله .. بس اتصل ومحد يرد عليه.. جنه الا محد في البيت
احمد: شدعووه هاجرو!!
عبدالله: وانت الصادق نحن هني عندنا موضة التطنيش .. وتلفون البيت عافووه الناس..
أحمد: أي والله وانت صاج ...
عبدالله: يالله قربنا نوصل...

ويوصلون البيت وينزل عبدالله ويقرب عبدالله باحمد .. ويدخل الميلس..يسير عبدالله يشوف الوالده وينها ويعطيها خبر ان عنده ضيف ع الغدى..مايشوف حد في الصاله غير شما.. يتنشدها عن الوالده وتخبره انها سارت بيت يرانهم......فياكد عليها تبلغها تزهب الغدى لان عنده ضيف..

عبدالله: شمووه لاتنسين خبري الوالده ..
شما: يابوي قالنالك انشاءالله بخبرها وبنبيض ويهك لا تحاتي الغدى...
عبدالله: زين انا بسير خليت الريال روحه في الميلس... ياخوفي يكون رقد من تعب السفر
شما( وهني انتبهت): هااا جي ضيفك نازل ترانزيت؟؟
عبدالله: شو ترانزيته .. ياي الريال من الكويت توه .. بس انا حلف عليه يتغدى عندي
شما( وحست بنغزه بقلبها): من الكويت؟؟
عبدالله: المهم انا ساير ولاتنسين الي وصيتج عليه..
شما : انشاءالله

وتسير شماااااااا المطبخ وتشرف ع الغدى ولا تبلغ امها واهتمت هي بكل صغيره وكبيره ..ويوم يت ام عبدالله وشافت شما جي مرتبشه في المطبخ استغربت لان مب من عاداتهااا وسالتها شو السالفه؟؟

ام عبدالله: شمااااامي فديتهااااااا .. غاديه حرمه اليوم خير فديتج شو عندج .. اكيد ربيعاتج بيون الغدى؟؟ بس ماحيدج تهتمين جي
شما: لا الوالده فديتج .. بس عبدالله عنده ضيف وانتي محد .. عاد انا خفت تبطين .. قلت اقوم بالازم .. تعرفين بعد لازم نحشم الضيوف ونبيض ويه عبدالله ..
ام عبدالله: بارك الله فيج شمامي .. والله وكبرتي وعرفتي السنع
شما: فديتج ام عبدالله انا شمااااا بنت بو عبدالله مب لعبه .. امبوووني اعرف السنع ..
ام عبدالله: ادريبج تعرفينه . بس عاد لو تودرين عنج هالهيازه زين تسوين..
شما: يوووه عاد مابغيتي هههه..
ام عبدالله: زين عيل كملي معروفج وانا بسير انسدح شوي.. والله رويلاتي متورمات عليه ..
شما: مب منج من الهيامه من صباح الله... زين سيري ولا تحاتين بسوي انا كل شي..

وهناك كان عبدالله يالس ويا احمد ودق سوالف عن علوم الكويت والبورصه و التجاره

عبدالله: الا ماقلتلي احمد شو الاسهم عندكم في الكويت واخبار التجاره؟؟
احمد: والله يا عبدالله انا واااحد مالي ابد في هالامور.. الوالد الله يرحمه كان تاجر بس ماخلفه علي..
عبدالله: افااااا جي عاد ؟؟
احمد: والله شنو اقولك.. بس عارف انااا غاوي فن .. تصدق عاد بالكويت والله يهاوشوني ع سبة هالسوالف . بس منو يرمس .. مادري احس بالطرب بدمي
عبدالله: ههههه الله يهديك .. طرب عاد؟؟ زين يوم بعرس انشاءالله بوفر الفرقه وبخليها عليك
احمد: ايييييييه اكيييييييد فالك طيب .. والله اسويها لك خووووش حفله وخاصه وحصريه لعرس عبدالله
عبدالله : تسلم والله .... زين ماخبرتني وين تشتغل؟
احمد: اناا عندي محل للموسيقى داش فيه شراكه مع الربع والحمدالله يكد خير والله وماشي سوقه.. اذا تذكر بنفس المجمع الي شفتني فيه اول مره
عبدالله: هيه هيه تذكرت.. زين انزين حلو المحل .. والاهم انك فاهم شغلت هالسوالف
احمد: ايه صحيح .. حلو تشتغل بشي انت تحبه... مثل صاحب محل كمبيوتر وصاحبه مبرمج حاسب آلي .. الموسيقى نفس الشي..
عبدالله : بااااااااالضبط.... بس لا تيب لي طاري الكمبيوتر لاني تعقدت منه
احمد : خييييير ليش عاد.. بالعكس الكمبيوتر لغة العصر وحلو تتعلمه.
ويبدأ عبدالله يخبر أحمد عن سالفة النت و الكمبيوتر وكيف بغى يروح فيها بسبة الجات .. وهني أحمد يتم يقنع عبدالله كيف من الممكن انه يستفيد من النت وبالفعل قدر يغير وجهة نظر عبدالله عن الكمبيوتر وبالعكس حمسه زيادة ووعده انه يساعدة بحكم خبرته الكافيه لتعليم عبدالله من البداية في طريقة تصفح المواقع المفيده له.. وهني يقترح عليه أحمد اييب كمبيوتره ويباشر في تعليمه .. بس طبعا عبدالله اعتذر لان كمبيوتره ثابت .. لكن تذكر لاب توب شما .. وسار عسب يتنشدها عنه .. وما شاف حد غير شويخ يالسه تطالع التفلزيون في الصاله

عبدالله: شويخ .. وين شموه؟
شويخ: مادريبها اعتقد في المطبخ.. خير اخويه شو بغيتها؟
عبدالله: ماشي.. زين ماتدرين وينه كمبيوترها..اباه شوي
شويخ: اضني فالحجره .. صبر بييبه لك
عبدالله : بسرعه زين .. وجيكي بالمره مافيه صور ولا خرابيطكم..

وتسير شويخ وتيب اللاب توب لعبدالله .. وياخذه للميلس.. ويلسون عليه هو و أحمد.. ومر الوقت بسرعه وهم مب حاسين بعمارهم.. واكثر شي جذب عبدالله مواقع البورصه و الاسهم الي فعلاً شدت انتباهه.. كل شي بثواني يعرفه بدل ما يتصل ويتريا حد يرد عليه باخبار السوق.. واحمد ماشاءالله عليه كان عنده خلفيه في بعض المواقع وطريقة الاشتراك فيها .. ولاااا وفوق هذا فتح لعبدالله اميل للمراسله .. يعني هاي النقطه ساعدت عبدالله انه يتخلص من الفاكس و لا البريد.. مشكلة عبدالله الي تعود عليه استمر فيه .. وماكان يحب يجرب هالامور ولا يفطن فيها .. بس يوم بسطها له أحمد حب يغير من طريقته و اسلوبه التقليدي..
شوي ولا يسمع عبدالله حد يدق الباب.. اترخص عبدالله من احمد اكيد الاهل وبيحطون الغدى.. يظهر عبدالله ويتم أحمد روحه في الميلس يالس ع النت.. شوي ويسمع صوت يطالع ولا رسالة فوريه من الماسنجر.. وهني ينتبه انه الماسنجر شغال ..الظاهر انه يفتح اتوماتيك يرفع البوكس ولا ماشاءالله امة محمد كلها موجوده والي ضحكه ان كل الموجودين مرقوعين ببلوك... ويسمع الصوت مره ثانيه ..يرفع بوكس الرساله ..
(())bint_alwady(()): هاااااايووووووووو 
(())bint_44(()): ؟؟؟؟؟؟؟
(())bint_44(()): يالسباله شموووه ردي عليه
(())bint_44(()): اييييييه وينج
(())bint_44(()): يهد ايهدج... شمووووووه
(())bint_44(()): باي باي .. والله لارقعج ببلوك عشان تعرفين هالمره كيف اطنشيني

أحمد: بل بل بل .. ذي بينه ولا ينيه .. هههههه
ويسكر احمد الماسنجر وهو يحس انها مب حلوه .. مهما يكون هاي خصوصيات .. لكن الي ماقدر احمد يمسك نفسه عنه .. انه يظهر ورقة وقلم من جيبه ويكتب الاميل الي كان مسجل به الماسنجر.. وحط في باله يمكن يكون للبنت الي شافها وان ماكانت اكيد بتكون اختها .. يعني شي قريب منها .. ويسكر بعدها الكمبيوتر ويتريا عبدالله .. يتغدون ويريحون .. وبالعصر بعد الصلاه يظهرون يتمشون .. وبعدها يوصل عبدالله أحمد الفندق عن ربعه الشباب..بس بعد ما وعده انه يمره مره ثانيه ..

في البيت كانت شويخ يالسه افحجرتها تذاكر ..لان امتحاناتها قربت وشما محتشره تضارب الخدامه..
شما: يالقرده انا مب قايلتلج ما تحركين شي بدون شوري.. وين وديتيه هاااااا؟؟
سورياتي: ماما انا والله يشيل .. شوف مني يمكن يحطي انتي
شما: وعساج انشاءلله ما تنشلين .. يعني انا حطيته هني وين سار ..سوى ريل ومشى؟؟
سورياتي: والله مايدري ماما انا مايشوف شي..خبر ماما شيكا ماما كبير يمكن يشوف
شما: اوووووووووف .. يغربلها من عيشه .. شو هالحاله .. حشى مب بيت مافي شي يتم ع حاله

واتي ع حشرت شما شويخ تسالها شو بلاها منو ماكل عشاها ع هالتزعيج

شويخ: اييييه بلاج انتي جي محتشره.. عنبوه والله ماعرفت اقرالي كلمتين منج
شما: وين اللاب توب .. حاطتنه هني.. وهاي فقدتها مادري وين ودته ..ادوره من الصبح ولاني لاقتنه
شويخ: اوووه صح نسيت اخبرج .. عبود كان يباه الظهر و وديته له .. والظاهر تم في الميلس
شما: شووووووووووووو .. عبود خذاه
شويخ: هيه الظاهر كان يبا النت لانه شل واير النت وياه .. طرشيها خليها اتيبه لج.. وخلينا انذاكر
شما: سورياتي سيري مجلس هناك كمبيوتر يبيه .. وديري بالج وانتي شالتنه عن يطيح وينكسر لاكسر راسج.
سورياتي : شوف ماما انته كيف.. انا يقول انتي مافي معلوم كله بس جنجال جنجال
شما: عن طولت اللسان.. جلبي ويهج يالله

واتيب الخدامه الكمبيوتر .. واتم شما ع اعصابها تبا تعرف ليش خذ عبدالله الكمبيوتر.. ولا ترتاح الا يوم تساله اول ما تشوفه فاضي.. وتعرف شو السالفه..



.................................................. .................


وترقبوا الجزء السابع منـــ ( مافادني عذرك)



ولكم كل التحيه و السلام

ملاك الكون





.................................................. .................


وترقبوا الجزء السابع منـــ ( مافادني عذرك)



ولكم كل التحيه و السلام

ملاك الكون

[أنا]

الجزء السابع..





وفعلا تسال شما اخوها ويرد ويجاوبها عبدالله انه كان يبا احمد ( الضيف) يراويه اشياء في النت .. طبعا شما بداخلها كانت مستانسه بس نفس الوقت مب عارفه سبب هالوناسه او ليش هي مهتمه اصلاً..

شما: زين يا عبدالله .. اخيرا يعني قررت انك تستفيد
عبدالله: يالله بنجرب ونشوف هالتكنولوجيا
شما: عبدالله دامنا رواحنا وانت فاضي بغيتك بسالفه
عبدالله: خير انشاءالله .. شو عندج.. بس هااا قبل لا تقولين جانه شي يغث من الحين اقولج لا ترمسين
شما: لالا والله هو شي يخصك بس مادري مجرد راي يعني لا اكثر
عبدالله: مافهمت؟
شما: شوف انا مادري انت شو رايك في سالفة الزواج بعد انفصالك .. بس الي عندي اني مرشحه لك وحده وهي خيرة البنات
عبدالله: بعـــــــــــد زواج لالا الله يخليج خلاص فضيها سيره
شما: خلاص براحتك اخوي.. هو كان مجرد اقتراح .. المهم انا بتخرص ورايه امتحان ميتيرم باجر
عبدالله ( وهو يضحك): زين عاد شدي حيلج وبالتوفيج.. طبعا لو درستي

وتترخص شما ويتم عبدالله يتذكر حصه والشهر الي قضاه وياها وكل سوالفها ومشاكلهم .. ويحس بالقهر ليش ربعه كلهم توفجو الا هو للحين ماعرس .. هو يتمنى يلقى بنت الحلال بس خوفه تكون مثل حصه ونفس اطباعها .. ويتردد في اقتراح شما برغم انه كان يباها تلح عليه اكثر.. اما شما فكانت تحاول انها تلهي مواز عن قلبها عبدالله وتشغلها بالدراسه وهذا كان سبب خلى شما تهتم بدراستها اكثر و اكثر.. ويوم السبت كان عندهم تسليم بروجكت الفيجول كميونيكيشن وطبعاً لازم يخلصونه خلال يومين .. وكان باقي جزء تخلصه مواز على الي انتهت منه شما .. وبنفس الوقت كانت شما مزحومه بواجبات لازم تسلمها وماتروم تظهر من البيت فطلبت من مواز انها اتيها البيت تاخذ البروجكت عسب تكمله .. مواز طبعا ماطاعت لانها حالفه ماطب هالبيت من آخر مره بس الحايه خلتها تكفر وتستسلم وتوافق في الاخير .. وع الساعه 10 فليل بوقت متاخر يت مواز لشما
مواز: اسمحيلي شمامي والله ييتج وقت متاخر .. شو اسوي ماحصلت حد اييبني
شما: لا عادي فديتج .. انزين هاج هاي الاوراق وهذا الفلوبي مسيف عليه باقي الشغل
مواز : خلاص ماعليه بشوفه وان مافهمت شي ترانا بنكون ع اتصال
شما : اوووكي .. انزين تفضلي بتمين جي ع الباب
مواز: تستهبلين انتي .. تبينهم يقصون رقبتي زين خلوني ايي ويا بابو .. يالله باي
شما: اوووه لحظه نسيت فلوبي الصور.. دقيقه بييبه وبيي
مواز: ايييه بسرعه والله تحيرت تراني

وتسير بسرعه شما اتيب الفلوبي ويشوفها عبدالله .. يتنشدها شو سالفة ربيعتها يايه ويا دريول هالحزه روحها بدون حد من اهلها .. فتقوله ان ماعندها حد ومضطره اتي تاخذ الاغراض عسب البروجكت.. فينش عبدالله وخذ السويج وقالها خلاص انا بمشي ورى سيارتهم لبيتهم .. الوقت ليل و الدنيا مالها امان.. باجر لو صار شي بيقولون اهلها كانت افبيتكم .. وتخبر شما مواز ان عبدالله ملزم يوصلها..
مواز: شووو .. لا يابوج خله يستريح .. تخيلي حد شافه غير يقصبوني
شما: لالا ماعليج مواز بس هو يحاتي لانج انتي يايه بيتنا وبتردين روحج ويا الهندي .. ولاديرين بال انشاءالله مابيصير الا الخير..

طبعا مواز مب يايزلها بس ماتروم تقول شي ويتم عبدالله يمشي وراهم لين وصلت بيتهم .. فتح الدريول الباب عسب تدخل ورجع للسيارة يدخلها الكراج.. وعبدالله ماتحرك لين ما تدخل مواز .. نزلت مواز وهي موطيه راسها شكرت عبدالله ودخلت بسرعه البيت وقلبها مقبوض.
ونفس الوقت شما دقتلها تطمن عليها وصلت ولا ..

شما: هلا موزا ها وصلتي ؟
مواز: هيه وصلت من شوي ..
شما: زين يالله شوفي شغلج وانا تراني مابرقد ان مافهمتي شي دقي عادي أي وقت
مواز: اوكي اوكي

وتيلس مواز بين اوراقها والملفات جدام الكمبيوتر لكن مارامت ادقق في شغلها وعبدالله شاغل بالها.. اما شما فكانت هي بعد مشغوله بالواجبات لين صلاة الفير صلت وردت تكمل .. وما نتبهت الا و الساعه 6 الصبح نزلت تتريق وتاخذ بريك شوي.. وهي في المطبخ سمعت صوت طلت ولا تشوف عبدالله ..
شما: بسم الله الرحمن الرحيم.. من وين ظهرت انته .. والله زيغتني
عبدالله: جي شايفه يني جدامج؟؟ .. ييت من المسيد وطارت النوده من عيني ..
شما: زين عيل بزهب الريوق وبنتريق شو قلت؟؟
عبدالله: تم.. بس هاااا ابا بيض عيون وخليه يستوي عدل.. وداقوس بو شاهين عليه
شما: فالك طيب .. بس انا بسويلي بيض قرص ويا الجبن .. تدريبي احب اخبص الاكل ههه
عبدالله ( وينبه شما وهي سايره) : شموووه لا تنسين الجاي

ودقايق ولا شما يايه ويا الوليمه ويلسو اكل وسوالف وضحك على سوالفهم قبل
وكل واحد يعاير الثاني بلقبه يوم كان ياهل

عبدالله: تذكرين شموه يوم دستي ببطن الجلب وعضج من رويلاتج ورجعتي البيت بصياحج
شما : ههه هيه والله اذكر .. احلى شي لا كنت لابسة وانت بكرامه جوتي بنت خالوه الجعب وجيف ما اييه افبطنه .. بس اسميه انتقم مني
عبدالله: عفاني الله من يومج خديه انتي.. ولا ضنتي بتعقلين .. الله يعين بس كيف بتربين عيالج باجر هالمخدي.
شما: طالعو انتو .. عيالي انا الحين مخدي ولا عيالك المصرقعين ... ماعليه باجر ان ما ذكرتك بشوف ياقحطه
عبدالله: قحط الله راسج .. قولي آمين.. وعيالي وينهم بس .. خلهم ايون قبل وعقب يصير خير
شما( وتذكر سالفة أمس): تعال صح نسيت اتنشدك شو صار أمس .. وصلت اربيعتي؟
عبدالله : هيه وصلتها.. بس مستغرب جيف اهلها مخلينا روحها تظهر هالحزه ويا الدريول؟
شما: مسكينه مواز والله تراها يتيمة .. ويالسه عند خالوتها وو خالتوها حرمه عوده وريلها ما ايي الا في الويك اند.. وبناتها معرسات .. يعني فديتها هي الي قايمه بالبيت .. وامس كانت مضطره اتي تاخذ البروجكت .
عبدالله: بس يبان عليها بنت حشيم ومتربية .. الله يوفجها ... الا ما قلتيلي هيه وياج فالجامعه؟
شما: موااز؟؟ هاي اصلا صديقة العمر.. انا وهي رباعه من يوم الثانويه لين الجامعه عمرنا ماتفارجنا ابد .. واحمد ربي يوم رزقني باخت شراتها
عبدالله: الله يدوم عليكم هالصداقه .. زين بعد يا شمووه طلعت فيج حسنه
شما: جي بلااااااااااااااايه .. امبوووني كلي حسنات انا .. صدق انك ما تنعطى ويه
عبدالله: زين زين كلتينها حشى مب لغابه عليج.. دوووج هاي خبزتج وكليها روحج انا ساير
شما: خيبه على وين تو الصبح
عبدالله : ساير المزرعه ... اجابل الرجاب ولا اجابل ويه الدبش
شما: ماعليه يا عبود .. والله اخبر العيوز عليك
عبدالله : والله ما قلت شي غلط .. حمدي ربج المفروض الدبش يحتجون مب انتي

ويسير عبود من هني وتتصل شما من الصوب الثاني لمواز .. تشوفها يمكن تكون واعيه اتهذرب وياها.. وبالمره تسالها لوين وصلت بالبروجكت

مواز: يالله صباحك ربي.. شو انتي من سلالة الخفافيش ماترقدين؟
شما: ههه زين سلام عليج ولا صباح الخير المهم شحالج اخبارج علومج
مواز: شوي شوي ...هااا شو عندج يالسه من صباح الله
شما: وانا اصلا رقدت؟؟ والله مواصله يلست اخلص واجباتي من بداية الكورس ماهبشت الاوراق..
مواز: حسيبج الله وطول الكورس شو تسوين
شما: علمي علمج .. مادري سهيت ومادريت
مواز : يااا ويلي عليج يالساهيه
شما: وانتي خبريني شو سويتي من امس .. انشاءالله خلصتي
مواز: ممم تبين الصراحه ولا حركت ساكن بالمره
شما : موااااااااااز ..هذا و انا معتمده عليج اوني
مواز: والله يا شمامي من امس وانا بعد ما شفت عبدالله وحالي حال . احاول اشغل نفسي بس مارمت
شما: والله كنت حاسه .. تصدقين اليوم كان يالس وياي الصبح يتريق وتم يتخبرني عنج
مواز : والله .. شو قال
شما: حشى بتموت ... بقولج بس بشرط خلصي البروجكت وبعدين ..
مواز : عوذ بالله صدق انتهازيه .. بخلصه والله بخلصه بس قوليلي شو قالج؟

ويلست شما تخبر مواز بالرمسه الي دارت امبينهم .. ومواز ودها شما ترمس وترمس ولا تخلص وتقول بس هذا الي صار .. ودها كلام شما يطول عن عبدالله .. حبها كان كبير بس كان مكتوم بصدرها..وبنفس اللحظه يرن الخط الثاني ترد عليه شما ولا عبدالله يخبرها انه مب ياي على الغدى وبيسير الذيد بياخذ الضيف و ياه للمزرعه.. وتصك شما عن اخوها وترد على خط مواز.....

مواز : الووه حشى زرعتيني ع الخط
شما: هاا
مواز: منو داق هالحزه راعي الدكان؟
شما : هاااا
مواز : ويعه .. بلاج مسبهه
شما: هاااااا
مواز : شمووووووووووووووووه ترمسين عدل ولا
شما :لا عادي
مواز: عادي ولا اتوماتيك .. منو كان ع الخط بلاج انجلبتي مره وحده
شما: عبدالله
مواز: هاا
شما : رمسني وصك
مواز : هاااا
شما: ما بيي على الغدى بيسير المزرعه ويا ضيفه
مواز : هااااااا

شما: ...................
مواز:..................

وتمر دقايق وكل وحده سرحانه بصوب وحده راح عقلها عند عبدالله و الثانيه عند احمد
وما ينتبهن الا على صوت سورياتي الخدامه : ماما ماما انا يسير دكان يريد بطاقه عشان تلفون مال بومبي...
شما: زين سيري بس جلدي كرو انزين .. ويوم بتظهرين دروازا باند كرو.. .........الووو
مواز : هلا .. الا تعالي خبريني شو سالفتج انتي انا والله بلاني لكن انتي شو عندج .. وبلاه ضيف عبدالله سبهج جي؟؟
شما: آآآخ يا مواز .. مادري مادري.. بس احس هالشخص في شي يربطني فيه .. بس شو والله مادري
مواز : شمامي فديتج غسلي ايديج ولا تعيشين قصة حب من نسج الخيال.. انتي يتوهملج بس.. ولا هو وين وانتي و ين بينكم بحور و برور مثل ما يقولون..
شما: يا مواز القلب لي حب يخلي العالم خريطه بجيبه.......... ماعلينا نشي يالله خلصي البروجكت وانا المغرب بحاول امرج انشاءالله

وترجع شما لغرفتها تفتح الستاره .. وتهوي المكان وترجع بين اوراقها بس هالمره حست ان بخاطرها كلام ودها تقوله.. مسكت قلم و ورقة وتمت تشخبط عليها:



مدري الحب هديه
ولا ورده
بوسط مزهريه
مدري ان كان لي
قلب يحب
ولا عن الهوى
نفسي غنيه!!
صدفه صارت
والروح عانت
صدفه غريبه
وقدورنا كلها معنيه!!
وبعدها يلست بينها وبين نفسها تردد الكلام الي انكتب وتلحنه كانها غنيه وكل مره تعيد وبصوت اعلى وبدون ماتحس تنهدت وحست بان قلبها لاول مره فز من محله ...








.................................................. .................


وترقبوا الجزء الثامن منـــ ( مافادني عذرك)



ولكم كل التحيه و السلام

ملاك الكون

[الغلا]

تسلميييين اختي على هالاجزااااء الروووووعه


بصراحه نحن في انتظار الاجزاء القادمه بفااارغ الصبر

الله يعطيج العافيه ..... الى الامام دائما


اختكم
الغلا

[دلوعة بوظبي]

تسلمين الغالية على الاجزاء الصراحة روووووووعة



ولاتبطين علينا نترياج الغالية

[العـقـرب الاسود]

مشكوووووووووووووووووووورة اختي على القصة الحلوة

وفي انتظار الاجزاء الباقية في احر من الجمر


تحياتي لكِ

::العقرب لااسود::

[الرايقه]

شو السالفه انوووه ؟؟؟؟؟

هاااااااااااااا ؟؟؟ من ورانا اشووووووف ..

ابدعتي فديتج ... انا ما قريت الا اول جزء بس والباقي نقلتهن على الوورد ...

بس ضحكت ضحك والله اني نقعت ... والحينه يالسه اعووطس ... انا جي اذا ضحكت اتم اعطس ...

عندي حساسيه من الضحك عافانا الله ... <<< نكديه

يالله غناتي .. نتريا الجزء اليديد ...

ومشكوره على هالابداع :)

[أنا]

عزيزتي الغلا

السموحه ع التاخير

ومثل ما وعدتج بسبب العطل الي صار متى مااضبط الامور راح انزل الجزء الثامن

تسلمين ع المتابعه

واتمنى ان تكون القصه نالت رضاكم


تحياتي وسلااااامي انا :)

[أنا]

دلوعة بوظبي

تسلمين الغاليه

وفالج طيب انشاءالله

واتمنى القصه تنال اعجابكم


تحياتي وسلااااامي أنا :)

[أنا]

العقرب الاسود

تسلم اخوي ع المتابعه

وانشاءالله القصه تنال اعجابكم


تحياتي وسلاااامي أنا :)

[أنا]

الرايقه أم البلاليط

عساج دوم رايقه انشاءالله الغاليه

واشكرج ع المتابعه

واتمنى تكون نالت اعجابج


تحياتي وسلاااااااااامي صاحبة السمو الملكي أنا :)

[أنا]

الجزء الثامن..




يوم السبت كان دوام شما الساعه 8 ونشت متاخره .. وخذت الدريول يوصلها لان سيارتها خذها اخوها .. وطبعا ما في مجال تلحق على الكلاس .. ويوم وصلت طبعا فات الوقت وحطولها ابسنت وبعد ساعه عندها امتحان .. وطبعا بعد زفتت فيه لانها مادرست عدل والاسئله كانت ابدا مب مباشره.. وحست انه يوم منحوس متعثر من اوله .. وفي نهاية الدوام الدريول تاخر عليها ويوم اتصلت فيه ولا الثاني بعد السيارة اختربت عليه وخذها للكراج..واتصلت لعبدالله عسب يمرها .. يعني كملت المصايب اليوم.. مواز حاولت تهديها لكن ماشي فايده .. شما ضيجها تم يزيد مع كل موقف يثير توترها فاليوم هذا.. لين وصل عبدالله ..
عبدالله: بلاج مبوزه؟
شما: ماشي
عبدالله : زين ماتبانا نوصلها ربيعتج .. حليلها موقفه بريحاتها
شما: عندها محاضره ما خلص دوامها
عبدالله: اييه بلاج .. شو هالوغاده
شما: اووف ماشي .. شوبلايه يعني
عبدالله: مب منج مني يوم ارمسج

وتدخل شما البيت و الضيجه بنفسها .. ولا لها نفس تتغدى .. تسيرلها الوالده تشوفها

أم عبدالله: فديتج شمامي بلاج الغاليه؟
شما : مصدعه .. وابا ارقد
أم عبدالله : انزين اييبلج بندول ولا تبيني امسحج.
شما: لا الوالد فديتج مشكوره بس ابا ارقد وبرتاح
أم عبدالله : واعليه عليج بنيتي .. ماعليه بس ان تعبتي بوديج الدختر
شما: خلوني ارقد وبستوي بخير

وتنزل الوالده .. ويسالها عبدالله عن شما وتقوله انها مصدعه شوي وتبا ترقد.. وبالعصر يسيرلها الحجره يطل عليها.. يمسح ايديه ع راسها

عبدالله : سلامات شمامي .. ماعليج باس يالغاليه
شما:: الله يسلمك ...
عبدالله: ها انشاءالله الحين اهون
شما: الحمدالله خاز الصداع
عبدالله : زين خبريني .. صدق بلاج بس كان صداع ولا في شي صار مكدرنج في الجامعه اليوم؟
شما : بيني وبينك اليوم بكبره نحاسه من شي لشي .. لا تذكرني فيه
عبدالله : زين عيل صحصحي لاني اباج بسالفه
شما : هاا سالفه..خلاص خلاص صحصحت.
عبدالله: يالله يالعياره.. مسرع ما صحيتي..يا حبكم يالحريم للسوالف
شما: زين يالله خبرني شو سالفته
عبدالله: كنت ابا تنشدت عن ربيعتج ..
شما: اسفه اسرار ناس
عبدالله: سيري لااااااه .. خلاص اوكي
شما: لالا والله اسولف .. زين منو ربيعتي؟
عبدالله: هاي الي اليوم كانت وياج يوم خذتج من الجامعه مب هي نفسها الي وصلتها هاك اليوم؟
شما:اهاااا .. قصدك مواز.
عبدالله : هيه موزه ..
شما: زين بلاها؟
عبدالله : هيه ممخطوبه ولا شي؟
شما: ايوووه يا عم .. اوول كده بأه .. لا يابوي لا مخطوبه ولا محيره ولا غيره.. وعلى فكره هاك اليوم يوم كنت برمسك عن فكرة الزواج .. كنت مفكره ارشحها لك .. بس انت الله يهداك ما عطيتني فرصه.
عبدالله: انزين شاوريها .. وردي عليه
شما: بدون ماشاورها .. الف مبروك عليك واعطيك قرنتي 50 سنه
عبدالله ( ويتمصخر) : انزين منو قالج حقي ..اباها للبيدار الي في المزرعه هههه
شما( وتفره بالمخده) : فقدتك يالسخيف

ويظهر عبدالله من الغرفه وهو حاس براحه .. وشما مستانسه وطايره من الفرحه .. مب مصدقه الي صار وكانه حلم عبدالله يكلمها عن مواز .. وانه يشور عليها ترمسها .. مسكت الموبال عشان تخبر مواز .. بس تراجعت وقالت خبر مثل هذا ماينقال بالتلفون ...وماتدري متى بتغيب الشمس عشان تسير لمواز وتخبرها .. ويمر الوقت وبس توصل شما عند مواز وتشوفها تحضنها وهي مستانسه.
مواز: يالله الي يشوفج ما يقول هاي شموه مالت الصبح.. الي طول اليوم جنه يني صافعنها.
شما: فديتج فديتج فديتج والله يا مواز لو تدرين بلي بخاطري جان انتي الي يني جلب ويهج
مواز: خير انشاءالله شو صاير.. خبريني
شما: عبدالله .. عبدالله مواز ياني اليوم وقالي ارمسج ويعرف رايج فيه
مواز(بشهقه)
شما: والله يا مواز والله ماقص عليج .. واحلفلج انه طلبه من نفسه انا مارمست ولا فجيت فمي بالسر
مواز: شموووم انتي متاكده..( وتاخذ بيد شما) شموم اصفعيني دخيلج قوليلي ان رمستج صدق
شما: ههههه والله يا مواز مب حلم .. خيبه مب لقافة ريل فيج وياهالويه ...
مواز: انتي ماتعرفين شما والله حاسه بريلي مب رايمه تصلب نفسها .. فرحانه خايفه ابا اصيح ابا اضحك مب عارفه احدد انا شو حالتي الحين ولا شو ابا اسوي .
شما( بحركة استهبال): زين خبريني شو ارد عليه .. موافقه ولا عندج مانع
مواز( وهيه مستحيه): سباله خذي البروجكت وسيري بيتكم يالله
شما: افاااااا.. الحين عاد انا ينقالي جي .. ماعليه مقبوله منج .. المهم انا بسير بس خبري خالوتج وشوفي رايهم وبلغيني.
مواز: انزين والوالده ؟
شما: بلاها ام عبدالله.. ماعليج نحن اليوم بنخربها بس عبدالله حب يعرف رايج قبل خصه انه مطلق ويعني انتي عارفه .. ماحب يحرج نفسه يبا يطمن بموافقتج وبعدين بيرمس الوالده
مواز: خلاص .. خير انشاءالله

وتبلغ شما اخوها عبدالله بالرد وان مواز موافقه ولا يهمها كان مطلق ولا غيره المهم يكون ريال شارنها .. ويرمس عبدالله الوالده ودعتله ربها يوفقه ويرزقه بالذريه الصالحه وتشوف عياله قبل لا تغمض عينها وتفرح فيه .. وطبعاً شويخ كانت آخر من يعلم بالموضوع لان طول الوقت في غرفتها بين الكتب تدرس لامتحانات الثانويه ..

شما: شويخ بسج يابوي لحستي الكتب من الدراسه ..
شويخ: حرام عليج انا روحي مب مترقعه.. صلي ع النبي
شما:عليه الصلاة و السلام.. المهم سكري كتابج شوي عندي لج خبر
شويخ: خير .. بتعرسين...؟ الحمدالله اخيراً ربي استجاب دعائي وبرتاح افحياتي
شما: يالسه ع قلبج انا..؟؟ .. بس لا هو فيها سالفة عرس بس مب انا
شويخ: لالا انا ابا اكمل دراستي
شما: ههههه مالت عليج انتي يالله تبين حد يربيج بعد حد يعتمد تربين له عياله
شويخ:زين خلصي منو؟
شما: يعني اذا مب انا ولا انتي .. منو يكون الوالده!!!
شويخ: اولالااااا جسويتد لاتغان تغو
شما: شووووووو
شويخ: اقصد طحنا بمشكله ان سوتها ام عبود...
شما: لا جد ظريفه اختي.. زين سمعي عبدالله عزم بيعرس والوالده بترمس خالة العروس اليوم انشاءالله
شويخ: خالة العروس؟؟ ممممم معناه امها متوفيه .. اذاً من تكون؟؟ .. اهاااا اخمن تكون هيه .. صح
شما: وصحين بعد .. شو رايج بالخبر
شويخ: آآآآآآآآآآآآآآه والله ريحتيني صدق استانست .. الحين الواحد تنفتح نفسه للدراسه بهالاخبار الحلوه

وبالفعل تقوم ام عبدالله وتتصل بخالة مواز وترمسها وتحدد يوم للزياره وتخطب مواز لعبدالله.. وبدورها خالتها رحبت فيهم .. ومواز غاليه وعبدالله ريال و النعم فيه .. وتم الخطبه ع خير ويتم تحديد وقت كتب الكتاب على انه يكون بعد امتحانات شويخ باذن الله




.................................................. .................


وترقبوا الجزء التاسع منـــ ( مافادني عذرك)



ولكم كل التحيه و السلام

ملاك الكون

[الرايقه]

انزين ماعليه يا ام الزفر ...

ويالله فديتج نتريا الجزء اليديد ...

واعناد فيج هب قايله شو رايي في هالجزء ... مووتي حررررره ;)

[الغلا]

مشكووووووووووووووووووووووووووووووووورة الغاليه على هالجزء الاكثر من راااااااائع

على الرغم من انه قصير ... وما ياب راااسي ;)

هههههههه بانتظار الجزء القاااااادم ......



اختكم
الغلا

[شعنونة]

وين باقي القصه حرااااااااااااام :blue:

:sad:

[صديقه]

والله الصراحه تسلمين علي هالقصه الحلوه

وانا من هواة القصص وخصوصا من هالنوع

ونتريا المزيد منج
فديييييييييتج

مشكوره
نترياج

[صديقه]

مرحبا اناااااااااااااا
مشكوره فديتج علي هالابداع الجميــــــــــــــــــــــــــــــــــــل

فديتج الحقينا بالباقي بليززززززززز
لا تبطططيييييييييييييييييييييين عليناااااااااا

ومشكوره مره ثانيه
نتؤيا اليديد