قصه (.... سـحـابة صـيـف ....)

[البدوي الحبوب]

السلام عليكم

مرحبا بكل اعضاء هذا المنتدى الجميل

يسعدني انا انقل لكم هذه القصه وهي من تاليف الكاتبه ( شوق بوظبي ) وكلي امل ان تنال على اعجابكم

وهذه الحلقه الاولى من القصه وان شاءالله الحلقه الثانيه بتنزلها الاخت الغلا

تحياتي لكم *******************

الحلقه الاولى

في وحده من مؤسسات بوظبي عند البرنت واقفه ليلى تطبع اوراق للمدير ..وكل شوي توايج ربيعتها حصه تشوفها خلصت ولا لاء...ويوم ملت من زود ما تتريا سارت لها بنفسها...
حصه : عنبو شو تسوين هالكثر مب اوراق هاللي بتوصلينهن اللي يشوف تطبعين بطايق عرس.
ليلى وهي مبتسمه: وانتي شعليج ممكن افهم.؟
حصه: مليت وانا يالسه لروحي تعالي المكتب..
ليلى: بسج عاد عن الدلع بسير اوصلهن لنصوور وبرد..
حصه وهي مبتسمه: عشتوا..نصور بعد والله اللي يسمعج يقول اصغر عيال فريجكم..
ليلى: كيفي ادلعه انتي ليش محتره..
حصه: لا محتره ولا هم يحزنون بس تغمضيني لانج مقصه..
ليلى وتغير شكلها: ما قلنا بس من هالسالفه انا مب ياهل ولا تمين تسوين لي فيها الطيبه النصوح شوفي عمرج اول..
حصه مستغربه: ليلووه شو بلاج ..ليش انجلب حسج جي..ما قلت شي انا ارمس عن اللي الكل يشوفه..
ليلى وهي ترتب الاوراق وتدبسهن وشكلها معصبه على الاخر: خلاص فسري اللي تبينه على راحتج انا سايره يوم بخلص بييج..
وسارت ليلى عن حصه وطلعت فوق مكتب المدير الاول للقسم الاستاذ ناصر ..ودقت الباب ودخلت...
ليلى: السلام عليك استاذ.
ناصر رفع راسه مبتسم: هلا وغلا وعليكم السلام ويا هالاستاذ اللي قلنا نبطلها من زمان..
ليلى مبتسمه: وني مسويتنلك سالفه...
ناصر: مب مبين والله..
تضحك ليلى ويبتسم ناصر وتحط له الاوراق...
ليلى: لا تنزل تحت ولا شي انا خلصت كل الاوراق وباقي بس انك توقع وتسير البنك وتختمهن..
ناصر: الله يعطيج العافيه يا اخت ليلى..
ليلى: اسمع هذا شو يقول من متى انا اختك يالاخ...
ناصر:اقول سيري مكتبج بعدين يقولون المدير مسوي حق ليلى سالفه عشانها من اهلهم..
ليلى: يا حظي من درا فيك انت ولا درى اني من اهلك..
ناصر: جنه مب عايبنج..؟؟
ليلى وهي مبتسمه: هذا موضوع انتهينا منه ...الكبار حكموا علينا ما نكون من اسره وحده انت ليش مزعل عمرك...
ناصر ونش من مكانه: والله ما يخصني فيهم..انا عمري 29 اظن اقدر افكر واتخذ قراراتي بنفسي..
ليلى: احلى هناك يا بو قرارات انت...
ناصر:زين ممكن تشرفين وتطلعين..
ليلى: يعني طرده..؟؟
ناصر مبتسم: الله يهديج محد يروم يطرد روحه...جانج سمعتي حد يطرد روحه انا بطردج..
توردت خدود ليلى من المستحى وظهرت على طول...ويلس ناصر في مكتبه..يكلم نفسه..
" لو عطيتها كلمتين حلوات من اول جان ظهرت من وقت ..بدل الصدعه وويع الراس"..
سارت ليلى مكتبها وهي متخدره من كلمتين سمعتهن..وبغت تطير...ليلى من ايام دراستها بالجامعه وهي مولعه بناصر..اللي يكون ولد عمتها وناصر بعد يموت فيها ولو انه شوي غلس ودمه ثجيل بس يتم يحبها..ورغم محاولاته الفاشله انه يفهمها ان اللي بينهم حب مستحيل بس مب راضيه تقتنع وعنيده لابعد الحدود...
كانت علاقة ناصر في ليلى قمة في البساطه يعاملها مثل اخته بس بنفس الوقت ما يقدر يخفي شعوره الغريب في حبها..مع انه نفسه تمنعه مرات بحكم الظروف اللي مرت ولا زالت تمر بها العايلتين..من ايام الزيارات والعزبه وسوالف اليهال وهي صغيره لين ما كبروا ودخلت الاعداديه ومنعها راشد انها تظهر عليه بليا حجاب..وعقب من يوم دشت ثالث اعدادي وتوفى ابوها انقطعت علاقة العايلتين في بعض وما قامت تشوفه ابداً..رغم ان اللي في قلبها من الصغر ما كان حب بس من كبرت تولعت به وحبته اكثر من يوم غاب عن عيونها..وزاد هالشي في فترة دراستها بالجامعه..وعقب تخرجها ما اشتغلت الا في شركة مشترك ميراثها بينهم وبين بيت بو ناصر..والمشاكل بين العايلتين..هي سوالف الميراث بين ابو ليلى الله يرحمه واخته ام ناصر..ومشاكل لا اول لها ولا تالي فرقت بين البيتين وقامت ام ناصر ما تسير بيت اخوها من عقب ما توفى لا هي ولا عيالها...
ناصر بتفكير انسان عاقل يشوف ان ليلى بالنسبه له شي مستحيل خصوصا انه ابوه ما يطيق بيتهم خير شر...فكان تفكيره اكبر من مجرد الحب..ومرات يلعب الشيطان براسه وما يشوف في ليلى اكثر من تسليه وحب عابر يرطب فيه حرارة الاجواء مع انها بنت خاله...
...................
ردت ليلى المكتب ونست انها زعلانه من حصه...ويلست وياها...وهي غارقة في بحر الحب والهيام..
ليلى وهي متسنده على الكرسي ومغمضه عيونها: اااه يا حصه والله اني ميته ميته ميته...
حصه وهي حايسه حلجها ومبتسمه شوي: هاه شو صار ويا قيس بن الملوح..؟؟
ليلى: وييه فديت ابويه الله يرحمه يوم سماني ليلى ما درى ان قيس بيطلع لي في أي لحظه...فديتك يا قيسي..
حصه تضحك: شو قيسي هذي بعد..اسميها اللغه ما بيشوهها الا انتي واشباه قيسووه مالج هذا..
ليلى: ويا ويهج يالغياره..ودج تلاقين نص نصوري..علني افداه..وتفدينه انتي وكل ربعج..
حصه: فداج ابليس انتي وهو يا مسودة الويه..انا امايه بعدها تباني ..جانج بايعه العمر تفدي نصوورج هذا...
ويقطع سوالفهن صوت دق على الباب...وعدلن شيلهن وتحجبن...
ليلى: تفضل..
حمد: السلام عليكم
ليلى وحصه: يا هلا ومرحبا وعليك السلام...
حمد: اشحالكن اليوم...؟؟
ليلى وحصه: الحمد لله..
حصه: شحالك حمد وشحال الوالده..؟؟
حمد وهو يطالعها بنص عين: الحمدلله..
ويحط اوراق على مكتب ليلى ...وهو ساير صوب الباب وقف..
حمد: ليلى قولي للمدير يوقعهن اليوم ضروري لاني هب مدوام باجر..وما بداوم الا يوم السبت..
ليلى وهي تفتح الاوراق: ان شاء الله...
وطلع حمد..وطالعت ليلى حصه وضحكت..
ليلى: هاه اخت حصه وين وصلتي في بحر الخريط..اووه اقصد في بحر الحب..
حصه وهي تسوي عمرها عاديه: ليلى خل عنج الخبال اكبري شوي...
ليلى: كبرت من زمان ما اترياج يا عبله..وعنتر اللي مب داري وين دارج...
حصه: زين شلج انتي ليش متغصصه مني..
ليلى: برايج بس حبيت اذكرج برمستج عني قبل شوي...
حصه: زين زين..
ليلى: يالله بنرد البيت بسرعه الدوام بيخلص ونحن نسولف..بسرعه ابى الحق على شواخي اكيد تترياني..
حصه: فديت روحها يا ربي...
ودقت حصه لدريولها وظهرت وياها ليلى اللي خلاص من يوم توظفت وهن يردن مع بعض... ليلى وحصه من عايله وحده بس من بعيد شوي يعني ام حصه تستوي بنت عم ابو ليلى الله يرحمه... اعمارهن نفس الشي 26 سنه ..متعلقات ببعض..وكل وحده تشوف في الثانيه الاخت اللي ما تستغني عنها..خصوصا ان ليلى اخر العنقود في البيت..واصغر اخوانها..وما عندها خوات في عمرها او قراب منها..وكلهن معرسات وبعاد عنها في دبي..
وفي الموتر..
حصه: ليلى ..
ليلى وهي طفرانه: هاه ..
حصه: متى ناخذ اجازه بصراحه مليت...ابى ارتاح شوي..
ليلى: قولي لي متى تقررين وخليها علي انا بطلع لي ولج اجازه لو من عيون المدير بطلعها..
حصه مبتسمه: اكيد شعليج غناة القلب...
ليلى تبتسم وهي شوي مستحيه: بس عاد والله استحي..
حصه وهي تتمصخر: وايد..
ليلى: شو قصدج يعني فاصخه الحيا...؟؟
حصه وهي تضحك: اقول يالله انزلي وصلنا بيتكم...
ليلى: احمدي ربج الله انقذج في اللحظات الاخيره...
حصه: سلمي على خالتي ام راشد وبوسي لي شواخي..
ليلى: ان شاء الله غناتي..بينا تلفون عقب...
حصه: ان شاء الله...
دخلت ليلى البيت كالعاده الكل توهم واصلين من دواماتهم...سارت وسلمت على امها وشافتهم يحطون الغدا..
ام راشد: يالله غناتي سيري بدلي ثيابج وتعالي تغدي ويانا..
ليلى: لا امايه فديتج ..انا بتريا حمداني وسلامه...
ام راشد: بيتأخرون لين اربع شتبين بهم..بيتغدون لرواحهم..
ليلى: حرام امايه بترياهم وحليلهم محد مسوي لهم سالفه كله لروحهم..ترا مب زين هذيل مراهقين وينخاف عليهم..بعدين يتعقدون ولايس..
وينقطع كلام ليلى فجأة عقب ما تشوف اخوها راشد يدخل الصاله...
راشد مبطل عيونه: خيبه خيبه..كل هذا بيستوي فيهم عسب يتغدون لرواحهم...
يوم سمعت ليلى صوت راشد استحت شوي..وتغير شكلها...هذا اخوها الكبير عمره 45 سنه وابو سلامه وحمدان...وعلى الرغم من ربشة ليلى وسوالفها ..بس من يي اخوها راشد تصخ ولا ينسمع حسها تكون خجوله وساكته وتستحي منه ...لانها مب متعوده تيلس وياه وايد شرات باقي اخوانها...
ليلى مبتسمه: امايه انا بسير فوق وبتريا سلامي وحمداني...
راشد: لا تسوين لهم سالفه زياده على اللزوم بيكبر راسهم عقب..
ام راشد بحنيه: زين انت اقرب الحين اخافك الا ما بتتغدا انت الثاني...؟؟
راشد: لا امايه انا ما تهمني هالخرابيط تغدوا ما تغدوا برايهم...
مشت ليلى وهي سايره فوق تشوف البشكاره ماسكه ايد شواخي وتمشيها ..واول ما شافت شيخه ليلى مشت بسرعه وجنها بتتعثر في خطواتها من السرعه واول ما قربت من ليلى عقت عمرها عليها ولوت على ريولها ..وشلتها ليلى وتمت تحضنها وتبوسها...وهي لاويه عليها وشلتها وطلعت فوق..
شيخه بنت سيف اخو ليلى عمرها سنتين وثلاثة اشهر..توفت امها وابوها في حادث وهم رادين من العين يعزون واحد من ربع سيف..وكان عمرها ثمان شهور وربتها ليلى واهتمت بها طول هالفتره..ولين الحين ما تطيع تسير ولا تيي الا عندها ومرات تتقبل يدتها ام راشد..
ليلى تشوف فيها براءة اخوها سيف الله يرحمه ..ومن نظرة عيونها تحس انها ملكة الكون كله..عاهدت نفسها تفرغ العمر كلها لها ولا تتنازل عنها لو شو ما صار..رغم ان اهل حرمة سيف جلبوا الدنيا مشاكل يبون يربون بنت بنتهم بس ما رضت مع انها صغيره بس اهتمت بها ووعدت نفسها ما تتخلى عنها..
وعاد شيخه رغم انها طفله بس ما تقدر تتخيل الدنيا بدون عمتها ليلى..واربع وعشرين ساعه وهي بحضنها ما تنزل ابد..ونص معاش ليلى على اغراض شيخه...اللي ما تطيع تسكت من الصياح اذا ما شافتها...ويابت لها خدامه خاصه تهتم فيها لين ما ترد من الدوام....
..................
في غرفة ليلى يالسه تلاعب شويخ..وتغير ثيابها..وشيخه تلحقها من مكان لمكان مثل العصفوره اللي توها بدت تتعلم تطير...ويلست ليلى على الشبريه وحطت شيخه فوقها...
ليلى وهي تكلمها بدلع: من سوالج غدا اليوم..؟
شيخه: ثرملا..( شرملى خدامتها)..
ليلى وهي تلوي عليها: فديتج انتي وكل طوايفج..اقول شواخي من الحلوه..؟؟
شيخه وهي تسوي عمرها مستحيه وتحط راسها فحضن ليلى: انا..
ليلى تلوي عليها بقو: فديت قلبج يا روحي وعمري كله..
شيخه تطالع ليلى بدلع وهي مبطله عيونها: وين حواوا..؟
ليلى: شتبين بالحلاوى ويا ويهج وانتي الحلاوه بكبرها...فديت قلبج وفديت امج اللي يابتج يعل قبرها وقبر ابوج نور على نور...
شيخه تبتسم ما تدري عمتها شو تقول..وتطلع لها بعض الحلويات اللي يابتهن وتسير تبند الليتات وترقدها حذالها لين ما نامت شيخه ..وليلى حطت راسها شوي لين ما يوون عيال اخوها....
وتفكر في حالهم هالمساكين اللي محد يعبرهم وابوهم وامهم مشغولين عنهم اربع وعشرين ساعه...وهم الاثنين مطيحين ببيت يدتهم ما يسيرون من عندها...مر الوقت وليلى بتموت من اليوع بس تكابر تتريا عيال اخوها يردون من مدرستهم الساعه اربع العصر..لانهم في مدرسة الشويفات الخاصه..غفت شوي لين 3:30 عقب نشت...ويلست تفكر مره ثانيه في عيال اخوها وفي الدوام..وفي شخص ساكن في حناياها...
...ولين ما وصلت ليلى لاخر حدود تفكيرها...قطع عليها حبل افكارها...صوت هبل عند الباب...وشوي الا حد يفتح الباب...
سلامة وهي شاله شنطتها في ايدها ولابسه ثياب المدرسه ووراها حمدان: سلام عليج يا احلى عمه بالدنيا....
حمدان من ورا سلامه: مرحبا عمووتي ....
ليلى وهي تطالعهم مثل اللي يقول يا حظي فيكم: وعليكم السلام ..قصري حسج انتي وياه شواخي راقده..
سلامه: ليش معتفس ويهج عمووه..؟
ليلى: يالله سيروا غيروا بسرعه بنتغدا رباعه انا اترياكم من الصبح مب رايمه ايود عصافير بطني...
سلامه وحمدان: ان شاء الله....
وعقب حطت لهم البشكاره الغدا ...وتغدوا حمدان وسلامه وعمتهم ليلى وكل واحد بعدها سار حجرته يرقد...لين المغرب..

العصر حوالي الساعه 5:00 عقب ما رقدت ليلى ساعه ..نشت ونزلت تحت...
وفي الصاله... يلست مع خلود حرمة راشد...
خلود: اقول ليلوه وين سلامه ما شفتها اليوم...
ليلى بينها وبين نفسها(ومن متى تهتمين انتي ولا تدرين عنها شي):راقده في حجرة ختيه عويش هي وحمدان..
خلود: هيه زين بعد..
ليلى: اقول خلود انتي متابعه دراستهم...؟؟ لانها وايد صعبه وتبى لها متابعه من اهلهم...
خلود وهي ودها تصفع ليلى: ما يحتاي حمدان وسلامي ما ينخاف عليهم طالعين على خوالهم...
ليلى مبتسمه ابتسامه صفرا: هيه والله صدج ..
وبينها وبين نفسها( راحوا عيالك يا خويه دامها شبهتهم في خوالهم)
وعلى الساعه 6:00 ينزل حمدان من فوق وويهه كله رقاد ويسلم على امه وييلس عدال عمته...
حمدان يهمس : عمووه اباج بسالفه عقب...
ليلى: شو..الحين خبرني ما فيني صبر...
حمدان: شو الحين انا ما اريد امايه تسمع..
ليلى: زين يالله نقوم حجرتكم ولا حجرتي...
خلود ما انتبهت لانها ولا تهتم ابدا بالعكس فرحانه ان عيالها متعلقين بعمتهم..ومفتكه من صدعتهم...
وساورا حجرة ليلى....
-----
في بيت مبارك ابو خليفه...كانوا عقب صلاة المغرب يالسين في الخيمه برا في الحوي..يسولفون ويتقهوون خليفه وعبدالله اخوان حصه وبنات خليفه اللي هن عفرا وحمده وام خليفه وابو خليفه...
بو خليفه:بنتي عفرا وين عمتج حصه ما شفتها اليوم...؟
عفرا: في حجرتها مع عمتي سمر..
ام خليفه: حليلها تعبانه من هالشغل...
خليفه: كلنا تعبانين ما شفنا حد ترحم علينا..
عبدالله: البزا كله للبنات شتبى به انت..؟
خليفه: عفرا وحمده يالله كل وحده على حجرتها مب جنه باجر وراكن مدارس..
وقامن بنات خليفه ويلس يسولف ويا اهله واخوه...
وفي حجرة حصه يالسه ويا اختها سمر اللي عمرها 11 سنه...
حصه: ليش تطالعيني جي كم مره قلت لج ان حرف ال H ما تلفضينه بس تكتبينه...
سمر: زين كيف اكتبه ولا انطقه هاي صعبه عاد..انا اشدراني متى الكلمه لازم يكون فيها حرف ال H ولا انطقه..
حصه: يينتيني شو اسوي بج..كل ادوات الاستفهام فيهن هالحرف في البدايه او يكون الحرف الثاني بس بعضهن ترومين تنطقينه شرات who & how وبعضهن شرات why & what ما ترومين تنطقينه هاي قاعده عنبوهن من مدرسات ما يفهمنكن شي...
سمر : زين بقولج نكته...
حصه وهي بتموت من العصبيه: شو من نكته ويا راسج انتي...بتتصفعين والله...
سمر: ارجوج والله العظيم انها خبال بتموتين عليها..
حصه: قولي يالله وفكينا مبتلشه فيج وفي دراستج وفي ثقالة دمج بعد...
سمر بدلع وثقاله: مـــره فــي واحد..
حصه وهي قابضه راسها: والله لو بتقولين روايه جان خلصتيها ..يالله قولي النكته لا اقوم اجلب الحجره على راسج...
سمر: زين شفيج معصبه...سمعي بقولج..مره في واحد نذل يبى يعذب خدامته عطاها فرشة اسنان وقال لها خمي الحوش...
حصه وفقدت اعصابها: اااااااااخ لو الجتل مب حرام جان ارتكبت فيج جريمه نكراء..انتي من وين ييتي وشو هالنكت المغبره اللي تقولينها...
سمر: حرام عليج حصوه ليش جي تقولين عني والله اني مسكينه...
حصه وهي تبطل الباب بتطلع: انا شاللي كالفني ادرس عاهات ما تفهم والله ان ما عندي سالفه لو اني راقده ولا ارمس تلفون ابرك لي..
سمر ماده بوزها اونها زعلت : برايج بدرس لروحي...
طلعت حصه وسارت الصاله تتصل بليلى...وتمت تدق على البيت بس محد يرد..وبندت ودقت على الموبايل بس محد يرد بعد...
صكت السماعه" برايها عقب هي بتسوي...شو هالملل يا ربي وين اسير الحين"
وهي ترمس روحها مرت عفرا بنت اخوها في الصاله..
عفرا: عمتي حصه..
حصه لفت بسرعه: بسم الله منج انتي الثانيه طيحتي قلبي من وين طلعتي مثل ابليس..
عفرا: يدي مبارك يبغيج...
حصه وقامت من مكانها بسرعه: يا ربيييه ابويه فديته ما شفته اليوم مول والله اني نسيته...
عفرا: حد ينسى ابوه..؟
حصه: اقول فارجي لا افج حرة سمر اختي فيج...
عفرا: شفيج بسم الله شابه ضو..
وطلعت حصه وسارت تيلس عند ابوها واخوانها...

[عابرة السبيل]

مشكووور البدوي الحبوب على القصه
ونتريا التكمله

[البدوي الحبوب]

تسلمين عابرة السبيل على المرور

وان شاءالله الاخت الغلا بتكمل لكم القصه

تحياتي لك

[الغلا]

تسلم اخوي البدوي على الجزء الاول
وشكرا لك اختي عابرة سبيل على هالتواصل الحلو
وترقبو الجزء الثاني ....


اختكم
الغلا

[الغلا]

الحلقــه الثانيه

هناك في بيت بو راشد وفي غرفة ليلى بالتحديد يالسه ويا حمدان اللي كان يبغيها في سالفه ضروريه...صكت الباب وشيخه نشت وتمت تصيح..
حمدان: اوهووه شو هالحاله..انا مستعيل..
ليلى بعصبيه:يعني شو تباني اسوي..اخليها تصيح مثلا وايلس وياك...
سارت ليلى ودقت تلفون للبشكاره تحت وقالت لها تسوي حليب حق شيخه..ويلست تلاعبها..لين ما هدت شوي...ويلست تطالع حمدان وهي مبتسمه..وهو ميت من القهر..
حمدان: عمتي شو هاه ابا ارمس وراي دراسه..
ليلى وهي تتكلم بسخريه: ونك تدرس والله ما تدري شو الفرق بين كتاب هالسنه واللي قبلها..
ودخلت البشكاره وعطت ليلى الحليب اللي بدورها عطته شيخه بعد ما رقدتها على الشبريه..
ليلى: يلست يالله خبرني شو من مصايب مسوي يا مسود الويه..
حمدان يحك راسه ويطالعها بنص عين: مادري من وين ابدا..
ليلى: ابدا من أي مكان مب مهم بس ارمس..
حمدان: عمتي ليلى فديتج اباج بسالفه خطيره بس حلفي ما تخبرين حد...
ليلى: وليش شو قالوا لك فتانه..طب لسانك بثمك وما اريد اسمع شي...
حمدان: اسف عمووه بس عاد مب وقته والله..دخيلج والله لا يحتمل التأجيل...
ليلى وهي تخفي ابتسامتها: يالله يابو التأجيل انته...شو بعد ..شو مسوي من بلوى...؟؟
حمدان: والله عمووه مااعرف شو اقولج...بس مستحي اخبر حد وتعرفين محد يسوي لي سالفه غيرج انتي..ولا جنه عندي ام وابو...
ليلى: زين زين يالله لا تتمسكن..ارمس شو مستوي...
حمدان: عمتي لا تخبرين ابويه...بس انا سقطت...
ليلى وهي فاجه عيونها: شوووو؟؟؟ خيبه تخيبك يا مسود الويه..شو سقطت وتقولها بكل برود..؟؟؟
حمدان : عمتي قصري حسج مابى حد يسمع...
ليلى: وسلامه اختك...
حمدان: مب احسن عني كل درجاتها c و d
ليلى وهي ماسكه راسها: الله يغربلك يا حمدان والله بيجتلك ابوك...
حمدان: زين عمتي فديتج شو اسوي والله خايف ..امايه تتحراني من الاوائل..بس ما روم اقص على ابويه..وهاي اخر سنه وكل شي مكشوف...
ليلى وهي تهز راسها بأسف: والله ما ادري شو اقولك..بس تباني ارمس راشد..
حمدان: لا عمووه استريحي..ماله داعي...اذا بغيت ابويه يدري..انا بقوله..انا ياينج اباج تنقذيني من هالورطه..
ليلى وبدت تعصب: وبعدين وياك حمدان..كم مره بنخبي على ابوك..ما استوت حاله هذي..احس بالذنب انا ..وانا اشجع عياله على الرسوب من وراه..
ويلست ساعه تهزبه..وهو موخي راسه بس مب متندم انه خبرها لانه يعرفها مهما عصبت ماله غيرها..
حمدان: خلاص عمتي لا تعصبين والله بشد حيلي وعد..
ليلى: سمعت من هالرمسه وايد..حمدان انت وسلامي لازم شوي تحسون بالمسؤوليه...
حمدان: والله العظيم بدرس بس انتي ساعديني...
ليلى وقامت من مكانها وسارت تييب تلفونها: انا الحين بدق لحصه ..وبعرف منها شو مسويات بنات اخوها..
حمدان يوم طرت ليلى عفرا وحمده جدامه تغير شكله..
حمدان مرتبك: عمووه ماله داعي انا اعرف شو مسويات.
ليلى: وشو مسويات..؟؟
حمدان: عفرا كله A+ حمده كالعاده راسبه...
تحاول ليلى انها ما تبتسم بس ما قدرت وفجأة ضحكت...
ليلى: حمدان سير ادرس وانا بشوف حصه شو بتسوي ويا حمده لانها من نفس طينتكم..
حمدان: سلمي عليها..
ليلى شاله المخده بتفرها فيه: زين خلك من هالخرابيط وجابل دروسك..
واول ما طلع حمدان فرت ليلى التلفون على الشبريه..
" برايها ما فيه ادق لها الحين عقب يستوي خير..بنزل لامايه بيلس وياها شوي..."
وشلت شيخه وبدلت ثيابها...
ليلى: يالله حياتي بنسير عند يدووه..
شيخه:بلوح عند ددي..(يدتي)
ليلى وهي تبوسها: هيه فديت قلبج بنسير عند ددج..
ونزلت ليلى الصاله...ووياها شيخه...
بعد صلاة العشاء..كانت ام راشد في الصاله مع شمسه حرمة مبارك اخو ليلى الثاني وعمره 34 سنه...ومبارك ساكن في دبي عشان شغله..هو وحرمته وبناته...وولده عمر..
ام راشد: وين البنات يا شمسه..ليش ما يبتوهم وياكم..؟ يالسين لرواحهم في البيت..بغيت اشوفهم واسلم عليهم..
شمسه: والله يا خالتي مريم و ايمان وامل يدرسن..و عمر سار المعهد عند المدرس ما رضى ييه البيت...ومب لروحهم ما شاء الله البيت مب خالي..فيه البشاكير وخالهم بيخطف عليهم كل شوي...
ام راشد: الله يوفقهم..يا ليت عيال راشد مثلهم بس...
شمسه وبأسلوب الحريم المعروف تبى تسأل ام راشد عن عيال ولدها راشد...وسؤالها فيه شوية خبث...
شمسه: خالووه اليوم البنات وعمر يابوا النتايج ما شاء الله عليهم من الحسد..درجاتهم ترفع الراس..
ام راشد بطيبتها و هي مب عارفه شي: انزين والله الله يفتح عليهم..عيل ما خبرنا حمدان وسلامي شو مسووين..
شمسه بينها وبين نفسها(ساقطين كالعاده)
كانت سلامه نازله من فوق وتسمع عمتها شمسه شو تقول ليدتها وهي منقهره..وسلمت على عمتها وتخبرتها عن البنات..ويلست وياهم بس تمت تنغز مرة عمها مبارك بالرمسه..
سلامه وهي تهوي وتحب راس يدتها: هلا يدوووه ولهت عليج والله...
ام راشد وهي تلوي على سلامه وتقربها منها: هاه عمتج تقول طلعن النتايج اليوم شو مسويه انتي وحمدان..
سلامه وهي تطالع عمتها وحاطه راسها بحضن يدتها وهي تلاعب شعرها: ما مسويات شي ..اليوم طلعوا نتايج نص الفصول نحن بعدنا..يقولون الاسبوع الياي..وبعدين يدوه نحن وين وهل دبي وين..؟ التعليم غير وقته عن وقتنا ..شدخل بوظبي في تعليم دبي...
شمسه كانت تعرف ان سلامه تخرط على يدتها بس تمت ساكته ما فيها على لسان سلامه......
ويا مبارك وسلم على امه ويلسوا شوي استأذنوا من ام راشد بيردون بيتهم عشان العيال لروحهم..وطلعوا سايرين دبي..
سلامه: عقربه هذي...
ام راشد وهي مبطله عيونها: ليش ترمسين عن عمتج جي...
سلامه: سوسه نقالة رمسه..تبى تواشي علي عند امايه وابوي..
ام راشد: وليش شو مسويه انتي..؟؟
سلامه: ما شي يدووه بس هي تغار مني لاني احلى عن بناتها الخسفات...
ام راشد مستغربه: هذيل بنات عمج..ليش تقولين خسفات...؟
سلامه: لانهن خسفات صدق وشرات امهن خقاقات ونقالات رمسه...
ام راشد: غربل الله ابليسج من بنيه...شو خليتي في الحرمه وبناتها ما قلتيه...
سلامه وهي تلعب بشعرها بايدها: خقاقات وخقاقات ما دانيهن..ولا اداني امهن...
ويدخل حمدان وليلى ...ويسلم حمدان على يدته وييلس عندها من الجهه الثانيه..
وتلوي عليه هو سلامه...
ام راشد: هاه حمدان عمتك ام عمر تقول طلعت نتايج الامتحانات الشهريه..بشر شو مسوي..
ليلى وحمدان انصدموا وما عرفوا بشو يردون....وسلامه بترقع السالفه...
سلامه: امي غاليه وين ابويه راشد ما شفته اليوم..
وام راشد بطيبتها المعهوده نست الموضوع..
ام راشد: تغدا ورد الشركه على طول...
حمدان يطالعها ويغمز بعينه...علامة انتصار ومبتسم..
ليلى بينها وبين نفسها..
"يا حظي فيكم..واحد راسب والثانيه تخورط على امي..وانا ساكته لا حس ولا خبر.."
ام راشد: ليلى غناتي بلاج صاخه...
ليلى توها تنتبه: لا امايه ما شي بس الظاهر طاح كرتي..لابستني ويالسه مع احفادج نسيتيني...
ام راشد مبتسمه: لا بنتي من قال..انتي الاصل...
سلامه تقوم وتطالع يدتها: هيه امي غاليه انتي بس تحبين ليلى ونحن تكرهينا..
ام راشد:بسم الله يا بنتي لا تقولين جي ليش اكرهم وانتوا عيالي وعيال الغالي...
حمدان: هيه عمتي ليلى الاصل ونحن الفروع يعني وجودنا والعدم واحد..
ام راشد تضرب كف بكف..وتطالع ليلى ولسان حالها يقول "لحقي علي يا بنتي"
حمدان وليلى يضحكون....
وقامت ام راشد حجرتها بترقد..
ام راشد: انا بسير ارقد شبعوا وسووا اللي تبون مافيه على حشرتكم رفعتوا لي الضغط..
سلامه: تعبانه ولا مب طايقه تشوفينا ويوهنا..هاه اعترفي يدووه..قولي قولي يالله..
وتمت سلامه تغلس على يدتها...وكل ما يت ام راشد بتقوم تعلقت فيها سلامه..وتمسكها من ايدها..
ام راشد: قومي عني يا ام لسان الله يعينه اللي بيبتلي فيج...
سلامه: ليش ان شاء الله يا حظه فيني والله...وبعدين يدوه انا ما بعرس..بتم هني طول عمري ما استغني عنج..ولا تخيل حرمة حمدان تاخذج عني...
حمدان: حرمتي عمتج يالهرمه..
حمدان و سلامه ناقعين ضحك وليلى تبى تسوي عمرها معصبه..
ليلى: هاي امايه يعلكم فداها لا تطفرون بها...
ام راشد: لا غناتي عادي الا يهال ماخذ برمستهم...
ويوم سارت ام راشد كان حمدان و سلامه يغلسون على عمتهم ليلى وهي تسولف وياهم...ودخل راشد ابوهم...
راشد وهو معصب: حمدان...
حمدان وهو يسوي عمره ثابت: لبيه ابويه..
راشد وهو يطالعه بنظره غريبه: شو ميلسك عند البنات ..ليش ما تسير تدرس..وبعدين وين نتايج الفصل ما شفتها...
حمدان وهو ميت من الخوف: لا ابويه..ترا..
سلامه: ابويه نحن استاذنا عنده ظروف عسب جي ابطى بالنتايج...وقال نحن غير عن الفصول..
ليلى انتهبت ان راشد حس ان عياله يقصون عليه..واتداركت الموضوع بكذبه ثانيه..
وهي مستحيه: راشد انا بسير لهم باجر ان شاء الله وبشوف كل شي..
راشد هدا شوي: زين تسوين انا مشغول هاليومين...
تموا ساكتين..وسار راشد الفله مالته..وبعد ما طلع..
حمدان يتنهد: ااه كنت بموت من الزيغه...
سلامه: نجونا بإعجوبه..
وتضحك هي وحمدان..
ليلى: ما شي مسؤوليه ابد..الله يهديكم..كذب وكسل وفوق كل هذا ثقالة دم..
حمدان: عمموه حتى انتي تقصين على ابويه..يوم قلتي بييكم المدرسه..
ليلى: هيه والله العظيم بسير لكم باجر..وبشوف بلاويكم...
طالع حمدان سلامه..وابتسم عارف ان عمته مهما سمعت ما بتقول شي لانها الوحيده اللي فاهمتنهم...
وقامت ليلى بتطلع...
ليلى: حمدان وانتوا طالعين صكوا باب الصاله..
حمدان: لا عمتي ..ما بنسير البيت..بنرقد هني اليوم..بحجرة عمتي عايشه..
ليلى: ع راحتكم..
وكل واحد طلع حجرته بيرقد...

السموحه عالتاخير

اختكم
الغلا

[البدوي الحبوب]

تسلمين اختي الغلا على هالحلقه

وان شاءالله تكملة الحلقه بنزلها باجر

تحياتي لك

[الغلا]

الله يسلمك من الشر اخوي ..

وبانتظار الجزء القادم


اختكم
الغلا

[البدوي الحبوب]

تكملةالحلقه الثانيه

اليوم الثاني الصبح في الشركه يالسه ليلى تعدل في اوراقها وتخلص اللي باقي لها..لانها بتطلع اليوم من وقت عشان تمر على مدرسة حمدان وسلامه..ولا مرت على مكتب ناصر ابداً...
حصه متملله: ليلووه دخيلج لا تروحين والله ملل...
ليلى: انا وعدت راشد ولازم امر اشوفهم..
حصه:اهون عليج ايلس لروحي...
ليلى: ما تهونين بس غصب عني..اليوم الاربعاء وابى اظهر من وقت...
حصه: زين ويا ويهج والله ماتحسين كيف اكون بغيابج..مالي معنى..
ليلى تعرف انه حصه ضايجه عشان حمد ما داوم اليوم بس حاولت انها ما تبين لها انها فاهمه...وكسرت حصه خاطرها..وابتسمت..
ليلى: شو رايج تيين وياي مب لازم نيلس لاخر الدوام...
حصه بفرح: هيه والله كيف ما يا على بالي...
حصه انسانه رقيقه وشفافه فوق التصور..خيالها واسع وأحلامها كبيره..وكبرياءها اكبر من الكون نفسه..وكل شي عندها يهون الا وقت الكرامه وعزة النفس..ناعمه لابعد الحدود ولو انها مرات دفشه شوي في البيت ويا اختها وبنات اخوها...
خلصت ليلى الشغل واستأذنت هي وحصه وطلعن وسارن مدرسة حمدان وسلامه..وفي الدرب..
حصه: يا سلام راحه نفسيه..
ليلى: شعليج يا ام راحه نفسيه انتي..الحين انا اللي بتتدمر نفسيتي من عيال اخويه...
حصه: برايهم ليش حارقه دمج..
ليلى: شعليج انتي عندج وحده حافظه المنهج اكثر عن اللي طابعينه..لو ييبون لها سؤال كم رقم الصفحه اللي فيها هالسؤال عرفته..
حصه: عوذ بالله من فالج..الحين اكيد بتسقط والله قلبي يقول لي..
ليلى تضحك..
حصه: قولي ما شاء الله...يالله قولي الحين جدامي ولا بنزل الشارع والله..
ليلى: برايج محد ميودنج انزلي...
حصه: ليلى..!!
ليلى: يا عيونها...وقلبها..
حصه تطالعها بعصبيه...
ليلى: بسم الله خلاص ما شاء الله ما شاء الله ما شاء الله....ارتحتي..
حصه: يالويه عوذ بالله منج..
ليلى: يا فنتكه انتي اموت عليج يوم تعصبين مول ما يليق عليج والله..
حصه: ع شو تحسديني يا حظي ..بيتنا محد فلحت فيه الا عفاري بنت اخويه خلوووف فديت قلبها والله انها فلتة زمانها...ولا تعالي شوفي حمدوه راسبه مع مرتبة الشرف..وكله بصوب واختي سمر بصوب ثاني والله انها تحفه كلما قلنا لها شي قالت بقولكم نكته..ما ادري شو سالفتها ويا هالنكت...
ليلى ميته من الضحك مب رايمه تيود عمرها..
حصه: اضحكي شعليج ما ابتليتي في اخت شراتي والله انها مثل العظم في البلعوم..وفوق كل هذا بليده ما تفهم..
ليلى وهي تضحك: صدقيني يمكن تتلاعن عليكم ومب غبيه بس تستغبي تحب ترفع ضغطكم..
حصه: ما يندرى بها والله..بس المصيبه يوم اسألها شي ماتفهم مول ولا يخصها في العالم..كيف تطلع من العشره الأوائل ما ادري..
تضحك ليلى...
حصه: والله البنت مب طبيعيه وانا اللي بعالجها...
ليلى تضحك: عيل اذا ما ماتت على ايدج ما كون بنت امي وابوي...
ووصلن المدرسه وقالت حصه للدريول لا يسير ويترياهن لانهن بيظهرن الحين...
وفي المدرسه دخلن الاداره وسارن يتخبرن عن اساتذة عيال اخوانهن وعقب ما نشدن عنهم وعرفن كل شي ردن الموتر...ووصلت حصه ليلى البيت وسارت عنها...
دخلت ليلى البيت وشافت شيخه ناشه من وقت ويلست تلاعبها..وشلتها وسارت صوب حجرة امها...
ليلى: السلام عليج امايه..
ام راشد وهي مبطله عيونها ومتفاجأة: هلا غناتي وعليج السلام عسى ماشر..ليكون تعبانه ولا شي...بسم الله عليج راده من وقت اليوم زيغتيني..
ليلى مبتسمه: لا امايه ما فيني شي بس ولهت على البيت وشواخي ورديت...
ام راشد: الحمدلله ولهت عليج العافيه والله يوم شفتج شي قبضني بقلبي...
ليلى: فديت قلبج يا احلى ام في الكون كله...
يلست ليلى عدال امها...وخلت شيخه تتعبث في الحجره لروحها...
وقفت شيخه عند المنظره اللي طول اليدار..ومسكت ثوبها ويلست تدور على عمرها..وسارت عند يدتها وتفتح عيونها وتير شيلة يدتها..
شيخه: ثوفي ثوفي..
بس ام راشد كانت ترمس ليلى وما اهتمت..
ليلى: امايا شوفي شواخي ترمسج ردي عليها...
ام راشد لفت على شيخه:عيوني شو تبين فديت حسج..
شيخه:إلوه ...إلوه..
ام راشد: والله مادري يا بنتي شو تقولين..
شيخه: انا إلوه..ثوفي فتاني...
ليلى تضحك:امايا تخبرج انها حلوه وتباج تشوفين فستانها...
ام راشد وتلوي عليها: حلوه فديت عمرج...
سحبت شيخه عمرها من حضن يدتها وسارت تسحب شيلة الصلاه مالها...وتشيلت بها بس غطت عمرها..وسحبت السجاده..ومدتها ونها بتصلي..
شيخه بصوووت عالي وجنها تصارخ وبكل براءه: الله نم نم..
ليلى بغت تموت من الضحك...وام راشد ترمس..
حرجت ام راشد: يا بنتي شو فيج ارمسج..وانتي تطالعين لي هالبنت..
ليلى: امايا فديت روحج سمعيها كيف تكبر......شواخي قولي مره ثانيه الله واكبر..
شيخه متعجبه وتسوي حركتها المشهوره تبطل عيونها على الاخير ونها متعجبه: تاني مله..
ليلى: هيه ثاني مره...قولي الله اكبر...
شيخه ونها عصبت وتعاند وتأشر بإيدها دليل انها رافضه: ماليد خلاث خلاث كم مله..ماليد..
ليلى بحده: كيفج هو...؟ قولي الله اكبر يالله...
شيخه بطلت عيونها اونها متعجبه: الله نم نم...
ضحكت ليلى وام راشد ابتسمت وردت تكمل سوالفها ويا ليلى...
حطت ليلى راسها ع ريول امها ليلى وهي تطالع فوق..وامها يالسه تمسح على راسها...
ليلى:امايه
ام راشد: لبيه غناتي..
ليلى: شيخه غامضتني...وايد..وايد..
ام راشد تنهدت: مب قلنا لج يا بنتي عطي البنت اهلها يربونها..ويوم تكبر يفهمونها كل شي..بس ما طعتي..وشوفي بعدج ما شفتي شي من اليهال..تتحرين انه بس صياح وحليب ورقاد..البنت بتكبر ويبى لها مسؤليات ودنيا..وباجر تبى المدرسه وانتي بتعرسين وين تبين بها..ليكون بتشلينها بيت ريلج..واي ريال هذا اللي بياخذ بنيه وعندها ياهل...
كانت ليلى تصيح بصمت في شي يصرخ داخلها..ويقول لها لا تخلين شيخه يا ليلى..دموعها خيسن ثوب امها...اللي حست بها...
ام راشد: ليش تصيحين يا بنتي هالكلام الصدج اللي يزعلكم..انتي ما قصرتي وسويتي اللي عليج واكثر..بس انتي صغيره وما شي كالفنج تتحملين مسؤليتها..هي بنت ولدي انا وانا ادرى منج بهالسوالف..والله لو انها بنت بنتي ما خليها في بيت اهل ريلها..واشلها واربيها انا..بس يوم ان اهل سعاد الله يرحمها راعين اصول وواجب خلو لج البنيه..ومن طيب اصلهم ..والله لو انهم عرب ثانيه ما ترضى..
ليلى: لاامايه انا ما افكر بهالطريقه..انا مب متضايجه من وجودها في حياتي لان هالشي برغبتي انا وعمري ما بندم عليه..بس قلبي يعورني عليها لا ام ولا ابو..وانا مهما سويت عمري ما بعوضها ولا حتى ابتسامة امها ولا عطف ابوها...
دمعت ام راشد يوم ذكرت ولدها سيف..وتقطع فوادها على شبابه اللي راح...وهو ما استوى له سنه من يوم عرس...وتجلبت بقلبها الذكريات وحست فوادها محترق حرة عليه...
قامت ليلى ولوت على امها ويلست تتفداها...
ليلى: امايه شو هاه انا يايه اشتكي لج واصيح عندج...تيين انتي تصيحين الحين من الام ومنو البنت..؟
ام راشد وهي تصيح: سيف يا ليلى الله يرحمه كان اكثر واحد بار فيني..
ليلى: افا يمه وين رحت انا وراشد ومبارك وين ساروا ولا نحن مالنا رب ..وشايفتنا مب بارين فيج...؟
ام راشد: لا يا بنتي بس البعيد يتم له غلا خاص..وسيف عمره ما ضيج بقلبي وطول عمره وانا راضيه عليه..والله اني كل ما شفت هالبنت احس بنار تحرق يوفي..
ليلى مبتسمه رغم كل اللي في قلبها من نيران: قولي الله يرحمه وبس تكفي وتوفي عن كل شي..
ام راشد: الله يرحمه يا بنتي ويجعل قبره روضه من رياض الجنه...
يت شيخه تركض وعقت عمرها بقو فوق ليلى..
ليلى: فديت قلبج يا بعد كل هلي وناسي..
ام راشد: شلي البنت من فوقج ولا تدلعينها ما بينجلب دلعها الا علي انا...يوم بتعرسين بتطيح فوق راسي..وانا تعرفيني ماتحمل البنت المبزايه..
ليلى وهي ما تشوف امها لان شيخه يالسه بحضنها وحاطه ويهها في رقبتها..
ليلى: ومن قالج بخليها عندج..يمكن بس اول شهر وعقب بشلها عندي..
ام راشد: زين ان شاء الله..اول شي حصلي الريل عقب تشرطي عليه..
ليلى وخرت شيخه عنها وطالعت امها: شو قصدج يعني مب حلوه ولا مب حلوه..ولا يعني عشان ما انخطبت للحين فيني شي..هاه قولي..
ام راشد مبطله عيونها:خلاص …خلاص..سلامه بنت اخوج ما بستغرب من وين يابت طولة اللسان هذي الا منج…كلتيني بسم الله منج..من قال انج شينه…بس يا بنتي العرس ستر للبنيه..
ليلى: زين امايه خليه المعرس يي اول وعقب قولي لي وافقي بس للحين محد ياني…
ام راشد: الله يرزقج كل خير وصالح…
شيخه تمسك ويه ليلى:ماما ماما..
تضحك ليلى وتستحي من امها…
ام راشد وشكلها متغير : وين ماما شو من بنت انتي ما تسمعين الرمسه..قلنا لج خلي البنت لاهلها…
ليلى يوم شافت امها صدج تضيجت من الموضوع…شلت شيخه وحبت امها على راسها..
ليلى: امايه هذا موضوع منتهي فديت قلبج انا بسير الحين..لا تضيجين بعمرج..
ام راشد: عقلج براسج وخلج معانده وشوفي اخرتها…



والسموحه منكم ادري انه الحلقه صغيره والسبب انه الحين محد فاضي يدخل
النت وايد بسبب العيد...
فقلت انزل حلقات صغيره علشان الكل يقدر ايتابع معانا ولايمل

وان شاءالله الاخت الغلا بتكمل باقي الحلقه

تحياتي لكم

[الغلا]

تسلم اخوي البدوي الحبوب على هالجزء

وان شاء الله بنزل لكم الجزء اليديد باجر ....

وعيدكم مبارك.. وكل عام وانتو بخير
بس ها مب تنسون عيديتي :):)

اختكم
الغلا

[البدوي الحبوب]

الله ايسلم غاليج اختي

ومشكوره على التواصل الجميل

[الغلا]

حصه بعد ما وصلت ليلى مرت على مدرسه سمر ويابتها قبل يخلص الدوام وكانت الساعه تقريباً 12:30 الظهر..وخذت لها اذن وطلعتها بس جي بدون سبب..وفي السياره...
سمر: فديت روحج والله اني بغيت اتفجج من الوناسه يوم ظهرتيني عندي كلاس math وما اريد احضر..
حصه: والله مب عشان سواد عيونج بس عشان اليوم اربعاء وخاطري نتغدى ويا بعض..من زمان ما تغديت وياج..
سمر: الله بنتغدى برا...
حصه تطالعها باحتقار: شو برا انتي بعد وين عايشين نحن..بنسير البيت نتغدا ويا امايه وابوي..واخواني لان شموس ختيه ردت من السفر وبتيينا باجر وجي يعني..
سمر: الله يا ليت ياخذني واحد شرات ريل شموس..كل يوم يوديني بلاد...
حصه: انتي ان حد فكر يخطبج اذبحيني ولا ارتكبي فيني أي جريمه..تبين سفير شرات ريل شمسه..قولي الحمدلله لو ياج بياع الجرايد...
سمر معصبه: لا والله وانا شو ناقصني..
حصه: زين زين سكتي الله يخليج اختج عانس ما رمست تيين انتي يا شبر ونص ترمسين هالرمسه يالله سكتي ولا كلمه ياهل وترمس عن العرس..
ابتسمت سمر وما ردت..وبعدهم في الدرب ساكتين وحصه تفكر في باجر والحشره اللي بتستوي في البيت والتجهيزات عشان اختها بتيي وتفكر منو بيي ومن بيعزمون وشكثر ناس بيوون..وكل هاه بصوب واحساسها المرعب انها بتشوف حمد باجر في بيتهم بصوب ثاني...تنهدت من الخاطر..
"الله يستر بس"
سمر: هييه ينيتي ترمسين روحج..؟؟
حصه انتبهت وانتفضت شوي: عوذ بالله منج مب ادميه والله انج من سلالة ابليس..
سمر: عوذ بالله منج انتي..
حصه سكتت مره ثانيه...
سمر: حصه
حصه:عله..
سمر مبتسمه: ابى اقولج نكته...
هني حصه ما رامت تيود عمرها ومسكت سمر من كتفها : طفرتي اهلي وطوايفي شو حياتج انتي كل شوي بقولج نكته وبقولج نكته...خلاص لاعت جبدي منج انتي ونكتج هاللي مثل ويهج..بس بس افففف كرهتج...
انصدمت سمر من رمسة حصه بس طنشت ويلست مكانها ولا تحركت لين ما وصلوا البيت ونزلت وسارن صوب حجرتهن وبدلن وانسدحت حصه على شبريتها وسمر طلعت عند امها...بتشوفها وتسلم عليها....
قامت حصه وبطلت دفتر عندها من ايام المراهقه..ويلست تجلب اوراقها اللي احال الزمن بياضها الى اصفرار مثل ما تعبث الفصول في اوراق الشجر وتبدل الاخضر للبني..وانسدحت على الشبريه ويلست تقرا وتجلب الصفحات اللي نصهن معلقات ويطيحن بمجرد ما تفتحهن..وتقرا رمسة ربعها في المدرسه الثانويه...
"عهدتك دوما صديقه وفيه لا تهزك الازمات..وفقك الله وسدد خطاك وجمعني واياك في جنات الفردوس/صديقتك امل"
ابتسمت حصه وجلبت الصفحه..
"حصوه الغاليه/يوم تقرين هالاسطر وعمرج 77 سنه تذكري ربيعتج وفوي شيخة البنات"
ضحكت حصه من خاطرها وتذكرت وفوي هاي كانت من شلة الهبل وياها في الثانويه..ذكريات عمرها ما تنساها...وجلبت على اخر صفحه بالدفتر وشافت شي كتبته لها ليلى اخر يوم في الثانويه العامه..
"غناة روحي حصه..عمر الايام ما تفرق الانسان عن انسان يحبه..ونحن دايما اللي نفرق اعمارنا عن اللي نحب..هذي فلسفتي في الحياة..صدقيني يوم نتم نذكر اللي نحبهم هذي هي قمة تواصلنا معاهم..وبمجرد ما ننساهم نكون نحن اللي حكمنا على بعض بالفراق..لا تعتبري فراق الاجساد هو الفراق..لكن الفرقا يا غاليه هي غياب من نحبهم عن بالنا"
تنهدت حصه وصكت الدفتر..
" صدقج يا ليلى والله بحياتي ما قريت جمله تأثر فيني شرات هالجمله لو شو ما اسوي واتم اعيدها عمري ما أمل منها...صدق بسيطه بس ياما تتضمن"
وردت حصه تجلب الدفتر وسحبت الدفتر اللي تحته وشافت فيه وايد اشياء مكتوبه بخط ليلى اشعار وخواطر كانت تكتبها لصديقتها شما اللي كانت تحبها وافترقت عنها ايام الدراسه يوم انتقلت للعين عقب العرس ....وكانت ليلى دوم تكتب في دفاتر حصه عشان اخوانها دوم ييودون دفاترها وما تعيبهم هالخرابيط...واحتفظت حصه بهالاشياء وتمت تغايظ فيها ليلى وتضحك على تفكيرهن يوم كانن مراهقات....
في واحد من الدفاتر مسكته حصه في قصيده كتبتها ليلى اول سنه لهن في الجامعه عقب ما التقت بناصر في صالة بيتهم يوم كان ياي يطالب اهله بحق امه بس راشد اخوه ما سوا له سالفه..
وكثر تردده هو وابوه على بيتهم وعرفته اكثر بعد وفاة ابوها وحبت في ناصر قوته وقسوته وشافت فيه ابوها الله يرحمه وهو تعلق بها رغم ان كل سبل الحياه بينهم مستحيله .....كانت ليلى كاتبه في اخر صفحه على الغلاف..
"تجّمل غض طرفك يا نعيم العود..تجمّل لا تعذب قلب مفتونك..انا من يوم ما شفت العيون السود..اسرني طرفك ولا اعيش من دونك..تبادلنا المحبه والقلوب شهود..عيوني ترجمت الاحساس لعيونك..احبك وانت في عيني نعم مفنود..حلفت اني اراعيك ولا خونك..انا مالي في غيرك يالغلا مقصود..انا لك انت بس عايش في كونك..غلاك بخافقي والله ماله حدود ..وكل الناس عندي ما يساوونك..دخيلك لا تناظر بالعيون السود ولا تذبح عيوني بنعّس جفونك.."
صكت حصه الدفتر وابتسمت ولفت على الساعه واستغربت شافتها 1:15 معقوله مرت ساعه الا ربع ما حست بها..؟؟
نزلت حصه على طول وسلمت على ابوها وخليفه وعبدالله وامها ويلست في الصاله...
حصه: وين ذياب ما شفته اليوم..؟
ام خليفه: سار دبي ويا ربعه وبيرد ان شاء الله باجر وقت العشا ويا قوم خلفان بن محمد واهله واختج..
حصه: هيه خير ان شاء الله...
خليفه: وين رحتي اليوم؟
حصه: الدوام ومدرسة عفاري وحمده..
خليفه: وليش قبل تسيرين ما تقولين حق حد ..
حصه: شو فيها المدرسه ما تحتاي اذن وبعدين انا قلت بسأل عنهن لانك مشغول وما ابى اتعبك..
خليفه: زين وشو قالوا لج...؟
حصه: عفرا مسوين لها رعايه خاصه يقولون من اوائل المدرسه هالسنه ان شاء الله..و..
سكتت حصه..
عبدالله: والتحفه الثانيه...؟
خليفه: احترم نفسك ولا ترمس عن بناتي جي..
يضحك عبدالله...
بو خليفه:شتبون بها هالصدعه وويع الراس يلسوا بناتكم بالبيوت الزمان تغير واول كان كل شي هين..بس الحين الدنيا تصعبت وتصعب معاها كل شي..
حصه: فديتك يا بويه حكيم في كل شي...
عبدالله يضحك: ابويه فديت روحه..ماعنده واحد اثنين علىطول اقطع الشك باليقين...
يضحكون ....
ام خليفه توها منتبهه: وين سمر..؟
حصه تذكرت انها واجعت سمر اليوم وكسرت خاطرها...
حصه: امايه بسير اشوفها اكيد في فلة خليفه ويا عفاري وحمدوه..
وقامت حصه من عندهم وطلعت الحوش بتسير فلة خليفه...

السموحه عالتاخير


اختكم
الغلا

[البدوي الحبوب]

تسلمين اختي على هالحلقه وان شاءالله بعد اجازة العيد بكمل باقي الحلقه

واذا شفت ردود تتطلبون فيها اني اكمل عادي بكمل قبل ماتخلص الاجازه

تحياتي لكم

[الغلا]

تسلم اخوي على هالتواصل ....
الله يعطيك العافيه

وعيدكم مبارك


:)

اختكم
الغلا

[العيناويه وبس]

تسلمين الغلا ..
عل هاي القصه ونترقب المفيده واليديد وعيدج مبارك شعنوني وبالنوفيج يارب ..

اخـتج.. العيـ وبس ـناويه

[البدوي الحبوب]

في حجرتها يالسه مع حمدان اخوها عقب ما ردوا من المدرسه وتغدوا لرواحهم.....وما ساروا بيت يدهم بو راشد...حمدان يالس يسولف وهي تبطل اوراق الامتحان..
سلامه: يا حظي ..
حمدان: بشو؟
سلامه: اليوم قالت لي المس اني بعيد صف ثاني ثانوي مره ثانيه..وقالت لي مستحيل انجح لو شو ما سويت..
حمدان: وشو الغريب في الموضوع...؟
سلامه: كيف بقول لابويه ان انا ساقطه وما شي امل من نجاحي..يعني يا فالح باختصار..كيف بيتقبل رسوبي اخر السنه وهو حاط بباله اني طول السنه got full marks..؟؟
حمدان: مشكلتج والله محد قالج تقصين عليه...
سلامه وهي تسحي شعرها: عدال يالصادق انت اللي مول ما تجذب...اصلا ابويه ما شي بيقهره في الدنيا كثر درجات عفاري بنت عمي خليفه..
حمدان:........
سلامه: بديت اكرهها والله...
حمدان: ليش ؟ عشان احسن عنج..
سلامه: احسن عني بشو؟؟ جمال ولا شو..؟
حمدان: هاللي تفكرين فيه بس..الجمال..فكري شوي بأشياء اكبر عن هذي...
سلامه: زين اطلع ابا ارقد..ممكن يعني...
حمدان: انا بسير بيت يدتي غاليه...يارب تكون عمتي ليلى موجوده...
سلامه: وين بتكون يعني اكيد في البيت...
حمدان: انخمدي ورقدي وانا بسير لهم مليت من هالبيت الكئيب عوذ بالله ..جنه سجن والله العظيم..
سلامه: زين شو نسوي مثلاً..نغير ابونا وامنا عشان نرتاح..مب بكيفنا اخترناهم هم اللي يونا...
حمدان: يا عيني على التفكير...!!! نبدل امي وابوي؟؟ روعه بصراحه انا ما ادري من وين تطلعين هالافكار..خاطري اعرف؟؟
سلامه: ما عليك انت تتمصخر وبنشوف اخرتها من يضحك...
حمدان طلع وصك الباب وراه وسلامه رقدت على طول وهو سار بيت يده بو راشد..واول ما دش الصاله شاف امه يالسه ويا يدته وسلم عليهن ..
ام راشد: حمدان ولدي ايلس ويانا شوي..
ام حمدان: مستعيل خله يسير عند عمته ...
حمدان: لا والله امايه هب مستعيل بس ما اعرف شو ايلس اقول وياكن..
ام راشد: فديت روحك يا حمدان غديت ريال ما شاء الله...
يبتسم حمدان..وامه تطالعه بفخر...
ام حمدان: فديته حمداني الحين بيتخرج وعقب بيسير كلية الشرطه ان شاء الله..
حمدان: لا امايه مابا الشرطه انا..
ام راشد: شو بلاها الشرطه ما شي اخير عنها...شحلاتك وان ضابط محد قدك..
حمدان وهو ينش من مكانه ساير فوق: خلوني انجح اول وعقب يصير خير وين بسير...
وسار حمدان فوق عند عمته ليلى..دق الباب ولقاه مبند وتم يدق...وبعدين فتحت له ليلى...
ليلى: هلا بالاستاذ...
حمدان: الله يستر شكلج يقول في مصيبه مستويه....
ليلى مبتسمه: ليش الاخ مستغرب..؟؟ انت المصايب بنفسها..يعني انت اذا ما سويت مصيبه عادي تختنق..ولا عادي يستوي بك شي..
حمدان يضحك: بطول وانا واقف برع...
ليلى: اتفضل يالغالي...
دخل حمدان وشاف شيخه يالسه تلعب في بعض العرايس اللي مازره الحجره...وتخربط الماي في كل مكان ونها تسبح عرايسها...
حمدان: والله ما شي شغله عندج الا هالبنت...
ليلى: وليش زعلان..؟
حمدان: ما شي بس مضيعة وقت..
ليلى: زين شو مسوي وكيف بترمس ابوك الحين...
حمدان: عمتي ..ترا سلامه اليوم قالوا لها انها ساقطه ومستحيل تنجح هالسنه مول...
ليلى: تستاهل هاللي اباه انا...
حمدان: ليش تكرهينا..؟
ليلى مستغربه: ليش اكرهكم ان شاء الله..انا بالعمد ودي انها ترسب عشان تتعلم..مب انها هامله عمرها طول السنه وعلى اخرها تبا تنجح..شو من تفكير عندك انت وهي..؟
حمدان: ليكون بس تدعين علي في صلاتج؟
ليلى وهي حاطه ايدها على كتفه وهو موخي راسه: يا غناتي انت ولد اخويه من لحمي ودمي ليش ادعي عليك..والله وحده العالم اني اكثر وحده تدور مصلحتك وما في شي شاغل بالي عقب شواخي الا مستقبلك انت وسلامه..
حمدان: عمتي والله خاطريه متضيج احس كل شي ضدي واحس بعمري ما روم اتنفس..بيتنا صدج شرات القبر..وين تبيني ادرس..وامايه كلما شافتني قالت لي يالله خلص وهات نسبه عدله عشان اتم ارفع راسي بك جدام الحريم..وابويه اربع وعشرين ساعه يقول لي ما منك فايده انت فاشل ويطلب مني انجح...يوم انه يدري اني فاشل كيف يباني انجح ممكن تفهميني؟؟
ليلى تنهدت وفي خاطرها" الحين هاه وقت هالسوالف يا حمدان الله يهديك تبى توهقني ويا ابوك"..
ليلى: ما عليه يا حمدان انت ريال وكم سنه وانت خريج وبعد فوقهن شوي وانت ريال بحرمه وبيت وعيال..وبيكون كل هاللي تسمعه وتشوفه ذكريات وخرابيط بتضحك عليها...
حمدان: والله اتمنى هالشي...
ليلى: انت ما رقدت عقب ما ييت من المدرسه..؟
حمدان: لاء فيني نشاط مب طبيعي..
وقام صوب شيخه
حمدان شلها وطالع ليلى: بشلها وياي العزبه...
ليلى: شو تقول انت وين تبى.؟
حمدان مبتسم: الله يخليج عمتي والله بتستانس..خليني الله يخليج..
ليلى عاقده حياتها: شو تقول انت والله انك مب صاحي..والله ما توديها..
شيخه مب فاهمه السالفه بس مبتسمه ويودت ويه حمدان وتأشر جهة الباب: بنلوح ددي..
ضحكت ليلى وضحك حمدان..
حمدان متشجع: هاه عمتي شوفيها موالفتني عادي هب زايغه...يالله عاد..
ليلى: زين بسير وياكم..
حمدان: لا استريحي فديتج ماله داعي..انا وهي والدريول باشا..
ليلى : لا ضحكتني تصدق..والله لو تموت ما خليك تسير بروحك العزبه وهي وياك ..ما شي شغله ضاع العقل..
حمدان: افا تشككين في رجولتي وقدراتي..يالله عاد عمتي ارضي فديت روحج...
ليلى: بفكر وأجلها لباجر عشان افكر عدل...
حمدان: لا لا باجر ما ريد..انا معزوم...
ليلى: وين ؟
حمدان: بيت يدي مبارك...
ليلى: منو ؟وليش؟ وشو مستوي ؟وليش ما خبرتني حصه...؟ شعندهم؟ وشو صار ؟ممن تفهمني وتوضح لي ليش انا اخر من يعلم ؟وبعدين كيف انت معزوم وانا لاء؟..ومن اللي عازمنك..؟ومن خبرك اصلا انه في عزيمه...؟
حمدان مبطل عيونه مب مستوعب شي..حط شيخه على الارض ويلس على الشبريه...
بعده مبطل عيونه على اخر شي: اقول ممكن ورقه وقلم بحل هالامتحان ؟ خيبه مستويه جورج قرداحي.. كم سألتيني سؤال والله ما حيد شي منهم الا اخر كلمه وهي عزيمه..
ليلى تضحك: بسم الله من ويهك ..زين لا تغير السالفه ارمس...
حمدان: ما شي عمتي شمسه بترد من بلجيكا هي وريلها انتهت الفتره اللي محدد فيها يكون سفير هناك..وعازمينهم..
ليلى: وشو اليديد في هذا..شموس من استوت وهي تسافر مب اول مره..ليش العزايم..
حمدان: ربج بعد...بنتهم متولهين عليها..وما عرفوا يفرون فلوسهم وين قالوا نسوي عزيمه...
ليلى: زين والله..ما عليه يا حصه الهرمه ولا ترمسين..
حمدان: خلينا بموضوع العزبه شو قلتي..؟
ليلى: زين قلت لك بفكر، اجلها ليوم الجمعه...
حمدان: عمتي شو هاه..اليوم الاربعاء الوحيد اللي بكون فاضي..والخميس معزوم..والجمعه بحضر للمدرسه...
ليلى: والله ما اظن انك بتسير العزيمه الساعه 10 الصبح...
حمدان: انزين برايج انا بسير البيت...
ليلى: ونك زعلت..؟
حمدان: لا والله..محد يزعل من اغلى الناس بحياته..
ابتسمت ليلى ولوت عليه: فديت روحك يا ربي..الله يوفقك دنيا واخره...
وسار عنها حمدان البيت..وهي دقت لحصه...
ليلى: مراحب اخت حصه..
حصه وصوتها رقاد: اهلين..
ليلى: عوذ بالله من أي مقبره طلعتي؟
حصه: يعلج فداي...شو تبين..
ليلى: مب منج من اللي يتصل بج...
حصه: زين عطيني خمس دقايق وبسوي لج تلفون..بسير اصلي المغرب ..
ليلى: اوكي برايج..مع اني اعرف ما بتدقين..
حصه: والله بتصل اصلا خاطري ضايج وابى ارمسج..
ليلى: اترياج...
نزلت ليلى وياها شيخه..وخلت شرملى توديها حديقة البيت تلعب شوي..وهي يلست ويا راشد وامها..
ام راشد: بتسيرون باجر بيت مبارك.؟
راشد: ان شاء الله اكيد..عازمينا وخلود مصره انها تسير..
ام راشد: هاه ليلى بتسيرين ولا لاء.؟
ليلى: محد عزمني..؟
راشد يطالعها بنظره غريبه: ليش انتي مب منا يعني..ولا لازم عزيمه خاصه...
سكتت ليلى..علاقتها براشد احترام فضيع بدون حدود..ما تبى تجادل في معركه بنظرها بتطلع منها خسرانه غصباً عنها لانها تعرف انها مستحيل ترضى تخليه يطلع غلط لو درت انها على صواب بس وتمت ساكته..ونشت بتطلع من باب الصاله الحوش..
ام راشد: وين سايره ليلى تعالي يلسي..
ليلى: بسير اشوف شيخه..
وطلعت ليلى..
ام راشد: زين جذي حرام عليك تكسر بخاطرها..ما تروم ترمس وانت هني..
راشد: شو تبين برمستها ما احب هالبزا اللي هي فيه..
ام راشد: يا ويلك من الله ..أي بزا اللي ترمس عنه؟؟ليلى هي الوحيده اللي انظلمت فيكم..وانحرمت من حنان ابوها..
راشد: ما عليج منها بتعرس وبتنسى..الا اقول ما رمستيها في سالفة شيخه بنت سيف الله يرحمه..
ام راشد تنهدت: يا ولدي رمستها بس مب طايعه..وانا امك طالبتنك طلبه ما تردني فيها..
راشد: افا عليج والله يالغلا لو تبين عيوني واصله...
ام راشد: علني افدا روحك يا ولدي..لا تضيج خاطرها ورمس اهل المرحومه وقلهم لا يستعيلون على البنت..لين ما نشوف لنا رمسه ثانيه ويا عمتها..ولا تعذر لهم بأي شي ..والله بيتقطع فوادها عليها..
راشد: والله مدري شو اقولج بس هم ما ادري بلاهم..اول شي رضوا والحين خوالها ردوا احشتروا يبون بنتهم..
ام راشد: لو يينا للحق البنت مفروض تتربى عند ام امها..بس شو نسوي ؟
راشد: البنت بنتنا ونحن اهلها واسمها شيخه سيف مب شيخه سعاد...وانا اول مره اشوف ليلى تعاند على شي صح..
ام راشد: الله يسهل اللي فيه خير وصالح...
راشد: ان شاء الله امايه...
ونش من مكانه وحبها على راسها..
راشد: امايه انا ساير الحين البيت بسبح وبسير اشوف لي كم شغله..تامريني بشي..؟
ام راشد: لا فديت روحك تحمل على عمرك والله الله بنفسك...
راشد: لا يهمج الغاليه..الحين بتييج خلود هي قالت لي تبى تيي تيلس عندكم الليله ما شي مدارس عند العيال وقالت بسهر ببيت الوالده..
ام راشد مبتسمه: الله يرضى عليكم يا ولدي...


السموحه منكم وان شاءالله الاخت الغلا بتكمل باقي الحلقه

تحياتي لكم

[الغلا]

في بيت مبارك الناس محتشره ولو ان العزيمه باجر..بس الكل يشتغل حتى بنات خليفه...وفي الممر اللي فوق بين غرفة ذياب وحصه...
عفرا: اقول سمر وين عمتي حصه حطت المفارش مال ميلس الحريم..
سمر وهي تاكل ايس كريم: ما اعرف..
عفرا بنظره تحتقر فيها سمر وهي سايره عنها: شو تعرفين انتي غير الاكل..
سمر: سمعتج !!
طنشت عفرا المتباهيه المتعاليه اللي بعمر حمدان ثانويه عامه..متفوقه بدرجات تبهر العقل والكل متأكد انها بتكون من اوائل المدرسه او المنطقه.... جميله جمال اكبر من الجمال نفسه..نظرة الشموخ اللي ماليه عينها مثل عمتها حصه..وكبرياءها اللامتناهي..وخطواتها الواثقه..غير عن كلامها الموزون..ومع هذا محد كان يحبها ولا يسوي لها سالفه..حتى في المدرسه..سلامه وحمدان اربع وعشرين ساعه ويا حمده اختها..حمده اللي اصغر من سلامه بسنه وفي اول ثانوي..راسبه وكل شهاداتها كيك احمر..بس على اخر السنه تنجح وعمرها ما عادت سنه..بس تصف الدواويح طول التقاويم....حمده اللي صح مب نفس جمالها لكن قمه في الربشه والحركه ..كلها على بعضها سوالف وضحك وماليه المكان بحشرتها..ورغم كل هذا انيقه بشكل بسيط يلفت لها النظر واللي يشوفها يحبها من ابتسامتها اللي صدق تحسس اللي يشوفها انها من القلب..
نزلت عفرا الصاله اللي تحت وسارت صوب المطبخ...وحصه واقفه تشوف شو يسوون..
عفرا: عمتي حصه وين كنتي حاطه المفارش اللي اخر مره كانن في فلتنا عقب عزيمة قوم خالي فهد..
حصه: ما ادري والله انشدي أي حد من البشاكير..
عفرا: كلهم يقولون انتي مستعملتنهن اخر مره...
حصه: زين والله ما حيد وين حطيتهن...خلني اتذكر...يا ربي وين حطيتهن..؟؟
دخلت حمده الحشره...تغني...
" يا عذابي سبة جروحي يا مصابي يا شقا حالي..ليش عني تصد وتروحي وانت قلبي حبك الغالي"
حمده: اووه شعندكم حاشرين البيت...؟
عفرا: نشتغل عندنا ناس بيون...انتي من وين ييتي..؟؟
حمده: كنت اكلم حمداني مسوي تلفون يتخبرني عن شي...
عفرا اللي انقهرت: شو هالشي...؟
حمده مبتسمه: لو اباج تعرفين بقوله من اول جمله بس اسرار...
عفرا وهي تطالعها بغرابه: وشو من اسرار بينج وبين حمدان..؟
حمده وهي تفتح الثلاجه وتصب لها عصير: نفس الاسرار اللي بينج وبين سعود...
انقهرت عفرا اكثر: احترمي نفسج..
حمده مبتسمه ببرود: محترمه من زمان....
حصه بصوت عالي وهي مبطله عيونها: اييييه انتي وهي..شو بلاكن ..احسن شي صفعيها وانتي الثانيه قومي ضربيها واسحبي شعرها..شو من مذهب عندكن انتن الثنتين انا واقفه هني وجي ترمسن عيل لا ظهرت شو بتسون؟؟؟
حمده: اسفه ابله حصه..
وطلعت..
عفرا تبا تسوي عمرها عاديه قد ما تقدر: ما تذكرتي المفارش وين؟؟
حصه منقهره من ثقة عفرا: لا ما تذكرت اذا ذكرت بطرش لج تينا تييبهن لج فلتكم..
عفرا: انا ما اباهن ولا امايه..نحن نبى نحطهن على طاولة الميلس فبيتكم انتوا..عشان الضيوف اللي باجر..
حصه: والله ما ادري عقب بشوف هن وين..انتي الحين سيري كملي شغلج...
عفرا: اوكي بسير ..
وطلعت عفرا وقلبها محترق..لا حب في حمدان ولا شي بس انقهرت..هي روحها مب عارفه ليش هالشعور..قهرتها حمده..وفي نفسها" ليش دايما هي تاخذ كل شي مع انها مب شي راسبه ومب حلوه بس الكل يحبها...احس بضيج...يا ربييه ليش هالمشاعر المختلفه..برايها المهم ابويه يحبني وبس..ما يهمني شي ثاني"
..........
في فلة خليفه...ابو عفرا يالس يرتب اوراقه ويحطهن في ملف الشركه وام عفرا يالسه عنده تسولف له عن باجر وشو بيسوون...
خليفه: ما ودي اسير لدبي احس ما فيني حيل اسوق لدبي...
ساره: كبر الريال خلاص ما يروم للمشاوير العوده..
يضحك خليفه: أي مشاوير عوده..بس والله احس ما روم اركز بالسواقه لين دبي..عيوني ما ادري بلاهن...
ساره: قلت لك لازم تروح المستشفى وتسوي فحص..ربك بعد يمكن تحتاي نظاره ولا شي..
خليفه: بنشوف ان شاء الله خير...
ساره: الله يعينا على باجر..
خليفه: هيه والله صدقج الله يعينا اسمينا بنحتشر حشره..الا اقول عزمتي اهلج...
ساره: وشمعنى يعني ما ذكرت اهلي الا يوم طرينا الحشره...
خليفه يضحك: هم الحشره كلها...
ساره: احلف انت بس...؟؟!!
خليفه: اقول سارونه وين البنات...ما شفت عفاري اليوم...؟
ساره: اييه وحمده بنت الحرمه الشينه محد يذكرها....
خليفه : حرام عليج..بس عفاري غير..عفرا الاولى وغناة قلبي..وبعدين ما شاء الله حمدووه محد فهالدنيا ما يحبها بس عفاري وحدانيه ما يخصها بحد وكل شي تسويه ما يعيب خلق الله..بس حمدووه شيطونه وحركيه تفرض نفسها فرض...
ساره مبتسمه: فديتها عفاري طالعه عليه وحدانيه...
خليفه يطالعها بغرابه: شو مثلج..؟؟ يعني لو قلت البنت شينه بتقولين شراتك...؟والله انكن الحريم مصايب...زين يالله سيري ساعدي قوم امايه في بيتهم تلاقين امايه مسويه يوم العمل العالمي...
ساره: انا قلت للطباخ هني يسوي الحلويات وطرشت لهم البشاكير كلهن..بعد شو تبى..؟
خليفه: سيري لهم انتي اكيد يحتايونج في شي...
ساره: ان شاء الله على هالخشم..
وظهروا كلهم من البيت وهم سايرين في الحوش بيت بو خليفه..شافوا عفرا تمشي لروحها يايه من بيت يدها موخيه راسها وتتكلم بصوت واطي ما ينسمع بس مبين انها تغني...
خليفه: علني افدا هالحس...
عفرا رفعت راسها ويوم شافت ابوها برد قلبها وسارت ولوت عليه..وحبته وسلمت على امها...
عفرا: ابويه ولهت عليك..
خليفه: فديت روحج من وين يايه وليش تمشين في الحر لروحج جان تميتي ببيت يدج لين ما يخف الحر شوي...
ساره مبتسمه: يالله يالله يالبزا...
عفرا : ما عليه ابويه انا سايره ادور مفارش ميلس الحريم ضيعناهن...
خليفه: ما بتردين ويانا ..؟
ساره: خلها يمكن يدتها مطرشتنها...
وسارت عنهم عفرا البيت وهم ساروا بيت بو خليفه..
...................
*للتنويه
الابيات للشاعر الاماراتي/ حميد بن سعيد النيادي..

ترقبو الحلقه الثالثه من الاخ البدوي الحبوب ....
ومشكووورين على تواصلكم الحلو


اختكم
الغلا

[البدوي الحبوب]

الحلقه الثالثه
الجزء الاول(3).

في الليل الساعه 12 وعقب ما رقدت شيخه...انسدحت ليلى ع شبريتها ويلست تفكر في ناصر..
" ناصر انشغلت عنه من يوم الثلاثاء ما شفته ولا سمعت حسه..يا ويل حالج يا ليلى كم بتعيشين..؟..اااه يا قلبي..حصوه الهرمه قالت بتدق وما دقت..اعرفها مسودة الويه جذابه من يومها..."
تتجلب على الفراش ما شي رقاد.." يالله شو هالحاله ابى ارقد...مب حاله هذي..".
ما ياها رقاد وقامت وشغلت الليت..وطلعت صور المدرسه ويلست تطالعهن وتضحك على شكلها هي وحصه وكيف كانت شعورهن..وتجلب في الدفاتر والاوراق..بس ما لقت شي يذكرها بأي شي ولا أي شي يشغلها..كل اوراقها وذكرياتها وكتاباتها في بيت حصه..وكلما فكرت تطلبهن منها تنسى..فتحت واحد من كتب الثانويه العامه وشافت توقيع شما ربيعتها الروح بالروح اللي عرست وسارت العين...
"ذكراي من ماضي غرامك وعودك...واحلى ليالي العمر سجات ماضيك..طبيعتي تفرض علي وجودك..لي غبت عن عيني..حناني يناديك"
ضحكت ليلى وذكرت شما ربيعتها اللي حتى ما قامت تدق ابداً..ولا حتى بالمسجات تتواصل وياها..وعذرتها..مشغوله بريلها وبيتها ومب نفس يوم انها بنيه وحياتها بتكون شوي فيها وقت فراغ...وهي سرحانه وتقرا بعض الاشياء في الكتب..صاح تلفونها...
ليلى وقلبها يدق بسرعه قبل تشوف اللي متصل: بسم الله الرحمن الرحيم من بيتصل لي الحين...؟
وشافت التلفون مكتوب" حصه"..
ليلى بهمس: شو فيج حصه شو مستوي بج ليكون تعبانه ولا حد استوى به شي..؟
حصه تقلدها ونها تهمس وياها وبصوت مبحوح: لا ما شي يا خبله بس ابى اسولف وياج..
ليلىبهمس: يالسخيفه طيحتي قلبي...
حصه وردت ترمس بصوت عادي: وليش تهمسين ان شاء الله.ليكون ريلج توه راد وما يباج ترمسين..؟
ليلى مبتسمه: وشاللي حارنج..؟ ما عندي ريل بس كيفي اتدرب من الحين ربج يمكن ابتلي فواحد ما يباني ارمس انصاص الليالي..
حصه: زين اقول بتيين باجر بيتنا...يوم نشدت خليفه قال لي انه رمس راشد خوج وعزم اهل بيتكم...
ليلى: مابا ايي...
حصه: وليش ان شاء الله مب من مستواكم ولا مب من مستواكم..؟
ليلى: لا الثانيه مب الاولى...
حصه: يالله عاد تعالي بكون لروحي..اباج تآزريني...
ليلى: مالي بارض والله .
حصه: الله يخليج...تعالي والله وناسه قوم شموسه واهل ريلها ربشه...
ليلى: بشوف اذا قدرت ...
حصه: شو كنتي تسوين قبل ادق لج..وليش يا الديايه ما رقدتي للحين...؟
ليلى: والله يالسه اطالع صورنا مال الابتدائي..وتذكرت شي..
تضحك ليلى..
حصه معصبه: ما يضحك كم مره قلتي هالسالفه..؟
ليلى وهي تضحك: مب رايمه انسى شكلج والله وانتي.....
قاطعتها حصه: باي والله مب منج من اللي يدق لج..
ليلى: حصوووه بس والله سوري ..بطني يعورني من الضحك..
حصه ونها عاديه: زين سامحتج...
ليلى تضحك: والله عادي شو فيها مب انتي اول ولا اخر بنت طلعوها عشان القمل...
حصه: والله انج نذله باي..
وبندت في ويهها....
ليلى: يا ويلي شكلها صدق عصبت...برايها...وطرشت لها مسج..
"تصبحين على خير يا عمري"
حصه طرشت مسج ثاني..
"جب ما يخصج فيني ولا تدقين على رقمي مره ثانيه"
ليلى تضحك...وطرشت مسج ثاني..
"زين حصوه بدق لج والله ملانه..شسوي ما حب حد الا انتي فديت روحج ردي علي"
ودقت ليلى...
ليلى: حصووه..
حصه: شو تبين...؟
ليلى: حرام لا تزعلين مني اهون عليج..
حصه: اكيد لاء...
ليلى: زين منو عازمين باجر...؟
حصه: والله كل حد من العايله ابويه عازمنه..
ليلى: الله يعينكم..
حصه: فديتج ليلوه تعالي مب حلوين هلج بدونج...
ليلى: خلاص فديت روحج بحاول والله...
حصه: فديتها يا ربي شو اسوي بعمري احبها احبها...
ليلى: من؟
حصه: من بعد اكيد انتي..
ليلى تضحك: يعني الحين تقولين لي هالرمسه..يعني لازم انتحر..هاه..؟؟ قولي لي يعني تبين الفكه مني وخلصي عمرج..تعرفيني ما روم اتحمل..شو اسوي بحياتي..اعق عمري من الدريشه مثلاً..؟ لا لا اقولج احسن شي اني اشرب لي ديتول وافتك نهائياً...
حصه مب رايمه ترمس ميته على رمسة ليلى من الضحك....
حصه: لا يا بوج خلاص استريحي مب متفيجين للفضايح صبري لين ما عرس وانتحري...
ليلى: هاه يعني تبين الفكه...قولي من اول...
حصه:ابى الفكه منج عقب العرس..ابا أأمن على حياتي وادور لي بديل بغيابج.....سمعي بخبرج شو استوى اليوم مع بنات خليفه...
ليلى: شو استوى....؟
وخبرتها حصه كل شي..وانقبض فواد ليلى..تعرف كل شي عن حمدان وعمره ما خبى شي عليها..كيف يرمس حمده وما يقولها...؟؟
حصه: وين وصلتي.؟
ليلى: هني والله بس افكر شوي ...
حصه: لا تفكرين وايد انا تعبت من كثر ما افكر...
ليلى: في شو.؟؟
حصه: اقول ليلى لحظه شوي....
وسمعت ليلى حصه ترمس حد دخل عليها...
حصه: باااك..
ليلى: احلى ولكم لاغبى حصه..
حصه: ارجوج يا حفيدة انشتاين...
ليلى: يالله بسير ارقد عيوني تعورني...
حصه: هيه وانا والله يايه ببند..سمر يت من عند امايه ما فيه تقول لها اني ارمس بالتلفون هالحزه...
ليلى: خلاص غناتي تصبحين على خير..
حصه: وانتي من اهله لا تنسين باجر..
ليلى: يالله مع السلامه مابا انسى....
ورقدت ليلى...على طول...
...............
في بيت بو خليفه حصه منسدحه ودخلت سمر..وشغلت الليت وغيرت ثيابها..وعقت عمرها على الشبريه تتحرىحصه رقدت...وحصه ما تروم ترقد والليت مبطل...
حصه: يعني ما بتصكين الليت لين ما نقول صكيه..
سمر:ما كنت اعرف انج واعيه تحريتج رقدتي...
وقامت سمر وبندت الليت وانسدحت وتلحفت...
حصه: سمر..
سمر بفرح ما صدقت حصه تبى ترمسها: هاه..
حصه: وليش مستانسه يعني..؟
سمر: لانج مب زعلانه...
حصه بينها وبين نفسها" الحين من اللي مفروض يزعل انا ولا هي..بس يالله فكه ريحتني من الاعتذار"
حصه بنذاله: زين احمدي ربج اني رضيت عنج..
سمر: زين شو تبين تقولين...
حصه: نسيت...
سمر بثقاله: لا دخيلج تذكري...
حصه: ما شي بس سكتي برقد...والله نسيت شو بقول...
سمر: حصوه..
حصه بعصبيه: مب اصغر عيالج..اسمي حصه...
سمر: حصه..
حصه:هاه..شو بعد..
سمر: بقولج نكته...
حصه ما عرفت شو ترد بس الظاهر هالمره ما رامت تيود عمرها وانفجرت ضحك...بصوت خفيف اخر شي اترفع صوت ضحكتها...
سمر ابتسمت ببلاده: ههههه ادري طفرتبج..
حصه وهي تضحك: زين يوم عرفتي..
سمر: اقولها ولا تبينها تم في خاطري لباجر..
حصه: قولي..
سمر:في واحد اول مره يرمس بنيه بالتلفون..قالها كم عمرج...؟قالت له:37..قال لها: الله مقاس نعالي..
حصه: مثل ويهج..تحريت شي يديد...
سمر: بقولج وحده ثانيه..
حصه: برقد اقولج يالله شكلج بتفتحين لي صندوق النكت...برقد الحق على عمري قبل لا تبدين ولا تسكتين..تصبحين على خير..
سمر: وانتي من اهله..
..............
اليوم الثاني الصبح..سلامه نشت من وقت عقب رقاد البارحه اللي من المغرب لليوم الثاني..وسارت بيت يدها مبارك وشافت يدتها ناشه ويالسه في الصاله وحاطه قناة المجد والمقرئ يقرا قرآن..وسلمت عليها ويلست عندها...
ام راشد:شو اللي موعنج الحين..؟
سلامه: رقدت من امس العصر لليوم..
ام راشد: خيبه...!!
سلامه: وين عمتي ليلى..؟
ام راشد: بتنش عقب شوي ..
سلامه: بسير اوعيها..
ام راشد: بس تحملي بتحرج عليج..
سلامه وهي سايره فوق: عادي..متعوده...
عند الحجره وعلى دق الباب نشت ليلى ودخلت سلامه عقب ما بطلت لها الباب..وقامت ليلى وصلت وقرت قراءن شوي ويلست ويا سلامه...
ليلى: ليش واعيه من وقت.؟
سلامه بطلت شعرها وانسدحت على الشبريه: ما اعرف راقده من امس العصر...ما فقدتيني..؟
ليلى: بالعكس ارتحت من حشرتج..
سلامه: برقد هني...
ليلى: يا سلام توعيني عشان ترقدين مكاني...
سلامه: يدتي غاليه تحت انزلي سولفي وياها..
ليلى: اعرفج لوتيه تبيني اظهر عشان توعين شويخ..
سلامه وهي تتثاوب: لا والله مب متفيجه لها..سيري عند امج وانا بنام...
ونزلت ليلى وسلامه ردت ترقد...وفي الصاله ما شافت امها بس لقت التلفزيون مثل كل يوم حاطينه على القراءن في قناة المجد..
وسارت الحوش وشافت امها في الزراعه تعابل فيها..سلمت عليها ويلست تسولف وياها..وشوي استوت الساعه 8 وشافن خلود ام حمدان يايه من صوب فلتهم هي والبشكاره اللي يايبه الريوق وياها...
ليلى: حليلها مرة اخويه ايهدناها...
ام راشد: الله يرضى عليها يا بنتي...
وقربت منهم خلود وسلمت على عمتها...
خلود: صبحج الله بالخير عمتي ام راشد...
ام راشد: الله يصبحج بخير وعافيه...
خلود: شحالكم اليوم ان شاء الله بخير..
ليلى: الحمدلله ناشين من وقت نتريض انا وامايه..
خلود تضحك: واعليه منها عموتي تخيليها رياضيه...
ام راشد: وليش شو بلاني .؟ ما تعرفني ايام الشباب ماشي احسن عن رياضتي..
خلود: اييه صح كنتي رياضيه درجة اولى...
ليلى: وحصلتي كم ميداليه ذهبيه..
ام راشد: ما عليج يالهرمه تضحكين عليه...وين ايامنا وايامكم ..فرق السما والارض..ايامنا ما شي اخير عنها...
خلود: زين عمتي تعالي داخل بنتريق يايبه لكم الريوق ويايه....
ام راشد: الله يعطيج العافيه بنتي..
وساروا داخل يتريقون....وياهم راشد ويلس وعقبه وصل حمدان ويلسوا كلهم يتريقون ويسولفون...
راشد: يالله برايكم انا بسير الوكاله موتري خربان بشوف شو سالفته...
ام راشد: الله وياك...
خلود: لا تنسى ترد بدري عشان تودينا بيت بو خليفه...
راشد: يا بيت بو خليفه هذا..اصلا لو افقد الذاكره ما بنسى انهم عازمينا اليوم من كثر ما حنيتي على راسي...
يضحكون كلهم على خلود..
حمدان: ابويه انا بسير العزبه اليوم...
راشد: ويا منوه..؟
حمدان يطالع عمته ورد يطالع ابوه: لروحي مع الدريول باشا...
ارتاحت ليلى لانها كانت ناويه توافق ان حمدان يشل شيخه وياه..بس ما تبى أي حد يعرف لانها تدري الكل بينصدم من هالحركه وكيف توافق انها يشلها العزبه لروحه..
بو راشد: سير محد قابضنك...
ابتسم حمدان..وسار بيتهم بيغير ثيابه..وقبل يطلع..
حمدان: عمتي ليلى تعالي وياي..
ليلى: ما فيه شده اسير هناك..
حمدان: يالله عيزت عمتي...
ليلى قامت على طول: لا والله شو بعد الحين بسير وياك..قال عيزت...؟
ضحكت خلود وام راشد...
حمدان يضحك: ما تيون انتوا الحريم الا بالنغزات..
ليلى وهي يايه صوبه: حريم في عينك انا بعدني انسه..
حمدان: زين سوري...
وساروا بيت راشد..


السموحه على التأخير ... ان شاءالله الحلقه أتعيبكم والحلقه اليايه مع الاخت الغلا ...

تحياتي للجميع

[الغلا]

شكرا لك على التكمله

وانتظرو الجزء القادم


اختكم
الغلا

[الغلا]

الحلقه الثالثه (2)


في بيت بو خليفه كل شي مرتب ونظيف..من الصبح ريحة البخور والقهوه والهيل شاله البيت..من اول ما يدخل الضيف صوب الفلل والممرات اللي حواليها...و اخوان حصه وصلوا من دبي الصبح الساعه 9 عقب ما اتفقوا يمشون من هناك صوب بوظبي رباعه خوانها وحريمهم وخواتها ورياييلهن...اخت حصه العوده نورة عمرها 34 سنه هي وعيالها ميره 12 سنه ومحمد 15 سنه وهذي ما تيي البيت الا نادراً ريلها تاجر مشغول اربع وعشرين ساعه..وما عنده وقت كل يوم وهو عافد بوظبي...وعبدالله عمره 37عقب ما يلس عند اهله يومين في بوظبي رد دبي وسار ييب عايلته اللي هم حرمته بدريه بس وما عندهم عيال... سلمى 31 معرسه قريب وما عندها عيال...واخر واحد ذياب اللي ما يطلع من دبي مول وهذا اصغر واحد في الاولاد واصغر من حصه في البيت عمره 20سنه مب معرس بس يتصرف بطيش مثل اليهال وما يطلع من بيوت خواته ومستانس على القعده في دبي..لا شغل ولا مشغله....
استوت الساعه 9:30 وكل هالعايلات في البيت عدا قوم شمسه اللي قالوا ما بيوصلون الا الساعه خمس العصر عشان يرتاحون عقب رحلةالبارحه..
وفي الصاله الخارجيه للبيت ابوابها زجاجيه وتنشاف منها حديقة البيت...
حاطين ريوق من اول الطاوله لاخرها..وكلهم متيمعين و بو خليفه الدنيا مب واسعتنه يموت في اليهال..والبيت حشره وبيت خليفه كلهم في البيت العود..يدخل بو خليفه ياي من صوب الميلس هناك موصلين ريوق الرياييل يعني عيال بو خليفه و رياييل بناته...على عكاز يدخل من باب الصاله وينشن البنات يسلمن على ابوهن...
بو خليفه: انا ودرت ميلس الشباب وياي اتريق ويا بناتي...
سلمى: فديت ابويه يا ربي...
نوره: شو من ريوق بيكون هذا..احلى ريوق في الدنيا...من زمان فديت روحك ما يلست وياك...
بو خليفه: مب منج من ريلج هاللي جنه قابض تجارة دبي بإيده...
نوره: اسمحلي يا بويه ادري بعمري مقصره...
بو خليفه: لا بنتي لا قصور ولا شي الا اسولف وياج..الزم ما عليج بيت ريلج...
ام خليفه: ما بتقربون وتخلون السوالف..يالله متى بتتريقون...؟؟
ويلس بو خليفه وحواليه بناته ونزلت حصه ويت عفرا وحمده...وتموا يسولفون وكل حد يقول اخر اخباره...
سمر مب مصدقه من الفرحه ان حد على قدها موجود..كانت هي وميره بنت اختها نوره فوق ما نزلن حتى يتريقن من الوناسه...
كانت عفرا ساكته ما تتكلم ومتضيجه من موقفها مع حمده امس..على عكس حمده اللي ولا جنه شي صار تضحك وتسولف وحتى انها هي اللي ماسكه محور الحديث في القعده..ويدها ويدتها ميتين على سوالفها من الضحك...
نوره وهي تضحك: الله يغربلج يا حمدوه موتينا من الضحك...
بو خليفه: فديتها بنتي ملح اليلسه...
ام خليفه: فديت ابوها والله طالعه عليه...
سلمى: لا والله خلوف دمه ثجيل...حمده طالعه على خالتها سلامي فديت قلبي يا ربييه يوم كنت مثل عمرها ما كان للبيت طعم وانا محد..
ساره: نعم نعم...!! احلفي انتي بس..
سلمى توها انتبهت على ساره حرمة خليفه واستحت وحطت ايدها على ويهها وهي تضحك:اووه انتي هني ...؟؟
ساره مبتسمه: لا هناك...قالت لي دمه ثجيل...والله خليفه ما شي منه ما تحلى اليلسه الا بوجوده...
بدريه(حرمة عبدالله): عيل شو اقول انا عن عبدالله....
حصه: هيه والله يا ام سعيد صدقتي ما فيهم غير عبدالله خويه...ما شي منه اثنين ..عقل ورزانه وغير هذا حبوب..و..
ام خليفه قاطعتها: بو خليفه خلنا نسير الحديقه اللي برا...الحريم بييلسن يتغزلن في اخوانهن ورياييلهن..نحن شياب ما يخصنا...
بو خليفه يضحك: يالله قمنا...
نوره: ابويه تم الله يخليك ولهنا على حسك..
بو خليفه: ان شاء الله بس بسير اشوف شو مسوي هالمزارع في الزراعه والجو حار ما ادريبه صار لي يومين ما شفتها بشوفها وبسير ميلس الرياييل وبخطف عليكن عقب...
وطلع بو خليفه وحرمته الزراعه...
نوره طالعت عفرا اللي ساكته طول الوقت وخلصت ريوقها بس ما انسمع حسها ابد...
نوره: هاه اخت عفرا ما تبينا نسمع حسج..؟
ساره قلبها عورها يوم شافت عفرا..وحست انها تحترق من داخل...الكل مشغول بحمده وهي ولا حد يدري عنها...
عفرا وابتسمت ابتسامه باهته بس فيها ثقه وغرور: لا بس اتريق عقب ما خلص بسولف وياكم..
نوره: خلصنا من زمان....
ساره حست ان نوره تستفز بنتها وفي خاطرها" شو اسوي يا ربي وين اقول لها تسير عشان تفتك من حشرتهم"...
سلمى: هاه عفاري السنه من اوائل الدوله ان شاء الله...
عفرا: اكيد ان شاء الله...
بدريه اللي يالسه عدال عفرا لوت عليها وقربتها منها: فديتها يا ربييه هالبنت كل النعومه فيها...فديت اللي واثقه من عمرها...
عفرا ابتسمت "اخيرا حد تفداني..فديتج يا حرمة عمي"..
حمده: فديت اختي والله بتبيض الويه...يا سلام بنسوي لها حفله عوده..
حصه انفجرت ضحك: يا مسودة الويه انتي شعليج في اختج...انجحي وبيضي ويهج اول عقب تفاخري باختج...
حمده تضحك: فديتني يا ربي والله العظيم بتشوفون في الثانويه العامه اذا ما صكيت على الكل وخليت الوزاره تعيد حساباتها في هالمناهج ولا ما كون حمده بنت خليفه بن الشيخ مبارك...
ساره: هههه الشيخ مره وحده...
حمده: هيه فديته يدي الشيخ وشيخنا كلنا...وابويه ولي العهد...
ساره تضحك: غربلج الله من بنت..
ونزلت سمر وميره...
حصه: ميرووه الهرمه تعالي سلمي علي....
ويت ميره وسلمت على خالتها...
حصه: هاه شو اخبارج وشو مسويه...
ميره: زينه الحمد لله...
حصه: من وين ييتي..؟
ميره: من حجرة الالعاب...
حصه: زين زين..
ميره: خالوه بقولج نكته...
حصه وهي حست عمرها بتين من القهر: اختي نوره لحقي على بنتج..اختج سمر طلعتها فوق وسوت لها غسيل مخ..يتها عدوى النكت...
نوره: برايها خلها تطفر ابوها..
حصه وهي تسوي عمرها تصيح: لا يا ربي انا شو سويت ..تحل عليه لعنة النكت...
كلهم ميتين من الضحك على حصه..
حصه: اخت ميروه..قومي ما اريد اسمع أي نكته..انا حافظه كل النكت من اختي سمر..والله بتدخل جينيس هذي..
نوره: يالهرمه لا تكسرين بخاطر بنتي..سمعي شو بتقول...
ميره: مابا خلاص...
قامت ميره وسارت عند سمر وطلعن الحوي...
وين البشاكير وشلن سفرة الريوق...وقامن البنات وشلن اغراض خواتهن وودنها غرفهن وشلن اغراض حرمة عبدالله وودنها غرفة حصه...
وعقب يلسن يسولفن بدريه ونوره وسلمى وحصه وساره وعفرا وحمده..

السموحه عالتاخير وترقبو الحلقه القادمه مع الاخ البدوي الحبوب

اختكم
الغلا

[البدوي الحبوب]

تسلمين اختي الغلا

مشكوره على التكمله ومسموحه

ان شاءالله باجر بكمل لكم الحلقه

تحياتي لكم

[العيناويه وبس]

الغلا ,,
تسلمين عل التكلمه ونترقب منك الحبوب وبالتوفيج يارب ,,

العيـ وبس ـناويه

[الغلا]

البدوي .. العيناويه

مشكووووووووووووورين على هالتواصل الجميل

ونحن بانتظار البدوي

اختكم
الغلا

[شواقه]

السلاام عليكم ورحمة الله وبركاته
اول شي حبيت اشكرك اخويه "البدوي الحبوب "
ع هالاختياااااار الاكثر من راااائع..يا الذوويق :)
الصراحه انا قريت هالقصه من مده..
ووااااايد عيبتني .. لانها قصه غير عن كل القصص..
تتكلم ع اشياء وايده في حياة الانسان مب بس ع ن الحب..
لا تفوتكم..لانها وااااااايد حلوووه..@19@
انا طبعتها ومب هاينه عليها اعقها الصراحه..وعادي اقرها كم مره @81@
تسلم انامل اللي كتب هالقصه "شوق بوظبي"

اقروها ومابتندموووون ;)
والسموحه منكم..
اختك..شووااقــ^ــ^ــه

[البدوي الحبوب]

تسلمين اختي شواقه على هالمرور الجميل

ومشكوره على ردج الطيب وان شاءالله انه القصه اتعيب باقي الاعضاء

تحياتي لك واسعدنا مرورك

[البدوي الحبوب]

في بيت بو راشد..وفي غرفة ليلى..حمدان واقف...ومتلبس...
حمدان: شو قررتي...؟
ليلى: امم بعدني افكر...
حمدان: يا ربييه الثقه معدومه...
ابتسمت ليلى: فديت روحك يا ربي ..بس دخيلك حمدان انتبه عليها الله يخليك...
حمدان: وافقتي والله اني مب مصدق...يالله لبسيها لبس فنتكه على قولتج وييبيها لي الموتر وانا بترياج..
ليلى: وليش اللبس المفنتك..رايحين العزبه بتتخيس تراب ليش معذب روحك...
حمدان وهو طالع بيصك الباب: برايج أي شي انا بسير اخلي باشا يجهز الموتر...
لبست ليلى شيخه لبس عادي عشان تسير ويا ولد عمها حمدان العزبه ونادت على شرملى تسير وياها...ووصتها عليها وقالت لها لا تخلي حمدان يركبها الموتر بروحه...
حمدان لابس ومتجهز وبيسير العزبه...وليلى نزلت شيخه من الباب اللي ورا في الصاله..عشان محد يشوفها...
وعند باب السياره وهم طالعين...شيخه يالسه بحضن حمدان جدام وشرملى ورا...
حمدان متأفف: الحين هالبودي قارد لازم تسير ويانا يعني...؟
ليلى وهي تطالعه بخبث: وليش ان شاء الله تبغي تسير لروحك خبرني شو من مصايب ناوي لها..
حمدان يتمسكن: عمتي الله يسامحج دومج تحبطين من معنوياتي وتقللين من قيمتي وعمري ما اكبر بعينج ودومي ياهل...والدليل انج ما تثقين تخلين شواخي عندي ويايبه هالشيفه ويانا...
ليلى تضحك: اخ يا قلبي وايد أثرت فيني..شو بقيت حق الهنود من شغلات المسكنه واللعانه..
حمدان: بس يالله اخرتينا صكي الباب بنسير قبل يي حد ويخرب علينا...
ومسكت ليلى شيخه وباستها ولوت عليها..كانت شيخه دبدوبه ممتليه وبيضا بياض الثلج مثل امها الله يرحمها..وعيونها وساع وفيها جمال ياخذ العقل بالرغم من ملامحها الطفوليه ...طريقة رمستها تقربها من القلب اكثر..وصعوبة نطقها لبعض الحروف مخليتنها احلى واحلى ...
ليلى: حبيبتي شواخي خبريني اذا زعلج حمداني الدب..
شيخه وهي تطالعها بغرابه: انتي ما لوحين...؟
ليلى: لا حياتي انا ما بروح ...
حمدان: يالله عموه بعدي عن الباب بصكه..
ليلى: انتبه عليها..
حمدان: هاي المره العشرتعش الف اللي تقولين لي فيها هالوصيه..اللي يشوفج ترمسين جي يقول برهنها عند حد...
وقبل ترمس ليلى سلامه يايه من بعيد وويهها كله رقاد وعيونها منفخات...ولابسه بيجاما قصيره شوي..
سلامه وهي تفرك عيونها: وين بتروحون..؟
حمدان وهو يطالع عمته مستغرب: هاي من أي مقبره طلعت..
سلامه: حمدان وين بتروح؟
ليلى تضحك: العزبه...
ونطت سلامه السياره ويلست عدال شرملى...
حمدان معصب: عمتي نزليها...والله ما سرنا وهي ويانا...
ليلى: سلامه انزلي استحي ع ويهج وين رايحه بهاللبس..والله لو يشوفج راشد بيقطعج..
سلامه: انا ما بنزل لين ما تتريوني اغير ثيابي وبرد...
حمدان يطالع عمته...
ليلى: اوكي يالله سيري..وهم بيتريونج..
نزلت سلامه..وسارت البيت ركض عشان تغير..
حمدان: باشا يالله نروح...
باشا: ماما سلامه وين ما يجي..
حمدان: الحين انا الريال وانت بتمشي على شور الحريم؟ اقولك يالله...
باشا: ان شاء الله بابا..
حمدان: جي اباك تسمع الرمسه من اول مره...
سارت ليلى البيت وروح حمدان ويا شيخه العزبه...ونزلت سلامه من فوق تركض ويوم شافت الحوش خالي ومحد فيه..يلست تصيح...على الارض..
سلامه وهي يالسه على الارض تصيح: يالنذل والله بتشوف والله بخبر ابويه عليك...
وتصيح بصوت عالي..وطلعت لها يدتها ام راشد..
ام راشد وهي تمشي بسرعه تبا تشوف شو بلاها البنيه..
ام راشد خايفه وماسكه ايدها: بنتي سلامه شو فيج فديت روحج..؟ شي يعورج؟
سلامه وهي تصيح: راح عني والله بيشوف الخايس...
ام راشد : من اللي راح ووين راح؟
سلامه: حمدان سار العزبه وخلاني...
ام راشد: شتبين به خلاص باجر انا بوديج وبنسير كلنا الا هو...
سلامه: ماريد ابى اروح الحين..الحين...
بطلت ليلى الجامه اللي تحت في الصاله وتطل على الحوش...
ليلى: امايه تعالي ما عليج منها خلها تصيح..دلع بنات...
وقامت عنها ام راشد ودخلت البيت..وسلامه سارت فلتهم...
وفي الصاله في بيت بو راشد...
وصل مبارك اخو ليلى اللي اصغر عن راشد وحرمته و بناته مريم و ايمان وامل وولده عمر..سارن البنات فوق عند عمتهن ليلى ومبارك سلم على امه و يلس مبارك شوي معاهم قبل يظهر ويسير عند الشباب مثل ما وعدهم...وشمسه حرمته يلست عند ام راشد واتصلت بخلود مرة راشد عشان تييهم...
وفي غرفة ليلى...البنات يالسات مريم اكبر وحده ثاني ثانوي عمرها 17 سنه.. حلوه واجتماعيه بس شوي دلوعه وانيقه ومهتمه فوق التصور بمظهرها.... عمر في ثالث اعدادي عمره 15 وعقبهم ايمان وامل توأم في صف اول اعدادي اعمارهن 13 سنه..ايمان خبيثه وهاديه بس تسمع..وامل على نياتها هاديه وكل شي تقوله وتحب تسولف ومبينه براءتها في عيونها..
مريم: عمتي ليلى.. وين شيخه..؟
ليلى: سارت ويا حمدان العزبه..
مريم مستغربه: كيف خليتيها تسير وياه يمكن تتعور ولا يصير بها شي...
ليلى في خاطرها" يا ربيييه على رقتها ونعومتها هالبنت..يا ليت سلامه تاخذ منها شوي"
ليلى مبتسمه: لا عادي اصلا حمدان ريال ما ينخاف عليه...
مريم بكل نعومه: اتمنى والله..
امل: عمتي البارحه سرنا بيت خالي احمد ..ولدهم طاح من على الدراجه وتعور وانكسرت ايده وخالي احمد قاله ما يسوق الدراجه مول..وحلف بيبيعها..وامايه تمت زايغه وساروا المستشفى وحطوا له جبس ابيض..وما يروم يمسك شي..مسكين الحين كيف بيسير المدرسه..
ايمان عصبت وطالعتها بحقد: ليش تقولين لها..؟ امايه قالت لا تخبرون حد اسرار البيت..
ليلى مصدومه:امونه حبيبتي هذي مب اسرار عادي..نحن بيت واحد وانا اخت ابوج ما بينا اسرار..
وغمزتلها وكملت: اسرارنا وحده حبيبتي..
مريم:عمتي ودينا العزبه...مع حمدان وشواخي..
ليلى: والله فكره..
امل بفرح: الله يا رب امايه توافق...
ايمان: ما بتطيع بتقول بنخيس ثيابنا...
ليلى: عادي بنغير لج..ما شاء الله في لج ثياب هني غيري منها..
ايمان: ماباها انتهت موضتها..
ليلى في خاطرها" الله يعيني على اناقتكن يا بنات دبي"..
نزلت ليلى الصاله تحت وسلمت على شمسه حرمة مبارك..وعلى مبارك اخوها..ويلست وياهم يسولفون ويضحكون..وتمت مريم بنت مبارك تأشر لعمتها عشان ترمس ابوها..بسالفة العزبه..
ابتسمت ليلى: مبارك..!!
مبارك: يا عونج..
ليلى:اليهال يبون يسيرون العزبه..شو رايك..؟
مبارك: برايكم..ما عندي مانع..بس شاوروا ام عمر..
شمسه: ما عندي مانع..بس انتبهي عليهم..
ليلى:افا عليج مرة اخويه..
مريم ابتسمت بفرح...
امل ونشت من مكانها وتمت تتنطط: يعيش احلى ابو في العالم..
ايمان ساكته بس ما رامت تخبي فرحتها..
ايمان: واذا تخيست ثيابنا كيف نغيرها..؟
امل: اوووه انتي لازم تخربين علينا...؟
شمسه: ما عليه في لبس احتياطي يايبتنه وياي...وفي لكم لبس جديم في حجرة عمتكم عايشه...
في هاللحظه يدخل عمر ويسلم عليهم..
عمر: سرت بيت عمي راشد..وين حمدان وسلامي...
ليلى: حمدان سار العزبه..وسلامي راقده..عمر شو رايك تسير ويانا..
مبارك: بتتغدون هناك..؟
ليلى: هيه وبنرد الساعه 5 العصر..
شمسه: هيه فديتج...ردوا بسرعه..ابى البنات يلبسن عشان انسير عقب بيت مبارك بن عبدالله..
ام راشد متعجبه: حتى انتوا معزومين..؟
مبارك:هذيل تخبلوا امايه...ما خلوا حد ما عزموه...
ام راشد: الله يعينهم...
ليلى: انزين بنات قومن غيرن..بنسير عقب شوي..
وطلعن البنات فوق وبدلن ثيابهن في غرفة عايشه..وخذن اللي يبن وياهن..وعقب ما طلعت ليلى من حجرتها وشافت البنات واقفات في الصاله اللي فوق..اول ما شافتهن ليلى غصب ابتسمت..
مريم كانت لابسه مخور عنابي ولابسه شيله وشكلها كان بنتهى النعومه والرقه..
امل عدالها كانت لابسه جلابيه خضرا فاتحه قصيره وبكم قصير بعد..اما ايمان كانت مثل ما توقعت ليلى لابسه Body ابيض وقميص احمر وتنوره حمرا..قصيره وفيها ورد ابيض..ولافه شعرها بطريقه حلوه اشبه ما تكون تسريحه..
ليلى مبتسمه وهي تنقل نظراتها من مريم لين ايمان وبكل بساطه..
ليلى: ايمان حبيبتي..وين رايحه فديتج؟
ايمان وهي تلعب بخصله من شعرها: العزبه وياكم..
ليلى: وشو كل هالكشخه..؟
ايمان: وكيف تبين الناس يشوفوني..وشو بيقولون عني...
ليلى: أي ناس؟ محد الا انا وحمدان وخواتج..
امل: وسلامي.؟
ليلى تحط ايدها على ويهها: اووه نسيناها هذي؟؟
سارت ليلى فلة راشد..وزقرت سلامه اللي يتها على طول...
سلامه: شو تبين؟
ليلى: نحن سايرين العزبه..بتروحين ويانا...
سلامه: منو انتوا..؟
ليلى:انا وبنات عمج مبارك..
سلامه: وينهم...
ليلى: وصلوا من ساعه..
سلامه: وصلوا العقارب وهاللي نحن ناقصينه..
ليلى: بتروحين ولا لاء؟
سلامه: اكيد..عيل ايلس في البيت لروحي شو اسوي؟
ونزلت سلامه وسلمت على البنات وعمر وساروا ويا الدريول مجيد للعزبه...

الحلقه الثالثه
الجزء الثاني

في العزبه نزل حمدان وسار صوب الركاب ويلس يطالع بكرته (الجوهره)..وشاف ناقة عمته ليلى..وعقب انتبه ان شرملى وراه..شاله شيخه اللي كانت شبه مغطيه عيونها من الشمس مع ان الجو شوي مغيم وبارد..وفي نود خفيف..بس هي ما تحملت الضو...
حمدان وهو ياخذ شيخه من شرملى: مب منج انتي ..من عمتج اللي صاكه عليج الحجره اربع وعشرين ساعه..ما تعرفين الشمس..
وتمت شيخه تحط ايدها على عيونها من الضو ...
حمدان وهو شالها: اااخ يالدبه شو يأكلونج هالكثر متينه..
شيخه ببراءه ومافهمت شو يقول:هاه..
حمدان:شو تاكلين.؟
شيخه مبتسمه بفرح:حبيبه..
حمدان: شو هذي بعد..
شرملى مبتسمه: حليب بس هي قول حبيبه..
وتمت شيخه تغطي عيونها وتحط ويهها في حضن حمدان مب قادره تطالع الشمس..
شرملى: هي عينها في عور عشان شمس قوي..
حمدان مبتسم:الله اكبر..عاشت اللغه..وعاشت شرملى..الا اقول من مسمنج انتي..؟
شرملى: شو..؟
حمدان:من يسمي انتي شرملى؟
ضحكت شرملى: ماما انا قبل حبي كتير شوف فلم هندي...انت يعرف انا من سيريلانكا..في عيب واجد بنت حبي ولد في تلفزيون...
هي كل يوم بابا يضرب عشان حبي ولد في تلفزيون..هي في زعل روح فوق سطح..وبابا دور ما لاقي..ما شوف هي وين روح بعدين هو كل يوم نادي هي شرملى عشان هي سيم سيم جنيه ما شوف ابدا بسرعه روح..بعدين ماما سوي زواج جيب انا بابا هي موت سمي انا شرملى عشان بابا هي موت..يعني اسمي انا شرملى يعني جنيه..
حمدان: صح اني ما فهمت شي بس الظاهر ان معنى اسمج ينيه..والله ما كذب اللي سماج..
شيخه: وحث وحث..
وتأشر بإيدها على البوش في العزبه...
حمدان: هذا مب وحش على قولتج..باجر يوم تربي الجوهره..بعطيج بكرتها لج..
شيخه مبتسمه مب فاهمه شي..
ومر الوقت بسرعه وانتبه باشا ان موترهم الثاني وصل..وسار بسرعه عند حمدان...
باشا:حمدان حمدان..
حمدان: خير..
باشا: موتر بابا راشد مال العزبه يجي..
حمدان عاقد حياته: شو يايبنه ابويه..؟
سار حمدان من الجهه الثانيه وشاف ابواب الموتر تنفتح..وتنزل منها عمته ليلى واخته سلامه..بس منو هاللي وياهم؟؟
ما قدر يشوف من بعيد وقرب وشاف عمر وسلم عليه..
سلم على مريم والبنات وتم يطالع مريم ومبتسم وهي لاحظت ونزلت راسها..
سلامه: يالاخ لا تنسى الحركه..
حمدان توه منتبه: سلامي اختي حبيبتي..
ليلى: وين شواخي...
وقبل تكمل ليلى رمستها شافت شيخه يايه من بعيد حافيه تركض في الرمل وخدودها ورديه وتنافخ من كثر ما تركض وتلعب وهي مستانسه لين ما وصلت عند ليلى وشلتها..
شيخه مبطله عيونها على الاخر تبى تسوي روحها منصدمه من شي ونها شافت شي خطير..وبكل عفويه..
وبغصب تطلع منها الكلمات: هناك وحث وحث ..
تبتسم ليلى: حياتي انتي..
مريم: عمتي عطيني اياها شوي..
ليلى وهي تناول شيخه لمريم: يالله شواخي روحي عند مريومه..
تعلقت شيخه اكثر في ليلى وما طاعت..وحمدان استغل الموقف..
حمدان: مريم تعالي براويج الجوهره..
مريم بخجل: يالله نروح..
وسارت مريم وحمدان صوب البوش ويلسوا على التراب مع بعض...
حمدان: من زمان ما ييتوا بوظبي...
مريم: امايه تقول يوم تخلص المدرسه بنتم في بيت يدي ناصر لين ما نقول بس..بس الحين لاء عشان المدارس..
حمدان: هيه جي يعني..
سكتوا شوي..ومسكت مريم حطبه ويلست تخربش على الرمل..
مريم: حمدان..ان شاء الله نسبتك عاليه هالسنه..
حمدان: لاء انا كسلان...
مريم مبتسمه: ليش.؟
حمدان: الرياييل ما تهمهم الدراسه اهم شي الشخصيه القويه وانا بعدين بشتغل ويا ابويه يعني الشهاده بتكون شي ثانوي في حياتي...
مريم وهي مبتسمه ابتسامتها الطفوليه: كلام منو هذا,..؟
حمدان: انا...
كتبت مريم على الرمل كلمة "غلط"..واشرت لحمدان يشوفها...
حمدان: لا مب غلط..
مريم: الشخصيه القويه اللي يحبها الكل لازم تكون ناجحه في مجالات وايده اهمها العلم..اللي ما عند أي حد عذر انه ما يتعلم خصوصا ان كل شي موجود ومتوفر..وبعدين الناس الحين قامت تتنافس من يتعلم ومن يدرس اكثر..والله حمدان..اعرف وحده من جيرانا في دبي..ريلها شيبه عود ويسير هو وياها محو الاميه عشان يتعلمون..يعني ما شي عذر العلم صار مطلب الجميع..حمدان شد حيلك انت اكبر حفيد في العايله واكبر احفاد يدي ناصر الله يرحمه..واكيد نبغي شي مميز منك...
حمدان حس ان شي يغلي داخله مع انه سمع هالكلام اكثر من الف مره من ابوه وامه وعمته ليلى بس غير هالمره..ابتسم ونش من مكانه وهي يالسه مكانها ما قامت..
حمدان: قومي بنسير صوب الخيل....
مريم: لا حمدان اخاف..
حمدان: يالله مريامي قومي بنسير كلنا..خواتج وسلامي وعمر كلهم هناك...
احمرت خدود مريم من الخجل اول مره يناديها مريامي..حتى حمدان انتبه..وابتسم...وقامت مريم وياه وساروا صوب الخيل وشافوا امل وسلامي وايمان..وشرملى وليلى وشيخه يطالعون عمر وهو راكب الخيل ويدور به حوالين العزبه..
سلامه: يالله عمر الله يخليك انا بعدك...
عمر: لا لا انتي بنت...
امل: انا اريد بعد...
ايمان: وع عليكن..ريحته خايسه..
سلامه: محد قالج تيين..
ايمان: شو هاه ما شي ظل الشمس بتسمرني..
مريم: امونه غناتي سيري يلسي في ظل السياره..
ايمان مستنكره: في الرمل؟
ليلى بدت تعصب: محد قالج تلبسين احلى لبس في البيت وتيين العزبه..تتحرين سايرين حفله زين منج ما حطيتي ميك اب...
ايمان سارت صوب السياره وطنشت عمتها وفرشت جرايد ويلست عليها...اما الباقيين ساروا يتعبثون في العزبه وعقب سارت مريم مع سلامه ويلسن يسولفن عن المدرسه والبنات..
سلامه:بتسيرون بيت مبارك اليوم..
مريم: هيه..
سلامه: عيل بنكون شله كبيره هناك..انا وانتي وعفاري وحمدوه..
مريم: هيه وناسه وسمعت ان بنات سالم بن حمود هناك بعد..
سلامه: هيه يا فالحه اصلا العزيمه عشانهم هم وامهم اللي هي شمسه..
مريم: هيه خبرتني امايه..
سلامه: قومي نرد صوبهم..
وقامت مريم وسلامه وسارن عند الباقيين وهب هوا بارد وغيم الجو اكثر ونزل نفاف غير الجو..واستانسوا عليه..ودخلت ايمان السياره عشان ما تخيس ثيابها تطالعهم من الجامه... ويوم وقف المطر الخفيف كان الدريول باشا ساير ييب لهم غدا وعقب ما تغدوا يلسوا يسولفون ويا بعض ويستهبلون ويحشون في خلق الله..
عقب الغدا كلهم ردوا صوب الخيل الا ليلى وشيخه...
لوت ليلى على شيخه ولحفتها بوقايتها عشان ما تبرد مع انها كانت ملبستنها شي دافي..ويلست ليلى على الارض...وقامت شيخه من وراها وتعلقت في رقبتها من ورا..وعقت عمرها على ظهر ليلى..
شيخه: ثليني..
ليلى: وين اشلج..؟
شيخه تصارخ بشطانه: فوووووووق..
ليلى:مابا..
هدت شيخه رقبة ليلى ويت جدامها...وبطلت عيونها على الاخير: مابا ثليني..
ليلى مبتسمه: ماريد..
شيخه يلست على الارض وسوت روحها معصبه وما تبى تكلم ليلى..
ليلى مدت ايديها تبى تناديها: شوااخي تعالي حياتي..
مدت شيخه بوزها : مابا..
ونشت تركض..وقامت ليلى وراها تلحقها بس شيخه تمت تركض وقبل توصلها ليلى وقفت عدال يدار لحجره في العزبه وسندت ظهرها عليه وحطت ايديها ورا ظهرها ومدت بوزها ويلست تحرك ريولها على الارض بدلع اونها زعلت...
ليلى ما قدرت تتحمل وحست ان ودها تقطعها ويت لها وشلتها ولوت عليها بقوه وتمت مقطعتنها بوس..
ليلى: بعد روحي علني افدا هالويه ياربي...
وهي لاويه عليها وتبوسها...وترفعها لفوق واخر شي ابتسمت شيخه ابتسامتها اللي تذبح القلب..وتمت تضحك من خاطرها...
شيخه: ثليني ورا..
ويلست ليلى على الارض وخلت شيخه تتعلق فيها من رقبتها ويودتها عدل وقامت تمشي بها بدلع لين ما وصلت عند الباقين ويلسوا كلهم مع بعض يتحرشون في شيخه ويلاعبونها وهي تشرد عنهم ولين ما توصل عند ليلى وتعق عمرها بقو عليها وتتقبض فيها عشان محد يمسكها...
..........
الساعه صارت 3 الظهر في بيت مبارك بو خليفه..الكل راح عقب الغدا يستريح..في حجرته..
وحصه خذت بدريه حرمة عبدالله اخوها..وسارن حجرة حصه...بدريه هي بنت عم حصه واخت حمد اللي تحبه حصه..حرمة عبدالله اخو حصه معرسين من 6 سنين وما عندهم عيال بعد الفحوصات اللي سووها اول سنه طلع عبدالله هو اللي ما يقدر ييب عيال ..وعرض عليها الطلاق اول سنه ما يبى يحرمها من حقها في الامومه بس بدريه ولد عمها خذها عن حب...وما حبت تفرط فيه ورضت بقسمة الله فيهم..وصبرت على هالحال ..متخرجه من المدرسه بس عندها شهادة ثانويه عامه وما كملت دراستها لان عبدالله تقدم لها على طول وعرست ..علاقتها في حصه قويه بس زادت اكثر عقب ما خذها عبدالله..
صكت حصه باب الحجره ويلست بسرعه عدال بدريه...
حصه: حرمة اخويه حبيبتي فديت روحج...
بدريه: زين ما شاء الله شو هالمحبه جني الا اعرف سببها...؟؟!!
حصه: بدور يا بدر البدور يا حبيبة قلبي..تعرفين اني اكثر وحده احبج في العالم...واني متخبله عليج من زمان..واول وحده ابارك لاخوي عبود خطوبته عليج..
بدريه: يالمذله.!!! كم مره قلتي لي هالجمله التاريخيه؟
حصه: زين غناتي..ادخلي بالموضوع على طول..
بدريه: ليش مستعيله..؟ هو قال بيي اليوم وخلاص يوم بتشوفينه تفاهموا...
حصه بعصبيه: انتي محد ياخذ منج لا حق ولا باطل..بدريه احسج تخبين شي علي..
بدريه: لا شي ولا ما شيات ..شو بخبي مثلاً..حصوه بنت عمي..خلي عنج الخبال واعقلي..
حصه: اوكي بس ما قال لج ليش زعلان مني..
بدريه: لا والله ما قال...
حصه: كنت اعرف يالنحسه...
تضحك بدريه..
حصه: زين بترقدين ولا بتتريين حبيب القلب..؟
بدريه: فديته شو يبى بي الحين يالس عند الرياييل علني ما خلى منه..انا بحط راسي وبرقد من 7 وانا ناشه..
حصه: وانا بعد..
ورقدن كلهن في حجرة حصه..
..........
في العزبه كان حمدان كالعاده مفضوح باهتمامه المبالغ فيه في مريم..وخذته سلامه شوي بعيد...
سلامه: حمداني حركاتك واضحه..
حمدان مرتبك: شو من حركات..؟
سلامه: انت فاهم..
حمدان : جلبي ويهج...
سلامه وهي رايحه عنه: مره حمده ومره عفرا ومره مريوم...باجر الله يعلم منو...؟
حمدان مستحي وما عرف شو يرد: جب جب مالج خص...
سلامه: وايد عليك..
وردوا للباقين..
ليلى: يالله نروح صارت الساعه 4.
مريم: لا تموا بعد شوي..باجر بنرد دبي..وما بنيي هني الا يوم تبدا الاجازه..
ايمان: اووه انا ابى ارد..
امل: لا انا ابى اتم..
سلامه: مليت يالله نرد...
عمر: يالله عموه امايه بتحرج..
في هالوقت كان حمدان يشغل الموتر وعلى الصوت على الاخير وفتح المسجل وحط شريط عيظه وسار صوب الحطب اللي حذا العزبه وخذ وحده وكلهم صدوا صوبه وسار يعدل الاغنيه وحط اغنية عيظه " يا طارشي"...واستهبل ورزف...
البنات الصغار احتشرن...
امل وهي تصارخ بفرح: الله حمدان ولد عمي يا فنان...
ايمان ما قدرت رغم غرورها تخبي وناستها وحطت ايدها على خدودها: الله وناسه...
ليلى تطالعهم وتضحك وانجلب المكان حشره..
سلامه وعمر مبتسمين..بعدين عمر صفر وقال: عجيب ولد عمي..
سلامه طالعت عمر مستغربه:لا صراحه ولد عمي تعبت روحك..وايد عليك تصفر..بس وين الومك ولد دبي اشدراك بالبداوه..
عمر: وشو فيني يعني ..مب ريال ولا مب تارس عينج..
سلامه: زين زين اسكت خلني اشوف اخويه فديته..
شيخه متعلقه في ثياب ليلى: ثليني ثليني..
وشلتها ليلى وتمت تطالع وياهم...
تم حمدان يرزف والكل محتشر..وهو كل ما صد صوبهم شاف مريم مبتسمه..وكان هذا كل اللي يبغيه..وعقب الربشه والرزيف اللي ماله داعي..
حمدان: شو رايكم.
شرملى: سوي مره تاني..
يضحكون كلهم..
حمدان: عمر تعرف ولاء..؟
عمر: لا والله..
مريم: روعه حمدان...
امل: يااااي وناسه والله..الله يخليك حمدان بعد مره..
حمدان وهو يمسح ويهه في وزاره: لا لا الحين بنرد البيت وايد تأخرنا ورانا سهره..
ايمان: حمدان بعد مره ارجوك..
طالعها حمدان مستغرب..وابتسم: عشان الاميره ايمان تنازلت ورمستنا بويه حلو..وقررت ترحم مشاعرنا وتعطينا ويه شوي..برزف لكم مره ثانيه..
كلهم احتشروا..ويلسوا يصارخون بهبل..ويت شرملى تصفق وياهم..وهي متقطعه من الوناسه..
حمدان: شو من اغنيه تبون..؟
كلهم بصوت واحد: اللي توك حاطنها..يا طارشي..
ورزف حمدان وعقب ما احتشروا وقالوا بس اتفقوا كيف يتقسمون على المواتر...
وساروا كلهم ليلى وامل وايمان وشيخه وشرملى مع الدريول مجيد..وحمدان ومريم وسلامه وعمر مع باشا..
وردوا البيت وكل واحد سار حمام يتسبح وعقب يرتاحون عشان يسيرون بيت بو خليفه بالمساء..
........

وصلت شمسه بيت اهلها..واستقبلوها استقبال حافل ابوها وعبدالله وخليفه وساورا وياها لين الصاله وعقب ردوا ودخلت وشافت امها وحريم خوانها وخواتها وبناتهن..
دخلت شمسه هي وبناتها هنادي وافنان وريم ومها..بس الاولاد تموا برا ما دشوا صالة البيت..ويلسوهن في الصاله الاماميه وضيوفهم..
ام خليفه: الحمدلله على سلامتكم بنتي متى وصلتوا يا ام سعود..؟
شمسه: الله يسلمج امايه..شرا هالوقت البارحه وصلنا..
ام خليفه: عسى ما تعبتوا؟
شمسه: لا والله بس اجراءات المطار هني شوي اخرتنا والعيال هلكانين وتعبن البنات شوي..
ام خليفه: وين العيال ما حدروا..؟
شمسه:تموا عند ابويه والشباب..في الميلس..الا اقول سلمى جني شفت ريلج حادر من صالة الميلس وياي صوب الباب ويوم شافنا نسلم على ابويه انا والبنات رد داخل...
سلمى: فديته من يومه خجول..ما تترس عينه غير سلامي...
نوره:يقطع واعليه من المستحى...
سلمى: هاه شوفوا من اللي بدا..؟
ساره: لا عاد هالمره سلمى بريئه...
بدريه: مول ما يخصها في البراءه..ولا تليق عليها...اصلا اذا سلمى تيلس بمكان دون ما تضارب حد ما تكون بخير...
سلمى: امايه شوفي بعينج وسمعي عدل..وتقولين دومج ان سلمى هي الشرانيه...
ام خليفه: سكتن من بنتي بس خلاص حشموا ام سعود...
ابتسمت شمسه: فديت امايه يا ربي..
سلمى: وانا اقول مب عشان سواد عيوني..بسير اشتكي عليكن عند حامد...
ساره: دخيلج زغنا..
بدريه:ردينا انتي وحامد مالج هذا..اللي يسمع يقول هتلر..
انجلبت الصاله ضحك من سوالف بدريه وسلمى اخت ريلها..وشوي ودخلن بنات خليفه يايات من صوب فلتهم..
حمده: هلا هلا بعمتي شمسه عاش من شافج وعاشت ايامج وعاشت بلجيكا يوم انج ييتي منها..وعاشت الامارات يوم وصلتي لها سالمه..
وهوت على راسها وحبتها..وكملت رمستها..
حمده: وهالبوسه لج ع راسج يا اغلى عمه بلجيكيه..صدق انج اللي طلعتي فينا..اسميج انتي عمتي شيخة العمات..
شمسه ميته ضحك هي وكل اللي موجودين..
شمسه:عاشت ايامج يا ام لسانين ما تغيرتي..!!
بدريه: وين تتغير هذي..صناعه اصليه...
سلمى: هيه والله..لسانها عليه ضمان مدى الحياه...
ساره:عوذ بالله منكن اذكرن الله عند بنتي..
حمده: فديت روحي ما جد سمعتن المقوله العالميه اللي تقول" حمده ذهب لا تبليه الايام"...
حصه: مسكينه حمدوه بنت خويه طاحت في ايدين خواتي اليوم بتطيح وبينقص لسانها...
سمر: مب مشكله ما يحتاي ترمس..الكلام شي ثانوي في الحياة..
حصه: هيه صدج..شي ثانوي...اهم شي الواحد بس يقول نكت...صح اختي سمر..
سمر مبتسمه: يمكن...
حمده:زين عمتي شمسه..واخبارج بعد..قولي لي شو الحياه في بلجيكا ربج بعد محد يدري بالاقدار يمكن ادرس هناك او يطيح ولي عهدهم في غرامي..
شمسه تضحك: غربل الله بليسج من بنت..ليت لي بنت شراتج...
ساره: ودكن يكون عندكن شرات بناتي...
سلمى: انا لو تييني وحده شرات حمدوه اقص لسانها على طول...ونكن الحين هذي بنت ولا حيه...انا لو حد يختار بناته ما اختار الا عفاري علني افدا ويهها يا ربي ما خلت شي من مقومات الانوثه..ود البنات بربع عقلها ولا حلاتها...
ابتسمت عفرا بخجل وبنفس الوقت غرور...
وكملت سلمى: اما اخت حمده لو تييني بنت شراتها بقص لسانها وما بخليها مول تطلع من البيت لين ما تنسى ابجديات الكلام..
ام خليفه: يا هالاجرام اللي ما يطلع لج من لسان
سلمى:امايه هذا يسمونه الادب المفنتك في الدفاع عن النفس...قريت مره كتاب عنه انا وحماده..والحين قدمنا طلبيه لسويسرا عشان يطرشون لنا الجزء الثاني من الطبعه...
ام خليفه: وليش معبلين على اعماركم...الكتب ممزوره في البلاد...
تضحك سلمى على عفوية امها...
عفرا: أي دوله هذي عموه وشو من مؤلف منزل هالكتاب..ما جد سمعت عنه..ومن أي مطابع...؟
سلمى: اووه نسيت الاخت عفرا هني..تحريت عمري اروم اخورط على هالمساكين...طلعت ام الكتب هني..زين سمحولنا كانت كذبه بيضا..اختبر شطارتكن في القراءه..
عفرا: يعني مب صدج..والله تحريتج ترمسين صدق..قلت غريبه وين تقرا عمتي...بس الحمدلله غلبتج هالمره...
بدريه: فديت روحها هالبنت يا ربي..ليت كل البنات شراتها..ادب وجمال واخلاق..وشطاره لو عندي.
وسكتت بدريه وعرفوا انها قطعت رمستها بس ردت على طول ترمس بكل ثقه..
بدريه: عوذ بالله من ابليس كنت يايه اقول لو عندي ولد جان ما ابدي عليها شيخة البنات...
سكتوا كلهم وابتسمت شمسه لبدريه وحسدتها على قوتها وثقتها...
سلمى عشان تقتل حالة البرود: يالله يالله اذن المغرب قومن صلن...
شمسه: بعده ما اذن...
سلمى: يالله قومن تمسحن وعقب يصير خير يوم يأذن صلن...باقي عشر دقايق..
نشن كلهن يصلن..وطلعت حصه فوق مع خواتها سلمى وسمر ونوره وبنتها ميره...اما ام خليفه وشمسه سارن حجرة بو خليفه يصلن..وساره وبناتها عفرا وحمده مع بنات شمسه هنادي وافنان وريم ومها سارن فلة خليفه عشان يبدلن ثيابهن هناك...
بدريه الوحيده اللي تمت في الصاله بس عقب نشت وسارت صوب المطبخ القريب من الصاله..وشافت البشاكير يسولفن وقالت لهن ان المغرب اذن اذا بغن يصلن..وسارن عنها وهي يت بتطلع...وشافت اثنين شباب كبار يايين من بعيد..عدلت وقايتها وتحجبت...
سعود: السلام عليج خالوه...
بطي: سلام عليج خالتي..
ابتسمت بدريه: وعليكم السلام والرحمه..
واشرت على واحد منهم: انت سعود ..صح؟
سعود: لاء غلط هذا بطي..بس هو اطول عني ...مع اني اكبر عنه..
بدريه: امم زين شحالكم والحمد لله على السلامه..ما شاء الله مستانسين رديتوا البلاد...
بطي: يعني مب وايد...
بدريه: ليش..؟
سعود: فرحه مؤقته وعقب بنرد نسافر..
بطي: شكلي بشاور اهلي اتم في بيت حد من خوالي ولا عمامي وما بسافر وياهم وبكمل دراستي هني...
بدريه: بوظبي ولا دبي..؟
بطي وهو يطالعها بفخر: دبي طبعاً...انا ما اعيش بليا دبي...وما اتنفس الا فيها..
سعود: اشوفك تقدر تتنفس في بلجيكا ومصر والمغرب والسويد والنمسا..
بطي: لا اانا مجبور على هذيل لكن اقصد بالنسبه للامارات...
بدريه: زين شو رايك تشاور هلك وتعال اسكن عندي انا وخالك عبدالله..
بطي: اخاف اضايجكم...
سعود: ياللواته...!!
بدريه: لا بتضايجنا ولا شي ..انا ما عندي بنات بيستحن منك..بس اخافك تمل منا..بتكون لروحك
بطي: افا عليج خالوه بالعكس حلاته يوم اكون لروحي عشان اكون الولد المبزاي...
سعود: يالبنيه شو تبى بالبزا..؟؟
بدريه: كم باقي لك سنه..؟؟
بطي: رايح ثاني ثانوي...
سعود: وانا ثاني جامعه..
بدريه: وكيف ظهرتوا من مدارسكم ..؟
سعود: عادي بنكمل في دبي المنهج الامريكي في كل بقعه..
بدريه: زين بسير اصلي اخرتوني..سيروا صلوا ولا حياة الغرب غيرتكم وما تصلون..؟
سعود: الحمد لله انا اصلي..بس ناس لاء.
بدريه وهي سايره : بييكم عقب وبنسولف...
صلن المغرب ونزلن الصاله ودخل عبدالله وخليفه وعيال شمسه سعود وبطي وبدر ويوسف..وساروا بحجره جدام الصاله اللي حذا الصاله الاماميه..في الدور الارضي..
وكانوا اللي موجودين بو خليفه وحرمته وعبدالله وخليفه وعيال شمسه بس..وشمسه ونوره..
عبدالله: ما شاء الله شمسه اختي شو هالرياييل اللي ينشد بهم الظهر...
شمسه: فديت روحك طالعين على خوالهم..
بو خليفه: كم بتمون بنتي في البلاد..
شمسه: ما ادري ابويه ..يقول سالم اسبوعين..
خليفه: زين والله..
نوره: انتوا ما خذين اجازة لليهال..؟
شمسه: هيه ماخذين اجازة اسبوعين..
ويسلوا يسولفون ويتخبرون شمسه ويناقشونها في مواضيعهم...
.................
في الصاله الثانيه اللي جريبه منها...سلمى وبدريه وساره وبنات شمسه وبنات خليفه وحصه وسمر يالسات..
سملى: اكيد ريلي في الميلس بروحه..شو من مذهب عند اخواني..؟
بدريه: اقول سلامي ذبحتينا بريلج..شو ريلي وريلي..محد عندها ريل الا انتي..
ساره: خليها بعدها ما شافت شي..وايد مسويتله سالفه وعقب بيطلع عيونها وبتعافه...
سلمى تغني" لاموني اللي غاروا مني"..
تضحك ساره وبدريه ويتحمحم عبدالله عند الباب..ويعدلن شيلهن...
عبدالله: سلام عليكن..
كلهن : وعليك السلام...
عبدالله: وين حبيبتي..؟
سمر:كل هالنور وما تشوفني؟؟ بس ما عليه خويه مالومك انعميت من نوري..
عبدالله: علني ما حبيت جانج حبيبتي...!!
حمده يلست بطريقه مؤدبه وتغمض عيونها وتفتحها بطريقة دلع: فديته عمي..ادري بي مخبله به..علني ما خلى منك يا اغلى عم في الدنيا زين زين شوفوا هالعم ولا بلاش اللي ما يزقر بنت اخوه الا حبيبتي..حبتك العافيه يا فناتك على قولة خالتي ليلى..
عبدالله يضحك: وحتى لو ما كنت حبيبتي بس ما شي شراتج بين كل البنات..
حمده نشت من مكانها:انا رايحه باي...
كلهم يضحكون عليها ...
سلمى : على وين رايحه..
حمده: وين بعد ؟ اكيد بسير انتحر..كيف اعيش وانا اسمع كل هالرمسه..
ضحكوا على سوالف حمده...
عبدالله: بدريه حبيبتي تعالي اباج في موضوع ضروري..
ونشت بدريه وقبل يظهرون من الصاله..
سلمى وهي تتنهد: حصه وسمر وحريم خواني يالنحيسات لو انتن محد جان ريلي زقرني وظهرت وياه...
عبدالله يضحك: اختي سلامي..ريلج بروحه في الميلس سيري يلسي عنده..
وطلع عبدالله ويا بدريه وساروا الحديقه اللي ورا فلة خليفه ويلسوا هناك...
بدريه: شو من موضوع بغيتني فيه...؟
عبدالله: مليت من الحشره ..
بدريه: وليش ظهرت الحديقه؟؟ الجو بارد اخافك تمرض.
عبدالله: شسوي بعد ولهت عليج وما قدرت اصبر...
بدريه: كل هذا حقي انا؟
عبدالله: وشوي منه حق يدتي..
بدريه تضحك: وشو بعد..؟
عبدالله: ما شي..
بدريه: متى نرد دبي.؟
عبدالله: متى ما تامرين..
بدريه: ما ودي ارد..وايد مرتاحه هني..
عبدالله: عيل تمي لين ما تملين وقولي لي عشان اردج دبي..
بدريه: وانت وين بتروح؟
عبدالله: وين بعد؟ اكيد وياج..شو تتحريني اقدر اعيش لحظه بدونج...؟
بدريه تقلد حمده: باي باي بسير انتحر ما روم لكل هاه...
عبدالله يستهبل: لا يا زوجتي الحبيبه لا تذهبي..
يضحكون...
بدريه: جني اشوف سياره داخل الحوش..
عبدالله: يالله ردي داخل من باب المطبخ اكيد حد من الضيوف وصل...
وسارت بدريه داخل ومرت الصاله وسمعت الحشره....وضحكاتهن شاله المكان...
بدريه: يالله نشن الحريم وصلن ..
وقامن البنات وتمت ساره وسلمى وبدريه في الصاله واستقبلوهن ودخلوهن حجرة الضيوف...

وانتظروا باقي القصه مع الاخت الغلا

تحياتي لكم..

[الغلا]

لكم التكمله .....

في بيت ناصر في الصاله اللي خاري هاديه ومحد فيها..وكل حد مشغول في حجرته يرتبون ويخلصون عشان يظهرون مع بعض...
وفي غرفة ليلى ...امل وايمان ...
ايمان: ليش ما بتروحين عمتي..؟
امل: الله يخليج عمتي..
ليلى:مالي بارض...
امل: تعالي عموه وناسه...بسوي لج اللي تبين بس تعالي الله يخليج...
ليلى: ما ريد وخلاص...
امل: خالوه حصه بتزعل..
ليلى: لا تخافين نحن متفقات..
ويلست ايمان تتعدل وامل تسحي شعرها...
ودخلت مريم وكانت لابسه تنوره زرقا غامجه وقميص ابيض بكم قصير..وشعرها طايح على كتوفها..وشكلها يجنن..
ليلى: مريامي شو هالزين كله...
مريم بخجل: والله عمتي..؟
ايمان: مب احلى عني...
مريم: ليش ما لبستي للحين.؟
ايمان: الحين بلبس وببهركم..
امل: زين مريامي كيف شكلي الحين...؟
مريم: حلوه بس البسي عشان تحلوين اكثر...
شوي ودخلت ايمان وكانت لابسه تنوره ورديه قصيره وقميص ابيض بكم قصير نفس موديل مريم بس لون وردي فاتح..
مريم مبتسمه: ليش تقلديني..؟
ايمان وتوها منتبهه: اوووه ليش لابسه شراتي..يالله الحين بغيره...
وطلعت ايمان..
امل: برايها مريامي..انتي احلى..
ليلى: امل شو بتلبسين..؟
امل: عندي تنوره بيج بلبسها...
وطلعت امل...ويلست مريم عدال عمتها ليلى...
مريم: عمتي ليش ما تبين تروحين.؟
ليلى: بس جي..
مريم: يعني مب زعلانه من خالتي حصه..
ليلى مبتسمه: انا وحصه مثل الظفر باللحم..مالنا غنى عن بعض..انا وهي اكبر من هالتصرفات..
مريم: حلو يكون عندي ربيعه جي..
وقبل ترد ليلى دق تلفونها..
حصه: السلام عليكم...
ليلى بفرح: هلا والله ومليون غلا..بعمري وروحي هلا باللي اغلى من الغلا... من الخافق مليون ترحيبه اهلي بج...توني ارمس مريامي عنج...
ابتسمت مريم ونشت من مكانها بتطلع: عمتي سلمي عليها...
وصكت مريم الباب..
حصه: بتيين ولا لاء؟
ليلى:اعذريني...
حصه: سبب مقنع؟
ليلى: تعرفين ليش؟
حصه: عشان حمد.
ليلى: عشان يا عبيطه تاخذين راحتج...
حصه: ليلووه والله احس بضيج بكتمه احس بالموت مع ان البيت ممزور ناس..وخواتي وناسه وحشره...تعالي الله يخليج محد جريب مني كثرج..دخيلج....
ليلى تتنهد: حصه حبيبتي يوم يي حمد وين اروح انا..؟ ما تحمل نظرات العالم احس عمري مجرمه..دخيلج حسي فيني...
حصه: عيل انا شو اقول...احس بضيج من هالسالفه...
ليلى: ما ادري اكره هالسؤال..كلهم يتخبروني جني راعية البخت ولا امي دجاله...كرهت العرس وسنينه ...مالي ايد في اللي يصير...
حصه: على الاقل انتي محد عندج الا عايشه ومحد يقول لج شي في البيت...شو اقول انا اللي اكبر وحده في خواتي عرست وعمرها 19 سنه..
ليلى ما تبى تكدر خاطر حصه: حبيبتي انا ما احب هالتجمعات سيري استانسي ويا اهلج وافرحي وعقب رمسيني ...
حصه: زين متى بتزورين شموس اليوم تسألني عنج...
ليلى: يوم السبت عقب الدوام برد البيت ارقد والعصر بييكم..
حصه: اوكي فديتج اترياج...
ليلى: خلاص في وداعة الرحمن...
حصه: الله وياج..
..........
في صالة بيت بو راشد..كانت خلود حرمة راشد يالسه..مع ام راشد وجاهزين كلهم..ونزلت عندهن شمسه حرمة مبارك..
شمسه: ام حمدان وين سلامه..
خلود: مادريبها يمكن في البيت تلبس..
شمسه: متى بتظهرون؟
خلود: بدق لراشد الحين بشوفه...
شمسه: شو هالكشخه عمووه..؟
ام راشد: أي زين يا بنتي نحن خلينا الزين كله لكن انتن وبناتكن..
ودخل حمدان لابس ومتعصب..
ونزلت ايمان وامل واول ما شافته مريم رفعت وقايتها ع راسها...ودخل عقبهم راشد ومبارك يايين من برا...
راشد: يالله اذا جاهزين بنظهر رباعه في سياره وحده..
مبارك: اللي تشوفه يا خوي..بس مب جنه اليهال وايدين..؟
حمدان: هيه ابويه ضيج....
راشد: اللي تشوفونه...
خلود: حمداني فديتك..
حمدان: لبيه امايا..
خلود: سير ازقر سلامه اختك بتأخرنا..
امل: بسير وياك...
وطلع حمدان وامل ومن فلة يدهم العود لين فلة راشد..
امل: حمدان كان رقصك اليوم وايد حلو..
حمدان: مب رقص هذا اسمه رزيف...ولا يواله...
امل: ما شي فرق..
حمدان: فرق كبير...
امل تغني: فرق كبير بينك وبين غيرك فرق كبير...
حمدان: غني اغنيه عدله ولا سكتي..
امل بتغني:احم احم." ما يفيد بعد الفوت صوت..خلاص من قلبي انتهيت صاب الغلا والحب موت وانت على نفسك جنيت..وش فايدة كثر الكلام من بعد ما خنت العهود..روح وعلى الدنيا السلام دام الوفا ماله وجود"
فتح حمدان باب الفله وكانن الليتات مبنده وظلمه بس وقف وابتسم: بنت عمي صوتج يجنن والله..ما شاء الله عليج..من وين مطلعه كل هالمواهب..؟
امل بثقه: من احبالي الصوتيه..شو تتحراني شي سهل...انا امل بنت مبارك بن الشيخ المرحوم ناصر ..نحن هل دبي والاجر على الله ..في دمنا العزه وفي جبينا الشهامه عنوان..دومنا من جديم الزمان معتلين هامات السحب...
حمدان انفجر ضحك:الغرور مب زين اختي اموله..
دخل حمدان مع امل والصاله مظلمه ويشوف ليت من اخر حجره في الصاله بس الظاهر في حد هناك...كان حمدان شوي خايف..
امل: حمدان شغل الليت..
حمدان بهمس: سكتي ويا ويهج..
وقرب من الحجره وهو زايغ ومب مبين عليه... بس اول ما طل براسه..شاف سلامه ترمس تلفون واول ما رفعت راسها وشافته حطت ايدها على قلبها ونزلت السماعه..
سلامه بهمس: زيغتني غربلك الله...
حمدان: يالله نسير شو تسوين اخرتينا...؟
سلامه: زين ويا ويهك الحين بطلع اسبقوني...
وشلت السماعه:ريماني بعدين ارمسج يالله الحين بنسير بيت يدي بو خليفه...
وقبل يطلع حمدان بندت سلامه التلفون...
وظهر حمدان وامل رادين الفله العوده...
حركت سلامه شعرها الحريري اللي صابغه خصلات منه بالماروني بسرعه..وشافت عمرها بالمنظره..
سلامه ترمس عمرها : حلوه فديتني حلوه..شيخة البنات..وين الاقي مثل هالويه فديت روحي..مثيلي بالبشر نادر...صدج ان 7/ابريل ما كان يوم عادي..يوم امايا يابتني..كنت فخر للامه العربيه كلها...
ودارت على عمرها وكانت لابسه ثوب عنابي غامج ضيج من فوق لين الخصر وانسيابي لين تحت بكم قصير وشيله خفيفه...ومب رابطه شعرها لانه قصير بس لين تحت رقبتها شوي..
عقب لبست عباتها وساروا كلهم بيت بو خليفه...
............



ترقبو الجزء القادم من الاخ البدوي الحبوب ...


اختكم
الغلا

[البدوي الحبوب]

الجزء الثالث

في بيت بو خليفه وصلوا اهل بدريه و دخلوا الحريم الصاله العوده...بدريه وامها وحريم اخوانها...وبنفس الوقت وصلوا اهل ليلى..وانمزرت الصاله عرب..
بدريه يالسه عدال سلمى وتهمس لها: سلامي ما شاء الله الصاله ممزوره عرب شو رايكن نخلي البنات ينزلن الصاله اللي خاري..والحريم يتمن هني...
سلمى: اللي تشوفينه بس رمسي امايه..
وسارت بدريه عند عمتها...وشاورتها وعقب ووافقت على طول..
ونشن البنات كلهن الصاله الثانيه اللي ما يفصلها عن صالة الحريم الا بوابه زجاجيه...وعقب حطوا العشا وتعشوا كل الناس وردن البنات الصاله والحريم صالتهن...
وفي صالة البنات..
حمده: سلامي شو هالحلاه اليوم مب من عوايدج..
سلامه: من يومي حلوه فديتني..ودج بنص جمالي..
هنادي تهمس لعفرا: من بنته هذي؟
عفرا: سلامه بنت راشد بن يدي المرحوم ناصر..يدها ابو ابوها يستوي ولد عم يدووه عايشه...
هنادي: يدتي عايشه ام امايا..؟
عفرا: هيه..
هنادي: شو يستوون حق مبارك بن ناصر..؟
عفرا: عمها اخو ابوها بس هو ساكن في دبي...ليش تعرفونهم...؟
هنادي: لا بس ابوها وابويه يشتغلون بنفس المكان... اعرف بنت خالوه وياهن نفس المدرسه...مدرسة الاتحاد..
عفرا: زين والله اول مره تشوفيهن..؟
هنادي: هيه بس العوده شايفتنها قبل في عيد ميلاد بنت خالتي بس لمحتها وما كنت اعرف انها من الاهل...
عفرا: ما تشبه سلامه مول صح؟
هنادي: لا وين سلامه ما شاء الله عليها تخبل جنان..ولا الصبغه روعه عليها...ولبسها بسيط بس حلو ...
عفرا ابتسمت: ما شوفها حلوه هالزود..
هنادي: انتي من اللي حلو بعينج غير عمرج..؟
سلامه: شو اخت عفرا يالسه تتساسرين ويا بنت عمتج ولابستنا اليوم...
عفرا بغرور وبنظره بارده: يمكن...
سلامه: مب منج من اللي يسوي لج سالفه...
هنادي: الزين يفرض نفسه...
امل: والغالي اصله غالي والزين يفرض نفسه..
ضحكن ايمان ومريم خوات امل..يعرفنها على الريحه وبتغني..
حمده: سلامي خبرتي ابوج بنتايج الفصل...
سلامه تخزها بنظره وتبتسم انها تسكت عشان بنت عمها مريم موجوده ويمكن تقول لامها..
حمده مبتسمه وهي مفتشله: كلنا في الهوا سوا..
سلامه في خاطرها" الله لا يبارك فيج..غصب تبى تفضحنا.."
مها:سمر يالله نطلع ال Garden
سلامه: عشتوا...
ونشت سمر وميره بنت نوره وبنات خليفه مها وريم..
سمر: اموله ايمان تعالن ويانا..
امل بصوت واطي ترمس عمرها: فديتج يا سمر بنت مبارك ما تقصرين.. زين حد عبرنا..وانا اقول كلهن اللي اسماء اباءهن مبارك بنات اصول..
وقربت افنان من مريم ويلست تسولف وياها لو ان طبايعهن مختلفه بس بعد خذن على بعض ويلسن يسولفن وعقب اندمجن كلهن في السوالف..
سلامه: عفاري بتسيرين ويانا يوم الاربعاء ال skate ؟؟
عفرا: اكيد ان شاء الله..
هنادي: الله وانا بعد...
سلامه: للاسف رحله مدرسيه ما نروم ناخذج ويانا...
هنادي باسف: خساره..!!
ويلسن يسولفن بنات شمسه عن بلجيكا شو فيها ما فيها..ومريم يلست تسولف لهن عن نظام الدراسه في دبي والتغييرات اللي صارت في التربيه..وخذوا على بعض بسرعه...
..............
في حديقة البيت الكبيره..يالسات كلهن على الارض عدا ايمان ومها ...
سمر : يلسن...
ايمان: ما اقدر اخيس ثيابي...
ميره: عادي ما يخيس هاه عشب مب تراب...
امل: يلسي ايمان..
ريم: يالله مهايه يلسي..
مها: I can’t ما احب ايلس على الارض...
وسارت مها ويا ايمان ويابن كراسي من ورا الفله ويلسن عليها والباقين على الارض..
ريم: ونحن في المطار رادين دبي امايا اشترت لي باربي مع طقم يديد توه نازل..
سمر: الله انا اباه...
مها: Impossible وين تبين؟..هالطقم في بلجيكا وبس..في مصممه اسمها باميلا هارت مان هي مصممتنه ومخلتنه حصريا على بلجيكا..وممنوع أي دوله ثانيه تبيعه..
امل: يا ليت ابويه يودينا بلجيكا..يا ربييييه..زين ريم ممكن نشوفه...؟
ريم بدلع: امايه ما خلتني اييبه..بوظبي وقالت لي خليه في بيتنا في دبي..قالت لي ان بنات بوظبي غشيمات ما يفهمن في هالسوالف..
امل ترمس وجنها عيوز: في هذي صدقتي..
سمر: نعم نعم...!!! شو قلتي انتي وياها...؟ وانتن وين يالسات الحين..والله ان بنات بوظبي شيخات هل الامارات كلهن...
ميره: بنات دبي هن اصل وجذور الفن والموضه ما شي شراتهن..وبنات البلاد من طرفها للطرف الثاني يتسابقن عشان يقدلن بنات دبي في كل شي..
ريم: بنات دار الحي شيخات والكل يتمناهن...
سمر: ميره لا ترمسين جي..نحن هل العاصمه احسن ناس ما شي منا...
ايمان: شو اللي فيكم يا هل بوظبي...ما شي عندكم تنحسدون عليه..غير بابا زايد...
سمر: يسدج ويسد كل اهلج...
مها: Oh my God شكلكم بتتضاربون...؟
سمر: مهايه لوعتي بجبودنا اللي يسمع يقول ابوج رابي في ربوع شيكاغو..مب الا جنه رابي في عزبة امه...
انجلب المكان ضرابه وملاسن بين البنات الصغار..وكان بطي وحمدان وبدر ويوسف وعمر يتمشون في الصوب الثاني من الفله..وشافوا البنات من بعيد..
بطي:الله بنات..!!! تعالوا نسير صوبهن...
بدر(اخو بطي 11 سنه): يا مسود الويه...
حمدان: ههههه مب منك.. حنيت لراعيات الشيله والمخور...
يوسف: خويه بطاي مليت من الشقر صار لك فتره مجابل راعيات ثياب فوق الركب..
بطي: خل عنكم الرمسه يالله نسير لهن...
وساروا صوبهن...
بطي : اوووه يهال قوم 10 سنوات لين 15 ما ينفعن..
حمدان: شكلهن يتضاربن...
وسمع بطي هواشتهن...
بطي: حوو شعندكن...؟
ريم: خويه بطي البنات تخبلن...
عمر: من يومهن مخبل...
سمر: هيه احترم نفسك...
حمدان: اسكت عمر هذيل عقارب ما نروم لهن...
يوسف:لا ترمس عن خالتي جي...
حمدان مستحي: سوري...
بطي: زين يهالوه شو مستوي...؟شو فيكن خبرني انا بحل مشاكلكن من تساقط الشعر لين شد الوجه واضافة المساحيق..
يضحكن البنات على سوالف بطي...
امل تأشر على سمر: هذي تقول ان بنات دبي مب زينات وما فيهن شي حلو..
سمر:هي بدت تقول ان هل بوظبي ما فيهم شي زين وانهن خسفات بناتهم وعوفه..ولا يفتهمن في الموضه..
انفجروا الاولاد ضحك...
بطي: لا انتي ولا هي كل وحده اخسف عن الثانيه..شو فيهن بنات دبي وشو فيهن بنات بوظبي..مالت عليكن كلكن يا مال الميك اب وعمليات التجميل..علني ما خلى من بنات العين ما شي منهن ابد شيخات البلاد عقل وجمال وادب وثقافه...يا زين البداوه فيهن..يردن الروح..
حمدان: لا المثقفات بنات الشارجه...
يوسف: تحريت شي خطير...
بدر: سخافه!!!
حمدان: كل البنات سخيفات...
عمر: قلنا لكم محد سمع رمستنا...
بدر: الا خواتي ما شي منهن...
مها: فديتك Brother…
حمدان: امحق رمسه...
مها تطالع حمدان باحتقار وترمس بطي: Wat’s wrong with him ?...
بطي: جب انتي وياه يالله قومن سيرن داخل..عن يحدر ريال ويشوفكن تتضاربن ..
وساروا عنهن الشباب وتمن في الحديقه عنادا فيهم..وعقب شوي نزلن البنات الكبار...ويلسن في الحديقه وياهن...
...........
جدام فلة خليفه كان حمد يالس في موتره يسمع ميحد ويرمس تلفون...
حمد: زين وبعدين..؟
لارا: شو بعدين إحنا حكينا كفايه..
حمد: شو حكينا ما حكينا انتي...اطر من عندج انا..كل شي بفلوس..لا تموتين علينا...
لارا بدلع: بموت عليك من يومي..بس انت ما بتأدر هالشي..
حمد: بأدروا يا عيني..
لارا: شو بيلبأ عليك الحكي اللبناني..
حمد: الله يخليكي يا ستي..
لارا تضحك: زين شو إلت...؟
حمد: الحين فارجي وعقب بينا تلفون بنزل اسلم على اهلي..
لارا: وانت فارج بعد..
حمد: اسمع يالهرمه ..انتي تفارجين مب انا...
لارا: وشو يعني تفارجين وليش اتخضيت هيك..يعني اكيد كلمه مش منيحه..
حمد: غبيه هاي الكلمه بس تنقال للحرمه يعني بما معناها انه يا حبيبتي او جي بس ما تنقال للريال مول..
لارا: تؤبر البي حبيبي لك انا بدي افارج العمر كله...
حمد يضحك ويرمس روحه: مب راكبه الجمله مول ما عرفت احبكها هالمره...
لارا: خلاص بحكيك بعدين...
وبند عنها حمد...
ونزل ودخل الفله من الباب الرئيسي اللي يودي فلة بو خليفه...
وشاف بطي وباقي الاولاد...وأشر لهم ويوه بسرعه...
بطي:هلا خالي حمد..
حمد يطالع بطي من فوق لتحت: الحين يا مسود الويه يدك مسوي هالعزيمه عشانك انت واهلك وانت مب في الميلس؟؟ ليش مب يالس ويا الرياييل..؟
بطي عصب بس مسك عمره: بسير الحين..
حمد يتمادى: وين المريله ولا شغل برا غسل لك مخك..؟ يالس تدور لي في الحوي جنك بنيه..ومودر ميلس الرياييل...
بطي عصب من الخاطر وشاف حمدان وبدر والباقين ساكتين وحس انه يتعمد يهينه....بس بعد تم ماسك عمره هذا مهما كان ولد عم امه وبنفس الوقت خاله...
حمد: يالله دامك الا ويا البنات سير ازقر امك بسلم عليها...
خلاص بطي ما قدر يتحمل اكثر...
بطي: ما بسير شو اشتغل عندك انا..تراني حشمتك بما فيه الكفايه وانت ما تستاهل حشيمه...وجاني سكت مب خوف فيني بس احتراما لقرابتك لامايه..ولا قبل تنصح الناس طالع عمرك...وين يالس انت؟؟ هاه...؟؟ في ريال بعمرك يودر الميلس وييلس في موتره ..؟ شو من مذهب هذا...
حمد اعتفس مزاجه ورفع ايده بس مسكها بدر...
بدر: هاللي ناقص بس...
وسار حمدان عنهم ومشى وراه يوسف وعقب بدر وبطي ساروا الميلس...وحمد تم واقف مكانه..ويته سمر من بعيد...
سمر: هاه حمد شو تسوي هني..
حمد: سيري ازقري اختج شمسه بسلم عليها..
سمر: بس شمسه...؟
حمد: كل خواتج وعمتي بعد...
سمر: بس...؟
حمد: ناقصنج انتي بعد...يعني اقولج شو رايج احدر ميلس الحريم..؟
سمر: محد غريب...
حمد: من اللي داخل...؟
سمر: خواتي وامايه وخالتي غاليه واهلك و حريم عيال بو راشد...
حمد: من خالتج غاليه هذي؟
سمر: ام راشد حرمة خالي ناصر الله يرحمه...
حمد: هيه ام ليلووه..
سمر: كيف تعرفها..؟
حمد: ويانا في الدوام..
سمر: شو تبى الحين انتي...
حمد: سيري زقري خواتج...
وسارت سمر البيت من صالة الحريم وزقرت بدريه...
بدريه: زين هو وين الحين..؟
سمر: في الحوش وشكله معصب..
بدريه: من متى يهدا هو اصلاً...
وسارت بدريه عند بنات عمها وخبرتهن وعدلن شيلهن وتحجبن ونزلن الصاله اللي خاري ويلسن شمسه ونوره وسلمى وحصه اللي كانت حالتها حاله..
ونزلت بدريه الحوش وسلمت على خوها ...
بدريه وهي تلوي عليه: فديت عمرك والله تولهت عليك...
حمد مبتسم: مبين عشان جي مسوي لج غسيل مخ الاستاذ عبدالله ما تيين بوظبي الا بيت اهله...
بدريه: حمد بزعل..؟
حمد: اسولف وياج...وين بنات عمج بسلم عليهن..؟
بدريه: تعال وياي..
وسار حمد ويا بدريه ودخل الصاله..ونشن البنات يسلمن عليه...
ويلس وياهن...وبدريه ردت عند الحريم...
حمد: الحمدلله على السلامه يا ام سعود..
شمسه: الله يسلمك...ويسلم غاليك..
سلمى: حمد ولد عمي..
حمد تنهد يعرف انها بتطيح فيه طيحه..دومها ماكلتنه..
سلمى: وليش تتنهد بعدني ما قلت شي...
نوره: يستعد للعاصفه القادمه..
سلمى: من متى يالاخ ما ييت تسلم علينا..من متى ما شفناك ولا اسفارك وشغلاتك مالها حد ولا عد..
حمد: مشغول دومي مشغول...
شمسه: بس سلامي خلي الريال...
نوره: هاه حمد وعلومك بعد وش مسوي ..؟
حمد: بخير الله يسلمج..الا اقول شمسه ..
شمسه: لبيه..
حمد: بطي ولدج ..
شمسه تغير شكلها: شو بلاه.؟
حمد: ما فيه ادب يالس يلاسن الرياييل ويغلط عليهم...
شمسه وشكلها صدق تغير وبدت تتضيج: ما عليك منه يا حمد برمسه اليوم ان شاء الله السموحه لو قالك شي والله هالولد لسانه متبري منه...
حمد في خاطره" الحين يا ولد امك بنشوف شو تسوي"
تموا يسولفون و شمسه ضاغطه على عمرها عشان ما تبين انها معصبه وحمد كان يتعمد انه ما يرمس حصه..يموت في نظرة الانكسار اللي في عيونها..وتعجبه نظراتها المتوسله...ويحس بعمره شي كبير وهي تستجدي كلمه منه...
كانت حصه تغلي من داخل ومعصبه ومحترقه وكل مشاعر القهر والكبت متجمعه داخلها...بس ما حبت تبين وطول الوقت ساكته...اخر شي قررت تقوم من الصاله..بس ردت مسكت عمرها وقالت" ما بظهر بيتحراني طالعه عشانه خلني اتم"
حمد كان يسولف ويطالعها ويبتسم ويتعمد يقهرها يدري بها تحترق من داخل..كان طول عمره نذل ما تدري شو اللي خلاها تحبه..وطول عمره منبوذ ومحد يحبه..وخواتها ياما حذرنها من اللي هي فيه..وان حمد ما يستاهل وانه صايع وراعي بنات وسوالف بطاليه بس ما رضت وقالت ان كل شي يصير خارج عن ارادتها...
حمد: يالله انا استأذن بسير الميلس...سلمن على عمتي ما حدرت ادري به ميلسها ممزور حريم...
نشن البنات...
وظهر حمد...وتمن في الميلس واقفات...
سلمى: ما ادانيه ولا احب شوفة ويهه الله يعين عمي وعمتي عليه...
نوره: شو تبين به صايع مقطوع الرجا فيه..
شمسه : شو مسوي بطاي...؟؟
نوره: لا تصدقينه تلاقينه متحرش في اليهال وسنعوه بكلمتين..
شمسه: بس انا اعرفه بطي ما بيرمس بشي مب زين الا اذا زاد الشي عن حده ومب أي شي يعصب ببطي...
نوره: عيل انشدي ولدج ولا تستعيلين وتهزبينه عشان هاللي ما يسوى...
حصه طلعت بدون ما ترمس ولا تقول شي...
نوره: الاخت تحب... برايها خلنها خبال في خبال..
سلمى: حرام عليج مب بإيدها...
شمسه: شو مب بإيدها كل هالانحراف اللي فيه وبعدها ما شافت..بعدين والله لو حمد اخر ريال في العالم ما خليها تاخذه يا حيا الله العنوسه ولا مجابل اشباه الرياييل...
وطلعن من الميلس وسارن الصاله


ونتظروا التكمله مع الاخت الغلا
تحياتي لكم

[فطوم]

اششششششششششششكركم صراحة لانكم حطيتوها

كان ودي اقراها بس شوي شوي..
والله يعطيكم العافية..البدوي الحبوب والغلا..
مشكورين..
انا قريت الاجزاء الاول والثاني واعتقد الثالث من زمان في المنتدى
بس مادري ليش ما كملت..
زين اللي الحين حطيتها اخوي..ومعاك الغلا..
مشكورين مرة ثانية ونترياكم

[الرايقه]

السلاااااااااااااااام عليكم ,,,
قصه رهيبه وغاويه واشكركم على نقلها ويالله وين البقيه تراني اتريا ,,

[البدوي الحبوب]

فطوم

العفو اختي وتسلمين على هالرد الطيب

الرايقه

تسلمين على المرور وان شاءالله الاخت الغلا بتنزل القصه اليوم

تحياتي لكم

[الغلا]

ولكم مني هالجزء ..... بس الصراحه هالجزء طويل :)

الحلقه الرابعة
الساعه 12:30 كانت ليلى في حجرتها يالسه وعقب سارت حجرة عايشه اختها ويلست فيها...حست بكبت بتعب وضيج..حست محد في العالم كله فاهمنها..."ليش ابويه مات..!! وليش اختي عايشه عرست وراحت..ليش انا في البيت وحيده..وليش خويه سيف توفى وبنته شو ذنبها تعيش يتيمه العمر كله..انا مب معترضه يا ربي على قدرتك واللي كاتبنه في اقدارنا...بس سؤال في نفسي اللي ضعفت وعمري اللي بدا يمشي بدون هدف..ليش ما عرست للحين...ليش كل الاقدار ماشيه ضدي..باقي 4 سنين وكم شهر واوصل الثلاثين..."
نزلت دموعها بصمت وحراره..ما قدرت تتكلم...ودها تكلم حصه بس تدري به بيتهم ممزور ضيوف..دفنت ويهها في المخده....
"اختي عايشه ولهت عليج"...
حست ليلى عمرها تبى تصيح تطلع الكبت اللي يحرق حياتها..وحدتها تسبب لها تعب نفسي..تحس بعمرها ضايعه ما تلقى نفسها الا في عيون ناصر...ناصر اللي ربت وياه وشافت كل ايام الطفوله معاه..كان ناصر حياتها من يوم انولدت وشافت الدنيا، ناصر هو عيونها اللي تشوف بها..تذكرت يوم صغيره وتلعب معاه ويوم كبرت وصارت مراهقه وهي تموت عليه..ويوم تخرجت وبعدها تعشق الدنيا لان ناصر فيها..لين ما وصلت هالعمر وهي بعدها ما عرست للحين..وتذكرت اثنين خطبوها بس رفضتهم عشان ناصر..ناصر اللي تقنع عمرها انه لها لو شو ما صار..
اكثر شي يعذبها انها تدري انها حبه الاول والاخير تدري ان ناصر يموت فيها....بس ناصر عاقل ويدري ان ليلى بالنسبه له مثل خيوط الشمس تنور له حياته بس ما يروم ييودها ..ليلى بالنسبه له نجمه يناجيها لين الفير بس عمره ما يوصل لها...
تعبت ليلى وهي على هالحال تفكر فيه وتدري انه سراب ..بس عواطفها قامت تسيرها وحست عمرها ما تقدر توقف تفكير فيه..وصار هالشي من يوميات حياتها..وكيف ما تحبه وهالحب ربى في قلبها من الطفوله وتأكدت منه ونضج في قلبها من 12 سنه..
يلست تناجي نفسها بصمت...
"ناصر وينك..!! ليش الدنيا رخيصه..شو اللي اغلى من البني ادم..الحين صار الميراث وسوالف الفلوس هي اللي تفرق بين الناس...الله يرحمك يا بويه..لو تدري ان عمتي اللي هي اختك ما طبت بيتنا من يوم غاب حسك عن هالبيت..ليت الموت بالاختيار جان رجيت الله ياخذ روحي وانت تتم...بس بعد ما تهون عليه احرق لك قلبك...يكفي كيف حالتك ومرضك اللي مرضته عقب وفاة سوافي الله يرحمه.."
يلست ولوت على المخده وتربعت على الشبريه...وتنهدت بحراره تذوب لها اقسى القلوب...وبدون شعور كانن دموعها مفر لها من قسوة الايام..ويمكن شافت فيها تبريد لروحها المتعبه المثخنه بالجراح....
"ناصر لو ان ابويه وافق يوم خطبتني اول مره شو كان بيستوي حتى لو ما عرسنا ذاك الوقت...الله يسامحك يا بويه قلت اني صغيره...ما تدري ان الدنيا بتتغير وانك يوم بتموت بيفترقون هلك عشان ميراثك..وبيروح اللي حبه القلب وعشقته الروح...ليش يا بويه ما حسبت ان هالبنت اللي كانت صغيره بتكبر..ما ادري يا بويه اذا رمستيه تعذبك بس من اشكي له..ربي اصبر علي والهمني الصبر ما عاد في باقي العمر روح..."
نشت من مكانها ويلست تطالع المنظره...ورفعت ايدها لشعرها وفتحته...وطاح من فوق لين اخر ظهرها...ويابته شوي جدام ويلست تطالعه...وابتسمت بألم...وجدام المنظره..
" باجر يختلط سوادك بالبياض.."
ردت لفته وبندت الليت ومشت دموعها وطلعت من الحجره..كان الممر مظلم بقدر ظلمة الحياة في نظرها...سارت بخطوات ثقيله لحجرتها تجر معاها هم ووجع السنين...ويلست على الكرسي وسحبت الدفتر والقلم وسجلت على صدر الزمن صرخة الم...
" آآآآآآآهٌ من غربة الروح ومن هيجان أوجاعي"
ووقفت وردت شخبطت على الجمله وقطعت الورقه...وكتبت من اول ويديد..

"تعبت أكثر من التعب.. أحترق... أحترق مثل الحطب مثل الخشب آه يا حرق اللهب كيف الصبر بين اللواضي والجمر كيف الجبر؟؟ هذا الكسر ما ينجبر من يجبر كسور الزجاج يارب عجّل بانفراج جلّ المصاب القلب ذاب يكفي عذاب يالوعتي كبر الفيافي والقفر كثر المطر أو كثر أمواج البحر حتى النهر
أو كثر قطرات البحر حتى النهر او كثر من ودا البحر عنا وراح يكفي جراح أبعتذر..... يعني : يكفي إذا هذا مزاح ؟؟؟؟ ما عدت اميز صدقيني بين ضحكي والنواح بين صبري والكفاح بين رمشك والرماح الكل........ سبب لي جراح.. الكل أرث لي نواح هل يا ترى أصبح عذابي مستباح؟...
أم ياترى ماضي أنا عدا وراح !!!!!!!!! وين العدل حتى الأمل عني غدا واصبح جُمَل فيها مواساتي غزل كيف العمل من بايداوي هالعلل يالله يعل اللي تجلا بي وحل أنه يصير مثل السراب ويضمحل أهل ورفاق ما عوضوني عن بعادك والفراق والله يعلم أن قلبي قده ضاق أرجوك يكفيني إحتراق"

صكت الدفتر ونشت بتنزل الصاله وكان الجو بارد...تترياهم...بس تعبت من كثر ما تتريا وقررت ترقد...حطت راسها على المخده ورقدت..
............
حصه على طول بعد اللي صار طلعت فوق وصكت الباب وعقت مخدة سمر ولحافها برا الحجره..ولحقتها سلمى على فوق بس ما قدرت تقنعها تفتح لها الباب....
سلمى: حصوه بطلي الباب خلي الخبال اللي فيج...
حصه ما ردت...كانت تحترق وتحترق بس ما تقدر تكبت اكثر عن جي...داخلها براكين غضب...لو صاحت جدام اختها بتقول انها ضعيفه...وايد تسمع من نوره هالرمسه ودايما جملها ترن في اذنها..
" انتي دومج مستقويه على سمر وبنات خليفه..دومج تطولين لسانج علينا وعلى خوانج وحريمهم..وما تحشمين حد بس الله مبتليج في محبة ولد عمج اللي يسقي الناس كاس مذلته"
حصه بندت الليتات ويلست بكل ثقه على شبريتها وقاومت الدموع وكانت فعلا قويه...كانت تتنهد تبى تقهر العبره اللي خانقتنها..تكابر ولا تصيح...تدري انهم كلهم بيلومونها حتى بدريه اللي دومها وياها ممكن تلومها على دموعها...
سلمى: حصووه وغلاتي عندج بطلي الباب...او ارمسي على الاقل...
وملت سلمى وسارت عنها تدري بها عنيده ومستحيل تفتح الباب الا في الوقت اللي يرضيها..
نزلت سلمى تحت وشافت ان هل بدريه روحوا..وشافت ان بنات مبارك بن ناصر يلبسن عبيهن وشكلهم بعد هذيل بيروحون...
وهناك عند باب الصاله واقفه مريم وخواتها وسلامه وبنات خليفه وبنات شمسه...وياي من بعيد بطي وبدر ويوسف بيدخلون الصاله...
هنادي: لحظه بطي اصبر شوي...في بنات هني..
بطي يستهبل: احلى شي..
وتحجبن البنات ودخل بطي..وسارن سلامه ومريم شوي بعيد لين ما يمر...
ودخل هو واخوانه...
هنادي: وين ساير...؟
بطي: وين بعد اكيد بسير ارقد تعبان...
هنادي: وين..؟
بطي: اوهوو في حجرة خالي ذياب وين يعني..يالله يوسف.
وسار وياه يوسف ...وبدر تم يسولف ويا امل وايمان...
بدر: اقول من احلى بنات دبي ولا بوظبي..
ايمان: دمك ثجيل..
ريم: بنات دبي...
بدر: والله سوالفكن تييب المرض..اونه من احلى نحن ولا بنات دبي...مالت عليكم احلى شي بنات البحرين وبس..
وسار عنهن وهن يتحرطمن خواته وبنات مبارك الصغار...
وردت مريم وقامت شمسه حرمة مبارك هي وخلود وام راشد..وسلمن عليهم وقبل يظهرن وقفت افنان عدال مريم وطلبت رقمها في دبي..
مريم: هذا رقم الصاله اللي تحت وخذي هذا بعد للي فوق يمكن ما كون تحت دوم..
افنان: ما عندج موبايل..
مريم: يوم اخلص الثانويه العامه وادخل الجامعه ابويه وعدني...
افنان مبتسمه: ولا انا ..ما عندي بس خالي ذياب وعدني يوم اتخرج بييب لي واحد انا وهنادي..
مريم:احسن عقب مب الحين..شو نبى الموبايل الحين..؟
افنان: زين مريامي بدق لج عقب وان شاء الله بزورج قبل اسافر...
مريم مبتسمه: ان شاء الله..
سلامه: ما شاء الله الخوات تعارفن...
حمده: يهال ما عليج منهن...
عفرا تطالع حمده بنظرات: من كبرج انتي؟
حمده ما ردت عليها..وهاللي قهر عفرا اكثر..
طلعوا بيت بو راشد سايرين بيتهم ودخلن الحريم في بيت بو خليفه وشافن البيت مجلوب فوق تحت والدنيا معتفسه..
نوره: الله يعينا على اعادة الاعمار...
سلمى: شكلنا بنتعب وايد...
عفراء: الشغل الجماعي يخلي كل شي يخلص بسرعه..بنتعاون وكل شي بيخلص بوقته...
ساره: شو نبدا الليله ولا باجر الصبح..؟
شمسه: شو الليله ساره..؟؟ تعبانين نحن خلهن لباجر..
بدريه: لا شموس انتي ما تسوين شي خله علينا نحن...
سلمى: عيب بعد ضيفه وتشتغل..
شمسه: وفرتن علي..
شمسه كان مزاجها معتفس عقب اللي صار..معروفه ومشهوره بتربيتها لعيالها احسن تربيه..والكل يشهد لها بهالشي..وكانت طول الوقت تفكر بطي شو مسوي...!!!!
وسارت شمسه فوق وخذت وياها ريم ومها..اما هنادي وافنان قالن انهن بيسيرن ويا عفرا وحمده فلة خالهن خليفه...
سلمى: انا برتب شوي ويا البشاكير والله يغمضني هن بشر شراتنا...
بدريه: وانا بعد...وياج سلامي..
نوره: انا بسير ارقد..
ساره: عيل بتم ويا بدريه وسلمى..
عفرا: امايه بسير اغير ثيابي وبييكن اساعدكن...
حمده: انا بسير ارقد..
هنادي وافنان: ونحن بعد....
وكل وحده سارت المكان اللي تباه...شمسه طلعت فوق على طول وفتحت باب حجرة ذياب وشغلت الليت وشافت بطي متلحف ورفعت اللحاف شوي من على ويهه..وشافته راقد...وخلته...وهي طالعه...بندت الليت وصكت الباب...
نش يوسف من مكانه: مب قلت لك انها بتيي تشيك عليك رقدت ولا لاء...
بطي: والله انه مب ريال الهرم خبر امايا..يالوهقه عاد ام سعود هاي تصدق المشتكي الاول..
يوسف: ما عليك بنخلي بدر يشهد ويانا هي تصدقه...
بطي: بس بعد ما ابى امايا تهاوشني...وبدر خوك فتان يباها من الله على الضرب اللي يحصله مني...
يوسف: ما عليك منه ارقد الحين وباجر اغسل لك مخ بدر بسنكرز واي حلاوة ثانيه وتلاقيه عبد مأمور...
بطي: تصبح على خير..
يوسف: وانت من اهله...
.............
وصلوا قوم بو راشد بيتهم...وسار مبارك وحرمته وبناته البيت العود وراشد سار فلته ويا حرمته..وسلامه وحمدان وعمر ولد مبارك وياهم...وفي فلة راشد سلامه فوق في حجرتها قافله الباب...وتغير ثيابها..
وتغني بصوت مسموع" تقدر تروح وتبتعد ان كان يرضي مطمعك..لو حب قلبي ما صمد...عن حب غيري ما امنعك..الحب احلى من الشهد..ومن مثلي حب ودلعك..ولا تظن في قلبي احد يا كيف وهو نبضه معك..وسهيل نجم بلا عمد..ومن فوقه حبي رفعك"
مشطت شعرها وحاولت تلفه ولفت شوي منه مع انه قصير..و على طول وانسدحت على الشبريه...
وفي غرفة حمدان على طول رقد عمر من التعب اللي فيه...وحمدان بعد ما غير نزل الصاله بيسير بيت يده ناصر...بس شافه ابوه وهو نازل...
راشد: وين رايح...؟
حمدان مرتبك: بيت يدي ناصر..
راشد: وهاي حزة طلعات ..عمتك راقده..سير ارقد...ما شوفك فتحت لك كتاب من يوم الاربعاء...ارقد عشان اشوف الدراسه باجر ...وتعويض الوقت اللي قضيته في الهياته طول هالويكند...
حمدان نزل راسه: ان شاء الله ابويه...
ورد على طول حجرته وقفل الباب...
" اففف يا ربي ما شي رقاد شو ايلس اسوي هني..شو هالملل.."
وتم طول الليل يتجلب ما ياه رقاد من الملل مع انه من الصبح ناش...

وفي الدور الثاني في بيت بو راشد...وفي غرفة مبارك يالس ويا حرمته شمسه...
مبارك: نرد باجر...؟؟
شمسه: عيل نتم شو نسوي...عيالك وراهم مدارس يوم السبت ولا ناسي..
مبارك: زين على الله يصير خير...
شمسه: شكلك ما تبى ترد..
مبارك: من قال بالعكس..بس تعرفين ما احب ايلس في بوظبي وايد...
شمسه: من حقك والله...
مبارك: كرهني راشد اخويه فيها والله...
سكتت شمسه ما تريد تتدخل تعرف مبارك بيبدا في لوم اخوه ويعيد سوالف ما تحب تسمعها لان حلولها انتهت...
مبارك: فشلنا وفضحنا بين العرب..عيال عمتي يشوفوني ويا الشباب ولا يون يسلمون...يتخبروني الناس شو بينكم..شو ارد عليهم اقول اخويه ماكل حلال امهم...حتى عمتي لا سرت اسلم عليها تكلمني من ورا خاطرها...
شمسه: وانت شعليك ليش يحاسبونك على شي مالك ذنب فيه..
مبارك: هذي هي الناس كل حد يدخلونه في اللي له واللي عليه...
شمسه: رمست راشد.؟
مبارك: يحلف بالله ان ابويه معطيها حقها كامل وان عيال عمتي ناصر وفهد يألفون سوالف هم وابوهم...ويقول اكيد لاهفين حلالها وهي ما تدري..
شمسه: والله ام ناصر طيبه وعادي يكون حد قاص عليها...
مبارك: ما ادري بس عمتي ما بتصدقنا ضد ريلها وعيالها...
شمسه:زين ما رفعوا دوعى بالمحكمه...
مبارك: فال الله ولا فالج من حرمه...ناقصنا محاكم نحن...هاللي باقي الفضايح...عوذ بالله من فالج...
شمسه سكتت...وتلحفت: تصبح على خير...
مبارك: وانتي من اهله ولو ان الخير معدوم...
..................
وفي بيت بو خليفه..كانن البنات والحريم اللي ما رقدن يشتغلن...و ع الساعه وحده دخل بو خليفه بعصاه يتعكز عليها...وشافهن يرتبن الصاله ويودن وييبن...
بوخليفه: بناتي ليش ما رقدتن..؟
ساره: والله يا عمي بنرتب شوي ما نروم باجر لكل هالشغل...
بو خليفه: بنتي ساره سيري بيتج ..ريلج سار هناك من الساعه 12 ..بيتج الزم ما عليج الحريم هني يكفن ويوفن والبشاكير هب زينه في البيت..
ساره: ان شاء الله عمي...
وسار بو خليفه حجرته...
سلمى: وا عليه عليك يا حامد اكيد توله علي...
بدريه تتمصخر عليها: والدليل انه دق لج...
سلمى: اووه موبايلي ما شفته والله اكيد حرق التلفون دق...
بدريه: هذا ويهي لو لقيتي نص مس كول...
وتمن يرتبن وسارت سلمى حجرة نوره ويابت تلفونها ويت تربع المطبخ..
سلمى: قبل ادق التلفون ولا اسوي به شي يبته لين هني...شوفي كم مس كول...
بدريه: اشوف..
سلمى: فديت روحه 14 مس كول وثلاث مسجات...
بدريه: يالله فتحينه يمكن شي يعيبني طرشيه...
سلمى: وسعي عني يمكنه بيقول لي سالفه سريه..
قرت سلمى المسجات وعصبت وويهها تغير...
ساره: شو مستوي سلامي؟
سلمى مدت بوزها ونها بتصيح: مسود الويه....
بدريه: ليكون خذ الثانيه...
سلمى: بجتله..
ساره: سافر...؟
سلمى: يا ليت...
بدريه: عيل شو الشي الجايد اللي يخلي سلامي تقول عن ريلها مسود الويه..
سلمى: قال...
بدريه تسحب تلفونها: هاتي اشوف...
وانفجرت بدريه ضحك وساره تطالع: شو السالفه بدريه...؟
بدريه: اااه بطني ما روم والله...ساره اقري لروحج...
سلمى: ما يضحك..والله بيشوف..
ضحكت ساره لين ما قالت بس..
ساره: تستاهلين دواج وهذا غيض من فيض...
كان حامد كاتب لسلمى في المسج" دقيت وهلكت وانا ادق وما رديتي تمي في بيت اهلج انا راد دبي..يوم تشبعين وتفضين سوي لي تلفون اييج"
سلمى: بتشوف والله..
بدريه: سمعناها وايد...
وكملن شغلهن وسلمى يلست وياهن لين 2:30 عقب كلهن سارن يرقدن وراهن نشه باجر...
..................
سمر اول ما طلعت فوق وشافت اغراضها برا الحجره عصبت ونزلت عند ابوها بتواشي على حصه...وتخبره شو مستوي وتمت تدق الباب ولا حشمت ان ابوها راقد..
سمر: ابويه افتح الباب بسرعه...
ونش بو خليفه بسرعه: هاه بنتي شي مستوي عسى ما شر...
سمر وهي تصيح:حصه فرت مخدتي ولحافي في الممر..وين ارقد..
بو خليفه عصب: شو اسوي بج ريال شكبري وتعبان وهلكان الضيوف ما سارو الا اخر الليل موعيتني عشان مخدتج..انخمدي في أي حجره لا بارك الله فيج...
وصك الباب بسرعه...
سمر انصدمت من ردة فعل ابوها وتمت تصيح...ومرت بدريه وشافتها هي وسلمى وعرفن شو فيها..وشلتها سلمى وياها حجرتها ترقد عندها...
وبدريه سارت بتدق لعبدالله بس اكتشفت عقب ان تلفونها في حجرة حصه..بس ما تكلمت ونزلت الصاله ودقت لعبدالله..
بدريه: وينك غناتي...
عبدالله: في الميلس...
بدريه: ويا منوه؟
عبدالله: لروحي..راحوا ضيوفكم..؟
بدريه: من زمان والله اني تحريتك رقدت بس قلت بجرب وحظي انك واعي للحين..
عبدالله: فديت غناتي يا ربي..زين ثواني وانا على اسرع من بساط الريح عندج الحين...
بدريه مبتسمه: اوكي اترياك في الصاله...
يلست بدريه في الصاله ...شوي وتسمع دق على باب الصاله ونشت تبطله..وعقب ما دخل عبدالله بندت الباب...
عبدالله: بووووو انا ييت...
بدريه مبتسمه: يا هلا بك والله..
عبدالله يطالعها ومبتسم: يالله يالله شو هالزين كله يا بدوور..(ومد بوزه ونه زعلانه) الحين كل هالحلا للحريم وانا بس مالي الا بقاياه...
بدريه: بس عاد خل عنك هالرمسه...وايد تبالغ...
عبدالله: وين نرقد الحجر ممزوره عرب...
بدريه: لا في حجر فاضيه شو قالوا لك ساكنين خرابه فيها حجرتين..يالله تعال بنرقد..
عبدالله: وين..؟
بدريه وهي تأشر على اخر حجره في الصاله: هناك...
عبدالله: فاضيه..؟
بدريه: هيه يالله وفرشت وكل شي خلاص..
عبدالله: اكيد على الارض..؟
بدريه: ارجوك يا ولي العهد اللي متعود على ريش النعام..
عبدالله: ظهري يعورني ما روم ارقد على الارض وانتي تدرين بهالشي..
بدريه: وكيف انسى ؟ وليش كم عندي عبادي انا ..
عبدالله: عشان جي تبين ترقديني على الارض وتفتكين مني...
بدريه: امنت لك اللي تبى وفرشت لك فراش طبي كان عمي مبارك يرقد عليه... احسن عن ا لشبريه مليون مره..
عبدالله: بعد عمري والله ..كل حريم الارض ما يسونج يا بدريه...
بدريه: كل هاه عشان فراش..يالله يالله نسير..
عبدالله: يالله نسير..
وسار هو وياها ورقدوا في هذيك الحجره...

وفي حجرة حصه ما رقدت للحين قاصه على عمرها ونها ما بتصيح لو شو ما صار...وقالت في خاطرها" ما شي الا اني ارمس ليلى اكيد هي الوحيده اللي بتفهمني"
ونشت تييب تلفونها....ودقت بدون تردد حق ليلى...
بس طوّل محد يرد وتمت تدق واخر شي ردت عليها ليلى...
حصه بهمس: ليلووه...
ليلى وصوتها رقاد: منو؟
حصه: من بعد انا حصه...
ليلى: شو مستوي..؟
حصه: ما شي بس ما ياني رقاد...
ليلى: وحد قالج اني منوم..؟
حصه تضحك: يالله خل عنج انا مقهوره ليلوه نشي..بسج رقاد...
ليلى : شو تبين انتي الثانيه خليني ارقد ما فيج صبر لين باجر..
حصه: محد يدق لج تحريتج الوحيده اللي بتفهميني...
ليلى: زين شو فيج..
حصه: ما شي باي..
وصكت حصه التلفون قبل ترمس ليلى...
ليلى ردت ترقد..بس بعد عشر دقايق نشت..وسارت تشوف الساعه ولقتها 3:10 وغسلت ويهها..بطلت الليت وشافت اذا صدق حد متصل بها من شوي ولا كانت تحلم...ويوم فتحت المكالمات الوارده..شافت ان حصه متصله..وتذكرت اللي صار وتلومت وردت تدق لها..
حصه: خير شو تبين..؟
ليلى: اسفه حبيبتي والله ما كنت حاسه..
حصه: اففف ليلوه مضايجه والله..
ليلى: شو استوى بج ارمسي..
حصه: هو..
ليلى: حصوه والله اني مصطله رقاد منو...زين حمد شو سوا اليوم..
حصه: نذل كالعاده..
ليلى: يومج تدرين بهالشي ليش متقبضه فيه..؟
حصه: مثل يوم انج تدرين ان ناصر مستحيل ياخذج ..بعدج تحبينه ليش؟
ليلى بحزن: غصباً عني...
حصه: نفس الشعور..
وخبرت حصه ليلى كل شي صار..
ليلى: طول عمره خسيس وما ينبلع وكارهتنه من ايام زمان..
حصه: حرام عليكم..
ليلى: حصوه حبيبتي الساعه الحين 3:30 شو رايج ترتاحين شوي وترقدين فديت روحج..تدرين شموس عندكم وراج نشه من الصبح عشان تيلسون وياها قبل يردون دبي..ولا شو رايج..؟؟
حصه: خلاص عيوني بسير ارقد..بس ابى ارمسج باجر...
ليلى: باذن الله...في وداعة الرحمن..
حصه: الله وياج.
ليلى: حصه...
حصه: هلا غناتي..
ليلى:احبج..
حصه بفرح: فديت قلبج وانا بعد..
ليلى مبتسمه: يالله فديت روحج باي..
حصه: مع السلامه..
ورقدن كلهن الثنتين...على طول..
...........

اليوم الثاني في بيت بو راشد..الساعه 8:30 نشت ليلى اول وحده...وحست بنشاط غريب رغم انها ما رقدت امس عدل ورغم الضيجه اللي فيها بس نشت بسرعه اليوم وعلى غير العاده....وسارت المطبخ وسوت لها شندويتش جبن وكوب شاي..ويلست بتاكل ..وتذكرت حمدان...وحطت الاكل وقالت بتتريا لين ما ينش هو وسلامه...
البيت كان هادي والبشاكير مبطلين بيبان الصاله وصوت العصافير يريح القلب وهوا بارد ياي من صوب الحديقه...وطلعت ليلى وكان الجو يجنن برا..وقبل تنزل من دري الصاله ....
امل: عمتي ليلى...
ليلى لفت صوبها: صباح الخير اموله..
امل مبتسمه: صباح النور...
ليلى: ليش ناشه من وقت...
امل: انا دومي جي اول وحده انش في بيتنا...
ليلى: شطوره..
امل: عمتي ما ريد ارد دبي..قولي حق ابويه بنيلس هني...
ليلى: والمدارس..؟ وين ومن بيكمل دروسج عنج...؟
امل: اففف ما ريد ارد...
ليلى: احيدج تموتين في دبي...شو ياج على هل بوظبي..؟
امل: حبيتهم..ابى اتم هني...زين عمتي وين سايره الحين...؟
ليلى وغيرت رايها:بيلس في الحديقه..تيين وياي؟
امل: هيه..
ويلست هي وياها...وتمت تسولف لها شو تسوي ما تسوي....وعن المدرسه وكل شي...وقالت لها امل انها كانت مشتركه بمسابقة افضل صوت في أي مجال على مستوى في المشاركات الصيفيه...وفازت بالمركز الاول محلياً...
ليلى: زين والله وليش ما شاركتي على مستوى الخليج...؟
امل: ابويه ما خلاني قال عيب...
ليلى: صح فديت بنت اخويه اللي تفهم..وفديت صوتها الحلو....
امل مستحيه:عمتي استحيت..
ضحكت ليلى..
امل بثقه: عمتي شو تبين تسمعين..؟
ليلى: امممم أي شي...على ذوقج...
امل : احم احم...
وغنت"الزين هذا حلو و زين..خصه الي لبس القلايد..فتان يسبي القلب والعين..فيه الحسن والزين زايد...ما شفت انا في وصفه اثنين...ذرف الصبا غض النهايد..من وين هذا الريم من وين..لي صار للغزلان قايد...مفنود عن كل المزايين..نوره لنور الشمس عايد في مبسمه در مثامين..مسك ودانات فرايد..عوده اذا هب الهوا يلين فارع ومياس ونايد..تحلى به الاوصاف وتزين..وتزين به حتى القصايد..."
ليلى منصدمه من صوتها: هذا وتوج ناشه من الرقاد جي..عيل لا صحصحتي شو بتسوين..؟
امل: قولي ما شاء الله عن تحسديني...
ليلى تضحك: فديت روحج والله صوتج جنان اموله...
امل: زين عيبج..امس غنيت للبنات في بيت يدي مبارك...
ليلى: منو اكثر وحده عيبتج ومن اللي ما حبيتيها...؟
امل: حبيت ميره وريم مع انها شوي خقاقه..بس ما حبيت مها ابدا ..لانها شرات ايمانوه اختي...
تضحك ليلى: خقاقه..؟
امل: ودلوعه...
وقبل ترمس ليلى سمعت صوت شيخه من بعيد...وقامت ودخلت البيت وشافتها واقفه في بداية الدري من فوق..ومبتسمه ابتسامه مشرقه من الصبح...وماسكه دب صغير..ولابسه قميص برتقالي فيه عصافير صفرا وبنطلون نفس الشي...
وبفرحه طفوليه اول ما شافت ليلى وعيونها بعدها ما بطلتها عدل مدت ايديها عشان ليلى تييها وقالت: امي..
ابتسمت ليلى وضحكت امل..وسارت لها فوق وشلتها..
ليلى وهي تحبها على خدها: فديت هالويه وفديت هالخدود يا ربي..
امل: عمتي وايد دبه..شو تأكلينها..؟
طالعتها ليلى بنظره حاده: قولي ما شاء الله..
امل مبتسمه: ما شاء الله..
شيخه ماسكه ثوبها وعفست ويهها وتطالع بدلتها باحتقار: ماليد ثليه..مث حلو..
ليلى طالعتها بخبث: نروح نتسبح.؟
شيخه بخوف: لا لا ماليد ثبح...
ليلى: زين تعالي بغسل ويهج حياتي..
وسارت الحجره وغيرت لها ونزلت الصاله ويلسن امل وليلى... وشيخه يالسه على ريول عمتها ليلى ..
ليلى: شواخي..
شيخه وهي طايحه براسها على كتف ليلى وبكسل: هاه..
ليلى: غني لي عشان امل تسمعج وانتي تغنين...؟
شيخه: ماليد..
ليلى: من يبى حلاوه...؟
امل تغايض شيخه: انا...
شيخه نشت بسرعه وبعصبيه: لا لا انا...
ليلى: ما يي معاج الا هالاسلوب..يالله غني يا علايه...
شيخه: يا علايه يا علايه ابوث ما عبلني يا علايه..
واستحت شيخه من امل وحطت ويهها في حضن ليلى وما قدرت تكمل...لوت عليها ليلى ويلست تتفداها ساعه..وقطعتها بوس..وامل ميته ضحك عليهن...
ويلست تسولف وياها لين ما نزلوا الباقين وسلموا وقربوا الريوق...وتريقوا كلهم..
................
الساعه 9:15 في بيت بو خليفه...الكل رقود هلكانين ومحد منهم نش للحين..وفي حد يبطل باب الصاله من برا بس مب رايم له...
" افففف شكله مصكر من داخل شو هالحاله...يا رب ان البشاكير نشن"
وسار من الباب اللي ورا الفله ولقى وحده من البشاكير تحط الحب للطيور في الحديقه اللي ورا...
ذياب ينادي بصوت مبحوح عشان محد يسمع: ناتالي ...
ناتالي: نعم بابا...
ذياب: قصري حسج علني ما صرت ابو جانج بنتي...
ناتالي: شو ريد...؟
ذياب: شو ابى من ويهج بعد...اقولج باب الصاله سيري بطليه ما اريد ادخل من باب المطبخ وتقبضني امايا..
ناتالي: ما في ولا واحد ينش لين الحين روح من هذا باب....
ذياب: بابا مبارك ما يسأل وين انا امس...؟
ناتالي: انا كيف يعرف..يمكن يسأل ماما..تعال تعال انا شوف طريق في حد ولا لاء..؟
ذياب: زين منج فايده..
وسارت البشكاره تشوف الصاله..واشرت له ان محد وعلى طول طلع فوق بسرعه لان ابوه يرقد تحت...واول ما وصل باب حجرته وبطلها...شاف ثلاثه رقود فيها..بطي ويوسف وبدر.
ذياب وايده على راسه" يالوهقه..عيل شموس اختيه يت وشيكت البارحه على عيالها واكيد بتقول اني ما رديت للفير...يا ربي شو اسوي."
ويلس في الحجره يفكر ويفكر...انه لازم ما يكون راقد في الحجره هذي..واحسن شي يفكر انه يرقد برا هالفله بس كيف..؟
"اووه كيف ما يت على بالي...هذي احسن فكره والله.."
وصك ذياب الباب وسار على طول وهو نازل على الدري سمع حد يرمس...
بو خليفه: جينا...جينا...
جينا: نعم بابا...
بو خليفه: ذياب رد من برا ولا بعده...
ذياب مات من الزيغه وقبض قلبه..وما عرف شو يسوي.."متى نش هذا..؟خلاص انكشفت انا شو دخلني هني يا ربييه شو هالمصيبه من الصبح.."
جينا: ما يعرف بابا بس باب الصاله من امس بند...يمكن هو في حجره فوق...
بو خليفه: وين اروم اطلع له الحين ..انا يالله يالله امشي..لو طلعت فوق اموت..بس بيلس له هني في الصاله...
ذياب" والله هاللي ناقص بعد"
ورد ذياب فوق...وسمع صوت حجرة تتبطل...وعرف انها شمسه وقبل يربع صوب حجرته...
سلمى بنبره حاده: وين شارد.؟
ذياب بعد ما طاح قلبه من الزيغه: الله يخسج موتيني من الرعب..تحريتج ام سعود..
سلمى: خس الله ويهك جي ترمس اختك اللي اكبر عنك...وين كنت ومتى ييت..الحين بنزل لابويه ارمسه...
ذياب: سلامي الله يخليج ابويه يالس في الصاله يترياني..حرام ساعديني ابى اظهر...
سلمى: وين بتروح..؟
ذياب: بسير انخمد في الميلس..جني راقد من البارحه وجي ما بيحس..
سلمى: اسفه ما اقص على ابويه...
ذياب: سلامي بس عاد..اوكي لا ترمسين ولا تقولين انج شفتيني ما في داعي تكذبين من الاساس..
سلمى نزلت وطنشته...ووقف على راس الدرج...وسمعها تسلم على ابوها اللي ينشدها عن ريلها وهي قالت له انه بييها اليوم...
سلمى: ابويه تعال نتريق في الحديقه...
بو خليفه: لا بنتي انا ما ريد باب الصاله يتبطل ما ادري به خوج وين يسير ما رد بعده للحين...
سلمى: ابويه خلك منه ذياب اكيد راقد في الميلس..
ذياب من فوق" فديتج سلامي والله انج اختي السنعه..."
بو خليفه: انا مب ناش من هني..اعرفه ذياب ما يداني يرقد على الارض...ومستحيل يرقد في غير حجرته...
ذياب يرمس روحه" احلف انت بس هاللي ناقص..انا مستعد ارقد على جمر بس انت اطلع من الصاله"
ويلس يفكر شو يسوي وكيف يطلع من الصاله واخر شي يته فكره..وطلع وكمل طريجه لين فوق ووصل باب السطح...وفتحه..ويلس فوق يفكر كيف ينزل وشاف سلم من السطح لين نص الفله مثبت في كل البيوت اللي لها هالديزاين.....وعقب نزل من فوقه...لين تحت..ويوم وصل صوب الدرايش تقبض فيهن ومسك عمود الماي وتزحلق عليه ونط الارض...وانطرت كندورته من تحت لين ركبته...وتخيست تراب وماي...
ذياب وبصوت عالي: عشت يا راعي المغامرات والله هوليوود لازم تعتبرني احد المغامرين بدون حبكه ولا خرابيط واكشن على الهوا وصدج بعد...
ونزل راسه يشوف كندورته وسولف لعمره"نفاد بدل الوحده عشر..بس وين ادسها من هالبشاكير الملاسين"
وسار يربع لين ما وصل الميلس...وشاف سعود راقد لروحه هناك..وسحب عنه اللحاف وتلحف وجلب وحده من مخدات الميلس ورقد على طول...
.
.
تعب بو خليفه من كثر ما يتريا..وبطل باب الصاله..وهو نازل الدري شاف نعال ذياب وانصدم كيف دخل والباب مبند..بعدين حس انه ظلمه وانه اكيد راقد فوق....
وسار ويلس في الحديقه ..وشوي نش بدر ويوسف وساروا عند يدهم في حديقة البيت....وسلموا عليه...
بو خليفه: حيا الله الرياييل...
بدر: الله يحييك يدي مبارك..
يوسف: ما شاء الله جو بوظبي هاليومين يفتح النفس...
بو خليفه يضحك: احسن من حرها...الا اقول يوسف خالك ذياب رقد عندكم ولا لاء...
يوسف ارتبك وتذكر ان خاله ذياب موصنه هو وبطي...
بدر: لا ما رقد ويانا...
يوسف" يالوهقه"
بو خليفه: زين ولدي قم بارك الله فيك شوف اذا راقد بالميلس ولا لاء...؟
بدر: ان شاء الله يدي...
وسار بدر الميلس ويوسف حس عمره مرتبك وايد...بس يلس يسولف ويا يده..لين ما ياهم بدر...
بو خليفه: هاه ولدي ؟
بدر: راقد في الميلس الصغير اللي ورا صالة الطعام مال الرياييل هو وسعود خويه...
بو خليفه بضيج: الهرم يتحراني ما بعرف سواد ويهه...
يوسف يرقع الموضوع: يمكن انه يا ولقى الباب مبند..
بو خليفه: انا قافل الباب الساعه ثنتين الا شي..وكل خالاتك رقدن بس ما عليه ان شاء الله انا بشوف لي صرفه ويا هالولد...
ويلس بدر يسولف ويا يده هو ويوسف ويتهم سلمى ويابت الريوق ويلست وياهم وتريقوا..
....................
الساعه 10:00 الصبح الموبايل يدق..ويدق بس محد يرد..يسكت ويرد يدق مره ثانيه...يتحرك من مكانه..وينجلب على الجهه الثانيه..ويعصب فجأة
"شو هالحاله محد يعرف يرقد في هالبيت.."
شل التلفون وتم يتحسسه..واغلقه على طول بدون ما يشوف من اللي يتصل...بس ما حط راسه الا وتلفون الحجره يدق..ونش معصب من مكانه..
شل السماعه وبكل غضب الكون اللي متيمع في نبرة صوته..
حمد: خير في شي ..ما تحسون الساعه 10 الصبح ما تعرفون تخلون الناس ترقد..؟
اليازيه:مب منك يا حمد من اللي تدق لك ..هذا ويهي ان شفت رقمي مره ثانيه..
حمد ارتبك وما عرف ويمع كلامه: يزوي سوري فديتج والله مب راقد عدل تحريته حد مغلط...
اليازيه: وليش منو بيدق لك غيري..؟ محد قريب منك الا انا بتدق لك في الوقت اللي تبى...
حمد وهو تعبان موت يلس على طرف الشبريه: زين غناتي ما شاء الله ناشه من وقت...
اليازيه بدلع: هيه بس حبيت اقولك ان اهلي اليوم سايرين العين..كلهم ومحد بيتم الا انا..
حمد مبتسم: ويعني...؟
اليازيه: حموود بس عاد ما يليق عليك الاستهبال...
حمد يضحك: فديت روحج حبيبتي..زين متى امرج...؟
اليازيه: بسوي لك مس كول يوم اكون جاهزه...
حمد: اوكي ..
اليازيه: عيل حبيبي كمل رقادك و خلاف ارمسك...
حمد وارتاحت نفسيته انه بيبند: زين حياتي الله وياج...
اليازيه: بباي...
وبند عنها حمد وسحب واير التلفون...
" مأذيتني هذي شو تبى..هالبنات محد يسوي لهن سالفه..والله انهن يابن لي المرض متى القى لي وحده افهمها وتفهمني.."
وانسدح بكل برود ورقد يتريا اليازيه الليله..
................

انتظرو الجزء الخامس من الاخ البدوي الحبوب ...

اختكم
الغلا

[الرايقه]

صدق ما تستحي هالاليازيه ههههههههههههه بنات اخر زمن
هالاجزاااء ولا بلاش هيه نبا كل الاجزاء طويله جذه (( الله يالطماعه ))
تسلمين الغلا ونترياااك يالبدوي الحبوب ,,,

[البدوي الحبوب]

تسلمون على مروركم وتواصلكم الجميل

ولكم هالجزء مني

تحياتي للجميع

[البدوي الحبوب]

الحلقه الخامسه
الجزء الاول


الساعه 10:30 الصبح يت سلامه بيت يدتها غاليه وكان وياها كم كتاب ودفتر..ودخلت الصاله وشافت شيخه منسدحه جدام التلفزيون وتشوف الفيديو وكانوا حاطين لها (شركة المرعبين المحدوده) ومحد كان في الصاله الا هي....يت سلامه وحطت كتبها على الطاوله وابتسمت بلعانه..وسارت وقفت جدام التلفزيون..وتمت شيخه تلف يمين ويسار عشان تشوف وسلامه تغايضها عشان ما تخليها تشوف التلفزيون...
شيخه: قومي قومي طفثه...
سلامه تضحك: انتي طفسه...
شيخه: ماليد وثعي وثعي..يالله..
سلامه ببرود: مابا اوسع كيفي...
وبندت سلامه التلفزيون..
وصاحت شيخه وتمت تضرب بريولها على الارض..وتصارخ..وتتجلب يمين ويسار..
شيخه: ماليد ماليد...ابى مالد وثوثني..ثلامه طفثه..خاثه..
سلامه تضحك على رمستها: انتي خايسه وطفسه..
يت شرملى بسرعه من الحوي يوم سمعت شيخه تصيح وشافت سلامه وعصبت..
شرملى بعصبيه: شو هدا انتي شو سوي...؟
سلامه: مالج خص..
شرملى وهي تشل شيخه: انتي مافي مخ بنت كبير سوي مشكله ويا بيبي صغير..عوز بالله منج..
سلامه: يالهرمه عوذ بالله منج انتي..يا ويه ابليس..
شرملى وهي معصبه: انا خبر بابا راشد...
سلامه بثقه: خبري..من درا عنج انتي وبابا راشد..
شرملى تمت تتحرطم: بنت مافي ادب..
وشيخه بعدها تصيح وما سكتت وتسحب شعر الخدامه..لين ما هدتها..ويلست على الارض...وتصارخ..
شيخه:مالد وثوثني...اليد مالد وثوثني...
سلامه تصارخ: بس سكتي ابى ادرس....
شرملى: روحي بيتكم شو يريد يقعد هني..
سلامه: بيتج هو يا مسودة الويه..؟
ودخلت ام راشد من باب الصاله لابسه عباتها يايه من بيت جيرانهم...
ام راشد: شو هالحشره اصواتكن واصله باب الشارع..
سلامه: امي غاليه شوفي هالشرملى مالتكم تسبني..
شرملى: كدابه ماما والله هي يضرب شيخه...
سلامه تشهق: يالجذابه ضربتها؟؟
ام راشد: بسم الله منكن.شو مستوي عليكن..؟
شيخه طوف الصاله بتتكسر من حسها وهي تصارخ من الخاطر...وشوي وتيي ليلى على صوتها من فوق...وتنزل مريم وايمان وامل..
ليلى بسرعه رايحه صوب شيخه: حياتي شو فيج حبيبتي ليش تصيحين؟
وشلتها ولوت عليها..وتقبضت فيها شيخه بقو...وتمت تصيح من خاطرها...
شيخه: مالد وثوثني...
ايمان: شو تقول..؟
ليلى: منو مبند التلفزيون عنها...؟
سلامه: شرملى..
ويلست على الكنبه وحطت ريل على ريل..وفتحت كتابها ويلست تلعب بشعرها...
ليلى: شويخ منو مبند عنج الرسوم..؟
شيخه وهي تشهق من كثر ما صاحت وتأشر على سلامه وماده بوزها شبرين: طفثه هذي..
ليلى:سلامه كم مره قلت لج لا تأذينها ما تستحين انتي حاطه راسج براس وحده ياهل ما تفهم شي...
سلامه: ما يخصني هي معليه صوت التلفزيون على الاخير...ما خلتني ادرس...
ليلى بعصبيه: خلصن الحجر ما شي الا الصاله تدرسين فيها..وبعدين من فلاحتج ولا درجاتج اللي تبيض الويه..
كانت ليلى ترمس جدام بنات مبارك وامها...وما حست بعمرها الا وقالت هالكلام...
سلامه نشت من مكانها وهي معصبه ما توقعت عمتها ابد بتقول هالكلام وفرت الكتاب تحت وتمت تطالعها وما نزلت عيونها من عيون ليلى وانترسن عيون سلامه بالدموع حست ان كبرياءها انطعن...وطلعت برا سايره صوب فلتهم على طول...
احترم الكل صمت ليلى..وسحبت مريم خواتها وطلعن فوق...وام راشد يلست حذالها ...حتى شيخه يوم شافت ليلى معصبه سكتت وشرملى طلعت برا الصاله...
كانت ليلى ساكته ما عرفت شو تسوي ولا شو تقول...وفكرت كيف سوت جي وبينها وبين نفسها بصمت..
" حبيبتي يا سلامه فديت روحج والله عورني قلبي بس كل شي ولا شيخه عاد"
ام راشد: بنتي هوني على عمرج هذيل يهال لازم يستوي بينهم جي..
ليلى: عادي امايا ما صار الا كل خير...
ونشت ام راشد سايره صوب حجرتها...
شيخه يلست تطالع ليلى وتنقل نظراتها بينها وبين كل شي في الصاله...يلست ليلى على الكنبه..وسندت راسها وتنهدت من القلب..وشيخه يلست على الارض وتمت ترسم بايدها على الارض وتخربش صور من خيالها..ورفعت راسها تطالع ليلى بس انتبهت انها ما تطالعها ويلست تتحرك تبى تلفت نظر ليلى بأي شي...بس كانت ليلى غرقانه في افكارها...
نشت شيخه من مكانها وحاولت بصعوبه انها تطلع على الكنبه وما قدرت..وتمت تستجدي ليلى بنظراتها انها ترفعها بس ليلى كانت مطنشه وما اهتمت من كثر ما هي ضايجه....
واخيراً..قدرت شيخه تطلع ووقفت على الكنبه..ويلست على ريول ليلى وبكل هدوء لوت عليها وحطت راسها في رقبة ليلى...
شيخه : حبيتي انتي..(حبيبتي انتي)...
وحطت شفايفها على خد ليلى ورصت بقو عليها وحبتها من الخاطر ووسعت عنها شوي..
شيخه بعد ما باست ليلى بقوه: ااححححح ..قوه..(كانت تقصد بوسه قويه)..
ابتسمت ليلى رغم كل الضيج اللي فيها..ولوت على شيخه...وباستها على خدها...
شيخه رفعت راسها بعد ما تأكدت ان عمتها هدت...
شيخه مبتسمه: مالد وثوثني...
ونشت ليلى وشغلت الفيديو..وحطته لها...وسارت عنها...
شيخه: يلثي ثوفي مالد وثوثني...
ليلى: لا غناتي انا بروح انتي شوفي مارد وشوشني لروحج انا برد بعد شوي..
شيخه وهي تسوي عمرها مؤدبه: ذين..
................
نشت حصه الساعه 11:20 وبطلت الباب..وقبل تنزل شافت باب حجرة ذياب مبطل وطلت براسها وشافت بطي يالس عدال يوسف ويرمسون بصوت واطي..وبدر عندهم بس بعيد شوي يالس على الكمبيوتر...ودخلت..ونشوا يسلمون عليها لانهم ما شافوها من يوم وصلوا..
حصه: شو تسوون هني ليش ما تنزلون..؟
بطي بتردد: ماريد انزل...
يوسف: محد في الصاله الاحريم وبنات..
بدر بعد ما رد للكمبيوتر ومعطنهم ظهره: ما يبون يشوفون امايه مسودين الويه..
حصه مبتسمه: ليش شو مسويين..؟
تنهد يوسف من قهره من اخوه بدر الملسون...
بطي: خالوه..بخبرج شي عن خالي حمد...
انتفضت حصه وحست شي بجسمها ..وشعرها كله وقف...
يوسف: ريال خربان..
حصه ما ردت بس مبطله عيونها وبينها وبين نفسها" يعني محد الا انا تقولون لي هالرمسه"
وخبرها بطي كل السالفه...
حصه بضيج: زين يوم انزل برمس شموس انا... خلكم عادي...طنشوا حمد ولد عمي دومه جي ما يداني حد..
وطلعت حصه من الحجره وهي متضيجه..ونزلت تحت وشافت ميره يالسه ويا سمر...حصه اول ما شافت سمر ابتسمت ابتسامه خبيثه...واول ما شافت سمر حصه طالعتها بنظره حاده...
حصه مبتسمه: يمدحونهم اللاجئين من حجره لحجره...
سلمى: شف عوذ بالله منج...ليش تتحرشين فيها وهي ساكته..؟
حصه:متفيجه ما عندي شغله...
سمر ساكته ما تقدر ترمس بعدها ما نست هزبة ابوها البارحه...
حصه: تريقتوا؟
سلمى: انا تريقت ويا ابويه وبطاي ويوسف وبدر...بس الباقين مادري..
حصه: وين شموس ونوره وبدريه؟
سلمى: بدريه بعدها راقده ونوره وشمسه مسيرات على خالتي فاطمه ما تروم تيي تسلم على شموس فيها روماتيزم وقالت امي نحن بنسير لها...
حصه: زين خلاص انا ابى اتريق..
سلمى تأشر على المطبخ : هناك الدرب سيري تدلينه بيتكم ما يحتاي...
حصه: سمر..
سمر رفعت راسها وتمت تطالعها بغضب:شو تبين.؟
حصه: دخيلج روحي قولي حق جينا تسوي لي ريوق ما فيني اسير لين هناك...
سمر: ماريد..
حصه: حرام سمر اول مره اطلب منج شي...
سمر: ليش طردتيني امس..ابويه هزبني في الليل..
حصه وهي تبى تمسك عمرها لا تضحك: خلاص حقج علي والله باجر بييب لج شي حلو وياي من الدوام..
سمر متأففه بعد ما لعبت حصه بعقلها شوي: زين بسير يالله ميره نروح...
وطلعن..
سلمى: يا ويلج من الله شو تسوين فيها..؟
حصه: كيفي محد عندي افرغ شحنات غضبي فيه الا هي...
سلمى: ما عليه يايينج الدور..
حصه: من منو...؟
سلمى: ما في شي يصعب على الله..
سكتت حصه ويلست على الكنبه وبطلت شعرها القصير الاسود وطاح على كتوفها وتمت تحرك راسها يمين ويسار بدلع...
حصه: سلامي حلوه انا؟
سلمى: مب اكثر عني..
حصه: زين حلوه ولا لاء؟
سلمى: يعني مب وايد...
حصه: عادي اتقبل غيرتج القاتله ما لومج...
تضحك سلمى...وتدخل ام خليفه ونوره وشمسه....وسلمن ويلسن...
شمسه وهي تيلس على الكنبه: اااخ يا ريولي والله تكسرن...
نوره: اااه يا عظامي والله بغيت اموت...قلت لج امايه بنسير بسياره بس الله يهداج ما طعتي..
ام خليفه: شو من حرمات انتن..العيازه في عظامكن ما فيكن شده تسون شي...مشيتن خطوتين وهلكتن عيل لا قلت لكن بنسير نمشي في الفريج بالليل شو بتسون..؟
شمسه: امايا انا كبرت عوده خلاص عيزت ما تحمل أي مجهود...
نوره: لا لا انا ما عيزت بس تعبانه هاليومين...
سلمى:الحين تبن سياره لين بيت خالوه فاطمه..؟ من بعده هو؟
شمسه: ما تشوفين ريولي والله بغن يتفطرن من التعب...
ودق تلفون حصه وقامت من عندهن وسارت الحديقه ويسلت ترمس...
حصه: هلا والله شو هالصباح المنور...من وين الشمس طالعه اليوم.؟
ليلى: فديت روحج من مكانها اللي كل يوم...
حصه: شحالج اليوم.؟
ليلى: بخير وانتي شو النفسيه اليوم ان شاء الله احسن..؟
حصه: حد يسمع هالحس ويتعب مستحيل...
ليلى: اقولج باي..
حصه: لا لا تعالي وين تبين مب الحين تنتحرين..
ليلى: خلاص حفظتي المنهج...؟
حصه: اكيد ما يبا له شي..حتى حمدوه قامت تطبق عملي...
ليلى مبتسمه:ولهت على ناصر...
حصه مبتسمه: يا ربييه على هالناصر اللي قالب لج الحياة فوق تحت...
ليلى: شسوي الله بلاني في حبه..
حصه: باجر بتشوفينه...
ليلى: وايد مستعيله ما داني هالويكند...
حصه: ما يستاهل محبتج..ما يسوي أي خطوات ايجابيه...
ليلى: ما طلبت رايج..يعني هو بكيفي احب ولا ما احب..
حصه: محد يروم لج ...شو سويتي اليوم؟؟
ليلى: حصه ابى اقول لج شي..
حصه: قولي فديتج...
ليلى: اليوم زعلت سلامي وجرحتها جدام بنات مبارك...
حصه ببرود: وخير يا طير..ياما هزبنا حمدوه وعفاري ولا سمر اختي في وجه المدفع اربع وعشرين ساعه...
ليلى: انا مب متعوده ازعل حد من عيال اخواني...
حصه: برايها هي بترضى وبعدين سلامي ويهها لوح ما تحس روحها ولاديه وتستاهل اللي ييها..
ليلى: حرام عليج والله انها ملكة جمال شو تقولين واحساس وانوثه بس شخصيتها وايد قويه...
حصه: زين برايها اذا ما رضت راضيها...عطيني شواخي برمسها...
ليلى: تشوف التلفزيون...
حصه: ازقريها...
وزقرت ليلى شيخه ويت تركض للتلفون...
شيخه: الوه...
حصه: ياااااااااي فديت حسج يا عمري...
شيخه: ........
حصه: شواخي..
شيخه:هاه..
حصه: تحبيني..؟
شيخه:لاء...
حصه: افا يا دبه...زين شو تشوفين في التلفزيون....
شيخه بفرح وتزاعج بصوت عالي: تأااالي ثوفي مالد وثوثني...
حصه تضحك: فديت روحج....
وخذت ليلى التلفون وسارت شيخه...
ليلى: شبعتي..؟
حصه:فديت روحها والله خبلت بي...عطيني اياها ليلوه..
ليلى: هاللي ناقص انتي حد يعطيج يهال عشان تجتلينها يا متوحشه...
حصه: حرام عليج ....ما حبج..
ليلى: احسن...
حصه: وشو بعد...يالله متى بيي باجر ابى اداوم...
ليلى: مادري بس حصوه ابى دفاتري ومذكراتي من عندج...
حصه: بالمشمش ...يوم تردين صوري مال الابتدائيه بردهن لج...
ليلى: يا هالصور..ما بردهن..عندج صور مثلهن حق شو تبين مالي انا...؟
حصه: كيفي مااداني شكلي يوم كنت في الابتدائيه واريد اقضي على كل الصور..
ليلى تضحك: اوكي بعطيج الصور وقطعيهن بس كيف بتقطعين باقي الصور اللي عند البنات...؟

حصه: مابا كيفي خلها عندهن اهم شي انتي ما ريدها عندج..
ليلى: عيل موتي والله ما تاخذينهن...
حصه: سخيفه..
ليلى: طالعه عليج..
حصه: زين ابى صور شواخي..
ليلى: اوكي بصورها وبعطيج..
حصه مبتسمه: فديتج والله..زين يا ويهج بسير لخواتي فضيحه يالسات لرواحهن وبيسيرن اليوم بيلس عندهن شوي خصوصا اخت نوره محد بيشوفها لين عقب رمضان..
ليلى تضحك: اوكي غناتي الله وياج..سلمي عليهن..
حصه:يبلغ فديتج..
................
الساعه12:00 سلامه في حجرتها شابه ضو ومعصبه وفيها قهر ما عرفت شو تسوي وفتحت الكبت وطلعت كل ملابسها وعقتهن على الارض..وخربت كل شي وطيرت الاوراق على الارض وعقت كتبها من فوق المكتب ولوت على مخدتها وصاحت..ما عرفت من قهرها شو تسوي ..ليش عمتها رمستها جي جدام بنات عمها مبارك وهي ما تدانيهن مول؟ ..كيف تجرح احساسها عشان ياهل صغيره ما تفهم شي..؟كيف تسمح عمتها لنفسها تخلي مريم والباقين يسكتون من الفشله يوم جي رمستها؟ زين هي مب شاطره وتدري بهالشي ليش عمتها تعايرها وتغايضها فيه؟
لاول مره سلامه تتقبل شي بحساسيه وطول عمرها قويه وما ترضى الا وترد الا يوم تكون ليلى في السالفه تسكت تستكثر منها كل شي مب متعوده منها غير البزا والحب الزايد...
وهناك في فلة ناصر ابو راشد...ليلى يالسه في الصاله وعقب ما بندت من عند حصه...سارت وشلت شيخه وبندت التلفزيون...
شيخه وليلى شالتنها: وين نلوح؟
ليلى وهي تحاول تغير الموضوع: بنلعب...
شيخه بفرح:عند وحث؟
ليلى:لاء ..
وبينها وبين نفسها" الله يعيني على حشرتج الحين لو تدرين وين بنروح؟؟"
وطلعت ليلى فوق ودخلت حجرتها ويلست شيخه على الشبريه وكانت شيخه تسمع صوت شي مشوش في الحجره وسارت صوب الحمام..وشافت الماي مفتوح في البانيو وينترس ماي...وردت بسرعه وشكلها متغير..
شيخه: ماي ماي من ثوي تش...؟
ليلى وهي تفتح كبت شيخه وتطلع لها لبس: خليه بنروح نتسبح..
هني الصاعقه حلت على راس شيخه اللي عرفت انها بتسوي الشي اللي ما تطيقه وشردت في الحجره وتمت تصيح ..
شيخه: ماليد اثبح ماليد..
ودخلت في كبت ليلى ونها بتنخش..وهي تصيح...
ليلى وهي تضحك: الحين محد قالج شي..اندسي في الكبت ومحد بيشوفج بس ليش تصيحين داخل ؟ جني ما بعرف انج هني..؟
فتحت شيخه الكبت ونظراتها تستجدي ليلى:مابا مابا...
ويت لها ليلى وشلتها وهي تمت تصيح وعرفت ليلى انها بتبدا مناحه يديده فيلستها على الشبريه قبل تشل ملابسها..
ليلى: ليش حياتي الماي حلو ليش تخافين؟
شيخه وهي تلوي على ليلى بقوه: ماليد ماليد ثبح...
ليلى: زين شواخي انتي حلوه وشعرج حلو وويهج حلو شوفي هالثوب اليديد انا اشتريته حقج..حلو حياتي...
ويلست ليلى تأشر على ثوب شيخه اللي هي لابستنه: شوفي هذا يع مب حلو وريحته مب حلوه..يالله عشان سلامي ما تضحك عليج بنروح نتسبح ونلبس ثياب حلوه وبنروح عند الوحث...
شيخه اللي سكتت: بنلوح عند وحث..؟
ليلى مبتسمه: هيه بنلوح عند وحث....
شيخه: انتي مالوحين..؟
ليلى: بلى بروح وياج..يالله حبيبتي تعالي بشل ثيابج عشان اسبحج...
وشلت ليلى ثيابها وودتها البانيو ويلستها فيه ويوم صبت الماي على راسها ...
شيخه بخوف: ما ثوي ثابون...؟
ليلى: لا حياتي ما بسوي صابون انتي بس يلسي...
وسبحتها عقب طلعتها ويابت لها عيش ابيض وروب واكلتها وعلى طول رقدتها....وصلت صلاة الظهر..وصكت الباب ونزلت تحت....
..........
حمدان لبس هو عمر وعمهم مبارك وساروا الحوش يشغل مبارك الموتر وشاف راشد ياي من بعيد...
مبارك: يالله يا بو حمدان اتأخرنا...
راشد: ياي انا خلاص..
وركبوا الموتر وساروا المسيد عشان يلحقون على صلاة الجمعه....
وفي البيت كانت خلود هي وشمسه اللي يسون الغدا وما خلن البشاكير يدقن شي...وام راشد سارت تصلي الظهر..محد تم الا ليلى هي و بنات مبارك اللي يالسات في الصاله يشوفن التلفزيون....
مريم: عمتي انا بسير اصلي في حجرتج...
امل: وانا...
ليلى: زين بس تحملن تنش شيخه توني رقدتها....
مريم: ان شاء الله عمووه..
ايمان: انا ابى شيلة صلاه نظيفه..
ليلى وهي تطالعها بطرف عينها: وليش اخت ايمان حد قالج ان نحن نصلي في شيل نجسه لا سمح الله...
ضحكت مريم وطلعت فوق هي وامل..
ايمان: ما قلت بس ابى شي نظيف..
ليلى: المشكله انج راده دبي اليوم ولا جان عرفت كيف تشوفين الشيل النظيفه...سيري حجرة عويش ورا الباب شيل الصاله تنقي انظف وحده والبسيها...
ايمان: زين
وسارت عنها وليلى طلعت سايره صوب فلة راشد وشلت كتب سلامه اللي خلتها في البيت...اول ما دخلت لقت البيت مظلم وشغلت الليتات وكانت ريحة البيت تجنن...
" ما شاء الله عليج يا حرمة اخويه كامله في كل شي بس عيبج هالعيال ما تنشدين عنهم"...
طلعت فوق ومرت الصاله وشافت حجرة حمدان مبطله ودقت ودخلت بس محد كان فيها وعرفت انه راح يصلي..طلعت وسارت حجرة سلامه وعرفت اكيد انها مبنده...بس يوم جربت تفتح الباب تبطل وكانت الحجره مثلجه ...بس مزبله من الاغراض اللي فيها..وشافت ليلى شكل الحجره وانصدمت مهما كان سلامه نظيفه ومرتبه عمرها ما سوت جي...
ليلى في خاطرها"الظاهر انها فرغت غضبها في اغراضها"
سارت ويلست على الشبريه وشلت لحافها وكانت سلامه شبه غافيه...ونشت اول ما سحبت عمتها اللحاف...
ليلى مبتسمه وبكل حنان: حبيبتي...
سلامه اول ما شافتها صدت وردت تتلحف...
ليلى قلبها عورها: سلامي غناتي...
وشلت اللحاف وحبتها على خدها...هني سلامه ما قدرت تتحمل ويلست تصيح...وليلى حست عمرها ميته ما قدرت تتحمل...تشوف شيخه وعيال اخوها راشد كل شي بحياتها ولا تحب حد يهزهم ابد..وقوتهم وثقتهم في انفسهم كلها مستمدينها منها...ومن طريقة تعاملها معاهم...
ليلى: سلامي ما اباج تحطين راسج براس شيخه..تعرفين انها ما تهون علي..واني بزعل حتى امايا عشانها...
وانا اسفه على اللي قلته بس صدج كنت معصبه من خاطري...قومي غناتي والله ما تهونين علي فديت روحج..والله اذا ما نشيتي ما برد البيت برقد هني...
ما نشت سلامه وكانت متضيجه صدق...عقب قامت ليلى تعدل الحجره وترتب اوراقها وملفاتها وتدخل الملابس في الكبت..وفي هالوقت سلامه سارت الحمام وغسلت ويهها...ويلست تطالع كتابها...ويت ليلى ويلست عدالها على الشبريه ولوت عليها...
ليلى: سلامي سوري بس عاد ما يسوى عليج..اول مره نزعل من بعض..
سلامه: مب زعلانه بس قهرتني نظرات مريم وخواتها...
ليلى: ما عليج منهم شو يسوون فيج..انتي محد يروم يوصل لج...
ابتسمت سلامه...ولوت على عمتها...
سلامه: عمتي حبيبتي والله صدج خفت اني ما رمسج مول..
ليلى وهي تمسح على شعرها: بكفيج هو..؟ اذا تستغنين عني انا مالي غنى عنج...بعدين منو بيتدلع علي..؟
سلامه وهي بعدها في حضنها: شيخه الخايسه..
ليلى: تحطين عقلج بعقل يتيمه..
سلامه سكتت وردت ترمس : مبزايه وايد...
ليلى تضحك: مشكله اللي ما يشوفون عمارهم...
ويلست تسولف لها سلامه وتخبرها عن المدرسه وليلى يلست تراجع لها دروسها وتحل واجباتها وياها...لين ما وصل حمدان وغير ثيابه ..ومر عليهن...
حمدان: عمتي هني ولا تمر علي والله زعلت...
ليلى: لحوول شو فيكم اليوم..جنه يوم الزعل العالمي...
حمدان: زين يالمبزايه قومي...
سلامه وهي حاطه راسها على ريول ليلى: مابا كيفي...
ليلى مبتسمه: وين راشد.؟
حمدان :دخل يغير يالله بنسير بيت امي غاليه اكيد حطوا الغدا...
ليلى: يالله سلامي فديتج..
ونشت ليلى وسلامه وسارن مع حمدان بيت ام راشد...
................
الساعه 1:30 حطوا الغدا في بيت مبارك بو خليفه...ويلسوا الكل يعني عيال مبارك كلهم الاولاد والبنات وحريم العيال وكانت لمه ولا اروع...
وكانت عفرا وبدريه يحطن الاكل على السفره...ويوم خلصن سارت عفرا داخل المطبخ بتييب شي.. وبدريه يلست عدال عبدالله..
عبدالله يهمس لبدريه: فديت ايدينج اللي يابن هالاكل..
بدريه مستحيه: مسود الويه نحن مب لرواحنا...
عبدالله يهمس: زين حبيبتي كيفي ادلعها شو اللي حارنهم..؟
بدريه: حرام لازم نراعي مشاعر ناس..
عبدالله قبل يضحك: وحليلها سلامي اختي بتنفجر من حامد..
بدريه:هيه والله...
سلمى وهي تطالع بدريه ومبتسمه مع انها ما سمعت شي: بدريه حبيبتي كلي قبل يبرد الاكل ولاحقه على ريلج..
عبدالله ما قدر يمسك عمره وانفجر ضحك: ما قلت لج يا بدور والله انها ساس البلى..مب سهله يالسه تسمع وتراقب...
سلمى: يا سلام يعني حشيتوا فيني...
وتموا يسولفون بس لاحظوا ان خليفه ما كان ياكل...
ام خليفه: ولدي خليفه بلاك ما تاكل...؟
خليفه: ما يهنى لي اكل بدون عفاري بنتي..
حمده: احم احم...
ويت عفرا...
خليفه يوسع لها شوي:عفاري تعالي عند ابوج يا حبيبته...
عفاري ابتسمت لابوها: علني افدا روحك...
ويلست حذاله...
حمده: والله يمدحونهم بنات البطه السودا وايد سمعت عنهن...
يضحكون...بس محد انتبه ان بو خليفه متضيج ومعصب..وشمسه مب في المود العدل...وكانوا مشغولين بالسوالف...
كان سعود طول الوقت يطالع عفرا..بس ما سوت له سالفه وكانت كل ما رفعت راسها شافت عينه في عينها ..وكانت تلف عنه بكل برود..ويوم شافته مصخها وكل شوي يطالع..عطته نظره من الخاطر خلته ينزل راسه...
سلمى: ولهت على دبي..
بدريه ضحكت..
عبدالله: يمدحونها الشرده انصاص الليالي..
سلمى : اسكت الله يخليك..
ساره تطالع بدريه وتبتسم...
حمده: اقول تعرفون ان باقي على الامتحانات النهائيه شهر و اسبوعين...
حصه مبتسمه: لا تنسين الكريمه فوق الكيك..
حمده تضحك: ودج اني ارسب حلمكم كلكم..
عبدالله: ودي افهم كيف هالبنت ترسب طول السنه وتنجح اخرها...
نوره: اخوي خليفه ليكون بس عندك واسطه بالوزاره..
خليفه: لو عندي جان خليتها شرات اختها اولى على المنطقه..
حمده: هذا سر المهنه..اصلا انا اشطر عن عفاري بس ما ريد ابين عشان ما يحشروني اغششهم ولا حد يصكني بعين واخلي شغلي المبهر للامتحان النهائي..
يضحكون كلهم عليها..وينفتح باب الصاله ويدخل بدر ويوسف وبطي وخالهم ذياب...
ذياب: السلام عليكم..
كلهم ردوا السلام وابوه خزه بنظره...
ويلسوا يتغدون وبطي يلس يطالع امه اللي في نظرتها الف سؤال وسؤال...
بو خليفه: مسود الويه عقب الغدا تعال حجرتي اباك..
ذياب يستهبل: عبدالله سمعت ابويه شو قال...
عبدالله يطالعه باستغراب: ابويه انا..؟؟
بو خليفه:عارف نفسه..ذياب ودر الشغل الماصخ وين المريله..عنبوك عمرك 20 سنه وبدر اعقل عنك...
يوسف يهمس لبدر: شف يدي يالس يشبه خالي ذياب فيك يعني انت خبل ويقولون انك اللي ما عليك لوم وانك ...
بدر بصوت عالي: يدي انا خبل...؟؟
بو خليفه طالعه: لا ولدي ودي ذياب يستوي شراتك انت ريال وريال عود بعد..وين ييك الخبال..
بدر: يوسف قال...
شمسه طالعت عيالها بنظره غريبه وفي نفسها
" ابويه الحين معصب وانا ناقصه خبال عيالي"
شمسه: بدر ويوسف تغدوا واسكتوا..
وطالعت بطي بنظره...ونزل راسه وكمل غداه..
سمر: ابويه ..
ما رد بو خليفه...ونش من على الغدا وسار حجرته ...
حصه بهمس تضحك: يا سلام على القفطه اللي تشد الويه...
سمر بضيج: خايسه والله...امايه شوفيها...
ام خليفه: بس يا حصه خلي اختج تتغدا..
حصه: شو امايه انا ساكته ما قلت شي هي تفج حرتها فيني عشان ابوي مب مسوي لها سالفه....

سلمى ترمس ذياب: مسود الويه انت من يوم تدش نحن ما نشوف خير..
خليفه: وين راقد البارحه..؟
عبدالله: والله لولا ان امي يالسه جان بالعقال في ظهرك..ابوي روحه تعبان وانت ما يحتاي تغط الراس في التراب..
ذياب نش من مكانه قبل يذوق لقمه وحده وطير صحنه على السفره: اشبعوا بغداكم..
وسار فوق...
ام خليفه: حرام عليكم ما ذاق شي الولد...
خليفه بعصبيه: والله يا امايه لولا حشمتج جان كسرت راسه..
نوره: هالاسلوب بيدمره اكثر وبيخليه يعاند اكثر...
نشت شمسه وعيالها وبناتها وقالت لهم يجهزون اغراضهم عشان ابوهم بيي عقب المغرب ياخذهم...
ونشت نوره عقبها وسلمى وخليفه وساره وبناتها وردوا فلتهم...وام خليفه سارت عند ريلها..وبدريه يلست تساعد الباقين وشلت وياهم السفره هي وحصه ...وسمر سارت حجرتهم..
كان الجو متكهرب في البيت عقب ما دش ذياب اللي مسبب لابوه ازمه..لا يداوم ولا راضي يشتغل وكل اللي في باله ذهب ادراج الرياح عقب ما وصلته نتايج القبول في كلية خليفه بن زايد الجويه..وطبعا ما انقبل ..ومن هاك اليوم والولد منحرف واللي براسه يسويه...وهالشي مسبب لابوه ازمه لانه صدق مب عارف كيف يحكم سيطرته على ذياب ابدا....
..................
في الحجره...يلست سمر على المكتب وفتحت كتابها ويلست تقرا وتراجع دروسها حق باجر..ودخلت حصه الغرفه وانسدحت...ما تعرف شو تسوي..عقب نشت وبطلت الكمبيوتر...ويلست تتسمع اغاني وتتصفح المواقع...
سمر بدت تحل واجباتها ويوم خلصت فتحت كتاب العربي تبى تسمع لعمرها كم شي عشان عندها تسميع باجر...
وبدت تسمع بصوت عالي...
حصه طفرانه وتباها من الله..
حصه: ممكن تقصرين حسج..؟
سمر: عندي تسميع باجر شو اسوي ما احفظ عشانج..؟
حصه: زين طلعي برا ابى اشتغل مب متفيجه لويهج...
سمر: انا ييت قبل..
حصه: اوكي يلسي بس اسكتي..
سمر: ماريد لازم اسمع لروحي..
حصه: ان شاء الله ترسبين...
سمر: ان شاء الله تدعمين باجر..
حصه ونشت من مكانها وسمر شردت تبى تبطل الباب تشرد بس حصه كانت قافلتنه اول ما دخلت بالمفتاح...
سمر وهي تترجاها: خلاص والله اسفه ان شاء الله عبود ولد ييرانا ولا انتي..
حصه وهي تيودها من كتفها : ليش شو ذنبه عبود.؟ ان شاء الله انتي ولا هو...
وفرتها حصه بعيد وعقت كتبها في الممر...وصكت الباب..بس سمر تمت في الحجره..
انسدحت سمر في الحجره عناد علىشبريتها...
سمر: عادي بس ما بطلع...
حصه كانت محترقه ومب عارفه كيف تقتل سمر من القهر...وحطت اغنيه سمر تكرهها وهي اغنية علي عبد الستار "نظرة عينه"...
سمر عشان تقهرها اكثر: الله حصووه علي الصوت وايد احبها..
حصه ونشت مره ثانيه من مكانها وصارخت في ويهها: طلعي برا يا سمر لا تقهريني...
سمر: شو فيج اريد ادرس حشى جني حرمة ابوج مسويه فيني كل هذا...
حصه: زين طلعي يالله..
ونشت سمر من مكانها وشلت كم كتاب وياها وطلعت من الحجره وسارت الصاله اللي فوق عشان تدرس..
...............
الساعه 3:15 كانت ام راشد في الصاله مع شمسه حرمة ولدها مبارك وهم خلاص جاهزين بيروحون...
ام راشد: الله الله بنفسج يا بنتي وبعيالج وريلج..
شمسه متبسمه: ان شاء الله عمتي فديت روحج...
مبارك: يالله تأخرنا...
ليلى: والله يا مبارك يا خوي محد يطلع وقت القايله الا انتوا جان صبرتوا للعصر..
مبارك: لا ليلى لازم نظهر الحين عشان نوصل بدري اليهال وراهم مدارس وانا وراي دوام وكم شغله يبا لي اخلصها في البيت..
شمسه: هيه غناتي والله البيت طلعنا وهو معتفس والبشاكير ما يندرى بهن ينظفن ولا لاء...
قربوا العيال يسلمون على يدتهم ويحبونها على راسها...
ام راشد: الله الله بالمدارس علني فداكم...
مريم: لا توصين يدووه ان شاء الله كل شي بيكون مثل ما تبين...
سلامه كانت يالسه في الصاله...وام حمدان كانت يايه من عند المطبخ...وياييبه شي وياها مغطى عدل...
خلود: شمسه خذي هالكيك لليهال يتسلون فيه في الدرب...توني مسوتنه...
شمسه مستحيه: تسلم ايدج يا ام حمدان ما قصرتي علني فداج والله...
مبارك: مشكوره يا ام حمدان...
مريم سارت تحب عمتها ام حمدان: مشكوره عمتي...
خلود: قليل من قدركم..
يت امل ولوت على ليلى...
امل: عمووتي بتوله على بوظبي...
ليلى: خلصوا المدرسه وتعالوا وبتشبعون منها....
ايمان: لا لا عقب المدرسه نبى نسافر عشان في وايد اشياء بتفوتنا برا لو ما سافرنا...
ليلى وهي تطالعها باستغراب: خاطري اعرف هالبنت طالعه على منو..لا امها ولا ابوها جي..
مبارك: والله محد مطلع لي قرون غيرها....
شمسه: يوم انها مفتهمه بكل شي مب عايبتنكم..
ايمان: مب مشكله امايا الغيره تسوي اكثر عن جذي...
ضحكوا كلهم...وظهروا قوم مبارك رادين دبي...
ويلست ام حمدان مع ام راشد...
سلامه: اففف ما بغوا يسيرون...
خلود بنظره حاده: سلامه عيب..
سلامه بتأفف: زين..
ام راشد: بارك الله فيج يا بنتي والله مادري كيف بيكون هالبيت بلياج...
خلود مبتسمه: افا عليج يا عمتي وين اروح انا هني تامه عندكم وين اروم اصبر بدونج...
ليلى: سلامه وين حمدان؟
سلامه تقلب القنوات: مادري يمكن راقد...
خلود: مريت عليه يوم سرت الفله وكان يدرس...وراشد رقد..
ام راشد: زين بنتي سيري ارقدي من الصبح وانتي في المطبخ...
ليلى: اووه صح تسلم ايدينج حرمة اخوي على هالغدا السنع..
خلود: هني وعافيه..
ونشت بتسير بيتها..
خلود: عمتي اترخص الحين فديتج بسير احط راسي شوي..
ام راشد وهي تنش بصعوبه: يالله فديتج وانا بعد بسير حجرتي..
وتمت ليلى وسلامه...في الصاله...

وانتظروا الباقي مع الاخت الغلا

تحياتي لكم

[الرايقه]

تسلم يالبدوي ويعطيك العافيه .....
الغلا ...
اتريااااااااج ,,,

[البدوي الحبوب]

الله ايسلمج اختي وتسلمين على التواصل الجميل

[الغلا]

الجزء الثاني(5)

الساعه 4:00حمدان في حجرته يالس يحاول يحل مسألة في الرياضيات ومب عارف كيف...وما عرف شو يسوي..ونش الصاله اللي فوق وشاف امه داخله حجرتها وقفلت الباب بترقد...
شل سماعة التلفون واتصل....
حمدان: السلام عليكم ...
حمده: هلا حمدان وعليكم السلام...
حمدان: شحالج
حمده: بخير شحالك انت...؟
حمدان: حمدووه وين عفرا..؟
حمده: شو تباها...؟
حمدان: شعليج...روحي قولي لها حمدان يباج...
حمده : زين اصبر شوي ودق بعد خمس دقايق ابويه وامي راقدين بفصل التلفون وبشله حجرة عفاري...
حمدان: اوكي...
شلت حمده التلفون ودقت الباب..
عفرا: ادخلي...
حمده مبتسمه بهدوء: عفاري...
عفرا ونزلت نظارتها وهي تقرا في واحد من كتبها وتحل مسائل ومشغوله على الاخر..
عفرا: خير في شي...وليش يايبه التلفون وياج...؟؟…
حمده: ما في شي بس حمدان ولد راشد كان يبغيج مادري في شو وقلت له يصبر شوي...
عفرا بطلت عيونها وعقدت حياتها: شو..؟ شو يبى فيني حمدان...؟؟
حمده وهي تركب واير التلفون: مدري والله...تخبريه يوم يدق...
عفرا نشت من مكانها وسحبت الواير...وابتسمت بثقه...
عفرا: حبيبتي شو يستوي لي حمدان عشان ارمسه..؟ قولي له اذا دق مره ثانيه بعدني ما فصخت الحيا اسولف وياه...
حمده: خيبه شو بيقول لج...؟
عفرا: خلاص انتهى الكلام...
حمده: بس انتي تكلمينه في المدرسه...
عفرا: هناك اللي بينا علاقة زماله ما تتعدى حدود الدراسه وتنتهي بمجرد ما اطلع من سور المدرسه...
حمده: رمسيه بسج عاد عن الخبال يمكن يحتاي شي...
عفرا: يكفي انتي يا اخت حمده...شو تتوقعين امايا بتقول لو تدري انج ترمسينه بالتلفون شرات أي وحده من ربعج...؟
حمده: ما فيها شي صديقي في المدرسه...
عفرا: ما شاء الله ومن متى نرابع الاولاد نحن...حمده انا مالي شغل فيج طلعي بدرس..
حمده: واذا دق...؟
عفرا بثقه: شو اذا دق قولي له اللي قلت لج...قولي له ماريد ارمسه شو بيني وبينه عشان ارمسه خله يحشم عمره اول وقولي لها تقولك عفرا لو دق سعود ولد خالوتي شمسه على سلامي اختك بيكون عادي عنده...؟؟
حمده: زين شمعنى سعود ترمسينه بالتلفون...؟؟
عفرا ارتبكت بس ردت بثقه اكبر: حبيبتي امايا تعرف هالشي وانا بس رمسته مرتين يوم كان يباني افهمه شي في كتاب الmath مال الجامعه وكانت امي عندي في الصاله وانتي سويتيها سالفه..وبعدين سعود ولد خالتي وحمدان ما يستوي لي مول..
حمده: بس امي تقول انه من اهلنا يعني يستوي لنا..
عفرا: قرابه بعيده مب شرات هل البيت...يعني يده يستوي ليدتي وبس ...
حمده طلعت من الحجره وقفلت الباب...وعفرا تنهدت وردت لبست نظارتها ويلست تقرا في كتابها...
وفي الصاله اول ما حطت حمده الواير رن التلفون...
حمده: مرحبا...
حمدان: هلا حمده..
حمده: عفرا راقده...
حمدان: مستحيل علينا باجر امتحان math وعفرا ترقد لا يمكن...على العموم قولي لها بس كنت اباها تفهمني شي ومب لازم الحين الف طريقه للجذب يا اخت حمده...وما فيها شي لو قلتي الصدق..
حمده مستحيه: شو تقول انت...؟؟
حمدان: اللي سمعتيه ..يالله باي وراي دراسه..
حمده مستغربه: باي
...........
الساعه 5:30 العصر نش حمد وسار سبح وتلبس وفتح تلفونه..وعلى طول وصلنه اكثر عن 16 مسج.. وقبل يفتح المسج الاول رن تلفونه...وابتسم..
سالم: وينك ياخي من ساعتين وتلفونك مغلق..
حمد: انا غالقنه من الصبح..الحين بييكم...
سالم: انت في البيت ولا الشقه..؟
حمد: الشقه ...بس بييكم انتوا وين.؟
سالم: في هافانا كافيه...
حمد: خسكم الله اوكي ياي الحين..
سالم: وليش تسب..
حمد: كيفي شيخ يالله مع السلامه..
وبند عنه سالم...ويلس حمد يطالع مسجاته وعقب تسفر وطلع..وهو يشغل السياره تذكر اليازيه وشاف الساعه..
"اووه بعده وقت لين الليل..."
ودخل الشريط وحط محمد عبده "اعترفلك.."
وفي الدرب رن تلفونه ..
"لا حوول نحن ما بنخلص من هالتلفونات..؟؟"..
حمد: الووه..
بدريه: هلا حمود..
حمد: هلا الغاليه..شحالج...
بدريه: بخير والله شحالك انت...؟
حمد : الحمد لله..هذا موبايلج؟
بدريه: هيه..ما وصيك عاد في المسجات...
حمد: وشو الداعي للموبايل من بيتصل بج..ريلج لو يباج يدق على البيت..
بدريه : الله يهديك ما تبطل طبايعك ابد..انا من متى معرسه وانتهى شورك علي الا اذا مسويه شي غلط..بس الحمد لله ريلي راضي علي..
حمد: بس التلفون ماله داعي..شو تبين بالمشاكل..؟
بدريه: وليش حد قالك اني متعرفه على شباب ..؟
حمد: هاللي ناقص..يعني نترياه يصير..وعقب نمنع التلفون...
بدريه: حمد استح على ويهك على العموم برايك انا بخليك...الله وياك..
حمد: ونج زعلتي..؟
بدريه: برايك انا بس بغيت اسألك ليش اهلي ما يردون علي..؟
حمد: يمكن حد ساحب الواير...شو تبين بهم.؟
بدريه: بسير عند امايا يومين..
حمد: اخيرا وافق ريلج يستغني عنج يومين..
بدريه بضيق: مع السلامه حمد...
حمد يضحك: باي الغاليه..
كان حمد نذل لابعد الحدود وما يحشم صغير ولا كبير..ويتم يجرح في الناس ومحد متحملنه غير بدريه اخته اللي ما يقصر فيها ويسمعها من كلامه اللي يسم البدن...بس هي تطنش وتعرف ان حمد ملسون بس قلبه طيب...
............
عقب المغرب كانت ام راشد في حجرتها تصلي ودخلت عندها سلامه وانسدحت على شبريتها لين ما تخلص..وعقب ما سلمت ام راشد..
ام راشد: بنتي سلامه...صليتي..؟
سلامه وهي منسدحه: لاء...
ام راشد: ليش يا بنتي قومي صلي قبل تفوتج الصلاه وتعرفين صلاة المغرب وقتها قصير...
سلامه: زين يدوه بقولج شي..
ام راشد: ماريد اسمع منج شي قبل تصلين..هكوه الحمام سيري تمسحي وصلي عقب يلسي رمسيني..
ونشت سلامه وتمسحت وام راشد يلست ترتب ثيابها وتحطهن في الكبت..وخلصت سلامه وسارت وانسدحت وحطت راسها على ريول يدتها...
ام راشد: شو هالصلاه يا بنتي..؟
سلامه مستغربه: شو بلاها..؟
ام راشد: ما تعرفين تصلين...متى اخر مره صليتي..؟
سلامه مستحيه: مدري..
ام راشد: خاف انج مصليه من سنه...؟؟لحوول يا بنتي شو من تربيه هذي اللي ما تخلي الاوادم يصلون...تعوذي بالله من ابليس وصلي عشان الله يبارك فيج..
سلامه: ان شاء الله...
ويلست ام راشد تتمسح وتسحي شعرها...
سلامه: يدووه..ابى اقولج شي..
ام راشد: شو بنتي...؟
سلامه: انتي ما تزيغين يوم ترقدين بروحج؟
ام راشد: من شو ازيغ الحمد لله الامان موجود...ما شي نزيغ منه الا رب العالمين...
سلامه: لا يدوه انا اقصد في الظلام..
ام راشد ولا في الظلام بعد..
سلامه: زين ابى ارقد عندج اليوم...
ام راشد: حياج الله بنتي ارقدي في أي وقت..بس انا ما روم للمكيف وما شغله مول هلكني وياب لي المرض في ريولي...
سلامه: عيل كيف تتحملين الجو ايام الصيف..
ام راشد: لي يا الصيف يصير خير بس الحمد لله الجو هاليومين ابدع ما يكون...
سلامه: يدووه..
ام راشد: هاه بنتي..
سلامه: قولي لي كيف مات عمي سيف الله يرحمه...؟
ام راشد تنهدت...وسكتت شوي ..وسرحت شوي بعيد..ولاحت صورة سيف في خيالها..
ام راشد: بنتي سيري لذاك الدرج وهاتي الالبوم اللي فيه بروايج شي..
ونشت سلامه ويابته...وبطلته لها ام راشد..وشافت صور عمها سيف من ايام قبل المدرسه وصورته وهو في الروضه..وصور وايده له وهو في المدرسه..واخر صوره له وهو يدرس كانت ايام الثانويه العامه وهو لابس لبس الجويه..وفي صور له في امريكا ويا ربعه..يوم سار يكمل دراسته..واخر شي صوره وهو خريج وصورته ليلة عرسه..وكانت هذي اخر صوره تصورها وعطاها امه...وشافت سلامه سعاد حرمته...
رفعت سلامه راسها بتتخبرها اذا هذي سعاد وشافت يدتها تمسح دموعها في شيلتها...
سلامه مرتبكه: يدوه ليش تصيحين..؟
ام راشد تتنهد بحرقه: لا يا بنتي ما شي ..عمج سيف الله يرحمه..ما شي منه في الرياييل..الله يرحمه يا سلامه..
سلامه وهي تطالع الصور: الله يرحمه...
كانت صورة سيف تجنن وملامحه جميله ويشبه ليلى وايد..بس شيخه ابد ما كانت تشبه ابوها..كانت نسخه مطبوعه من امها سعاد..اللي نفس الشي كانت حلوة الملامح..ومملوحه بعد...وحتى بياضها ماخذتنه من امها...
سلامه تسأل ويدتها تتكلم وهي محترقه...
سلامه: زين كيف مات..؟
ام راشد حست بشي قبض فوادها...رغم البرود اللي تسألها فيه سلامه..بس ام راشد كانت شابه ضو من داخل..وتحس انها تموت الف مره كلما طروا سيف جدامها..وكانت ما تحب ترمس عنه في أي مكان..بس ما حبت ترد سلامه ولا تبين لها شي...ورمست ام راشد وحسها تغير ومبين انها مخنوقه وهي ترمس...
ام راشد:في رمضان كان ساير يعزي واحد من ربعه في وفاة اخوه ..وكان عمر شيخه 7 شهور..وقالت له سعاد انها بتسير وياه..لان حرمة ربيعه جد يتها كذا مره للبيت..وخلوا شيخه عند ليلى وكانت هاديه ما تصيح ولا تقول شي...
سكتت ام راشد..
سلامه: كملي يدوه..
ام راشد تتنهد وبدا الضيج اكثر على ويهها..تحس بشي يحترق داخلها..ودها تقول لسلامه تسكت بس ما عرفت ليش ما قدرت..تحس هم الكون ياكل روحها...وتحس ان في صدرها حطب كلما رمست سلامه شب ضو اكثر...تحس التنفس صاير اصعب والدنيا ممكن في أي لحظه تاخذ أي انسان تحبه..تذكرت على طول ضحكات سيف وخفة دمه..وكيف كان مالي البيت ضحكات ..وكل شي فيه يذكرها به...حتى لو كوبها اللي تشرب فيه كان سيف مشتري طقم منه..وبعدها للحين محتفظه فيه..ما استوعبت للحين انه توفى..وكانت دوم تستغفر ربها على قلة صبرها..بس ما قدرت تتحمل انها تفقد ضناها وقطعه منها...حتى تعرف ان البيت تغير عقب ما مات..قبل الناس كلها تضحك في وجود سيف ..واليوم البيت مظلم كئيب عقب غيابه...
واللي زاد همها اكثر ان بو راشد لحق بو سيف على طول...وحست بعمرها وحيده رغم وجود عيالها...بس هذي حكمة الله في خلقه...

كملت ام راشد وبدت العبره تخنقها: وعقبها ما ردوا الا اخر الليل ع الساعه 2 ومن العين لين بوظبي وقريب من الوثبه ...البقعه كلها بر ومحد فيها ومادري يا بنتي كيف ما يود عمره وهو يسوق ودعم في اطراف الحديد اللي ع الشارع...واصتكت عليهم السياره..وابطوا فيها محد ياهم ..واختارهم الله يا بنتي..
سلامه نزلت راسها: الله يرحمهم...
ام راشد ابتسمت عشان تقتل حالة الالم اللي في نفسها وكابرت وتمخضت شفاتها عن ابتسامه تجمع هم السنين والم الكون..وفاجعه فقدان اقرب الناس..رسمتها بكل صعوبه وهي تعلن تحدي جديد لمآسي الله يعلم اخرتها...
وبكل حنان الدنيا الممزوج بألم الرحيل : يالله بنتي قومي ادرسي انا ما شفتج يودتي الكتاب من اسبوع..
سلامه تضحك: شو اسبوع يدوه...!! عاد هذي مبالغه عوده...
ام راشد: يالله نشي..
وقبل تطلع سلامه كان باب الحجره يتحرك ومسكة الباب ترتفع وتنزل وحد يحاول يبطله بس مب رايم..
ام راشد: انتي قفلتي الباب بالمفتاح..؟
سلامه: لا والله...
ام راشد: قومي شوفي من عند الباب...
وسارت سلامه واول ما بطلت الباب شافت شيخه وويهها كله رقاد...وفي عيونها نظرة غضب..وخدودها حمرا وشكلها شوي وتنفجر صياح...
تمت تنقل نظراتها في الحجره تدور حد تباه بس ما لقته...
مدت بوزها شبرين وبصوت مخنوق والعبره خانقتنها: وين ماما...؟
سلامه ابتسمت: محد..
ام راشد: تعالي بنتي تعالي شيخه فديتج..وين ليلى عنها..؟
سلامه تمد ايدها : تعالي شواخي..
صاحت شيخه: ماليد وين امي..اليد امي...
وبدت شيخه المناحه وشلت البيت بصياحها وما طاعت تسكت..ونشت لها ام راشد بس ما خلتها تمسكها وتمت تصيح من قلبها..ولا طاعت تسكت..
سلامه متأففه: لا حووول متى بتسكت هذي اذتنا اففف منها صوتها حشره...
ام راشد وهي تلوي على شيخه: بس غناتي فديت روحج..
شيخه وهي تبعد نفسها عن يدتها وتصارخ: اليد امي..امي...
ام راشد متحسره: لا حول ولا قوة الا بالله..من وين اييب لج امج الحين يا بنتي..الله يرحمها..
سلامه منصدمه: يدووه لا تخبرينها حرام هي تتحرى ليلى امها...
ام راشد: وهي اشدراها شو اقول..؟
سلامه: يدووه شو تتحرينها غبيه ما تفهم...؟
ويتها شرملى يايبه لها الحليب..وحاولت تشلها بس ما رضت وسارت عنها شرملى ما قدرت تراضيها....شيخه معصبه ومسكت مرضاعتها..وسارت تيلس عدال طاوله في الصاله وحاضنتنها..وتصيح من قلبها...وتصارخ: اليد امي...
ام راشد: وين ليلى ؟
سلامه: سكتوها حشرتنا...
وسارت شرملى فوق تدور ليلى بس ما لقتها ودخلت حجرتها وليلى طلعت من الحمام وكانت متسبحه...
ليلى: عوذ بالله منج زيغتيني..
شرملى: شيخه صيح يريد انتي...
لبست ليلى بسرعه ولفت شعرها...ونزلت الصاله واول ما شافتها عورت لها قلبها وشكلها مسكينه يالسه عند الطاوله وتصيح..شيخه اول ما شافت ليلى زاد صياحها وسارت عندها وشلتها ليلى فوق وهي حاضنتنها بقو بس شيخه ما طاعت تسكت...وسدحتها على الشبريه وانسدحت عدالها وهي لاويه عليها..وحبتها على يبهتها..وتمسح دموعها...
ليلى تكلمها بلهجة اطفال: عيوني شو فيج يا حياتي...وليش كل هالدموع فديت روحج...
شيخه ساكته بس متقبضه في ليلى بكل قوتها...
ليلى: كل هذا عشان نشيتي وما حصلتيني جدامج...يا دلوعه...
ورفعت ليلى راسها وشافت ويهها متخيس دموع بس هي سكتت...
ليلى: تبين حبيبه..؟
شيخه وبعدها زعلانه: هيه...
ويلست ليلى وشيخه يلست وياها..ومشت لين الطاوله اللي عليها الحليب وشيخه نشت وراها ورقدتها على الشبريه ويلست تجفف شعرها...
شيخه وتأشر على ريول ليلى: هني..
ابتسمت ليلى: تعالي حبيبتي..
ويت شيخه وحطت راسها في حضن ليلى وانسدحت على ريولها ويلست تشرب حليبها...
................
الساعه 8:00 كانت ام خليفه واقفه عند باب الصاله وتسلم على بنات شمسه...وشمسه خلاص بيردون دبي...وكانن كلهن موجودات عدا نوره اللي روحت الساعه 5:00 العصر..
ام خليفه: الله الله بنفسج يا بنتي...
شمسه: ان شاء الله امايه وانتي بعد الله الله بصحتج...
بدريه وهي تسلم على بنات شمسه:يالله يا حلوات شدن حيلكن بالدراسه...
سلمى: ما عليج منهن ما يتوصن امهن شمسه بنت مبارك...
وهن يرمسن يتهن ساره وبناتها من بعيد...واول ما وصلت..
ساره: الحمدلله اني لحقت عليكن..ياني خليفه يقول ان سالم هني وبيروحون قوم شمسه..
حمده: افا عمووه تسيرين ولا تقولين...بلجيكا علمتكم جي..؟
ساره: عيب يا حمده..
شمسه ومبين انها ضايجه من امس وحتى تبتسم من ورا خاطرها: لا فديتها حمدووه محد يزعل منها...
عفرا سلمت على عمتها والبنات: عمتي انا ما روم اطول هني بسير عندي امتحان ولازم ادرس...لا تقطعينا..
شمسه وهي تلوي عليها: لا فديتج سيري الله يوفقج ان شاء الله...
وسارت عفرا لين فلتهم وهي في الدرب شافت عمها ذياب مع سعود...
ذياب: عفرووه..
عفرا: خير..
ذياب: وين اختي شموس.؟
عفرا: مدري بسير انا..
ذياب: سيري كلي اوراق الكتاب...
كان سعود يطالعها ومبتسم بس ما سوت له سالفه وسارت عنه..
سعود: عفاري..
عفرا تطالعه: شو..؟
سعود: بنسير ايطاليا عقب اسبوعين..تامرين بشي...؟
عفرا وقفت: متى عينوا خالي سالم..؟
سعود اللي ما صدق انها نطقت: امس مسوين له تلفون ...وعقب اسبوعين لازم يسير يخلص كل اوراقه وعقب يسير ايطاليا..
عفرا ابتسمت ابتسامه ملائكيه بعفويه: الله وياكم...الله الله بدراستك..
سعود بفرح بس ما بينه الا بابتسامه صادقه: ان شاء الله وانتي بعد..
كانت عفرا ترمس عادي صح انها ترمس حد لاول مره بعفويه بس ما كانت تكن لسعود أي مشاعر...اما سعود اللي يحبها صدق من قلبه سار وهو مرتاح على الاقل شوي رمسها ونفسها حلوه...
ذياب: ابى اسير وياكم..
طالعه ذياب: حووه ارمس انا...
سعود: زين اسمعك..اقول خالي...
ذياب:شو..
سعود: متى بتراضي ابوك...؟؟
ذياب: مب شغلك..
سعود سكت وساروا فلة بو خليفه عقب سلم سعود عليهم...
بطي: باااي خالوه بدريه...بنتوله على سوالفج...
بدريه: فديت روحك ادرس عدل ولا تنسى الموضوع اللي بينا..
سلمى: الحمدلله والشكر شو تبين في بطاي الخبل..؟
بطي مطلع لسانه يغايض خالته:عمتي سلامي يلسي ببوظبي شو تبين تردين دبي...
سلمى: والله انك ما تخيل..
بطي: شو رايج تيين ويانا...؟ بنوصلج...
سلمى: كثر خيرك..ريلي موجود حق شو ايي وياك..ما شي شغله...
بطي وهو يسير عنهن: يالله برايكن انا بسير عن يخلوني..صراحه ما تحمل جو بوظبي..مول ما يعيبني...
حصه: عدال يا مدلل..
سمر: من زينك انت ودبي..كلها هنود..
بطي من بعيد: وايد عليج...خالوه سمر..
بدريه: فديت روحه يا ربي والله ان دمه عسل...
سمر:حرام برد وحيده كلهم راحوا...
حصه: الا قولي ارتاحوا من ويهج ليتني رايحه وياهم على الاقل ما بشوف ويهج مول..
سمر: يعني انا اللي ميته عليج خلاص ما روم اعيش بدونج...
حصه: جب اسكتي صوتج يعور اذنيه ماداني اسمعه...
ام خليفه: لا اله الا الله شو من بنات انتن...سمر يا بنتي سكتي منها..اختج ضو..كل ما رمستيها زادت..
حصه: هيه امايه انتي اللي تحرضينها علي وترفعين من قدرها وانا جني بنت الحرمه الشينه ما تسوين لي سالفه..
سلمى بتأفف : يالله يالبزا وثقالة الدم اللي فيكن..
بدريه: الاخت متوتره..الا اقول حماده مالج هذا متى بيوصل؟
سلمى وهي تيلس على الكنب بقهر: وانا شدراني يعله يا ربي...
ام خليفه: اذكري ربج شو تدعين على ريلج..
سلمى: يا امايه ورايه شغل ودوام ومدرسه وتحضير شو من ريال مودرني في بوظبي ويالس في دبي...
ساره: يمكن عند حرمته الثانيه...
سلمى: قلعته هو وياها المهم ابى ارد البيت...
حصه: الاخت ملت منا...
سمر: بسير ادرس...
حصه: باللي ما يردج...
ام خليفه بعصبيه: حصه بس عاد زودتيها...
سلمى ونشت سايره فوق ودق تلفون الصاله...
حمده: مراحب...
حامد: السلام عليكم..
حمده: وعليكم السلام..
حامد: وين سلمى.؟
حمده: اصبر شوي..
نزلت السماعه وسلمى سايره فوق..
حمده: عمتي سلمى تعالي تلفون...شكله ريلج..
نزلت سلمى بسرعه ورمسته وشوي واجعها ان تلفونها مغلق وقال لها تتجهز انه صار قريب منهم...وطلعت سلمى فوق وجهزت اغراضها ونزلت..
ام خليفه: شكلج مستانسه تودرين البيت..
سلمى: امايا حرام عليج وراي باجر مدرسه وتعرفين يبا لي احضر الدروس عشان الشرح ..
حمده: شو رايج تغيبين عشان البنات يفرحون وياخذون حصة فراغ..؟؟
سلمى: احلفي انتي بس...
حصه: اختي سلمى لزقه ما تغيب ويعرفون البنات انها مستحيل تغيب عشان جي فاقدين الامل في غيابها...
سلمى: وليش اغيب اذا ما شي اعذار...
دخل ذياب الصاله...
ذياب: سلمى ريلج في موتره يقول لج يالله مستعيل...
ام خليفه: مسود الويه ليش ما ينزل يسلم..ما شي مذهب...
سلمى مفتشله: الحين بقول له يي امايا..
ام خليفه: لا برايج سيري غناتي وراج دوام..اذا ما كان مسنع مب انتي اللي بتسنعينه...
وسلمت عليهم سلمى وروحت ...وام خليفه سارت تصلي العشا..وحصه طلعت فوق وبدريه سارت الحجره اللي رقدت فيها سلمى البارحه..
..................
في بيت بو راشدالساعه 10:00 كانت خلود واقفه عند باب الصاله ...
خلود: تصبحين على خير عمتي انا بسير البيت...
ام راشد: وانتي من اهله غناتي..فديت روحج..
وظهرت خلود وام راشد سارت حجرتها بترقد...
وسلامه يالسه في اخر الصاله تدرسها ليلى كيمياء..
سلامه: خلاص عمتي بسير ارقد تعبت..
ليلى: من شو تعبتي باقي 12 صفحه ونخلص...
سلامه: لااا وايد عمتي ما روم ابطل عيوني...
ولفت سلامه وشهقت من اللي شافته...كانت شيخه ماسكه دفتر سلامه وما خلت فيه بقعه بيضا ويلست تخربش على كيفها وتلعب وترسم شخابيط وشوهت الدروس والواجبات....وقطعت بعض اوراق الدفتر ...
سلامه ونشت بسرعه بتضربها وهي معصبه: اووووه..
شيخه اول ما شافتها عقت كل شي وفي عيونها نظرة خوف..ونشت بصعوبه وسارت تركض شارده وفجأة انفجرت ضحك ان حد يالس يلاحقها.. ونطت فوق ليلى وتعلقت فيها وتمت تدفن عمرها وجنها تبى تدخل داخل جسم ليلى وهي تضحك بصوت عالي وتزاعج بفرح....ضحكت ليلى ولوت عليها..
ليلى تضحك: خلاص سلامي هالمره مسحيها في ويهي..
وقربت سلامه من شيخه وقرصتها في ريلها وابتسمت وقالت بغياض: ضربتج...!!
شيخه مسكت ريلها من المكان اللي يعورها وطالعتها بنظره متألمه: اححححح
ليلى تبى تهدي الوضع: عادي ما يعور صح شواخي..؟
شيخه بعناد ومغايض اكثر ومدت لسانها عناد: ما عولني ..ما عولني...
سلامه: اوووه شو هاه والله بضربها كيف بسوي باجر يعني لازم ننهزب كل يوم..
ليلى: ما عليه حبيبتي انتي متعوده..خلاص سيري ارقدي ووعد باجر يوم ارد من الدوام بشل هالدفتر وبعيده لج من اوله لين اخر درس...
ابتسمت سلامه: اوكي...
ويلست سلامه تيمع كتبها ..ولفت عليها شيخه وشافتها ..
شيخه تغايضها وتطلع لسانها ومبتسمه بمغايض: ثوفيني.....
سلامه رفعت راسها: جب يا دبه دبه..انتي دبه كبيره مثل الفيل..
شيخه تتحرطم وتسوي روحها فاهمه شي: اتي طفثه..
سلامه: انتي دبه ومب حلوه...
ليلى تضحك: لا حوول يا سلامه مسويه راسج براس ياهل...
شيخه وهي متعلقه: خاثه اتي...
سلامه: انتي اللي خايسه مب انا...عمووه سكتيها انا روحي معصبه...
ليلى: شواخي بس حبيبتي..
شيخه: ماليد ..
سلامه بعد ما شلت كتبها: يالله عمووه وصليني ابى اسير البيت وزايغه...
ليلى: حرام عليج تبيني اصك درب لين فلتكم ليش تعذبيني..
سلامه: شو ؟؟ ماريد ارقد هني بيتكم ما فيه ثياب المدرسه مالي..الله يخليج قومي...
ونشت ليلى وشلت شيخه ووصلت سلامه وردت البيت...وطلعت حجرتها...وغيرت ملابس شيخه ورقدتها على الشبريه وانسدحت عدالها بترقد...وبندت الليت..
هني شيخه انفجرت ضحك...
شيخه: وحث وحث...
ليلى: اسكتي بنرقد...اذا ما رقدتي بييج الوحش...
شيخه بفرح: وحث..
ليلى: لا حوول انا احيد ان الوحش يزيغ ما يفرح خلق الله..كلما طريتلج الوحش تتشققين من الوناسه...يالله ارقدي..
شيخه: ماليد...
شيخه وهي تدور ايد ليلى عشان تمسكها...
شيخه: اتي وين..؟
ليلى: هني وين بكون يعني..يالله ارقدي انا برقد وبخليج..
شيخه ونشت وتتحسس ليلى وين ويلست فوق بطنها...وتمت تنط..
ليلى: شواخي بس عورتيني انزلي ..يالله...ولا بطلع وبخليج..
شيخه بفرح: لا لا انا دويه...
ليلى: ادري انج قويه..بس انزلي يالله...
شيخه بشطانه: ماليد...هييييه
وتمت تزاعج وتتنطط وماطاعت ترقد..ورقدت عنها ليلى لان وراها دوام باجر...وشيخه في الظلام تمت تتجلب فوق ليلى وتفتح عيونها..
شيخه: قومي يالله..يالله...
بس ليلى ما تحركت وخلتها ورقدت..واخر شي يوم يأست منها سارت ورفعت ايدها وحطت راسها في حضن ليلى ولوت عليها ورقدت على طول..
....................
في منطقه غير محددة الذكر في بوظبي..على الساعه 12:00 نص الليل كان حمد يمر بموتره عليها وساعه يدق على تلفون اليازيه بس ما ترد..
" الله يخس ويهج جني اللي ابى مب انتي..وينها هذي"..
ودار فوق العشر مرات على المنطقه وحتى الشباب اللي كانوا يتيمعون ويسهرون للفير في المنطقه حسوا ان في هالموتر شي او انه مواعد وحده هني...
طبعا الشباب طنشوا وما حبوا يتدخلون...بس حمد مصخها واخر شي وقف عدال بقاله وطلب شي بارد ويلس في السياره..ودق لها تلفون...
وردت اخيرا...
حمد بعصبيه: احلفي انتي بس...قولي والله..؟؟
اليازيه: شوفيك انا قلت لك بسوي كول يوم بخلص..ليش محتشر حد قالك تيي الحين...؟
حمد بقهر من برودها: والله...؟
اليازيه: لا ترمسني بهالاسلوب ما يعيبني..عوذ بالله منك جاف ما تعرف ترمس..
حمد: اذا مب عايبنج دوري واحد ثاني..مالت عليج وعلى ويهج..بتموتين وانتي تراكضين ورا الشباب..
اليازيه بضيج: حمد شو هالرمسه..؟
حمد: خس الله ويهج شو قالوا لج كلب انا اراكض ورا البنات..يكون في علمج انا البنات اللي يربعن وراي هب انا اللي اسير لهن..واقولج اسف لان سهرتج الليله بتخترب وجلبي ويهج ترا فريجكم متروس شباب دوري لج واحد منهم لين ما يردون هلج من العين..
اليازيه قبل تنطق...بند حمد التلفون وما اغلقه بالعكس خلاها ترد تدق وتدق عشان تحترق اكثر وهي تترياه يرد..ويباها تموت وهي تدري انه حذال التلفون بس ما بيرد ...
حرك حمد الموتر وما سار الشقه ..رد البيت على طول..وطبعا شي بديهي ان اهله ما يعرفون ان عنده شقه..
وخذ تلفونه الثاني ودق على ربيعه بكل برود..
حمد: هلا بو شهاب..
احمد: هلا الغالي..
وتم يسولف وياه يمكن عشر دقايق ..
حمد: خذ رقمها وهذي هديه مني لك..
احمد: شو اسوي بها..؟
حمد:لا تسألني...يالله بسير ارقد وراي دوام...
احمد: هي حلوه..؟
حمد: يعني الميك اب معدلنها يالله تعرف واحكم بنفسك....
احمد: وانت ليش ودرتها...؟
حمد: مليت يابت لي الغثه..وانت بعد غثيتني شو رايك تخليني اسير البيت...؟
احمد: الله وياك...
وخذ احمد رقم اليازيه من حمد..
واول ما وصل البيت..سار وسبح ورقد والتلفون بعده محترق ومحد يرد عليه..وحطه على السايلنت وما سوا لها سالفه...وانتهت سالفة اليازيه نفس ما انتهت سالفة الف بنت غيرها...
..............


ترقبو الحلقه السادسه من الاخ البدوي الحبوب ...

اختكم
الغلا

[الرايقه]

استغفر الله يعني في شباب في الدنيا شرات حمد انا مستحيل اتخيل هالشي اعوذ بالله منه ومن امثاله وتستاهل اليازيه مستويه شرات اللزقه انا مليت منها خخخخخخخ
الغلا يعطيج الف عافيه ,,,,

[الغلا]

الله يعافيج الغاليه ويعطيج الف عافيه على هالتواصل المستمر مع القصه


وترقبو الجزء القادم من الاخ البدوي الحبوب

اختكم
الغلا

[البدوي الحبوب]

اشكركم على هالتواصل وان شاءالله باجر بكمل القصه

تحياتي للجميع

[البدوي الحبوب]

الحلقه السادسه

الدريول الصبح واقف ساعه يتريا سلامه اللي ما خلصت بسرعه وحتى ما نشت من وقت..وحمدان يالس في السياره يترياها..
حمدان: اففف يالله اخرتنا هذي..باشا روح يالله..
باشا: شو روح بعدين بابا راشد عصب..
حمدان: يا خي روح شو هالحاله اول كلاس عندي امتحان ممكن تروح...؟
ويت سلامه تركض بسرعه وبطلت باب السياره..
سلامه: سوري حمدان والله ما عرفت اربط شعري...
حمدان: وانا شو يخصني..يالله باشا روح...
وسار حمدان وسلامه المدرسه...
وفي حجرتها كانت ليلى تلبس بهدوء عشان شيخه ما تنش..وكان خاطرها تبوسها قبل تطلع بس خافت تنش ويتكنسل الدوام كامل...تلبست ونزلت الصاله وشافت امها كالعاده وسلمت عليها...ويلست تتريا حصه عشان تمرها...
ام راشد: فديتها والله هالبنيه..ما تقصر كل يوم تييج..
ليلى: زين امايه عادي احسن اروح وياها بدل ما اسير ويا الدريول لروحي..وبعدين هي اقرب خلها تمرني...
وشوي ويرن تلفون ليلى..
ليلى: هلا والله صباح الخير غناتي..
حصه بفرح: صباح الورد والجوري شخبارها حبيبتي اليوم..؟
ليلى: بخير دامي اسمع حسج...
ابتسمت ام راشد وحست بداخلها براحه ان بنتها تقدر تستانس مع حصه وتمنت لها الخير ودعت لهن بالتوفيق والنصيب على هالصبح...
حصه: يالله اظهري انا عند الباب وهاتي شيخه وياج بحبها...
ليلى: الله يخليج لا تضحكيني شو تبين في شيخه الحين..هذي بس لو تشوفني لابسه بيجاما سوداء تعلقت فيني وقالت وين بنلوح..؟ تبينها تشوفني لابسه عباتي بتتخبل....
تضحك حصه: يالله طلعي وسلمي لي على امج لو هي ناشه...
بندت ليلى وسلمت على امها وطلعت اول ما ركبت السياره باست حصه ويلست عدالها...
ليلى: فديت هالويه يا ربي والله ولهت عليج..
حصه تمثل انها مستحيه: وااااي شو هالرمسه من الصبح؟؟ لحظه بفتح الباب وبعق عمري في الشارع العام باي ...
ليلى تضحك: الله يغربلج يا حصووه...
حصه: والله!!! شو تسمعيني رمسه حلوه من الصبح ما روم انا خلاص كل الخلايا عندي تنصهر...
ليلى: زين خلاص بسمعج كلام يسم البدن....
وتمن يسولفن لين ما وصلن الدوام...وسارن مكتبهن....
.
.
في مكتبه كان ناصر يالس يعدل الاوراق ويختم بعضهن ويفكر في مشروع مع شركه قدمت له عرض وتسهيلات ويفكر يشترك وياهم..بس بعده متردد شو يسوي..كان غصبا عنه مبتسم..ابتسامته فيها حنان ورقه وفيها ابوه دافئه..ناصر رغم كل ظروفه وحياته وصعوبتها بس يتم انسان راقي بمعنى الكلمه وحنون وقلبه كبير..اليوم يحس بشي غريب وبفرحه عجيبه ويتمنى يتم له هالشعور على خير...يرتب الاوراق وغصبا عنه تمر صورة ليلى جدامه...
ما يقدر يمنع نفسه انه يبتسم..وكم حاول وحاول انه يقتل هالحلم ويعيش الواقع وما يتخيل وايد...
بس من يقدر يسيطر على مشاعره..هذي اكبر حرب وهي حرب المشاعر...يفكر فيها ويبتسم من خاطره وشوي وما يعرف ليش خطرت على باله صورتها وهي صغيره...يوم كان هو واخوانها في بيتهم يتسابقون وكان خاله المرحوم بو راشد يعد لهم من واحد لين عشره...
وينطلقون وكانت ليلى دبه وهي صغيره ويتذكر شكلها يوم كانت دوم اخر وحده توصل ويردون هم اللفه الثانيه وهي بعدها ما وصلت اول دوره...وكان في اخر دوره يعدها لهم بو راشد تعب وقال حق بو ناصر يكملها..وعد لهم ابوه..وركضوا كلهم ووقفت ليلى معصبه ان محد ترياها وانها ولا مره طلعت الاولى وهي في نص الدرب ما كملت السباق الاول شافتهم رادين وردت قبل تكمل وعصبوا الاولاد اللي وياها وهم اخوانها راشد ومبارك وهو واخوه فهد..وبسرعه ركض لها فهد اخوه ودزها على الارض وطاحت وتمت تصيح وياها ناصر وشلها ومشى بها خمس خطوات بس هو طاح من متنها وما قدر يكمل وطاح فوقها ما رام لها...وزاد صياحها ونش ابوها وشلها من تحت ناصر وهو ميت ضحك على شكله...
كان ناصر يسبح في افكاره ومبتسم...وقطع عليه افكاره تلفون المكتب...
حمد: السلام عليك استاذ ناصر..
ناصر: هلا والله بحمد شحالك..
حمد: بخير وسهاله..اقول ناصر..
ناصر: تفضل...
حمد: انا طرشت اخر مجموعه وصلتني لشركة ظبي الخليج..وقالوا اليوم المغرب بيردون علينا...
ناصر: بارك الله فيك يا حمد والله بدونك مادري شو كنت بسوي...
حمد: الخير فيك وان شاء الله نسوي اللي نقدر عليه...زين اقولك بتم لهم ولا انا ايلس هني...؟
ناصر يضحك: اللي تشوفه يا حمد بتيلس للمغرب؟
حمد: ما عندي مانع والله شغلي جريب من الشقه يعني ماشي مشكله...
ناصر: عيل برايك خويه وان شاء الله تتصل فيني عقب ما تخلص وخبرني كل شي..
حمد: فالك طيب..
ناصر: فالك ما يخيب...
وبند عنه حمد..ويلس ناصر يكمل شغله ويخلص اللي باقي من اوراق الشركه...
.
.
.
مر حمد مكتب ليلى وحصه...وطالع ليلى وابتسم وهي طالعته بنظره حاده خلته يغير ابتسامته لنظرة تحدي ثانيه...
حمد: كيفكن صبايا....
حصه مبتسمه: بخير وانت شحالك...؟
حمد ببرود: مثل ما تشوفين عال العال...
ليلى وهي تتعبث في اوراقها...طالعت ويه حصه وهي من الصبح موصتنها تكون بارده وعاديه عشان تقهره اكثر....بس حصه وين تقاوم اللي في قلبها وتمت مبتسمه وكل شي مبين من لهفتها وعيونها وعاد حمد ما صدق وليلى تخزها بنظره تباها تصطلب شوي بس ما طاعت..وظهر عنهن حمد...
ليلى بعصبيه: سخيفه وبتمين سخيفه..انا شو قلت لج تسوين...البسيه احسن شي...
حصه: جب جب..
ليلى: هاللي قدرتي عليه...؟
حصه: شو تبيني اسوي ما اقدر..يعني اقص على عمري والله انتي ما تحسين فيني...
ليلى: شوفي كيف يعاملج وكيف يرمسج شو من ادميه انتي...؟؟
حصه: لحوول احنا كل يوم بنتم على هالحال..الله يخليج لا تتدخلين في حياتي...
انصدمت ليلى بس سكتت عنها ويلست تكمل اللي في ايدها وحصه طلعت عنها....ونزلت الدور الثالث...وسارت عند وحده من الموظفات اليداد في الشركه اسمها مشاعل كويتيه وعمرها 23 سنه اصغر عن حصه وليلى بثلاث سنين..بس طيبه وحبوبه وسوالفها عسل..ومحد متضيج منها وعمرها ما اشتكت من حد ولا حد اشتكى عليها...ملامحها طفوليه وابتسامتها بريئه وفيها جمال خليجي وسمارتها محليتنها اكثر...وكل شي في قلبها على لسانها....يايه مع اخوها عمره 21 سنه من الكويت عنده شركات ولها فرع في الامارات وياي يشرف عليه ويديره بنفسه..هي اكبر عنه بس ما اشتغلت معاه وحبت تكون لها حرية المكان اللي تبغيه واشتغلت في هالشركه...
حصه دقت الباب ودخلت...ونشت مشاعل من مكانها على طول وسلمت على حصه...
مشاعل مبتسمه: يا هلا والله اش هاليوم بيكون وانتي يايه تزوريني على الصبح...الله الله شو هالحلى كله...
حصه مبتسمه: الله يخليج أي حلاة...نحن مخلين الجمال كله لبنات الكويت ما يخصنا فيه...
احمرت خدود مشاعل: فديت روحج حبيبتي ...
وضحكت هي وحصه...
مشاعل: شوفيني اتعلمت حجي اماراتي وقمت اتفداج...
حصه: غناتي والله...
مشاعل: الا اقول ما شفت ليلى اليوم وينها...؟
حصه وتغير شكلها: مادري...في المكتب ولا مدري وين..؟
مشاعل مستغربه: لا عاد ما يصير جذي...الثنائي المرح زعلانين على بعض ليش..؟
حصه: اشدراني فيها بعدين مب زعلانات..وليش نزعل ماشي يرزا..
مشاعل: شو؟
حصه: اقصد ماشي يستاهل ماشي يستحق..لا يوجد داعيٍ لذلك...
ضحكت مشاعل: لا عاد شكلج معصبه على الاخر...
حصه: زين شو مسويه وشو اخبارج واخبار اهلج...؟
مشاعل: والله كل شي زين..البارحه امي اتصلت فيني وكلمت ابويه ويدتي وبنات عمي...
حصه: ان شاء الله انهم بخير...وشخبار الكويت؟..
مشاعل مبتسمه: الحمدلله ماكو شي يديد..وانتي تعرفين الحرب في العراق توها مخلصه فيعني شوي توتر في المكان...بس الحمدلله على كل حال ابوي قال كل شي زين و امي تقول انها متولهه علي...
حصه: هيه والله يا حليلها اكيد بعد بنتها الوحيده لازم...واخوج اللي هني شو اخباره..؟
مشاعل: الحمدلله زين بس تعرفين شغله وايد متعب ما يردلي الا اخر الليل وانا اخاف اتم بروحي في البيت ...بس هو قال لي بييب لي خدامه تيلس وياي..مع ان الشقه ما تحتاج شغل وايد...
حصه: الله يعينج...
تمن يسولفن... ونست حصه ليلى...اللي تمت تشتغل في مكتبها وهي متضيجه من اسلوب حصه اليوم وياها..بس حاولت تطلع لها مبررات وقالت بخاطرها ان اكيد لحظة غضب...وعقب كل شي بيرد مثل ما هو...تمت تكتب تقرير للمدير العام للشركه وقبل تخلصه دق الباب..وعدلت شيلتها وتحجبت...وكان الهندي اللي ييب الشاي الصبح..وحط لها كوبها وسألها عن حصه بس قالت له انها ما تدري وينها ويلست تخلص شغلها وبدون ادنى شك ان ناصر كان في بالها ولو انها حاولت تبعده شوي عشان تشتغل عدل.....
وعند باب المكتب...بكل هدوء ...
ناصر بهمس وهو يوايج من حذال الباب: صباح الورد ابله ليلى...
قلبها دق بسرعه وحست بالدم يمشي في عروقها اسرع ..حست برجفه بس ما شافت من اللي يرمس..لكنها عرفت الصوت...تغلغل في مساماتها وفي كل خليه في جسمها..في عيونها وقلبها وكل نبضه فيها..حست لبرهه انها تطير وانها مب هي ..حست بالعالم يتلون من حواليها..والحياة لها طعم ثاني...ورفعت راسها مبتسمه وعدلت شيلتها ودخلت شوي من شعرها اللي كان طايح على ويهها وهي تكتب...
ليلى وتيمع الدم كله في ويهها ومبتسمه من خاطرها: صباح النور...
ناصر مبتسم وهو يشوف ويهها احمر مثل الورد : كل هاه استوى عشان قلنا صباح الخير...؟؟
ليلى بعدها مبتسمه: تفضل استاذ...
ناصر وهو واقف عند الباب: ياخي ذليتينا بالاستاذ هذي كم مره اقولج لا تقولين استاذ..
ليلى: ليش معصب..؟
ناصر: كيفي مواطن...
ليلى: يعني انا من وين ..؟حد قالك اني من شرق اسيا ولا من ساحل العاج...؟
ناصر يضحك: يا سلام يا ام لسان من متى ما تهاوشنا...تحريت لسانج انقص يوم كبرتي اثاريه كل يوم يطول...
ليلى: من يومي...اونك ما تعرفني...؟؟
ناصر : اليوم يالس اتذكرج يوم نتسابق وشليتج و......
ليلى تضحك: بس بس الله يخليك اسكت..ذليتنا عاد...
ناصر يتنهد وبعد مبتسم: كسرتي لي عظامي ذاك اليوم جني شايل دبة غاز على ظهري...
ليلى وهي مبتسمه:بس عاد والله مصختها....
ناصر:يا سلام على ايام قبل ما تتعوض...
ليلى وهي تطالع الاوراق: ليش ياي ..؟
ناصر: كيفي بعد شو اسوي ..؟ نص الشركه ملكي..وانا حر...
ليلى: يعني انا ما شي ملكي..يا بابا انا لي ربع النص...؟؟
ناصر مبتسم بمغايض: اوكي قلتيها ربع في النص...لكن انا لي النص...
ليلى: زين وشو يعني ما وصلنا لهالحال المتردي اللي نحن فيه الا الفلوس..
ناصر: زين يا ويهج ملسونه محد يروم لج والله...بسير مكتبي...باي ..
ليلى: تعال ما قلت لي ليش نازل شو عندك تحت...
ناصر وهو معطنها ظهره بيطلع: لا والله بس ييت اسلم عليج..حرام ولا شو..؟
وسار عنها دون ما يشوفها بس هي ابتسمت من القلب وحست عمرها فراشه وبتطير من الوناسه..وقلبها يدق بسرعه بسرعه...
تنهدت وبينها وبين نفسها
"فديت روحك"

.....................
في المدرسه كانت عفرا في الكلاس تتريا متى يي الاستاذ وكانت ساكته وبعده الكلاس ما انمزر طلاب..وتدري شو بيستوي عقب شوي يوم ان كل اللي في الكلاس بيتيمعون عليها كالعاده يبونها تغششهم..بس هي ساكته ما رمست ويت حذالها وحده من البنات...
عفرا وهي ماسكه الكتاب وتحل كم مسأله وتتدرب عليهن قبل يوصل الاستاذ اللي أجل الامتحان للحصه الثالثه..والطلاب في الصف كانوا كلهم يلعبون ويضحكون وهي الوحيده اللي قابضه كتابها....
ريهام: عفاري ما تعبتي... ؟
عفرا تنزل نظارتها: من شو؟
ريهام: من الدراسه خلصتي الكتاب فوق 30 مره...
عفرا وهي تبند الكتاب: اوكي ما بدرس ..ارتحتي...بس شو تبيني اسوي...؟
ريهام: تعالي نسولف...
عفرا وهي تفتح كتابها مره ثانيه: لاحقه على السوالف...
ونشت ريهام وسارت تيلس عند باقي بنات الكلاس...
فاخره تهمس لريهام: شو قالت لج..؟
ريهام:محد ياخذ منها حق ولا باطل حشى ترمس من طرف خشمها الله يخس العدو فشلتني..والله حسيت عمري اطر منها...
فاخره: عادي من يومها جي شو نسوي بها..
ريهام: بس انا ما درست كنت طول الوقت في راس الخيمه...
فاخره: الله يعين انا ما قدرت افهم شي وقلت لامي توديني عند مدرس بس ما طاعت وقالت خلي المدرس لنهاية السنه...
وشوي ويووهم الشباب...
طارق: شو بنات درستن ولا لاء؟
ريهام: ما سوينا شي بغينا الاخت تغششنا وما سوت لنا سالفه...
طارق: خلها تولي ..مذله هالبنت...
فيصل: برايها بس وين منال ؟
طارق: هيه والله هذي البنت السنعه اللي تغشش عدل...
ولفوا يدورونها وشافوها في اول الكلاس يالسه ويا حمدان وهدى و عذاري و سلطان...وكلهم متيمعين عليها وهي تدرسهم من الخاطر...
ودخل الاستاذ وعلى طول دخلت عفرا كتابها في الشنطه ويلست تقرا بعض الايات والطلاب ارتبشوا ويلسوا كلهم حوالينها وحوالين منال ...بس الاستاذ كان اذكى منهم وحطهم بالاماكن على كيفه...ويلسوا يمتحنون وطبعا غشوا نصهم والنص الباقي يحلون ويكتبون اللي درسوه...
.
.
في كلاس سلامه كانت المدرسه غايبه والبنات جالبين الكلاس فوق تحت سوالف ودق وغنى..وبعضهن يدرس والباقي يلعبون..
غيداء: سلامي وين سرتي في الويكند..
طالعتها سلامه باحتقار: وانتي شلج..؟
عصبت غيداء...ونشت عنهن..
منيره: عيب شو هالاسلوب يا سلامه سألتج سؤال عادي..
سلامه: كيفي مب عايبنها تطلع من الشله..
منيره وهي ما تبى تفرض رايها على سلامه اللي متزعمه الشله: اوكي...
ونشت سلامه وطلعت من الكلاس وسارت بعيد في مكان محد ييلس فيه الا هي.ويلست تتريا متى يخلص الوقت ويستوي اللي في بالها..

الساعه 11:00 الضحى كانت ام خليفه يالسه في الصاله مع بدريه...اللي ما ردت دبي...
ام خليفه: متى بتردون بيتكم يا بنتي...
بدريه: ما نبى نرد..بنتم هني..
ابتسمت ام خليفه من خاطرها وفرحت...وما صدقت بعد..
ام خليفه: علني افدا هالويه يا بنتي..وين ريلج اليوم..؟
بدريه: بسير اوعيه الحين طول رقاده...
ونشت بدريه وسارت حجرتهم فوق...اول ما بطلت الباب لقته راقد...وقربت منه وشغلت الليتات..
بدريه وهي تفتح الستاره: يالله عبادي الساعه 11 لو انك في دبي بشوفك من الساعه 6 وانت ناش..
بس عبدالله ما تكلم...ولا تحرك مول..وقربت منه وحطت ايدها على كتفه وهزته بحنان..
بدريه: عبادي يالله مب ناوي تنش ولا شو سالفتك...
بعد عبدالله ما تحرك ...
بدريه: حشى مب رقاد اوادم هذا...سبات دببه..يالله عبادي شو هالحركات نش امك تتريانا في الصاله...
وسارت له من الجهه الثانيه وشافت ويهه..
بدريه: لحوول عبدالله نش عاد والله رفعت لي الضغط شو من حركات هذي...
ويلست على الشبريه وتربعت: انا زعلت لا ترمسني عنبو ساعه ارمسك ما ترد علي يالله نش..
وسحبت عنه اللحاف وشغلت المكيف والجو كان بارد....بس بعد عبدالله ما تحرك..وتمت تهزه وتوعيه بدون فايده...
بدريه وبدت تعصب: والله انك سخيف يالله نش...عيب عليك والله...
واخر شي نشت من عنده وسارت من وراه ويلست حذاله ويودت كتفه وهزته شوي..بس عبدالله ما تحرك ولا نص حركه...
وبدريه الحين صدق خافت وقلبها دق بسرعه...وحست بشي غريب...قلبها كان يتنافض وما تدري شو الاحساس المفاجئ اللي ياها...
وبصوت كله خوف : عبدالله الله يخليك بس نش ثواني اعرف ان مافيك شي وعقب رد ارقد...
وحطت ايدها على يبهته تتحسس اذا محموم ولا لاء...بس كان عادي وحتى شوي كان جسمه بارد...
زاغت بدريه وحست بالموت في عظامها وتمت تحركه..واخر شي بتلقائيه دمعت عيونها..
وبصوت كله تعب ومختلط عبرات ومتحشرج: عبدالله ارجوك نش...
عبدالله يوم سمع حسها هالشكل بطل عيونه وانفجر ضحك....وتم يطالعها وهي تمسح دموعها...
عبدالله: ابيييه والله ما توقعت تصيحين حرام حبيبتي....والله كنت امزح معاج...
بدريه مبطله عيونها وفرته بالمخده: صج انك ما تستحي ولا تخيل ..مسود الويه..
ونشت عنه بس قبض ايدها...
عبدالله يضحك مب رايم ييود عمره: والله دشيتي وكنت بنش ....بس يوم شفتج مستانسه قلت بزيغها شوي...كنت بكمل لين ما تموتين من الزياغ بس صراحه ما روم لدموعج...
بدريه محرجه: صدج انك سخيف كل هذا عشان تطفر بي..اصلا انا ما زغت هذي حركه عشان اخليك تنش..
عبدالله ما رام يسكت ويضحك من قلبه وهي محرجه على الاخر:هيه صح مبينه انها حركه..حتى الدموع شكلها مصطنع...
بدريه وهي تطالعه بنظره حاده: دمك ماشي اثجل عنه..بس ما عليه يا بو حميد مردوده..
ونشت وهي معصبه...
عبدالله وهو ينش من على الشبريه ويضحك: انتي محد يمزح معاج..؟
بدريه وهي ترتب اللحاف وتبطل الليتات: مزحك بايخ...
ونش عبدالله الحمام وسار عنها وهي طلعت وسارت تييب له الريوق..
..................
الساعه 12:30 نشت شيخه ويلست على الشبريه تطالع يمين ويسار..ونزلت علىطول وبطلت باب الحجره وسارت عند الدري ووقفت كالعاده تتريا حد يي يشلها لانها تخاف تنزل من فوق...
تعبت من كثر ما تتريا واخر شي يلست على اول درجه تتريا حد يي يشلها...
كانت ام راشد في الصاله بس ما سمعت حسها.. يوم ملت من كثر ما تتريا..
شيخه تزاعج: ماما...
سمعتها ام راشد ونشت ووقفت لها تحت وتطالعها وهي متقبضه في حدايد الدري...
شيخه: تألي ثليني...
ام راشد وهي تطالع فوق: وين اطلعلج..انا ما روم امشي خطوه تحت تبيني اطلع لج فوق...يالله خلي البزا وانزلي...
شيخه بعصبيه: ماليد تالي اتي..
ام راشد: يا بنتي سمعي الرمسه وانزلي..
شيخه: احاف احاف ماليد تالي..
ام راشد: لحوول شو من بنيه انتي..؟
شيخه وقربت تصيح: اليد امي وين امي...
ام راشد وهي متضيجه: امج الله يرحمها من وين اييبها لج...انزلي يالله...
شيخه: اتي طفثه طفثه...
ام راشد وهي مبتسمه: زين انا طفسه بس انتي انزلي...
شيخه معصبه: لوحي ماليدث ماليدث..وين امي...
ام راشد وهي سايره عنها: برايج تمي فوق لين ما تييج عمتج..
وراحت ام راشد وما تمت وياها...وسارت الحوي تزقر البشكاره اللي يتها على طول...وطلعت تييب شيخه وغيرت لها وحطت لها اكل ويلست تلاعبها..
..................
الظهر كانت حصه تشتغل وما رمست ليلى مول...وليلى بعد ما تكلمت خلاص تعودن على هالاسلوب..وكل يوم او تقريبا بين وقت واخر لازم يستوي بينهن خلاف بسبة هالموضوع....صارت الساعه 1:30 ودقت ليلى على البيت عشان ترمس شيخه...
ليلى: السلام عليكم..
شرملى: وعليكم سلام..
ليلى: شرملى شواخي نشت...؟
شرملى: ايوه..صبر ماما دقيقه هي يجي...
وسارت ويابتها للتلفون...
شيخه: الووه...
ليلى: هلا حياتي..
شيخه اول ماسمعت صوت ليلى: ماما تأاالي..
ليلى: زين حياتي بعد شوي بيي..
شيخه: انا بلوح يالله تألي...
ليلى: خلاص زين حياتي ...كلي عدل..وانا بييب لج حلاوة...
شيخه:ذين..
وصكرت عنها...
وطالعت حصه ولقتها يالسه تسوي typing لتقرير بتسلمه الساعه 2:00....
ليلى: ما بترمسين..؟
حصه رفعت راسها: يوعانه شو رايج نسير نتغدا...
ليلى: وين..؟
حصه: في بيتكم..
ليلى مبتسمه: والله..؟
حصه: هيه..
ليلى: لا تقصين علي ارجوج...
حصه مبتسمه: عادي بتغدا عندكم بس بيكون الوداع الاخير وعقبها بيقطعوني اخواني...وبيحطوني في اكياس وبيوزعوني في غابات منغوليا ..للذياب اليواعى...
ليلى: اوكي مب مشكله اهم شي تقضين اخر يوم عندنا...
حصه: طفثه...على قولة بنتج شواخي...
ليلى: ارمسها توني تقول..اذا ما ييتي انا بروح..مادري بها وين بتروح...والله البارحه في الليل ما خلتني ارقد تتنطط ومحتشره وفرحانه بالظلمه...
حصه: شفت ناصر مر عليج الصبح وانا راده المكتب بعدين قلت ما بخرب عليكم ورديت عند مشاعل...
ليلى مبتسمه: وخير وشو يعني..وشو مثلا بيقول لي...؟ حصووه خلي الخبال عنج..اصلا ناصر ما يداني هالسوالف..بنت خاله لازم يي يسلم عليها..
حصه: هيه صح..على فكره مشاعل الكويتيه تسلم عليج...
ليلى: فديتها والله..قبل يخلص الدوام بمر عليها...
حصه: لا خلاص راحت اخوها يالها وخذها ..قالت بتسير البيت عندها وحده رفيجتها على قولتهم بتيي تزورها وتبى تجهز الشقه...
ليلى: يا حليلها والله...
حصه: باقي 10 دقايق ويخلص الدوام يالله متى بتودين التقرير..
ليلى: الحين ..انتي خلصتي..؟
حصه: باقي شوي سيري سلمي وانا بيي...
وطلعت ليلى بتسير الاداره القسم الخاص عشان تسلم اخر تقرير في مجال مبيعات الشركه لهالموسم...وفي الوقت اللي طلعت فيه ليلى من المكتب ..حمد سار عند حصه..ودق على باب المكتب...
حصه: تفضل..
ودخل حمد يوم رفعت راسها وشافته ابتسمت...
حمد طالعها بنظره..
حصه: شو فيك..خير..؟
حمد: سمعي الحمدلله يوم ان ليلى مب موجوده هني...ابى اقولج كلمتين واطلع...
حصه قلبها دق بقو..خوف على ربكه على احساس كبير بالرعب...
حصه: امر شو..؟
حمد: شو اللي يوديج مكتب مشاعل الكويتيه..شو تبين فيها...انتي يايه تشتغلين ولا تسيرين على الموظفات...
حصه مبطله عيونها: وانت شعليك..؟
حمد بضيج: شو..؟
حصه تراجعت في رمستها: اقصد شو اللي مضيج بك..ليش تعرف شي ولا سامع شي عنها..؟ شو بلاها البنيه طيبه ومزيونه..
حمد يقاطعها ويرمسها باحتقار: اقول سكتي سكتي وطبي لسانج بثمج..ما يخصج فيها ولا تسيرين مكتبها..وجان رمستيه هب عايبتنج اقولج ان شفتج في مكتبها ولا تسولفين وياها اعتبريها مفصوله من الحين..وانتي وضميرج لو ترضين تفصلين أي بنت من شغلها...
حصه نشت من مكانها وطالعت حمد بغرابه: انت شو تقول...شو وراك يا حمد..؟ وعلى شو ناوي..انت ليش مستوي جي..؟ والله انت ما كنت هالشكل..شو اللي غيرك..تعوذ بالله من ابليس ومحد يبى منك شي...بس رد حمد ذاك الادمي الاولي...علىالاقل حسن من صورتك جدام الله وخلقه...
حمد وهو بعده محرج: ما ييت اخذ عندج درس في الادب..حصووه شوفي شغلج واسكتي ...جانج تبين البنيه تتم في شغلها...
وطلع من عندها..وهي يلست على الكرسي وحست بمشاعر غريبه في داخلها وتناقض فضيع...
" حمد شو يبى من مشاعل..اعرفها البنت محترمه ما عندها لف ودوران...بس ليش ما يباني اسير لها...شو سالفته هذا انا اريد افهم..؟"
ومسكت راسها وحست بصداع فضيع..وحست بالدنيا تدور بها...هي تعرف ان حمد راعي بنات وسوالف بطاليه..تعرف انه يرمس وحده اليوم وباجر يرميها ورا ظهره...
تعرف كل شي عن حمد...بس مع هذا تحبه..تحب جبروته وغروره..دوم تعودت على السلطه والقياده...بس تبى تجرب يوم من الايام حد يمارس جبروته عليها...تستلذ بتعذيب حمد لها...في قلبها حب كبير ولكن في نظر الناس...لشخص اخطأت في اختياره...
" لا لا هذا شو يبى في مشاعل...لا حووول لازم نتنكد على اخر اليوم...حسبي الله على ابليس..."
ودخلت ليلى..وحصه سوت عمرها طبيعيه قد ما تقدر...وابتسمت...بس وين على من..؟ لو قصت على كل العالم كل حد تقدر تخبي مشاعرها عنه الا ليلى...
ليلى قربت منها: شو فيج حصوه..؟
حصه: ماشي يالله نروح الساعه 2:05 تأخرنا...
ليلى وهي تطالعها بغرابه: زين يالله نسير..بس سلمتي التقرير...؟
حصه: بزواله..مب الحين باجر الصبح...
ليلى: على راحتج...
وهن يجمعن اغراضهن....مر ناصر من عند المكتب وطل براسه وشافهن بس ما شافنه وروح على طول..وفي خاطره..وهو مبتسم..
" اهم شي اني اشوفها قبل اطلع.."
طلع ناصر ويلس في موتره...وشاف ليلى وحصه طالعات وركبن ويا الدريول...ويوم شافها روحت على طول سار البيت...وفي الدرب..
وكان حاط الاف ام
"محطات الظهيره"
مبتسم مايدري ليش..هالمزاج الحلو من الصبح..واللي زاده ان رمس ليلى اليوم...يحس في شي مختلف..بس بعد هو يخاف من شعوره بالفرح لانه يخاف من الصدمات عقب..
"لحوول شو فيني مستوي مراهق اليوم...والله حاله.."
وطالع ويهه بالجامه...وكان مبتسم..ويلس يرمس روحه...
" انت الله يستر منك..ليش فرحان انا ابى افهم..شو اللي مفرحنك هالكثر.."
ووصل البيت ودخل السياره ونزل عند اهله..
................
الساعه 2:45 كانت ليلى تبدل ثيابها...بس بعدها للحين ما شافت حد منهم..ولا حتى شيخه...بس كانت تفكر في ناصر ..ما قدرت تتخيل شكثر استانست اليوم على اللي صار رغم انها تكابر دايما ولا تبين شوقها..وسارت عدال المنظره وابتسمت بفرح..
" الله يا ربييه والله اني متقطعه من الوناسه..فديت روحي...بتخبل والله.."
لفت شعرها بسرعه..وطاحت خصله على يبهتها....ورفعتها ..اول ما شافت ويهها في المنظره...كانت تحس انها مشرقه وفي عيونها لمعة حب وامل وشوق...خدودها كانن حمر...
تنهدت...وابتسمت مره ثانيه وثالثه..وحست عمرها اليوم مختلفه....
" يا ربي كم تسوى عندي نزلته من فوق عشاني..."
وعند الباب...
شيخه: ماما افتحي الباب...
انصدمت ليلى انها اليوم ما فكرت مول عقب ما ردت انها تشوف شيخه....وركضت للباب وبطلته...وشلتها ولوت عليها...وشيخه مستانسه..
شيخه: ماما حبيتي...
ليلى وهي تبوسها: حبيبتي والله فديت حياتج...
وسارت وطاحت ليلى على الشبريه ويلست شيخه فوقها....
ليلى وويهها احمر: فديت روحج هذا وانا بس افكر فيه نسيتج...لحوول ما بسامح عمري ابداً..
شيخه حطت راسها في حضن ليلى...
شيخه: ماما حبيتي اتي..
ليلى: وانتي حبيبتي بعد...شواخي تغديتي..؟
شيخه: لا لا ماليد...
ليلى وهي تنش: تعالي بنروح عند يدووه وبنييب الغدا...
شيخه تمد ايديها عشان تشلها ليلى...ونشت وياها ونزلن تحت..
...........
ردت حصه البيت وكانت بعدها تحت تأثير رمسة حمد...سلمت على اهلها وطلعت فوق...ومرت على حجرة بدريه..بس لقتها مبنده...اول ما دشت الحجره شافت سمر..
حصه وهي تتنهد: يارب..
وونزلت عباتها ووقايتها...
حصه: ممكن تطلعين لين ما ابدل ثيابي...؟
سمر: اوكي..
وطلعت سمر وحصه بدلت...وبطلت لها الباب ودشت...وبندت حصه الليت بترقد..
وانسدحت سمر بعد تبى ترقد...
حصه وهي لافه ويهها صوب اليدار: سمر...
سمر: هاه..
حصه: قوم عبدالله خويه ساروا.؟
سمر: لا بعدهم...بس الحين يرقدون في حجرة سلامي ختيه...
حصه: ما سمعتي متى بيردون..؟
سمر: اليوم على الغدا عبدالله اخويه قال انه يبى ييلس في بوظبي لين ما بدريه تطلب انها ترد دبي...
صخت حصه....وشكلها رقدت...
سمر: حصوه رقدتي...؟
يوم ما ردت حصه...سمر على طول تلحفت ورقدت..
...........
في الصاله الكبيره اللي مجابله الحوش...كانت البشكاره تحط الغدا على السفره..ويلست ام ناصر وابو ناصر..وناصر واخوه فهد...
ابو ناصر:شو هالغدا الزين يا ام ناصر...
فهد: ما يحتاي امايه ماتقصر طباخها لا يعلو عليه...
ام ناصر: هني وعافيه...
ويلسوا يتغدون وناصر ساكت ما رمس...بس محد انتبه..لان هذي حالة ناصر من يوم المشاكل ويا ابو ليلى...صح ياخذ ويعطي ويا اهله..بس بعد قلبه على ليلى..ويدري انه مهما صار مستحيل يتخلى عن حبه لها..ولو ان كل الظروف ضده..ولو انه يلاقي صعوبه كبيره انه يقنع نفسه ان ليلى ابعد عليه من الشمس..وانها مجرد خيال في خيال..لكنها حب باقي... عمر الايام ما تمحيه...يعرف ان زواجه من ليلى مثل اللي يمد ايده يبى يطول نجمه ويودها بإيديه...
فهد: اخوي ناصر بلاك ما ترمس...شي يعورك..؟
ناصر مبتسم: لا بخير الحمدلله..ما تشوفني اكل..عمرك سمعت عن مريض شهيته مفتوحه..؟
بو ناصر يبا يغير الموضوع: فهد شو مسوي في الدوام..؟
فهد: ما شي الحال..بس بعدني ما تعودت على خلق الله اللي هناك...
ناصر: شو رايك تيي عندنا الشركه..يعيبك هالنوع من الشغل...
بو ناصر بضيج: لا يا ناصر يكفي انت..ما نبى شي من بيت خالك واهله..مادري شو اللي بالشنك بالشغل وياهم..؟
ناصر: يا بويه الله يهداك ما دريت بك الحين..انت متضيج عشان حق امي..والحين تقول لي ليش اشتغل وياهم..؟ بعد شغلي ولازم اعطيه حقه...
فهد: كنت تقدر تشتغل في أي مكان مب لازم وياهم...
بو ناصر: هذا اللي قدروا عليه..عطوك مكتب في شركتهم وقصوا عليك..
ناصر: ابويه محد قص علي الحمدلله انا ريال ما ينقص علي..وهذا اللي قالوا انه حلال امي..هذا انا اشتغل فيه...
فهد: وايد عليهم..وباقي الحلال لهفوه ما يستحون..ابى افهم كيف قادرين ياكلون ويرقدون وعايشين حياتهم وكل ملبسهم ومشربهم ومرقدهم حرام...
ام ناصر كانت ساكته ما رمست ولا قالت شي..ومب جنه الي يرمسون عنه المرحوم اخوها وعياله...
ام ناصر تمت صاخه ما تدري شو تقول..صعب عليها تعارض عونها وسندها..وفي نفسها..
"الله يرحمك يا خويه...ويغفر ذنبك..ما ودي كل هذا يصير وانت عايش..عاد وانت ميت...ربي يرحمك برحمته..."
بو ناصر: هاه ام ناصر اشوفج ساكته مب جنه الموضوع يخصج..؟
ام ناصر: بزواله المال اللي يفرق بين الله وخلقه...
بو ناصر مبتسم بسخريه: بعد شو يا ام ناصر..الحين كل هاللي يصير وانتي بعدج تقولين مسامحين..انا ما ابى شي لي..كله لعيالج ولج انتي...
فهد: الله يغربلك يا راشد يا ولد خالي...حسبي عليك الله وعلى كل اهلك...
ام ناصر وهي ضايجه ونشت من على الغدا: لا تدعي على هلك يا فهد وقل ربي يسامحه...حسبي الله على ابليسكم..وانت يا بو ناصر لا تعلم عيالك ولا تزرع في قلوبهم كراهية عيال خوالهم....
بو ناصر مبتسم بخبث: شو اللي ينحب فيهم اصلا..آكل مال الحرام من اللي بيحبه...
وسارت عنهم ام ناصر..وناصر على طول نش ولا رمس بالموضوع..وسار حجرته وقفل الباب ورقد.

الحلقه السابعه
الساعه 5 العصر كان التلفون يدق ومحد يرد عليه..ووقف ورد يدق مره ثانيه...محد كان في الصاله الا شيخه تشوف سبيس تون...ومطنشه التلفون..وهو يدق ويبند لروحه وعقب يدق..عصبت الاخت ونشت بسرعه....وشلت السماعه وحطتها عدال اذنها بالمجلوب...
شيخه وهي معصبه وتتحرطم: اتي ثو تبين..؟
فاطمه: وين يدتج...؟
شيخه: اتي من.؟
فاطمه: سيري ازقري يدتج...
شيخه: اتي خاثه كم مله تتثلين لوحي بيتكم..
فاطمه مبتسمه: سيري ازقري ليلى...
شيخه: اتي تليدي ماما...؟
فاطمه شي قبض قلبها: هيه سيري ازقريها...
وسارت شيخه تشوف التفزيون وودرت السماعه ونست سالفتها...ويا راشد من برا ودخل الصاله...واول ما شاف السماعه عدلها...ودخلت وراه سلامه على طول...
راشد: سلامي وين يدتج..؟
سلامه: مدري بها وين ...يمكن مسيره على عربها...
راشد: شو من ياهل هذي مخربطه الدنيا وفاره السماعه على الارض...
سلامه: شيخه تعالي...
ويتها شيخه ويوم شافت راشد صخت وتمت تطالعه وهي حاطها صبوعها في حلجها وشكلها خايفه على مرتبكه ...
سلامه بعصبيه: ليش عقيتي السماعه ..؟ تبيني اضربج..؟
راشد: وديها عند عمتها...
شيخه بدت تحس عمرها وحيده وفي اثنين جدامها يرمسون بزعيج واصواتهم بالنسبه لها جافه وما فيها أي حنيه...
زعلت شيخه وشكلها بتصيح....وراشد طلع...
شيخه بخوف: اليد امي...
سلامه بنذاله: محد امج راحت....
شيخه وخلاص بتنفجر: اليد امي...
سلامه بحقاره: تبين بابا...؟
شيخه: لاء لاء اليد امي...
وضربتها سلامه ضربه خفيفه على خدها...ومدت بوزها وقربت تصيح بس ما رامت كانت تحس بوجود راشد وما رمست مع انه طلع...
وراحت تركض ويلست تحت الدري...
سلامه انتبهت للسماعه وشلتها...
سلامه: الو...
فاطمه: السلام عليكم..
سلامه: يا هلا ومرحبا وعليكم السلام...
فاطمه: وين ام راشد..
سلامه: مسيره على عربها...
فاطمه: زين ليلى بنت ناصر موجوده...
سلامه:عمتي موجوده...ازقرها..؟
فاطمه: لا فديتج ماله داعي...بس قولي لها فاطمه بنت سعيد بن مطر بتيي..
....................
في بيت بو خليفه كانت عفرا يايه صوب فلة يدها...وهي في الدرب شافها عمها عبدالله وهو ساير صوب موتره...
عبدالله: وين عفاري...؟
عفرا: بسير عند يدوتي وعماتي بسلم عليهن..
عبدالله: غريبه ما بتدرسين...؟
عفرا: اليوم قدمت امتحاني وان شاء الله ابيض الويه...
عبدالله: والمفعوصه الثانيه...؟
عفرا وهي رايحه: ما ادري بها...
دخلت عفرا الفله وشافت يدتها وبدريه وحصه وامها ساره...وسلمت عليهن..
ساره: فديتها اللي يت..
عفرا مبتسمه: متى ييتي امايه توني واصله من المدرسه وقلت بيي اسلم على يدوه وتحريتج في البيت...
ساره: توني ييت...وين اختج...؟
عفرا: رقدت...
عفرا ما تحب تيلس عند حد واذا يلست تكون شوي بعيده ما في أي احتكاك بينها وبين حد منهم...بس اول ما حدرت الصاله يلست بهدوء حذال بدريه..
بدريه اللي تموت في عفرا من يومها...وعفرا مهما كابرت وحطت عمرها في موقف غموض..ما تقدر تنكر هالشعور بالامان والحب اللي تحسه وهي حذال بدريه...
بدريه وهي مبتسمه: حبيبتي اسوي لج شي تشربينه..؟
عفرا: لا مشكوره فديتج...
حصه بطلت عيونها: لا لا مستحيل اصدق...عفرا تتفدا حد غير ابوها والله مستحيل..عيدي يالله عيدي ابا اتأكد..
ساره: لحوول يا حصوه ما بتسكتين عن بنتي...
ونشت بدريه وسارت المطبخ...وهن كملن سوالفهن..وردت بدريه ووياها صينيه..فيها قطعة كيك وكوب عصير...وحطته لعفرا..اللي ابتسمت ابتسامه عذبه نادرا ما حد يشوفها...
عفرا بخجل فضيع: فديتج عمتي ما كان في داعي تتعبين عمرج...
حصه نشت من مكانها:لا اليوم بنت اخويه فيها شي...شو مستوي بج غناتي...شي متعبنج..؟
ام خليفه(ترمس حصه): الله يهديج يا بنتي ويهدي سرج..شو مستوي بج...؟ بلاج تخبلتي ما خليتي حد في حاله...
حصه وهي رايحه فوق: خبله من يومي ما شي امل اني اعقل...
ساره: الحين بتسير تتحرش في سمر...
يضحكن عليها....
بدريه: انا بسير اتمشى برا في الحديقه حد بيي وياي..؟
ساره وام خليفه ما قامن...
عفرا: انا عمتي بيي وياج..
وطلعت بدريه وعفرا يتمشن برا..
................
ناصر كان في موتره..ساير بيت عمته وحاط الاف ام ويسمع اغنية ميحد.."السوالف"..ومبتسم وبعده المود عنده توب ومستانس..وامه كانت وياه...
ام ناصر: يا ولدي بند هالشياطين ولا هب راكبه وياك مره ثانيه..
ناصر: حرام عليج يمه كلهم شياطين الا ميحد هذا شيخهم كلهم..
ام ناصر: لا ميحد ولا غيره..يا ولدي الله يهديك وانت في الدرب حط لك محاضره دينيه ولا شريط قرآن عشان الله يسهل دربك..
ناصر مبتسم: ليش جي تقولين..اعرفج تقصدين انج تبيني اموت وانا اسمع قرآن بدل الاغاني..
ام ناصر فز قلبها: عوذ بالله من فالك ..يعل يومي قبل يومك..ويعلك تصلي على قبري يا ولدي وتغطيني بالتراب..ويعل عيني ما تبكيك يا ناصر...
ناصر: ما شاء الله عليج امايه رمستج موزونه تقولين شاعر..
ام ناصر محرجه: بتسوق وانت ساكت ولا بتشوف..يالله جدامي بند هالرادو لا تخليني احرج عليك ومن اليوم ما اباك تحط هالاباليس وانا راكبه وياك الموتر...يوم انزل تسمع على كيفك..عقلك في راسك وتعرف خلاصك..وانت ادرى بالدين والعلم مني..
ناصر وهو يبند الاف ام: لا حووول قلبتي لنا مفتيه..خلاص امايه بندته ..ارتحتي...
ام ناصر مبتسمه: زين جي..
ووقف موتره جدام البيت..ويت ام ناصر بتبطل الباب..وقبض ايدها ناصر...ولفت عليه..
ام ناصر: بلاك ..ما تباني انزل..؟
ناصر: امايه صبري برمسج كلمتين...
يلست ام ناصر عدل: هاه ولدي شعندك..؟
ناصر:امايه فديت روحج طالبنج طلبه قولي تم..
ام ناصر: هب قايله لين ما اسمع شدراني فيك شو تباني اسوي لك من منكر..
ناصر: لحوول يمه قولي تم دخيلج..
ام ناصر: تم..
ناصر: حلفت عليج برحمة خالي ناصر ما تفتحين مع عمتي أي سالفه عن أي عرس ولا تييبين طاري اروى مول..دخيلج خلنا نيلس مع بعض مره وحده بدون سوالف تغث يا يمه فديت روحج..
ام ناصر بطلت الباب ونزلت دون ما ترد عليه بكلمه..
ناصر يتنهد:اففففف يا رب شو هالحاله...
ونزل من الموتر وسار صوب الميالس..
......................
في حجرة ليلى كان قلبها يدق بسرعه اول ما قالت لها سلامه من اللي اتصل..طلعت سلامه برا ويابت شيخه الحجره وصكرت الباب ولوت عليها بقوه..وغمضت عيونها وهي لاويه عليها...حست بخوف ورعب حست ايديها تتنافض وما قدرت تيود عمرها...كانن عيونها يحرقنها تبى تصيح بس بعد لازم تكون قويه...
"ليش اصيح..انا مب خايفه...ليش اصلا شو اللي بيستوي..لا والله ماريد اصيح حرام...لازم اكون قويه..هذي انا اولى فيها من غيري"
بالبقيه الباقيه اللي فيها من القوه نشت ليلى وشلت ثياب شيخه...
شيخه وهي تدز ويه ليلى: انا ماليد ثبح لوحي...
ليلى بضيج وهي تسحب القميص عن شيخه: مب ناقصه دلعج يالله اص ولا كلمه...
شيخه صاحت وهي تطالع ليلى ترمسها بعنف وهي قبل شوي سامعه هزبه تحت من عمها راشد وسلامه..والحين عمتها ليلى...وانفجرت صياح...
هني ليلى حست عمرها تعبت اكثر...ودمعت من القهر وشيخه تصيح لوت عليها وصاحت وياها...
يوم سكتت شيخه كانت ليلى لاويه عليها بقوه وطلعت عمرها من حضن ليلى وشافت ويهها مخيس دموع..
شيخه: ماما ليث ثيحين..؟
تنهدت ليلى ويابت حق شيخه ثياب يداد وما سبحتها...ولبستها احلى لبس ومشطت لها شعرها اللي مسوتنه لها قصه حلوه قصيره بس بعد قصه بناتيه لليهال..
وهي لبست لها ثوب مخور ولبست وقايتها ونزلت....وطلبت من البشاكير يسون العصير والفواله وان في حد بيي...اذن المغرب وسارت تصلي وحمدان ياها الحجره...وشاف شكلها مب طبيعي...
حمدان: عمتي ليلى شو بلاج..؟
ليلى : ماشي بس بتيي عندي حرمه...
حمدان: عمتي شكلج ضايج...شو فيج...
ليلى تتنهد: حمدان شو مسوي في الدراسه وشو سويت في امتحان اليوم...؟
حمدان: الحمدلله اوكي بس كم مسأله خليتها فاضيه ما عرفت شو اسوي فيها مول...
ليلى: ليش تخلي شي فاضي اكتب حتى القاعده على الاقل نص درجه احسن من صفر...بس الله يوفقك يارب..
حمدان : ان شاء الله..
ليلى: من زمان ما ييت عندي ولا يلست وياي شو سالفتك ليكون حد ماخذه عقلك...؟
حمدان: لا والله بس تعرفين انا وعدتج ادرس وهذا انا درست وبتشوفين نتايجي يوم الاثنين...
ليلى: فديت روحك ان شاء الله من الاوائل...
حمدان:لا عاد عمتي هذي مستحيله...
ودخلت سلامه..
سلامه: عمتي في حرمه دخلوها ميلس الحريم تباج..
نقز قلب ليلى وما عرفت شو تسوي..عدلت وقايتها ودورت شيخه بعيونها في الحجره بس ما لقتها...
ليلى بعصبيه: وين شيخه..؟
سلامه مستغربه: شو فيج عمتي بسم الله عليج..هذي شواخي يالسه تلعب على الشبريه شو ياج..؟
ليلى تتنهد بخوف: شيخه تعالي...
كانت ليلى اليوم كبريت وخلاص دقني وانقع مب قادره تسوي شي...وكل شغلها بعصبيه من اول ما يتها المكالمه..شلت شيخه وظهرت من الحجره..
اول ما دشت ميلس الحريم سلمت على الحرمه ويلست شيخه حذالها ...بس وين تيلس شيخه...لازم التعبث والتدمير...ونشت للمخدات وجلبتهن كلهن...وسارت صوب الورد والزينه اللي حاطينها حذال الباب وبدت تشتغل وتنتف ولا عليها من حد...
فاطمه: شحالج يا ليلى...
ليلى وبعد الارتباك واضح عليها: بخير ربي يسلمج...اخبارج واخبار الوالده..؟
فاطمه مبتسمه بهدوء فضيع: الحمدلله يسلمون عليج الغاليه..
ليلى نشت: دقايق وبييج بسير اييب لنا شي نشربه...
اول ما طلعت ليلى نادت فاطمه شيخه وهي تطالعها حست شي يقبض فوادها....
فاطمه: تعالي حبيبتي..
شيخه وفي عيونها نظرة شطانه: لوحي بيتكم...هذا بيتنا..
فاطمه مبتسمه: فديت روحج يا ربي...
وبطلت شنطتها...وطلعت منها حلاوه ومدت ايدها...شيخه يوم شافتها ما قدرت تقاوم مع انها مول ما توالف حد حتى خلود حرمة راشد...بس يوم السالفه فيها حلويات نشت وعلى طول نطت ويلست فوق ريولها وفاطمه لوت على شيخه وحبتها وما قدرت اكثر تمنع نفسها وصاحت على طول...حست فوادها يحترق وحست بألم فضيع...هذي البنت اللي يالسه فوقها نسخه طبق الاصل من سعاد...
"فديتج يا اختي ما لحقتي تشوفين هالملاك...الله يرحمج برحمته."
كانت شيخه مشغوله تاكل الحلاوه وفاطمه طلعت كلينكس من شنطتها ومسحت دموعها قبل لا حد يي...ويلست تطالع فيها وتسولف لها وهي فوق ريولها وشيخه تطالعها مبتسمه وتخيس ويهها كاكاو...وتطلع لسانها وتمسح به الحلاوة اللي على شفايفها...
شيخه وهي تطالع شنطة فاطمه ومبطله عيونها على الاخر: بعد عندث حلاوة..؟
فاطمه حبتها بقوه على خدها: لا ما عندي..
شيخه طالعتها بعصبيه ومسحت مكان البوسه: خاثه اتي عولتيني..
دخلت ليلى معاها دلال القهوه والشاي والبشكاره وراها يايبه صحن الفواله..
واول ما شافت شيخه يالسه فوق فاطمه..قلبها انقبض وما تدري ليش حست بغيره وقهر...
ليلى: شيخه انزلي عيب...
فاطمه: خليها نحن ما نشوفها الا في السنه مره...
ونشت شيخه...
فاطمه: وين بتروحين حبيبتي...؟
بس شيخه ما رمست وسارت على طول ويلست فوق ليلى....
شيخه وهي تأشر على ويهها انه متخيس وبدلع: ثليه ثليه..
يودت ليلى كلينكس ومسحت الكاكاو عنها....
شيخه تعلقت فيها و حبت ليلى في رقبتها: ماما حبيتي...
توردن خدود ليلى من المستحى...
"لحوول يا شيخه هذا وقت ماما الحين"
فاطمه حست بغصه..وقهر كان ودها تقول لليلى..ليش شيخه تناديها ماما...شيخه امها ماتت من زمان..ومافي أي انسانه تستحق تكون ام شيخه غير سعاد...
فاطمه تتقهوى وهي ساكته كان في الميلس برود فضيع والرمسه كانت مختصره...فاطمه اخت المرحومه سعاد كانت يايه تزور بنت اختها وتشوفها..وكانت يايه ترمس ليلى وتقولها انها تبى تاخذها كم يوم عندها بس ما قدرت ..حست في ارتباط فضيع بين ليلى وشيخه..وحست من نظرة شيخه انها مستحيل تودر ليلى ثانيه..
نشت فاطمه واستأذنت بتروح وليلى حست براحه فضيعه يوم شافتها قامت..ولا حتى قالت لها تتعشى ولا شي ما صدقت انها بتطلع...وسلمت عليها ببرود من الطرفين ولوت فاطمه على شيخه وطلعت واول ما عقت غشوتها على ويهها ما قدرت تشوف الدرب من الدموع اللي خيست ويهها...


جدام الشركه الساعه 7:30 المغرب وقف حمد موتره ويلس دقيقه يتسفر ويتعدل..خلاف نزل ودخل عشان يوقع ويستلم كل شي من شركة ظبي الخليج نفس ما وعد ناصر اليوم الصبح...حمد رغم كل شي بس مخلص في شغله ويتحمل اشغال وايده..وكل شي يعجبه يأجله لين عقب الشغل..ومخليه من اولوياته...
دخل داخل وفي غرفة كبار الزوار يلس يتريا وشوي ودخل عليه العامل يقول ان المندوب وصل...حرج حمد وتغير شكله...
"الحين انا بكبري يطرشون لي مندوب صج انهم مضيعين المذهب.."
وشوي ودخل عليه المندوب وسلم...
جهاد: هيدي كل الاوراء اللي حكينا عنا..والبضاعه والمبيعات كلن هون...بتأدر تأرا العأد وتشوف لحالك كل شي...
حمد من طرف خشمه: اوكي حط الاوراق بشوفها...
جهاد: تفضل...
ويلس جهاد وحمد يلس بعد...وتم يقرا..بس حمد طول والظاهر شاف ان السالفه صعبه شوي....
جهاد: طولت وايد يا استاذ حمد...
رفع حمد راسه وبنظرة احتقار طالع في المندوب جهاد وتم يتحرطم
" يا شين رمستنا في حلوجكم لي نطقتوها "
جهاد: اخوي وقع لو سمحت انا عندي شغل تاني...
حمد: عنبوك مافيك صبر مب ادمي انتي..خيبه تخيبك وعلك ما ترد..اصبر علي هذا عقد..
جهاد: بس انا عندي شغل...مش فاضي..
حمد: يعني شو شايفني مثلا اتسكع من شارع لشارع..ماشاء الله شركتكم فروعها في كل الخليج..ما حصلت الا انت تطرشك لي..وتقول لي بقواة عين انك مشغول..سود الله ويهك..انا عمك يالهرم...
جهاد: لك خلصنا يا عمي...والله ماني عارف شو بتؤوول...
اتصل حمد بناصر وقاله كل اللي في العقد وعرف ناصر السالفه وعقبها وقع حمد وخلص الاوراق واستلم كل شي...
حمد: يالله انجلع من ويهي خلني اشوف شغلي...
وطلع جهاد وهو يتحرطم ويدعي على حظه اللي رماه في هالموظف اللي يسد النفس و اسمه حمد...

في حجرتها كانت حصه تذاكر لسمر عليها باجر امتحان علوم ويالسه تسمع لها...وتعلمها كيف ترسم الجهاز الهضمي وتحفظ اجزاءه..
سمر: زين الحين الرسمه حفظ ولا لاء...؟
حصه: مدري بها شو قالت لكم المس...بس ما اعتقد انها حفظ لا تحفظينها..
سمر: حرام نسيت ابى اعرف...
حصه: دقي على وحده من ربعج وتخبريها...
سمر: لا مب وقته يالله كملي شو بعدين اسوي..؟
حصه: تبين تلفوني تدقين منه..؟
سمر:لا لا بتغثني وما بتبند ادري بها...
حصه: اوكي والحين شو تبين...؟
سمر: قولي لي شو اسوي ...
حصه: انتي سيري احفظي التفاصيل وانا برسم الجهاز الهضمي وعقب بمتحنج في اجزاءه...
سمر: زين...
شلت حصه الكتاب ويلست ترسم لسمر الجهاز الهضمي...وشوي ويدق الباب...
حصه: ادخلي مبطل...
بدريه بطلت الباب ودخلت:يا سلام على المذاكره بصراحه شكلكن غلط وانتن ما تتواجعن...
حصه: لا تحاتين وايد بس شوي وبنبدا الحرب الاهليه...
بدريه: مليت من اليلسه في الصاله قلت بطلع لحجرتي...
حصه: وين عبدالله..؟
بدريه: في الحجره مدري شو قال بييب وبيظهر للشباب..
حصه: عشان جي سايره تربعين لحجرتج..
بدريه مبتسمه: لا والله ما يخصه...
سمر: بتخلوني ادرس ولا شو...؟
بدريه: خلاص انا بطلع بس مريت اشوفكن...
وظهرت بدريه وسارت لحجرتها...وحصه يالسه مع سمر تذاكر لها...
.
.
سارت بدريه الحجره وشافت عبدالله يتعبث في بعض الاوراق وهو مبتسم اول ما شافها..
عبدالله: فديت عصفورتي اللي تلحقني وين ما رحت..
بدريه مبتسمه: هالتفدي وراه شي..خلصني وقول رايح وين..يعني انا مب عارفه حركاتك...؟
عبدالله يستهبل: وين بروح يعني..؟؟ الحين بغير ثيابي وامشط شعري وانظف اسناني وبرقد..فديتني انا ولد مطيع..
بدريه: يا ويل حالي انا ..تعرف ويهك مول ما يليق عليه الكذب..احسن شي ان تعترف وتقول لي وين رايح...
عبدالله ونش من حذال المكتب وطالعها: متى نرد دبي...بدور مليت من بوظبي..
بدريه: اذا تبى الحين بنرد ع راحتك...
عبدالله: انتي مب ضايجه...؟
بدريه:وليش اضيج..؟ انا راحتي من راحة ريلي..تبانا نرد الحين بنرد...بسير الحين ارتب ثيابي...
عبدالله يطالعها بنظره غريبه ومبتسم: فديت روحج يا ربي..انتي قولي لي الحين شو اسوي بج...تبيني اقتل عمري..انتحر انجلط..اختاري العقوبه..
بدريه تضحك: بس عاد شو هالحس الاجرامي اللي فيك..لا تسوي شي بعمرك..انا منو بيتم لي..وشو ذنبي اعيش وحيده..وانتي اللي مالي علي حياتي...
سار عبدالله صوب الباب بسرعه وبطله وطالعها وهو مبتسم: اذا تميت في الحجره اكثر عن جي عادي اضيع نفسي..وبعدين بيكون تركيبي شديد الصعوبه...باي حبيبتي..
طلع عبدالله وتمت بدريه واقفه مكانها مبتسمه تدري به يتلاعن عشان يشرد وما يرد على سؤالها...ورتبت المكان بعد ما عفسه ريلها ونزلت تحت بتيلس ويا عمتها وسارة حرمة خليفه..


انتظروباقي القصه مع الاخت الغلا

تحياتي لكم

[الغلا]

شكرا جزيلا اخي الكريم على هذا الجزء .. :)

اختكم
الغلا

[الرايقه]

هاي الاجزاء اللي تبرد على القلب اسميك حاس بي يا البدوي
يعطيك العافيه ,,,

[البدوي الحبوب]

الله ايعافيكم جميعا وتسلمون على تواصلكم معانا

تحياتي لكم

[الغلا]

الساعه 9:30 كانت ليلى تتعشى ويا امها وشيخه وحمدان...
حمدان: اليوم رمست ابويه وقلت له اني ابى مدرس ييني البيت..
ليلى: وشو قال.؟
حمدان: وافق على طول وعطاني البيزات وخلاص باقي اتصل به واخبره...
ليلى مبتسمه: شي طيب والله...
ام راشد: شوفي البنيه يالسه تتعبث بالاكل رمسيها...
كانت شيخه ماسكه اللبن وتصبه فوق البيض وتحركه باصبوعها...
ليلى لفت صوبها وسحبت الصحن وكوب اللبن عنها...
ليلى بضيج: شيخه ليش تسوين جي..عيب انتي ما تعرفين ان هذا غلط...؟
شيخه كانت ساكته ومنزله راسها..اصلا مبين من الصبح انها ضايجه ومالها خاطر تسوي شي...ونشت من مكانها وسارت حجرة شرملى ويلست عندها...
بس ليلى ما انتبهت لها ونشت تساعد البشكاره وتشل الصحون وحمدان سلم على يدته وسار فلتهم بيرقد....وام راشد سارت حجرتها ...
طلعت ليلى فوق ودقت لحصه...
حصه: هلا ليلى..
ليلى: اهلين..
حصه: شو بلاه حسج..؟
ليلى: ما شي طفرانه ومالي بارض اسوي شي ومالي بارض اداوم باجر..
حصه: بسم الله شو مستوي عليج..؟
ليلى: ما شي بس ضيج غريب...اليوم يت فاطمه بنت هادف تزور شواخي..
حصه: اها عشان جي الاخت متأزمه..
ليلى: والله مدري ليش صرت احس برعب مجرد محد يطري لي سيرتهم احس عمري اتنافض..
حصه: عادي وحياتج محد يروم يسوي شي..اصلا مالهم ويه يرمسون عقب سنتين وعقب ما كبرت البنت ييون ياخذونها بارده مبرده ليش..؟
ليلى بضيج: والله ما اعرف..
حصه: وشيخه شو سوت يوم يت خالتها اكيد جلبت الدنيا صياح...
ليلى توها انتبهت: حصه بخليج عقب بسوي لج تلفون...
حصه: شو ياج..؟
ليلى: اقولج بعدين الحين الله وياج..
حصه مستغربه: يالله باي...
نزلت ليلى تحت تدور شيخه ولقت باب الصاله مبند والليتات مبنده ومبين ان محد في الصاله..وسارت المطبخ التحضيري وما لقت حد وبطلت حجرة الضيوف بس بعد ما لقتها وسارت صوب حجرة الخدامه..واول ما بطلتها شافت شرملى يالسه تتمسح بفازلين في ريولها وشيخه طايحه على الارض وراقده...
انقبض قلب ليلى وشلتها بشوي شوي وصكت الباب وطلعت بها فوق وحطتها على شبريتها...ورقدت حذالها وهي تحس قلبها مقبوض..وبضيج فضيع في صدرها بس رقدت من التعب وما دقت لحصه...
.............
في حجرتها الساعه 10:45كانت طايره من الفرحه..وقلبها يدق بسرعه وببراءه طفوليه تحملها في نظرة عيونها..وابتسامة عذبه تحلي محياها..كانت اروى جدام المنظره تطالع خدودها اللي استون ورد جوري من الخجل والفرح وحاسه قلبها الليله يدق بسرعه غير عن كل ليله..حطت ايدها على قلبها وابتسمت بعذوبه ووبراءه...
"فديتك هدي شوي ..ارحم نفسك.."
كانت اروى ترمس قلبها...اللي فضحها الليله وهي يالسه مع ناصر ولد خالها وامه...بطلت شعرها ولبست بيجامتها الورديه ويلست تسحي شعرها القصير وتطالع المنظره ودارت على عمرها...تذكرت ناصر اللي تحبه موت..وما قدرت تتخيل انها يلست قريبه منه اليوم وكلمها وسألها عن دراستها...وقالها انها كبرت وتغيرت وايد..
مسكت خدودها وصرخت من الفرح...
"فديته يا ربي"...
اروى بنت عمة ناصر عمرها 19 سنه...مب جميله بس هي الجمال نفسه..اللي يشوفها بدون ما يرمسها يحبها على طول..طيبه ورقيقه وناعمه لابعد الحدود...تحب ناصر وتموت فيه من يوم عرفت شو يعني الحب...وناصر يدري بهالشي بس ما يتكلم ولا يفتح لها أي مجال ومخلنها على هواها لان عمره ما حسسها بهالشي بالعكس كان مرات يحاول يلمح وهم يالسين ويا اهله واهلها انه ما بيتزوج الا ليلى واذا ما خذها مستحيل يعرس لو شو ماصار....
بس وين اروى فيها طفوله نادره ما تنوجد في انسان في عالمنا وفي نظرتها ابتسامة عذبه تقطع قلب اللي يشوفها...ولحضورها سحر خاص..انوثتها فضيعه..ولها ابتسامه تخلي الانسان وهو في اشد حالاته يبتسم غصبا عنه...كانت ابدا ما تفهم تنغيزات ناصر ابد..كل همها وهو يالس انها تنزل راسها وتسمعه وهو يتكلم..واذا رمس امها تكون فرصتها الوحيده انها ترفع راسها وتطالعه...
ناصر كان يعرف ان اروى جميله ويشوف بعينه جمال رباني مرسوم فيها..بدق وعنايه..تنم عن قدرة الله عز وجل..كان يعرف ان اروى اجمل من ليلى بمليون مره..بس عمر هالشي ما شده ولا لفت انتباهه..مب انه ما يهتم بالجمال ولكن احاسيسه غلبته....هو يدري بمشاعرها..انسان كبير وفي مثل سنه صارت ابسط حركه تخليه يفهم كل دواخل اللي جدامه...فما باله بمشاعر جارفه من بنت عمته اللي اصغر عنه بعشر سنين...
حطت اروى راسها على المخده وهي مبتسمه بفرح...وقلبها بعده يدق بقو..ورقدت بس بوقت متأخر من كثر ما يلست تفكر في ناصر اللي شافته اليوم..
.................
حمد الساعه 11:00 طلع من البيت وركب الموتر وسار الشقه...اول ما بطلها لقى الدنيا معتفسه وانقهر..لان اكيد واحد من ربعه يا وعفس المكان وروح...بعد ما قضى وقته اكيد ولعب على هواه وراح...
يلس يرتب وهو مقهور...وعقب نش واتسبح...عشان يرقد...وعقب ما خلص يلس على الشبريه يفكر..شو يسوي...وفي شي في باله مصر انه ينفذه بس مب قادر يلاقي طريقه يديده..محد يكشفه فيها....حط راسه بيرقد...بس حس بصداع فضيع وما قدر يرقد ابد...تم يتجلب ونش يسوي له كوب شاي...بس بدون فايده....
تلبس ونزل بيسير اقرب صيدليه مب قادر يركز وهو يسوق...ومب قادر يشوف جدامه...يحس بدوخه..ووقف على ينب الشارع..وتسند على الكرسي...
اول مره يحس بهالشعور...شو اللي استوى عليه...؟؟..حمد رغم ان عنده ربع..بس كانت بدريه اول انسان يخطر على باله في مثل هالوقت...ما يثق الا فيها وما يحب يتنازل عن جبروته ويلغي انسانيته الا وياها...بدريه الوحيده القريبه من حمد رغم انها ما تقدر تغيره بس على الاقل كان وياها شوي مختلف...ولو انه قاسي بس ما يفكر يوم تشد الازمات قبضتها عليه الا فيها...
اتصل في بدريه على طول...
حمد بصوت تعبان: بدريه
بدريه: اخويه بسم الله عليك شو بلاه صوتك...
حمد: بدريه خلي عبدالله ييني هب قادر اشوف يدامي...بدريه قولي لعبدالله اني واقف في الشارع تحت جسر الدفاع...
بدريه بخوف: اخويه فديتك لا تتحرك وعبدالله ياينك الحين...
عق حمد التلفون حتى ما صك عن بدريه وجسمه يتنافض..ويعرق وهو مب قادر يتنفس...
دقت بدريه لعبدالله يسير لاخوها بسرعه..وعبدالله كان عند الشباب اول ما دقت له بدريه طار طيران لين جسر الدفاع...وبطل باب الموتر وحمد كان رايح فيها...وعلى طول سحبه لين الكرسي اللي حذاله وركب عبدالله سيارة حمد...ويلس مكانه بعد ما وقف موتره قريب من الجسر...وعلى طول وداه مستشفى خليفه...
دخلوه الحجره ودخل عليه الدكتور..وفتح عقم كندورته عشان يتنفس بسهوله..
وعبدالله وقف يتريا برا وبدريه حارقه التلفون اتصال...
عبدالله بهمس: يا بدريه استهدي بالله مافيه شي..
بدريه وهي تصيح: عيل ليش ما يروم يسوق شو استوى عليه يا عبدالله خبرني..
عبدالله: وانا اشعرفني بدريه بس عاد ماروم ارمس انا في المستشفى والناس كلها حواليه..والله مدري شو فيه داخل عند الدكتور..
بدريه: زين احلف انه مب حادث..
عبدالله متنرفز مب عارف كيف يهدي بدريه ولا يهدي عمره: والله مب حادث يالله ببند هكوه الدكتور طلع بسير انشده وبسوي لج تلفون..
بدريه: يالله مع السلامه...بس لا تتصل في اهلي دخيلك ماباهم يستهمون...
بند عبدالله من عندها والدكتور بعده ما طلع بس كانت حجه عشان يبند عن بدريه اللي توتره اكثر....
سار عبدالله الاستقبال ويلس يتريا الدكتور يزقره يوم يخلص...وفي غرفة حمد كان الدكتور يساعده عشان يتنفس وكانت النيرس حذاله تساعده...ويوم حس انه هدا عطاه مهدي وخلاه يستريح...وطلع صوب عبدالله اللي اول ما شافه نش على طول...
عبدالله: هاه دكتور بشر..عسى ما شر...؟
الدكتور: ما شر ان شاء الله..اطمن اخويه بس كان عنده هبوط في الضغط وشكله يرهق عمره وايد...
عبدالله: الله يهديه بس...زين دكتور خلصتوا منه يعني نروم نروح..؟
الدكتور: هيه تقدر تاخذه عقب ساعه والحمدلله على سلامته...بس نصيحتي يبطل تفكير وسهر ويريح جسمه شوي..انا عطيته اجازه يومين..الصراحه الهبوط كان عنده شوي مرتفع...
عبدالله: ان شاء الله دكتور..
وسار عبدالله ودخل عند حمد واول ما شافه حمد طالعه وابتسم...
حمد: مشكور ريل اختي..
عبدالله: هههه مسود الويه ونك ريل اختي.؟؟..خلك شرير ما ينفع عليك دور سنو وايت...
حمد: اقول ياريال ييت في سيارتي ولا سيارتك...
عبدالله تذكر: الله يغربلك سيارتي ودرتها في الشارع بسير اييبها وبييك ..
حمد وهو ينش: لا لاء بسير وياك..
عبدالله محرج: استريح الله يخس عدوك...عقب ساعه اذن الخروج لا تسوي لنا فضيحه..واتصل في اختك حرقت تلفوني تتحراك مسوي حادث...
حمد بهمس عشان ما يسمعه عبدالله: فديت روحها...
طلع عبدالله وهو مبتسم لانه سمع حمد بس ما رمس يدري بحمد يحاول يبين عمره قوي وما يحتاي حد وانه مهما قست الايام يتم قاسي ولا تهزه الازمات...بس كل هذا ينتهي بلمح البصر في وجود بدريه...اخته حبيبته...
اتصل حمد فيها وحصل تلفونها مغلق...ودق على بيت عمه...
حمد: السلام عليكم..
سمر: هلا وعليكم السلام..
حمد: انتي شو تسوين للحين ما رقدتي ما وراج مدرسه...مسودة الويه...
سمر: ما يخصك...انت مب اخويه ولا ابويه...
حصه: منو ترمسين...؟
وشلت عنها التلفون...
حصه: منو.؟
حمد: وين اختي..؟
حصه انتفضت: حمد..؟
حمد: لا خياله..يالله ازقري بدريه...
حصه: شو بلاه حسك...؟ تعبان ولد عمي.؟
حمد: لحوول ما فيني شي ليش تفاولين علي وين اختي لا تأخريني...
وسارت حصه حجرة بدريه بسرعه وشافت عيونها منفخات وحمر وعرفت انها تصيح...وقالت لها ان حمد على التلفون ونزلت له ركض...بس حصه ردت حجرتها وما حبت تتدخل وتحرت انه واجعها كالعاده...
بدريه: هلا حمد...طمني عليك...
حمد: بخير ما فيني شي..ارتحتي...
بدريه: فديت روحك اخوي خطاك الشر..شو ياك شو يعورك..؟
حمد: ما شي يعورني يالله لا تدقين حق اهلي مافيني شي بظهر الحين تامريني بشي...؟
بدريه: سلامتك يا حمد الله الله بعمرك...
حمد: في وداعة الله...
وتم يتريا ربع ساعه ودخل عبدالله...ويلس عنده يسولف له وعقب نش..
عبدالله: يالله يا ريال انت الليله خسرتني وايد وما بنساها لك...
حمد: في شو خسرتك موديني مستشفى حكومي وقاص علي والبترول من سيارتي ..خسرتك في شو.؟
عبدالله: الليله اخر ليله في بوظبي وبرد باجر دبي وخربت علي سهرتي ويا الشباب..وثاني شي سيارتي لقيت عليها مخالفه اني مبركننها في مكان مب مسموح به...وثالث شي تعبتني وايد وياك...وانت مقرف صراحه..
حمد وهو يصك عقم كندورته:اجلب ويهك محد طلب منك شي يا راعي الفزعات انا اروم اسوي كل شي بروحي...
عبدالله يضحك: يالله قمنا بسير ارقد وراي نشه...تعال بنرد البيت...
حمد: لاء انا بسوق وبسير شقتي ماريد اسير البيت..
عبدالله: على هواك بس انا بسوق وبوصلك الشقه وبرد لسيارتي عقب...
حمد: على راحتك...
وطلعوا ورد حمد الشقه ورقد على طول من التعب اللي فيه...وعبدالله رد البيت وما سار عند الشباب عقبها...
.................
كان المكان مظلم وشيخه يالسه على الارض تصيح وفي ايد ضخمه من بعيد تحاول تشلها بس ما قدرت..وليلى واقفه وكل ما يت بتوصل لها تطيح وما تقدر توصل لها..كانت ليلى تبكي من قلبها وهي تشوف شيخه تتعذب ومب قادره تيود دموعها ولا قادره تتنفس...وشيخه ما تشوف ليلى وتدور بعيونها في المكان..والايد الضخمه تقرب من شيخه كل شوي..واخر شي نشت ليلى بسرعه تتحسس وين شيخه وشغلت ليت الابجوره وشافتها راقده بهدوء وقبضت قلبها وعرفت انها كانت تحلم...وحمدت ربها مليون مره...بس غصبا عنها ارتجفت..وتمت تصيح وحطت ايديها على ويهها..ومثل اليهال يلست تبكي وتبكي لين ماقالت بس...وتتنافض...وهي تشوف شيخه وكابوس رحيلها ما يفارقها مول...اليوم تحس انه كان حلو من الصبح..لين ما اتصلت خالة شيخه وزارتهم وهي مب طبيعيه...
قلب ليلى محترق احساسها مثل احساس انسان انه يبدا ينعد له عد تنازلي وبيخسر كل شي...نشت بسرعه تدور تلفونها وصبوعها يرتجفن اتصلت في حصه بدون ما تشوف الوقت...بس محد يرد وتمت تدق ومحد يرد...
ليلى وهي تصيح من الخاطر..
" ارجوج ردي علي احتاجج"
عقت ليلىتلفونها على الشبريه....ودق على طول..
حصه: مراااحب انسه ليلى توج تذكرتي تدقين...
انفجرت ليلى صياح وما عرفت ترمس بس تمت تشهق من الغصه والتعب اللي فيها...
حصه مبهته: ليلى شو فيج ..؟ قولي لي شو صاير انتي مب على بعضج من المغرب...
ليلى تصيح وما عرفت ترد...
حصه: لحوول شو سوت هذي مسودة الويه فطوم...
ليلى وهي تصيح وبصوت متقطع: ماادري يا حصه ما سوت شي..
حصه: زين حياتي ارمسي قولي اللي بخاطرج...قولي أي شي ارمسي ارتاحي بس ارمسي...
ليلى وبعدها تصيح: حصه ابى اموت يا رب اموت اليوم...ليش يستوي فيني جي..شو سويت من ذنب في حياتي...؟
حصه بعصبيه: سود الله ويهج قولي عوذ بالله من الشيطان..ليلى استهدي بالله قولي لا اله الا الله...
ليلى وهي تصيح: لا اله الا الله..
حصه: نشي الحين تيددي وصلي ركعتين استغفري الله وبتصل فيج عقب خمس دقايق..
ليلى: ما اقدر والله ما اقدر اتحرك احس جسمي متخدر...حصه تعالي الحين بيتنا صدق اباج والله محتاجه وجودج...
حصه بأسى: يا ليت لو بإيدي فديتج شوفي الساعه كم..لو العصر يمكن كنت اقدر..ليلى خافي الله في نفسج نشي صلي..ولا اقول شو رايج توعين خالتي غاليه ويلسي وياها بتهدين..
ليلى: لا يا حصه ماباها تستهم علي...
حصه : سمعي شوري ونشي صلي وانا بتصل لج...
ليلى: ان شاء الله...
ونشت ليلى وتمسحت وصلت ركعتين وحست عمرها هدت شوي ودقت لحصه...
حصه: هلا عمري..
ليلى: اهلين...
حصه: مابا مابا..قولي هلا حياتي هلا حبيبتي ..ما ريد اهلين..
ليلى تبتسم بمراره: متفيجه...
حصه: يالله ارمسي فديتج شوفيج قولي غناتي..
ليلى ردت تصيح: يا حصه انا تعبت من هالدنيا كلما قلت هانت تنسد في ويهي..يا حصه شوفي العمر راح واللي مثلي كل وحده عندها اربعه واكثر..ليش انا بالذات...وهالبنت اللي وياي ضحيت بدنياي عشانها مدري محد معاي اقدر اشد فيه ظهري..يا حصه البنت بتروح مني وانا لروحي انا محتايه انسان يوقف معاي واشد ظهري فيه...محتايه ريال اسند عليه ظهري لا سودت ايامي...
وصاحت ليلى ما قدرت تكمل..
حصه انصدمت توها تنتبه لهالشي رغم انها دوم تفكر فيه...وصلنا وقربنا من الثلاثين والعمر راح...هذي سته وعشرين سنه مرت بدون هدف ولا معنى..مرت بدون كلمه حبيبتي من ريال تقدر تعتبره ريلها..مرت بدون شقا وتعب ولا يهال ولا بيبي كل يوم يقول ماما...ويملى عليها البيت زعيجه...توها انتبهت ان الزمن يركض ويركض..وهي واقفه مكانها متمسكه بسراب اسمه حمد...بس انقطع عليها حبل افكارها بدمعه انسابت على خدها كاويه حرقت لها احساسها....
حصه وهي تمثل القوه: لحوول يا ليلى شو هالتفكير الحين..انتي ليش منغصه على عمرج مب مهم اللي تترينه اهم شي انج ترضين باللي الله كاتبنه..مب يعني عشان ما عرسنا فينا عيب..سبحان الله يمكن كل تأخيره وفيها خيره...
ليلى: خلي العرس على صوب...شيخه شو اسوي بها اهلها بدوا يتحركون انا لروحي يا حصه اخواني ما فيهم خير لو يي حد من اهل شيخه ويطالب به بيفرونها عليهم..وامي روحها متضيجه من وجودها في البيت وكل شوي تتذكر فيها المرحوم تبين الصدق احس امي ما تحب شيخه...
حصه: شو هالرمسه المخبقه اللي تقولينها..الحمدلله والشكر...بعدين خلي اخوانج يولوون انتي عن 100 ريال...وما يقدرون هل شويخ يسوون شي البنت منسوبه لاهل ابوها مب لاهل امها...
ليلى: بس من حقهم ياخذونها غصب طيب...
حصه: وانتي ليش تفكرين قبل يصير شي..لا صار شي فكري وعقب صيحي مب تصيحين قبل يموت الميت....
ليلى تتنهد: مااعرف شو ارد عليج بس هلكت ذبحني التفكير والله...
حصه: الحين استهدي بالله وارقدي وان شاء الله ما يصير الا كل خير وفطوم الغلسه هذي ما عليج منها...
ليلى مبتسمه: والله انها طيبه وايد بس اخاف من زياراتها احسها تبى تقولي تبى شيخه عندها شوي..غمضتني وهي في الميلس كانن عيونها حمر شكلها صاحت...
حصه: انتي الحين خايفه ولا بتسوين لي فلم هندي...؟
ليلى تبتسم: زين روحي الحين ارتحت وخذت لي مسكن عقب ما رمستج..سيري ارقدي...
حصه: وانتي ارقدي عدل وشلي الافكار السودا من راسج...
ليلى: ان شاء الله...
وبندت ليلى عنها وتمت تفكر شوي وعقب رقدت..
.......................
في فلة راشد دخل راشد حجرته مع خلود...وحمدان رقد على طول...وسلامه يالسه في حجرتها تقرا في المجلات...يوم استوت الساعه 12:00 نزلت الصاله اللي تحت...وتأكدت ان الكل رقود...خذت التلفون وسارت الحجره اللي دوم ترمس فيها...
دقت بهدوء الرقم وكانن الليتات كلهن مبندات وحتى ما تشوف الارقام بس يلست تتحسسهن بس اكيد حفظت اماكنهن على كثر ما تيي كل ليله مثل هالوقت...
سلامه بهمس من ورا الكنبه في الحجره: السلام عليكم....
عبدالرحمن: هلا غناتي...
سلامه: تأخرت..؟
عبدالرحمن: يعني شوي...بس تولهت عليج...
سلامه قلبها يدق بسرعه مب قادره تتخيل اللي تسمعه..وما نطقت بحرف وتغير لونها وحست بحرارة الدم تجرف اوصالها...
عبدالرحمن: وين سرتي..؟
سلامه بهمس: هني وين بروح..؟
عبدالرحمن: اليوم شفتج تتريني صوب ملعب المدرسه...بس ما رمت اييج كان بعض عيال الصف وياي...
سلامه: انا ضجت في البدايه بس عقب يوم شفتك ابطيت قلت اكيد حد ياك..
عبدالرحمن:سوري حبيبتي والله غصب عني...زين شو مسويه ..؟
سلامه: ولا شي اليوم كانت مس فتحيه غايبه وافتكينا...
عبدالرحمن: وليش ما تغيب هذي يوم تكون علينا..؟
سلامه : نحاسه فيكم...
عبدالرحمن: سلامي..
سلامه: هلا..
عبدالرحمن: انتي صدق تحبيني..؟
سلامه بدت تتنافض وحست شعرها كله وقف وقشعريره فضيعه وقلبها حست بيطلع من صدرها من قوة الدق...خلاص ما فيها حيل ابد..وحست بحرارة جسمها ترتفع اكثر وتتنفس بسرعه وتنافخ وما قدرت ترد عليه..
عبدالرحمن:ليش صاخه ردي..ولا اكيد مستحيه تقولين لاء...
سلامه بخجل فضيع: لا مب جي بس انت تعرف شو الجواب حق شو الاحراج..
وسمعت صوت حد نازل الصاله...وبغت تموت من الرعب..
سلامه: عبادي اذا قلت لك ريماني ورمستك على اساس انك ربيعتي على طول اعرف ان حد ياني...
عبدالرحمن: اقولج بندي الحين ماريد حد يمشكلج..يالله حياتي بشوفج باجر..
سلامه: اوكي خلاص باي...
وبندت سلامه وقامت توايج صوب الباب ويوم ما شافت حد نشت بسرعه وردت التلفون مكانه وهي تمشي بسرعه تعثرت في الواير وطاح التلفون على الارض وطلع صوت..وهي خلاص كانت بتموت الليله من الخوف...وفجأة وهي تنش تبطلت ليتات الصاله...ماقدرت سلامه ترفع راسها...وتمت طايحه حذال الكنبه وهي لاويه علىالتلفون...وقلبها يدق بسرعه من الخوف..
...................

انتظرو الجزء الثامن من البدوي الحبوب ....

وان شاء الله يعجبكم هالجزء ..

اختكم
الغلا

[البدوي الحبوب]

تسلمين اختي الغلا على هالجزء وان شاءالله باجر بنزل الجزء الثامن

تحياتي لك

[الرايقه]

يعطيج العافيه ....
احينه وين اروم اتريا يالله الله يعين بس
البدوي انت عارف شو تسوي دخيلك لا تطول ههههه ,,,

[البدوي الحبوب]

الحلقه الثامنه

تشغلن ليتات الصاله...وكان حد ياي يمشي صوب الكنبه والتلفون اللي طاح وسلامه مغمضه عيونها بقوه ما تبى تشوف اللي دخل بس كانت ميته من الخوف...وما قدرت ترفع راسها...وقلبها يدق بسرعه..خلاص تحس الاوكسجين انعدم...
ميرنا: انتي شو سوي هنا..؟
سلامه بعد ما تنهدت من الخاطر: ما يسوي شي...انتي شو تبين..؟
ميرنا: انا يخبر ماما خلود..انتي كلم تلفون في الليل هدا عيب..
سلامه ما تحب تذلل لاي حد بس هالمره اضطرت: خلاص اسكتي وبعطيج 200 درهم..هذي صديقتي يريد شي مال مدرسه انتي شو تفكرين...
ابتسمت البشكاره: زين خلاص مافي مشكله روحي نامي يالله...
وهدت سلامه التلفون وطلعت بسرعه فوق وهي طايره من الفرحه..على الاقل قدرت تسمع صوته حتى لو ثواني...
وعلى طول غيرت ثيابها ومشطت شعرها ورقدت وكتبها في زاويه الغرفه ما دقتهن من اول ما ردت من المدرسه...
.................
نشت حصه الصبح الساعه 7:00 وشافت سمر تدرس وشكلها مستهمه...وهي توها تبطل عيونها..
حصه بكسل: شو تسوين..؟
سمر وشكلها خايفه: ادرس...
حصه ردت تتلحف...
سمر: ما بتسيرين الدوام...؟
حصه من تحت اللحاف: مالي بارض ليلى ما بتسير ليش اسير..؟
سمر: وانتي تداومين عشان ليلى بس..؟
حصه: انتي متى بتروحين المدرسه..؟
سمر: الحين بخلي الدريول يوصلني ويرد لج على طول...
ويلست حصه تتحسس التلفون وينه ويوم لقته..دقت على ليلى...
ليلى: هلا حبيبتي صباح الخير..
حصه: صباح الورد ما شاء الله نشيتي..؟
ليلى: ليكون انتي راقده..؟
حصه: مب قلتي ما بتسيرين وقلت انا ما بسير بعد..
ليلى: يالله نشي ليش ما نسير خلنا نسير قومي البسي..
حصه: اوووه وانا قلت اجازه...يالله برايج بسير اتسبح..
ليلى: برايج..
ونشت حصه وتلبست وخلصت وهي طالعه من الحجره..شافت ذياب يصك باب الحجره...
حصه: ذياب..
طلع راسه شوي: خير في شي..؟
حصه: توك راد..؟
ذياب: هيه في شي بعد ما ناقصني الا انتي تحاسبيني..
حصه: كلمني بأدب انا اكبر عنك..مسود الويه انت وين لين الصبح..؟
ذياب صك الباب ولا رد عليها وانقهرت منه...بس نزلت تحت وشافت بدريه يالسه ويا عبدالله وميتين ضحك...
حصه: عوذ بالله ليش ناشين من وقت..؟
عبدالله: يمدحونه السلام...
بدريه تضحك...
حصه: صباح الجوري اخويه فديتك...وصباح الورد والياسمين حرمة اخويه...
عبدالله وبدريه: صباح النور..
حصه: ليش ناشين من وقت...؟
بدريه: بس جي بنرد دبي وقلنا نشم هواكم الصبح...
حصه مبطله عيونها: حرام لا تسيرون الله يخليكم...
عبدالله: تحبينا هالكثر..؟
بدريه: شفت عاد ربك...
حصه وهي تفتح باب الصاله: يالله يالكناري بباي وراي دوام..
عبدالله وبدريه: الله وياج....
وطلعت حصه وسارت بيت ليلى وخذتها وسارن الدوام..
.................
الساعه 10:00 كانت ليلى يالسه ما تسوي شي..وحصه بعدها تكتب تقرير امس اللي ما سلمته...وشوي وتدخل مشاعل...وتسلم عليهن وتيلس وياهن...
مشاعل: اليوم حمد ما داوم...
حصه اللي انصدمت انها ما تعرف...طالعت ليلى...وتذكرت امس...وتمت صاخه..
ليلى: وليش مب مداوم احيده راعي شغل ما يغيب الا من شي جايد...
مشاعل: والله ما عندي خبر بس مريت على مكتبه بسلمه تقريري وما شفته..
حصه تمت تكتب وطنشت اونها مب مهتمه...
ليلى تغير الموضوع: يا هلا والله بمشاعل...قولي لي شخبار اخوج وشو مسوي في شغله...
مشاعل: الحمدلله ماشي عدل..
ليلى تطالع حصه وشكلها مب على بعضها وكانت تسولف لمشاعل تبى تلهيها عن شوفة حصه بس مشاعل ما كانت غبيه وتعرف كل شي بس تمت مبتسمه واحترمت اسرارهن ..ولكن كل شي كان مبين...
مشاعل وهي تنش: عيل اخليكن هديت شغلي عشان اسلم عليكن وراجعه له الحين...
ليلى نشت: بسير وياج لين المكتب ابى امشي ريولي تخدرن...
وطلعت ليلى ومشاعل..وحصه اتصلت في البيت على طول..وردت عليها الخدامه...
جينا: نعم..
حصه: نعامه ترفسج..سيري ازقري لي بدريه...
جينا: ماما بدريه روح دبي خلاص...
حصه: الله لا يبشرج بالخير...زين وين امايه مع اني ادري انها ما بتفيدني..
وسارت البشكاره وخبرت ام خليفه اللي يت للتلفون على طول...
حصه: امايه..فديتج ابى خدمه جليله منج..
ام خليفه: هاه ياام الخدمات شو تبين .؟
حصه: شوفي حد دق على البيت اليوم..؟
ام خليفه: محد دق مول انتي اول وحده تتصلين علينا..شو فيج مسويه شي..؟
حصه: لحوول يمه يعني ما بتصل الا اذا مسويه بلوه...؟
ام خليفه: عوايدج..يالله انا مشغوله شو تبين..؟
حصه: ركزي معاي في اللي بقوله..
ام خليفه: قولي..
حصه: شوفي الكاشف جدامج تحت شاشة الارقام في دائره مجسومه نصين..يعني بينهن خط..
ام خليفه: صبري ما لقيتها...
حصه: من صغرها؟؟ جدام عيونج اول ما تطالعين الكاشف في النص...
ام خليفه: هيه شفتها شو اسوي بها...
حصه: هوسي على الفص اللي فوق..تمي هوسي شوي شوي بنشدج عن شي...
وسمعت حصه صوت الكاشف وامها تمرر الارقام بسرعه ..
حصه محرجه: وقفي امايه انا قلت لج شوي شوي..لحوول طار الرقم...
ام خليفه: انتي شو تبين ؟ شو من رقم تبينه..بنهم لج البشكاره تظهره..
حصه: كثر خيرج امايه بخليج عندي شغل....
ام خليفه: برايج..
وبندت حصه وهي محرجه من امها اللي ما فهمتها شو تبى...
...............
كانت خلود فوق في حجرة حمدان تشوف كناديره وتاخذ اللي ما يباه بتتبرع به..ويوم تعبت زقرت البشكاره تساعدها..
ميرنا: ماما روح غرفة سلامه انا يخلص غرفة حمدان..عشان ماما سلامه يقول ما يدخل غرفتي...
خلود: ما عليج منها بتدخلين غصبا عنها..
ميرنا: لا ماما ما يقدر احسن شي انتي روحي..انا هني خلص شغل في غرفة حمدان...
تنهدت ام حمدان وسارت حجرة سلامه وشافتها مرتبه كالعاده ..بطلت الكبت ونزلت الملابس الجديمه.. ويلست ترتبها عشان تاخذ منها شوي للتبرعات شرات كنادير حمدان...
نشت ام حمدان وسارت صوب المكتب وشافت صور سلامه مع عمتها واخوها وابتسمت...ويلست تطالع بس لان كل شي كان مرتب بعنايه ودقه تتميز فيها سلامه رغم طيشها.... وبطبيعة الانسان الفضوليه بكل عفويه شافت كوب زجاجي على الطاوله عليه رسمات بالشمع دقيقه وعيبها وايد..رغم ان هالشي حركات طفوليه..بس شد انتباهها الرسم الدقيق عليه بالشمع..وتمت تطالعه وشافت داخله وردة مصنوعه من الورق بشكل شديد الدقه وعليه ورقه صغيره من اوراق الديستروفيشن القويه مقصصه بشكل مثلثات من الاطراف وكان مكتوب عليها...
" تخيل قمت اهوجس بك بعد ما وزعوا الاوراق...وانا ادري من يجي طيفك يلخبط لي امتحاناتي..كتبت اسمك على الورقه بدل مااكتب اجاباتي..احب اذكرك وانسى الكل ..تصور موقفي المحرج"
وكانت قصيده فكاهيه طويله وايد حلوه مكتوبه بس ام حمدان ما كملتها وبتلقائيه جلبت الورقه وكان مرسوم فيها قلب وفيه حرف ال A.S وتحته قوسين مكتوب بينهن...
" الحب الابدي"
ابتسمت ام حمدان على حركات بنتها الطفوليه وردت الكوب الزجاجي مكانه وبعدها تطالعه بكل انبهار من دقة الرسم اللي عليه.....وما تدري شو اللي قاعد يصير من وراها وبسبب غفلتها....كل اللي شدها في السالفه مظهر الكوب من برا ونست الجوهر وكانت سالفة الكوب نفس سالفة سلامه اللي حياتها من الخارج هبل وضحك وغرور ودلع وثقاله...ومن داخل قلب مراهقه محتاجه ام وحنان وحد يسمعها...وام حمدان نفس الشي شدها الكوب بمظهره الخارجي ونست مضمونه وما فكرت لثانيه وحده ولا شغلت بالها باللي مكتوب وبطبيعتها خذت الحياة بعفويه اكبر مما تستحق...
وطلعت بعد ما خذت اللي تبى وسارت ترتب باقي الثياب للجميعات الخيريه...
..............
في الشقه نش حمد وطالع الساعه وشافها 11:45 ونش بسرعه من على الشبريه وتذكر الدوام ويوم انتبه على الدوا اللي على المكتب تنهد..
" لحوول والله ناسي سالفة هالاجازه..بسير الدوام واللي فيها فيها"
..ما يتخيل انه ما بيداوم اليوم..حس بصداع خفيف وخذ الحبوب وشرب ماي..وسبح وتسفر ونزل وفي الموتر...شغل اغنيته المفضله..
وجدمها على البارت اللي يموت عليه ويعيش في عالم ثاني من الحرمان وهو يسمعه..عالم ما يعرفه الا هو ولا يسكنه الا هو ...يعيش فيه مع ذاته ويسكنه بكيانه...
" سولفي للناس عني ...قولي اني ما عرفت اختار من قلبي يحبه ..سولفي للناس اني ما عرفت اقرا وجوه الحاضرين من الاحبه...اعترفلك اني فعلا ما عرفتك...ما قدرت اوصل مع قلبي لحل وما فهمتك..تجمعين الضد في كل الامور راغبه مره ومره مثل نور..تشبهين ايام اوراق الخريف..تمطرين احيان احساسك زهور..صدقيني صرت من بعدك اخاف واعترف ان الخلاف واسع طريقه...واننا ما نلتقي في أي شي... فينا اختلاف للاسف هذي الحقيقه...يا رضاها وقف وناظر شوي شف غلاها كيف سوا بشخص حي..."
لف بالموتر وسار الجمعيه بيشتري له كم شغله وبيرد الدوام...وهو هناك سار صوب الحلويات بياخذ له اشياء وبيطلع...شاف بنت صغيره تفتح الحلويات وتاكل ومحد قريب منها..وتتطعم وتفر القراطيس والحلويات على الارض..وتتذوق من كل شي وتعقه...وغصبا عنه ابتسم...وضحك عقب من قلبه...
قرب منها ويوم شافته وقفت وهي كانت يالسه... توها باديه بتفتح وحده من الحلويات...يوم قرب منها اكثر طالعته بعفويه..
البنت وفي عيونها نظره مرتبكه وهي تمد ايدها بحلاوة: تبى منها ..؟؟
حمد للحظه ابتسم وطالعها بحنان: ليش تسوين جي..السكيورتي اذا شافج عادي يخبر عليج الشرطه..
البنت وهي ميته زيغه: انا مب اللي سويت جي..
حمد في داخله" عيل يدتي اللي سوت جي"
حمد: زين انتي شو تبين من حلويات..؟
البنت: ماريد شي خلاص..
حمد بينه وبين نفسه"ادري والله ما تبين شي ..كل شي تطعمتيه ما بقى وسع في بطنج"
حمد: لا لا خذي اللي تبينه...
البنت وهي تروح: بس انا ما عندي فلوس...
حمد مبتسم بحنان فضيع: انا بعزمج..
البنت بفرحه: احلف.؟
حمد: شلي اللي تبين يالله ..
وردت البنيه الصغيره تشل اللي تبى وما خلت في خاطرها شي وحمد يطالعها وما رمس بس ياه واحد من السكيورتي عقب ما شاف كل شي بالكاميرا من غرفة المراقبه فوق...كان حمد مبتسم وهو يطالعها وسرحان لين ما انتبه لوجود الريال...
تغيرت ابتسامة حمد فجأه ورد لشكله الطبيعي من التجهم والغموض في الملامح...
السكيورتي: بنتك هذي.؟
حمد: لاء..
البنت عقت اللي في ايدها من الخوف...
حمد: شفتها في كل اللي سوت انت بس خبرني كم الحساب وانا بدفع...
وسار عنه وزقر اللي على الكاشير وحسبته ودفع كل شي والبنت واقفه حذاله حط ايده على راسها يمسح على شعرها وفجأة دخل ولد كبير تقريبا من شكله عمره 19 سنه...اول ما شاف البنت مسك الكيس اللي في ايدها وفره على مكينة الحساب وسحبها من شعرها وطلعها برا وحمد واقف مستغرب من كل اللي يشوفه جدامه...
وطلع ولا رمس مول وخلى الاغراض في الجمعيه مع انه دفع..وسار موتره وهز راسه...وابتسم بسخريه..
"صج انك ثور حد يمد ايده على ياهل ما تفهم شي"
وسار الدوام بعد هالفلم اللي شافه على الصبح...

في الدوام ليلى يالسه تشتغل وحصه سرحانه تفكر ليش حمد غايب ويتها فكره شيطانيه من افكارها...
حصه: ليلى...
ليلى: هاه...
حصه: شو رايج نسير مكتب حمد..؟
ليلى: شو نسوي مثلا..نبكي على الاطلال...؟؟
حصه: افففففف مثقل دمج يالله نشي...
ليلى: زين شو نسوي هناك...؟
حصه وهي تغمز لها: انتي نشي ويوم نوصل يصير خير..
ونشت ليلى وياها وطلعن فوق..كانت حصه مبتسمه وليلى بعد وتسولف لها بس قلب ليلى كان يدق بسرعه لان هالطابق هو اللي فيه مكتب ناصر..
حصه مبتسمه: تشمين ريحة ناس..؟
ليلى بعفويه: أي ناس..؟
حصه تغمز: يقولون مكتب يدتي هني...
ضحكت ليلى بس للحين ما فهمت شي: زين شو فيج ولله انج خبله..
حصه تضحك: ونج ما فهمتي..؟
ليلى وهي تبطل باب مكتب حمد: دشي صيحي على الاطلال وألفي لنا معلقه شرات امرؤ القيس..
حصه تتمصخر: قلبي اخ..ما روم..
ليلى: شو ياج...؟
حصه: ليش غايب مسود الويه...؟
ونشت حصه ويلست على كرسي حمد وتدور به..وتتعبث باللي على الطاوله...
ليلى: يالله يا حصه ما فينا علىالمشاكل نشي بنرد...
حصه وهي تفتح الدرج: بس الله يخليج...حمد محد ومحد يروم يتدخل فينا انا بنت عمه عادي...
يلست ليلى على الكرسي اللي حذال الباب: يا حصه نشي والله ان قلبي يدق بسرعه...
حصه وهي تتعبث باللي في الادراج: خففي سرعته...
حصه كانت تطالع اللي في الادراج وشافت شي وطلعته شافت بطايق مكتوب عليهن- روتانا-الهيلتون-الانتر-....بطلت عيونها وطالعت ليلى ..وتأكدت مليون بالميه ان هالفنادق اكيد حمد سوا فيهن العجايب..ومستحيل يسيرهن مني والدرب...
ليلى: شو بلاج شو شفتي لحوول شو تسوين انتي ليش ويهج جي...؟
حصه ويهها استوى احمر من القهر والغيض..وحست بالدم يحترق داخلها...وردت كل شي بسرعه مكانه...وهي ترجع البطايق شافت ظرف صغير بني..وبعد دافع الفضول فتحته وشافت عجايب من صور البنات اللي بشيله واللي اجنبيه والشاميه ومن كل بقعه وعلى طول ردته مكانه وهي ترتجف...وطاحت شيلتها على كتوفها من القهر..وما عدلتها...
ليلى وهي تقرب منها: شو فيج ..؟ شو شفتي ابى اشوف..
بس حصه ما رمست..وانترسن عيونها بالدموع...وفجأه وهن يرمسن ضربه قويه على الباب..خلت ليلى تطير من مكانها من الخوف وحصه بدون ما تشوف الباب قلبها طاح تحت ريولها...
ناصر مبتسم: شو تسوون هني.؟
ليلى احترقت من الخجل وحصه تنهدت وارتاحت شوي انه مب حمد...
ليلى وهي تتلعثم: ولا شي بس جي..لانه هذاك..
ناصر مبتسم: شو فيج ليش مرتبكه ومنو هذاك..وليش لانه...؟
حصه ابتسمت غصبا عنها: لا ولا شي يينا نسلم لحمد تقرير امس..
ناصر يقلب نظراته فوق تحت: احيد ليلى سلمت امس..وانتي المسؤول عنج دانيال...
حصه وهي مرتبكه اكثر: هذا تقرير مشاعل..
ناصر ابتسم: اسف اني ييت فجأه بس اللي اعرفه ان حمد مريض (حصه مبطله عيونها من الصدمه)وماخذ اجازه ويوم سمعت حشره في مكتبه قلت اكيد انه وصل..فييت اسلم عليه...على العموم سوري يا صبايا والله بس كنت اسولف وياكن...
ليلى ولا نطقت بحرف..ما كانت تبى ناصر يدش وهي في هالمكتب ولا تسوي اللي تسويه...كان ودها حمد يدخل يشرشحهن ولا تشوف ناصر بهالشكل ابدا...وطلعت هي وحصه ..وهن يمشن في الممر نازلات تحت..ابتسمت حصه..
حصه: يودي عباتج ليلووه..
ليلى بعصبيه وهي محمره من الخجل: شو بلاها وليش ايودها..؟
حصه مبتسمه: العباه تنتفض من دقات قلبج اخاف تنطر من جهة اليسار..
ليلى: والله انج متفيجه دوم توهقيني..
حصه: احمدي ربج وهبتج فرصه تشوفينه..
ليلى: أي فرصه وانا مثل الحراميه...
تنهدت حصه..ونزلت من على الدري هي وليلى ومن المبنى الزجاجي للشركه..شافت ليلى حمد يبركن السياره في مكانها ونازل منها...
ليلى: مب جنه هذي سيارة حمد..؟
حصه: وين.؟
وبعد ما انتبهت حصه وهي مبتسمه: يالله الشرده مكتبنا قبل يي ونحن هني..
ليلى وهي تنزل: حشى قطو بسبع ارواح..مب توهم يقولون انه مريض..
حصه: عشان جي بدريه البارحه كانت تصيح...
ونزلن بسرعه وسارن مكتبهن...

الساعه 1:30 في المدرسه كانت عفرا في الاداره بروحها مع المديره...والطلاب كلهم في الصفوف...
المديره: تفضلي حبيبتي..
عفرا وهي تيلس: مشكوره..
المديره: عفرا في رسالة وصلتنا من الوزاره عشان المتفوقين وانتي ما شاء الله نسبتج تأهلج لهالشي..يعني في اوراق بعثات لو الاهل بيوافقون...لامريكا واستراليا وبريطانيا..اذا حبيتي تكملين دراستج...
عفرا بنظره بارده: يعني اقدر اخذ نسخه منها عشان يشوفها ابويه..؟
المديره بحماس: اكيد حبيبتي..
ونشت المديره وصورت لعفرا رسالة البعثه..من زود فرحتها لان هالشي اكيد لصالح سمعة المدرسه كثر ما هو لصالح عفرا...
وعطتها اياها..
المديره مبتسمه: زين عفرا رمسي اهلج وعقب عطيني خبر...
عفرا وهي تنش: ان شاء الله...
وطلعت عفرا وهي ماشيه في ممرات المدرسه تسولف في خاطرها..
" وهذي شو اللي مفرحنها هالكثر ..انا اللي بسير البعثه ولا هي..؟ زين اكيد ابويه بيستانس علي يا ربي بسير امريكا..لا لا شو امريكا احسن شي بسير استراليا الطبيعه فيها وايد روعه..والمكان هادي وما فيها عرب كثر امريكا..لااا انا سمعت عمتي شمسه تقول عربها اكثر من هل البلاد...يالله بشاور امايه..وو منو بعد هيه اول ما رد بسير لعمتي بدريه اكيد بتستانس علي.."
وشافت ساعتها ولاحظت ان الوقت تأخر ومشت بسرعه.
"لحوول شو هالمديره اخرتني عن الحصه اكيد فاتتني اشياء وايده"
وعقب وصلت الكلاس ودشت بس ما قالت لها المس شي..في المدرسه عفرا لو تحرقها محد بيقول لها شي..هذي عبقريتهم ومحد يقدر على زعلها...
.
.
هناك في صفوف الثاني ثانوي...كانت سلامه في الكلاس وحذالها غيداء..والمس تشرح ويوم قرب الوقت يخلص...يلست وعطتهم كم مسأله في الفيزياء عشان يخلصونها في البيت ...
غيداء تهمس لسلامه: متى بتوزع الاوراق...؟
سلامه: سكتي بطني يعورني والله مدري شو مسويه في هالامتحان..؟
غيداء: تعرفين ان اذا رسبنا يعني ما نحضر امتحانات اخر السنه الا بعذر رسمي..؟
سلامه خايفه: قولي والله...اخخ يا قلبي والله مت من الزيغه...
المس: سلامه ووغيداء خلصتوا اللي في ايديكم من مسائل...؟
غيداء: يالسين نتناقش...
المس: باقي على الحصه خمس دقايق..حوزع الاوراااء دلوأتي وعايزه كل وحده تراجع نفسها وتشوف الدرجات يمكن انا ملخبطه في الحساب..وبسرعه دلوأتي لاني عايزه اسلم الدرجات يوم الاربعاء...
ووزعت الاوراق ...وكل حد تغيرت ملامحه طبعا الامتحان كان في مستوى الطالب المتوسط..في ويووه ابتسمت وفي وناس تنهدت وارتاحت لو انها على الحافه..وفي ناس صاحت من الرسوب وفي ناس انصدمت من التدني وفي ناس صرخت من الفرح..وفي ناس دمعت من الغيره ..وفي ناس حطوا الورق على ويووهم من الصدمه وتنهدوا بخوف والم...وطبعا هذي سلامه...
غيداء: سلامي كم؟؟؟ شو بشري..؟
سلامه: راسبه..
غيداء: انا الحمدلله مب شي درجتي بس على الحافه ونجحت...
سلامه تتنهد: زين شو اسوي لج...
وخلصت الحصه وطلعت المس...وسلامه على طول راحت المبنى اللي فيه كلاسات حمده...وشافتها حمده ويتها تربع ...
حمده: سلامي شو فيج..؟
سلامه وهي تبلع ريجها: رسبت..
حمده مبطله عيونها: لاااا حرام هالامتحانات وايد مهمه لتحديد المصير...شو بتسوين..؟
سلامه: مدري..
حمده: شورايج ترمسين المس تعيده لج وقولي عندي ظروف في البيت ما رمت ادرس..

سلامه: هه تبين هذي تطيع..والله لو الموت في عيوني والروح تنزع ما ترضى...
حمده: يا ويلج من عمي راشد بيجتلج والله...
سلامه: بس اسكتي لا تزيديني...
حمده: عاد الله يستر من نتايجي انا...
سلامه: متى انتوا..؟
حمده: هالحصه اللي الحين...
ولفت حمده وشافت الاستاذ يدخل...
حمده: يالله برايج انا بسير ادعيلي....
وسارت حمده الكلاس ...وسلامه ردت وما لقت بنات كلاسها...وعرفت انهم ساروا المختبر...وشلت كتابها ولحقتهن..
.................
في المكتب الساعه 1:50 مشاعل مرت على حمد المكتب تسلمه التقرير عقب ما عرفت انه رد يداوم اليوم...واول ما دقت الباب نش حمد وابتسم لها..وهي ردت الابتسامه...
مشاعل: الحمدلله على السلامه استاذ حمد...
حمد وهو يأشر لها تيلس: الله يسلمج اخت مشاعل..ما فيني شي بس هالدكاتره يجربون فينا ع كيفهم..
مشاعل مبتسمه: التقرير اول شي اسفه انه متأخر بس مو بإيدي تعرف لازم شويه نكون متأخرين لان بعض الحسابات ماعرفناها الا اليوم الصبح يوم ياك المندوب البارحه..
حمد: لا عادي في أي وقت...
مشاعل: خلاص هذا الملف انت استلمته..والحين انا طالعه بسير ..اخويه ينتظرني تحت...
حمد: اوكي الله يحفظج...
طلعت مشاعل مبتسمه ما تدري ليش بس اتانست ان حمد داوم..رغم انه ما في شي خاطرها بس ما تحب حد يغيب وتحب الربشه والمكان الممزور عرب..وتعيبها اللمات...
وحمد يلس يطالع التقرير ويراجعه عشان يرفعه للميزانيه فوق..وعقب ربع ساعه الكل ظهر وردوا بيوتهم عقب ما خلص الدوام...

العصر ليلى كانت راقده..وشيخه راقده بعد حذالها...وسمعت ليلى صوت دق على الباب ونشت تبطله وشافت سلامه بعدها بلبس المدرسه..
ليلى وهي بالغصب مبطله عيونها: هلا سلامي متى ييتي..؟
سلامه بضيج: عمتي ابى ايلس عندج...
ليلى تبطل الباب اكثر: يالله ادخلي..
ودخلت سلامه ويلست على الكرسي..
ليلى سارت الحمام تغسل ويهها وصلت العصر ويلست على الشبريه...
ليلى: زين قومي غيري ثيابج ورمسيني..
سلامه بكآبه: ما عندي شي هني كلهن في بيتنا...
ليلى مبتسمه: زين البسي من عندي...
ونشت سلامه وغيرت من عند عمتها ويلست على الشبريه...وحست بضيج والكون اسود في عيونها كانت تبى تخبر ليلى كل شي تبى تقول لها احس عمري ضايعه ..تبى ترمسها وتخبرها كل شي من دراستها وربعها وحتى قررت تخاطر وتقولها عن عبدالرحمن واللي فيها فيها...
ليلى: شو سويتي اليوم في المدرسه..؟
سلامه وهي تبلع ريجها: ولا شي...
انترسن عيونها دموع وحست بعبره تخنقها وما قدرت ترمس...وليلى توها انتبهت ان سلامه فيها شي وحطت ايدها على كتفها...
ليلى(عاقده حياتها): شو فيج؟
سلامه ودموعها تطيح بصمت: عمتي انا.....والله كنت ابى اقولج بس..
ليلى بخوف: شو مستوي ارمسي..اكيد عن دراستج.؟
سلامه صاحت: هيه..
ليلى بعصبيه شوي: لا تقولين لي رسبتي.؟
سلامه هزت راسها انه هيه..
ليلى ونشت من مكانها وبعصبيه اكثر: انا قلت لج كم مره ادرسي وانا مب مسؤوله عن اخطاءج في الدراسه..سلامه انتي بنت لعابه ومفروض تعرفين تدبرين نفسج عمرج 16 سنه يعني عاقله وتفهمين..شو وراج قولي لي شو تسوين شو حياتج...كمبيوتر وتلفون وبنات وميك اب وقصات شعر وطلعات والله العالم شو بعد....يا سلامه خلاص هالمره طفح الكيل تصرفي ويا راشد بنفسج واعفيني من مهمة الكذب اللي تعودتي عليها...تفاهمي ويا ابوج لين متى بتم لج ستر وغطا...
واستمرت ليلى تواجعها وسلامه انهارت اكثر...وتبخرت احلامها انها تخبر ليلى كل شي وقالت في خاطرها وهي تصيح..
"اذا جي على الدراسه لو اخبرها عن عبدالرحمن شو بتسوي..؟؟"
ويلست سلامه تصيح بس ما طلعت تدري لو واجعتها ليلى للصبح الرمسه منها ما تجرحها كثر لو يسمعها ابوها هزبه محترمه...ولو ان ليلى هالمره كانت قاسيه عليها لابعد الحدود وصاحت منها سلامه بس ليلى ما اهتمت وشافت ان هذا هو الحل المناسب..وفي هالوقت دخل حمدان...
حمدان مبتسم: مراحب عمتي...
ليلى بضيج: اهلين انت الثاني شو مسوي بعد.؟
حمدان: شو مسوي ؟ ولا شي ياي اسولف وياج واخبرج شي..
ليلى بضيج: راسب ؟ ولا شارد من الصف وتباني ايي بدل ولي امرك..ولا رايح لي ويا شلة صيع يغازلون بنات الثانويه...؟ ولا اكيد تدخن لي في حمامات المدرسه..ولا ضارب لي استاذ..؟ ارمس شو مسوي..؟
حمدان: عمتي بلاج محرجه...(وانتبه ان سلامه تصيح)..
ليلى: شو تبى يا حمدان ما يكفينا اللي فينا شو تبى تقول...؟
حمدان بضيج: مشكوره يا عمتي الطيبه انا بطلع شكلي غثيتج..بس حبيت اقولج اني نجحت في كل المواد وبدخل Final Exams ومعدلي في هالامتحان كان 78% بس شكله مب هامنج الموضوع...وييت اقولج اني وفيت بوعدي لج...
وطلع حمدان وصك الباب..وغصبا عنها ليلى ابتسمت رغم الضيج...وطالعت سلامه وشافت ان شيخه نشت على هالزعيج..وصاحت اول ما بطلت عيونها...وسارت لها ليلى وشلتها وهدت شوي..وخلت سلامه في الحجره ونزلت بتسير لحمدان اللي ما وسعتها الدنيا عقب ما سمعت منه هالخبر..
......................
الساعه 5:30 على الدجه في حوش البيت..حطت البشكاره دلال الشاي والقهوه وسارت ويلس ناصر ويا فهد ..
ناصر يطالع بعيد: تعرف يا فهد ...
فهد وهو يصب لروحه شاي: شو.؟
ناصر: مرات نفكر في اشياء وهي مستحيله بس عقب فتره من الزمن نكتشف انها كانت وايد سهله وقريبه..ولو اننا فكرنا فيها بشوية هدوء جان وصلنا لها...
فهد: زين .؟
ناصر: انت بليد ولا اهبل..ارمسك تقول لي زين..؟
فهد مبتسم: مللت بي اعرف بعد هالمقدمه الافلاطونيه بتقول لي كيف اخذ ليلى واقنع ابويه..خلاص يا ولد الناس فهمتك من متى وانت تغني لي هالموال وتعيده علي...
ناصر مبتسم: عوذ بالله منك ساحر انت...
فهد يضحك: خلاص فاهمنك...بس انسى واقطع الرجى مثل ما انا قطعته وشفني عايش ولا جنه شي صار...
ناصر: بس بس الله يخليك والله اللي يسمعك يقول فقدت جولييت...اسمعني يا بابا اللي كنت تسويه انت شي من الاحلام وضروب الخيال...
فهد: هذي هي معرسه وعايشه ويا ريلها ولا افتكرت فيني...ولا كأني كنت يوم من الايام في نظرها انسان تراعي مشاعره ولا تقوله كلمه طيبه..والله يا ناصر مرات احس عمري احقد عليها من الخاطر..
ناصر: اسكت بس لا تفضحنا عن شو ترمس انت..؟ما تستحي تفكر ببنت اكبر منك بأربع سنين..تخبلت انت...؟
فهد: برايها خلنا نصك هالسيره الكئيبه...
ناصر يغمز: قصدك سيرة الحب...
فهد يغني: لا انا أد الشوق و ليالي الشوق...
ناصر يضحك: لو تسمعك ام كلثوم عادي تطلع من القبر تكفخك وترد..
فهد: ودها تسمع صوتي بتقول لي بنفسها ارجوك يا فهد ممكن تعيد احياء كل اللي غنيته...
ناصر: اييه صح ...
وشوي وتيهم ام ناصر وتيلس وياهم...
ناصر: يا هلا والله بالشوق كله..هلا بأمي اللي ما شي شراتها...
فهد وحط راسه على ريولها: يا حياتي انتي ولهت عليج ...
ام ناصر محرجه وترفع راس فهد عنها: نش عني يالله مثقلك يا فهد..ما حب هالتلزق بعد عني يالله...
ناصر: وييييو راغوه...
فهد: ما عليه يا ام ناصر ..باجر يوم اموت بتحسين بجيمتي..الحين روغيني واجرحي احساسي المرهف على كيفج...
ناصر يسوي عمره يصيح: الله يرحمك يا خويه..
ام ناصر مبطله عيونها:عوذ بالله من فالكم..شو هالرمسه المخبقه اللي تقولونها...
ويت بتنش ونها حرجت: مب منكم من اللي ييلس وياكم...
قبضها فهد من ايدها: خلاص والله توبه بنرمس في أي شي ثاني بس يلسي..
ويلست ام ناصر..وناصر يصب لها قهوه...
ناصر يمد لها القهوه: هاه تقهوي يا شيخة القبيله...
فهد يضحك..
ام ناصر: سمعتكم ترمسون عن شي جديم قبل شوي..يوم مريت من الصاله..
ناصر: عن شو.؟
فهد: كيف سمعتي ونحن هني..
ام ناصر: باب الصاله مفتوح..وسمعت بعض الرمسه..مب جنه حد ياب طاري عويش بنت ناصر..
ناصر يطالع فهد وهو مبتسم: حرام يمه..خلوه يستعيد الذكريات...
ام ناصر: ما تستحي انت وهو بنت خالكم معرسه وتطرون خرابيطكم عنها الحين..
فهد يتنهد: اسفين...
ام ناصر: بس الحين الله يشفي اخوك من اللي فيه..
ناصر: انا مب مريض بالعكس اللي حواليه مرضى..وانتي محشومه يالغاليه...
فهد: بس بس والله ما تاخذ ليلى لو تموت مثل ما احترق فوادي على عويش احترق انت بعد..مب احسن عني انت..ولا يابتك امي على قولتهم وفي فمك ملعقه من ذهب...
ناصر يضحك: جان شوري ولا شورها على ايدك امنعنا...
ام ناصر وهي ما تعرف بشو ترد...بس غيرت الموضوع..
ام ناصر: لا والله فديته ولدي بيسمع شوري ما يبى غير بنت عمته بنوته صغيره وبعدها في عز شبابها..ومسنعه ومزيونه...وماشي شراتها..
ناصر: وفهد الفقير منو بياخذ..؟
ام ناصر: عرس انت الاول وعقب يصير خير...
ناصر وهو ينش: امايه فديت روحج انا ظاهر ويا الربع تبين شي اتصلي وبكون عندج على طول..واروى خليها للي من عمرها تبيني اخذ بنيه اربيها ولا اعلمها اصول الحياه..انسي الموضوع ولا تغثين قلبي يكفيه اللي فيه منكم..
سكتت ام ناصر وما ردت على ولدها..ونش فهد وحبها على راسها وسار ويا اخوه...وهي تمت بروحها ما تدري شو هالحظ العاثر اللي مسوي فيها جي...هي تحب ليلى وايد وفوق ما تتصور وما تبغي ناصر ياخذ الا هي..وتفكر ان بنت اخوها كبرت ومحد بيستر عليها ويداريها الا ولد عمتها...بس الظروف وكل شي حواليها اقوى منها..ومالها أي سلطه ولا كلمه قويه ممكن تأثر على حد..في وجود بو ناصر...
...................
في فلتهم يلست بدريه في الصاله وكانت طفرانه من الخاطر...ونزل عبدالله متسفر بيطلع...
بدريه: على وين يالاخ..؟
عبدالله مبتسم: بيلس هني وين بسير يعني..انا اقدر اخلي عصفورتي بروحها...
بدريه: والله شكلك يقول طالع وانا ما بقبضك بس ابى اقولك شي ..
عبدالله ويلس عدالها: قولي وتدللي يا ملاكي..
بدريه: انا وايد ملانه وانت ما تقر وبصراحه يا عبدالله طلعاتك كثرت..وانا بروحي في البيت شو هالحال ما تفكر فيني مول..
عبدالله تنهد ونزل غترته: هذا انا يالس وما بطلع..ما روم اخليج وانتي ملانه بيلس عندج...
بدريه ضاجت وحست عبدالله يتمصخر:ما قلت لك ايلس في البيت ..اظهر على كيفك بس انا ملانه وابى اوصل لشي..
عبدالله: شو؟
بدريه بتردد: ابى اشتغل..
عبدالله مبطل عيونه: شو..؟ وشاللي قاصر علينا تشتغلين..؟؟
بدريه: مب شرط شي يكون قاصر..انا ودي اشغل عمري بشي...
عبدالله: لا ماله داعي...
بدريه: ايوه يوم يكون شي ابى اسويه لعمري انت ترفض..ويوم هو لنفسك عادي..انت اناني..
عبدالله نش من مكانه مبتسم وشل غترته وتسفر حذال المنظره اللي عدال باب الصاله وهو يفتح الباب: مشكوره بدوور حبيبتي..
اول ما صك باب الصاله وطلع..تأففت بدريه من اللي صار...وسارت للتلفون واتصلت في سلمى اخت عبدالله..
بدريه: سلامي..
سلمى: خير انتي شو تبين؟
بدريه: ولا شي ملانه تعالي يلسي عندي...
سلمى: لا غناتي توبه اسير بوظبي وايلس بدون ريلي يومين ما روم..
بدريه: غربلج الله انا في دبي خلاص تعالي يالله...
سلمى: اخيرا...اكيد غاديه سودا من جو بوظبي..
بدريه تتمصخر: بس الله يخليج يا اميرة الثلج..اول ما وصلت دبي شفت الثلج مغطي البقعه...يالله يالله لا تمصخينها تعالي..
سلمى: شو عندج من اكل...؟؟
بدريه: ولا شي ...بس عندي كيكة برتقال وفطاير بالتفاح تبينها تعالي مسوتنها من ساعه..ومحد ذاقها..
سلمى: من كثركم محد ذاقها...الا اقول وين المحروس ريلج..؟
بدريه بضيج: مدري..طلع..
سلمى: زين بتصل في حامد وبقوله اني سايره بيتكم وبييج عقب خمس دقايق..بس لين ماالبس عباتي..
بدريه: اترياج..تراني بنفجر من الملل...
وبندت عنها سلمى وسارت بدريه تغير ثيابها لان بيت سلمى مب بعيد عنهم وعادي تقدر تييها مشي...على الاقل سلمى فيها الخير كل يوم تيي العصر عند بدريه تونسها اذا حست بالملل...

سارت ليلى فلة خليفه ووياها شيخه بس ما لقت حمدان وردت تحت وشافت خلود تساعد البشكاره وهي تغير اماكن الاثاث وتعيد ترتيبه...
ليلى: شحالج مرة اخويه..؟
خلود: الله يسلمج..من وين يايه..؟
ليلى: بغيت حمدان مدري وينه...
خلود: والله ولا انا ما شفته هو وسلامه اليوم مول...
ليلى وهي سايره
"قلبج قوي والله مب شايفه عيالها من امس؟؟؟..والله انج صدج قويه"...
وبطلت ليلى باب الصاله..وكان الحمام فوق العشب في حديقة البيت..وكانت شاله شيخه فوقها...
شيخه تبى تنزل: نذليني...نذليني..
ليلى تنزلها: يالله بشوفج يالقويه اول ما توصلين صوبهم بتشردين...
شيخه راحت تركض ورا الحمام...اللي اول ما وصلتهم طاروا على طول..
شيخه تنط: تأاالي تأاالي...
ليلى: هه ..تراهم يسمعونج...اونه تعالوا...؟
شيخه يت عند ليلى وتشكي لها: عثفوله لاحت حلاث مافي..
ليلى بخبث: هي راحت خلاص سارت عند امها..... بتتسبح... وتنام...
شيخه بخوف: لاء مافي ثبح..
ليلى: زين مافي ثبح مستويه لي هنديه اونه مافي ثبح...والله كل شي تسوينه بيطيح فوق راسي وبيقولون تربية ليلى...
شيخه: ثليني ثليني..
ليلى: عن الدلع انتي تعرفين تمشين حق شو اشلج...يالله حبيبتي امشي انتي قويه صح.؟
شيخه بعصبيه: ماليد اتي ثليني..
وشلتها ليلى وسارت بها في الزراعه اللي برا...ويلسن هناك لين ما أذن المغرب وعقبها دشت هي وياها داخل ويلست في الصاله تتريا حمدان متى يرد...وتذكرت ان سلامه فوق من العصر وخلت شيخه تشوف سبيس تون وطلعت فوق واول ما بطلت باب الحجره لقتها منسدحه على الشبريه ومبطله شعرها وراقده..
غمضت ليلى سلامه..ويلست عدالها واول ما حست بها سلامه نشت ويلست عدل تحاول تربط شعرها اللي زين اذا رامت تمسكه ..
ليلى مبتسمه: من طوله تبين تربطينه روحه شبر ونص..
ابتسمت سلامه بس بألم بعدها متأثره: وين ابويه وامي..
ليلى: امج في بيتكم تنظف ويا البشاكير مسويه جرد لكل شي..
انصدمت سلامه ونشت: زين عمتي انا بروح..
ليلى: ليش شو مستوي..؟
سلامه وهي تلبس شنطتها: ماشي عمتي بس بسير بيتنا مدري شو بسوي بس لازم اسير هناك..
وطلعت سلامه بسرعه وعمتها تمت تطالع بغرابه ما تدري شو وراها هالبنت...
..
..
ما وصلت سلامه الفله وشافت امها في الصاله..وقفت وطالعت البشكاره...
سلامه بضيج: انتي ايييه ..؟
ميرنا وهي تنزل من على السلم اللي كانت تنظف من فوقه الثريات: شو يريد..؟
سلامه: دشيتي حجرتي اليوم ولا لاء..؟
خلود: سلامه عيب شو تقولين..؟
سلامه:كم مره منبهه عليها ما تدش حجرتي..
طالعت ميرنا سلامه بنظره تذكرها باللي شافته امس...خلت سلامه تحترق وتموت من القهر...
خلود: انا دخلت حجرتج وشليت بعض الثياب الجديمه...وعيبني كوب عليه رسم بالشمع وايد...
انتفضت سلامه وبارتباك: زين امايه هذا ربيعتي عطتني اياه يوم عيد ميلادي..
خلود: وايد روعه..من وين اشترته..شكله محل راقي..؟
سلامه: لاء هي مسوتنه امايه هذا شغل يدوي...
خلود: هيه حبيبتي بنحط العشا بعد شوي اذا تبين انزلي واذا ما تبين خلاص ارقدي..
سلامه تنهدت: لا ماريد..
وطلعت بسرعه فوق وشافت حجرتها وتفقدت الاشياء المهم ولقت كل شي مكانه وبعدما ارتاحت..عقت عمرها على الشبريه ..ويوم بغت تبتسم ..تذكرت اللي صار الصبح وغيرت ابتسامتها لوجه عابس كئيب



((( الحلقه التاسعه مع الاخت الغلا )))

تحياتي لكم

[الرايقه]

يعطيك العافيه البدوي ...
الغلا هههههه ,,,

[الغلا]

الحلقه التاسعه
اليوم الثاني في العصر وعقب ما نشت ليلى من الرقاد سارت فلة اخوها تبى تشوف حمدان وتتطمن على سلامه..وهي نازله من فوق في بيتهم شافت خلود وسلمت عليها وعلى امها وسارت الفله الثانيه..واول ما بطلت الباب شافت البشكاره تطالع التلفزيون...
ليلى: ميرنا وين اليهال..؟
ميرنا: حمدان فوق ما يعرف شو يسوي..وسلامه ما يعرف وين..
سارت عنها ليلى فوق صوب غرفة حمدان ودقت الباب..اول ما شافته ابتسمت ولوت عليه..وهو نفسه ابتسم وحبها على راسها..
ليلى تشهق:لااا شو تحبني على راسي عيوز انا..؟ لا تسويها مره ثانيه..انا ابى انسى عمري وانت تذكرني فيه...
حمدان يضحك: شحالج عمتي...؟
ليلى وهي تصك الباب وتدخل: بخير فديت روحك ...(وبتردد وهي مستحيه بعد اللي صار امس) مبروك والله انك ريال وقد كلمتك وهذا العشم فيك...
حمدان مبتسم: وعدتج بس ما صدقتيني..
ليلى: لا بس الحين مصدقتنك وانت قدها وقدود...
حمدان: خلاص ما بقى شي على النهائي وهذا بيحسم كل شي والله اني ميت من الخوف..
ليلى: توكل على الله وكل شي بيكون بخير..
حمدان: عمتي ابى اقولج شي وايد شاغلني..
ليلى: خير شو..؟
حمدان: سلامي اختي..شو بنسوي بها..حالتها مترديه..قلت لامايه انها تعبانه خلج شوي وياها قالت لي ان اكيد هي جي طبيعي من ضفط الامتحانات..
ليلى تتنهد: بشوفها وبرد لك ..
ونشت ليلى وسارت حجرة سلامه..بس لقت الباب مبطل وهي محد...ودورتها في باقي الحجر وما لقتها ونزلت تحت..ودورتها وما لقتها..واخر شي سمعت حسها في حجره في اخر الصاله...دخلت عليها وهي ترمس..
سلامه وهي ترفع راسها: هلا عمتي...(ونزلت السماعه)..
ليلى: حبيبتي شو تسوين؟
سلامه: ارمس ربيعتي تنشدني عن شي ما تعرفه...
ليلى مبتسمه ومبطله عيونها بتعجب: وانتي اللي تعرفينه...؟
سلامه ترمس بالتلفون: ريماني بعدين برمسج عمووه تباني..
عبدالرحمن : لحوول شو تبى هذي..؟
سلامه: شوي برمسها وبرد لج عقب شوي...
ليلى مول ما حست بشي لان سلامه كانت اكثر عن طبيعيه وما في شي يدل في ملامحها انها ترمس ولد...وسارن فوق ..بس ليلى لاحظت ان سلامه صدج متغيره وملامحها صارت اهدا شوي..والبنت خفت شطانتها..وما قامت تتحرش في شيخه وحمدان..بس عمرها ما فكرت ان الحب اللي تحبه سلامه ممكن يخلي من شخصيتها انسانه هاديه او انه يتحكم في تصرفاتها..كانت ليلى واثقه اشد الثقه من سلامه ومستحيل تفكر عنها أي شي..ليلى اللي عمرها ما قصرت ويا سلامه بأي شي وكانت لها البديل عن الام والابو...صح انها ما تعوض مكانهم بس على الاقل وجودها احسن من عدمه..
يلست ليلى ويا سلامه تدرسها وتساعدها بس سلامه كانت لاهيه تفكر متى بتطلع عمتها عشان تسوي اللي في بالها وتسير للتلفون كالعاده...
................
في بيت خليفه دقت عفرا باب حجرة ابوها برقه واستأذنت ودشت عنده وهي بعدها من امس ما قالت له عن البعثه..وسلمت عليه وقال لها تيلس حذاله على الشبريه بس هي يلست على الكنب مجابلتنه...
عفرا وهي ماسكه اوراق البعثه :ابويه شحالك..؟
خليفه: الحمدلله في هالشغل اللي ما يخلص..انتي بشريني شو مسويه في المدرسه ..ولو انه ما ينخاف عليج..
عفرا مبتسمه: للحين انا ضامنه ال 99% ...بس عقب الامتحانات ما ادري..
خليفه مبطل عيونه: شو 99%..؟ هذي انا ما اباها خلها حق حمدووه..انتي ابى منج 100%...
عفرا: لا ابويه هاي مستحيله...محد سواها..
خليفه:زين وانا ما اريد من عفاري الا اشياء غير متوقعه...
عفرا: ان شاء الله ابويه ببيض ويهك..(وبتردد)..ابويه...انا يايبه لك شي ويايه وقبل اقولك عنه...اريدك لا تستعيل علي بردك وتفكر اني بنت وتستعيل بقرارك علي..ودي شوي تفكر على مهلك..
خليفه مبتسم: امري غناتي...
عفرا: ابويه انا الدوله بعثتني ادرس برا عشان معدلي...في استراليا او بريطانيا او امريكا..مدري ليش ما قدرت افرح وحسيت انك ما بترضى..بس ودي شوي تبعد عن بالك فكرة اني بنت وان هالشي ممكن يأثر على طموحاتي..
خليفه ابتسم وفي عيونه نظرة فخر بهالرائعه اللي تيلس جدامه...وحمد ربه بقلبه مليون مره ان هالدره كانت بنته..وشكر ربه على النعمه اللي ما يقدر يرد لربي جزاه وبيتم يحمده العمر كله عليها...
خليفه: تعالي عندي...
وقربت عفرا مبتسمه من ابوها ولوى عليها وحبها على يبهتها..
خليفه: مبروك يا غناتي الحين انا مرتاح اني ما قصرت في تربيتي...واوراقج بقراها بتأني وما بسوي اللي قلتيه وبحط في بالي انج بنت ومن حقج اللي ممكن يكون من حق الولد...بس لا تستعيلين علي بالقرار بعدني بشاور امي وابويه وساروونه...ورمسج عقب..
عفرا وهي تبوس ابوها على راسه: فديت روحك ابويه خلاص اتريا ردك في اقرب وقت..بسير الحين بيت يدي...
ونشت عفرا وسارت فلة يدها مبارك...
.
.
هناك في غرفتها كانت حمده تنبش تحت الشبريه وتدور شي مب لاقتنه...يلست متأففه على الارض..
حمده: اففف وين حطيته..؟ شو هالحاله....
كانت حجرة حمده مقبره ومستحيل اذا فكرت تدور شي ما تعيد بناء الانقاض في حجرتها..وترد تجلبها فوق تحت..والبشاكير كلهن يشتكن منها ومن سوء ترتيبها....
كانت يالسه على الارض وتتنهد..وشافت شي تحت الكتب والدفاتر ونشت وسحبته...وطاح كل شي على الارض..بس ابتسمت انه اخيرا شافته..وبعد ما لقته الحين عليها ترد تدور ورقة الامتحان اللي كانت راسبه فيه بجداره...ويايبه اقل من نص الدرجه...وكان اللي تدور عليه الاخت حمده من الصبح هو ماسح للحبر السائل..ومن حسن حظها ان الورقه مب مصححه بالكمبيوتر ومب بقلم جاف..ويلست تمسح وتعدل على كيفها..وعقب ما خلصت حطت الورقه جدام عيونها تقلد ابوها يوم يقرا...كانت يايبه 14 /70 بس بالعربي مكتوبه..وكل اللي غيرته انها حطت خط حذال رقم واحد فتحول من واحد الى سته..وصارت درجتها المزوره 64/70.....
حمده مبتسمه وترمس عمرها: فديت روحي والله ما يبين أي شي...يالله نشي حمدووه يا عمري بنسير بيت يدي نغلس عليهم شوي..ونضحك على الاوائل اللي يكرفون وما ييبون اللي يبون ونحن الكسالى نحصل كل اللي نبيه...
ونشت بسرعه وخلت الورقه على الطاوله ولبست لها وقايه من الشمس وسارت بيت يدها ولحقت امها واختها...
.................
في بيت بو ناصر كانت ام ناصر يالسه ويا ريلها..ويسولفون عن اخت بو ناصر لين ما وصلوا عند اروى...
بو ناصر: اول ما تبند المدارس رمسيها وقولي لها ان نبى اروى لناصر...
ام ناصر: بس الولد ما يبغيها ليش نغصبه..؟
بو ناصر: لا تمين تعيدين لي نفس الموال..تراه لو يموت ما ياخذ بنت غاليه لو شو ما صار..
ام ناصر بضيج: والله البنت منسوبه لابوها هب لامها..واللي اعرفه انها ليلى ناصر مب ليلى غاليه..
بو ناصر: شو ما تكون تلتعن هي واهلها..
ام ناصر: وانت ليش كارهنهم هالكثر خاف ربكم ادعوا بالرحمه لموتاكم..
بو ناصر: زين فكينا من هالرمسه..ورمسي امها بالموضوع واخطبي اروى لناصر..وعقبها يصير خير..لو يبى يحط الثانيه خله يخطب بنت خاله العيوز..
ام ناصر محرجه بس كتمت غيضها ..وانقهرت منه وطلعت...وفي الصاله شافت ناصر يالس ويا فهد يشوفون التلفزيون ويتقهوون...
ناصر يلس عدل وابتسم: هلا والله عد ما هلت المزون..
فهد: من كثر المزون عندنا..
ونش فهد من مكانه وانحنى ومد ايده يستهبل ويرمس امه: تفضلي يا مولاتي..
ام ناصر متضايجه: مب متفيجه لخبالكم..
فهد: كلا امي يبدو عليها الغضب الشديد...هيا يا ناصر ارنا مهاراتك..واضحكها..
ناصر يضحك: احيدك انت مهرج البيت مب انا..نش يالله استهبل وهي بتضحك..
وطلع بو ناصر من حجرته متسفر بيطلع ..
فهد: ابويه وين ساير.؟
بو ناصر: بسير عند اخوانك وين بسير يعني..ولا مالي بيت وحرمه ثانيه لازم اشوفها...
ناصر محرج بس ما رمس...
تنهدت ام ناصر وتمت صاخه..وتذكرت ان اليوم بوناصر لازم يكون في بيته الثاني..ويجابل عيالها وعورها قلبها انها غثته بالرمسه ولو انه قاسي..وفي خاطرها..
" لحوول يا ربي شو المصايب اللي تتحذف على راسي..الحين بيسير لحرمته وهو محرج بتقول ان مافيني خير واني غاثه ريلي ومب مستهمه فيه.."
فهد: ما عليج منه امايه..ابويه جي..
ناصر: شو مسوي بج انا براويه..
ام ناصر تطالعه باشفاق: مب مسوي شي..انت اسمع رمستي من دون زعيج..
ناصر مرتبك: خير ان شاء الله..
فهد ينش : انا بطلع شكلكم ناويين على شي شين وانا اعرفه واشم ريحته...
ناصر: ايلس يا فهد لا تطلع..اباك تسمع وياي رمسة امي..
ام ناصر: لا يا فهد اطلع..ابى ارمس اخوك..
فهد مبتسم: يعني لازم يحترق ويهي..كنت طالع بكرامتي..بس انت لازم تييب لي الهم ..
طلع فهد ويلس في موتره يتسمع اغاني يعرف امه شو تبى من ناصر لان ابوه خبره من قبل كل شي..
وفي صالة البيت من داخل...
ام ناصر: اسمع يا ناصر يا ولدي ما اريد اطول بالرمسه وياك..انا قلت لابوك اللي في خاطري وانت عليك تسمع رمسته مني..هو مغيض عليك وما يبى يقولك بنفسه..وانت الزم ما عليك رضى ابوك..فاهمني ولا لاء..
ناصر: باختصار شو الموضوع..؟
ام ناصر: انت تبىالرمسه بس ما تبى تسوي شي...
ناصر: اعرف شو تبين تقولين..اكيد اروى..صح ولا انا غلطان...؟
ام ناصر: زين هي شو فيها.؟ شو بلاها البنت..؟
ناصر: افا يا ام ناصر مدري من اللي كان حالف ما ياخذ ليلى غير ناصر..افا يمه وين راحت الرمسه..ولا خلاص..مات خالي ناصر يعني تتبخر الرمسه..ليش يمه..؟ مب حرام عليكم..البنت وصلت الثلاثين تترياني وتتريا وعد عمتها لها..وتيين وتهدمين كل شي بإيديج..ليش يمه..؟
ام ناصر بضيج من اتهام ناصر لها: ليش يا ناصر وانا من متى شوري بإيدي ..؟ انت ما تعرف اللي يصير..ابوك ما يبا شي من ريحة المرحوم خالك في بيتنا..لين متى بنتم على هالخلاف...
ناصر: عياله وايدين ليش ما ييوز فهد لاروى..وليش ما ياخذ واحد من اخواني من حرمته الثانيه اروى...ليش انا بالذات..؟؟ ممكن تفهميني شو اسلوب العناد اللي فيه هذا...؟
ام ناصر تتنهد: يا ناصر يا ولدي ليلى شلها من بالك..لا هي قادره تاخذ اللي تبى ولا ابوك راضي بهم..توكل على ربك وانسى..خلاص ..يا ولدي رضى الوالدين ما شي منه...ورضاهم من رضى الله..
ناصر: شوفي لو خلصن البنات مب ماخذها ..مب ماخذها يعني مب ماخذها..انسوا السالفه..انا مب لعبه...ويلعن يومه من ميراث اللي مسوي فينا جي..من قل فلوسنا ميتين على كم الف..يمه رفجه عليج روفي بحالي..انتي تبين تهدمين حياتي بايديج انتي وابويه...
دمعة ام ناصر وظهر وخلاها وهو متغصص ويحس بقهر..وركب موتره ..وقرر يروح لمكان يعرف انه بيرتاح لو سار له...
..................
في المول..اثنين شباب يالسين يلحقون بنات من مكان لين مكان..ومب مخلينهن في حالهن..
خالد: يلعنها نعامه من سرعتها...
ذياب: يالرومانسي شو هالتشبيه البليغ..اول مره اسمع حد يشبه بنيه بالنعامه...
خالد: بس كيفي غصب..لازم تاخذ الرقم....
ذياب: ودرها الله ياخذها في غيرها مليون..
خالد: لا انا ابى هذي..كيفي ..مصر اييب راسها..
ذياب: برايك تعبت من كثر ما اراكض احس عمري جلب وراهن..
خالد يتمصخر: بس يا راعي المبادئ..لا تجرحني..
ذياب: انا بسير للكمبيوترات ..واحد من الربع معطيني كم بروكسي اروم افج بهن أي سايت اباه..
خالد: بس والله انك ياهل..شو تبى باللي في النت..شوف وحرق يوف...تعال هني ع الطبيعه احسن لك..
ذياب: لا لا الطبيعه تييب المشاكل..بعدني ما تطورت ..خلني على الكمبيوتر اهون لي..عن تزخني الشرطه وايلس لك في السجن اكل عدس..
خالد: ومن قالك الشرطه ما تزخ راعيين سوالفك في النت..؟ والله وتتطبق عليهم دعاوي ومحاكم شرات المغازلجيه..
ذياب: يوم انك تدري ليش ما تسوي اللي اقولك عليه وتفتك...؟
خالد: برايك سير مب ناقصني يهال انا بسير وراها يوم تخلص من كمبيوترك اتريا تلفونك بنسير ناكل شي...
ذياب وهو يودر خالد: زين خلاص بينا تلفون خلاف...
وسار خالد ربيع ذياب ورا البنتين...وذياب سار للانترنت كافيه اللي فيه الكمبيوترات...ويلس وطلع ورقته...وحط البروكسيات ع كيفه..ويلس في زاويه محد يشوف شو يسوي...وهو في عالم ثاني..يوم تأكد ان البروكسيات تشتغل واتصالات مب كاشفتنهن وانه بيروم بيطلهن في البيت..نش من مكانه بيروح ولقى في ويهه ريال واقف..
الريال مبتسم: شو تسوي..؟
ذياب بغرابه: وانت شعليك.؟
الريال: لا بس جي شفتك تعابل في Enternet Option وقلت اكيد عندك بروكسيات..
ذياب مبتسم من ذكاء الريال: لا ما عندي انت عندك...؟
الريال: اكيد ..تبى شي منهن...؟
ذياب مبتسم: اوكي نتبادل ..بس بشرط اتأكد انهن شغالات ما بعطيك شي مضمون وتقص علي..
الريال: اكيد... مب طبعي اني اتعامل بالغش..انا من فتره اشوفك هني وعرفت من شكلك انك راعي سوالف مثلنا كلنا في الهوى سوا..وبين فتره وفتره كنت اتردد اني ارمسك..بس من حسن حظي انك واقف اليوم بدون ربيعك..
ذياب: هيه هذا ربيعي خلوود...
الريال: شو اسمك..؟
ذياب: انا ذياب..وانت...؟
الريال: فيصل..
وتعرف ذياب على فيصل على اساس انهم يتبادلون المنفعه في هالاشياء اللي يعتقدون انها المتعه كلها...وشوي ويروح فيصل ويدق تلفون ذياب..ويطلع خالد...وخبره عن مكانه عشان يسيرون يشترون لهم شي ياكلونه..
.................
عقب صلاة المغرب نش حمد من الرقاد وسار...تسبح ولبس وتسفر..ودق تلفونه..وطلع ربيعه سالم بس ما رد عليه...
" متفيج لك انا."
ويلس في الصاله يطالع التلفزيون...ونش يدور شي في الدرج اللي تحت التلفزيون..وعقب ما لقاه نش بيشغله كان فلم اجنبي مأجرنه ويلس يطالعه..وشوي و رن جرس الشقه..ووقف الفلم لين ما يشوف..وسار للباب...واول ما بطله..انصدم من اللي شاف..وحس قلبه يدق بسرعه من الخوف...
نوال مبتسمه: شو بلاك ما بتقولي دخلي...
سحبها حمد بقوه من ايدها وصك الباب بسرعه ورمسها وهو صاك على ضروسه بقو لا يطلع صوته: انتي شو يايبنج هني..؟ تخيلي شافج حارس العماره..تبين توهقيني..؟
نوال: شفيك قلت بسلم عليك ليش متضايج...؟
حمد: ليش ما دقيتي وقلتي لي..؟
نوال: حبيت افاجأك...
حمد وهو يهزها بقوه وضاغط على كتوفها بعنف: صبري ثواني بشوف لج الدرب خالي من الناس..العماره متروسه عوايل لا تفشلينا..وردي من مكان ما ييتي عسى الرحمن لا يردج...
نوال وعقت شيلتها والعباه ويلست على الكنبه وتغيرت ملامحها للجديه: اسمع حبيبي انا مب أي وحده من الشارع لاقطني..تاخذ اللي تباه مني وعقب تفرني..لا بابا..انا غير ومثل ما خليتني احبك وقصيت علي انك تحبني..دور لنفسك صرفه..وصدقني ما بخليك في حالك وبطلعك لو وين ما شردت...
حمد مبطل عيونه على الاخير: وليش ما يبتي المطوع وياج بالمره عشان نملج...انا مب مسؤول عن صياعتج والضياع اللي انتي فيه..ترا لو انتي اخر بنت مستحيل اخذج انا ما اخذ شي سبيل..وكل الناس مستخدمتنه..
ابتسمت نوال: عادي ما تهمني رمستك..مب شرط تاخذني المهم اني اخذ اللي ابى..
حمد: كم تبين..؟
نوال: مابا فلوس انت تعرف شو ابى...
حمد وهو يمشي صوب الطاوله وشل التلفون: اشبعي بالشقه لج انتي ماباها يلسي فيها لروحج...
وفر المفتاح عند ريولها وطلع...بس قبل يصك الباب..
حمد: على فكره انا نازل اقول لبواب العماره كل شي..بخلي الشرطه شوي تتصرف وياج..دخلتي بدون وجه حق بيت انسان يالس في حاله..
نوال: عادي وانت خذيت شي بغير وجه حق يوم شبعت فريته بالزباله...
حمد: انتي قذره من يومج وكانت غلطه يوم نزلت مستواي وعرفتج...
نوال: اوكي اجلب ويهك اتريا البواب يي...
صك حمد الباب ونزل بس يلس في موتر عقب ما بعده شوي من العماره...وعرف انها بتمل وبتظهر..شرات أي بنت دخلت هالشقه وطلعت...وعقب ساعه وهو محترق يتريا ظهرت نوال من شقته..ووقفت تاكسي وراحت..وهو طلع فوق مرتاح وقرر انه من باجر يغير مكان سكنه...
.................
في البيت وبالتحديد في حجرتها يالسه ترتب ثيابها...ومن الملل طلعتهن وتشوف شو تبى وشو اللي جديم وما تباه..وكانت ملانه على الاخير..ودقت على حصه...وعقب ما سولفت وياها شوي..ونشدتها عن احوالها..
بدريه: حصووه ملانه وايد شو اسوي...؟
حصه: بقولج شي بس لا تزعلين..
بدريه: شو.؟
حصه: انتي متضاربه ويا عبدالله..؟
بدريه: هيه ..
حصه تضحك: والله اني عرفت..
بدريه:شو عرفتي يالخبله..؟
حصه: انتي ما تملين مول واذا مليتي اعرف انج وياه متضاربين...
بدريه: هو سخيف...
حصه: شو مسوي.؟
وخبرتها بدريه بالسالفه..
حصه: ما ترزا والله انكم يهال...الا تعالي بتخبرج ياللي ما تستحين...ليش ما قلتي لي انه حمد مريض...؟
بدريه: اشدراني هو ما يبا حد يعرف من قالج انتي.؟
حصه: يا خبر اليوم بفلوس باجر ببلاش...
بدريه: مب جي المثل...
حصه: عيل شو؟
بدريه: نسيت بس مب جي...المهم بخليج اسمع حسه شكله ياي وهو يرمس بالتلفون..
حصه: سلمي عليه..
بدريه: يوصل يالله باي..
ودش عبدالله عليها..وهم من امس ما يرمسون..ويا بعض عسب الموقف اللي استوا امس العصر...وشل سفرته ويلس على الكنب في الحجره وشغل التلفزيون...ولا رمس وياها مول...وهي بعد ما اهتمت وتمت تعدل في ثيابها ولا سوت له سالفه..بس هي منقهره ومحترقه من داخل..وكل شوي ترفع راسها وتطالعه ..ما تنكر انها ما اشتاقت لحشرته وسوالفه..وضحكته وخفة دمه...بس تمت صاخه وكابرت..اخر شي قررت تفتح موضوع..
بدريه: تعشيت ولا احط لك العشا..؟
عبدالله وهو يطالع التلفزيون : من متى اتعشى برا البيت..عمري تعشيت في مكان انتي مب فيه؟؟..انا ما ادري من وين تييبين هالافكار..
ابتسمت وحست عمرها بتتقطع...بس حافظت على ثقلها..
" لا خلني اسوي نفسي عاديه عن يكبر راسه علي..وان هالرمسه مول ما اثرت فيني..فديتني من يومي ثقيله امي جي تقول عني"..
بدريه: شو تبى تتعشى..؟
عبدالله: أي شي تسوينه يعيبني..
ونشت بدريه وهي تحس عمرها دايخه من الوناسه بس ما بينت مول وقدرت تحكم سيطرتها على ابتسامتها..وخلت ملامحها طبيعيه..وهي طالعه من الحجره..
عبدالله: بدريه..
ردت وفتحت الباب: هلا..
عبدالله مبتسم: تبين أي مساعده..؟
بدريه ابتسمت وهالمره صدق من قلبها: ماريد أي مساعده مشكور بس تعال وياي ..
وبند التلفزيون وطلع وياها ونزلوا تحت وحطوا العشا وتعشت وياه وتموا يسولفون بوناسه..
عبدالله: جني مب مرمسنج من مليون سنه..
بدريه: تراك ياهل ومن كل شي تزعل..
عبدالله: لا والله انا ياهل..وانتي شو تطلعين..؟
بدريه: كبيره وعاقله..
عبدالله: اها قلتيها..كبيره وعاقله..كبيره اعترفتي..يعني من حقي احط وحده ثانيه..لانج كبرتي..
بدريه وهي قربت تحط الاكل في حلجها وردت تحطه على الطاوله: ودك والله لقص ريولها..
عبدالله يضحك: اذا يت السالفه على قص الريول عادي بس اخافها تستوي جريمة قتل...
بدريه: زين يالله تعشى وانت ساكت..يالزعال..
عبدالله: ان شاء الله عمتي..اوامر ثانيه...
بدريه تبتسم: انا شبعت الحمدلله ..
ونشت وهو نش ونادت البشكاره تيي تشل السفره ويلست على الكنبه تطالع التلفزيون..وسار عبدالله يرمس تلفون في الممر..ورد داخل وانسدح على الكنبه وحط راسه على ريولها...وهو يرمس...
عبدالله(يرمس ربيعه): لا لا مب ياي انا وراي دوام باجر والحين ابى ارتاح شوي..
ابتسمت بدريه وبينها وبين نفسها
"فديت روحك يا ربي"
وبند عبدالله عن ربيعه..
عبدالله وهو يعدل راسه فوق ريولها: ارتحتي الحين..
ابتسمت بدريه بخجل: الله لا يحرمني منك..
عبدالله: وجان استانس ..ولا منج غناتي..
ويلسوا يطالعون التلفزيون وسهرانين عليه..
.................
الساعه 8:45 العشاء يالسه ليلى في الصاله ويا امها..ويابن طاري بيت اهل المرحومه سعاد...
ام راشد:سمعت ان خال شيخه رد من امريكا..
ليلى بارتباك: زين شو اسوي له..؟
ام راشد: الريال ما يا البلاد من قبل تتوفى اخته..والحين تحملي اللي ييج منهم..وراهم ريال بيشدون فيه الظهر..قبل انتي بس مستقويه على فطيم وامها..والحين الريال ياي واكيد بيشل بنت اخته..
ليلى بخوف بس حاولت تتداركه: برايه يحترق..ان رام ياخذها..
ام راشد: انا غاسله ايدي من السالفه..وانتي وراشد اخوج تفاهموا..
ليلى: والله راشد مابيسوي لي شي..انا برمس مبارك وبخليه يي اذا فكر ييي اخوها صوبنا...
ام راشد: والله برايج سوي اللي تبين..وانتي شفيج خلي البنت تعرف اهلها..وتيلس عندج شوي وشوي عندهم..
ليلى: ماريد ما نشدوا عنها يوم ماتت امها..ويوم كبرت يبونها جاهزه..
ام راشد: والله ما علي منج انتي تفاهمي ويا العرب..انا لا شورج بايدي ولا تطيعين لي راي..
ليلى: لا اله الا الله..انتي شفيج ما تبين البنيه تتم ويانا ودي افهم...
ام راشد: وليش هذيلاك مب اهلها..؟ مالهم حق فيها..؟ ولا ليكون بس البنت قطعتي نسبها في اهل امها...؟
ليلى: انتي شفيج تحبينهم هالكثر ما بيشوفونها لو يموتون...اذا يحبونها بيتنا مرحب بهم يزورونا في أي وقت هم احرار...
ام راشد: والله هالولد من رد البلاد وانا احس انه بيجلب الدنيا مشاكل...
ليلى طنشت الرمسه: شوااخي تعالي..
نشت شيخه بسرعه من حذال التلفزيون..ونطت فوق ليلى..
ليلى وهي تحبها على خدها: روحي حبي يدووه وقولي لها انتي حبيبتي...
ونشت شيخه ولوت على يدتها وحبتها بقو على خدها: اتي حبيتي..
ابتسمت ام راشد ولوت عليها ورقدتها على ريولها...ويلست تلاعبها وتضحكها...
شيخه وهي ميته ضحك: بث بث خلاص..عولتيني..
وليلى تضحك..تدري امها ما تقاوم ابتسامة شيخه اللي تجنن...
سوت ليلى عمرها تصيح: انا محد يحبني..بروح عند سلامه..(وسوت عمرها بتنش)..
وانتبهت شيخه لرمسة عمتها..وحاولت تنش من فوق يدتها بس ما قدرت لانها كانت قابضتنها...
شيخه: حليني حلاث بلوح..امي ماليد..يالله ماليد..
ام راشد: ماشي روحه تمي هني عندي ماريد اتم بروحي..
شيخه: طفثه وثعي وثعي اليد امي...
ليلى مستحيه وعضت على شفايفها: شواخي عيب هذي يدوه..لا تقولين طفسه...
شيخه وبعدها تحاول تطلع من بين ايدين يدتها وتصارخ: اليد امي ..ما تلوحين عند ثلامه..
ام راشد: يالله يالله يالغيره..ما تباج تسيرين لسلامه...
ليلى: امايه خليها تيي والله قطعت قلبي..
وهدتها ام راشد وسارت ونطت فوق ليلى ولوت عليها وهي معصبه..وطالعت يدتها بنظرة تحدي...ومدت بوزها بعصبيه..وكانت لاويه على ليلى بكل قوتها وما تبى تهدها..
شيخه: هذي مالي انا....
ام راشد تبى تغايضها: هذي بنتي انا مب مالج..
شيخه: لا لاء هذي مالي انا امي حبيتي(وحبت ليلى على خدها)..
وحطت راسها في حضن ليلى..وتمت تطالع يدتها بنظره حاده...
ليلى:وبعدج تبينها تسير عندهم.؟؟.اذا ما والفتج انتي ..وانتي وياها في البيت اربع وعشرين ساعه..تبينها توالف ناس بحياتها ما شافتهم..والله امايه ما ادري كيف تفكرين..
ام راشد: ما روم للسانج انا..بس ان شاء الله تعرسين وافتك من حنتج هذي...
ونشت ام راشد وسارت بتصلي العشاء...
تمت ليلى يالسه تفكر في اخر جمله قالتها ام راشد..وضاق صدرها وما عرفت شو تسوي..حست انها نغزه ونغزه قويه بعد..
بس تمت ساهيه ولا لقت جواب مقنع لرمسة امها...ويلست شيخه ترمسها وما ردت ليلى لانها كانت في عالم ثاني..
شيخه: ماما ثوفيني..
ليلى بضيج: اففف منج انا هني وين بروح يعني اشوفج..شو تبين..؟
طالعتها شيخه بنظره حزينه ليش تحرج عليها: ماليد خلاث..
ليلى وهي تصد بويهها: احسن ماريد اسمع منج شي..كل مشاكلي من تحت راسج..
شيخه حست ان ليلى تواجعها وانها اكيد ضايجه ومدت بوزها: ماليد خاثه اتي..
ليلى: من الحين انا خايسه باجر لا كبرتي بتودريني وتسيرين عند اهلج..
صاحت شيخه استكثرت من ليلى كل كلمه ولو انها مب فاهمه شي بس ما قدرت تتحمل...وليلى حست بضيج..كيف تتصرف ويا ياهل بهالطريقه..شكلها فجت حرتها من امها في شيخه...ولوت عليها وتمت ساعه تراضيها لين ما هدت دلوعتها شيخه..وعقب سارت المطبخ تشوف شو مسوين عشاء عسب تتعشى وترقد...
................
الساعه 9:30 يالسه سلامه في حجرتها منسدحه على الشبريه تلعب بخصلات شعرها..ما تدري شو تسوي..ونشت بسرعه ونزلت الصاله اللي تحت وشافت ابوها...وتمت تطالعه بنظره كلها خوف وضياع..كلها عباره عن متاهه تنتهي وترد بنفس المكان..متاهه يمكن لها مدخل بس استحاله الخروج منها....
راشد ابتسم: وين رايحه..؟
سلامه: هني ما بسير أي مكان..
راشد: وهو يطلع الدري: ما قلتي لي شو النتايج..
صفعه قويه كان سؤال راشد لسلامه اللي بسرعه ردت: بعدنا..
راشد وهو يبتعد اكثر صوته: مادري لين متى هالبعدين...؟
سلامه: اففف ما بغيت افتك من هالسؤال..الله يعيني على اخر السنه..
وسارت للتلفون..وودته الحجره اللي في اخر الصاله..ويلست على الكنب واتصلت..
سلامه بهمس: مراحب..
عبدالرحمن: اهلين..شحالج..
سلامه: بخير والله انت شحالك..؟
عبدالرحمن: بخير الحمدلله..شو تسوين..؟
سلامه: ماشي ملانه افف والله ما اعرف شو اسوي..
عبدالرحمن:درستي لامتحان باجر..؟
سلامه: عمتي درستني العصر شوي..بس ما رمت اكمل..
عبدالرحمن: سمعت انج رسبتي في امتحان الفيزيا...
سلامه بخجل: من خبرك..؟
عبدالرحمن: ربيعي حمود...
سلامه: منو هذا..؟
عبدالرحمن: محمد ربيعي..اللي تحبه حمده ربيعتج..
سلامه: هيه ..عرفته...وكيف عرف..؟
عبدالرحمن: ما يباله بعد حمدوه خبرته..
سلامه: غبيه هذي ما تسكت..
عبدالرحمن: عادي ونه يعني ما بنعرف..الا بنعرف ونص..بنشوفج السنه اليايه في ثاني ثانوي..
سلامه بقهر: وليش تفاول علي...يمكن انجح..
عبدالرحمن: انسي من سابع المستحيلات دام ما نجحتي الحين ماشي فرصه ثانيه..
سلامه محرجه: وانت ليش حاقد علي..؟
عبدالرحمن: شو بلاج عصبتي بس حبيت اقهرج شوي..
سلامه بضيج: زين برايك بسير ادرس...
عبدالرحمن: مع السلامه...
وبندت عنه سلامه وهي محرجه منه..وسارت حجرتها تبى ترقد بس ما قدرت..ونزلت تحت ببجامتها وسارت بيت يدها...واول ما دشت الصاله ..شافتها مظلمه وعرفت ان الكل في حجرهم..وسارت فوق وشافت من بين فتحات الباب ان ليلى بعد الحجره مضويه عليها يعني للحين ناشه..
دقت الباب..ونشت ليلى تفتحه..كانت سلامه ضايجه حدها خلاص تحس بضياع فضيع..تحس الدنيا ضيجه والكل بعيد عنها...اول ما تبطل الباب ..وشافت ليلى تغير كل شي وحست عمرها بخير وانتهى الضياع اللي تحسه...وبدون شعور وبتلقائيه فضيعه عقت عمرها في حضنها وصاحت على طول...
ليلى روحها كانت منهاره وضايجه وشيخه مب طايعه ترقد..بس من شافت سلامه قلبها تقطع..بنت اخوها وايد تغيرت..ومحتاجه امها اكثر من أي وقت فات..وليلى تحس بعمرها مستحيل تعوضها وجودها ابدا...
ومن دون لا تسألها ليلى شو فيها لوت عليها بقو...سلامه كبرت وصارت مراهقه وفي مرحله خطيره واخطر من الخطر نفسه..سلامه مب محتاجه حد يعلمها كيف تلبس ولا محتاجه حد يعلمها كيف ترسم بقلم التحديد على شفايفها...ولا محتاجه هدية عيد ميلادها افخم زجاجة عطر..
هي محتاجه ام وابو وحنان الكون فيهم..محتاجه حد يسمعها ويوجهها....
ليلى كانت للحين لاويه عليها بقوه..بس قوه خارجيه وضعف داخلي قوي..وشيخه تطالعهم بغرابه من اللي يصير..
وسعت سلامه راسها وطالعت ليلى وفي نظرة عيونها الف قصه حزينه..
سلامه وهي تصيح: عمتي والله احتاجج..خلج وياي..
ليلى انهارت عقب ما سمعت هالرمسه..اول مره تحس ليلى ان سلامه القويه تتذلل لانسان...هزت ليلى راسها بأسى وحطت مخده ثانيه على الشبريه ..
ليلى مبتسمه بحنان تخفي فيه جروحها: ارقدي وياي..
سلامه على طول انسدحت وحطت راسها ورقدت من الارهاق والتعب النفسي اللي تحسه...ليلى ما قالت لها ترمس ولا طلبت تعرف اللي فيها..بس حست ان سلامه محتاجه لها وهي موجوده..ووفرت لها الحنان لليله وحده...
يا ترى هل بيستمر للابد ولا سلامه كل ما احتاجته بتسير بيت يدها تاخذه كمسكن وعقب ترد بيتهم قويه..لين ما تهزها ازمه ثانيه وعلى نفس الموال..؟؟
.......................
الساعه 11:30 سمر دشت الحجره وشغلت الليت...ويلست تدرس..وشوي وتدش حصه..اللي كان مزاجها رايق على الاخر..
حصه: ابى ارقد ادرسي في الصاله وشلي لحافج والمخده لاني بصكر الباب وماريد أي ازعاج...
سمر: يا سلام ليش ارقد في الصاله..بنت الشغاله وانا مدري..
حصه: يا ترقدين الحين يا ما شي رقاد عقب هني..
سمر: ابى ادرس حرام عليج...
حصه: وين تدرسين الحين يالله ارقدي والله ما تفهمين شي باجر لو تميتي سهرانه..بيطير كل اللي درستيه...
سمر: انزين شو تقولين..احسن شي ارقد.؟
حصه: هيه اكيد ارقدي وان شاء الله باجر تدرسين اول ماتنشين...الا ما قلتي لي شو سويتي في امتحان اليوم..؟
سمر: زين الحمدلله (وابتسمت)ما يابوا لنا الرسمه اللي قلتي لي امس..
حصه وهي تتلحف: قلت لج مب حفظ ..يوم اقولج شي سمعي رمستي محد بيفيدج الا انا...
سمر: الحين صبري دقايق بحط كتب باجر في الشنطه..وببند الليت..
حصه: زين بسرعه انا مصدعه..
وخلصت سمر وبندت الليت وتلحفت...
سمر: حصه..
حصه: هاه..شكلنا ما بنرقد اليوم..
سمر تضحك: من زمان ما قلت لج نكته..
حصه: افتكيت لي يومين والظاهر رد لج الفايروس..
سمر: سمعي بخبرج نكته والله انها فنانه..
حصه: انتي كل شي تقولين فنان..انتي بس قولي لي شو النكته اللي ما قلتي انها فنانه..
سمر تضحك: زين بقولج النكته خبرتني فيها ربيعتي..
حصه: يالله اتريا...
سمر: مره قطوه دشت عند الحلاق ليش..؟
حصه: ليش.؟
سمر: لقت الباب مفتوح..
حصه ابتسمت: الحمدلله والشكر..صدج سخيفه..
سمر: والله انها فنانه..نحن في الصف متنا من الضحك..
حصه: اشك ان المس يتها جلطه وغسلت ايدها منج انتي وربعج..
سمر: زين بقولج..وحده ثانيه..
حصه: سمر باجر خلاص ورانا دوامات خلينا نرقد..
ورقدت حصه وسمر رقدت وراها على طول..

ترقبو الحلقه العاشرة من سحابه صيف مع اخونا البدوي الحبوب

اختكم
الغلا

[البدوي الحبوب]

الحلقة العاشره

حست سلامه بحد يهزها بحنان وبكل صعوبه بطلت عيونها...ما قدرت تميز الملامح..وردت غمضت عيونها...بس ردت الايد الحنونه تهزها..وهالمره بطلت عيونها...
سلامه بصوت ثجيل وكله رقاد: شو تبين عمووه..؟
ليلى: حياتي نشي بنصلي الفير..صدقيني بتحسين براحه فضيعه..
سلامه وهي تغطي ويهها باللحاف: يوم بنش الصبح للمدرسه بصلي ما روم انش الحين..
ليلى بهمس:زين زين نشي يالله جدامي اشوف..ادري بج بتنشين الصبح والله ما بتدرين أي صلاه بتصلين..
وما طاعت سلامه...وسارت ليلى للدريشه وبطلتها وعلى صوت المأذن العذب يتغلغل في اركان الحجره..وتنهدت ليلى وفي هوا بارد على الفير يدخل الحجره على هالصوت اللي تقشعر له الابدان...بس سلامه ما طاعت تنش وليلى ما تبى شيخه تحس..وسحبت سلامه من ايدها..
ليلى بحزم: يالله نشي صلي شو بتقولين لله يوم يتخبرج..بتقولين له الحصه كانت بتبدا عني وما رمت اصلي...
سلامه وهي تنش: ما روم لج انا...
وسارت تتوضى ويلسن يقرن قرآن لين ما تقام الصلاه..وعقبن صلن...ويلست ليلى تقرا قرآن عقب الصلاه وسلامه وياها...
حست سلامه براحه فضيعه وما تدري ليش اول شي فكرت فيه هاللحظه هو اليوم اللي بتموت فيه...وتخيلت شكل القبر والموت والظلمه..
بس كل هذا فوق طاقتها..يلست تبكي..وليلى حست بها وعرفت انها تصيح بس ما حاولت ترمسها..لان هاي كانت غاية ليلى ومرادها انها تقرب سلامه من ربها ما في غيره اللي مستحيل يتخلى عن عباده...مب البشر اللي في أي لحظه ممكن يخذلونا...ويلست سلامه تصيح من خاطرها وغطت ويهها بشيلة الصلاه..وزاد صياحها..مب عشان أي شي بس كانت فرصه انها تفرغ اللي بخاطرها...
ليلى قلبها تقطع بس قاومت..ما تقدر تشوفها منهاره بس هالحل الوحيد ولازم تصبر...نشت من مكانها وبندت الليت وتلحفت وغمضت عيونها بقو وحاولت ما تسمع صياح سلامه...اللي صدق تعبت ونشت بسرعه وشلت الشيله ورتبت السجاده وحطتها مكانها...ويلست تتحسس البقعه لين ما وصلت الشبريه..ورفعت اللحاف وغمضت عيونها ورقدت على طول من التعب اللي تحسه...
ليلى في هالوقت كانت تفكر تخلي سلامه تغيب باجر لانها خلاص منتهيه واذا سارت ما بتفهم شي ..بس ردت تفكر ان هاي مب بنتها وعندها ام وابو مسؤولين عنها ومن حقهم هم يصدرون القرارات في حق بنتهم...وغفت ليلى وهي تفكر شو بتسوي باجر...
.....................
الساعه 7:30 نشت حصه بصعوبه..وشافت سمر بعدها راقده..ونشت توعيها...لان الوقت كان وايد متأخر على مدرستها...
ونشت سمر بسرعه وسارت تتلبس..ويوم خلصن كل شي..
حصه وهي تعدل وقايتها بتنزل: الحين دامج متأخره..اول شي بخلي الدريول يوصلني الدوام وتسيرين المدرسه عقبي..
سمر وهي تلف شعرها الطويل بسرعه ومب عارفه كيف: زين الله يخليج لفيه لي والله اني ما اقدر اسوي به شي احس عمري مخنوقه..
حصه تضحك: تعالي بربطه لج..
ولفته لها حصه بسرعه وعدلته لها من جدام..ولبست سمر شنطتها ونزلت بسرعه وركبت الموتر..ويتها حصه وركبت حذالها...وساروا ويا الدريول..وفي الدرب....
حصه: مره ثانيه ارقدي من وقت عشان تنشين..
سمر: لا والبارحه بعد كنت بسهر ازيد عن الساعه 11:00
حصه: انتي لو تسمعين رمستي والله ما بتندمين...
سمر: بجرب..بس انتي خفي ارهاب شوي..
حصه: وهي تطالع الشارع من الجامه: ان شاءالله...
سمر مندهشه: الدريول سار مدرستي..خليه يوديج الدوام...
حصه: برايه انا بعدني بمر على ليلوه...
ووصلت سمر المدرسه وويوم بطلت الباب بتنزل...ونزلت صرخت بصوت عالي..خلى حصه تنتفض مكانها...
حصه مصدومه: شو بلاج؟؟
سمر ردت تركب السياره بسرعه وعيونها انترسن دموع: حصه...!!!!
حصه: شو..؟؟؟ ليش تصارخين في الشارع..؟ شو مستوي؟
سمر والعبر خانقتنها: نسيت البس نعالي...
حصه هني ودها حد ييمعها..ماتت حست عمرها مجتوله من الضحك...وسمر ضحكت بعد مع انها كانت بتصيح...
حصه وهي تضحك: والله يا سمر ما يحتاي تقولين نكت..انا اللي من اليوم بنكت للناس...
سمر: سخيفه يالله بنرد البيت...
حصه: وانتي كيف حسيتي..؟
سمر: نزلت وانا مدري اول ما لمسن ريولي التراب اخترشت...
حصه تضحك...وتمش دموعها من الضحك...
سمر: ما يضحك يالله نواب بسرعه وصلنا البيت...
وردن البيت عقب سارن المدرسه وفي الدرب..اتصلت ليلى في حصه تتخبرها ليش متحيره..وقالت لها انها في الدرب..وسارن كلهن الدوام..
...................
الساعه 9:45 يالسه مشاعل في المكتب تشتغل كالعاده..ودخلت عندها ليلى...وعطتها بعض الاوراق..
ليلى: فديتج غناتي خلصيهن لي بسير اكمل الباقي الملف الرئيسي بعدني ما بديت فيه..
مشاعل: خلاص خليه وانا اشوفه لج..
ليلى وهي تطلع: تسلمين حبوبه...
واول ما سارت ليلى المكتب نشت مشاعل وسارت مكتب حمد..وسلمته بعض الاوارق ويلست في المكتب عشان يعلمها باقي الشغلات في الملف الرئيسي للشركه...
حمد: اول ما تبدين تكتبين عن احصائية واردات الشركه..حطي مقدمه او نبذه صغيره عن كيفية العمل وطبيعة العمال..
مشاعل: ضروري..؟؟
حمد: اكيد لان نحن مرات ننزل كتيبات ونحط فيها شوي من تقاريركم وتتوزع على الشركات الثانيه وعلى الخريجين عشان الوظايف اليديده..
مشاعل: خلاص حمد..شو البند الثاني..؟
حمد: عقب ما تخلصين كل شي تكتبين فترات شغلج وتشرحين ببساطه كم مره تواجدتي في بعض اماكن الصادرات والواردات وكم مره سرتي للماليه..تعرفين كل هذا من صالحج لانه النظام يمكن يتغير عقب للساعات..
مشاعل وهي مندمجه:فهمت ..يعني ابدا الحين...
حمد: صبري باقي كم شغله بخبرج فيها...بس شو رايج نشرب شي...
مشاعل مبتسمه: اوكي
حمد: تشربين شو؟
مشاعل:ما عليك امر اريد عصير برتقال..
حمد: ان شاء الله ثواني بس..
ويلست تكمل الشغل وياه...وهو يعلمها ويساعدها في بعض الشغلات اللي ما تروم لها...
.
.
في مكتبهن يالسات ولا وحده ترمس..مشغولات والميزانيه لازم تقاريرها تتسلم يوم الاربعاء الظهر...
تتنهد ليلى: لحوول باقي لي وايد...وانتي.؟
حصه وهي تطبع علىالكمبيوتر: والله ما اعرف شو اسوي..والله ما يندرى بي ..اخاف الا اكون خلصت وانا مدري..
ليلى: وين وصلتي..؟
حصه: تقرير شركة ايرباك ما بديت فيه...
ليلى: انا احسن عنج خلصت اللي عقبه بعد...
حصه: زين تعالي خلصيه وياي...
وردت ليلى تكتب وحصه بعد...وشوي ويدق تلفون مكتب ليلى..
ليلى: مرحبا
ناصر: السلام عليكم..
ليلى: اهلين استاذ وعليكم السلام...
ناصر: تعالي المكتب ..
ليلى: الحين؟
ناصر: هيه..
ونشت ليلى سايره مكتب ناصر...
حصه: وين رايحه...؟
ليلى: برد الحين...دقايق بس..
وسارت فوق ما تدري شو يباها ناصر...بس الاكيد انه ما يبى يرمس عن الشركه..من حسه واضح انه يبى يقول لها شي ثاني..والدليل انه ما طرا لها ملفات ولا اوراق ولا حسابات...وصلت لباب المكتب وقلبها يتنافض مب من شي بس شعور دوم تحسه يوم تسير فوق ..
ناصر: ادخلي ..
ودخلت ليلى ويلست مجابلتنه ...
ناصر: شحالج..
ليلى: بخير الله يسلمك...وانت؟
ناصر: مثل ما تشوفين...خلصتي شغلج؟
ليلى: باقي لي وايد..
ناصر:اها..اوكي..
ليلى: شو تباني..
ناصر: بغيت ارمسج عن...عن اشياء وايده لازم تتعدل...
ليلى بارتباك: مثل شو.؟
ناصر: وايد اشياء..
ليلى: ومنها؟
ناصر: حياتنا..علاقة امي فيكم..علاقة ابويه...سالفة راشد ومبارك..وو...
ليلى: وشو.؟
ناصر: ونحن..
ليلى: شو بلانا..؟
ناصر: ماشي بس يعني وايد اشياء لازم تتعدل..
ليلى بسخريه: بلاك مب على بعضك ارمس شو في خاطرك..؟
ناصر: والله اني ما اعرف بس وايد اشياء لازم نسويها...
ليلى بنظره حاده :هيه وشو المطلوب مني..؟
ناصر: سمعي اباج ترمسين راشد...عن المي.........
قاطعته ليلى وهي تنش: شبعت من هالموضوع..اذا بتم تقارن كل شي من بينا بفلوس خياليه احب اقولك ان راشد اخويه ما عنده شي..بس هاللي حبيت اوصله لك وتقدر توصله لابوك يا ناصر...مب هالعشم فيك..
وطلعت ليلى وخلته في المكتب بروحه...بس هو حس بالمهانه..وحس ان اسلوبه كان وايد غبي..وما عرف يتصرف..كان يعاتب ليلى على غلط اخوها..ويطلب منها شي فوق طاقتها..في لحظه يحس عمره لازم يتصرف كريال..ويمشي كل شي على كيفه...و للحظه حس بضعف وغباء..كيف يستعين ببنيه...وهو الريال...؟ ضرب بإيده على الطاوله منقهر من سرعة تفكيره...
في الجهه الثانيه ليلى بتنفجر من القهر والغيض...حست لاول مره بسطحية ناصر...هي طول عمرها تعرف انه ضعيف جدام اهله وخصوصا ابوه...يلست مكانها وغمضت عيونها وقررت بعد برهه تكمل شغلها...حست بقهر فضيع وصداع عنيف...
" يا ليت ناصر احتفظ بغباءه لنفسه...ليش يشاركني فيه..كم مره فهمته ان ما عندنا له شي لا هو ولا امه...وليش انا يرمسني...ليكون بس يمهد لشي..ويبى يحطني في الواجهه...؟ اكيد هو يبى يقنعني ان ما في بينا شي بيتم متواصل الا اذا انهينا هالمشكله...ويوم يدري انها مب بايدي يبى يحدد علاقتنا فيها..."
حصه: ليلى شو صار..؟ وين كنتي..؟
ليلى: لا ترمسين بليز ابى اخلص شغلي..ممكن..؟
حصه: اوكي..
..................
مرت الساعات بسرعه وخلص اول وثاني وثالث كلاس...وعقبه البريك الجماعي...وطلعوا الطلاب يتريقون...بس حمدان كان في الصف وما طلع..
ويلس يكتب واجب الكيمياء..
تريقت عفرا وردت للكلاس بتقرا شوي عشان الامتحان اللي في الدرس اللي طاف...وشافت حمدان في الصف وما رمسته حتى هو ما انتبه لها اصلا..
مر الوقت شوي وقررت تكسره عفرا....
عفرا: حمدان ليش ما تسير تتريق..؟
حمدان رفع راسه ما انتبه انها هني: لا عندي شوي شغل بخلصه وبسير.
عفرا: تحل واجب الكيميا؟
حمدان مفتشل: هيه..
عفرا: اها..
وسكتت وهو سكت ودخلوا بعض الاولاد والبنات عشان يكملون اللي بقى وينسخون الكتاب في الطاوله... وينقلون من بعض واجباتهم..ونشت عفرا بتسير لسلامه وحمده...
اول ما طلعت عفرا نش طارق حذال الباب...
طارق يهمس: طلعيه من شنطتها..وانا بتم واقف هني اذا غنيت بصوت عالي ردووه بسرعه..
ريهام: وين ننقله؟
طارق: في دفترج...وانا عقب باخذه منج...يالله بسرعه قبل ترد..
وطلعت ريهام دفتر عفرا من شنطتها ونقلت واجب الكيمياء كامل...وبسرعه..نقلت كل الحلول...
طارق: بعدها ما يت شقي الورقه...خلي الاستاذ ينصدم فيها اليوم..
ريهام: بسم الله منك..شو هالحقاره..مستحيل اسويها...!!!!
وردت الدفتر مكانه بسرعه...وساروا ينقلون الواجب...وكل هذا استوى بس حمدان ما انتبه ابداً..لانه روحه كان مشغول في اللي عنده..

في المبنى الثاني كانت حمده واقفه في الممر توايج على ملعب الاولاد...بروحها..وشوي وتييها عفرا اختها...
عفرا: حمدووه..
حمده ارتبكت: هاه انتي ليش ييتي هني..
عفرا: تريقتي.؟
حمده بارتباك: هيه..لاء ليش؟
عفرا حست ان في شي: شو فيج؟
حمده: ولاشي..ليش ييتي؟
عفرا: احيد المدرسه مب مال ابويه..ييت اشوفج انتي وسلامي وايلس وياكن...الا اقول شو تطالعين..؟
وقربت عفرا من السور وبكل براءه حطت ايدينها على خدودها وتسندت ويلست تطالع...
عفرا: تشوفين الاولاد يلعبون كوره..
حمده بخوف فضيع: هيه وناسه..اشجع الفريق الاحمر..وانتي؟
عفرا تبتسم بسخريه: ما اشجع حد لاني ما اعرف شي عنهم...
وانتبهت عفرا وهي تقلب نظراتها في كل مكان لشي قبض قلبها..وما قدرت تتخيل شو اللي تشوفه..حست بقلبها ينقبض ويزيد النبض فيه..وخافت وبنفس الوقت طالعت حمده اللي صدق كانت متغيره ..
حمده هاللحظه حست ان عفرا فهمت كل شي وانكشف المستور...بس عفرا كانت اذكى من حركات حمده وخبالها...عفرا للحظه ما تتحكم فيها العواطف وما تحكم شي اكثر من عقلها...تماسكت وسوت عمرها ما شافت شي..وحولت غضبها ورعبها من اللي شافت لابتسامه ذكيه..
عفرا: حمدووه بسير عنج الحين تذكرت عندي امتحان كيمياء ولمحت الاستاذ يمر في المبنى الثاني وزغت..
ارتاحت حمده وحست حمل كبير نزل من على قلبها وابتسمت بخوف..وعفرا سارت...اما حمده كانت حالتها حاله مب مصدقه كل اللي صار وما عرفت كيف تتصرف..بس اول شي سوته انها نزلت بسرعه لملعب الاولاد وزقرت سلامه اللي يتها ركض..
سلامه: شو فيج.؟
حمده بخوف: عفاري كانت هني في المبنى تفاجأت بها..وشافتج..
سلامه بخوف: قولي والله؟
حمده: مادري بس هي لاحظت شي وويهها تغير وقلت يمكن شافتج بس عقب قالت انها تذكرت امتحانها...
سلامه: الحين شافت ولا ما شافت..؟
حمده: ما شافت..
سلامه تتنهد: افففف الحمدلله موتيني من الرعب...
حمده: شو سويتي..؟
سلامه مبتسمه: ولا شي عادي كنا يالسين جدام المبنى العود نسولف...ما سوينا شي..
حمده تضحك: يعني لازم تسوون شي..؟
سلامه: مب قصدي بس اقول ما سوينا شي..عشان نزيغ هالكثر...
حمده: يعني عادي لو شافتج عفاري..؟
سلامه تضحك: طبعا لاء..
وسارن مبناهن وطلعن فوق كل وحده في صفها وعند ربعها...والاكيد اللي ما يعرفنه ان عفرا عرفت كل شي اليوم والله العالم شو بيكون تصرفها...!!!!
................


عقب ما ردوا الكل من دواماتهم...كانت ام راشد يالسه في الصاله تتريا راشد يرد البيت ..وحدرت ليلى وسلمت وسارت فوق...وشافت شيخه راقده..وغيرت ثيابها ونزلت لامها...
ليلى:امايه تغديتي...؟
ام راشد: لاء ما تغديت اتريا راشد ابغيه بسالفه...
ليلى: شو من سالفه..عادي اعرف؟
ام راشد: الكلام فيج ما ييب فايده..تبين توطين راسي التراب..
ليلى مستغربه: شو مستوي بج..؟
ام راشد: مالي رمسه وياج..راشد بيي وسمعي كل شي...
ليلى: امايه شو مستوي...؟
وما ردت ام راشد عليها..ويلست ليلى ساكته هي وامها..محد فيهن رمست..لين ما وصل راشد..اللي دخل ويا خلود...وتغدوا بس ليلى ما ذاقت شي وقالت بتتريا سلامه وحمدان....عقب ما خلصوا الباقين الغدا نشت خلود وسارت بيتهم...
راشد: هاه امايه عسى ما شر متصله بي للدوام ..صاير شي؟؟
ام راشد بجديه فضيعه: الا صايره اشياء مب شي...والسبه مشيتنا على شور الحريم..مخلين اختك ممشيه شورها علينا..وفاضحتنا بين خلق الله..
عصب راشد وطالع ليلى اللي ما كانت معصبه اقل عنه...
ليلى بضيج: انتي عن شو ترمسين؟
راشد: قصري حسج..هذي امج..
ليلى وقربت تصيح: انا شو سويت بكم عشان جي تسوون فيني..لهالدرجه وجودي في حياتكم مضيج بكم..يعني اطلع اقتل نفسي..ادور لي ام ثانيه..ولا اهج دبي واعيش عند مبارك..وين اسير وين.؟
وصاحت ليلى..
راشد: امايه شو مستوي؟
ام راشد: خلي هالبزا عنج...وانت اسمع...اليوم احمد بن سعيد خال شيخه متصل فينا..ورمسني بكل هداوه..وقال انه بلى فضايح ولا محاكم..وبدون قسمه تحرمكم من البنت..يبا يتفاهم وياك..ويقول خير الامور الوسط..
راشد: شو يبغي..؟
ام راشد: يقول البنت تكون عندكم الاربعاء والخميس واليمعه..وباقي ايام الاسبوع عندهم..
ليلى تصارخ: في الاحلام والله لو على قص رقبتي ما يسوونها...
راشد: لا امايه اسمحيلي في هاي عاد..خليه اذا يبى محاكم يسير بيبانها مشرعه...شو اربعاء وخميس..البنت مب لقيطه ..مربينها وتعبانين فيها ..ياخذها بارده مبرده ليش.؟
ام راشد: والحل وشو الراي وشو تشوفون..اسمع يا راشد يا ولدي...البنت لها اهل من حقها تتربى بينهم..وتعرف اهل امها..ولها يده وخاله وخال..من حقهم يشوفون بنت بنتهم..ويتعرفون عليها..ولا تبى البنيه تكبر عايشه على عايله مب عايلتها..
راشد: نحن اهل شيخه ومالها اهل غيرنا...ولو يبى احمد القسمه يسمع قسمتي انا...
ام راشد: قول..
راشد: البنت تسير لهم في اخر الاسبوع...وتتم عندنا باقي الايام..
ليلى وهي تصيح: والله لا هذي ولا هذيك...راشد ماريد والله ما ياخذونها...راشد دخيلك يا خويه لا تحرق فوادي..
راشد بجديه: ما حيدج انتي اللي يبتيها...
ونش من مكانه وسار عنهم..وهو عند باب الصاله...
راشد: امايه انا اليوم بسير لهم وبرمسهم بالموضوع...
ام راشد: الله يوفقك يا ولدي..
وتمسكت ام راشد في المخدات ونشت بصعوبه وسارت دون ما ترمس مع ليلى لحجرتها...
..................
العصر الساعه 5:30 ركب حمد موتره وروح دبي...وفي الدرب شغل اغنيه عشان يتسلى فيها...لين ما يوصل..وجدمها على البارت اللي يحب..وهي اغنية اعترفلك...
يلس حمد يدندن في موتره وهو ساير دبي..متوله على حبيبة القلب...وعلى طول اتصل بها...
حمد: السلام عليكم..
بدريه: يا هلا والله باخويه حبيبي..
حمد: شحالج.؟
بدريه: متولهه على بوظبي..حمد تعالي خذني...
حمد: شو ابا بج..لو بييب حد جان يبت حصيص وياي...
بدريه مبتسمه: نعم...!!!
حمد: هيه اللي سمعتي...
بدريه: اقولها..؟؟
حمد: بقص راسج...
بدريه: اهون عليك..
حمد: للضروره احكام..
بدريه: وينج يا حصه يا بنت عمي والله لتتخبلين لو تسمعين هالرمسه..
حمد مبتسم: ما قلت شي..بس ما ابى حد الا حصه تيي وياي..
بدريه: حمود ليش ما ترمسها وتيلس وياها حرام عليك ذال البنيه..
حمد: انا مرتاح جي...
بدريه: تخيل حد خذها عنك...البنت كبرت واهلها يبونها تعرس..
حمد: ليش طايحه بجبودهم..؟
بدريه: لاء بس تعرف البنت كبرت ومحتايه ريال وعيال ...
حمد: محد بياخذها وحمد عايش بس خليني شوي اتلذذ بتعذيبها..والله يا بدريه ما تعرفين كيف احس الدنيا مب واسعتني وانا اعذبها...
بدريه: حرام عليك...يا حمد والله..انت عذبها مب مشكله بس خبرها انك شاريها..لا تعافك البنت وتسير بعيونها لحد غيرك..
حمد: والله ريولها لحشهن حش..وراسها بقصه واقطعها الف قطعه...اصلا بعدني ما تفيجت لها ولا الشركه هذي براويج لها..اصلا لازم تيلس في البيت..
بدريه: ليكون انت ولي امرها ولا اخوها وانا مدري...اللي اعرفه انك ولد عمها بس...
حمد: ولد عمها تاج راسها اسنعها على كيفي..
بدريه: وهي مب مسنعه؟
حمد: امبلى بس كيفي تعرفيني احب افرض سيطرتي على الكل...
بدريه: الله يعينا عليك يا حمد يا ولد امي وابوي...
حمد: زين يالله بخليج ربيعتي على الخط الثاني..
بدريه: والله ان ويهك لوح...
حمد: والله ربيعتي على الخط والله العظيم..
بدريه: ليش تحلف والله اصدقك ..اصدق لو قلت لي انك متعرف على 12 الف بنيه...
حمد: بل عليهن شو اسوي بهن هذيل..
بدريه: شو بتسوي بهن..اكيد بتذلهن...ونك تعرف تحب وانت تتبلى على بنات خلق الله..
حمد: هن يركضن وراي ويرقمني انا ما يخصني ..شو ذنبي اني من اجمل ما خلق الله...
بدريه: ارجوك يالمتأثر...!!!
حمد: بندت البنيه ما عليه اصلا هي من قوم بو رنه ما تدق مول..فقرني الله يفقرهن بنات الفقر..

بدريه: الله يهديك..يالله برايك..
حمد: جهزي لي القهوه وسوي لي شي حلو من ايدينج نص ساعه وانا عندج..
بدريه: انت شو تخرف..
حمد: والله ارمس جد...
بغت بدريه تموت من الفرحه وما صدقت اللي سمعت وبندت عنه وسارت تسوي له كيكه وشاي وقهوه وتجهز له الصاله وبخرت البيت مستانسه اخوها حبيبها بيي من بوظبي عشان يزورها...
................
الصاله اللي فوق مظلمه وباب الحجره مبند وليلى تصيح داخل وقلبها محترق مب مستوعبه أي شي..بس ما رامت تسكت وحست الدنيا متحلفه لها..
" ليش ليش..؟ ابى افهم ليش انا يعني..ما في حد ثاني يصيح...لازم اعيش برعب وخوف..لازم ابكي..واتم طول العمر اعيش في كابوس..؟لازم كل شي احبه ياخذونه..لازم كل شي ارتاح له يختفي .؟ ليش يالدنيا..؟ ما يكفيج اخويه خذتيه وابويه حرمتيني منه..؟ وما يكفيج ولد عمتي حرقتي فوادي عليه..خلاص انا ماريد ولا واحد منهم..بس تتم شيخه وياي..يا ربيييه ارجوك لا ياخذونها...يا ربي ارجوك ارجوك...بسوي أي شي بس خلها يا ربي تتم وياي..يا رب انا ما اعرف انت شو كاتب لي في اقداري..بس رجيتك لا ياخذونها ارجوك..."
وتمت تصيح وتشهق مب مصدقه اللي بيصير...تتخيل هالبيت بدون ضحكات شيخه وشطانتها وعفويتها ورمستها الحلوه...بدون ابتسامتها اللي تقطع القلب..خلاص ليلى تحس ان العد التنازلي لحياتها بدا...تحس بلوعه والم...
دقت البشكاره الباب ودخلت شيخه..اللي دخلت وجسمها وثيابها كلها ماي وشعرها مبلل...مسحت ليلى دموعها واطالعت بنت اخوها بنظره بعيده وشيخه بكل عفويه يت تركض عندها..
شيخه: ماما ماما..انا ثبحت ..
شرملى: هذي بنت روح زراعه ويصب ماي مال زرع فوق راسها..
ليلى: زين شرملى خلاص سيري انا بشوفها..
شيخه: ماما انا ثبحت ثوفي ثعري..
ليلى وهي تنش بتغير لها: تعالي الحين بسبحج عدل...
شيخه: خلاث خلاث مافي ثبح ..
ليلى: بكيفج هو..؟
شيخه: والله انا ماليد ثبح..
وسارت تركض صوب الكبت وطلعت لها بدله وقميص..وردت عند ليلى..
شيخه: انا اليد هذا..
ليلى: زين انتي متسبحه بماي خايس لازم اسبحج مره ثانيه..
شيخه بعصبيه: ماليد اتي ثبحي..
ليلى: زين يالله انا وانتي..
وشلتها ليلى بالغصب وسبحتها..وغيرت لها وقررت انها ما تنزل تحت لو شو ما صار على الاقل حجرتها ارحم من مجابل ناس بيحرقون فوادها...
بس شيخه تمت مأذيتنها تبى تنزل...
ليلى: شواخي وبعدين وياج اذا ما سكتي بوديج عند الوحش...
شيخه تطالعها من طرف عينها: مافي وحث..خلاث مالد وثوثني لوح بيتهم..
ليلى: لا ما سار بيتهم هذو هني بزقره ...
شيخه:عادي..
ليلى: بياكلج.؟
شيخه:اتي ياكلج..
ليلى: يلسي اللي ما يسمع كلام ماما ياكله الوحش..
شيخه وهي تنش وتطالع وراها تتأكد ان ما في حد:ثوفي مافي وحث..اتي نونو ثغيره..تحافي من وحث..
ليلى مبتسمه: الحين انا نونو وانتي يالعيوز شو؟
شيخه حطت شيلة ليلى على ويهها وغطته وسارت عند ليلى وبطلت ايديها ومشت ببطء..
شيخه: اووووه انا وحث...
ليلى: والله انج متفيجه شواخي ردي وقايتي مكانها..
ونشت لها ليلى ويلستها على الشبريه وعطتها ورقه وقلم وخلتها تشخبط وترسم...
شيخه رسمت شخابيط ما يعلم بها الا رب العباد..
شيخه: ثوفيني...
ليلى: الله شو هذا...؟
شيخه: انا ثويته..
وسحبت ليلى منها القلم ورسمت لها بنيه طويله وحذالها وحده قصيره...
ليلى: هذي انا وانتي هذي.
شيخه ابتسمت بفرح وسحبت القلم من ليلى:انا اليد اثوي..
ويلست تشخبط وترسم ما تدري شو تسوي..
شيخه:ماما ثوفي..
ليلى: الله منو هذيل...؟؟
شيخه مستحيه وتأشر بدلع:هذي انا ..واتي هذي..هذا امداني(حمداني)..وثلامه..ودده(يدوه)..
ليلى:ليش ما رسمتي بابا..
طالعتها شيخه بغرابه وبطلت عيونها على الاخير..
نشت ليلى ويابت صورة سيف وحطتها جدام شيخه..
ليلى: يالله ارسميه هذا بابا..
شيخه شلت الصوره وتطالعها بإستغراب: هذا بابا..؟
ليلى:هيه هذا بابا...يالله قولي بابا سيف..
شيخه:بابا ثيف..

لوت عليها ليلى بقوه ما عرفت شو تسوي بس اكيد ان هالمفروض شيخه تبدا تتعرف على كل شي حواليها..افضل من انها تسير تعيش ببيت خالها ويخبرونها بكل شي وتطلع ليلى الجذابه في عين شيخه واللي قصت عليها طول هالسنين..فحبت تبدا من اليوم تعرفها بكل شي عشان تنغرس في بالها افكار عن العالم اللي تعيش فيه..
...............
كان احمد هالوقت وعقب ما اذن المغرب وصلوا يالس ويا اخته فاطمه في حجرتها..يتناقشون شو بيسوون بسالفة شيخه..ويرمسون بعد عن دراسة احمد ووين بيشتغل عقب ما رد البلاد..
..وشوي ويدق تلفون احمد..
احمد: مرحبا وعليكم السلام..
راشد: حيا الله بو شهاب..الحمدلله على السلامه..شحالك يا ريال؟
احمد:الله يسلمك يا بو حمدان..شحالك عساك بخير..
راشد: الله يسلمك والله عايشين..هاه خلاص خلصت دراسه..؟
احمد:هيه الحمدلله خلاص افتكيت بيلس بالبلاد الحين واشوف الشغل..
راشد:الله يوفقك اذا محتاي شي رقبتي سداده ما يردك الا لسانك..
احمد: دومك اصيل وهالعشم فيك..
راشد:زين يا بو شهاب...بغيتك في موضوع صغيروني..وانا في الدرب الحين ياينك اتقهوى واسولف وياك...
احمد:يالله حيهم فالك طيب يا بو حمدان..
وبند عنه وسار للميلس ونشت فاطمه تسوي القهوه والشاي وتقرب الفواله...
.
.
بعد نص ساعه وصل راشد..وسلم على احمد ويلس يسولف وياه ويضحكون ويتذكرون المرحوم سيف وحرمته..وسوالف الشياب لين ما وصلوا عند سالفة بنتهم شيخه...
احمد:اللي تشوفه يا راشد شو تبغينا نسوي بنسوي بس البنت من حقنا انها تيينا..
راشد: وانا وياك بهالشي..بس البنت ربت في بيت اهل ابوها وبس للعلم انها ما توالف حد للحين يعني بصراحه بتواجهون صعوبات لين ما تتقبلكم البنت..وانت من اولها تبى تفرض ان الاسبوع كامل جداكم واخره تيينا..وانا ما اشوف فيها عدل السالفه..
احمد: يعني كيف بتوالفنا ولا بتعرفنا وهي ما بتيينا الا اخر الاسبوع..البنت يبالها يا بو حمدان يلسه طويله عندنا..
راشد: انا معاك بس اصبر علينا شوي لين ما تكبر البنت ويشتد عودها وتقرب تسير المدرسه ويصير لين ذاك اليوم كلام ثاني..
احمد فكر شوي..
احمد: خلاص يا بو حمدان اللي تشوفه..اربعاء وخميس ويمعه...وانا بقول للوالده..
راشد: ما بنوصيكم عليها...
احمد: افا عليك ما يبا لها هذي بعد...
ونش راشد واستأذن عقب ما تفاهم ويا احمد..واتفقوا على مهله بسيطه عقب ما ترتب عمتها اشياءها وتحاول تفهمها تتقبل الموضوع..والاربعاء الياي موعدهم.
...............
في بيت بو ناصر..كان فهد نازل من فوق متسفر بيطلع..وامه يالسه في الصاله ويا ابوه...
بو ناصر: على وين؟
فهد: بسير عند الشباب..
ام ناصر: وين اخوك؟
فهد: مدري وينه من يوم رد من الدوام ما شفته...
وطلع فهد..ونشت ام ناصر بتسير فوق تشوف ناصر وينه..وطلعتله حجرته وشافته متلحف ومنسدح على الشبريه...واول ما حدرت نش من مكانه ويلسها على الشبريه...
ام ناصر بحنان:شو فيك يا ولدي يا ناصر..؟
ناصر يتنهد: ولا شي...
ام ناصر: انت مهموم يا ولدي ..خل الهم لغيرك ولا تشغل بالك ..خل الهم للايام اليايه..
ناصر: مب بإيدي يمه غصبا عني والله...امايه لو اتم اشرح لج اللي في خاطري بتتحرين ولدج ضاع منه العقل..
ام ناصر: لا والله ما اقول بس انت لا شكيت خاف اللي فقلبك يهدا..
ناصر: مستحيل..مستحيل يمه...
ام ناصر : ارمس..
ناصر: امايه مدري ليش احس بعمري ضايع بدون هدف..كل يوم يمر من عمري بدون قيمه...احس مرات مالي كلمه ولا اروم اتصرف بحريتي..وقبل اسوي أي شي احسب له الف حساب..تصدقين مرات احس عمري مب انا واحس في حد مسيرني..وغصبا عني امشي لاماكن ما ريد اروحها..واماكن تناديني وما اقدر اسير لها...
ام ناصر: وشهو له حارق فوادك يا ولدي..هذي الدنيا وهذا حالنا..مهوب كل شي نبغيه نوصل له...
ناصر: بس انا ريال يمه مفروض لي كلمه ولي وجود والي في خاطري اسويه..انا مب بنيه اتقيد برمسة اهلي..صح من واجبي طاعتكم بس مب على حساب نفسي...
ام ناصر: يا ولدي لو تسمع شوري وتعرس وتخليني اخطب لك اروى..والله انها نعم البنيه بتداريك وتعيشك بخير وتييب لك العيال يملون عليك حياتك..
ناصر سكت ولا تكلم ..
ام ناصر: هاه شو قلت يا ولدي...؟
ناصر: لاء ماريدها..خلاص انسي اني بعرس..وسمعي يا امايه اخر مره تييبين لي هالسالفه تراني كرهت عمري..وهالسالفه تراها اكثر شي عقب ليلى بنت خالي مضيجه بي..
ام ناصر: ليلى شلها من بالك يا ولدي..مب ماخذنها لا تيلس تحرق لي فوادك وانت في عز شبابك..
ناصر: خلاص الايام بتخلينا نشوف كل شي..بصبر ما وراي غير الصبر..هذو انا صابر اكثر من تسع سنين..يعني ما روم اصبر اكثر.؟
ام ناصر: بس العمر يسير بدون ما نحس به..وانا اريد اشوف عيالك مالين عليه البيت..ولا تبى تحرمني منهم..؟
ناصر: الله يطول بعمرج يالغاليه..بس عندج فهد شوفي عياله تراهم شرا عيالي..يوم انج تحبينه زوجيه اروى...
ام ناصر: اخوك خبله ما عليك منه...ولا تقول واحد عنده عقل يحب بنيه اكبر عنه..؟
ناصر مبتسم...
ام ناصر: شفيكم يا عيالي تخبلتوا وعايفين العرس..؟ وعلى من ؟ على بنات خوالكم..الله يهديكم بس..واحد يبى وحده اكبر منه باربع سنين ومن يوم عرست عاف البنات..والثاني مرابط لي على اختها والموت اقرب لها منه...
ناصر: بسم الله عليها يمه يعل عمري قبل عمرها...
ابتسمت ام ناصر وتيمعن دموعها في عيونها: الله يرحمك يا بو راشد والله لو انك عايش جان انا وانت شفنا عيالهم...(وتنهدت) بس الدنيا ما نروم نمشيها على كيفنا....
ناصر: امايه اذن العشا انا بسير المسيد اصلي وانتي نشي صلي فديتج...
ام ناصر تنش من على الشبريه: الله يوفقك ويهدي سرك ويفتح عليك فتوح العارفين يا ولدي..وينولك اللي في بالك...
ناصر وهو ساير يتمسح: ان شاء الله يمه...
وطلعت عنه امه وسارت تصلي وهو تمسح ونزل المسيد...

[الرايقه]

يعطيكم الف عااافيه ,,,

[خطافة الارواح]

يعطيك العافية اخوي البدوي الحبوب

بصراحة انت مو مقصر ابدا

بس حبيت اسال كم حلقة بقى للقصة ؟؟؟




وسلامتكم
@83@

[الغلا]

لكم مني
الحلقه الحاديه عشر
باجر هو الثلاثاء...وليلى بعدها للحين ما عرفت شي عن اتفاق احمد وراشد...بس الشي الوحيد اللي تحسبه ان في مؤامره تدور من وراها..
عقب الساعه 10:30 رد راشد البيت وسار وغير ثيابه ورد بيت امه وخبرها كل شي صار وطلبت منه يسير لليلى ويخبرها بنفسه كل شي لانها مستحيل تتقبل الرمسه من امها...وطلع لها راشد ودق الباب وبطلته بس انصدمت يوم شافته ما توقعت انه ييها لين الحجره...دخلته..وكانت شيخه تارسه حوض صغير بالماي وتغطس فيه العرايس والالعاب البلاستيكيه..واول ما شافت راشد زاغت كالعاده وشردت تتقبض في ثياب ليلى..وغطت ويهها...
يلس راشد على الكرسي مجابل ليلى اللي تمت واقفه وشيخه مغطيه ويهها..يوم انها ما تشوف راشد تتحراه بعد ما يشوفها...
راشد: يسلي اباج في موضوع مهم..
يلست ليلى: هاه..؟
راشد: جهزي لبس البنيه في شنطه صغيره..خالها يوم الاربعاء بيي يشلها...وما في داعي للحركات اللي مالها معنى...
ليلى بقهر فضيع: راشد ترا......
قاطعها: قصري حسج مالي رمسه ثانيه وياج واللي سمعتيه يتنفذ انا تعبت من بزاج وقلةادبج..ليلى خلج عاقله وسمعي الرمسه لاني ماريد اكررها..ومافي داعي تترسين راس الياهل افكار...
ليلى تبى ترمس بس ما قدرت وتمت عاضه على شفايفها بقوه لين ما سال الدم منها...حست عمرها ترتجف من القهر..والغيض والتعب...تبى تصرخ بس حتى حرية الكلام هي ممنوعه منها...
راشد وهو يطلع: يوم الاربعاء الصبح بيمرها خالها خليه في بالج هالشي..يعني لا تسيرين الدوام...
وطلع راشد وصك الباب وليلى يلست علىالارض تبى تصيح بس مب قادره..كانت من كثر ماهي تعبانه وخاطرها ضايج ونفسيتها متدمره مب قادره حتى تعبر عن مشاعرها...
يوم حست شيخه ان صوت راشد انعدم في الحجره..هدت ليلى وسارت تكمل لعبها...ما تدري شو تخبي لها الايام..
بس ليلى حست عمرها تنتهي وانها تكبر كل يوم عشر سنين..حست انها انتهت خلاص وما بقى منها شي..كل شي تحبه انتهى وكل شي قريب منها يبعد..وكل شي تتمناه يروح بلى رجعه..
تبى تصيح بس من فضاعة الصدمه جف الدمع....حست بقهر فضيع ..بضياع بانهيار ..بس وين اللي يسمع ؟ وين اللي يحس..؟ وين اللي يقدر..؟
مب كل شي نتمناه نوصله...وما في اصعب علينا من انا نكافح في الحياه وتاخذ الناس منا شقا كفاحنا...!!!
بس وين المفر من الاقدار..
..................
في البيت يالسين في الصاله حصه وامها وابوها وسمر..وعفرا وحمده وساره وخليفه...
بو خليفه: وينهم قوم عبدالله محد شافهم من فتره...؟
حصه: ما صار لهم اسبوع من يوم ساروا...مسرع ابويه تولهت عليهم..
ام خليفه: فديتهم والله...بدريه علني افدا ويهها ما تخليني لحالي والحين من تظهرون اتم لروحي...
ساره: وانا يا عمتي وين سرت..؟
خليفه: شو تبين بأمي اهم شي انا ارتاح وانتي وياي...
حمده: يا عيني على الحركات المكشوفه...
حصه: لحوول يا ام لسان والله يبى له قص..
سمر طالعت حصه بنظره...
حصه ترمس سمر: خير في شي؟
سمر: حد كلمج.؟
حصه: اتحرا بعد تراني واصله حدي وعادي اسوي فيج أي شي...
سمر: ابويه يالس وعادي اقوله...
حصه: لا ارجوج زغت...اصلا انا ابى ارمس ابويه...في موضوع...بس مب الحين عنج انتي ببرد فوادي فيج...
سمر: ما سويت شي واثقه من عمري...
حصه انقهرت من ثقتها: زين يالحافيه اسكتي...
سمر مستحيه ومعصبه بنفس الوقت: والله يا ويلج ان خبرتي حد..حصووه حرام عليج...
حصه مستانسه: يالله اسكتي ولا بخبرهم كلهم..
سمر: خلاص بسكت بس لا تخبرين حد...
ام خليفه: انتن تتساسرن في شو؟
حصه: لا بس اتخبرها عن امتحانها...
وتمت حصه وسمر يتلاسنن من تحت لتحت عشان ابوهن ما يسمع....
كانت عفرا كالعاده ساكته ...بس هالمره سكوتها فضيع تحس انها ساكته على جرم فضيع...بس كيف ترمس وتقول لمن..تعبت من كثر ما تفكر وطلعت عنهم..وسارت بيتهم...وسحبت التلفون حجرتها...تمت تفكر شوي..وبعد تردد قصير دقت الرقم لا شعوريا...كانت لاول مره محتاجه ترمس تبى تعرف كيف تتصرف..
"مستحيل اخبر عمتي حصه...هذي ما تيود الرمسه...وامايه بتجتل حمدوه اختي...وانا ماريد افرق بينها هي وسلامه..ويدوه شلها بهالسوالف...يعني يا ربي اخبر من والله اني محتاره...؟؟؟"
والتلفون بعده يدق ومحد رد عليه...بندت وردت تدق مره ثانيه...اخر شي شلته الجهه الثانيه...
عفرا بنعومه فضيعه: الوو..
بدريه: مرحبا..
عفرا: وين بدريه؟
بدريه: انا ليش منو انتي؟
عفرا: انا عفرا بنت خليفه...
بدريه ابتسمت: يا هلا والله غناتي فديت حسج والله اني ولهت عليج...
وبعد السوالف والسؤال عن الحال...قررت عفرا انها ما تخبر عمتها بدريه أي شي...
بدريه: غريبه متصله؟
عفرا: لا بس حبيت اسلم عليج وببند الحين لان امايه تبغيني...
بدريه مستغربه: على راحتج فديتج..
وبندت عنها ..بس الاكيد ان عفرا ما كانت مقرره تخبر بدريه..واللي في خاطرها انها تحبها وتموت عليها بعد...ما تدري كيف سمحت لعواطفها تنجذب لبدريه بهالسهوله...بس الاكيد انها تكن لها حب كبير...
...............
في دبي رد حمد من عند بدريه...وهو في الدرب مسرع على الاخير يبى يوصل بوظبي يسابق الوقت وما يدري شو الدنيا مخبيتنله...ناسي العالم كله ومحد يدري ولا ممكن يعرف حمد يفكر في شو...سار اليوم دبي متوله على بدريه ويبى يسلم عليها..بس ما يعرف شو بعد بدريه..!!!
حط شريط قصايد ل بن رحيمه وحط قصيده يموت فيها وتجلب بقلبه مواجع كبيره...
" لا ما عرفتي الحب لا ما تحسين .. وغدرج تعدى غدرذيب الفلاتي الذيب يعوي قبل يغدر بمسكين .. و انتي غدرتي خافقي في سباتي وانتِ السبب سقتِ على القلب جرحين .. غدر الغرام و وجع الذكرياتي وانتي السبب واليوم لا لا تلومين .. و ان ياج باجر شوفي شلون ياتي والله لكتب و أفضحج في دواوين .. و أرزف وأغني يوم خبر الوفاتي و أرسم لأهل العشق قلب و سهمين .. و قصة خيانة ما روتها الرواتي و يمين لنشر فوق إسمج عناوين .. و أشهرج من قاصي اليمن للفراتي و من غرب هالدنيا إلى قاصي الصين .. ديوان غدر فيه كل اللغاتي و البادي أظلم سنة العين بالعين .. و لاَّ فهذي لا عادتي ولا صفاتي "
تنهد وزاد على السرعه رايح وين ما يعرف..كل اللي في قلبه جروح لا لها اول ولا تالي..ما يدري يدوايها من من ولا من..قلبه مثخن جراح..
ويلاقي متعته في تعذيب غيره...ابتسم بسخريه من اللي يصير بس كمل طريقه وهو في الدرب انتبه للتلفون اللي كان يدق من الصبح ولا حس به..بس شاف فيه ثلاث مكالمات لم يرد عليها...وكلهن من رقم يعتقد انه يعرفه وعلى طول اتصل به...
حمد: السلام عليكم
عبدالله: وعليكم السلام شو هالحركات يا ريال..؟
حمد: شو؟
عبدالله: كيف تروح بدون تشوفني ولا تسلم ولا هذي سنتكم يا هل بوظبي..
حمد: لا تضحكني ارجوك..ولا يالاخ انت من وين؟
عبدالله: انا صرت من دبي بحكم شغلي ولا عقب اخر الاسبوع استوي ظبياني...لا لا صدج ليش روحت؟
حمد: شو بعد الساعه 11:00 متى تباني اوصل...وراي دوام باجر.
عبدالله: مب مشكله اشوفك الاربعاء ان شاء الله في ميلس عمي ...
حمد: على خير ان شاء الله ولو اني ما احب هالتجمعات..
وبند عنه عبدالله وحمد كمل دربه ساير بوظبي..
.
.
في دبي وفي بيتهم بالتحديد عبدالله يبند ليتات الصاله..وطلع فوق وهو على الدري يسمع صوت التلفون يدق في الصاله..بس طنشه وراح..ودخل الحجره وشاف بدريه تفرد اللحاف على الشبريه..
عبدالله: كان تلفون الصاله يدق بس ما رديت..
بدريه: برايه من يبانا الحين اكيد حد مغلط..
عبدالله: يا كثرهم هالمغلطين غثونا...
بدريه: اقول..هالويكند بنسير بوظبي ولا لاء..؟
عبدالله وهو ييلس على طرف الشبريه: اللي تبينه..
بدريه:هيه اكيد ابى اشوف امايه ولهت عليها..
ويدق تلفون عبدالله ونش له بسرعه....
عبدالله: مرحبا..
سلمى وهي تصيح: عبدالله وينك تعال...
عبدالله بخوف: شو فيج سلامي...؟
سلمى وهي تصيح من الخاطر: تعال الحين يالله يا عبدالله ...
عبدالله: اوكي ثواني وانا عندج..
بدريه بخوف: شو فيها..؟
عبدالله وهو يلبس بسرعه: مادري تصيح من الخاطر الله يستر بس..
بدريه: بيي وياك وين بتحدر ميلسهم هالحزه...
عبدالله: ماله داعي..
بدريه: ارجوك عبادي خذني وياك..
ولبست بدريه وشلت تلفونها ولقت فيها اكثر عن 11 مكالمه من سلمى..وهي نازله شافت الكاشف رقم سلمى ويلست تواجع عبدالله اللي ما رد على التلفون...وهم في الدرب...
بدريه: شو تتوقع مستوي؟
عبدالله: اشدراني عاد سلامي سمن على عسل ويا ريلها ما توقع شي يستوي...
بدريه: يا ربييه شو مستوي بها والله زيغتني...
وصل عبدالله ووقف موتره ونزل ويا بدريه ودقوا الجرس ونزلت سلمى لابسه عباتها وطاحت في حضن بدريه ويلست تصيح...
عبدالله بضيج: سلامي شو صاير...؟
سلمى تصيح: يالله طلعني من هني ما ريد اتم ولا لحظه...
بدريه: استهدي بالله يالله ندش...
سلمى: ما بدش والله نظهر الحين يالله...ولا والله اذا ما طلعتوني بدق على ابويه الحين ييني دبي...
عبدالله: بس فضيحه ناخذج من بيت ريلج بدون شوره..يا سلمى يا حبيبتي استهدي بالله..
سلمى تصيح: ماريد يالله ابى اطلع الحين..
واشرت بدريه لعبدالله انه خلاص يالله يروحون...وخذوها وردوا بيتهم...وطلعوا فوق ...عبدالله سار حجرته ودخلت بدريه سلمى حجرة نوم فاضيه فوق..ونزلت تسوي لها عصير ليمون عشان تهدا شوي...ولحقها عبدالله...يبى يعرف الاخبار ويستهبل شوي...
بدريه وهي تعصر الليمون: طلع الخبز من الثلاجه بسوي لها أي شي خفيف تاكله...
عبدالله: ما تبى شي وهي تصيح..الا اقول حق منو هالعصير..؟
بدريه: لسلامي...
عبدالله: انا ابى بعد..
بدريه: تراني مب متفيجه لك..
عبدالله ونه زعل: بس شوي والله خاطري فيه..
ابتسمت بدريه: اشرب هاللي سويته وبسوي لها واحد ثاني...
وطلعت هي وياه فوق...ويلسوا وياها شوي وكانت منهاره..وتصيح وما طاعت تسكت ..بدريه لاحظت شي بس سكتت ما تبى ترمس جدام عبدالله...
بدريه: يالله عبادي سير ارقد ..
عبدالله: وانتي؟
بدريه: انا برقد عن سلامي..
طالعها عبدالله بنظره متألمه انه ما يبى..وهي ردت له نظره جاده...ونش وطلع يرقد..وهي تمت عند سلمى اللي ما هدت مول...
بس بدريه كانت يالسه حذالها تقرا عليها وتهديها وما سألتها أي شي لين ما تهدا..وعقب ساعه رقدت سلمى...ونشت بدريه بتغير ثيابها وترقد..بس بتمر على عبدالله شوي..وسارت وبطلت الباب شوي وشافته راقد..ومب متلحف..ولحفته...وطالعته بحنان وابتسمت...وغيرت ثيابها...وسحت شعرها..
عبدالله: ليش ما رقدتي..؟
بدريه انتفضت زايغه: بسم الله منك انت ناش للحين..؟
عبدالله يلس: ما ياني رقاد خايف...اليوم خليتيني ورحتي..
ضحكت بدريه ومسكت دبدوب وفرته عليه: رقده حذالك لين باجر..
عبدالله ماد بوزه: مابا مابا...شو هاه يا سلام انا ارقد بروحي وانتي ترقدين ويا سلامي..بيي عندكم..
بدريه: اشهد انك استخفيت وقعدت...
عبدالله: شو اسوي والله ما فيني رقاد...تعالي بنتمشى في الحديقه شوي..
بدريه: الله يكملك بالعقل وين نتمشى الساعه 1:00 نص الليل...
وسارت لين حذاله..وردته يرقد على الشبريه ولحفته...وحبته على يبهته....
بدريه: يالله حبيبي ارقد عشان باجر تنش للدوام...
عبدالله مبتسم: ان شاء الله ابله...
ضحكت بدريه وطلعت عنه...وسارت ترقد عند سلمى وهو رقد من بعدها..
......................
اليوم الثاني الصبح يلست ليلى وحست حيلها مهدود من الصياح اللي البارحه..وتلبست ونزلت تحت تتريا حصه..بس ما يلست في الصاله لانها ما كانت تبى تشوف امها...ويلست في الحوي تتريا لين ما حصه توصل...
ومرت ام راشد في الصاله وشافت ليلى من الجامه يالسه في الحوي وغمضتها وتقبضت في الباب وعلى عكازها نزلت للحوش وما انتبهت لها ليلى..
وتمشي ام راشد ببطء مثل بطء السنين في رسم الافراح في عيون اليتامى..ما وصلت ام راشد الا وليلى طلعت من الباب وسارت ويا حصه وما انتبهت لامها اللي كانت يايه حذالها..وما زقرتها تدري انها ضايجه منها...بس ليلى لازم تعرف الواجب وان الحق حق...
.
.
في الدوام سارت ليلى مكتبها على طول ولاحظت حصه انها ضايجه..بس ما حبت تتدخل..دام انها يايه من البيت يعني امور عائليه فما حبت تتدخل مول...
يلست ليلى وبدت تشتغل وهي ساكته بس عيونها منفخات من الصياح..وخدودها حمر من التعب...
حصه ما قدرت تصبر و نشت وسارت تيلس حذالها...
حصه: شوفيج عسى ماشر.؟
ليلى: ماشي بس تعبانه شوي..
حصه: واللي تعبان يصيح؟
ليلى تبلع ريجها وفي عبره خانقتنها: ضايجه...
حصه: عادي اعرف؟
ليلى:يوم احس اني بخير بخبرج الحين ما روم ارمس...
حصه: تبين شي بارد عشان ترتاحين؟
ليلى بصوت مخنوق: مالي خاطر في أي شي...
حصه وهي متألمه لحالها: زين انا هني لو تبين شي...
ونشت حصه تشتغل...ومرت ساعه ....وياهن حمد دق الباب ودخل...
حمد: ليلى اذا فضيتي مري علي المكتب ...
ليلى رفعت راسها ترمسه: في شي ضروري...؟؟
حمد انصدم من شكلها بس حافظ على هدوء ملامحه:لاء بس بغيتج تسوين وياي بعض اوراق التأمين وتراجعين الملفات لاني ما اعرف لهن وايد وهاي شغلتج...اذا فضيتي.؟
ليلى: اوكي خلاص بييك الساعه 1:30 زين جي؟
حمد: اوكي خلاص...
وقبل يطلع طالع حصه بنظره متسآءله..خلت حصه تتلخبط فيها كل الاحاسيس ..علىالاقل نظرة الهدوء اللي في عيون حمد تموّت مليون مره اكثر من نظرة الغرور والذل..هزت حصه راسها انها ما تعرف شي ..رد حمد وعطاها نظره بما معناها ان ما فيها فايده...وظهر..
ابتسمت حصه على الاقل ابتسامة الرضا منه كم تسوى...ولو ان نظرة اليأس اللي شافتها في عينه سببت لها احباط رغم وناستها...
...............
انفتح باب الحجره الساعه 10:15 ودخلت وهي ماسكه صينية الريوق...ومبتسمه ابتسامتها المشرقه اللي تفتح نفس كل من يطالع فيها..
بدريه: صباح الخير يا عيوني...
سلمى مبتسمه بس عليها اثار الالم: صباح النور..
بدريه: شو اخبارها الحلوه اليوم..؟
سلمى بتعب: زينه..
انتبهت بدريه لشي ثاني موجود في ويه سلمى من الجهه اليسرى بس ما قدرت تمسك عمرها اكثر عن جي..
بدريه: شو فيه ويهج..انتي متعوره..؟
سلمى بصوت مخنوق: لاء..
نشت بدريه حذالها تشوف عدل ورفعت شعرها شوي وشافت خليط من الالوان وكدمات خفيفه...
بدريه: شو فيج سلامي قولي والله ما اخبر حد..
سلمى تصيح: ضربني..
بدريه منصدمه: حامد..؟
سلمى: هيه..
بدريه: ليش شو السبب قولي لي شو اللي يخلي حامد يفكر يمد ايده عليج.؟
سلمى ما رمست وصاحت على طول...
بدريه تتنهد: خلاص طبيه ماريد اعرف..برايج انتي وريلج..بس لا تسكتين له..وخلي عمي يعرف بكل شي..
سلمى: ابى تلفونج شوي .
بدريه: لا تتصلين على عمي وتتعبينه.... البارحه عبادي قال بيوديج باجر بيت عمي...وبياخذ اجازه من الدوام...
سلمى: اوكي خلاص...
ونشت عنها بدريه عشان تتريق..وسارت حجرتها ترتبها بعد ما سار ريلها دوامه...ودقت له اكيد من حجرتها...
عبدالله: يا صباح الورد والجوري لاروع انسانه في الكون والمجره ودرب التبانه كله..يا هلا بكل احساسي وذاتي..
بدريه مستحيه: صباحك ورد يا عمري...شحالك..
عبدالله: مب بخير ملتعن من صباح الله خير في الدوام...وما شفتج اليوم الصبح...جان ييني صياح..
بدريه: عادي طلع البوك وشف الصوره وانتهى الموضوع..
عبدالله: ما يسدني..لازم اشوف غناتي ع الطبيعه بكشتها..اووه سوري اقصد بشعرها الحريري المنسدل على كتفيها وابتسامتها الحلوه وريوقها اللي يفتح النفس..
بدريه تضحك: كشتها في عينك ودك بشعره من راسي..وبعدين ارمس من البدايه انك متضيج عشان الريوق مب عشاني..
عبدالله: افففف متى بتيي الساعه 2:00 وارد البيت...
بدريه: يوم ترد بخبرك شي...
عبدالله: عن سلامي..؟
بدريه: يوم ترد بقولك...الحين بسير بنجب الغدا انا والبشكاره....
عبدالله: شو مسوووين؟
بدريه: برياني دياي..
عبدالله: يم يم خاطري فيه الحين..ما يخصني..
بدريه: لحوول يالله عطلتني باي ..
عبدالله ونه زعلان: اوكي امايه..
بدريه تضحك: يالله غناتي باي..
وبندت عنه وسارت تجابل شغلها وعقب طلعت فوق ويلست ويا سلمى تسولف لها وتحاول تطلع منها الرمسه..
........................
الساعه 1:30 بدا كلاس الكيمياء..وكان الاستاذ البارحه ميمع دفاتر الواجب..واليوم عقب ما صلحهن ياي يوزعهن...وزعهن كلهن عدا دفاتر 6 طلاب منهم عفرا...
الاستاذ: اللي ماخدش الكراس بتاعو يجيني هنا أصاد الباب..
عفرا مبطله عيونها على الاخير مب مستوعبه شي..معقوله مسويه شي وهي مب حاسه..ونشوا اكسل خمس طلاب في الصف...ريهام وطارق واثنين ثانيين وياهم...ووقفوا حذال بعض والاكيد ان عفرا الوحيده اللي كان شكلها غلط من بينهم...ولاول مره توقف في هالمكان....ريهام و طارق كانوا فاهمين السالفه وميتين خوف بس ما في حل الا الانكار...حمدان كان يطالع عفرا مستغرب من اللي يشوفه..ويت عينها في عينه..واستحت بس ردت تطالع في الاستاذ بكل ثقه رغم ارتباكها....
الاستاذ: عايز اعرف دلوأتي ازاي الحل بتاعكوا نفسه...ونفس الاخطاء ونفس التنظيم...
طارق: انا ما غشيت من حد...سرت عند اخويه وشرح لي كل شي..
ريهام: انا والله يلست احل وهاللي طلع معاي بصراحه انت تعرفني استاذ ما اغش..
والباقين دافعوا عن اعمارهم الا عفرا ساكته ما رمست....
الاستاذ: وانتي يا عفرا..؟
عفرا طالعته بنظره حقيره: استاذ انت تعرف ان الغش مب شغلتي..وبحياتي ما سويتها...تخبرهم من اللي ناقل من الثاني..ما احب احط عمري بمواقف محرجه فما بالك اغش من غيري..وبعدين انت تعرف زين يوم احتاي شي وما اعرفه..انا ادل المكتب مالك..
الاستاذ مبتسم: ايوه الكلام ده كله سليم..وانا عارف كل ده..بس عايز تفسير للحل والمشكله دي..
عفرا بثقه رغم انها محترقه من داخل: استاذ مجرد انك موقفني هني..يعني تحاسبني على غش غيري...ممكن ارد مكاني.؟
الاستاذ: ارجعي مكانك ياعفرا...
وردت عفرا بكل ثقه مكانها والباقين تموا واقفين يتريا الاستاذ حد فيهم يعترف بس ما طاعوا...وطرشهم كلهم للمشرفه الاجتماعيه تتفاهم وياهم...
ورد يشرح الدرس...
عفرا كانت هاديه وواثقه من نفسها...بس في داخلها نار محترقه مب مصدقه اللي صار..وحاسه بطعن في كرامتها...كيف يسمح لنفسه انه يشك ولو للحظه في نزاهتها وعبقريتها..كان الاستاذ يشرح وهي في عالم ثاني لاول مره...وتحس الكل يطالعها وينتظرها تسوي شي..وقف الاستاذ شرح وعطاهم مثال عشان يحلونه..وخلصت اول وحده رغم انها ما كانت منتبهه للشرح بس من تحضيرها البارحه كانت فاهمه كل شي..
ومر الاستاذ يشوف حلولهم بس كلهم مخبصين بإستثناء منال اللي حلت الطريقه لين نصها صح..والناتج شوي فيه اخطاء..ومر على عفرا ويلس يرمسها بصوت واطي..
الاستاذ: انا عارف كل حاجه بس عاوز اشوف الولاد دول حيفضلوا كده لحد امتى..
حقرته عفرا وما ردت عليه...بس الاكيد ان الود ودها تعطيه كف يطير ويهه..وسار عنها يشوف باقي الاولاد والبنات..
.....................
كان هالوقت ناصر يالس في مكتبه يشتغل ما يدري ليلى شو تعاني ولا شو تحس..ولا يعرف انها في هاللحظه تذبل، تضعف، تنتهي،الكون يسير عكس مشيتها،العالم يتحالف كله ضدها..كان يفكر في شغله وتمر على باله..فقرر ينهي صراعه مع ذاته..وينزل لها تحت على الاقل يطيب خاطرها بكلمتين ويشوف شو اخبارها..ويعتذر على اللي صار امس...ويبتسم لها ابتسامه من خاطره تدفعها للفرح طول اليوم..
بس وين؟ كان اللي في خاطر ليلى اكبر من مجرد ألم،هم،تعب ،ضيج،انهيار...ليلى اللي في هالوقت كانت تمشي ثقيلة الخطى لمكتب حمد وهي في الدرب شافتها مشاعل..
مشاعل: ليلووه..
ليلى: هلا مشاعل..
مشاعل: شو فيها عيونج محمره..ليكون بكيتي؟
ليلى: لاء ..
مشاعل مستحيه: سوري اذا ضايقتج بسؤالي..
ليلى مبتسمه: لا عادي..
مشاعل: وين رايحه؟
ليلى: عند حمد يباني اساعده شوي..
مشاعل: ايي وياج ولا ماله داعي..؟
ليلى: ع راحتج انا ما بطول عنده بس شوي وبسير..تعالي اذا تبين.؟
مشاعل وهي رايحه: لا حبيبتي انا عندي شغل ما خلصته اشوفج بعدين..
وسارت ليلى لحمد ودقت الباب..ونش لها ويلسوا على المكتب تخبره شو يسوي ما يسوي..وتعدل معاه وتكتب له اهم النقاط..
.
.
هاللحظه ناصر وصل مكتب ليلى ودق الباب وعدلت حصه وقايتها بسرعه وهدت اللي في ايدها..
حصه: تفضل..
ناصر واقف حذال الباب ويطالع مكان ليلى الفاضي: السلام عليكم..
حصه: وعليكم السلام ..
ناصر سكت الحين ما يعرف شو يقول...وحصه طالعته بغرابه وعقب استوعبت ...
حصه: تامر بشي.؟
ناصر: لاء ..بس..
حصه حبت تنقذه وتنهي غرقه وتجاوبه على السؤال وتبعد عنه احراج طرحه: ليلى سارت مكتب حمد يراجعون اوراق التأمين...
ناصر: اها اوكي...
وطلع ناصر من عندها ورد مكتبه فوق..يجر اذيال الخيبه..للاسف في اللحظه الي كان يباها تشوفه يعتذر لها او يطيب خاطرها..ما كانت موجوده...طلع مكتبه...وهو فوق شافها طالعه من مكتب حمد بس ما انتبهت له..وهي عند الدري رمسها..
ناصر: ليلى..
لفت له ببرود: اهلين..
انصعق من شكل عيونها وذبولها: شوفيج؟
ليلى خلاص انتهت هاللحظه..اللي يسألها هو ناصر..هو عيونها ..وقلبها ..الانسان الوحيد اللي تبى تشكي له ضعفها..بس وين..البارحه ناصر جرحها بسؤاله السخيف..واللي زادها هم سالفة شيخه في البيت...
ليلى بصوت قد ما تقدر يكون عادي: ماشي بس تعبانه من الشغل..
ونزلت قبل يرمس وعيونها انترسن دموع ولين ما وصلت المكتب قدرت تتمالك نفسها ومسحت دموعها...
ناصر بعده واقف مكانه مصدوم متعجب..
"معقوله ليلى متضايجه مني على سالفة امس..؟ مستحيل مب ليلى اللي تهزها وتضعفها هالكلمات البسيطه انا اعرفها زين.."
ودخل مكتبه مستغرب ومتضايق بنفس الوقت...
ليلى جهزت عمرها ورتبت اوراقها...لان الدوام انتهى خلاص الساعه 2:10 الحين..
حصه: على فكره ناصر مر هني..
ليلى: شفته فوق..
حصه: خلصتي شغلج ويا حمد..؟
ليلى: هيه بقى شوي وقال لي انه بيخلصه بروحه..
وسارن السياره بس بعد ما تجرأت حصه تنشدها عن شي وانتظرت لين ما تحس انها فعلا محتاجه لها وهي بترمس في الوقت اللي يريحها..
...............
المغرب الساعه 7:15 صلت المغرب ونزلت بتسير بيت يدها عقب ما تلبست وغيرت ثيابها عشان ترد بدري وتدرس شوي...وفي الصاله شافت ابوها وسلمت عليه..
خليفه: شحالج اليوم غناتي.؟
عفرا: بخير فديت روحك انت شو صحتك..؟
خليفه: هلكان من دوامي خلاص ابوج غادي شيبه...
تبتسم عفرا: فديت روحك...
خليفه: بنتي عفاري تعالي بغيتج في كلمتين..
عفرا: اكيد ابويه ...
ويلس على الكنب في الصاله ويلست حذاله..وطالعها بفخر..
خليفه: منو خبرتي ان المدرسه باعثتنج.؟
عفرا: ما قلت حق أي حد الا انت وبس..
خليفه مبتسم بارتياح: زين جي..
عفرا: ليش ابويه في شي استوى...؟
خليفه: غناتي يدج مب راضي تسيرين...ويقول كملي دراستج في أي جامعه في البلاد..
عفرا انصعقت..كل احلامها تبخرت..كل شي ضاع..كل شي انتهى...تبى تحافظ على هدوءها جدام ابوها...
خليفه: بنتي وعسى ان تكرهوا شيئاً وهو خير لكم..ويمكن الله مب رايد لج تسيرين..
عفرا بإبتسامه باهته: اللي تشوفه يا بويه...
خليفه: مب ضايجه.؟
عفرا: يعني شوي بس اهم شي رضاكم..
خليفه: بارك الله فيج يالغاليه..وحبها على راسها...
ونش ساير بيت اهله...وعفرا تمت واقفه في الصاله ..نست وين بتروح وشو بتسوي..كل الوجود انتهى في نظرها الحين..وطلعت فوق بكل هدوء..وغيرت ثيابها ولبست بيجاما للنوم..وسحت شعرها ولفته بشكل مب مرتب مول..ويلست وبطلت كتابها تبى تلهي عمرها..تبى تكافح هاللحظه عشان شي واحد بس...وهو التغلب على دموع متيمعه في عيونها..وخنقتها العبره بس تمت صاخه...
ويلست تقرا وتحل واجبتها وتحضر لباجر...وطردت شبح البعثه من راسها وحاولت تنسى للحظه انه انرفض هالطلب...
وشوي وتييها حمده وتدق الباب وتدخل..
حمده: عفاري...
عفرا رفعت راسها تطالعها: شو.؟
حمده: شو فيج خدودج حمر شو مستوي؟
عفرا متماسكه:ولا شي تبين شي ضروري ولا اذا تكرمتي طلعي وراي دراسه..
حمده: بس كنت بقولج تعالي بنسير بيت يدي ...
عفرا: عندي امتحان قولي لهم ما تروم تيي...
حمده: اوكي...
وطلعت عنها حمده وهي نشت تصك الباب بالمفتاح..عشان ترتاح وتفتك من الحشره...
.
.
في البيت العود يالسه ساره ويا عمتها ام خليفه وحمده وبو خليفه وخليفه....يسولفون ويتقهوون عقب المغرب..ونش عنهم خليفه بيسير للشباب..
وكانوا ما يعرفون شي للحين عن سلمى بنتهم لان عبدالله طلب منها ما ترمس لين يوم الاربعاء يوم بيسيرون بوظبي...
طلعت سمر عنهم وسارت فوق تدرس..اول ما وصلت الحجره لقتها مبنده...
سمر: حصووه بطلي الباب..
حصه من داخل: عندي شغل تعالي بعدين..
سمر: ابى ادرس بطلي الباب...
حصه: عشر دقايق وتعالي..
سمر: انتي شو تسوين.؟
حصه: ما يخصج تعالي بعدين..
ويلست سمر في الصاله اللي فوق تتريا وحصه داخل منسدحه على الشبريه بس متعايزه تبطل الباب...كانت تحاتي ليلى وتفكر شو فيها ؟؟وشو اللي ممكن يخلي ليلى القويه تهتز بهالسهوله..وتضعف لدرجة الصياح...؟؟.وشو اللي ممكن يخلي ناصر ينطرا جدامها ولا تبتسم ولا يتغير ويهها لورد جوري من المستحى....؟؟
كل هذي اسئله دارت في بال حصه ما تعرف لها اجابه والكارثه انها ما تروم تدق لها لانها تترياها هي تدق..وتعرف ليلى ما بترمس الا يوم تحتاي انها تقول اللي في خاطرها...وقبل تكمل تساؤلاتها وافكارها ياها صوت مول ما تحبه..
سمر: يالله بطلي الباب...اففف منج..
حصه وهي تنش: لحوول محد يعرف يرتاح في بيته...
سمر تضحك من برا..بس بصوت خفيف عشان ما تتوحش عليها حصه..
بطلت حصه الباب وركضت سمر داخل ونطت على الشبريه وانسدحت ولوت على مخدتها...وحصه مبطله عيونها على الاخير تطالعها بغرابه...وتشوف كل هالخبال اللي في اختها....
حصه: الحمدلله والشكر...شي يعورج..؟ انتي بخير.؟؟
سمر ميته ضحك: هيه مادري بلاني بس تولهت على حبيبتي..
حصه: منو هذي؟
سمر: شبريتي..
حصه تصك الباب: اص ولا كلمه انا ابى استرخي وماريد حد يزعجني..
سمر : ان شاء الله اختي..
حصه انصدمت من ادب سمر اليوم بس طنشت..وسمر نشت لين عند حصه وهي منسدحه...
سمر: اختي تبين اييب لج ماي انا نازله تحت..
حصه متعجبه: لاء مشكوره...بس قربي مني شوي بتحسس راسج يمكن فيج حراره...
سمر: لا اختي مافيني شي بس انا قررت اكون مؤدبه مع اختي الكبيره..
حصه مبتسمه بتعجب: ان شاء الله دوم..بس على الله ما يكون وراج شي..
سمر: انا نازله وبييب لي ماي وبسوي لج عصير...
حصه: كثر خيرج اقول تعالي تعالي..بنزل وياج لازم نسير الطواري انتي فيج شي اكيد...
سمر: اووه اختي ...اقصد حصه عزيزتي لا تتعبين نفسج ما فيني شي...
وطلعت سمر بسرعه...وحصه بعدها تحت تأثير الصدمه...وردت بعد شوي...ياييبه وياها عصير برتقال وعصير ليمون..
سمر: اختاري اللي يعيبج ما اعرف شو مشتهيه هالوقت..
حصه منصدمه: مشكوره مابا شي..هه شو اللي يضمني ما تكون نهايتي في هالكوب..
ويلست سمر على الشبريه تقرا في كتابها....وتطالع حصه من ورا الكتاب بشوي شوي دون ما تشوفها..
سمر: اختي اذا انا مضايقتنج بوجودي بطلع..
حصه: لا والله شكلي انا اللي بطلع من الخوف..بس اقولج ارمسي شو مستوي بج..
سمر: اممم ابى شي..
حصه: قولي من البدايه كل هالتمثيليه وراها طلبه محترمه..بسرعه شو تبين...؟
سمر بتردد: زين حصه ابى فلوس..
حصه: ما حيدني ابوج..
سمر: الله يخليج والله يوم اكبر بردهن لج...
حصه: شو تبينهن..؟
سمر: ابى اشتري حق المس هديه..
حصه: شو المناسبه...
سمر: وااايد احبها...
حصه: انزين انتي تحبينها..انا ليش اشتري لها هديه...
سمر: الله يخليج حصووه الله يخليج..بسوي لج أي شي تبينه..اطلب وتمنى من عندي..
حصه: ماريد شي منج..
سمر: امم أي شي بس روحي اشتري لي شي حلو..
حصه: شو سوت بج تحبينها هالكثر..ولا راسبه وتبين تدهنين سيرها عشان تنجحين...
سمر: لا لا انا ما ارسب ..شو قالوا لج حمده..يالله حصيص فديتج..
حصه: ماريد..ماريد..
سمر: رفجه..
حصه: اوكي بشرط..
سمر: أي شي بسويه شو شرطج.؟
حصه: اذا يوا عندنا قوم عبدالله باجر بشتري لج واذا ما يونا خلاص انسي..
سمر: اوكي...
ونشت عنها سمر تدرس وتتريا باجر يوونها قوم عبدالله...واللي ما تعرفه حصه انهم اكيد بيكونون باجر في البيت والاخت شكلها ناسيه ان باجر الاربعاء...
...................
في الكوفي كان ذياب يالس ويا خالد ربيعه يسولفون ومرت بنيه حذالهم ...بس ذياب ما تحرك من مكانه ....رغم صياعته بس يزيغ يرقم البنات..يحب يطالعهن يين صوبه ..بس هو يسير لهن ما يروم..يخاف من شو ما يدري بس ما عنده جرأه يرقم أي بنت ولا جد سواها في حياته...
خالد: تينن صح...؟
ذياب: وايد...شوف وحرق يوف...
خالد: هيه والله..شورايك ننش لها...؟
ذياب: نش بروحك ..انا بطني يعورني..
خالد: ايوه يالبنيه ما تروم..وين المريله نش وخلك ذيب..
ذياب: لا والله..افضل اني اكون ديايه ولا يتفرجون على رقعة ويهي باجر في الجرايد...ما احب الشهره عن هالطريق..
خالد: يا ريال منو متفيج لك...هذي الصور اللي في الجرايد صور هنود يدفعون لهم ويسموونهم ويقولون هذيل مغازلجيه..
ذياب: بس بس اسكت والله محد بيوهقنا الا انت...
خالد: استريح وانا بسير وراها...
ذياب: ياخي البنت توها حادره ويا اهلها خلها تاخذ راحتها...وعقب يوم تخلص سو اللي تبغيه..
خالد: خير البر عاجله..
ذياب: ان شاء الله يطلع لك حد من اهلها ويسنعك ويخليني اشوف فيك يوم اسود..
خالد وهو ينش: فال الله ولا فالك..
وسار عنه خالد وذياب يالس ما تحرك بس يطالع من بعيد لبعيد...ما يشغل حدود تفكيره اكثر من يومه..ولا يفكر مول شوي جدام...
ما يحدر البيت الا الفير او الصبح لا شغل ولا مشغله...مب راضي يشتغل في أي مكان..او بالاحرى مافي أي جهه وظفته مب عشان أي عيوب فيه..
بس البطاله تفشت بين الشباب واغلبهم سلكوا مسلك الحريم..يالسين في البيوت بدون هدف الا في هالمقاهي والمولات وورا البنات وما خفي كان اعظم....
................
كان باب البيت الخارجي مشرع على الاخير كالعاده في كل البيوت...والشغاله كانت نازله الحوش تساعد الحرمه اللي دخلت البيت بالسياره ويا ريلها وتنزل الشنط معاها...محد كان يدري انها يت الا البشكاره اللي شافتها صدفه في الحوي...وسارت تساعدها عقب ما زقرتها...وشلت وياها اغراضها...ودعت الحرمه ريلها اللي ما طاع يدش وسارت تسولف ويا البشكاره...
انسانه حنونه بمعنى الكلمه وطيبه ومتواضعه لابعد الحدود هاديه بشكل فضيع وما تحدر بوظبي الا في السنه مره بحكم شغل ريلها...
دخلت البيت وكان هادي كالعاده ...من فتره طويله ما يت هني..تقريبا من عيد الاضحى...يلست تطالع كل شي ..البيت مثل ما هو ما تغير ومحد حرك فيه شي..هذا اثاث الصاله من يوم مات ابوها...وهناك في اخر زاويه صورتها هي وناصر وراشد ومبارك وليلى.....وبنظره خجوله ومبتسمه شافت فهد...فهد اللي ياما تحتفظ في بالها وياه عن اروع واعذب ذكرياتها...ذكريات رغم مرارتها ورغم انها صارت محرمه بس تحسها مثل سحابة الصيف ترطب عليها الجو وتخطف عنها بكل سرعه......وقفت عايشه بنت ناصر تطالع زوايا البيت وعمق السنين وطولها....قبل 12 سنه كانت في هالبيت مراهقه تلعب وتسرح وتمرح...كان عمرها 20 سنه...تحب وتهوى ولو انها حبت حب مراهقات...وخجلت من هالحب وكان في نظرها حب مستحيل ...بس رغم طول السنين ورغم ان هالحب اندثر...بس بعدها تكن له كل احترام وتحسب له الف حساب ويعتبر في بالها من اروع الايام اللي مرت بها...رغم كل الصعوبات...
فهد كان صغير ومراهق عمره 16 سنه..بس كان يموت فيها بدرجه فضيعه..وكانت تضحك عليه وتضحك على تصرفاته...بس عقب اقتنعت بحبه لها وحبته اكثر مما يحبها...وتولع فوادها به..محد كان يعرف انها تحبه غيره هو...تستحي تفصح عن هالحب..تخاف حد يجرح مشاعرها ويقول لها انها ساذجه....بس وين؟؟؟ مستحيل كان هالحب ينجح...ومستحيل الايام تجمعهم...
اليوم عايشه واقفه في صالة بيتهم تسترجع ذكرياتها وتبتسم ...هي اليوم ام لثلاث اولاد اكبر واحد فيهم مطرعمره 11سنه وهزاع 9سنين وحبيب قلبها ودلوعها فهد عمره 8 سنين ...وريلها ماخذ منصب تحسده الناس عليه...
كل اللي عليها الحين انها تحمد الله وتشكره....انه عوضها بريل يموت فيها وعيال تشد فيهم الظهر...وهذا كان كل مبتغاها ورضت باللي الله قسمه...ومب كل شي تتمناه النفس توصل له....
جرت خطاها تبى تشوف جنتها وحياتها..اللي ولهت عليها...بسرعه هناك بتسير لحجرة امها الحبيبه.....
.......................

انتظرو اخونا البدوي مع الحلقه الثانيه عشر


اختكم
الغلا

[الرايقه]

يعطيج الف عافيه الغلا ...
ونترياااك يالبدوي ,,,

[الغلا]

تسلمين اختي الرايقه على تواصلج الجميل مع القصه


والله يوفقكم...

اختكم
الغلا

[الجنيبي]

الله يعطيج العافية أختي الغلا على القصة

ونتمنى التكملة بسرعة

والسموحة










*a3* *a3* *a3* *a3* *a3* *a3*

[البدوي الحبوب]

الحلقه الثانيه عشر ( حلقه طوووووويله وروعه )

كانت الساعه 9:00 الليل قربت عايشه اكثر من حجرة امها...ولقت الباب مبطل ودخلت عقب ما دقته عشان تنبهها...
عايشه شافت امها ودمعت عينها: السلام عليج امايه..
ام راشد مب مصدقه تبى تنش: وعليكم السلام يا هلا غناتي هلا فديت عمرج ...
قبضتها عايشه عشان ما تنش: فديت روحج استريحي امايه ...
وحبتها ولوت عليها....
عايشه: شحالج امايه ..؟
ام راشد: بخير ربي يسلمج متى وصلتي..؟
عايشه: توني داخله...
ام راشد: والله انيه مب مصدقه..عايشه بنتي من متى ما شفتج....
ابتسمت عايشه: فديت قلبج غناة روحي...
ام راشد: وين ريلج.؟
عايشه بخجل فضيع: سار امايه وايد مشغول ..
ام راشد: خلاص فديتج ادري به مشغول ما ينلام..زين منه يابج...
ويلست تسولف ويا امها وتتخبرها عن احوالها..واحوال البيت والشركه والاهل..وكل شي...
عايشه وفي عيونها نظره بريئه: امايه ما تسيرون على بيت عمتي ؟
ام راشد: لا والله يا بنتي ما نشوفهم ابد...هذي الدنيا محد عاد يدري عن اهله..الا اقول ليش ما يبتي اليهال...وباجر اخر يوم في الاسبوع وعقبه اجازه يومين...
عايشه: والله يا امايه ما طاعوا قلت لهم بنسير بيت يدتكم قالوا بيتمون في العين مب راضيين ييون صوب بوظبي..يقولون رطوبه..وابوهم واعدنهم يسيرون دبي هالخميس...
ام راشد: على هواهم غناتي ...
عايشه: زين امايه وين ليلى...ولهت عليها موت..
ام راشد وتغير شكلها: ما شفتها اليوم مول وما يت ولا سلمت علي...
عايشه: افا يمه عسى ما شر..؟
ام راشد:ما شي يا بنتي سيري لها فوق ..مب طايعه تظهر من حجرتها..حتى عيال اخوج راشد ما شفناهم مول..
عايشه: ليش امايه شو اللي مستوي؟
ام راشد: ما يوون هني الا عسب عمتهم..والحين مب طايعه تظهر لحد ..عقب بتخبرج هي..نشي لها بنتي شوفيها..
ونشت عايشه وهي طالعه فوق..خطفت على حجرة سيف وبطلت الباب بس كان مقفل..وتحسست المفتاح من فوق ولقته وفتحت الحجره..ودخلت داخل...تنهدت من قلبها....ريحة سيف كانت مسك يفوح في اركان الغرفه...كل شي كان مكانه ما تحرك...وشبريته مرتبه نفس ماهي..اثاث حجرته لو ينطق بكى حزن على فراقه...سيف اللي بحياته ما زعل حد..سيف اللي بكته كل الناس وكل العيون ..واحترقت كل القلوب لفراقه....وكان طول عمره الطيب اللي يصلح من بين الناس..كل شي في هالبيت يذكرهم فيه...كل الاثاث اللي في الحجر هو اللي مشترنه اول ما توظف وكان هديه للبيت بعد بمناسبة زواجه من سعاد...
سعاد الملاك الطيبه اللي فعلا محد يستحق سيف الا هي..بنت الناس الطيبين والمعروفين بكرمهم وطيب اخلاقهم....ودارت الذكريات في راس عايشه وجمعتها المواقف مع سيف ....اللي كان نصير البنات في البيت ..يوم راشد ومبارك يأذونهن....وتذكرت واحد من مواقفها وياه...
سيف: يالله نلعب انا وعايشه وليلى...
مبارك: اوكي وانا وراشد بروحنا...اكيد بنغلبكم...
عايشه: بنشوف نحن اللي بنغلبكم..
ليلى: البناااات هيه..
سيف: حووه انا ولد لا تنسين..
تضحك عايشه وليلى...ولعبوا كوره وكان راشد يلعب بعنف..وما يرحم البنات...وكل شوي سيف يوقف اللعب..
سيف: يا ريال شو هالحركات ما تستحي ع ويهك هذيل بنات رقيقات ما يتحملن..
راشد: محد قالهن يلعبن ويانا...
مبارك: سير ازقر فهد وناصر عشان نلعب وياهم..
وتزعل عايشه وتمد بوزها شبرين..اما ليلى ما تسكت مول عن حقها..
ليلى: اذا زقرتوا قوم عمتي بخبر ابويه عليكم وبقوله من اللي مشرد الخيول من العزبه....
سيف يضحك: والله هزأتهم البنيه...
راشد بخوف من ابوه: اوكي ليلوه تلعب بس عويش لاء..
سيف: انا احتج اذا عايشه ما لعبت انا ما العب...
انقطع حبل ذكريات عايشه قبل تكمل شو اللي صار ويا سيف..يوم سمعت حس شيخه تلعب وتصارخ في الحجره اللي حذال حجرة سيف..ونشت بعد ما انتفض قلبها..ودقت باب حجرة ليلى بس ما رمست..وليلى ما سألت من اللي حذال الباب...ويتها شيخه بس من داخل..
شيخه: اتي من.؟
ابتسمت عايشه ودقت الباب...
شيخه: اتي من مافي متاح(مفتاح)..لوحي لوحي بيتكم...
ضحكت عايشه من قلبها: ليلوتي بطلي الباب...انا عويش..
ليلى اول ما سمعت حسها ابتسمت من قلبها ونشت بسرعه وبطلت الباب ولوت عليها...مب مصدقه انها تشوفها..ودخلت عايشه ويلست وياها تتخبرها عن احوالها و تحاول تلاعب شيخه اللي ما طاعت تيلس عندها مول..وكانت دافنه عمرها في حضن ليلى...
عايشه مبتسمه: خلاص كبرت نزليها من فوقج مب زين البزا...
ليلى: خليها تتدلع ما بقى لها شي وبتروح الله العالم شو بيصير فيها..
طالعتها عايشه بغرابه: وين بتروح؟
انترسن عيون ليلى بالدموع وسكتت..وعقب ما مسكت عمرها شوي خبرت عايشه اختها بكل شي...
عايشه: ليلوتي غناتي..حطي نفسج مكانهم وان شويخ عندهم...بذمتج ما بتولهين عليها..؟ ما بتفكرين فيها؟ ما تبين تشوفينها؟على الاقل لو يومين في الاسبوع...صح كلامي..؟
سكتت ليلى..وطالعت شيخه اللي مندمجه في عالمها..ونشت بسرعه صوب عرايسها...
عايشه نشت لها وسارت صوب شيخه...واول ما رفعت شيخه راسها طالعت عايشه وبطلت عيونها على الاخير..
مدت عايشه ايديها عشان تشلها: يالله حياتي..
نشت شيخه بصعوبه عشان تشرد..بس مسكتها عايشه ويلست تلاعبها وتضحكها ورغم ان شيخه مب راضيه على اللي يصير فيها من تعذيب بس انفجرت ضحك..وجارت عايشه ويلست تلعب وياها وما استحت هالمره منها..وعايشه تلاعبها وتتحرش فيها...وليلى تطالعهن ومبتسمه...
وردت عايشه عند ليلى تسولف لها...وما حست الا وحد يسحب ايدها..
شيخه:تألي بنثبح علوثه...
عايشه: فديت قلبج يا عسل انتي..شو تقولين والله اني مب فاهمه شي..
ليلىمبتسمه: تقولج نشي بتسبح عروستها...
عايشه:الحين عمتج عيوز وصلت الاربعين وتبينها تسبح العرايس..منقود يا بنيه...
شيخه: يالله تألي ثوفيها تثيح..بث ما ثويت فيها ثابون..
ليلى: شو اربعين انتي بعد..اذا وصلتي الاربعين يعني انا بكون في الثلاثين..بسم الله من فالج عويش..الحين انتي 32 وانا 26 ..ابييه والله اني يالسه اكبر ويطوف عمري بدون ما احس...
عايشه مبتسمه بحنان: عادي ما بنعيش الا مره وحده..خلينا قد ما نقدر نبتسم ونضحك..ونفرح اللي حوالينا..ونشكر الله على كل شي..صح؟
ابتسمت ليلى: صح...
عايشه: اممم ممكن ننش انا وانتي بنسير مكان...
ليلى: وين؟
عايشه: عند امايه.؟ ولا ما تبين؟
ابتسمت ليلى: ولهت عليها موت..يالله ننزل لها...
ونزلن البنات وتراضت ليلى وام راشد وردت طلعت فوق ويا عايشه اللي ما سارت بيت راشد بتتريا تسير لهم باجر..وتشوف اخوها وحرمته وعياله...ورقدت بحجرتها...مع ان ليلى يلست تقنعها ساعه ترقد عندها....
.................
اذن الفير الساعه 4:25 ونشت ليلى بصعوبه وقبل تصلي طلعت توعي عايشه للصلاه..بس شافتها يالسه على الشبريه ماسكه المصحف وتقرا فيه..وابتسمت وسارت تيلس حذالها..
عايشه وهي تبند المصحف: صدق الله العظيم..
ابتسمت ليلى..
عايشه: متى نشيتي؟
ليلى: توني ناشه وانتي..؟
عايشه: من نص ساعه احب اتعبد هالوقت والكل رقود..احس اني وايد قريبه من ربي...ليلى لا تضيعين هالاوقات وكوني فيها اقرب لله..صدقيني محد بينفعج الا هو...
ليلى: والله اني اسوي اللي اقدر عليه وانش كل يوم الفير...واصلي.
عايشه: لنفسج مب لي..لا تقولين ولا تضيعين اجرج...تعرفين اني اعاني ويا مطر وهزاعي وما ينشون الا عقب ما يطلعون روحي..بس فهد فديت روحه..والله يا ليلى اني اذا ما نشيت هو يوعيني انا وابوه للصلاه..علني افدا روحه تولهت عليه..تعرفين ليلوتي صج تولهت عليه..خصوصا يوم يتيدد فديت قلبه ييني يركض قبل يروح المسيد ويلوي علي وهو ميت برد ...واتخبره شوفيك..يقول لي اخذ شويه من دفاج قبل اسير...فديته عمري والله..
ليلى مبتسمه: ربج بعد..اسمه فهد لازم يكون كريم الطبايع بعينج..
عايشه مبتسمه بخجل: خافي ربج..والله ما طرا لي في بال..يالله نشي خربتي علي لحظاتي الروحانيه...بسوالفج الماصخه..
ليلى: عويش بذمتج شو تحسين يوم تتذكرينه...؟
عايشه: اضحك على عمري واستحي..يا ربييه كيف كنت مراهقه والله اني اضحك ضحك على نفسي..فهد ما يعني لي اكثر من اخو وولد عمه..وما يزيد حبه في قلبي عن حبي لراشد ومبارك وسوافي وناصر اخوه....
نشت ليلى مبتسمه: انا بصلي وبرد ارقد..انتي ارقدي بعد...
عايشه: ان شاء الله بس روحي وصكي الباب...
طلعت ليلى وصلت وكانت تفكر اكيد انها مب سايره الدوام..وشنطة شيخه كانت مرتبه وحاطتنها في طرف الحجره...ونشت بصعوبه وانسدحت على الشبريه وشافت شيخه راقده بهدوء ما تدري شو اللي يالس يصير حواليها..
.
.
مر الوقت ووصلت الساعه 8 الصبح..واتصلت ليلى بحصه وقالت لها ما تمر عليها...
حصه محرجه:وليش ما قلتي لي من امس..؟
ليلى: ما قدرت اتصل يتنا عويش ونسيت ادق لج..
حصه: مب عذر والله...برايج..
ليلى: ليش محرجه؟
حصه: ولا شي يالله برايج بسير الدوام..
ليلى: باي..
وبندت عنها ليلى اللي كان مودها معتفس على اخر درجه...ومب ناقصه تتضارب ويا حصه..يكفي ناصر وشيخه مب ناقصنها وذا حصه...ونزلت تحت وشافت امها في الحوي ويا عايشه وخلود...سلمت عليهن ويلسن يسولفن ويت شرملى تقولهن ان في موتر واقف برا فيه واحد يتريا ..ليلى هاللحظه قلبها انتفض وحست بشي غريب ..خافت وتغير شكلها..وبلعت ريجها بصعوبه..
شرملى: سياره لون ابيض..
ام راشد: شو يبغي.؟
عايشه: يمكن اهل شواخي..
خلود: يالله ننش داخل خافه يبا يدخل الموتر الحين داخل الحوي..
ونشن بسرعه داخل وياهن ليلى اللي تمت توايج من جامات الصاله...بس الريال ما نزل ونزلت حرمه منقبه اول ما شافتها ليلى عرفت انها فاطمه من مشيتها..ودخلتها شرملى الصاله وسلمت عليهن ويلست وياهن دقايق بس..ليلى فيها كانت تنتهي تنعدم تتنافض تموت كل ثانيه...
فاطمه بخجل: خالتي ام راشد..اخويه مستعيل فديتج ماروم اطول وين شيخه...؟
طالعت عايشه في ليلى اللي صاخه من اول ما يلسن وقلبها عورها عليها...
عايشه: بسير اييبها لج الحين...
ام راشد: بسرعه يا عايشه الريال بيتوحش على اخته...
خلود ما حبت تطول في القعده وعشان ما تشوف اللي تخاف منه نشت للمطبخ تتعلث بالقهوه والشاي...
سارت عايشه فوق وشافت شيخه راقده حبتها على خدها...وشلتها بهدوء وشلت شنطتها ونزلت بشوي شوي تحت عشان ما تنش...
ليلى اول ما شافتها ضغطت على عمرها اكبر عشان ما تصيح بس دموعها كانت اقوى منها...وبكل حراره انسابت دمعاتها حاره تكوي القلب...ما قدرت تتحمل ولا تقاوم هاللي ياخذونها جزء ما يتجزأ من عالمها..هذي اللي بقى لها من الدنيا وهذي فرحتها وهمها...ما قدرت ليلى تقرب ونشت امها ويلست حذالها وتمت ميوده ايدها....
شلت فاطمه شيخه بهدوء عشان ما تنش وابتسمت وسلمت عليهم وخلت شرملى تشل شنطتها.....
ام راشد: ما وصيج عليها يا بنتي...
فاطمه: لا تشغلين بالج يا خالتي بحطها في عيوني...
عايشه مبتسمه: وهالعشم فيكم غناتي..سلمي على الوالده...
فاطمه وهي تنزل نقابها : الله يسلمج الغاليه والله بعد هي تنشد عنكم...
وطلعت فاطمه..وعايشه ردت الصاله ويلست حذال ليلى من الجهه الثانيه..ولوت عليها...وانفجرت ليلى صياح ما قدرت تتحمل..وصيحتهم كلهم عليها مب على شيخه...وانفجرت شرملى صياح وام راشد تمت تصيح بنت ولدها وحال بنتها...اللي قطعت فوادها بالصياح...
كانت عايشه لاويه عليها من الخاطر وتمسح على شعرها وهي تشهق منتهيه من الصياح..قلبها متقطع...تحس بعمرها مختنقه..وكل شي حواليها غادي اسود..بس وين اللي يسمعها...

يلست عايشه تهديها بس ماشي فايده كانت محترقه من الصياح وترتجف من التعب والضيج..وسارت شرملى تييب لها ماي بس بعد ما هدت مول وام راشد تحاول فيها بس ما قدرت..ويتهن خلود ويلست وياهن ..وعايشه عقب نشت وخذت ليلى فوق حجرتها وخلود يابت الريوق وتريقت ويا ام راشد..
.....................
الساعه 9:30 كانت حصه متملله في المكتب وضايجه ومعصبه بعد..تبى تنزل عند مشاعل بس خايفه يشوفها حمد لانه منعها تسير لها..ويلست مكانها منقهره...
" يا ربي وين اسير الحين..الشيخ حمد مانعنا لا نسير على مشاعل ..والاخت ليلى محد ..وين اسير يعني..اروح للعاملات تحت احلى شي اسولف وياهن...ياهي حاله هذي...؟..زين ليش حمد يوم ما يباني ارمس حد ما يي يسولف عندي"
وابتسمت تضحك على عمرها بشو تفكر بس الحمدلله انها يالسه تفكر لروحها بدون محد يسمعها ولا جان راحت فيها....يلست متأففه ولا دقت شي ولا اشتغلت من الصبح وحست بضيج وملل فضيع...
"لحوول هذي مشاعل يوم حد يباها تييه ما تيي..وين منخشه هذي...؟"
رفعت سماعة المكتب ودقت عليها...
مشاعل: مرحبا..
حصه: وايد مصدقه عمرج اونه مرحبا...
مشاعل تضحك: بسم الله منج خرعتيني...
حصه: شحالج يا كتكوته..؟
مشاعل: بخير فديت عمرج ..(وتضحك)
حصه: اشوفج علقتي على الكلمه...
مشاعل: عاجبتني...
حصه: شو تسوين.؟
مشاعل: ولا شي انا خلصت من زمان بس باقي لي كم شغله خفيفه اخليها لبعدين..تامريني على شي؟
حصه: ملانه شو رايج تيين عندي؟
مشاعل: متهاوشه ويا ليلى ؟
حصه: ليلى غايبه تعالي واقولج كل شي...
بندت مشاعل عن حصه وسارت لها المكتب..
.
.
في مكتبه كان يالس يغني لروحه...ويخلص شغله وموده رايق على الاخر...يود تلفونه ودق الرقم وابتسم...
حمد: صباح الخير...
مهره: صباح الجوري..
حمد: شحالج؟
مهره: بخير وانتي شخبارج.؟
حمد: جييه حد قالج اني بنيه.....
مهره: اممم وشو بعد...
حمد: هيه يعني حد حذالج انا فاهم بس قصدي العوزج شوي....
مهره: انتي وين الحين ما بتيين الجامعه..؟
حمد:في الدوام...شو هالحشره اللي حذالج..؟
مهره: توه مخلص البريك ورادين الكلاس بسرعه ...
حمد: متى عندج بريك ثاني..؟
مهره: الساعه 12:25 البريك الجماعي...بتدقين؟
حمد: اوكي برايج الحين انتبهي عدل للاستاذ...
مهره: ان شاء الله...
بند حمد من عند هالبنت ورد يكمل شغله...حمد ضايع في داخله شي قوي يجبره يسوي اللي يسويه...هالبنت اللي اسمها مهره مب حبيبته ولا غناة الروح..وهي تعرف هالشي...مهره وحده من عشر يقضي حمد فيهن وقت فراغه..هي راضيه وهو راضي...على قولتها كل ما رمسها قالت له
"انت بس صديق لا اكثر.."
خلص حمد وحس بيوع ونش بيطلب له شي ياكله..وهو نازل خطف مكتب مشاعل بس ما لقاها..وعرف اكيد انها عند قوم ليلى وحصه..وسار بس ما دخل ودق الباب..
حصه: ادخل...
حمد: السلام عليكم..
حصه بإبتسامه كل فرح الكون فيها: وعليكم السلام..
حمد: شحالج حصه؟
حصه: بخير وانت؟
حمد: زين..
مشاعل: شلونك حمد؟
حمد: حنطاوي وانتي؟
تضحك مشاعل: يا خفة دمك...
حمد مبتسم: مب من شوي ترا ويانا كويتيه في الشركه لازم خفة الدم كلها هني...
مشاعل بخجل: الله يسلمك ما تقصر اخوي حمد...
كانت حصه تغلي تحترق تموت منقهره...في عيونها نظرة غضب تخلي حمد يتقطع يبتسم من الفرحه...يحس عمره طاووس...يطالعها بطرف عينه..وهي منقهره من الغزل الصريح بين مشاعل وحمد...
حمد: شو تسوين هني؟
مشاعل: اسولف ويا حصوه...
حمد: هيه ترا الشركه غاديه ميلس من سوالفكن...
مشاعل مبتسمه: ونحن نقول ديوانيه مو ميلس...
حمد: محد نشدج ندري من قبل تشوفين الدنيا...
ضحكت مشاعل...كان حتى لقسوة حمد نكهه ثانيه مستساغه عند كل البنات...رغم كل شي بس محد يروم يكرهه...حصه رغم كل الوان العذاب المباشره وغير المباشره بس ما تروم له....لكنه بجد اليوم حرق لها قلبها بسوالفه ويا مشاعل...طلع حمد وحصه هاللحظه حست عمرها خلاص مب متحمله مشاعل وخاطرها تصفعها لين ما تقول بس مع ان مالها خص في أي شي....بس الظاهر ان مشاعل كانت الطعم اللي حمد يصيد فيه افراحه من تعذيب حصه...نشت مشاعل واستأذنت بتروح تكمل شغلها...وتمت حصه في المكتب بتنفجر من القهر اللي فيها...
"شو هالحركات البايخه والله يا حمد بنشوف..."
وتمت مغيضه وما عرفت شو تسوي...ويلست مكانها وقررت تدق لليلى وتشوف شو فيها على الاقل ليلى بتفهمها ما بتحرق لها فوادها...
واتصلت بس كان تلفون ليلى مغلق..واستغربت منها هي ما تغلقه مول حتى الفير يكون مفتوح شو اللي مخليها تغلقه الحين الصبح..الا اكيد شي جايد وهو بعد اللي مخلنها تغيب وتتضيج البارحه...فكرت حصه شو ممكن يضيج بليلى غير ناصر وشيخه بس ما لقت شي لان ناصر يوم ياهن امس المكتب ما شاف ليلى مول وهي متضيجه من الصبح....بس ردت صورة مشاعل في عيون حصه...وخلتها تحرج وتكره عمرها...ونشت بتطلب لها شي تشربه....
......................
في دبي الساعه 11:00الضحى بدريه تحط شنطهم واغراضهم في السياره ويا البشكاره وتساعدها..وسلمى نزلت بدون أي شي الا لابسه عباتها ويلست في الصاله...وعبدالله يساعد بدريه وييب الاغراض من فوق...
عبدالله وهو نازل من الدري: سلامي غناتي اركبي السياره بنسير الحين...
نشت سلمى وركبت ورا...وعبدالله رد فوق ييب اللي باقي من اغراضه...وطلعت وراه بدريه...تييب تلفونها...
عبدالله: ما نسينا شي..؟؟
تضحك بدريه...
عبدالله: ليش تضحكين..؟
بدريه مبتسمه: ما بقينا شي في الفله (وردت تضحك)..واحنا رادين يوم اليمعه البيت حق شو كل هالعفسه...؟
عبدالله: نسيتي شو استوى بنا اخر مره رحنا..؟ رقدنا على الارض ولبست بيجاما من حجرة ذيابووه معفنه الله العالم من متى مب غاسلينها...ولا نسيتي يوم نشيت الصبح وما لقيت شي اغير فيه ثيابي...احسن شي نأمن يلستنا من الحين...
بدريه: لو سمحت لا تم تعايب..هذاك اليوم محد تفيج لنا كلهم كانوا تعبانين من العزيمه ومحد رتب لنا شي والصبح ما نشوا من وقت خل عنك البزا..
اصلا اهلك ما يقصرون كل مره ويانا وعشان قصروا وياك مره وحده بتاكلهم...؟
عبدالله: زين زين يالله تأخرنا انزلي...
ونزلوا كلهم الاثنين على الدري...
بدريه تضحك: اتخيل شكل عمي يوم يشوفنا حادرين البيت بمخداتنا ولحافاتنا وثيابنا والله بيتخبل..
عبدالله: عادي بقوله بدريه راغتني من البيت وييت عندكم..
بدريه تضحك من خاطرها: الحين قمت انا اللي اروغ؟ احيدكم اللي تروغونا هب نحن نروغكم...
ابتسم عبدالله: بدريه...
بدريه وهي تصك ليتات الصاله طالعين خلاص: هاه حبيبي..
عبدالله: فديت حسج بتوله عليج...
بدريه: ليش الاخ وين رايح...؟
عبدالله وهو طالع وياها ويصك باب الفله: يعني تعرفين يوم نسير بوظبي ما شوفج على راحتي واتم ويا الشباب..
بدريه تطالعه بطرف عينها: هيه هذي طريقة غير مباشره تخبرني فيها انك ما بتقر في البيت...
عبدالله ينزل من الدري صوب الموتر: تقريبا....
ركبت بدريه ورا حذال سلمى ما تبى تيلس جدام احتراما لها رغم ان بدريه الاكبر بس شافت انه من الذوق ما تخليها ورا بروحها...
عبدالله: ما شاء الله وانا الهندي مالكن يالس جدام بروحي...هيه تراني دريول..امحق سنه..
ضحكت سلمى..
بدريه: محد بياكلك بيلس عند سلامي...
عبدالله بصوت واطي ما تسمعه الا بدريه وسلمى: الحين بوقف وبيلس البشكاره حذالي..
بدريه: ودك عشان اطلعك انت وياها من السياره وارد انا وسلامي بوظبي لروحنا..
عبدالله يضحك: ان شاء الله هذا ويهي لو وصلتي قبل اسبوع...
بدريه: تعيبك سواقتي اشدراك انت...
عبدالله: هيه مبين..اللي تخاف تنزل في بيتها لتحت بروحها تروم تسوق ...لا تضحكيني..
بدريه مبتسمه: زين اخ عبدالله واللي يزعل عشان......ولا خلنا ساكتين احسن...
كان عبدالله وبدريه متعمدين يتحرشون في بعض عشان يغيرون مود سلمى اللي اكيد غصبا عنها بتضحك من سوالفهم واستهبالهم هم الاثنين...
ويلسوا يسولفون ويضحكون على سوالف عبدالله...كانت بدريه مسويه شندويتشات جبن ويايبه دلة شاي وياها...واكواب بلاستيكيه للدرب..
بدريه بحنان وهي تلف ورا: اندوج حبيبتي دونا كلي ما شفتج تريقتي...
وعطتها كوب شاي وسندويتشه....
سلمى مبتسمه: انتي الكل حبيبج حتى البشاكير..
بدريه: يا ويلج من الله مسكينه وحدانيه مالها حد الا الله واجب علينا نروف بحالها...
عبدالله: فديت الحنونه يا ربي اللي تتخبر عن البشاكير قبل ريلها...
بدريه: يالله يالبزا اللي فيك هي اول وانت وسلامي عقب مسكينه...
عبدالله: انا بفتح لي مشروع في دبي عباره عن تجميع وتلقيط كل المساكين وتكونين مديره عليه شو رايج..؟؟
بدريه:عن الطنازه...
عبدالله يطالع من الجامه: دونا...
دونا: نعم بابا..
عبدالله: انتهبي وانتي تاكلين لا تخيسين السيتات ولا تصبين الشاي عليهن..ويوم تخلصين حطيه في كيس فاضي..
دونا:ان شاء الله...
عبدالله يرمس بدريه: شو هالحرمه وين رايحين احنا يايبه كل هالمؤونه وياج..اللي يسمع بيقول سايرين السلع هب الا بوظبي ساعه ونص ونحن هناك ما فيج صبر..لازم تبرعاتج هذي واكلاتج اللي ما تخلص...يعني بيت اهلي ما فيه اكل...لازم تخيسون السياره..؟
سكتت بدريه وصبت شاي لسلمى وما ردت على عبدالله...اللي شغل الاف ام يتسمعون في برنامج حاطينه الضحى كل يوم....
....................
في مكتبه نش ناصر بيشوف ليلى هالمره وبيعتذر لها لو جدام حصه خلاص طفح الكيل وشوقه لعبه وعذبه والله ابتلاه فيه...ما يروم يوقف كل هالشوق اللي بخاطره واحسن شي يسويه انه يرضي قلبه لو على حساب عقله ونش من مكانه ونزل تحت...وتحمحم عسب ينتبهن...
حصه: ادخل..
ناصر: هلا حصه..
حصه: مرحبا استاذ..
ناصر وهو يطالع مكان ليلى: وين سارت ليلى..؟
حصه: ما داومت تعبانه...مدري شو فيها حتى مب طايعه ترمس...
اتفاجأ ناصر من رمسة حصه: ما قالت امس بتغيب..
حصه: والله انا بعد ما عرفت الا اليوم الصبح دقت وقالت لي لا امر لها...
ناصر: خير ان شاء الله مشكوره حصه..
حصه: العفو..

وطلع يجر اذيال الخيبه متضايق متكدر وصدره من الهم ممتلي...مب عارف وين يروح...حتى من لذيذ النوم محروم..وقرر بإيده ينهي حرمانه بس ما لقى اللي على ايدها نهاية كل الاوجاع...ورد مكتبه وكل هموم الكون على راسه....وسحب ورقه من على الطاوله وخربش بعض اللي في قلبه...

" لاتخفي الود في قلبك وتتبعني*** ولاتحرم العين من شوفك وابتسامتك*** زعلان ارضيك اعذرني وعاتبني*** قصرت اوفيك انا كلي لرضاتك*** طول غيابك وهجرانك يعذبني*** ياشين دنيا احرمتني من ملاقاتك*** شوف الوله من لذيذ النوم يسلبني*** ويحط لي في سكون الليل رسماتك*** "

ماقدر يكمل وقطع الورقه وفرها تحت المكتب ويلس يفكر ليش ما يت اليوم اكيد شي صار بهم...تم يفكر ويفكر واخيرا قرر..بعد طول صراع مع نفسه انه يمر عليهم اليوم ولو ان هالقرار كان شديد الصعوبه بالنسبه له بس بيسويه وعادي ابوه ما بيعرف ولو عرف ما يهمه اهم شي عنده راحة نفسه...
ابتسم ناصر ابتسامة رضا على قراره القوي في نظره ولكن الخطوه اليايه عليه هو هل يقدر يكمل ولا ما يقدر...؟؟.
......................
في فلة المرحوم بو راشد هدت ليلى شوي بس عيونها كانن منفخات من الصياح وجفونها متورمه..وخدودها متيمع فيهن كل الدم...منسدحه على شبريتها تطالع السقف بتعب...وعايشه حذالها تمسح على شعرها...ويوم حست انها هدت ظهرت عنها بتسير لامها شوي...
كانت ليلى بتموت من التعب وتحس قلبها محترق على اللي صار...هالبنت شو بيستوي بها؟ معقوله تين من كثر ما هي تصيح؟ كيف بتتقبل حد غير ليلى يهتم بها.؟
ملايين الاسئله كانت تدرو في راسها ومب قادره تركز في أي سؤال ولا تلاقي أي اجابه...صدق تعبانه من خاطرها...وحتى من تعبها مب رايمه تبطل عيونها ولا تشوف الضو في الحجره ..قلبها يدق بسرعه بسرعه..وانفاسها متلخبطه..وتفكيرها يوديها وييبها...من وين تبتدي في هالضياع اللي هي فيه..؟؟
نشت بصعوبه من مكانها ويلست على الشبريه وحست عمرها دايخه من الصداع العنيف اللي فيها....وردت تنسدح..مب رايمه تفتح عيونها مول..تحس بفوادها محترق وصداع ما يخليها حتى تتنفس عدل...وضحكات شيخه تتردد في بالها وصوتها ورمستها..وعيونها البريئه وكل شي فيها...
.
.
في الصاله اللي تحت كانت ام راشد يالسه ويا عايشه وخلود يسولفن..وعقب نشت خلود عنهن..
خلود: انا بسير البيت اشوف البشكاره شو مسويه من غدا وبييكن العصر...
عايشه: الله وياج ام حمدان..
ام راشد: مع السلامه بنتي..
وطلعت عنهن وام راشد تكلم عايشه..
ام راشد: شحالها الحين.؟
عايشه: الحمدلله سكتت بس مدري احس بها ضايجه وايد...ما كان له داعي ياخذونها هالفتره لو صبروا شوي لين ما تسير المدرسه..
سكتت ام راشد ونشت بصعوبه وسارت حجرتها وخلت عايشه في الصاله...ودقت لريلها ورمسته وتخبرته عن اليهال وعقب بندت..
كانت متملله مب عارفه شو تسوي..حست انها نحسه من اول ما يت والبيت كله مشاكل..تتحرا انها فال شر عليهم...وسارت تتمشى في الصاله والحجر وخطفت على كل الصور المعلقه وشافت صورهم وخبالهم وهم يهال...وابتسمت ويتها فكره جنونيه رغم هدوءها واتزانها بس فكرت شوي وسارت على طول صوب التلفون...واتصلت...تم يدق شوي بس محد رد..وبندت وردت تدق...
عايشه بهمس: السلام عليكم..
ام ناصر: وعليكم السلام...
عايشه: عمووه.؟
ام ناصر مستغربه: منو انت.؟
عايشه: امممم خمني..
ام ناصر: وشهو؟
عايشه تضحك: شحالج عمتي حبيبتي...؟
ام ناصر: بخير وسهاله من انتي؟
عايشه: بنت واحد يقولون انه اخوج...الله يرحمه توفى وكان عنده بنتين وثلاث اولاد واحد منهم خذ الله روحه قبل ابوه...
ام ناصر مبتسمه وتيمعن الدموع في عيونها: فديت روحج يا غناتي..فديت اهلج كلهم..شحالج وشحال الوالده واخوانج وليلى...
عايشه وقلبها يدق بسرعه: بخير وسهاله يا عيون عايشه...افا يا عمتي ايي بوظبي ولا تدرين عني...؟
ام ناصر وهي تمسح دموعها: فديتج يالغاليه وانا وش اللي بيعرفني..؟ شحاله بو هزاع واليهال ..؟
عايشه: بخير والله ..طمنيني عليج وعلى فهودي ونصور...
تضحك ام ناصر: هذاك اول نصور وفهود..الحين لو يسمعونج بيحرجون عليج...
عايشه: ما عليج منهم كلهم يهال...
ام ناصر: بخير يسرج حالهم علني افداج يا بنتي...والله ردت لي الروح من سمعت حسج...
عايشه: ولو عمتي تؤبري ألبي..ما عندنا الا عمه وحده تدلل كيف ما بدا...
ام ناصر عاقده حياتها: والله ما فهمت شي شو تقولين.؟
عايشه مبتسمه: لا غناتي بس كنت ارمسج لبناني..
ام ناصر: والله انا ما افهم شي غير رمستنا اما رمسة البي سي ما اعرفلها..
عايشه: عشتوا وتعرفين ال بي سي بعد...ثرج مب هينه...وبعدين اسمها ال بي سي..هب البي سي..شو بي سي انتي بعد...؟
ام ناصر: وانتي ما تيوزين عن خبالج..قلنا عرست وبتعقل..ثرج مثل ما انتي ما تتغيرين...على حطة غطاج...
عايشه: تراني اصيله ما تغير مول...
وتمت عايشه تسولف ويا عمتها شوي وعقب بندت عنها لان الظهر اذن وكان لازم تسير تصلي...
....................
عقب الساعه 2:00 يلست عفرا في الكلاس ما تحركت كانت وايد ضايجه ومب عارفه تشتكي همها لمن..تتمنى لو كانت عندها ربيعه تروم تثق فيها..بس مشكلتها انها تفكر الكل مب من مستواها وما تحب تدخل في أي تجربه ويا أي انسانه لانها تخاف من الفشل...
كل الطلاب طلعوا شوي برا الكلاس لين ما توصل المس وتأخرت وايد عليهم...طلعت عفرا كتابها ويلست تجلب فيه واخر شي نشت ووقفت حذال الباب...وتطالع برا بصمت وقلبها محترق...خلاص راحت وقالت للاداره انها ما تبى البعثه وما خبرتهم ان اهلها رفضوا عشان تبين ان عقليتهم مختلفه ولا تبى تحط اهلها ونفسها في موقف محرج..ولها اسباب ما حبت تذكر للاداره في الاخير ان اهلها لهم باع وذراع في اللي صار....
حمدان يقطع الصمت مبتسم: شو فيج؟
عفرا وهي تجمع شتات افكارها بعد ما بعثرها حمدان مثل اللي يبعثر قطع الدراهم في مكان هادي وينتبه له كل الموجودين بعدما يحدث الضجيج..
او مثل اللي يلمس ورق الورد وهو مبتل بالندى ويتبعثر من عليه...
عفرا: ولا شي...ليش تسأل؟
حمدان : ولا شي بس شكلج ضايجه وحبيت اسألج لو عادي...
عفرا بنظره بارده: اكيد مب عادي...
حمدان وهو يطالع المبنى الثاني: عيل سوري...
عفرا: اوكي قبلت اعتذارك..
حمدان مبتسم: ما بقى شي على الامتحانات غير اسبوعين...
عفرا بثقه: نحن لها...
حمدان مستغرب: نحن؟؟ انتي بس انا مب لها ..هي علي...
عفرا وهي حاطه ايديها ورا ظهرها ومتسنده على اليدار: ما بتنجح لو تميت جي..كن قد التحدي...واقبله..انت ريال مفروض كل الصعاب تذوب جدام قوة تحديك...
على طول بدون تفكير مر هالكلام مثل نسمة هوا بارده في جو حارق ..مثل كفوف بارده تنحط على خد دافي..او بالاحرى مثل سحابة صيف مرت وبردت المكان في صيف حار......
ابتسم حمدان لحظتها ويت مريامي بنت عمه على باله...وتذكر رمستها في العزبه...
عفرا وهي ما تطالعه وتشوف اللي في الساحه: هاه شو قلت..؟
حمدان بثقه: اوكي انا لها...
عفرا بثقه اكبر: كلنا لها مب انته بس لا تنسى..
ابتسم حمدان على عفوية عفرا: زين عفرا اقول..؟
عفرا: شو..؟
وقبل يرمس حمدان كان طارق ياي من بعيد يركض...ودخل الكلاس بسرعه...ودخلت عفرا خايفه هي وحمدان مع انهم ما يدرون شو السالفه..
طارق وهو يتنفس بصعوبه: اخ كنت بموت....
حمدان: شو مستوي بك.؟
طارق ينافخ ومب قادر يجمع انفاسه: سرت مبنى بنات اول ثانوي وكانت بتزخني المشرفه وييت اركض وهي تلحقني..بس زين ما شافت ويهي...
ضحك حمدان: دواك ياللي ما تستحي...
احتقرت عفرا طارق وطالعته بنظره من فوق لتحت....وهو انقهر من نظراتها بس طنش يدري بها ما تداني حد...ويلسوا في الكلاس كلهم يستهبلون ويدرسون ومحد ياهم والظاهر ان المس نست سالفة الكلاس...
عفرا من عقب الملل نشت..ومحد يدري وين سارت..وهم كلهم يسولفون واللي يقول نكت واللي يسب في الاساتذه واللي ما يعرف شو يسوي...واللي مازر السبوره شخابيط...وشوي وتدخل عليهم المس وهي تنافخ شكلها يايه تركض..
طارق: الله يخسها هذي شو يايبنها.؟ تحريتها نست...
وفي هاللحظه دشت عفرا وما قالت لها المس شي لانها تأخرت او دخلت بعدها....
ويلسوا كلهم...
المس محرجه:
Why didn’t u tell me that u had a class at 2:00.? did u forget that this is your last year and all u need is more time to study and work, what did u get when u wasted ur time?
ريهام تتحرطم: هاللي ناقص بعد نقولج تعالي درسينا..ما صدقنا افتكينا منج...وشفنا حصة فراغ ..تبينا نقولج بعد..
طارق: هيه والله هاللي ناقص...
حمدان ساكت ما رمس..وعفرا تطالع المس وهي ساكته بعد...

المس: anyways thank you Afra for comming to my office and telling me about the class timing, you are the only student who really cares about her studies.
. الكل في هاللحظه طالعوا عفرا بحقد...لانها سارت تزقر المس للكلاس ونها ملت من اليلسه بدون دراسه وسارت لها عشان ما تضيع وقتها على الفاضي...
ريهام بهمس: بل عليج من بنيه...صج اكلة كتب..!!!
طارق بقهر: والله لو ما السنه مخلصه ولا جان قلت حق ابويه ينقلني من هالكلاس...اففف من بعض الاوادم...
طنشت عفرا وبطلت كتابها وتابعوا كلهم غصب ويا المس اللي بدت تشرح على اخر الوقت...
.....................
بطلت عيونها الوساع بكسل وتثاوبت ببراءه..وتحسست حذالها ويلست على الشبريه...وشافت شي غريب..مكان مب مكانها وبقعه مب بقعتها..وشبريه مب شبريتها..وغرفه مختلفه تماما عن اللي تنش كل يوم فيها...طالعت بغرابه..وبطلت عيونها على الاخير بحركتها المعتاده..وبدت تعصب ومدت بوزها وانترسن عيونها دموع...وفجأه بعد هالمقدمه الاستكشافيه يوم نشت..انطلق صوتها مدوي كالمدفعيه في الحجره...والبيت واركانه كلها...
بيت سعيد بن مطر اللي ينسمع فيه دبيب النمل من هدوءه ..فجرت سكونه شيخه بصراخها...وما طاعت تسكت مول...
وتبطل باب الحجره ودشت فاطمه اللي اول ما شافتها شلتها ولوت عليها...بس شيخه يتها الصدمه الثانيه...منو هذي اللي تتجرأ وتشلني غير امي وانا اصيح؟وين انا..؟ وهذا بيت منو؟ وين امي؟ وشرملى..؟ وشبريتي ؟ وحجرتنا انا وماما.؟وين عرايسي ومسبحهم؟ هذا مب شكل حجرتنا؟
كل هذي اسئله لو كانت شيخه ترمس كانت بتقولها...بس استمر صياحها...ونش احمد من رقاده ودخل الحجره..
احمد: بل عليها خبقت طبلة اذني..حتى الناس اللي كنت اشوفهم في الحلم زاغوا وشردوا من حسها...

فاطمه: يا هالوهقه شو بيسكتها هذي....؟
احمد: نزليها عند امي..
فاطمه: هيه بالمره عشان تفرها في الحوي..امي ما تتحمل أي ازعاج...
وشيخه تصيح وتصيح وتصارخ ولفت ويهها وهي فوق فاطمه واول ما شافت احمد زاد صياحها...ما تتحمل مول تشوف رياييل.... تكرههم كره العمى من كثر ما تكره عمها راشد ما تطيق تشوف أي ذكر...وترافس وفاطمه شالتنها وتصيح وتتحرطم...
احمد وهو حاط ايديه على اذنيه ويصارخ: سكتيها شو هالونّان...بوديها وياي الملعب تصارخ وتشجع ...هذي تتحدى كل الجماهير العيناويه بصوتها...
فاطمه: والله انك متفيج...احمد ساعدني شو اسوي...(وصرخت فاطمه)..
لان شيخه سحبت شعرها..وتمت تصيح بصوت اكبر واعلى .....
احمد قرب منها: حياتي تعالي بنروح نشتري حلاوه...
شيخه: ماليدث ماليدث..
ابتسم احمد بفرح: الله رمستني يا سلام والله ان هالبنت تحفه..بس شو قالت..؟
فاطمه وهي تعطيها احمد: اندوك تفاهم وياها...بسير اسوي لها شي تاكله...
احمد يلس على الارض ويا شيخه اللي ما رضت تسكت...وحاول فيها وما طاعت مول..وطيحت عمرها وهي يالسه على راسها بالعمد وضرب بقوه في الارضيه وبطلت عيونها على الاخير وسكتت بعد الضربه القويه على راسها...ثواني وانفجرت صياح توها انتبهت انه يعور..وصاحت بقوه وبصوت اعلى...
شيخه: وين ماما...اليد امي...
احمد: يعني شو اسوي اسير اطلعها من القبر مثلاً؟
شيخه: اليد...اليد...اليد..
احمد يقرب ويهه منها: شو تريدين.؟
شيخه تصارخ وتمد ايدها بتضربه على ويهه: اليد اليد..
احمد يبعد شوي عنها: اوكي تريدين..شو هو اللي تريدينه.؟
شيخه بصوت اعلى وصياح اقوى: اليد اليد..
احمد بضيج: بتنفجر مرارتي ارمسي شو تريدين بسويه...اسوي لج ملاهي..ولا اصنع لج مركبه فضائيه...شو اللي تبينه بسويه بس اسكتي وقصري حسج..والله ان صراخج بييب لي مرض خبيث في راسي...
شيخه تضرب بريولها على الارض وتتجلب يمين ويسار: اليد اليد...
احمد بعصبيه: زين يالدبه شو تبين..طفرتي اهلي تراج...
شيخه بصراخ: اليد اليد...اليد....اليد..
احمد ماسك راسه: شو اللي تريدينه بسويه..شو اليد هذي بعد....
شيخه وهي تتنفس وتشهق بصعوبه: اليد اليد...
احمد وهو يطلع: يلعن يومه اللي ييلس وياج..
ويوم كان احمد طالع شيخه انصدمت انها في الحجره بتم لروحها..ونشت بصعوبه وركضت ورا احمد وتعلقت في ريوله...
احمد هالمره تخدر وحس انه بيموت من الفرح..وتيمع كل حنان الكون فيه..وكسرت خاطره هاليتيمه اللي محد لها الا ربها في هالكون...
وشلها بسرعه ولوى عليها..وباسها على خدها وسكتت..وسار حجرته...ويلس على الشبريه..وهي يالسه فوق ريوله..وحاطه راسها على كتفه وتشاهق عقب الصياح...
احمد: خلاص يا عيوني يا عمري بس فديت روحج...
شيخه ساكته بس تشهق وتيمع انفاسها....وشوي وتدخل فاطمه مصدومه من اللي تشوفه..
فاطمه ماسكه حليب شيخه: شو سويت فيها؟ وشو هاللي اشوفه.؟
احمد وهو ينفخ نفسه ويطالع بفخر: قلت لج بروضها وروضتها.
فاطمه: وليش وين نحن في السيرك؟
احمد: لا نحن في البيت..الا شو رايج فيني؟
فاطمه: تعالي حياتي عندي...
شيخه: لوحي ماليدث..لوحي.
احمد: ويييييو راغوها..يالله لوحي يا لوح نحن ما نليدث...صح شواخي...
شيخه ساكته ولاويه على احمد بقوه...
فاطمه تغريها: تعالي بعطيج الحليب...
احمد: ييبي انا بعطيها...
وعطته فاطمه الحليب وطلعت وسدحها على ريوله وعطاها حليبها وتمت تطالعه وهو يشوف خدودها مثل بقعه كلها دم من احمرارها وعيونها منترسه دموع..ورموشها مبتله منها...وفي عيونها نظرة حزن فضيعه...كان يطالعها بحنان ويمسح على شعرها...ويشوف فيها سعاد..اللي هي امها ما خلت شي منها ما شابهتها فيه...
شيخه بعد ما خلصت حليبها مدت ايدها لاحمد يشل مرضاعتها: الحم الله..(الحمدلله)..
كانت ليلى معلمه شيخه اذا خلصت اكلها تقول الحمدلله...
ابتسم احمد ويلسها ولوى عليها: فديت روحج..والله يبارك في اللي علمج...
شيخه ماده بوزها: وين ماما؟
احمد يغير السالفه: نروح الدكان نييب حلاوه كبيره( ويفتح ايدينه على اخر شي)..كبيره هالكثر حقج انتي بروحج...؟
شيخه ابتسمت اخيرا: مالي انا بث.؟
احمد: هيه انتي بث...
شيخه: اتي مالوحين.؟
احمد ما يدري شو تقول بس فهم انها قالت انتي: زين حياتي مادري شو تقولين بس انا ريال مب بنيه تقولين لي انتي...
شيخه: اتي ما لوحين.؟
احمد: والله ما اعرف شو تقولين...بس بقولج لا لا انا مالوحين...شو هالكلمه يا ربي...
شيخه عصبت: ليث اتي مالوحين..ليث...
احمد : لا لا خلاص انا ايوه بسوي اللي تبين بس الله يخليج لا تبدين لي شغل المطافي...يالله نشي يا دبووه بنسير...
ونش احمد يتلبس مع ان الساعه 3:30 الظهر...وركبها وياه الموتر وساروا الجمعيه اللي قريب من بيتهم...وخلاها تشتري كل اللي في خاطرها وشكلها ما خلت شي ما خذته...وما زعلت عمرها مول....بس شكلها بدت تتعود عليه...!!! من يدري.؟
......................
الساعه خمس العصر كانوا كلهم ناشين من الرقاد...ويالسين في الصاله..عبدالله وحصه وسلمى وخليفه وساره..ويتناقشون في سالفة سلمى اللي مب طايعه ترمس...
خليفه: ولين متى بتمين صاخه ولا ترمسين..؟
ساره: حبيبتي سلامي قولي شو فيج يمكن حد من اخوانج يروم يساعدج.
سلمى تتنهد: ما برمس لين ما اشوف ابويه...
خليفه: ابويه ما بيرد الا يوم اليمعه ..سار المزرعه هو وامي...وتدرين به ما يرضى ييلس اقل من يومين...
عبدالله: خلاص سلامي تقبلي الوضع انج نحسه وارمسي ويانا عادي ما بنخبر حد..ولو تبيني اطلع بدريه الفتانه بطلعها..
بدريه: فتانه في عينك..
خليفه يرمس عبدالله وبدريه: زين يهالوه سكتوا شوي بنرمس الحرمه شو فيها...
عبدالله: والله اهانوني...افا ما يطيع زينك يا بو عفرا...
بدريه: تستاهل..
سلمى: غيروا السالفه بصراحه انا مليت..
ساره: خلوها ع راحتها بترمس يوم تحس عمرها محتايه ترمس...
ونش خليفه: انا طالع ميلس بن حميد..بتيي وياي عبدالله..
عبدالله يتأفف: لا لا ما حبه سير انت بروحك...
ابتسمت بدريه وفي خاطرها"الحمدلله ما راح"..
ساره: عيل انا بخليكم بسير اشوف بناتي ردن من المدرسه ولا بجهز لهن شي ياكلنه...
بدريه: ايي اساعدج..؟
عبدالله بهمس: بدينا..؟
ساره: لا فديتج ماله داعي..
وطلعت ساره وسلمى سارت فوق..
بدريه:انت ما تعرف تسكت.؟
عبدالله: والله انا حابس عمري هني عشانج وانتي تبين تسيرين فلتهم..
بدريه: وشو فيها يعني..تولهت على بنات خليفه...
عبدالله: ايوه..شي طيب..انتي تولهي على البنات واعطفي على البشاكير وحلي مشاكل الحريم الزوجيه..وانا بكون اخر اهتماماتج..دومج جي تخليني اخر شي..
بدريه مبتسمه: والله اللي اذكره من تاريخ بيت عمي العريق..ان سمر وذياب اخر العنقود ..من وين يايب انت هالبزا مادري..ماحيد عمي مدلعنك..
عبدالله: تراني فاقد حنان...
بدريه: زين شسوي لك..؟
عبدالله: والله انج تغيرتي وايد..لسانج طول..وانا مب مرتاح جي..
بدريه مستغربه من جدية عبدالله:شفيك انت؟
عبدالله: مدري اللي سمعتيه..
نشت بدريه ويلست حذاله وحطت راسها على كتفه: حياتي شو تقول انت؟تعرف ان مالي غيرك وما روم على زعلك..حد يزعل من قلبه وروحه..اذا لقيت حد يزعل من قلبه انا بعد ما بزعل منك...
عبدالله: هيه ادهني سيري بكلمتين...
بدريه: افا ومن متى وهاه اسلوبي.؟
عبدالله: امزح يا عمري خلاص..بس ابى شي.؟
بدريه: شو ؟
عبدالله: ابى اسهر عند الشباب اليوم..عادي ولا عندج مانع؟
بدريه مبتسمه: اسهر عندهم...ما بترياك وبرقد..بس رد قبل الساعه 2:00 اوكي.؟
عبدالله وهو ينش: ان شاء الله بحاول...
بدريه: اصبر شوي بدخنك..عشان ما يقولون ياي من دبي ومب متدخن..ولا حرمتك ما فيها خير..
عبدالله: هه خلي حد يرمس والله لا امشي عليه بالسياره عشر مرات واخليه يغدي تراب...
بدريه:فديت اللي يدافع عني...
ويابت الدخون ويلست تدخنه...وطلع عنها وسار ويا ربعه اللي في بوظبي..

في الحجره اللي فوق كانن سمر وحصه راقدات...مرت عليهن سلمى بتبطل الباب بس لقته مبند..وسارت حجرتها...وفي حجرتهن حست سمر ان حد بطل الباب وطلع..ونشت من مكانها ويلست على الشبريه...وشغلت الليت وسارت صوب حصه...
سمر وهي تهزها: حصه نشي يالله...
حصه بكسل: كم الساعه؟
سمر: مادري يمكن 5:00
حصه يلست: شو تسوين انتي هني؟
سمر: توني ناشه يالله قومي بننزل...
حصه: ليش ننزل اهلي محد انا بتم هني...
سمر مبتسمه وبدلع: لاء قوم عبدالله خويه هني...وسلامي ختيه بعد..
حصه نشت بسرعه من على الشبريه:قولي والله..
سمر: والله العظيم...
بدلت حصه بسرعه وسحت شعرها...وفتحت الباب...
سمر: ما صليتي العصر...!!!
ردت حصه مستحيه : اووه نسيت والله..
سمر: زين انا ذكرتج بالصلاه..لا تنسين اللي وعدتيني..
حصه: شو؟
سمر: الهديه..هذول قوم عبادي يوا..يعني بتشترين اللي قلتي لي حق المس..
حصه مبتسمه: ان شاء الله بنروح باجر العصر انا وانتي كارفور واشتري اللي تبين..
سمر: تعيش اروع اخت في البشريه..
ضحكت حصه ودخلت تتيدد عشان تصلي...وبعد ما طلعت دشت سمر وصلن العصر مع بعض...ونزلن تحت بس ما لقن حد في الصاله..
حصه: تقصين علي حضرتج؟
سمر: والله العظيم ان جينا قالت لي..
حصه: جينا هذي ما فيها مخ شراتج...والله يا سمر اذا محد طلع هني انا اللي بخلي المس تشتري لج هديه في المستشفى وانتي متكسره من الضرب...
سمر تضحك: والله انهم هني...
حصه: عيل كيف اختفوا ممكن تفسريلي..؟
سمر: بقولج نكته لين ما نلاقيهم..
حصه: جب مب متفيجه لشي ممكن تسكتين..
سمر: بقولج نكته والله انها فنانه...احلى نكته سمعتها..
حصه: لحوول كل شي فنان ما شي عندج نكته بايخه..
سمر: سمعي واحكمي بنفسج...
حصه: قولي..
سمر: ولد راح مع ابوه البخيل الدكان قال: ابويه انا احب الكت كات...قاله ابوه: زين يا ولدي حبه ورجعه مكانه..

حصه ببرود:زين وين بدريه؟
سمر: شو ما عيبتج؟
حصه: وينهم وينهم لا تطفريني..
وركضت سمر لجامات الصاله توايج من ورا الستاير تشوف اذا حد في حديقة البيت...
سمر: هذي بدريه توقعت انها تكون ويا البشاكير ...يالسه وياهن في الحديقه..
ابتسمت حصه وراحن لها كلهن يسلمن عليها...ويلسن وياها في الزراعه..
..................
الساعه 6:00 المغرب..كان حمدان منسدح على الشبريه في حجرته توه راد ويا اخته من نص ساعه...يفكر في اشياء وايده صارت اليوم وتصير بين فتره وفتره....ودقت سلامه الباب...
حمدان: تعالي سلامي..
سلامه: كيف عرفت انه انا...؟
حمدان يبتسم بسخريه: وليش منو بيدق علي..اصلا محد يسكن في هالبيت الا انا وانتي..
سلامه تستهبل: وامي وابويه؟
حمدان: قولي والله عندج ام وابو؟
سلامه تمت تستهبل: هيه يرقدون في الحجر ويانا فوق بس ما نشوفهم...
حمدان: الله اكيد لابسين طاقية الاخفاء...
سلامه: يمكن..
حمدان: ويمكن نحن نشوفهم بس هم ما يشوفونا..
سلامه: جي بنطلع نحن اللي لابسين الطاقيه مب هم...
حمدان يلس: يكفي استهبال..شو تبين؟
سلامه: ولا شي ملانه طفرانه..احس بتعب ابى اروح المدرسه..ماريد الاجازه تبدا..
حمدان: ليش.؟ من متى هالحب..ولا يكون وراج شي.
سلامه بثقه: مثل شو يعني...تتحراني عاشقه لي واحد واسير له كل يوم..
حمدان: ودج عشان اقطعج مليون قطعه...
سلامه: ضحكتني انا سلامه بنت راشد مب مال هالحركات..محشومه طال عمرك..
حمدان: زين تعالي نروح بيت يدي..
سلامه: لا استريح ما نبى نسير...عندهم عزا..
بطل حمدان عيونه: عزا شو؟
سلامه: محد مات بس عمتي ليلى..مب في وضع طبيعي.
حمدان : انتي شو تخرفين.؟
سلامه: شواخي الدبه خذوها قوم سعيد بن مطر..
حمدان: حرام لا تقولين...
سلامه: يالمتأثر شو ياك..؟
حمدان: ما احاتي شواخي..عمتي فديت روحها اكيد ميته من الضيج...
ونش حمدان وتلبس وبيطلع..
سلامه: وين رايح..؟
حمدان: اكيد بسير لها...طول عمرها تضحي عشاني بكل شي..وهي امي وابوي ما تبيني اسير لها وقت ضيجها...مب سنه هذي..ولا هو بمذهبي...
سلامه ابتسمت: انا بعد بيي وياك...
حمدان: يالله نسير لها...
ونزلوا تحت كلهم وساروا فلة يدهم راشد...وشافوا عمتهم عايشه في الصاله ويا امهم ويدتهم...وسلموا عليهن كلهن...واضطروا ييلسون في الصاله عشان عايشه...
حمدان ضايج: وين عمتي..؟
سلامه تأشر له ان عيب لازم ييلس..
عايشه تسولف: افا وانا مالي جيمه...
ام حمدان: ما عليج منهم اليهال جي..اصلا نحن ما ينشدون عنا كثر ما ينشدون عن عمتهم ليلى...
سلامه في خاطرها"عدال انتي اللي مقطعه عمرج بالسؤال"
سلامه: امايه قوم عمي مبارك ما بيوون اليوم.؟
خلود: لا والله ما بيوون دقت لي عمتج شمسه وقالت ما بيوون هني قبل ما تخلص الامتحانات عليكم..وعلى حمدان...
سلامه: احسن...
عايشه مستغربه: ليش احسن..؟
نش حمدان لانه مب متفيج لسوالفهن...ولحقته سلامه على طول قبل ترد على عمتها....
دقوا عليها الباب بس ما رضت تبطله ...
حمدان: عمتي بطلي الباب انا حمدان برمسج شوي وبظهر والله ..
سلامه: ما بنغثج بس دقايق ارجوج عمتي...
حمدان: اذا ما تبين سلامه تدش عادي بس انا شوي وبظهر..
سلامه: يا سلام ع كيفك هو..عمتي انا بنت افتحي الباب وهو ولد ما يدش..
حمدان: كانت فكرتي نيي هني انتي ما طعتي..
سلامه: تراها عمتي بعد مب بس انت...
حمدان: عمتي فديتج بطلي الباب...
ونشت ليلى من داخل وبطلته وابتسمت يوم شافتهم....سلموا عليها..وسلامه تمت لاويه عليها بقوه وما طاعت تخليها...
سلامه: عمتي ولهت عليج..
حمدان: زين ممكن تخلينها شوي تيلس بنسولف لها...
ليلى مبتسمه وعيونها متورمه من الصياح: سلامي خليني بيلس يالدلوعه...
ويلسوا كلهم على شبريتها...وسلامه حطت راسها على ريول ليلى بدلع..ويلست ليلى تتعبث بشعرها..
حمدان متأفف: طلعيها الله يخليج تييب لي المرض..
ليلى: حرام عليك ياهل...
حمدان: شو ياهل..باقي سنه وتكمل دراستها وتكون جامعيه..
سلامه: لين ما تيي السنه بعدني طفله..ابى استمتع بطفولتي...
ليلى: شخباركم وشو مسوين.؟ حمداني اخبار الدراسه.؟
حمدان: للحين اوكي بس الاهم اللي عقب اسبوعين..
ليلى: يالله شد حيلك انت لها...
ابتسم حمدان: كلنا لها..مب بس انا...
يت عفرا على بال حمدان..وابتسم من خاطره..نفس الجمله اللي قالتها عمته كان سامعنها اليوم من عفرا..ويلسوا ويا ليلى يسولفون ويضحكون..وغيروا لها شوي مزاجها من عقب الضيج اللي كان مسيطر عليها...


الساعه 7:15 متعطر ومتبخر ومتلبس ونازل تحت ويلس في الصاله...وشاف اخوه يالس يطالع التلفزيون...ويا امه..
ناصر: على وين اخ فهد؟
فهد: ولا أي مكان بيلس هني..
ناصر: وليش كل هالكشخه...؟
فهد: شباب لازم اكشخ..احب نفسي ياخي شو اسوي؟
ام ناصر: والله لا كشخه ع قولتك ولا شي..هذي الا بطره فيك..
ناصر: سمعت اللي انا سمعته...
طالعت ام ناصر ولدها بنظره مستغربه..شو اللي ممكن يكون سمعه..
فهد ييلس على الكنبه: شو سمعت؟ انا ما سمعت شي؟
ام ناصر: وشهو اللي سمعت يا ناصر.؟
ناصر: في ناس اليوم في بوظبي واتصلوا علينا وفي واحد هني ويانا في الحجره رمسهم بس ما خبرنا...
فهد: منو ياي بوظبي؟
ام ناصر: صج انك ما تستحي ولا تخيل..عيب عليك هالرمسه يا ناصر.
ناصر: وشو قلت انا الحين...اخبره ..
فهد: لعوزتوني شو مستوي؟
ناصر: الحب الجديم في بوظبي..
فهد ابتسم ابتسامه عريضه من قلبه: والله...!!!!!
ام ناصر: وليش مستانس شو بتسوي ان شاء الله...يا فهد استح على ويهك..
فهد: بعدني يالس عندج ما سويت شي.
ناصر: وليش شو ناوي تسوي؟
فهد: ازور بيت خالي حبيبي الله يرحمه واشوف بناته واسلم عليهم..وعياله بعد..صلة الرحم وصانا عليها الرسول..
ناصر: هيه ما تذكر غير هذي من وصايا الرسول..والباقي ناسنه..
ام ناصر: والله يا فهد ان سرت هناك لا انت ولدي ولا اعرفك....
فهد محرج: شو فيج انتي...ليش جي عقليتكم...ابويه ما بيعرف عند حرمته الثانيه ما يدري بشي عنكم..خلونا في حالنا ما صارت حاله هذي...
ونش فهد محرج وطلع عنهم...وناصر تم يالس ويا امه عقب استأذن منها وتلبس وسار عند ربعه...
.
.
وحده ورا الثانيه يتدافعون بقوه..الاقوى فيهم اللي تضرب اقوى..واللي ترتفع اكثر...كان صوتهم مرتفع وهم يتبادلون الادوار...والظلام مخيم على المكان..وتلاطمهن يشق سكون الليل...وكان يالس هناك عندهن يفكر في اللي ابعد من مدى نظره..وهو يشوفهن يتصارعن جدامه يكسرن صخور الشاطئ..تنهد فهد من قلبه وهو يشوف الامواج كل موجه تدفع الثانيه نحو الصخور..بشكل عنيف..ويطالع لبعيد بدون هدف...
نش بهدوء وركب سيارته ومشى على غير هدى...وما حس بعمره الا واقف جدام بيت خاله المرحوم ناصر...
ابتسم من قلبه...يا كم لعب في هالشارع..وكم طاح وتعثر وابتسم وركض ..وعاش حياته كلها قريب من هالبيت وفي ربوعه..
واللي خلى ابتسامته تنفرج عنها زاويه اكبر...يوم تذكر لعبه ويا الاولاد كوره في هالشارع..قبل 13 سنه وعمره 15 كان عقب صلاة المغرب يدخل بيت خاله بسرعه ويلاقي عايشه يايبه له كوب ماي تستقبله فيه...رغم انه صغير بس يحبها..وهي تنظر له نظره طفوليه تقهره...يندس في الزراعه عشان خاله ما يضربه ويا راشد ومبارك وسيف يوم ما يسيرون يصلون وهم صغار في المسيد..وكانت عايشه تشرده من ورا وتشهد وياه انها شافته يصلي بس عشان لا ينضرب..
كان فهد يفسر تصرفاتها على انها حب...بس عايشه كانت تتصرف بعفويه وما يهون عليها تشوفه ينضرب ولو ان ضرب ابوها كان خفيف وتأديبي...
ابتسم بعدها فهد وتنهد..وشاف عمره واقف وطول وقوفه..ونزل ودق الجرس...وتريا..ويت البشكاره تبطل له الباب..
تاما: من يريد.؟
فهد: ماما عايشه هني.؟
تاما: ايوه في موجود..تريد اناديها..؟
فهد: هيه يالله..
تاما: من انته؟
فهد: قولي لها تعالي وبس..هي تعرف..
وسارت البشكاره..وابطت شوي عايشه داخل..وفهد حس باحراج ورد بسرعه موتره وروح....
طلعت عايشه بس ما حصلت حد ..واستغربت...وعقب تفكير طويل ما شكت للحظه يكون اللي برا غير فهد..وابتسمت منه وعليه..
مول ما يتخلى عن مراهقته..وحركاته الشيطانيه...ضحكت وردت على طول داخل وهي مبتسمه..بس ما قالت لحد أي شي..
كان راقد وتلفونه يدق ويدق وهو مطنش..يدوره يمين ويسار بس ما لقاه..واخر شي مسكه ورد عليه بكسل وضيج..
حمد: الوو..
بدريه: صح النوم يا كسول..وينك ؟
حمد: بدريه الحشره شو تبين..؟
بدريه: تعال عندنا..
حمد: متفيج لج انا..
بدريه: الله يخليك..
حمد: امس كنت عندج شو تبين تتحريني فاضي لج اربع وعشرين ساعه..؟
بدريه: انا في بوظبي يالله تعال بيت عمك..
حمد: والله!!!!
بدريه: والله تعال..انا في البيت بروحي ويا حصه وسمر بس..
حمد: وخير يعني..اذا انتوا بروحكم شو اسوي يعني؟
بدريه تضحك: ولا شي..بس تعال بنتعشى ويا بعض...
حمد: فاضيه انتي والله..عندي مشاغل ثانيه غيرج...
بدريه: ايه اكيد مواعد لك وحده وعازمتنك على العشا...
حمد: لا طال عمرج مب نحن نمد ايدينا على بيزات البنات..الغاليه نحن نأكلهن ونأكل اهلهن ...
بدريه: ارجوك يا حفيد بيل جيتس..
حمد: ما اعرفه بس سلمي عليه..
بدريه: هاه شو قلت..
حمد: بسبح وبيي اسلم عليج وعلى البنات..بس لا تقولين للي عندج..
بدريه مبتسمه: اوكي حبيبي...
وبندت عنه بدريه وسار يسبح ولبس وطلع على طول...وسار بيت عمه...
.
.
في بيت بو خليفه كانت حصه وبدريه وساره يسولفن ويتذكرن ويستهبلن ويتهن حمده اللي عرفت ان عمتها بدريه يت هي وسلمى..ونزلت سلمى وسمر عندهن واحلوت القعده ضحك وسوالف..وما خبرت بدريه حد ان حمد ياي..وشوي وتيي عفرا لابسه مخور عنابي كان يجنن عليها ومكحله عيونها..وكانت صدق مختلفه ..بس اللي صدمها انها ما تعرف ان بدريه موجوده...اول ما شافتها ابتسمت من قلبها وحست قلبها يدق بسرعه..
ونشت لها بدريه ولوت عليها...
بدريه: فديت روحج غناتي شو هالحلى كله..ما حيدني احلويت يوم قربت امتحانات الثانويه العامه..الا انخسفت خسفه...
عفرا مبتسمه ببراءه ابتسامه نادراً ما يحصل لهم الشرف يشوفونها: الحلوه عيونج عمتي...
ويلست وياها وحصه مبطله عيونها على الاخير..وساره تطالع عفرا مبتسمه..وحمده تسولف ويا سلمى مب مهتمه...
عفرا: عمتي ولهت عليج...
بدريه: تولهت عليج العافيه..
حصه: عفاري فيج شي..؟
بدريه: حصوه ما تعرفين تسكتين؟
طنشت عفرا عمتها...ونشت المطبخ التحضيري وردت..يايبه وياها كيك وعصير لكل الموجودين..اللي بالنسبه لهم ما تغير شي في اليلسه لانهم متأكدين ان عفرا مستحيل ترمس مع أي حد فيهم..ولو انها يلست حذال بدريه..وتسولف لها...
بدريه:بقى اسبوعين..شدي حيلج ابى اشوف اعلى نسبه في العايله كلها..
عفرا وابتسامتها ما فارقت ويهها: انتي عمتي كم يبتي؟
بدريه: نسبتي مب شي..يالله شدي حيلج انتي اول حفيده بتتخرج من العايله...وعشان ما تم في خاطرج انا كنت يايبه 81%..مب شي..
عفرا: وما كملتي عشان تعرسين صح؟
بدريه: كنت احب عمج وماريد اضيع وقت اكثر وخفت يمل ويعرس ترا اول يتحرون الحرمه تنشغل بالدراسه اكثر عن الريل..
عفرا: ما فكرتي تكملين؟
بدريه: يحاول معاي عبادي بس ما رضيت..ما احب التزم بشي..ابا اعيش حياتي بدون قيود..
عفرا مبتسمه: بالعكس الكتب مب قيود...الكتب متعه ومتعه كبيره بعد..هي اكبر حريه في العالم..مستحيل حد يضايقج منها او تزعلين منه..ومتى ما تبينها سيري لها بدون عتب ولوم..
بدريه: بالعكس الناس هم الحياه والحياه هي الناس..نحن في العالم ما لنا غنى عن بعض..والكتب لها فايده وتونس صح بس ما تغني عن البشر..انتي ممكن تستغنين عن صديقه عشان كتاب؟؟
عفرا وهي منتبهه انها مرت عليها 12 سنه في المدرسه وبرا المدرسه وهي بدون صديقه مقربه منها..كانت تحس انها مب في حاجه للصديقات..وان مافي أي انسانه ممكن تفهمها وتتقبل عقليتها..
بدريه: شو قلتي؟
عفرا: ما اعرف.
وتمت بدريه تسولف وياها وعقب قربت اكثر من الحريم وسولفوا ويا بعض طبعا عدا عفرا اللي ساكته وما ترمس الا اذا حد رمسها...بس الاكيد من رمسة بدريه انها ناويه تقضي على احساس عفرا بالوحده قد ما تقدر...صح يبا لها وقت بس هي قد التحدي...وهي لها...
.
.
مرت نص ساعه ودق الجرس..وطلعت له جينا ودخل سيارته ونزل..وشاف بدريه يايه من بعيد.رحبت به ووايهته...
بدريه: فديت روحك يا ربي..
حمد: وين الشعب.؟
بدريه: كلنا داخل تعال...
حمد: كلكن حريم صح؟
بدريه: هيه..مافي ولا ريال الا انت...
حمد: يالله سرنا..
وقبل يدش الصاله دخلت بدريه..
بدريه: حمد اخويه بيدخل يسلم..عدلن شيلكن..
وتحجبن كلهن..وحمده سارت فوق على طول لانها ما كانت لابسه وقايتها...ودخل حمد..وحصه حست بعمرها اخف عن الريشه..وقلبها يتنافض بسرعه...ومب رايمه انها تخفي ابتسامتها رغم كل المكابره الي في عيون حمد...سلم عليهن كلهن...
وهو اول ما يت عينها في عينه..ابتسم من قلبه..ما قدر انه ما يبتسم..وما عرف شو اللي خلاه يبتسم..ويلس قريب منها شوي..على الكنبه اللي مجابلتنها...
حصه تحس قلبها يدق ويدق ويدق..مب رايمه تتحكم في انفاسها..تحس انها تبا تضحك بصوت عالي..وتحس انها بعد تبا تصيح..يلست سمر عدالها..
وساره طلعت..وبقت عفرا وسلمى وبدريه وحصه...
حمد: لو ادري ان هالذيبه هني ما ييت..
سلمى: مالي بارض ارد عليك..خلك بعيد عني...
حمد: اووه في تطور هاديه اليوم...
وبدريه تأشر له من بعيد يسكت انها ضايجه ومب وقته يتحرش فيها...
ونشت سلمى فوق وخلتهم..بس حمد انتبه على عفرا وبهره جمالها وسكونها..انبهر اكثر من نظرة الغموض في عيونها...وهي اول ما حست انه يطالع فيها..عطته نظره حاده غريبه..وحس بقشعريره في جسمه لاول مره من نظرة بنيه...
تنهدت عفرا وانتبهت حصه انه يطالعها...ونشت ..
بدريه: عفاري على وين؟
عفرا: بسير البيت ادرس..
حمد: بل عليج ويك اند ذابحه عمرج ليش..
حصه وبعدما انتهى الصمت بالنسبه لها:هي دوم جي ما تفج الكتاب..
حمد في خاطره"اخيرا قررتي تتكلمين"
سمر: حمد انت ليش ما تيي عندنا دوم..؟
حمد بإستخفاف: مره ثانيه ان شاء الله...
سمر: متى يعني؟
حمد: يوم اعرس كل يوم بيي عندكم...
سمر: الله بتعيش ويانا..
حمد: هيه تراكم لاقطيني من الشارع ايي اعيش عندكم...
بدريه: حمودي بس عاد ياهل هاي شو تحط راسك براسها...
كانت سمر متسنده بإيديها على ريول حصه اللي مول ما حست بها...حصه كانت ضايعه في عالم ثاني وسمر ماخذه راحتها..حتى حصه ما علقت على سمر انها تسولف ويا حمد..بالعكس استانست على الاقل بيرمس بيسولف..احسن من نظرة الاحتقار والصمت القاتل...
حمد: حصه ليش ساكته..
حصه مب قادره تركب جمله وحده على بعضها: انتوا ترمسون..
حمد كان يدري بكل اللي في قلبها..وابتسم: زين سولفي ويانا...
حصه مستحيه: زين ..
بدريه ابتسمت وعيبها الوضع...وسمر ببلاده علقت على حصه..
سمر: ونها اختي مؤدبه شياج اليوم..
حصه انتبهت ان اللي ترمس سمر بس ما ردت عليها..لازم ما تشل قناع الادب لين ما يطلع حمد...
تم وياهم حمد شوي وطلع ووصلته بدريه لين سيارته..وردت الفله..
بدريه: حصوه اباج عقب شوي تعالي يوم تصلين العشا...
حصه ما ردت..
سمر: اختي انتي فيج شي..
حصه منتبهه ان حمد راح وسمر متسنده عليها..وبعدتها عنها...
حصه: ذلفي من ويهي شو متسدحه علي قالولج شبريه ولا شبريه..
سمر: لا الشبريه الثانيه...
حصه: سمر اسكتي..
ابتسمت حصه بهدوء كانت الليله تعني لها الكثير..يمكن تكون نقله ويمكن تكون فتره وتزول..ويمكن تكون سحابة صيف تروح وما ترد...
بس الاكيد انها مهما قصرت يتم لها طابعها الخاص في قلب حصه...

ونتظرو الاخت الغلا مع الحلقه الثالثه عشر

تحياتي

[رهيف الحس]

شي جميل
شي رائع..

ربي يعطيك العافيه...

تحيااااااتي لك

اختك
رهيف الحس

[البدوي الحبوب]

رهيف الحس

مرحبا بك وبمروك الجميل

اسعدنا تواصلك فلاتحرمينا منه

تحياتي لك


@54@

[الغلا]

الحلقه الثالثه عشر
الصبح كان منسدح على شبريته..ويتحرك يمين ويسار يباها تنش..ويتحسس بإيده وينها..ومتعمد يسوي ازعاج عشان هي تنش..ما يروم يصبر عنها..
ويتجلب في كل جهه..وابتسم يوم شافها تحركت..ونش بسرعه وحط ويهه جدامها..وهي تبطل عيونها بكسل..
احمد: الله نشيتي اخيراً...
تثاوبت شيخه بكسل..وحاولت تبطل عيونها بس كان فيها رقاد..وردت تغمض..وحرج احمد..ما يباها ترقد يبى ييلس وياها شوي..
شيخه رقدت عنده البارحه وما طاعت ترقد غير في حضنه...وما رضت ابد تيلس ثانيه عند فاطمه...وحتى انها رقدت وهي متعلقه في رقبته...
تضايج احمد..كان يباها تنش بس ما طاعت وانجلبت على الجهه الثانيه وردت ترقد...ونش الحين بيتعامل معاها بإسلوب مباشر..وهزها شوي..
احمد بهمس: شواخي الدبه...نشي يالله...
شيخه تطلع اصوات وكنها تتوجع..تبى ترقد بس وين الشرده من هالمغثه...
احمد بدا بإسلوب الاغراء: بنروح الجمعيه...
ابتسمت شيخه وردت تطالعه وبكسل: نلوح دمعيه...
احمد مبتسم بفرح: يا ويل حالي على الدمعيه انا..ما نروم لج...مصطلحات عجيبه..
شيخه: نلوح دمعيه..
احمد يضحك: دمعيه..هه..دمعيه..وين تبين ؟؟؟
شيخه وهي بالغصب تبطل عيونها وتمسك بدلتها: انا ماليد هذا...ابى فتان تاني...
احمد مستغرب: بل علينا منو الفتّان..؟
وبعد ساعه من المحاولات انه يفهمها....فهم انها تبى فستان عشان تروح الجمعيه وان اللبس مب عايبنها...ونش من مكانه وغسل ويهها وبطل شنطتها...
احمد: يالله اختاري اللي تبين..
ويلست شيخه تنبش وطلعت فستان ابيض بدون كم: اليد..
احمد مسك راسه: ردينا لكلمة اليد..المهم البسي اللي تبينه بس فكينا من كلمة اليد..كلما اذكرها تييني قشعريره..
شيخه تطالعه مبتسمه...وشلها والساعه بعدها 8:30 الصبح..بس كان يحس بنشاط فضيع..وعالمه هالمره في مغامرات واستكشافات..ولازم يقضي كل لحظه ويستمتع بشيخه قد ما يقدر....وفي السياره طلعوا الاثنين ويلسها جدام...
احمد: بنشتري حلاوى كبيره وايد مثل السياره...
شيخه بفرح: انا اليد كندل..
احمد: حبيبي على المتطوره اللي تبى كيندر..يا عيني وا علينا نحن..كان حدنا لبان بو نص درهم...الا اقول شواخي كم تبين تشترين حلاوه..؟
شيخه وهي تفتح ايدينها وتأشر بأربع اصابع : بث هذا... ( وردت تبطل ايدها الثانيه واستون ثمان اصابع وهي ثانيه السبابتين ونها بتنقص العدد)
احمد: عاشوا ونج الحين ما بتشترين وايد..؟
شيخه تحاول تبطل الخيط اللي في نعالها ويوم بطلته رفعت ريلها وهي بعدها فاتحه ايديها على ثمان اصابع..وجدمت ريلها جدام..
شيخه: بث هذا...
احمد مبطل عيونه على الاخير: بل عليج..حتى صبوع ريولج بتحسبينهن..؟؟؟ والله انج مب هينه....
شيخه تفتح ايدها:لي انا بث...
احمد يغمز لها: وانا وياج لا تنسيني..انا صديقج الطيب..
شيخه عاقده حياتها: لا انت مافي..
احمد: هه بدينا بالخيانات...احيد هاي سيارتي وانا اللي مودنج..على الاقل حشمي..وجامليني..
شيخه تضحك مع انها ما تدري شو يقول خالها..بس تعابير ويهه المرحه كانت تضحكها...اللي مستانس ويستهبل وياها على راحته...
شيخه تلوي على علبة الكلينكس: مالي...
احمد مستغرب: مالج!!!! مالج مالج ولا تزعلين...
ومسكت الاشرطه وحطتهن في حضنها: مالي...
طالعها بغرابه احمد: شكلي ببركن السياره على ينب..اخاف الا تطلع هي الثانيه مالج بعد...!!!
وتمت شيخه تدور شي بعيونها في انحاء السياره عشان تتملكه...وحاولت توقف بس يودها احمد...
احمد وهو متلعوز بالسواقه: يا بنت الناس يلسي لا توهقينا خليني اشوف دربي...
شيخه: ماليد...
احمد: حبيبي...!!! ماليد..والله ما ادري منو معلمنج هالطلاسم الفرعونيه...!!!..شكلج مب راكبه سياره من قرن..والله مب شايفه خير ..
شيخه: اتي طفثه..
احمد مبتسم بتعب وهو هلكان من حركات شيخه: ايوه..بدينا..لاحظي انج اللي بديتي بالسب مب انا..
شيخه وهي تيلس على السيت وماده بوزها: ماليد...
احمد: شو اللي شفتيه ورا وتبينه..قولي لي وانا بييبه...
وردت شيخه بتنش...
احمد: شكلها نهايتي على ايدج..انا شو اللي خلاني اوعيج..شو تبين يلسي..انا بييبه...
شيخه: هذا هذا...
احمد وهو يلف ورا وييب الكوره: هذي؟
تبتسم شيخه: ايوه...
احمد: هاه مسكي وفكينا من حشرتج...
لوت شيخه عليها: مالي..
احمد مبتسم : مالج..بس فكينا من حشرتج...كل شي استوى مالج...اخاف الا يوم تكبرين تقولين اني عبد اشتغل عندج..
شيخه مب مهتمه...
احمد يستهبل ويأشر على واحد من البيوت في اطراف الشوارع: شواخي شوفي هالبيت مال منوه..؟
شيخه تضحك: مالي انا...
احمد: ايوه...وهذي السياره اللي جدامنا مال منوه؟
شيخه بفرح: انا...
احمد يأشر على عمره: وانا مال منوه...
نشت شيخه تبى تلوي عليه: مالي انا..( ويلست في حضنه)..
ابتسم من قلبه وهو واقف للاشاره ولوى عليها وقطعها بوس...
احمد: يلسي على السيت ولا تتحركين...روحج بتفلسيني الحين في الجمعيه..تبين بعد تدفعيني غرامة مخالفه وانتي يالسه جدام...
كان لاوي عليها من قلبه وهي طايحه في حضنه وراسها على كتفه..
شيخه: حبيتي اتي...
احمد يهز راسه ونه فاهم شي: صح...
وردها مكانها وعقب وصلوا الجمعيه ونزلها تشتري اللي تباه..
..........................
الساعه كانت 9:00 وليلى نشت من وقت وسارت تيلس في الحديقه...وياها دفتر وقلم...هالوقت محتاجه تكتب لها كم كلمه..كانت سلامه البارحه راقده عندها...وحمدان رقد في الحجره الثانيه لانه عمته عايشه موجوده فما قدر يرقد في حجرتها...
يلست ليلى على الكرسي في الحديقه...وغمضت عيونها واسترخت تستعيد في بالها الف ذكرى وذكرى...نست ان ناصر ما يا على بالها هاليومين من عقب اللي استوى ويا شيخه...حست بعمرها ضايجه...وايد مقصره في حقه..حتى التفكير حرمت نفسها منه...ناصر اكيد زعلان منها عشان ودرته ذاك اليوم وهو يرمس...ما تدري انه متضايج والدنيا مب شاله همه من كثر ما يحاتيها ويدري انها اكيد زعلانه...والمصيبه في الموضوع انهم الاثنين يدارون على بعض وكل واحد فيهم يتحرى الثاني هو اللي زعلان منه...
يلست عدل وبطلت دفترها وخربشت بعض اللي في خاطرها...وهي ضايجه حدها..تحزن بحزن عميق في نفسها بس مب قادره انها تبعده..ولو انها تكابر تبى تبتسم...

" في غيابك ...اشتعل خافقي نار...والحزن سكن فيني...وبشراييني دار...اااه يا حبيبي وش جرى مني..وش بعد صار ؟؟ ...في غيابك ...ضاقت علي الوسيعه..وادع القلب فيني موسم ربيعه..ليه تهجر الروح فيني...قلبي اللي حبك..ليه بس تبيعه ؟؟ ...في غيابك ...امتليت أنا حسره...ورافقني الهم ..قلبي وشيجبر اليوم كسره؟؟غدا من همه عدم ...في غيابك ...تناثر الياس على أضلاعي...منتى شاريه حبي ولنت له راعي...مزوده ضيق قلبي .. مزوده التياعي ...في غيابك ...عافني الحرف وعافته أوراقي... وضاع قلبي بزحمة الآمه...تاه عني ...وين أنا قلبي ألاقي ؟؟ ..."

وصكت الدفتر قبل تكمل...لانها سمعت صوت سياره وقفت برا وردت داخل ونادت وحده من البشاكير تشوف من اللي عند الباب...ويلست في الصاله...وطلعت امها وسلمت عليها ويلست وياها...
ام راشد: منو اللي ياي الحين؟
ليلى: والله ما ادري خليت البشكاره تسير تشوفه..
ام راشد: خافهم الا هل سعاد ردوا شيخه..
ابتسمت ليلى: وين يردونها كانوا يبونها اسبوع تبينهم يردونها في يوم وليله...
ام راشد: البارحه ما رقدت عدل من ريولي تعبانه ودي نسير العياده..
ليلى: تبينا نسير العصر بنسير...
ام راشد: بنشوف..خلي راشد يي اول اباه هو اللي يوديني..
ما اهتمت ليلى ويلست ساكته..والبشكاره دخلت...
تاما: ماما في ريال برا يريد انتي..
ليلى: انا.؟
تاما: لاء ماما كبيره..
ابتسمت ليلى وهي تطالع امها: سيري يبونج انتي..
ام راشد وهي تنش بالغصب: لا اله الا الله..
ليلى تحاول تساعدها: يالله يمه ما فيج الا العافيه..نشي بسرعه..انتي غزال اصلاً..
ام راشد: أي غزال الله يخليج..الا قولي عيوز ما بقى فيها حيل..
ليلى: تاما خليه يدخل الميلس الداخلي امي ما تروم تظهر له..
ام راشد وقفت شوي: الا اقول منو هاه.؟ وشو يبى.؟
ليلى: يمكن حد من اهلج...من يدري..
وطلعت ام راشد للميلس الداخلي..وليلى ردت داخل بتسوي شي للريال يشربه....
اول ما دخلت ام راشد الميلس انصدمت من اللي شافته..
ام راشد مصدومه: يا حيا الله من يانا اتفضل اقرب يا ولدي...
ناصر: حيا الله المهلي ...دام فضلج..
ام راشد وهي تيلس: شحالك يا ولدي وشحال هلك وعربكم كلهم...
ناصر ييلس: الحمدلله بخير وسهاله يسرج الحال..شحالج خالتي عساج بخير..؟
ام راشد: والله بخير يا ولدي دامنك بخير..وامك شحالها.؟
ناصر: امي كبرت وتعبانه والله يكون في عونها...
ام راشد: ايه والله يا ولدي كبرنا..من متى ونحن تعبانين والعمر يمر..ولدي راشد غادي شيبه..وانا خلاص يالله بحسن الختام..
ناصر مبتسم: فديتج يا خالتي والله يعطيج العافيه وطولة العمر..
ام راشد: اجمعين يا ولدي على غير مضره..
ناصر سكت وما عرف شو بيقول....!!!.وام راشد تمت صاخه بعد...من يقطع الصمت...؟؟
ناصر متردد: خالتي..!!
ام راشد: يا عونك..
ناصر: عانج الله..(وبتردد كبير)..وين البنات بغيت اسلم عليهن..؟؟
عرفت ام راشد انه اكيد ياي يسلم على ليلى وان هالزياره بس اكيد عشان سواد عيونها..ولا ناصر ولد ابوه ما يطب بيتهم لو شو ما صار..وفي نظر الكل انه ضعيف وممكن أي حد يسيره على الشكل اللي يبى..وناصر عكس كل هذا تماما..لانه مب ضعف اللي فيه بقدر ما هو مراعاه لمشاعر اهله...
ام راشد: اصبر يا ولدي بشوف لك ليلى..لان عايشه للحين ما بينت..خاف انها راقده...!!
ناصر: اللي تشوفينه يا خالتي..
وطلعت ام راشد متسنده على عصاها وتتقبض في اليدار لين ما تمشي...وناصر تم في الميلس..وهي سارت داخل البيت..وتمت تنادي ليلى..
ليلى وهي ماسكه دلال القهوه والشاي: هاه يمه..
ام راشد بنظره بارده: سيري الميلس ولد عمتج ياي يسلم عليكن..
ليلى بردت اطرافها من الرهبه: منو عمتي؟
ام راشد: هي الا وحده..ناصر في الميلس...سيري شوفي اختج نشت ولا سيري سلمي عليه والبسي لج وقايه..
كانت ليلى واقفه والعالم من حواليها يدور..وقلبها تمرد عليها..وحست انه ينبض فوق الطبيعي..وانه يعاند يبى يطلع من صدرها ويعيش بحريه اكبر..حست ان قلبها يبى يتمرد على قفصها الصدري ويعيش طليق مثل طير في السما..
كان يرفرف في صدرها ويدق وهي تطالع امها...وبصعوبه تبى تضغط على عمرها عسب ما تبتسم..بس كان شعورها اكبر من انها تكتم ابتسامتها..اللي ارتسمت على ويهها بعفويه...وحطت كل شي على الطاوله وطلعت فوق تغير ..ولبست مخور عيناوي..لازم انها تلبس عيناوي عشان تغايض ناصر اللي طول عمره وحداوي..وحبت تستفزه شوي...يعيب ليلى انها تستفزه وتخليه يحرج..رغم انه ما يبين بعض الاحيان..عكس حصه اللي كانت صاغره طول الوقت لعواطفها... وكحلت عيونها اللي هن اصلا اول شي يلفت النظر فيها...رغم جمالها البسيط والعادي لكن لعيونها طابعها الخاص..ومرت على غرفة عايشه ولقتها راقده...
نزلت الصاله وشافت امها...وشلت دلال القهوه والشاي ويت بتظهر..
ام راشد: تعالي وين تبين؟
ليلى مستغربه: الميلس...
ام راشد بضيج: وليش كل هاه؟ وين سايره انتي؟
ليلى: شو اللي هاه؟
ام راشد: سيري مشي الجحال من عيونج..وين تبين انتي..؟
طالعت ليلى امها بغرابه: شو فيها امايه عادي.؟
ام راشد: امسحيه ولا يلسي هني...
ردت ليلى بضيج فوق وحاولت قد ما تقدر ما يتم له اثر في عيونها..لين ما طلعته كامل...ونزلت تحت وسارت للميلس الداخلي...واول ما وصلت للباب كان جسمها يتنافض وصوت فنايين القهوه يعطي اشاره للي في الميلس ان حد ياي..كان ناصر يالس ما تحرك من مكانه...يتريا حد يدش..واول ما دخلت ليلى..انصدم...بس حافظ على شعوره...وهي كانت ناويه عليه اصلا..مجهزه له كلام تعاتبه فيه..غير النغزات اللي بيسمعها عشان هالزياره...
ليلى: السلام عليكم.
ناصر وهو يشل الصينيه عنها: وعليكم السلام يا حيا وسهلا..
ليلى: لا هان المرحب..
ويلست وهو يلس..
ناصر بعده مبتسم: شحالج؟
ليلى وبدت ترتبك: الحمدلله شحالك انت.؟
ناصر والابتسامه ما فارقته: مثل ما تشوفين...
ليلى ابتسمت...
ناصر: يعني لازم تلبسين عيناوي..ما عندج شي عنابي..
ليلى تحاول تمسك نفسها لا تضحك: والله عايبني اللون..لو العنابي عايبنك جان لبست عنابي..
ناصر: اها زين والله..من متى وانتي عيناويه..احيدج عنابيه..
ليلى: عنابيه عيناويه كلهن في الاخير اماراتيه..
ناصر: عاد هذي صدقتي فيها..الفرد للجماعه والجماعه للفرد..
ليلى: الحين شو يخص هالحكمه..
ناصر: اسكتي وني اعرف اشياء وايده ومثقف..يا خي لا تخربين علينا خلني اصدق عمري شوي...
ليلى تبتسم....
ليلى: غريبه ياي بيتنا...
ناصر: ربج بعد..اسباب داخليه يابتني..
احمرت خدود ليلى بس حافظت على وقارها ولو ان في ابتسامه خانتها: زين..
ناصر: ليش ما ييتي امس..؟ افتقدناج..
ليلى خلاص تحس جسمها ارتفعت حرارته ولو انها كانت من برا عاديه ولا يبين عليها أي تأثر: شوية ظروف...
ناصر: زين ليلووه..
ابتسمت ليلى غصبا عنها هالمره ابتسامه عريضه: ليلوه!!!! ..ع كيفك تقول ليلوه..اسمي ليلى..ومب ياهل عشان تقولي ليلوه.
ناصر مبتسم: يعني كيفج انتي..!! ليلوه هني وليلى في الشركه..
ليلى: زين شو؟
ناصر: ولاشي بس محترق من يوم الاثنين وضايج صدري مب هاني في عيشه..ومتكدر..ومالي بارض اشوف حد..وكل هم الكون ع راسي..
ليلى مبطله عيونها: ليش شو مستوي عليك.؟
ناصر: اسف على اللي صار قبل ثلاث ايام في المكتب... مع ان السالفه مب محتايه اعتذار..بس ما حب يتم شي في خاطرج من صوبي...
ليلى وهي بتموت من الخجل: لا عادي انا نسيت الموضوع..
ناصر: زين الحمدلله..اول مره تسامحين بسهوله..
ليلى مبتسمه: ما برد عليك..بس احلف انك ياي عشان هالسالفه.؟
ناصر: والله عسب هالموضوع..ليش انتي تشوفين عمرج شويه..اذا انا ما راضيتج انتي وحسبت لج الف حساب..منو اللي تبيني اراضيه مثلاً..خدامتنا..؟؟
ليلى خلاص انتهت وما تقدر تكابر وتخفي ابتسامتها اكثر عن جي: زين مشكور ...
ناصر: ما يخصج مول..خلج عاديه..عافانا الله ما تتخلين عن كبرياءج ابد...
وقبل ترمس ليلى..تدخل عايشه وتسلم وتيلس...وبعد السلام والسؤال عن الاحوال...
عايشه(ترمس جد) : وليش ما يبت فهود وياك...؟
ناصر يضحك: ليش هو ما ياكم البارحه...؟
طالعت ليلى عايشه اللي قدرت تسيطر على ملامح ويهها بس ما قدرت تخفي الحمره اللي بينت على خدودها..
عايشه بتردد: ليش هو يانا..؟
ناصر: قال لي سرت بيت خالي ناصر..مدري به الهرم يمكن يكذب علي..
عايشه: زين شحالك نصور عساك بخير..؟
ناصر مبطل عيونه وليلى تضحك...
ناصر: شو نصور انتي بعد..ياهل انا تقولين نصور..؟
عايشه: انتوا يهال عادي الا نزقركم بالدلع..ونك كبير الحين..
ناصر: ما تشوفيني غادي شيبه..
عايشه: وليش ما تعرس للحين يعني.؟ ولا تتريا لين ما تكبر العروس..؟
ليلى سكتت..وناصر ابتسم: والله نتريا موافقتج يالاخت وبعدين بنعرس..
عايشه: وانا شو يخصني.؟
ناصر: اخت العروس..
ليلى انحرجت واحمر ويهها وحست بضيج وما تقدر تتنفس...اول مره يكون ناصر جرئ بهالشكل..وعمره ما سمح لنفسه يرمس وياها في هالموضوع..واصلا عايشه حبت تستفزه عشان يرمس ولا يقول أي شي..وتكون رايته بيضا جدام ليلى...والظاهر ان اسلوبها ياب نتيجه...
ابتسمت عايشه..وليلى حست انها تبى تطلع بس ما تبى ناصر يفهم شي..وتمت شوي وعقب استأذنت وظهرت..وعايشه تمت ويا ناصر في الميلس..
.
بعدما طلعت ليلى فوق تمت تطالع المنظره وتحط كفوفها البارده على خدودها المحترقه..وتبردهن..كانت خدودها تشتعل من المستحى واللي يشوفها يقول ما بقت قطرة دم في جسمها ما تيمعت في خدودها...كانت لاول مره تحس ان مشاعرها حطب ورمسة ناصر كانت نار يشتعل هشيمها في اطرافها و احاسيسها...ما قدرت تيلس وتمت تمشي وتروح يمين وشمال في الحجره..حست عمرها ما تروم تقر في مكان..وكل الحجره باللي فيها مب واسعتنها...وهي تحس بدوخه وبنفس الوقت تحس عمرها خفيفه وتبى تطير..ما تدري كيف سمحت لنفسها تذوب في حبه حد الانصهار...
يت على بالها ابتسامته العذبه ونظرته الحنونه..وشكله الجذاب..قلبها كان يسابق نفسه عسب يدق اسرع كل ثانيه من اللي قبلها...
...............
الساعه 12:00 الظهر وصل بو خليفه وحرمته البيت..وسلموا على الكل عدا حصه وسمر اللي كانن رقود...وعلى حظ سلمى انهم هالمره ما تموا في العزبه لين اخر الويك اند..دخلت ام خليفه عشان تلحق تتوضى وتصلي الظهر وبو خليفه بعد...كانن عفرا وحمده في يدهن من الصبح..بدريه ويا عفرا وسلمى ويا حمده..
بعد ما صلى بو خليفه رد الصاله بييلس ويا بناته...لين الغدا...واول ما دخل نشت عفرا وسلمت عليه وطلعت..كانت بعدها شايله في خاطرها عليه..ولو انها ما تبين بس ما تحب تيلس وياه شرات قبل...وقبل ييلس نشت له سلمى وقالت انها تبى ترمسه قبل الغدا بروحه...ودخلها حجرته وسارت هي وياه داخل....يلس هو على الشبريه وهي يلست على الكرسي اللي مجابلنه....
بو خليفه: هاه بنتي عسى ما شر..
سلمى وملامح ويهها تغيرت: لا بويه ما شر..بس حامد..
بو خليفه : عسى ماشر عليه؟
سلمى: ابويه ابى ارمسك ويا ليت تسمعني للاخير فديت روحك..
بو خليفه: ارمسي يا بنتي..
سلمى والعبره خانقتنها: طول عمري يا بويه وانا احب حامد واداري عليه..وعمري ما ذكرته بشينه جدامكم..ويبت له العيال وكبروا والحين كل واحد منهم يدرس في بقعه وانت ادرى الناس بهالشي..بس حامد بطران متعبث عكس اللي كنت ابينه...ما كنت اريد اضيج عليك وما اريد اعور لك قلبك..يكفيك اللي فيك من ذياب اخوي..نيي نحن البنات نزعلك ليش...والله يا بويه بحياتي ما قصرت بحقه..وكنت طول عمري قايمه بالواجب واكثر..(دمعت عيونها)بس حامد طماع ما يترس عينه شي..طول عمري وياه ما خذت الا اللي يسدني للشهر..وراتبي كله بين ايديه ما شوف منه فلس احمر..ما كنت اقولكم وين يروح راتبي وانتوا ما تدرون انه ياخذه مني كله...والحين بعد هالعمر كله..بغيت اخذ راتبي هالشهر..وانجلب حسه وقال اني بنت فقر ومب شايفه خير وانه اللي تم يراكض لي في الوزارات عشان اتوظف وكل شي..ومب بس هذا..ترا بعد...
قاطعها بو خليفه: هو وين يودي البيزات.؟
سلمى: مب بس هذا يا بويه انت ما تدري انه بعد اكثر الليالي ما يباتهن في البيت...وانا ما قلت هالشي عشان ما اشمت خلق الله فيني...ويقولون هذي اللي ميته على ريلها شوفوا شو استوا بها....؟ المهم اني تجادلت وياه اخر ليله..(وبعد صمت قصير)..ضربني عشان الفلوس والله العالم وين يوديها ...والحين انا عندك وطالبتنك محد يعرف بالسالفه..ولا اريد حد من اخواني يدري..وخلها من بينا حتى امايه ماباها تعرف..
بو خليفه بضيج: ان شاء الله يا بنتي..انتي الحين تمي عندنا في البيت وانا بتصل فيه وبتفاهم وياه..
سلمى: اللي تشوفه ابويه..وان شاء الله ما ضيج عليكم..
بو خليفه بتعب: لا يا بنتي شو هالرمسه المخبقه..اذا ما شلناج نحن منوه تبين يهتم فيج.؟
سلمى وهي تهوي على راس ابوها وتحبه: فديت روحك يالغالي...
وطلعت من عنده....وردت لهم في الصاله بس ما لقت حد والظاهر ان بدريه طلعت تصلي وبنات اخوها ردن بيتهم...
وهي طلعت توعي حصه وسمر عشان الصلاه...
.
.
وفي حجرتهن فوق...
سلمى: يالله يا بنات نشن..الساعه 1:00 ما تبن تصلن؟
سمر وهي تنش بصعوبه: اووه شو هاه محد يعرف يرتاح في بيته...(وردت تتلحف)
سلمى: حصوه نشي صلاه خافي ربج...
حصه ما تحركت ابد...وطنشت سلمى الله تمت تباغم عليهن...ويوم ملت طلعت عنهن..
سمر نشت ودخلت تتيدد..وحصه ما نشت..ويوم صلت سمر وعت اختها...
سمر وهي تسحب اللحاف: نشي يالله..
حصه: سمر حلي عن سماي لا اقوم اكسر الشبريه فوق راسج..
سمر تضحك: زين يالله ما ولهتي على ابويه وامي...
حصه: يوم يردون بشوفهم..
سمر: سلامي قالت انهم تحت يالله نشي بنسلم عليهم..
حصه وهي تنش: حسبي الله عليكم..محد يدري متى بيفتك منكم ويعيش حياته مرتاح..حتى الرقاد محد يهنى فيه..شو من بيت هذا..؟
سمر وهي تطلع: صلي وتعالي..
حصه وهي تفرها بالمخده: ذلفي من ويهي مب ناقصني غيرج يامر علي..اعرف صلاتي قبل لا تنخلقين...
صلت حصه ولحقت اختها ونزلت عند اهلها وسلمت على ابوها وامها...وكانوا كلهم في الصاله..خليفه وساره وبناتهم عفرا وحمده..وسلمى وبدريه وعبدالله..
بو خليفه بضيج: محد شاف ذياب.؟
خليفه: راقد في بيتنا..
ساره طالعت خليفه مستغربه كيف ما تعرف ان حد راقد في البيت...بس الظاهر ان خليفه ما يبى يغث ابوه..وقاله انه راقد في بيته...مع ان ذياب مب موجود في البيت اصلاً...
حمده: ما بتطلعونا مكان قبل السجن المؤبد...؟
بدريه: أي سجن؟
عبدالله: قصدها الخبيص ..يعني الامتحانات...
سلمى: بنشوف عاد..هذا اول ثانوي مب اعداديه... ترومين تنجحين فيه..؟؟
حمده بثقه: بنشوف عموه..يا ثقتي يا استفزازكم...
خليفه: خلصت السوالف ماشي الا حمده ترمسون عنها...
حمده: افا يا بويه ما هقيتها منك..يعني شو حلاة الرمسه بدون ذكري...
خليفه: حلوه الرمسه وانتي في الطاري..بس تحلو اكثر يوم يطرون بعض الناس...
ابتسمت ساره بخجل...
خليفه: وين تبين سارونه..لا تصدقين انا اقصد عفاري..
انصدمت ساره منه: والله انك ما تستحي..
ضحك بو خليفه وامهم عليهم وعلى سوالف خليفه....
عبدالله: الله يعينكم بوظبي ممله...
بدريه: هاي نغزه عشان نرد ولا شو السالفه...
خليفه: ايوه بدوا اليهال بالضرابه..
عبدالله: خلووف اصطلب شو يهال صدق بحرج والله..
خليفه ملاحظ ان عبدالله مب في مزاج يسمح له بالسوالف: اوكي اسف..
بدريه بعد انتبهت بس قررت ترمسه عقب الغدا...وتموا يسولفون لين ما رفعوا الغدا المطبخ اللي برا وعقب نص ساعه يابوا شاي وبعد ما شربوا كل حد فيهم سار حجرته....
.
.
في حجرة عبدالله..وهو ينزل كندورته بيرقد...بدريه كانت يالسه على الشبريه..
بدريه: عبادي ..
عبدالله بضيج:هاه..
بدريه: شوفيك غناتي..؟
عبدالله: تعبان برقد..
وانسدح على الشبريه وتلحف ولف الجهه الثانيه وعطى بدريه ظهره...وهي نشت له وسارت للجهه اللي مجابل ويهه...
بدريه بحنان: ما بتقولي شو فيك حبيبي..؟
عبدالله: يا بدريه ممكن تخليني ارتاح.؟ يعني ممكن ارقد وتفكيني من حشرتج؟
بدريه مستغربه: زين انا سويت شي؟
عبدالله: لا لا بس سيري عني ضايج والله ما ريد ارمس حد؟
بدريه: شو مستوي عليك..زين خبرني يمكن ترتاح..
عبدالله: اوهوووه علينا شكلنا ما بنفتك من صدعتج...؟
بدريه بضيج: ليش ترمسني جي؟ انا شو سويت لك؟
عبدالله وهو ينش: انا لله وانا اليه راجعون..احسن لي اطلع وارتاح وبخلي الحجره لج اشبعي بها...
ولبس كندورته وطلع عنها وهي مبطله عيونها على الاخير شو فيه عبدالله ؟؟ شو اللي مضيج به...؟ وليش جي يتصرف وياها بهالقسوه.؟
طلع عبدالله وسار يرقد في الميلس...وهو ضايج..كان متواجع ويا الشباب البارحه وبعده شال في خاطره وهو اصلا مزاجه معتفس من يوم سلمى ولو انه ما بين...بس الظاهر ان بدريه هي كانت محطة التفريغ للي في قلبه...
..................
العصر الساعه 5:30 نزل حمد من شقته كان ساير ويا ربعه المول...واتصل بهم بس ما رد عليه غير سالم ربيعه..وتواعدوا هناك....مر حمد عليه البيت وخذاه وياه...وساروا...ويلسوا في الكوفي اللي هناك....
ومع السوالف والضحك والتطنز على خلق الله...لمح حمد ذياب في الانترنت كافيه..وسار له على طول ..وبعد ما توايهوا..
حمد: شعندك بو الشباب هني؟
ذياب: شغل.؟
حمد: شو تسوي من شغل.؟
ذياب: يالله ياللقافه اللي فيك شغل وبس..ليش راز بويهك..؟
حمد معصب: تكلم وياي بأدب يا اخ ذياب..
ذياب: حمود احسن شي تسويه انك ترد مكان ما ييت مب متفيج للسوالف ويا اليهال...
حمد: مب مشكله يا ذياب..كنا في مكان عام ولا بعرف اتصرف وياك...
ذياب يتمصخر: ارجوك لا تضربني ..يالله رد لربعك..عوذ بالله منك منبوذ وياي تفج عقدك فيني...
حمد عوره قلبه من الكلمه بس ودر ذياب ورد عن الشباب...
ذياب رد يكمل شغله..واتصل بفيصل اللي استوى ربيعه الروح بالروح بعد سالفة البروكسيات...وحتى ان علاقته في خالد صابها فتور فضيع..لان خالد ما كان يداني فيصل ومب مرتاح له مول...وعقب ما وصل فيصل يلس يعابل ويا ذياب..ويسوي اللي عليه..
وكانوا داشين مواقع اتصالات حاظرتنها...ولو انها مب شي قذر بس انهم داشين على مواقع توزع البروكسيات اللي للحين محد كنسل شغلها...
وبعد ما خلصوا اذن المغرب وظهروا يتمشون صوب البحر....
.
.
حمد رد الشقه...وكان خلاص واصل حده من الضيج..ومب عارف ليش ضاج من رمسة ذياب مع انها واقعيه...
"صدج انا منبوذ؟؟ صج محد يدانيني.؟؟"
نش للادراج وطلع منها البومات الصور..ورسايل ما تنعد ولا تحصى...وكتب اشعار..ودفاتر مكتوبه بخط ايده...وغير الاوراق اللي مطبوعه من الهوت ميل..ورسايل لا لها اول ولا تالي..كل تعابير الغرام مدفونه فيها..وطالعها بكل أسى..وفتح وحده من الاوراق بعشوائيه..وكانت قصيده كاتبنها قبل تسع سنوات وعمره يومها 19 سنه...وكان عنوان القصيده..
"ضحكة شفاتك"..

" كل حروف المعاني وعبارات الغرام..فيك صارت ماتساوي ضحكة شفاتك دلع..يوم تضحك بين ربعك ألف عين ماتنام...وألف خافق فيك يرسم سواليف الولع...يوم تمشي وانت ترسل تحيات وسلام..كن نورك من بهاتك البدر لي من طلع...يوم تسال وش علومك مدعي الاهتمام..ألف نبته فالخوافق أهتمامك بي زرع..يوم تبعد لو دقايق في نظر عيني اعوام..يحترق قلب حمد ويذوب صبري كالشمع...ذي حقايق قلب مغرم بك..هايم بك هيام...قلب بك لغير قلبه في حياته ما ســمــع...لا عذول ولا وشاة من بني خال وعمام..غيروني في غرامك لان قدرك مرتفع....في صفاتك زدت عنهم ولفتت الاهتمام...لين صار القول قولك وانا عليه السمع...لي تشوفه من عيوني ورايك دايم تمام...ما يعيبك غير طيبك جان ماهوب م السنع...وانت كلك من راسك لين موطاة الاجدام...حايز اعجاب حمد بطرح والا الجمع...قلتها لك بالصراحه...كيف ارموشي تنام...والغلالك من عرفتك في حشايه منزرع...كل حروف المعاني وعبارات الغرام...فيك صارت ماتساوي ضحكة شفاتك دلع"


وغمض عيونه بمراره..وغصباً عنه..غصباً عنه وعن قسوته..غصباً عن جبروته..وغصباً عن تحديه وعنفه...انترسن عيونه دموع..وعوره قلبه وكن حد يطعنه بسيوف..ويغرس الف شوكه في فواده....ويدمي جراحه اللي عمرها ما بتبرى....حس بالالم الفضيع يتغلغل في خلايا جسده...ياما حرم نفسه يمر على هالدرج..وياما حاول يفني اللي فيه..بس قلبه ما يطاوعه..وين يطاوعه..وحياته كلها كانت في هالدرج..وسنين عمره اللي راحت كلها فيه....حس بأنفاسه حاره تنساب من رئتييه..وتندفع بقوه لصدره..وتمر بكل خليه فيه....ورد كل شي مكانه وحتى ما تجرأ يفتح الالبوم...ونش من مكانه....
تنهد من خاطره وانسدح على شبريته...وتحسس تلفونه..ودق على بدريه...
بدريه: هلا حمد..
حمد: شو بلاه حسج؟
بدريه: ضايجه شوي..
حمد يتنهد: منو اللي مرتاح..؟
بدريه: شو فيك اخويه..صوتك ضايج..
حمد: بدريه وين عبدالله.؟
بدريه بضيج: وانا شدراني.؟
حمد: اوكي عادي اييج البيت.؟
بدريه: لا تعال خذني احسن...
حمد: اوكي دقي لعبدالله وخبريه اني في الدرب ياي اشلج بس مب بيتنا..بوديج وياي الشقه..
بدريه مبتسمه: خلاص دقايق وبقوله...
بندت بدريه عن حمد واتصلت في عبدالله...اللي ما رد عليها..وطرشت له مسج..
"حمد ياي ياخذني وياه البيت..بسير اسلم على اهلي وبرد الساعه 10:00 "
رد عبدالله يتصل...
بدريه: اشوفك ما ترد..؟
عبدالله: مشغول عند الشباب..وين تبين انتي؟
بدريه: بسير لاهلي فيها شي هذي؟
عبدالله: ردي بسرعه لا تتأخرين..
بدريه: ان شاء الله..شي ثاني.؟
عبدالله: لاء ما في شي..
وبندوا عن بعض واتصلت لحمد تقول له ييها...وعقب ربع ساعه كانت جاهزه ويالسه في الصاله...
دخلت عفرا ويلست وياها...
عفرا: عمتي وين تبين ليكون راده دبي؟
بدريه: لا بسير بيت اهلي بسلم على امي واخوي..
عفرا: الله يخليج عموه لا تباتين عندهم..
بدريه مبتسمه: لا ما ببات عندهم ما روم اخلي عبادي بروحه...
عفرا مبتسمه: الله يخليكم لبعض..زين عمتي انا بس ييت اشوفج شوي..وبسير ادرس..فديت روحج ادعيلي...

كانت ساره واقفه عند باب المطبخ التحضيري وسمعت كلام عفرا وعمتها بدريه..ودمعت عينها...عفرا طول عمرها وحيده وطول عمرها هاديه..عمره انسان ما حاول يخترق وحدتها ويبني له عالم في عالمها..الكل يشوفها مريضه نفسياً..ومنعزله ومغروره..حتى هي ساره نفسها تتضايج من عمرها انها بنتها وما تقدر تسوي لها شي...بس الحين هي مرتاحه على الاقل بنتها بدت توالف بدريه وتقرب منها..وساره تعرف ان بدريه هي الشخص المناسب..وعمرها ما بتندم ان بنتها تعلقت فيها...يمكن من يدري ..تتخلص عفرا من عزلتها على يد بدريه..كانت ساره واثقه من هالشي وتعرف ان بدريه قدها وقدود...بس ما تدري ليش وايد أثر فيها الموقف..خصوصا يوم سمعت عفرا تتفدا بدريه..وهي اللي عمرها ما تفدت حد غير ابوها وبس...
دخلت ساره..وعفرا تحب بدريه على خدها..وابتسمت..ويوم انتبهت عفرا ان امها موجوده سارت ولوت عليها...وحست ساره بدفاها ولاول مره تحس ان عفرا قريبه منها لو انها ما رمست...
عفرا: امايه محتايه دعاءج...
ساره: الرب عالم شو في نياتي يا بنتي..والله اني مالي طاري غيرج انتي واختج..عسى ربي يسهل عليكن...
وطلعت عفرا...ويلست ساره ويا بدريه شوي...وعقبها وصل حمد وخذ اخته....وساره ردت بيتها...
........................
الساعه 7:00 يالسه في الصاله ملانه ما تعرف شو تسوي..ودخلت عليها سلامه وسلمت عليها ويلست حذالها..
سلامه بدلع: عمووه ملانه شو اسوي.؟
ليلى: لو ادري بحل مشكلة عمري اول..والله من الملل محد عارف شو يسوي...
سلامه وهي تلعب بشعرها: عمتي شو رايج نسير الصالون.؟
ليلى: ليش؟
سلامه: بصبغ شعري..
ليلى: ماله داعي لونه حلو حق شو تصبغينه...
سلامه: تغيير...
ليلى: انتي خبرتي ابوج عن النتايج..؟
سلامه: لاء ..بشوف لين اخر يوم في المدرسه..يمكن انجح من يدري؟
ليلى: والله اتمنى هالشي رغم انه شي شكله مستبعد على وحده لعابه...
سلامه: حرام عليج والله اني ادرس..
ليلى: وايد فديت روحج..الكتاب يشتكي من زود ما تقبضينه...
سلامه تبتسم...
ويدخل حمدان وراشد...
راشد: السلام عليكم..
ليلى وسلامه: وعليكم السلام..
راشد: شحالج ليلى..؟
ليلى: بخير فديت روحك..شحالك بو حمدان.؟
راشد: بخير ..بس وين امي وعايشه؟
ليلى: في بيت ام حميد..
راشد طلع من البيت وخلاهم..وحمدان سار يسلم على عمته...
حمدان: انا بس ييت اشوفج..وبسير الحين ادرس ما اقدر اضيع ثانيه...
ليلى مبتسمه براحه: علني افدا روحك..يالله سير ادرس ربي يوفقك..
سلامه حست بالغيره: وانا بسير ادرس بعد...
ليلى: يالله فديتكم سيروا ادرسوا واذا في أي شي صعب عليكم بس ازقروني وانا بييكم اسرع من البرق..
سلامه وحمدان طلعوا وخلوا ليلى بروحها في الصاله..حست بحنين فضيع لشيخه..وحست به اكثر يوم دخلت عليها شرملى...وكانت ملانه..
شرملى مبتسمه: ما يعرف شو يسوي..يدور يدور..ما في شغل..
ليلى مبتسمه: اصبري بس باجر وبتييج شواخي..
شرملى: حبيبتي هدي بنت..انا حبها كتير..
ليلى تتنهد: عيل شقول انا..؟
شرملى: من هدي حرمه يجي يشلها؟
ليلى: اخت امها...
شرملى: عوز بالله منها انا ما يحبها..
ليلى: عيل ما بترقد الليل لو درت انج ما تحبينها...
شرملى ما فهمت: ايوه ماما انا يروح الحين عند تاما يمكن يريد يسوي شي..
ليلى تتنهد: روحي...
وراحت شرملى وليلى مسكت تلفونها ودقت لحصه..صج ولهت عليها من قلبها واكثر ولهت على سوالفها وحنتها..وعلى شطانتها..تحس عمرها من زمان ما رمستها...ودق التلفون شوي وردت عليها..
ليلى: السلام عليكم
حصه: يا هلا والله وعليكم السلام..
ليلى: قبل انشدج عن احوالج..تراني ولهت عليج موت..
حصه: تولهت عليج العافيه..شحالج.؟
ليلى حست ببرود حصه: الحمدلله اخبارج انتي..؟
حصه: عايشين..شو تسوين؟
ليلى:ماشي ملانه ما اعرف شو اسوي؟
حصه: الجو يجنن برا ليش ما تروحين الحديقه ويا شواخي.؟
ليلى غمضت عيونها: هي محد..
حصه مستغربه: وينها.؟
ليلى: عند اخوالها...
حصه عورها قلبها وعرفت شو اللي صاير من اول امس لليوم..
حصه: فديتج وانتي كاتمه بقلبج ليش ما تقولين لي..مخلتني مثل اللوح ما اعرف شي..
ليلى تتنهد: خلاص انتهى الموضوع..(وردت ترمس بفرح) قولي من يانا اليوم.؟
حصه: منوه؟
ليلى: والله ما تتوقعين..
حصه: قولي عاد..
ليلى: خمني؟
حصه: عايشه...
ليلى: عايشه عندنا من يوم الثلاثاء..
حصه: عيل منوه ما فيني افكر قولي..
ليلى: ناصر..
حصه منصدمه: شووووووو؟
ليلى مبتسمه: اللي سمعتيه..
وخبرتها ليلى كل شي من اول كلمه لين اخر حرف..وحصه منصدمه مب مصدقه اللي تسمعه..وتمت تسولف وياها وعقب بندت عنها لان امها وعايشه وصلن وتبى تيلس ويا عايشه لانها بتروح عنهم باجر...
..................
الصاله كانت ازعاج لا يطاق..والضحكات واصله لين اخر البيت...والركض وصوت الحشره مب مخلي حد يسوي شي ولا يركز في أي شي...والكوره رايحه راده في ارجاء البيت...واخر شي الصوت اللي هز الصاله هز..هو صوت المزهريه يوم طاحت من فوق الطاوله في زاوية الصاله..بعدها دقيقة صمت..ارتعب فيها احمد...وشل شيخه وهي ميته ضحك وركض بها فوق ووقف على بداية الدرج من فوق وشاف فاطمه تدخل الصاله من المطبخ يايه...
فاطمه: احمد...
بس ما رد عليها..وكان ماسك شيخه وهي ميته ضحك..
احمد بهمس: اسكتي ولا بتضربنا فطوم...
شيخه بصوت عالي ومبطله عيونها على الاخير:انا ما ثويته انته كثرتها...
احمد: اخ منج ..فتّانه درجه اولى..وانا تحريت عمري بلصق التهمه فيج...ثرج مب هينه...
فاطمه تطلع فوق وشافته..وهو انفجر ضحك..
فاطمه معصبه: والله انك ما تستحي...يا احمد استح ع ويهك الصاله مب ملعب عيل نحن مسوين الحوش زينه..؟
فاطمه: الحين اطبخ ولا انظف الصاله واخم اللي كسرتوه..(ما عندهم خدامه بيتهم صغير وحالتهم الماديه مب لين هناك)....
احمد: اسف والله اخر مره...
فاطمه: اطلع وخل البنت في البيت لا تطلعها وياك...
احمد: ليش.؟
فاطمه: والله ودي تيلس وياي منقهره بصراحه منك..
احمد: يا بوج ناس عن ناس تفرق...
فاطمه: زين عطني اياها..
شيخه: ماليدث..
وتمت فاطمه تحاول فيها بس ما طاعت ولا رضت لها..وسمعت صوت امها تزقرها ونزلت لها...كانت ام احمد مشلوله..وعلى كرسي متحرك..وما تسوي شي بدون مساعدة بنتها فاطمه...وكانت ام احمد تزقرها تباها توصلها المغسله عشان تيدد وتصلي العشاء....وطلع احمد حجرته وشل شيخه وياه...اللي بدت تتثاوب تبى ترقد بعد نشة اليوم الصبح....ودق تلفونه...
احمد: يا مرحبا والله ومليون هلا سهلا...
الريال: حياالله بو الشباب..احيد انك رديت البلاد..هالكثر متوله على البيت ما تبى تطلع..
احمد مبتسم: يا بوك التزامات وتعرف اليهال وحشرتهم..
الريال: افا يا بو شهاب..تعرس ولا تعزمنا..؟؟
احمد: لا الغالي بعيد الشر بس بنت المرحومه ويانا في البيت ومنشغلين فيها نعودها على الجو...
الريال: الله يكون فعونكم...
وتم يسولف وياه وشيخه جدامه تتثاوب وهو يحط ايده على حلجها..واخر شي بند من عند الريال..ويلس على الارض جدامها...
شيخه: اتي ثو اثمث..؟
احمد: هاه؟
شيخه:من اثمث..؟
احمد ما فهم شي بس انتبه انها تسأل فقرر يعيد عليها نفس اللي تسأل ويشوف شو تجاوب..وبيفهم بهالطريقه شو تبى...
احمد: اتي ثو اثمث...؟
شيخه بدلع: ثواخي...
احمد عرف الحين انها تتخبره شو اسمه...
احمد: انا اسمي احمد...قولي خالي احمد..
شيخه: اهمد...
احمد: خالي احمد..
شيخه: حالي اهمد...
احمد يالس يطالعها وهي تبطل عيونها وتغمضهن تبى ترقد...وكسرت خاطره ورقدها على الشبريه...واول ما سدحها..ولحفها..نش بيطلع...يوم تأكد انها رقدت..
شيخه بصوت متقطع: تأاالي..
رد احمد..وانسدح على ينبه..لين ما رقدت...وعقب طلع عنها ونزل عند امه اللي من قلبه وله عليها وما صار يشوفها من كثر ما ييلس ويا شيخه..
....................

اختكم
الغلا

[البدوي الحبوب]

الحلقه الرابعه عشر


في الليل الساعه 10:30 كان يالس في حجرته يعابل في تلفونه يدور على الرقم بس ناسي بأي اسم مخزننه..ونش صوب الليت يبى يشوف الارقام عدل..بس بعده ما لقى الاسم اللي يبى...كان شبه مغمض عيونه ناسي بأي اسم حاطنه وعقب تعب طويل لقاه..
بو خليفه: هالريال عثره حتى اسمه مب لاقنه...
ام خليفه: منوه هذا..؟
بو خليفه: حامد..
ام خليفه: شو تبى به...
بو خليفه: لا ماشي بس ابغيه في سالفه عن الشركه..
ام خليفه وهي تتلحف: والله انكم ما تملون من هالسوالف...
بو خليفه: لو ملينا ما عشنا..من وين ناكل ونعيش لو ما انشغلنا بحلالنا..
ام خليفه: برايك يا مبارك سو اللي براسك انا مصدعه وبرقد..
بو خليفه: رقاد العافيه...
وطلع عنها غرفه صغيره مثل الملحق بس في حجرتهم..وصك الباب عشان ما تسمعه واتصل بحامد..بس ما رد عليه...
بو خليفه: وليش ما يرد مسود الويه...؟
وتم يدق عليه بس مارد..واخر شي مل بو خليفه ورد بيرقد..ويوم حط راسه على المخده..اتصل به حامد..ونش له بسرعه عشان ام خليفه ما تنش..وسار الحجره الصغيره في حجرتهم..وتم يسولف وياه ويتخبره عن احواله..ودخل له عقب بالموضوع..
بو خليفه: شوف يا حامد يا ولدي..جان حرمتك مقصره بحقك الله علي شاهد انها بتذوق العصا في ظهرها..بس انك تتبلى عليها تراك لا تعرفنا ولا نعرفك...
حامد: والله يا عمي مدري شو اقولك..ترا مهما سوت ومهما قصرت كله علي انا وانا ما برمس واشتكي لحد...بس انت تعرفني يا عمي عدل..ولا ما يوزتني بنتك....
بو خليفه: بارك الله فيك يا ولدي انا ما بلومك من الحين لاني سمعت الحرمه شو قالت ومب ماخذ على شور الحريم..وابى اسمع منك انت بعد عشان ما حط بذمتي واظلم حد...
حامد: عين العقل يا عمي ادري بك ما بتقصر ولا بتظلم...انت تشوف اللي سوته صح ولا لاء؟
بو خليفه: شو سوت؟
حامد: عمي مهما صار بيني وبينها ما يحق لها تطلع من بيتي بدون شوري..حتى لو ويا اخوها...مهما كان واستوى لو شربتها دمها...ما يحق لها انصاص الليالي تظهر من البيت..شو بيرمسون عنا العرب اللي حوالين بيوتنا...اللي ما شاف عبدالله بيقول وين طالعه حرمته نص الليل...؟ انا بسكت على كل شي الا السمعه انا مب ماشي ضدها اسمحلي يا عمي..
بو خليفه مفتشل وما عرف يرد: والله يا ولدي هي ما ذكرت لي الحزه اللي ظهرت فيها...
حامد مستغل الموقف: عاد انت وشورك جان يرضيك الناس ترمس في بنتك وريلها الشي راجع لك..
بو خليفه والنار تاكل قلبه: خلاص يا ولدي انا بتفاهم وياها وان شاء الله كل شي يرد مثل قبل واحسن...
حامد: على خير يا عمي...
بند بو خليفه من عند حامد اللي عرف من وين يلوي ذراع عمه..وكانن الكلمتين اللي قالهن مثل السم الزعاف على قلب بو خليفه...اللي افتشل من بنته...وصار موضوع طلعتها في الليل هو اللي شغل باله..ونساه ان بنته انضربت وان حقها ياخذه ريلها بارد وجاهز من دون لا تاخذ منه شي...نسى بو خليفه كل هذا وحط في باله الفضيحه اللي سببتها بنته بطلعتها ويا عبدالله اخوها في الليل....
استغفر ربه وطلع وسار بيرقد..هذا ان ياه رقاد وعزم بالباجر يرمس ويا سلمى ويتفاهم وياها على كل شي...
.......................
في نفس الوقت كانت في الصاله يالسه تشرب عصير..وتطالع التلفزيون...وتجلب مجله في ايدها يمين ويسار وملت منها...وشوي ويدش حمد من باب الشقه....هم في حقيقة الامر ما رمسوا عن شي بس من شافها يلسوا يستهبلون ولا ياب طاري أي شي في خاطره..حمد حس ان شكواه انكسار وضعف..وما حب يضعف لاحاسيسه لو لمره وحده ففضل الصمت.....
حمد: سوري غناتي..تأخرت عليج.؟
بدريه: والله بيت عمي ملل بشكل فضيع...عاد انت بيتك العن واشد...
حمد: سكتي لا افر الاكل فوق راسج...الملل ما يي بيتي ولا يدله...
بدريه: زين ايلس..
حمد يبطل الاكياس: اول مره بتعشى وياج من فتره ما تعشينا ويا بعض...
بدريه: الاسبوع اللي طاف كنت عندنا متعشي..يا حبك للخريط...
حمد يطالعها بنص عين ويحط لها الاكل جدامها...
بدريه: ما باكل وايد لازم ارد البيت قبل ال....(وطالعت ساعتها وشهقت)
حمد ونزل اللقمه اللي كان بياكلها: شو فيج؟
بدريه وهي تنش: حمود فديتك انا قلت لعبدالله اني برد عشر فديت روحك يالله رجعني والله ما فيني على الحشره روحنا متضاربين..
حمد مبطل عيونه على الاخير: يلسي لا اقوم لج الحين..وانا مب مازر عينج مب ريال تعتمدين علي..مخوفنج هاللي ما يتسمى..
بدريه: نش يالله فديتك... بعدين استعرض علي عضلاتك...
حمد: عيل والله ما تردين لين ما تتعشين وانا حلفت...ولا يمين ما ردج البيت وخلني اشوف شو يسوي عبود مالج هذا..وبغلق تلفوني وتلفونج..وبيسير بيت اهلي وما بيلاقيج وخلني اشوف لو قدر يمس شعره وحده من راسج..
بدريه زايغه ويلست بتتعشى: لا كثر الله خيرك..خلاص يلسنا بناكل..واحنا نقدر لتحديات حمد..خلنا جي فقارى..لان من تتفرعن علينا لازم نستسلم...
حمد: ايوه جي اباج ما تخافين وحمد موجود...
ويلست تتعشى بعباتها وهو يضحك عليها كيف زايغه...و بعد ما تعشوا ما طاع يوديها...
حمد: مب ساير من هني..
بدريه: ليش هذي انا تعشيت شو تبى بعد؟
حمد: بصلي العشا والله نسيت من سوالفج...
بدريه: يوم ترد صلي في البيت بروحك..
حمد: اسف الحين طرت على بالي الصلاة تبيني بعد أأجلها ليش؟ ناقص ذنوب انا...؟
بدريه وهي تتأفف وتيلس على الكنب: لا اله الا الله..
حمد مبتسم بخبث: والله بشوف شو تسوين..؟
بدريه: زين يا حمود اللي تييك مره ثانيه...والله ان ييتك مره ثانيه اطردني برا البيت ولا عطني كف..
حمد: محشومه طال عمرج ...مب اختي اللي تنضرب اقص ايده اللي يفكر ييها لو كان ابويه...
بدريه مبتسمه: فديتك ادري بك ريال وينشد فيك الظهر بس نش وصلني.؟
حمد وهو ساير صوب الحمام: تريي لين ما خلص صلاتي..هندي انا تقصين علي وتقولين لي كلمتين حلوات وتدهنين سيري عشان اوصلج..ماريد..
بدريه: ياهالنشبه..والله اني ندمت اني ييتك..يا حظي العاثر...
ورد حمد من مكانه اللي بيسير له...قبل يسير يتيدد..
حمد ضحك: فديت روحج يالغاليه اللي محد يسوى مواطيج..نشي بنسير والله ما تهونين علي...انا صليت في وقتي...يوم سرت برا من ساعه...بس حبيت اشوفج شو بتسوين...
بدريه مبتسمه: يا ثقل دمك يا حمد يالله بنسير...
وطلعت هي وياه وركبوا السياره وردوا بيت عمها....
.....................
نزلت بخطوات خفيفه للصاله تحت..تمشي على اطراف اصابعها مثل طفل يتعلم المشي..خفتها وسرعتها تمنع أي احساس يتكون في بال أي انسان..انه ممكن يكون حد متواجد في الصاله...شافت ليتات الجامات اللي على جهة الصاله مشغله..وعرفت ان امها بعدها في بيت يدها...وربعت للتلفون في الحجره المعهوده....حمدان يدرس فوق وهذي فرصتها وابوها بعده ما رد ....
دخلت الحجره ويلست على الكنبه مجابل الباب..عشان اول ما يتبطل باب الصاله تشوفه..مكانها استراتيجي..حتى تروم تشوف اللي ياي من فوق..لانه بيمر من الممر اللي فوق وبتشوفه وهو حادر تحت....دقت الرقم وتم يدق...واول ما رد..ابتسمت..
سلامه: يااااي والله استانست تحريتك ما بترد...
عبدالرحمن: وليش ما برد...بالعكس اترياج انا..اعرف ان امج هالحزه في بيت يدتج غاليه...
سلامه مبتسمه: هيه والله...
وتمت تسولف وياه...عن المدرسه والبنات والاولاد...
عبدالرحمن: يالله سلامي شدي حيلج..لازم تنجحين..
سلامه: وايد صعب المنهج شو اسوي.؟
عبدالرحمن: هاي فرصتج الاخيره...
سلامه بحزن: اذا ما نجحت ما روم اكون بصفك السنه اليايه...
عبدالرحمن: عشان جي لازم تشدين حيلج اكثر..ما بقى لنا غير هالسنه..وبعدها كل حد بيسير بدرب ثاني...
سلامه بحزم: والله بشد حيلي قد ما اقدر...
عبدالرحمن: هيه غناتي من متى نحلم ندش ثانويه عامه عشان نكون بنفس الكلاس..لا تخربين علينا...
سلامه بفرح وقلبها يدق بسرعه: اكيد والله بدرس من قلبي...
ومن كثر ماهي مندمجه بالرمسه..ما حست الا وحد واقف حذال الباب يطالعها.... وهي وقفت مكانها مبهته..لانها مبنده الليت...وما تبينت ملامح اللي واقف..بس جسم حرمه مب ريال...نزلت السماعه وشغلت الليت...
سلامه بقلة ادب: انتي شو تبين تتجسسين علي...؟ منو مطرشنج صوبي؟
ميرنا بإحتقار: بنت خايس...
سلامه ارتفع ضغطها: يا قليلة الادب والله انج ...(وعضت على شفايفها عشان ما تسب)..شو تقولين انتي؟
ميرنا مبتسمه ببرود: روح روح كلم ويا ولد..بنت مافي ادب...
سلامه ما تروم ترد عليها وبندت الباب في ويهها بقوه وردت ترمس عبدالرحمن وهي ميته من الغيض...
سلامه: والله بتشوف..
عبدالرحمن: طبيها شو تبين بها...الا هي بشكاره حبيبتي ما تنزل مستواها لهالاشكال..صح؟
سلامه مبتسمه وقلبها يدق بسرعه: اكيد...
عبدالرحمن: شو كنتي تسوين اليوم صوب كلاساتنا.؟
سلامه وتوها منبتهه: اووه عبادي بقولك شي...
عبدالرحمن: شو؟
سلامه: بسير ادرس الحين..وانت سير صوب كتابك العربي واقرا شي مكتوب ورا في اخر صفحه...
عبدالرحمن مبتسم: اوكي حبيبتي..يالله باي...
سلامه: باي عبادي...
وبندت عنه وهي مبتسمه..وطلعت فوق...وبطلت كتابها...كانت كاتبه فيه قصيده وبنفس الوقت نسختها لعبدالرحمن في كتابه..عشان يتذكرها كل ما بطل الكتاب.....وكان عنوانها...." تخّيل"


"تخّيل قمت اهوجس بك..وقت ما وزعوا الاوراق...وانا ادري من يجي طيفك يلخبط لي امتحاناتي...كتبت اسمك على الورقه..بدل ما اكتب اجاباتي..احب اذكرك وانسى الكل..تصوّر موقفي المحرج..!!!!...انسى المسأله والحل...مسكينه خويه لي..وعدت اني اغششها..عطتني اوراقها بسرعه...بشعري قمت اخربشها..قصايد حب لعيونك اطرشها...في الاحياء شفت سؤال عن الصرصور وتشريحه...كتبت الله ثم الله..لن ارضى بتجريحه..دخيل الله يا ابله..تخلي نفسه مريحه..دخيلج لا تهينونه...تخيلته يحب مثلي...خبله مدري مينونه...حتى اني دعيت الله..يرده للّ يحبونه...شفت اشلون يا خلي..خذاني الحب وجنونه..الا يا ساكن فوادي...انا اشهد امتحاني بوادي..وعقلي وفكري بوادي...بس عاد لو تييني كعكه حمرا في الشهاده..عندي الكعك الاحمر صار شي عادي

صكت سلامه كتابها وهي تتخيل شكل عبدالرحمن وهو يقرا اللي كتبته له..وايد مستانسه انها كتبت لها بيتين مركبين على بعض...وقدرت تكون شويعره..بس الاكيد ان مشاعرها تجاه عبدالرحمن كانت يوم عن يوم تزيد....
....................
في الليل الساعه 12:30 كانت بدريه تغير ثيابها بترقد..وتبى تصك الباب..بس تتريا عبادي..اللي ما رد للحين وهي تبى تدق له بس كبرياءها منعها..لانها زعلانه عقب الهزبه اللي سمعتها الظهر بدون سبب...وقررت تترياها بس بتسوي روحها راقده...وفعلا انسدحت...وتلحفت عسب اذا دش ما يحس انها للحين ما رقدت.....
.
.
في الصاله كانت حصه وسمر وسلمى يالسات يشوفن فلم اجنبي لقنه في غرفة ذياب ..بس كان عادي...وكل ما يت لقطه تصارخ حصه على سمر..
وسمر كانت اصلا كل ما يت لقطه مب زينه تحط ايدينها على عيونها...
حصه بعصبيه: سمر نشي ارقدي شو من بنت انتي نقولج عيب...
سمر: انا ما اشوف ما اشوف شو فيج؟
سلمى: يالله سمر اطلعي فوق..
سمر: ماريد اسير الحجره بروحي..
سلمى: ياهي مغثه هالبنت...
ويت لقطه واول ما شافنها..سمر حطت ايدينها على ويهها عسب ما تشوف...ونشت حصه معصبه..وسحبت الواير...
حصه: يالله جدامي يالعله يالله فقدت ويهج...
سلمى: متى بيي عبدالله والله بخبره عليها..
سمر ببرود: خبري..
حصه تذكرت: والله لو تموتين ما وديتج تشترين شي للمس اللي خبرتيني عنها..
سمر شهقت ونشت بسرعه: حصوه والله برقد خلاص والله..
وسارت تركض صوب الدري...وطلعت فوق..وحصه ردت تشغل التلفزيون...
سلمى: دواها..
حصه تعابل في التلفزيون: بنات ما يووون الا بالابتزاز...
ودخل عبدالله..وطالع في الصاله يدورها بعيونه بس ما شافها...
عبدالله: ليش ما رقدتن.؟
سلمى: ماشي رقاد...
عبدالله: وين بدوور..؟
حصه: مالها بارض تسهر ويانا وسارت ترقد...
وتمت حصه تحاول تشغل التلفزيون بس ما قدرت...
عبدالله: شو تسوين؟
سلمى: لا بس التلفزيون كان مبند ونبى نشغله...
وسلمى ترمس فجأه ظلم البيت وانطفت الكهرباء...بعد ما يلست حصه تتعبث في واير التلفزيون...
عبدالله: دواج خلي ابويه يخيس من الحر ويظهر لج الحين..
سلمى: بسم الله عبدالله ما نشوف شي سير شغلها...
عبدالله: حصوه سيري فوق اكيد اختج ميته من الخوف...
حصه بضيج: الله لا يبارك فيها كله بسببها هي...
سلمى: حصوه تصبحين على خير انا بطلع ارقد..حشى ما يسوى علينا نيلس نشوف مقاطع من الفلم..
حصه: اخوي عبدالله تصبح على خير...
وطلعن فوق..وعبدالله يحاول يشوف دربه يبى يسير يشوف عداد الكهرباء ويشغلها..وهو يتقبض في الكنب...طلعت بدريه حذال باب حجرتهم...
بدريه: عبادي اسمع حسك في الصاله...بعدك هني...؟
عبدالله مبتسم وتنهد: هيه انا هني وينج..؟
بدريه: وين بعد هني عند باب حجرتنا...ظلمه ما شوف شي..
عبدالله: تعالي..
بدريه: احلف؟ لا والله انا مادري كيف وصلت للباب بعدك تباني ايي للصاله عشان ما خلي شي ما ادعم فيه واكسره...
كانت بدريه ترمس وما حست الا وعبدالله واقف حذالها لاوي ايده على كتفها من ورا....
بدريه: بسم الله والله شعر ينبي وقف من الزيغه..
عبدالله مبتسم: فديتج هاي مب زيغه كثر ماهي شوق ووله..
بدريه تذكرت انها زعلانه: الحين انا بكون راضيه عليك لين ما تشتغل الكهرباء وعقب لنا حساب ثاني..
عبدالله (يحبها على خدها): اسف حياتي..
تخدرت بدريه واحمرت صدق: خلاص سامحتك..
عبدالله انفجر ضحك: فديتج يا اطيب قلب في العالم..
بدريه: مب اني سامحتك بالشكل اللي تبى..لكن عفوت عنك لطيب اصلي وكرمي..وانك وحيدي في الدنيا اللي ما روم ازعل منه..وما بعيش واشوفه الا مره وحده عسب جي بطنش بمزاجي..لا تتحراني ياهل وينقص علي...ولا ان كلماتك الحلوه ممكن تغير اللي في بالي..زعلانه يعني زعلانه...
عبدالله: اوكي حياتي اسف والله..
بدريه : زين سامحتك..يالله ندخل نرقد..
عبدالله: بسير اشغل الكهرباء وبرد..
بدريه: بسير وياك..
عبدالله: اوكي حبيبي..
وطلعوا مع بعض ورا الفله وشغلوها وردوا البيت ..ولا حسوا ان شي صار من بينهم..وتموا يسولفون شوي في الحجره..عقبها رقدوا علىطول..
....................
اليوم الثاني الفير ع الساعه 5:30 كان جرس البيت يدق...بس محد انتبه..يدق ويدق بس محد نش..رغم ان في ناس رقود تحت...بس ما سمعوا..
كانت جينا ناشه من الرقاد بتسير لباقي البشاكير توعيهن..لانهن اليوم بينظفن صوب الميلس مثل ما طلبت منهن ام خليفه..عشان ريلها عازم رياييل يايين من قطر يوم الاثنين وتباهن ينظفن الثريات والارضيات في الميالس...
في هالوقت ناتالي سارت المطبخ التحضيري بتسوي لها كوب شاي عشان يعدل مزاجها وتشتغل عقب..وسمعت صوت الجرس..واستغربت من الوقت وتحرته واحد من العيال رد من المسيد وتبند الباب عليه..او انه اكيد ذياب رد من برا.....و سارت بسرعه للباب...
ناتالي: من ؟
الريال: بيت مبارك بن خليفه؟
ناتالي: ايوه من يريد؟
الريال: بطلي الباب..
وبطلته البشكاره..وكان شرطي واقف عند الباب..
ناتالي: صبر دقيقه ينادي بابا..كلهم في نوم..
الشرطي: اوكي بسرعه...
وسارت البشكاره وهي زايغه..وفي الصاله شافت عبدالله لابس كندورته بيسير يصلي الفير...
عبدالله: شو فيج؟
ناتالي: في ريال برا يريد بابا مبارك..
عبدالله عاقد حياته: الحين؟
ناتالي:ايوه هو من ساعه يدق الجرس بس مافي حد بطل الباب..
عبدالله وهو يطلع: بسم الله الرحمن الرحيم...عوذ بالله..الاخبار الشينه ما تيي الا اخر الليل...والله ان السالفه جايده..
كان يرمس روحه لين ما وصل لباب البيت..ويوم شاف الشرطي غمض عيونه...وعرف ان السالفه اكيد فيها ذياب اخوه مسود الويه...
الشرطي: السلام عليكم ورحمة الله وبركاته..
عبدالله: وعليكم السلام والرحمه..
الشرطي: انت مبارك بن خليفه؟
عبدالله: لاء ولده ..ليش في شي؟
الشرطي: وينه هو؟
عبدالله: شو مستوي .؟ الوالد راقد وتعبان اللي تباه خبرني انا..
الشرطي: ممكن تتفضل ويانا لو سمحت..
عبدالله: خير ان شاء الله شو مستوي؟
الشرطي: ما اقدر اعطيك تفاصيل..انا ياييني امر لبيت مبارك..مب اعطي تفاصيل طال عمرك..
عبدالله تنهد: دقايق بشغل الموتر وبلحقك..
الشرطي: اوكي تعال قسم الشرطه في منطقة......
عبدالله: ان شاء الله..
ودخل عبدالله داخل البيت وتسفر ...ويلس حذال بدريه...ونشت...
بدريه بكسل: هاه عبادي رديت من المسيد.؟
عبدالله: بدريه انا بسير المركز ..
بدريه: أي مركز الساعه 5:00 الفير.؟
عبدالله: مركز ابويه...أي مركز الله يهديج..بسير مركز الشرطه..
ويلست بدريه ميته من الزيغه: شو مستوي؟
عبدالله: حبيبتي ما اوصيج على ابوي ما فيني ينجلط ولا يوقف قلبه..لو نش الصبح قولي عبدالله سار ويا واحد من ربعه مصفح عشان سياييرهم ..
بدريه تمسكت في ايدينه: والله ما تروح لين ما تقولي شو السالفه..
وخبرها عبدالله كل اللي صار...وتأكدت هي ان ذياب ورا الموضوع..ودعت لريلها الله يوفقه ويحميه من كل مكروه..وعقب يلست في حجرتها ماياها رقاد..وعبدالله سار المركز اللي نعته له الشرطي....
وصل عبدالله المركز..ومثل ما توقع شاف ذياب هناك..وبعد الاستجواب والتحقيق والاسئله...ارتفعت اوراق اثنين من ربعه للمحكمه...وهو تم على ذمة التحقيق لين التأكيد على الجرم المتهم به....
عبدالله: زين هو شو مسوي؟
الضابط: والله يا خوي مدري شو اقولك..الشباب ضاعوا وبيضيعون البلاد وياهم...
عبدالله: هو هذا اخويه شو مسوي؟
الضابط: حد يمتشى اخر الليل ..؟؟ بصراحه في دوريات مسكتهم نص الليل يتمشون واشتبهت بهم..وتمت تراقبهم..وللاسف صار اللي صار..
عبدالله منقهر: بس عشان يتمشون؟
الضابط بحزم: وكاسرين جامات سياره ومستولين على اللي فيها...بيزات وبطايق البنك..
عبدالله انصدم..وطلب انه يشوف اخوه...يدري مهما وصلت نذالة ذياب مستحيل يمد ايده على فلوس حد او انه يفكر مجرد التفكير انه يسرق..ذياب عنده كل شي وابوه ما يقصر عليه مستحيل يسرق والسالفه فيها ان...وعقب ما يابه الضابط طلب عبدالله منهم انه ينفرد ويا اخوه...
عبدالله منقهر وخاطره يصفعه: ذيابوه شو مستوي؟
ذياب منقهر اكثر: عبدالله والله ما يخصني والله...هم اللي سووا كل شي وحذرتهم بس ما سمعوا رمستي..
عبدالله مستغرب: ذياب..انت تمد ايدك..شي قاصر عليك..؟ ليش ما تخبرنا..
ذياب يطالع في عبدالله بتوسل: عبدالله دخيلك طلعني من هني ورفجة ابويه ما سويت شي..بس عشان كنت وياهم شلوني..والله ما سويت شي..
عبدالله: لا يا ذياب مب الشرطه اللي مني والدرب تظلم حد...انت شوهت سمعتنا..ويبتنا المراكز ونحن ما نعرفها...بس قلبي ما يعورني عليك...تدري ليش؟؟
ذياب من قهره يتأفف: ياربي بغيتك عون طلعت لي فرعون...
عبدالله بتحسر: يا خوفي عليك يا بويه..بس والله يا ذياب لو استوى في ابوي ولا امي شي والله..اسمعني وانا احلف...لا اخليهم يحبسوني انا بدالك هني..بتهمة جتلك...
ذياب: عبدالله الله يخليك افهمني والله مالي خص...
عبدالله: تستاهل ما ياك..ياما قلنا لك ابعد عنهم..يا ذياب الرسول قالها قبل..."المرء على دين خليله فلينظر احدكم من يخالل" وقالوها في الامثال"الصاحب ساحب"..اللي تشوفه الحين من فعايل ايديك..وهذا اللي زرعته احصده..الله يهنيك في حياتك..والله ما شغل بالي غير ابويه..وين بيودي ويهه من الناس..
ذياب بعصبيه: عبدالله والله ما يخصني والله..شو فيك..من متى انا امد ايدي على بيزات حد...؟
عبدالله: ما ينفع الندم..خلاص ماياك اتحمله..حتى لوانت ما سويتها..ولو انا صدقتك الناس ما بتصدقك...تراك من يومك عاصي وقليل طاعه..شو تبى ربي يوفقك..؟؟ اكيد لاء..احصد ما زرعت...
ذياب وعيونه تدمع: دخيلك اخوي ظهرني..والله مابا اسهر برا البيت مره ثانيه..واحرموني من مصروفي..وشل الكمبيوتر من حجرتي..واقطع عني النت..واحبسني في البيت...والله ما بزعجكم بس طلعني من هني...
عبدالله: ما يفيد ما يفيد...خلاص طاح الفاس بالراس.. الحين عاد يوم يفوت الفوت .. ما ينفع الصوت
دموع ذياب تيمعن في عيونه...ودخل الضابط وطلع عبدالله من عنده..وخبره وقت المحاكمه..وقال له ان ولي امره لازم يكون موجود....وردوا ذياب السجن وبيتم على ذمة التحقيق 12 يوم..وبعدها ترفع اوراقه للمحكمه..

الصبح نشت وسارت للحوي ويلست على الزرع متملله..ما تعرف شو تسوي...وبطلت باب البيت وطلعت في الزراعه الخارجيه ويلست تطالع الشارع..ويتها تينا ووقفت حذالها...
تينا: شو يسوي؟
شرملى بحزن: مافي شغل..ما يعرف شو يسوي؟
تينا: تعالي يسير بيت بابا راشد..يشوف ميرنا..
شرملى بعصبيه: انتي روح بيت بابا راشد شوف ميرنا..انا مايريد..انت وهي سيم سيم بلاد..انا مسكين ما يعرف انتوا شو يقول...
تينا: خلاص ما يروح..انا بروح الحين ينظف الصاله...
ودخلت وياها شرملى وشافت ام راشد في الصاله تتعبث بالريموت تدور قناة المجد بس مب عارفه وينها...
ام راشد: شرمله
ضحكت تينا وسارت المطبخ وشرملى سارت لام راشد وهي مبتسمه..
شرملى: ماما انا اسمي شرملى مش شرملة..
ام راشد: عاد من زينه الحين بتعلميني شو هو..تعالي سوي لي قناة مدري وش اسمها..بس فيها قراءن..
شرملى تعابل في الجهاز: ما يعرف ماما انا ما يشوف تلفزيون...
ونزلت عايشه من فوق وسلمت على امها وحطت لها قناة المجد...ويلست وياها في الصاله لين ما يحطون لهن الريوق...
ام راشد: ما نزلت ليلى؟
عايشه: لا امايه شكلها ما رقدت امس..
ام راشد: ما اتصل لج ريلج؟
عايشه: توه متصل من ساعه يقول انه واصل بوظبي قبل الظهر ..
ام راشد: بتروحين؟
عايشه: هيه امايه لازم اسير عيالي وراهم مدارس باجر..وابى اشوف بيتي..
ام راشد: الله وياج غناتي..ولو ان ما شبعنا منج..
عايشه: ان شاء الله اييكم جريب...
ام راشد: على الله يا بنتي...
.
.
وفي حجرتها نشت ليلى بكسل..وتحسست حذالها..بس نست للحظه ان شيخه مب في البيت..وقبل تبطل عيونها عدل اختفت ابتسامه عذبه ارتسمت على شفايفها لمدة ثواني..وتمت منسدحه على الشبريه وغمضت عيونها..بس ما رقدت وتمت تفكر..باجر بتروح الدوام..وبتشوف ناصر..
"ناصر فديته..والله اشتقت له موت..مب مصدقه اني شفته امس..كان مثل الحلم..."
ابتسمت وردت تفكر بكل شي صار وتستعيده من يوم يتها ام راشد وقالت لها ولد عمتج في الميلس..لين الكلمه الفاصله..
"اخت العروس"
احمرت خدودها وهي تتذكر وابتسمت وقلبها يدق بسرعه..بسرعه..ما قدرت تتمالك نفسها..ولوت على مخدتها بقوه..وهي مبتسمه من الخاطر..ونشت..بتسير تيلس ويا عايشه قبل تسير ..تعرف انها اكيد بترد اليوم العين..وقبل تنزل سارت لمكتبها..وشافت اوراقها متبعثره يمين ويسار..وابتسمت وهي تيمعهن على بعض..ويت في بالها حصه..بعدت وايد عنها هاليومين ..وكثير ناس تحبهم بعدوا عنها...
"يعني ناصر يقرب مني..وفي ناس وايده تبعد..حصه وشيخه وعايشه اختي وسلامي وحمدان..والعكس يوم ناصر يبعد يكونون كل هذيل حواليه...ما شاء الله عليك يا ناصر يا ولد عمتي..مبدأك خالف تعرف..مدري والله خافك الا نحس علي وانا مدري"
ضحكت وهي تتخيل شكله لو يسمع هالرمسه..اكيد بيحرج عليها...وقبل تبطل باب الحجره انتبهت على ثوبها العيناوي اللي معلق ورا الباب..وابتسمت من خاطرها....وهي تتذكر ناصر يوم يطالعها بنص عين..يوم لبسته...ونزلت تحت بتيلس ويا امها وعايشه...
الساعه 9:30 اتصل في اخوه عشان يلاقيه في الوكاله..يبى يشتري له سياره يديده...
فهد: ناصر اقولك لا تيي من صوب الجسر الاخير..
ناصر: عيل من وين ايي؟
فهد: لا تيي من صوب منطقة ساس النخيل...تعال من ورا الوكالات...
ناصر: وليش اتعب عمري والف كل هاللفه..بيي من صوب بقعه ساس النخيل..
فهد: يا ولد الناس بلى معاند شفيك على الصبح عله على القلب...الشوارع كلها مبنده..في ناقلة نفط منجلبه على جسر ام النار..والشوارع زحمه وللحين ما خمدت النار..
ناصر: اوكي بييك من ورا وكالة بن بروك...
فهد: لاء...تعال من شارع ادنوك...
ناصر: والعثره..مب ياي من هناك..
فهد: ياخي احترق يبت لي المرض تعال من أي درب..
ناصر: اوهووه الحين من وين ايي انا عند منطقه ساس النخيل والشوارع مبنده..
فهد: تستاهل قلت لك تعال من شارع ادنوك..
ناصر: اوكي خلاص...
فهد: بتتأخر.؟
ناصر: ربع ساعه وانا عندك..انت من متى هناك..؟
فهد: من عشر دقايق...
ناصر: خلاص شوي وانا عندك..
وبند فهد من عند ناصر ويلس في موتره يتريا اخوه يي...ويت في باله عايشه....
"معقوله بعدها للحين في بوظبي؟؟"
وشغل الاف إم وكانوا حاطين اغنيه تلوع بالجبد..وبندها ويلس يعابل في الاشرطه يدور على شي يسمعه بروحه....
وحط شريط جديم وجديم وايد...عبدالمجيد عود بعد...واستطرب الاخ وهو يسمعها..كانت هاديه بدرجة الهدوء الخارجي اللي يعيشه فهد..
حارقه بدرجة الشوق اللي في دواخل نفسه..كلماتها وايد قويه..ودقة العود عنيف وقعها على مسامعه..تتخلل مسامات وخلايا قلبه....وتلامس واقعه..وتشابه ظروفه....اتسند على السيت وغمض عيونه..ويلس يسمعها بكل هدوء...
"إستكثرك وقتي علي وغدا بك...عادة زماني كل ما طاب هوّن...ليت الذي وداك يا زين جابك تشوف عقبك كيف الايام سوّن..شرق مشيت وغرب وقتي مشى بك..والقلب ماله لايم فيك لوّن..طويتني طي الورق في كتابك ..حتى معاليق الحشى لك تطوّن...اشتقت لايام الهوى في جنابك..يوم الشموع بليل الاحباب ضوّن..واشتقت اقول لهاتفك مرحبا بك..واشتقت لغيوم الصحاري تكوّن...عوّد ترا داعي الهوى عند بابك..واروي القلوب اللي بعد ما تروّن...غنيت لك عمري ولا جا جوابك..واسمي مع مجنون ليلى تدوّن..."


خلصت الاغنيه..وابتسم فهد وتم يعيد فيها ويتسمع في مقاطع بسيارته لين ما دق له ناصر..وقال له انه واقف وراه وانه يباه ينزل وياه الوكاله..ونزل ناصر وشاف اخوه وساروا عشان فهد يشتري له السياره اللي يبى...وبعد ما خلصوا شغلهم طلعوا رباعه...وساروا بيتريقون من فطاير الخليج...
وعقب ما تريقوا ردوا البيت كلهم مع بعض..ونزلوا من سياييرهم..وساروا على طول غرفة ناصر..يالسين هناك...
ناصر: انت ما سرت امس بيت خالي؟
فهد: امبلى ما قلت لك؟
ناصر: خل عنك الخريط وارمس جد...واحد من اثنين يا انك جذاب يا عايشه بنت خالي جذابه..
فهد: وانت وين شفت عايشه..؟
ناصر مبتسم: امس رحت بيتهم..
انفجر فهد ضحك...
ناصر يطالعه بنص عين: ما عليه اضحك..عيل والله سرت والله...
فهد: زين زين اسكت الله يخليك..ونه راح..
ناصر: برايك والله ويلست ويا البنات كشخه ردينا لسوالف اول..
فهد: وين راشد؟
ناصر: مادري به بس ما شفته...
فهد بدا يصدقه: زين متى سرت.؟
ناصر: الصبح وابويه راقد..
فهد: مقواك..
ناصر: وانت سرت قبلي بس ليش ما نزلت..؟
فهد مبتسم: شو رايك نروح اليوم؟
ناصر: يالله اطلع برا خلني ارد اكمل رقادي لين صلاة الظهر..ونه قالي بنسير اليوم..انا ما ادري كيف سرت هناك..بعدني مب مصدق اني سويتها..
فهد: ما عليه يا نصوور..
ناصر يضحك: على فكره عايشه امس تقولي ليش ما يبتوا فهوود.؟
ضحك فهد: بعدها على فهود ونصور.؟
ناصر يتلحف: هيه ..بند الليت وصك الباب..
فهد: بترد ترقد..والله انك متفيج..
ناصر: زين اطلع..
وطلع فهد عن ناصر اللي رد يكمل رقاده...وفهد سار حجرته بييلس شوي وعقب بيسير يسبح عشان صلاة الجمعه..
.................
الضحى نش وطلع الصاله يشوف امه واخته وييلس وياهن شوي...وكانوا كلهم في الصاله...
فاطمه: احمد بنسير الجمعيه شو رايك؟
احمد مبتسم: عدتج بنت اختج؟
فاطمه: لا صدق..بنسير ماشي اغراض في البيت..
احمد: من وين اييب فلوس...
فاطمه: ما عليك عندي...
احمد: من وين.؟
فاطمه: من معاش ابوي..
احمد: اها..
ام احمد: ما لقيت لك شغل يا ولدي..
احمد: لا امايه والله للحين ماشي..بس ان شاء الله الاقي..
فاطمه مبتسمه بحنان: ان شاء الله يا احمد بتلاقي قريب والله بيفرجها..
ام احمد: الا وين شيخه؟
فاطمه: البنت ما تبى غير احمد ولدج ونحن عايفتنا...
احمد مبتسم: فديتها يا امايه والله خبلت بي...
ام احمد: عرس وبتييب وحده لك محد ينافسك فيها وجان تبى الله بيعطيك اكثر عن العشر..
احمد: لا وين اعرس الحين الله يهداج يمه..منو بترضى بريال بدون شغل..فقير حافي منتف شراتي..
تضحك فاطمه...
ام احمد: الرياييل مخابر يا ولدي هب مناظر..
احمد: صح كلامج بس بعد الحياة الزوجيه مهي بذيك السهوله اللي تخليني اتحمل تكاليف العرس وتكاليف اسره يديده..
فاطمه : يوم تشتغل ان شاء الله بتحصل الحرمه الزينه...
ام احمد: خلاص يا احمد توكل على الله ودور لك شغل..والحرمه خلها علي انا مختاره لك وحده بتعيبك ان شاء الله...
احمد مبتسم: قولي جي..انج مختاره من اول..
ام احمد: لاوالله يا ولدي بس طاحت عيني عليها وقلت يستاهلها احمد..بنت ناس وعرب حشام..
احمد: منو؟
فاطمه: افا امايه نحن ربع ولا تخبريني.
ام احمد: لا يا احمد هب قايلتنلك الا يوم تلاقي لك وظيفه..
احمد: على خير ان شاء الله وانا واثق في ذوق امايه...مع اني وحيدج وما جد خطبتي لحد بس بعد ادري انج ذويقه...
ام احمد: نشي فاطمه يا بنتي وهاتي لنا الريوق...
فاطمه تنش: ان شاء الله يمه..وانت يا احمد سير شيك على حبيبة القلب شفها نشت ولا بعدها...
احمد مبتسم: امايه بسير شوي فوق اشوفها نشت شواخي ولا لاء...
وطلع احمد فوق وتمت ام احمد في الصاله بروحها...ويوم وصل فوق سمع صياح شيخه شال الطابق الثاني كامل...
ودخل الحجره واول ما شافها لقاها يالسه على الشبريه تصيح..وعيونها منترسات دموع...
احمد يشلها: حبيبة قلبي فديتج..
شيخه: اليد اليد..
احمد بطل عيونه: اشهد ان لا اله الا الله..
شيخه: اليد ماما..
احمد ابتسم: فديت روحج يالله تعالي نروح عند يدووه...
شيخه تصيح: ماليد..اليد امي..
احمد: زين شواخي بنروح الجمعيه..اقصد الدمعيه..
شيخه: مابا اليد ماما...(وصاحت بصوت اعلى)..
احمد: لا الظاهر الموضوع خارج نطاق السيطره...تبى امها ومعزمه البنت..لا دمعيه ولا غيرها بيثنيها عن الموضوع...
شيخه تصيح وما طاعت تسكت...وحاول فيها احمد ونزلها تحت وتمت ضايجه وكل شوي تسكت وترد تصيح..
ام احمد:تعالي يا بنتي تعالي عندي..
شيخه: ماليدث..

ام احمد بحنان: تعالي شوفي ريلي تعورني ما روم انش لج..
احمد يهمس لشيخه: روحي عند يدوه..شوفي ريلها تعورها..قولي لها من عورج؟
طالعتهم شيخه وهي مبطله عيونها على الاخر ومن بين الدموع: عولث؟(يعورج)
ام احمد: هيه يعورني تعالي شوفيه؟
نشت شيخه وحطت ايدينها على ريول يدتها: هني؟
ام احمد: هيه..
شيخه وعيونها مبطله على الاخر: من عولث؟
ام احمد: كنت وايد اصيح وما اسمع الرمسه وعورتني ريولي..
احمد مبتسم..
شيخه: في وحث عندكم..عولث..
احمد انفجر ضحك: اميه تقول ان في وحش عور ريولج..
ام احمد مبتسمه: تعالي يلسي عندي هني..
ويت شيخه ويلست حذال يدتها اللي ماده ريولها..وما تروم تمشي...وقعدت تطالعها وهي مندهشه...تبى تلمس بس زايغه...
شيخه تبطل ايدينها على اخر شي: في بيتنا وحث كبيل..
ام احمد يلست تسولف لها وتحكي لها حكايه من حكايات اول..وتمت شيخه تطالع يدتها بغرابه..وانها ما تروم تمشي بس تعرف تتكلم..الحين شيخه جدام مخلوق يديد بدا يدخل حياتها بس بطريقة مختلفه عن الكل...
وبعد فتره قصيره دخلت عليهم فاطمه يايبه الريوق وياها وتريقوا كلهم ويا بعض بدون ما تزيغ شيخه من حد..بس بعدها للحين ما والفت خالتها فاطمه...
.......................
رد عبدالله البيت مثقل بالهموم ...رغم انه ما رمس ويا حد حتى موبايله اغلقه من حرقة قلبه على ابوه..اللي بيروح فيها لو درا بالخبر...واول ما حدر البيت شاف خليفه يشغل الموتر بس شكله ما بيظهر من البيت...ولا سلم عليه ودخل الصاله على طول..ولحقه خليفه ودخل وراه..
خليفه: بو حميد..
عبدالله: يا عونك..
خليفه: عانك الله..شو فيك؟
عبدالله تنهد: ماشي يا خليفه..تعال شوي الحجره ابغيك...
خليفه: أي حجره؟
عبدالله: حجرة الطعام...
وساروا ورا بعض...بس شافوا البنات كلهن هناك عشان جي ظهروا قبل يشوفنهم...وركبوا موتر خليفه ويلسوا فيه...
خليفه: ارمس شو فيك..
عبدالله: ابويه مدري شو اقوله؟
خليفه: شو مستوي؟
وخبره عبدالله كل السالفه..وانصدم خليفه صدق محد كان يتوقع ابداً...وتناقشوا بالموضوع وفعلا صعب عليهم الموقف وكيف بيخبرون بو خليفه وحالته الصحيه مب لين هناك لا هو ولا الوالده..وكانوا متأكدين مليون بالميه انه واحد فيهم لازم يستوي عليه شي يالوالد يالوالده..وتوكلوا على الله وقرروا يفتحون السيره ويا بو خليفه عقب العصر.....ونزل عبدالله ورد البيت كان صدق تعبان ومرهق وراسه بينفجر من الصداع...ودخل حجرتهم وسبح وسار ينسدح على الشبريه..بس ما رقد لانه حط في باله صلاة الجمعه....

دخلن البنات الصاله سمر وسلمى وبدريه وحصه وام خليفه وحمده وساره..ويلسن يسولفن وعقب نشت عنهن ساره بتسير تساعد وتشرف على الغدا...
وحمده تمت عندهن...
سمر: وين ابويه؟
ام خليفه : سار الزرع خاري شو تبينه؟
سمر: ولا شي بس نبى نيلس وياه شوي؟
سلمى: ولهتي عليه؟
سمر: هيه ولا حرام بعد..
سلمى: هيه بس انا ترومين تردين علي..بعض الناس يقطعونج ما ترومين تبطلين حلجج..
سمر: كيفي.
حصه: ناس عن ناس تفرق يا شيختنا سلامي...
حمده: عمتي سلمى ما خبرتج..
وقربت سلمى من حمده ويلسن يسولفن كانت سلمى قريبه وايد من حمده وتحبها لان حمده ربشه وسوالف..شرات عمتها...وبدريه كانت ساكته ما ترمس على غير عوايدها...تدري بكل شي بس كاتمه في قلبها..تخاف وتفكر شو بتكون ردة فعل بو خليفه وام خليفه عقب ما يدرون اللي صار على ولدهم...وهي في غمرة سرحانها دش خليفه...
خليفه: حمده وين امج؟
حمده: سارت المطبخ اللي برا بتشوف الغدا...
خليفه: نشي ردي البيت..ما وراج السبت الياي امتحانات...
حمده: ابويه.....
خليفه: ارمس مره وحده ردي البيت حمدوه..
حمده: ان شاء الله ابويه..
الكل لاحظ انفعال خليفه بس محد رام يتدخل..بنته وهو حر فيها.....
خليفه: بدريه وين عبدالله..
ارتبكت بدريه: ما شفته من الصبح قال بيسير مصفح ويا ربيعه سيارته مادري بلاها..
خليفه لاحظ ويه بدريه المرتبك: زين خلاص..بس موتره هني..
نشت بدريه وسارت حجرتها على طول وخليفه طلع ساير فلتهم...واول ما بطلت الباب شافت ريلها منسدح ومغمض عيونه...وقفلت الباب بالمفتاح..وسارت بسرعه يلست حذاله..وما رمست تتحراه راقد..وغصباً عنها دمعت عيونها...ومسحت على شعره..وهو بطل عيونه...
بدريه تمش دموعها: سوري حبيبي وعيتك...
عبدالله بتعب: لا فديتج مب راقد وراي صلاه..بس مسترخي راسي مصدع...
بدريه تهمز له راسه: فديت راسك حبيبي ليت الويع فيني ولا فيك..
عبدالله مبتسم بحنان: في العدو ان شاء الله..
وردت بدريه تدمع ودموعها تطيح على خدودها....
عبدالله بتعب: فديتج بدريه ليش هالدرر يطيحن مافي شي يستاهل..ان شاء الله الموضوع يعدي على خير...
بدريه تصيح: خايفه على عمي وعمتي...
عبدالله يبلع ريجه بخوف: الله يكون في عوننا...
بدريه بحزن: ليش لازم نتكدر ويينا الضيج..
عبدالله تنهد: اختبار يا غناتي واصبري لين ما الله يفرجها..
بدريه: ليش هالعيال ما يحسبون حساب اهلهم قبل يسوون أي شي..؟ ليش ما يفكرون بوالديهم لا تحترق قلوبهم عليهم...ما يفكرون كم لحظه تعبوا وكم لحظه شقوا في حياتهم..الحين هذا الجميل اللي يردونه..؟
عبدالله تنهد: ما عليه الله كريم..زين حبيبي بقولج شي...
بدريه: هلا غناتي ..
عبدالله: ولهت على سوالفج وعليج اكثر..
بدريه مبتسمه بخجل من بين الدموع: متفيج والله...
عبدالله مبتسم: يالله متى نرد دبي..ونيلس في بيتنا انا وانتي بروحنا..بدون مشاكل ولا صدعه ولا تفكير..بس انا وانتي ...
بدريه: لا حياتي بنيلس عند اعمامي شوي اخاف شي يصير ولازم نتم عندهم هالفتره..
عبدالله: اللي تشوفينه حبيبتي...
ونشت بدريه تجهز الحمام لريلها عشان يسبح..ويلست تجهز له ثيابه وتدخنها ...عشان الصلاه....
...................
العصر وعقب ما نشوا كلهم من رقاد الظهر..يلس عبدالله ويا خليفه واتفقوا يرمسون ابوهم هاللحظه ويتوكلون على رب العالمين واللي مكتوب في كتاب ابوهم ما بيقدرون يردونه....وساروا له حجرته ويلسوا وياه شوي...يسولفون ويضحكون...
بو خليفه بتعب: بغيت ارمس اختكم سلمى نش يا عبدالله ازقرها لي...
عبدالله في خاطره"من وين ولا وين بتلاقيها يا بوخليفه"
خليفه: لا ابويه خلنا من سلمى الحين بغينا نرمسك في سالفه شوي اهم..
بو خليفه يحاول ينسدح على الشبريه بس مب رايم خلاص ريال كبير وتعبان والله يكون بعونه..
بوخليفه: ارمس يا ولدي..
ونش عبدالله يعدل له المخدات حذال ظهره وعلى ينبه..ويعدل مكانه...
بو خليفه: بارك الله فيك يا ولدي..
خليفه: ابويه بغينا نرمسك عن ذياب..
بو خليفه قلبه عوره شوي: خله ذياب انا لا راضي عليه لا دنيا ولا اخره وما بيشوف خير طول ما هو على هالحال..
عبدالله: لا يا بويه ذياب صغير ومالنا غير رضاك لا تدخل سخط الله البيت...
بو خليفه: عيل في ولد ما يي يشوف ابوه ولا يسلم عليه ولا يدل بيته..شو بتقول عنا الناس...
خليفه: يا بويه الله يهديك ذياب حاله من حال هالشباب الطايشين ما يعرفون كيف يتصرفون...
بو خليفه منفعل: لا بارك الله فيه وانا مب راضي عليه لين ما تقوم الساعه...
عبدالله يهمس: عيل كيف لو عرف..
خليفه: الحين السالفه تعقدت..
عبدالله يتنهد: ارمس يا خليفه..
خليفه: ابويه ذياب اخوي من الفير في المركز..
بو خليفه: طول عمره يالس في هالمراكز ما يظهر منها..ما ادري وش يعطونهم هناك..ما يفارجون البقعه..
خليفه قلبه عوره على عفوية ابوه: ابويه مب مركز التسوق..ذياب مسجون في مركز الشرطه...
بو خليفه انصدم وما عرف بشو يرد وحاول ييلس وما قدر ونش له عبدالله يساعده: ابويه استهدي بالله وكل شي بيعدي على خير...
بو خليفه: مركز الشرطه؟؟ أي خير يا بو حميد..أي خير.؟
عبدالله: صحتك يا بويه الزم ما عليك..لا تيهد عمرك وان شاء الله خليفه بيقوم باللازم...
خليفه: ابويه خلها علي وانا ان شاء الله بطلعه اليوم ولا باجر...
عبدالله: ما عليك ابويه اهم شي انك ما تيهد عمرك وذياب بيطلع ولا حد بيدري...
بو خليفه تم ساكت وما قال ولا كلمه....ونش عبدالله وخليفه واحترموا صمته وطلعوا برا...وام خليفه اول ما شافت اشكالهم متضايجه وهم طالعين دشت عند ريلها بتشوف شو فيه.....

كانت بدريه تطالع عبدالله اللي ما انتبه لها ووقف متسند حذال وحده من الدرايش..وخليفه يلس على الكنب..ومحد كان في الصاله الا حصه تشوف التلفزيون..وعقب طلعت فوق...وسارت حجرتهن...وشافت سمر ترسم في دفتر الفن...
حصه: سمر نشي لو تبينا نسير كارفور..
سمر عقت الاقلام: قولي والله؟
حصه: والله يالله نشي البسي..
وقامت سمر ولبست بعد ما خبرت حصه امها وخذت الاذن...وهن نازلات في الصاله..شافهن خليفه..
خليفه: على وين؟
سمر: كارفور..
حصه: مستأذنات من امي..فيها شي بعد..
عبدالله:دشن داخل مب وقت حواطه عندنا من المشاكل اللي يمنعكن تظهرن السوق..
حصه: يا سلام وانا شدخلني في مشاكلكم حلوها بروحكم..
سمر: هيه والله انتوا سووا المصايب ونحن نتحمل العقوبات...
نش لهن خليفه محرج..وشردن كلهن فوق الدري...
سمر: والله عبادي خلنا نروح شي ضروري..
خليفه: خلني اشوف وحده فيكن شبرت برا البيت...
حصه: شو هالظلم عافانا الله...مستأذنين من امايه شو خصكم انتوا؟
خليفه: يوم تذلفين بيت ريلج ارمسي..ما دمتي هني تمشين كيف ما نباج تمشين..
عبدالله يكلم خواته بهدوء: سيرن فوق فديتكن عندنا كم شغله مهمه وان شاء الله باجر انا بوديكن..
سمر: فديتك اخوي الله لا يحرمني منك...
حصه:ايوه سيلانيات يقصون علينا بكلمتين حلوات...
وطلعن فوق محرجات ويتحرطمن على اخوانهن الشباب....
وشوي ويسمعون بو خليفه يزقر عبدالله ودخل بسرعه عند ابوه اللي كان ضايج وكل حزن الكون في عيونه...
بو خليفه مب رايم ينش من على الشبريه: شوف امك يا عبدالله تعبت عقب ما خبرتها السالفه...
عبدالله لف صوب امه وكانت تتنفس بصعوبه وشكلها دايخه..ودمعت عينه وقرب منها...
عبدالله: امايا فديتج لا تشغلين بالج..قريب وبيطلع الا هو اشتباه مب جرم مؤكد..
خليفه حس بضو داخل قلبه وقرب من امه بس ما رام يرمس..
ام خليفه: يا فضيحتج يا عايشه بين الناس..وين بودي ويهي من خلق الله اللي بتاكل فيه..ليش يا ذياب يا ولدي ليش..؟
عبدالله: امايا خلي الناس تولي شو نبى بهم..نحن واثقين من ولدنا انه مب مسوي شي...
ام خليفه بتعب: ودني العياده يا ولدي احس بضيج في صدري....
وشلها ودخل يساعده خليفه اما بو خليفه من تعبه ما رام ينش...بس تقبض في الشبريه وقام ببطء بس ما لحقهم....وركبوا امهم في السياره..وفي الدرب اتصل عبدالله ببدريه اللي كانت تصيح...
عبدالله: يا بدريه الله يهديج ما صار الا كل خير..
بدريه: زين شو تباني الحين..عمتي شحالها..؟
عبدالله: يوم نوصل المستشفى بسوي لج تلفون..خلي بالج من ابويه يالس بروحه اخاف يتعب ومحد عنده...
بدريه تصيح: ان شاء الله عبادي..
وبندت عنه وسارت لبو خليفه اللي شافته على شبريته يالس وماد ريوله..وعور لها قلبها ودقت عليه الباب ودشت تيلس عنده...وشوي وتنزل سلمى ودخلت عليها ولا حد يدري ان ام خليفه سارت المستشفى مول..وعقب ما خبرها ابوها تمت تصيح..وما طاعت تسكت وطلبت من ابوها يخلي الدريول يوصلها...بس قال لها ان اخوانها بيحرجون عليها لو شافوها هناك...
.
.
في المستشفى وعقب فحص طال وقته...ظهرت لهم الدكتوره...تطالعهم بنظره بارده...وهم يتريونها تنطق تقول شي...
خليفه: ان شاء الله خير؟
الدكتوره: خير ان شاء الله...المدام شويه تعبانه وهي عندها من أبل كده ضغط..يعني ممكن تجنبوها الازمات..لان دا حاجه صعبه على ألبها..وممكن يعرضها لجلطه في أي وقت...
عبدالله تنهد وغمض عيونه: استغفر الله ..
خليفه: ان شاء الله دكتوره..في شي ثاني بعد ولا ناخذها..
الدكتوره: لاء مافيش..بس ماتنساش تمر الصيدليه تاخذ لها دوا..
عبدالله: على خير ان شاء الله...
وشلوا امهم وما طلعوا من المستشفى الا يوم اذن المغرب...ورد عبدالله امه البيت..وخليفه سار لاخوه المركز..
.................
الساعه 8:30 العشا..يلست ليلى في الصاله..مع امها بعدما روحت عايشه عنهم...يسولفن ويطالعن التلفزيون...ودخلت سلامه عليهم..
ماسكه كتبها تبى ليلى تدرسها...بس اول ما شافت يدتها فرت الكتب على الطاوله وسارت تيلس عندها...وتسولف لها..
ليلى: سلامه وين حمدان؟
سلامه: ما ادري يمكن في حجرته يدرس...
ليلى: اها..
ام راشد: وانتي ليش ما تدرسين.؟
ليلى تتمصخر: لاء هي خليها تلعب ترا ابوها وزير التربيه تروم تنجح أي وقت..
سلامه مبتسمه: لا تتطنزين..
ام راشد: أي وزير فديتك يا ولدي (وابتسمت) لو وزير جان زين..
ليلى: الحمدلله على اللي عندنا بعد نفكر في وزير..قولوا الحمدلله..
ام راشد: الحمدلله على كل حال...
وطلعت عنهن ليلى فوق بترتب حجرتها...وتحت في الصاله في سياره من الصبح تهرن برا...طلعت لها شرملى..وشافت احمد ياييب شيخه وياه..وبغت تتخبل وسارت تبطل لهم الباب ودخل السياره داخل...وفي السياره قبل تنزل شيخه وهي تشوف بيتهم من الجامات وتتنطط...
احمد: هالكثر مستانسه بتردين بيتهم..؟
شيخه بفرح: اليد امي..
احمد: انزلي عندها..انا زعلان...خلاص ما حبج..
عقدت حياتها وطالعته بغضب: ماليدث اليد امي..
وبطلت البشكاره الباب..وقبل تشلها..مسكها احمد وهي تصارخ بس ماتصيح..وحبها وبعدين شلتها شرملى..وتمت لاويه عليها وهي تضحك وفرحانه..
شيخه: اليد ماما..
شرملى: ماما فوق صبر انا يصكر الباب حبيبتي وبعدين يروح عندها..
شيخه ما انتظرت شرملى وسارت صوب البيت تركض بفرح وعفويه...ويوم دخلت الصاله وشافتها ام راشد انقبض فوادها ودمعت..
ام راشد: هلا والله بغناتي هلا بالغاليه بنت الغالي...تعالي فديت روحج منو يايبنج..؟
شيخه مبتسمه وخدودها حمر: وين امي.؟
سلامه: شواخي حبيبتي ما ولهتي علينا..؟
شيخه راحت بتطلع الدري..وشلتها شرملى وطلعتها فوق..الاكيد ان ليلى بتتخبل لو عرفت انها وصلت...
شرملى: اصص عشان ماما ما يسمع..
شيخه تهمس وتقلد شرملى: اتي وحث..
ودقت شرملى الباب ونزلت شيخه...وشيخه ما صبرت..
شيخه: ماما افتحي...
للحظه حست ليلى ان قلبها ما نبض ولا نبضه..وبدون احساس بطلت الباب ولوت عليها..وهي ميته من الوناسه..
ليلى: حياتي فديت قلبج وحياتج وعمرج..فديتج والله...
شيخه تلوي على ليلى بقوه: امي حبيتي...
ويلست ساعه لاويه عليها مب مصدقه انها وياها الحين...لين الاربعاء الياي...
ليلى: حبيبتي كلتي شي؟
شيخه: ايوه ..ددوه عطتني اكل...
ليلى ابتسمت: فديت هالويه...
شيخه بطلت عيونها على الاخير: هي ريلها عولها..عثان تثيح وايد والوحث ضربها...(وبدت بالبنت بالتأليف),,
ابتسمت ليلى وهي تشوف شيخه تسولف بعفويه عن بيت يدتها..وتخبرها كل شي مع الزيادات من افكار شيخه الطفوليه...والاكيد في الموضوع ان ليلى اليوم بتطير من الفرحه عشان حبيبة قلبها ردت لها...

للتنويه..


"تخيّل" من تأليفي..>>مصدقه عمري..


"استكثرك" للمبدع خالد الفيصل..

[رهيف الحس]

تسلم على التكملة و بانتظار الباقي على أحر من الجمر

الله يعطيك العافية على هالقصة الحلوة...

بس لا تتاخر علينا


نبي نشوف الاحداث اللي بتصير...


نتريااااك....


تحياتي لك ...

[الغلا]

لكم مني

الحلقه الخامسه عشر
الساعه6:30 الصبح نشت وهي شبه مفتحه عيونها..ويوم شافت شكل الحجره ابتسمت ابتسامه عذبه..وحطت راسها على المخده وهي مبتسمه تبا ترقد..بس حبت تتلذذ شوي وتستمتع باللي حواليها..وما حبت تحرم نفسها من شي..ونشت وبخطواتها المتعثره والمتردده والمليئه بالشطانه..تحاول تتجاوز المخدات واللحاف..ابتسمت اخيرا ابتسامة نصر انها وصلت ورفعت اللحاف وانخشت في حضن ليلى وحاولت قد ما تقدر تدفن نفسها وهي تثبت لقلبها انها موجوده وان امها قريبه منها لدرجة الانصهار..ولوت عليها بقوه وهي مغمضه عيونها وتعلقت فيها اكثر لين ما نشت ليلى وشافتها تجاهد تبا تخفي نفسها غصب في احضانها وابتسمت..وهي تحس ايدينها الصغيره لاويه عليها بكل قوه تحس اصابعها الصغيره ملتصقه برقبتها لحد التشبث...ليلى طبعا ما حبت تحرمها من متعتها فلوت عليها اكثر وحبتها على خدها ..الشي اللي خلى شواخي تضحك وهي شبه راقده...
شيخه: امي حبيتي..
ليلى بهمس: ارقدي يا حياتي..
شيخه بكسل: اتي القدي..
ليلى مبتسمه: حبيبة امج انتي..
شيخه بدلع: ماما..
ليلى: عيونها وقلبها..
شيخه: بنلوح عند وحث..؟
ليلى مبتسمه اكثر: شو تبين بالوحش؟ بياكلج..
شيخه تدافع عن الوحش: لا ما ياكلني وحث حلو...
ليلى: زين ردي ارقدي انا برقد..
شيخه تمسك ويه ليلى: ماما ما تنامي ..
ليلى مغمضه: امبلى ابا انام ممكن نرقد حبيبتي..
شيخه تبطل عيون ليلى: لا لا يالله ما في نوم...
ليلى بكسل:هه مافي نوم..؟ والله انتي مشكوك في اصلج...مافي نوم؟ وين تبين.؟
شيخه: امي ما في نوم...
ليلى بتعب: بنام حياتي انا تعبانه...
شيخه: اتي تعبانه..؟ لا لاء..
ليلى ونها بتصيح: خلاص ما حبج..
شيخه تتعلق بليلى اكثر وتحبها على خدها: لا لا خلاث..
لوت عليها ليلى: يالله نرد نرقد زين؟
شيخه: ذين...
وردت ليلى تغمض عيونها بترقد..بس شيخه خلاص تعودت هاليومين في بيت خالها احمد تنش من وقت...
شيخه: ماما..
ليلى بتعب:هاه..
شيخه: امي اليد الوح..
ليلى: وين يا حافظ..
شيخه: دمعيه...
ليلى: اقول ردي ارقدي متفيجه اوديج الجمعيه هالوقت ماشي شغله..
شيخه بتصيح: اليد اليد..
ليلى بتعب: شيخه مافي جمعيه في الليل ...الصبح بوديج..
شيخه: ماليد ثوفي الثمث...
ليلى: أي شمس واي خرابيط الحين الفير..رقدي شواخي حبيبتي..حرام عليج وراي دوام..
شيخه: امي ما نلوح دمعيه..؟
ليلى بكسل وهي مغمضه: منو معلمنج تروحين الجمعيه..؟
شيخه: اليد..
ليلى: ماشي جمعيه انتي دبه..اذا كلتي حلويات وايده خلاص بتصيرين نفس الديناصور بارني دبه وكبيره..وما بتدخلين من الباب وبنرقدج في الصاله لان باب الحجره ما بيوسعج عقب....وبعدين بشتري لج ثياب مب حلوه لانج دبه..والثياب الحلوه بس تيي على البنات الحلوات الضعاف..
شيخه بخوف: اتي ما تثتري لي فتان..؟
ليلى: ما بشتري لج فستان لانه بس للبنات الضعاف البنت الدبه تلبس ثوب مب حلو..
شيخه وهي تدفن نفسها في حضن ليلى: خلاث انا ماليد الوح الدمعيه..انا مث دبه..
ليلى: لا يا حافظ مب دبه..عيل امي الدبه..؟
انفجرت شيخه ضحك: لا ددوه مث دبه..
ليلى مبتسمه: فديت روحج هلكتيني ردي ارقدي..
شيخه: ذين...
ليلى: بنشوف هالذين سمعناها وايد..يالله ارقدي...
وردت ليلى ترقد شوي لين ما تنش للدوام...بس شيخه تمت ناشه تتعبث بشعر عمتها..لين ما رقدت هي الثانيه..وهي في حضنها..
....................
نش عبدالله وخليفه وساروا المركز على طول بيشوفون اخوهم ويتابعون اجراءاته وعقب ما وصلوا هناك..كان خليفه يحاول قد ما يقدر محد يشوفه من الناس ولا فضيحته فضيحه لو شافوه..مركز راقي واسم عايله معروف في كل البلاد..وسلطه ونفوذ قوي...بس للاسف ما نجى منها وشافه واحد يعرفه كان وياهم ايام ما ساروا يدرسون في امريكا...وعقب ما وايه الريال وهو متوهق...
شهاب: هاه خليفه عسى ما شر شو ياييبنك المركز..
خليفه ما بينفع معاه في مثل هالوقت غير الكذب:لا لا خير ان شاء الله بس امور بعض العمال..
شهاب: شو من عمال في المركز اللي يهديك..؟
خليفه منقهر ومب متفيج وعبدالله سار عنه داخل: لا بس عندنا عامل مختلس شوية اموال من الخزينه ونتابع اجراءاته..
شهاب: عيل وين عمالك و عملاءك ما ييون بدالك ويخلونك في شغلك..
خليفه" اسميها وهقه": والله يا شهاب كل حد لاهي في حاله مب شرط كل شي يسوونه بأرواحهم يعني لازم نساعد شوي..
شهاب: الله يعين..
خليفه: اترخص منك الحين بغينا نشوف الضابط قبل يفوتنا الموعد..
شهاب: على خير ان شاء الله فرصه سعيده شفناك ..
خليفه: ان شاء الله تتكرر يا بو ناصر..
شهاب: على خير ..
وسار عنه وخليفه يتحرطم ويقول في خاطره..
" تتكرر بس مب هني ...ناقصين فضايح نحن..؟!!!"
ودخل خليفه وشاف عبدالله واقف يتريا حذال غرفة الضابط اللي اول ما شاف خليفه دخله حجرة راهيه للكباريه ويلسه فيها..وياب له الشاي والقهوه والعصير..وعبدالله يلس حذال اخوه...
عبدالله: شو يسوون هذيل..؟ نحن مب يايين نتقهوى..
خليفه: والله يا عبدالله الهيبه مالها جيمه في مثل هالبقعه..
عبدالله: ما نبى حد يسوي لنا سالفه يدخلونا أي مكان المهم نطلع من هالمستنقع..الله يهديك يا ذياب اخوي زين جي سويت فينا..؟
خليفه: بس عاد خلاص ان شاء الله بيطلع وبنفتك من هالوذا اللي نحن فيه..
عبدالله: ان شاء الله بس وعقبها بشله وياي دبي وبشغله هناك وان شاء الله ما بيرد لهالشله الفاسده..
خليفه يتنهد: خله يطلع اول...الا اقول انت خبرت حد السالفه..؟
عبدالله: لا بس بدريه..
خليفه: انا ما قلت لاي حد حتى ام عفرا..
عبدالله: احسن خلها تعدي على خير لا من شاف ولا من درى..
وهم يرمسون دخل عليهم الضابط وسلم وعقب طلبوا مقابلة اخوهم ذياب اللي حدر عليهم على طول رغم ان الوقت مب وقت زيارة بس ناس تفرق عن ناس حتى في السجون...
يلسوا وياه شوي وتفهموا موقفه صدق اول مره يحسونه منهار وتعبان وضيج الكون فيه..وبالاخص يوم خبروه عن حالة امه وابوه..صاح من قلبه يوم عرف..
ذياب مدمع: كله بسببي انا يا رب اموت اليوم..
عبدالله بضيج: ودر شغل الصياعه وبتفكنا من هالمواقف المحرجه..
ذياب: خليفه اخوي ارجوك طلعني من هني مب قادر اتخيل كل هاه يصير فيني..
خليفه بعصبيه: مب قادر انا اتفاهم وياك ما ينفع لك غير هالمكان يربيك..وطيت رووسنا التراب...
ذياب: خليفه ارجوك حاول وفي البيت أي شي تباه بسويه وانا خبرت عبدالله قبل...
خليفه: الحين شو قالوا لك ما زقروك ولا رمسوا وياك...
ذياب: قالوا مستحيل أي شي يلغي القضيه الا اذا قالوا الشباب اللي وياي انه مالي خص..
خليفه: وانت تتوقع انهم يبدونك على اعمارهم..مستحيل اصلا هم وراهم سمعه مثلك ..تتوقع انهم بيفضلونك على ارواحهم..انسى يا بابا..
عبدالله: منو وياك من الشباب...؟
ذياب: محمد ولد سعيد بن ناصر...وفيصل ..
عبدالله: محمد اللي ساكن ورا مسجد خليفه..؟
ذياب: هيه..
عبدالله: ومنو فيصل؟
ذياب: ما اعرف شي عنه توني من كم يوم عارفنه...
خليفه: عيل وين خالد عنك..؟
ذياب: ما طاع يي ويانا قال انه بيسهر ويا شباب ثانيين مب متفيج لنا..والله وطلع منها...
عبدالله: تستاهل...
خليفه: يالله بنسير بس حبينا نمرك نشوف شو الموضوع واخر التطورات وان شاء الله كل شي بينحل حط في بالك ان ما بنخليك بس اثقل وخلك ريال...
ذياب يحب راس خليفه: ان شاء الله..
وطلعوا عنه ورد عبدالله البيت وخليفه سار دوامه...
.........................
في الدوام يلست مشاعل في مكتبها ضايجه وما تبى ترمس حد ولا تبى تطلع...ومحد اصلا مر عليها الكل كان مشغول واليوم الميزانيه لازم يسلمون تقاريرها..وكل شي يخص خزينة الشركه...بس ع الساعه 11:30 نزل حمد يخلص بعض شغله وكان اصلا طالع من الشركه بيروح البنك وعقب بيرد الشركه مره ثانيه....وخطف على مشاعل...
حمد: صباح الخير..
مشاعل مبتسمه بحزن: اهلين حمد شلونك..؟
حمد حس: فيج شي؟
مشاعل بضيج: لا ماكو شي..
حمد: لا والله في شي شكلج وايد ضايجه..
مشاعل: ما له داعي تزعج نفسك ما فيني شي ..
حمد: اوكي اسمحيلي على التطفل ..
وسار عنها..وهي تمت متلومه فيه..اللي الكل يجهله ان مشاعل تموت في تراب حمد..بس حبها صامت ومستحيل تعبر عنه ومستحيل حتى حصه تحس به او يثير غيرتها...بالرغم من الاحترام المتبادل بينها وبين حمد..الا انها عمرها ما بينت له بأي شي ممكن يحسسه بهالحب...كان حمد يعني لها الكثير..الكثير..اكثر ما حبت فيه غموضه وكبرياءه وعنفه..تحب حمد ولكنها مسكينه ما تدري ان حمد يدري بكل خوالج نفسها...يعرفها حمد من مجرد ما تلقتي عينه في عينها حتى لو كانت نظره عمليه..بس كان يحس بحب جارف يتدفق مثل شلال من عيونها ومن نظراتها..كان يبتسم من قلبه وهو يشوفها تضحك على أي شي يعلق عليه مهما كان سخيف..وكان يضحك بكبرياء داخله يوم يشوفها تكتب كل شي في وقته يحس فيها براءه وطفوله ..يحس بعنفوان حبها له..بس للاسف ما يقدر يحبها...كان حمد يرحمها وما تهون عليه يأذييها شرات باقي البنات رغم انه مرت عليه الف بنت بريئه ومشاعرها صادقه بس مشاعل الوحيده اللي قلبه ما طاوعه يكسر بخاطرها...والسبب كان متعلق بشخصية حمد وتركيبته واللي منعه اكثر هو غربة مشاعل عن بلادها وبعدها عن امها وابوها وكل هذا كان له رابط بمرحله عمريه مرت على حمد خلته يفكر في مشاعر مشاعل مليون مره قبل يجرحها...والسبب الثاني يمكن لانه يوم من الايام صرح لها ان حصه تحبه..عسب هالشي آثرت الصمت واعدم في قلبها الفرصه الاخيره انها تصارحه بحبها..وحطت في بالها
" انا الغريبه وهي القريبه واولى مني فيه"..
حزنت مشاعل وضاق صدرها بس للاسف رغم كل هذا كان شعور الحب في داخلها مب قطعة معجون بإمكانها تشكلها كيفما شاءت..للاسف مشاعرها كانت صراع داخلي عنيف خارج نطاق سيطرتها...
وحمد يوم حس بهالشي قال لها بكل عفويه ان حصه بنت عمه تحبه ولو انه ما قال لمشاعل انه يحب بنت عمه ولكنها احترمت هالنغزه وهو احترم وقارها وصمتها وعسب جي حاول قد ما يقدر يمنع أي حساسيات تصير بينها وبين حصه..وشاف من الانسب ان حصه ماترمس مشاعل لانهن بنات وبيفهمن بعض..وما كان يرضى على مشاعل تنجرح مشاعرها ولا على بنت عمه ولو انها كان يستمتع بتعذيبها.....في الاخير كانت ملايين الافكار تدور وتدور في راس مشاعل بس انتبهت انها لازم تخلص شغلها قبل يرد حمد من البنك عسب تسلمه التقرير..وغير هذا ضيجتها اليوم كلها ان امها دقت لها وقالت ان ابوها تعبان وتباها ترد عسب تيلس وياه لانه هو اللي طلب هالشي وطلبوا منها تقديم اجازه عشان ترد الكويت ويا اخوها على الاقل اسبوعين....
.
.
في مكتبهن يلسن يسولفن وودرن الشغل...
ليلى: افف مليت والله...
حصه: مب قلتي بنقدم على اجازه يالله متى.؟
ليلى: متى نقدم ..؟ شو رايج يوم يخلصون اليهال المدرسه.؟
حصه: وليش يعني.؟
ليلى: اصلا ما بقى شي هن الا اسبوعين وبيخلصون...
حصه: يالله نقدم على اجازه كل شهر سته ...
ليلى: لا يا ذكيه...شهر سبعه كله...
حصه: ان شاء الله بنشوف اذا وافقوا..
ليلى: غصبا عنهم اصلا هاي اجازتنا السنويه لازم ناخذها غصب طيب..
حصه: ننزل نتريق ولا شو رايج.؟
ليلى: يالله نروح...
ونزلن تحت يتريقن وطبعا مرن على مشاعل اللي ما طاعت تروح وقالت انها بتكمل شغلها وما تقدر تسير...
..................
الظهر حمدان سار بيت يده حوالي الساعه 3:00..طبعا ما عندهم مدرسه هالاسبوع لانه اللي يسبق الامتحانات..ويلس في الصاله بس محد كان موجود وطلع فوق عند عمته وسمعها تسولف وتضحك..في الحجره..استغرب وقال اكيد انها ترمس في التلفون....دق الباب وسمعها ترمسه..
ليلى: حمدان تعال الباب مفتوح..
ودخل ويلس عندها شوي وشاف شيخه يالسه في طرف الحجره متربعه وماده بوزها وزعلانه...وسار لها...
حمدان : شوفيج شواخي..؟
شيخه: ماليد..؟
حمدان: شو اللي ماليد؟
شيخه: امي..
حمدان: شو سوت؟
شيخه: اليد الوح الدمعيه ما توديني.
حمدان ابتسم: اوديج؟
شيخه مبتسمه: اوه..
حمدان: شو اوه بعد..يقولون هيه..
شيخه: هيه..
حمدان: بس بوديج جمعيه صغيره مب كبيره..
شيخه: فيها حواوا...؟
حمدان: اكيد كبيره بعد..
ومد ايده بيشلها وهي تعلقت فيه واشر لعمته انه بيروح يلاعبها وبيرد..وهي ابتسمت انه احسن..روحها يابت لها المرض من كثر ما ترمس عن الجمعيه...
طلع حمدان وودا شيخه الدكان اللي حذال بيتهم...واشترت اللي تبى وردها بيتهم مب بيت يده وطلعها فوق ويلسها في حجرته...وخلاها تتعبث على كيفها في اللي تبى..وهو يلس يلاعبها شوي عقب لهى عنها بالدراسه..وهي يلست تخرب على كيفها..ونشت صوب الكبت..وتمت تلعب وتدور..ولقت علبه زجاجيه مدوره فيها ماي وداخلها كور صغيره حمرا..كانت منال اللي في صف حمدان مشتريتنها له في عيد ميلاده يوم كان اول هالسنه..المهم يلست تلعب بها شيخه وظهرت وما حس بها حمدان...وشلت الكوره الزجاجيه وياها...وهي واقفه في بداية الدرج طبعاً ما تقدر تنزل..وتمت تطالع وهي لاهيه طاحت الكوره من ايدها وانكسرت على رخام الصاله تحت وطارت الكور وتبعثر الماي في الارضيه...وطبعا شيخه من الصدمه تعلقت في اطراف الدري ونزلت تحت وكانت هذي اول مره تنزل شيخه من فوق لوحدها ومب في بيتهم بعد..في بيت عمها راشد...
اول ما وصلت تحت يلست على الارض وابتسمت وهي تشوف الكور الحمر والزرق متبعثرات..وطبعا دخلت نصهن في حلجها..والباقي تمت تتعبث به..وتطالع..وتتفحص الباقي..وشلت وحده منهن وبكل شطانه دخلتها في وحده من فتحات خشمها...ويوم حست انها ما تروم تظهرها رجعت كل الكور اللي في حلجها على الارض..وتمت تصارخ وتصيح..ويتها ميرنا تشوف شو فيها..وهي تصارخ بصوت عالي..
ميرنا: شوفيج حبيبي...؟
شيخه تصارخ وما طاعت تسكت..وظهرت لها ام حمدان وركضت بها بيت يدتها غاليه وكانوا محتشرين ونزلت ليلى من فوق ويوم شافت ويه شيخه احمر من الصياح لوت عليها وحاولت تفهم شو فيها بس شيخه صدق تعبت وما رامت ترمس...واخر شي هدت شوي واشرت لليلى على المكان وتحسسته بصبوعها ويوم حست بجسم غريب في خشمها انصدمت وعلى طول سارت ويا الدريول والبشكاره العياده القريبه منهم...ويوم وصلت هناك دخلوها طواري...
الدكتوره وهي تكشف عليها: بعيد جداً..ما أدرش اطلعوا...
ليلى وهي مدمعه: وشو الحل..؟ منو بيطلعه يعني..؟
الدكتوره: انتي ازاي تسيبيها تلعب في الادوات الخطيره دي؟
ليلى بضيج: يا دكتوره دخيلج خلصينا متى بيظهر منها وشو الحل..
الدكتوره: للاسف معندناش ملقاط نلقط فيه الجسم من انفها...
ليلى: مستشفى هالكبر ما فيه ملقاط..حشى ما يسوى علينا...
وشلت شيخه وودتها على طول مستشفى خليفه اللي عذبوها تعذيب لين ما طلعوه وشيخه تصيح..وطبعا طلعوا ليلى برا عشان ما تنهار لو تشوف شو يسوون فيها...المهم انهم ما طولوا ثواني وطلعوه وطبعا نزفت من خشمها يوم طلعوه لان الملقط مر على طرفه وجرحها شوي....
ردت ليلى البيت وهي منهاره وتعبانه ...صدق ندمت انها خلت شيخه تروح ويا حمدان لو تدري كل هاه بيصير جان رقدتها من زمان...بس وين شيخه صدق تعبت وكانت خايفه وايد..وتمت متلصقه في ليلى طول الوقت...وسارن الحجره فوق عقب ما وصلوا...وكانت شيخه راقده على ريول ليلى..وهي تطلع اصوات متعبه قلب ليلى لانها تدل على المها...
ليلى: فديت روحج يا عمري ليته في عيوني ولا فيج..
شيخه وتسوي عمرها تصيح: امي عولني..
ليلى: شو اللي وداج بيت راشد..يعني من زود اللي بيهتمون فيج الحين.؟
شيخه تدمع وبصوت متقطع: مافي دم..
ليلى تمسح دموعها: لا حياتي مافي دم خلاص راح...
ونشت ليلى تييب لها شي تاكله وعقب رقدتها..طبعا حمدان كان في حجرته ولا يدري بأي شي من هالمهزله اللي صارت بسبب اهماله غير المقصود...وعقب نزلت ليلى وياهم عشان تتغدا هي وامها وسلامه اللي يتهم عقب الظهر...
......................
العصر في بيت ام ناصر..كانوا يالسين في الصاله كالمعتاد بو ناصر وام ناصر وناصر وفهد...
بو ناصر: يالله يا ناصر خبرنا متى تبغي العرس..
ناصر: أي عرس..؟
بو ناصر: عرسك على بنت عمتك ولا ناسي؟
ناصر: ماابغي اعرس الحين ..
بو ناصر: عيل تتريا شو؟؟ عمرك 30 سنه وما عرست للحين..متى تبى تعرس ان شاء الله..ولا ما تبانا نشوف عيالك..؟
ناصر: بتشوفهم ابويه يوم ييون بس انا ما ابغي اروى..
ام ناصر ساكته ولا تكلمت وفهد يجلب القنوات مب مهتم يعرف هالنقاش شبه اليومي شو اخرته...
ناصر: ابويه هذا عرس مب سياره أي حد يتنقاها لي..ماريد اروى..
بو ناصر: عيل بغيت بنت خالك هذي العيوز المركونه اللي محد يباها..خاست في بيت ابوها..
حرج ناصر بس تم ساكت واحترم ابوه....
ام ناصر: ليلى مب عيوز يا بو ناصر..والف من يتمناها بس البنت ما بغت غير ولد عمتها...
بو ناصر: وولد عمتها ما يبغيها ..
ناصر: امبلى وهي اللي بخاطري وبقولكم من الحين جان اروى بتستوي حرمتي والله لاخذ ليلى عليها الثانيه...
بو ناصر: مب مشكله انت خذ اروى وعقب يصير خير..انا قلت لك قبل عرس بأروى وخذ ليلى الثانيه...
فهد وهو يطالع التلفزيون: ماحيد ليلى بنت خالي رخيصه لهالدرجه ومحد يبغيها عشان تعق عمرها عليك يا ناصر وترضى تكون الثانيه...
بو ناصر: محد طلب شورك انت...
ام ناصر ابتسمت من رمسة فهد...
ناصر يتنهد: زين ابويه اروى وايد صغيره وانا ريال عود شو ابا بها شيبه انا...
بو ناصر يضحك: سلط الله على ابليسك يا ولدي... شيبه..؟ عيل انا شو؟
فهد بهمس: رايح فيها...
ناصر سمع فهد وضحك بس عقب خزه بنظره ما يرضى على ابوه مهما سوا بعد يتم ابوه وله واجب الاحترام...
ام ناصر: شو قلت يا ناصر...؟
ناصر: خلاص انا اقترحت عليكم باخذ اروى وليلى بحطها حرمه ثانيه..البنت في خاطري وما بضيعها...
فهد: جان رضت بك...
بو ناصر: بترضى به اصلا هي تتمنى حد يي ياخذها...قبل تروح فيها...
فهد وهو ينش: بنت خالي اعرفها زين عشرة عمر مب من يوم ولا يومين...هذي ليلى بنت ناصر شعارها في الحياه...في كل شي في كل شي ..ماحب انا الحل الوسط..إما اكون او لا اكون..حطوا على الحرف النقط...
ابتسم ناصر بفخر: صح لسانك يالشاعر...
فهد يطلع الدري: والقايل بعد..بس هب انا اللي مألفنها..هذي سلطانه عبدالعزيز السديري من السعوديه...
وطلع فهد فوق...
ام ناصر عاقده حياتها: منهي هذي سلطانه؟
ناصر: شاعره يعني من بتكون مثلا..؟
ام ناصر: ربك بعد خافها الا وحده يعرفها وهي اللي صارفتنه عن العرس..
بو ناصر: خلي هالخرافات يا ام ناصر...قومي سوي لي كوب شاي...
وتنش ام ناصر بصعوبه: ان شاء الله...
وييلس ناصر يكمل سوالفه ويا ابوه...طبعاً خذت ام ناصر موافقه مبدأيه على خطبة اروى..واكيد انها الخميس الياي رايحه تخطبها لناصر....
......................
طلع عبدالله من المسيد عقب صلاة المغرب وسار البيت على طول...وسمع موبايله يدق وطلعه يرد عليه....
عبدالله: وعليكم السلام..
الضابط: عبدالله مبارك...
عبدالله: هيه نعم منو وياي؟
الضابط: معاك الضابط عبيد خلفان سعيد..
عبدالله: مرحبا اخوي خير اقدر اخدمك بشي؟
الضابط: اخوي بس حبيت اقولك ان الحكم يوم السبت في موضوع ذياب اخوك..وبنفس الوقت اذا طلعت اوراقه المحكمه بتعرفون عسب جي حبينا نذكركم..
عبدالله ببرود:اوكي على خير ان شاء الله..
بند الضابط واغلق عبدالله تلفونه..وفكر في الموضوع...ورد البيت وقال بيشاور خليفه لان في باله الف فكره وفكره...
اول ما حدر البيت شاف سمر منسدحه في الصاله مبعثره كتبها في كل بقعه واونها تدرس ما خلت ورقه ما قطعتها ولا كتاب ما خربشت فيه...
عبدالله: سمر...
بس ما ردت عليه ويوم سار لها لقاها راقده وهزها شوي عشان تنش...
سمر: حصوه خليني ارقد..وراي امتحانات...
عبدالله: مبين عشان جي راقده في الصاله..والطاولات تدرس عنج...سمر نشي..
سمر بطلت عيونها: وين كتبي..؟
عبدالله: يالله نشي ارقدي فوق وين راقده في الصاله...
سمر وهي تيلس وتربط شعرها الطويل بصعوبه: حصوه ما خلتني ادخل الحجره لاني اسمع لعمري بصوت عالي...
عبدالله: زين روحي ادرسي فوق مب زين الصاله جي غاديه روضه من الاوراق اللي فيها...
ونشت سمر تيمع كتبها وبتطلع فوق...وعبدالله نش بيسير عنها وشاف امه طالعه من حجرتها وابتسم لها بحنان..وسار يلوي عليها ويحبها على راسها..وايدينها ويتفداها ساعه وهي مبتسمه وتدعي له...
عبدالله: هاه يالغلا شو صحتج الحينه..؟
ام خليفه: الله يسلمك يالغالي..انت ليش ما رديت دبي ما وراك شغل...؟
عبدالله: وين اروم ارد دبي واودر جنتي في بوظبي..ما يستوي يا شيخة هل البلاد كلهم..
ام خليفه: لا مب شيخه ولاشي خلني ام خليفه ابرك لي...
عبدالله يتنهد: تعالي فديتج بنيلس في الصاله والله اني متوله على سوالفج...
ام خليفه: وين حرمتك عنك؟
عبدالله: ما ادري بها وين سارت توني ياي من المسيد..ما شفتها..
ام خليفه: شو سويتوا يا ولدي في موضوع اخوك..؟
عبدالله اتذكر بس رمس: ماشي بنشوف الحكم النهائي فيه يوم السبت...
ام خليفه: قلهم شو يبغون بنعطيهم بس يطلعونه...
عبدالله: امايه هم الحين يالسين يحققون..ومافي أي اثبات... اذا ربعه قالوا ان ماله خص بالموضوع بيطلعونه بس ربعه مصرين انه كان وياهم..
ام خليفه: وابوي عليهم..شو من اوادم هاييل..سير لاهلهم قلهم شو يبون بنعطيهم بس يطلعون ولدنا ويكلمون عيالهم...
عبدالله: امايه ترا حالهم مب احسن من حالنا..هم صدر في عيالهم سجن سنه وثمان شهور..على الاقل ذياب احتمال يطلع براءه...
ام خليفه مدمعه: الله يكون بعونهم ويسهل عليك يا ولدي يا ذياب...
وهني دخلت سلمى من برا وهي لابسه عباتها ...وسلمت وعبدالله مبطل عيونه ويطالعها...
عبدالله مستغرب:من وين يايه؟
سلمى : من المول كنت ويا ربيعاتي...
عبدالله: من منو مستأذنه وويا منو سايره؟
سلمى تطالعه مستغربه من استجوابه: شو هالاسلوب اليديد..؟
عبدالله تنهد بضيج وسار حجرته كان يعرف انه محرج وبيعصب عليها فتمالك نفسه عشان ما يفج ضيجه فيها...وهي طالعته وهزت كتوفها باستغراب وسلمت على امها وطلعت فوق تغير....
دخل عبدالله حجرته وشاف بدريه ترتب اغراضهم وتعطر ثيابه...وتحطهن فوق الكبت...
ونزل كندورته وانسدح على الشبريه...وهي طالعته مبتسمه...
بدريه: صليت؟
عبدالله بضيج: الحمدلله...
يت بدريه ويلست عنده على طرف الشبريه وابتسمت له بحنان: يا عمري مافي شي يسوى كل هالضيج هذي ازمه وبتعدي ان شاء الله..خل ثقتك بالله كبيره...
عبدالله بضيج اكثر: مب مبين انها بتعدي..نحن انشغلنا بذياب ونسينا سلمى...
تنهدت بدريه: كل شي بوقته حلو انتوا الحين حلوا مشكلة ذياب..اما سلمى هني في البيت معززه مكرمه ما عليها قاصر..انت اشغل نفسك بذياب وسلمى يصير خير فيها..وعمي هو اللي بيرمسها هب نحن...
عبدالله بضيج: بدريه انتي ما تشوفين كيف ماخذه راحتها ولا هامنها اللي يصير داخله طالعه..بدون حسيب ولا رقيب حرمه عمرها 31 سنه وين تبى..ونه سايره ويا ربيعاتها..من متى هاه شورنا ولا مذهبنا...
بدريه مرتبكه: زين حبيبي هي ضايجه و يالسه تنفس عن روحها خلها لين ما ترد بيت ريلها وعقب يصير خير..
عبدالله: شو تنفس عن روحها...اخوها مسجون بفضيحه وامها بتموت مهدده بجلطه في وقت بدل ما تقول بيلس اشوف اهلي واخفف عنهم يالسه تهيت في المولات ومحد يدري عنها...
بدريه: هاي اختك يا عبدالله انت مب واثق من تربيتكم فيها..؟
عبدالله: امبلى واثق والله بس بعد الحشمه مطلوبه..بدريه( ويجمع كفوفه في بعض) بوظبي هالكبر وكل عربنا متقاربين فيها يعني ما في شي يندس.ورمسة الناس تعور وايد...ما فينا على سلمى يكفينا اللي فينا من ذياب...
بدريه: شو بتقول الناس خل الناس تولي...
عبدالله: وابوي انا ردينا لسالفة خل الناس تولي...اخوج حمد يوم كان في لندن شو كانت الناس ترمس عنكم..ومقطعه بيت عمي تقطيع..ولا نسيتي...؟..اذا ناسيه سالفة دبي والرده كل اسبوعين من لندن انا بعدني ما نسيت..
بدريه: يا عبدالله حمد ريال مب بنيه...واختك ما سوت شي..وبعدين حمد تغير ومب شرات قبل..
عبدالله: هيه وايد تغير اسأليني انا عنه..
بدريه تبتسم: خلك من حمد اخوي..وخبرني شو تباني اسوي لك تشربه انت مزاجك تعبان وايد ويبا لك شي يعدله..
عبدالله غمض عيونه وبضيج: أي شي من ايدينج احبه ..
بدريه مبتسمه بحنان: فديت روحك حبيبي..
ونشت بتسوي له كوب نسكافيه بس قبل تنش مسك ايدها...وطالعته مبتسمه ويلست..
بدريه: هاه غناتي؟
عبدالله: بدريه اعذريني لو كنت جاف شوي هالفتره وياج او ضايقتج برمستي..بس صدقيني ظروفي والضغط اللي حواليه عافس لي حياتي..
بدريه وهي تحب كفه: يا عيوني مستحيل ازعل عليك انا ومقدره كل اللي تمر فيه وانا بعد سامحني جان قصرت بحقك لاني بكون منشغله بعمي وعمتي تراهم اقرب لي من امي وابوي ..لازم اهتم بهم واراعيهم..
عبدالله يتنهد ويقرب ايدها من ويهه ويحبها: روحي علني فدا ترابج..ياللي قلبي ما بيرضى على حد كثر ماهو راضي عليج..
ابتسمت بدريه ونشت تسوي له اللي طلب...
............
من الاحد لين الخميس مرت الايام سريعه في بيت ليلى مع شيخه اللي يا خالها وشلها يوم الاربعاء الصبح...وثقيله في بيت بو خليفه اللي يتريون يوم السبت على احر من الجمر...غير انه مر مختلف وبلون ثاني في بيت بو ناصر اللي سارت ام ناصر فيه بيت عمته وخطبت لها اروى..اروى اللي ما وسعتها المجره كلها عشان تعبر فيها عن فرحتها..اللي ما رقدت ليلة الجمعه من فرحها..ما بغت ام ناصر ما تيي تخطبها لحبيب القلب والروح...
اروى كان يوم الخميس يوم ما ينتسى في كل حياتها ...اليوم كان ليله ولا اروع ما جد تخيلتها ولا سمحت لنفسها ترمس عنها غير بينها وبين احلامها...ما قدرت تسيطر على دموعها ان افراحها تتحقق في ليله وحده...
اروى كانت فراشه حالمه تحلم بأمير على حصان ابيض هالامير كان ناصر...بس للاسف اروى ما تدري ان ناصر اذا خذها بياخذها جسد بلا روح.. بلا قلب..بلا اهم شي في انسان عشان يعيش ويا انسان..اروى محتاجه بشده للي في قفص ناصر الصدري..بس ما تدري انه من يوم عمره 13 سنه وقلبه في بيت خاله...ما فكرت اروى للحظه في مشاعر ناصر وكل اللي هامنها انها تحبه وانه خلاص صار لها وصارت له....
هذي كانت احلام طفله صغيره اسمها اروى تحققت بلمح البصر بدون سهر ولا جهاد ولا تعب....بس اكيد الايام بيكون لها وقفه ثانيه...
........................
يوم الجمعه المغرب كان احمد رايح بيت بو راشد عشان يرد شيخه وهو في الدرب...كانت شيخه راقده ..كان طول الوقت يفكر في الحال اللي يعيشون فيه..وكيف ممكن يتغير للافضل..خصوصا ان امه بدت تحن بسالفة عرسه وهو بعده حتى ما لقى الشغل....ووهو في غمره افكاره يفكر يا ترى منهي هالبنت اللي امه حاطه العين عليها وهالكثر متشبثه انه يباها...ما حس بعمره الا واقف جدام البيت وهرن بس محد ظهر له مع ان الباب مفتوح بس ما حب يدخل لين ما يظهر له حد من اهل البيت...تم واقف يمكن خمس دقايق وهو يتريا شاف وحده نازله من دري الصاله بس مبين انها بنيه مب خدامه كان الجو شبه مظلم وكان وقت مغيب وهي تنزل كانن خصلات شعرها القصار يتطايرن من بعيد فوق كتوفها ..كانت بعد لابسه بيجاما قصيره شوي...وتركض صوب الباب...ووقفت حذال الزراعه ووايجت براسها واشرت بإيدها لراعي السياره انه يدش وما خلتها يشوفها او هي حتى ما شافته.....كانت سلامه تعرف انه خال شيخه يايبنها...لان شرملى كانت تصلي وما بتقطع الصلاه عشان تفج الباب..وسلامه اللي لا صلاه ولا دين سارت للباب بس ما شافها احمد ابدا غير وهي نازله من باب الصاله من بعيد حتى ماشاف منها شي غير شكل انسانه يايه من هناك...
وقف احمد الموتر وسلامه تمت في الزراعه ما ظهرت له تتحرا فاطمه بتنزل وبتعطيها شيخه...بس للاسف احمد تم يتريا يتحراها بنت صغيره عندهم ولا بشكاره..واخر شي هرن مره ثانيه وطلعت له تينا اللي شلت شيخه وهي راقده بشوي شوي..وهو رد السياره على ورا عسب يظهر وشاف سلامه وهي تطلع من الزراعه وتسير صوب البيت وهالمره شاف ويهها واستغرب..
" منو عندهم في البيت هالكبر..ما حيد عندهم بنات صغار من وين طلعت هذي.؟"
ابتسم وتذكر عمره
" ما شاء الله اذا هاي بنت راشد عيل حمدان اكيد ريال الحين...من متى مب شايفنه...والله محد تم ما عرس ما بقى غيري يالله ان شاء الله احصل الشغل..وتخطب لي امي هالاميره اللي ما خلت شي من مواصفات الجمال على قولتها...ياي والله اني متشوق اعرف منهي"
احمد عمره ما فكر بالحب وكان تارك مهمة زواجه على امه ومب مهتم لاي شعور يسميه الناس الحب..وكان من افكاره ان الحب ما يي الا عقب الزواج..كان مستقيم لابعد الحدود مع نفسه قبل يكون مستقيم مع الناس...الكل كان يحترمه عشان اخلاقياته...واسلوبه الراقي في التعامل مع الناس...هذا احمد اخو المرحومه سعاد اللي عمرها ما تركت في قلب أي انسان غير الذكرى الطيبه والدعاء بالرحمه لها ولريلها الطيب سيف....
.
.
في بيت ليلى ودت تينا شيخه فوق عند ليلى اللي تخبلت يوم شافتها بس بعد حزنت انها راقده ..كانت تبى تفرح يوم تشوفها وهي تشوف امها...بس خلتها ليلى فوق ونزلت الصاله بسرعه بتسير بيت راشد عشان حمدان متصل يباها تفهمه كمن شي لان باجر السبت اول يوم امتحانات وحالة الطوارئ بدت في بيت بو راشد وراشد....اما سلامه فكانت مثل المثل اللي يقول" على حل شعرها" ولا تدري هي وين...كل اللي تعرفه انها لازم تنجح ولا بتكون حياتها ملتعنه بعد ما هددها ابوها انه بيطلعها من المدرسه وييلسها في البيت اذا ما نجحت....
..............
يوم السبت الصبح سار عبدالله وخليفه المركز يعرفون شو اخرة الصبر ...يلسوا يتريون حوالي الربع ساعه لين ما وصل الضابط المسؤول اللي حسوا من علامات ويهه انه ما يبشر بالخير...
عبدالله: هاه حضرة الضابط بشر خير ان شاء الله...
الضابط: اخوي التهمه ثابته ما باقي غير حكم المحكمه...
انصدم خليفه وشل عمره وطلع وعبدالله تم مكانه تيبس ما عرف يرمس ولا يقول شي جنه حد وقف له قلبه ومنعه لا ينبض...
هز راسه وما طلب يشوف اخوه ...
عبدالله: سؤال اخير.. متى وقت المحاكمه..
الضابط: اليوم الساعه 11 الضحى...
عبدالله: حكم نهائي.؟
الضابط: هيه..
طلع عبدالله وشاف خليفه روح وهو ركب موتره وسار على غير هدى ما يدري وين بيودي ويهه من ابوه وهو وعده ان كل شي يتم على خير...وقلب امه يا ويل حاله على قلب امه..اللي اكيد اني بيوقف والجلطه بتنهيها من الحياه.....
.
.
في الصاله كان بو خليفه في الزراعه يعابل فيها ويشغل عمره قبل يوون عياله... وام خليفه في الصاله تتريا كلهم كانوا على اعصابهم يتريون حد من عيالهم...خليفه ولا عبدالله يي ويعطيهم الخبر اليقين...بس ما يدرون شو من صدمه تترياهم وان عيالهم اصلا كل واحد شارد عن البيت ما يقدرون وما يعرفون بأي طريقه بيواجهون اهلهم...
الساعه 10:30 الصبح ردت سمر من الامتحان وويهها احمر وترتجف ودموعها تارسه عيونها...ويوم شافها بو خليفه في الحديقه داخله البيت نش لها واستغرب منها....
بو خليفه: هاه بنتي عسى ماشر؟
سمر بصوت متقطع: ابويه مريضه بموت...
تحسس بو خليفه راس بنته وشاف الحمى ذابحتنها...ودخلها داخل ويت ام خليفه تربع صوب بنتها ويابت لها كمادات وكانت زايغه عليها...بدريه اول ما حدرت الصاله وشافت سمر سارت تسوي لها شي دافي وتجهز حجرتها بتطلعها فوق عشان ترقد...وعقب ما خذتها بدريه حجرتها لحفتها ويلست تكلمها شوي...
بدريه: شو سويتي حبيبتي في امتحانج...؟
سمر بتصيح: ما سويت شي..كان جدام عيوني ضباب..وودوني لجنه خاصه...
بدريه: شو يعني؟
سمر: ما ادري يمكن يراعوني بس انا برسب ما حليت شي والله..
بدريه: لا تفاولين على عمرج انتي شطوره ومابترسبين...
سمر تصيح: بس انا ما حليت شي نصه فاضي وبعضه ما ذكرته كانن عيوني حمر واحس بحراره وما شوف عدل في عيوني ضباب...
بدريه: حبيبتي عادي بتسيرين العياده اليوم وبتخفين ان شاء الله عقب ما تاخذين الدوا الحين بتصل في عبادي يي يوديج...
سمر : وامتحان اليوم شو بيصير فيه...؟
بدريه: لا تفاولين بالشر تفاءلي بالخير ما تدرين الله شو كاتب لج....
وصاحت سمر ويلست بدريه تهديها...ونشت تتصل في عبدالله يوديها المستشفى عشان تخف على الليل وتدرس شوي لامتحان باجر...بس عبدالله للاسف كان غالق تلفونه...وهي استغربت بعد منه...
...................
في المدرسه كانوا الاولاد والبنات يالسين كل حد يسوي شي..اللي يراجع شو سوا في الامتحان واللي يقرا شو حل وفي حد يصيح واللي يفر كتابه ويقطعه.....وكل على ليلاه يغني...
عفرا وسلامه وحمده وحمدان كان مخلصين الامتحان وواقفين برا يتريون حد يي ياخذهم...
حمده: الله يستر بس...
حمدان: عفرا شو سويتي؟
عفرا مبتسمه براحه: احاتي باجر اليوم اكيد عندي غلطه..
فتحت سلامه حلجها: وايد عليج..
حمده مبتسمه: اختي شو رايج تمتحنين بدالي...؟
عفرا: متفيجه ما عندي شغل..
حمدان: انا خبصت شوي في بعض المسائل الله يستر بس...
سلامه: انتي عندج غلطه..عيل انا عندي سؤال واحد صح...
ضحكوا كلهم وتموا يسولفون شوي ويووهم بعض الطلاب يسولفون وياهم ويتخبرونهم عن الامتحان شو مسوين فيه....
ووصل دريول حمدان وسلامه وسلموا على عفرا وحمده وراحوا على طول....
.
.
اول ما وصل حمدان راح بيتهم وتسبح ولبس ورقد على طول وسلامه عرفت ان امها مسيره على جيرانها ونزلت للتلفون تحت...ما تدري بتدق لمن ولا شو تسوي المهم انها تضيع وقتها...وعقب يوم تمت تتعبث ومحد متفيج يسولف لها نشت وسارت بيت يدتها اللي اكيد محد يحبها بعد ليلى كثرها...
................
على الساعه 12 كانت ليلى في المكتب تسولف لحصه اللي كانت منشغله على الاخير وليلى مخلصه كل شي..طبعا ليلى ما تعرف شي عن خطبة ناصر...ولا سمعت بالموضوع مول...
ليلى: الله يكون بعونهم الحين اكيد طلعوا من اللجان..
حصه: متفيجه تحاتينهم شو تبين بهم...
ليلى: عيال اخوي بعد شو ابى بهم...اذا ما نشدت عنهم بنشد عن منو؟
حصه: زين شفتي مشاعل صار لها اسبوع ضايجه وسمعت بعض الموظفين يقولون انها بتقدم على اجازه...
ليلى: شو رايج نسير لها يمكن مستوي بحد من اهلها شي...؟
حصه: اوكي روحي انتي..
ليلى: وانتي؟
حصه بتردد: انا عندي شغل...
ليلى تطالعها بطرف عينها: أي شغل..ولا ما تعصين اوامر الحكومه..مالت عليج...
ونشت ليلى وسارت لمشاعل وحصه تمت في مكتبها ما تحركت..اكيد طبعا ما تروم تقول لحمد في أي شي لاء..اصلا هي تباها من الله وحمد عادي عندها يتحكم فيها بس المهم انها ترمسه وتقدر تتواصل وياه....
سارت ليلى مكتب مشاعل ومثل ما قالت حصه كانت ضايجه وهم الكون على راسها..يلست ليلى حذالها وابتسمت لها..
ليلى: حبيبتي شو فيج؟
مشاعل وعيونها ذابله من التعب: ماكو شي..
ليلى: علي انا؟
مشاعل: ضايج خلقي..
ليلى: من شو؟ اذا ممكن اعرف..وما فيها احراج..
مشاعل حست في ليلى شخص كتوم ومناسب بس بعد ما حبت تفصح عن اللي بقلبها: ابوي مريض ويبوني ارد الكويت هالويك اند..
ليلى شهقت: بسم الله عليه شو مستوي به؟
مشاعل: شوي تعبان تعرفين ابوي ريال عود بالسن وعنده السكري..
ليلى متأسفه: الله يكون بعونه...
وتموا شوي ساكتين بس ليلى حبت تغير جوها..
ليلى مبتسمه: شو رايج نسير نشرب شي؟
مشاعل: مالي خلق..اسوي أي شي..
ليلى: حرام ترديني بزعل..
مشاعل: والله مالي خلق اسوي أي شغله..
ليلى: امم انا اريد اشرب شي علىحسابج يالله نشي اعزميني..
مشاعل مبتسمه: يعني الحين انتي تقنعيني غصب اطلع..؟
ليلى مبتسمه: بتردين في عزيمتج ؟؟...لا لا ما هقيتها منج بصراحه...
مشاعل: اوكي موافقه...
ليلى ابتسامة نصر: قلت لج ما ترومين لي..
مشاعل نشت ويا ليلى ونزلن تحت بيشربن لهن شي...
.
.
في مكان ثاني حمد عرف ان ناصر خطب وسار وسلم عليه وبارك له على كل شي وطالعه بنظرات خبيثه لانه يعرف عن سالفة بنت خاله ليلى..بس ما تجرأ يرمسه ..ولو ان حمد في قلبه كان يفكر في ليلى شو ممكن يصير بها لو درت ..اصلا حمد كان وايد يحب مسحة الحزن في نظرات ليلى..واكثر شي يشده فيها عيونها اللي تحكي روايات الحزن كلها....بس عقب هالتفكير نزل حمد تحت ومر على مكتب حصه وليلى..بس شاف حصه بروحها..
حمد: صباح الخير..
حصه مبتسمه: صباح النور والسرور يا هلا...
حمد بويه معتفس: هاي مصدقه عمرها وكل يوم غايبه...؟
حصه: لا سارت عند مشاعل...
حمد: اها اوكي..
حصه: في شي.؟
حمد: ليلى ما قالت لج شي اليوم...؟
حصه: عن شو مثلاً؟
حمد: أي شي.
حصه: لا والله..
حمد: هي ضايجه اليوم ولا عاديه.؟
حصه: عاديه..بس ليش كل هالاسئله..؟
حمد مبتسم: لا ماشي..خلي بالج من شغلج..
نشت حصه: حمد والله تقول شو صاير...
حمد: يا ويلج جان قلتي لحد...
حصه: وراس امي وابوي ما خبر حد...
حمد: ناصر خطب بنت عمته...
شهقت حصه وحطت ايدها على قلبها: حمد شو تقول؟
حمد: اص لا تفضحينا يا ويلج ان رمستي بالموضوع...
حصه ودمعت: ليلى..فديتها..بتموت بتنجلط..
حمد: وليش يستوي فيها كل هذا؟؟ عشان واحد ما يعرف يحب..عشان واحد ما يستحق الحب..ناصر مب ريال لين هناك..شخصيته وايد مهزوزه...ماله راي ولا كلمه..ابوه يسيره على كيفه والكل يدري بهالشي...وليلى وايد قويه وشخصيتها وايد فذه..تستحق واحد ما يكون اقل عنها..
حصه يلست على الكرسي وحست الكون يدور على راسها: فديتج يا ليلى والله مدري شو بيستوي بج..
حمد مبتسم: خلاص لهالدرجه تهمج؟
حصه بحزن: اكيد بتنهار والله...
حمد وهو يطلع برا المكتب: خلاص باخذها انا يمكن تنسى...
وطلع حمد اللي كان يتطنز على حصه وهي اشتعلت نيران الغيره في قلبها حتى لو تدري ان حمد يمزح..وهي تعرف ان لو كان اخر ريال في الكره الارضيه مستحيل تاخذه ليلى لو شو ماصار...رغم ان حمد رمس ويا حصه وابتسم لها ووثق فيها وخبرها عن ليلى..بس ما قدرت للحظه انها تبتسم او تفرح...حست بنار تاكل قلبها وحياتها..حبيبتها واختها الغاليه بتدمر..
" فديت قلبج يا ليلى وين بتروحين عقب هالخبر..ما يكفيج اللي فيج من شيخه واخوالها..بعد يي ناصر النذل ويسويها..والله اني تحريته ريال..كيف هانت عليه هذيج الايام صدق ان الرياييل مالهم امان...فديتك يا حمد يا ولد عمي.ما بتكون شراتهم..والله مب مفروض اني اثق كل هالثقه..اخاف الا باجر يي حد من الموظفين ويقول لليلى ان حمد خطب له وحده وانا اخر من يعلم...لا لا بسم الله علينا..اما انا اقرب وسيلة انتحار بسويها...بسم الله على عمري..ان شاء الله يصير كل خير..واعليه عليج يا ليلوه من وين ولا ين بتلاقينها...؟؟"
ويلست تحاول تشتغل بس وين تروم تركز في شي عقب الخبر الصاعق اللي سمعته من حمد...
........................
على الساعه 1:00 الظهر كان عبدالله وخليفه رادين من المحكمه وبعيد عن كل التفاصيل صدر القرار... بعد ثبوت الدعوى على ذياب وعدم تنازل ربعه عن التهم الموجهه له....وتقرر القرار النهائي لها اللي صدر بموجبه الحكم على ذياب بالسجن سنه وثمان شهور بتهمة التعدي على ممتلكات الغير واتلافها...وقرر خليفه يرمس ابوه وامه اول ما يوصل..وطبعا نزلوا البيت وقرروا يخلون كل شي على الله..ودخلوا الصاله ونشت لهم ام خليفه تطالع وراهم تتريا ولدها ييها ولا يكون برا بس ابطى ما دش عليهم...
ام خليفه بخوف: وينه ليكون بس صار به شي وما يا وياكم...
بو خليفه يوم شافهم لرواحهم فهم الموضوع من نظراتهم وشل عمره وطلع من الصاله لحجرته...
ام خليفه مدمعه: خليفه ارمس...
ودشت بدريه وسلمى الصاله وكانت ساره وياهن هي وحمده بس عفرا كانت في بيتهم...
عبدالله طالع كل اللي في الصاله وفهمت بدريه كل شي ونزلن دموعها غصباً عنها من الحزن والخوف بعد...
يلس خليفه حذال امه وهو يطالعها بنظره تعبانه..وساره مشفقه على ريلها وعلى امه من الحال اللي هم فيه...بعد ما عرفت وانتشر الخبر في البيت كله......
ام خليفه تصيح: ارمس يا خليفه حرقت فوادي...
خبرها خليفه كل شي بهدوء بس كان لهدوءه شكل ثاني ما قدر يسيطر فيه على كل احاسيسه...وما قدرت فيه ام خليفه تتحكم ولو للحظه في تعبها وانهارت طايحه عندهم على ارضية الصاله.....
شلوها المستشفى على طول وسط الخوف والدموع وكل احزانهم اللي ملت عليهم البيت ضيج وتعب...طبعا بدون مقدمات على اثر هالموضوع انهارت ام خليفه ودخلت المستشفى وساءت حالتها الصحيه وانجلب في هالوقت بيت بو خليفه فوق تحت من المشاكل والعبث وويع الراس....
وامرها الدكتور تم مرقده بالمستشفى لين ما تتحسن حالتها ويشوفون لها صرفه عسب ما تييها الجلطه...
..................
مرت ثلاث ايام على كل شي وفي امتحانات البنات والاولاد...وليلى بعدها للحين ما تعرف شي عن سالفة ناصر..وحصه كاتمة الموضوع..
وام خليفه بعدها في المستشفى...طبعا حصه مرضت بعد ما عادتها سمر وغابت عن الدوام يومين جلبت فيهن البيت فوق تحت...
حصه وصوتها ثجيل من الزجام: سمر طلعي برا بجلتج يا سخيفه يبتي لي المرض...
سمر بعدما خفت تضحك: وين اسير.؟ الحين انا اللي بشرد منج عشان ما تعاديني...
حصه وهي منسدحه: مب مشكله يالسخيفه والله براويج..اسمعي صوتي كيف غادي...
سمر: من يومه يخرع توج الا تدرين..؟
ونشت حصه بتلحق سمر ولو ان ما فيها حيل بس نشت لها وسمر شردت تحت وشافت بدريه لابسه عباتها...
سمر: وين بتروحين؟
بدريه: بسير عند امج بتيين وياي.؟
سمر: اكيد..
ساره: لاء سمر ما بتروح وراها امتحانات..
بدريه: اووه والله اني ناسيه يالله ردي ادرسي ماشي سيره..
ساره:الا كيف اختج الحين خفت حصوه..
سمر وهي تطلع فوق: مادري بها تعالن شوفنها مب بشكارتكن انا...
ابتسمت بدريه وساره لبست عباتها وسارن هن وسلمى عند ام خليفه المستشفى...
..................
في حجرته وفي عالم ثاني وفي لبس لبسه من يوم الجمعه اسمه الحب.... وخيال عايش به ما تنازل ولا لحظه عنه...كان هايم من راسه لين ريوله...غرقان في هواجسه وافكاره وحبه وهيامه..كان يشوف الدنيا بطعم ثاني وبلون ثاني...ولاول مره يذوق حلاوة الحب وتعذيب الشوق...اااه من الشوق...
متغير هالفتره وايد من يوم الجمعه وهو مب طبيعي..سرحان وتفكير..كل ما حاول يشل الصوره من باله مب رايم ولا في استطاعته يوصل لها...حاول قد ما يقدر يضحك على عمره ويبعدها عنه بس كان وجود هالصوره في عيونه غصبا عنه...صار كل ليله يحلم فيها ويتخيل كيف تبتسم وكيف تسولف وكيف تحركاتها...مب قادر للحظه انه يبعدها عن خياله...التفت على يمين وشاف دفتر صغير غلافه اسود..فتحها وانسدح على بطنه ويلس يشخبط فيه...

"ثلاث ايام مرن في حياتي غير....ثلاث ايام عشت الحب واغليتك...ثلاث ايام واتهجى كلام الطير...كلام اعذب من اعذب من تفديتك...رسالة حب شاهدها غلا وتعمير...على فوادي تربع واسكن ف بيتك...اقول اش قد انا عطشان وانت البير...دلو فكري نضح من كلمتي ليتك...اقول ال (مايصير) لعينك انت يصير..ولو حتى بثريا الكون حطيتك...حبيبي والغلا صوره بلا تصوير...صورها بكل رمشة عين انا ريتك...حبيبي والعطا يحتاج للتقدير...اذا صرحت انا اللي حيك وميتك...ثلاث ايام مرن في حياتي غير...ثلاث ايام عشت الحب واغليتك...ثلاث ايام لكن ما ادري وش التفسير...بس..ادري من ثلاث ايام حبيتك"

صك احمد الدفتر ورد ينسدح عدل وابتسم من قلبه وهو يفكر في سلامه اللي ما فارقت خياله ثانيه وحده..وشكل خصلات شعرها وهي تطير بالهوا ما اختفت عن عينه ولاثانيه وحده...ابتسم من قلبه ابتسامه عريضه..وانسدح وحط راسه على المخده...لانه بيحاول يفكر فيها بأكبر حجم يقدر له عسب يحلم فيها...


*للتنويه...

قصيدة "ثلاث ايام"
للشيخ فزاع...

...............
انتظرو الحلقه السادس عشر من الاخ البدوي الحبوب

اختكم
الغلا

[الرايقه]

السلاااااااااام عليكم
اشحااااااالكم ....
يعطيكم الف عاااافيه ونترياااا البقيه ,,,,

[البدوي الحبوب]

الله ايعافيج اختي وتسلمين على التواصل الجميل

ودقايق وبنزل الجزء السادس عشر

تحياتي لك

[البدوي الحبوب]

الحلقه السادسه عشر

الصبح الساعه 7:30 نزلت ليلى متلبسه وشكلها مستانسه اليوم غير عن كل يوم...لبست قميص عنابي وتنوره بيضا..ويلست في الصاله..وشافت امها يايه من صوب الزرع وداخله من باب الصاله....ونشت لها تسلم عليها...

ليلى تيلس على الكرسي: ش اصبحتي اليوم يالغاليه.؟

ام راشد: والله يا بنتي ظهري يعورني..يعورني وايد...

ليلى: فديتج والله..اليوم من ارد من الدوام بهمز لج وبحط لج فازلين...

ام راشد: ما منه فايده كل يوم نغطس اعمارنا فيه..ما ييب العافيه الا الله...

ليلى: امايه فديتج لازم تتعالجين علاج طبيعي..مب زين تمين جي..

ام راشد: على الله..خليها على الله..

ليلى: سمعي حبيبتي انا باخذ اجازه وبيلس وياج شهر كامل كل يومين في الاسبوع بنسير المستشفى تاخذين العلاج..

ام راشد: ان شاء الله خير يا بنتي..

ودق تلفون ليلى....

ليلى: هلا حصوه..

حصه بحزن وصوتها ثجيل: صباح الخير حبيبتي...

ليلى: صباح الورد والجوري...فديت هالحس الغاوي...

حصه: جب عن الطنازه ..من زين صوتج..انا الحين مريضه ومب متبرضتلج...

ليلى تضحك: زين شطوره...

حصه وقلبها يعورها اكثر: ما شاء الله مستانسه..

ليلى تضحك: مادري بلاني اليوم احس بفرحه غريبه..براويج يوم تيين شو لابسه..

طالعت ام راشد بنتها تبى تشوف شو لابسه...بس ما انتبهت...

حصه وضيج الكون فيها: خلاص حبيبتي الحين بشوف اظهري انا برا...

ليلى مستغربه: شوفيج غاديه اليوم مؤدبه..حبيبتي وحبيبتي ..على العاده تزفيني اذا ابطيت..ليكون فيج شي..؟

حصه تحاول تخلي عمرها عاديه: لا مافي شي اظهري اتأخرنا وايد..يعني ما تيين الا بالزف..خلاص تعودتي..

ضحكت ليلى وبندت عن حصه..وسلمت على امها..

ام راشد بعفويه: شو لابسه..؟

استغربت ليلى بس ابتسمت وبطلت عباتها: قميص عنابي..

ام راشد: وشو يعني اذا مدري وشهو؟

ليلى مبتسمه: ولا شي بس حصه تحب هاللون...

ابتسمت ام راشد ويلست تضغط على ركبها المتألمه...وليلى طلعت عنها...وركبت ويا حصه وعقب ما سلمت..

ليلى: شو فيه ويهج ؟

حصه اللي صدق شكلها كئيب: ماشي ليش فيني شي؟

ليلى: صدق والله شكلج وايد تعبانه...

حصه: مزجمه وحالتي حاله....

ليلى تطالعها بنظره غريبه: بس..!!!؟؟؟

حصه تغير الموضوع وترمس الدريول: كريم حط الاف ام...

حط الدريول الاف ام وكانوا حاطين هند ....وعلى انغامها كانن البنات متغشيات وحصه تطالع من الجامه على برا..وليلى لفت نظرها البنات اللي واقفات على اطراف الشوارع يترين الباصات عسب الامتحانات وتشوف في عيونهن لهفه متى يي اخر يوم ويفتكن......

كانت هند تصدح بصوتها العذب في اركان السياره وحصه سرحانه وياها....تتأمل بألم كلماتها..وتحس بشعرها واقف من الخوف والرهبه والحزن على ربيعتها اللي فشلت في قصة حب دامت على مر السنين..



"انا ما كنت ابي اكثر من اللي فيك لاقيته ..حنان ورقة وطيبه وقلب يا كبر بيته..تسكني وسط صدرك..بإدينيك جرح داويته..كفايه بسمتك هذي تنسيني اللي عانيته....كفايه طلتك تملى حياتي ياللي حبيتك..بعدما جيتني بحبك بعد كل اللي سويته..بيبقى حبي لك وحدك..وغيرك رحت وخليته..انا طوعك تحت امرك مادامك قدري عليته.."



ليلى تقطع الصمت: حصوه فيج شي والله فيج شي..

حصه انتبهت وعيونها مدمعه من تحت الغشوه: هاه لا والله بس ضايج صدري خايفه على امي في المستشفى..وراسي مصدع بعدها الحمى ما خازت عني...

حطت ليلى ايدها من ورا الغشوه على يبهة حصه: فديتج والله وايد محمومه..ليش داومتي..

حصه والعبره خانقتنها: غبت ثلاث ايام غير الويكند بس يكفي ابى اداوم...

ليلى: خلاص اليوم تردين بدري تفهمين...

حصه: ما اقدر ابى اتم وياج..

ليلى انصدمت: انتي شو فيج والله تصرفاتج ترعبني احس فيج شي..حد من اهلكم استوى عليه شي؟ عمتي عايشه شي صار بها..؟

حصه: لا تحاتين امي بخير وذياب قال خليفه بيسير اليوم يقدم استئناف مادري شو في المحكمه عشان يظهرونه...

ليلى: زين ليش ضايجه..

حصه تتنهد: بطلي الباب وصلنا...

ونزلت ليلى هي وحصه وسارن الدوام...
...................

اليوم هو الثلاثاء يعني رابع يوم يكون فيه ذياب في السجن...بس خليفه كان مصر انه يتعامل بمبدأ الواسطه فوق ال "........." ويستخدم كل الطرق الملتويه عشان يطلع اخوه بأي وسيله...كان وايد خايف على امه وابوه واكثر من جي خايف على مركزه وسمعته..خايف على مكانته ونفوذه..عسب جي قرر يكدس وقته ويكرسه ويطلع ذياب من الوهقه اللي هو فيها..ومب بس جي خليفه كان طموحه اكبر من هالشي..وقرر الف قرار في نفسه...قرارت خلت اخوه عبدالله يسحب نفسه من الموضوع..لانه ما يحب يحط نفسه في مثل هالمواقف..خليفه كان مب بس يفكر يطلع ذياب..كانت افكاره تروح وتيي انه يطلعه براءه بعد ويخليه برئ براءة الذيب من دم يوسف...ويثبت للكل ان مب هذي تربيتهم لعيالهم..ويخلي الكل يعطيهم نظرة الاحترام والهيبه...وان الاسم والمنصب يلعبون اكبر دور في تربية الابناء..وان أي عايله واسم كبير لازم عيالهم يكونون قدوه ومثال...هذي للاسف كانت نظرة خليفه...

في هالفتره اهمل شغله وبيته وكرس نفسه لقضية ذياب ومعزم هالمره يطلع وبيطلعه بإيده بدون محامين....



في بيت بو خليفه الساعه 10:30 واقفه البشكاره وماسكه باب الصاله الزجاجي..وبدريه يايه من بعيد من صوب المطبخ التحضيري يايبه وياها دلتين شاي وقهوه..وماسكه صينيه ثانيه مغطيتنها بقصدير بشكل عدل....

بدريه مبتسمه: ناتالي مسكي وياي لين ما اتغشى..

مسكت ناتالي الاكل ونزلت وياها وشافت ساره يايه من بعيد لابسه عباتها بيروحن عند عمتهن...وماسكه دلتين هي الثانيه...

بدريه مبتسمه: ليش سويتي مب قلت لج امس انا بسويه ليش عبلتي على عمرج..؟

ساره: مب مشكله شلي اللي سويتيه..وانا بحطهن في صالة بيت عمي مبارك الحين بترد سمر وخليفه وبناتي وبيشربون الشاي...

بدريه: انا بترياج هني عبدالله في السياره..

ساره وهي تروح: ما بنسير ويا الدريول.؟

بدريه: لا عبدالله قال يبى يسير ويانا بعد...بسرعه اترياج..

وسارت ساره وفي نص الحوش يتها البشكاره وخذت عنها الدلال...وهي راده لبدريه...شلت عنها الاكل وبدريه تمت شاله الدلال..

ساره: الله ريحته تجنن شو مسويه في الصينيه..؟

بدريه:جباب وعسل و قروص ولبن...

ساره مستغربه: متى تفيجيتي تسوينه...؟

بدريه تحط الاكل جدام في السياره: الصبح نشيت بدري ...

وركبن السياره وعبدالله يالس فيها يترياهن...ويوم صكن البيبان...دخل الدريول بالسياره الثانيه...ونزلت سمر وركضت لهم وبطلت باب السياره ويلست ورا بمريول المدرسه...

سمر: الحين واحد من اثنين يا تودوني عند امي..يا ما بتروحون انتوا وانزلوا وياي...

ساره طالعتها وابتسمت بس ما رمست...وبدريه تمت تطالع عبدالله اللي ساكت ما رمس...

عبدالله بحنان: زين يعني ما بنروح يالله انزلن...

بدريه شهقت: لاء عمتي ماروم ما سير لها...

سمر: ليش؟

عبدالله مبتسم: انتي خيرتينا ونحن اخترنا..خلاص ماشي سيره...

ساره: سمر انزلي عمتي تتريانا..يعني ما نسير لها عشانج؟

سمر: عمتكن هاه قلتنها..انا اسمها امي..تعرفون شو يعني امي..انتن بس الا عمتكن..عبادي حبيبي ارجوك لا تردني..

ابتسم عبدالله: اوكي تعالي ويانا..

سمر بطلت باب السياره: ثواني وبردلكم بسير اغير..تعرفون مب حلوه اسير جي لازم اكشخ..

حرك عبدالله السياره بيسير عنها..وبطل الجامه وهي تركض صوب الصاله: ماشي سيره يلسي في البيت ..جان تبين تروحين عند امج خلج بلبسج...

سمر تشهق من بعيد: عبادي خلاص بسير بمريولي...

وردت تركض وهم يضحكون عليها..وركبت وياهم وساروا عند ام خليفه....

دخلوا على ام خليفه اللي شكلها تحسنت من صدمتها..ولو انه مبين عليها التعب شوي..ويلسوا وياها واستغربت من سمر...

سمر: امايه انا ييت...

عبدالله: زين يالسخيفه هي ما تشوفج يعني؟

بدريه تضحك...

سمر:زين امي انا اليوم حليت الامتحان كله صح...

ام خليفه: يعني بتييبين 100..؟

سمر: هيه..

عبدالله: اقص ايدي ان يبتي شي..

ساره:وانا اقول حمدوه بنتي طالعه على منو..ثرها الا عمتها..

سمر بنظره بارده: ودها تكون شراتي..على الاقل انا ما انجح جوازاً وبالدز...انا اتفوق واطلع الثانيه..

عبدالله يتحرش فيها: هيه ابويه وحليله يراكض لج في المدرسه يدور لج على كلاس ضعيف وكل بناته كسالى..عسب جي تطلعين الثانيه..مب ذكاء فيج...

ساره وبدريه ميتات من الضحك....وام خليفه تطالعهم مبتسمه...

سمر:ودك انت تييب بنت شراتي حلوه وشاطره...

ابتسم عبدالله بس مارد عليها...

بدريه: وين عمي غريبه ما شفته اليوم؟

ام خليفه اللي قلبها للحظه عورها من رمسة سمر:عمج قال بيسير مدري شو بيسوي تحت زقروه وبيرد الحين..

ساره: اقول انا ما يستغني عن عمتي..

بدريه: وايدين ما يستغنون عن حريمهم الله يخليهم لبعض...

عبدالله يطالعها مبتسم وفي خاطره يتفداها...

ساره: حليلنا..

عبدالله: ساره وين خليفه ظهر من الصبح..

طالعته ساره وحس انها بتكذب عليه: مادري به يمكن سار المؤسسه...

عبدالله: اها..

ودخل عليهم بو خليفه وتريقوا كلهم ويا بعض..ويلسوا يسولفون ويا ام خليفه اللي عرفوا عقبها انهم بيرخصوها اليوم المغرب او عقب صلاة العشاء..وعقب ما يلسوا وياها شوي نش عبدالله وشل ساره واخته سمر وردهن البيت..اما بدريه اصرت انها تيلس عند عمتها لين ما يطلعونها...
.................

في الشركه كان اليوم اخر يوم دوام لمشاعل وحتى مب دوام رسمي كثر ما انها يايه تشوف الموظفات وتسلم عليهم وتاخذ ورقة الاجازه من الاداره..

كانت مشاعل مستانسه انها بترد الكويت واللي مفرحنها اكثر انها بتشوف اهلها بعد غيبه طويله...بس رغم هذا كانت متأكده ان شوقها بيشدها لحمد...وانها مهما قصت على عمرها مستحيل تقدر تقاوم شوقها له...مرت على مكتبها وبطلت الباب وابتسمت كان فاضي وكل شي فيه مرتب ومنظم بطريقه دقيقه...وقررت تقضي اليوم كله عند ليلى وحصه اقرب ثنتين لها في الدوام....وسارت لهن المكتب...وشافت حصه حالتها حاله ويا الزجام وليلى مقطعتنها تقطيع بالطنازه...

ليلى: والله بنوله عليج يا مشاعل وايد...

مشاعل تلعب بالقلم على الاوراق: انا بعد والله...

حصه بصوتها الثجيل: لا تنسينا وهالله الله بالاتصال..وانتي راده اذا نسيتي نفسج لا تنسين هديتي..

تضحك مشاعل على صوت حصه اللي يموت من الزيغه بسبة الزجام..

ليلى: دخيلج حصوه من تبين ترمسين اكتبي في ورقه ما نبى نسمع والله مروعتنا...

مشاعل: ما تشوفين شر حصوه..

حصه تتنهد: الشر ماييج..

كانت حصه شاله هم الكون على راسها بس اللي مساعدنها اكثر انها مريضه والمرض مخبي بعض ملامح الحزن اللي في قلبها بعد خبر البارحه...كانت ليلى تسولف لمشاعل اللي مندمجه وما حسن بالوقت وهو يمر وهن ضحك واستهبال وسوالف عن الكويت والامارات...ما لاحظن مول ان حصه مب وياهن...

حطت حصه راسها على المكتب ويلست تفكر...
" عقب ما تعرف شو معقوله يصير بها؟؟...معقوله تصيح؟معقوله تطلع من الشركه؟..معقوله انها تتصرف بجنون.؟ لا لا هذي ليلى مب أي انسانه ضعيفه أي شي يهزها...بس بعد هذا ناصر مب أي حد عند ليلى ويل حالي اسميها بتتخبل لو درت...اخ بس لو اروم اجتلك يا ناصر..انا ربيعتي ما مر عليها يوم حلو وكل ايامها حزن ودموع..وحاطه الامل بعد الله فيك ...تخيب رجاها؟؟...اسميك نذل وانا كارهتنك من يومي.."

تنهدت حصه وغصبا عنها دمعت عيونها...وما حست الا بإيد ليلى على كتفها وهي تحاول ترفع راسها...

ليلى: غناتي نشي والله بتذبحج الحمى..؟

حصه رفعت راسها: وين مشاعل؟

ليلى: ظهرت بتسير تشوف اوراقها خلصن ولا لاء..

حصه بتعب: اها..

ليلى: حبيبتي ردي البيت حرارتج مرتفعه...

حصه وعيونها منترسه دموع:مافيني شي...

ليلى: ادري مافيج شي بس انتي محمومه لازم تردين البيت...

حصه تمسح دموعها اللي ينزلن بغزاره على ويهها: ليلى ارجوج كوني شوي قاسيه ليش انتي طيبه هالكثر..

ليلى ابتسمت لها بحنان وهي مب فاهمه شي: شو تخربطين غناتي نشي بوصلج البيت...

حصه: مابا اسير البيت الحين صبري اليوم بداوم دوام كامل فضيحه مشاعل اخر يوم وبتسافر...

ليلى: لا اله الا الله الحين مشاعل اهم ولا صحتج...؟وبعدين كلهن اسبوعين وبترد هني...

حصه: ليلى ارجوج مابا ارد البيت الحين...

وهن يرمسن وليلى تقنع حصه تروح وياهن دق الباب ..وتشيلن عدل...

ليلى: اتفضل..

حمد: السلام عليكم...

حصه بخوف لا يرمس عن شي: وعليكم السلام هلا حمد..

ليلى: وعليكم السلام..

حمد: شخباركم...

حصه تأشر من ورا ليلى وترمسه بالاشاره ان ليلى ما تعرف شي...

حمد ابتسم بخبث: حصوه شو هالصوت الغاوي؟

ابتسمت حصه بخجل: حتى انت..

ليلى يلست على مكتبها مول ما تداني هالانسان...

حصه: هاه شعندك ولد عمي شو تبى؟

حمد: ماشي سمعت انج مريضه وقلت ايي اشوفج متي ولا بعدج حيه..؟

حصه: حرام عليك بسم الله على عمري..

ليلى بويه مجلوب: بسم الله عليها ان شاء الله عدوينها...

حمد: منو تقصدين..؟

ليلى: افهمها مثل ما تبى...

حمد مبتسم: زين يا ليلى مب راد عليج الله يعينج على ما ياج..

ليلى تطالعه باحتقار: الله يعين الجميع...

حصه كانت ميته من الخوف لا يقول حمد شي وكانت تطالعه بتوسل ما يرمس وان مالهم دخل في الموضوع واحسن لليلى تسمع من حد ثاني ولا تسمع من حصه وحمد....

ليلى: يالله حصوه ما تبينا نرد البيت..؟

حمد: ليش تردون ماشي عندكم دوام؟

ليلى: بنت عمك ميته من الحمى هب قادره تتنفس شو ميلسنها هني..

حمد عاقد حياته: نشي بوصلج البيت..

كان هاللحظه احساس حصه انها تباه يغمى عليها وترد تسمع الجمله مره ثانيه ويغمى عليها...وترد تسمع الجمله مره ثالثه ويغمى عليها...وترد تسمعها حتى مره رابعه والف ومليون...

ليلى: يالله نشي بيوصلج ولد عمج..

حصه: لا ماله داعي انا قلت مب سايره الا يوم يخلص الدوام..

حمد بجديه: كيفج هو؟ يالله نشي ما اريد اتعامل وياج بأسلوب ثاني..

كان حمد جاد و يمثل انه معصب صدق من الخاطر..ما يباها تتم وهي تعبانه وكان شكلها كاسر خاطره...ويوم شافتهم ليلى يطالعون بعض وهو محرج..ظهرت وخلت لهم المكتب واستحت تتحرا حمد يبى يرمس حصه على انفراد...

حصه بحزن: تحمل تقول لها شي...

حمد: للحين ما درت؟

حصه وهي تدمع: لاء...

حمد قلبه عوره من دموع حصه وغير الموضوع: زين نشي يالله بردج البيت..

حصه: بتصل في الدريول..مالها داعي تتعب نفسك..

حمد:اسمع انتوا...يالله امشي جدامي ناقصني مرضى انا في الشركه..اقولج يالله نشي بتردين وياي البيت بسرعه...

نشت حصه وهي دايخه ..دايخه حمى وحب وحزن...ما قدرت تسيطر على مشاعرها وهي تلوي على مشاعل وانفجرت شوي وصاحت واللي يشوفها يقول مشاعل ربيعتها الروح بالروح..ما يدري انها منفجره من خوفها وحزنها على ليلى....وودعتها وركبت سيارة حمد اللي بيوصلها البيت...

.
.
.
وفي السياره...كان الصمت شي طبيعي انه يخيم على المكان...حصه يالسه ورا وحمد يسوق ..كانت متغشيه وتتنفس بصعوبه من الحمى والضيجه اللي تحس بها في صدرها....

حمد حب يكسر حاجز الصمت وحط قصيده موجوده عنده....طبعا القصيده كان لها الف معنى ومعنى صح انه مب متعمد بس شكلها الصدفه خير من الف ميعاد...

"لا تسألي عن ذكرياتي الحزينه...قلبي واعرفه ممتلي هم وجروح..ولا تكشفي اسرار فيني دفينه..مرات يكون السر اجمل من البوح..شو يسوي اللي ضاع منه ضنينه ..شو يسوي اللي عايش سنين مجروح...اتكلمي يا بنت وش تنصحينه..الحظ ضده للاسف وين ما يروح...فيني هموم تعيش فيني سجينه..شوفي عيوني كيف اثر بي النوح..ما جني عايش جني والله رهينه..ما بين بعدي والالم عشت مذبوح...دمعي فضحني بس لا تفضحينه ولا اقولج افضحي القلب والروح..ما عندكم الا حطام السفينه..ولا تراني منتهي من عصر نوح"



خلصت القصيده وحصه عايشتنها كلمه بكلمه...خاطرها تتغلغل في خلايا قلب هالانسان وتكشف اسراره..بس الظاهر انها لازم تجتاز الف بوابه وبوابه عشان توصل لاول محطه في قلبه....

حصه تقطع الصمت:وايد حلوه الكلمات..

حمد ساكت وما رد عليها..الشي اللي خلاها تستحي وتندم انها رمست.... بس شوي وتدارك الموضوع يوم وقفوا عند الاشاره...

حمد: قلتي شي؟

حصه: لاء...

حمد مبتسم: هيه وايد حلوه القصيده احسها قريبه مني...

حصه في خاطرها"يوم انك سمعت ليش تستهبل"

حمد وهو يطلع السيدي من مكانه...ويمد ايده لها ورا...

حمد: خذيه..

حصه: لا شكرا ماريده...

حمد بحزم: خذيه...

شلت حصه السيدي وتمت تطالعه مبتسمه...

حصه: انا ما قلت اباه...

حمد: زين عايبنج ماباه يتم في خاطرج...وبعدين بسير اخذ لي غيره...

حصه ابتسمت بخجل:مشكور ولد عمي...

حمد طنشها ووقف حذال البيت وهرن عشان يفتحوا له...

حصه: لا عادي خلاص بنزل هني..

ويت بتبطل الباب...

حمد: خلج هني بدخلج لين الفله...

حصه: ماله داعي خلاص...

حمد: اقولج سمعي الرمسه وراي شغل هب متفيج لدلع البنات...

حصه: ان شاء الله..

وبطلت البشكاره الباب ودخل السياره لين باب الفله الامامي...

حصه وهي تفتح الباب: اقرب عندنا..

حمد: وراي دوام مشكوره ..سلمي على الاهل..

حصه وهي نازله: الله يسلمك ما تقصر يا حمد...

حمد: زين صكي الباب...

ونزلت حصه ودخلت داخل وحمد رد الشركه....
.....................

الساعه 12:45 ردت عفرا وحمده من المدرسه...وعلى طول دخلت حمده تتسبح ورقدت بدون حتى ما تكلف على عمرها تسير تسوي شي ولا تنشد عن يدتها...اما عفرا تسبحت ولبست وسارت على طول بيت يدتها وشافت امها هناك يالسه في الصاله تدرس سمر في كتاب الرياضيات...

ابتسمت وسارت تيلس عند امها كان ويهها مشرق وفي عيونها بريق غريب..له شكل ثاني..حتى ابتسامتها كانت توقف شعر امها اللي هي امها..

عفرا: شحالج امايا..؟

ساره: بخير غناتي شو سويتي اليوم؟

عفرا والابتسامه ما فارقت ويهها: الحمدلله..كل شي مثل ما اباه يسير...

ساره وفي عيونها نظره واثقه من بنتها: الله يوفقج وين حمدوه.؟

عفرا: رقدت اظن مب متأكده...(وبتردد) امايه؟

ساره وهي تطالع حل سمر في الامتحان التجريبي اللي تدرسها فيه: هاه غناتي..

عفرا وحمره شديده تعتلي على خدودها بشكل ملاحظ: وين عمتي بدريه؟

ابتسمت ساره ورفعت راسها تطالع بنتها: في المستشفى..

شهقت عفرا قبل تكمل امها رمستها: امايه شو فيها.؟ شو صار عليها.؟ عمتي حبيبتي فديتها ليكون تعبانه..متى بنسير عندها...

عفرا اللي ما تنطق مول وان نطقت طلعت درر من شفايفها..اليوم لاول مره من يوم تعلمت الكلام تتكلم بهالاندفاع وبهالسرعه...كل اللي تعرفه انها ما تروم تتحمل لين ما امها تنطق وتقول شو صار في حبيبتها بدريه....

ساره مبتسمه ومبطله عيونها بدهشه على الاخير: عفاري شو استوى بج..؟ حبيبتي هدي..بتسير تييب يدتج من المستشفى بس..

عفرا تتنهد بخجل: امايه طيحتي قلبي...

ساره: فديت قلبج والله...من متى تحاتينها هالكثر تراني بغار وانا امج ما تحبيني هالكثر...

ولوت عفرا على امها من ينبها...وابتسمت وهي تحبها على خدها.....

عفرا: من يسواج انتي من يسواج..وانتي غناة روحي..فديت هالويه يا ربي..

ضحكت ساره وطالعت بنتها اللي شبه تغيرت 50% من شخصيتها الصامته...لشخصيه محبه مبتسمه...ساره فرحانه وهي تشوف ويه بنتها مشرق وعليه الابتسامه العذبه السحريه اللي نادرا ما تنشاف صارت الحين كل شوي مرتسمه على ويهها....

سمر: حظج يا عفرا عندج ام....

للحظه ساره قلبها عورها: وانتي يا سمر بسم الله على امج اليوم بتطلع وبتشوفينها...

عفرا: اكيد وبنسوي لها حفله ونحتفل اكثر يوم بيطلع عمي ذياب....

ساره: ومن قالج ؟

عفرا: ابويه اليوم وهو يتريق الصبح قالي انه بيطلعه بيطلعه ولا ما يكون خليفه ولد مبارك...فديتك يا بويه..من حقي افتخر به..

ابتسمت ساره: اول مره تهملين دراستج سيري ادرسي وراج ثانويه عامه..لا تشغليني خلني ادرس عمتج...

عفرا متبسمه: اول مره انتي بعد تقولين لي ادرس على العاده تقولين لي يكفي ارتاحي..

ساره: اقولج يوم اشوفج هالكه عمرج دراسه الحين روحي درسي ووعي اختج تدرس...

طلعت عفرا وردت الفله بتستريح شوي وعقبها بتكمل دراستها...كانت عفرا شوي تحس عمرها اختلفت وتغيرت للاحسن في نظر الناس..يمكن الفتره اللي بدريه يالسه فيها في البيت خلتها تتطبع بطبعها وما تتعامل الا مثلها....
.
.
فوق في حجرتها محد يدري للحين انها ردت البيت كانت عاقه عمرها على الشبريه بعباتها وشيلتها ..مرهقه لابعد الحدود...تحس عمرها منتهيه والحمى ذابحتنها...قد ما تقدر يالسه تجلب ويهها علىالمخده عشان تحس ببرودتها وتخفف شوي من حرارة جسمها...للحين ما صلت الظهر وتحس مافيها حيل تشل عمرها وتغير ثيابها....كانت غرقانه في تعبها واحلامها وويه حمد وعيون ليلى وحزن الخبر الشنيع..وشوي ويبتطل الباب وصوت بشع ما تحبه داخل يغني...
"عايز الحأ...ايوه الألب بحبك دأ...عايز الحأ..ايوه حلمت ان انت تكون لي واني اكون لك..وفات الوأت..وجيه الوأت..وانا مضطره اأولك لاء لاء لاء...استنيتك عمر بحالو...وانت بعيد....كان من حأأي اني أأبل حد جديد...يعني ابتدت كل الحكايه معدش فاضل غير سكوت... وفات الوأت..وجيه الوأت..وانا مضطره اأولك لاء لاء لاء..جيت متأخر والايام مبتستناش..جاي تأولها لا من فضلك ما تأولهاش..ما يبتدي بعد النهايه..من بعدما الايام تهون.... وفات الوأت..وجيه الوأت..وانا مضطره اأولك لاء لاء لاء"

وفرت الكتب على الطاوله بصوت عالي....وعقت عمرها على الشبريه وهي للحين ما شافت حصه..اللي شوي وتنش تمسح فيها الصاله والدري والممرات وحوش البيت والزراعه والشارع العام...بس تمت حصه ساكته بتشوف شو تسوي هالسمر...

سمر تنش وهي ترمس عمرها: يا ربي ما صليت للحين...

ويوم شافت حصه منسدحه على الشبريه شهقت بصوت عالي: عوذ بالله منج من وين ييتي..

حصه وهي ما تشوفها لانها مب طايحه على ظهرها وبصوت كله تعب: جب...

سمر تضحك: بعده صوتج مارد...؟

حصه: اخرسي وطلعي برا..سمر يكفيني اللي فيني منج...

سمر: الله يكون بعونج اختي...

حصه ونشت وسمر واقفه مكانها..ونزلت العباه والشيله..وسمر دخلت تتمسح وهي بدلت ثيابها وردت تنسدح على الشبريه...طلعت سمر وصلت وحصه مب رايمه تتحرك من الحمى اللي فيها....

نشت سمر بثقالة دم تبى تغلس على حصه يوم انها تدري انها ما بتروم تتحرك وهي تعبانه...ويلست حذالها على الشبريه..

سمر وترمس مثل العياييز ولبست شيله وتلثمت: يا وخيتي خطاج السو عساه يا ربي في العدو ولا فيج...

حصه مغمضه عيونها ومب متفيجه لسخافات سمر..

سمر وهي متثلمه: شوفيج يا وخيتي..ما تتحجين..؟

حصه بتعب: شو اللي جلب اصلج كويتيه...من متى نقول تتحجين؟

سمر: عاد ربج يا وخيتي التغيير مطلوب...

حصه تضحك: سمر ذلفي من ويهي هب فايجتلج...

سمر تنزل الشيله وتفرها على الارض: زين انا رديت سمر العاديه...شي يعورج اختي..

حصه بتعب: لا بخير الحمدلله ممكن تفارجين ابى ارتاح شوي...

كانت حصه ترمس وهي ما تطالع سمر مول من التعب اللي فيها..مب قادره حتى ترفع راسها وتجابل اختها...وعاد سمر بغلاسه يلست تطفرها...

سمر وهي تضغط على بطن حصه: هني يعورج؟

حصه: هيه بطني مزجم...سمر حلي عن سماي لا اقوم العنج والعن اليوم اللي تعبلت فيه امي ويابتج...



سمر: اختي انتي تعبانه نوديج المستشفى؟

حصه: ااااااااااااه يا ربي سمر نشي ماريد اتعب عمري واقوم اضربج...

سمر: اليوم رحت عند امي..

حصه: مبروك انا سرت لها البارحه سمر ارجوج طلعي..

سمر: زين اختي ما بتتغدين ويانا..؟

حصه: مب مشتهيه شي..طلعي برا وصكي الباب..

سمر: بس عشانج مريضه ما بضايقج وبدرس في الصاله..

حصه : كل هذا وما ضايقتيني عيل لو فكرتي شو بتسوين؟

سمر وهي تنش بتطلع وتاخذ كتاب ودفتر الرياضيات: زين بهالمناسبه السعيده انج ما ترومين تتحرشين فيه..بقولج نكته..

هني حصه نشت واستجمعت كل اللي بقى فيها من قوه..وفرت المخده علىالباب..وسمر يوم شافتها جاده شردت وصكت الباب بقو...وحصه سارت وقفلته بالمفتاح وهي تسمعها تركض ركض على الدري شارده عنها....
في الشركه حوالي الساعه 1:30 كانت ليلى يالسه في المكتب بروحها اليوم مول ما شافت ناصر وهو بعد ما شافها...اما مشاعل يلست وياها شوي وعقب راحت ويلست شوي ويا حمد ومن عقبها سلمت على ليلى والموظفين وياها اخوها وطلعوا على طول مطار دبي رادين لحبيبتهم الكويت....

ليلى بروحها مبتسمه ما تدري ليش بس تعرف انها من الصبح مبتسمه...وبعد ثواني من تفكيرها مر عليها العامل اللي ييب لهم الشاي كل يوم...

او يمر بس جي المهم هو عامل نظافه بس وايد يحبونه....

حبيب: سلام عليكم مدام..

ليلى مبتسمه ومتحجبه عدل: اهلين حبيب..وعليكم السلام..ليش ما رديت البيت للحين؟

حبيب: بس اليوم خلاص شركه فاضي...

ليلى: ليش ان شاء الله عشان مشاعل بتروح..

حبيب: مدام مشاعل ومدام حصه مريض...كل واحد يروح...

ليلى: وانت شدراك ان حصه مريضه وراحت البيت ..

حبيب: انا يعرف كل شي يصير هنا في الشركه...

ليلى: حشى استخبارات...

حبيب: ايوه..

ليلى: بل عليك حتى هالكلمه عارفنها..

حبيب: يعرف كل شي مدام..

ليلى: زين خلاص روح جابل شغلك هب فايجتلك...

حبيب: مافي شغل انا يروح عند بابا ناصر..

ليلى وقلبها يدق بقو وتحاول ما تبتسم: شو تبى به..؟

حبيب مبتسم: يريد يقول حق هو مبروك عشان في زوج...

ابتسمت ليلى بس حست بشي غلط سمعته: شو؟

حبيب يأشر على صبعه اللي في ايده اليسار وهو مبتسم: بابا ناصر يسوي زواج..

حست ليلى انها ما تروم تبلع ريجها اصلا نشفت ما كان فيها ريج من الصاعقه بس طبعا ما صدقته...

ليلى و شفايفها ترتجف: من بابا ناصر؟

حبيب وهو يطلع: مدير مال قسم..

وطلع وخلاها وهي بعدها تحت تأثير الصدمه او احسن الكذبه اللي هي سمعتها ..
"خرف هالهندي وحليله (وقلبها يدق بقوه فضيعه) شو يخربط"

وطلعت واقفه عند باب المكتب وشافت حمد نازل من فوق اللي ما قدرت هالمره تجلب ملامحها في ويهه وهي تستجدي ربها يخليه يرمس ويقول لها شي....

وخطف من عندها رايح البيت...بس قبل ينزل...

ليلى : حمد...

التفت عليها وطالعها وعاقد حياته وعيونه في عيونها...والنظره الاليمه تقطع له قلبه...مسحة الحزن في عيونها تعبر عن الف ومليون قصيدة الم مجروحه..رغم قوة هالشخصيه بس الحزن مبالغ فيه اللي مرسوم في سواد عيونها...

حمد: امري.خير في شي؟

ليلى بتردد: لا بس حبيب...

حمد بحزم: شو سوا غلط على حد فيكن..سوا شي بفصله تراني؟

ليلى بخجل: لا لا بس..هو يقول شي..

حمد: شو يقول؟

ليلى: يقول بيسير عند ناصر ...

حمد: ويعني؟

ليلى بخوف: لا لا ماشي

حمد حس انها عرفت: خير ليلى في شي؟ قولي لي بساعدج؟

ليلى استحت وغيرت رايها: لا حمد روح مافي شي؟

حمد اللي ما صدق انه بيشرد من هالموقف: مع السلامه ليلى...

ليلى ما ردت عليه ودخلت وحس كفوفها ترتجف...وسمعت حبيب نازل من فوق ووقفته وهو ساير وشافته مستانس وماسك 500 في ايده...

ليلى بخوف: وين كنت؟

حبيب فرحان: شوفي بابا ناصر سوي عروس يعطي كل واحد هني 100 بس انا غير يعطي 500...الله يبارك في هدا رجال...

ليلى مغمضه: أي عرس؟

حبيب: عرس بابا ناصر يسوي خطوبه...

ليلى بعصبيه: انت شو تخربط.؟

وقبل ينطق حبيب كان ناصر نازل من فوق وشاف ليلى وحس الدنيا تدور به..وقلبه للحظه كان هادي بس انتفض وكأنه مارد راقد من ملايين السنين وتوه حس بالدنيا..وحبيب اول ما شافه راح على طول وليلى تمت واقفه عقب طنشته ودخلت المكتب وهو دخل وراها....

كانت تتنافض وعيونها تحرقها ما تبى تضعف وتتمنى انها ما فهمت شي وان كل اللي سمعته كذب في كذب..وان هالهندي خرف او انها تحلم وما سمعت شي بس خرابيط واوهام...

ناصر قطع الصمت: شحالج ليلى؟

ليلى ما رفعت راسها عشان ما يشوف الحمره اللي حارقه خدودها: الحمدلله وانت؟

ناصر وقلبه يعوره: بخير...

ليلى سكتت وهو سكت...

ناصر: شو كان حبيب يسوي هني؟

ليلى بارتباك وتعب وحزن: ولا شي بس يتخبرني وين حصه؟

ناصر: بس؟

ليلى: و......

ناصر: و شو؟

ليلى رفعت راسها ولاول مره تسوي هالشي من يوم انخلقت ولاول مره يتبعثر كبرياء ليلى للحظه وعيونها منترسه دموع: يقول كان يبارك على الخطوبه...

ناصر نزل راسه وتم ساكت...

ليلى بصوت متقطع ومبين ان في عبره خانقتنها:ناصر صدق؟

كانت تستجدي كل شي ينبض بقدرة ربي انه يقول" لاء شو هالخرابيط مستحيل اخليج يا ليلى انتي كيف تفكرين؟"

بس للاسف احلامها تبخرت يوم سمعت ناصر يرمس...

ناصر بتردد: هيه...

ليلى انجتلت في هاللحظه..كان ودها ان شي يستوي بها...تموت تنجلط ..تنفتح الارض وتبلعها وما تسمع شي...تتمنى أي شي يصير هاللحظه...او ان ناصر يرفع راسها ويقول "انتي تصدقين اني ممكن اخليج....؟؟!!!!!"

طالعته ليلى بأسف ومراره بس رغم ان دموعها تيمعت في عيونها بس ولا نزلت منها دمعه وتمن متيمعات في محاجر عيونها...لبست شنطتها وفرت الغشوه على ويهها...

ليلى بصوت يصعب على العذاب يزيده : مبروك الله يوفقك....

وطلعت وهو تم واقف في المكتب ولا قال ولا نطق بحرف واحد...كان صدق مفتشل منها....ومب عارف وين يودي ويهه وكيف بتصدقه ان كل شي صار غصبا عنه...

نزلت ليلى تحت متمسكه في الدري ما تشوف شي من البحر اللي كانت تنزفه عيونها...وطاحت غشوتها وشافها كذا موظف وردتها على ويهها ويوم وصلت الموقف اللي فيه الدريول ما لقته...وبعدها للحين تجاهد هي وطوفان الدموع اللي غسل ويهها...وتمت واقفه تترياه يي..بس الظاهر حتى الدريول بيحرق لها دمها..لانه في بيت مبارك ما خلوه يسير الشركه يوم ان حصه ردت وما يدرون عن ليلى او يمكن نسوا السالفه...

طلع ناصر وشافها واقفه حس بسيوف تطعن قلبه وخناجر تتسلل لاوردته....بس ما رام يسوي شي يشوفها واقفه في الشمس..ويدري من تحت غشوتها انها اكيد تصيح...ضعفه منعه يقترب منها ولا حتى يعرض عليها انه يوصلها...وركب موتره وتم واقف بعدين مشى وروح.....

ليلى كانت منهاره وطلعت تلفونها واتصلت بالبيت وقالت لهم يطرشون لها مجيد ولا باشا يي ياخذها...كانت تحترق تنتهي تذبل وقلبها يضعف...ليش كل شي تمنته راح..هي مب زعلانه على أي شي كثر ما الشي اللي ضيعت سنين العمر عشانه يروح منها بلمح البصر وبدون سبب ولا اذيه...

كل اللي تعرفه ليلى ان محد بقى في الشركه الا هي..والكل روحوا وهي بعدها تتريا الدريول...بس اللي تجهله وما تعرفه ان في انسان وقف من بعيد يراقب ويتريا وما هان عليه يرد البيت وهي بروحها في الشركه...كل اللي يعرفه انه ما رام يحرك موتره وهذيك الصوره مب راضيه تفارق خياله...المأساه اللي في عيونها والدمع المتيمع فيها والخوف والتردد والذبول وقصة الحزن مب راضيه تخوز من باله وهو يتذكر عيونها وهي تزقره تستجديه بس ما رامت تكمل...حمد ما قدر يروح لين ما وصل دريول ليلى وردها البيت...وبهاللحظه قدر حمد يرد البيت مثقل بالهموم وهو يشوف في مواجع ليلى هموم تتقلب بقلبه....
وصلت ليلى البيت ونزلت بسرعه كانن خطواتها سريعات عسب توصل حجرتها يمكن تقدر تفرغ بسهوله كل اللي صار فيها...بس وين لازم تمر على الصاله وتسلم على امها ...اول ما دشت الصاله كانن عيونها حمر و شكلها صايحه ولو انها بذلت المستحيل عسب تسيطر على مشاعرها وملامح ويهها وسلمت على امها اللي انتبهت ان فيها شي بس ما سألتها...وطلعت فوق على طول تسابق نفسها تبى تشوف باب حجرتها وتصكه على روحها...اول ما وصلت صكت الباب بقوه وطاحت على ركبها على الارض...خلاص ليلى ضعفت ما عاد فيها القدره تسوي أي شي ولا تكابر ولا تعاند...

ليلى ودموعها طايحه على ويهها مافي أي قوه في البشريه ممكن توقفها..
"يا ربي انا شو سويت من ذنب..؟ مالي اعتراض على حكمك..بس صدق انا شو سويت...؟ما ادري اذا كان تعذيبي لنفسي بالصمت ذنب ولا لاء واليوم جنيت ثماره...(حطت كفوفها على ويهها وشهقت) صدق اللي انا سمعته..؟ صدق؟ معقوله ناصر سواها..؟يعني يا ناصر انا شو سويت بك عشان تسوي فيني جي..؟ ما اظني بحياتي كلها غلطت عليك...؟ عمتي انا كنت عيونج الثنتين معقوله تهون عليج العشره وترضين بغيري...وينك يا بويه ما تيي تشوف اللي بنتك تشوفه..؟ وينك يا بويه ليش رحت وخليتني..ليش ما خذتني وياك يمكن الحياة هناك ارحم من اللي اشوفه؟ اه لو انك عايش كنت على الاقل برمي نفسي فحضنك وببكي بدون خجل بدون ماحس بالضعف..؟ ليش يا بويه رحت وخليتني وناصر راح وخلاني وسيف راح وخلانا..من اللي بقى لنا من؟ من يا ربي..(وشهقت شهقه روحها بتطلع معاها.) ابويه ليتك تدري بنتك شو من حال عايشتنه في بعدك..اااه يا ربي..؟"



وتمت تصيح من خاطرها وتبكي بكاء ما بكته من يوم توفا ابوها صدق كان قلبها محترق وتعبها تعب وتعب وفوق التعب...كانت تصيح وتفرغ كل الالم اللي تعيشه وكل العذاب اللي ميمعتنه في صدرها..كانت تفرغ همومها وتصيح من خاطرها...لابسه عباتها وشيلتها ويالسه على ركبها في وسط الحجره...ولا شعوريا في ايد انحطت على كفوفها تجاهد عشان تفتحهن وتشوف ويهها...

شيخه برعب: امي ليث تثيحين؟

نزلت ليلى كفوفها وهمال الدمع ما وقف وتمت تطالع شيخه ونظرة الخوف ماليه عيونها...وبدون مقدمات انترسن عيون شيخه دموع وانفجرت صياح...

ولوت على ليلى وتمن يصيحن مع بعض...ليلى تصيح نصيبها في الدنيا واللي تشوفه منها وشيخه تصيح امها اللي بقت لها من هالدنيا ولو انها ما تدري شو اللي مسبب تعاستها...

شيخه كانت تصيح بصوت عالي خايفه ميته من الرعب..شو اللي تشوفه..امها القويه المبتسمه الحنونه الطيبه تصيح..اكيد شي يعورها..وليلى كانت منهاره ما حبت ان بنتها تشوفها بهالشكل بس ما تقدر والله ما تقدر تخبي حزنها...كيف تخبي مشاعرها بعد انتظار دام اكثر من نص العمر...كيف ما تصيح واحلامها يوم عن يوم تنتهي تنعدم ويفنيها الوجود....

شيخه لاويه على ليلى بقوه وعقب هدتها ويلست تمسح دموعها بكفوفها الصغيره: امي ما تثيحين خلاث انا ماليد الوح الدمعيه خلاث امي...

ليلى انهارت اكثر وتمت تصيح اكثر وكأنها كانت محتاجه ان شيخه تكون شوي اكبر عشان تعق عمرها في حضنها...تمنت لو شيخه اكبر شوي من هالعمر وتدفن نفسها هالمره هي في حضنها وتبكي بحرقه..بس للاسف حتى الحضن انحرمت منه ليلى...

يوم شافت شيخه تصيح وتتنافض وميته من الخوف حاولت تهدا شوي...ومشت دموعها وحضنت شيخه بقوه وحبتها ويلستها على ريولها...وجاهدت عشان ترسم ابتسامه دافيه على ويهها عسب تطيب قلب شيخه...
ليلى بحنان: مافيني شي حبيبتي بس اسناني تعورني..

شيخه وهي تشهق عقب الصياح:امي ما تثيحين..

ليلى مبتسمه بمراره: خلاص حياتي ما بصيح وانتي بعد ما تصيحين زين..؟

شيخه تمش دموعها: خلاث...

وتحاول شيخه تفتح شفايف ليلى:امي وين اثنانج اللي تعولج؟

ليلى:هناك بعيد ما بتشوفينه...بس خلاص الحين ما يعورني..

شيخه ورموشها الطويله مبتله من الدموع عقب الصياح: خلاث ما تلوحين المثتفى.؟

ليلى تتنهد: لا ما بروح..يالله نشي بغير ثيابي عشان ارقد..

شيخه: امي انا بنام معاج..

ليلى: اكيد حياتي وانا من بقى لي غيرج...

ونشت ليلى وغيرت ثيابها ولبست بيجامتها وحاولت ترقد من التعب اللي فيها ولفت ويهها وشافت الثوب العيناوي اللي معلق ورا الباب..وشي طعنها في قلبها وبتلقائيه ردت تدمع ولفت ويهها الجهه الثانيه والظاهر هالمره رقدت من كثر ما كتمت في قلبها حتى صياحها لا تشوفها شيخه...


في الصاله كانوا كلهم متيمعين يتريون على الساعه 6:30 المغرب...كلهم بلهفه وشوق وولههم يسبقهم يتريون فيه يشوفون الغاليه وام الجميع متى ترد...طبعا سلمى وساره وعفرا وحمده وسمر يالسات على الكنب اللي مجابل باب الصاله..وخليفه سار ويا عبدالله ييبونها وبو خليفه وياهم....

سمر: يا ربي ما تعرفون شكثر متولهه على امي..؟

ساره: فديتها عمتي كم يسوى البيت وهي بينا...

حمده: يالله يا يدووه فديتج متى تردين والله تولهت على سوالفها...

عفرا:فديت يدتي والله...حتى عمتي بدريه اشتقت لها...

ساره: وين حصه محد شافها يمكن ما تعرف ان امها بتيي اليوم؟

سمر: حصه مريضه مب رايمه تتنفس فيها حمى...

سلمى استغربت كيف ما تعرف ان اختها مريضه: حصه مريضه؟ من قال؟

سمر: بتموت تقولين عيونها جمر من الحراره اللي فيها...

وقبل تنش ساره وتروح لها كانن سيايير بو خليفه وعياله داخلات البيت وجدموا مواترهم لين باب الصاله...ونزلت ام خليفه وهي متقبضه في خليفه اللي دخلها الصاله وكلهم نشوا فرحانين بردتها...ويسلمون عليها...وبرا نزلت بدريه وعبدالله...

عبدالله مبتسم: فديت التعبانه يا ربي..

بدريه مبتسمه: هلكت والله...

عبدالله: يالله ادخلي ارتاحي..

بدريه: شو ارتاح بسير ايلس وياهم شوي...

عبدالله: زين انا وانتي بنيلس عقب بنش وبزقرج شوي وبنسير داخل..

بدريه: اوكي...

ودخلوا ويا الباقين داخل ويلسوا يسولفون ويا ام خليفه اللي مبين انها شوي ارتاحت ولو ان ملامحها لا زالت متعبه وميهوده من الطيحه...وعقب نش بو خليفه واستأذنوا من العيال انهم بيدخلون يرتاحون شوي...

عفرا ما شلت عينها لحظه عن عمتها اللي كانت تسولف ويا سلمى....وعمرها ما بدت ترمس ويا حد..بس هالمره سوتها..

عفرا: عمتي بدريه شحالج؟

بدريه مبتسمه: فديتج والله ما شفتج شحالج عفاري...؟ شو ميلسنج هني سيري ادرسي انتي وحمدوه يالله..

خليفه: يالله بنات نشن وراكن امتحانات...

عفرا مبتسمه: عمتي ادعيلنا...

بدريه: الله يوفقكن حبيبتي...

ونشت ساره ويا بناتها وريلها وردوا فلتهم...والباقين تموا في الصاله..وعقب نشت عنهم سمر تكمل دراستها...

عبدالله: وين حصه ما شفتها؟

سلمى: تقول سمر انها مريضه...

عبدالله: بطلع اشوفها...

ونش عبدالله فوق بيسير يشوف اخته...ودق الباب بس محد رمس..وبطله ودخل ولقاها راقده وحط ايده على يبهتها وشاف حرارتها مرتفعه فوق التصور....وشهق وهو خايف عليها...وهزها شوي..

عبدالله: حصوه..حصوه...

حصه وهي تأن: هاه...

عبدالله: نشي فديتج البسي عباتج بوديج المستشفى بتموتين جي..الحمى بتذبحج...

حصه بتعب: ماروم اتحرك ابداً..

عبدالله: ثواني بزقر لج بدريه..

ونزل بسرعه وزقر بدريه اللي راحت لها فوق وساعدتها تنش وعلى طول شلها عبدالله المستشفى اللي انصدموا من حرارتها المرتفعه...وعطوها الادويه اللازمه وردت البيت ويا اخوها...وفي الدرب...

عبدالله: انتي كيف داومتي اليوم؟

حصه وهي تحس عمرها شوي احسن عقب المسكن اللي خذته في المستشفى..

حصه: كنت الصبح احسن عن جي...

عبدالله: باجر ما بتروحين تفهمين؟

حصه: ان شاء الله...

عبدالله: وكيف حمد الهرم ما يقولج ردي البيت وانتي تعبانه..؟

حصه تذكرت: هيه عبدالله نسيت اخبرك ..ترا حمد هو اللي ردني اليوم..

عبدالله: شو؟ وليش وين الدريول عنج؟

حصه: ما خلاني اروح وياه...

عبدالله: اها زين متى رديتوا؟

حصه: الساعه 12 ما ادري 11 ما اذكر...والله تعبانه ما اذكر شي...

وصلوا البيت ونزلت حصه ودخلت تسلم على امها وابوها وعقب طلعت فوق وسلمى تمت تحت...والباقين كل حد سار صوب حجرته يشوف شغله..
.................

كان الباب يدق ومحد يرمس ويدق ومحد يرد..اخر شي تبطل الباب شوي وتشغلن الليتات...ودخلت سلامه حذال عمتها..وشافتها راقده بعمق ومبين تحت عيونها وفوق جفونها ورم خفيف....مبين انها صاحت وصاحت وايد...

سلامه تهزها: عمتي نشي شوفي الساعه كم...؟

ليلى تبطل عيونها بضعف: سلامه؟

سلامه: عمتي الساعه الحين 9:00 الليل من متى وانتي راقده من يوم رديتي من الدوام.

ليلى وهي تبطل عيونها تشوف الساعه: الساعه 9:00 معقوله؟

ويدخل حمدان الحجره عقب ما دق الباب ويلس على الشبريه...

حمدان: عمتي ولهنا عليج...ليش ما نزلتي اليوم؟

ليلى ابتسمت يوم شافت ويه حمدان اللي يقطع القلب من حلاة تقاسيم ويهه:فديت روحك حبيبي والله تولهت عليك..من متى ما ييت عندي..هالكثر مشغول بالدراسه؟

سلامه بدلع: لحمدان بس وانا؟ لا ام ولا ابو يدلعوني وقلت اخر شي ما بقى لي الا انتي وتسوين فيني جي؟مابا...

ليلى يلست على الشبريه: شخباركم وشو مسويين؟

حمدان: عمتي شو بلاهن عيونج متورمات...

توها ليلى تتذكر اللي صار وتحسست عيونها بإيدها ودمعن وحطت كفوفها على ويهها ويلست تصيح..

سلامه: عمتي شو بلاج؟

حمدان مصدوم: عمتي شوفيج؟

وتمت ليلى تصيح وتفرغ اللي في قلبها من قهر وضيج..ونش حمدان وبعد سلامه وحاول يفج كفوفها عن ويهها بس ما قدر...ولاول مره يسويها من القهر اللي يحس به لوى عليها بقوه...صدج ليلى كانت محتاجه لقلب حنون وانسان قريب من قلبها...صح ما كان في بالها حمدان بس سواها وما هانت عمته عليه....كان لاوي عليها بقوه وهو متأثر من ضعفها ودموعها...وسلامه نشت تصك الباب..عشان محد يسمع...كانت كفوفها ترتجف وعيونها دمعت من الحزن والتأثر...

سلامه تصيح: عمتي شو صار فيج.؟

حمدان: سلامي روحي ييبي لها ماي حرام والله حرام...

وطلعت سلامه بسرعه..وهو تم وياها..

حمدان: عمتي ارجوج بس...

كانت ليلى تحس بدفا قلب حمدان...تحس بحنان ولد اخوها وطيبته..تحس شوي احسن انها لقت انسان تقدر تبكي على صدره بدون خجل...وهي رغم انها تصيح من قلبها بس حست بالراحه لان ولد اخوها غدا ريال ومستحيل يوم من الايام يتخلى عنها ابدا....سكتت من الصياح بس ما شلت عمرها ابدا وهو بعده ساكت بس لاوي عليها....

حمدان: بسم الله عليج يا امي وابوي انتي..شو مستوي بج؟

ليلى ابتسمت من بين دموعها...

حمدان: قولي لي من ضيج بج والله لانهي حياته..انتي بس أشري..

ليلى وعيونها منترسه دموع ورفعت راسها: فديتك والله يا ولد اخوي والله انك الغالي...

حمدان يتنهد: قطعتي قلبي شو مستوي عليج..؟

ليلى تمسح دموعها: ولاشي انتبه لنفسك وسير ادرس عقب يوم احس عمري اوكي بشوف اقولك ولا لاء..

حمدان: لا والله ماروح عنج..انا بسير اييب كتبي من هناك وبتم هني في غرفة عمتي عايشه يمكن تحتايني في الليل ولا شي..

ليلى مبتسمه: فديت روحك مابا شي غير سلامة راسك..

ودخلت سلامه يايبه الماي وعطته ليلى اللي شربت شوي وشافت سلامه مرتبكه وعيونها منترسه دموع...وقربتها منها ولوت عليها وهي سلامه حطت راسها على ريول عمتها وهي خايفه شو ممكن يخلي عمتها تصيح هالكثر....

نشوا عقبها وساروا ييبون كتبهم كلهم ويلسوا في بيت يدتهم...غير سلامه اللي دخلت ترقد عند ليلى وحمدان سار حجرة عايشه...

بس ليلى ما رقدت يلست تدرس سلامه...وتضيع وقتها وياها لين ما ييها الرقاد هذا ان ياها....اما شيخه ما نشت وتمت راقده...الشي اللي ريح ليلى اكثر عشان ما تشوف شي من هالمواقف...

تمت ليلى تدرس سلامه لين ما رقدت من التعب على الارضيه وعقب خلتها تنش ولحفتها ورقدت وياها على نفس الشبريه...وهي نشت لطاولتها تبى تفرغ شوي من اللي في قلبها عقب الفاجعه اللي حلت على حياتها....ويلست تشخبط بكل اسى على اوراقها..



""رجعت لسكة أحزاني أنين الشارع المهجور على نفس الوهم امشي بضيق الدرب باحزاني يطل الخوف من عيوني يدور للامان حضوريعانق بالندم نظرة تضيع ف عبرة أشجاني يمرني الوقت مستعجل وينسى يحتضني شعورعلى حد الالم قلبي جلس.. والوقت عداني نفضني كل فرح مرني على غفلة حزن مغرور تلقفني الزمن يضحك على ياسي وحرماني أضم الهم واحساسي أخذني للورا مجبور لدنيا كانت الفرحة سما والضحكة اوطاني على ذاك الوعد جرني زمان العاشق المغدور رمى همي على قلب شعوره فارق أزماني مشيت ف دربنا المنسي مشيت وخافقي مبهورأطالع حولي اتامل سكون الكون بكاني ادور للقا لمحة تطيب خاطري المكسوراملي بشوفها عيني وأحضنها باجفاني تغير كل شي بعدك تلعثم بالظلام النورانادي لك وأنفاسي تبعثر صرخة لساني تمرغ بالالم وجهي وبات بهالشقا مغمورتضيعني تعابيره وأجهل كيف تلقاني تلبسني الحزن واصبح رفيقي والهنا مأسور ف ركن اجهله بعدك واعرف ليه ما جاني لاني من بعد عينك شعوري طار به عصفور رحل لابعد مدى وقفى ولا رد لي من ثاني وقلت بداخلي ترجع بنيت من الاماني قصوروكنت أضحك على نفسي الين الوقت صحاني زماني غرني ضحكك تبعتك والنظر مسحورهقيتك بالفرح تزخر صدمني فرحك الفاني صدمني وبعدها جرني لسكه حزني المنثورعلى نفس الطريق أمشي ألملم باقي أحزاني""


...................

الساعه 11:00 دخل الصاله وشاف امه اللي كانت فاطمه تمسح ريولها بفازلين عشان ترقد....

ام احمد: وينك يا ولدي من الصبح ما شفناك..

احمد: باركي لي يالغاليه...

فاطمه مبتسمه: حصلت شغل؟

ام احمد بفرح: بشرنا يا ولدي..

احمد: هيه حصلت شغل والمقابله يوم السبت الياي..ادعيلي يالغلا...

ام احمد وعيونها منترسه دموع: فديتك يا احمد يا ولدي الله يفرح فوادك دنيا واخره...

احمد: فديتج يا اروع ام في العالم...

فاطمه بفرح: مبروك حمود يالله عقبال العروس...

انقبض قلب احمد وحس به يدق بسرعه بسرعه مب قادر يسيطر على نبضه...

ام احمد مبتسمه: خلاص يا احمد اشتغل وعروسك زاهبه تترياك...

احمد وهو ينش: يمكن ما تطلع اللي ابى..صبري امي على سالفة العرس بفكر فيها عقب ابى اعيد حساباتي..

ام احمد: ما عليه حبيبي ان شاء الله يصير خير عقب بشاورك فيها وفي اهلها جان عيبوك خطبناها وان ما بغيت برايك..

وطلع احمد...وفاطمه يلست تحن على امها تبى تعرف منو هاي...بس ما طاعت ام احمد تخبرها وقالت مستحيل تخبر حد قبل تشاور احمد فيها..وتعرف رايها واذا ما عيبت احمد بتحلفه ما يخبر حد وما يرمس انهم حتى فكروا في الموضوع...وعقب بتتخبره من اللي في خاطره وبتخطبها له لو من تكون...
.................

كل حد سار حجرته عقب العشا وهي تمت في الصاله تطالع التلفزيون...ودخل عليها ابوها..

بو خليفه: سلمى..

سلمى تنش وتبند التلفزيون: لبيه ..

بو خليفه: تعالي يا بنتي الميلس بغيتج شوي...

سلمى بإرتباك: امر فديتك خلاص بسير الحين...

بو خليفه: تجدميني وانا بسير وراج بس بشوف جان امج رقدت ولا بعدها..

سلمى مبتسمه: ان شاء الله الغالي..

وسارت سلمى الميلس وبو خليفه خطف على حرمته يشوفها رقدت ولا لاء....وعقب سار عند سلمى بيرمسها...



نهاية الحلقه 16

للتنويه..

القصيده لا تسألي<< نسيت منو مألفنها..بس اعتقد شي خليفه..

القصيده الثانيه سكة احزاني للاماراتيه دموع بوظبي


((( وانتظروا الجزء الثامن عشر مع الاخت الغلا )))

[رهيف الحس]

تسلم إديييينك على ها الحلقه الرررروووووووووووعة ...
و لا خلاني الرب من ابداعك
روووووووووووووووووووووووووووووعه والله انه مافيك حيييييييييييييييييييييييييله يالبدوى الحبوب
تحيااااااتي لك
أخـتـ رهيف الحس ــك

[رهيف الحس]

يالله مشكورة اختي الغلا على هالابداااااااع والله يفرح قلبج دووووووم
مثل ما فرحتي لناااا قلووووبنابهلحلقه
تحيااااااتي لج
أخـتـ رهيف الحس ــج

[الغلا]

الحلقه السابعه عشر
عقب ما شغلت الليتات وعدلت المنظر اللي على الطاوله.. كانت تحس بعمرها مرتبكه وقلبها يدق بقوه...ما قدرت تيلس بس كل اللي كان يهمها انها تخلص السالفه ويا ابوها وتطلع..
وشوي ووصل بو خليفه اللي دخل يتسند بعصاه ويثبت عمره على الارض ويلس على الطرف وهي يلست وياه...
بو خليفه وهو يسند عصاه على الطوفه:تدرين بشو برمسج؟
سلمى: هيه ابويه..
بو خليفه بحزم: انا رمست ريلج وهو وايد شال بخاطره منج..
سلمى مبطله عيونها: من شو؟ ابويه هو اللي غلطان هب انا...
بو خليفه: بشو غلط عليج.؟ هو ريلج وله الحق عليج في كل شي...انتي غلطتي ومن حقه يسوي اللي يبغيه..
سلمى بقهر: ابويه حرام عليك ضاربني وماخذ معاشي وفوق كل هذا معاملته الشينه وتقول ظلمته..؟
بو خليفه: شوفي يا بنتي سالفة الضرب بنرمس فيها ولكن سالفة البيزات انا مالي حق اتدخل بينج وبين ريلج ودام انج رضيتي كل هالسنين تحملي ماياج...والسالفه مب بذيك الخطوره ومن يعز عليج شي نحن موجودين جدامج...ومعاشج انتي وريلج متفقين ومب عشان هالخلاف تفلشين ريلج وترمسين فيه..
سلمى وقلبها محترق كيف ابوها فاهم الموضوع: ابويه حرام والله حرام...انت ما تعرف حامد كيف...ابويه ترا...
بو خليفه: شو ؟
سلمى: ابويه حامد والله يتعبث بالفلوس على كيفه ومحد يدري عنه..وفوق كل هذا تلومني ليش اشتكيت منه مره في العمر..
بو خليفه: ريلج تفهمين شو يعني ريلج..وهذا ريال يحق له اللي ما يحق لج...يعني تمشين على طوعه ..يقولج يمين تقولين حاضر يقول شمال تسيرين شمال...يصفعج على يمينج تعطينه الخد الثاني...
سلمى تدمع بقهر: ابويه...
بو خليفه ينش: تطلعين حجرتج وتسيرين تزهبين ثيابج باجر ريلج بيي عقب الظهر يشلج وياه..
سلمى تصيح: ابويه ما توقعت جي تسويبي...؟
بو خليفه وهو يمشي صوب الباب: انتي مدرسه ومتعلمه ما قريتي في كتاب الله" الرِجال ُ قَوّامونَ على النِساء"..ما تعرفين هالايه؟
سلمى وهي تكمل ورا ابوها: "بما ملكت ايمانهم" ليش ما تكملونها...؟ ابويه القوامه مب بالضرب والعنف القوامه بالمشوره والانفاق..
وطلع بو خليفه وودرها في الميلس وكان مثل اغلب او اكثر الرياييل اللي مبدأهم الريال مع الريال ضد الحرمه لو انها صح...
...................
من اصبح الصبح وشيخه ناشه ما خلت حد يرقد..وتلعب في شي وتخرب شي..وسلامه تسكتها عشان عمتها لا تنش...وشيخه تعاند اكثر...
وبما ان سلامه وحمدان رقدوا في بيت يدتهم فأكيد انها بتنش من فير الله تسوي لهم ريوق كل شي ولا عيال راشد حبايب القلب....وفي غرفة ليلى ما نشت بس سلامه وشيخه ناشات...سلامه تدرس شوي وشيخه مأذتنها...
سلامه بهمس: اصصص ماما تعبانه حرام عليج..
شيخه بعناد: اتي ليث تنامين عندنا...
سلامه بضيج: خلاص بسير بيتنا بس اسكتي..
شيخه: لوحي ما نليدث هذا بيتنا..
سلامه رافعه حاجب: عشتوا..بيتكم؟ والله اعرفه قبل لا تشرفينا يا حضرة جناب الدبه...
شيخه مطلعه لسانها: اتي دبه..
سلامه بإحتقار: جب جب..ودج حتى لو بس بصوره تشبهني ولا جسم شراتي..لو انا شراتج اكيد ما بظهر على حد..
شيخه مب فاهمه شي وعلى هالحشره نشت ليلى.وتلومت سلامه فيها بس بعد شو...
ليلى: سلامي ليش ما سرتي المدرسه؟
سلامه: بعده وقت الدريول بيوصلنا بعدين الامتحان مب الحين...
ليلى تطالع شيخه: وانتي ليش ناشه الحين ناقصه صدعه انا؟
شيخه: امي ثوفيها؟
ليلى: منو هي؟
شيخه تأشر على سلامه: هذي..
سلامه: قولي سلامه..شو هذي بعد بشكارتكم انا..
ليلى تضحك: شو سوت بج بعد..؟
شيخه تيلس في حضن ليلى: مالي..
ليلى: عدال اللي يسمع الحين محد بقى ما نافسج على حضني..ناطه هني تقولين صافين طوابير يسابقونج..
سلامه بغت تموت من الضحك على رمسة ليلى وشيخه تطالعها وضحكت مع انها مب فاهمه شي...ونشت ليلى ويلست ويا سلامه شوي وعقب طلعت ونزلت تحت وشمت ريحه من زمان ما شمتها وعرفت ان امها مليون بالميه في المطبخ...وسارت لها وسلمت عليها..طبعا ام راشد ما رمست ولا تدري شو السالفه بس الاكيد انها بتفاتحها في الموضوع عقب ما ترد من الدوام...
وشوي ونزل حمدان ووراه سلامه اللي كانت شاله شيخه وياها...ويلسوا يتريقون في الصاله ويا يدتهم وعمتهم...وعقبها نزلت ام راشد الزراعه برا وتمت سلامه تدرس هي وحمدان في الصاله ويا ليلى لين ما ياهم الدريول وروحوا وياه...
.
.
تمت ليلى يالسه في الصاله تفكر في موضوع امس..وحست بطعنه كبيره وخيانه فضيعه...فكرت كيف ممكن تتعايش ويا هالانسان مره ثانيه..وكيف ممكن تتقبل وجوده...؟ والاصعب كيف بتواجه نظرات اخوها وامها وحصه واللي يعرفون ان ناصر يعشق ترابها...كيف ممكن تتقبل وكرامتها سحاب وهامات شامخه ما يوصلها أي انسان...؟ كيف ممكن تتحمل...وبلحظه حست فيها بالضعف قررت انها ما تسير الدوام اليوم وخله يصير اللي بيصير...
دقت لحصه بس محد رد عليها..وردت تدق مره ثانيه بس بعد محد يشله...وتلومت في نفسها كيف ما نشدت عنها طول هالوقت وهي تدري انها مريضه...بس بعد يوم فكرت ليلى يوم تخبر حصه باللي صار بتعذرها...ما تدري انها تعرف من قبلها...
تمت تدق بس ما يردون اخر شي قررت تدق على البيت تدري بهم ناشين هالحزه...ودقت...
ليلى: السلام عليكم..
سمر: وعليكم السلام هلا ليلوه...
ليلى: ليش مستعيله وتنافخين شي وراج؟
سمر: الدريول برا بتأخر اليوم اخر يوم خلني اروح..تبين حصه؟
ليلى مبتسمه: اذا مافي مانع...
سمر: ما بتسير الدوام تعبانه وايد...يالله بخليج..
ليلى مصدومه: اوكي باي...
وبندت عن سمر...وهي تهز راسها بأسف..وفي خاطرها...
"هه ..شغلت نفسي بإنسان تافه ما يستحق للحظه اني اضيعها في التفكير به..وانشغلت عن بنت عمتي صدج اني ما استحي على ويهي.."
وتمت سرحانه في عالم ثاني...لين ما قطع عليها الصمت صوت شي ينكسر في الصاله..وفاجأها ونشت بسرعه تشوف...ومسكت راسها يوم شافت شيخه واقفه حذال الطاوله مبتسمه وشكلها مسويه جريمه نكراء....
ليلى تطالع قطع الكريستال اللي صارت اشلاء وملح تبعثر على ارضية الصاله...وشيخه واقفه مكانها ما تحركت...ويوم ليلى تمت تطالعها تحركت بتيي صوبها..
ليلى بخوف: لا تتحركين...
شيخه انصدمت وتمت تطالع امها ليش تصرخ؟كانت ليلى خايفه لا تجرح ريولها بالقطع المتكسره تحت...وقربت منها وشلتها وزقرت البشكاره تيي تنظف المكان ويلست ليلى في الصاله وشيخه قاعده حذالها ساكته...
ليلى بجديه: شو اللي وداج هناك؟
شيخه مبطله عيونها على الاخير ومبين انها بتكذب:امي في وحث..
ليلى بعصبيه: شيخه لا تجذبين الله بيحطج في النار..نحن ما عندنا وحوش...ليش كسرتيه هذا مال يدتج..خلاص ما بتحبج...
شيخه مبطله عيونها: مث انا كثرته مث انا...
ليلى تطالعها: من كسره؟
شيخه: ثلامه...
ليلى: سلامه في المدرسه كيف كسرته..
شيخه: امي والله في وحث والله...
ليلى: لا تحلفين جذب الله بيحطج في النار..
ومسكت ليلى ايدها وشلتها...بعصبيه...لين المكان اللي انكسر فيه الكريستال....
ليلى: وين الوحش وين راح ممكن افهم وينه؟
شيخه عاقده حياتها: والله امي في وحث..
ليلى الظاهر بدت تفقد اعصابها: زين وينه؟
وتمت شيخه تتلفت وتطالع يمين ويسار بس ما لقت الوحش اللي ممكن ينقذها من التهمه..كانت تدور بعيونها الوساع في ارجاء الصاله بس ما شافته...وين راح هالوحش هذا وقته يختفي ويكذبها جدام امها...
ليلى: شفتي ما شي..شيخه حبيبتي انتي بنت كبيره عيب تكسرين اغراض البيت بعدين يدوه بتزعل...
وسارت ليلى عنها وهي تمت واقفه مكانها ويلست على الارض وشافت البشكاره يايه من بعيد يايبه قطعة قماش وماي بتمسح على الطاوله اللي مكسور عليها الكريستال...
ووقفت شيخه تطالعها وشافت شي على الطاوله وابتسمت بفرح....وسارت تركض لامها ويابتها لين الطاوله....
شيخه مبتسمه بنصر: امي ثوفي الوحث...
ليلى بنظره بارده: وينه؟
شيخه تأشر على الطاوله: هنا مات..خلاث..
نزلت ليلى راسها وشافت فراشه تجنن من حلاة الوانها بس ميته والظاهر الزجاج موتها...يوم طاح عليها..وابتسمت وشلت شيخه وحبتها..وانحل الاشكال...
ليلى: الحين انتي تركضين ورا الفراشه وهي متعلقه على الكريستال وتبين تقبضينها..؟
شيخه: امي هي كثرته مث انا..
ليلى: ردينا للتأليف...زين هي كسرته سامحتج لان واحد من المتهمين توفى وعقبها ماشي سماح عقوبه شديده..
شيخه طنشتها وعقب سارت ليلى الزراعه وقالت لامها انها مب مداومه اليوم خير شر...واقنعت امها بالموضوع وقالت بتوضح لها الاسباب عقب مب الحين....
........................
الساعه تسع الصبح يالس في مكتبه رفع سماعة التلفون وكلم السكرتيره تطلب له المركز وعقب ما دقت طلب شوية معلومات عن شخص يريده وعلى طول خلصوله اللي يبى بالتلفون وعطوع بياناته كامله....ثواني وخليفه يتصل بالشخص المطلوب...
خليفه: السلام عليكم ورحمة الله وبركاته...
وائل: وعليكم السلام يا مرحبا...
خليفه: لو سمحت اخوي..انت وائل عبدالكريم..؟
وائل: ايه هوا في ايشي؟
خليفه: اخوي شحالك عساك بخير..؟
وائل: الحمدلله نشكر خير الله..بس ممكن اعرف من بيحكي؟
خليفه:وياك خليفه مبارك احمد طال عمرك..
وائل: يا اهلا وسهلا ممكن اخدمك بشي؟
خليفه: هيه والله بغيناك في خدمه صغيرونه اذا فضيت يعني؟
وائل: ولو خيي انت تؤمر بس كيف بدي آبل شخص ما بعرفوا؟
خليفه بثقه: اخوي تقدر ببساطه تنشد أي حد منو خليفه بن مبارك ويعطيك الجواب...
وائل: وانا شو دخلني ..طيب فين بدك ياني آبلك.؟
خليفه: اذا فاضي الحين تقدر تييني الشركه ..
وائل : طب شو رأيك تحاكيني في أي مكان عام.؟
خليفه: انت ليش زايغ؟
وائل: شو؟
خليفه: لاء ماشي بس انت تعرف حد اسمه عبدالله بن خليفه كان وياك في المركز امس..؟
وائل:اييه عرفتوا...شو بو هيدا...؟
خليفه:اعرفه انا....دلني عليك...
وائل:ايوه هيك برتاح اكتر..عبدالله بدوا يجي معك...
خليفه: هيه بتيي؟
وائل: خلص بدي اجي..وينك.؟
خليفه متملل من غلاسته: اوكي وين تداوم؟
وائل: سائق ثقيل..
خليفه: اها اوكي مرني الشركه يكون افضل...
وائل: وين العنوان...؟
خليفه: شارع خليفه بن زايد الثاني ...
وائل: خلاص اتفأنا...
وبند خليفه وخلص من البند الاول من الخطه...على امل ان الجزء الثاني ما يخيب...وبيتريا لين ما الاخ وائل يشرف...
تم يشتغل بس فكره لاهي ويا السالفه وكيف بيروم يرمسه ويتفاهم وياه وكيف اصلا وائل بيساعده...كان خليفه مرتبك وما يعرف هل ممكن يتقبل وائل الموضوع او انه يرفضه رفض كلي...كل خوفه ان وائل يكون انسان يعرف السنع والمبدأ وما يعرف له...او انه انسان نزيه...
كانت الافكار توديه وتييبه لين ما دق على موبايله مره ثانيه...
وائل: ايوه.؟
خليفه: تأخرت يا ريال وينك؟
وائل: والله ماني عارف شو بدك فيني...انا هلا واأف مأابل الشركه...
خليفه مبتسم ابتسامه نصر: اطلع اخوي حياك الدور الثامن...وبخلي حد من الموظفين يوصلك...
بند خليفه ووائل خذه واحد من الموظفين...بهره في المكان فخامته واسال لعابه رفاهيته...لاول مره يدخل اماكن مثل هذي وفي الدرب لين الطابق الثامن ولين ما يوصل لبرج خليفه العاجي..كان بينه وبين الموظف كلام بسيط...
وائل: هيدي الشركه لمين.؟
الموظف: والله الشركه دي للاستاز خليفه مبارك احمد...
وائل مبطل عيونه: ومين خليفه مبارك؟
الموظف:دا من كبار رجال اعمال الدوله مش معأوله ما تعرفهوش؟
وائل مندهش: لا والله اول مره بسمع فيه..لك كل هيدا لا إيلوا...مبصدء...؟
الموظف يطالعه بإستخفاف: لا دا شويه دا أأل حاجه عندو...دا لسه سلسلة مطاعم ومحلات مجوهرات ووكالة سيارات...واسم وعيله وكل حاجه...دي الشركه تبأ ابسط شي يملكو..
وائل خلاص حرارته ارتفعت مب مستوعب شي: طب انت ما عندك فكره شو بدوا اياني...
ووصلوا قبل يرد الموظف ودخل واستأذنت له السكرتيره ودخل على خليفه....
كان خليفه يالس على كرسيه ومن دش وائل نش ومد له ايده وسلم عليه واشر له على الكرسي عسب ييلس..
خليفه مبتسم: مرحبا اخوي شحالك؟
وائل: نشكر خير الله كيفك استاز..؟
خليفه: الحمدلله شو مسوي وشعلومك؟
وائل: والله منيح الحمدلله...بدك ياني اخدمك في شي..؟
خليفه يحرك الكرسي:والله يكون من دواعي سروري...
وائل: اتفضل استاز..
خليفه: تعرف منو انا؟
وائل مبتسم: خليفه..
خليفه: لاء ..انا خليفه مبارك اخو ذياب بن مبارك الي متهم بكسر سيارتك...
طالع وائل خليفه وهو مبطل حلجه مب مصدق: بتحكي جد؟
خليفه: هيه..
وائل:شو صار معو هلاّ؟
خليفه:في السجن...
وائل شوي خجل بس ما رمس...بس خليفه استغل الموقف ويلس يسولف وياه شوي حول اموره العائليه وضايقته الماليه واحواله كإنسان مغترب...طبعا كل شي كان يمشي لصالح خليفه اللي دهن سير الريال وعقبها قدر يدخل بالموضوع وياه بشكل حلو ودبلوماسي...
خليفه: شو رايك اعرض عليك صفقه..؟
وائل: مثل شو؟
خليفه: خبرني اذا الموضوع دخل بمزاجك...
وائل: اتفضل..
خليفه يمد ظرف لجهة وائل: تقدر تشوفه..
بطل وائل الظرف وشاف شيك مكتوب ب10,000 درهم...طبعا ارتعدت اوصاله يمكن من يوم انخلق ما شاف مبلغ جدامه بالحجم...
بس رد يتدارك عمره...
وائل: شو بدي اعمل فيه؟
خليفه:تاخذه لك...
وائل: وشو اعمل لك..؟
خليفه: تتنازل عن القضيه...
وائل سكت...وفكر شوي...فكر بخبث كيف يستغل حاجة رجل اعمال له..عرف ان خليفه الحين يالس يشتري سمعته...
وائل: المبلغ ما بيكفي...
خليفه ابتسم وخذ الشيك وقطعه ووائل يطالعه وهو مبطل عيونه..ورد كتب واحد ثاني...ومد يده لوائل..
خليفه: يسدك؟
وائل وهو يشوف ال 15,000 تتراقص جدامه...ابتسم وهز راسه..
وائل:خلص مشي الحال...
خليفه: عطني الشيك...
وائل: ليش؟
خليفه: بعطيك نص مقدم وعقب ما اضمن تنازلك..اعطيك الباقي..
وائل: ماشي الحال...ما عندي أي مانع...
وطبعا خذ وائل 7500 واتفق مع خليفه على تنازل القضيه وقت الجلسه باجر الساعه 11:00 الضحى....
.......................
حوالي الساعه 10:30 كان في مكتبه يحس بنار تاكل صدره...يعوره قلبه وايد...ويحس بطعم الم فضيع...محتقر عمره بشكل غير متصور...
"انا ليش رضيت باللي صار...؟ كيف تهون علي ليلى.."وابتسم بمراره"..ليلى الغاليه اللي حبتني رغم عيوبي..رغم كل شي فيني..رغم ضعفي وانهزامي ورغم ان شخصيتي مهزوزه بس حبتني...ليلى القويه الطيبه الحنونه المحبوبه..فضلتني على الكل والكل يخطب ودها..كيف تهون كيف؟
بدل ما احمد ربي انها اختارتني من بين الناس...بعتها برخيص والله ورخيص بزود...كيف ممكن تسامحني..كيف؟ اكيد انها تحتقرني الحين وكارهتني من قلبها...الله يسامحك يا بويه...بس اكيد اروم اطيب خاطرها عقب ما تعرف ان شاريها وانها الغاليه...واكيد ان حياتي ما بتكتمل بدونها...اصلا مستحيل اخلي أي انسان يفكر ياخذها..اخ يالظروف والله كل شي قاعد يصير عكس اللي ابى وعكس حياتي"
كان ناصر متعذب بداخل محترق....يفكر بليلى وما فارقت خياله للحظه وقلبه محترق عليها وعلى اللي صار فيها...يحس بتأنيب ضمير عنيف..ولا هو بقادر يلغي كل احساس بالذنب...ويحس عمره خاين..
لكن كل اللي كان يسليه بالموضوع انه مخبي لليلى المفاجأه الحلوه انها بتكون الثانيه...ما يعرف شو اللي يخليه يكون واثق من الاعماق انها مستحيل ترفض وان فكرت فهو بأساليبه بيعرف كيف يقنعها....
انقطع حبل افكاره ونش ونزل تحت...ساير ما يدري وين بس على الاقل بيمر من هناك...يشوف يستطلع قلبه يرجف بقو..يحس ريحة الخيانه تفوح منه...بس بالرغم من هذا يحاول يبرر موقفه....
مر على المكتب ودق الباب بس محد رد عليه..ودق مره ثانيه بس للاسف محد رد..واخر شي دخل وانصعق يوم ما شاف حد..
حس بخيبة امل ورد يجر اذيال اللوم والعتب على نفسه وحرقة القلب..وسار مكتبه بيحاول يكمل باقي شغله على الله ويقدر يلهي نفسه...
وبعد دقايق كان حمد عنده في المكتب...
حمد: بلاه ويهك غادي جي.؟
ناصر: ما بلاني شي بس مب راقد مثل الاوادم...
حمد في خاطره"هنود نحن": منو ناعسة الجفن اللي مسهرتنك..
ناصر مبتسم ببرود: محد مسهرتني وما عندي هالخرابيط..الشغل ماخذ وقتي..
حمد: هيه صح الشغل..الا اقول ناصر..
ناصر: البنات مب مداومات اليوم؟
حمد مبتسم: لاء...بنت العم مريضه والثانيه تقلدها...ما يفجن عن بعض...
ناصر مبتسم: اها...
حمد: اسمعني يا ناصر.
ناصر: اتفضل..
حمد: انا بطلع اليوم من وقت عندي كم شغله لازم اخلصها ما روم اسير لهالشغلات العصر..
ناصر: خلاص صار خير..بس خل حد من الموظفين يي بدالك يراجع الملفات اوكي..
حمد: ان شاء الله برمس دانيال قبل اظهر...
وطلع عنه حمد وسار مكتبه وناصر رد يكمل شغله..
................
الظهر حوالي الساعه 12:45كانت سلمى في حجرتها منقهره وما نزلت الصبح تشوف ابوها ولا امها...بس بدريه كانت عند ام خليفه من الصبح وحصه عقب ساعه نزلت وياهن تسولف في الصاله ويتهن ساره عقب....
ام خليفه:وين سلمى؟
حصه:في حجرتها..
ام خليفه: شو تحسين بعمرج الحين يا بنتي...؟
حصه:الحمى خازت عني بس بلاعيمي للحين ما روم ابلع شي منهن..
بدريه: حبيبتي انتي اليوم ذكريني قبل نسير بجهز لج خلطه دافيه اشربيها..
ام خليفه بحزن: وين تبين يا بنتي ما يلستوا ويانا...
بدريه: فديتج يا عمتي والله عبدالله ما سار الشركه من اسبوع وانا بيتي مادريبه الحين كيف..يبى لنا نسير دبي...
ساره:الله يكون بعونج...
ام خليفه: ما قصرتي يابنتي تعبناج ويانا...
بدريه: شو هالرمسه يا عمتي ما بينا هالكلام وهاه واجبي وبعدين ما سويت شي...
ساره: متى بتتحركون من هني..؟
بدريه: الساعه 4:00 العصر...
وتدخل سمر من باب الصاله وتفر اقلامها على الارض وتصارخ....
سمر: الله اخر يوم امتحانات يا فرحتي والله الاجازه بدت..
حصه ترمش بعيونها بسرعه: الحمدلله والشكر..
ساره: شو سويتي اليوم...؟
سمر: حليته كله صح..
ام خليفه: بتييبين 100..؟
حصه طالعت امها: وانتي كل شي بتييبين 100 حد قص عليج وقالج انها عفرا خليفه.؟
بدريه مبتسمه وساره تضحك...
سمر: امايه فريت كتبي في المدرسه ماباهن...
ام خليفه: ليش يا سمر حرام عليج ام سعيد قالت تباهن لولدها يراجع فيهن ويشوف منهج السنه اليايه..ليش تفرين الكتب.؟
سمر: مابا اعطي كتبي لحد...
حصه: من قالج تفرينهن يمكن تيبيين دور ثاني من وين بندرسج..
سمر زاغت:مابا اييب دور ثاني..
حصه: بتييبين وانا اذا توقعت شي بيطلع صح...
سمر: امايه شوفيها تقول اني بييب دور ثاني..
ام خليفه: بسم الله على بنتي شاطره ما تييب دور ثاني...
حصه:امي انتي ماخذها مقلب فيها... صدقيني بتييب دور ثاني..كل يوم اشوفها ترسم في طرف الكتاب ولا تطالع السقف وفاجه حلجها والكتاب مبطل جدامها ونها تدرس...
سمر: والله انها جذابه...
حصه:هذا غير المرات اللي تكون الصفحات كلها كافي ولا منسدحه على الكتاب وتشخر ببلاده...
سمر: امي والله تقص عليج..
حصه: وغير المرات اللي تحول الكتاب فيها لقصيدة غرام بين حرفها وحرف حبيبة القلب ابله عبير..
ام خليفه:تغار منج ما عليج منها...
حصه:هه يا حظي على شو بغار..
ساره:هذي حصه ما تتغير مرضت تعبت أي شي يستوي بها ما يغيرها...
حصه:فديتني والله اصيله وين اتغير...معدني اصلي...
سمر:وع..
حصه: والله لولا حشمة امي جان قمت ادوس ببطنج..
ام خليفه: كل هذا وحشمتيني..عيل لا ما بغيتي تحشميني شو بتسوين.؟
ضحكت بدريه وساره على ام خليفه وبناتها...
وهن يسولفن دخل عبدالله وسلم عليهم ويلس يتريق وياهن...وزقر بدريه وساروا الحديقه...
عبدالله: تجهزي بنروح اليوم..
بدريه: زين ادري ليش تقولي الحين..
عبدالله:شغلي ما جابلته من متى...والبيت معفن يبا له تنظيف استوا لنا اسبوع هني..
بدريه:خلاص الساعه اربع بنمشي والحين بسير ارتب ثيابك والمخدات والاشياء اللي يبناها ويانا...
عبدالله: لا تنسين شي ترانا ما بنيي الاسبوع الياي عندي شغل مهم ما روم ارد في الويكند...
بدريه وهي تسير عنه: خلاص انت سير جابل شغلك وعقب بينا رمسه...
ودخلت عنه بدريه وهو ركب موتره بيسير يشوف شغل ابوه شوي..وبيمر على خليفه...
.....................
في بيت بو راشد كانت ليلى هي اللي مسويه الغدا اليوم...تبى تشغل عمرها بأي شي..بس ولا ثانيه ولا لحظه قدرت تبعد ناصر وشبح خيانته عن بالها...كانت تروح وتيي وتسوي وتودي وتييب بس ما قدرت ما تفكر فيه...رغم حشرة شيخه اللي يالسه في نص المطبخ و ماسكه غطا واحد من الجدور وقابضه ملعقه حديد وتضرب فيها عليه وتغني بخرابيطها والحشره واصله لين الصاله....بس حتى هذا ما لفت انتباه ليلى ولاقدر حتى لثانيه يبعد عنها ناصر....
شرملى دخلت وشلت الغطا من ايد شيخه:بس بس شو هدا ماما كبيره تصلي في الصاله ما يقدر يقرا أي شي..
شيخه وهي تنش:اتي هاتي هذا مالي...
شرملى:مافي مالج هذا مال مطبخ..
وترفع الاغراض عنها فوق...وتسير شيخه تير ثوب ليلى تباها تنتبه..
شيخه: امي ثوفيها ثلت مالي..
ليلى انتبهت:شو تبين؟
شرملى وهي تشل شيخه:تعالي نروح فوق...
ليلى:لاء خليها هني اباها عندي ما فيني ارد والاقي شبريتي في الشارع مكسره من شطانتها...
شيخه:امي مالوح فوق اليد هنا..
ليلى:زين يلسي بس لا تسوين حشره..
وطلعت عنهن شرملى ويتهن ام راشد محرجه..
غاليه:شو هالحشره اللي ما خلتنا نصلي..
شيخه وهي ما تشوف يدتها وتعابل بشي بالارض:هذي امي ثوت طاخ بالحديده...
ليلى انتبهت ان شيخه تألف:شواخي شو سويت؟
شيخه:انتي ثويتي طاخ..
ليلى وهي تبتسم:والله محد عليه اكبر طاخات الا انتي..حشى عندج ماجستير في التأليف...
ام راشد: والله كل ما ييت بقرا الحمد ولا قل هو الله احد ما ادري شو اقول خربطتني بسم الله من الحشره..
ليلى: وليش ما صليتي في حجرتج اريح لج..
ام راشد: والله ما رمت اسير هناك وصليت في الصاله...
شيخه كانت تحبي في المطبخ وشكلها تلحق شي وقبضته بإيدها...وسارت عند يدتها..
شيخه مبتسمه بخبث:ددوه ثوفي ثوفي...
ام راشد: شعندج؟
شيخه وهي صاكه ايدها بقوه ومبطله عيونها على الاخير:عندي وحث..
ام راشد:هاه..؟
ليلى:امي خلج منها ياهل...
شيخه:امي ثوفي ايدي..
ليلى: شوفيها؟
شيخه: وحث..
ويت ليلى بتبطل ايدها ويوم فتحت اصابعها كانت في نمله صغيره شارده من بين اصابع شيخه ..الشي اللي خلاها تعصب على امها كيف تخلي هالوحش اللي صادته بصعوبه يشرد عنها بكل سهوله..
وشلتها ليلى تغسل ايدها وظهرت مع امها وردن الصاله لين ما يزهب الغدا....
وفي الصاله...
يلست ام راشد على الارض ومجابلتنها ليلى وشيخه طايحه في حضنها وهي تلعب بشعرها...
ام راشد:غناتي ..
ليلى:هاه امايه..
ام راشد:ليش ضايجه.؟
ليلى حست عمرها بتصيح:مب ضايجه..
ام راشد:مب علي انا فديتج شو فيج.؟
ليلى غصبا عنها ما قدرت تتحكم في ملامح ويهها:امي ناصر.
ام راشد حست بشي وقلبها انقبض:شو فيه؟
ليلى تبتسم بصعوبه: بيعرس..
ام راشد انصدمت بس ما حبت تضيج صدر بنتها اكثر:اخرة الصبر..
ليلى:هاه؟
ام راشد:منو بياخذ..
ليلى تحاول تكون عاديه:مادري به...
ونزلت راسها تتعبث بشعر شيخه اللي طاحن دموعها فوقه...
ام راشد: الله يوفقه..تقولين بيعزمونا...؟
ليلى ما فكرت في هالشي.؟معقوله تروح عرس ناصر؟
ليلى:ما ادري بس احس هيه..
ام راشد:الله يتمم عليهم بخير...وليش ما داومتي اليوم ليكون ضايجه يا بنتي.؟
ليلى:منو اضيج امايه بالعكس حصه تعبانه وانا مالي بارض اداوم بروحي..
ام راشد شهقت: على طاري حصه..يالفضيحه ما سيرنا على ام خليفه طلعت من المستشفى وما شفناها...
ليلى:سيري لها اليوم وبسير وياج ازور حصه...
ام راشد:والبنت..
ليلى: خالها بيي ياخذها اليوم...
ام راشد:خلاص ان شاء الله بنسير لهن العصر ولا عقب المغرب..
ليلى:لاء يوم تروح شيخه بنسير...
ام راشد: اللي تشوفينه...
ونشت ليلى تشوف الاكل وشيخه تمت عند يدتها اللي انسدحت من التعب اللي في ظهرها...
....................
الساعه 1:00 طلع حمد من الشركه بعدما رمس ناصر وسار على طول المكان اللي رمس ناصر عنه بس ما قاله في شو بيسير له...ومن وصل طلع فوق الطابق الثامن ودق الباب ودخلته السكرتيره على خليفه اللي رحب به اول ما شافه...
خليفه:هلا بولد عمي اللي ما ينشاف...
حمد: يا مرحبا بك...هاه شو سويت؟
خليفه:رمست الريال واشتريت منه تنازله..
حمد:وافق على طول..؟
خليفه:هيه على طول ما كان ناقصني الا انه يتشرط...
حمد:اسمع انا اليوم بسير ميلس سعيد بن ناصر وبشوفه وبحاول اضغط عليهم شوي...
خليفه:انت متأكد انك تعرفه..
حمد: اقولك اخوه دارس وياي في بريطانيا ربيعي وما ظني يردني..خلها علي هالمره..
خليفه:ما ندخل ابويه في السالفه..؟
حمد: اعتمد طال عمرك السالفه اذا فيها حمد ما تروح هدر..
خليفه: مشكور ولد عمي ما تقصر ..
حمد: طاع انتوا هاه شو يالس يقول...ترا مب عشان سواد عيونكم...لا تنسى ان الاسم من بينا مشترك وما ياكم احس بويعه في ينبي قبلكم...
خليفه مبتسم: ما تقصر يا حمد وهالعشم فيك...
ويلس حمد يسولف وياه شوي ويتفقون شو ممكن يسوون ولا بشو يفكرون...وعقبها نش عنه حمد وسار البيت....
.
.
في الدرب كان حاط محطات الظهيره...ومسك تلفونه واتصل...تم يدق بس محد رد عليه...رد يدق مره ثانيه..وثالثه بس محد يشله...
دقايق ورد تلفونه يدق....
حمد مبتسم:هلا وغلا ومليون مرحبا بالشوق كله والوله كله والحب كله...
فرح:اهلين بس والله بصدق عمري كل هاه لي انا...شو بقيت لباقي الناس؟
حمد: وتستاهلين زود يالغاليه...شحالج حبوبه..
فرح:الحمدلله وانت شخبارك ان شاء الله مرتاح..؟
حمد:بخير وسهاله ميهود من الدوام..
فرح:الله يكون بعونك الغالي..زين ليش ما تاخذ اجازه وترتاح..؟
حمد: والله افكر بس مب الحين..
فرح:عيل متى؟
حمد:مادري المهم شو مسويه انتي وشخبارج.؟
فرح:والله ماشي بس شبه مخلصين بروجكتاتنا وباقي التسليم وعقبها الفاينل ونأجز..
حمد:يعني مافي أي فرصه نشوفج فيها قبل شهر 7..؟
فرح مستحيه:شو شهر سبعه..ودك تفتك مني كل هالفتره..؟ لا بنشوف لنا حل جريب..
حمد:متى يعني.؟
فرح: باجر..
حمد مندهش:والله؟
فرح:هيه عادي باجر اشوفك بالمارينا...
حمد:على خير ..
فرح تضحك: بلاك جي مبهت.؟
حمد:ماشي بس ما توقعت بهالسرعه...
فرح:عشانك كل شي يهون...
ابتسم حمد ورمسها شوي وعقب بند عنها وسار الشقه على طول....
......................
العصر الساعه 4:30 كانت ام خليفه واقفه في الصاله هي وبو خليفه وحصه وسمر وساره وعفرا وحمده يسلمون على بدريه وعبدالله اللي بيردون دبي...
بو خليفه: الله الله بعمرك يا ولدي...
ام خليفه:اتصلوا من توصلون..
بدريه وهي في الموتر:ان شاء الله عمتي...ساره ديري بالج على عمووه..
ساره مبتسمه...وعفرا ساكته وحمده واقفه وياهم...وردوا كلهم داخل وقوم عبدالله روحوا...
في الصاله يلسوا يتقهوون وحمده وعفرا راحن البيت يدرسن....
بو خليفه:متى شهاداتكم يا سمر..؟
سمر:الاثنين الياي...
ام خليفه: الله يوفقكم...يميع ان شاء الله...
حصه: ابويه ما بنسافر هالسنه.؟
بو خليفه: وين نسافر يا بنتي واخوج في السجن واختج مبتلشه هي وريلها في مشاكلهم...
ام خليفه: الا على طاري سلمى..حامد ما ياها...؟
ساره: اتصل من ساعه يقول انه بيكون المغرب هني انشغل بدوامه وما رام يي...
بو خليفه: خير ان شاء الله...
ودخل عليهم خليفه...وهو يرمس تلفون وعقب بند وسلم على اهله..ويلس وياهم..
بو خليفه: هاه ولدي شو سويتي بسالفة اخوك...؟
خليفه: اصبر يا بويه شوي علينا وان شاء الله خير..
ويرن تلفون خليفه وينش بعيد شوي...
خليفه مندهش: لا والله متى؟
وكلهم يطالعون خليفه يبون يعرفون شو السالفه...
خليفه مبتسم من الخاطر:الحين بكون هناك دقايق..لا لا افا عليكم ثواني وانا عندكم الحين...
ويستأذن من اهله ويظهر بدون ما يرمس مع حد...ما يعرفون وين راح خليفه...
وعقبها راح بو خليفه الميلس وام خليفه تمت في الصاله...وساره ردت عند بناتها...
.
.
فوق في حجرة سلمى كانت من امس مب ماكله شي ولا رمست ويا حد ولا حتى رضت تبطل الباب...حست انها صدق انظلمت وان ابوها خذلها..ما تعرف شو بتسوي...وللحظه طروا عيالها على بالها بس ما قدرت تفكر فيهم وايد كل شي كان بالنسبه لها هاللحظه مب مهم عقب كرامتها اللي ضاعت هدر....ضاقت وضاقت الدنيا فيها.....يتها حصه وحاولت وياها تبطل الباب بس ما رضت....
وسارت حجرتها وانسدحت وتمت تفكر في ليلى...
"ليلوتي حبيبتي ...بدق لها يا ربي اكيد زعلانه اني ما خبرتها اني ما بداوم...فديتها والله يا خوفي ليكون حمد قال لها شي.."
ومسكت تلفونها ودقت لها بس محد رد عليها ودرت تدق مره ثانيه وثالثه ورابعه بدون محد يرد....صدق خافت وحست ان في شي...
طرشت لها مسجين..
"اذا فضيتي دقي لي ابى اسولف وياج"
"يبلي الف عمر وعمر..لين اسلاك في ليله...وتنتهي الدنيا ولا اوصل لنسيانك"
وحطت تلفونها على الشبريه ورن على طول...
حصه: اهلين..
سمر:انزلي عندنا ضيوف..
حصه:وانا شدخلني...
سمر:امي تقول انهم يعرفونج..
حصه مستغربه: محد يزورني منو بيكون..
سمر:ما ادري..
وقفلت حصه التلفون في ويه سمر ونزلت تحت وشافت امها سايره صوب ميلس الحريم...
حصه:امايه منو هني...؟
ام خليفه:ام راشد وبنتها ليلى..
ابتسمت حصه من خاطرها وركضت فوق وغيرت ثيابها وحطت وقايتها وبسرعه للميلس....ودخلت تسلم على ام راشد وبنتها...
حصه: شحالج خالتي..
ام راشد: بخير وسهاله يا بنيتي..شحالج ان شاء الله تحسين الويع خف عنج...؟
حصه: هيه الحمدلله...
ونشت تيلس عند ليلى وهي مبتسمه وتسولف لها ويوم دشت ام خليفه...
ام خليفه: يا حيا الله من يانا زارتنا البركه ياام راشد وينج ما تنشافين من يوم ما كانت شمسه بنتي هني..؟
ام راشد: والله مشاغلنا يا ام خليفه ما نفضى مول وانتي تعرفين..
ام خليفه: الله يكون بعون اليميع...
حصه وهي تنش:انا بشل ليلى بنسير حجرتي عسب تسولفن على راحتكن...
وطلعن البنات فوق حجرة حصه...
.
.
وفي الحجره....
حصه: تعالي هني يلسي عدالي...
ليلى مبتسمه:زين بيلس أي مكان عادي...
حصه: تعالي على شبريتي يلسي...
ليلى: هذي شبرية منو؟
حصه: سمر المغثه...
ليلى:حليلها...
حصه طول الوقت ترمس بس ما رفعت راسها ولا قدرت لثانيه وحده تطالع في عيون ليلى...تحس بشي خانقنها...
ليلى: انا ما داومت اليوم..
حصه مستغربه: ولا انا...
ليلى: ادري دقيت الصبح ورمست سمر...
حصه: ما خبرتني مول...
ليلى: اقول حصه...
حصه خافت: هاه..
ليلى مبتسمه وضاغطه على عمرها:تعرفين شي جايد استوى؟؟
حصه تبلع ريجها:شو؟
ليلى وبعدها تجاهد انها تحافظ على ملامح ويهها:ناصر خطب ...
حصه غمضت عيونها وقلبها يدق بقوه ما قدرت تسوي شي ورفعت راسها تطالع ليلى اللي كانت بعدها مبتسمه بس مبين انها ثواني وبتنفجر...
ما قدرت حصه تنطق...بس طالعت عيون ليلى اللي على طول انترسن دموع...
ليلى مبتسمه من بين الدموع:عادي مب مهتمه..
حصه قلبها عورها كيف تحاول ليلى تسوي عمرها عاديه وهي محترقه...
حصه مسكت ايد ليلى:فديتج غناتي والله ما يستاهلج والله بيعوضج احسن عنه..
انفجرت ليلى وما قدرت تكبت اكثر وصاحت بحضن حصه اللي ما كانت احسن منها وصاحت وياها...
حصه: بس ليلى والله مافي شي يستاهل دمعه من دموعج...
ليلى: انتي ما تدرين بشي...
حصه: ادري بكل شي والله ادري انج مب قادره تتحكمين بشي ومشاعرج مب ملكج...بس حاولي ان شاء الله تنجحين..
ليلى وهي تمش دموعها: بشو انجح انا حياتي ما فيها أي هدف والله انتهت وانا اللي كنت اترياها تبدا...
حصه: من قال انها انتهت..حبيبتي توها ابتدت..صح انها انتهت من حياة ناصر بس بتبتدي في حياة ثانيه...وايد اشياء بعدج ما سويتيها وجدامج الدنيا بعدج ما شفتي منها شي...
ليلى: كيف بقدر اعيش وافكر واحلم بدون ما ييني احساس ان احلامي ممكن تتبخر...؟ كيف اقدر احط الامل في انسان مره ثانيه عقب ناصر بدون ما افكر ولو ثانيه وحده انه ممكن يخونني...؟
حصه: حبيبتي ما عليج منه..خله يولي...واحسن حل عشان يحس بقهر اكبر...انج تحقريه..احقريه يا ليلى وبيحس بقدر ويهه..لا تسوين له سالفه ولا تبينين انج ضايجه من الموضوع...
ليلى: ما اقدر..
حصه: اخ عليج...تحريتج قويه..ما كنت اتوقع ان انسان مثله ممكن يهز شخصيتج وانج ضعيفه هالكثر...
كانت حصه تستفز ليلى عشان تردلها ثقتها بنفسها وعشان تخليها ترد توقف على ريولها مره ثانيه بدون مساعده...
ليلى تتنهد: بحاول يا حصه بس يبى لي وقت..
حصه: شوفي الحين باقي كم يوم ويبدا شهر 6 بناخذ اجازه وخليها فترة نقاهه ابعدي فيها عن ويهه وردي قويه واثقه من نفسج اكثر..وارتاحي في البيت...
ليلى: وانتي..
حصه مبتسمه: ما روم ما أأجز وانتي مأجزه...كيف اسير الدوام وانتي محد..عادي انتحر...
ليلى تضحك: الله يغربل ابليسج..خلاص بناخذ اجازه...
وتمن يسولفن بعدما قدرت حصه تغير مود ليلى وتخليها تبتسم رغم كل اللي تمر فيه....
..................
الساعه 6:00 المغرب في بيت ام احمد بعدما خذ احمد شيخه من بيتهم...كانوا كلهم يالسين في الحوش...وشيخه يالسه تلحق الكتاكيت الصغار اللي في حوش البيت...
فاطمه: شواخي تعالي..
شيخه عاقده حياتها: ماليدث...
احمد يالس عدال فاطمه:خليها بعدين بتتعود عليج..
فاطمه: حرام والله احمد انا اضيج من تيي ما روم المسها وان قربت منها شلت الدنيا صياح..مب حاله هذي..
احمد: فاطمه..
فاطمه: هاه؟
احمد: منو تتوقعين في بال امي؟
فاطمه بلهفه:دخيلك احمد تخبرها والله اني ميته من الفضول ابى اعرف منهي.
احمد بخيبه امل: يعني ما تعرفين.؟
فاطمه: يا ليت والله...
ونشت فاطمه تركض ورا شيخه...واحمد راحت افكاره لبعيد...
"معقوله هذا اللي احس به صدج حب...؟ معقوله انا الحين صدق حبيت بن راشد.؟ حتى ما اعرف شو اسمها..اذا طلعت في بال امي وحده ثانيه كيف بقنع امي نرد ناخذ من بيت ريل اختي الله يرحمها...؟ وايد الوضع بيكون صعب...معقوله راشد يرضى يناسبنا.؟وايد حالتهم الماديه عاليه...معقوله يرضى يزوجني بنته...؟ وانا فقير على قدي..معاشي ومعاش ابويه ما يسدني ابني لها حتى شرات حجرتها في بيت ابوها...
بتريا لين ما اثبت في الوظيفه وعقب بفاتح امي بالموضوع."
ام احمد: بشو ساهي يا ولدي..
احمد انتبه: لا امايه بس افكر في الدوام..
ام احمد: شو سويت اليوم.؟
احمد: ولا شي بس لفيت كم لفه في الدائره وشفت الموظفين وتعرفت على طبيعة شغلي وعقبها رديت البيت..
ام احمد: الله يسهل عليك للي فيه خير وصالح...
وتيي فاطمه وهي ماسكه ايد شيخه وشيخه تطالعها مبتسمه..
فاطمه متشققه: اخيرا انتصرت وقدرت اجذبها عندي..
احمد يضحك: شو سويتي بها؟
فاطمه: مسكت لها الكتكوت وخليتها تلعب فيه واستوينا ربع...صح شواخي.؟
شيخه بفرح: ثح.
ام احمد مبتسمه: تعالي عندي حبيبتي...
شيخه بطلت عيونها على الاخير: اتي لوحي هناك بعدين الوحث بياكل ليولج...
احمد انفجر من الضحك...وفاطمه بعد وياه...
ام احمد: بلاكم شو قالت..؟
احمد: تقولج سيري داخل عن يي الوحش ياكل ريولج...
ام احمد ابتسمت: علني ما ذوق حزنج يا بنتي...
ويلسوا يسولفون وعقب طلع عنهم احمد ساير صوب ربعه وشيخه تمت عند يدتها وخالتها...
....................
وصل المطار وسار على طول قاعة كبار الزوار....ودخلوه الموظفين وابتسم من خاطره يوم شافها...وسلم عليها...
خليفه: الحمدلله على السلامه يالغاليه ...
شمسه: الله يسلمك يا خويه...
خليفه: شو هالمفاجأه الحلوه اللي فاجأتيني فيها...
شمسه: ربك بعد شسوي ييت اشوف امي ومسود الويه...
خليفه مبتسم:يالله الغاليه بنسير البيت...
شمسه: يالله..
خليفه: وين شنطتج؟
شمسه: خلاص الموظفين بيوصلونها السياره لا تشغل بالك..
خليفه:شعليج من كبار الشخصيات لازم كل هالدلع..
شمسه: امش اللي يخليك بنسير البيت ولهت على امي..
خليفه: محد يا وياج..؟
شمسه: سالم ما حصل فرصه يطلع..والعيال عندهم امتحانات...
خليفه: الله يوفقهم ان شاء الله....
وردوا البيت على طول وهو يايب لهم احلى مفاجأه...
.
.
في بيت بو خليفه كان حامد توه واصل ويلس ويا بو خليفه في الميلس وتفاهم وياه واتفقوا على شروط من بينهم كرياييل...
وزقر سلمى اللي نزلت اغراضها وسلمت على اهلها وروحت ويا ريلها على طول...وما مداه حامد يلف من الشارع اللي حذال بيت بو خليفه..الا وخليفه وصل البيت ووياه شمسه..ويوم دخل الصاله وهي وياه...انصدمت سمر وتمت تطالعها...وسارت تسلم عليها وهي مصدومه..
سمر: اختي شمسه ما كنت اعرف بتيين...
شمسه تضحك: ولا انا ادري اني برد...
خليفه: وين امي.؟
سمر: عندها حرمه...
خليفه: وقته هذا...؟
سمر: زين سيروا عند ابوي...
وين البشكاره شنطة شمسه..
ناتالي: بابا مبارك في الميلس عند الرياييل...
شمسه: عيل بسير ارتاح شوي لين ما تظهر الحرمه...سمر منو هني؟
سمر: خالتي غاليه...
شمسه لاويه بوزها: الحين انا اتحرا حد غريب مالت عليج...بسير اسلم ..
وسارت شمسه عند الحريم تسلم عليهن..ويلست ويا امها وهي مستانسه انها بخير واحسن عن قبل...ويلست وياهن شوي وعقب استأذنت ام راشد وزقروا على ليلى اللي نزلت وروحن عشان الوقت تأخر ويبون بيت بو خليفه ييلسون ويا بنتهم شوي.....

.
.
كان تلفون خليفه يرن وهو ساير صوب فلتهم بيخبر ساره عن شمسه...
خليفه: الو مرحبا حمد..
حمد: اهلين خليفه...
خليفه: هاه بشر..
حمد: دقيت له ما يرد...سرت له الميلس قالوا في العين بيرد اليوم في الليل..
خليفه: ويعني؟
حمد: باجر برمسه...
خليفه: على خير ان شاء الله بينا تلفون..
حمد: اوكي...
وبند خليفه من عند حمد وسار يزقر حرمته وبناته...
...................

ترقبو الحلقه الثامن عشر من الاخ البدوي الحبوب
اختكم
الغلا

[الجنيبي]

السلام عليكم ورحمة الله وبركاته

مشكورة أختي الغلا على القصة الجميلة

وننتظر منج التكملة بسرعة

أخوج الجنيبي

[الغلا]

الجنيبي

شكرا جزيلا لك اخي الكريم على هالتواصل الحلو منك ....

وان شاء الله الجزء القادم اخوي البدوي الحبوب بيعرضه لكم


اختكم
الغلا

[البدوي الحبوب]

الحلقه الثامنه عشر

يوم الخميس الظهر كان بوخليفه مسوي عزيمه لاهل البيت عشان ام سعود ياييه زياره لاهلها..والكل كان متيمعين يعني بيت بو خليفه كانوا كلهم في البيت العود..الا عبدالله طبعا وحرمته وزعل بو خليفه يوم درا انهم ما بيون بس ام خليفه اقنعته ان عبدالله لاهي عن دوامه من اسبوع وما جابل الشركه ولا شاف الشغل..بس بو خليفه بعد حرج ان اليوم جمعه ماشي دوام ..وام خليفه تحاول فيه لين ما رضى ..والظهر عقب ما تغدوا وخلصوا كل شي..في الصاله نشت ساره وبناتها عفرا وحمده وسارن البيت يدرسن لامتحان باجر اللي بيكون لحمده اخر يوم وعفرا بعدها بيوم وتخلص..
شمسه: ما دقيتوا لسلامي ولهت عليها...
بو خليفه: امس روحت بيت ريلها قبل تيين بشوي..
خليفه: وانا اقول جني شايف سيارة حامد امس عند الدوار...
بو خلفيه:هيه والله ياي امس وخذ حرمته..
شمسه: خساره ما لحقت عليها..
ام خليفه: واعلي عليها بنتي مادري بلاها خاف الا متواجعه ويا ريلها..ويهها مب على بعضه..
بوخليفه:لا ما عليها شر ان شاء الله الا خرابيط اليهال..
خليفه: وين يهال يا بويه الله يهديك عيزنا وبعدك على يهال..
ام خليفه: والله لو ان عمرك 100 سنه بتم اشوفك ياهل واحاتيك وفوادي ياكلني عليك وجنه عمرك خمس سنين..
حصه: بلاج امي متخبله على رقم 100 تبين سمر تييب 100 في الشهاده وعمر خليفه 100 شو السر..؟
بو خليفه:خلي امج في حالها لا تغثينها..
خليفه: من قدج محامي ودفاع شامل..هذي ام خليفه محد يروم لها..
حصه:الحين انا يا بويه مغثه الله يسامحك..
سمر:اسمع ونه الله يسامحك..يلعب ابويه وياج شقالوا لج ياهل هو..
حصه مبطله عيونها: من وين طلعتي انتي من قالج ترمسين اصلا..مب قلنالج يوم نرمس تسكتين ..صوتج وذا..
سمر: عاد اللي يسمعج انتي ماشاء الله تقولين عندليب..
حصه: فديتني شو يي العندليب عند صوتي..
سمر:يزيغ ويطيح ريشه..
شمسه تضحك: والله ولهت على حشرتكن...ما تيوزين يا حصيص نقول تكبرين وتعقلين ثرج الا تكبرين ويخف عقلج..
حصه:شوفيني زينة بنات العايله عقل وجمال وادب..واخلاق..
خليفه: بس للاسف لسان طوله شبرين...
سمر: هيه والله وبتتخرطف فيه بعد من طوله..
حصه: جب الله يخليج والله احس بلوعه غريبه يوم ترمسين مول ما اتحملج...
سمر:يعني انا اللي ميته عليج..
بو خليفه: بسكن ما تعرفن تحشمن حد انتن؟
ام خليفه:هذي حصه ما تيوز عن اختها ولا سمر هاديه ما ترمس..
حصه منصدمه...وسمر تطلع لسانها ومن يصد ابوها تتأدب وترمش بعيونها ونها مؤدبه ما سوت شي..
خليفه يتمصخر: والله كلهن يبالهن بالعصى في ظهورهن...
بو خليفه:ماعاش اللي يمد ايده على بناتي...
ورد يتذكر سلمى بنته بس حمد ربه انه محد يعرف عن الموضوع ولا بس بيقولون بو خليفه الا رمسه بدون فعل...
حصه: الله يخليك لنا يا بويه ذخر وعسانا ما نخلى منك..
سمر: وبهالمناسبه السعيده ان ابويه دافع عنا بقولكم شي..
حصه: انا بروح ارقد بنخمد..ما ريد اسمع نكت..
سمر: ما بقول نكته..ابويه عندي فكره..
بو خليفه: شعندج..؟
خليفه: ارمسي يا ثقلج تييبين المرض..من وين طالعه انتي..
سمر: من بطن امي..
خليفه متقرف: والله انج تييبين المرض..
حصه: الحمدلله حد أيدني..
سمر: ابويه شوفهم..
بو خليفه متأفف من ثقالة سمر:ارمسي وخلصينا..
سمر ماده بوزها:ابويه شو رايك نسير نخيم في حتا.؟
خليفه: وانا اتحرا بتقول شي..
ام خليفه: هيه والله صدقها..
بو خليفه: وين صدقها يا ام خليفه..بنخيس من الحر ما تعرفين نحن في الصيف الحين..
ام خليفه: يمكن شي نود ولا هبوب بارد يينا..
خليفه مبتسم: وين يينا الله يهديج يمه يعني بيعرف ان نحن سايرين نخيم وبيهب علينا..
حصه وهي تطلع فوق: لو قررتوا تسيرون مكان خبروني انا ما بسير وياكم بتم في البيت ولا بسير بيت عبادي...
بو خليفه: لين متى بتمين يا شمسه هني.؟
شمسه: باجر موعد طيارتي الساعه 12 بالليل..
ام خليفه: ما طولتي ..!!
شمسه: عيالي وريلي وامتحاناتهم بس ييت اشوفج واطمن عليج واشوف سالفتكم ويا مسود الويه..
خليفه: خلاص ان شاء الله كل شي بينحل خلوا ثقتكم فيني كبيره...
وتغيرت اشكالهم عقب ما يابوا طاري ذياب..وعقب اذن العصر وكلهم نشوا يصلون وخليفه ركب موتره بيسير بيت عمه بو حمد...
........................
في صالة البيت كانت ملانه ما تعرف شو تسوي رايحه راده للزراعه وما تدري وين تتوجه..فكرت تتصل في حصه بس تعرف انها ترقد هالوقت..فكرت تروح بيت راشد بس ما تبى تغث العيال وقالت احسن شي تسويه انها تسير ترتب حجرتها وتغير فيها شوي...وقبل تطلع فوق كان تلفون الصاله يدق..شلته وردت...
ليلى: مرحبا..
شيخه:امي حبيتي..
انفتضت ليلى وقلبها يدق بقوه: حبيبة قلبي انتي فديت هالحس الغاوي..
شيخه: امي تعالي..
ليلى مبتسمه: وين ايي فديتج..؟
شيخه: امي تعالي ثليني ماليد ماليد..
ليلى: زين حياتي باجر بتيين...اقول شواخي منو متصل لج..؟
شيخه: هذي مااعلف من اثمها..
ليلى: قولي خالوه فاطمه..
شيخه تضحك..
ليلى: ما يضحك قولي خالوه فاطمه..
شيخه: ماليد...
ليلى:زين شواخي متى بتردين..؟
شيخه:امي اليدث تعالي..يالله بنلوح بيتنا..
ليلى: فديت هالحس يا ربي...زين حياتي يالله بسير الحين ارتب حجرتي..روحي العبي..
شيخه:ذين..
وصكت شيخه عن ليلى اللي سارت حجرتها..ترتبها وتشوف لها كم شغله لين ما يأذن المغرب وعقبها بتسير تصلي..اول ما طلعت الحجره فوق تعايزت تسوي شي ولكنها نشت ترتب ثياب شيخه وتيمع اللي يبى له غسيل واللي يبا له ترتيب مع ثيابها..عقبها ملت ويلست على شبريتها..وتذكرت ربيعتها شما اللي كانت وياها ايام الدراسه...وابتسمت وقررت تتصل بها وتسلم عليها..تعرفهن المعرسات من البنات دوم حجتهن العرس في قطاعة ربعهن...بس انصدمت وتضيجت وايد يوم عطاها ان الرقم مب مستخدم حالياً..
نشت ليلى لطاولتها وخيبة امل فضيعه صايبتنها من ناصر اللي ما فارق خيالها لثانيه وحده...كل شي في حياتها كان يذكرها فيه..كل شي واي شي..ثيابها والالوان والضحكات والدموع..اوراقها والاقلام..حتى اشعارها وكل شي كان مرتبط بناصر..ناصر اللي كان عيونها الثنتين اللي تشوف بهن وقلبها اللي عايشه به..كان ناصر يعني لها الحياة الجديده...دومها تفكر انها بائسه وحياتها صعبه والوحده متعبتنها بس ياما عقدت الامال في ناصر وكانت تقول املي بالله كبير واكيد انه بيعوضها كل اللي فات...حطت راسها على الطاوله بيأس...
"كنت دوم اقول اني وحيده..ضعيفه ولو اني قويه..كنت طول عمري هشه بمشاعري قويه بكبريائي..ما سمحت لانسان يتقرب مني رغم كثرة اللي شفت...كل شي حواليه كان يحبني..وكنت ما احب شي الا هو..كأن الحب فيني انخلق عشانه...(تتنهد)..كنت اقول كلما مريت في ازمه.ما عليه يا ليلى لا تضيجين الايام اليايه بتكون احلى واروع كل شي بيكون حلو..ناصر بيغير علي الدنيا...بس للاسف..مافي اصعب على الانسان من ان الشي الوحيد اللي نعلق عليه امالنا يخيبها...الله يسامحك يا ناصر..على الاقل كان حسستني انك معيشني بزيف وحب كاذب ماله وجود..."
رفعت راسها وابتسمت ابتسامه أليمه يمكن حاولت فيها تضحك على نفسها..بس استجمعت اللي بقى فيها من قوه ويلست ترتب حجرتها وتشغل نفسها من التفكير اللي لا محاله ما تروم تشرد منه...
.
.
خلصت ام راشد صلاة المغرب ونزلت الصاله يوم سمعت حس خلود حرمة راشد عندها ويلست وياها...
ام راشد: وين راشد ما قام يي يسلم علي...من امس ما شفته؟
خلود: والله هلكان يا عمتي لو تشوفينه كيف..
ام راشد: واليهال وينهم ما شفتهم.؟
خلود: يدرسون حليلهم..
ام راشد: بتيين وياي بنسير صوب الزرع ما شفته اليوم الضحى كانت عندي حرمة سعيد بن محمد..
خلود:يالله عمتي بنسير...
ونشن بيسيرن الزرع وهن في الحوي سايرات برا شافن سلامه يايه من الفله وشكلها توها ناشه من الرقاد..بس طنشتهن وسارت بيت يدها على طول....وطلعت عند عمتها...اللي كانت ترتب الحجره بعدها..كانت سلامه صدق ضايجه وشكلها معتفس..واول ما دخلت عند عمتها يلست تسولف لها...
ليلى: والدراسه انتي ما تبين تخلصين ولا شو رايج..؟
سلامه: عموه باجر اجازه يعني بدرس لا تحاتين..
ليلى: مبين..الا اقول حمداني بيخلص الاحد وانتي.؟
سلامه: ما اعرف ..حمدان تعرفين متى بيخلص وانا لاء..انتي اصلا تحبينه اكثر عني..وانا اعرف في هالبيت ولا حد يدانيني حتى شيخه..ولا البشاكير...اذا امي وابوي ما حبوني برتجي حب من انا..؟
انصدمت ليلى...وتمت تطالعها ...سلامه ما تضايقت من سؤال ليلى اكيد..في شي مضيج بها وانفجرت هاللحظه...
ليلى: شو هالرمسه اليديده؟
سلامه وهي تنش: ماشي يديد خلاص تعودوا كل شي..تتحرون بس انتوا اللي تحسون..انتوا اللي تتعبون..وانتوا اللي تصير لكم مشاكل...يعني انا عشان مب معرسه وما عندي عيال لازم حياتي كلها فرح وما ييني الهم...ليش الهم بس هم العيال والريل؟ عمره حد فيكم ما قال لي ليش متضايجه يا سلامه..؟ ليش عيونج حمر..؟ ليش اليوم ما مريتي البيت العود..كل شي يمر بهدوء وسلام..سواء ييت ولا رحت..(دموعها بدت تطيح) انا ما اعرف شو اللي جابرني اصبر..وليش اتعذب والكل ينازعني ولا حد فكر فيكم شو سبب ضيجي..حتى انتي يا عمتي اللي دوم وياييه بالزينه والشينه..تغيرتي وما عاد همج الا نفسج وشيخه..انتي اصلا وايد متغيره ومن زمان...(تصيح اكثر)..ان شاء الله ربي ياخذني منكم وارتاح...
طلعت سلامه وخلت ليلى في داومه من الصدمه على الذهول على الخوف ..
"شو اللي بيخليها تفكر جي..؟ شو اللي ممكن يشغل قلب سلامي البرئ..؟؟(تعض على شفايفها بألم)..صدق انا مقصره وياهم...؟ معقوله انهم حسوا اني متغيره وما قمت اسأل عنهم؟ بس انا بعد لي مشاكلي وحياتي صح احبهم واداريهم بس مب شرط اكرس كل حياتي لهم..في لي جزء خاص من حياتي لازم اعيشه..شو فيها سلامي..؟ شو صار عليها..؟ معقوله متألمه هالكثر وهب طايعه ترمس؟انا لازم اكلمها"
.
.
في هالوقت سلامه وصلت حجرتها وانفجرت صياح..كل اللي تعرفه ان نفسيتها تعبانه وجداً تعبانه...راسها بينفجر من الصداع..وكل شي حواليها متعب...امها وينها عنها..الحين عمرها 16 سنه شوي وتدخل ال 17..عمرها ما فكرت تلوي عليها ولا تحبها ولا تنشدها شو سوت في امتحانها...الحوار بينهن وايد مقتضب...عمرها ما فكرت تقول لها "بنتي شو فيج؟" تتحرا هالشي مب مهم ما تدري ان أي انسان مهما كبر عمره وقل احتياجه للناس ووقف على ريوله..عمره ما بيستغني عن حنان امه..عمره ما يغنيه عنها شي..فما بالها بمراهقه في عمر سلامه...
تمت سلامه تصيح ما تدري ليش بس كل اللي تعرفه انها وحيده ومب قادره تحب حد رغم ان الكل في المدرسه يحبون شخصيتها القويه حتى رغم الدفا اللي في ملامح ويهها ورغم تقاسيمه شديدة الجمال والانوثه الا انه ما يكفيها..تبى حد يحس بها يحبها يحترمها..يقدسها كإنسانه...
وهي في غمرة ألمها نزلت تحت ويابت التلفون فوق...ودخلته لاول مره حجرتها....ودقت لعبدالرحمن..كم كثر محتاجه تشكي له بمكنون قلبها..مافي انسان في هالعالم يفهمها كثره في نظرها..كان الحب اللي تحبه لعبادي..اكثر من أي شعور ممكن يوصف وقلبها صدق مولع به..وحتى هو كان يحبها من خاطره يحب قوتها وعنفوانها..بس يقهره يدمره غرورها وثقتها بنفسها...دقت له وهي في اقسى لحظات ضعفها..
عبدالرحمن: مرحبا..
سلامه وصوتها ثجيل من الصياح: اهلين عبادي..
عبدالرحمن: شو بلاه حسك؟
سلامه حست: حد عندك؟
عبدالرحمن: هيه والله ويا الاهل عقب اشوفك ان شاء الله..تعرف ويكند ما نشوف بعضنا الا فيه..
سلامه بخيبه شديده: اوكي برايك..
عبدالرحمن: باي..
صكت سلامه عنه وقلبها يتفطر حزن اكثر..حتى الانسان الوحيد اللي وثقت فيه وحبته..ما كسرت خاطره وهي تصيح..مفروض لو يحبها في نظرها يضحي بالناس والاهل عسب يكون وياها في لحظاتها العصيبه...
تمت تصيح لين ما حست قلبها بينفجر من الصياح والضيج اللي فيها..وتمت على هالحال مصدومه من نفسها على حياتها..ولو انها انتبهت بوقت متأخر بس الظاهر ان لكل صبر حدود وشكلها وصلت للحد الاخير...
الساعه 7:30 كان حمد في موتره واقف جدام بيت سعيد بن ناصر...اتصل بخليفه قبل ينزل..
حمد: مرحبا خليفه.
خليفه:هاه وينك؟
حمد:خلاص وصلت الميلس ان شاء الله خير..اول ما اظهر بتصل بك..
خليفه:زين ما وصيك..
حمد:اوكي يالله برايك..
وبند حمد عن خليفه ونزل الميلس وظهر له منصور اخو محمد ربيع ذياب..ويلسوا ويا بعض وكان الميلس فاضي محد فيه الا هم الاثنين..
منصور:يا حياالله القاطعين ..
حمد: الله يحيك وين قاطعين عاد تعرف ناس ودوامات ما عندي وقت..
منصور: وين ما عندك وقت الله يهديك..حق سلوم فاضي بس نحن اخر من تنشد عنه..
حمد يضحك مجامله:حرام عليك سالم لروحه ما عنده ربع وانت الشباب ما شاء الله مازرين الميلس عندك..
منصور:انزين يالطيب ما قررت تعرس بتوصل الثلاثين وانت ما فكرت حتى بالعرس..على الاقل اخطب اضمن لك حرمه زينه..
حمد: والله ما فكرت بالعرس مول وجان على الخطوبه حق شو اخطب واعلق البنيه دام العرس مب في بالي ..يعني اقطع بختها وانا معلقنها جي..
منصور: يالله الله يوفقك ان شاء الله..
حمد: تعرف يا منصور انا ابغيك في سالفه وان شاء الله ما تردني فيها..
منصور: فالك طيب انت تامر امر..الله يقدرني عليها وان ما قدرت اخلي أي حد يسويها لك ولا تم بخاطرك..
حمد مبتسم:فالك ما يخيب يالطيب وهالعشم فيكم..
منصور: تفضل..
حمد:اسمع يا منصور اخوك محمد مسجون ويا ولد عمي ذياب وذياب ما يخصه بالموضوع وربعه يعرفون هالشي بس تعرف حركات الخساس في الشباب مب راضيين يعترفون ويلغون الموضوع ويفكونا...
منصور يطالعه ببرود: هممم زين..كمل.
حمد منقهر شوي:جنه الرمسه مب عايبتنك؟
منصور: لا افا عليك كمل بسمعك..
حمد:بصراحه يا منصور جان لي معزه عندك وما بتردني يا ليت تخلي اخوك يغير اقواله والله لو تشوف حال عمومتي والله يعورك قلبك..امه طايحه بالمستشفى ثلاث ايام مهدده بجلطه باي وقت..
منصور:الله يكون بعونهم بس ترا لنا ولد وياكم هب لرواحكم انتوا..
حمد:بس ذياب ما يخصه واخوك يعرف بهالشي...
منصور: اعرف...
حمد: عيل شو بتسوي الحين..
منصور ابتسم: فالك طيب يا حمد ان شاء الله اخليه وقت الجلسه الاولى يغير اقواله..
حمد ابتسم من قلبه:العشم فيك يا ولد الاياويد..ودامك مسهل علينا حبيت اقولك اننا خلينا راعي السياره يتنازل عن البلاغ وان شاء الله يتخفف الحكم النهائي...
منصور مستانس: الله يبشرك بالخير..عيل ابشر اهلي ..
حمد: على خير ان شاء الله..
منصور:نشوفك يوم السبت في الجلسه..
حمد: لاء انا مب ياي ان شاء الله اخوه العود خليفه بيكون وياه..
منصور: هيه اعرفه...
حمد ينش: عيل اترخص انا منك الحين..
منصور: ما يلست اتريا بنحط العشا..
حمد: دام فضلك بس والله وراي كم مشوار لازم اخلصهن...
منصور: الله يحفظك يالغالي..
ووصله لين الباب وعقب روح حمد ومنصور دخل البيت...
.
.
وفي الموتر اتصل على طول في فرح وحس انه وايد اتأخر عليها...وردت عليه من اول رنه..
حمد: اعرف شو بتقولين لا ترمسين والله توني طلعت من ميلس الرياييل ما بغى يفجني الريال...
فرح معصبه:احترقت وانا ادق عليك وليش ما ترد...صدق انحرق دمي...
حمد مبتسم: سمعي والله ان تلفوني في السياره والله...زين حبيبتي اسف والله..
فرح مبتسمه: اووه اووه حمودي يتأسف السالفه فيها شي...
حمد: حبيبتي بعد حرام اتأسف لها...
فرح: فديتك انا..
حمد:احم استحي انا لا تتفدين..
فرح: عيل والله فيك شي غادي مؤدب اونه عاد حمد يستحي..
حمد: زين يالله حبوبه انتي وين..
فرح: في الكوفي وانت وين؟
حمد معصب: شو تسوين هناك.؟ عسب الشباب يتفرجون عليج؟
فرح: شو بلاك أي شباب اللي ترمس عنهم والله ولا حد صد ولا طالع..يالسه في الزاويه من يشوفني..؟
حمد:هيه تراج يالسه تطالعينهم كلهم..
فرح: والله ما شفت ولا واحد شو فيك؟
حمد: عيل كيف عرفتي ان ولا واحد صد صوبج؟
فرح: انا لله وانا اله راجعون..قول انك ما تبا تيي وفك عمرك من الحشره..
حمد: بييج الحين ودج اني ما ايي وبيرج من شعرج جدام كل الخلق..
فرح مبتسمه: زين يالله اترياك..
حمد:اضحكي ما عليه بتشوفين الحين..
فرح:اشدراك اني اضحك...
حمد:ما عليه خلج مثل ما انتي...
ونزل حمد من موتره وسار الكوفي اللي في المارينا وفرح بعدها وياه على الخط...
فرح: وين انت الحين..
حمد: بعدني عند الدوار..
فرح: بس اسمع صوت حشره عندك..
حمد: عيالي في السياره غثوني...
تضحك عليه وشوي ويشوفها في الزاويه متغشيه وعرفها...وسار لها..واتفاجأت منه..
حمد: مسكتج متلبسه بتهمة المغازل..
فرح تمت يالسه وابتسمت...
حمد يلس مجابلنها: شحالج غناتي.؟
فرح : الله يسلمك شحالك انت..
حمد يضحك..
فرح مب طايره من الفرح الا اجتازت المجره من فرحتها ودها تنش وتباغم في البقعه وتقول احبه احبه احبه لين ما يسمعها كل الناس..
حمد:زين احلويتي عن اخر مره..
فرح استحت:مشكور..
حمد: العفو..شو تشربين.؟
فرح: أي شي من ايديك حلو..
حمد: ما بعصر لج شي شو قالولج اشتغل وياهم بالمطبخ ..ونه أي شي من ايديك حلو..قولي أي شي من ايدين الهندي حلو..
فرح ميته من الضحك عليه..وتموا يسولفون وتعشوا ويا بعض وعقب ما سهروا احلى سهره في بوظبي..ردت فرح البيت وهو رد شقته

في فلتهم بدبي...كانت بدريه يالسه تقنع عبدالله ساعه يسيرون بوظبي وهو مب طايع..وهي تحاول وهو رافض الفكره كليا وشالها من باله...
بدريه: ارجوك الله يخليك عبادي والله فضيحه ان ما سرنا..
عبدالله: اقولج مب ساير لا تحاولين اذا بييج حمد يشلج سيري وياه والله ما سرت هناك..
بدريه: ليش فديتك والله شموس بتاخذ في خاطرها منك والله عيب..
عبدالله: شو بوظبي انتي الثانيه بعد..اسبوع خست فيها وتبيني ارد عشان ابويه ما يفج مني ويقول لي انا بيلس وانت جابل الشغل..واودر شغلي هني..قلت لج مب ساير الجو ما يساعد..
بدريه: والله بسوي لك اللي تبى عبادي حبيبي ارجوك..
عبدالله : انسي الموضوع مستحيل نروح..تبين اتصلي بأخوج خل يوديج..
بدريه: هيه وبعدين يتمصخرن علي الحريم..ريلها ما يسوي لها شي ومودرنها في بوظبي وهو في دبي..تباني اخليك هني بروحك عشان تاخذ راحتك..
عبدالله: أي راحه واي خرابيط الله يهديج..مب ساير يا بدريه عورتيلي راسي بالحنه والله بينفجر..
بدريه: اوكي عندي اقتراح..
عبدالله: مب ساير بوظبي لو بكل الاقتراحات..
بدريه: اسمعني زين..
عبدالله: قولي بس بعد ما بنسير بوظبي..
بدريه: زين اسكت واسمع...
عبدالله: يالله..
بدريه: بنسير باجر .........
يقاطعها عبدالله: اقولج مب سايرين بلا حنه صدعتيلي راسي والله بينفجر منج..بدريه بس عاد..
بدريه: زين اسمع الفكره وعقب ارمس..يمكن تتوافق مع مشاريعك...
عبدالله: ماشي سيره لبوظبي ويكفي حنه على راسي منو معلمنج الحنه انتي منو؟ صدق اول مره تكونين جي...
بدريه:منك متعلمتنها...
عبدالله: صدق اليوم غاديه حنانه بشكل فضيع...
بدريه تضحك: زين حبيبي لا تغير السالفه بتسمعني ولا لاء...؟
عبدالله : ارمسي...
بدريه: بنسير باجر الصبح انا وانت وبنخلي البشكاره في البيت..وبنتغدا في بيت عمي والساعه 7 المغرب بنروح..وبنقول لهم بشكارتنا في البيت وعبدالله عنده اجتماع مهم باجر في الشركه وجي ما بيطلبون منا نيلس..
عبدالله: بعد ماريد..مب مقنع الحل...دوري لج على شي ما يخلي ابويه مول يقول لي ايلس في بوظبي...
بدريه: اوكي نسير لهم بوقت متأخر دليل اننا ما نروم نيي بوظبي ومايينا الا بالصعوبه يعني نسير لهم العصر ونقول بس بنتعشى وبنروح..وشمسه اكيد رحلتها بالليل انا دقيت لها اسلم وهي قالت لي رحلتها يوم الجمعه في الليل...يعني انتهت زيارتنا وبنرد البيت...
عبدالله:رحلتها في الليل؟
بدريه بفرح في قلبها:هيه..
عبدالله: اممم..
بدريه تتريا الموافقه: شو قلت.؟
عبدالله: اوكي اتفقنا بس والله ان لزق ابويه فيه والله لا اخليج في بوظبي وارد دبي...ويلسي انتي جابلي شغله..
بدريه تضحك: اوكي فديتك يا ربيه انا...والله احبك..
عبدالله ابتسم:عيل كل يوم بوديج بوظبي..
بدريه تضحك:عسب تسمعها مني..انت بس قول متى تباها وانا بقولها...
عبدالله: مالها طعم يوم اطلبها حلاتها جي منج بدون مقدمات...
ابتسمت بدريه ونشت تسوي لريلها العشا لين ما يشوف التلفزيون وعقبها بترتب ثيابها حق باجر..عسب يسيرون بوظبي...
......................
في الحجره اللي فوق كان يالس يرتب اوراق المشروع اليديد اللي على وشك الانتهاء..ويشوف في التقرير اخر الاعمال..وشوي ويدق باب حجرته...
فهد: تعال نصور..
ناصر يدخل ويصك الباب: شو تسوي؟
فهد يدخل الاوارق في الملف: اشوف اوراق ابوي خلصن ولا بعدهن...
ناصر: زين انزل بنظهر..
فهد وهو يطالع الملفات: وين؟
ناصر بضيج: أي مكان...
فهد حس بصوت اخوه وطالعه: شي يعورك؟
ناصر:لاء بتظهر وياي..
فهد حط الملف في الدرج وقفله:ناصر اخوي شي بلاك؟ مب على بعضك..
ناصر بضيج: فهد والله العظيم احبها...
فهد:يا بوك انسى...صار اللي صار..
ناصر بأسى: لو شفت شكلها يوم خبرتها والله لو انك حجر بتصيح من حالها...
فهد: ليكون صحت.؟
ناصر: تخسي الا انت...حرمه انا اصيح..
فهد: الدموع مب عيب العيب الطعن في الظهور..
ناصر سكت وغمض عيونه:فهد تتوقع ممكن يصير شي يلغي العرس..
فهد: لا يا بابا ماشي بيلغيه..شو تتوقع مثلا اروى تموت يوم العرس..ولا ابوي يحب قوم خالي ناصر..ماشي بيصير من هالاشياء....لازم شوي تتنازل عن خيالك اللي تعيش به خلك واقعي وانسى حركات الافلام انت مب في فلم مصري تلتعن طول الفلم وفي الاخير الظروف تسير لصالحك وتتزوج اللي تحب...اخوي حبيبي دخل احلامك في مخباك...وحط فبالك شي واحد..يوم سمحت لك نفسك تقتل حلم انولد في قلب انسانه من يوم انخلقت...انه بييك اليوم اللي تخسر فيه احلامك....
ناصر خاف من رمسة فهد: أي انت شو تقول؟
فهد: اللي سمعته..يا ناصر اعقل وفكر بحرمتك اليديده وبيتك وحياتك وعيالك اللي بيون باجر منها..وانسى وحده خلاص صارت ملك للزمن..
ناصر: انت تحلم وايد ان ليلى تصير لحد...ليلى عمرها ما كانت الا ملكي انا...ولو اموت محد بياخذها غيري..
فهد: ودر عنك حب التملك وفكر بعقلك شوي انت بتصك الثلاثين متى بيكبر هذا(ويأشر على راسه)..
ناصر بضيج: زين شو اسوي شو؟
فهد: تعرف بخبرك شي...
ناصر: شو؟
فهد: انا قلبي ما يعورني عليك مول..كان بإمكانك بشوية ضغط تثني ابوي عن رايه..وتخلي اروى الثانيه وتحافظ على ليلى...وقلبي بعد ما يعورني على بنت خالي ليلى..لانها قويه ومب في حاية شفقه منا...تعرف انا الوحيده اللي كاسره خاطري بالموضوع كله هي اروى بنت عمتي...
ناصر مبطل عيون على الاخر: ليش ان شاء الله..
فهد: لانها الوحيده اللي ضايعه في هالمعمعه...هي الوحيده اللي ما تدري بشي..كل اللي تعرفه ان بتاخذ حضرة جنابك..ولا تدري عن ماضي عشقك المستمر..ولا تدري انك مغصوب عليها...
ناصر تنهد...عمره ما فكر في اروى...ليش تنظلم شو ذنبها...؟ مسكينه هي اكيد فرحانه...وقلبها ميت من الوناسه..والارض مب واسعتنها...بس كيف بيكون شعورها يوم تدري انهم يزفونها لانسان وياها منه الجسد والروح ضايعه...
فهد: اروى ضحية ابويه وضحيتك انت...ضحية ابوي لانه يبغيها عشان يدخل شراكه ويا ابوها في مشروع المباني اليديد اللي صوب السمحه...وضحيتك انت يوم انك بتكون بقلبك لغيرها وبجسدك بس لها...بذمتك ما تكسر الخاطر هالبنت؟
ناصر يحس قلبه يحترق: محد قال لها توافق...
فهد ينش بيطلع: هه!!! هيه محد قال لها توافق...مسكينه اروى صدق مسكينه..الله يصبرها بس...
ناصر تم يالس على الشبريه ما رمس بس حس بقلبه يشل حمل ثاني غير همه وهم ليلى..صار له ثلاث هموم همه وهم ليلى وفوقهن هم اروى...صدق معقوله يظلمها ناصر...؟ معقوله انها بتنظلم وياه..؟ افكار تمت تدور في بال ناصر..اللي مب ناقص هم بس زاده فهد فوق همومه هموم زايده....خلت كل المواجع بقلبه تتقلب...

الساعه 11:30 بالليل كان راد من ميلس واحد من الربع...ونزل من السياره وسار بيت امه على طول وما مر بيتهم...وكان يعرف ان امه راقده بس اصر انه يمر بيتها اول وعقب يسير فلته...دخل الصاله وحس بهدوء فضيع وقاتل..بس مشى وشاف ليت حجرة امه مب مبند وسمع سوالف...ودق الباب...
ليلى: منو؟
راشد: بطلي انا راشد..
ونشت ليلى بسرعه وبطلت له الباب...
راشد: السلام عليكم..
ليلى وام راشد: وعليكم السلام...
راشد قرب من امه وهوى على راسها يحبها وليلى بعدها واقفه...
ام راشد: وينك يا راشد ولهت عليك فديتك ما شفتك من امس..
راشد: امايه فديت قلبج والله وايد مشغول ومن حظي أني شفتج قبل اسير البيت والله مول ما توقعت انج للحين سهرانه...
ام راشد: ما ياني رقاد وزقرت على اختك تسولف لي ...
وطالع ليلى اللي بعدها واقفه وابتسم ومد ايده لها..وهي طالعته بغرابه..
راشد مبتسم ماد ايده: بلاج تعالي...
ليلى يته وقربت منه ومسك ايدها ويرها صوبه وهي يلست حذاله..وهو قربها منه لين ما انحط راسها على كتفه...وحبها على راسها...
ليلى انصدمت منه وام راشد وايد تأثرت..عمرها علاقة راشد وليلى ما كانت قويه لانها وايد تحترمه احترام انجلب لحواجز واشياء الغت من بينهم عاطفة الاخوه...اما ليلى اللي ما تنحسد على هالموقف وقف شعرها وحست بقشعريره فضيعه...وبدون ما تحس دمعت...
راشد: بلاج الغاليه ما يسوى عليج...
ليلى صاخه ما ردت...
ام راشد: فديتها بنتي كم كثر تشل بقلبها وما ترمس ...
مسحت ليلى دموعها ورفعت راسها وطالعت راشد بخجل فضيع...ما تتجرأ مول ترفع عينها فيه..وايد عصبي وهي حساسه رغم قوتها بس تحترمه بشكل فضيع...
راشد:امايه عندي لج خبر...
ام راشد: ارمس..
ليلى بتنش: يالله امايه تصبحين على خير...
راشد: وين وين يلسي نباج تسمعينه ويانا...خبر يهم الجميع..
ليلى يلست ...
ام راشد: ارمس يا ولدي شو ؟
راشد يضحك: شوي شوي علي...
ام راشد: مافيه صبر ارمس..
راشد: ليلى..
ليلى: يا عونك...
راشد: في واحد من معارفنا خطبج مني..ريال محترم وما عليه قاصر ما شاء الله مرتاح هو واهله..وولد عرب وناس..شو رايج تفكرين بالموضوع..؟
ام راشد وقلبها بيتقطع من النبض وايديها تتنافض وويها متقطع من الوناسه: لا تقول يا راشد.؟
راشد مبتسم من خاطره: صدق..
ليلى قلبها انتهت كل نبضات الحياه فيه...ما تسمع شي ولا تحس بشي غير كلمة"خطبج مني"...حتى تحس بفراغ وماشي يتردد على مسامعها غير هالكلمه...
ام راشد: منهو يا راشد؟
راشد: فلاح ولد علي بن بطي..
ام راشد تتذكر: هيه عرفتهم عرفتهم..هاييل من معارف ابوك الله يرحمه..امه بنت ناصر بن سهيل...كانوا حذالنا يوم كنا ببيت اهلي قبل ياخذني ابوك...
كان راشد يرمس وليلى في عالم ثاني ما تتصور شو اللي سمعته...
راشد: والحين عاد نبى نفرح...من يوم عرس مبارك ما فرحنا والحين ما شاء الله عنده اربعه...يالله نبغي نفرح في اخر العنقود...
ام راشد: هاه بنتي شو قلتي..
ليلى طالعت امها ببرود: امي ما ابغي اعرس...
راشد : ليش؟
ليلى: ما ابغي اعرس وخلاص كل انسان حر في حياته وانا مب للعرس..ابى اتم عند امايه..
ام راشد بحزن: بس انا ما بتم لج العمر كله يا بنتي..لازم تعرسين العرس ستر للمره..
ليلى وهي تحاول تتماسك: بس انا مابا اعرس..
راشد: مب كيفج بتعرسين والريال ما يعيبه شي...
ليلى بجديه: كل شي بخليك تسويه فيني على هواك دون ما اعارض الا العرس يا راشد..مستحيل تجبرني اعرس وانا ما ابغي..
راشد: عيل تترين شو؟ خلاص اللي بعمرج عندهن عيال ومعرسات من متى ....وانتي لين متى بتمين جي؟
ليلى:راشد كل انسان ونصيبه وانا ماريد اعرس...
ونشت تحب راس امها وطلعت وفي القلب مليون جرح وجرح كل ماله يزيد...
طالع راشد امه بضيج..وهي نزلت راسها بحزن...وحبها على راسها وطلع وهو ضايج الخاطر والصدر..كل امله كان في ناصر بس ناصر خذلهم...كان متأكد ان ناصر يبغي ليلى وما بيستغني عنها...وكان يترياه على احر من الجمر..بس ناصر باع الموده ونسى الحب الجديم...ويوم يات الفرصه لليلى رفضتها....وخاب امل راشد فيها..بس هو قرر ما يرد على الريال لين ما يرمس ليلى مره ثانيه...
اما ليلى في حجرتها حاولت ترقد بس ما قدرت...غيرت ثيابها وتوضت وصلت ركعتين ..انسدحت على الشبريه وغمضت...

"ما اتخيل عمري اكون حرمة حد غير ناصر...ما اتخيل اني ممكن اوهب قلبي لانسان غير ناصر..ولا بعرف احب حد كثر ما حبيت ناصر...فديتك يا ناصر بعمري كله وحياتي كلها..رغم اللي سويته ورغم الجرح اللي في قلبي منك..بس بعده والله القلب ما يبغي غيرك...ما تهون علي اعرس ولو انك ملك غيري..ما يهون علي اودر كل هالحب وافكر بغيرك...كيف طاوعك قلبك تفكر بغيري..وانا اللي ما جد سمحت لمخلوق يشغل بالي غيرك...ناصر كلمه تعلمتها من يوم بديت ارمس واليوم قلبي ينطقها...بس جتلت احساسها بإيديك...معقوله قلبي يغفر لك هالطعنه؟ معقوله؟ ما اتوقع...."
كانت ترمس عمرها ودموعها بغزاره غاسله ويهها...وقلبها يدق بقوه...تتمنى لو كانت شيخه هني علىالاقل بتصيح بحضنها وبترتاح لو انها طفله..بس وجودها يحسسها بالراحه....نشت ليلى وسارت صوب قلمها وورقتها...وسجلت عصارة المها في سطور..

"خذ راحتك صبري على بعدك كبير...لا تنزعج مني ابد دنياك عاشرها وسير...لا تتعب افكارك معاي وانا مجرد ذكريات...راحت مع احلام السنين هذا المقدر والمصير...خذ راحتك عيش الهنا عيش الوفا مع من تريد..عسى الليالي تسعدك وتهنى مع الجو الجديد...وغلاك عندي ما حسدك ما دامك انته المستفيد..لكن ما خبي عليك ما عود لك مهما يصير اسلوبي وطبعي معاك من ما عرفتك ما خفا...اعاند القلب العنيد واوفي مع اللي هو وفا...اصفي مع القلب الصدوق لو في غيابي ما صفا..مبداي في الدنيا يقول الله على الظالم كبير...لي ما عرف معنى الهوى ولا ذاق تلويع الغرام...يا صاحبي صعب عليه يكمل غرامه بالكلام..في الحب تعذيب وسهر ترحال واسلوب وهيام...ما حس به غير الذي يشعر بتأنيب الضمير..خلك قوي العاطفه صادق مع نفسك وضوح...ارحل مع جو الامل مالك في تعذيب الجروح..الله معك الله معك...من وين ما تمشي وتروح...لك قلتها خذ راحتك...دنياك عاشرها وسير.."

عقب ما خلصت عقت الورقه على المكتب وسارت ترقد...ان ياها رقاد قبل تفكر في كل شي يصير حواليها ابتداء من قلبها مرورا بسلامه وحمدان وشيخه وانتهاء بنفسها وحياتها وكل شي يمر عليها...
..................
الضحى عقب ما نشت هي وبو خليفه طلعوا يتريقون في الصاله...لان الجو كان وايد حار برا...وهم طالعين من حجرتهم كانت شمسه في الصاله تتكلم تلفون...
بو خليفه:صبحج الله بالخير يا ام سعود...
ابتسمت شمسه وعطت التلفون ابوها وحبته على راسه...وهي سارت لامها تيلس وياها...وابوها تم يرمس ريلها...
ام خليفه:هذا سالم اللي على التلفون؟
شمسه: هيه..
ام خليفه: شحاله وشحال العيال..
شمسه:كلهم بخير بس بدر مأذنهم ما يطيع يدرس...
ام خليفه: شعليه المبزاي لازم ما يدرس ما يبغي غير امه...
شمسه :فديته والله بغيت ارمسه قال ابوه انهم ساروا المدرسه...
ام خليفه: وش مدرسته هذي يوم اليمعه...
شمسه: لازم بعد مب عرب يمشونا على نظامهم...
وياهن بو خليفه ويلس وياهن...ويابن البشاكير الريوق..ويلسوا يتريقون...ونزلت لهم سمر...
سمر: صباح الخير..
بو خليفه: وعليكم السلام..
سمر استحت: السلام عليكم..
عقبها ضحكوا عليها وردوا السلام...
ام خليفه: لا تصبحين على حد بهالطاري ما شي ابرك من السلام..
سمر: زين...
شمسه: قربي تريقي ويانا..
بو خليفه: تعالي بنتي اتريقي...
سمر: ماريد الحين عقب بتريق...مب وقته..
بو خليفه: عيل له وقت خاص عندج..
سمر:هيه ابويه عقب اتريق مب الحين تعرف لازم بعد احافظ على رشاقتي..
شمسه تضحك..
ام خليفه: انتي روحج عود يابس شتبغين به الرجيم..ترا مب زين ..
سمر: ليش مب زين بالعكس يحافظ على جسمي يكون حلو ومب مترهل...
شمسه مصدومه: شو مترهل انتي بعد..؟ حشا ما خليتن شي بنات اليوم..انا بعمرج ما عرف شي غير شغل البيت..واسم امي وابوي..
بو خليفه: الله يخلي التلفزيون...
سمر: والله الرجيم شي يعرفونه الكل ما يحتاي ثقافه..
ام خليفه: مب زين مب زين..لانه من الشيطان الرجيم...
سمر وشمسه يضحكن...
بو خليفه: زين قربي اتريقي ولا تكثرين عسب ما تغدين متينه..
شمسه تغمز لها ان عيب تنش وتسمع الرمسه...وعقبها نشت سمر غسلت ايديها وقربت تتريق ويا اهلها....
الظهر عقب ما رد راشد من الصلاه كانوا مقررين يتغدون في بيت ام راشد ويتهم خلود وعيالها سلامه وحمدان...وتيمعوا كلهم في صالة بيت بو راشد ونزلت وياهم ليلى ويلسوا يسولفون لين ما يي وقت الغدا..
ام راشد: الحمدلله اليهال قربوا يخلصون بنفتك من ويع الراس ومن المدارس وحشرتها...
سلامه: اخير بنعيش بحريه وسلام ونرتاح من المذاكره والواجبات..
حمدان: جتلتي عمرج بالدراسه...
راشد:ان شاء الله بس النتايج تبيض الويه...
خلود مبتسمه: ان شاء الله..
ليلى تغايض سلامه: حمداني فديته اكيد نتيجه غير متوقعه وشي مبهر..
حمدان اتشقق..
سلامه طالعت عمتها بنظره حاده:ان شاء الله اليميع..
ام راشد: يالله يا ولدي ما شاء الله كبرت وصرت طول ابوك...الله يوفقك يا حمدان..
سلامه تطالع حمدان بقهر وهو مبتسم..
ليلى: ما قلت لي حمدان وين عقب الثانويه ناوي تسير..
راشد على طول:الشركه عندي..
حمدان: بسير عند ابويه اساعده واشوف الحلال..
ابتسمت ام راشد وهي تتذكر راشد يوم كان بعمر حمدان ونفس الرمسه يقولها يوم كانوا صغار قبل يتوفى بو راشد.وليلى تشوف ولد اخوها بفخر وتتنهد من قلبها..كم كثر اشتاقت لشيخه وشطانتها وحشرتها وكم يسوى البيت وهي فيه..وكم يضيج عليها الكون يوم تغيب..بس ما عليه هانت شوي وتوصل شيخه باقي كم ساعه وتكون موجوده...
خلود: بسير اشوف الغدا مخلص ولا لاء...
وطلعت خلود...
راشد: ليلى..
ليلى انتبهت: يا عونك..
راشد: عانج الله..فكرتي في موضوع البارحه مره ثانيه...
ام راشد كل نظراتها توسل عسب توافق ليلى بس مافي امل والظاهر ليلى معنده اكثر واكثر...
ليلى:راشد فكرت بس ما ابغي..
راشد: ليلى فكري شوي بعقل...الموضوع وايد حساس وانت تعرفين موقفج...وافقي..
ليلى: امي محتايتني مب وقت هالسوالف..
ام راشد: لا تتعذرين فيه انا مب الحي الدايم..يالله يالله بحسن الخاتمه..
سلامه وحمدان يطالعون بعض مب فاهمين شي..
ليلى: امايه ما ابغي وخلاص...
راشد استلسم رغم انه ما فكر يضغط على ليلى اكثر ولا هو يقدر يجبرها تاخذه شاءت ام ابت..بس هو فكر بمنطقيه شوي وما حب يحدد مستقبلها ومصيرها في الحياه..وسكت عنها بيشوف شو بتسوي وقرر في نفسه يرد على قوم فلاح بن ناصر ويخبرهم ان البنت ما وافقت....

الساعه 4:30 العصر كانت واقفه في الصاله لابسه عباتها وتنادي على امها وهي مستعيله..وامها بعدها في الحجره...ويتها البشكاره...
فرزانا:شو يريد ؟
اروى:ما زقرتج انتي ابا امي..
وتنادي على امها...وتطلع ام اروى من الحجره لابسه عباتها وجاهزه...
ام اروى: حشرتي الدنيا وجلبتي البيت فوق تحت بحسج...وين تبين؟
اروى: امايه فديتج تأخرنا وين بنلحق نحصل شي...
ام اروى: فديتج والله هالكثر مستانسه..
ابتسمت اروى بخجل وبراءه: امايه يالله فديتج..
وطلعت ام اروى ويا اروى وركبن الموتر سايرات يتشرن ويجهزن اعمارهن حق العرس...كانت اروى مب واسعنها الكون كله ولا واسع فرحتها...قلبها يتنافض من النبض...وفي السياره..
ام اروى: وين بنسير الحين...؟
اروى: بسير الشعيبي بشوف شو التشكيله اللي عنده واذا ما عيبنا شي بنفصل..
ام اروى: وعقبها..
اروى تفكر: امم اقول احسن شي نمر عقبها على محلات الفساتين الجاهزه...
ام اروى: فساتين شو؟
اروى: العرس..
ام اروى: زين بتشترين جاهز؟
اروى: مافي وقت افصل فستان عرس..وبعدين سالفة اني اصمم واسوي انا مب قد هالسوالف...
ام اروى: وشو اللي قاصر عليج..ما بتدفعين شي من فلوسج كله من بيت ريلج...
اروى: بعد ما يكفي الوقت اني افصل والمصممين الحين كل حد مشغول بنفسه..وزحمه ولو ادري من قبل ان شي بيستوي كنت حجزت لي في الصيف عند أي حد..
ام اروى: برايج اللي تشوفينه يا بنتي...
اروى: امايه هم حددوا الملجه؟
ام اروى: سمعت ابوج يرمس خالج بو ناصر وقاله انهم يبون الملجه قبل العرس بأسبوع ...
اروى شهقت: ليش جي؟
ام اروى: وليش تبينهم يبطون؟
اروى: امايه ماشي وقت ليش ما رمسوا من قبل بصراحه انا ابى اعرس في اجازة الربيع ماريد الحين...
ام اروى: بكيفج هو؟ عاد جان الشور عليج ما بتعرسون قبل سنه...سمعي ابوج وخالج حددوا العرس وبيكون شهر تسعه...
اروى ابتسمت بعفويه: اووه زين بعده بعيد باقي شهرين ونص..
ام اروى: زين وصلنا انزلي يالله بنشوف شو تبين من السوق والاسبوع الياي بنسير دبي ونتم يومين بيت خالتج وضحى تتشرين اغراضج بعد من هناك...
اروى وهي تعق غشوتها على ويهها: انزين..احسن بعد..دبي اكشخ..بس ماداني بيت خالتي وضحى..
ام اروى: وليش ان شاء الله؟
اروى: اكره عيالها كله يطالعون فيني..مب شايفين خير..
ام اروى: منو يطالع فيج؟
اروى: ضاحي وعيسى...
ام اروى خزتها بنظره: من زينج الحين..انتي بس تتحرين يطالعون ولا عيال اختي حشام عن طبوع الخياس ومطالع البنات...
اروى: اييه انتي مسكينه ما تعرفينهم عدل..
ام اروى بنظره متردده: وانتي شو اللي فيج يتشاهد كلج على بعضج ما يدلج الزين ...
اروى شهقت: فديتج يا امايه ما ادري انا اشبه منو مب جنه الخلق تقول اني نسخه منج..وبعدين واثقه من عمري جمالي الفتان يأسر الالباب..ولا مب ولد خالي عايف العرس ثلاثين سنه عمره وما خطب من البنات غيري..هذا دليل اني ممكن اغير اراء الناس..
ام اروى: انتي ما تدلين الحيا وبنات اليوم فصخنه حد ترمس جي..يالله انزلي جدامي اشوف..
اروى مبتسمه وتضحك :فديتج والله عذاب يوم تحرجين...
ونزلت هي وامها وسارن محلات الذهب يشوفن وياخذن اللي يبن..
..................
الساعه 5:15 العصر كانت بدريه وعبدالله سايرين بوظبي وفي الدرب يسولفون....
عبدالله: انا بسلم وبشرد...
بدريه مبتسمه: وين؟
عبدالله: بشرد أي بقعه بس ان شافني ابوي رحت فيها..ترا ماداني يوم يقبضني شغله..
بدريه: حرام عليك ..
عبدالله: فديت هالويه..
ضحكت بدريه: ليش تغير الموضوع..
عبدالله:من زمان ما يلست وياج وما سولفنا ولا عشنا حياتنا ولهت على دبي..
بدريه مبطله عيونها: ما صار لنا ربع ساعه من يوم ظهرنا منها...
عبدالله يغمز لها: بس غير هناك ذكرياتنا واشياءاتنا وحياتنا..كل خصوصياتنا...هناك بيتي انا وانتي وبس..
بدريه مبتسمه: بعد عمري يالرومانسي انته...
عبدالله: متعلم منج..وبعدين تعالي...شو سالفتج ويا عفاري بنت اخوي..
بدريه: شو سالفتنا...؟؟
عبدالله: تلفونات ومساسر وقعده لين الفير في بيت ابوي..خبريني انا ريلج..
بدريه: احلف انت؟ سوالف بنات شعليك..
عبدالله: انتي حرمه وهي بنت..يعني ماشي توافق ..يعني عادي تستوي السالفه بين حرمه وبنت وريال..
بدريه تضحك بتمصخر: هاهاها..
عبدالله: لا والله صدق شو سالفتها..
بدريه: ماشي بس تحب تسولف عندي وتخبرني عن نفسها..
عبدالله: احيدها ما تداني حد مول...شو مسويه فيها..؟
بدريه: ولاشي والله انت ما تعرفها عفاري وايد رقيقه...بس تحتاج حد يفهمها..
عبدالله: وانتي ماشاء الله الطبيب النفسي..
بدريه تضحك..
عبدالله:احط لج شي تسمعينه...
بدريه: لاء انا بحط لك اغنيه حلوه..اهداء مني لك...
عبدالله: لاء لاء..اول شي انا وعقب انتي..
بدريه ابتسمت: زين يالبيبي..حطها وانا بسمع...يا رب تكون حلوه...
وحط عبدالله الشريط على طول وكان عبادي الجوهر..وشهقت بدريه يوم سمعتها..وابتسمت له وهي تتفدا امه وابوه واهله كلهم...عبادي حبيب الروح والقلب اللي محد يسواه...

"هو فيه مثلك!!!...ياللي الحسن ظلك هو فيه مثلك!!! ليــــــه العطر وانتي انفاسك دخون...؟ لين الكحل وانتي ما غيرك عيون...وليه تفكير يكون انك تكوني دايم اجمل..انتي اجمل..انتي اجمل من جمالك انتي اجمل من دلالك من خيالك...ياللي كل افراح قلبي والحزن في المسافه بين فرقاك ووصالك...وليه يالقلب الحنون تاخذك فيني الظنون...؟...ضعيتي عدلك هو فيه مثلك..انتي ما غيرك عيون...وانا احبك احبك احبك..وانتي انفاسك دخون...وانتي انفاسك دخون.."

بند عبدالله المسجل وطالعها وهو يغني: وانا احبك احبك احبك...وانتي انفاسك دخون..
ابتسمت بدريه ورغم طول الفتره اللي من بينهم بس ما قدرت تتحكم في ملامح ويهها وابتسمت بخجل فضيع...وحمره شديده تعتلي خدودها..
عبدالله: عذاب لون خدودج..
بدريه: والله انك ما تستحي بس عاد..والله ويهي احترق...
عبدالله: حبيبتي انتي...
بدريه تغير الموضوع وويهها محترق: زين انا بحط لك اغنيه..
عبدالله: اوكي اتريا بس ان ما عيبتني بعق عمري من الدريشه..
بدريه وهي تدور الشريط: بسم الله على عمرك..ان شاء الله انا ولا انت..
عبدالله: فديت عمرج لا انا ولا انتي..بعدين اذا صار بج شي لا سمح الله..انا بتخليني لمنو؟
بدريه: فديتك والله ما بخليك لحد لان عمري ما بخليك...
عبدالله: لا بصراحه وين بعيش وانا اسمع كل هالحب..لازم هذي يبا لها دعمه...
بدريه: تعوذ بالله من ابليس شو دعمه انت الثاني بعد...
عبدالله: ما حصلتي اللي تبين...
بدريه: اشوف شو عندك وعقبها بختار وبحط لك اغنيه حلوه...
عبدالله: وانا اتريا...
بدريه: الله لقيت شي حلو...اسمع بحطه لك بس مب اغنيه هي قصيده بس وايد روعه...
عبدالله: يالله حطيه..والله انتي تحفه تهديني اغاني من سيارتي..
بدريه وهي تشوف الشريط مغبر : يعني اوقف اقرب تسجيلات واشتري لك شريط بس عسب اهديك اغنيه في الدرب؟
وحطت الشريط...

"اخر قصيده قلتها فيك..اذكر قبل عامين وياك..نسيت؟ ..نسيت يوم اكتب على ايديك يا بعد عمري لا عدمناك...واليوم تطلبني وانا اعطيك اخر قصيده تكسب رضاك...عنوانها ربي يخليك..ارحم وداد اللي تمناك..بس انشدك قلي انا افديك..شاللي من الدنيا تبلاك..تنسى..وانا دايم اراعيك تهجر وتبعدني بذكراك...وين السلام وين السلام ومدة ايديك عوّد ولا تنوي ع فرقاك..صدق مشاعر قلب يطريك..يا مالك عقلي بطرواك..لو بعتني بالروح بشريك..تكفي ابتسامه من محياك وتبغي الصراحه ميت فيك..الطف ترحم بي انا فداك..."

خلصت القصيده وبدريه مبتسم...وعبدالله اسرع بالسياره اونه مستانس..وشهقت بدريه من الخوف ما تداني هالحركات بس عبدالله تهور وتم يشوح بالسياره وهي حاطه ايدينها على ويهها من الخوف...
بدريه: عبدالله بس دخيلك بس...
عبدالله مستانس: لا تراج خبلتي بي شو هالقصيده الغاويه ما روم ايود عمري الحين...
بدريه: عبدالله الله يخليك بس خبال مانبغي نموت الحين..
بس عبدالله تهور اكثر واسرع على الشارع اكثر بشكل جنوني وتم يستهبل بالسياره وبحركات غبيه...طايشه..وبدريه تصارخ وهو مستانس..
بدريه بتصيح: عبدالله بس والله قلبي بيوقف من الزيغه..
عبدالله ميت من الضحك: احسن خلنا نستانس شوي...
بدريه: ورفجة بو خليفه تهدي..
هدى عبدالله ومشى عادي على الطريج وهو مستانس...
عبدالله: زغتي..؟
بدريه: تعرف انك سخيف...
عبدالله: قولي والله..
بدريه: شو هالحركات تعرف اني ازيغ والله روحي بغت تطلع من الخوف..
عبدالله: قل لن يصيبنا الا ما كتب الله لنا..اذا الله يبغيج تموتين جي بتموتين جي...فديت عمرج يعل يومي قبل يومج..
بدريه: بس بعد قال ولا ترموا بأنفسكم الى التهلكه...حركات مراهقين...!!!
عبدالله: زين يالكبيره انتي...قربنا نوصل افف والله ماريد اسير...الله يسامحج.
بدريه بعدها محرجه: لا ترمس وياي صدق زعلانه...
عبدالله: زين حبيبتي والله اسف..
بدريه: زين سامحتك...مب جنه هذي شعبية بيت عمي..
عبدالله: هيه الحين وصلنا جهزي عمرج...ان شاء الله ابوي يكون في المزرعه مب في البيت..
تضحك بدريه: ودك عشان تاخذ راحتك..لا يا حبيبي عمي متوله على بنته يبا ييلس عندها...
ودخل عبدالله السياره البيت ونزلت بدريه هي وياه وساروا الصاله على طول....
......................
المغرب وعقب ما رد من المسيد دخل البيت وشاف امه يالسه في الحوي وتطالع شيخه تلعب في الماي اللي في الزرع...
احمد: البنت جاهزه...؟
ام احمد: هيه يا ولدي خلاص ودها بيت اهلها...
فاطمه: بتوله عليها...
احمد: شيخه تعالي...
شيخه: وين بنلوح..؟
احمد: عند امج..
ام احمد: بسم الله على البنيه...
احمد: ترا عمتها غاديه امها شو نسوي..
شيخه نطت بسرعه عند احمد وبفرح: بنلوح عند امي..
احمد يشلها: هيه يالله..
وحبتها فاطمه وام احمد وركبت وياه وهم في الدرب..مستانس احمد ويتمنى لو تطلع البنت الي شافها ذاك الاسبوع على الاقل نظره بس...
احمد: شيخه شو اسم امج...
شيخه: ليلى...
احمد: منو تحبين في البيت..؟
شيخه تفتح اصابعها بتعدهم: امي وددوه وامداني وبث...
احمد: ماشاء الله عندكم وحده اسمها بث...؟
شيخه:بث..
احمد: زين ومنو اللي مب حلو في بيتكم..
شيخه: لاثد...وثلامه..يع..
احمد غمض عيونه: منو هالهندي اللي عندكم اسمه لاثد..؟ ليكون بس عمج راشد..
شيخه: ايوه لاثد..ماحبه وحث..
احمد: ومنو بعد؟
شيخه: ثلامه.
احمد مبتسم: سلامه...اخت حمدان..
شيخه ابتسمت ما تعرف شو ترد عليه...وعقبها وصلوا البيت وكانت ام راشد يالسه في الحوي فما دخل السياره داخل..ووقف برا وظهرت له البشكاره ونزلتها..وهو روح عنهم خايب الرجا...
شيخه من وصلت البيت بدت فيه الحشره..والاستهبال والضحك وسارت على طول عند يدتها اللي لوت عليها ويلست تحببها لين ما وصلت ليلى اللي بغت تقطعها وهي استانست وبدت تعطي امها التقرير المفصل عن كل شي صار في الثلاث الايام اللي طافن في بيت خوالها

[البدوي الحبوب]

في بيت بو خليفه الساعه9:30 الليل يالسين الجميع في الصاله من ام خليفه وشمسه وعبدالله وخليفه وبدريه وعفرا وحمده وساره وحصه وسمر وبو خليفه..
ومستانسين يسولفون وخليفه ما رمس في موضوع ذياب مخلنه مفاجأه حق باجر ..وبعد ما يبى يفتشل لو ما يستوي شي واخرتها بس يعلقهم بأحبال ذايبه....
حمده: يالله متى تطلع شمس باجر ونفتك من المدرسه...
عبدالله: هاه اخت حمدووه بتأجزين وبتبدا الصدعه الله يعينك يا خليفه...
خليفه: ادري بها بتبدا تحن بتسافر وبتسافر...
عفرا: هيه والله ابويه نبغي نسافر..مليت من البيت ابى اطلع شوي ويا ليت نسافر ويا قوم عمي عبدالله ...
كلهم تموا مبهتين منو يرمس وبكل طلاقه وبدون حواجز...
ساره مبتسمه: خلاص عقب النتايج بنسافر..
بو خليفه: ما ابغي اسافر انا..
ام خليفه: ولا انا بعد..
حصه: يعني انا تعرفوني ما حب اترزز ويا حد اذا امي وابوي ما راحوا شو ذنبي ايلس في البيت..
بدريه: بتروحين ويانا منو قالج بتيلسين في البيت..
حصه: ماحب سوالف المذله اذا ما سار ابويه وامي انا ما بروح...
شمسه: منو بيذلج انتي ويا اخوانج..
حصه: انتي ما تعرفين شو يسوون خصوصا العود..
ابتسم خليفه: تقصديني انا...
سمر: هيه نسيت كيف حرجت علينا ذاك اليوم يوم نبغي نسير كارفور..
خليفه: بل عليكن ما تنسن ثاركن...
سمر: كيف ننسى ضيعت علي مشوار مهم...
يضحكون على سمر..وعبدالله يطالع بدريه انه يكفي بيروحون....وبدريه تأشر له ان يصبر شوي..بس هو نش ولا سمعها باجر عنده دوام ومب متفيج لليلسه في بوظبي..
عبدالله: زين يا جماعة الخير نحن نترخص..
بو خليفه: وين عبدالله ما بتيلس هالاسبوع في البيت؟
عبدالله انصدم وفي خاطره"مب بس الويكند ماشاء الله يبى الاسبوع كامل": لا ابويه عندي اجتماع مهم باجر ويا الموظفين...
بو خليفه: لازم يعني؟
عبدالله: ابويه ما روم ايلس في بوظبي...
عفرا: عمي دخيلك تموا هني والله بموت ان سرتوا الحين..
بدريه: بسم الله على عمرج حبيبتي..
ساره: ما طولتوا حرام بدريه يلسي..
عبدالله يطالع بدريه بنظره ان هاللي كان خايف منه ...
بدريه: خلاص بنسير عمتي ورانا شغل والله...
وفعلا نشت بدريه ولبست عباتها وطلعت وسلمت على شمسه وعمومتها والحريم وركبت السياره...
وعبدالله وقف يسلم على شمسه: يالله تحملي على عمرج وسلمي على سالم واليهال...وحبي لي بدر...
شمسه: افا عليك يا عبادي تروح وانا بسافر الليله...
عبدالله مفتشل: اسمحيلي شموس والله وراي شغل لا له اول ولا تالي وانا حالف ما طب بوظبي قبل شهر بس عشان خاطرج والله...
شمسه: فديت روحك يالغالي...
وسلمت عليه وركب موتره وشاف بدريه شوي زعلانه..
عبدالله: نحن متفقين من دبي صح؟
بدريه: زين انا ما قلت شي..
عبدالله: وليش زعلانه الحين؟
بدريه: فضيحه نطلع ورحلتها عقب اربع ساعات خلنا نتم شوي وعقبها نسير...
عبدالله: ماريد اتم تبغين تسيرين سيري...
بدريه: شو هالرمسه..
عبدالله: حبيبتي سمعي...هم يبغونج تمين..انزلي عندهم وانا برد دبي وبتصل في حمد باجر الصبح او العصر يردج دبي زين..
بدريه: من خاطرك ولا بس عشان ترضيني..؟
عبدالله مبتسم: والله من خاطري...
بدريه مبتسمه: يعني اسير لهم الحين وانت بتدق لحمد يوصلني باجر دبي..
عبدالله: اكيد حبيبتي..
بدريه: فديت روحك انا...
وبطلت الباب بتنزل..
عبدالله: تحملي على عمرج ولا ترقدين بروحج رقدي ويا حصوه فوق..
بدريه : ان شاء الله حبيبي تلحف عدل والله الله في السواقه لا تسرع فديتك..وانا بدق لك كل شوي..
عبدالله: مع السلامه فديتج...
وردت بدريه داخل وكلهم تفاجأوا منها بس فرحوا عقب ويلسوا كلهم سهرانين مع شمسه لين الساعه 11:00 وعقبها خذها خليفه وروحها المطار..وبدريه تمت سهرانه ويا البنات حصه وحمده وعفرا..اللي ودرن المذاكره مب مصدقات ان بدريه عندهن...وفي حجرة حصه..
حصه:زين نحط فلم..؟
حمده: حطي أي شي هاي فرصه ما تتعوض عمتي هاديه والوضع غير قابل للتغيير...
عفرا تضحك:عاد عمتي عيد لين ما تبتسم...يالله حطي أي فلم...بس رومانسي ماحب العنف..
حصه: عدال يالنعومه انتي...
عفرا: فديتني ما تحمل المشاهد العنيفه...
بدريه:اييه انتي وهي يالله كل وحده تسير حجرتها سيرن بيتكن ونهن يبن يشوفن افلام...انسه عفرا وانسه حمده ماشي وراكن دوامات باجر..؟
عفرا:عمتي خلصت والله ما يبا له علينا باجر تربيه اسلاميه..مخلصه الحفظ من متى...
حمده: وانا اصلا مخلصه دراسه من ايام التقويم الاول وحافظه المنهج عن غيب في اوراق صغيره..
انفجروا ضحك على حمده اللي عيني عينك تغش...
بدريه تبند التلفزيون: ماشي سهر يالله البيت بييكن الاسبوع الياي وبتم كل الويكند اللعب يتعوض والنجاح ماشي يعوضه...
عفرا انسدحت على شبرية حصه: انا ما اريد اروح..
حمده: عمتي الله يخليج بس عاد فلم واحد...
بدريه: وليش ان شاء الله ناويه تشوفين كم فلم..
حمده: نسهر للصبح...
حصه: الحين نحط ولا لاء..؟
بدريه: لاء حمده وعفرا بليز ردن البيت...
فرت حمده المخده في ويه عفرا...تتحرا انه عادي...بس عفرا تغيرت ملامحها والكل اتريا انها تعصب على حمده...بس فجأه شلتها وفرتها في ويه حصه...اللي انصدمت....
حمده: الحمدلله عدت على خير...
حصه: وليش ما تفرين اللي فرتج يعني مستقويه علي..
بدريه بتموت من الضحك عليهن وانجلبت الحجره استهبال..ونشت سمر اللي كانت راقده...
سمر بثقاله وتفرك عيونها: شو هالحشره ابى ارقد...
حصه تفرها بالمخده: جب طلعي برا نحن اكثر عنج مب طالعين عسب وحده..
سمر: والله بخبر ابويه عليكن...
بدريه: يالله طلعن يا بنات الحين المغثه نشت مافينا على حشرة عمي...
ونشت عفرا وحمده وكانت الساعه 2:30 الليل..ووصلتهن بدريه وحصه لين فلتهم..وردن وتمت حصه وبدريه سهرانات شوي..وعقبها رقدن على طول...

الصبح الساعه 7:30 مرت حصه على ليلى البيت وسارن الدوام وفي الدرب...
حصه: خلج عاديه البسيه لا تبينين شي...
ليلى:من قالج بسوي له سالفه اصلا مب انا اللي اتوصى يا عمري..
حصه مستانسه: ان شاء الله يموت من قهره..
ليلى: اييه انتي شو يموت من قهره شو تخربطين انتي...
حصه: بعدج تدافعين عنه...؟
ليلى: معصبه عليه هيه اتمنى له الموت لاء..تراه في الاخير ولد عمتي..
حصه: زين سوري..
ليلى: يالله ننزل....
ونزلن الدوام...وكانوا كل الموظفين موجودين وسارن مكتبهن على طول...يلسن يشتغلن وليلى تفكر لو شافته شو بتسوي...
"معقوله لو شفته اضعف ولا اكرهه..؟ شو من موقف بعيش فيه لو يت عيني في عينه..؟ يا ربيه..اذا رمسني شو اقوله..؟ارد عليه ويعرف اني محترقه ولا البسه ويبين اني مب مهتمه..بس والله ما يصدقني لو اسوي عمري مب مهتمه...ولو كابرت بعد هو يدري انه جرحني...بس بعد انا لازم اسوي عمري عاديه في كل الاحوال...مستحيل اعطيه فرصه انه يشفق علي او اني اكسر خاطره..بخليه يندم بس بطريقه راقيه شوي..حلوه هذي حتى الندم فيه طرق راقيه...ما علينا والله بسوي فيه العجب عسب يعرف ان الاحاسيس مب لعبه ولا المشاعر سلعه تنباع وتنشرى بأرخص الاثمان.."
حصه: هييه..
ليلى: شو؟
حصه: التلفون يدق ردي عليه...
ليلى انتبهت وشلت السماعه: الو مرحبا..
حمد: مرحبتين ليلى شحالج..؟
ليلى تطالع حصه: هلا حمد بخير الحمدلله شحالك انت..
حصه طالعت ليلى مبتسمه وغمزت لها...
ليلى: الحين؟
حمد: هيه اذا ما عندج مانع...؟
ليلى: افا عليك الحين بييك..
وبندت من عنده..ونشت..
حصه: وين؟
ليلى مبتسمه: بسير عند حمود..
حصه: ليلوه وين سايره..وبعدين حمد شو حمود..طباخكم هو؟
ليلى: ما نسمي طبابيخنا حمود..
حصه: شو يبغي هذا..ما يعرف يضرب على تحويلة مكتبي شو من ادمي هذا..ليتني انا اللي رديت..
ليلى وهي بتطلع: سواء رديتي ولا مارديتي كان بيطلبني انتي ما تعرفين لهالشغلات...
حصه: اسمع انتوا..
ليلى ردت وبطلت شنطتها وطلعت منها ورقه وعطتها حصه: حصووه شوفي..كتبته اول امس..
حصه: الله من زمان ماقريت اشعارج...يا ربيه شو مبدعه هالمره اكيد شي فلته...
ليلى: يالله برد وابى اسمع رايج بس هاه بدون مديح ما حبه تراني...
حصه : زين زين سيري...
طلعت ليلى سايره فوق لحمد...وتمنت بليار مره في الدرب انها ما تشوف ناصر...متلوعه منه ومالها بارض تشوف ويهه...واول ما وصلت فوق دقت باب مكتب حمد وقالت للمره المليون الحمدلله ان باب مكتبه مبند وما شافها وهي خاطفه حذاله....
حمد: تعالي ليلى...
ليلى دخلت: السلام عليكم...
ناصر وحمد: وعليكم السلام...
تيمع الدم كله في ويه ليلى وحست عمرها تحترق وكل شي حواليها مب طبيعي...يعني طول هالوقت شارده منه تيي وتلاقيه هني في المكتب عند حمد...
ناصر اول ما شافها ابتسم من خاطره..."فديتها والله تحريتها بتغيب عقب الصدمه..والله هذي ليلى اللي احبها قويه عمر الازمات كلها ما تهزها...فديتج يا ليلى والله محد يسواج.."
ناصر: شحالج ليلى...
ليلى وهي تيلس بدون ما تطالع فيه: الحمدلله شحالك انت؟
ناصر: بخير الله يسلمج..
ليلى وهي تطالع حمد ومسويه اكبر طاف لناصر: حمد ممكن اشوف الاوراق اللي قلت لي عنها.؟
حمد: تفضلي..
شافتها ليلى ويلست تقرا فيها وحمد يلس يقرا في الملف اللي بين ايديه...وناصر يطالعها ما شل عينه...
ليلى: هالاوراق مخلصينها من متى ..ملف منو هاللي مب مخلص؟
حمد: تصدقين ما ادري حتىالاسم مب مكتوب وفي شي ما لاحظتي؟
ليلى: امبلى في ارقام مب موجوده يعني في اشياء وايد مسحوبه من الخزينه..
ناصر: وعسب جي نحن يايين نناقش الملف هذا لمنو...في حد يتلاعب بالميزانيه...
ليلى ما ردت عليه ورمست حمد: راجعت كل الملفات..
حمد: لاء..
ليلى: عيل راجعهن كلهن وشوف اللي اسمه مب موجود وشيك على باقي الملفات...
حمد: بس اغلبهم ردينا لهم ملفاتهم..وما اذكر منو ولا منو...وبعضهم في اجازات وانتي تدرين بهالشي..
ناصر: اوكي حمد يعني يبالها شغل كبير..
حمد: ابى حد يساعدني...برمس دانيال...
ليلى: حمد مب مشكله انا بساعدك...
ناصر انقهر من رمست ليلى وما عيبه انها ترمس حمد جي وتاخذ وتعطي وياه واللي قهره اكثر انها لابستنه وما ترد عليه مول...
نش ناصر ضايج: حمد عقب بكمل وياك خلص ويا ليلى الشغل ومر علي خبرني شو مستوي بسير اراجع بعض الملفات اللي عندي واطرشهن البنك...
حمد: خلاص خير ان شاء الله...
ويرن تلفون حمد ويستأذن من ليلى يرمس وهي تمت تشوف الملف..
حمد: متى؟..اها اوكي خلاص ساعه وبكون عندج...رمستي عبدالله..؟ اوكي خلاص جهزي نفسج وبييج...لا لا ما عندي شي باخذ اذن وساعه وبوصلج دبي..مب مشكله...اوكي بدريه...؟
انصدمت ليلى منو بدريه وكيف جي يرمس وحده جدامها...شكلها ناسيه انها اخته...بس انقهرت من وقاحته...وخلصت اللي باقي معاه وسارت المكتب على طول....
ليلى تصك الباب: حصه حصه..
حصه: شو؟ قالج انه يحبني؟
ليلى: متفيجه والله..سمعي سمعته يرمس بنيه..
حصه معصبه: قولي والله..
ليلى: يعني شو بتسوين مثلاً؟
حصه: شو قالها.؟
ليلى: قالها بوصلج دبي ساعه وانا عندج..واسمها بدريه بعد..
ضحكت حصه: غبيه هاي بدور حرمة عبادي...
احمرت خدود ليلى يوم اتذكرت: اووه كيف ما يا على بالي والله اني غبيه...
حصه:خرعتيني والله..
ليلى: اللي يسمع ما تدرين عن مغامراته العاطفيه دون جوان...
حصه: والله القصيده عذاب عذاب عذاب...
ليلى: فديتج والله..زين صدق قولي لي قويه..؟
حصه: بس ما يستحقها خساره فيه بيت على بعضه..
ليلى: يالله الا هي فضفضه...
حصه: انزين شو صار وياكم..شفتي ناصر...
وخبرت ليلى حصه بكل شي وعقبها ردن يكملن شغلهن

الساعه 10:00 بالضبط كان منصور بن سعيد بن ناصر...ويا خليفه بن مبارك واقفين في المحكمه بعدما صدر الحكم النهائي وبعدما غير المتهمين اقوالهم وبحضور وائل صاحب القضيه...وتنازله عن كل شي جدام القاضي والشهود...وصدر القرار الاخير...ببراءة ذياب بن مبارك وتخفيف فترة السجن على باقي الشباب من سنه وثمان شهور الى شهرين لكل واحد فيهم...بعدما غيروا اقوالهم واعترفوا ببراءة ذياب وانهم ما كان وياهم...وسلم خليفه وائل الباقي من المستحقات...وشكر منصور على حسن تعاونهم وشل ذياب وياه البيت....وطبعا في الدرب...
خليفه: لازم تشكر ولد عمك ترا لولاه ما طلعت ...
ذياب: ان شاء الله...
خليفه: ماشي صياعه ولا سهر ولا كمبيوتر ولا انترنت...
ذياب: ان شاء الله..
خليفه: قعده برا البيت عقب الساعه 10:00 ماشي...
ذياب: انزين...
خليفه وهو يدخل السياره البيت: انزل يا مسود الويه...
ذياب: منو يدري اني بيي..؟
خليفه: انجب وانزل وانت ساكت..
وسار وياه ودخلوا الصاله..وكانت ام خليفه وبو خليفه يالسين يشربون شاهي الصبح ووياهم بدريه بعباتها تتريا حمد ياخذها دبي...
يوم شافت ام خليفه ذياب شهقت...وطاح كوب الشاي من ايدها..وبو خليفه نش من مكانه...
وذياب في موقف لا يحسد عليه...سار لابوه وحب راسه ولوى عليه..ودمعن عيون بو خليفه من الفرحه ولين ما وصل حضن امه كانت مفرغه بحيره من الدموع...وهي تلوي عليه..
ام خليفه لاويه عليه وتصيح: فديت روحك يالغالي فديت عمرك..علني ما خلى منك يا بعد عمري فديت حسك ارمس ارمس فديتك ابى اسمعك والله ولهت عليك يا ذياب...
ذياب وهو يمش دموعه: امايه سامحيني والله اسف...
ام خليفه: فديتك والله مسامح دنيا واخره فديت روحك...
بو خليفه يمش دموعه في غترته ويلوي على خليفه: ريال ريال ينشد بك الظهر يا ولدي...
وخليفه مبتسم بفخر: خلاص طلعناه لكم ارتحتوا قلت لكم خلوا كل شي علي ما صدقتوني...يالله اترخص بسير دوامي من يوم سالفته وانا مودرنه..
كانت بدريه تصيح من الفرحه مب مصدقه اللي تشوفه...وبو خليفه متقطع من الوناسه..وزقرت ام خليفه على البشكاره تجهز له الحمام يسبح...وترتب حجرته وتنظفها عسب يرتاح...ويلست تحن على راسه شو يسوي ما يسوي وشو يأكلونه وكيف يرقد وكل ما خبرها شي تصيح زياده...وتموا يسولفون لين ما دق تلفون بدريه...
بدريه: اهلين حمد..
حمد: طلعي انا برا...
بدريه نشت واستأذنت من عمتها وعمها وسلمت عليهم وتحمدت لذياب بالسلامه وطلعت ويا حمد...
.
.
في السياره اول ما ركبت...
بدريه: شحالك حمودي...
حمد: بخير شحالج الغاليه..
بدريه: بخير ادري بتحرج اني ما خبرتك اني في بوظبي والله.....
حمد يقاطعها: ادري خبرني عبدالله كل شي....
بدريه: زين سوري بتعبك لين دبي..
حمد: خل عنج شغل المصاخه هذا...
وتموا يسولفون...ودق تلفون بدريه...
بدريه: هذي حصه..
حمد: لا تردين عليها..
بدريه: ليش؟
حمد: بس جي خلها برايها شو تبى هذي..اكيد بتقولج حمد وياج..
بدريه: زين خلني اقولها...
حمد: اقولج لا تردين برايها...
بدريه: زين خبرني عنك شو مسوي وشو اخبارك..؟
حمد: والله الحمد لله ماشي...كساد في سوق البنات..
بدريه: لحوول انت ما بتبطل...اقولك حمد ليش ما تخطب حصه...عيب عليك بتصك الثلاثين انت وهي وانت ما تجدمت وهي ترفض..
حمد: تروم هي توافق وانا عايش...
بدريه: زين اخطبها...
حمد يسرع شوي: ماريد..
بدريه: خفف السرعه تراني ازيغ يكفيني اللي سوا فيني عبادي امس..
حمد: شو سوا بج؟
بدريه: تم يشوح بالسياره بغينا ننجلب..والله فوادي بغى يطلع من صدري من الزيغه..
حمد يضحك بخبث: يا جبانه...
ويسرع اكثر...
بدريه: حمد والله اتصل بعمي وارد البيت..
حمد يخفف السرعه: زين خفت..
وردت حصه تتصل..
بدريه: برد عليها...
حمد: اقولج خلها تولي شو تبين بها..لا تردين..
بس ردت بدريه..
بدريه: هلا حصه...
حصه: اهلين بدريه شحالج.؟
بدريه: بخير سرت عنكم انا في الدرب بسير دبي...
حصه: ادري ووياج حمودي..
تضحك بدريه: اقول..؟
حصه: لا دخيلج اسكتي...
حمد:بدريه صكي التلفون...
حصه: شو يقول..
بدريه مفتشله: لا ماشي..
وتعض على شفايفها ان حمد يسكت وتترجاه بنظراتها...بس هو تم مأذنها يباها تبند...
بدريه: حمد شو فيك؟
ويسحب عنها التلفون وهي قابضتنه..
بدريه: يا حمد انتبه جدامك ما نبغي نموت...
حصه: ليش شو يسوي؟
بدريه: ولاشي يستهبل...
حمد: براويج منو يستهبل...
واسرع حمد على اخر شي وتم يشوح بالسياره ويخوف بدريه وير السماعه عنها وهي ميته من الخوف..بس ما قدرت تصك من عند حصه مفتشله لانها بتحس ان حمد ما يبغيها ترمسها...
حمد: بتصكين ولا بشل على تايرين...؟
بدريه تأشر له انه بيشوف...
حمد يضحك ويدوس اسرع ويلف يمين ويسار ويستهبل...
بدريه تصرخ: حمد بس عاد والله بتصل بعمي...
حصه: برايج جان مشغوله..؟
بدريه مفتشله: لا عادي برمسج...
وير السماعه منها حمد ويتضارب وياها وصدق حرج عليها ليش ماتصك ...وبقوه وهو منتبه لبدريه يدعم في طرف الشارع وتنجلب السياره جلبتين...بس دعمه عنيفه...تصارخ بدريه بصوت عالي وينقطع التلفون عن حصه...وترد تتجلب السياره...كانت جلبتها عنيفه ... انطلقت فيها كل الصرخات..وكل الالم..وكل الدموع..وينابيع الدم..وصور تتكرر كل يوم وكل لحظه في كل شارع من شوارع البلاد...ودخلت السياره في حدايد الشارع ودخل في الرمله على ينب ..وبين الحدايد وعجلات السرعه..وفي داومة الموت..وفي اله صنعها البشر لتقضي عليهم بكل سهوله..صرخت بدريه بطول صوتها وتبعها صوت حمد..وانين خافت..وفجأه انخمد الصوت..
تيمعوا الناس وانمزر المكان بالسيايير.. في الطريج للي سايرين دبي....الناس نزلت تحاول تشوف اذا حد بقى عايش ولا لاء...بس للاسف محد عنده جرأه يقرب منهم..الناس تخاف..ومحد فيه قوه ياخذ أي حد فيهم للمستشفى...كل الحوارات كانت.."السياره فيها حرمه وريال بس".."ساعدوهم حرام ذابوا بين الحديد..".."بسرعه حد يتصل بالاسعاف...النزيف فضيع عليهم"..."في حرمه بينهم تحركت شوي ووشكلها عايشه بعد..لحقوا عليها"....
ومن يغير الاقدار ومن يقدر يجاري سرعة الله ويغير ما كتب في صحف البشر..... وبعد فتره طويله حوالي النص ساعه وصلت سيارة الاسعاف والشرطه...وعلى طول خذوهم مستشفى خليفه....
وفي المستشفى...خذوا حمد غرفه قريبه على طول وودوا بدريه على طول غرفة العمليات...كانت جراحها خطيره ونزيفها فضيع...وفي الحجره اللي فيها حمد..كانت الممرضه تخيط شق في راسه وممرضه ثانيه تلف الجروح اللي في ايديه بضمادات...
حمد من على السرير يتحرك: خلوني وين اختي وينها..؟
الممرضه: هدي حالك اخي هدي حالك ان شاء الله بتكون بخير...
ونش عنهن حمد: مب فايج لكن وين اختي..
كان قلبه يدق بقوه..بقوه خايفه ما يبى يحط في باله ان بدريه ممكن تموت...مستحيل يتخيلها تموت...وسار بسرعه صوب العنايه وتم واقف يمشي يمين ويسار يتريا الرحمه من الله...لين ما طلعت ممرضه تركض بسرعه في الممر...ومسكها من ايدها...
حمد: ارجوج قولي لي شو صار؟
الممرضه: ان شاء الله خير اخوي بعدها عايشه تطمن...
خلاص ارتاح حمد وطاحن دموعه بغزاره على ويهه..هذي بدريه مب أي حد...كل شي يهون عشان خاطرها بس لا تموت...
" يا رب ارجوك لا تاخذها وجان تبى واحد منا خذني انا ولا تاخذها ارجوك يا ربي"
وطلع الدكتور اخير من الغرفه...
حمد: دكتور ارجوك طمني..
الدكتور مستعيل: لا تعطلني من شغلي عقب ما اخلص كل شي بنرمسك..اصبر شوي..الاخت في العنايه وعملية وقف النزيف للحين ما خلصت في حديده في صدرها صوب القلب انت ايلس ادعي الله يسهل عليها...
انصدم حمد كيف كلام الممرضه يناقض كلام الدكتور...
.
.
حصه استغربت كيف قطع الخط وتحرت تلفون بدريه فضى..وردت تتصل بس لقته مغلق وحست بشي غريب وخبرت ليلى اللي قالت لها ينزلن تحت يخلون الشركه تتصل بحمد...ويوم دقوا له قالها الموظف انهم مسوين حادث وهم الحين في خليفه...
بغت حصه تموت من الصياح ميته من الخوف واتصلن بالدريول وياهن وروحت هي وليلى على طول المستشفى....
.
.
طبعا رد الدكتور ويا جيش من الممرضات والدكاتره داخل الغرفه..وحمد اصبوعه يرتجفن من الخوف...وهو واقف صوب الغرفه شاف ليلى وحصه يايات وما رد عليهن وطالع حصه بإحتقار...خافت من نظرته وبنفس الوقت استغربت منها...
وشوي ويطلع الدكتور....
حمد بخوف: دكتور شو تسوون هالكثر خبرني شو صار عليها داخل..
الدكتور: انت عبدالله..؟
حمد خايف: لا انا حمد شو السالفه؟
الدكتور: كانت بتحكي طول وقت العمليه عبدالله عبدالله..فكرته انته..
حمد: لا هذا ريلها انا اخوها..يا دكتور مب وقته قلي شو مستوي؟
الدكتور: اختك عطتك عمرها...
حصه بصوت مرتجف: لا..ارجوك لاء..كل شي ولا الموت لاء...دكتور احلف..ارجوك احلف انها ماتت...مستحيل.....ليش ما كنت انا...ابى اموت الحين...
ليلى صاحت على طول وحمد تم واقف مكانه ما تحرك...دموعه على طول طاحن وشاف الممرضات يطلعنها وينقلنها غرفه جريبه وهو مشى وراهن على طول...
تصيح من قلبها..محترقه ميته من الخوف وكفوفها ترتجف..ووحده من الممرضات ماسكتنها تهديهاوطلعت تلفونها وهي ترتجف بس ما قدرت تدق....من كثر ما اصبوعها متلخبطات من الخوف...وبكل عفويه وخوف مسكت الممرضه منها التلفون..
الممرضه: شو اسمه اللي بدك تتصلي فيه...
حصه وهي تصيح من قلبها: مكتوب في التلفون " الوالد"..
واتصلت الممرضه..وعطته لحصه..
حصه منهاره صياح: ابويه وينك..تعال..
بو خليفه: هاه بنتي شو فيج شصار عليج...؟ انتي وين بسم الله الرحمن الرحيم..
حصه تصيح بصوت عالي: ابويه انا في مستشفى خليفه صار على بدريه وحمد حادث...
بند بو خليفه بدون ما يرد عليها...وهي ترتجف وعظامها ميته من الخوف..ودموعها مب قادره تتوقف...قلبها يدق بسرعه وتنفسها صعب...
ووصل خليفه وابوه..ولوى على حصه وبعده ما يدري بالمصيبه الاعظم...
بو خليفه لاوي على حصه: يا بنتي عسى خير ان شاء الله وين ولد عمج واخته...
خليفه وهو واقف حذال حصه اللي منهاره وميته من الخوف بس ما رمست...
بو خليفه: وين اختكن بدريه..؟
انفجرت ليلى صياح يوم طرا بو خليفه بدريه...وخليفه تم يطالعهن بخوف...
حصه كانت تطالع ابوها بنظره كلها تعب الم ندم..خوف وحزن...وهو يطالعها يتريا منها اجابه بس الظاهر قوتها خانتها...
خليفه: وين حرمة اخوج ارمسي؟
حصه وهي مب متمالكه نفسها:ابويه الدكتور يقول انها ماتت...
بو خليفه مصدوم: بسم الله من رمستج لا ان شاء الله ما عليها شر..
خليفه فواده انقبض: بتصل بعبدالله خويه...
بو خليفه بضيج: لا تشغل اخوك على حرمته خلنا نتأكد اول يمكن اختك من الزيغه تهاذي...
كان بو خليفه مب مستوعب رمسة حصه ويدري انها من الخوف بتقول أي شي...وسار للدكتور اللي أكد له موت بدريه...وانفجع بو خليفه بموت بنت اخوه وحرمة ولده...وانترسن عيونه دموع..غير يوم ريال يصيح ..اكيد ان المصيبه مضاعفه في حجمها....ونزل راسه يمسح دموعه بغترته ...يمسحها بعد ما خانته...ويترحم على بنت اخوه وحرمة ولده...ويفكر بقلب ولده اللي بيحترق بعدما يدري باللي صار..
وقف خليفه واتسند بظهره على اليدار....خايف ما يعرف كيف بيخبر عبدالله...
كانت حصه واقفه ميته من الرعب وتحس كل شي بسببها...لو انها ما دقت لبدريه الصبح...؟؟وكان الشيطان يلعب براسها...وحاطه ايدها على حلجها عشان ما يطلع صوت صياحها..ودموعها ينزلن بدون توقف....
" لو اني ما دقيت لها لو..؟ لو اني صبرت لين ما توصلين شو كان بيصير؟؟ بأي ويه بقابلك يا خوي..؟ وين بروح من ذنبج يا بدريه وين..؟ اه يا حرقة فوادي على اللي صار.؟ ليتني اللي مت ولا انتي ..على الاقل انتي الكل يباج وانا ما مني فايده غير المشاكل وويع الراس..؟"


في الحجره الثانيه كان حمد مبهت يطالع اخته اللي مغطينها بشرشف ابيض...وانترسن عيونه دموع...حمد الجبار اللي ما يهز فواده شي..صاح من قلبه وتم يتلفت يمين ويسار..يدور شي يكذب في عينه الخبر..
شاف كل شي حواليه يقول ماتت...بدريه ماتت للابد.....وقبل يرفع الشرشف يت في عيونه مليون صوره..
ضحكاتها وابتسامتها وقلبها الطيب..وحضنها الدافي..ونظرتها الحنونه...واتصالاتها اليوميه...وين بدريه اختفت وافراح حمد بتختفي وياها...ولعب الشيطان براسه..وظهر للممر...وسار لحصه..اللي كانت تطالع بتعب والم..تنتظر منه الكلمه الطيبه والمواساه....
بس وين..؟؟
حمد كان في قلبه نار ونار كبيره بعد...قلبه محترق ويشوف في عيون حصه جريمه..وجريمه كبيره بعد....يودها من كتفها...
حمد والدموع تارسه عيونه: يا حقيره انتي السبب انتي اللي قتلتي اختي...بدريه ماتت وانتي السبب..انتي السبب...اكرهج انا من كل قلبي..
انفجرت حصه صياح..وما ردت عليه بكلمه..كانت تعبانه وفوق التعب تعبانه...تحس انفاسها تنتهي وعمرها ينقضي وكل لحظه حلوه متأكده انها مستحيل تعيشها بعد اليوم...
حمد: اكرهج يا حصه ومستحيل اسامحج على اللي صار طول عمري وبتم كارهنج العمر كله...وين بتشردين من حساب الله..؟؟ وين...؟ ضيعتي حياتي وحرمتيني من اغلى انسانه في الدنيا...
ليلى: اييه انت شو تقول هي ما يخصها شو جتلت اختك ما تخاف ربك انت....هي وين واختك وين...
حمد بحقد: يا ليتج كنتي بدالها يا حصه مافي حد بيتحسف عليج..
ليلى: اسمع اي انت حصه مب هي اللي كانت تسوق ولا هي اللي كانت ويا بدريه لو حد سبب موتها فهو انت لانك مب منتبه وانت تسوق .. بس اللي صار قضاء وقدر لا نقدر نلومك ولا من حقك تلومها....
ورد داخل يصيح مثل الياهل في الحجره وحط راسه على ويهها وهي متلحفه وتم يصيحها...اااه لو الصياح يرد غالي..جان تم حمد يصيح اخته بدريه العمر كله...تم يصيح ويصيح...ورفع عنها الشرشف وشاف ويهها ما فيه ولا جرح غير يبهتها...فيها خدش بسيط..بس كان راسها من ورا منترس دم..والجرح شكله عميق..وشاف رقبتها كلها جروح...وصدرها عليه شاش المستشفى وكل دم...بس ويهها كان مثل ما هو ..مسحة الحنان ما فارقته والطيبه كلها فيه..حتى وهي مب وياهم ..حتى وهي روحها عند ربها..كان لوجودها رهبه...كان حمد يشوفها ويرتجف..واخر شي شهق من قلبه..
حمد بصوت عالي: ليش انا بالذاات ليش.؟ ليش يا ربي ليش.؟؟ اشمعنى اختي من بد بنات الناس خذيتها..؟؟
رد يصيح من خاطره...
حمد: ادري اني غلطت في حياتي وسويت اللي محد سواه وعصيتك يا رب وكنت اسوي كل اللي نهيتني عنه...بس ليش ما عذبتني انا..ليش حرقت فوادي وخذيت اختي ليش...(وشهق شهقه كن روحه بتطلع وياها)..بدريه فديت حسج فديت مواطيج نشي..بوديج أي مكان في الدنيا ..ما قلت لج يا بدريه لا بندي التلفون ليش ما بندتي ليش؟؟ كان لازم تحرقين قلبي وتروحين..؟ كان لازم اعيش وحيد عمري كله..يالله يا ربي سألتك لو مالك حايه بنفسي خذها لك ماباها...
ورد يصيح..وقلبه محترق..
شل خليفه اخته البيت...بعد ما خلصوا التحقيق ويا الشرطه...وبو خليفه تم في المستشفى عشان يتابع الخطوات اليايه للدفن...
وهناك بعيد في الحجره..يالس على الارض وماسك راسه بإيديه ويصيحها من كل قلبه..
" بدريه وين تبين؟؟؟ لا تروحين علني افدا روحج...يا اختي وين بتخليني وانتي تعرفيني مابا شي من هالدنيا الا انتي...يا رب خذني بدالها..وردها يا رب ارجوك اسمع دعوتي..رجيتك لا تردني.."
كان حمد يصيح اخته صياح ما صاحه على ابوه يوم توفى...بدريه اخته وسنده والعون...بدريه اللي تضحي بنفس روحها عشان اخوها وكل الناس..
بدريه الطيبه راحت.....زاد صياح حمد وتم يشهق بقوه وحس روحه تنزع من التعب..مستحيل ترجع بدريه...وحس بإيد تنحط على كتفه..
بو خليفه: نش يا ولدي بارك الله فيك..انت ريال والرياييل تصبر وقت الشده...
حمد بضعف كسر خاطر عمه وهو يصيح: أي رياييل يا عمي..انا خلاص من يوم راحت هالاخت لا عاد تعتبرني عايش انا مت من يوم ماتت..
دمعن عيون بو خليفه وعوره قلبه على ولد اخوه.....
ونش حمد بضعف: بس ماتت بدريه يا عمي..اختي الوحيده ماتت...وين ابدلها وين؟؟؟ من يردها لي...
بو خليفه بحنان: استغفر ربك يا ولدي..وخاف الله في نفسك...الموت حق علينا كلنا..اليوم هي وباجر انا وعقب انت بعد عمر طويل..وين ما سرت لا مفر من الموت...
حمد لوى على عمه وتم يصيح من خاطره...وبو خليفه احترق قلبه على ولد اخوه..ودمعن عيونه..وهو في خاطره يقول..
"لو اخوها انهار هالكثر ...مسكين حالك يا عبدالله يا ولدي شو بتسوي.؟؟"
................
في البيت اتصل خليفه بعبدالله...وقاله ان حرمته واخوها استوى عليهم حادث..بس ما خبره ان بدريه توفت...وكانت ساره حذاله تصيح من قلبها...
خليفه: يا عبدالله يا خويه الله يهديك..ما فيها الا كل خير..انت رد وتطمن على حرمتك..
عبدالله: يا خليفه هالسوالف ما فيها مزح ارمس لاخر مره..بدريه شي صار عليها..
خليفه: لاء..
عبدالله: احلف يمين الحين ..
خليفه بضيج: يا عبدالله خاف الله فيني عندي دوام ..ما تصدقني اتصل بأبويه...
عبدالله: عيل انا حاطنها بذمتك ليوم الدين..انا راد بوظبي الحين...
خليفه: ان شا ءالله..
وبند عنه ولف يشوف ساره منهاره..وتصيح بحرقه..وكسرت خاطره...ونش ولوى عليها..
خليفه: فديتج يالغاليه عسى ربي لا يحرمني منج...
ساره تصيح: بدريه يا خليفه..(وقبل تكمل صاحت بصوت عالي)..
تم خليفه يهديها ونش بييب لها ماي وهو طالع الصاله شاف البنات يطالعن رادات من المدرسه يضحكن وسلمن عليه...وعوره قلبه يوم شاف عفرا مبتسمه وتضحك...ما يدري لو تعرف شو بيصير فيها....
يوم حست عفرا ولفت تشوف ابوها..لاحظت انه فيه شي...بس ما رمست..
حمده: احس في شي.؟
عفرا: وانا بعد..
حمده: نروح عند امايه احسن هي بتخبرنا...
عفرا: يالله نشينا..
وسارن لامهن بسرعه...ودخلت حمده وعفرا تمت واقفه عند الباب...وساره كانت تصيح...
حمده: امايه فديت روحج شو بلاج؟
عفرا دخلت: امايه ليش تصيحين حد صار عليه شي؟
ساره: عمتكن ..
عفرا بخوف: من عمتنا وشو صار؟
حمده: امايه رمسي ابويه اذا يا بيروغنا من هني وما بنعرف شي...
ساره تصيح: عمتكن بدريه توفت...
حمده : شووووو؟
عفرا شهقت بقوه..ووقفت..
عفرا: امايه لاء..انتي شو تقولين..انا بروح بيت يدي بعرف السالفه..
وطلعت عفرا تركض برا الحوش سايره بيت يدها ودمعه ما نزلت من عيونها لين ما تتأكد..واول ما دخلت شافت سمر تصيح في حضن امها.. ...وذياب يالس في الصاله...ومنزل راسه...ويدتها كانت تصيح بعد...
عفرا بخوف وهي ترتجف: يدوه...رفجه عليج براس ولدج خليفه ترمسين. صدق اللي سمعته...؟
ام خليفه وهي تصيح: شو يا بنتي؟
عفرا ودمعت هالمره ما قدرت: وين عمتي بدريه؟
هني صاحت سمر بصوت عالي وما قدرت تمسك عمرها...وبدون أي تردد ولا انتظار كانت عفرا طايحه على ارضية الصاله غشيانه...
...................

وانتظروا الجزء التاسع عشر مع الاخت الـــــــغـــــــــلا

تحياتي

[الجنيبي]

السلام عليكم ورحمة الله وبركاته

مشكور اخوي البدوي الحبوب على التكمله الحلوة
ونترياج اختي الغلا تكمليلنا القصة
بسرعة لانه الجزء الياي وايد مشوق بالاحداث

والسموحة

[الغلا]

الحلقه التاسعه عشر
ضرب راس عفرا على الارضيه بقوه وشهقت ام خليفه ونش ذياب بسرعه وشل بنت اخوه وحطها على ريوله والبشكاره راحت المطبخ ركض تييب ماي..وحمده دخلت الصاله تصيح وهي تشوف البيت انجلب مناحه والكل يصيح...
ذياب: شو اسوي بها كيف بتنش..؟
حمده تصيح: اختي شو صار بها؟
ونشت ام خليفه لهم ويحاولون يوعونها بس ما نشت عفرا وسارت حمده هي ووحده من البشاكير ركض بيت خليفه وخبرنه وهو ما صدقهن وسار البيت بسرعه يشوف بنته اللي ما طاعت تنش..وركبها على طول السياره ووصلها المستشفى اللي فيه بدريه الله يرحمها..
واول ما دخلوها على الدكتوره تمت تحاول فيها لين ما تبطلن عيونها بصعوبه...ودمع خليفه وهو يشوف بنته تنهار جدامه...
خليفه يمسح على شعرها:عفرا فديتج الحمدلله على السلامه..
عفرا وعيونها منترسه دموع: ابويه انت ما تجذب..صدق عمتي ماتت؟
خليفه:بنتي انتبهي لصحتج وان شاء الله خير..
عفرا: بدريه شي يعورها..وايد تعورت؟
خليفه ودموعه تطيح:والله انها مرتاحه راحه ما بعدها راحه..ادعيلها يا عفرا..
حطت عفرا كفوفها على ويهها وتمت تصيح..وفي قلبها...
"معقوله عمتي تموت..؟معقوله.!! صدق يعني ما بشوفها بعد اليوم.؟ يعني خلاص ابدياًًًً"
خليفه: عفرا لا تعذبين روحج كلنا ذايقين الموت..
عفرا تحاول تيلس: ابويه ابغي منك شي..
خليفه: تامرين امر يالغاليه..
عفرا وويهها خرسان دموع:خلني اشوفها ارجوك ارجوك لا تردني..
انتفض قلب خليفه..مستحيل ييب لبنته الهم ويخليها تشوفها..لو شو ما سوت..مستحيل لو شو ما صار يخليها تشوف عمتها اللي تحبها وهي ميته...يدري ببنته حساسه وفوق الاحساس عادي تموت لو شافتها وعادي تنجلط...
بس عفرا ما خلته في حاله لين ما خذها غرفة بدريه..وهناك شاف شي مستحيل يتصوره تفكيره وخانته في هالموقف رجولته وانصدم بعمره وهو يصيح من قلبه..وهو يشوف ولد عمه حمد حاط راسه على الشبريه وطايح على ركبه في الارض ويصيح مثل الياهل...وبو خليفه يالس على كرسي قريب منه...واول ما سمع حمد حس حد في الحجره رفع راسه..وشافهم ورد يعدل يلسته...وبو خليفه انصدم يوم شاف عفرا..وطالع خليفه بس خليفه اشر له ان ما عليه...
خليفه مد ايده لولد عمه بيشد على كتفه ويهون عليه مصيبته:عظم الله اجرك يا حمد..
حمد ويهه معتفس وهم الكون فيه: اجرنا واجركم..
بو خليفه: خبرت اللي في البيت...؟
خليفه: كلهم يدرون...
وبو خليفه صد يطالع عفرا اللي واقفه ماتسوي شي بس تطالعها وهي ممده على الشبريه ومغطينها بشرشف ابيض..ما عندها جرأه ترفعه ابداً..ونش لها خليفه ووقف حذالها..
خليفه: يالله نروح حبيبتي..
عفرا بصوت مخنوق: ابا اشوفها..
خليفه زاغ: لا ما يستوي بتخافين والله..
عفرا ودموعها تطيح:لا ما بخاف...ارجوك نظره اخيره..
وزقر خليفه حمد يشل عن اخته الشرشف وهو بيسير شوي بعيد لين ما تشوف عفرا عمتها..
حمد بحزن: بتخافين مب لازم..
عفرا تصيح: ارجوك ارفع بسرعه...
حمد رفع عنها الشرشف ودمعت عيونه ولف يطالع عمه وهو يمسح دموعه في غترته..وخليفه دمع وبو خليفه قلبه محترق على ولده يوم بيدري..
عفرا اول ما شافتها تمت صاخه دقيقه تطالع ويهها...ويت بتحط كفها على خدها بس ما قدرت..ورفعت ايد بدريه وحبتها وحطتها على ويهها...وبصوت مرتفع..
عفرا من بين العبرات والدموع: ليش تروحين.؟ ليش انتي تروحين ليش؟ اشمعنى انتي يعني..؟
ولفت تطالع حمد بحقد ونظرات اتهام خلته يتنتفض مكانه...
خليفه زاغ على بنته وقرب منها يسحبها: يالله يا عفرا استغفري ربج..قولي استغفر الله..مب زينه هالرمسه اللي تقولينها..
طالعته عفرا بنظره بارده ولفت تطالع ويه حمد وويه يدها..وتشوف كل شي دبل..تحس عيونها ما تشوف وضباب جدامها..ما حست بعمرها من بين ايدين ابوها وانسابت بسهوله غشيانه مره ثانيه...
بو خليفه حرج على خليفه ليش يايبنها المستشفى ما يدري شو سالفتها هي الثانيه ولا هم ناقصين هم ثاني..ووصلها للمرضات يشوفن شو فيها ويتابعنها....
..................
في الدرب لين بوظبي كان عبدالله يرتجف من الخوف بس مول ما حط في باله انها تموت يعني تخيلها وهي متعوره والجبس مغطي ايدينها...ودق على رقمها وهو مسرع يسابق نفسه والزمن..بس لقاه مغلق واتصل على حمد ولقاه مغلق بعد..وقرر يتصل بأبوه...بس بو خليفه يوم شاف رقمه ما رد عليه...
كان متوتر ويحس بشي غريب في نفسه...ويتمنى كل شي يعدي على خير...واول ما وصل المستشفى اتصل بأبوه...ورد بو خليفه..
عبدالله: ابويه الله يهداك حرقت قلبي وينك من الصبح ادق وما ترد..
بو خليفه احترق قلبه اكثر: انت وين الحين؟
عبدالله: تحت انت وينكم كم رقم حجرة بدريه ان شاء الله الاصابات مب خطيره..
بو خليفه خلاص يحس عمره يموت كلما رمس عبدالله: لا خير ان شاء الله الحين اخوك يايينك..
ونزل خليفه وحمد نزل وياه تحت عسب يوصلون عبدالله الحجره...عبدالله اول ماشاف حمد ارتاح وهدت نفسه ولوى عليه وحبه..
عبدالله: ما تشوف شر ولد عمي خطاك السو..طهور ان شاء الله...
حمد منزل راسه: الشر ماييك...
خليفه: لا ماعليك منه حمد ان شاء الله بخير..
عبدالله بلهفه: يالله يا ويلك جان استوى في بدريه شي بذبحك..يا ويلك ان شوهتها هي روحها ما تشاهد بعد تشوها انا بدور لي حرمه ثانيه...
كان عبدالله يستهبل يبى ينسي عمره ان شي جايد مستوي...
حمد سكت وما رد عليه وقلبه يتنافض..
خليفه بارتباك: اطلع فوق ويانا...
وطلعوا كلهم فوق ودخلوا الحجره وكان بو خليفه واقف عند الباب متسند بعصاه..ويوم شاف ولده عوره قلبه..وعبدالله تم يطالع يمين ويسار وينها وين بتكون...ولف يشوف ويه خليفه وحمد اللي كانوا يطالعون الارض...
بو خليفه وايه ولده وحط ايده على كتفه وشد عليها بقوه وبحنان فضيع:العمر لك يا بو حميد...
ابتسم عبدالله ببلاده ونزل ايد ابوه من علىكتفه..وسار للسرير وغمض عيونه..وتمنى للمره المليون تكون راقده وما نشت من تأثير البنج...رفع الشرشف وبعده مغمض ويوم بطل عيونه بشوي شوي..شهق..وضرب بكفه بقوه على يبهته....
عبدالله بصوت عالي: لاء..لاء...
حط ايده على ويهها وشل الشرشف كامل لين تحت صدرها..وشاف كل شي من التشوهات لمكان حدايد السياره والشارع كيف انغرست في صدرها..وشاف ويهها الصادق الحنون ومسحة الحب كلها فيه...بطل عيونه على الاخير وحط صبوعه على عيونها يبى يبطلهن...
صاح عبدالله: بدريه..ارجوج....
مسح على شعرها..وهو يصيح بحرقه مثل الياهل...
خليفه بخوف: استهدي بالله اخوي..
بو خليفه: خاف الله في نفسك يا ولدي..
لف لهم عبدالله بعصبيه وطالعهم بنظره حاقده...استغربوا منها كلهم ..كان ينقل نظراته بينهم من ابوه مرورا بحمد لين خليفه...
عبدالله بعصبيه وهو يصيح: برا..طلعوا برا..ماريد اشوفكم طلعوا برا...
طلعوا كلهم من عنده ومحد ممكن يلومه...اللي فقده مب شويه...
عبدالله مب مستوعب شي: شو يا بدريه..قولي والله خليتيني..حلفي بس...قولي كلمه وحده..انطقي..صدق ما بتردين..؟؟
ورد يصيح: الحين صدق ما بشوفج ابد...ما بتكونين وياي..حرام عليج والله حرام...(وتم يهز راسه بأسى)شو قلتي لي امس ونحن سايرين بوظبي...؟ مب قلتي لي والله ما اخليك العمر كله..افا يا بدريه تروحين واهون عليج اتم بروحي..
حبها على يبهتها وما رفع راسه وتم يصيح ودموعه بللت ويهها...ونزل راسه وبكى على صدرها لين ما بغت روحه تطلع..
تم يصيح وحس بشي في ويهه ويوم رفعه وتحسس بإيديه شاف شوية دم من صدرها على ويهه..وشهق وتم يصيح وما قدر ييود عمره وهو خلاص يحس بعمره منتهي...
عبدالله بهدوء: بدريه زين جي..كل يوم بتم بروحي...خلاص محد يحبني ومحد بيهتم فيني..خلاص يعني قررتي ما تردين..رحتي هناك ما تبين شي مني..هنت عليج تخليني بروحي..صدق الحين كل يوم برقد لروحي وانش لروحي..محد بيحن علي يبغي يسير بوظبي..صدق يا بدريه..خلاص افقد الامل..
كان يتكلم بهدوء فضيع ودموعه مخيسه ويهه وقلبه خلاص انكوى واحترق عليها...ودخل عليه الدكتور ويلس يهدي فيه..وقالهم متى وقت غسل الحرمه..وانه اكرم للميت دفنه عشان ترتاح نفسه..نش عبدالله وحبها على يبهتها ولوى عليها بقوه ويرها صوب صدره وهو قابضنها بقوه ويصيح وتخسيت كندورته شوي من الدم اللي فيها.. وعقبها نش وغطاها بالشرشف الابيض..ووقف يرمس الدكتور ويخبره عن باقي اجراءات المستشفى لين ما يي وقت الدفن..وطلب من الدكتور انه يتم عندها لين صلاة العصر وانه محتاج يقضي معاها اخر اللحظات قبل ما يودعها ابدياً....بس الدكتور طلب منه ما يطول بس يتم شوي ويظهر لانه مب زين وممنوع بعد..وتقبل عبدالله الامر..
.
.
كانت الساعه 1:30 طلع عبدالله وابوه وخليفه وولد عمه حمد وساروا بيت بو خليفه كلهم على اساس ان الدفن يكون الساعه 4:00 عقب صلاة العصر...
واول ماظهروا كانت عفرا وخليفه وبو خليفه في سياره وحمد في سيارته وعبدالله في سيارته سايرين البيت العود بيت بو خليفه...
يوم وصلوا كان الكل متيمعين في الصاله سمر وحصه وذياب وام خليفه وساره وحمده والبشاكير وكل حد...يوم دخلوا نشت ام خليفه تشوفهم وساره ركضت صوب بنتها اللي تمت تطالع الكل بحقد وكراهيه ونظره تعبانه اكثر...
ام خليفه تدور بعيونها على ولدها على عبدالله اللي طالعهم وطالع في ويووهم كلهم..وهو يقول في خاطره ليتكم كلكم متوا ولا راحت بدريه..كان كاره الكل هاللحظه وما يبى حد يعزيه ولا حد يشفق عليه..شافهم ووزع نظراته بينهم...كانوا زايغين عليه يوم شافوا كندورته مخيسه بالدم...
ام خليفه تصيح: عبدالله..
عبدالله بعصبيه وير كندورته يراويهم ويصيح: هاه شوفوا...هذا دمها..دمها...صدق ماتت..ماتت..مب دمي هذا يا ليته دمي ولا دمها..يا ليتني انا اللي رحت وهي اللي تمت...يا ليت..
ام خليفه تصيح بحرقه: عبدالله...
بس ما رد وسار الحجره اللي تحت دوم كان يوم يي يرقد فيها هو وبدريه...صك الباب بقوه..وقفله بالمفتاح..وعق غترته وعقاله..وغمض عيونه وتخيل لو يبطلهن ويشوفها يالسه ترتب ثيابهم وتحطها في الشنطه عشان يردون دبي...ودمعن عيونه وانسدح على الشبريه وتم يصيح بصمت بينه وبين نفسه..
"ردي والله ما أأذيج..خلاص ما بعق ثيابي يوم ارد من الدوام على الارض..خلاص والله كل ما تبين تسيرين بوظبي بوديج وعادي خل ابويه يقبضني شغله مب مشكله عشان تستانسين هني..(يبتسم بمراره)..ردي والله ما اسرع وانا اسوق وما بشوح بالسياره ولا بلعوزج ...خلاص والله يوم تطبخين ما بزيغج في المطبخ على غفله..انتي بس ردي ولج مني كلمة ريال اتغير واعقل وماعاد اضايقج مول..بس لا تخليني اتم لروحي وحيد.."
مسح دموعه وتنهد واستغفر ربه..وسار الحمام يتمسح ويلس يصلي وتم يصيح في صلاته..ويوم خلص يلس على السجاده..
"اغفر لها يارب..ارحمها برحمتك..ولا تعذبها يا ربي..كانت طيبه وما جرحت حد..وما شفت منها الا كل خير..يا رب والله اني راضي عليها دنيا واخره..ورجيتك يا رب لا تعذبني وقرب يوم لقاي فيها..يا رب"
ومسح بكفوفه على ويهه ورد ينسدح على الشبريه...
.................
الساعه 1:50 طلع ناصر من مكتبه ولا يدري شو صار في الدنيا الشركه فاضيه مافيها حد..مر على المكاتب اللي في الدور الثاني وشاف مكتب البنات مشرع على الاخر والكمبيوترات مفتوحه بس محد فيها...دخل مكتبهن وشاف مكان ليلى فاضي وحصه مكانها فاضي بعد...تم يطالع ويتلفت بعشوائيه وشاف ورقة دفتر على طاولة ليلى وشلها وشاف اول شي مكتوب فيها...
" خذ راحتك صبري على بعدك كبير...لا تنزعج مني ابد دنياك عاشرها وسير...لا تتعب افكارك معاي وانا مجرد ذكريات........"
ما كمل الباقي بس عوره قلبه وحط الورقه في الفايل اللي وياه وطلع...وهو نازل الاستقبال تحت...شاف الموظفين طالعين...
حبيب: بابا ناصر..
ناصر وهو ينزل الدري اللي جدام الباب الرئيسي:نعم..
حبيب:بابا حمد سوي حادث..
انفجع ناصر واستغرب من اللي سمعه وتنشد حبيب عن كل شي وخبره وعلى طول اتصل بحمد بس لقى تلفونه مغلق...ودق على شقته بس ما لقاه...وحاول يهدي عمره وان الموضوع كله سوء فهم او التباس على الهندي اللي ما يفهم شي وقرر يرد البيت والعصر ان شاء الله يمر على ناصر الشقه او البيت...ويتطمن علىالخبر اللي سمعه....
.
.
ردت ليلى البيت ويا دريول قوم حصه..ودخلت الصاله وشافت امها يالسه تشوف التلفزيون على قناة السعوديه وحاطين فتاوى وهي يالسه تتسمع وشيخه طايحه عندها تلعب في عرايسها...اول ما دخلت ليلى سلمت وويهها معتفس ونطت شيخه ..
شيخه تتعلق في ريولها: امي...
شلتها ليلى ويلست على الارض مجابل امها: شحالج امايه.؟
ام راشد: بخير فديتج بلاه ويهج جي؟
ليلى تبلع ريجها: امايه..بخبرج شي..
ام راشد خافت: شو؟
ليلى: عبدالله ولد عمتي عايشه..
ام راشد: شو بلاه؟
ليلى: حرمته توفت اليوم بحادث..
شهقت ام راشد: لا اله الا الله..انا لله وانا اليه راجعون..يا حرة فوادج يا ام خليفه..ولا ريلها واعليه عليه...
وصاحت ام راشد وليلى يلست تهدي فيها...
ام راشد: فديتها والله بنت ناس وعرب طيبه واهلها من خيرة خلق الله ...
ليلى بحزن: يالله يمه عاد هاللي صار ومحد بيرد قضاء الله...
ام راشد: عيل انا بسير لهم العصر...
ليلى: مب جنه وقت يمه بعدهم للحين ما دفنوها..
ام راشد تصيح:انا ما بسير الدفن وين تبين انتي انا قلت بسير عند ام خليفه واعليه عليها...
ليلى تنش: يا فرحه ما تمت..ما فرحت بطلعة ولدها ماتت حرمة الثاني..
شيخه تطالع يدتها: امي ليث ددوه تثيح..؟
ليلى: اسنانها تعورها..
وشلتها ليلى فوق وما تغدت طبعا اللي فيها مكفيها...ومسكت تلفونها واتصلت بعايشه...
عايشه: يا هلا والله بالقاطعين...
ليلى: اهلين شحالج عويش.؟
عايشه: بخير الحمدلله شحالج انتي...شو بلاه حسج.؟
ليلى: بخير مافينا شي...بس اقولج بغيت اخبرج ان حرمة عبدالله ولد عموه عايشه توفت ...يا ليت تضغطين على ريلج شوي وتردين بوظبي..
عايشه شهقت: لا حول ولا قوة الا بالله..
ليلى: عزا عاد ما يصير ما تكونين هني...خبريه لازم تردين بوظبي..
عايشه: هيه اكيد ما يبالها هذي لازم ارد...
ويلست ترمسها شوي وعقب استأذنت منها ليلى وخلتها بتحاول تحط راسها شوي وبترقد...
.
.
تحت في الصاله تمت ام راشد ضايجه وتصيح من قلبها على الحرمه المسكينه اللي توفت...ودخل راشد عليها وانصعق يوم شافها تصيح..وعقب ما خبرته انصدم ونش من مكانه يتصل بأخوه مبارك يخبره يرد بوظبي ضروري عسب العزا في بيت عمتهم عايشه....وطبعا راشد طلع من البيت هالحزه وسار للقصابين عسب الذبايح واتصل في بو خليفه اللي كان في همه وخبره ان العشا عليه في اول ليله من ليالي العزا.....
....................
في حجرة الضيوف صوب الميلس كان حمد منسدح ويصيح مثل الياهل ومبند على روحه الباب...وجسمه يرتعش من الضعف والالم...وخليفه وذياب كل شوي ييون عنده يحاولون فيه بس مب طايع يفج الباب...ولا راضي ياكل لقمه ولا يشرب شي...ورغم الهم اللي فيهم سارت له ام خليفه بكبرها..ودقت الباب بس ما بطله ويوم سمع حسها هي وعمه وياها بطل لهم الباب..وهو منزل راسه وعيونه وارمه صياح...
دخل بو خليفه وحرمته ويلسوا عنده..
ام خليفه وعيونها منترسه دموع: خاف الله في نفسك يا ولدي...
بو خليفه: عيب عليك انت ريال والرياييل ما تسوي جي..
ام خليفه: يا ولدي احتسبها لله...
بو خليفه:الدنيا ما تدوم لحد...
كان حمد منزل راسه وعيونه شبه مفتوحه ما يدري شو يسمع من اعمامه..والدنيا دايره فيه ترفعه وتشله...راسه بينفجر من الصداع وقلبه بينفطر من الهم..وماسك عمره بالقو عسب ما يصيح جدامهم ولا يبين ضعفه ابد...
ام خليفه: نش يا ولدي فديتك..وتمسح وصلي ركعتين..ان شاء الله تهدا نفسك..
بو خليفه: خبري البشاكير يحطن له شي ياكله..
ام خليفه: لا انا بنش اسوي له شي ياكله وما اظني بيردني...
حمد منزل راسه وما رد..مب وقت اكل ولا وقت شرب ولا حياه..ما اصعب عليه يتنفس الحين عاد ياكل هذي مستحيله...
بو خليفه يشد على ايد حمد: نش وانا ابوك خفف على عمرك وادعي الله يغفر لها...شوف ولد عمك ما يندرى شو بيصير به عقب حرمته..
حمد رفع راسه وتوه يتذكر عبدالله:وين عبدالله؟
بو خليفه بحزن: ما شفته صاك على عمره الباب ما يندرى شو مستوي به..
ام خليفه تصيح: واعليه على ولدي اخاف يستوي به شي..ثيابه مخيسه بدم حرمته وقلبه محترق عليها..
تذكر حمد شكل الحادث ودم بدريه ويوم الشرطه والاسعاف تسحبهم من داخل وعقبها ما يذكر شي مول..غير ممرضه تحاول تربط جروحه...يتخيل شكل بدريه وهي تعض على شفايفها تباه يسكت وهو يرمس حصه...تذكر حصه واشتعل قلبه حقد...وطالع عمه بنظره غريبه...عقبها بو خليفه وحرمته نشوا لانه اللي ظهر لهم ان حمد خلاص عقله بيروح على اخته وحالته حاله...
.
.
الساعه 3:00 الظهر بطل عيونه وحس بصداع قوي براسه...ناسي ان شي مستوي..ويلس على الشبريه وتنهد...ولف على يمينه...بيسأل بدريه اذا الصلاه قامت ولا بس اللي يسمعه آذان... اصلا ما اذن بس هو يتهيأله انه يسمع اذان... وزقر بصوت واطي "بدريه"......وتذكر اللي صار ونزل راسه بين كفوفه وتم يصيح....وما نش ويلس على الشبريه...بعد شوي بيطلع غصبا عنه وبيودعها الوادع الاخير وحتى عمره عقب اليوم ما بيشوفها وهي ميته...غمض عيونه وسحب مخدتها اللي ترقد عليها وقربها من ويهه وشم ريحتها وانقبض قلبه...الحين لازم ينش عسب ييبونها البيت يغسلونها الحريم وعقبها يشلونها يصلون عليها ويودعها الوداع اللي ما عقبه شوفه...
عيونه مغمضه واستجمع قوته يتذكر شي....
عبدالله: وين نرقد الحجر ممزوره عرب...
بدريه: لا في حجر فاضيه شو قالوا لك ساكنين خرابه فيها حجرتين..يالله تعال بنرقد..
عبدالله: وين..؟
بدريه وهي تأشر على اخر حجره في الصاله: هناك...
عبدالله: فاضيه..؟
بدريه: هيه يالله وفرشت وكل شي خلاص..
عبدالله: اكيد على الارض..؟
بدريه: ارجوك يا ولي العهد اللي متعود على ريش النعام..
عبدالله: ظهري يعورني ما روم ارقد على الارض وانتي تدرين بهالشي..
بدريه: وكيف انسى ؟ وليش كم عندي عبادي انا ..
عبدالله: عشان جي تبين ترقديني على الارض وتفتكين مني...
بدريه: امنت لك اللي تبى وفرشت لك فراش طبي كان عمي مبارك يرقد عليه... احسن عن ا لشبريه مليون مره..
عبدالله: بعد عمري والله ..كل حريم الارض ما يسونج يا بدريه...
بدريه: كل هاه عشان فراش..يالله يالله نسير..
عبدالله: يالله نسير..
دمعت عيون عبدالله وهو يتذكر الوحيده اللي كانت تراعيه وتحبه وتوفر له كل شي..بكى من قلبه وهو عارف ان هالدقايق مهما طالت مصير بدريه تنحط تحت التراب وما عاد بيشوفها للابد...بدريه انتهت من الدنيا ومستحيل ترد لعبدالله لو شو ما سوا...حس بشي في جسمه وبقوه مب طبيعيه تذكر بدريه وحبها القوي ومشاعرها الفيّاضه..بدريه كانت طول عمرها تموت فيه لين اخر لحظه وهي تنطق بإسمه...ماتت وهي تزقره...عبدالله فقدها للابد..فقد ابتسامتها وضحكاتها وحسها الغاوي وعيونها العذبه ونظرتها الحنونه وكفوفها الغاليه وحضنها الدافي وكلامها الحلو..فقد كل شي لكنه ما خسر محبة بدريه...انخلقت وهي تحبه وماتت وهي تحبه...حرمته الدنيا والاقدار من كل حياته وحبه الوحيد لكنها ما تقدر تحرمه من ذكرياتها من حبها...
حب بدريه بيتم طاقه كبيره داخل عبدالله اللي طول عمره ما بينساها...
ابتسم من بين دموعه وهو يتخيل بدريه تيره من ايده ...
بدريه: يالله عاد متى بتنش تصلي ...؟
عبدالله بكسل: صلي انتي عني..
بدريه: استغفر ربك مسود الويه يالله نش وصلي...
ونش عبدالله وعرف ان الله ما يحاسب على الاحلام ولا الخيال..حب بدريه اقوى من انه يخلي عبدالله يضعف واكيد انه بيتماسك دام الانسانه اللي حبته ماتت من الدنيا وفي عيون الناس ولكن بعدها عايشه في قلبه...دخل يتمسح عسب يظهر يصلون جماعه مع صلاة العصر مع صلاة الجنازه في المسيد على روح الغاليه...صح انه صاحها وهو يصلي الظهر ويسجد بس بعد احتسبها عند رب العالمين...وعرف ان هذا قضاء الله وقدره....
يوم خلص لبس كندورته وسفرته...وطالع ويهه بالمنظره وشاف جفونه ورامه بس استغفر ربه ودعاه ان يلهمه الصبر والسلوان جدام الناس على الاقل...
طلع من الحجره وشاف امه وذياب وساره وحصه في الصاله...ونشت امه يوم شافته..ولوت عليه وتمت تصيح وحصه نشت له..وذياب...وعزوه في حرمته وهو ساكت متماسك جدامهم بس منزل راسه ومبين الحزن فيه...
ام خليفه تمش دموعها: الله يصبرك يا ولدي ويخفف عليك...
حصه ودموعها تنزل: احتسبها لله يا عبدالله...
ذياب: عظم الله اجرك اخوي..
عبدالله انتبه ان ذياب موجود وابتسم له بحنان ولوى عليه: الحمدلله على السلامه..
هني انفجرت حصه صياح ومارامت تيود عمرها...وهم واقفين انفتح باب الصاله ودخل بو خليفه..
بو خليفه يلوي على ولده: الله يصبرك يا ولدي...
عبدالله: اجمعين ان شاء الله..
بو خليفه: يالله اظهروا اخوك في الموتر يالله يا ذياب...
وطلعوا الرياييل بيسيرون ييبون بدريه من المستشفى عسب يغسلنها الحريم ويكفنوها..
وفي نفس الوقت اللي طلع فيه عبدالله كانن ثلاث سيايير داخلات البيت سيارة سلمى وريلها ونوره وهل بيتها وسيارة قوم ليلى...
وعلى طول البشاكير كانن مجهزات الصاله وغرف الضيافه عسب من يوصلون الحريم والمعزين يكون كل شي زاهب لخلق الله...
طبعا الميالس كانت زاهبه..وحمد ظهر ويا الرياييل عقب ما تيدد ولبس وسار ويا عبدالله في سيارته..
وما مرت شوي من الوقت الا والبيت انمزر من اوله لين اخره بالناس من كل بقعه ووصلت ام بدريه اللي ما كان حزنها اقل من حزن غيرها...وعلى كبر الصاله اللي فيها الضيوف والمعزين قسموا الحريم قسمين..البنات في صوب والحريم الكبار في صوب ثاني...
طلعت ليلى فوق عند حصه اللي كانت تموت وتنتهي وقلبها متقطع من الحزن...تحاول تهدي فيها وتذكرها بربها...ليلى صدق كانت حزينه من خاطرها وهالمشهد شافته وتكرر قبل سنتين يوم توفى ابوها الله يرحمه...فكانت حاسه بإحساس حصه واهلها كلهم....وفي حجرة حصه...
ليلى تشد على كفوفها: حصه الله يخليج روفي بحالج..
حصه تصيح: ما اقدر والله ما اقدر...
ليلى: والله بتتعبين والله..شوفي ويهج كيف غادي..
حصه:عادي خلني اموت احسن افتك ارتاح..
ليلى تشهق: بسم الله عليج عن الخبال..قومي صلي والله ماشي يهدي النفس شرات الصلاه...
حصه: ماروم اسوي شي ماروم اتحرك كل اللي احسبه اني ابى اموت الحين وافتك من كل شي حواليه...
ليلى بحزن: يا عمري يا حصه خافي الله في نفسج...ترا الصياح ما بيرد ميت ولا جان كل انسان صاح اللي يحب العمر كله..
حصه تصيح: انتي ما تعرفين شو في بالي ما تعرفين اني دقيت لها وهي في الدرب ويا حمد وكنت لو ما اتصلت جان.....
تقطاعها ليلى بعصبيه: أي انتي شو تخرفين شو تقولين..انتي وحده مافي قلبج ذرة ايمان ولا عندج ثقه في قضاء الله وقدره...شقايل ترمسين عن عمرج جي..انتي ناسيه ان الله موجود وهو اللي كاتب في كتابها هالشي..انتي تعرفين انج يالسه تعترضين على القدر وثاني شي انج يالسه تقولين بشكل غير مباشر انج السبب ويعني هذا ان الله ما كان بيموت بدريه لولاج...شو من منطق تفكرين به...حصه اعقلي وخلي ثقتج بالله كبيره..قومي جابلي امج ولا ولد عمج ولا اخوج شوفي بيتكم ممزور عرب انزلي تحت وقفي ويا اهلج في محنتهم...
حصه تصيح اكثر: ليلى والله ما اقدر اسوي شي تعبانه والله والله...
ليلى تقرب منها: يا حصه الله يهديج قومي صلي وانا بصلي وياج ركعتين للراحه بعد شوي بيوصلون اهلج وبييبون حرمة اخوج تسلمون عليها قبل يدفنونها....
حصه زاغت اول مره تعرف هالشي: بشوف بدريه مره ثانيه.؟
ليلى: هيه لازم بعد...
حصه تصيح: اه يا قلبي عليك يا خويه ما شفتي كيف ويهه يوم شافها...عاد اخوها حمد شو بيسوي وكيف بيعيش...
حرجت ليلى: انتي ما عندج كبرياء ولا كرامه كل اللي سمعج اياه وتفكرين فيه..يا حصه اثقلي هذا افه على المجتمع وجوده مثل السم في الدم..
حصه رفعت راسها بحزن: بس هذي اخته ومن حقه اللي قاله كان منهار..
ليلى بعصبيه: بس بعد ما يحق له شو يتحرا عمره...يقولج انه يكرهج وما ادري شو ويا ليتج بدالها ويباج تموتين..شو تبين به خايس ودريه عنج...
حصه تصيح: ما تعرفين ولد عمي يحب اخته فوق ما تتصورين والله ما تعرفين حزنه اكيد بيموته علي..
ليلى: ما تعرفين تفكرين مول ما يكفي ان هو السبب باللي صار...متهور والله يعلم شو كان يسوي بالموتر لين ما انجلبت بهم السياره..
حصه بثقه: ليلى توج تقولين ان ما عندي ايمان ولا ثقه في قضاء ربي..كيف تتهمين حمد بموت بدريه..صدقيني يا ليلى لولا انج اقرب الناس لي بعد حمد كنت ما فكرت اني اتم وياج ثانيه وحده بعد اليوم...
ليلى بضيج: هو السبب من اهماله وطيشه..
حصه: مب هو السبب مثل ما قلتي كل شي كان قضاء وقدر وان كان لاي انسان دخل في موتها فهو انا...بس كل شي كان بيد رب العالمين...
ليلى مسكت ايدها: يالله نشي بننزل تحت نشوف الحريم وامهاتنا جان يبن شي نساعدهن فيه....
.
.
الساعه 3:30 دخلت السيايير البيت ووصل عبدالله وحمد في سياره وحده ووياهم بدريه...وسيارة بو خليفه وخليفه ونزل عبدالله وحمد...وبطلوا حجره قريبه من صالة البيت بس بابها على خاري..وين خالاتها وحريم اخوالها يغسلونها قبل يأذن العصر ويشلونها المسيد عسب يصلون عليها ويتممون اجراءات الدفن..
طبعا اول ما دخلوها الحجره اللي قريبه من الصاله كان المكان هادي ومأساوي بس ام خليفه شوي كانت تصيح وما رامت تيود عمرها..وساره وياهم وسلمى.....ودخلت نوره على الحريم في الحجره وقربن يغسلنها بالسدر ويحطون عليها الحنوط اللي متكون من دهن الورد ودهن العود والكافور والياس والصندل ...وانترست الحجره من هالريحه الطيبه مختلطه بعبرات وحزن الناس واخر شي دخنوا الكفن بالعود ..ام راشد كانت واقفه هي وام خليفه على ينب تتذكر في هالموته ريلها بو راشد يوم توفى..ويوم خلصن غسيلها سلمت ام خليفه عليها قبل يكفنونها هي وام راشد وعايشه اخت ليلى وحرمة خليفه ساره..مع سلمى و نوره بس حصه ما طاعت تنزل ابدا وخافت من هالموقف وما قدرت تشل عمرها وتتخيل انها ممكن تسلم على ميت..... في الاخير طلعت ام راشد وام خليفه اللي ما تحملت..وسارن الصاله بيجابلن الحريم اللي مازرات البيت...
ساره طردت حمده ..كانت زايغه على بنتها تشوف هالمشاهد ومناظر الغسل والتكفين وصياح الحريم.. وقالت لها ما تيي البيت وتم عند اختها تشوف شو تبى واذا صار عليها شي تزقر حد منهم لانها في حاله ما تحسد عليها..وعقب ما خلصن الحريم وغسلنها كان عبدالله واقف حذال موتره ساكت وحمد قريب منه بس منزل راسه..صدق كان جو البيت كئيب وحر فضيع بس مب احر من جو الحزن اللي كانوا عايشين فيه...
زقرت خالتها على ريلها جان يبى يسلم عليها قبل يكفنونها لانه ما يجوز يفج الكفن عقب ما تتكفن..وطلعوا الحريم من الحجره ودخل عليها عبدالله وخلى حمد في الموتر لانه ماطاع يي وعرف عمره بيصيح زود جدام الخلق...
عبدالله اول مادش سمى بالله وسلم عليها..وحبها على راسها...وعيونه دمعت فوق ويهها..
عبدالله حط ويهه على يبهتها وويهها وتم شوي يصيح عقب تنهد واستغفر ربه...وطلع وزقر عمته وخالاتها يكفننها بيشلها يصلون عليها...
طلعوا الحريم بدريه وهي مكفنه ومخلصه وكل شي ويا حمد وعبدالله بيشلونها السياره عسب يلحقون الصلاه..حمد انهار وهو شالنها وتم يصيح وما رام يقبض عمره وعبدالله متماسك لابعد الحدود وقابض عبره خانقتنه بس يوم دخلها الموتر وشاف ولد عمه متحطم ويموت من الصياح عوره قلبه وما قدر يقبض نفسه ودمعن عيونه...بس ركب الموتر ولا حتى قال لحمد يركب وياه وتم واقف يترياه لين ما ركب جدام عنده وعقبها سارت سيايير الرياييل كلهم عبدالله وابوه واخوانه خليفه وذياب ورياييل البنات نوره وسلمى...وساروا المسيد يصلون على روحها الغاليه ويودعونها الوداع الاخير...
.
.
في البيت الداخلي يلست سلمى ونوره حذال بعض سلمى صدق تعبت ومنهاره وفوق الانهيار..بدريه وايد قريبه منها وايد..ساكنه وياها في نفس المنطقه وبنت عمها وحرمة اخوها وما تنسى موقفها وياها ايام سالفتها ويا ريلها...
سلمى تصيح...
نوره بحزن: بس يا سلمى خافي الله في نفسج..راحت الحرمه صياحج ما بيردها..
سلمى تصيح: شو اسوي يا سلمى خلاص احس حيلي مهدود نحن من وين تتحذف علينا هالمصايب...؟
نوره دمعت: يا سلمى حرام والله اللي تقولينه شو من تفكير اللي تفكرين به..كوني قويه وقت اختبار الله لج..
سلمى تصيح اكثر: ما اقدر والله...
يتهن ام راشد ويلست عندهن ونشن يسلمن عليها ...
ام راشد وعيونها منترسه دموع: يالله يا بناتي كلنا بنذوق الموت مهما ابطينا في هالدنيا الزايله...(وتشد على ايد سلمى) الله يطول بعمرج يا بنتي وعمر اهلج ويخلي لج اليهال وابوهم...قوي ايمانج بالله وخلج واثقه من قدرة رب العالمين...ومشي دموعج وسيرن جابلن امكن تراها في حال اشد من اللي انتن فيه...
نوره تصيح يوم سمعت كلام ام ليلى: ان شاء الله يا خالتي...
سلمى تصيح اكثر: انا مب قادره اشوف حد احس بعمري كل ما شفت الناس اختنق اكثر...
ام راشد ودموعها تطيح: لين متى يا ام منصور..لين متى بتمين منخشه عن خلق الله...نشي وشوفي امج وساندنها امكن حرمه كبيره وتبى تفرح وهي تشوف بناتها غدن حريم تعتمد عليهن قومن الله يرضى عليكن ويوفقكن يالله نشن وامنن بالله وبقضاه..وكل وحده تجابل العرب منكن..ترا مب زين بترمس عنكن الناس مودرات امكن وهي حرمه كبيره بروحها ويا الحريم...
نوره تنش: ان شاء الله خالتي غاليه...
ونشت ام راشد بصعوبه: يالله فديتكن وعسى ربي ما يذوقكن الحزن في غالي...
ونشت سلمى ونوره وطلعن ويا خالتهن ام راشد وسارن صالة الضيافه يجابلن الحريم ويا امهن...
.
.
الساعه 5:00 خلصوا كل شي وكان عبدالله راد البيت وفي سيارته حمد وبقايا من ريحة المرحومه..وصمت قاتل..والم في القلوب عنيف...
صدق رغم حزن عبدالله بس ما كان كثر حزن حمد وانهياره.لدرجة ان عبدالله وهو في قمة تعبه والمه كسر خاطره ولد عمه....
عبدالله بحزن:حمد مب زين اللي تسويه بعمرك...
حمد صاخ وما رمس كانت عيونه ذابله تعب وحزن ومنزل راسه وعايش في دوامه الم وتعب..مقهور وكل قهره حوله لاحقاد للي حواليه...
عبدالله بنبره حنونه: حمد كلنا نحب بدريه بس هي الله اختارها تروح له..انت مب عايبنك اللي الله يباه..
حمد: استغفر الله..
عبدالله يوقف سيارته بينزل: يالله قوي عزومك على الاقل جدام الرياييل..واطلب ربك يلهمنا الصبر ويقوي قلوبنا على طاعته..
على كبر فجيعة حمد بس ما توقع للحظه ان عبدالله ممكن يتماسك هالكثر صدق صدمه...بس بعد ما اهتم ونزلوا للميالس اللي اكيد ممزوره من اولها لاخرها بالمعزين....
في الميلس انترس المكان بالرياييل وكان راشد واخوه اخوان ليلى هناك وشافوا ريل عمتهم بو ناصر وعياله فهد وناصر مع الناس ونسوا خلافهم وسلموا على بعض وتبادلوا التعازي في غمرة الحزن ينسى الانسان خلافاته مع غيره...وكان عبدالله يالس شوي جريب من الباب وحمد حذاله وقريب منهم بو خليفه وخليفه...صدق حالة حزن عنيفه كانت تعم ارجاء البيت...
الناس كانت وايد اللي يايه يعرفونهم ومايعرفونهم واللي بس ياي يعزي عسب حرمة اخو خليفه بن مبارك توفت..ومن هالسوالف...
حمد كان يموت كل لحظه ويشوف الناس ومختنق وده الليل يي والناس تروح وهو يختلي بنفسه...يحس انه مب رايم ييود عمره من التعب يبى يصيح يحس انه ما شبع صياح عليها...على عكس عبدالله اللي الله منور له قلبه وهادنه ومسكن نفسه...كان ويهه رغم التعب والالم والمعاناه يشع بقوة ايمانه...وصبره واحتسابه غناته لرب العالمين...بس مع هذا كان وده يروحون الناس ويسير حجرته ويرقد شوي لان راسه كان بينفجر من الصداع...
.
.
مرت لحظات العزا ببطء والبيت كله مشتل حزن فوق وتحت طبعا سمر كانت في اسوأ حالات حياتها وبغت تموت ام خليفه من الزيغه عليها..البنت كانت حالتها مب طبيعيه ومنهاره ويتها حمى قويه من الخوف والتعب..مناظر قويه مب مألوفه لبنت في عمر سمر..موت وصياح وجو كئيب ورحيل فرد من افراد الاسره بشكل فجائي...
وفي حجرتها كانت ليلى عندها بعدما عيزت فيها حصه وامها وهي مب راضيه تسكت من الصياح جالبه حجرتها فوق تحت..
ليلى تمسح على شعرها: سمر حبيبتي تعرفين ان بدريه الحين يالسه تتعذب من هاللي تسوينه...ومب زين حد يصيح هالكثر على الميت..لازم لو تحبينها تمين تدعين لها عشان الله يخفف عليها الحساب..
سمر تصيح وجالبه ويهها الصوب الثاني..
ليلى بحنان: تعرفين سمر..بخبرج شي ما قلته حق حد مول..
ما لفت سمر وتمت تشهق وهي تصيح...
ليلى تبلع ريجها: بدريه حرمة اخوج وبنت عمج من حقج تصيحينها...بس بعد لازم تشكرين الله وتحمدينه على النعم اللي عندج..ترا الله كريم عمره ماياخذ شي بدون ما يعطي..يعني الله خذ بدريه وعطاج شي ثاني...ادري انج مب متفيجه لي ولا لسوالفي..بس قولي الحمدلله على نعمة العافيه وعلى ان اهلج وياج..غيرج يموت امه وابوه وكل اهله ويتم وحيد العمر كله...ومع هذا يعيش ويصبر والله يعوضه عن كل شي...
سمر هدت شوي...
ليلى ابتسمت وفيها حزن: تعرفين يوم كنتي صف ثالث ابتدائي وبعدج نونو صغيره...انا كنت في الشغل ويا اختج حصه..واتصل بي راشد ابو سلامي..زين تعرفين شو قالي...؟
سمر تتنهد وهي بعدها تدمع: لاء...
ليلى بحزن: قال لي اني ارد البيت ضروري في شي جايد مستوي...ورديت بسرعه وانا خايفه على شيخه تعرفينها بنت اخوي اللي مات...وسرت البيت وقولي شو لقيت.؟
سمر: شو؟
ليلى: ابوي ميت..خلاص تخيلي يا سمر يعني امس كنت راده من الدوام وما شفته الا الظهر...ورقدت ونشيت اليوم الثاني وما شفته الصبح وماعاد شفته للابد لانه مات....وهو ابوي..تصدقين..وهذي انا عايشه ما صار فيني شي رغم انه ابوي..ترا الحياه حبيبتي عادي تمشي حتى لو فقدنا اللي نحب...
سمر بحزن: انا ما كنت اعرف ان ابوج ميت..
ليلى مبتسمه: خالج يا الدبه وما تعرفين انه ميت..
سمر: محد خبرني..
ليلى ميوده ايدين سمر وتلعب في صبوعها: ومب بس هذا.. تعرفين شيخه الصغيرونه اللي عندنا..
سمر: هيه..
ليلى: ما عندها ام ولا ابو..
سمر باندهاش: مب انتي امها؟
ليلى: من وين امها يا حظي وانا مب معرسه...هذي بنت اخوي..تعرفين اخوي وحرمته ماتوا في يوم واحد ..حزنا عليهم وصحنا لين ما قلنا بس..وهذي الحياه بعدها ماشيه رغم انهم محد..
سمر بتصيح: بس بدريه ما بترد واخوي عبدالله بيتم بروحه...
ليلى وقلبها يعورها: عبدالله الله يقويه ويخفف حزنه..ترا الله بيلهمه الصبر لو دعيتي له..واذا تميتي تصيحين تعذبينه اكثر وتعذبين امج وخواتج..بدل ما تكونين انتي كبيره وعاقل والكل يحترمج انج صبوره وما تصيحين...
سمر: صدق والله.؟
ليلى: هيه والله حياتي..قومي غسلي ويهج وصلي العصر انتي ما صليتي..وادعي ربج باي شي في خاطرج...وسيري فلة خليفه ويلسي ويا حمده وعفرا...
سمر: اوييه عفرا..اكيد صار بها شي هي اكثر وحده تحب بدريه...؟
ليلى: هيه وانتي بعد بس انتي اقوى منهن وبتسيرين تخففين على بنت اخوج لانج كبيره وعاقل وربي بيقويج وما بتصيحين عسب ما تضيجين بحد..صح؟
سمر ببراءه: زين بحاول بس بعد شوي بصيح..قلبي والله يعورني..
لوت عليها ليلى:حبيبتي والله...
ونشت سمر تصلي وليلى طلعت عنها تشوف اذا حد يبغي شي تحت وتساعد البنات وتخفف على حصه اللي حالتها حاله..
..................
في فلة راشد بعد ما اذن المغرب وصلى في المسيد...كان حمدان في حجرته يالس يدرس لاخر امتحان...اللي باجر...ويفكر يا ترا كم بييب وشو بيسوي لو خذلته الامتحانات وزفت...ويلس يفكر في عفرا اكيد قابضه الكتاب الحين وتاكله اكل...مسكين ما يدري شو مستوي....ودخلت عليه سلامه..
سلامه: حمدان ملانه قوم نطلع..
حمدان: وين؟
سلامه: يكفي دراسه والله يكفي...
حمدان: يا سلام عشان خلصتي اطنش اخر يوم عندي..
سلامه: لا تعب عمرك ما بتييب شي..يالله نش..
حمدان: ماريد طلعي برا بدرس..
سلامه: البيت فاضي محد هني ولا في البيت العود..
حمدان: وينهم؟
سلامه: اووه ما خبرتك..حرمة عم عفرا وحمدووه توفت...
حمدان شهق: قولي والله؟
سلامه: هيه امي خبرتني يوم كانت طالعه...
نش حمدان وهو مصدوم وخايف على عفرا شو بتسوي باجر وكيف بتمتحن..وقرر انه يتلبس ويسير ويا الرياييل ميلس بو خليفه..مب اقل من هاللي فيه..ولازم يثبت رجولته في هالمواقف من الحين..وتحسر وايد انه ما حضر وقت الدفن والصلاه..
سلامه: وين رايح؟
حمدان:وين بعد اكيد العزا..
سلامه شهقت: وانا بتم لمنو؟
حمدان: ميرنا وشرملى وتاما عندج شبعي بهن..
سلامه: اخ عليك..
طنش حمدان سلامه وطلع على طول...طبعا سلامه كانت تقص على حمدان وما تبى تظهر بالعكس تبغي تفتك من ويهه وتيلس على التلفون لين ما تقول بس...وهاي فرصتها والاكيد انها راحت تدق لعبدالرحمن اللي ما بتشوفه لين السنه اليايه ما تبدا...
................
في الليل الساعه 9:30 كانت سلمى ونوره وساره في الصاله الثانيه بعيد عن الحريم الكبار وحصه وليلى وياهن وكم حرمه من الصغار وياهن...وسمعن صوت حشره برا ونشت ساره بسرعه تشوف...وردت لهن اسرع..
ساره : اختكن شمسه يت..
ونشن كلهن وراها...طبعا كانت وراها كل الشله الملكيه من بناتها هنادي وافنان وريم ومها...وسلمت على امها والحريم اللي في البيت وشكلها معتفس وصدق ضايجه ومبين انها صاحت وايد...طبعا ساره مسكت بناتها وطرشتهن ويا البشكاره فلتهم..ما كانت تبى البنات ييلسن ميلس العزا مول...ويلست شمسه ويا امها تخفف عنها عقبها دشت الصاله اللي فيها ساره والباقيات...
شمسه:الله يكون بعونك يا خوي..
نوره: هيه والله صدقج يا ام سعود...
حصه صاخه ما رمست...
سلمى بضيج: متى بتروح الناس نبى نيلس ويا اخوي شوي ونخفف عليه تلاقين ضاكينه ضكه في الميلس..
شمسه عطت سلمى نظره انه عيب...
ساره : منو مخبرنكم.؟
شمسه: اتصل خليفه بسالم وهم بعدهم في المستشفى وعلى طول اقرب طياره للبلاد يينا..
ليلى: حليلكم والله تعب بصراحه وانتي اول امس راده..
حصه: امس ردت مب اول امس..
شمسه:كيف صار وشو استوى حد عندها فكره..
سلمى بقهر: مسود الويه الله لا يبارك فيه..هو كان وياها..؟
شمسه بغرابه: منو؟
سلمى: منو غيره ويه النحس حمد ولد عمج...
نوره: خلاص سلامي بس عاد ما يسوى عليج..
شمسه: شو استوى وكيف صار؟ انا قلبي قابضني حسيت انه ما يكون حمد لو ما يكون له خص بالموضوع...
نوره: ماشي قضاء الله وقدره بس هو تلاقينه مسوي شي..حمد مودنها دبي ودعموا وصار اللي صار..
شمسه بقهر اكثر: الله يغربله..لو ربي خذاه هو وفكنا من ويهه ابرك من انه ياخذ هالفقيره المسكينه..
ليلى: استغفر الله..
سلمى:هو السبب والله صدقوني..هو السبب ماله ويه يواجه الناس..
شمسه: الله يقطع ابليسه قطو بسبعة ارواح..طلع منها مافيه شي..
حصه نشت بعصبيه: بس بس انتي وياها...شو تقولون؟ حمد ما يخصه في أي شي...شو هو اللي جتلها..اييه انتي وهي ما تخافن ربكن..ما بتستغرب لو قلتن أي شي..الحين ربي ما عنده قدره يصرف الناس ويموتهم شرات ما يبى..حمد شو ذنبه..حرام عليكم اخته الوحيده يجتلها ليش...ليش..؟
شمسه بعصبيه: اسكتي الله يخليج مب ناقصين تفاهاتج..نحن ما قلنا متعمد..على الاقل بيكون تهور وضاعت بسببه..
سلمى: والله لو انها ما سارت وياه جان بعدها ويانا...
ليلى: بس يا جماعه هدوا هذا قضاء وقدر...يمكن يكون حمد طايش بس بعد ما يحق لنا نلومه ترا هو بشر مثلنا يخطي ومب معقوله يتعمد يموت اخته..
نوره: ليلى حبيبتي نحن ما قلنا متعمد...
حصه: بس بس حرام عليكم ولد عمكن خافن الله فيه..تبونه يموت ويكون بدالها..شو من تفكير تفكرنه خافن الله في امه واهله وناس تبغيه...
شمسه: منو يبغيه الا انتي وبس..
حصه تهز راسها: حمد ما سوا شي وحمد اكبر من تفكير اليهال اللي تفكرن فيه..الله يعينكن صدق على تفكيركن انا مالي يلسه وياكن وهذا اللي تفكرن به...
ونشت عنهن وسارت حجرتها فوق مودره الناس وخلق الله وتفاهات خواتها وهي في قلبها الحب الكبير اللي ما يتغير ومستعده تبيع كل الناس وتدافع عن حمد اللي خسر بدريه...ولا يهمها اذا كرهها ولا لاء...اهم شي انها تحميه من اللي حواليه ومن كلام الناس....
.
.
في فلة خليفه انصدمت حمده يوم شافت بنات عمتها شمسه في البيت...ويلستهن في الصاله وكان حوارهن بارد لان حمده كانت تحاتي اختها اللي فوق وكل شوي تستأذن منهن وتسير تشيك عليها جان تبى شي ما شيات...طبعا في حجرة عفرا كانت الكآبه عنوان كل شي نظراتها ودموعها والسواد اللي غلف قلبها الرقيق...حتى كتابها ما دقته والاكيد انها مستحيل تسير باجر المدرسه لانها ماتروم تشرب الماي..فكيف تدرس وتقبض قلم وتكتب كان شي مستحيل رغم حبها وشغفها بالعلم بس انتهى الامر وكان من ظروفها الصحيه وظروف البيت انها ما تسير وهي بهالحاله...دخلت عليها حمده تشوفها ويلست على طرف شبريتها..
حمده: عفاري حبيبتي تبين شي؟
عفرا ساكته...
حمده: سمعي بسير اييب لج شي تاكلين مب زين تمين جي بتموتين..
ما ردت عليها عفرا...بس حمده نشت المطبخ وسوت لها كورن فلكس وهذا اللي قدرت عليه وكوب حليب...ودخلت عليها...
حمده: يبت لج شي لذيذ صح انه للريوق بس عادي مستعدين عشانج نجلب ليلنا نهار..
عفرا صدت الصوب الثاني..
حمده: ما بزعل انج لابتسني بس نشي عفاري ارجوج انتي اختي الوحيده وما اريد اخسرج نشي يالله..
عفرا: ماريد شي طلعي برقد..
حمده: والله ما ارقد ولا اسوي شي لين ما تاكلين..
عفرا بتصيح: والله ماريد..
حمده: عشان خاطري وغلاة امي وغلاة ابويه نشي بس لقمتين واشربي كوب الحليب وعقبها والله بودرج ولابأذيج..
عفرا بحزن: حمده نفسي ما تبى شي عايفه كل شي..طلعي مني الله يخليج..
ويلست تصيح..
حمده مسكينه من اول ما ردوا عفرا من المستشفى وهي تحاول فيها ماظهرت من عندها مول غير يوم دقت لها امها تقولها تشوف بنات عمتها وتيلسهن في البيت وتيلس وياهن....
حمده حاطه ايدها على راس عفرا: عفرا ارجوج قومي عشاني...تتوقعين الله يوم يشوفج جي تصيحين بيرد عمتي ..؟ مستحيل..
عفرا تصيح: بس بس اسكتي لا تييبن لي طاريها ما روم اتذكر شي عنها..والله حمده ابى اموت..
حمده شهقت: بسم الله عليج..هي اخت وحده عندي تخليني واروح لمنو؟
عفرا: مثل عمتي ما خلت عمي وراحت...
حمده: وييه هذيل غير ونحن غير..اذا متي انتي عادي ارمي نفسي في الشارع العام وانتحر..
عفرا ضحكت وهي تصيح..
حمده: الحين تصيحين ولا تضحكين قولي..
عفرا تمش دموعها: زين طلعي ارجوج ابى ارقد..
حمده: زين لقمتين عشان خاطري...لا ترديني...
عفرا :زين..
قربت حمده الصينيه على ريول عفرا وقعدتها عدل ودخلت ايدها ورا راس عفرا..واكلتها بنفسها...
عفرا تصد بويهها: بس يكفي..
حمده: شو يكفي احمدي ربج هالعرض ساري المفعول لفتره قصيره جداً..
عفرا: انزين بس يكفي ..
حمده: اوكي اخر لقمه والله..
عفرا: اووه حمده راسي مصدع طلعي..
حمده: خلاص بس والله بطلع بس شربي الحليب كامل...
عفرا تيره وتشربه كامل ..طالعتها حمده وابتسمت..
حمده: فديتج اختي الله لا يحرمني منج...
عفرا دمعن عيونها لاول مره تكون قريبه حد التنفس من اختها...
عفرا تصيح: مشكوره حمده...
يرتها حمده بقوه ولوت عليها وتمن كلهن يصيحن...حمده وايد كانت خايفه على اختها الوحيده وعفرا كانت تحس بوحده شنيعه يوم بدريه توفت وما قدر حد يغير مزاجها..حتى حمده للحين بس سيطرت على احساس الحزن فيها لثواني معدوده...ويمكن تنتكس عفرا اكثر من قبل....
.................
روحت الناس على الساعه 11:30 وما تم حد غير ام راشد وليلى اللي كانت في الصاله ويا خوات حصه وامها...وعقبها نشت ام راشد..
ام راشد تسلم على ام خليفه: السموحه جان قصرنا وياكم ونترخص الحين بنسير البيت..
ام خليفه: فديتج والله ما قصرتي يا غاليه ما يي القصور منج..تعبناج ويانا..
ام راشد: لا تعب ولاشي ان شاء الله باجر بييج من الصبح...
ام خليفه: لا تعبلين على عمرج وانتي تعبانه...
ام راشد: لا عبال ولا شي يالله ليلى نشي بنسير...
ونشت ليلى وسلمن عليهم وروحن البيت ...
عقب ما روحن دخل بو خليفه الصاله ووراه ذياب وعبدالله...يتعكز ويتسند باليدار وشكله هلكان على الاخر وحيله مهدود...
ونشت له شمسه ونوره وسلمى اللي ماشافنه من يوم وصلن وسلمن عليه...كانن خايفات يشوفن عبدالله وما يعرفن كيف بيقبضن عمارهن يوم بيسلمن عليه...بس عبدالله تجدمهن وسار يلوي على امه ويحب راسها وهي انهارت تصيح ولدها ما قدرت...
ام خليفه: فديتك فديت روحك ولدي حبيبي..
عبدالله وعيونه منترسه دموع: فديتج الغاليه شكلج تعبانه..سيري ارتاحي...
ولف على خواته وشاف شمسه وسار مبتسم يسلم عليها وهي صاحت يوم شافته مول ما رامن يوودن عمارهن عن الصياح وحالة عبدالله حاله وهو يشوف هالمناحه جدامه...وسلم على سلمى ونوره واستأذن منهم وسار حجرته...
بو خليفه سار الحجره ويا حرمته والبنات سلمن على ذياب اللي شكله كان وايد مستحي من شمسه يدري بها ما تداني حركاته..ويلسن في الصاله وياه وساره استأذنت وروحت لبيتها وخليفه تم ويا خواته..ونزلت حصه من فوق ويلست وياهم عقب ما سارت تشوف سمر رقدت ولا بعدها في الحال اللي فيه...
.
.
في حجرته نزل سفرته وعق الكندوره على الشبريه وانسدح وتنهد من قلبه وهو مبند الليتات ومغمض عيونه...هني يقدر يصيح ويفرغ دون محد يشوفه..هذي الليله الاولى مرت اصعب من الصعوبه بطيئه ثقيله على القلب..عيل كيف بتمر الليالي الباقيه...؟؟
مغمض عيونه ويحاول يفكر بأي شي غير صورة الكفن الابيض وهو مغطنها...بس مب راضيه تخوز عنه..يحاول يتذكر أي شي بس صورة الكفن وهي فيه ماطاعت تسير عنه لحظه...ومن بين دموعه يسمع حسها وكلامها وكل شي من بينهم...واخر شي تذكر موقف السياره اللي من بينهم وهم سايرين بوظبي اول امس...
بدريه: زين انا بحط لك اغنيه..
عبدالله: اوكي اتريا بس ان ما عيبتني بعق عمري من الدريشه..
بدريه وهي تدور الشريط: بسم الله على عمرك..ان شاء الله انا ولا انت..
عبدالله: فديت عمرج لا انا ولا انتي..بعدين اذا صار بج شي لا سمح الله..انا بتخليني لمنو؟
بدريه: فديتك والله ما بخليك لحد لان عمري ما بخليك...
عبدالله: لا بصراحه وين بعيش وانا اسمع كل هالحب..لازم هذي يبا لها دعمه...
بدريه: تعوذ بالله من ابليس شو دعمه انت الثاني بعد...
عبدالله: ما حصلتي اللي تبين...
بدريه: اشوف شو عندك وعقبها بختار وبحط لك اغنيه حلوه...
عبدالله: وانا اتريا...
بدريه: الله لقيت شي حلو...اسمع بحطه لك بس مب اغنيه هي قصيده بس وايد روعه...
عبدالله: يالله حطيه..والله انتي تحفه تهديني اغاني من سيارتي..
صاح عبدالله لين ما قال بس..ولو نطقن ضلوعه اشتكن وقالن بسك صياح وعذاب..حس انه مخنوق وبينفجر من ضيجه..والحزن اللي فيه...
خلاص لازم يقنع نفسه بعيد عن الكل انه بيعيش وحيد ومهما كابر لازم يثبت للناس انه بدون بدريه ولا شي ولكن الحب اللي كان ولازال من بينهم بيعطيه قوه ابديه ما تخليه للحظه يضعف...
.
.
في الصاله..بعدهم يالسين كلهم ويا ذياب سلمى وشمسه اللي ين بناتها وطلعتهن فوق وريلها ما طاع يرقد في بيت ابوها وسار حجز له غرفه في فندق ببوظبي وكان بياخذ العيال وياه بس ما رضى يسير وياه غير يوسف..اما بطي وبدر يلسوا ويا شمسه ببيت يدهم...طبعا بدر رقد في الميلس من التعب ويابنه البشاكير وودنه حجرة ذياب والبنات رقدن في حجرة امهن فوق...اما بطي اللي كانت حالته حاله لا هو بقادر يصيح ولا هو قادر يشوف خلق الله..كان بيرقد في الميلس بس كان حمد راقد هناك...وحاول يقول لخاله عبدالله يرقد وياه بس استحى وحس انه يمكن يبغي يتم بروحه فدخل الصاله على خالاته ويلس وياهم بويه يقطع القلب...
شمسه بحزن: تعال بطاي فديت ويهك...
بطي بحزن: لا عادي امي بيلس هني..
سلمى: ذياب كيف كان عبدالله جدام الرياييل...؟
نوره: هيه ذياب خبرنا..
حصه تطالع تتريا ذياب يرمس..
ذياب: شو بعد عادي كيف كان يعني..؟ ما صاح ولا شي كان وايد قوي ومتماسك...اللي صدق يكسر الخاطر حمد ولد عمي صدق لاول مره اشفق عليه لو تشوفنه كل شوي يكح وجنه روحه بتطلع وينش الحمام كلما رمسوه وشافه بدر ولد شمسه وهو يصيح ومتسند على يدار حجرة الضيافه..
حصه تقطع قلبها وما قدرت تتحمل كل هاللي تسمعه...ودمعن عيونها جدامهم وصاحت شوي...
سلمى: عوذ بالله منه..ربي يجازيه في اخته على اللي يسويه...
شمسه: غربل الله ابليس الحين بيعقل هذا ولا ناوي يجتل حد فينا وتهتز نفسه..
حصه بصوت مخنوق: لو الله يجازيه على اللي يسويه وخذ عنه اخته عسب يكون وحيد..شو ذنب عبدالله اخوي؟ الله لو يبى يعاقب حمد ما بيرمي بذنوبه على غيره..ربي ماعنده لف ودوران وما يحاسبنا على اخطاء غيرنا...
نوره تهز راسها بأسى..وبطي تعب من هالحشره ..
بطي: خالي ذياب تعال بنسير نرقد..
ذياب ينش: شمسه ليش ما يبتوا سعود..
شمسه: واعليه عليه ولدي عليه امتحانات الفاينل بالجامعه مب فاضي..
سلمى: وييه محد شاف عفاري شو مسويه...
بطي: ما دقت الكتب...
شمسه: شدراك؟
بطي رحنا فلة خليفه انا ويوسف وبدر نشوف البنات ونسلم على حمده وعفرا..بس قالت حمده انها راقده وما تبى تشوف حد...وابوها قال ماتروم تسير باجر خايف عليها وبيسير المدرسه يقدم لهم عذر ان عمتها متوفيه وبتقدم دور ثاني في مادة باجر..
نوره شهقت: مسكين عفرا والله بتخسر كل شي دراستها وعمتها اللي تحب الله يعوضنا ويعوضها كل خير ان شاء الله...
شمسه: يالله نشوا خلنا نسير نرقد باجر ورانا نشه من فير الله...الناس ما بتخلينا لين ماتمر ثلاث ايام على العزا..
وهم ناشين دخل خليفه وويه معتفس يتحرا حرمته في البيت...
خليفه يطالع عقب ما سلم: وين ساره؟
شمسه: سارت البيت...بلاه ويهك جي...
خليفه بصوت مخنوق: ولد عمج الله يهديه...
حصه بخوف: شو فيه؟
خليفه: منهار وحالته حاله..والله اني خايف يستوي عليه شي..صدق متحطم...
نوره دمعت: الله يكون بعونه..
شمسه: الله يهديه ان شاء الله انت شو سويت له.؟
خليفه: حاولت وياه بس صدق منهار وحالته تعبانه ويكح بقوه اخاف الا ييه ضيج وما يروم يتنفس...
شمسه: بطاي فديتك سير ارقد عنده..
بطي : ان شاء الله..
خليفه: لا بطي خله لروحه هو يبا جي..انا قلت له بتم عندك بس ما طاع...تصدقين ان ما ذاق شي ولا كل ابد...على لحم بطنه للحين..غير يوم ابويه رفج عليه العشا يشرب كوب شاي يهدي ويع راسه...
حصه تصيح وما قدرت تتحمل وكل هاه ينقال جدامها...وسلمى طلعت فوق...وعقبها خليفه روح عنهن بيته....
ونشوا كلهم طبعا حصه راحت حجرتها وهي منهاره تفكر في ولد عمها المسكين اللي اكيد قلبه متقطع وبيموت من الهم..ويلست في الحجره ماياها رقاد وقضت الليل بطوله في الصياح....وتلوم عمرها وتتذكر بقايا رمسته في المستشفى وحالتها وحالته لله...
...................
اليوم الثاني عقب ما نشن البشاكير الصبح يرتبن البيت عقب العفسه اللي صارت امس..رتبن صالات البيت الاماميه وصالة الضيوف...ورتبن المصاحف مكانها عسب العصر يوم يين الحريم يقرن منها...الساعه كانت 7:30 الصبح وكلهم رقود ومحد سار دوامه...لا الرياييل ولا عفرا اللي ودرت امتحان اليوم...حصه نشت من وقت ونزلت الصاله ومحد كان ناش هالحزه الا هي والبشاكير وهالشي ريحها اكثر...
طبعا ما رامت تقبض عمرها عقب كل اللي سمعته امس واللي حمد عايش به...وسارت ويا البشاكير بحجة انها بترتب وياهن الميالس قبل يوون الرياييل...واول ما وصلت هناك كانت ميته من الزيغه لا يي حد من اخوانها ويشوفها...بس تشجعت ووايجت وشافة حمد يالس لروحه متسند بظهره على الكنب وسرحان وعيونه في عالم ثاني من الالم والتعب والحرمان...ضايج وحالته حاله...تنهدت وهي تتمنى انها ما تسمع شي يسم البدن منه...واستجمعت قوتها ودخلت بتسلم عليه وما تقدر انها ما تعزيه في اخته الغاليه اللي راحت عنه...كان قلبها يرجف لانها دخلت وهو ما التفت...صدق حسته ميت ووقف مكانها من الزيغه ..وهي تشوف عيونه ذابله وشكله مول طول الليله ما رقد وهي ما تدري انه رقد شوي ويوم اذن الفير صلى في البيت وما رقد عقب الصلاه للحين....
دخلت وسلمت ويلست على الطاوله اللي مجابلتنه ناسيه العالم والناس....
حصه بتردد: عظم الله اجرك حمد..
وهو ما رد لانه بعده حاقد عليها من كثر ماهو حاقد على نفسه حول حقده على حصه..ومن كثر ما حسس عمره بالذنب يشوف في حصه الذنب كله....
حصه وهي تطالعه بلعت ريجها من شكله اللي غادي يزيغ من العذاب اللي معذب نفسه...
حصه وهي تستجمع شجاعتها: ادري انه محد يعوضك بدرية ... وان محد يحبها كثر انت ما تحبها ... وانك تلوم نفسك على اللي صار ... بس اللي تسويه ما بيردها ... بدرية كل من عرفها حبها ... بس هذا قدرها ... انها تخلينا وتروح ... وتعذيبك لنفسك يعذبها ... لانك اكثر واحد تحبه في هالدنيا وانت تدري هالشي....
ما رد عليها حمد وصد بويهه عنها صدق كان اكثر شي مزيغنه لا تطيح منه دمعه وتخونه وينكسر جدام حد..ومنو هالحد حصه....
حصه وهي تحس عمرها مخنوقه: كنت اظن انك اقوى من جيه ... كنت اتوقع ان عبدالله اللي ينهار يموت بعد بدريه ... بس عبدالله احتسبها عند الله
وهي حرمته والوحيده اللي له بس مع هذا صبر وانت منهار..انا كنت افكرك اقوى عن جي...
حمد كان يغلي ومحترق ويحس دموعه بيطيحن وده ينش يسوي أي شي في حصه يذبحها يقطعها يدعمها بس لا ترمس جدامه ما يبى يسمع شي..روحه مب مصدق كيف خلق الله روحت من عندهم امس واختلى بنفسه شوي...
حصه بحزن: وباللي تسويه تعذب عبدالله يا حمد ما يكفيه ان بدريه راحت عنه للابد وخلته وهو اللي ما يروم يصبر عنها ... ارجوك يا حمد عشان عبدالله وبدريه وعشانك بعد...
حصه تمت تطالعه وتشوف سكونه اللي يقهر...وهو صاد بويهه عنها ويشوف فيها كل الذنب...
حصه وعيونها كلها دموع: تريد تلومني ... اوكي حمد لومني ... اذا هالشي يريحك انا ما عندي مانع ... على الاقل اذا ما اسوي هالشي عشانك فأنا اسويه عشان بدريه ... عشان الانسان الي حبته بدريه وخلتنا نحبه وياها .. لا تخلي الناس تصدق انك سبب موت بدرية لا تعطيهم مجال يلومونك...
عيونها كانت منترسه دموع بس كابرت وحمد كان نفس الشي بس مسك عمره جدامها ما يبغي يصيح...
ونشت من عنده بتسير بسرعه قبل لا يوون اخوانها ويكسرون راسها ولا حد يرتكب منهم فيها جريمة قتل لو يشوفونها في الميلس وهي تخاطر هالمخاطره..ويوم ظهرت عند الباب وقف شعرها كله وحست بقشعريره في كل انحاء جسمها...وقلبها انتفض بقوه وهي تسمعه يزقرها..
حمد وهو ياي صوبها: حصه وقفي شوي...
وهي ردت تتأكد انه صدق زقرها..ولفت وراها وشافته ويهه بويهها وعيونه بعيونها...شافت عيونه تغرق بالدموع...وهي نفس الشي...
حمد بحزن فضيع: حصه انا اسف ما كنت اقصد أي كلمه قلتها بالمستشفى..صدقيني والله...وصدقيني لو ما كنتي قريبه مني ما قلت لج هالكلام..وانا ادري انه عقب المرحومه محد ممكن يتحملني غيرج...اسف واقولها لج للمره الثانيه...ما كنت اقصد أي كلمه وكنت في لحظة غضب...
طبعا حصه عقب ما سمعت هالرمسه ما ردت عليه بكلمه وطلعت وهي تصيح سايره البيت وهو رد الميلس لاحزانه بس بعد حس عمره ارتاح يوم اعتذر لحصه...وحس انه صدق ظلمها وياه...
"مالها ذنب في أي شي صدق اني ظلمتها...محد ممكن يتحملني ويتحمل تصرفاتي غيرها..والله يا حصه اني متلوم فيج فوق ما يمكن لخيالج انه يتصور.."
ورد ييلس مكانه وقبض المصحف بيقرا له شوي لين ما يوصلون الرياييل...
...............

ترقبو اخوكم البدوي الحبوب في الحلقه العشرون ...

اختكم
الغلا

[الجنيبي]

السلام عليكم ورحمة الله وبركاته


مشكورة اختي الغلا على هذا الجزء
ونتمنى التكملة بسرعة


والسموحة

[البدوي الحبوب]

الحلقه العشرون

كان اليوم اخر ايام العزا..الكل يحاول يتأقلم مع الوضع رغم ان اكثر شي كان مسبب لهم الخوف هو ثلاث حالات هي عفرا وعبدالله وحمد..بس اللي مطمننهم في الموضوع ان عبدالله كان قوي الايمان متماسك وكان يحاول بعد يطلع حمد من عزلته وينهي خوفه والمه..رغم ان هالشي كان صعب وصعب جداً...والعصر البيت كان منترس بالحريم بعده للحين..وليلى وامها وحريم اخوانها راشد ومبارك وياهم في العزا من اول يوم...وعند المطبخ كانت ليلى واقفه هي وحصه..

حصه:شفتي منو يا؟

ليلى: لا منو؟

حصه: خالتي ام ناصر..

ليلى: قولي والله..

حصه: هيه بعد ما تبينها تيي ليش؟

ليلى تبتسم: ما قلت شي..

حصه: وفي حد ثاني بعد...

ليلى: منو بعد.

حصه: خطيبة ناصر وامها..

ليلى شي عور قلبها بس ابتسمت: برايهن..

حصه: بتسلمين.؟

ليلى: لاء..يالله تعالي نسير نشوف خواتج..

حصه: يالله..

وطلعن الصاله بس غصب عنها ليلى كان لازم تسلم...ومرت على الحريم وسلمت على عمتها ام ناصر اللي تمت تطالع بنت اخوها وقلبها يعورها عليها وبعد تحس بشعور غريب صوبها وجنها مفتشله منها...

ام ناصر تير ليلى تيلس حذالها: شحالج بنتي..عساج بخير..يالله يا ليلى من متى ما شفتج؟

ليلى بقهر: هيه والله يا عمتي محد منعج لا تيين تسلمين على عيال اخوج..

ام ناصر منحرجه: الله يكون بالعون يا بنتي..

ليلى: شحاله خالي بو ناصر وشحال فهد..؟

ام ناصر: بخير كلهم بخير فديتج...

ليلى بثقه: هيه ولو ان الوقت مب مناسب بس مبروك خطبة ناصر وعقبال فهد ان شاء الله..

ام ناصر حست ان ليلى تنغزها بالرمسه: الله يبارك فيج عقبالج بنتي..

ليلى: ان شاء الله قريب عمتي قريب..

ام ناصر تبتسم: هاه بشري شي في الطريج ولا بس رمسه..

ليلى بغرور: عمتي انا مب شينه محد يبغيني..ولا اتم محيره لحد..عمتي ما ابغي اعرس انا امي كبيره وتحتايني اكون حذالها..

ام ناصر مستغربه من اسلوب ليلى الجاف وياها: الله يعطيها العافيه..

ليلى تنش وهي تهمس لعمتها: نحن في عزا هب وقت سوالف العرس...

وسارت عن عمتها وهي تحترق من داخل..كيف يقدرون يتصرفون ببلاده وبرود وانهم مب مسوين شي...ومشت بتسير الصاله الثانيه وعلى الطرف شافت امها يالسه حذال ام اروى واروى حذال امها...

ام راشد تزقر بنتها: ليلى تعالي..

ليلى في خاطرها"هذا وقته يمه" وتقرب من امها..

ام راشد: سلمي على خالتج ام اروى...

وتسلم ليلى عليها...

ام راشد تأشر على اروى:هذي اروى بنتها ..خطيبة ولد عمتج ناصر..

ليلى منقهره من امها وتسلم على اروى: اهلين اروى شحالج.؟

اروى مبتسمه: الحمدلله شخبارج انتي..؟

ليلى: بخير..

اروى مبتسمه: ليلى اخت عايشه صح؟

ليلى:هيه..

وتمشي ليلى بتسير عنهم: امايه بسير داخل عند البنات...

ام راشد: برايج غناتي...

اروى بعفويه: ليلى الله يخليج طلعيني من ميلس الحريم بموت بيقطعوني بنظراتهم..

ليلى بقهر: وين تبين تسيرين؟

اروى: وياج أي مكان..عادي اسير داخل ويا البنات..؟

ليلى: اوكي تعالي...

اروى كانت بعفويه ترمس ليلى اللي ما كانت طايقه تشوف ويهها...اروى ما تدري بشي ولا تعرف ان هاللي وياها هي ليلى اللي خذت منها اروع حلم عاشت به في حياتها..ما تدري اروى انها بلحظه سريعه هدمت بمعول براءتها كل احلام ليلى وقلاع الحب اللي بنتها طول 13 سنه...

اروى بخجل: ليلى انتي تعرفين ناصر عدل..؟

ليلى خلاص بتنفجر: ولد عمتي ليش ما اعرفه.؟

اروى: زين يي بيتكم..؟

ليلى: لاء..

اروى: اقول وين بنسير...؟

ليلى منقهره: بوديج عند البنات..تيلسين وياهن..

اروى: لا الله يخليج ما اعرف حد خلج وياي لا تسيرين..فضيحه..انا قلت لامي مابا ايي بس هي لزمت علي وقالت قريب بتغدين حرمه تبا تعودني على مخالط الحريم..

ليلى طفح الكيل عندها: بس انا مشغوله وربيعتي ضايجه لازم ايلس وياها..البنات هني طيبات سولفي وياهن وبيسولفن لج..

اروى بخجل: والله استحي..

ليلى تنهدت: اوكي بوديج وياي ويلسي وياي انا وحصه..

اروى بفرح: مشكوره ليلى والله انج طيبه..الا ناصر عمره ما خبرني عنج..

حست ليلى قلبها يتنافض من القهر..ودها تصفعها تراها مب متفيجه لخبال هالياهل...شو يبا بها ناصر كيف فكر يبديني عليها...؟

ليلى تعرف ان اروى احلى منها بمليون مره وان ملامحها طفوليه وبريئه الشي اللي ممكن يحبب أي انسان فيها حتى لو كان يكرهها..على عكس ليلى اللي كانت ملامحها بسيطه وعاديه بس بنفس الوقت فيها جاذبيه قويه والاكثر ملامح ليلى الطيبه والحنيه اللي في نظراتها تخلي أي حد يحبها على طول...

الف سؤال دار في راس ليلى وهي تمشي ويا اروى لين ما وصلت الصاله الثانيه الي فيها شمسه وحصه وخواتهن..حصه يوم شافت ليلى بطلت حلجها وتمت تطالع ليلى وهي خلاص مب رايمه تيود لسانها ما تتخبر شو الي صار في الدنيا بس ليلى من القهر طنشتها ويلست وياهن...

شمسه تطالع ليلى ان منو هذي..؟

ليلى مبتسمه: هذي اروى بنت هزيم بن سالم..

نوره: اهلين حبيبتي شحالج..

اروى متقطعه من المستحى: بخير..

سلمى منبره من جمال اروى: ماشاء الله عليها...

شمسه: ماشاء الله كبرت والله اخر مره شفتها فيها كان عمرها 4 سنين بل عمر ما نتشاوف نحن واهلنا..

اروى: انتوا تعرفونا.؟

شمسه: هيه امي كانت تزوركم ترا خالج بو ناصر يستوي ريل خالتي..

اروى: هيه..

حصه تطالعها: انتي خطيبة ناصر صح؟

اروى مستحيه: هيه...

شمسه بطلت عيونها على الاخر هي ونوره وسلمى..صدق انصدمن من الخبر..ما توقعن مول ان ناصر يخطب حد غير ليلى..لو انهن ما يدرن انه يحبها بس الكل يعرف انه هو اللي بياخذها طالت المده ولا قصرت...

شمسه مصدومه: والله؟؟

اروى: هيه...

نوره بعفويه: احيد ليلوه خطيبته مسرع غيّر..

حصه تتدارك الامر: لاء ما خطب ليلى بس جي ....

حصه ضيعت ما تعرف شو تقول....

اروى ببراءه: لا انا اللي خطبني مب ليلى..يمكن اختلط عليكن الموضوع...

ليلى انفجعت من هالرمسه...ودها الارض تبلعها ولا تسمع اللي سمعته..ليش يخبرونها هي ما يخصها..

سلمى وهي تنش بتييب ماي: عادي الرياييل يسوونها مب مشكله اليوم يحبون فلانه وباجر يعرسون بعلانه..

اروى ما تعرف شو يقولن هذيل بس كل اللي سمعته ان ناصر خاطب ليلى والي فكرت به بسرعه انها بنت خاله اكيد..انحرجت اروى وما عرفت شو تسوي وما حبت تنش عسب ما يحسن بشي..بس الاكيد انها تمت تحترق من داخل..
"معقوله ناصر يقص علي وما يحبني..اصلا هو ماقال يحبني ليش خطبني دامه يبغي بنت خاله ليش؟"

كانت عبرة ظلم خانقتنها وما تعرف شو تسوي وتتريا متى تيي امها تزقرها عسب تروح عن هالناس اللي جرحوا احساسها المرهف...

ليلى وايد افتشلت من كلام نوره وحست بقهر..وحصه بعد حست في ليلى اللي غيرت الجو على طول..ليلى غمضتها اروى رغم انها تشوف فيها عدوه..بس بعد كسرت خاطرها مالها ذنب هي الثانيه يحطمون احلامها اذا ما كانت تعرف شي...

ليلى: اروى انتي مخلصه دراسه صح.؟

اروى بحزن: هيه..

ليلى: ليش ما كملتي دراسه عليا...؟

اروى: حبيت ايلس في البيت اعرف ابويه ما بيخليني اشتغل عسب جي قلت اوقف ولا اتعب عمري..

ليلى مبتسمه: لو درستي احسن محد يضمن الدنيا...

اروى: مابغي ادرس خلاص شهر تسعه بعرس وريلي بيقوم بالواجب..

ليلى انقهرت منها: اها اوكي الله يتمم بخير..

ليلى في خاطرها ..

" مسكين حالج بتاخذين واحد هانت عليه 13 سنه حب..كيف بتضمنينه من يوم ولا يومين.."

وتمن يسولفن لين ما زقروا على اروى وروحن البيت هي وامها..وليلى تمت في بيت بو خليفه هي وامها لليل مثل كل يوم..وطبعا هاي كانت اخر ليله في العزا ومن باجر بتخف الزيارات...
................

الساعه 11:30 الليل كان يالس يرتب ثيابه في الاكياس اللي كانن فيهن...خلاص الحين بيرد شقته ما يبغي ييلس هني حس عمره ثجيل والمفروض يرد بيته...وعبدالله يحاول يقنعه يتم بس ما رضى..

عبدالله: يعني مصمم على رايك..؟

حمد: خلاص عبدالله ابغي ارد الشقه ودوامي مودرنه من متى..

عبدالله: الله يهديك يا حمد قول امين..

حمد: امين..الا انت ما بترد دبي..؟

عبدالله بحزن: باجر الصبح بتحرك من هني..

حمد حاط ايده على كتف ولد عمه بقوه: قوي عزومك الله يوفقك..

عبدالله: يميع ان شاء الله...

ونزل عبدالله ويا حمد وسار وياه لين موتره...

حمد: عبدالله بغيتك في شي؟

عبدالله: امر ..

حمد: ازقر البنات بسلم عليهن..

عبدالله مبتسم: لاء ما بزقرهن..(ويره من ايده) تعال سلم عليهن كلهن داخل..

حمد حط اكياسه داخل السياره وسار ويا ولد عمه البيت العود ودخلوا الصاله وكانت فاضيه محد فيها...ويلس حمد على الكنب اللي مجابل الباب..وظهرت له ام خليفه ويلست تسولف له شوي عقبها خلته ودخلت ترقد..وعبدالله طلع فوق يزقر شموس والباقيات..ونزلن بسرعه يسلمن على ولد عمهن الوحيد..وييلسن وياه..كلهن نزلن شمسه ونوره وسلمى وحصه وسمر..

وعقب ما سولفوا شوي ..

شمسه مبتسمه بحنان: الحين بتودرنا وبترد شقتك هاه..ما عيبتك اليلسه هني..

نوره:هيه ما يبغينا مب من مستواه..

شمسه: ونه عاد حمد ما يحب الاالمستويات الراقيه..

كانت شمسه ونوره يحاولن يغيرن مود حمد شوي ويستفزنه عسب يسولف..صدق ما عيبهن الانكسار اللي في نظراته..مب متعودات منه غير القوه والعنفوان..ومب مرتاحات لضعفه مول..صح يكرهن تصرفاته بس بعد ولد عمهن لازم يحبنه ويكسر خاطرهن....اما حصه كانت تغرق في بحر حزنه وتطالع ويهه الحزين بس ما ترمس..

سمر: حمد تم ويانا الله يخليك..عقب ذياب اخوي بيحس بالوحده..

حمد: اشتغل عندكم انا بيبي سيتر..هاللي ناقص بعد...!!!

هني سلمى انفجرت ضحك مارامت تيود عمرها: عمرك ما تتغير لو شو ما يستوي فيك..

عبدالله ابتسم وسار عنهم داخل..

حصه: عيل مرنا يوم تفضى وسلم...

حمد بحنان على حصه فضيع: بتداومين باجر؟

حصه: ان شاء الله وانت؟

حمد هز راسه انه هيه: عيل اشوفج باجر في الشركه..

نوره ابتسمت..وشمسه تطالع حمد..ودخل بطي الصاله ووايه خاله حمد وخالاته ويلس وياهن..هو وبدر الصغير..

بطي: وين خالي عبدالله؟

شمسه: دخل يرقد...

بدر: شو هاه من يوم يينا ما ذقنا شي من الحلويات مب حاله هذي؟

شمسه مبطله عيونها من هالملسون:بدر مافيك صبر..خلاص الخميس بنسافر شوتبغي من حلويات هني..هناك احلى واشيك..

حمد يطالع بدر بحنان: تعال وياي بوصلك الجمعيه...

بدر: احلف..؟

حمد: والله..

بدر: الله بسير الجمعيه...!!!

سمر: وانا بعد..

طالعت حصه سمر وكانت بتاكلها بعيونها: ايه وين تبين الساعه 12 ويا الريال...؟

حمد ابتسم: بس بشل بدر وياي..

ونش وسلم على البنات ووصل بدر الجمعيه وتشرا اللي يبى وعقب رده البيت وهو روح شقته على طول وراه باجر دوام...


في حجرته كان منسدح وراسه بينفجر من الصداع..وفي شي خانقنه ما يعرف شو هو..مب قادر يركز في شي..ولا يفهم شي..قلبه يعوره..رغم انه كان شوي يحس بالقوه والثقه وضامن اللي يبغي بس بعد كلما شاف اللي جدامه..يحس بهوان وضعف وانهيار وكل شي يخطط له يحس انه بيتبخر بلمح البصر...كانت الكلمات تتراقص جدام عيونه وهو يتابعها بأسى...

"خذ راحتك عيش الهنا عيش الوفا مع من تريد..عسى الليالي تسعدك وتهنى مع الجو الجديد...وغلاك عندي ما حسدك ما دامك انته المستفيد.."

وفي نفسه.

"صدق عادي عندها...تباني اعيش مع اللي ابغي او قصدي اللي يبغون..؟ صدق ليلى عادي اهون عليج..ما يهمج اكون مع اللي اكون ولا لاء..؟تهون عليج كل الايام اللي طافت وتتبخر بكل هالسهوله..بعد تبيني اخذ راحتي..؟ أي راحه يا ليلى بعيد عنج...صدق والله مالي راحه غير بوجودج..."

ورد يكمل قرايه...

" لكن ما خبي عليك ما عود لك مهما يصير اسلوبي وطبعي معاك من ما عرفتك ما خفا...اعاند القلب العنيد واوفي مع اللي هو وفا...اصفي مع القلب الصدوق لو في غيابي ما صفا"

ورجع يكلم نفسه مره ثانيه..

"عادي ما ترجعين لي مره ثانيه؟ مب كيفج اصلا ما تردين لي..ادري بي جرحتج بس مب للدرجه اللي تخليج تودريني..ليلوتي صدق والله عادي عندج تعاندين وتسوين اللي تسوين بس عسب تحرقين قلبي؟؟ والله صدق بعدني للحين مب مستوعب أي شي من الي مكتوب مب انتي ليلى اللي احبها والله اكيد حد مغير مشاعرج من صوبي.."

"..مبداي في الدنيا يقول الله على الظالم كبير...لي ما عرف معنى الهوى ولا ذاق تلويع الغرام...خلك قوي العاطفه صادق مع نفسك وضوح...ارحل مع جو الامل مالك في تعذيب الجروح..الله معك الله معك...من وين ما تمشي وتروح...لك قلتها خذ راحتك...دنياك عاشرها وسير.."

عوره قلبه وهو يقرا الابيات الاخيره..
" افا يا ليلى وانا اللي اعدج الغلا ومحد يسواج..تقولين اني ظالم وما اعرف تلويع الغرام..؟ عيل من متى عرفتيه انتي.؟ مب الا يوم من حبيتيني؟اه يا ليلى ليتني اروم ايلس وياج بس لين ما اقول كل اللي بخاطري وعقبها والله اني متأكد ما تخليني لو شو ما صار...وشو من وضوح تبيني اقوله لج..يعني شو اقول اكثر من اللي عطيت...حبيتج من كل قلبي..واخرتها ظروفي جرحتج غصبا عني...وتكتبين فيني كلام قوي يقطع القلب وانا كل ذنبي محبتج؟ ليش يا ليلى..الحين هذي اخرة الحب..يا خساره والله..صدق ما هقيت تنتهي مشاعرنا بهالسهوله..انا صدق يبالي وقفه مع نفسي اراجع فيها نفسي واشوف شو اللي ابغي وشو اللي ما ابغيه وعلى الله اقدر اجمع نفسي بموقف وياج ويكون للزمن وقفه من بينا.."

تلحف ناصر عدل وحط الورقه تحت المخده..صار له ثلاث ايام وهو يقرا فيها..وكل ليله يعيد نفس الرمسه..ومايدري شو يسوي وشو اخرتها ويا نفسه اللي صدق عذبته....
...............

الساعه 12:00 الليل كان الوقت يمر بطئ بشكل مزعج...ماعاد يهمها شي غير الحزن اللي طوت نفسها فيه..خسرت كل شي حلمها الوردي بالتخرج..ونسبه خياليه..خسرت الانسانه الوحيده اللي حبتها..المره الوحيده اللي قررت تثق في انسان خسرته قبل تنهي بناء علاقتها فيه...

بدريه راحت وعفرا انتهت من الوجود...والكل يطلب الله ويرتجيه ان البنت ما يصيبها شي ولا تين عليهم....وفي الصاله اللي تحت في فلتهم..

خليفه يتنهد: خايف عليها والله..

ساره بخوف: شو نسوي يا خليفه والله البنت حالتها تزيد كل يوم اكثر عن اللي قبله..ما تطيع ترمس وان رمست صاحت..

خليفه: لا والالعن من كل هاه انها ما تبا تاكل وما تفكر تفج الكتاب مول..مب جنه عندها دور ثاني قريب...

ساره: شو رايك نسافر عسب تغير نفسها شوي..؟

خليفه: ما اقدر والله عندي التزامات وايده..

ساره: بس هذي بنتك..

خليفه: سافروا ويا ابويه وذياب..

ساره: محد بيسافر الناس محزنين..وانت بتسافر خلها تسافر ويا اختها.

خليفه: لروحهن؟

ساره: شو بعد لروحهن..خلهن يسافرن ويا عمتهن الخميس..

خليفه ينش: لا ماله داعي شو يعبلن على عمتهن ليش...؟

ساره: خليفه حرام عليك بنتك بتموت وانت مب هامنك..

نش خليفه وطلع فوق حجرة عفرا..ودق الباب بس محد رد وطلعت حمده من حجرتها وسلمت على ابوها..

خليفه: وينها؟

حمده مبتسمه: ابويه ادخل الباب مبطل..بس ما بترد عليك..

خليفه يلوي على كتف حمده:تعالي وياي..

حمده تضحك: اوكي..

ودخلوا على عفرا اللي كانت منسدحه ومتلحفه ولا ترد على حد...

خليفه يلس حذالها: عفاري..

عفرا لفت صوبه وطالعته: اهلين ابويه..

حبها على يبهتها: شو ما ولهتي علي..؟ ما تبين تشوفيني؟ كم يوم ما يلستي وياي..ولا كلمتيني..خلاص انا زعلان؟

عفرا تحاول تيلس: اسفه ابويه والله راسي مصدع ماروم اطلع من الحجره احس بضيج..

حمده: انا بخليكم وبسير حجرتي..عفاري من تبين شي خبريني..

عفرا تطالع حمده: لاء حمده تمي هني..

ابتسمت ويلست وياهم..

خليفه: عفرا تبين تسافرين؟

عفرا: لاء..

حمده: شو لاء كيفج هو..انا ما اقدر ما اسافر...

خليفه: عوقج هالسفر بتموتين ان ما سافرتي..غيرج ما شبر بحياته برا بوظبي...

حمده: والله مب ذنبي اذا الناس على قد حالها..الحين تباهم يقولون حمده بنت خليفه ما تسافر..بصراحه كبيره بحقي..وانت ما ترضى علي..

خليفه يضحك: الله يقطع ابليسج من بنت..ماشي سفر الا اذا عفرا تبغي تسافر..

عفرا: لا ابويه لا تربطهم فيني ان يبون يسافرون سفرهم بس انا بتم بيت يدي عند عمتي حصه..

خليفه: واهون عليج اسافر بدونج..

حمده: والله شكلي بسير الديوان ولا المستشفى اتأكد انا بنتكم ولا لاء..كل شي عفرا عفرا..وانا من الشارع لاقطيني..حشا محد مسون لي سالفه..

عفرا ابتسمت لاول مره من خاطرها من يوم توفت بدريه:فديتج اختي انتي شيختنا كلنا...

ابتسم خليفه صدق من قلبه وهو يسمع عفرا وحمده..

اما حمده راحت صوب الدريشه وفتحت الستاير وبطلت الجامه وتسوي روحها بتنتحر..

حمده مبتسمه: بصراحه انا ما اقدر اعيش اكثر من جي..عذاب عذاب يا ناس اذوب والله شو اسوي بحالي رومانسيه ما اتحمل...

خليفه يضحك ويغايض حمده: لا تعالي وين تروحين بعدين عفاري تم بروحها ليش..

حمده: ردينا لعفاري..يعني مب هامنك اموت بس اهم شي عفرا ما تم بروحها..

عفرا مبتسمه: لا اختي بعد ما استغني عنها..يكفينا موت وحزن ما اريد احزن مره ثانيه..

خليفه يتنهد: الله يجعلها خاتمة الاحزان يا بنتي..

حمده تبى ترد جو المرح: ابويه متى بتييب شهادتي؟

خليفه: شو متوقعه حمدوه قولي الصدق..معقوله تفشلينا وترسبين..

حمده بدلع: ابويه اذا يبت دور ثاني بنسافر هديتي اوكي..لان الدور الثاني في اول ثانوي انجاز بالنسبه لي..وان رسبت رسوب كلي وعدت اول ثانوي مره ثانيه..عقابي ما بنسافر هالسنه برا..بس بنسير نخيم أي بقعه...

خليفه: ما شاء الله يعني من الحين مجهزه هدايا الرسوب...عيل اذا نجحتي شو تبغين؟

حمده: اووه هاي يبالها سالفه..من الحين جهز عمرك عسب تقترض من البنك..بس لانك ابوي حبيبي ماريد اخسرك فقررت ما انجح هالسنه واوفر عليك...

عفرا: ان شاء الله بتنجحين..

خليفه: وانتي متى بتدرسين؟

عفرا: يوم احس نفسيتي اوكي بدرس..الحين ما اقدر...

خليفه: اوكي حبيبتي بس لا تنسين الماده مب بذيج الصعوبه الا هي احياء..شدي حيلج وان شاء الله على فبراير بتسجلين في الجامعه...

عفرا: ماروم من الكورس الاول؟

خليفه: تبين الكورس الاول بنخليه لعيونج من الكورس الاول...

عفرا: ابويه ابى ادرس الكورس الياي اللي بيبدا في سبتمبر اريد اشغل نفسي...

خليفه: ولا يهمج انتي تامرين...بس وين تبين جامعة زايد ولا الامارات.؟

عفرا: بفكر وبشوف بسأل شو الاحسن واللي شهادتها اكبر وبسجل..

خليفه ينش ويحبها على يبهتها: انتبهي لعمرج انا بسير ارقد وراي شغل وعفسه ماريد اسمع انج ما تاكلين واباج باجر تنزلين تسلمين على عمج العصر وتعزينه...تراها حرمته بعد لانه بيرد دبي اليوم ومب حلوه بحقج ما تسلمين عليه..وتسيرين عند يدج ويدتج بعد..مستهمين منج..

عفرا تتنهد: ان شاء الله ابويه..

وطلع خليفه وعفرا تمت ويا حمده تسولف لها حمده وتغير مزاجها....
....................

اول ما وصلن البنات الدوام خطفن على مكتب مشاعل بيشوفن وصلت ولا لاء..بس ما شافنها واللي صدمهن اكثر ان باب المكتب مفتوح والحجره جاهزه وفي حد بيوصل لها...

ليلى وهي تمشي مع حصه: تعتقدين بتوصل اليوم..؟

حصه تنزل نظارتها الشمسيه: ما اظن ..

ليلى بعد ما دخلت المكتب:ولهت على الدوام..

حصه تيلس: مب وايد والله الرقاد احلى...

ليلى: عبدالله رد دبي..

حصه: اليوم العصر بيروح..

ليلى: مفتشله من اروى والله..

حصه: ياخي بلى خبال قالت لي اروى..خليها تولي صح اني افتضحت من نوره بس عقب قلت خلها تعرف بتعاشر منو..

ليلى: بس بعد هي ما يخصها ومب مفروض نحاسبها على اخطاء ناصر..."ولا تزر وازرة وزر اخرى"...

حصه: من هالناحيه صح..ما عندي اعتراض بس من حقها تعرف ان ريلها كان يحب وانه ماشي ورا اهله..

ليلى مستغربه:وانتي شدراج انه مغصوب..؟

حصه: لا والله كل هالحب من يوم انخلقتي انتي وهو واخر شي تتوقعين ناصر يخون..انا حمد ما اصدق انه يخون..تبيني اصدق في ناصر..اللي بعده ما طلع من البيضه..ناصر البرئ الطيب المحترم اللي ما يغازل (وتغمز لها) ..

ليلى مبتسمه: اووه بعد تعرفين كل شي عنه..

حصه: لازم بعد... امه بنت عم امي...

ليلى: زين تتوقعين حمد داوم...؟

حصه تتذكر اللي صار بالميلس وتبتسم غصبا عنها:قال لي امس بيداوم..

ليلى: وين شفتيه؟

حصه: يلس ويانا البارحه بالليل قبل يسير شقته...

ليلى: شو صار وليش مبتسمه..؟

حصه تبى تحتفظ بتفاصيل اجمل لحظه في اصعب وقت لنفسها: ولاشي يالله نكمل الشغل..

ليلى: لا ما بكمل ابا اعرف شو اللي يخليج جي مستانسه.هاه بشري في شي..

حصه تبطل الملف: الله يهديج شو يستوي وبعدنا في العزا..

ليلى: امم زين..

ويرن تلفون المكتب وترد عليه حصه...

حصه تطالع ليلى: هيه موجوده اخليها تييك.؟..اها اوكي خلاص بحولك عليها انت رمسها بنفسك..

وحولت التلفون على ليلى...

ليلى: الو..

ناصر: السلام عليكم ..

ليلى انقبضت: اهلين وعليكم السلام..

ناصر: شحالج؟

ليلى: بخير وانت؟

ناصر: الحمدلله....ليلى..؟؟

ليلى: خير في شي.؟

ناصر: تعالي المكتب وما عليج امر ابغيج شوي..

ليلى بحزم:عن الشغل.؟

ناصر انصدم من سؤالها: هيه..

وبندت ليلى ونشت بتطلع..

حصه: شو يبغي..؟

ليلى بضيج: ما ادري...

حصه: كنتي وايد جافه والله..

ليلى: لا ما ناقص الا اخذه بالحضن واقوله شو تبغي يا حبيبي..برايه والله شوي اللي بيشوفه مني...

حصه: ايوه تعجبيني يا قويه انتي..

ليلى تبتسم: حشا حلبة مصارعه..

حصه تضحك: يالله سيري وابا اعرف ييبي معاج تقرير مفصل شو صار ما صار...

ليلى: ان شاء الله...

طلعت ليلى وهي تفكر شو يبغي وشو ممكن تقوله وشو ممكن يقولها..وكيف بترد عليه..وكيف بيقابلها...وكيف اصلا عنده جرأه يزقرها..شوي يبغي منها..بتقدر تجرحه..ما بتقدر..تقدر تقوله لو قال لها شي انه خاين وغلطانه في العمر اللي ضاع هدر وهي تترياه فيه...

تنهدت من قلبها وهي واقفه جبال باب مكتبه..وقالت في نفسها..
"بمر اشوف حمد هني ولا لاء"

وطلت براسها بس كان المكتب فاضي وهو محد...تنهدت ليلى من الخاطر..
"حليلك يا حمد والله رغم كل شي تكسر خاطري"


دقت باب مكتب ناصر وتحجبت عدل وترست نفسها غرور وثقة بالذات واستجمعت شجاعتها وخلت الوقار لها عنوان في دخلتها مكتبه..

ليلى: السلام عليكم.
ناصر نش: وعليكم السلام.

ليلى: هاه خير في شي ناصر..؟

ناصر يطالعها بنظره حنونه: يلسي ليلى برمسج..

طالعته بنظره بارده ويلست مجابل مكتبه: تفضل..
ناصر: ابغي ارمسج بشي مهم وسمعيني رجاء للاخر.
ليلى حست انه ما بيرمس عن الشغل: عن الشغل.

ناصر بقهر: مب عن الشغل عن شي ثاني..

ليلى تحاول تكون عاديه وما تنفعل مشاعرها: مثل شو يعني؟

ناصر: انتي وانا؟

ليلى مصدومه: شو بلانا؟

ناصر: ليش زغتي ماشي...بس ابغيج بكلمتين في خاطري...(ويتنهد)..

ليلى: ما عندي وقت..

ناصر: دقيتين بس...

ليلى: تفضل وراي شغل مب متفيجه اسمع أي شي...

ناصر: ما روم ارمس وانتي جي محرجه..

ليلى منقهره من بروده: اقولك مب فاضيه شو تبغي بسرعه عندي الف شغله...

ناصر بحنان: ليلى ارجوج اسمعيني...خلج هاديه الموضوع يحتاج الهدوء...

ليلى: تفضل يا ناصر تفضل.

ناصر: مشكوره بنت خالي..

ليلى تبتسم بسخريه....وهو طالعها بأسف.

ناصر بتردد: ليلى انتي تعرفين اللي صار..(يتنهد) ما اعرف كيف ممكن اخليج تصدقيني او كيف اقدر اخلي ثقتج فيني ترد...اصعب شي يوم نفقد ثقتنا في حد ونحاول نردها مره ثانيه...

ليلى تمت تطالعه بقهر...بس ما ردت عليه بتشوف شو اخرة الفلسفه...وهو تم يتعبث في الورق على المكتب..ما يعرف بشو بيكمل وهي هالشكل...بس حاول انه يقول اللي بخاطره عسب يرتاح..

ناصر: ادري كلامي ماله داعي الحين..بس والله ليلى انتي ما تعرفين انتي شو بالنسبه لي..والله يا ليلى محد يسواج عندي..ادري بتقولين جذاب وخاين وما عندي سالفه..بس والله ثم الله الظروف وكل شي اقوى مني..

ليلى طالعته بنظره كلها لوم وضحكت بسخريه: هه..

ناصر: مستحيل تصدقين ادري..بس انا لا ليلي ليل ولا نهاري نهار..ما اعرف كيف ممكن اصلح غلطتي ولا كيف بسوي ولا كيف ممكن ارد ثقتج فيني..بحاول بأي طريقه بس انتي ترضين....

ليلى بحزم تقطع رمسته: اقولك ناصر موضوعك ما عاد له في قلبي وجود..انا نسيته مثل ما انت بعت اللي كان...

ونشت من مكانها وكملت: نحن في شركه مب في ميلس ابوي الله يرحمه ترمسني في هالبقعه...اسمع يا ناصر لا تحاتي ما بدعي و ما بحقد عليك صدقني بالاخير مهما سويت تتم ولد عمتي حسبة....(وسكتت..بس ردت تكمل) وحسبة اخوي راشد ومبارك..ولا تتخيل اني ممكن اتمنى لك الشر في يوم...بس ابغيك تعرف شي واحد... ترا جرحك في خاطري ما بيبرى طول ما انا عايشه في الدنيا.. اللي سويته يا ناصر مب شويه...وانا مب طيبه هالكثر اني اسامحك..صدقني تهون علي كل الجراح..واقدر اسامحك على كل شي واي شي..بس الخيانه صعبه..والله صعبه يا ناصر..

ناصر: واللي كان من بينا مستحيل يغفر غلطه مالي ذنب فيها؟

ليلى خلاص ما تروم تواجهه ولا تقابل نظرة الضعف في عيونه اكثر:ناصر صدقني انا بعيش بك ولا بدونك كله عندي واحد...

كانت هذي الضربه القاصمه في قلب ناصر...والجرح اللي شكله ما بيبرا العمر كله...وفكر يكلمها عن سالفة انها تكون ثانيه ولو ان الجو المشحون ما يساعد.

ناصر بلع ريجه بألم: ليلى ابى اخبرج شي غير كل هاه.

ليلى تمشي بتطلع ومعطيتنه ظهرها وعيونها انترست دموع: ناصر انا عندي شغل.

وطلعت وصكت الباب قبل لا يشوف دمعه ممكن تكسر كبرياءها جدامه...وهو بدل ما يطيب جروحها زادهن اكثر واكثر...كانت كلمتها مثل السم الزعاف في قلبه ترنّ بقوه...تهز نفسه وكيانه...تتردد في روحه واركانه وضلوعه وحنايا قلبه..
" ناصر صدقني انا بعيش بك ولا بدونك كله عندي واحد..."



في حجرتها يالسه تسحي شعرها بسرعه بسرعه..وتلفه وهي مرتبكه وتسمع حد يزقرها من برا ...

سلامه: انزييين بيي الحين شو فيكم...

حمدان من برا يزاعج: والله بسير عنج...

سلامه: زين هذي انا طلعت..

وطلعت ويا حمدان وركبوا ويا الدريول خبر خير محد يدري وين سايرين الاخوان...

حمدان: بطني يعورني...

سلامه: انا ميته من الزيغه خلاص..

حمدان: شو تتوقعين راسب ولا ناجح..؟

سلامه: انت اذا رسبت انا بجتل نفسي معقوله كل هالدراسه وترسب انا الي بنتحر..زين شو تتوقع عني انا..؟

حمدان يبلع ريجه: ما ادري يمكن ناجحه..يا رب تنجحين سلامي..

سلامه: فديتك اخوي مستوي طيب..

وصلوا المدرسه وتلفون السياره ما وقف من الاتصال وليلى مب مخلتنهم في حالهم وكل شوي تدق لين ما وصلوا المدرسه..حمدان يالس يرمسها في التلفون...

حمدان بإرتباك: يا عمتي دخيلج خليني بنزل الحين وبشوف شو السالفه..انتي ادعي لي..

ليلى : ارجوك طمني عليكم اول ما تشوف الشهاده..

حمدان: اوكي ان شاء الله...

دخلوا المدرسه وشافت سلامه عبدالرحمن وسارت وين ما يشوفها حمدان ووقفت ترمسه...

وحمدان دخل يطالع نتيجته وهو يدور على الاساتذه كان المكان حشره واللي يرتجف واللي حالته حاله ميتين من الزياغ وهو في كل هالزحمه عينه تدورها بس وين يلقاها..مستحيل تكون موجوده ولو انه تم متعلق بخيط امل رفيع ان عفرا تكون بين هالجموع..ولكنه لمح حمده ويته على طول..

حمده: حمداني بطني والله بموت من الزيغه..

حمدان: اسكتي انا مب راقد من عقب الصلاه..

حمده: يا حيك انا والله ما سويت شي بس ارتجف..

حمدان مبتسم:هيه ترانا ما نحس بشي الا يوم النتايج..

حمده: الله يستر بس...

حمدان: وين عفرا..؟

حمده: الله يهديك شو تبا بعفرا...عفرا وين ونحن وين..عندها دور ثاني...

حمدان: ادري بس ليش مايت..؟

حمده: دخليك اسكت زين منها تنش تصلي وتاكل بالدز...لا حياتها حياه ولا دنياها دنيا...

حمدان عوره قلبه: الله يكون بعونها..

حمده: الا وين المس ما شفتها اكيد انا راسبه والله..وين سلامي..؟

حمدان: يمكن ويا بنات كلاسها انا ما شفتها من يوم دخلنا..

حمده: تعال وياي بنشوف المس مالتي وشو النتيجه..

حمدان: ماريد عقب يوم ترسبين تقولين ويهي نحس..

حمده مبتسمه وهي ترتجف من الزيغه: غبي والله ما بقول تعال...

حمدان يضحك: اوكي..

وساروا للمس اللي تدرس حمده وابتسمت يوم شافتها...

حمده: هالابتسامه وراها مليون كيكه حمرا ادريبج يا عيوز النحس مستانسه فيني..

حمدان ميت ضحك والمس تطالع مب فاهمه شي..وتدور شهادة حمده وطلعتها...

المس مبتسمه على الاخر وبلهجه مكسره: مبروووك همده u passed ...

شهقت حمده وحطت كفوفها على ويهها: مستحيل مستحيل اصدق والله مستحيل...

حمدان يضحك: مبروك حمده تستاهلين...

المس: really Hamdah u passed!!!

حمده دمعت: يااااااي والله بطير بطير ...خلاص مب رايمه ايود عمري..

وتمت تمسح دموعها وحمدان يطالعها مبتسم..ومشى عنها بيسير يشوف هو الثاني شو مخبص..بس هي يوم شافته سار لحقته على طول ما بتطلع لين ما تشوف نتيجته...

حمده: والله مب مصدقه شو مره وحده ناجحه يا ربي الحمدلله والشكر..زين وين سلامي الا اقول انت طلعت النتيجه..حمدان شو تتوقع تييب؟

حمدان يضحك: بلاج ما تيمعين..حشا ما بقى شي ما تخبرتي عنه..صبري وبشوف...

وساروا ويا بعض حجرة استاذ حمدان وشافوه يرمس واحد من الطلاب قبله فتم يتريا لين ما لف الولد وطلع طارق واقف وعيونه مدمعه طلع عنده دور ثاني وخلاص حالته حاله وهو كان حلمه يدخل الشرطه بس تبخر كل شي بلمح البصر...وسار حمدان للاستاذ وحمده تمت تترياه عند الباب..

حمدان: هاه استاذ بشر..؟

الاستاذ: انت في بالك ايه..ايه اللي ممكن تقيبوا...دا انت ما تعرفش الكتاب من اصلوا ولا بتعرفش حاجه وطول الفصل وانت نايم على الكراس..عاوز تنجح ازاي يا ابني...؟

حمدان تذكر كل لحظه لعب فيها وكل لحظه رقد وما اهتم لكتبه وعوره قلبه يوم يا وقت الندم متأخر وحتى تعبه في اخر اللحظات ودراسته في الوقت بدل الضايع ما يابت نتيجه وعرف ان كل شي يي بسرعه يروح بسرعه...تم ساكت وما رد على الاستاذ...

الاستاذ: معليش يا ابني ان شاء الله السنه الجايه حتعوضها..دا درس ليك عشن تاخذ بالك من وأتك..ولا ما بتعرفش ان الوقت كالسيف ان لم تقطعه قطعك...

حمدان مصدوم: يعني راسب نهائياً..ما عندي دور ثاني..يعني اعيد السنه...؟

الاستاذ بحزن: ايوه يا ابني هو انته تلعب طول الفصل وعاوز تنجح في يوم واحد..لاء دا ما بيصحش...

حمدان قلبه عوره وهو يتذكر تعبه في اخر الايام وكلام عمته وكيف خذل الجميع...

الاستاذ: امال البنت عفرا ما تعرفش ليه ما جاتش.؟

حمدان بحزن شديد على هالخبر النحس: عمتها توفت..

الاستاذ: ربنا يرحمها برحمته...دي علاماتها كانت حاجه خياليه والله العزيم...دي كانت حتبأ من اوائل الدوله بس ربنا وما يشاء..

حمدان: زين خلص هذربان شو اسوي الحين..

الاستاذ يطلع ورقه من ملفه: تاخذ الورقه دي وتديها لولي امرك يدبح لك فيها الليله قعود ومتنساش تعزمنا على الكيك والحلو..دا كان لينا فضل باللي وصلتلوا..

حمدان يطالع الورقه بسرعه ويشوف اسمه عليها من فوق حمدان راشد ناصر ..النسبه/ 80% انصدم وهو يطالع الاستاذ اللي كان ميت ضحك على ملامحه...ابتسم عقبها حمدان وصرخ بصوت عالي: ايييه الحمدلله الحمدلله...

ويلس يحب الشهاده وطلع عن الاستاذ وهو بيطير من الفرحه والدنيا مب واسعتنه....

حمده تنط: ياي حمدان مبروك مبروك والله تستاهل...

حمدان بفرح ما ينوصف: والله مب مصدق قلبي بيوقف...تصدقين الغبي تم ساعه يعزيني في شهادتي والحين اطلع ناجح اسميه واحد ما عنده سالفه...

حمده تضحك: غبي ما عليك منه...المهم اختك وين خلنا نشوف شو اخرتها...

حمدان: حرام يا رب تكون ناجحه انا ما بتكتمل فرحتي غير يوم افرح بأختي..

حمده: يا عيني على الحب..

وساروا يدورون سلامه وشافتهم ويت بسرعه وباركت لحمدان وحمده وهي ميته من الخوفسلامه: ما لقيتها للحين..

حمدان: انتي دورتي وينها..؟

سلامه: هيه توها ربيعتي يايه وما لقتها...

حمدان: يالله بنسير المسرح يمكن تكون هناك.

وساروا كلهم مع بعض...لين ما وصلوا عند المس اللي تدرس سلامه..اللي كانت ترتجف وميته من الخوف..

وشافت عبدالرحمن طالع وهو منزل راسه ويطالع الشهاده يقرا علاماته..كان ودها تروح تتخبره وتشوف شو ياب..بس للاسف حمدان كان واقف لها ما تقدر تطلع بدونه..وحمده حست شو تبغي سلامه بس ما خلتها ..شكل حمده تغيرت وايد من يوم توفت عمتها وما عاد يهمها الموضوع..ولا هالسوالف..

حمدان: سلامه روحي يالله...

سلامه: اوكي..

وسارت عنهم سلامه وحمدان تم واقف ويا حمده اللي يتها وحده من ربعها تخبرها شو استوى ومن نجح ومن رسب..

حمده: حلفي؟

ديما: هيه والله رسبوا

حمده: وحليلهم والله.

ديما: محمد راسب بالكامل ما عنده دور ثاني..
حمده: وعبدالرحمن.؟

ديما: عنده دور ثاني في الانجليزي...

حمده: الله يكون بعونهم..

ديما وتلفونها يرن: اوكي حبيبتي اشوفج السنه اليايه...

حمده: يالله باي...
وتسير عنها وترد حمده عند حمدان..

وتييهم سلامه مبتسمه..

حمدان: شو بشري؟

سلامه مبتسمه: شو تتوقعون؟

حمده: وين الشهاده اصلا؟

حمدان بخوف: ليكون راسبه بجتلج والله.

سلامه: تقول المس شهادتي للحين في الاداره ما اعرف ليش؟

حمدان: واشمعنى انتي يعني؟

سلامه: ما اعرف..

حمده: سلامي عن الجذب ارمسي..

سلامه تضحك وتصارخ: ياااااي فديتني نجحت نجحت هيييه بس كل علاماتي على الحفه....

حمدان يضحك: مبروك فديتج اختي الحمدلله بنفرح قد ما نقدر الحمدلله يا رب يالله نتصل بعمتي..
سلامه: فديتها اكيد تحاتيني..

حمده: اسمع انتوا..اتصل بأمك وابوك عقب عمتك شو تبغي بها..

سلامه: انتي ما تعرفين شي..

حمدان يرها عسب تسكت: يالله الدريول يتريانا..

حمده: حتى انا.
حمدان وسلامه : سلمي على عفاري..

حمده تطلع وتركب سيارتهم: يوصل يالله خلونا نشوفكم في الصيف..

سلامه: اكيد

وطلعوا ويا بعض وسارت سلامه وحمدان البيت واتصلوا بعمتهم اللي بغت تتخبل من الفرحه وما صدقت على الله خبر يرد للبيت الحياه والروح...فرحت لحمدان بس مب كثر ما فرحت لسلامه...اللي كانت ميته عليها من الخوف....بس الحمدلله كل شي عدا على خير....

في بيت بو خليفه..كان خليفه في الدوام بعده ما يا وبو خليفه واقف في الزراعه وام خليفه عنده...دخل الدريول ووياه حمده..

ونزلت على طول عند يدها تخبره وتلوي عليه من الفرحه..

حمده: يدي نجحت والله مب مصدقه...

بو خليفه مبتسم: مبروك مبروك بنتي...

ام خليفه: تستاهلين يا بنت خليفه يالله يفرحنا في اختج..

حمده تركض بهبل في الحوي: بسير انشر الخبر...يا فرحتي..مسكين حالك يا خليفه ولد مبارك...

بو خليفه: ليش مسكين؟

ام خليفه: مب جنه ابوج؟

حمده: ترا قال اذا نجحت بياخذ قرض من البنك اهداء لي..

بو خليفه: ما يسدج اللي عنده تبين من البنك بعد..

حمده: هيه بعد شو هو اللي قال وهو اللي يتحمل...

وسارت عنهم تتصل في ابوها مب مصدقه...وتمت تدق عليه لين ما رد عليها..

حمده: ابويه خمن...

خليفه: سلمي عوذ بالله من هالحس...

حمده تضحك: مب وقته..خمن..

خليفه: اخمن شو؟

حمده: يبت الشهاده ونك الحين ما تعرف شو اليوم.؟

خليفه يضحك: دور ثاني...

حمده: لا شي ثاني..
خليفه: عيل راسبه...

حمده تضحك من قلبها: الحين بذمتك برسب وبتصل ابشرك..

خليفه: ارمسي حمدوه شو يالله قولي..لا دور ثاني ولا راسبه..اذا ناجحه اسمحيلي ما صدق..

حمده: اقول ابوي انا بقول لامي من الحين تجهز شنطتها وتاخذ بس اهم الاشياء عندها والباقي تخليه للبيت..

خليفه: يعني بنسافر والسفر كان ضمن الدور الثاني يعني عندج دور ثاني...تحلمين اسفرج..مسودة الويه..

حمده: ودك تسفرني ..ابويه الحين بتقول لي حمدوه وين تبين اسفرج بسفرج بس انا ما ابغي اسافر الحين..

خليفه: وليش تبين امج تحول ثيابها واغراضها..؟

حمده: بنفلس ولازم نسير بيت يدي مبارك نعيش وياهم...من القرض اللي بتاخذ لي اياه..

خليفه يضحك: يا بنت الناس ارمسي عندي شغل هب فاضي لخبالج..شو يبتي.؟

حمده: ايه لو انا عفرا بتم تسولف لي لين باجر وما بتمل...

خليفه يغايض: عفرا غير وانتي غير..غير يوم وحده تكون نسبتها 99 والثانيه ما تنجح حتى..

حمده ميته ضحك: اولا عفرا نسبتها مب 99 لانها للحين ما قدمت وثانيا ودك اني ما انجح عسب تفرح لكن وغلاتك يا بويه اني ناجحه وبسير ثاني ثانوي..

خليفه خلاص ميت ضحك عليها: مبروك فديت ويهج حبيبتي ..تستاهلين اكبر هديه بيب لج كيكه وياي..

حمده: شو كيكه بعد والله ما ارضى ..اريد شي تم خلق الله ترمس عنه..

خليفه: اقولج باي جلبي ويهج مب فايج لج..

حمده: انزين ماعليه بترد البيت..

خليفه يغايض:انزين سلمي على عفرا..

حمده تضحك: ان شاء الله باي...

وبندت عن ابوها وسارت تخبر امها ووتتصل في ربعها تتنشدهم وتفاجأهم بخبر نجاحها الباهر...
..................

العصر الساعه 4:00 عقب ما صلوا العصر..نش عبدالله حجرته بيتلبس وبيظهر...رغم ان ابوه ما كان يبغيه يرد دبي اليوم...وعقب ما لبس طلع الصاله بيسلم عليهم كلهم..وعقب ما حب امه على راسها ..

ام خليفه وعبره خانقتنها: بتم لروحك يا ولدي هناك..

عبدالله يبلع ريجه بصعوبه: افا عليج الغاليه الله الحارس انا مب لروحي..

ام خليفه: بس بتم مستهمه عليك خلك ويانا..

بو خليفه: لو صبرت شوي وعقبها تروح مب الحين..

عبدالله مبتسم: لا ابويه ماروم والله عندي اشياء وايده لازم اسويها..

ام خليفه: استريح يا عبدالله لاحق على اشغالك..

عبدالله يتنهد: يا امايه خلص الوقت اللي احزن فيه وحزني ما بيرد غالييّ...المفروض اجابل شغلي واشغل نفسي بدل ما ادفن عمري بالحزن..

شمسه تسلم عليه وتحبه على كتفه:فديتك يا خويه الله يقويك ان شاء الله...

سلمى تسلم عليه: الله يحفظك عبادي..

نوره وهي تحبه: الله الله بنفسك من تبغي شي رد بوظبي ولا تنسى توكل على الله بيخفف همومك..

يته حصه تسلم عليه: عبادي الله الله بنفسك عاد وتعال بوظبي مب تم في دبي ترانا نتوله عليك ..

سمر يته تلوي عليه: اخويه حبيبي بوله عليك والله...

عبدالله مبتسم من سمر: والله انا اكثر...

وانفج باب الصاله بقوه ويت تركض بخبال: عمي عبدالله حرام لا تروح وتخلينا بتوله عليك والله..

عبدالله يحب حمده: هلا والله كان ودي اعرف نتيجتج قبل اسير بس يالله اكيد راسبه الله يعوض على اخوي..

شهقت حمده: انتوا ما خبرتوووه؟

كلهم مع بعض: شو؟

حمده: يدوه ما قلتي له عن الشهاده؟ افا يا عمي تسوي روحك ما تدري على العموم انت مسامح في الهديه ما ابغي شي منك..

شمسه: شو تخربطين انتي؟

نوره: خرفت...

حمده: انا نجحت والله..ما تعرفون..تعرفون ابويه ما رد للحين من الدوام يالس يعابل بالبنك ييب لي منه القرض بمناسبة نجاحي..

ولاول مره من صارت حادثة بدريه المشؤومه انفجر عبدالله وضحك من خاطره ضحك على حمده بنت اخوه صدق فطستهم من الضحك..

ام خليفه: اييه والله اني نسيت صدقها اليوم قالوا لي نجحت..

حمده: شو قالوا لج يدوه والله انا اللي خبرتج...

يلسوا يباركوا لحمده وعبدالله تم يسولف وياهن شوي وهم واقفين وعقبها استأذن بيروح...بس حمده تذكرت عفرا..

حمده: عمي اصبر شوي بعطيك شي قبل تروح...

عبدالله مستغرب: شو؟

حمده: دقايق..

وراحت تركض البيت ودخلت حجرة عفرا اللي كانت منسدحه وشبه غافيه...

حمده تيرها: عفاري نشي الامر عاجل..

عفرا بخوف: شو مستوي؟

حمده: بسرعه نشي نشي يالله الله يخليج..

عفرا تيلس: شو مستوي...؟

حمده: عمي عبدالله بيروح دبي يالله نشي سلمي عليه..

عفرا قلبها عورها: ما اقدر..بصيح ان شفته...

حمده: ياخي بلى افلام هنديه نشي بسرعه الامر مستعجل...

عفرا ردت تنسدح: ما ابغي..

حمده: عشان خاطري عاد..انا حمدووه اختج اللي ما فشلتج ونجحت..

عفرا تبتسم: قولي والله؟؟

حمده: هيه والله ييت بخبرج الضحى بس كنتي راقده...

عفرا: مبروك حبيبتي...

حمده: يالله نشي..

ونشت عفرا بسرعه ببجامتها القصيره وشعرها المفرود على كتوفها...وحمده تيرها تنزل ركض من على الدري..

عفرا تضحك: حمده شوي شوي كسرتيني..

حمده: اقولج عاجل انزلي..

وتمت حمده تسحب عفرا من ايدها وتركض بها في الحوش لين ما وصلت الفله...

حمده تدخل عفرا: المفاجأه...!!!!

كلهم طالعوا عفرا ونقلوا النظرات فيها ما شافوها من يوم الحادث...حتى يدتها وكل حد...عبدالله يوم شافها تم مبهت وحس بسكين تطعن قلبه...وهي يوم شافته بطلت عيونها وتمت تطالعه...كلهم يطالعون شكلها الذابل وعيونها التعبانه...بس عبدالله تذكر في قسمات ويه عفرا بدريه..وضحكاتها ودلعها وابتسامتها...

عبدالله يقرب من عفرا: هلا فديت هالويه شو هالمفاجأه الحلوه...!!

عفرا تسلم عليه: اهلين عمي شحالك...؟

عبدالله مبتسم: بخير وسهاله افا يالس كل هالوقت في بوظبي ما شفتج الا الحين.؟

عفرا بعبره خانقتنها: بس جي...تعبانه...

عبدالله حس ان نبرة صوتها تغيرت: ما عليه حبيبتي كل شي راح الله بيعوضه...

عفرا: ان شاء الله عمي..خلنا نشوفك...

عبدالله: اكيد ..

وحبها على راسها...وسار عنهم...هذي كانت بدريه تموت فيها...وتسولف له دايما عنها...لو كان عندهم ولد بيخطبون عفرا له...بدريه ما تبدي على عفرا حد..شيخة البنات دوم تسميها...

لف عبدالله على عفرا وهو طالع: شيخة البنات عفاري اتريا النتيجه واعرف انج بتبدعين ولج مني وعد انا اللي بخلص لج اوراقج وبتدخلين من اول كورس....

ابتسمت عفرا وعيونها منترسه دموع: ان شاء الله عمي...

روح عبدالله وكلهم يلسوا في الصاله يسولفون مع البنات وحمده جلبت لهم البيت ضحك واستهبال عاد محد يعرف يغير الجو غيرها...وعفرا على طول من طلع عبدالله سلمت على يدتها والبنات وردت البيت...وشافت امها في الدرب وابتسمت لها وردت بيتهم وساره راحت فلة عمها بو خليفه....

وترقبوا الحلقه الواحد والعشرين مع الاخت الــــــــغــــــــــلا

[الرايقه]

يعطيكم الف عافيه ونتريا البقيه يا الغلا ,,,

[الجنيبي]

السلام عليكم ورحمة الله وبركاته


مشكور أخوي البدوي الحبوب

على القصة الجميلة ورائعة



ونتريا منج اختي الغلا
الجزء الي بعده




وو السموحة


أخوكم الجنيبي

[البدوي الحبوب]

الرايقه صاحت هههههههه عيل انتي خلاص مب رايقه الحين

تسلمين على المرور وان شاءالله بعد بتصيحين اكثر واكثر

تحياتي لك


الجنيبي تسلم عزيزي على مرورك ويسعدنا تواصلك وتواجدك معنا

تحياتي لك

[خطافة الارواح]

مرحبااااااااااااااااااااااااا

يعطيكم العافية والله

بس القصة كم جزء اساسا

يعني بقى وااايد ولا شوية



وسلامتكم
@83@

[البدوي الحبوب]

خطافة الارواح

مرحبا فيج ومرحبا بمرورج وتواصلج اويانا

صراحه القصه طويله بس الباقي مب وايد وايد يعني

والاحداث الي بتصير في الاجزاء اليايه وايد حلوه

خلكم اويانا وتابعونا ...... تحياتي

[الرايقه]

وين البقيه ؟؟؟؟؟؟؟؟؟؟؟؟؟؟؟؟؟؟

[الغلا]

الف شكر للجميع على هالتواصل الراااااائع منكم ...

ولكم مني الجزء الــ 21 والسموحه عالتأخير

العصر نشت ليلى من الرقاد على طول شلت شيخه وغيرت ثيابها ومشطت شعرها القصير ونزلن تحت...وشافت امها وسلمت عليها..طبعا ام راشد الدنيا ما كانت واسعتنها من الوناسه..
ويلست ليلى قريب منها...
ليلى: قلبي بيوقف والله مب مصدقه..
ام راشد: فديتهم والله بغوا يتخبلون الصبح قبل يسيرون كل حد فيهم زايغ من صوب..
ليلى: امي انا بسير بيت راشد وبشوفهم مب رايمه اتريا لين ما يون..
تضحك ام راشد: سيري وخلي شيخه عندي..
شيخه كانت معصبه وما تبى ترمس حد: ماليدث..
ليلى: اوكي تعالي وياي..
ام راشد: بسم الله شو ياها...؟
ليلى تشل شيخه: ما ادري بها...
طلعت ليلى وهي شاله شيخه وياها بس شيخه كانت وايد ضايجه ومبين من ملامحها..
ليلى: شو فيج حبيبتي ليش زعلانه؟
شيخه:ماليد..
ليلى: منو مزعلنج؟
شيخه: اتي ما تلعبيني..
ليلى ابتسمت: ادري حبيبتي اني ما لعبتج من زمان بس اليوم بنلعب زين..
شيخه: بنلوح اث..؟
ليلى: تضحك هيه بنروح تويز ار اص باجر..
شيخه ابتسمت: بلوحنا..
ليلى: هيه يالانانيه بروحنا...
ودخلت بيت راشد وكان هدوء فضيع في الصاله..والليتات مبنده بس في ضو خفيف من الدرايش من ضو الشمس مضوي الصاله...اول ما دخلت انصدمت يوم شافت راشد واقف حذال ميلس الحريم ويأشر لها انها تم ساكته وما ترمس وتطلع برا...تمت تطالعه وهو يأشر لها بإيده انها تظهر عسب شيخه ما ترمس..طبعا ليلى طلعت برا وخلت شيخه في الحوش ودخلت عند راشد اللي يأشر لها ما تتكلم...وقفت حذاله وقلبها يدق بقوه مب قادره ترمس ولا تتنفس ما تدري شو يسوي اخوها...كان شكله محرج وويهه احمر من الغضب اللي هو فيه...وليلى وقفت تسمع وياه شو يستوي...
سلامه من داخل الحجره: انزين شو فيها حبيبي الا هو دور ثاني عادي تقدر تنجح...مب نهاية العالم..
هني انصعقت ليلى وحست بشلل في اطرافها وانها مب رايمه توقف اكثر عن جي..وراشد يأشر لها ما تنطق مول لين ما تخلص سلامه...
سلامه: انزين اقولك عندي فكره شو رايك تمر بيتنا وانا بحط لك الكتب في الزراعه وخذهن ادرس منهن....
وتسكت بس ترد تكمل: لا عادي بشوف لك يوم محد يكون في البيت او احسن شي في الليل يوم الكل يرقدون بنزلهن لك..
هني طفح الكيل براشد..ما قدر يمسك عمره..خصوصا يوم سمع حمدان نازل متلبس ومتسفر يدندن...فرحان..
راشد دخل الحجره ومسك سلامه ويعطيها كف يسنعها فيه بكل قوته وكانت اول مره يمد ايده على حد من عياله...طبعا سلامه انصدمت بهم كلهم حمدان وليلى وراشد...وطاحت السماعه وشلها راشد وسحب الواير وفر التلفون في الطوفه عسب ينكسر...
راشد قابضنها من ايدها بقوه: مسودة الويه تبين تحطين راسي في التراب...
سلامه ساكته ما قدرت ترمس وليلى مصدومه صدمه ما بعدها صدمه وحاطه ايدها على قلبها مستحيل تصدق ان هذي سلامه ابداً...
راشد يرها من شعرها صوبه: قليلة الادب مب منج من اللي مخلنج على هواج...وين تبين انتي.!! تشوفينه بالبيت ما سدج التلفون بتنزلين راسي الارض..لا بارك الله في يوم شفت ويهج فيه...
كان راشد ير شعر سلامه بقوه وهني صاحت ما رامت تيود عمرها..وحمدان مصدوم من ابوه بس ليلى ما قدرت تتحمل وسارت تحاول تير اخوها من بنته شوي..
ليلى تصيح: اخوي الله يخليك استهدي بالله وفج ايديك عنها دخيلك راشد..
راشد ينافخ وهو صدق شكله تعب: مسودة الويه ما تشوفين شو بتسوي فيني.؟
ليلى ودموعها تطيح وتير سلامه صوبها: ارجوك راشد خلها علي دخيلك اخوي عشاني هالمره..
بس راشد كان مب قادر يركز في شي وير سلامه وفرها بكل قوته صوب الدري...وسارت لها ليلى وسحبتها قبل يجتلها ابوها ضرب..
ليلى تصيح: بس يا راشد دخيلك خلها ارجوك بتموت والله...
راشد: خليها تموت فكه من ويهها احسن...موتها فيه ستر لها...
ليلى وهي تغطي على سلامه بجسمها عسب ما يضربها راشد..وراشد مب محشم ويحاول يسحب سلامه منها...
راشد يصارخ: ليلى بعدي عنها لا تتدخلين فيني انا وعيالي..
بس ليلى ما اهتمت له ويرت سلامه بعيد عنه: راشد استهدي بالله وكل شي بيعدي على خير..
راشد يزاعج: بجتلها الخايسه والله بجتلها...
ليلى تصيح: راشد ورحمة ابويه تخليها عشاني ارجوك...
راشد بعصبيه: طلعي فوق الله لا يبارك فيج دنيا ولا اخره ماريد اشوف ويهج..
سلامه مب قادره تشوف شي من الصياح ونشت تلوي على عمتها وتمت هي وياها يصيحن صدق من الخااطر...
راشد: والله يا سلامه ان شفتج جدامي بعد اليوم لا اقص راسج واخليج تندمين علىاليوم اللي تفكرين فيه تنزلين راسي الارض..
طلع راشد من البيت محرج وحمدان مثل الاهبل واقف ما يعرف شو مستوي ولاشي..
سلامه لاويه على ليلى بقوه وتصيح..
ليلى تصيح وتبعد سلامه عنها: سلامه روحي فوق..
سلامه ترتجف:عمتي خلج وياي ارجوج والله ما اقصد..
ليلى من بين دموعها: سلامه روحي فوق ما ابغي اشوفج..(وطالعت حمدان) حمدان سير الحق ابوك شوف وين بيسير لا يستوي به شي..
حمدان بعده مصدوم: اوكي ..
وطلع حمدان وليلى مسكت سلامه وطلعت فوق وياها ووصلتها الحجره ومسكتها من كتفها ودزتها بقوه داخل وصكت الباب وراحت عنها..كانت ليلى صدق منقهره من سلامه وما تعرف كيف ممكن تتعامل معاها بعد اللي صار..ردت ليلى البيت وهي مثقله بالهموم وشاله في قلبها احزان الكون بعدما راحت تفرح وياهم ويا فرحه ما تمت..كانت تمشي من بيت راشد لبيتهم وعيونها ما وقف نزيف الدمع منها...تمشي وهي تشوف حظها ينتحس كل يوم اكثر عن اللي قبله...
يتها شيخه تركض من وراها بتعثر: امي تعالي وين تلوحين..؟
ليلى بحزن تمش دموعها: تعالي انتي الثانيه..
وشلت شيخه ودخلت البيت وشافت امها يالسه ويا خلود..بس ليلى ما تحملت وعطت خلود نظره حاده حقرتها فيها خلت خلود تنصدم منها وما تتوقع هالنظره منها ابد...
ام راشد: وين اليهال.؟
ليلى ما ردت على امها وطلعت فوق منقهره من كل حواليها..ودها تموت هاللحظه ولا تسمع ولا تشوف اللي شافته....
...............
وصل عبدالله دبي ونزل ونزلت البشكاره اللي وياه تبطل له الباب..ودخل السياره البيت وحس بشي يقبض قلبه بس استهدى بالله وقوى قلبه ونزل...فتح باب الصاله والبشكاره سارت حجرتها بتغير وبتسير تنظف البيت..
طلع عبدالله فوق على طول..حس بشي غريب وهو يمشي في الطابق الثاني..يوم وصل حجرته...عوره قلبه وايد وحس بثقل في ايديه وانه ما بيروم يبطل الباب..بس تشجع وبلع ريجه وحس بألم فضيع في صدره...انفتح الباب وفاح عبير بدريه من الحجره وترست ريحتها خلايا جسمه...وغصبا عن اللي ما يحس نزلن دموعه بحراره..ودخل وصك الباب وهو يطالع كل شي في الحجره مرتب ومعدل مكانه الا شبريته معفتسه لانه اخر ليله كان في دبي بروحه وما رقدت وياه عسب تنش الصبح وترتب الحجره...
مشى ببطء وفتح الكبت وشاف ثيابها وانعصر قلبه الم وهو ينزلهن من فوق ويلوي عليهن بقوه..ويصيح من خاطره..هني بيته ذكرياته...
كل لحظه حلوه عاشها ويا بدريه..عاشوها في هالبيت..هني اول مره ضحكوا وفرحوا وابتسموا وكل شي كل شي كان في هالبيت..
هني عبدالله يروم يصيحها دون ما يخاف من ان حد يشفق عليه ولا يسمع صياحه ويقطع قلبه..هني يروم يصيح دون ما يخاف انه يراعي مشاعر حد..يقدر يصيح بدريه ومحد بيحس ولا بيدري...
"خليتيني ورحتي!!! ابد ما توقعت هالشي..ما توقعته...ليش نهون على بعض ليش؟؟ ليش لازم واحد فينا يخلي الثاني...ليش انتي بالذات..بعضي اللي ما اعيش بدونه...ليش يا كلي ليش.؟..!!!"ويتنهد من قلبه"استغفر الله"....
نش ويلس على الشبريه وشاف صورتها حذال الابجوره..وخذها يلوي عليها وتم ساعه يصيح مب رايم ييود عمره ابداً..كان انهياره غصبا عنه..وتعبه وكل شي يستوي به غصباً عنه..تذكر مواقفه وياها...تذكر يوم يتهم سلمى نص الليل ورقدت عندهم وبدريه سارت ترقد وياها وما رقدت عنده...
عبدالله يلس: ما ياني رقاد خايف...اليوم خليتيني ورحتي..
ضحكت بدريه ومسكت دبدوب وفرته عليه: رقده حذالك لين باجر..
عبدالله ماد بوزه: مابا مابا...شو هاه يا سلام انا ارقد بروحي وانتي ترقدين ويا سلامي..بيي عندكم..
بدريه: اشهد انك استخفيت وقعدت...
عبدالله: شو اسوي والله ما فيني رقاد...تعالي بنتمشى في الحديقه شوي..
بدريه: الله يكملك بالعقل وين نتمشى الساعه 1:00 نص الليل...
وسارت لين حذاله..وردته يرقد على الشبريه ولحفته...وحبته على يبهته....
بدريه: يالله حبيبي ارقد عشان باجر تنش للدوام...
عبدالله مبتسم: ان شاء الله ابله...
ضحكت بدريه وطلعت عنه...وسارت ترقد عند سلمى وهو رقد من بعدها..
حط عبدالله راسه على المخده وتم يصيح ويحس راسه بدا يصدع وبينفجر من الصداع...خلاص مب رايم يتحكم في مشاعره اكثر من جي...ونش للكبت يعذب روحه اكثر..وشاف اوراق واشياء جديمه من اشياءات بدريه..بطل وحده من الاوراق وابتسم يوم شاف الورقه وتفداها مليون مره بس بعد شو ..بعد ما فدته هي بالعمر كله...شاف ورقه كان مطرشنها على ايميل حصه وهو مسافر استراليا...وبدريه تمت في بيت اهله وتذكر شي من بينهم..
عبدالله: بدريه خلي حصه تفتح ايميلها بس حلفيها بالله ما تقرا شي وانتي اقري الايميل واتصلي فيني عسب اعلمج كيف تمسحينه..
بدريه: ليش شو مطرش شي خايس؟
عبدالله : متفيجه اونه شي خايس يا ماما شي حلو بس ماروم اطرشه بالتلفون..
بدريه: حصه تعالي يقول عبادي بطلي ايميلج مطرش شي بس حاطنها بذمتج ما تشوفينه..
حصه: اااه الممنوع مرغوب ابى اشوف..
وبعد نقاش طويل اقتنعت حصه وحلفت ما تشوفه...
عبدالله تذكر هالموقف وابتسم من قلبه وهو يقرا الايميل اللي بعده للحين مطبوع ومحتفظه فيه حبيبته بدريه...كان مطرش لها قصيده وهو في استراليا...وخلتها عندها للحين..
"سلامي من سما برزبن الى اجمل بنات الكون...الىالغالي وشفا حالي ولي ماله مثيل ولون...ياللي منهم يغار الروز..ولجله كل شي يهون...ولي شوفه شروق الشمس ولي فيهم انا المفتون...فريد الحسن في طبعه ابد ماله مثيل يكون...هيامي وغاية احلامي ولو تحت الثرى مدفون...جماله زاد وتعدى...وفاق الوصف لو تدرون...فلا حور من الفردوس ولا نور ولا مزيون....ولا نجلى كحيلة طرف...حوت حسن العذارى بلون...مرادي الزين بو شامه..هذاك اللي بهم مجنون...يلي بوصفه عجز حرفي..يهون الكل وهو ما ايهون...فدته الروح من الخاطر...وعمر قد غدا مرهون...ومنايه فيك يا دنيا تزفين اللقا بالعون..ترديني الى الغالي وتدعيها سحب لظنون"
ابتسم من قلبه وهو يذكرها وهي ساعه تتفداه..يوم قرت هالقصيده وضحك عليها يوم سوت عمرها مستحيه..كانت هذيك الايام اول ايام زواجهم وكان ساير دوره 6 شهور وبيرد ويوم وله عليها طرش لها هالقصيده...دمعن عيونه ومسح دمعته وهو يسمع المؤذن لصلاة المغرب ونش بيتيدد ويصلي...
......................
دق موبايلها وهي يالسه تشيك ايميلها وتطالع اخر ايميلات القروبات اللي مشتركه بهن..بس ما ردت عليه وهي تعرف ان هالنغمه نغمة سلمى اختها...ورد يدق ونشت له سمر من على شبريتها..
سمر: ارد عليه...
حصه وهي مندمجه: شكرا ما نريد خدماتج..
سمر: ابى ارد..
حصه: ردي وقولي لها شو تبغي؟
سمر: منو؟
حصه: ردي وانتي ساكته..
سمر: كيف ارد وانا ساكته..
لفت حصه بسرعه وفرت الدفتر اللي على الطاوله على سمر..حصه ابد ما تتحمل شي منها مهما كان..وسمر ودمها الثقيل اللي ما يستحمل ابدا..تمصخها وترفع ضغط حصه..
سمر: منو؟
سلمى: وين حصه؟
سمر: مشغوله شو تبينها؟
سلمى: قولي لها تنزل قوم شماسي بيسافرون خلها تنزل تسلم مسودة الويه..
سمر: انزين..
بندت سمر بس ما خبرت حصه شو قالت لها سلمى...
حصه: شو تبغي؟
سمر: بس تتخبرنا نحن وين..
حصه: اها اوكي..
سمر: ارجوج بقول لج نكته..الله يخليج حصه ارجوج..
حصه: حشا كيف تذلين عمرج..قولي ما يسوى عليج..
سمر بفرح: الله اول مره توافقين بسهوله...
حصه: انزين قولي..
سمر: في الغابه كل يوم النمر يصفع الثعلب ويقوله ليش مب لابس قحفيه...وكل يوم على هالحال..والثعلب ساكت مسكين ما يروم يرمس...والنمر كل يوم يقول له ليش مب لابس قحفيه...اخر شي عصب الثعلب وراح عند الاسد وقاله منو ملك الغابه.؟ قال الاسد انا..قال الثعلب اشك في هالشي وانت ما تروم توفر لنا الامان وحرية الراي..قال الاسد ليش شو مستوي..وخبره الثعلب ان النمر كل يوم يصفعه ويقول له ليش مب لابس قحفيه..وزقر الاسد على النمر يوم راح الثعلب وتخبره عن كل شي..وقال النمر..ارجوك يا حضرة الملك ما يخصك في هالامور خلنا حبايب ولا ترز ويهك بشي ما يخصك..قال الاسد: بس انا مفتشل شو تباني اقوله وهو مشتكي عليك..انت اصلا ليش كل يوم تصفعه..قال النمر: ياخي كيفي ما احبه ما اواطنه بعيشة الله..قال الاسد اوكي اضربه بسبب قله مثلاً ييب لي تفاحه واذا ياب لك حمرا اصفعه وقله ابغي صفرا او خضرا..قال النمر والله فكره....اليوم الثاني شاف النمر الثعلب وقاله ابغي تفاحه..قال الثعلب شو تبغيها حمرا ولا صفرا ولا خضرا...عصب النمر وصفع الثلعب وقاله ليش مب لابس قحفيه..!!!!
حصه: والعثره كل هذي نكته..؟؟!!!
سمر ميته ضحك: هيه نكته بس طويله شوي..
حصه: زين طلعي برا..
سمر: عوذ بالله منج انتي كل شي عندج تروغين خلق الله برا..
حصه: انتي مب من خلق الله..
سمر: انزين انزلي تحت شمسه بتروح يبغونج تسلمين عليها..
حصه تلف: منو قال؟
سمر: سلامي توها..
نزلت سمر ويا حصه تحت وشافن الكل متزهبين قوم شمسه كلهم..وعيالها في الصاله بطي ويوسف وبدر..والبنات كلهن..
ام خليفه: بيفضى علينا البيت...
سلمى: هيه والله..
شمسه: بس عاد اللي يسمع انا ايلس في بوظبي وايد..سلامي انتي باجر او اليوم بتردين لريلج وامايه انتي عندج سارونه وبناتها وسمر وحصه..
ام خليفه: بس انتي بعد غير..
حصه: وايد غير..بالويه امي تقول ما عندها تفاهم..
وتي سمر وتعق عمرها بقوه في حضن امها..
ام خليفه تدزها: نشي من فوقي مثقلج غاديه متينه ..
حصه: وييييو راغوها..
سمر تنش: عادي عادي..
سلمى: بطاي شو مب ناوي تم في البلاد..احيدك تبغي تم بيت خالك عبدالله..
شمسه: قلنا له لو يبغي يتم هني ويكمل من بيت خاله بدبي ما عندنا مانع...
بطي مبتسم: متردد بفكر شوي وعقبها بقول..
شمسه مبتسمه: بشو تفكر حبيبي باجر بنسافر..
بطي: اليوم بنتم في دبي لين باجر يعني عندي مهله افكر..
شمسه: ع راحتك اللي تبغيه..وجان تبغي تسافر ويانا الحين وقرب المدارس ترد البلاد برايك..
بطي: اوكي امايه الحين بسافر وعقبها بفكر ويا سعود وابويه...
سلمى: فديته سعود من متى ما شفته...
ودخلت حمده الصاله مبتسمه..وكانت شيلتها على كتفوها ويوم شافت بطي تغير لون ويهها ورفعتها على راسها وسلمت عليهم كلهم..وهي مبتسمه بخجل...وسارت تيلس حذال بنات شمسه...
شمسه: هاه حمدووه ما شفنا شي من الكيك اللي بييبه ابوج..؟
حمده مبتسمه: ابويه للحين ما وصل..
سلمى: عدال يالخجل..ونج الحين مستحيه..؟
حصه حست في بنت اخوها مستحيه من بطي..بس بطي ما اهتم لخجلها مول...
بطي يغايض: لو السبب في مستحى بنت خالي انا اسمحولي ما بطلع..
ضحكت شمسه: ويهك لوح..
حمده بخجل: والله مب مستحيه..
حصه: وابويه انا حمدوه انتي في ويهج دم..حشا غاديه طماطه كل هاه خجل..!!!!
سمر مبتسمه..
ام خليفه: يوزن عن البنيه خلنها الله لا يقطع الحيا...
وتدش ساره الصاله...وياييبه وياها صينيه ووحده من البشاكير وراها وياها كرتونه كبيره...
بدر نط من مكانه: يااااااي خالوه شو ياييبه..؟
شمسه مفتشله: بدر!!!
بدر: حلويات اشم ريحة حلويات...
ضحكوا كلهم على بدر..وحطت ساره الصينيه والكرتونه على الطاوله ويتها سمر..
سمر: شو داخله..؟
ساره:سيري ساعدي خليفه يايب اغراض وياه..
سمر طلعت هي وبدر على طول الحوي وردوا ويا خليفه محملين بالاغراض..
خليفه دخل يسلم..ويلس وياهم..
ام خليفه: حق شو هالعبال كله..؟
خليفه: على شرف حمدووه بنتي حبيبتي...
حمده هني ما بقى لون من الوان المجره ما ارتسم في ويهها...
بطي: اووه محد يخبرنا عشان نبين مب راعين واجب..؟
شمسه : شو تبغي تسوي؟
بطي: على الاقل بنت خالي نجحت اشتري لها هديه بهالمناسبه مب جي نبين بدون ذوق...بس ما عليج يا بنت خالي لج مني كلمه اطرش لج هديتج من ايطاليا مخصوص..
خليفه يطالع ردة فعل حمده وما عيبه مول اسلوب بطي...بس تم ساكت...
حمده نشت تيلس حذال ابوها: فديتك ابويه ما تقصر...
ساره: ازقرن البشاكير ييبن الصحون والعصير...
ام خليفه: وين لو يشوفكم بو خليفه بيحتشر وبيقول ناس في عزا وانتوا مسوين حفل وخرابيط..
خليفه: مب حفله امايه بس شي خفيف عشان حمدوه..
المهم يلسوا كلهم يسولفون وطنشوا نظرات ام خليفه اللي كلها لوم وعتب لحركاتهم المراهقه...وشوي يرن تلفون سلمى...وطلع ريلها يترياها برا ونشت تسلم عليهم كلهم وروحت وياه دبي...اما نوره فكانت مروحه من العصر يوم روح عبدالله..وما بقى في البيت غير شمسه اللي بتروح بعد شوي وعقبها بيرد البيت شرات ما هو هادي ما فيه حد...
.......................
حطت فاطمه العشا الساعه 9:00 في بيت ام احمد..بس احمد كان ضايج ما يعرف من شو بس شكله صدق كان ضايج..
ام احمد حستبه بس ما رمست..
فاطمه: احمد ليش ما رحت تييب شيخه اليوم؟
احمد: مب لازم مالي بارض اسير هناك..
ام احمد: ليش يا احمد شي مضيج بك؟
احمد بضيج:مافيني شي امايه..
ام احمد: زين اقرب تعشى برمسك عقب العشا..
فاطمه : شو بتقولين له؟
ام احمد: وابويه عليج انا شو اللي ما تبغين تعرفينه؟
احمد ابتسم..
وتعشوا وعقبها نشت فاطمه المطبخ تغسل صحون العشا واحمد مشى كرسي امها حجرتها ودخل هو وياها...
ام احمد: كنت ابغي ارمسك بموضوع بس دامك جي ضايج بلاه لين ما تهدا نفسك...
احمد: لا فديتج قولي اللي تبغين..
ام احمد: مب زين اقولك الحين وتتوحش علي وانت ضايج ..
احمد: افا عليج يالغاليه ما عاش اللي ما تعيبه رمستج..
ام احمد: بعد ما ابغي ارمسك الحين..
احمد مبتسم: ارمسي يمه ارمسي..والله شوقتيني...
ام احمد ابتسمت: الحين انت مرتاح في شغلك؟
احمد: الحمدلله والله مستانس..
ام احمد: خلاص وظيفتك ثابته..؟
احمد: هيه ان شاء الله..
ام احمد: وتقدر تدبر امورك لروحك..؟
احمد فهم وابتسم: هيه ليش؟
ام احمد ابتسمت: خلاص تقدر تمشي بيت وحرمه وعيال؟
احمد ابتسم: ليش في عروس؟
ام احمد: قلت لك من قبل..موجوده بس نتشاور فيها الاول..يمكن اهلها ما يعيبونك..
احمد فكر في بنت راشد:واذا ما ابغيها عادي تخطبين لي اللي ابغي؟
ام احمد تطالعه بنظره غريبه: ليش حد في بالك؟
احمد: لاء بس اقول..يعني اذا ما عيبتني اللي تبينها بقولج من الناس اللي ابغي من عندهم..
ام احمد: خلاص انت قول من تبغي وانا عقب بقولك من اللي ابغي..
احمد انحرج: يا امايه فديتج قولي السالفه مب ضحك انا محد في بالي معين قولي من تبغين بشوف منو..
ام احمد: زين بقولك البنيه مزيونه وما عليها قاصر..ما خلى الجمال منها شي واهلها ناس معروفين وما شاء الله عليهم ينضرب بأخلاقهم المثل..انا اخر مره شفت البنت قبل سنتين وهي صغيره..ظني الحين كبرت وغدت جميله اكثر عن قبل...
احمد: بنت منو؟
ام احمد: بنت راشد بن ناصر اخو ريل اختك الله يرحمها...
هني صدق انفجع احمد يوم عرف وحس بشعر ينبه وقف من الصدمه..وتم مبهت يطالع امه..وهي استغربت من صدمة ولدها اللي ما رام يبلع ريجه من قوة نزول الخبر على مسمعه...
ام احمد: بلاك؟
احمد وارتسمت ابتسامه عريضه على ويهه ما قدر يخفيها: راشد عم شيخه؟
ام احمد: هيه نعم..!!
احمد وقلبه يدق بقوه بدون هدوء ابداً:والله اللي تشوفينه دامه اختيارج اكيد انه لا يعلى عليه...
ام احمد متردده: واللي في بالك..؟
احمد: منو في بالي امايه كنت اسولف وياج بس..انا مب راعي هالخرابيط...
ونش يحبها على راسها: زين متى نروح؟
ابتسمت ام احمد: الوقت اللي تبغي روح متى ما تبغي تسير لهم سير..
احمد بفرح: نسير باجر...خميس؟
ام احمد: زين بعد سيرلهم وايلس ويا ابوها شوي وفاتحه بالموضوع وبالمره هات شيخه وياك..
احمد: خلاص ادعيلي...
ام احمد: الله اللي بيوفقك ان شاء الله...
ام احمد يلست في حجرتها واحمد اللي كان ضايج عادي الحين من زود فرحته يوزع افراحه على سكان الارض وييه فائض من الفرحه اللي عايش بها..كان قلبه يدق ويتمرد على ضلوعه يبغي يطلع ويطير مب رايم يتحمل الحبس في قفصه الصدري...ماياه رقاد هالليله وين بييه وهو بين ليله وضحاها يتعلق قلبه وتخطب له امه اللي في باله...شو من مصادفه ممكن يتوقعها الانسان تصير له احلى من هذي....اكيد ان احمد بيتم يتريا باجر على اعصابه لين ما تغيب الشمس ويقابل بو حمدان...
.................
الليل كانت سلامه ميته صياح في حجرتها ..مب قادره تصدق انها انكشفت وصار كل شي واضح ..الحين الكل اكيد بيحتقرها..كل شي يهون عليها يهون عليها تموت ويحقرونها كل شي يهون الا شي واحد...سلامه ما كانت ابدا مستوعبه انها خسرت عمتها للابد...أي شي ممكن يتصلح الا ثقة عمتها فيها...
كانت تصيح الضرب اللي انضربته وقهرها من كل شي بس ما تصيح شي كثر ما تصيح ليلى..اللي بتخسرها للابد..عاد كل شي ولا عمتها..ودها الكل يشوفها وعي تغلط الا ليلى..اذا خسرت ليلى منو بيبقى لها...ما سكتت ابد من العصر وهي تصيح لين الحين نص الليل..ما ذاقت شي ولا شربت ولا حد كلف على نفسه يدق الباب يشوفها حتى امها للحين ما باركت لها على النجاح...وابوها بعده ما عرف كان ودها تقوله عقب ما ترمس عبدالرحمن ولكن الوقت ما كان في صالحها...
حتى الرقاد ما قدرت ترقد ابداً..خايفه في أي لحظه ينكسر الباب ويجتلها ابوها او حمدان يعرف ويكسر راسها...بس كانت توقعاتها خايبه كلها...كانت من داخل كلها امل تيي ليلى وتيلس وياها مثل كل مره تتفاهم وياها وتتخبرها شو صار وكيف صار...تعاتبها بحنيه بأمومه مثل دايماً..بس الظاهر صدمة عمتها فيها اقوى من انها ممكن ترحمها ولا تروف بحالها...
وهي في قمة الحزن والالم تخيلت الباب يدق بس ما رفعت راسها عن الشبريه بس رد يدق مره ثانيه لين ما تأكدت ان في حد...ارتجفت من الخوف ما عرفت كيف ممكن تتصرف ولا منو اللي بيكون موجود الحين...
رد يدق بس سوت روحها راقده ما تبغي ترد تخاف الا ابوها اللي عند الباب وتفتحه ويذبحها...
حمدان: سلامه افتحي انا حمدان...
يوم سمعت سلامه حسه صاحت اكثر عن قبل...وبغت تفتح الباب بس ما قدرت خافت يكون عرف شو السالفه اللي العصر وهو الثاني ياي يضربها بعد...
حمدان: سلامي بطلي الباب الله يخليج...
يوم سمعت في حسه ترجي وتوسل نشت تبطل الباب..وشافته واقف جدامه وفي عيونه حنان وشفقة الكون عليها...وماسك صينيه..
حمدان يدخل: ما رقدتي للحين..
سلامه كانت دموعها تطيح ما قدرت ترمس...
حمدان يحط الصينيه على الطاوله ويقرب من اخته وهو مبتسم ويمسك ايدها ويرها وخلاها تيلس على الكنبه مجابلتنه..ونش يصك الباب بالمفتاح..
حمدان: تعالي كلي...خليت شرملى خدامة بيت قوم امي غاليه تسوي لج اكل ..ابوي قال حق ميرنا ماتسوي لج اكل..
سلامه نزلت راسها وتمت تصيح...اصلا ما وقفت صياح من العصر..
حمدان: نشي يالله مافي شي يستاهل انج تصيحين عشانه..
سلامه ما ردت عليه..
بس حمدان نش ييب لها العصير والسندويتشات...
حمدان يمد ايده : يالله كلي اباج تاكلين وعقبها ابى اعرف شو مستوي بالتفصيل...
سلامه ما طاعت ترد عليه ولا تاخذ عنه شي..حاول وياها بس بدون فايده...
سلامه: وين ابويه؟
حمدان نزل راسه: في حجرته..
سلامه تمش دموعها: احلف..
حمدان: والله بس شوي تعبان...
سلامه تصيح: مني انا؟
حمدان: لا هو شوي ضايج ما ادري به...
مرت دقيقة صمت محد رمس فيهم...بس انقطع صوت الصمت..
حمدان: سلامه شو مسويه هالكثر يحرج ابويه؟
سلامه صدت بويهها: حمدان ارجوك لا تسألني بس اطلع عني ابى اتم بروحي...
حمدان: بس انا ابغي اعرف..
سلامه: اسأل عمتي او أي حد انا مستحيل اقولك...
حمدان ينش: اوكي..تصبحين على خير..
سلامه: خذ الاكل ما ابغيه...
حمدان: كليه وحطي الصينيه تحت الشبريه عسب الشغاله ما تشوفها باجر وتخبر ابوي..
سلامه ردت تصيح: صك الباب..
طلع حمدان ونشت سلامه تصك الباب بالمفتاح..وتلحفت ورقدت على طول وتم الاكل على الطاوله ما قربته ولا ذاقت شي منه....
...................
الصبح من نشت وهي يالسه في حجرتها ما طلعت ما تبغي تشوف امها ولا تبغي تشوف عيال اخوها اللي ما ييها منهم الا ويع الراس..ونشت شيخه وياها...وهي للحين مستغربه كيف خالها ما يا يشلها مع ان امس كان الاربعاء...وقالت اكيد انه انشغل وبيخليها هالاسبوع هني..
شيخه تبطل عيونها بصعوبه: امي انتي وين؟
ليلى تطالعها مبتسمه: واللي جدامج منو؟
شيخه تضحك..
كانت ليلى منسدحه على الشبريه على ظهرها ويوم نشت شيخه قامت بكسل وانسدحت فوق امها وردت ترقد ..
ليلى: قومي يا دبوووه..يالله حبيبتي..
شيخه بكسل: ماليد..
ليلى: اذا ما نشيتي ما بوديج تويز ار اص..
نشت شيخه ببطء: بنلوح اليوم..؟
ليلى مبتسمه:هيه يالله انزلي من فوقي كسرتيني...
شيخه تضحك: انا مث دبه..
ليلى مبتسمه: لا ما شاء الله عليج عمتي اللي دبه...
شيخه انسدحت حذال ليلى وليلى طالعتها وابتسمت وهي تلاعبها وشيخه تضحك...
ليلى: تعالي بسبحج والبسج ثوب يديد..
شيخه: ما نثوي ثامبو وما نثوي ثابون..
ليلى: ان شاء الله انتي تتشرطين على خدامتج بس... تعالي بشل ثيابج..
وشلتها ليلى وسبحتها وغيرت ثيابها...ونشفت شعرها ويلست وياها في الحجره..
شيخه حاطه راسها على ريول ليلى..وليلى تلعب بشعرها...
شيخه: ما بنلوح عند ددوه..
ليلى: لاء ما بنروح..قومي هاتي القلم والورقه بعلمج تكتبين شيخه..
شيخه: ماليد..
ليلى: قومي بنرسم بابا وماما...
شيخه ابتسمت: بنرسم بابا...؟
ليلى: هيه وماما بعد..
نطت شيخه بسرعه وسارت تييب دفترها اللي تحت ملابسها واقلامها ويت عند ليلى ويلست على الشبريه.وليلى قامت تييب صورة سيف من البوم الصور....
شيخه: وين بابا؟
مدت ليلى ايدها بالصوره:يالله ارسميه..
شيخه تفكر وتحاول تتذكر بس ما قدرت..
ليلى: شو تبين؟
شيخه: من اثمه..؟
ليلى: سيف..بابا سيف..
شيخه ابتسمت: بابا ثيف..هذا ابويه..
ويرت الصوره صوب صدرها ولوت عليها: هذا مالي انا هذا ابويه...
ليلى طالعتها وبلعت ريجها وحست بشي في قلبها نفس الالم الفضيع اللي ماله مسكن...
ليلى: هيه يالله ارسميه..
شيخه تخربش ورفعت راسها وبكل عفويه: ماما وين راح بابا.؟
ليلى بحزن: سافر..سافر بعيد ما نقدر نشوفه ..
شيخه: ثافر بعيد عند الوحث.؟
ليلى ابتسمت: لاء هناك مافي وحش..سيف راح فوق عند الله..
بطلت عيونها شيخه على الاخير: من وداه؟
ليلى حست انه مب وقت مناسب تسولف بهالسوالف لشيخه: زين شواخي رسمتي بابا..؟
شيخه نست الموضوع: هيه ثوفيه...
ليلى طلعت صوره ثانيه: شيخه شوفي هذي؟
يرتها شيخه: من هذي؟
ليلى: هذي ماما..
ضحكت شيخه وعقت الصوره على الشبريه: لاء انتي ماما هذي مث انتي..
ليلى ابتسمت: امبلى هذي ماما...عيب شيخه ييبي الصوره وحبيها هذي ماما..
عصبت شيخه: مث امي مث امي اتي امي..
ليلى تتنهد: اوكي انا امج..خلاص يالله ارسميني..
شيخه تشل صورة سعاد بتقصها: هذي يع مث امي..
ليلى نشت بسرعه قبل تقطعها شيخه:لا لا هاتيها حرام هذي امي انا...
ضحكت شيخه: انتي مث امث هذي..
ليلى تحط الصوره في الالبوم ويا صورة سيف..
شيخه: امي انا بلثمج..
ليلى تضحك: اوكي الثميني..
يلست شيخه ترسم وليلى تشوف المهمه بدت تصعب والاكيد ان الاصعب كيف شيخه يوم من الايام ممكن تتقبل ان ليلى ما تكون امها..وليلى كانت خايفه كيف بتقدر تقنع هالبنت ان لا لها ام ولا ابو...تنهدت من قلبها..
"الله يعيني على الايام اليايه.."
........................
في حديقة البيت العوده الفخمه كانوا اليهال يلعبون كوره والجو الصبح كان شوي حلو رغم انه حوالي الساعه 11:00 بيبدا يحر ومحد يروم ييلس برا..كانت يايه من المطبخ التحضيري وياييبه وياها الريوق والشاي عسب تتريق هي وريلها في حديقة البيت..خلاص علاقتهم شبه ردة طبيعيه رغم ان فيها شوية فتور طبعا غير قبل.. وكل هاه بس عشان خاطر اليهال...وعشان خاطر الخبر الحلو اللي يايبتنه اليوم لريلها...وبعد ما سولفوا شوي...
سلمى تصب الشاي: حامد..
حامد يقرا الجريده: نعم..
سلمى: يمكن اني حامل..
نزل حامد الجريده: شو؟
سلمى: اللي سمعته..
حامد مبطل عيونه: من متى.؟
سلمى: مادري والله بس انامتأكده واليوم بخلي الشغاله تييب لي الفحص وعقبها بتأكد في العياده..
حامد: ليش؟ ومتى صار كل هاه؟ مب انتي تاخذين موانع؟
سلمى انصدمت: لاء انا ما اخذ وبعدين شو جنه مب عايبنك..
حامد عق الجريده معصب: هالياهل لازم تنزلينه...مفروض ما تحملين وانتي تعرفين هالشي...
سلمى انصدمت اكثر: انزله؟ انت متأكد من اللي تقوله؟
حامد: نزليه يا سلمى نحن ما نبي يهال...هالياهل لازم ما يعيش..انا ما اريد اييب ياهل ثاني واظلمه معاي..
سلمى بعصبيه: انت شو تخرف؟
حامد نش معصب اكثر:نزليه يا سلمى اقولج نزليه ما ابغيه يعيش بدون اب.؟
سلمى مبطله عيونها: شو تقول انت؟
حامد محرج على الاخير: يا سلمى انا ما صدقت اليهال يكبرون ويفهمون تييبين لي ياهل زياده ليش؟اظن الحمل يي باختيار الطرفين..
سلمى: وشو يعني اذا العيال كبروا وصاروا يفهمون..وليش ما بيتربى ويا ابوه.؟ انت وين بتروح؟
حامد بتردد: نزليه يا سلمى قبل يكمل اربعين يوم وتستوي نفسه..خافي الله في عيالج..
سلمى: والله لو تموت ما انزله واقتل نفس شو قالوا لك اجتل؟ واجتل منو عيالي؟!! اشهد انك استخفيت..
حامد يأَشر عليها بعصبيه: تراني بعرس ولازم تتطلقين عسب اعرس...
سلمى مبطله عيونها مصدومه كل شي توقعته الا الطلاق: شو تقول انته؟ تطلقني..؟ عشان تعرس؟
حامد يتأفف: شوفي اللي باخذها ما بتوافق علي لين ما اطلق حرمتي القبليه..وانا مب مستعد اجابلها واجابل ياهل له مسؤوليات علي..
سلمى بقهر منه: وتهون عليك العشره؟
حامد: خلاص يا سلمى نحن ما نروم نفهم بعض اللي بينا لازم ينتهي..
سلمى: بعد كل هالعمر تونا ما فهمنا بعض؟ والسنين اللي طافت كيف فهمنا بعض فيها..؟ كيف قدرنا نعيش ونييب عيال..؟
حامد: غلطه وندمت عليها..ما حسيت الا الحين..انا وانتي ما ناسب بعض وما نقدر نتفق..
سلمى تصيح: عشان جلبه شايفنها في الشارع.؟ تبيع عيالك وحرمتك وسنين عمرك..تبيع الغالي للرخيص..والله هقيت منك كل شي الا هالشي..
حامد مب مهتم: لا تحاولين ابد تكسرين خاطري..القرار من زمان..
سلمى: وفلوسي وفلوسك وين كانت تروح.؟ لا تقولي ...........؟
حامد بلع ريجه: انا يالس ابني فله في الممزر..لي انا وحرمتي..ما تبغي تعيش في البيت عقبج..هالبيت بيتم لج انتي واليهال..
سلمى صدق تصيح من قلبها: واليهال خلاص ما تبغيهم..من الحين فكرت في حياتهم..بيعورون قلبك وبيغثون حياتك...
حامد: خلاص عاد القلب وما يبغي..
سلمى: قلبك ما يعرف الا التراب والشوارع..صدقني انا اللي ما ابغيك الحين..لو ان هالشي يريحك بس صدق انا ما ابغيك..مب انا اللي بوطي لك الراس واذله مب جي رباني ابوي...
حامد: روحي يالله مب فايج لج انا...
دخلت سلمى البيت تصيح وهي تدعي عليه من خاطرها..طول وقتها ان الله لا يوفقه دنيا ولا اخره...ويلست في حجرتها تصيح...وتصيح لين ما بغت روحها تطلع...وتذكرت بدريه وتمت تصيح اكثر واكثر...وفكرت في خليفه وعبدالله وابوها وهالمره قرارها بيكون حاسم ونهائي وما يخص حد فيه مول..بس محد يدري بشوف بتفكر سلمى لين ما تتصل في حد يي ياخذها بوظبي بيت ابوها...
........................
الساعه 11:45 عقب الضحى نش من الرقاد وحس بتعب فضيع في جسمه..لاول مره ينش يوم خميس هالوقت..طالع الساعه ورد ينسدح حاول يرقد بس خلاص تشبع رقاد ما يبغي يرقد...تنهد ونش يسبح بيطلع من الشقه أي مكان..بيسير لربيعه سالم..على الاقل وياه بيحس بالراحه وبيقضي وقت فراغه لين الليل..
عقب ما تلبس وقبل يطلع بشوي رن تلفونه وتذكره قبل لا ينساه في الشقه..وشاف المتصل "فرح" طبعا ما رد وخلاها تتصل على كيفها بدون ما يرد عليها...بس اترياها تبند واتصل بسالم على طول...
حمد: شحالك سالم؟
سالم: بخير وسهاله وينك البارحه ما ييتنا؟
حمد: تعبان شوي وينك الحين؟
سالم: موجود.
حمد: وينك بالضبط ابى اييك..
سالم: انا في الكوفي..
كانت فرح تدق على الخط الثاني بس ما رد عليها حمد..
حمد: سالم ربع ساعه وبييك..
سالم: ليش وينك من بعده الكوفي تاخذ ربع ساعه..
حمد: في مشوار صغير بخلصه وعقب بييك..
سالم: اوكي اترياك لا تحّير..
بند حمد عن سالم وغير وجهته على طول وسار اتصالات دايركت وقطع ارقامه القبليه وبدلها بأرقام يديده طلعها بنفس اللحظه...كان يحاول يطلع نفسه من هالمستنقع اللي يعيشه..يبى يخفف من حدة انتقامه وكرهه لنفسه..رغم انه للحين يحس ان ما قدر يبرد شوي من حرقة فواده..
بس حس ان الوقت انتهى..انتهى عليه قبل يكمل اللي في باله..مافي وقت الحين اللي كان يبغيه راح ومستحيل يرد..كل اللي حبهم راحوا..مستحيل يقدر يثق في حد مره ثانيه...شعوره صعب وايد ان انسان يوصفه..احساسه بالخساره مؤلم...ما يقدر يعبر عنه مهما حاول...
حط شريط اغاني ورد سحبه على طول ودخل بدله شريط قصايد...بس حس انه بدون هدف وبحركه كلها يأس رد طلع الشريط من المسجل وبنده بالكامل وسار الكوفي على طول لربيعه...
....................
العصر في البيت الشعبي الهادي الخالي الا من الهدوء والسكون وصوت عصافير يشق صمت المكان وحفيف اشجار يهب به هبوب هادي خفيف..طلعت بتيلس في الحوي وقلبها بعده للحين مقبوض وما تعرف لمن تقدر تشتكي..بس كانت افكارها توديها وتييبها ولا تدري وين بتوصل...طلعت امها وهي ماسكه صينية الشاي ويلست وياها على الكراسي في الحوش..
ام اروى: بلاه ضايق صدرج يا بنتي؟
اروى : ماشي امايه بس تعبانه...
ام اروى: نسير العياده؟
اروى: ماله داعي صداع خفيف وبيخوز عني...
ام اروى: شي مستوي بج من يوم عزا قوم ال مبارك..
بلعت اروى ريجها بتعب: لا امي ماشي مستوي شو يعني بيصير..؟
ام اروى: حد قالج شي ؟ حد ضيج بج؟ قولي لي..
اروى مبتسمه: الله يهديج يا امايه منو بيقول لي شي..؟ ياهل انا حد يقول لي شي...
ام اروى: عيل اشفيج؟
اروى تتنهد: ولا شي...امايه بغيت اتخبرج عن شي..
ام اروى: شو؟
اروى: عادي البنت تشوف خطيبها قبل الملجه؟
ام اروى: شو بعد تشوفينه قبل الملجه...؟ انتي تشوفينه حتى قبل الخطوبه..
اروى: بس بعضهم يقولون ما يستوي..
ام اروى: من ناس لناس تفرق يعني في ناس ما يخلون بناتهم يشوفون عيال العايله...الا يوم الملجه ولا العرس..وناس عيالهم متربين ويا بعض ويعرفون بعض زين ما زين..الا ليش تتخبرين؟
اروى: امايه انا اقصد ناصر..يعني الحين عادي لو يا بيتنا ايلس وياه وارمسه..
ام اروى مستغربه: هيه بعد ولد خالج وريلج ان شاء الله...
اروى: امايه اذا ما عيبني او ما ابغيه عادي اقول ما اباه..
ام اروى خافت: وابويه انا شو ما تبغينه شو هالمنكر بعد؟
اروى: لا امايه ما قلت ما ابغيه انا اقولج لو لو لو لو لو؟
ام اروى: هيه يستوي تقولين بس ما بتقولين؟ ليش شو فيه ولد اخويه.؟
اروى: يالله يا امايه مافيه شي وانا ابغيه بس اتخبرج من حقي اعرف...
ام اروى: زين بعد..
اروى: زين امايه بتخبرج شي ثاني..
ام اروى: حشا شفيج علي اليوم كلها رمستج اسئله...؟
اروى تضحك بدون نفس: زين امايه اذا ملج علي وما عيبني بعدين وقلت ما ابغيه..شو يستوي؟
ام اروى حست ان في شي: انتي شسالفتج؟
اروى: امايه ماشي ردي علي فديتج..
اروى: ماشي يستوي..بس تغدين مطلقه وانتي بعدج بنيه...
شهقت اروى: لا بسم الله على عمري..
ام اروى: عيل خلج عاقله وودري عنج هالمنكر اللي تتنشدين عنه وادعي الله بالتوفيق...
اروى غمضت عيونها ببطء: زين الله يستر...
ام اروى: هيه ما خبرتج ترا خالتج ام ناصر وناصر بيونا اليوم عقب المغرب يسلمون...
شهقت اروى: وليش ما قلتي من قبل؟
ام اروى تطالعها بنص عين: وليش تبغين تعرفين؟ شو تبين تسوين؟
اروى استحت: لا ولا شي بس جي عادي هو..
ام اروى: بلاج تخبصين بالرمسه..؟
اروى تنش: ولا شي امايه انا بسير اتسبح واتعدل شوي...
ام اروى تتحرطم لروحها واروى طنشتها وسارت البيت...بس رغم الحزن والتردد اللي في داخلها ما بتخلي الشي اللي فكرت به يروح من بالها والاكيد انها مقرره على شي الليله والله العالم شو هو...
.........................
ركضت شرملى بسرعه للباب العود بتبطله هي و تاما ودخلت السياره البيت...وردن البيت بسرعه يخبرن ام راشد...تبطلن بيبان السياره ونزلت مريم وخواتها ايمان وامل وام عمر ودخلوا الصاله في البيت العود على طول...وشافوا ام راشد ويلسوا وياها يسلمون عليها وسارن البشاكير المطبخ بيحطن الفواله والقهوه...
ام راشد متشققه من الوناسه: الله يغربلها من مدارس ما بغت تخلص ونشوفكم يا مبارك...
مبارك: فديتج يا امايه ادري بي مقصر وياج بس والله تعرفين الشغل من صوب واليهال من صوب ثاني والله يعين...
شمسه: هيه والله يا عمتي صدق نحن مقصرين فيكم وفي اهليه حتى بس والله اليهال ومشاغلهم ما تخلص..
مريم: يدووه وين عمتي؟
ام راشد: فوق ما شفتها اليوم ابد مادري بلاهم هل البيت زعلانين علي لا شفت راشد ولا عياله ولا حتى خلود ولا بنتي...ويا البشاكير من الصبح...
شمسه ابتسمت: فديتج يا عمتي ...انا بيلس وياج..
ام راشد فرحانه بقوم مبارك: يا حيالله مبارك ما بغيت تيي تسلم علي..
مبارك مفتشل وتم يسولف وياهن...
امل تقطع السوالف: يدوه وين حمدان وسلامه.؟
ايمان تطالعها بنظره كلها تكبر: قالت لج ماشافت حد تبين الازعاج غصب...
مريم مبتسم: انا بطلع فوق عند عمتي..
مبارك: يمكنها راقده خليها..
امل مبتسمه: بنوعيها...عادي عمتي ما ترقد الحين اكيد تلعب ويا بنتها..
ابتسم مبارك: ونه بنتها الله يهداج امول..
ام راشد توها انتبهت: وين عمر؟
مبارك:عمر سافر ويا ربعه البحرين..
ام راشد: وابوي انا شو يبغي في البحرين...وليش ما يا يسلم علي مسود الويه...
مبارك: نجح ومتحلف لنا من قبل النتايج اذا نجح يسير البحرين...وسار..
ام راشد: ترا حمدان وسلامه نجحوا ما خبرتك..
شمسه بطلت عيونها على الاخر: والله؟
ام راشد: هيه والله وحمدان من الاسبوع الياي بيداوم في وحده من شركات ابوه...
مبارك: شي طيب والله..
ام راشد: خلو عمر يشد حيله ويسير بعد..
مبارك: لا امايه عمر طلع الحين من المدرسه وسجل بخليفه بن زايد الجويه..
ام راشد: وين هذي؟
مبارك: في العين الريال يبغي يغدي طيار...
تموا يسولفون وطلعن البنات فوق عند عمتهن اللي انصدمت يوم شافتهم وسلمت علين ويلست وياهن في حجرتها...
ليلى تطالع مريم: مبروك على النجاح..
مريم : الله يبارك فيج...
ليلى تطالع فيها وكلها شك ما عاد تروم تثق في حد...شو يضمنها ما تكون مريم شرات سلامه..شو يضمنها بعد ايمان وامل حتى لو صغار ما يكون عليهن حركات تكبر مع الايام...
امل: عمتي بنروح العزبه؟
ليلى انتبهت: العزبه؟ لا ما بنروح..
ايمان تطالع بطرف عينها: احسن بعد مافينا على الخياس...
ليلى تطالعها بنظره: اذا نبغي نسير بنوديج غصب..
امل : عمتي اغني لج؟
ليلى: لا راسي مصدع..
ضحكت مريم وامل على ليلى اللي صدق شكلها كانت طفرانه...
اما شيخه كانت خاشه راسها في حضن ليلى ماتبغي تشوفهم ونها مستحيه وتتحراهم ما يشوفونها لانها ما تشوف حد فيهم..
مريم: شيخه تعالي عندي..
وتدفن شيخه عمرها اكثر في ليلى...
ليلى: شواخي شو هالحركات الغبيه نشي سلمي على بنات عمج..
شيخه ما تكلمت ونها متقطعه من المستحى..
ايمان بنفس خايسه: شرات النعامه..
عصبت ليلى بس ما ردت عليها..هالبنت تنرفزها وما تتحملها ابد..صدق ايمان تقهر بغرورها ومحد يتحملها ابد الا اختها مريم..مريم اللي كانت طبايعها نسخه مصغره من ليلى..حنونه ومتعاطفه والكل يحبها واكثر ما ينحب فيها هدوءها وخجلها..
امل: عمتي...
ليلى: شو يالحشره من يوم دخلتي وانتي سوالف حشى اسكتي شوي...
امل مبتسمه: احبج عمتي ماروم ايود لساني ما سولفلج..
ليلى ابتسمت: فديتج والله..
مريم: عمتي انزلي سلمي على يدوه...
ليلى طالعتها: امي؟
مريم: هيه قالت لابويه انها متولهه عليج وايد..
افتشلت ليلى وحمرن خدودها ونشت على طول...
امل: وين بتروحين؟
ليلى تلبس شيلتها وتشل شيخه اللي متلصقه في ريولها بشكل فضيع: بسير اسلم على اهلج..
ايمان: ننزل ولا نتم هني؟
مريم: هاه عمتي شو قلتي؟
ليلى: تمن هني وبييكن الحين..
طلعت ليلى وهي تفكر في سلامه وشو بتسوي بها..فكرت كيف ممكن تتعامل وياها بعد اليوم..بتحبها وتداريها شرات قبل ولا خلاص انتهت كل اللي بالخاطر وما عادت تعني لها اكثر من كونها عمتها وهي بنت اخوها...نزلت ليلى وهي شاله شيخه..
ليلى تبعد شيخه: خلاص مافي بطلي عيونج..
شيخه تفتح عيونها بشوي شوي: مافي خلاث لاحوا..؟
ليلى: الله لا يقطع الحيا ونج الحين مستحيه..ليتج تستحين في اشياء ثانيه...
شيخه عصبت وتطالع ليلى: امي ما نلوح اث..
ليلى: بنروح تويز ار اص..حشرتينا..بس بنسلم على يدوه..
دخلت ليلى الصاله وسلمت على مبارك وشمسه وامها...
ام راشد: ما بغيتي تخلينا نشوفج اليوم...يوم ما تبغين تشوفيني خلي البنت تنزل عندي..مب تمين حابستنها فوق..
ليلى مفتشله: ما كان لي بارض انزل..
شيخه متعلقه في رقبة ليلى:امي بنلووح..
مبارك: شواخي تعالي سلمي علي..
شيخه تطالع ويه مبارك بغرابه: امي من هذي؟
ليلى مبتسمه: يقولون منو هذا مب من هذي..هذا ريال مب حرمه..
ابتسم مبارك ومد ايديه لشيخه..
ليلى: روحي سلمي على عمي مبارك..وحبيه على خشمه..
شيخه: ماليد..
مبارك: افا يا بنت سيف..
انتبهت شيخه للكلمه وابتسمت: بابا ثيف...
هني بهت الكل بما فيهم ام راشد..اما ليلى ابتسمت على الاقل البنت بدت تركز وتيمع وتفهم وتربط الامور..
مبارك: ليلى انتي قلتي لها شي؟
ليلى مبتسمه: هيه بين فتره وفتره اطلع لها صورته واقولها هذا ابوج...
شمسه: فديتها والله..
ام راشد تمت ساكته واقرب معنى للتشبيه ان حد عصر فوادها الم وحزن...
ليلى: راويتها اليوم لاول مره صورة امها واحتشرت ما تبغيها تقول مب امي..
شيخه تطالع ليلى وهي ترمس وعصبت ونشت تحط ايديها على ثم ليلى..
شيخه: ما تقولين ما تقولين..
ليلى تضحك وتبعد أي شيخه عن ثمها: اوكي ما بقول خلاص..
مبارك يضحك: زين شويخ تعالي عند عمج بيسلم عليج..
شيخه تطالع ويه مبارك اللي فيه شوي من الصوره اللي شافتها...
شيخه تير ليلى: ماما هذا بابا ثيف..؟
ليلى تطالع امها: لا قلت لج بابا سيف سافر هذا اسمه عمي مبارك..
مبارك: تعالي شيخه حبيني..
نشت شيخه ما تدري كيف بس المهم انها نشت لعمها تسلم عليه كانت تحس بشي غريب صوب هالانسان ما تدري شو هو..مبارك مب لين هناك بس فيه شوي من المرحوم سيف...
مبارك يلوي عليها: فديتها الدلوعه انا...
شيخه: انتي من اثمث.؟
مبارك: وابوي انا شو تقول هاي؟
شمسه: تتخبرك شو اسمك...
مبارك: قلنا لج يا عسل اسمي عمي مبارك..
غمضت شيخه وبطلت عيونها: ما اعلف...
ليلى تضحك: شكله صعب عليها...
مبارك يضحك: واضح....
ونش مبارك وهو شال شيخه وتم يلاعبها ويرفعها فوق وينزلها وهي بتموت من الضحك...ام راشد كانت تطالع وقلبها يقول اه لو كان هاللي واقف سيف يلاعب بنته..ويضحكها شو كانت بتكون حياتها وحياتهم..لو كان بو راشد عايش كان ما استوى بينهم وبين بو ناصر أي خلاف وكان بنتها الحين معرسه وخالصه ولو ان سيف عايش كان بنته عايشه الحين احلى حياه بين امها وابوها مب مشتته بين اعمامها واخوالها...
انتبهت ام راشد على ليلى تلوي عليها وتحب راسها: امي حياتي ولهت عليج..
ابتسمت ام راشد: هيه وايد..
ليلى تتدلع على امها: امايه والله ما تعرفين شوفيني..بس صدق ولهت عليج..
ام راشد: انزين نشي من فوقي خل عنج البزا..
شمسه تطالعهن وتضحك..
ليلى: افا عليج يا اميه اهون عليج..وانا بنتج الوحيده اللي مالي غيرج...تروغيني..
ام راشد: كبرتي مب في حاية البزا...من زمان فاطمتنج انا...
ليلى تضحك:زين امايه ابى اتدلع عليج مب محصله حد يدلعني..
ام راشد: قلنا لج عرسي واتدلعي على ريلج..
ليلى: خل يي اول وعقب بنرمس فيه...بعدين وراي مسؤوليات شاغلتني عن العرس وايده..
ام راشد: هيه وايد ترا عيالج وشركتج وعزبتج كل شي يبغي منج شغل..
شمسه وليلى ميتات على ام راشد ضحك وهي تتمصخر على ليلى..
مبارك ينزل شيخه: بعد امايه تعرفين تنكتين...
ام راشد مبتسمه: وين البنات؟
ليلى: اووه نسيتهن...يالله بخليكم انا بسير لهن فوق...
ام راشد: زقري قوم راشد ييونا العشا الليله هني...
ليلى تذكرت: لا امايه خلي حد من البشاكير انا مابروح..
وطلعت ليلى وشلت شيخه وسارن فوق بييلسن ويا بنات مبارك لين وقت العشا...
.....................
في فلة قوم بو خليفه الدور الثاني كان هادي وانفتح باب حجرة حصه بقوه وطلعت سمر تركض وحصه تلحقها بسرعه ..سمر نزلت من فوق وهي ميته ضحك وحصه محرجه على الاخر....تركض وراها وخلاص لو مسكتها بتعدمها...
سمر: اماااايه لحقيني..
حصه: وين تلحقج اليوم نهايتج على ايدي..
سمر تشرد الحوش وهي ميته من الضحك..وحصه تلحقها واخر شي طلعت سمر الزراعه اللي برا وحصه ما كانت لابسه شيلتها وردت البيت وهي متحلفه فيها...واول ما دخلت الصاله شافت امها تطالعها مستغربه منها وهي تنافخ..
ام خليفه: بلاج تتنافضين هالكثر؟
حصه: ولاشي انا بسير فوق...
ام خليفه: لا صدق بنتي شو فيج؟
حصه: بنتج اللي ما تتسمى..كنت يالسه على الكمبيوتر واشتغل مشغوله من خاطريه ويرت الواير وبند عني..
ام خليفه: وينها مسودة الويه؟
حصه استانست اول مره امها توقف وياها ضد سمر..
ام خليفه: خلاص بنتي سيري الحجره وانا برمسها ما عليج منها...
حصه:انتي وين بتروحين الحين؟
ام خليفه: بسير على حرمة سعيد من متى ما شفتها...
حصه: وين ابوي؟
ام خليفه:مادريبه يمكن سار الشركه ويا خليفه..
طلعت حصه فوق وكان الطابق هادي محد فوق الا هي..بس سمعت حد يضحك بصوت عالي...وسارت لين الحجره اللي حذال حجرتها وهي حجرة ذياب..وقربت اذنها وسمعته يضحك بصوت عالي...وسمعت كلمات غريبه ما قدرت تيمع شو ممكن تكون...بس ما اهتمت ودخلت حجرتها لين ما اذن المغرب ويوم سمعت ان ذياب طلع من الحجره طلعت على طول وسارت له...دقت الباب بس محد رد وبطلته بشوي شوي...
حصه: الحمدلله محد هني بشوف شواللي مفطسنه ضحك هالكثر..
وسارت لين شبريته بس ما شافت شي وطالعت حذال مكتبه واوراقه بس بعد ما لقت شي..اخر شي قربت من كمبيوتره وشافت شي انصدمت منه وفجعها وشهقت بقو...وغمضت عيونها ما قدرت تطالعه ابد...وحطت ايدينها على ثمها من اللي شافت..لا ترجع..وقلبت الورقه وشلتها وقطعتها نتفه نتفه...وفرتها في المغسله بالحمام وصبت عليها ماي عسب تنمسح من الوجود..ودخلت تبطل الادراج تشوف اذا في شي بعد من هالنوعيه...بس حظها منحوس بالوقت اللي بطلت فيه اول درج دخل عليها ذياب..
ذياب محرج: ايه انتي شو تسوين هني؟
حصه رفعت راسها تطالعها بغضب: الا انتي اللي شو تسوي هني؟
ذياب: حلوه هذي شو اسوي بعد حجرتي..
حصه: اص ولا كلمه...
ذياب خاف: شو فيج؟
حصه: جب ولا كلمه طب لسانك بثمك...انت مب ويه نعمه وهالمكان مب مكانك..تعرف انت مكانك اللي ييت منه...
ذياب: جب ما يخصج..
حصه: الا جب ما يخصك انت..لك ويه ترمس بعد...وين غيرتك وين نخوتك وين الرجوله اللي فيك..الحين بذمتك هاللي شفته على كمبيوترك ما تخاف خواتك يشوفنه؟؟..بنات اخوك يشوفنه؟؟..وين دمك؟؟..اشهد ان مافيك قطرة دم و لا غيره...
ذياب انحرج..
حصه: انا بسكت هالمره وما بقول لحد اللي شفته...بس النت بينقطع من الحجره وبتشوف..يوم اقولك انت مب ويه نعمه اكون صادقه فيها..
ذياب: مب بكيفج..
حصه باحتقار: الا كيفي ونص مسود الويه وتتمادى بعد...زين يا ذياب انت ما لقيت اللي يأدبك..وبتشوف..
وطلعت عنه وصكت الباب بقوه وراها..وهو تأفف من خاطره وهو وده يصفعها بس وين يروم لها بيكسرون راسه لو يمد ايده على بنت في البيت وخصوصا عاد حصه...
.
.
نزلت حصه الصاله ويلست فيها ويتها حمده ويلست وياها...وتمن يسولفن..وسمر كانت واقفه عند باب الصاله ما تروم تدخل خايفه من حصه..
حمده: سمر تعالي..
سمر: بتضربني..
حصه: يوم تدرين انج بتنضربين ليش تخربين؟
سمر: كنت امزح..
حصه: زين براويج المزح انا...
حمده تضحك..
حصه: وين عفاري شو خلاص مب ناويه تيي بيتنا...؟
حمده: ما تطيع نحاول فيها ما تطيع ابد..
ويدق تلفون حصه وتنش له...وتسير الصاله الثانيه ترمس لان حمده كانت يايبه فلم وحطته بتطالع فيه هي وسمر..ويلسن في الصاله ياكلن كيك ويشربن عصير...ونزل ذياب من فوق وهو متملل وفيه ضيجه..ما يعرف وين يفجها...اول ما نزل وشافهن...عرف انهن الضحيه الاولى..
حمده انتبهت: عمي تعال شوف الفلم ويانا...
سمر: تعال ذياب..
ذياب طالعهن بنظره احتقار..وسار وبند الفيديو..ونشت سمر ونها معصبه وردت تشغله..
سمر: ايه مالك خص خلنا نشوف الفلم..
دزها ذياب: ذلفي من جدام ويهي...
سمر: قوم عنا بنشوف الفلم..
حمده: شو بلاك علينا ما عيبك لا تطالعه اظهر عنا...
ذياب: وانتي ما عندج بيت تيلسين فيه..يايه هني اربع وعشرين ساعه...
حمده: والله مب بيتك يوم تفتح بيت ذاك اليوم ارمس..لكن بعدك مثل البنيه تحت وصاية ابوك..
حرج ذياب وكان بيضربها بس يعرف خليفه بيجتله ويمسح فيه البيت مسح..
سمر تدخل الشريط وتشغل الفيديو: اف منك وسع عنا..
ذياب: ماشي فلم كل وحده تسير حجرتها...يالله ادرسن...
حمده: انت وين عايش نحن خلصنا من زمان..
ذياب يضحك: زين درسن للدور الثاني..
سمر: دور ثاني في عينك..بسم الله علينا...
حمده تضحك: سمر يمكن يطلع عندج دور ثاني انتي للحين ما طلعت نتيجتج..
سمر بخوف: بسم الله علي...
ذياب طلع الشريط من الفيديو وسمر تتقابض معاه تبغي تشله..
حمده: ايه انت شو فيك عيب عليك والله تجابل البنات...
وتدخل عفرا اللي انصدمت سمر وحمده يوم شافنها وكانت شوي مرتاحه وشكلها احسن عن قبل..
حمده مبتسمه: شو هالحلا كله قررتي تنورينا..
عفرا: مليت من الحجره قلت ايي اسلم عليكم وايلس شوي..
ذياب يطالعها وهو مصدوم من شكلها الذابل...
حمده تبغي تحرج ذياب يمكن يحس: تعالي يلسي ويانا..عمي ذياب يايب لنا فلم ولا اروع يبغينا نطالعه...
عفرا: فلم شو؟
حمده: قصة وحده يونانيه تعرس بواحد هولندي وتتعلم تقاليدهم بس هي تجبره يعرس بالطريقه اللي ورثتها عن اهلها في اليونان..
عفرا: حلو؟
حمده ترقع السالفه: هيه..شفت شوي منه وبنده عمي يقول ما بنشوفه الا وياج..
ابتسمت عفرا: فديتك عمي والله..
ذياب بنذاله: جب يالله انا ياهل تقصون علي..ما ناقصني الا اشوف افلام ويا يهال ووحده مريضه نفسياً..
شهقت حمده وسمر طالعته باحتقار..وعفرا انصدمت..
عفرا: منو المريضه ليكون انا؟
ذياب: هيه انتي مريضه ..بذمتج هاه شكل وحده صاحيه..
دمعت عيون عفرا: انت سخيف..
ذياب مبتسم: وايد عليج..
وطلعت عفرا وردت بيتهم وهي بتموت من الصياح...
حمده بعصبيه: هيه انت واحد ما فيك احساس متبلد وميت ..كيف ترمسها وهي تعبانه جي ونحن ما صدقنا على الله طلعت من البيت..
سمر مب فاهمه شي: هيه والله صح انت ليش تسوي جي؟
ذياب: جب انتي وياها( وقص الشريط عنهن) ما عندنا بنات يشوفن افلام..وذلفي انتي بيت ابوج وما تيين هني الا ويا امج..
طلعت حمده معصبه وهي مقرره تخبر ابوها بكل شي..وسمر يوم تمت وياه في الصاله زاغت..
ذياب: وانتي يالغبيه الثانيه ان شفتج في الصاله مره ثانيه بكسر راسج..
سمر بخوف: انزين...
ذياب: ومره ثانيه تنزلين الصاله تلبسين وقايه ما تشوفين الصاله كلها جامات واي حد يدش البيت بيشوفج..
سمر: بس بعدني صغيره حق شو البس شيله..
ذياب : جب تسمعين الرمسه..
سمر بهمس: جب في عينك..
ذياب: شو؟
سمر بتروح فوق: ماشي..
وبصوت واطي: الله ياخذك يارب اليوم..يارب يرجعونك السجن..
سمعها ذياب وفار دمه ومسكها بيضربها بس هي صارخت...وعلى طول طلعت حصه من الصاله الثانيه وشافته ماسكنها ومغربلنها وهي انصدمت وسارت تركض له..
حصه تسحب سمر عنه: ايه انت شو سالفتك ويا اليهال اليوم .؟ تتحراني ما سمعت رمستك ويا حمده وعفرا؟
ذياب: وخير يعني؟
حصه: ذياب كفينا شرك...وبعد عنا وخلنا في حالنا مب ناقصين شي من مشاكلك..
سمر متخبيه ورا حصه: ما خلانا نشوف الفلم وقص الشريط..
حصه معصبه: انت ونك تستحي ريال عرض وطول ومجابل لي البنات..ياخي سير شوف لك شغله بدل ما انت مجابل الحريم..انت تبغيني اخبر ابويه ولا خليفه عليك..؟
ذياب طنشها وطلع..
حصه: فقدت ويهك..
سمر: حصه شو هاه طلعت عفاري تصيح..
حصه: ماعليه الله يستر ان ما خبرن خليفه والله لا يقطعه تقطيع...
سمر: يستاهل فكه منه...
حصه: زين ذلفي انتي الثانيه فوق..خلني بروح اشوف عفرا..
سمر: بروح وياج اخاف يي يقتلني..
حصه حايسه بوزها: وين تبين انتي متأثره بالافلام...
سمر: بسير وياج..
ومشت سمر ويا حصه طالعات فلة خليفه...
حصه: ايه اقولج لا تتحريني نسيت سالفتج تراج بتنضربين..
سمر:انزين انضرب منج ولا انضرب من ذياب ضربه يعور وايد..
حصه كسرت خاطرها سمر: انزين..
سمر: بقولج احنا شو بنروح نسوي؟
حصه: بقنع حمده ما تخبر خليفه ما فينا على الحشره والضرابات..
سمر: واذا ما رضت؟
حصه: ماعليه بحاول وياها وبقنعها ان شاء الله..
سمر: واذا ما اقتنعت..؟
حصه: بجرب وياها أي شي عسب تقتنع بحاول بأي طريقه..
سمر: واذا ما لقيتي طريقه ؟
حصه حرجت: ايه رفعتي ضغطي جب ولا كلمه كل ما قلت لج شي قلتي ما بيستوي.
وتدزها حصه بعيد: روحي يا نحسه اخاف ما يطيعن لي..
سمر تضحك وفيها خوف شوي: لا مابا بتم وياج ماريد ارد بيتنا امي محد..
ابتسمت حصه وهي تحس ان سمر صدق زايغه..بس مع هذا ما رحمتها وسارت البيت وتمت تغايضها وتخوفها انها بتخليها لروحها...

.......................

[الغلا]

تلبس وطلع السياره يتريا امه تيي وياه عسب يسيرون بيت هزيم بن سالم ابو اروى..وفي السياره حط ناصر اغنية..
"الشوق لا جاني ولا يوم جيته الا لمن نظرة الشوق جاته..غرنوق لاخذني ولاني خذيته..الا حياتي تمازجت مع حياته..ازعل جميع الناس لو ما رضيته وارضي الخلايق كلها من رضاته...حبه تبنى القلب وانا خذيته ..ايه والله اني مولع بحب ذاته..لامست بإحساسي القتيل وحييته والصمت مات ولا اعلنا مماته...اعطيه من حسنه الى من عطيته ونقص الجمال اكمله من صفاته...ما قيل وصف الا بوصفه لقيته ..كل الحلى مستخرج من حلاته..اهداني الدنيا وانا ما هديته الا العمر والقلب والروح جاته..."
دخلت امه السياره وكانوا بادين في الاغنيه الثانيه...
ام ناصر: بند هالشياطين ولا بنزل..
ناصر يبنده: هاه بندنا..
ام ناصر: شو فيه ويهك ؟
ناصر: ما بلاه شي..
ام ناصر: ماعرفك انا...؟
ناصر:شو فيه.؟
ام ناصر: ترا ماشي يرزا ضيجك..خلك في يومك وانسى البارحه ما بتييب لنفسك الا ويع الراس..
ناصر ما تكلم ويسوق ويطالع جدامه..
ام ناصر: خلك في اللي انت فيه ما بتفيدك الدنيا الاوليه..البنت معنده وراسها قوي..
ناصر انتبه انها ترمس عن ليلى: ليش شو سوت؟ وين شفتيها؟
ام ناصر بضيج: شفتها في بيت مبارك بن احمد ايام العزا...والله يا ناصر رمستني بنفس خايسه وجني مسويه بها شي..
ناصر تنهد: وليش شو يخصج انتي عشان تفج حرتها فيج؟
ام ناصر: مادري بس صدق ما عيبتني رمستها..مب هاي ليلى اللي اعرفها..
ناصر مستغرب: شو قالت لج؟
ام ناصر: ماشي بس باركت لي على خطوبتك وقلت لها عقبالج..وتوحشت علي..
ناصر: زين شو قالت؟
ام ناصر: قالت انها مب شينه وما بتم محيره لحد والف من يبغيها بس هي ما تبغي تعرس..تبغي تم عند امها..
ناصر مقهور: كيفها هو تم عند امها...
ام ناصر: ناصر انت من صدقك بتحطها ثانيه..
ناصر: هيه والله..غصب عن اللي ما يبي..
ام ناصر: وش ذنب هالمسيكينه..؟ ما تدري بنصيبها..
ناصر عوره قلبه على اروى: مب مشكله بتتعود ومب كيفها ترا الشرع محلل اربع مب ثنتين..امايه انا ابغي ليلى ونفسي عايفه كل حرمه من يوم انخلقت الا هي..انتي ما تعرفين شو تعني لي هالانسانه..لو اقولج انها كل شي واي شي ما بتصدقيني..
ام ناصر بحزن: والله اصدقك بس مب نصيبك يا ناصر..تقاوي الله؟
ناصر:استغفر الله ما قلت..بس بعد يا امايه مفروض تحاولين تقنعين ابوي شوي..
وصلوا بيت عمته قبل ترد ام ناصر..ونزلت وهو نزل وياها...ودخلوا الصاله وسلم ناصر على عمته ويلس وام ناصر يلست وياهم بعد..بس ناصر ما طاع يتم وقال بيسير ميلس ريل عمته وعقب بيحدر عليهم..
وتمت ام ناصر ويا ام اروى ويتهن اروى وام ناصر بغت تتقطع من حلاة البنت وتوثمت فيها بس بعد ما تقدر تقول شي..وين تروم ترمس..
يذبحها بو ناصر على طول...وعقب ساعه على طول زقر ناصر امه بيروحون وهي طلعت له وقالت له يدخل يسلم على بنت عمته وخطيبته..ناصر تردد في البدايه بس عقب تشجع وقرر يدخل يسلم...وفي الميلس اللي خاري دخل وظهرت له اروى متحجبه بس وين والله ولا الف حجاب ممكن يخفف من حدة جمالها..وغصبا عن عين الف عاشق لازم ينبهر بها...ونش ورد عليها السلام يوم سلمت ويلست وخدودها ضو شابه من الحيا...
ناصر يطالعها بنظره ابويه اكثر منها عاطفيه: شحالج اروى.؟؟
اروى مب قادره تيمع: بخير الله يسلمك شحالك انت..
ناصر: بخير الحمدلله..
ودقيقة صمت...
ناصر: اسمحيلنا ازعجناكم يمكن..
اروى: لا ابد عادي حياك أي وقت..البيت بيتكم..
ناصر: من طيبج يا بنت عمتي..
اروى ما تكلمت..وناصر تم ساكت بس تنهد من خاطره..
اروى مستغربه: فيك شي؟
ناصر: لا والله بس جي ...
اروى: زين..
ناصر: انزين يا اروى اترخص الحين تامريني بشي..
اروى انقبض قلبها للحين ما شبعت من مشاهده وللحين ما قالت اللي في بالها..بس غريبه وين راحت حلوفها وشجاعتها لو شافته تصارحه..
اروى: تم بعد شوي...
ناصر انحرج وابتسم بحنان: اوكي يلسنا..
اروى: ناصر انت تشتغل ويا ليلى بنت خالك..
مثل الثلج نزل اسم ليلى من ثم اروى على راس ناصر...ومثل الضربه القاضيه اللي في لحظه تصنع المستحيل..او بالاحرى تهدمه..
ناصر يبلع ريجه: هيه ليش؟
اروى بخجل: لا ماشي..
ناصر حس في شي: انتي وين شفتيها...؟ ليلى ما تروح عند حد..
اروى: في العزا..
ناصر: اها..شي صار؟
اروى: لاء..بس....
ناصر: بس شو؟
اروى: ناصر ابغي اقولك شي..لا تقول عقب ما خلص انه مب من حقي ..ادري بتكون وقاحه مني بس بعد لازم اقوله لاني مثلك انسانه احس واتألم وافكر وكل شي ييك ييني...
ناصر مبهت شو ياها هذي مره وحده...
ناصر: ارمسي اروى قولي اللي بخاطرج..
اروى: ناصر انت كنت خاطب قبل؟
ناصر ابتسم وارتاح من سؤال اروى وانه مب اللي في باله: اكيد لاء...
اروى: انت مغصوب علي.؟
ناصر انتفض بداخله"من وين تييب الاسئله هذي":افا عليج بس..البنت ما تنغصب يغصبون الريال.؟
اروى انحرجت وحست انها جرحته:اسفه ما اقصد..
ناصر عوره قلبه من عفويتها:من مأذنج انتي قولي..من رمس وياج وخرب افكارج..؟
اروى: ناصر اذا انت تبغي حد ثاني قول من الحين احسن..قبل ما نملج وعقبها استوي مطلقه...
استغرب ناصر من رمستها: وليش كل هاه؟
اروى: من الحين احسن عسب ما اتطلق وانا بنت...ولا اخاف نعرس واييب عيال وعقبها يتشردون لو صار شي من بينا اذا ما اتفقنا..
ناصر حس بكلامها نظره مستقبليه واقعيه مليون بالميه: لا يا بنت عمتي من قالج هالرمسه..ما بيصير الا كل خير واللي الله كاتبنه بيستوي..
اروى: وكلام الناس..؟
ناصر ينش: عمره ما يودي ولا ييب انا ماخذنج عن قناعه تطمني...
اروى حست براحه: انزين اسفه ولد خالي لو غثيتك برمتسي بس لازم ما يبرد فوادي...
ناصر مبتسم: ما عليه اروى من حقج بعد ريلج لازم تغارين عليه..
اروى احترق ويهها وسلمت عليه وطلعت وهو ركب موتره وطلع ويا امه وردها البيت وتم طول الوقت يفكر كيف قدر ياخذ ويعطي مع اروى بكل بساطه وبدون ادنى قيود..والادهى كيف قدر يطمنها من ناحية مشاعره وهو من قبل يخطبها في باله مشروع غدر هي في غنى عنه...
.......................
الساعه 8:30 كان واقف بموتر جدام باب الفله العود متلبس ومتعدل ونازل بيت بو راشد..كان احمد مب مستوعب أي شي ويحس كل شي قام يمشي مثل ما هو يبغي..كل الصعاب هانت...بس باقي اصعب شي وهو مدى تقبل راشد للموضوع...توكل على الله ودق الجرس..وياه صوت البشكاره على الانترفون ترد عليه..
تاما: مين؟
احمد: ريال وين راشد؟
تاما: صبر يفتح باب الحين بابا راشد في الميلس..
وطلعت له البشكاره وبطلت له الباب وسار الميلس وكان اصلا معطي خبر لراشد انه يبغيه في سالفه..راشد كان ضايج وقلبه يعوره وماله بارض يدخل البيت ابد..لدرجة انه ما قال لخلود شي من اللي صار امس...ما يعرف كيف ممكن يتعامل مع بنته بعد اليوم...حس انه وايد الا طول عمره غافل عنهم..ما يدري يحط اللوم على نفسه ولا على امهم ولا عليهم هم...صدق كان يحس بتضارب في مشاعره...كان يالس وياه في الميلس مبارك اخوه وحمدان...ويوم وصل حد حذال الباب..نشوا له ورحبوا به ويلس احمد وياهم...
وطبعا اكيد يلسوا يسولفون واستانس مبارك يوم شاف احمد من يوم مات اخوه وهو ما شافه..
مبارك: والله عمر يا بو شهاب ما شفناك..
احمد: توني راد البلاد وين محد شافني حتى نص عربنا ما يعرفون اني رديت...
مبارك: هاه بشرني حصلت شغل؟
احمد: هيه الحمدلله من زمان...
احمد: ما شاء الله هذا ولدك يا راشد؟
راشد مبتسم: هيه خلاص كبرنا يا بو شهاب..
حمدان مبتسم..
احمد:هاه وين ناوي تكمل دراستك؟
حمدان: ما بدرس بشتغل ويا ابوي في الشركات...
بلع احمد ريجه..وفي خاطره.."هالناس ما تفكر ابد في مستقبلها..كل شي من يوم ينولدون ييهم على البراد..ما يحاتون شي ..الله يكفيهم الحسد والحاسدين والقوم الكافرين"
احمد: موفق يا حمدان..
راشد: حمدان رمس اهل البيت يزهبون العشا...
احمد: لا والله ماله داعي بسير الحين..
مبارك: يا ريال شو تسير الحين...ما يلست والله تتعشى ويانا..
احمد منحرج: خلاص خير ان شاء الله..
وطلع حمدان وتم مبارك وراشد في الميلس..
راشد: وين تشتغل الحين يا احمد؟
احمد: في دايرة الماء والكهرباء..
راشد: زين والله شي طيب...
مبارك: يالله تمشي حالك لين ما تحصل لك اخير عنها...
احمد: هيه الحمدلله ممشي اموري الحين تمام...
راشد: الله يوفقك ان شاء الله...
مبارك: شو يا ريال شيبت مب ناوي تعرس..وتييب لك يهال تفرح بهم..؟
احمد حس بقلبه يرجف بس بعد قدر يتحكم في مشاعره..ما يدري ليش كان متشجع ومن شافه خفت جرأته وحس انه ما يروم يرمس بالموضوع او انه صار شي صعب بالنسبه له..
احمد: والله اللي فيه خير يجدمه الله..
راشد: الله يسهل عليك يا احمد الف من تتمناك..
احمد: والله يا بو حمدان يحصل لنا الشرف لو نناسبكم..
مبارك صخ وراشد تم يطالع مستغرب...
راشد: والله نحن اكثر..
احمد: وجان بتوافقون انا ياي اخطب بنتك يا بو حمدان..
راشد صدق انصدم من خاطره ما توقع احمد يتجرأ ويخطب بنته..ولمن لنفسه..وهو يعرف عز المعرفه ان احمد لا من ثوبه ولا يناسبه ولا يناسب بنته..كانت صدمة راشد كبيره كيف قدر احمد يفكر للحظه ببنت راشد..بنت العز والرفاهيه...وتكون لمن؟ لانسان على قد حاله...كل اللي في بال راشد هاللحظه ان مستحيل يخلي بنته تطلع من بيت عز لبيت فقر لو شو ما صار..
راشد: والله ما ادري شو اقولك يا بو شهاب..
احمد حس بشي غلط: والله انا قلت اللي عندي ما بلاقي اخير عنكم ولا احسن عنكم..والله يشهد اني ما فكرت في بنات عمام ولا خوال واخترتكم من بد خلق الله..
مبارك ما حب يتدخل في الموضوع...
راشد: خلاص يا احمد عطنا فرصه نفكر بالموضوع ونشاور البنت وامها واهلها...
احمد : خير ان شاء الله...
صدق احاسيس احمد كانت مب في محلها..ما توقع هالنظرات من مبارك وراشد..وانصدم من ردة فعل راشد يوم تم يقوله يعطيه فرصه...كان في البيت يتحرا انهم ما بيفكرون يوافقون عليه..عسب الطبقات الفرقيه..وعقبها تردد وتشجع يوم انهم مانسبينهم من صوب اخته...
لين ما حطوا العشا والسوالف خذت مجرى بارد...بث الرعب والخوف في نفس احمد...وراشد اللي ما كان اقل منه بالصدمه بس للحظه كان الموضوع قيد تفكيرهم هم الاثنين...


انتظرو اخونا البدوي الحبوب ....

اختكم
الغلا

[البدوي الحبوب]

مشكوره اختي الغلا على هالجزء الجميل

وان شاءالله باجر بنزل لكم الجزء الي بعده

تحياتي لكم

[الرايقه]

يعطيكم الف عاافيه على هالمجهووود الطيب ...

[الغلا]

مشكورين على هالتواصل .... لله يعطيكم الف عافيه

ونحن بانتظار اخونا البدوي الحبوب عسب يكمل لكم الجزء


اختكم
الغلا

[البدوي الحبوب]

الحلقة الثانيه والعشرون

مرت الايام وعلاقة سلامه في عمتها انقطعت كلياً حتى ام راشد لاحظت انها ما قامت تشوف سلامه في البيت العود ابد..وراشد صار اقسى عن قبل على الكل وما عاد يثق في جنس بنيه وصار وايد يضغط بتصرفاته على ليلى وكل شوي يسألها ويحاول يفهم كل شي تخبيه..مب قادر يستوعب ان بنته الملاك الصغيره سوت كل هاه عيل الباقين اللي يفهمون شو بيسوون بحياتهم..طبعا راشد ما خبر حرمته بشي وخلود تتحرا سلامه بس تحس بالوحده من بدت الاجازه، سارت لها كم مره بس ما قدرت تفهم منها شي..وحمدان حاول وياها وويا عمته بس للاسف بعد ما عرف شي..حمدان كان الوحيد اللي ضايع وسط هالحروب...كان طول الوقت في بيت يدته ويا قوم عمه مبارك يالس ويا البنات والعصر يطلع ويا الشباب ويرد عقب المغرب ويكمل سهراته ويا ليلى ومريم وخواتها التوم.....

اليوم السبت راحت ليلى الدوام ويا حصه..وقدمن على اجازه ويلسن في البيت وخلن الشركه وويع الراس...عقب ما ردت ليلى من الدوام من وقت حوالي الصبح الساعه 9:45..شافتهم كلهم في الصاله حريم خوانها وعيالهم عدا سلامه..وسلمت عليهم وطلعت فوق بتوعي شيخه بتروح وياها السوق..وفي حجرتها..

ليلى: شواخي نشي بنروح السوق..

شيخه غرقانه في بحور الاحلام وما ردت..

يلست ليلى حذالها وهزتها شوي: شيخووه نشي بسرعه..بنروح السوق نشتري العاب وملابس..

بطلت شيخه عيونها: وين بنلوح..؟

ليلى: السوق يالله نشي..

ونشت شيخه وغسلت ليلى ويهها ولبستها وطلعت وياها الصاله..وكانوا كلهم يتريقون...

شيخه تغايضهم: هييه بنلوح الثوق..

حمدان: عمتي اسير وياج..؟

ليلى بدون نفس: استريح بسير بروحي..

حمدان استغرب من ردة فعلها البارده..

شمسه: عاد لا تنسينا..

ابتسمت ليلى: ان شاء الله ما عندنا غير شموس وحده.

خلود: هيه وانا الحرمه الشينه مالكم حايه فيني..

شب خاطر ليلى ضو ..ودها تمسكها وتقطعها قطعه قطعه...كانت ليلى طول الوقت تتجنب السوالف ويا خلود..تحس انها ضيعتهم وكانت بتشوه سمعتهم...كرهت حرمة اخوها من خاطرها وما خطر على بالها ابد ان اهمالها ممكن يوصل لهاي الدرجه...

لفت ليلى وسارت حجرة امها وسلمت عليها..

ام راشد: توج واصله على وين المسراح ان شاء الله؟

ليلى مبتسمه: بسير السوق تبين شي؟

ام راشد: من بيسير معاج؟

ليلى: انا وشيخه والدريول...

ام راشد: استريحي ماشي سيره تبين راشد يدوس ببطنج.؟

ليلى مستغربه: وليش يدوس ببطني ان شاء الله اصغر عياله انا..لي حايه وبسير اقضيها وبرد..

ام راشد: ماشي سيره اكسري الشر ويلسي..

ليلى: امايه حرام عليج من زمان ما طلعت شيخه خليني شوي اطلعها انا ما شوفها ابد...

ام راشد: قدمتي على اجازه خلاص بتجابلينها ليل نهار..ماشي سيره يعني ماشي سيره..

ليلى: امايا حرام عليج..

شيخه معصبه: اتي مالث خث...

ليلى ضحكت رغم انها معصبه: اسكتي انتي...

شيخه ونها بتواجع وتطالع يدتها: انا بنلوح اثتري فتان..اتي ما تلوحين..طفثه..

ليلى: شيخه عيب...

ام راشد:هيه هذا اللي علمتيه البنت الخياس بس...شي منه فايده ما تعلمينها...

جرح كلام ام راشد ليلى معقوله كل هاه وما علمتها الا الخياس.؟

ليلى: مشكوره يا امي والله يسامحج جاني ما بعلم بنتكم الا الخياس..

وطلعت ليلى وشيخه تسوي حركات وتتحرطم معصبه على يدتها وقبل يطلعن من الحجره مجابل الباب..

شيخه معصبه وتهدد: اتي ما نوديج اث...

ام راشد ابتسمت وهي تشوف بنت ولدها تتحلف فيها...

وليلى رغم الضيج ابتسمت: شواخي شو تبين امي تسوي في تويز ار اص..عز الله تبينها تلعب بالمراييح...

شيخه: ما نوديها ما نوديها..

ليلى: اكيد ما بنوديها..ولا نحن بنسير اصلا..

وطلعت ليلى فوق والكل يطالعها وحسوا اكيد ان سالفة السوق تكنسلت من يوم حدرت حجرة امها....

................

عقب ما طلعن البنات من الشركه خلفن وراهن فراغ كبير في حياة اثنين في الشركه ما يعرفون كيف ممكن يتصرفون..حمد تم في مكتبه يحس بملل فضيع ما يعرف شو بيسوي...ملان وحاس بوحده عقب ما طلعت حصه كان يفكر الحين بيتحرش في منو وبيغايض منو ومحد يتقبل منه شي غير حصه وعلى تفكيره انقطع بصوت التلفون...تلفون المكتب..

حمد: الو مرحبا..

ناصر: مرحبا حمد شحالك؟

حمد: بخير الحمدلله ..

ناصر: حمد بغيتك في خدمه..؟

حمد: تفضل..

ناصر: في موظفه يديده بتيي بدل مشاعل ممكن وماعليك ام تسير تشوفها والله اني مشغول ولازم اخلص اوراق البنك..

حمد مستغرب: ومشاعل؟

ناصر: ودرت الشركه وردت شركة اخوها...يت ايام وفاة المرحومه تبغي تسلم عليكم ما لقت حد وحولت هناك..ابوها ملزم عليها تم ويا اخوها...

حمد: برايها الا منو هالموظفه..؟

ناصر: مادريبها يمديها تكون وصلت الحين سير شوفها الله يخليك..

حمد: خلاص برايك بسيرلها اشوف وصلت ولا لاء وبخلص لها اوراقها...

صك حمد التلفون ونش بيسير الاستقبال ينشد اذا وصلت ولا لاء..بس وهو نازل تحت شاف وحده غريبه وعرف على طول انها اكيد الموظفه اليديده..روضه اول ما شافته على طول بهتت ما تدري شو ياها بس الاكيد ان حمد من اول نظره ذبح فوادها..ثقلت عليه وطالعته بهدوء وخجل مصطنع...

روضه:السلام عليكم.

حمد: وعليكم السلام مرحبا..اكيد الموظفه اليديده...

روضه حست براحه: هيه..

حمد: تفضلي وياي على مكتبج..

روضه: جدام ولا تحت..؟

حمد مبتسم: المكتب اللي جدامج على طول عقب الممر...

روضه مستحيه: مادل اخوي ممكن توصلني.؟

حمد ما يبغي يسير وياها بس اضطر: اوكي تفضلي معاي...

مشت روضه ويا حمد ما تدري ليش قلبها كان يدق بقوه..هالريال فيه شي غريب شو هو ما تعرفه...غير انه يوم وصلها دخلت مكتب مشاعل الموظفه القبليه ويلست..

حمد:خلاص تقدرين تباشرين الشغل من الحين..

روضه بخجل: مشكور اخوي ما قصرت والله..

حمد: افا عليج اختي هذا واجبنا نتعاون وانتي اكيد مع الايام بتنفعين باقي الموظفين..

روضه: ان شاء الله...

حمد: يالله الشيخه اترخص الحين برد مكتبي...اذا تبين شي كل التحويلات عندج موجوده على المكتب اضربي أي تحويله وبتردج على الادارييين..

روضه: مشكور اخوي...(وبجرأه) ما قلتي لي انت منو؟

حمد لف عليها وهو كان طالع: حمد..حمد خليفه..مدير الماليه في الشركه..

طلع حمد وتمت روضه فاجه حلجها الحين هاللي ساعدها مدير؟؟ بعدها مب مستوعبه..
"يالله يا حلاته مب حلى فيه اشهد انه يقطع القلب..ولا نظرته والله انها ترد الروح..!!مالت علي وعلى ويهي..اذا يومي الاول جي شو بسوي لين تستوي لي سنه في الشركه؟ الله يستر بس..."...

.....................

في بيت بو خليفه نشت سمر ونزلت تحت تدور حد يوصلها المدرسه تييب نتايجها..وفي الصاله شافت امها ويا ابوها يتقهوون ويالسين يسولفون..سلمت عليهم وهي مستعيله..

ام خليفه: على وين ان شاء الله؟

سمر: اليوم النتايج ابى اسير اييب شهادتي..

بو خليفه: من بيوديج؟

سمر: بسير ويا الدريول والبشكاره...

وفي هاللحظه دخلت السياره اللي توصل حصه الدوام...

سمر: هذي حصه ردت بسير وياها...

ام خليفه: الله يوفقج ان شاء الله...

وطلعت سمر الحوش تربع صوب حصه...

حصه وهي تبند باب السياره: اصبحنا واصبح الملك لله...

سمر: حصه ارجوج..

حصه: هاه شعندج انتي بعد شو تبين؟ ارمسي..من قالج نكته على الصبح وتبين تصبحين علي بها...

سمر: محد قال لي شي اباج توصليني المدرسه بسيير اييب شهادتي..

حصه: ايه بشكارتج وانا مدري..؟

سمر: حصه فديتج خلنا نسير محد بيوصلني..

حصه: اوكي اركبي..

سمر: يااااااي انتي فناتك..

حصه: زين جب اركبي وانتي ساكته..

طلعن ويا الدريول وروحن المدرسه..
.
.
في حجرته فوق كان تلفونه يدق وشله بسرعه ما يبغي حد يعرف انه ناش للحين وبعده ما رقد...

ذياب: الو...

هند: يا هلا والله شحالك؟

ذياب: تمام وانتي؟

هند: ماشاء الله ناش من وقت..

ذياب: شو ناش من وقت الله يهديج والله ما رقدت للحين...

هند: افا ليش؟

ذياب:سهران ما ياني رقاد...

هند بدلع: تفكر بمنو؟

ذياب: ما يبالها هذي بعد ..وما تحتاي تفكير..

هند: اوكي متى بشوفك اليوم..؟

ذياب: عقب ما نش...يعني حوالي السبع او الثمان..

هند: خلاص عيل بينا تلفون..

ذياب: اكيد ان شاء الله...

هند: مب تتصل عقب وتقولي اخوك ما خلاك تظهر ولا شي ماشيات..

ذياب حس برمستها نغزه له: لا تخافين بطلع يعني بطلع...

هند: اوكي بنشوف...

ذياب: يالله برايج بحط راسي..

هند: باي..

بندت هند عنه وهو انسدح ورقد على طول..خلاص ذياب من منعوه من الطلعات كمل صياعته داخل البيت...كان يحس بكبت وما يعرف وين يفجره..يلاحظ ان الكل يعامله بازدراء وعنف ويمنعون عنه حريته وهو ريال...يشوف حصه وهي بنت تسرح وتمرح بدون محد يقيدها وهالشي في نظره مب مقبول كونه من منظور نفسه ريال والريال يحق له أي شي..قبل البارحه يوم راحت حصه بيت خليفه قدرت بكم كلمه تقنع حمده وعفرا ما يقولن لخليفه شي ووعدتهن انها تخلي ذياب يصلح غلطته وهالمره يتغاضن عن السالفه وعقب بينهم رمسه ثانيه..ووافقت عفرا هي وحمده على كتمان السالفه عن خليفه...وانتهى الموضوع بالنسبه لهم....

........................

العصر كان يالس يتلبس في حجرته وتعطر ويوم خلص يلس وهو شكله يبى يقول شي ومعزم عليه وما يبى نقاش في السالفه..

راشد: خلود يلسي اباج بموضوع..

خلود: خير ان شاء الله...

راشد: سمعيني للاخر..ماباج للحظه تقاطعيني..

استغربت خلود: اوكي ارمس وانا بسمع...

راشد: سمعي يا خلود...احمد ولد سعيد بن مطر ياني قبل يومين البيت...

خلود: خال شيخه..؟

راشد: هيه...ياي الريال البيت يسلم ويخطب بنتج سلامه..

شهقت ام حمدان: شووو؟ شو يخطب منو؟

راشد بضيج: قلت لج لا تناقشيني لين ما اخلص..

نشت خلود: ليش ما اناقشك ان شاء الله مب بنتي ولي حق فيها؟ ولا شو رايك...ليكون ان شاء الله تبى بنتي تعرس بريال ما عنده مصروف جيبه...وين تباها تطلع من العز للمذله ولا ما يهمك..؟

حرج راشد على الاخر: شو عز وشو مذله تراني ما ييت اشاورج الا ييت اقولج بس...وبعدين انا ما ابغي راي حد بالموضوع حتى امي الا ياي اقولكن والعرس بيتم رضيتن ولا ما رضيتن...

خلود: عيل ليش ياي تقول..اذا بنتك رخيصه بتبيعها بارخص الاثمان وهي ما كملت دراستها شو بقول انا بعد..وين بودي ويهي من الحريم..؟

راشد بعصبيه فضيعه: يوم بتعرفين تربين عيالج زين تدخلي في هالشغلات...

خلود: وليش ان شاء الله مب عايبتنك تربيتي لهم..جد مره سوو شي ولا مسوا سمعتك بشي ولا سمعت حد يرمس فيهم...

راشد ضحك بسخريه: مسكين حالج ثرج الا غافله ويا غافلين لكم الله...

خلود تتأفف منقهره منه...

راشد بقهر اكبر: البارحه بنتج كانت بتضوي واحد لين الزراعه باجر ما يندرى يمكن تدخله البيت لين حجرتها يوم انج غافلة عنها..

انصدمت ام حمدان وتمت تطالع ريلها وهي ما تعرف شو الموضوع..بعدين ظهر عنها وسار فوق لحجرة سلامه...خلاص طفح الكيل وراشد ما عاد يقدر يتحمل اكثر من اللي صار...وين يروم يتخيل ان بنته ممكن تسوي هالاشياء كلهن...

دق الباب بقوه خلت سلامه تنتفض مكانها من الزيغه..

راشد: بطلي الباب ونج الحين تتحرين عمرج بتكسرين بخاطري يوم انج قافله على روحج..

سلامه ماتت من الخوف ونشت تفتح الباب وهي متأكده ان كف محترم بيوصلها..

راشد يدخل: سمعي ماريد نقاش ولا جدال بالموضوع..تفهمين ولا لاء؟

سلامه تطالعه باستغراب: شو ابويه؟

راشد: جب ولا كلمه لا تنطقينها على لسانج؟ ابويه؟ والله ماتشرف اكون ابوج...


راشد: ما يهمني صياحج ..زهبي عمرج وجان تبين تظهرين السوق قولي لي متى الوقت اللي تبين..عسب اظهرج..

رفعت راسها وهي تدمع: ماريد اسير السوق..حق شو اسير بعد...

راشد: اص قلت مابا اسمع حسج..ريال يا وخطبج وبيفكني منج ومن سواد ويهج..وبتعرسين تبين تتزهبين قولي أي وقت تبين تطلعين السوق..وماشي سيرة لدبي ولا هم يحزنون كل زهابج من بوظبي وبس...

سلامه شهقت: ابوي ماريد اعرس..بعدني صغيره...

راشد: صغيره!!! في بنت صغيره ترمس شباب وتبى تنزل راس ابوها الارض...؟

سلامه: ابويه ابى اكمل دراستي حرام عليك..

راشد: ولا دراسه ولا خرابيط تحلمين انتي وايد..وشوفي يا سلامه ماعندي لج رمسه ثانيه ولاني بفايج كل ما برمسج تفتحين لي موضوع خلاص الموضوع مختم بشمع احمر مافيه رمسه ثانيه...عرسج تحدد واليوم برد للريال خبر...

يلست سلامه تصيح من خاطرها وما قدرت تسكت وهو صك الباب بقوه ونزل تحت وسار يكلم امه بالموضوع وعنده موضوع ثاني بعد...

.
.
في فلة ام راشد دخل راشد وكانوا متيمعين في الصاله قوم مبارك وام راشد وليلى وحمدان..ونشن بنات مبارك يسلمن على عمهن وهو يطالعهن بنظرات كلها شك ويشوف ليلى بنظره اغرب منهم بعد..

راشد: امايا ابغيج بموضوع...

شمسه وهي بتنش: يالله يا بنات طلعن الصاله الثانيه...

راشد: لا والله ما تقومن انا ابغي امي وليلى بحجرة الوالد..

انتفض قلب ليلى وام راشد حست بشي غريب...ونشن كلهن الحجره وياه طبعا ام راشد كانت خايفه ما تعرف وش يبغي ولدها...وعقب ما فتح الموضوع وخبرها سالفة احمد ...ليلى ما رمست ونزلت راسها الارض...

ام راشد: بس يا ولدي بنتك صغيره على العرس وين تفتهم له...؟

راشد يطالع ليلى: بتفهم له صدقيني..اللي خلى بنات اول يعرسن وهن بنات 12 و13 سنه بيخلي سلامه تمشي حياتها...

ام راشد: والله يا راشد البنت بنتك مالي شور عليها وجانك ياي تشاورني ما بقول غير الله يوفقك وينولك اللي فبالك...

ليلى بتردد: راشد سلامه وايد صغيره على العرس..وانت تعرف ظروف بيت احمد وتعرف ظروف بيتك..تتوقع سلامه تتأقلم مع الوضع.؟

راشد: ما عندي هاللف والدوران بتسير له وراسها في الارض..وماعليج من عرسها وعيشتها خلاف..كل شي بيوصلها لين البيت وما بيقصر عليها شي..

ام راشد: بتصرف على بنتك وهي بذمة ريال؟

راشد: هيه مافيها شي...الريال بعده حالته صعبه شوي ولازم نساعده...

ام راشد: وشاللي حادنك على عرسها وهي بهالعمر بريال ما عنده شي...

راشد يتنهد بعصبيه: ماعليه ياامايه احسن ما تعرفين...

ام راشد: بنتك بييها نصيبها لا تستعيل..هكوه عمتها جدامك للحين ما عرست ما قالت شي..

راشد: ومنو قالج ما بتعرس ليش شورها براسها مالها رياييل تتنشد عنها...

ليلى استغربت..

راشد يكمل:انا طبيت الموضوع يوم استوى عزا المرحومه مرت عبدالله..والحين برد افتحه وانا ما اشاورج فيه كثر ما اني اجبرج عليه...

ليلى تطالعه بنظره غريبه..

راشد: ولد علي بن بطي..فلاح رمستج عنه...رد يخطبج مره ثانيه...الحين شو تبغين؟ شو عذرج ما توافقين...؟

ليلى بعصبيه: ماريده مب غصب العرس..

راشد: الا غصب شو مب غصب.؟ شو تبين انا ماريد يتم في هالبيت بنات يكفيني اللي شفته من بنتي...

ليلى: وتتحراني شراتها يعني؟

ام راشد مثل الاطرش في الزفه تطالعهم..

راشد:ما برده ولا تراني عند كلمتي والله ما شي شغل ولا طلعه ...

ليلى تطالعه اول مره يهددها: يعني انت جي تغصبني؟

ام راشد: وانتي ليش ما تبينه ؟ تترين منو ان شاء الله؟

ليلى انصدمت من موقف امها: ماتريا حد..

راشد: زين انا بخليج يوم واحد تفكرين به عسب ارد على الريال...اقول انا انتي العاقل اللي لازم اخذ شورها بس اقولج انا مب ياي اخذ شورج وبتعرسين غصب..

ليلى وعيونها مركزه عليه بقوه: راشد ماريده...

راشد حب يضغط على ليلى بشي ما تقدر تعيش بدونه...

راشد: عيل يوم ما تبغينه تمي عند امج..والبنت بخليها ببيت خالها يدتها وخالتها يربنها...مب في حايتج انتي وحده تشتغل ومب فايجتلها...

ليلى شهقت كل شي ولا شيخه...

ليلى وعيونها انترسن دموع: راشد كل شي الا شيخه ارجوك...

عرف راشد ان هالوسيله الوحيده اللي ممكن تغير راي ليلى..

ام راشد: يا بنتي الله يهديج وافقي خلنا نفرح بج وبعيالج وخلي المعاند ولا تيبسيين راسج...

ليلى ودموعها على خدها: عطني وقت افكر مع نفسي شوي...

راشد ينش: اوكي خلاص باجر ابى ارد لهم خبر موافقتج الشخصيه...

ام راشد: يالله عسى ربي يوفقج يا بنتي ان شاء الله...

طلع راشد وام راشد ظهرت لشمسه وبناتها...

اما ليلى على طول شلت عمرها....وتمت تصيح لين ما قالت بس...حست بحزن فضيع وان الكل يستغلها كونها يتيمه ولا تقدر تتخذ قرار مناسب لنفسها..كانت وحدتها اليمه الحين لازم توافق لازم..
"لازم اوافق ..لازم اضحي بحياتي وسعادتي عشانها..مالي غيرها وانا وعدتك يا سيف ما يربيها غيري...ليش ليش..."وتتذكر" كيف هنت عليك يا ناصر..لو انك صنت اللي كان..ما كنت بكون بهالحال..حرام عليك والله حرام...شفتني من عقب ما بعت اللي كان ؟ شفت..؟ لو تشوف حالي رديت وانته نادم على كل ثانيه فكرت فيها تجرحني..ليش يا ناصر ليش؟"

تمت تصيح من خاطرها ما حست بعمرها الا وهي تنش عقب الالم على ورق دفترها تعصرها اللحظات المريره ...يمكن الحزن يتألم لحزنها...ويروف بحالها وعلى ورق الزمن الخاوي من الاحساس..

" يتيمه وبس وش ذنبي ..وعقبك يالابو من لي... غريبه في دنيا مجنونه... تدور وبس ما ادري ...لا أخو بحالتي يدري ..ولا عم ولا خالي يشفي.. ادور لك عذر عندي ...رحلت من دنيتي بدري.. تركت الدار والخلان... وتركت عيونها تبكي.. قريب وغريب يا بويه... اعيش الهم وما يدري... وأدور في دنيا مجنونه.. غريبه وأبد ما ترحم... وأصيح الخال ويا العم ...وأقول العون يا عمه.. ولكن عقب أبو وأم ..من يسأل ومن يرحم.. ومن يمسح دموع ايتام.. في دنيا كبار ما ترحم ..واصيح بعالي الصوت واتنشد.. عن اللي غابوا من اعوام... يقولوا ابد محنا اغراب.. ولكن يا بوي ما هو بدم... اللي جمعنا ما هو بدم... معقوله اصيح ولا يدري... وآهات تشق الصدر ولا يدري ...يقول اخو وانا اعلم.. ولا هو داري بناري ولا يعلم ..يتيمة بس وش ذنبي... وعقبك يا الابو من لي"

.
.
راشد من طلع من البيت على طول اتصل في احمد...لانه هو اللي بيقرر مصير بنته بايده ما بيتريا قرارها شرات اخته ليلى..

راشد: خلاص مبروك يا بو شهاب وافقوا الاهل...

احمد انفجع بعدما كان عايش في كابوس الرفض:والله؟

راشد يضحك: الف مبروك يا ريال...

احمد مب مصدق: الله يبارك فيك..

راشد: بس ترا العرس بعد ست اسابيع بس..

شهق احمد: بس انا مب مستعد وبعدني للحين ما استقريت ماديا..

راشد اللي يبى يفتك بسرعه من بنته: ما عليك يا احمد نحن شارين ريال ونحن اللي بنقوم بعرس بنتنا...

احمد: بس اعتقد باقي لها سنه حسب ما قالت لي الوالده..

راشد: ما عليك من الدراسه بتطبها شلها فيها المره لها بيت ريلها وبس...

احمد مستغرب بس عيبه العرض: عيل بالبركه ان شاء الله يا بو حمدان...

وتموا يسولفون شوي وعقبها بند راشد عن احمد اللي المجره كلها مستحيل توسعه من الفرح عقب هالخبر..ولا يدري ليش ابوها يبغي يتكفل بمصاريف عرس بنته وليش مستعيل هالكثر وليش ما يباها تكمل السنه الاخيره لها...؟

كلها اسئله ما كان لها وقت معين في خيال احمد اللي على طول بيطلع من مكانه ويسير بأقصى سرعه لامه ورضيعته يخبرهن احلى خبر سمعه في العالم كله واخيرا الايام قربت وما بقى شي على بيت يجمعه هو ويا غناة الروح...

في بيت بو ناصر كانوا يالسين في الصاله كلهم قرب المغرب...وناصر كان ضايج وحالته حاله...

بو ناصر : شو رايك تملج يا ناصر؟

ناصر اللي تفاجأ:لا مب وقته...

ام ناصر: وليش مب وقته الا املج وخلص عمرك والعرس بشهر تسعه...

بو ناصر: هيه انا ما قلت لك..ترانا جدمناه العرس..

ناصر شهق: ما يكفي اني مغصوب تجدمون وتردون على كيفكم وانا بنت مالي شور..

فهد: تو الناس..

ناصر: شو هالحياه قسم بالله لاعت جبدي..

بو ناصر: لاعت جبدك من شو؟

ناصر: يا بويه انا مب ياهل بنت خالي ما تبونها وخلاص ليش مستعيلين تطيحون الثانيه على قلبي..خلاص عاد خلني اختار الوقت اللي ابغي بنفسي..

بو ناصر: ونحن مب عايبنك شورنا..خلاص صرت ولد نفسك مالنا كلمه عليك...

ناصر:افا عليك يا بويه من قال...انا اقول ماله داعي هالوقت..

بو ناصر بعصبيه: خلاص صرت ولد نفسك مالك كبير...

ناصر تأفف..

بو ناصر: وتتأفف بعد اشهد انك عاصي وعاق ما فيك أي سمع ولا طاعه لوالديك..

فهد نش.. تعب وكره حياته من هالحرب اليوميه..وناصر انقهر ونش عنهم وطلع برا....نش عنهم ضايج وركب سيارته وقلبه يدق بعنف خلاص مب قادر يتحمل...ويته فكره جهنميه وقرر يطلع حرته فيها...

"انا ابغي ليلى شو ممكن يصير لو رفضت اروى...لي ما اوقف بيووهم وادافع عن اللي ابى..ليش؟ شو اللي يمنعني ؟ ابويه؟ ماي يخصه فيني..ولا هو اللي بيعرس..وجانه يبغي يزيد استثماراته مب على حسابي انا...اروى هذي بنفس لازم اروح واقولها اني ما ابغيها..هيه صدق ما ابغيها..وانا ماريد الا ليلى وحتى لورفضتي الحين ..عقب ما تعرف ان سالفة عرسي تكنسلت مالها غيري ومالها مرد الا لي انا..."

مشى ناصر بموتره صوب بيت عمتهم ووصلهم يايب وياه الخبر اللي بيحطم كل التوقعات...

وصل ناصر البيت وقرر يقول لاروى كل شي واللي فيها فيها ما بيخسر اكثر من اللي خسره من قبل...دخلوه الميلس تقهوى وعقب قال لعمته انه يبغي يسلم على اروى...

يته اروى وكل الشوق بعيونها كلها لهفه وحب..مجرد ما دخلت قلبه تم يتنافض وحست بشي مختلف غير عن كل مره..حس بالفرحه في عيونها والامل في نظراتها..حس بحب جارف من صوبها له هو...

غصبا عنه نسى الكلام وضاعت الحروف وما عرف ليش يا وشو كان بيقول...فرحتها به كسرت خاطره خلته يشفق عليها اكثر من انه يحطم احلامها..ما عرف شو يقول وشو سبب زيارته بس الاكيد ان شجاعته خانته وما عرف شو يسوي...

اروى: والله بس ياي عشان تسلم..

ناصر متردد: هيه ييت اسلم عليج..

وبدون شعور ولا احساس: بغيت اشاورج في شي؟

اروى: اكيد قول بسمعك..

ناصر: ابويه يبغينا نملج الحين ..شو الراي...؟

احترقن خدود اروى من المستحى ووخت راسها الارض...براءه فضيعه في البنت...

ناصر مبتسم: بخليج تفكرين وعقب ليله ثانيه بيي اسمع ردج ..شاوري عمتي..

اروى مبتسمه: خلاص ان شاء الله..بس عطني وقت افكر واشوف اذا اقدر للملجه الحين ولا صبر عليها...

ناصر: خلاص على خير..

نش ناصر عن اروى وهو مب عارف كيف قرر يروح لها ووين راحت الرمسه اللي كان مزهبنها..كيف ضاعت وهو ياي ينهي كل شي وبدل ما ينهيه بناه وبدا يبداه من اول ويديد...كانت مشاعره تتضارب اذا خلى اروى شو اللي يضمن له ليلى توافق عليه؟

قرار نهائي انهى فيه ناصر كل صراعه مع نفسه وقرر يتزوج اروى وينسى كل شي لان الاحلام احيانا تسبب التعاسه..

في الفله العوده عقب ما انقطعت العلاقه من بينهم وصارت بس رسميه وجدام الناس لا غير..كانت نازله من فوق على الساعه 4:30 العصر بتسوي لليهال عصير قبل يسيرون النادي اللي مسجلين فيه هالصيف..شافت ان ريلها للحين ما نش من رقاده وهو على العاده ينش الساعه اربع ويطلع ويا ربعه لين الليل ويي يرقد بس..كانت سلمى صابره على هالحياه عشان خاطر عيالها بس..ولا كرامتها ما تسمح لها تيلس ثانيه وحده وياه عقب اللي سمعته..كانت ساكته عنه وهو ما يرمسها الحين هي في شهرها الثالث وابد مب مسويه لريلها سالفه اللي يقول مستحيل يهتم به ولا يسوي له شي..وحتى انه اغلب المرات يغلط عليها ويقول لها بتمين هني ولا بطلقج لازم تيلسين عند اليهال تجابلينهم..

ردت سلمى فوق رغم كل الظروف والجروح في قلبها بس ما تنكر ابدا انها تحب حامد ما تقدر تكرهه في يوم وليله وما تقدر تخفي احساسها بالحنان والوله صوبه..في النهايه هذا ريلها..حاولت تدخل حجرتهم بشوي شوي عشان ما ينش وعقب بتشوفه شو استوى عليه ..بس للاسف كأنها طلعت عشان تجرح نفسها اكثر..

حامد: خلاص عقب باجر ان شاء الله بسير ارمس ابوج رسمي...

وقف قلب سلمى...

حامد: مادري والله...لا لا تحاتين كل شي بخير..حرمتي ما يخصها وماظني تتدخل في زواجي واموري الخاصه...(يضحك بصوت عالي) لا فديت روحج انتي غير وبتمين غير..شو تبين تقارنين عمرج فيها..بالعكس انتي الامره الناهيه..تعرفين والله مافيه صبر ليوم الخميس..(يرد يضحك) فديت اللي يستحون..

بلعت سلمى ريجها بقهر وفتحت الباب وسوت عمرها عاديه جنها داخله بتاخذ شي وبتطلع وهو يوم شافها ويهه تغير...

حامد: خلاص بخليك الحين اشوفك عقب ان شاء الله..

وبند وسلمى انقهرت اكثر واكثر وحست عمرها تبى تجتله...

سلمى وهي تلف عليه بعصبيه: ايه انت انا مب خبله..خلك عادي ولا تسوي لي عمرك البرئ اونه بخليك..يعني تتحراني ما سمعت رمستك عند الباب..

حامد: وخير يعني؟

سلمى ميته من الغيض: الله ياخذك انت وياها قول امين..

حامد: وانتي ويانا ضربه وحده..

سلمى: انت شو استوى عليك..تضحك عليك بنت من الشارع ..اسميك واحد مقصة حريم..

حامد: يوم خذتج قولي عني هالرمسه الحين عرفت اختار اللي ابى مب هليه يختارون لي..

سلمى: ليش غصبوك هلك وضربوك على ايدك غصب تعرس..؟

حامد: يعني جي..قولي اللي تبينه انا بسير اسبح وراي مشوار..

ودخل الحمام وهي تمت محترقه مكانها عقب شافت تلفونه..شلت التلفون وطلعت الممر بين الحجره والصاله اللي برا...ودورت رقمها واتصلت على طول..كانت سلمى تفكر بعفويه..وقصدها تبرد قلبها من اللي يصير...

سلمى تمت ساكته..

مها بصوت كله دلع: حياااتي..

سلمى احترقت: حته تحت حياتج قولي امين ..

مها شهقت:منو انتي؟

سلمى: انا اللي اسأل ولا انتي؟ انا اللي اتخبرج من انتي ولا انتي تسأليني؟

مها تسوي عمرها بتصيح: انتي قليلة ادب ما عندج ذرة احترام..كيف تتصلين على موبايلي وتسبيني؟

سلمى: انا الحين سبيتج؟

مها :يالخايسه يا قليلة الادب بخبر ريلي عليج والله..

سلمى منقهره صدق: يا حافظ عليج وريلج هذا من وين ياييبتنه ان شاء الله..اكيد من الشارع شرات هالخديه اللي عندي...

مها سبتها سب وصخ وخايس وعقب بندت في ويهها..وسلمى مسحت الرقم من المكالمات الصادره وفرت التلفون على الشبريه وطلعت..

نزلت الصاله لعيالها تشوفهم وتيلس وياهم قبل يطلعون..ويوم ملت اتصلت بيت اهلها بترمس امها..

سلمى: قولي والله؟

ام خليفه: وليش احلف ..انا ما اكذب عليج..

سلمى: بسير لهم الحين..

ام خليفه: لا استريحي مكانج وين حامل وتسيرين لهم خلج الا بتتعبين..

سلمى: اللي يسمع يقول اول حمل مب جنه الرابع..

ام خليفه: الله يسهل عليج يا بنتي..

تمت شوي تسولف ويا امها وعقب بندت وطلعت الحوي شوي..وسمعت حامد يزقرها..

حامد: تبون شي من برا؟

سلمى: لاء..

حامد: بتعشى اليوم عند ربيعي لا تتريوني..

سلمى: ربيعك؟

حامد: ايه ربيعي..ارمس عربي انا ما قلت ربيعتي..(ويبتسم بلؤم) لو كنت رايح لها بقولج ليش اخبي..

عطته سلمى نظره وصلته تحت الارض..وعقب طلع وخلاها..كانت رغم احساسها بالقهر منه بس بعد خايفه لو يدري انها اتصلت في هاللي ما تتسمى..تخاف من ردة فعلها ومن تصرفه لو عصب...






نش من الرقاد الساعه 5:00 العصر يحس بصداع فضيع براسه مب قادر منه انه يبطل عيونه وتم يتجلب في فراشه في محاولات مستميته منه انه يرقد بس للاسف لا الرقاد راضي يكتمل ولا الصداع راضي يخوز..غمض عيونه بألم وتنهد من قلبه بعدما غزته وحده عنيفه ومب عارف منها وين يي ووين يروح كل اللي يعرفه انه غدا وحيد ومحد حواليه بدون استثناء اللي يحبهم واللي يعزهم ..في ناس راحت بدون رجعه وناس الله العالم شو تفكر لكن امله كبير فيها..في محبتها وفي حاجتها وفي حنانها وامله اكبر في قلبها الكبير..هي الوحيده اللي ممكن تفهمه وتحبه غير عنهم ومستعده تدافع عنه لو شو ما صار ومهما كانت الظروف..

ابتسم حمد بعفويه وهو يتذكر موقفه ويا حصه ايام العزا...

حصه وعيونها كلها دموع: تريد تلومني ... اوكي حمد لومني ... اذا هالشي يريحك انا ما عندي مانع ... على الاقل اذا ما اسوي هالشي عشانك فأنا اسويه عشان بدريه ... عشان الانسان الي حبته بدريه وخلتنا نحبه وياها .. لا تخلي الناس تصدق انك سبب موت بدرية لا تعطيهم مجال يلومونك...

ابتسم صدق من خاطره وهو يستعيد ملامح ويهها وانفعالها وهي تقوله بصوت متقطع " عشان الانسان الي حبته بدريه وخلتنا نحبه وياها"

كانت حصه ترمس بعفويه ذاك اليوم وكانت تبغي قد ما تقدر ترفع معنويات حمد ولكنه كان معصب عليها...

حمد مبتسم"صدق اني غبي والله كيف كنت وايد جاسي عليها..!!! حصه يا حليلها والله اشتقت لها هالبنوته وايد..اشتقت اكثر لمغايضها.."

حس بالصداع يزيد عليه لكنه نش وتوضى وصلى العصر متأخر وخذ تلفونه واتصل في عبدالله..

عبدالله: يا مرحبا ملايين وما يسدن..

حمد: المرحب لا هان شحالك ولد عمي.؟

عبدالله: الحال اللي خليتنا فيه مب احسن من اللي نحن فيه الحين..

حمد: على حطت ايدي؟

عبدالله: حالي ما يتبدل يا ولد العم..

حمد تنهد: وش اخبارك بعد وشو مسوي ان شاء الله امورك تمام؟

عبدالله: الحمدلله ماخذ لي اجازه اسبوع..

حمد: اووه زين في تطور وليش اسبوع بس؟ الا اقول شو هالحشره اللي حواليك ليكون بس عرست وما قلت لي..

عبدالله يبتسم: اعرس!!!! انا اعرس!!! يا خي احلامك تنافس ناطحات السحاب الله يخليك ابعد عني هالسيره..انا والعرس صار بينا مفترق ما نلتقي عقبه..تقدر تقول اني انا والعرس صرنا مستقيمين نمشي بنفس الاتجاه تتوقع ممكن نلتقي؟

حمد: يالله على الفلسفه العجيبه ما تنلام علمي لازم..

عبدالله: الحشره هذي طال عمرك بنات عمك وبنات ولد عمك عندي معسكرات هالاسبوع ..

حمد: زين والله يعني البيت ربشه..ولا تعزمني..؟

عبدالله: لو بنات خليفه محد جان عزمتك بس.....

حمد: بس شو؟؟ استريح اصلا مستحيل ايي دبي...مب فاضي..

حصه ترمس عبدالله: منو ترمس؟ تعال يالله بنطلع...

عفرا: عمي يالله تأخرنا..

حمد سمعها: قل حق اختكم المصون يوم الرياييل ترمس خلها تيلس بعيد مب بكيفها تتخبرك منو ترمس..

عبدالله ابتسم: حصوه سيري داخل برمس حمد وبرد..

انتفض قلب حصه من سمعت اسمه وحست بنضبها يتزايد كانت تحس بضرباته عنيفه وحتى عبدالله انتبه لملامحها بس طنش وكمل رمسته ويا حمد..

عبدالله: شورايك تيي يوم الخميس تتغدا عندنا؟

حمد: فضيحه كلكم بنات..

عبدالله: وانا صرت بنيه؟

حمد: واحد بس يالله بقبل عزومتك وبنشوف شو تطبخون..

عبدالله: اللي يسرك بس قبل تيي دبي هات ورقه وقلم ولا احسن اكتب الوصيه وخلها عند امي ولا ابوي...

حمد يضحك: زين والله بنشوف دام السالفه فيها وصيه انا بييب لكم العشا..

عبدالله يطالع حصه ويبتسم: اقولك عندي حصه تسوى الف مطعم البارحه متعشي عشا ولا منه انصحك تيي..

تلونت حصه ستين لون وهي تسمع مجاملة اخوها..

حمد: حصه ما تعرف تصب الشاي عدل في الكوب تباها تسوي غدا..يالله يا عمي العب بعيد..

نقع عبدالله ضحك: اوكي اوكي كل شي واصل..الحين يا بو الشباب البنات حشرني لازم انزل وياهن السوق..

حمد بمغايض: هيه لعبن بك البنات الحين بيحوطنك في المراكز...

عبدالله: محد لعب بي ولا شي بس حليلهن يبن يطلعن..

حصه بعصبيه: قوله لا يتدخل اخونا وكيفنا...خله يتحكم في حرمته مب فينا...

حمد انصدم من رد حصه العنيف: يالله برايك بينا تلفون عقب...

عبدالله: اوكي الله يحفظك..

بند عبدالله وشاف سمر وحصه وعفرا جاهزات طبعا كانت فكرة حصه انها تطلعه هي وحمده من هالسجن اللي حابس عمره فيه وفكرة عفرا انهم يتعشون برا يغيرون موده شوي...عبدالله رفض في البدايه بس جدام اصرارهن ما قدر يتمسك بقراره ووافق وقرروا يطلعون الليله مع بعض...

وفي السياره عقب ما طلعوا..

حمده: عمي سواقتك رهيبه احسن من سواقة ابوي...

عبدالله: اكيد..

عفرا: هيه اكيد..ودك يا عمي تكون سواقتك مثل ابوي بس..

حصه: يالله على سوالفكن ياليهال...

سمر: حطولنا شي يربشنا احس بملل...

عبدالله: سمووره قولي نكته ملان ومن زمان ما سمعت شي..

سمر تشققت: والله؟

حصه تبتسم: ترا مصدقه عمرها اول مره حد يوله على خبالها...

عبدالله: يالله سمر قولي..

سمر: بعدني مب متجهزه ولا في بالي شي الحين سولفوا لين ما اذكر..

حمده: عيل بنتريا لين عقب العشا..

عفرا: انتوا مخططين الحين وين بنروح...؟

حمده: بنسير السيتي سنتر..

عبدالله بطرف عينه: ويا ابوج سيري السنتر مب وياي..

حمده: شو فيها عمي عادي..

عبدالله: مب عادي عندي..زحمه وتعرفين اجازه وكل خلق الله متيمعين فيه وانا وين الحق اطالعج انتي واختج ولا اشوف خواتي..ماشي سناتر فكرن في شي ثاني..

عفرا بهدوء: شو رايكم نروح الخور.؟

ابتسم عبدالله على طول: اوكي فكره حلوه..

حصه: وانا موافقه..

حمده متأففه: اوكي..

سمر: النكته يت يالله هدووء عشان تسمعون...

عبدالله يضحك: قولي..

سمر: بدوي حب يجامل ربيعه في عيد ميلاده شرا له كيكه وحط عليها ذبيحه..

انفجر عبدالله وهو يضحك عليها: والله فنانه..

حصه تتمصخر: وايد!!!

عبدالله بهمس: حرام عليج لا تحرقين شخصية اختج خليها تكون نفسها ويكون عندها ثقه في ذاتها..مب شي انج دوم تحقرينها..تحتاج الشد منج والعون تراج قدوتها...

حصه ما اهتمت وحمده زعلانه عشان ما ودوها تتحوط وعفرا ساكته وسمر تسولف لهم...وكملوا مشاويرهم وساروا للخور..
.....................

في بيت ام ناصر دخل فهد الصاله ولقى امه وهي يالسه تنقي حب..ويلس حذالها يستهبل يبا يرمسها في موضوع..

فهد: امايه..!!

ام ناصر: شعندك..؟

فهد: ابغيج في موضوع..

ام ناصر بدون ما تطالعه: وشهو؟

فهد: ابى اعرس..

رفعت ام ناصر راسها بسرعه تطالع ملامحه وهو تم يرمش بعيونه اونه مستحي وحط كفوفه على ويهه ونه استحى..

ام ناصر متردده: فهد انت ترمس من صدق ولا بس بتعور لي راسي...؟

فهد مبتسم ابتسامته المستخفه: والله ارمس جد..وييه امايه صكيت الثلاثين وابى اشوف عيالي ..

قلب ام ناصر يدق بسرعه مب مصدقه:وايييه فديت روحك انا ما بغيت تقول هالكلمه يا علنيه ما ابكيك يا فهد يا ولدي...

فهد متشقق: امايه متى العرس..

ام ناصر تدزه بكفوفها بعيد: خل نخطب اول ونفكر من العروس..

فهد: ومنو العروس؟

ام ناصر: انت مب حاط في بالك حد؟

فهد يمثل انه مستحي: استحي اقولج...

ام ناصر معصبه: خل عنك المياعه قول تبغي بنت منو؟

فهد: بنت ابوها...

ام ناصر: والله ما عندي شغله يوم ابغيك تعقل وتغدي مثل العالم والناس..شعندك انت ترمس من صدق ولا تضحك علي..

فهد يضحك: فديت اللي تعصب انا وقسم بالله ما عندي حد( يتنهد وهو مبتسم) كانت وحده وراحت ولو انها يابت بنوته حلوه مثلها كنت بخطبها بس للاسف كل ذريتها شباب بس ما علينا ( ويحط ايده على كتف امه ويغمز لها) ثقتي في عيوزي كبيره واعرف ذوقج لا يعلى عليه وحرمتي انتي اختاريها...

تشققت ام ناصر : وييه يعل عيني ما تبكيك فديت روحك فديت عمرك يا فهد يعلينه ما خلى منك يا بعدي...

فهد يبتسم بدلع: فديتج ماماتي احبج..

دزته ام ناصر بعيد وعصبت: فهد بسك من حركات الخياس هذي قوم جابل شغلك..

فهد: فديت اللي تستحي..

ام ناصر تنش: والله ما فيك ذرة حيا مضيع المذهب انت..

فهد يمط ايدها ويحبها: حياتي يا امي والله اموت فيج..

ام ناصر تير ايدها من كفوفه: وخر وخر عني انت وحركاتك هالماصخه...

ويدخل عليهم ناصر...ويشوف فهد يمط امه من ايدها ومب مخلنها في حالها..

ناصر مبتسم: شو تسوون؟

ام ناصر: بتلحقني من خوك ولا وش رايك؟

ناصر: فهد لا تأذي امك...

ام ناصر: وايد عليك..

فهد: اقول نصوور خوفتني..اسمع بقولك متى العرس فيني هبه وابى استخف...

ام ناصر: روحك مستخف ما تزداد..

ناصر: مادري الشور شور الحريم في العرس مادري زهابهن هاللي يباله سنين لين ما يخلص..

فهد يعدل يلسته: اشوف تأقلمت ويا السالفه ما تلاحظ.؟

ناصر يهز كتوفه: شنسوي بعد كل شي يمشي عكس اللي نبى...مب بإيدنا هذي الاقدار..

فهد: والاراده مالها راي؟ مالها اعتبار..؟

ام ناصر: فهد اسكت عن خوك ولا تمزر راسه افكار بطاليه خل الريال يعرس ومالك شغل به..

فهد: اييه يالدنيا الحين انا اللي اعلم نصور الحركات مب هو اللي معلمني ولا نسيتي..؟

ناصر: اسمع انتوا؟

فهد: خلنا في موضوعنا صدق انت خلاص معزم وناوي؟

ناصر: الحمدلله اللي الله كاتبنه فيه الخير مالي نصيب في بنت خالي شو تباني اسوي اغير القدر.؟

فهد: بسألك شي بذمتك انت كم امنيه تمنيتها وحققتها؟

ناصر: بصراحه عمري ما تمنيت شي وتحقق كل احلامي تروح بلا رده..

فهد: تعرف ليش؟لان ما عندك اراده انت مب قوي كفايه تحافظ على احلامك..مب قوي كفايه تتمسك باللي تبغيه..عشان جي بتم طول عمرك تحلم واحلامك تفشل..

ناصر: فيلسووف ماشاء الله..

ام ناصر: ما عليك منه خله هالولد يخربط مادري شعنده اليوم الا ما خبرتك يقول يبغي يعرس..

ناصر: لا والله؟

فهد: هيه بعرس خلاص بودع العزوبيه بس اترياك تسويلنا درب وعقبها بنعرس..

ناصر: خلاص يا ريال هانت ما بقى شي الا شهر واعرس انتهى الموضوع..

ام ناصر: الله يتمم بخير ويوفقكم ويكحل عيني بشوفة عيالكم..

طلعت ام ناصر الحوي وناصر وفهد ظهروا ويا بعض عند ربعهم الشباب عقب الفكره اللي حطها فهد في راس امه وانه يبغي يعرس..اما ناصر اللي كان حاله مهوب بحال قرر انه يسكت وماعاد يصارحهم بشي ويحتفظ بأوجاع قلبه لنفسه وما فيه زود يتحمل..كان الصمت وسيلته الوحيده يخبي عنهم فيها مكنون قلبه..حبه القوي والجارف اللي عمر الايام ما بتقضي عليه ولا بتكون في حرمة تستحق انها بس تكون مكان ليلى ولا حتى بأقل من منزلتها شوي...حب ناصر الجارف اللي صار في عالم الصمت...

...................

الصبح الساعه 10:30 يالسه في حوي البيت تعابل ويا وحده من البشاكير في الزرع وييها ريلها ويصبح عليها...ويسولفون وعقبها يدش داخل وهي وراه ويشوفون حد ياي من بعيد من الفله الثانيه...وفي صالة البيت العود...

ام خليفه: اللي شفته خليفه؟

بو خليفه: مادري ما شفت عدل...يمكن هو..الا وين ذياب..؟

ام خليفه تتنهد: مادريبه فديته يمكن راقد..

ويدخل عليهم خليفه...ويسلم على امه وابوه..

خليفه:والله ناش من وقت اليوم البارحه رقدت مرتاح ومهدي من صدعة الراس..

ام خليفه: فديتك من شو مصدع..؟

خليفه: من هالبنات اللي يابن لي المرض..

بو خليفه يضحك: اتحمدلله انهن ثنتين ...لو مبتلي بعشر شو بتقول..؟

ام خليفه: ما يندرا باللي مكتوب يا بو خليفه يمكن بنت اخير عن عشرين ولد ولا شو رايك.؟

بو خليفه: وانا اشهد ان بناتي ماشي منهن مريحات فوادي..

خليفه: ايه ماشاء الله ونحن اللي فاضحينكم...؟

بو خليفه: وانت وخوك عبدالله ما عليكم قصور الا هالذياب مادري من وين الله حذفه علي..

خليفه تذكر: الا وينه انا ياي ارمسه..

بو خليفه: بشو؟

ام خليفه: خلك منه يا خليفه يكفي ذاك اليوم وش سويت فيه..

خليفه: وانتي عيبج اللي سواه في حصوه المسكينه هذي مهما كان اخته اللي اكبر عنه وما يحق له يرمس عنها جدام اللي اصغر منها جي اصلا ما يحق له طول يرمس ويعلي صوته عليها....

ام خليفه سكتت..

بو خليفه: خبرني شو تبغي ذياب؟

خليفه خبر ابوه سالفة الصاعقه وكل اللي صار بينه وبين عبدالله..

بو خليفه: ونعم الراي والله كيف ما يالي على بال..؟

خليفه: يعني انت موافق..؟

بو خليفه: هب الا موافق بس الا ابصم على العشر بعد ..

خليفه: عيل يوم السبت نخلص اوراق الالتحاق وكل شي..

بو خليفه : على خير ان شاء الله..

وشوي وتدخل ساره عليهم يايبه وياها الريوق ويلست ويا ريلها وعمامها وتريقوا كلهم ويا بعض عقب ما اتفقوا على سالفة ذياب واقروا كلهم بالاجماع ان ذياب يدخل الدوره العسكريه ويفك الجميع من شره ربهم من يدري يمكن تصلبه وتخليه يغدي شرا العالم والناس..
.....................

في شقته الفخمه رغم ان محد يسكن فيها الا هو حتى ربعه ما يداني ييبهم لها...يالس لروحه ما يبى يفكر في شي ولا يسوي شي كل اللي يهمه نفس وشو وصلت له من عذاب وتعب وضيج ووحده...كان ضايج ويفكر متى يي يوم الخميس ويسير دبي ويشوف حصه ...في داخله مشتاق لها موت ومشتاق اكثر للتحرش فيها ومناظرها بنظرات تسم الروح..بس مع هذا صدق يحس بقلبه وله عليها..ما يدري ليش كلما طالع كبته وشاف منظر الظروف والاوراق والقصايد والاشرطه يتذكر اللي صار يتذكر كل شي اليم من ايام مضت وغدت الحين ذكرى بارده في قلبه رغم ان قوة الطعنه بعدها للحين تسري في جوفه...ويحس بألمها للحين..طرت على باله روضه ووعفس ويهه بقرف وهو يذكرها ما يحب البنت اللي ترمي نفسها على الريال ويموت في الثقاله رغم انها معدومه في حصه...

"حصه يت على بالي والله يابها ...ان ما راويتها على كلمة ماله شغل..هين يا حصووه والله وطلع لج لسان بعد تقولين مالي خص خله يتحكم في حرمته..انا براويج شغل الله عدل فيكن يالحريم..مستقويه يوم انج عند اخوج بس ما عليه بشوفج الخميس الياي والله لطلع هالكلمه من راسج واخليج تعرفين ان مالج شور في هالدنيا وراس حمد ولد خليفه يشم الهوا"

نش من الملل اللي فيه وسار صوب ادراجه وسحب اوراق جديمه مر عليها اكثر من ست سنين ويلس يجلب فيها ويطالعها وابتسم..كان يفكر انه مستحيل يعيش عقب ذاك الالم اللي حسبه ولكنه عاش ولعب واستهبل وضحك وعور قلوب كثيره...

" سبحان الله نفقد ناس ونفكر ان الحياه مستحيل تستمر بدونهم ولكننا بدون ما نحس نعيش حياتنا واحيانا ننساهم واحنا كنا نفكر ان التنفس صعب في غيابهم.."

يت في باله بدريه واعتصر قلبه الم وتبدلت ابتسامته لالم فضيع في قلبه...مع هذا تماسك وهو يتنهد وقرر يكون طبيعي..اذا من الحين حس بإنهيار عيل شو بيسوي يوم بيروح الخميس الياي بيتها ويشوف ذكرياتها ويشم ريحتها في اركان البيت...

فتح الكبت وهو مبتسم بمراره وير منه ورقه وطالعها بغرابه وعقبها خلاها على ينب وصك الكبت ونش شبريته وانسدح وهو يقرا فيها..
" عـفا الله عن خطا غدر الخناجر والضلوع ابطال...بـسامح واتـرككتـحت الـظلام الحالك لحالك...دخـيلك وفـرّ دمـوعك ترى هدر الدموع اذلال...وتـرىمـا فيه احد يصبر مثل صبري بغربالك...انـا عـيب عـلي أنـقض كلامي والرجالافعال...واذا قـلت اقـطع احـبالك تـراني بقطع حبالك..عـشان اكسب هدب عينك تجرعتالعذاب اشكال...ولـيتك تـرأف بـحالي عـلشان ارأف بـحالك...أنـا مـحدن بـجابرنيأسـاير مـعك هالمنوال...تـرى لانـي تـبيع لـك ولا ني باصغر عيالك...أنا جيت اعشقكنبض ومشاعر ما اعشقك (تمثال)...أنـا جـيت اسـكنك واحياك وابقى فيك وابقىلك...أبـي قـلبك يـحس انـه فـقد بـمحبته رجـال...مـلكته مـن هدب عين وخسرت رضاهباهمالك...صـحيح ان الـفراق اقـسى ولكن الوصال محال...أنـا صعبن علي أرضي غروركواضعف قبالك
أبـهديك الـوصال فـراق واهديك الفراق وصال...بـسوي مـثل مـا شـوفكتسوي وافعل افعالك...عـشان تـعرف من فينا الزعول ومن وسيع البال
أبـيـك تـذوقفـنجالي وانـا بـذوق فـنجالك...نـصيحة واحـتفظ فيها قصر معك الزمن أو طال...أبـيتـسمع كـلامي زيـن وتـحطه على بالك
واذا قـصدك تـهين اسـمي عشان تشمتالعذال...تـرى لا انـته ولا غيرك ولا عشرة من اشكالك"



هالقصيده لها مليون ذكرى وذكرى في باله خلته بلحظه وحده يسترجع ذكريات ست سنين مضت بلمح البصر كان يتحرا عمره انتهى من الوجود لكنه اكتشف انه للحين عايش ما مات...عقبها فر الورقه تحت ونش يتلبس واتصل في ربيعه سالم عشان يطلعون رباعه ويا باقي الشباب...
.................



في بيتهم الشعبي المتواضع يالسه فاطمه ويا سلامه يسولفن بأشياء عن المدرسه والبنات ومن هالسوالف واحمد كان يتسبح داخل..

فاطمه: ما تبين تكملين؟

سلامه: خلاص ماريد اروح المدرسه..

فاطمه: اصلا لو رحتي بتسيرين جمعية النهضه مب مدارس البنات..

سلامه: وع ماريد اسير اذا فكرت اكمل بكمل ويا ربعي..

فاطمه: خلاص انتي حرمه الحين وين تبين تيلسين ويا البنات؟ ما يستوي.!!!

سلامه: خلاص اصلا مابغيها المدرسه..

ام احمد كانت تزقر فاطمه..

سلامه: عمتي تبغيج سيري لها..

فاطمه تنش: بييج الحين..

طلعت فاطمه وخلت سلامه بروحها في الصاله صدق كانت متملله ومتضيجه وتبى ترد بيتهم تحس بملل ووحده..صح انها متعوده على انها تكون وحيده بس ما تقدر تنكر انها في بيت ابوها الراحه كانت اكثر والحريه اكبر ..مجرد ما يضيج خاطرها كانت تركض لين بيت يدتها وتطلع عند اغلى انسانه في حياتها وتفاتحها بكل شي في خاطرها...اشتاقت ليدتها حبيبتها ولقعدة الصبح يوم اليمعه وسهرة الخميس في حجرة ليلى..ومجابل شيخه ومواجعها كل يوم الصبح على الفيديو والرسوم..اشتاقت اكثر لحمدان اللي ما يتصل بها وين يتصل بها وهي ما عندها موبايل...سلامه صدق ضاج حالها مب متحمله انها تخسر كل شي فجأه وتنتقل من الرفاهيه للضيج..بس كان اللي مصبرنها ومخلنها تسكت هو طيبة احمد وسكوته وحبه اللي ذابحنها..تحس انها يموت في ترابها عشان جي تتجنب انها تجرحه بكلمه..وتحاول تراعي مشاعره وتحسب لخاطره الف حساب...

احمد: وينج حبيبتي منو سعيد الحظ اللي شاغل بالج عني هالكثر..

سلامه انتبهت ونشت: انت هني؟ متى طلعت؟

احمد مبتسم: توني طالع وتلبست وخلصت...

سلامه: خاطرك تاكل شي؟

احمد: مابغي شي تعالي وياي..

احمد مسك ايدها وساروا حجرتهم وصك الباب ونزل سفرته..وسلامه تتابعه بغرابه تبى تعرف شو بيقول...

احمد: انتي عروس ولازم تطلعين طلعه محترمه وياي اليوم غيري بنظهر..

سلامه مستغربه: وين؟

احمد:يالله بنطلع نتعشى برا..

حست سلامه انه وايد يبى يحسسها بالسعاده لو على حساب نفسه...بس هي ما كانت نذله وانانيه لدرجة انها تسايره ..صح ما مر وايد على العرس بس بعد غيرت طيبة احمد شوي من غرورها..

سلامه: شفيك على برا انا ماحب اتعشى برا البيت افضل نكون ملتمين حوالين بعض احلى جي عايله وحده متماسكه..

احمد تخبل على رمستها: فديت روحج انا منو معلمنج هالسوالف..؟

سلامه رافعه حياتها:انا ما تعلمت من حد هذي انا..

احمد يقرص خدها برقه: فديتها هالانا احبها..

ابتسمت سلامه بخجل : زين بنطلع؟

احمد: اكيد يالله غيري وتلبسي وبنظهر الحين..

سلامه: اريد شي؟

احمد: عيوني لج..

سلامه بخجل: تسلم عيونك..اريد فطيم وعمتي يطلعون ويانا...

احمد: فكره حلوه بس امي ما تروم تظهر...

سلامه: امبلى بنطلعها... بنطلع نتمشى وبنسير نتعشى برا انا وانت وعمتيه وفطيم..

احمد مبتسم: فديت قلبج انا..خلاص غناتي تم..

طلعت سلامه هي وريلها وساروا الصاله ويلسوا وخبروهم وعقبها كل حد سار حجرته يتجهز وفي حجرة سلامه...

سلامه: احمد بنتصل بعمتي ليلى...

احمد: ليش؟

سلامه بنييب شيخه ويانا شو رايك؟

احمد تذكر شيخه اللي طول ما طرت له على بال: فديتها والله تولهت عليها...فديتج والله ذكرتيني من متى وانا ما شفتها..

سلامه مبتسمه: زين يوم نتزهب بنسير لين باب بيت هلي وبنييبها بس ما بننزل ورانا مشاوير..

احمد مبتسم: اوكي غناتي..

وعقبها يلسوا في الصاله شوي لين ما يطلعون ويسيرون بيت ليلى عشان ياخذون شيخه ويطلعون يسهرون برا كلهم..

..................

في بيت بو راشد الكل كان مرتبش رغم ان السالفه ما تتعدى زياره عاديه يتعرفون فيها على بعض ويشوفن البنات بعضهن ..كانت ليلى رغم احساسها بالبرود من اللي يصير متوتره ..والبشاكير اللي من امس وام راشد امره عليهن ينظفن الميالس والبيت الداخلي ويزهبن شغل المطبخ..

ليلى تدور في البيت ما تسوي شي كانت تحس ببرود داخلي تجاه الموضوع بس من برا شكلها مختلف كانت تحس انها ما تدري هل اللي تسويه صح ولا غلط..؟ هل هالشي لها ولا بس عشان شيخه..ما تدري كل هاللي يصير لها ولا بتم لين اخر لحظه في عمرها وهي تفكر بالغير وما تحسب لنفسها حساب وكل همها كيف ترضي الناس وتسعدهم وفي حقيقة الامر مب ناسيه قلبها اللي ما اندملت جراحه.. ولا حياتها اللي كانت شقا بس كان في داخلها شعله ماتطفيها برودة الايام ولا يمكن لاحد يظلم شي داخل قلبها..بس للاسف انطفت الشعله اللي ياما كافحت عشانها وضحت بالغالي والرخيص عسب تتم متوقده في قلبها..واليوم بعدما ودعت الحب وسنينه وقررت تعيش حياتها اللي الله كاتبنها لها قررت تتزوج بإنسان ما تعرف عنه شي ولا جد سمعت عنه طول واليوم بتشوف خواته...بتشوف البنات اللي بتعيش معاهن العمر كله...

ليلى: شرملى دخنتن الميالس؟

شرملى: ايوه..وحطيت الفواله كلها برا في الميلس العود..

ليلى: وين تاما.؟

شرملى: سوي دخون في مجلس الحريم..

ليلى: امم زين..خلي الباب مشرع عشان في سايير بتدخل الحوي..

شرملى: ماما ليلى منو يجي اليوم؟

ليلى: مادري بتشوفين ..

شرملى: ماما غاليه يقول انتي سوي عروس..صدق ماما؟

ليلى استحت: مسودة الويه يوم تدرين ليش تتخبريني..تدورين العلوم هاه؟

شرملى بضيج: اذا انتي سوي عروس شلي شيخه؟

ليلى: هيه ليش؟ ليكون بس تبينها تشلينها وياج؟

شرملى بحزن:وانا وين يروح؟

ليلى بطلت عيونها على الاخر: بتمين عندي امي ولا تبين تسافرين؟

شرملى: انا يريد يروح معاج..

ابتسمت ليلى بحنان وحطت ايدها على كتف شرملى: ما بتزوج ملك يخليني اشل خدامتي وياي وين ماروم ولا بياخذني امبراطور يوافق ان وصيفتي تسير وياي بيته...ولا بتزوج حافي منتف كرامته ما تسمح له اني استخدم في بيته شي من اشياء بيت هلي...

شرملى تطالع ليلى وهي مب فاهمه شي..

ليلى تتنهد وتطالع برا: الله العالم يا شرملى انا على شو مويهه ويهي..

شيخه من فوق: امي تعالي نذليني..

ليلى لفت عليها بسرعه: انزلج!!!! ماريد انزلج البارحه نزلتي وطلعتي لروحج خلي عنج البزا..

ام راشد داخله البيت: بعد شو؟ بعد ما شربيتها البزا وكبرتي راسها...الحين يايه تقولين لها يكفي بزا.؟ عيل اترييها تسمع كلامج...

ليلى تحب امها على راسها: بتسمع كلامي بتشوفين...

ام راشد تيلس بصعوبه: ايه بنشوف من شب على شي شاب عليه..

ليلى: شواخي تعالي غناتي..

شيخه بدلع: اتي تعالي انا بطيح..

ام راشد تضحك وهي تتمصخر على ليلى: ما شوفها سمعت الرمسه..

ليلى منقهره من شيخه: شواخي نزلي انا بروح السوق بتيين وياي.؟

شيخه بطلت عيونها على الاخر: ما نغير ثيابنا..اليد فتان..

ام راشد: قلنا تيس قالت احلبوه..

ليلى نقعت ضحك وطلعت لشيخه بنفسها ولوت عليها ونزلتها تحت ويلست تحببها وتلاعبها وتضحكها وام راشد مغيضه..

ام راشد: بسج بسج ما بطيح الا براسج ولا ولد الناس ما بيتحملها مجابله حرمته ليل نهار..

ليلى: كيفه هو؟ اصلا انا ما وافقت عليه الا عشان راشد ما ياخذ شويخ مني يعني يحمد ربه ويحب ايده ورا وجدام ويتم يشكر في شيخه ليل ونهار اني انا ليلى بنت ناصر قبلت اكون زوجته..

ام راشد: حييي من تكونين ان شاء الله الا بنت ناس عاديين على قد حالهم..

شيخه فوق ريول ليلى: امي ما نغير يالله..

ليلى: بعدين مافيني اطلع فوق..لو مستعيله روحي مع شرملى..

شيخه معصبه: ماليدها اتي لوحي عندها..اليدث اتي..

ام راشد: الا قومن غيرن ثيابكن الحين العرب اكيد الا واصلين الحين..

ليلى تنش: انا بسير البس واغير ثياب شيخه وبنزل الحين..

وطلعت ليلى فوق حجرتها وغيرت لشيخه ولبستها فستان بسيط بدون اكمام لونه وردي فاتح ومشطت شعرها القصير وهي لبست مخور عنابي جنان طالع على طولها وكحلت عيونها ولبست وقايتها ونزلت وما وصلت تحت الا وشرملى في ويهها..

شرملى: ماما تعالي الحريم داخل خلاص يجي..

ليلى مرتبك وهي شاله شيخه: اوكي خلاص سيري المطبخ..

عدلت ليلى وقايتها وسارت ميلس الحريم ونشت تسلم على ام فلاح وبناتها وكانت اول مره ييون فيها زياره لبيت بو راشد..

ام راشد وام فلاح وحريم عيالهن خلود حرمة راشد وظبيه حرمة سعيد خو فلاح يلسن ويا بعض بوسط الميلس والبنات يلسن ويا ليلى وكانن ثلاث اسماء وبسمه ولطيفه...سوالف ويا ليلى عن شغلها وتخصصها وسوالف جديمه وعن ربعها ومن هالسوالف اللي تيي يوم يتعرفن البنات على بعض..

اسماء: يا حيج والله خلوج تشتغلين..

ليلى: شو نسوي بعد نحلل سنوات الدراسه..

لطيفه: يا رب اخلص انا وافتك بعد..

ليلى مبتسمه: ان شاء الله..

بسمه بغت تتخبل على شيخه وتحاول فيها من الصبح بس بدون فايده شيخه كانت لاصقه في ليلى ومب طايعه تقوم..

بسمه: نظره بس ابتسامه..على الاقل رفعي راسج بشوف ويهج هب لازم تيين صوبي..

اسماء: بسوم خرعتي البنيه ما تباج..

لطيفه: بسوم خليها وهي بتنش لروحها..

ليلى تبتسم: خلوها حياء مصطنع ولا مناك الله يستر غاديه لي سوبر مان..

بسمه: فديتها والله مب رايمه اتحمل اني ما العب وياها..

لطيفه: يالله بالعقل فضحيتنا يا بسوم اللي يشلج وياه مره ثانيه..

اسماء تمت تسولف ويا ليلى وبسمه ولطيفه من تحت لتحت يتواجعن عشان شيخه اللي دافنه ويهها في حضن ليلى ومب طايعه ترفع راسها عسب محد يشوفها..

ليلى نشت تييب العصير والفواله وقربتهن صوب البنات اللي قربن واكتشفن على طول ليلى بدون حاجه انهن يتمن معاها سنين لان شفافيتها كانت واضحه واللي محلنها اكثر انها اجتماعيه وما عندها فرق الطبقات ولا ميزت بينهن ان مافيه وحده كملت تعليمها العالي عسب عادات هل البيت وكانت تتعامل وياهن على اساس انهن من نفس مستواها وهاللي خلى لطيفه واسماء وبسوم يرتاحن وايد لها...رغم ان معرفتهن ما تجاوزت الساعتين..

ليلى بعد خذت عنهن انطباع انهن طيبات وحبوبات وحمدت ربها انهن جي عسب تعرف شو من ناس بتعاشر وقالت في نفسها..
" صح الناس تعطي مرات انطباع حلو اول ما نعرفها وتخفي العيوب بس بعد الطيب يبان من الخبيث لكن الحمدلله شكلهن طيبات وبنات عرب ومحترمات والله يسهل علينا..."

دقت شرملى باب المليس وقربت من ليلى..

شرملى: ماما في تلفون..

ليلى: قولي لها مشغوله عقب برمسها..

شرملى: هدا ماما سلامه..

استغربت ليلى واستأذنت منهن شوي ونشت للتلفون وعقب ما سلمت على عمتها وتخبرت عن احوالها حست ليلى انها ترمس من موبايل وانها بعد برا البيت ..

ليلى: انتي في السياره..؟

سلامه : هيه عمتي فديتج خلي البشكاره تنزل لي شيخه نحن طالعين نتمشى ومستعيله ماروم انزل اسلم ان شاء الله يوم اردها بسير عليكم وبعدين في سايير برا ما روم انزل واحمد ما ينزل وياي ولكن عمتي وفاطمه وياي..

ابتسمت ليلى: اوكي دقايق وبييبها...

دخلت ليلى الميلس وقالت للبنات انها بتظهر شيخه لخوالها وبترد..وعقب ما طلعتها ليلى شيخه ما قالت شي خلاص متوالفه ويا قوم احمد ردت الميلس عند البنات وشافتهن قربن صوب ام راشد وامهن وقربت هي منهن بعد..

ام راشد: وين سرتي؟

ليلى: وصلت شويخ عند الباب خالها ياي ياخذها وياه..

اسماء: ماشاء الله البنت قامت اتعلق في خوالها احسلها بعد لا تروح لهم بعد العرس فجأة وما اتأقلم وياهم...

ام راشد وليلى انصدموا من رمسة اسماء..

لطيفه: لا ما بتفاجأ ان شاء الله راشد عاطنهم بنته وبتداري بنت عمها ولا بتنظلم على يد حرمة خالها..

ليلى ما قدرت تسكت: ومنو قال ان شيخه بتعيش ببيت خوالها عقب العرس؟

اسماء: عيل وين بتعيش ام راشد حرمه كبيرة ما بتروم تداري هالياهل واتابعها واللي نعرفه اهلها يبونها وانتي بعد العرس بتنشغلين بريلج وبيتج وعيالج بروحج..

هني ليلى ما قدرت تستحمل نشت وهي معصبه وطلعت على طول وهي تتحرطم على راشد واللي سواه فيها والموقف البايخ اللي حطها فيه ويا هالناس اللي من الحين بدوا يتحكمون ويقررون ويألفون على كيفهم... الكل في الميلس عرف ان ليلى مستحيل تعيش بدون بنت اخوها ولا تقدر أي قوه في العالم تفصلهم عن بعض...حركة ليلى خلت الكل يتم مبهت في الميلس ولا يدري شو يرد ولا شو يقول بس في الاخير الكلمه بتكون لراشد او ليلى وما يندرا بعد من يمكن تكون له...
.................

والجزء الي بعده مع الاخت الـــــــغــــــــــلا

تحياتي

[الرايقه]

يعطيكم الف عاافيه ,,,,

[البدوي الحبوب]

الله ايعافيج ويسلمج من الشر اختي الرايقه

وتسلمين على تواصلج الجميل معانا

تحياتي لك

[الغلا]

الحلقه الخامسه والعشرون
الساعه 11:30 الليل كانت يالسه في الصاله بروحها معصبه وبتنفجر من الضيج وتحاول قد ما تقدر انها تتحكم في الفاظها وكلامها تحاول انها ما تضيج وما يتكدر خاطرها..وتحبس دموعها بالشكل المطلوب ولا تسمح للضعف وفصوله انها تتجدد في حياتها..يكفيها ضربه وحده والضربه الثانيه اكيد مؤلمه..كانت تنش وتمشي من اول الصاله لاخرها وتتأفف يوم ابطى عليها اخوها بس مع هذا كانت امها كل شوي توايج تشوف بعدها في الصاله ولا لاء..
ام راشد: انتي ما بترقدين؟
ليلى: لاء مب راقده..
ام راشد: بسم الله وراج يا بنتي ما ترقدين خافي الله بنفسج وخوج لاحقه عليه كلكم ببيت واحد..
ليلى: امايه احسن شي تسوينه الحين انج ترقدين عشان ترتاحين..
ام راشد: برايج والله..
وصكت ام راشد الباب ودخلت ترقد..وليلى يالسه في الصاله تتريا راشد..عقب ما يابوا قوم احمد شيخه البيت الساعه 10:00 يوم خلصوا حواطه بس سلامه ما نزلت ولا حتى سلمت على حد فيهم لانهم كانوا مستعيلين.. وسمعت شرملى تزقرها من فوق..
ليلى: نعم!!! نعم!! شو تبين انتي الثانيه ناقصتنج انا..؟
شرملى من فوق: شيخه ما يريد يرقد..
ليلى بعصبيه: اذلفي انتي وياها عنها ما رقدت ان شاء الله..
وسمعت شيخه تركض فوق..ومن فوق الدري تنزل بسرعه خلاص تعودت تركض وتستهبل وما تخاف...
ليلى بخوف: اييه بشوي شوي لا تطيحين...!!!
شيخه: ما تيح ما تيح انا دويه..
ليلى: قويه ما قلنا شي بس امشي بأنوثه شوي حشا تقولين قطيع ثيران ياي من فوق..
نطت شيخه من اخر درجه وسارت تربع صوب ليلى..وتعلقت في ريولها..
شيخه: امي ثرملى تريد تنام في ثريري...
ليلى مبتسمه وتشلها وتتنهد..
شيخه: امي نذليني انا كبيله..
ليلى مبتسمه: هيه وايد كبيره..سيري ارقدي عشان باجر نروح الجمعيه..
بطلت شيخه عيونها على الاخير: نثتري حلاوه..؟
ليلى: بتغدين دبه...
شيخه تهز راسها انه لاء: ما نلوح انتي لوحي مع ثرملى..
وشافت ليلى سيارة راشد داخله البيت ونزلت شيخه وزقرت على شرملى تشلها فوق بس شيخه ما طاعت وتمت ويا ليلى وكانت ليلى محرجه وبتنفجر من القهر اللي ضاربنها...اول ما حدر راشد الصاله سلم عليها وعلى شيخه...
راشد: ليش للحين مب راقده غريبه..؟
ليلى بقهر: اترياك لازم بعد...
راشد مستغرب: تترييني؟؟ ليش؟؟ اول مره تسوينها..
ليلى:شفت عاد.!!!
راشد مستنكر: شو فيج؟!!
ليلى بقهر اكثر: شو فيني بعد؟
راشد بضيج: شو مستوي ارمسي؟
ليلى بتنفجر من الغيض: ما تعرف شو فيني انا شو سويت بك من الاساس عشان تجازيني جي؟
راشد: انتي عن شو ترمسين وبعدين شخبار العرب اللي يووكم...؟
ليلى بعصبيه: يا راشد خبر ربيعك هاللي اسمه فلاح اني مابغيه لو انطبقت السما على الارض...فاهمني؟
راشد وانقلب جد الموضوع: على كيفج هو...شورج براسج؟ ولا انتي بنت نفسج مالج رياييل يقررون عنج.؟
ليلى بقوه عنيفه: اسمع يا راشد انا ان كنت وافقت بكون وافقت عشان بنت اخوك ولا انا وحده عايفه العرس وما بغيه...
راشد: اليوم كنتي مستانسه الصبح شاللي غيرج فجأه..؟ اذا من هله او لو على خواته لا تحاتين بيحطج في بيت لروحكم لا تفكرين بهالموضوع..
ليلى بقهر وشوي وتصيح: يا راشد افهمني المسأله مب مسألة خواته وامه وبيته وجحيمه..راشد الموضوع اكبر من جي..انت حسستني ان فلاح بيخليني اشل شيخه وياي واليوم خواته يقولن عكس جي..
راشد ما استغرب من هالشي: يا ليلى اسمعيني..
ليلى صاحت ما رامت انها تيود عمرها: ماريد اسمع شي ياخويه يا سندي ارجوك افهمني مابغيه والله مابغيه لا تظلمني وتظلم نفسك وياي واردلك باجر مطلقه ولا تم معلقه..خلني جي احسن..
كانت ليلى تصيح بحرقه ومن الخاطر وراشد طالعها ويشوفها وهي منكسره وضعيفه والله ما هانت عليه..بس بيحاول وياها..
راشد: تفاهمي وياهم يا ليلى حاولي باسلوبج تقنعينهم...انتي مب ياهل اوجهج انا...
كانت شيخه تطالع راشد بحقد وتشوف انه السبب في اللي امها فيه بس ما قدرت تنطق...
راشد: فكري بالموضوع ليلى الفرصه جدامج لا تضيعينها...
ليلى تصيح وترمس وهي ذاله عمرها: يوزني دريول يشتغل عندك في الشركة يوافق ان شيخه تعيش وياي ولا تفرني عند ناس ما يبون بنت اخوي..
صدق راشد انصدم منها وما هانت عليه دموعها ولا رمستها وما صدق ان ليلى ممكن تسوي بعمرها جي عشان شيخه...بس في النهايه هاي اخته ابدا من أي انسان ومشاعرها واجب عليه يحترمها ويسوي لها قدر وحشيمه..
شيخه بعصبيه: حيوان!!!!!
راشد مصدوم: انا!!!؟؟
شيخه وهي بتصيح: ليث ليث امي تثيح ليث؟ انت حيوان!!!
ليلى وهي تمش دموعها: شيخه بس عيب هذا عمج..عيب...
شيخه تصيح ولوت على ليلى: مافي مافي..
ليلى: شو اللي مافي انتي الثانيه فديتج قمتي تخربطين..
راشد: ليلى طلعي فوق ارتاحي برمسج باجر ان شاء الله..
وطلع راشد قبل ترد عليه ليلى وهي سارت فوق تحلم انها ممكن ترقد او ييها رقاد...صكت باب الحجره وشيخه تتحرطم على راشد من قهرها..لبستها ليلى بيجامتها ورقدتها على شبريتها وسارت تتوضى بتصلي ركعتين الاستخاره ومن عقبها بتشوف شو الله كاتب لها...
نشت وتوضت وصلت ركعتين ومن خلصت يلست على الكرسي وهي منتهيه خلاص..تشوف وين كانت وكيف صارت وشو هالحظ والظروف والدنيا والاقدار والناس والقرايب اللي حواليها...تعبت خلاص وتحس ان مافيها بقايا للصبر اكثر من جي وقلبها تعب من اللي يصير..وين ليلى اللي قبل ووين ليلى اللي الحين..
"اييه يالدنيا وين كنت ولشو وصلت..؟ سبحان الله...!!! هذي اقداري....عمري ما فكرت بشي وتحقق وعمري ما حلمت ونفعتني احلامي..طول عمري كنت نحيسه ونحاستي ما فارجتني ثانيه..من يوم صغيره ولين ما كبرت...اخواني طول عمارهم مجابليني ومب مخليني اتصرف مثل ما ابى وابوي صح كان قريب مني بس بعد ما كان يردهم في شي...راشد طول عمره متسلط ومضيج علينا نحن البنات..ومبارك انعزالي وما يخصه فينا..وسيف(وتتنهد) الله يرحمك يا سيف الله يرحمك..انت الوحيد اللي فهمتني والوحيد اللي حسيت فيني..انت الوحيد اللي كنت اقدر اكلمه واقوله اللي فقلبي بدون خوف وانتظر نصيحته.. بس حتى انت رحت وخليتني...كنت متأكد وضامن مليون بالميه ان مستقبل اختك ما بيضيع دام ان وراها ريال تشد به الظهر..كنت طول عمرك تقول لي يا ليلى ما بتضيعين ووراج ناصر..بس ما تدري ان ناصر راح وراح معاه كل شي حبيته..ايه يا سيف يا خوي الله يرحمك..ناصر غدرنا وباعنا برخيص وراح...حليلي ما تهنيت في شي تمنيته...(انترسن عيونها دموع وطاحن على ويهها)...ناصر هان عليك كل شي وراحت الحلوف والوعود..ما هقيتها منك يا ولد عمتي والله..ياما داريتك ودافعت عنك واتحديت الكل عشانك بس للاسف صدق انك ما تستاهل...حتى اللي يتعرفون على بنات من الشارع مرات يكون في قلوبهم وفا واخلاص للعشره..وانت ما احترمت اللي من بينا لا عشره ولا قرابه ولا حب سنين..اسميها حياتك ما فيها معاني ولا تفكير...احسن شي اقوله بقلبي الحمدلله اني ما ربطت عمري فيك..مب مستعده ارد اعيد وابني حياتي من يديد وياك..ما بدري يمكن بدل ما تفرغ لسعادتي اتفرغ اعلمك كيف تقدر تتخذ قرار خاص فيك وفي نفسك ليوم واحد بس..."
تنهد ومسحت بقايا الدموع على خدها وعقت عمرها على الشبريه وتمت تفكر في كل شي حواليها يصير ولين وين بتوصل عقبها رقدت تنهي بهالرقاد معاناة ليله كامله من التفكير في عريس الغفله اللي طلع لهم...
...................
الصبح نشت اول وحده صح انها ما ترمس وياهم وايد بس اليوم ما تدري حست بشي غير بشعور مب طبيعي وتحس انها مب هي ولا التفكير اللي فكرته ممكن يرد على بالها مره ثانيه..الساعه كانت 9:30 الصبح دخلت المطبخ وحصلت البشكاره يالسه تتريق واول ما شافتها نشت على طول..
دونا: ماما ليش يقوم بدري روحي نامي بعدين تعالي...
عفرا: بسوي الريوق وبطلع..
دونا: مافي سوي ريوق انا سوي كل يوم..
عفرا بجديه بعدما طفرت من هالبشكاره الحنّانه:اقولج ولا كلمه خليني اخلص شغلي..
دونا صخت يوم شافت عفرا معصبه..وهي مب معصبه ولاشي بس شكلها جاده وما تبى تتجادل ويا البشكاره..بطلت الثلاجه وطلعت البيض والجبن والمربى واشياء خفيفه وجهزت دلال الشاي وحطت الماي على النار يغلي..كانت تفكر وين وصلت بحياتها ووين بتنتهي وشو هدفها وكيف ممكن تتكيف وترد تثق في حد..شافت ان المسأله وايد صعبه ومستحيل تلاقي حد يفهمها ويحبها شرات ما بدريه حبتها..صدق مستحيل تلاقي..بدريه كانت غير فهمتها من غير ما تطلب منها هالشي ومن غير ما تتقرب منها عفرا..حست بحب يتولد من بينهن لا ارادي وبدون مقدمات بس اريد وتريد ويفعل الله ما يريد...
وهي تحط الجبن في الخبز تذكرت شي غاب عن بالها من فتره طويله وما تدري كيف خطر على بالها الحين...تذكرت شي صار في بيت يدها خليفه قبل اربع شهور..
بدريه:بقى اسبوعين..شدي حيلج ابى اشوف اعلى نسبه في العايله كلها..
عفرا وابتسامتها ما فارقت ويهها: انتي عمتي كم يبتي؟
بدريه: نسبتي مب شي..يالله شدي حيلج انتي اول حفيده بتتخرج من العايله...وعشان ما تم في خاطرج انا كنت يايبه 81%..مب شي..
عفرا: وما كملتي عشان تعرسين صح؟
بدريه: كنت احب عمج وماريد اضيع وقت اكثر وخفت يمل ويعرس ترا اول يتحرون الحرمه تنشغل بالدراسه اكثر عن الريل..
عفرا: ما فكرتي تكملين؟
بدريه: يحاول معاي عبادي بس ما رضيت..ما احب التزم بشي..ابا اعيش حياتي بدون قيود..
عفرا مبتسمه: بالعكس الكتب مب قيود...الكتب متعه ومتعه كبيره بعد..هي اكبر حريه في العالم..مستحيل حد يضايقج منها او تزعلين منه..ومتى ما تبينها سيري لها بدون عتب ولوم..
بدريه: بالعكس الناس هم الحياه والحياه هي الناس..نحن في العالم ما لنا غنى عن بعض..والكتب لها فايده وتونس صح بس ما تغني عن البشر..انتي ممكن تستغنين عن صديقه عشان كتاب؟؟
عفرا وهي منتبهه انها مرت عليها 12 سنه في المدرسه وبرا المدرسه وهي بدون صديقه مقربه منها..كانت تحس انها مب في حاجه للصديقات..وان مافي أي انسانه ممكن تفهمها وتتقبل عقليتها..
بدريه: شو قلتي؟
عفرا: ما اعرف.
غمضت عفرا عيونها وهي تتذكر عمتها بدريه وتنهدت من القلب...بس عقبها خلصت شغلها وفي قلبها شي غريب تحس انه شعور اجمل من أي شعور حست به من قبل..خلصت الريوق وطلعت تتمشى في حديقة البيت وردت داخل وطلعت بتوعي حمده..حمده كانت غرقانه غرق في الرقاد وعفرا تهز فيها هز وتحاول توعيها بس بدون فايده ولا حتى نفس اللي يشوفها يقول ميته من السكون والغرق في الرقاد..
عفرا مصدومه: حمده نشي حشا مب رقاد..
حمده ولا تحركت..
عفرا تسحبها من ايدها: حمدووه بطلي عيونج شوي على الاقل ارمسي شو هالرقاد !! ديناصور مب انسان...!!
وتلف عفرا صوب الباب وشافت سمر واقفه وشعرها مفرود على جسمها بطوله وعيونها شبه مغمضه..
عفرا: انتي نشيتي متى؟
سمر بتعب: توني ناشه...
عفرا: وعمتي حصه نشت ولا لاء؟
سمر: بعدها راقده..انتي ليش معصبه؟
عفرا تلف على حمده: يابت لي المرض هذي مب طايعه تنش...
سمر بكسل: صبي على ويهها ماي...
عفرا ابتسمت: حرام اخاف تزيغ ولا يستوي بها شي..شوفيها مول ما تحترج ولا هي داريه بالدنيا..
سمر: اكيد ما بتدري بالدنيا..راقده..
عفرا: نزلي الصاله انا حطيت الريوق وشوفي عمي نش ولا بعده...
سمر: امبلى نش عبدالله وشفته نازل الزراعه برا..
عفرا وقلبها يدق بسرعه: اووه زين عيل سيري وعي اختج وانا بشوف هذي...
طلعت سمر غرفتهن ودخلت بتوعي حصه عشان يتريقون ويا بعض...بس الله يعينها على حصه اللي ما تتقبلها وهي صاحيه عيل كيف لا رقدت...
سمر تبطل الباب بقوه وتيلس بدفاشه على شبرية حصه: هيييه نشي الساعه 12:00
حصه بطلت عيونها بكسل وشافت الساعه10:00 وردت تتلحف..
سمر: حصووه قومي شو هاه معصبين كلهم تحت...
حصه وهي شبه راقده: طلعي برا ابا ارقد..
سمر: انزلي يالله حطوا الريوق ويتريوونج..
حصه: فارجي يا سمر لا اقوم اقطعج تراني مب ناقصتنج..
سمر: حمد موجود ويتخبر عنج..يقول ما بيتريقون قبل تنزلين..
فز قلب حصه وما حست بعمرها الا جدام المغسله في الحمام تغسل ويهها وبتغير ثيابها..وسمر واقفه تطالعها مصدومه..سمر كانت تتكلم بلعانه بس ما توقعت حصه تسمع الرمسه بهالطريقه..وفرحت من قلبها واخير لقت شي تستغل حصه فيه...."يا فرحتي!!!!" قالت سمر هالكلمه وقلبها يدق ويدق مب مصدقه ان حصه اخير بتسمع رمستها كلما طرت لها حمد..
"دامني اعرف من زمان ليش ما استغليتها الله يغربل ابليسي كيف غاب هالشي عن بالي.."
حصه وهي تسحي شعرها القصير: متى وصل حمد..؟
سمر:مادريبه..
حصه وقلبها يتنافض داخل صدرها..
"صح اني فرحانه بس والله لراويك شغل الله عدل...اصبر علي شوي يا حمد.."
سمر: بنزل عنج..
حصه مبتسمه بأدب: الله يحفظج..ولو اني افضل ننزل مع بعض..
سمر مصدومه: شوو؟
حصه: اللي سمعتيه بس لو تبين تسيرين برايج..
سمر تغمض عيونها وتبطلهن بسرعه: انا بنزل...
تنزل سمر وهي تقول في خاطرها"لازم ارد بوظبي باسرع سرعه قبل لا تنفذ فيني ختيه جريمة قتل..انا شو اللي بلاني اقول لها ان حمد هني هاللي ناقصني مشاكل وويع راس..والله اني بس كنت اباها تنش..(وتضحك وهي تتذكر شكلها) والله شكلي بندم من خاطري على هالضحكه.."
وصلت الصاله وشافت عبدالله يالس ويا عفرا وحمده وقربت منه ويلست حذاله...
عبدالله: وين حصه؟
سمر تطالع عفرا: بتنزل الحين..
وما كملت سمر رمستها الا وحصه نازله بكل هدوء من فوق ولابسه وقايتها واستغربوا منها ومن لبسها ..البارحه ما كانت حاطه شي على راسها ليش اليوم يعني...سلمت ويلست...كانت تطالع بعيونها في كل مكان تبى تشوفه تبى نفسها ترتاح وتريح هالقلب اللي عذبه طول البعد...
عبدالله مبتسم: حصه شي بلاج؟
حصه: ليش؟ شكلي يبين في شي؟
حمده تأشر على سمر: ايه انتي شو قلتي لها..
سمر خافت: انا ما قلت شي..
عفرا ابتسمت: عمتي انتي تتريين حد؟
حصه ارتبكت: تريقتوا؟
عبدالله: نترياج..
ويلسوا يتريقون وحصه تطالع سمر بنظره تقول فيها" والله مالج مفر مني" وسمر ميته من الزيغه خلاص تحس عظامها تفتت من الخوف...وتقول في قلبها" ليتني ما وهقت عمري وياج"...
خلصوا الريوق وكل حد سار بقعه يخلص اللي عليه...سمر وحصه ردن فوق عشان يجهزن اغراضهن بيطلعن اليوم ويا عبدالله وبنات اخوهن حسب الجدول اللي مخططات له طبعا شوي السالفه كان فيها تكفيخ بينهن على كذبة سمر بس كله سوالف ومزح...وحمده تمت ويا عبدالله في الصاله...اما عفرا سارت حجرتهن على طول..كانت تحس ان في شي مختلف اليوم ومستوي غير عن كل شي..تحس بشي ممكن ينقلها من اللي هي فيه لشي اكبر منه ..لشي مستحيل يتوقعونه..هي نفسها فرحانه فوق ما تتصور..وعقب اللي تذكرته اليوم عن بدريه تحس ان حياتها بتنجلب وبتتغير بشكل ما يتصورونه ابد..بس على الله تقدر ولو انها تحس ان هالشي شوي صعب بس بتحاول لان نصف التجربه محاوله...
...................
حاولت تكمل رقادها بس خلاص ماشي رقاد..تبغي ترد شوي ترتاح بس ماشي فايده الحشره اللي برا مب مخليه حد يرقد..وصوت التلفزيون اللي فوق شال البيت فوق تحت...وهي متعايزه حتى تقوم من على الشبريه بس مع هذا تمت منسدحه وتنهدت وهي تتذكر حظها ونحاستها وين وصلتها...بس استغفرت الله وشكرته على كل حال...وهي تقول في خاطرها" فتره وتعدي"..
شوي وهي مسترخيه يتبطل باب الحجره ويدخل وهو متسفر ومتعدل وحالته حاله...
حامد مبتسم: صباح الخير..
سلمى: صباح النور..
حامد: للحين ما نشيتي؟
سلمى: احس بتعب ماروم احترج من مكاني..
حامد رافع حياته: يعني ما بنطلع؟
سلمى وقلبها يدق بسرعه من الخوف: الحين؟
حامد:احسن شي نطلع الحين ماشي زحمه ناخذ اللي نبى ونرد..
سلمى: اللي تشوفه ولو اني بغيت اظهر المغرب...
حامد: المغرب انا برا ما بكون هني والدريول ماباه يوديج الجمعيه خلينا نطلع احسن الحين يوم المربيه عند اليهال..
سلمى: خلاص اظهر وصك الباب وبغير وبنطلع..
حامد: انا تحت..
سلمى: انزين..
طلع حامد وسلمى ميته من الخوف ما تدري متى تتصل ربيعته مها وتخبره عن اللي صار..صح سلمى مب ندمانه انها اتصلت بها بس بعد زايغه لا يدري ما تبى تحط عمرها بموقف سخيف وياه وتدري انه بيحرج وبيتوحش عليها..
توكلت على الله وتلبست ووصت المربيه تشوف اليهال بتسير الجمعيه هي وريلها يتشرون للبيت اغراض..وفي السياره كان حامد طول الوقت يشوف تلفونه وشكله مب طبيعي..بس مب مبين انه يعرف شي لانه لو عرف على طول بيتصرف وما بيتريا ولا بيحشم حد..
نزلت سلمى ويا حامد وتسوقوا وبعدهم بادين في التشري دق تلفون حامد وراح شوي بعيد عن سلمى وهي عرفت على طول انها اكيد هي ما غيرها ربيعته..كانت من تحت الغشوه تشوف حركاته وتعابير ويهه وشكله بدا يحرج...هي في البدايه خافت وعقب سوت عمرها عاديه..ويوم بند التلفون يا عندها...وشكله معصب على الاخر..
حامد بعصبيه: خلصتي؟
سلمى وهي حاسه بشي:شو خلصت للحين ما خذت شي...
حامد: مب لازم امشي جدامي يالله...
سلمى تسوي عمرها عاديه: شوفيك للحين ما خذنا شي..
حامد: اوكي يالله خلصي بسرعه..
خلصت سلمى وفضلت انها تطلع على اساس انهم متفقين يسيرون السنتر عقب الجمعيه..وما حبت تخليه يطول اكثر من جي لان شكله رايح فيها وهي حست بخوف منه...ركبت السياره وهو اول ما ركبت على طول حوّل بيسيرون من درب السنتر لطريج البيت..
سلمى تسوي عمرها بريئه: حامد ليش جي..السنتر من هالدرب مب من هني...
حامد بعصبيه خلاص ماعاد يتحمل: اسكتي لا انزلج في الشارع وتسيرين السنتر لروحج..
سلمى: ليش شو فيك؟ شو سويت بك؟
حامد: سلمى لا تستهبلين انتي فاهمه شو اقصد...
سلمى: شو مستوي ليش ما تكون صريح..
حامد: حلفي انج ما سويتي شي..
سلمى: مب حالفه انت قول شو قابض علي وانا برمس..
حامد: انتي ادرى عاد..قولي حلفي انج ما لمستي تلفوني..
سلمى ارتبكت: ما لمسته...
حامد: عيل منو راد على حرمة ربيعي؟
سلمى تطالعه بنظرة استخفاف: وحرمة ربيعك ليش متصله فيك؟
حامد بصوت متقطع: ليش بتتصل فيني..اكيد تسأل عن ريلها...فشلتيني فيها الله ياخذ غباءج..
سلمى: ماشاء الله ربعك عادي حريمهم يرمسون ربع رياييلهن..
حامد محرج: مب هاه الموضوع انتي اللي رديتي عليها وسبيتيها صح؟
سلمى بثقه: انا مارديت على حد وما رمست حد واذا انت شاك بعمرك سير تأكد منها....اقصد من ربيعك...
سكت عنها حامد ونزلها البيت وطلع وهي دخلت بهدوء..صح خايفه بس مب ندمانه حست انها تصرفت صح حتى رغم انها كذبت عليه بس احسن من انها تشوف شي ما تبغي تشوفه..بس شو اللي بيسلمها منه لو تمادى بالموضوع او لو ان مها مصختها وياه بدلعها وخلته يتصرف تصرف ما يبغيه..حاولت سلمى انها ما تفكر ابد بالموضوع بس غصبا عنها كان تفكيرها يردها له...فكان احسن شي تسويه انها العصر تسير بيت عبدالله وتسهر ويا البنات لين العشاء وعقبها ترد البيت بس اول شي فكرت انها تستأذن من ريلها وتسير لهم...
...................
العصر بعدما تملل من كل شي وضاق صدره ومب راضي يفاتح أي حد باللي في خاطره قرر شي اخير انه يروح بنفسه ويزور اخته لانه صدق وله عليها وما يتخيل كم مرت فتره من يوم عرست وما شافها ولا حتى رمسها...شل عمره واتصل في ريلها على طول ورمسه شوي ودخل له بالموضوع على طول...
احمد: افا عليك يا ريال البيت بيتك حياك في أي وقت...
حمدان: يعني ما بنثجل عليكم.؟
احمد: شو هالرمسه...؟!!! هل البيت منكم وفيكم ونحن الضيوف وانت راعي البيت..
تشقق حمدان: خلاص خير ان شاء الله بس ممكن ارمس سلامه شوي الحين..
ابتسم احمد: لحظه شوي..
وزقر عليها وكانت في الصاله ويا عمتها واخته ويته تربع يوم سمعته..
سلامه: امر يالغالي...
احمد مبتسم: مايامر عليج عدو..تلفون ناس يبغونج...
حمدان في الجهه الثانيه متصنم اول مره اخته في كل حياته تكون صاغره ومستسلمه لانسان غير عمتها ليلى...وسلامه انتفض قلبها وما تدري ليش خافت رغم ان ابتسامة احمد هونت الموضوع...
سلامه: منو متصل على تلفونك يبغيني..!!
احمد: ارمسي وبتعرفين...
سلامه بتردد: الو..
حمدان حس بشي قبض قلبه: مرحبا مليون باللي خلتنا وراحت...
سلامه ما نطقت بحرف وجنها مجهزه عمرها عشان هاللحظه...انفجرت صياح وهي تسمع حسه وهو خنقته عبره..بس ابتسم وحاول يكون عادي..هو ضايج الحين ومحتاج يرمس مع اخته عن ابوهم وعن حياتهم..لكن اخته فاجأته بصياحها...
حمدان: الحين انا متصل اسولف وياج وانتي تصيحين ليش..!!!
احمد احترم خصوصيات حرمته وطلع وخلاها رغم ان صياحها كسر خاطره وعوره قلبه...
سلامه تصيح: والله متولهه عليك..
حمدان اتشقق: والله؟ انتي تعرفين الوله...!!!
سلامه وهي تمسح دموعها: يالسخيف..
حمدان: ايوه هذي انتي مب مال الوله..خلج في الدفاشه...
سلامه: والله صدق تولهت عليكم...
حمدان: هيه صدق..من جي مريتي حذال البيت قبل كم يوم ولا سلمتي...
سلامه: والله كنا مستعيلين عمتي تعبانه وموعد دواها قرب وما خذته وانت تعرف بحالتها...
حمدان: المهم انا بقولج شي وما بطول..
سلامه:توك متصل وين تبند حرام عليك بعدني ما شبعت..
حمدان: لا فضيحه ريلج شو بيقول...سمعي انا بييج باجر عقب المغرب..عشان جي دقيت..
سلامه بفرح: احلف قول والله..
حمدان: والله..
سلامه: زين لا تبند خلك شوي وياي بنسولف..يالزطي بطاقه تستخسرها علي..؟
حمدان يضحك: يالدبه هذي فاتوره مب مدفوعه يا بوج نحن مب مال المدفوعه...بعدين الخساره فيج تعويض..ما يغلى عليج شي..
سلامه: وييه فديتني من زمان محد شحن غروري بنفسي..
حمدان يضحك: اشوفج غاديه حرمه مطيعه...
سلامه: تبى الصدق ولهت على ايام الدلع رغم ان ماشي قاصر علي هني..بس بعد حنيت لايام عمتي..الا شخبار خطاطيبكم؟
حمدان يتنهد: والله ماعرف اظني اليوم بيردون لهم خبر...يالله طولت بخليج الحين عندي شوية شغل...
سلامه: الله الله فيني عن تنساني ..
حمدان يضحك: وين انساج انتي نشبه محد يفج منج...يالله بخليج مع السلامه لا ترمسين حشا ما خليتي شي ما قلتيه..
سلامه مبتسمه: اوكي يالله برايك..سلم عليهم كلهم...
بند حمدان عن سلامه وهو مرتاح شوي على الاقل قدر يكلمها وترتاح نفسه..وهي ارتاحت اكثر وحست بفرح غريب ونشاط عجيب...كل شي حواليها اليوم كان مختلف..لازم بعد حبيبها واخوها الغالي اتصل بها وسلم عليها...اما حمدان فحس ان باجر بيكون يوم مختلف عليه وبيقول لاخته اشياء تكدر خاطره وعلى الله انها تفهمه او على الاقل انها توجهه وتقول له شو يسوي لانها خارج نطاق المنطقه...
..................
كانوا كلهم برا متيمعين...يالسين في الحوش والجو شوي معتدل رغم ان الحر هاليومين ذباح شي اكيد والناس في عز الصيف...يسولفون ويضحكون وعايشين حياتهم ما عليهم من حد كانت احلى ايام عبدالله من عقب بدريه هي هالايام اللي قضاها ويا بنات اخوه وخواته...غيرن له جو البيت وعدلنه وخلنه يعيش حياته صدق انه تضايج من النلقه اللي يبن ينقلنه منها لحياة كلها فرح وضحك ويبن يفهمنه بطريقه واخرى ان الحياه تستمر باللي نحبهم وبدونهم...ضيج هالشي على عبدالله ولكنه تقبله عشانهم وحسسهن انه بيطير من الفرح...رغم ان التغيير في دواخل نفسه شي صعب وصعب جدا بعد...كانن البنات يفكرن انه قدرن يغيرن عبدالله في هالايام لكنهن كانن يجهلن ان عبدالله بقايا صوره من داخل وفرحه من برا مصطنع...
في الحوي يلست عفرا على واحد من كراسي الحديقه وحمده كانت يالسه على العشب هي وسمر ..كانن يسولفن عن اشياء مختلفه وكثيره..منها شو بيطبخن باجر وشو بيسون يوم بييهن حمد...
سمر: انا ماعرف الا احط الاغراض على السفره...
حمده: وانا نفس الشي..
عفرا: عيل منو بيطبخ ومن بيسوي الاشياء...؟
حمده: احسن شي نطلب من برا ليش العباله...
عفرا: اخ عليج..الحين عازمين الريال ونقوله غدا ولا منه اخر شي نغديه من مطعم..ما يسوا عليه المشوار لين دبي..
حمده: زين شو نسوي محد فينا تعرف تطبخ...
سمر: والله انا ما ييت عشان اطبخ انا ييت عشان استانس..الحين دبي للوناسه ولا للطبيخ...؟
عفرا: بسير لعمتي وبشوفها شو بتقول...
سمر: يلسي وين تبين..عمتج في حجرتها الحين محد يرمسها...
حمده: ليش شو مستوي؟
سمر: شو مستوي بعد..ترمس حبيبة القلب لازم تكون مشغوله والله لو كسرتي الباب ما تبطله...
عفرا حست بشي مختلف في حصه...وفي قلبها..
"يا حظها عندها ربيعه!!! شو شعورها يوم كل شي تخبرها به...ويوم تتضايج تعرف ان محد بيسمعها الا هي...شو شعورها يوم تعرف ان ليلى موجوده في كل وقت عشانها وهي بالمثل....يا حظهم والله يا حظهم...معقوله الوقت فات ولابعده في وقت وابني نفسي من اول ويديد واشوف شو اللي قاصر علي وشو اللي طاف...بعده في وقت ولا لاء؟؟؟ يا رب ارجوك ساعدني...اكيد في وقت ولازم استغله قد ما قدر.."
خلصت عفرا رمستها في نفسها وهي معزمه على تغيير كلي كامل لكل حياتها قررت تتحول وتنهي التعب والضيج والمعاناه والوحده اللي عزلت عمرها فيها قررت من اول ويديد تبني نفسها للافضل على الاقل ان ما كان عشان نفسها بيكون عشان خاطر الانسانه اللي حبتها وهذا بيكون اجمل دافع واغلى هديه ممكن تنعطى لروح اقرب انسانه لها...
..
..
وفي الحجره اللي فوق والباب مبند وهي تمشي من اول الحجره لاخرها وتهز راسها بأسف وتحاول تهدي قد ما تقدر بس بدون فايده..تحاول انها تطلعها من الجو الحزين اللي دفنت عمرها فيه..تحاول تكون منها قريبه شرات كل مره بس للاسف ولا أي قوه في الكون ممكن تخفف عليها اللي فيها...كان حزنها نابع من القلب لا ترده ولا توديه قوة الدنيا..حزنها عنيف وقوي وهي مب قد انها تتحمله فما كان لها الا هالانسانه تشكي لها مثل ما تعودت..
حصه: وانتي ليش استعيلتي الله يهديج يا ليلى...؟
ليلى بصوت كله حزن: خله يولي ماريد اعرس اصلا...والله ضاج حالي يا حصه..
حصه: الحين انتي الفرصه يات لين عندج تودرينها ليش...مب كل يوم بييج معرس..ليش رفضتي..ليش؟
ليلى: لا تزيديني الله يخليج والله اللي فيني مكفيني والله يا حصه قمت اقتنع ان كل شي يعاندني بما فيها اقداري..
حصه: استغفري ربج يا ليلى مب انتي اللي تقولين هالرمسه...خلاص والله رغم زعلي انج طوفتي هالمعرس اللي ظني بيكون احسن من حبيب الغفله...
ليلى تذكرت ناصر: ولا تذكريني في هالانسان مب طايقه اسمع اسمه ولا شي يذكرني فيه..مب متخيله اني يوم السبت بداوم وبشوفه في ويهي...
حصه: خليه يولي شو تبين به...لاتسوين له سالفه ابد...
ليلى: لين عقب هالويكند يصير خير...الا اقول حمد متى بييكم...؟..وشو صار في سالفته...؟
حصه: باجر بيي والله ماعرف شو بسوي..
ليلى: لا تسوين شي بس حاولي تتذكرين شي من حركات الخساس ونظرات الطفاسه اللي كان يطالعج بها وطبقيها عملي عليه..يستاهل شوي يتعذب مب لازم كل شي ييه بارد مبرد...
حصه: يالشريره ترا ما يهون علي..
ليلى: كنت اعرف والله اعرف...ادريبج ديايه ما تتحملين تجرحين كتاكيتج..
حصه تضحك..
ليلى: ايوه اضحكي شعليج شو تبين اصلا الا تضحكين ويا راسج...
حصه: خلينا نستانس اليوم ندري باجر بيكون حرب بارده هذا غير التحرش من الطرفين...
ليلى: ما تخيلج ابد تنفرين منه..اصلا انتي غير..احسج تتلذذين بتعذيبه...
حصه: بيني وبينج هيه..مادري احس بعذابه يذبحني...اموت ان ما عذبني...يختي شسوي والله الحب بلوه..
ليلى تتنهد:الله يعينج بس ترا كرامتج لها اعتبار لا تهملينه...
حصه: الحب مافيه واحد اثنين ومافيه كرامه..الحب فيه ......
ليلى تقاطعها: نعم!! عيدي اللي سمعته قبل شوي...الحب اصلا كله كرامه ومبادئ ..نحن نقبل التضحيه والتنازل عشان يستمر الحب بس الكرامه هي الشي الوحيد اللي ما ينقبل النقاش فيه..اذا خسرتي كرامتج خسرتي كل شي...
حصه: مادري تفرق من ناس لناس...
ليلى: الله يعينج والله اذا ما تصلتي باجر يا ويلج ابى تفصيل ممل شو استوى من اول ما دخل البيت لين ما طلع..وشو شعورج وشو سوا وكيف تحرك وشو قال..
حصه تضحك:حشا مب استخبارات ..الا الاستخبارات ارحم ويا ويهج...
ليلى: لازم بعد منج تعاديت..
حصه: ليلى ابى اتخبرج عن كم شغله في المطبخ..
ليلى تغايض: وييه قررتي اخيرا تخيسين ايديج الناعمه وتحدرين المطبخ...؟ يالله قولي شو تبين تطبخين بس لا تختارين شي صعب تراني ماعرف كل شي..
حصه: انا بعد مابا شي صعب ابى اشياء سهله..قولي لي كيف اسوي مكرونة بشاميل وكيف اسوي مجبوس لحم...
ليلى: مكرونة البشاميل سهله ما يبالها..قولي بشو تبين تسوينها لحم ولا دياي..؟
حصه: امم دياي..
ليلى: طبخي الديايه ساعه وعشر دقايق طبعا لازم تكون فرش من العين مب مثلجه...وقبل تخلص بربع ساعه طبخي المكرونه..ولين ما تخلص المكرونه طباخ طلعي الدياي من الماي وشلي العظم عنه وافرمي بصل وايد وحطي الدياي عقب ما تفتتينه على البصل واقليه في سمن حطي صلصه وبهارات وملح وكل شي من فلفل اسود وابيض وفلفل احمر حار مطحون وشو بعد هيه كل شي من البهارات حطيه..عقبها قلبيه لين ما يحمر الدياي وبندي عليه وسيري للمكرونه يوم تستوي وجبي الماي من فوقها وانتهى الموضوع...
حصه: والبشاميل كيف اسويه..؟
ليلى: اشتري جاهز وفكي عمرج..
حصه: لا ابى مال البيت...قولي كيف..
ليلى: صبي سمن في الجدر وحطي فوقه ملعقه طحين متوسطه وقلبي لين ما تتيمع وتمي زيدي طحين لين ما تتماسك وتغدي شرات العجينه..وخليها وييبي ثلاث اكواب حليب نيدو مذوبات في ماي واغليهن وكل شوي زيدي على الطحين حليب لين ما يتماسك ويستوي ذايب شرات البشاميل اللي تاكلينه وابدي حطي طبقة بشاميل وعقبها نص المكرونه وحشوة الدياي وفوقها النص الباقي من المكرونه ووزعي البشاميل بالتساوي من فوق..وحطيها في الفرن لين ما تغدي ذهبيه وصحتين وعافيه..
حصه: الله يستر وايد صعبه..
ليلى: لا صعبه ولاشي يوم بتبدين فيها اتصلي وانا بخبرج كل شي اوكي..
حصه: خلاص اوكي..وكيف اسوي مجبوس لحم..
ليلى: مجبوس اللحم اول شي تقطعين اللحم قطع صغار وتطبخينهن وتحطين عليهن لومي يابس وقرفه وهيل وخليه يطبخ على حسب نوعية اللحمه..اذا كانت من اللحم الصغار تطبخينها ساعه ونص وان كانت لحم كبار طبخيها ساعتين الا ربع...ولين ما يطبخ حمري بصل وطماط وفلفل اخضر بارد وفلفل مطحون احمر واسود وملح ومكعب ماجي واحد بس عشان ما يستوي الاكل حامض..وصلصله والبهاارات اللي تبين...ونقعي العيش في الماي ربع ساعه هذا ان كنتي تستخدمين بسمتي وان كان شي ثاني الله اعلم...كل شوي زيدي الماي على اللحمه عشان يوم بتحطين العيش تضبطين المقادير واول ما يخلص العيش ربع ساعه صفي الماي من فوقه وحطيه على اللحمه وحطي الصلصه اللي جهزتيها قبل شوي وغطيه لين ما ينشف الماي بس تمي تابعيه عشان تذوقين العيش نضج ولا بعده طبعا النار تكون هاديه..وان ذقتي انه خلص بندي النار تحته وخليه مغطى خمس دقايق عشان يجف باقي الماي اللي تحت واجلبيه في صينيه ثاني ورتبي قطع اللحم بالشكل اللي تبينه..وصحتين وعافيه...
حصه: يعافيج حبيبة البي...يا بخته اللي بيظويج اسميه بيظوي حرمة بيت كامله..
ليلى: دخيلج صكي هالطاري لاعت جبدي من العرس وطاريه..
حصه: اوكي خلاص لا تزعلين يا الشيف ليلى..
ليلى: المهم يالله بخليج الحين بسير اشوف هالبنت اللي بتييب لي جلطه...
حصه تضحك: تستاهلين ماياج منها..حشا شو تأكلينها اشك تأكلينها لحوم بشر...
ليلى: يالخايسه والله ان ما قلتي ماشاء الله ببند في ويهج..
حصه: ماشاء الله ما شاء الله ما شاء الله.. ارتحتي ..!!
ليلى: زين يالله بخليج...اكيد بنزل وبلاقي دمار في البيت تحت والله مدري شو سالفتها هالبنت ما خلت شي صاحي في البيت..
حصه ميته ضحك: يالله سيري شوفيها...وان شاء الله اليوم قبل ارقد لازم برمسج..
ليلى: فديتج يا ربي..
حصه: يالله في وداعة الله..
ليلى: الله وياج...
بندت ليلى عن حصه...وحصه على طول نزلت تحت بتشوف البنات وينهن وعبدالله وينه من الظهر ما شافته والحين قربت الغيبه وهو مارد البيت..وهي نازله تحت شافت عفرا في الصاله اللي تحت بروحها تشوف التلفزيون...
حصه: عفاري وين عبدالله؟
عفرا تقلب القنوات: مادري اتصل قبل شوي يتخبرني شو نبى من الجمعيه...وقلت له حصه بتتصل لك عقب شوي..
حصه: سأل عني؟
عفرا: هيه قال يبغي يتخبرج شو تبون من الجمعيه عشان غدا باجر...
حصه: الحين بسير ادق له...الا وين سمر وحمده..؟
عفرا: حمده راحت فوق ترمس ربيعتها وسمر محنيه شعرها وسارت تتسبح..
حصه: اوكي خلاص قصري صوت التلفزيون برمس عمي...
اتصلت حصه على تلفون عمها ورد عليها على طول شكله كان يترياها..
عبدالله: وينج الله يهداج ساعه اترياج تتصلين..
حصه: سوري فديتك والله كنت ارمس ليلووه اسمحلي...
عبدالله: منو ليلى؟
حصه: مب منك انت...الا مصدق عمرك انك من دبي وتنكرت لبوظبي...الحين ما تعرف ليلى؟
عبدالله: والله ماعرفها تعرفيني ماحب هالسوالف...
حصه : أي سوالف يا شيخ ..ما تعرف ليلى بنت خالي ناصر الله يرحمه..
عبدالله يتذكر: هيه عرفتها ليلووه زين زين شو تبين من الجمعيه...
حصه: امم نبغي جبنة بيتزا وزيتون جالعين النوى منه ونبغي صنوبر وزبيب وجبنة مالحه وزعتر وفلفل ابيض وصبغة عيش لا تنسى ابى الصبغه اللي لونها احمر لا تييب البرتقالي...وشو بعد ذكريني يا عفرا...
عبدالله: وهاه كله بتحطينه فوق بعض؟
حصه تضحك: لا لاء هذي اشياء مب موجوده في البيت ونحتاجها لكذا طبق باجر..
عفرا: قولي له ماشي نسكافيه ولا دريم ويب وقولي له ييب بودرة سكر..وخلييه ييب وياه بشاميل جاهز احسن من اننا نتم نخبص..
حصه: لا لا ليلى خبرتني كيف اسوي به طريقه وايد سهله ما نبى جاهز بنطبخ احسن من الطلبيات..
عبدالله: يالله شو بعد..؟
حصه: هات وياك بودرة سكر ونسكافيه صغير وخل وليمون و اقولك هات وياك ..لا لا خلاص كتبت هالاشياء تكفي..
عبدالله: اذا في شي قولي من الحين الجمعيه وايد بعيده مافيني اسير مره ثانيه..
عفرا: هيه تذكرت قولي له ييب وياه معكرونه قصيره ما نبى طويله شكلها يطلع غلط..هذيك ارتب..
حصه: هات وياك م...
عبدالله: خلاص سمعت اذا في شي ثاني دقن لي الحين لان بعدني في الجمعيه..
حصه: اوكي نحن بنسير المطبخ نجهز بعض العجاين ..
عبدالله: برايكن ..
حصه: باي..
بندت حصه وسارت ويا عفرا المطبخ عشان يخلصون ويقربون على الاقل اشياء لباجر عشان يسونها بدل الزحمه والضيج قررن يخلصن بعض الشغل الليله ويخلنه في الثلاجه لين باجر ويكملن عليه يوم ينشن...
................
على بعد المسافه من بين دبي والعاصمه مرورا بكل بقعه وكل بيت وانتهاء بالصاله العوده والتلفزيون اللي يكسر الصمت في البيت الهادي والغرف الشبه فاضيه الا من اربع ا فراد وقريبا جدا بيصيرون خمسه..وعلى اتم الاستعدادات وفي جو لا يمت للبهجه بصله..ولا يعني للفرح أي شي غير تخطيط ومشاريع وكلام ما يخلو عن الشركات والصفقات والربح والخساره....وبعد ما بدا العد التنازلي ويوم ما بقى شي على اللحظات اللي ما تشكل أي اهميه لاي انسان سوى صاحب القرار او احسن شي نقول منفذه لان اللي اتنفذ فيه القرار شخص مغلوب على امره ما يملك من حرية رايه غير اللي يسمح له يتنفس فقط..
بو ناصر: فهد خلصتوا...؟
فهد: هيه خلصنا ويوم الجمعه بينصبون العمال الخيمه...
بو ناصر: كل شي جاهز ما بقى شي؟ متأكد انت ما نسينا شي..؟
فهد: افا عليك ما شي بقى كل شي خلص ...
بو ناصر: يا ام ناصر كلمتي الحرمات...؟
ام ناصر: اصلا هن يدرن ان العرس الخميس ما يحتاي اخبرهن...
بو ناصر: انا ما قلت عزمتي حد..انا اقصد هل بيت ام اروى قلتي لهم شي قاصر عليهم ماشيات...؟
ام ناصر: ماشي قاصر عليهن كل يوم اتصل بهن ما قالن لي شي..الا البنت مدري بلاها شكله فستانها هب عايبنها مدري شو بلاه..
بو ناصر: والله انا ما يخصني في هالشغلات قولي لريلها يتابعها وياها...
ام ناصر: كلمته وقال بيتصل بهن ترا البنت ما طاعت تفصل لها فستان وقالت بتشتري شي جاهز..
بو ناصر: احسن بلاها الخساير من اساسه...
فهد كان يسمعهم ما يدري ليش حس بعمره منقهر..مايدري ليش حس انه يحترق معصب وما يريد يسمع زود...
فهد: خلاص ابويه انا بطلع تامرني بشي؟
بو ناصر: على وين ان شاء الله..انت ما تشبع هياته..؟
فهد: عند ربعي مليت من البيت انا مب حرمه اتقيد بالمواعيد والزم ما علي بيتي..
بو ناصر: امك قالت انك تبغي تعرس...صدق؟
فهد: اكيد ولا بعد تبوني اصك الثلاثين وما عرست اكيد فكرت بالعرس...
بو ناصر: بنت منو؟
فهد: بنت ابوها...يعني الله يهداك بنت منو...ماعرف انا انا قلت للوالده تخطب لي وانتهى الموضوع...ما يهمني بنت منو ولا من وين..اهم شي يكونوا عرب ما عليهم رمسه راعين واجب ومحد يرمس فيهم..
بو ناصر: وليش ما قلت لي انا بخطب لك بنت اخت حرمتي..
فهد طالعه بطرف عينه: استريح يالغالي ما يحتاي زين ان اروى ما عندها خوات عشان ما اتوهق في صفقه ثانيه...انا حرمتي امي بتختارها لي...انت اخترت لناصر وانا امي تختار لي...
بو ناصر: برايك...
فهد: يالله يا ام ناصر من رخصتج..
ام ناصر: الله وياك فديتك...
طلع فهد من البيت وما يدري ليش رده تفكيره لليلى ما يعرف شو صار به..بس بنت خاله ما تستاهل اللي ياها...ما يدري شو صار به وليش حس بالذنب تجاهها..حس بطعم الغدر وما حب ان حد يجربه..ما يدري ليش ليلى ما هانت عليه...
"ما تستاهل اللي ياها ما تستاهل بنت خالي..حليلج يا ليلى 13 سنه وانتي تعشمين عمرج وتعدين اللحظات تقولين اليوم اليوم..وراح اليوم ويا باجر وطلع كل يوم يشبه اللي قبله..ماشي اختلف وانتي مكانج ما كسبتي شي..بالعكس خسايرج كل مالها وتزيد...الله يكون بعونج...!!!.."
كان في سيارته يتمشى في الشوراع وما يعرف ليش فكر بشي يمكن يشوفه ضرب من ضروب الجنون لكنه ابتسم وفكر فيها بحريه شوي اكبر..ولو انه تصرف اهبل بس بعد فكر يسويه على الاقل يقضي وقت ومنها يمر عليهم ويسلم ويرمسها بكلمتين في خاطره...وصل لين باب البيت ...البيت اللي ياما لعب فيه وضحك وعاش معظم وقته بين ناس ربوه وداروه ...بين ناس حسهم امه وابوه... في بيت كان يقضي فيه اغلب وقته حتى اكثر من بيتهم نفسه...
تنهد وهو لابس نظارته الشمسيه رغم ان الساعه كانت 8:00 الليل ومستحيل يكون هناك شعاع شمس حتى..هالبيت كان فيه كل شي ذكريات وصفحات عمرها ما تنّسى مهما طواها البعد ومهما عفت عليها السنين...ذكريات يالله محلاها...ذكريات الحب الاول والاخير حتى..يالله كم احتوى هالبيت من موقف بينه وبين عايشه وليلى والمرحوم سيف وراشد ومبارك...حط النظاره على السيت اللي حذاله وبند السياره ونزل ودق الجرس رغم ان الباب كان مشرع على الاخر...بس ما دخل سيارته..وشاف مواقف السيارات في البيت ..كانت فاضيه مافيها ولا سياره الشي اللي يعني ان راشد مب في البيت لا هو ولا مبارك اخوه...وهو يتريا حد ييه من داخل...سمع صوت على الانترفون من داخل...
ليلى: منو؟
فهد: السلام عليكم..
ليلى: وعليكم السلام..
فهد: ندخل ولا نتم برا...؟
ليلى: اقرب حياك الميلس على يمينك الشيخ..
فهد: ما يحتاي بنيلس في الحوش..
ليلى ماعرفت منو يرمس بس حست بقلبها شي غريب ما تدري شو هو...
ليلى: بغيت من؟
فهد: خالتي غاليه وليلى ...
ليلى مبتسمه: فهد!!!!!!!
فهد مبتسم اكثر: هيه زين والله تتذكرين اسمي بعدج...
ليلى: لحظه لحظه بييك الحين...
.
.
في صالة البيت اللي تحت ربعت ليلى فوق وحطت شيلة الصلاه على راسها وكانت لابسه مخور وشيخه في الصاله يالسه تركب المكعبات على بعضها...وامها يالسه وماسكه مسبحتها وتسبح في الطرف الثاني...
ليلى: امايه عدلي وقايتج في ريال بيحدر الصاله..
ام راشد: من هالريال؟
ليلى: فهد ولد عمتي...
ام راشد: هاه؟!!!
ونزلت ليلى من دري الصاله الخارجي ما تدري ليش فرحت لشوفة فهد ما تعرف ليش بسرعه طلعت له وحتى ما خلت امها تكمل رمستها وياها وسارت له لين الباب...وشافته وهو انصدم منها كيف تغيرت يالله متى اخر مره شافها...هالعيون بعدها شرات ماهي ان ما زاد جمالها ما قل...بس الويه البسيط الهادي اللي مافيه جمال يذبح ولكن فيه نظرات حزن تقطع القلب..شكلها ازليه مافي أي شي ممكن يخليها تختفي...
فهد: السلام عليج الغاليه..
ليلى مبتسمه: يا حيهم يا حيهم وعليك السلام يا هلا والله بولد عمتي اللي ما يقصر...
فهد مبتسم: نغزه هذي ولا شو...؟
ليلى: تفضل اقرب حياك...
فهد: قريب يا بنت خالي..
ومشوا مع بعض من البوابه الخارجيه لين الصاله وفي هالوقت..
ليلى: انصدمت والله ما توقعت انك فهد..
فهد: لا توقعي عادي ليش ما كون فهد...بعدني ماغيرت اسمي للحين...
ليلى تضحك: ماتغيرت ابد ...بعدك للحين ما تيوز عن سوالف الاستهبال...؟
فهد: شفتي عاد...شو بيغيرني مثلا...حليلي ما تغير انا...
ليلى: قلت يمكن الدنيا تغيرك شرات غيرك...
فهد: لا لا انا غير ما تبدل..
ليلى: ترا الناس مثل ما يغيرون الثياب يغيرون المبادئ...
فهد: يالله شو هالدرر بنت خالي..ماحيدج شاعره...
ليلى: شفت عاد هذي يسمونها عصارة السنين..
فهد: عن الفلسفه هذي قصيده متعب التركي اعرف مب انتي اللي قايلتنها...
ليلى تضحك: سود الله ويه عدوينك...مسود الويه...كشفتني..بس والله تراني اعرف اعد قصيد...
فهد: اعرف من زمان شو تتحريني نسيت...
وفتحت له باب الصاله ودخل البيت وقرب من ام راشد بيسلم عليها...ويوم سلم يلس قريب منها شوي...
ام راشد: حيالله من يانا...سيري هاتي القهوه يا ليلى فديتج...
ليلى: ان شاء الله...
فهد: الله يحييج يا خالتي شحالج عساج مرتاحه وشحالهن ريولج الحين..
ام راشد تشققت ان حد يعرف عن ريولها ويتنشدها: فديتك انا ريولي خلاص خربن ماشي منهن فايده..ليت حد يقصهن ويفكني منهن...
فهد: بسم الله شو هالفال تحمدي الله واشكريه يمكن ترتاحين عقب...ويفك الله كربتج...الا اقول ليش ما تروحين تتعالجين احسن برا...
ام راشد: وين ماروم للسفر انا..يالله يالله اروم اسير للعياده بعدك تباني اسير برا...خلني اموت في البلاد ابرك من بقعة هالحمر..
فهد يضحك: الله يطولي بعمرج يالغاليه....شحاله راشد ومبارك..؟
ام راشد: بخير ربي يسلمك ...انت علومك وعلوم امك وعربانكم كلهم...
وتدخل ليلى يايبه وياها الفواله والقهوه ودلة الشاهي.....
ليلى: تشرب شاي ولا قهوه...
فهد: اشرب عصير...
ليلى تضحك: فهد عن الاستهبال..
فهد: اشرب أي شي من بيتكم حلو...
ام راشد نشت عنهم..وسارت لشيخه...اللي كانت مندمجه وتركب المكعبات على بعض....
ام راشد: قومي يا شيخه...قومي سلمي على عمج فهد...
شيخه: ماليد..
لفت شيخه وشافت حد في الصاله وسارت عند امها وكان شعرها ملعوز ومب مسحينه...ولابسه جلابيه قصيره...
وركبت على ريول امها ويلست فوقهن...
ليلى: روحي سلمي عليه...
شيخه تطالعه بنظرات خقه: ماليد..
فهد: بنت سيف؟
ليلى: هيه...
فهد: هييي الدبه تعالي...
شيخه عصبت: امي ثوفيها تقولي دبه..
ليلى: لا هو يقصدني انا مب انتي...
فهد: الا انتي الدبه مب ليلى..تعالي سلمي..
شيخه: ماليد..
ونش فهد ويلس في وسط الصاله عند مكعبات شيخه...ويلس يلعب بهن..
شيخه بتصيح: امي ثوفيه قوليله يلوووح..
ليلى: فهد قوم روح بيتكم يالله..
فهد ميت ضحك: كيفكن هو...
ويلس يخرب اللي سوته شيخه ويركب على كيفه...وليلى شاله شيخه فوقها وعقب نزلتها...وشيخه ربعت صوبه..ويرته من كندورته..
شيخه: مالي مالي...
فهد مسكها ولوى عليها وتم يحببها: فديتج انا فديت روحج ...
شيخه: ماليدث ماليدث.
فهد: بس انا اريدج اريدج..
ليلى تضحك عليهم ويلست على الكنبه جدامهم..وفهد يتحرش في شيخه وهي تطالعهم...صح انها انصدمت من تصرف فهد ومن زيارته بس خلت عمرها عاديه او نقول احسن روحها كانت طبيعيه بدون ما تسوي هالشي...فهد بعفويته وخفة دمه خلى الجو عادي وجنه كان عندهم البارحه...
ليلى كانت سرحانه في عالم ثاني وفهد نسى نفسه ويلس ويا شيخه وماحس بالوقت..وبدقايق قدر يكسبها...
فهد وهو يحط اخر مربع فوق القلعه اللي بناها لشيخه: شوفي الحين سوينا بيت عوود..حقج انتي وريلج..
شيخه تضحك وضرسين من ضروسها اللي جدام مسوسات وشكلها يضحك:وامي ويانا..
فهد: وانا بعد...!!
شيخه: لاء اتي ولد عيب تلوحي مع البنات..
فهد: حي منو معلمنج انتي هالسوالف...والله انج مسنعه وبنت ناس...عادي ماستغرب دام ليلى وراج فأنتي بتطلعين من اخير بنات العايله..
شيخه تطالعه: يالله نثوي بيت للوحث..
فهد: شو؟
شيخه: وحث...!!
ودخلت البشكاره...
شرملى: ماما ليلى...
ليلى انتبهت: هلا...
شرملى: شو يسوي عشا..؟
ليلى: فهد شو بتتعشى..شو تحب تتعشى..؟
فهد: لا مشكوره الغاليه انا لازم اروح الحين...والله بالصدفه ياي هني والشباب يتريووني بس ما سرت لهم...
ليلى: ليش فهد الله يخليك تعشى ويانا راشد وحمدان بييون الحين...
فهد ينش بيطلع: والله العظيم اني مواعد الشباب..بس ييت هني وعقبها بمر عليهم وبشوف العمال وبسير البيت اصلا ما بيمديني الوقت...
ليلى: أي عمال...؟؟
فهد وشكله تغير: عمال الخيام...
ليلى وقلبها مب في حاله: خيام شو؟
فهد يبلع ريجه: عرس ناصر...
صاعقه نزلت على راس ليلى...ضربه مستحيل يحس فيها غيرها...كلمه تعني لليلى موتي الحين...يالله مرخص الدنيا..وبكل بساطه تقولها يا فهد...
نزل فهد راسه يطالع شيخه وهي تلعب...ما قدر انه يطالع ليلى اللي كانت متماسكه وما صاحت ولا دمعت...
ليلى بثقه مصطنعه: خلاص حددتوا...؟
فهد: الاثنين ان شاء الله...
ليلى حست انها تنجتل وتتعذب بس صبرت ويا مكثر صبرها: مبروك الله يتمم بخير...
فهد: يالله من رخصتج الغاليه...
وطلع من باب الصاله..وعشان ليلى ما تحسسه ان فيها شي طلعت وراه تربع وشيخه نشت وياهم...
ليلى: فهد تريا بوصلك..
فهد: شعليج ساكنه مملكه مب بيت ..اونه بوصلك..
ليلى تبتسم:قول ما شاء الله..
فهد: ماشاء الله..
ليلى: سلم على عمتي وعمي وناصر...و..
فهد: ومنو بعد...؟؟ خلاص خلصنا اونه سلم على وعلى...كلنا على بعضنا اربعه...
ليلى: لا بتستووون خمسه جريب...
فهد: ليلى...
ليلى: لبيه..
فهد: لبيتي حايه...سمعي بقولج شي بس قولي والله اقول الصدق..
ليلى مبتسمه: وييه مال اول هالحركات بس يالله ..والله اقول الصدق..
فهد: عادي اذا ابى ايي هني أي وقت...؟
ليلى مستغربه: شو هالعبط اكيد عادي..يا فهد يا خوي القطيعه يت من صوبكم ولا نحن خواطرنا ما فيها شي..صدقني لو تميت سنه تفكر وتحسب كبر فرحتي اليوم بزيارتك والله ما تستوعب..صدقني يا فهد...
فهد تشقق: زين مشكوره..
ليلى: عدال يالمؤدب انت..
فهد يطلع برا: يالله ردي داخل لحد يخطف ويشوفج...
ليلى ابتسمت: زين والله كبرنا...
فهد يركب الموتر: يالله اقولج داخل في شباب برا يالله دشي..
ليلى تضحك: سلم عليهم...
فهد بنظره حاده: منو؟؟
ليلى: شفيك اقصد اهلك...شبابهم الشباب اللي برا نفادهم..
فهد: ان شاء الله يالله تيك قود كير ..
ليلى: ارجوك ما نروم نحن...
فهد يرجع السياره ورا: الله وياكم..
روح فهد وليلى ما قدرت انها ما تصيح ما قدرت انها ما تطلع حجرتها وتبكي لين ما تقول بس..قهرها وباجر بيزفونه لوحده غيرها...يالله يالدنيا كيف انجلبتي..طول عمرج ظالمتني ويوم قلت بتنصفيني غدرتي فيني...مرخصج يالله مرخصج...صدق ليلى عاشت اكتئاب نفسي وما قدرت تتصل بحصه من ضيج حالها ومن قهرها...حست انها بتنفجر من الصياح...صاحت لين ما قالت بس..وفوق كل هذا تمت تصيح اكثر واكثر...صح تحس انها عافت ناصر بس ما تقدر انها تقول انها ما تحبه وانها قدرت تنساه..مجرد عصبيتها عليه يأكد لها انها بعدها تحبه وتموت فيه...بس كرامتها ابدا من كل شي..
"هذا وانا اشوف يوم السبت صعب علي اواجهه..عيل كيف بسوي وانا بشوفه واعرف ان عرسه باقي عليه يومين...يالله يا ربي شسوي..!! وشهي حياتي لو تلاقت عيني بعينه...شو بقوله وكيف ممكن اواجهه...والله انيه مادري يا ربي شسوي...ارجوك ساعدني.."
وتمت تصيح من قهرها وضيجها...وتلفونها يرن وحصه حرقته تتصل فيها بس ما شلته ابد..ما كان لها بارض تكلم حد..كانت محتاجه تعيش ويا نفسها شوي وتعرف شو اللي لها واللي عليها...ويوم السبت يحلها الف حلال..
.....................

اخوكم البدوي بيكمل هالجزء لانه وايد طويل ....

كونو بإنتظاره

اختكم
الغلا

[البدوي الحبوب]

تسلمين اختي الغلا وفالكم طيب ان شاءالله باجر بكمل الجزء

تحياتي لكم

[الرايقه]

يعطيج الف عاااافيه الغلا ,,,

[الغلا]

الله يعافيج اختي الغاليه على هالتواصل ....

شكرا جزيلا

اختكم
الغلا

[البدوي الحبوب]

اول ما نشو الصبح كانت عفرا مبخره البيت ومعدله الدنيا وكل شي في البيت كان يجنن من تنسيق حصه وعفرا...اما حمده وسمر فكان وجودهن والعدم واحد...عبدالله كان ضايع في هالعفسه ومب عارف ريله من راسه..بس كان متقبل الموضوع دام ان السالفه فيها خواته وهله وفيها وناسه له وياهم...

في المطبخ كانت حصه تدخل اخر كيكة نسكافيه مسوينها...واكيد عفرا اللي كانت مسويتنها...واما حصه ما تعرف لهالسوالف..واللي تفكر فيه كيف بتخبص الدنيا الظهر يوم بتسوي المجبوس والمكرونه...وعقب ما طلعت من المطبخ...وعفرا وياها..

عفرا: افف عفت ريحتي من الطباخ الله يعينا على الغدا...

حصه: والله ان مايت سمر وحمده ما يتغدن الخايسات بشاكيرهن ونحن ما ندري..

عفرا: ما يعرفن شي لاتزقرينهن وتصدعين براسج برايهن...

حصه: انا بسير اتسبح شوي وبرد الصاله بنحط الريوق...

عفرا: هو متى بيوصل..؟

حصه وقلبها يدق: والله مادري بس تقريبا على الساعه 1:00 الظهر...

عبدالله وهو يحدر المطبخ: يوعان ماشي ريوق...؟

عفرا: امبلى والله تونا نقول بنحطه الحين..

عبدالله: عفرا فديتج حطي لي شاي حليب وفيه شوية هيل..

عفرا: ان شاء الله..

طلع عنهن عبدالله..وهن كل وحده سارت مكان...الساعه بعدها كانت 10:00 الصبح وحمده للحين ما نشت..ودخلت عفرا توعيها...وحصه سارت تستلم سمر...اللي شافتها تسبح في بحور الاحلام...

حصه تسحب لحافها: قومي يالله بلا قلة ادب خلينا نخلص شغلنا..مب حاله هذي ..يالله نشي ساعدينا..

سمر: جب ما يخصج طلعي برا..

حصه مبطله عيونها على الاخير: شو فيج هييه انتي صاحيه..

سمر وشكلها بتصيح: طلعي برا..انتي شو تتحرين عمرج..محد يروم لج..انتي ما تحترمين حد..خلينا نرقد..انتي ما عندج احساس...

حصه كانت صدق مفجوعه في اختها ومب مصدقه اللي تسمعه...

سمر تكمل: بس انا استحملتج وايد بس انتي مصختيها وما قدرتي سكوتي اففففف..

ونشت سمر وشلت لحافها ومخدتها..

سمر: انا بس برد بوظبي ومابا ارقد وياج خلاص تمي بروحج وارتاحي وريحيني...وبليز لا ترمسين وياي اوكي...خلاص كل شي وله حدود..

وطلعت سمر برا وبطلت باب حجرة بنات اخوها وشافتهن يرمسن بهدوء بعدما نشت حمده وكانت عفرا يالسه على شبرية اختها ويسولفن..ولفن عليها مستغربات يوم شافنها..وهي يلست على الكنبه في الحجره وتمت تصيح من خاطرها...ونشت لها عفرا...وكانت هذي هي التجربه الاولى لعفرا والفرصه الاولى اللي مفروض فيها تثبت لنفسها انها تمشي في الطريق الصح..وان الدور اللي بتبدا تتقمصه هو الانسب لها..

عفرا: سمر شو فيج؟

سمر تصيح من خاطرها: ولا شي ولا شي..

عفرا: شو مافيج شي ودموعج هاي شو سببها..؟

سمر: اريد ارد بوظبي خلاص مابا اتم هني..اريد امي وابوي...

عفرا: خلاص نحن باجر رادين ليش مضيجه خاطرج..بس انتي كنتي مستانسه وما تبينا نرد شغيرج؟ حصه زعلتج؟

سمر: لا تقولين اسمها ماريد اسمعه خلاص كرهتها...

عفرا شهقت: افا يا سمر حد يكره اخته بنت امه وابوه..

حمده شلت عمرها ودخلت الحمام بتتسبح...

عفرا: قومي قومي غسلي ويهج وتعالي بكلمج في ميلس الحريم بعيد عن حمده وحصه وعمي...قومي..

قامت سمر ويا عفرا ودخلتها الحمام اللي في الصاله..وحصه صدق بعدها تحت تأثير رمسة سمر مب مستوعبه شي..ليش شو اللي خلاها تنفجر..

" معقوله انها ضايجه وبترد عادي...ولا شو سالفتها هدت علي مره وحده...معقوله اني مصختها..والله اني احبها هذي شو تفكر.."

وردت تتذكر جملة سمر...

" طلعي برا..انتي شو تتحرين عمرج..محد يروم لج..انتي ما تحترمين حد..خلينا نرقد..انتي ما عندج احساس..."

دخلت حصه تتسبح وطنشت الموضوع وعبدالله في الصاله يالس ما يعرف شو يسوي...ويفكر كيف بيكون البيت باجر عقب ما يروحن عنه البنات...بيرد وحيد ضايج ماله حد...بيحس بتعاسه كبيره..وضيج اكبر..بترد له صديقته الكئيبه بترد له الوحده اللعينه...بس بيحاول يصبر ما وراه غير الصبر...
..
..
طلع سيارته اول ما نش..اليوم نش من وقت وتعطر وتعدل كان صدق يذبح اللي ما ينذبح..متعمد يكشخ خله يعذبها شوي اصلا هي تموت في تعذيبه وهو ليش ما يزيد الجرعه....عدل المنظره في السياره وطالع ويهه...

"جي اوكي ...اليوم يومج يا حصيص بنت مبارك"

ابتسم ودخل السيدي في المسجل...

" سولفي للناس عني ...قولي اني ما عرفت اختار من قلبي يحبه ..سولفي للناس اني ما عرفت اقرا وجوه الحاضرين من الاحبه...اعترفلك اني فعلا ما عرفتك...ما قدرت اوصل مع قلبي لحل وما فهمتك..تجمعين الضد في كل الامور راغبه مره ومره مثل نور..تشبهين ايام اوراق الخريف..تمطرين احيان احساسك زهور..صدقيني صرت من بعدك اخاف واعترف ان الخلاف واسع طريقه...واننا ما نلتقي في أي شي... فينا اختلاف للاسف هذي الحقيقه...يا رضاها وقف وناظر شوي شف غلاها كيف سوا بشخص حي..."

قصر عالصوت شوي...واتصل في عبدالله...كان حمد متشقق ومستانس..وكانت هذي اول لمه له مع اهله من يوم توفت بدريه..واول مره يسير دبي من ذاك اليوم المشؤووم...كان صدق بيطير من الفرحه واللي مفرحنه اكثر انه ساير صوب حصه...حصه اللي صدق اليوم بيستعيد وياها احلى ايام العناد والتعذيب...

عبدالله: مرحبا مليون بولد العم..ماشاء الله لو ادري ان غدانا بيخليك تنش من وقت كل يوم بعزمك..

حمد يضحك: بس بس الله يخليك...والله ياخي نشاط مب طبيعي..

عبدالله: هاه ياي ان شاء الله..

حمد: في الدرب توني طالع وقابض درب دبي..

عبدالله: الله الله بنفسك...بيتنا مكانه ما بيطير لا تسرع ولا تتهور..

حمد: خلاص هي مره يا بو حميد ما تتكرر..

عبدالله يتنهد: الله يرحمها بحرمته..

حمد: امين يا رب العالمين..وين البنات عيل ..البيت هادي ليش؟

عبدالله: والله مادري شسالفة هالمخبل...

حمد يضحك: سلط الله على ابليسك..شو سون بك؟

عبدالله: ياخي مدري شعندهن..اخاف يحرقن البيت علي..من امس ما طلعن من المطبخ الا الساعه 2:30 واليوم ناشات تسع ويالسات فيه للحين..

حمد انفجر من الضحك: وين ام لسان عنك...

عبدالله: حليلها ما تروم لهن ودرت المطبخ ويلست في حجرتها...

حمد: وليش محتشره ذاك اليوم وتقول بتسوي الغدا هي؟

عبدالله: انت ترمس عن منو؟

حمد: وليش انت تقصد من؟

عبدالله: انا اقصد البشكاره..

حمد يضحك: حليلك ولد عمي ثرك مب صاحي..انا ارمس عن اختك حصه...محد ام لسان الا هي..

عبدالله يبتسم:والله تحريتك ترمس عن دونا..حليلها حصه..

حمد: دونا خلها لك شو ابا بها..

عبدالله:يالله خرفنا..

حمد:زين انا بخليك الحين يا بو الشباب وعقب شوي بكون عندك ان شاء الله...

عبدالله: الله الله في السواقه السنعه..

حمد: لا توصي يا بو حميد..

عبدالله: في وداعة الله..

بند حمد عن عبدالله اللي نش يتريق ويا خواته...طبعا سمر ما طاعت تنزل ويلست في حجرة بنات اخوها...وعلى سفرة الريوق..

عبدالله: وين سمر..؟

عفرا: للحين راقده بعدها ما نشت..

عبدالله: متى بتتريق..؟

عفرا: باخذ لها ريوق لين حجرتهن...

حصه: وليش فوق..خليها تنزل شو هالدلع..

حمده: خلوها على راحتها..

عبدالله: شي مضيج بها؟

عفرا: لا بس ما طاعت تنش...تقول نعسانه..

عبدالله: خلوها ترقد شو وراها ما بتسوي شي..حرام خلنها ترتاح ياهل..

عفرا: انا بطلع ارمسها عقب الريوق..

حصه: ما اتصل فيك حمد..

عبدالله: توه مبند عني..عقب شوي بيوصل..

حصه وقلبها ما عاد يصبر اكثر من جي: زين والله تحريته بيي متأخر..

عبدالله مبتسم بحنان: لا الحين ان شاء الله بيكون هني..

نشت حصه وشلت الصحون ويا حمده وعفرا وسارن المطبخ وطلعن ييلسن في الصاله يشوفن التلفزيون..وعفرا طلعت فوق عند سمر..وفي الحجره يالسات عفرا وسمر عقب ما رفعت لها عفرا الريوق فوق..

سمر: ماريد شي..ابى ارد بوظبي..

عفرا: لا تستوين نحيسه عاد..سمر اليوم اخر يوم لنا هني..خلينا نستانس...عمي ما يستاهل الضيجه..

سمر: لا تقولون له اني ضايجه بس صدق ابى ارد بوظبي ماقدر اتحمل اكثر من جي..

عفرا: اوكي تريقي ويحلها الف حلال عمي حمد بيوصل عقب شوي..عيب يشوفكن جي متضاربات وهو ياي يستانس وتعرفين اخته ماتت لازم يكون حزين ونحن نطلعه من جو العزله اللي دافن عمره فيها...

سمر: شو اسوي انا محد يحتايني في شي..

عفرا: وجودج مهم..انتي اخته او شرات اخته...لازم يحس اننا كلنا نحبه ونبغيه وفرحانين بوجوده...

سمر:زين بس قولي لحصه لا ترمسني ماريد ارمسها..

عفرا مبتسمه: اوكي بقولها بس نشي سبحي وعدلي شعرج وغيري ثيابج تراه شوي ويوصل..

سمر: قالوا بيي الظهر...

عفرا: توه متصل بعمي يقول الحين دقايق وبكون عندكم..

سمر: زين خلاص شلي هالريوق مابا شي بتسبح يبالي ساعه لين ما نشف شعري...

عفرا مبتسمه: اوكي بخليه لج على الكاونتر في المطبخ تريقي عقب اوكي..

سمر: اوكي صكي الباب وراج..

طلعت عفرا من عند عمتها سمر وهي مستانسه اول مره تقدر تقنع حد والظاهر ان الدور اللي بدت تتقمصه وتلعبه ينفع عليها..صح يمكن تواجهها عقبات لكنه اكيد دور بيكون اروع ما يكون عشان تعيش في حياتها ذكرى اغلى ناسها...
نشت اليوم هي الثانيه من وقت وسارت توعي اليهال عشان يصلون ما وعتهم الفير للصلاه ومتوثمه فيهم...بس اول ما ردت حجرتها ما لقت ريها في الحجره...دورته ما شافته وين...اليوم خميس وين بيكون راح...العاده يرقد لين 12:00 الظهر..

سمعته وهو يصارخ في الممر اللي فوق بين الدور الثالث والصاله اللي في الدور الثاني..وصوته يعلى وهو يحلف على شي ما تعرف شو هو بس الظاهر ان كان يدافع عن عمره...هي ما فكرت في شي بس راحت حجرتها وبطلت شعرها بتسحيه..وشوي يبطل الباب بقوه..

حامد: ان ما رمستي والله بجلب البيت فوق تحت على راسج...قولي منو رمستي من تلفوني؟

سلمى وهي مرتبكه: اييه شفيك ما لمست تلفونك...

حامد: حلفي؟

سلمى: مب على كل شي بحلف...اذا ما تبغي تصدقني هالشي راجع لك...

حامد وهو يعض على شفايفه من القهر: لا تنرفزيني ولا ترفعين ضغطي...حلفي انج ما لمستي تلفوني..

سلمى: وقسما بالله اني ما لمست تلفونك والله العظيم..

وتقول في خاطرها" والله اني ما لمسته اليوم"..

حامد: قولي والله العظيم ما لمسته..

سلمى: اووه شفيك شكاك جي..والله ما دقيته...حلفت كم مره بحلف...

حامد: قولي يعلني افقد عيالي واحد ورا الثاني اني ما رمست من تلفونك ابد ابد ولا شليته وهو يدق ولا دقيت على حد..

سلمى: لا صراحه مصختها...

حامد بقهر: حلفي..يالله..لا تخليني اتصرف تصرف ما ترضينه..

سلمى: اوف خلاص انا رمستها بنت الاصول ..ليش شو قالت لك...

حامد بدون تفكير مسك سلمى من شعرها ويرها لين الارض وفرها تحت..وبعثر الحجره فوق تحت يدور تلفونها...بس ما لقاه..وبطل شنطتها الصغيره وطلعه منها..وفتحه وطلع البطاقه...وكسرها جدامها...

حامد: هاي اخرتها..ما باقي الا ترمسين ربعي وانا مادري...

سلمى صخت ومنزله راسها الارض..وتحس الدنيا تدور بها..كل شي توقعته يصير الا هالشي..وعشان منو عشان انسانه دخلت حياتهم غلط وبتحولها كلها لغلط في غلط...

مسكت عمرها لا تصيح من قهرها ومن ذلها..وهو شافها بنظرة احتقار وهي نشت ترفع شعرها ويلست على الشبريه بكل هدوء...

حامد: تفوو على هالويه...وعسا ربي لا يبارك في يوم اخترتج فيه شريكه...

سلمى قابلت حقارته بالصمت..مب ضعف ولا قوه ولا مسألة كرامه ولكنها صدمه ما قدرت تمتصها للحين..

حامد وهو منقهر من سكوتها: اليوم ارد البيت وماريد الاقيج شلي قشارج وذلفي من ويهي..وورقة طلاقج بتوصلج باجر اذا ما وصلت الليله...وانتي طالق طالق طالق..

شهقت سلمى وهي تسمع الكلمات مثل الرصاص تحفر مسامعها...وهو صك الباب بقوه وطلع...يلست تصيح وتصيح وما قدرت تبرد قهرها..وما قدرت حتى تتصل في عبدالله ولا فكرت تدق لحد وما عرفت شو تسوي...غير انها تصيح وتصيح عسى بهالصياح يمكن شوي تعرف ترتاح وعقبها تتصرف...
.....................

في بيت بو خليفه الصبح كلهم الشياب يالسين في الصاله وخليفه وساره ونوره اختهم عندهم..يتهم امس بس انصدمت ان خواتها في دبي..وكانوا واقفين كلهم عند باب الصاله يسلمون عليه خلاص بيخليهم وبيروح...عقب ما اتفق اليميع ان الصاعقه هي الحل الامثل له ولاشباهه...

بو خليفه: يالله يا ولدي توكل على ربك...

ام خليفه وعبره خانقتنها: الله الله بنفسك يا ولدي..

خليفه: ريال ما عليكم منه..قدها وقدود...

نوره: يالله عاد الا كم شهر وتفتك..

ذياب بحقد عليهم: زين خلوني بظهر..

بو خليفه: ما بتسلم على بوك قبل تظهر..

ام خليفه بصوت واطي: واعليه عليك يا ولدي..

ساره: بس يا عمتي لا تزيدينه..

وسلموا عليه وطلع عنهم وسار ويا خليفه...

بو خليفه يدخل الصاله يتعكز: احسن له وين بيسير بيغدي ريال وبيخلي سوالفه..

ام خليفه وهي تمش دموعها: حليله ذياب ياهل ما يعرف شي وانتوا كله تلومونه...

نوره: وين ياهل ريال شكبره بلحيته تقولين ياهل..

بو خليفه: محد مخربنه غير بزا امج..

ساره : مسكينه عمتي ماتسوي شي..

ام خليفه: وييه فديتج محد يفهمني الا انتي..

نوره: اونه محد يفهمني..حليلج امي مافيج حيله وتعرفين منو يفهم ومنو اللي ما يفهم..

ام خليفه: اييه والله ولا عشاني هب متعلمه ما فتهم لشي..تتحرين العلوم بس لج انتي..

نوره: وين اروم لج انا...

بو خليفه: سكتي عن امج الحين بتأذينا والسبه ساره مرة اخوج..كبرت لها راسها..

ساره تضحك: الله يسامحك يا عمي..

نوره: البيت هادي بدون البنات..

بو خليفه: والله اني ولهت على بناتي وعلى سمر اكثر..

ام خليفه: ما عليه ان ما قلت لحصه..

نوره: وييه حرام حصه ما تداني سمر عاد الحين بتستلمها لو تدري...

بو خليفه: ما تروم براويها ان قربت صوبها..

ساره: حصه محد يروم لها يا عمي..

بو خليفه: انا راعي سمحه..وين محد يروم لها...وانا مب ريال اراويها..

ساره استحت: لا مب قصدي يا عمي..بس..

ام خليفه: لا بس ولا مدري وش...مستقوين عليها هاه يوم انها محد بترمسون فيها..حليلها بنتي محد يسواها...

بو خليفه يضحك..وتموا يسولفون وذياب راح خلاص اليوم اول يوم في الدوره اللي التحق بها..على الله ويمكن تعدله او تخليه يفكر بمستقبله شوي...
.......................

في دبي الكل في الصاله قاعدين وحشره وسوالف صدق الجو كان غير وكل شي فيه مختلف...بندوا التلفزيون مالهم حايه به...الكل مستانس..ويضحك ويسولف...الا حصه اللي في البدايه كانت ساكته وما عرفت ترمس ولا تتصرف...

حمد: والله قعدتكم وناسه..

عبدالله: بعدك ما شفت شي ما ستوا لك ربع ساعه وتقول وناسه..لو يالس مثلي اسبوع شو بتقول...طلعوا لي روحي..

حمده: ليكون مليت يا عمي..؟

عبدالله: حشا والحشا عن مية يمين ما دلني الملل وانتن هني الا رديتن لي روحي..

حمده: عمي حمد..

حمد: نعم!!!

حمده: تعرف تلعب ورقه..؟

حمد: لاء علميني...ويا هالراس اعلمج واعلم ابوج الشيبه بعد..

عفرا: اييه حدك عاد..ابوي ما يخصه...

سمر تضحك: خلووف الشيبه..

حمد: اووه سمر هني توني انتبهت...

سمر: لا والله انا كنت ساكته يمكن عشان جي ما عرفت اني هني..

حمد منقهر ما سخافتها: هاهاهاها.

سمر: جنك سبال شارد من حديقة الحيوان..

بطل حمد عيونه على الاخر وعبدالله افتشل..وحمده نقعت ضحك..وعفرا حطت ايدها على حلجها مستحيه..وفجأه انفجر حمد ضحك..

حمد يفرها بمخده صغيره: مسودة الويه..

حصه تطالعهم بصمت وما نطقت بكلمه..حتى هو ما قالها شحالج ولا رمسها ابد..

حمد: ييبوا الورقه بنلعب..

عفرا: اقولكم احسن شي نلعب بلاي ستيشن..واللي يغلب يطلب من الفريق اللي غلبه أي شي..

حمد مبتسم بخبث: اوكي موافق...بس بشرط..!!!

عبدالله يضحك: شو شرطك جني الا اعرفه...

حمد: انا اختار الفرق واقسمها على كيفي..

سمر: وييه انا محترفه في البلاي ستيشن بعيفكم اللعب..

حمد: بس جب جب ماريد اسمع حسج انتي..

سمر: انت جب..

وتموا سمر وحمد يتناقرون ويسبون بعض بس طبعا كلها سوالف مب من صدق بس هو مستانس ان حصه ساكته مالها حس يتلذذ في ضعفها ويفكر صمتها كله هيمان...

حمد: انا وعفرا وحمد في فريق...وحصه وعبدالله وسمر فريق ثاني..

عبدالله: ياللوتي شليت حمده وياك..

حمد: يا ذك ذك ترا سمر تعرف تلعب عدل ما يستوي يكون فريقين فيه محترفين اثنين..

عبدالله: ليش منو محترف عندكم..؟

حمد: انا طبعا...يالله الله يعينك على عبط بعض الناس..ان شاء الله ما يمسكون الجهاز بالمجلوب..

ويلس يضحك وعبدالله فهم قصده..وحصه حرجت ويلسوا يلعبون...اول اثنين بيلعبون بعد القرعه هم حمده وعبدالله..

سمر: انا اشجع عبدالله...

حمد: عبوود شو فريقه اخترت..؟

عبدالله: البرازيل طبعا..

حمد: وانتي يا ام ذيل؟

حمده: الارجنتين..شو ام ذيل هذي...!!!

حمد: كيفي ابى اسميج ام ذيل...

وتموا يلعبون حمده وعبدالله ويصارخون كلما دخل فريق عبدالله هدف ...ومرت الوقت ودخل عبدالله اربع اهداف على حمده وهي للحين صفر...

عفرا: انتي ما تعرفين تلعبين بتخسرينا...

حمده: جب انتي يعني انتي اللي تعرفين اللعب؟.

حمد: اييه انتن ماريد مشاحنات تأثر على نفسية اللاعبين في فريقي..اسكتن ولا كرت احمر...

كانت حصه تتأمله بجنون ميته عليه وهو ولا مفتكر فيها..مندمج في اللعب..

عبدالله: خلصت المباراه..وفزنا بالجوله الاولى...خمسه/صفر...والله انج مصخره..

حمده: عمي غشاش محد يلعب معاه...

حمد: اسكتي زين..قالت لي غشاش..

عفرا:انا اريد العب ويا عمتي حصه..ماروم لسمر لعيبه..

حصه: شو قصدج يعني انا ماعرف العب..ولا ماعرف العب..

حمد ابتسم وطالعها بلؤم: لا الثانيه ما تعرفين تعلبين...

حصه انقهرت منه وعطته نظره قويه وطالعته من فوق لتحت ولفت عنه ترمس عفرا..وهو يوم شافها مارام يمسك عمره وحس انه بينجلط من القهر..

"من متى حصه تتجرأ تطالعني بهالنظرات."

حصه: يالله انا بلعب وياج عفاري...

عفرا: صبري لين ما نسوي القرعه وعقبها بنشوف...

وبعد القرعه طلعت سمر تلعب ويا عفرا وانقهرت حصه من هالشي وحمد استانس وتحلف فيها في خاطره انه بيعلمها اللعب والادب في وقت واحد على اصول...لعبوا كلهم ويا بعض..واحتشروا ومنها نشت حصه تييب لهم عصير واشياء خفيفه قبل الغدا...لين ما يخلص الدور من عفرا وسمر...وانتهت المباراه وغلبت سمر عفرا ثمانيه /واحد...

حمده: وابوي انا على هالفضيحه...يا خيبتيه..!!!!!!

عفرا مفتشله: على الاقل يبت واحد مب صفر...

حمد: اووه شو قلت انا لا تتضاربن..

عبدالله ميت ضحك على حمد اللي متوهق في البنات..ويطالعه وينقل نظراته على طول صوب حصه...اللي كانت تغلي...وحمد بيقهرها اكثر بتجاهله بس ما رام لها عقب هذيك النظره اللي تقطع القلب...

حمد: يالله انسه حصه تعالي لعبي دورج والله الله فينا ما نبى نخسر...

حصه بقهر: تتمصخر..!!!

حمد: اكيد اتمصخر...ليكون تتحرين عمرج بتفوزين مثلاً..عادي اشنق عمري...

حصه: زين زين اسكت والعب وانت ساكت..لا توتر اللاعبين..

حمد يطالعها بنظرات وهو منقهر منها وبصوت واطي: اوكي بنشوف..

وحمده وعفرا وعبدالله ميتين ضحك على حمد وحصه اللي منقهرين من بعض...وفي نص الشوط الثاني كانت النتيجه11/ صفر لصالح حمد..وكانت حصه تلعب عادي...بس تذكرت كلام ذياب في نص اللعب...

" هيه هذا ولد عمج اللي ميته فيه وتتحرين محد يدريبج لكن انتي بالنسبة له ارخص من نعاله...ملطشه يا محترمه بس انتي ولا شي بالنسبة له ويوم بيمل من كل ها ما بيحصل غيرج اترياه وتتمسح في ريوله عشان ياخذها... وهو ولا يحبج ولا حتى معبرنج صدق مالت عليج فضل عليج بنت شوارع يا بنت الناس المحترمين...."

وبضيج فرة الجهاز على الارض ونشت سايره المطبخ من قهرها...واستغربوا كلهم من حركتها...بس عفرا نشت وراها ..

حمد: يلعن ابوج يالخساره شو تسوين....!!

عبدالله: هزمناكم شر هزيمه...

حمد: ايه بس منو اكثر لاعب فينا هزم لاعب ثاني..

حمده: لا تغير السالفه نحن قلنا الفريق اللي يغلب مب اللاعب اللي يسجل اكثر..

حمد: والله انسحبت لاعبتكم برايها ولا كنت سجلت 20 هدف...

سمر: احلامك كبيره...

حمد: انتي منو سألج يابقره...

حمده تضحك: وييييو والله اهانه يا سمر كيف ترضين...

عبدالله: لحووول يالفتانه انتي شو تبين توصلين له بالضبط...!!

حمده: اغير جو..
.
.

في المطبخ عفرا حاولت في حصه قد ما تقدر تقول لها شو فيها بس حصه ما رضت ترمس ابد..وتعلثت بالغدا انهن لازم يخلصنه وان وراهن الف شغله وشغله عقب الغدا وهي ترتيب البيت وتعديله مثل يوم ينه عشان باجر بيروحن ومب حلوه في حقهن يعفسنه ويطلعن ببرود قلب...

حصه: يالله ما بقى شي وننزل الاكل الفرن..

عفرا: خلصتي المكرونه؟

حصه: كل شي جاهز بس ازقري البشكاره تشغل الفرن ما فيني احرق الفله..

وزقرن دونا وشغلت لهن الفرن ونزلن مكرونة البشاميل تحت...وسارن يجهزن الصحون اللي بينجبن الغدا فيها...وتقريبا شبه خلصن..حدرت سمر عليهن وحمده وسارن يفرشن السفره ويقربن الخفايف مثل السلطات واللبن على السفره...لين ما يحطون صحون الغدا الرئيسيه...

وعقب ما خلصن وحطن كل شي في صالة الطعام التموا كلهم السته على سفره وحده..

حمد: شو هالغدا كله حرام عليكم انا مب ياي من مجاعه...

عبدالله: هذي حصوه وعفرا ما خلن شي في الجمعيه ما قالن لي اييبه..

حمد: والخيبه والله حرام هالنعمه تفرونها...

عفرا: انزين قولنا عيبك الاكل ولا لاء...

حمد: بصراحه بصراحه من ناحية عيبني ..عيبني وزياده بعد..ماصدق بنت عمي حصه تعرف تطبخ...

حصه كملت اكلها وما رفعت راسها حتى وهو بغى يموت من القهر..وده ينش ويصفعها ويكفخها لين ما تقول بس..

عفرا: وانا مالي رب...

حمد: شو مالج رب..لا تقولين لي طبختي شي ترا ما بصدق..

عفرا: بتشوف الساعه 3:00 شو بنحط لك وبتقول ليتني ما تغديت..

عبدالله: ليش شو طابخه؟

عفرا: بتشوفون عقب..

حمد: الحمدلله والشكر اللهم ادمها من نعمه..

ونش يغسل ونش عبدالله وراه وحمده وسمر وعفرا ..الا حصه تمت منهقره ويالسه مكانها..ما تعرف شو تسوي واللي قاهرها اكثر ان حمد يعاملها عادي وعمره ما فاتحها بشي عمره ما قال لها أي شي عن السالفه وما لمح لها..صح تدري ما يحبها بس ما تعرف انها كان يبغي غيرها..

يت البشكاره ونظفت السفره وكلهم يسلوا في الصاله الثانيه يسولفون الا حصه سارت حجرة الضيوف تحت ترمس تلفون..

ليلى: يا حيكم والله..

حصه: والله ميته من الغصه لو تشوفينه مكيف على الاخر وبايع سوالفه ببلاش...

ليلى: شو تبينه يسوي مثلا ييج ويقولج حصه انا كنت احب وابغي اعرس...

حصه: ما قلت جي...بس على الاقل يفهمني انه غلط في غيابي يوضح لي هالشي...ممكن اغفر له لو سمعت منه لكن من غيره ما ظني..

ليلى تتمصخر: وانتي الحين ونج زعلانه منه وما تبين ترمسينه..

حصه بصوت شوي عالي: يا ليلى انتي مفروض ما تسأليني هالسؤال لانج ادرى وحده بطعم الغدر...انتي لو تحلفين لي الحين انج ما تحبين ناصر..انا حتى ماروم اجذب واقول ماحب حمد..

ليلى: صح انا يمكن ما كرهت ناصر للحين بس اكيد ماحبه مثل قبل...لكن وضعي يفرق عن وضعج..

حصه: ليش؟

ليلى: انا توها الخيانه فرش الحين مستويه وما زالت قيد العمل...لكن انتي تحاسبينه على ماضي والماضي شي خارج نطاق الحب..

حصه: مستحيل اسامحه يا ليلى انتي ما تعرفين غدره شو سوا بي...على الاقل بيفقد احترامه في نظري..

ليلى: يا حصه افهميني لا تهدمين حب سنين في لحظة تهور...ترا كل شي يبدا صغير ويكبر الا الحب يبدا دايما كبير ويصغر..

حصه: وشو تشوفين الحين...!!!!!

ليلى: خلج عاديه وسامحي وتغاضي..

حصه: انتي تناقضين نفسج الصبح كلام والحين كلام ثاني..

ليلى: كنت اسولف وياج لكن لو يينا للحق انتي تحبين حمد من سنين وناسيه سالفة المبادئ والكرامه..لا تيين في لحظه تغيريين حياتج وتخسرين كل شي...

حصه تتنهد: ليلى فاهمتنج....

ليلى: يالله قومي عندهم لا تفوتج دقيقه من النظرات وتدعين علي..

حصه تبتسم: اوكي بتصل لج يوم يروح...

وحدرت حصه الصاله عليهم وما لقت غير حمد...وسمر منسدحه تشوف التلفزيون..

حصه: وين عفرا وحمده...وعمي..

محد رد عليها لانها ما سألت حد معين...وطنشتهم وطلعت تيلس برا على الدري...وحمد نش وسار وراها...ويلس قريب منها شوي..وهي بغت تذوب يوم شافته ونست الدنيا والزعل وكل شي مب حلو ونست حتى شو اسمها...

حمد: حمده وعفرا سارن فوق...وعبدالله راح بيقيل يقول انه مرهق شوي..

حصه ما ردت عليه...

حمد بصوت واطي وهو يطالع جدام: انا سويت لج شي...!!!

حصه وقف شعرها عمره حمد ما كان بهالانسانيه والطيبه والرقه..عمره ما سمعها كلمه تسر الخاطر ولا ترد الروح..

حمد بطيبه: قولي..لاتستحين...

حصه وقلبها يدق بعنف فضيع:انت سويت شي؟

حمد: ماعرف اني سويت شي يضيج بج...ما ذكر اصلا..

حصه وهي تبلع ريجها: اصلا المفروض تقول شو اللي ما سويته بج..

حمد: لهالدرجه شاله بخاطرج...

حصه: ما شليت بخاطري بس مرات يكون للصبر حدود وللمشاعر حدود بعد...والتجاهل يقتل كل شي...

حمد يتنهد: واللي حياته تمشي به مثل ما تبى وهو حتى ما يقدر يسوي شي..

حصه: ما ظني انت من هالنوع...انت قوي تسير حياتك مثل ما تبى مب حياتك اللي تسيرك...

حمد يبتسم: انتي تقولين جي...اذا انتي تقولين جي..وبعدج للحين ما فهمتيني..منو بيفهمني يعني..قولي لي..اذا انتي تفكرين فيني بهالطريقه..منو بيفهمني ومنو بيعرف شو ابى وكيف افكر..وانا اقول خلت الدنيا بعد بدريه وبقيتي انتي..

حصه حست عمرها تموت وهي تسمع كلامه بس ما قدرت تصدقه..حست انه يقص عليها ...يراوغ عشان يبري نفسه لو واجهته..وهي تعرف انها ما بتواجهه ابد..

حصه سكتت وما حست بعمرها الا تنش وردت داخل...وهو تم يالس لين ما اذن العصر وسار الميسد...وهي يلست في حجرتها...وعقبها حطت لهم عفرا كيكة النسكافية اللي مسوتنها مع القهوه والشاي...ويلسوا لين الساعه5:00 ورد حمد بوظبي...وما شافته حصه من يوم يلسوا برا وما عاد نزلت له تحت ابد...كان هالشي من بينهم مثل جدار فاصل...كان حمد يقول رمسته وهو يبغي يحسسها انه يحبها وما بقا له غيرها...بس هي مب قادره تفهم ولا تستوعب منه شي لانها مجروحه وبحاجه انه يداوي جرحها قبل يحسسها بحبه...
.....................


اشكركم على مروركم الجميل وتواصلكم معانا

تحياتي لكم


وانتظروا الاخت الغلا مع الحلقه (( 26 ))

[الرايقه]

البدوي شووو هالجزء القصير هااااه؟؟؟
لا لا لا لا ماريد جذه انا اباطول اشوي ههههههههه
يعطيك الف عاافيه ,,,

[البدوي الحبوب]

مرااااااااحب اختي الرايقه

السموحه طويلة العمر ان شاءالله الغلا بتنزل جزء بتخليج يومين تقرينه

تحياتي لك

[البدوي الحبوب]

الحلقه السادسه والعشرون


عبدالله مبتسم: زين ابغيج في سالفة مهمه..

حصه: عن شو؟

عبدالله: عنج انتي..

حصه وقلبها يدق بعنف خافت ما تدري ليش..

عبدالله: بلاج زايغه؟

حصه: مادري عن شو بترمسني..

عبدالله: ترا قلت لج عنج...زين بقولج..شو تبين تعرفين من البدايه ولا من النص ولا اختصر واقولها من اخرها...

حصه مستغربه: شو هي وعن شو بترمسني؟

عبدالله: عن السالفه..تبينها كامله ولا نصها ولا من اخرها..

حصه: يعتمد عن شو بترمس...اذا موضوع مهم قوله كامل واذا تافه هات من اخره..

عبدالله: بقولج عن شو وانتي احكمي..

حصه مبتسمه: اوكي قول...

عبدالله:عن حمد ولد عمي...

.
.
سلامه تطالع اخوها متعجبه: حمدان والله غادي وسيم غربلك الله...وسيم وايد...

حمدان يتمصخر عليها ويقلدها: وسيم غادي وسيم...!!!

سلامه: ونك تستحي...!! والله وايد شكلك جنتل وحليو بعد..ما شاء الله عليك..الله يعين البنات بس...صدق قلوب العذارى مصايب..

حمدان رفع حواجبه وابتسم: صدق خبله..

سلامه: صدق والله شكلك باللحيه وايد حلو...جي مرتب شكلك ريال صدق..

حمدان عاقد حياته: وقبل شو كنت؟

سلامه تضحك: ماقصد شي والله..بس الحين اكيد أي بنيه تخطف حذالك تقول بخاطرها ويل حالي كم بعيش انا...!!!

حمدان يدزها من جتفها: عيب لا ترمسين بهالسوالف ما يخصج بسوالف البنات الماصخه...فهمتي!!!

سلامه: بس بس الله يخليك...اونك الحين كبير وتفهم..يا شين الاولاد يوم يتفلسفون..

.
.
خليفه بهمس: ريلها طلقها..

شهقت ام خليفه ما ستوعبت رمسة ولدها..ودزته من جتفه..

ام خليفه: فال الله ولا فالك...وليش تفاول على ختك حسبي الله على بليسك..

خليفه معصب: لحوول هذي جدامج رمسيها ما بييب شي من عندي..

ام خليفه شافت رمسة ولدها صدق: يا فضيحتنا بين العرب...يا فضيحتنا اليوم ويا سواد ويهي جدام الحريم..

ساره ما عيبها اسلوب عمتها في الرمسه وطالعت خليفه يسكتها..

خليفه: امايه الله يهديج شو فيج...وشو من فضايح ترمسين عنها...؟

ام خليفه بقهر: ويطلقها ليش؟ حرمه ما يعيبها شي..ليش يطلقها...؟

خليفه: الطلاق وراد بين أي زوجين..خلاص الله ما تمم ويمكن ما يقدرون يكملون ويا بعض...

.
.
شيخه: امي علووثتي مافيها شّششعر...

ليلى:لا اله الا الله..وكل هاللي فوق راسها شو؟ قولي انج بس تبين تقولين شعر عشان تنطقين هالشين اللي ما شفنا خير من يوم نطقتيها...

شيخه: امي انا اثمي شششيخه..

تضحك ليلى: يا حظي والله...ما لقيتي شي بعد فيه حرف الشين عشان تنطقينه...

شيخه تضحك من خاطرها: امي متى بنلوح الجمعيه..(وتحط ايدها على خصرها) انا مب دبه خلاث انا صغيره..

ليلى مبتسمه:خلاص بنروح باجر العصر..اصلا اخر يوم اييلس وياج فيه وعقبها عندي دوام هب فايجه لج..يالله يالله اطلعج الخميس واليمعه...

شيخه: بتلوحين المدرثه...؟

ليلى: أي مدرسه اللي يخليج...بروح الدوام الصبح وبرجع لج الظهر نفس اول..

شيخه مبوزه: ما تلوحين ما تلوحين...

ليلى: زين يوم بسير بشاورج قبل...

شيخه: شششليني معاج...

ليلى تضحك من قلبها: فديت حرف الشين غير يوم يطلع من ثمج عسل والله...

.
.
ليلى: مادري والله جي يقول انه خاطف يسلم...بس تعرفين عرس ناصر يوم الاثنين..

شهقت حصه: قولي والله؟

ليلى بثقه: والله!!!

حصه: عزموكم..؟

ليلى: للحين لاء...

حصه: بتروحين؟

ليلى: اكيد لاء...

حصه: بتروحين غصبا عنج..يا ذكيه لازم تثبتين له انه عادي عندج...لازم تخلينه يحس انه ما كان يسوىشي...حسسيه بجيمته..

ليلى: مب انا اللي تعودت ازيف مشاعري...يدري اني احبه ويدري انه مب عادي...ليش اقص عليه واسوي عمري عادي..

حصه: كان يقول انج تحبينه..لكن الحين يدري انه لاء..او يمكنه متشكك..اقطعي شكه باليقين خليه يحس انه ولا شي..

ليلى:مقدر والله..!!

.
.
حمد: انتي متأكده من اللي تقولينه؟

جواهر تصيح: والله مب بإيدي..

حمد حس انها تجذب وهذا مب صياح: جواهر خافي ربج فيني..

جواهر وهي تبغي تبند عنه بسرعه: حمد ليش ما تصدق ..

حمد شوي ويموت: بس لا تذبحيني بس!!!!

جواهر: حرام عليك يا حمد..تدري اني صدق احبك وما بدي عليك لا تظلمني...

حمد بقهر:ما قدرتي ترفضين..!!؟

جواهر بحزن: رفضي ما بيودي ولا بييب...انا بنت مالي راي...

حمد: جواهر ارجوج كلمي ابوج حاولي وياه..والله برد باجر دبي وبخطبج انا بنفسي..ارجوج يا الجوهره لا تقتليني قاصر عمر..افا كيف تهون عليج المحبه...؟!!!!

.
.
عبدالله: وليش ما خبرونا من قبل شو هالسنه؟

حصه: ما يهم..ترانا ما نقرب لهم وايد من صوب الرياييل..عسب جي مب لازم نعرف بدري..الا احنا من المعازيم بس..

عبدالله: شو من المعازيم بس..ترا العروس بنت خالنا ومن حقنا ندري من وقت..اصلا هالريال بو ناصر مايعيبني مول مادري راشد كيف وافق على خته تاخذ ولدهم..

حصه مستغربه من عبدالله: اذا الابو مب زين الولد شفيه..ناصر مدير شركتنا والله مافي احسن عنه ريال حشيم ومحترم وما يغلط على حد ويراعي الله والناس...وبعدين تعال اقولك شو دخل راشد وخالي بو راشد بالموضوع..؟

عبدالله: كيف..؟ مب بياخذ بنتهم ليلى.؟

حصه تبتسم: لا فديتك وين ياخذها..خلاص كنسلوا...الحين بياخذ بنت عمته...

عبدالله انصدم: مب كان محيرنها من يوم صغيره؟

حصه: انت قلتها كان...الحين خلاص..

عبدالله: افا شو السبب حليلها بنت خالي كبيره ومب وقته يخليها الحين..لو قبل قلنا ما عليه بس.....!!!!

حصه: شفت عاد رياييل ما منهم امان...

عبدالله: خسه الله مسود الويه..تترياه هالوقت كله ويخليها اسميه ما يعرف المذهب...ولا شرع الرياييل...

حصه مستانسه ما تدري ليش: هالكثر تهمك؟

.
.
حمدان: هم ما يقصدون شي...لا تاخذين بخاطرج...

عفرا: لا تحاول تعدل الموضوع انا مب ياهل وفاهمه كل شي على العموم مشكور على دفاعك عني..

حمدان: شو هالرمسه والله ما يقصدون الا سوالف غيره تعرفينها...

عفرا: لا تحلف بالله جذب..انا سمعت وفهمت كل شي بس انا ما يهمني رايهم فيني دامني واثقه من عمري..

حمدان: ومن قالج ان رايهم ما يهم..بدل ما تمين ساكته وتقهرين نفسج..اثبتي لهم انج عكس اللي تفكرين..لا تبنين بينج وبين الناس الف حاجز كوني قريبه منهم وافهميهم عشان يفهمونج...ترا كل شي في الدنيا له قيمه الا محبة الناس قيمتها كبيره ومن خسرها خسر كل شي..خلج مختلفه بكل شي واكسبي محبتهم..ولا تنسين ان كل شي له جماله في الدنيا بس مافي مثل جمال حب الناس ...

وسار عنها حمدان..وهني انقطع حبل افكارها وعرفت ليش اتذكرت حمدان لما قال عمها ان "الحب ما ينشرا بالفلوس"

.
.
احمد وهو ما يطالعها: اشربي منه شوي..ولاّ تجزين...؟

سلامه في خاطرها" يا ثقل دمك": لا شو هالرمسه تعرف انك غير..

احمد مب مهتم: اوكي..

انقهرت من بروده...بس تمت ساكته..

احمد: امي وين؟

سلامه بضيج: في الصاله..وفاطمه وياها..تبى تسير لهم؟

احمد: هيه اكيد..اهلي هذيل ما يغنيني عنهم شي...

سلامه خلاص طفح الكيل عندها: زين شو سويت لك عشان ترمسني جي؟ ترا والله ماحب..!!!

احمد: ماسويتي شي ..

ونش بيغسل ايدينه...

سلامه: اليوم بتطلع مكان؟

احمد: هيه ليش؟

سلامه : وين بتروح؟

.
.
بو خليفه محرج: يعرس ما يعرس انتي شعليج...الشرع محلل اربع ولو حط عليج ثلاث تسكتين..من حقه يسوي اللي يبغيه..هو ريال وانتي حرمه ورايه يسد عن رايج.؟ من قالج تتعبثين بتلفونه؟

سلمى: ابويه انت الحين واقف وياه ضدي.؟

بو خليفه: هيه نعم!!! انا واقف مع الحق..والحق للريال...ريلج قربنا به لانه ما يعيبه شي والعرس يصلب الريال تتحريني بصدق انه يغازل.؟ وان غازل انتي شعليج الزم ما عليج بيتج وعيالج..

خليفه: حمدي ربج انه وافق تشتغلين لو غيره بيخليج في البيت بس من طيب اصله اشتغلتي...

عبدالله يتنهد: ليش ما رمستيه بينكم بالتفاهم....؟

سلمى بتصيح: ما شي خلاص انتهى من بينا التفاهم...

بو خليفه: الا انتي اللي ما عندج سنه تقابلين ريلج وتحطين راسج براسه..انتي حرمه وقدرج اقل من قدره المفروض يضربج الكف على ويهج وتعطينه الخد الثاني..

.
.
روضه طالعتها من فوق لتحت: منو انتي؟

حصه ردت لها النظره بالمثل: انتي اللي منو.؟

روضه: عافدات الشركه شرات المخبل وتسألن الموظفات منو ومنو...انتن اللي منو؟

حصه: اييه احترمي نفسج...

ليلى: نحن موظفات هني توها خلصت اجازتنا...ويينا نداوم...

روضه طالعتهن بغرور: اها اوكي خلاص روحن مكاتبكن...

انقهرت حصه وليلى بغت تين من القهر...

حصه بقهر: وانتي منو؟

روضه: موظفه هني...

ليلى: متى عينوج؟

روضه: تحقيق هو؟ انا ياييه اداوم مب اضيع وقتي في السوالف...

.
.
"يالله فديت هالصوت كم يسوى...!!!..لو ما كلمتني مباشره يسدني اسمعه وهالضحكه....يا قلبي على الضحكه...ترد الروح وتشفي الجروح...يالله رجيتك لا تحرمني منها.."

وطاف عنهن وطلع فوق...ناصر قبل يسير مكتبه خذ له جرعة حب من صوت ليلى الدافي اللي حرك الشوق بأوصاله...يدري حبل الود انقطع بس الحب عمره ما يموت...وان مرت عليه الظروف بيقل بس عمره ما يموت...ولا الف خيانه تفنيه...

دخلت الحجره وهي رافعه راسها فوق...وما تبى حد يرمسها..ضاربنها غرور عنيف الليله وما تبغي ترمس ويا حد ولا في خاطرها شي ابدا...حتى ما رمست أي حد غير اخوها وعفرا...فتحت الكبت وشافت دونا مرتبه ثيابها وبيجاماتها على الرف وشلتهن وحطتهن في كيسها على اساس انهم بيردون بوظبي باجر الصبح....شافت حصه منسدحه على شبريتها وراسها لفوق تطالع السقف ولا اهتمت لدخلتها ابدا...حطت اغراضها ورتبتهن عدل..

وتمت تغني..

"نحلم ايه...ونحس ايه..ياما حلموا ياما حسوا..اسألوهم ضاعوا ليــــه...كل واحد كان لوحده ..عاش لنفسه وعاش لوحده..هم كانوا اليأس ياخذوا ..ضاع لكنو ما ضاعش وحدوا...خذ معاه الكل جنبوا..غصب عنهم شالوا ذنبوا..واحنا منهم بعد منهم خذنا أيــــــــه..هم ضاعوا وراحوا واحنا..جرحهم مخلوق في روحنا... كل شي حوالينا واقف ضد احلامنا وطموحنا...كل حاجه باينه واضحه...لازم احنا نصحى...هي غلطه وفات زمانها...كلنا ندفع ثمنها..يا وطن يا ام خايفه نفسنا يرجع املنا.."

حصه نشت من مكانها وسارت لكبتها تطلع هي الثانيه اغراضها..بتخلي البشكاره تغسلهن وتكويهن عشان باجر الصبح بييهن خليفه او عبدالله بيسرحهن بوظبي من وقت..ما رمست سمر من يوم تواجعن الصبح وما توقعت سمر تشل في خاطرها ولا تسوي شي..ما تدري شو اللي غيرها فجأه مب طايعه ترمس وياها..بس ما همها الموضوع..وطنشتها ويلست تظهر ثيابها وطلعت وكانت هاي اول طلعه لها من يوم راح حمد...ونزلت الصاله وشافت عفرا وحمده يسولفن...

عفرا: وييه عمتي تحريتج راقده والله..

حصه: كنت في حجرتي ملانه...

حمده: بتردين يوم السبت الدوام..لاحقه على ويع الراس..

حصه تتنهد: بالعكس وناسه..اشغل نفسي على الاقل..

حمده: تعالي يلسي طالعي الحفله ويانا...

حصه: حفلة منو الليله؟

عفرا: كاظم الساهر..

حصه: كالعاده بروحه...صح؟

عفرا: لازم بعد قيصر الاغنيه العربيه وين ما تبينه يخق ويحيي الحفله بروحه..

حصه: ماقدر ايلس وياكن ابى ارمس اخوي وينه...؟

حمده: فوق في حجرته..

حصه مستغربه: والله؟ ليش لروحه؟

عفرا: مادري والله بس حسيت انه يبى ييلس شوي لروحه...

حمده: شكلنا قطعنا عليه وناسته في الوحده عقب بدريه..

عفرا: كيف يعني؟

حمده: يعني هو كان يحب يختلي بنفسه ويتذكرها على راحته ويعيش على طيفها وخيالها..بس نحن عكرنا وما يساعد الجو للخلوه الفكريه..

عفرا: حليله عمي...!!!

حصه وقلبها يدق بسرعه: انا بروح له الحين..

عفرا: وين عمتي سمر.؟

حصه: في حجرتنا ترتب اغراضها..

حمده: عفرا قومي ازقريها..

عفرا: انتي الصغيره انا اتأمر عليج مب انتي تتأمرين علي..قومي انتي..

طلعت عنهن حصه فوق وسارت حجرة عبدالله اخوها بتشوفه وتيلس وياه شوي...ويوم وصلت باب حجرته بغت تدق الباب..بس ما تدري ليش نفسها منعتها من هالشي..تخيلت عمرها تمنعه من انه يعيش للحظات يفكر فيها في بدريه..حست انها تقضي على احساسه فيها وتفكيره بها...حست بقلبها يعورها وما قدرت تتخيل انها تكون السبب في طرد بدريه ولو لثانيه وحده من خيال اخوها...خنقتها العبره..

"فديتك يا عبدالله والله ما تستاهل..الله يقوي عزومك يا رب"

ولفت بتسير حجرتهن وقبل تمشي شوي تبطل باب الحجره..

عبدالله: حصه!!

حصه حست عمرها استحت: لبيــه..

عبدالله مبتسم:تعالي ابغيج...

حصه: تعال بنيلس هني(وتأشر على كنب الصاله فوق)

عبدالله: لاء تعالي الحجره برمسج هني بعيد عن البنات ابغيج في موضوع..

حصه مبتسمه وتمشي صوبه...واول ما قربت حذاله لوى عليها من جتفها ودخلها الحجره وصك الباب..كانت ريحة الحجره ريحتها..وعبيرها وعطرها ولمساتها..كانت بدريه موجوده في كل ركن فيها...الحجره كانت مب حجرة نوم كثر ما هي مملكة ذكريات..كانت روعه روعه بس تسبب الالم لكل من يدخلها...وحصه متأكده انها اول انسانه تدخل الحجره من عقب بدريه وعبدالله...هي من شافت اغراض بدريه في مكانها وعطورها على تسريحتها والهاند باق مالها على طاولة الحجره..وثوب الصلاه معلق مكانه وشيلتها البيضا فوقه بعد...الشبريه وترتيب الحجره نفس ما هو...حتى مكياجها خلته على الطاوله من اخر مره استخدمته يوم كانت يايه بوظبي وهو ما حركه من مكانه...ولفت بسرعه تشوف فريمات صورها هي وياه وحطها حذال الشبريه...ريحة عطرها في الغرفه تجنن بس مؤلمه بنفس الوقت...حست اخوها يتعمد يعذب نفسه..ويرهق احساسه بأمل موؤد..

حصه وهي تبلع ريجها: ليش يا عبدالله؟

عبدالله وهو ييلس على طرف الشبريه: شو اللي ليش؟

حصه وعيونها في عيونه: ليش تسوي بعمرك جي؟

قبل ينطق عبدالله كانت حصه مصدومه يوم شافت عيونه حمر..او احمرار خفيف فيها..وهالشي يدل انه توه صايحها..ما حست بعمرها الا تلف عليه بتشوف ردة فعله..وانصدمت اكثر يوم شافت شي على شبريتهم..بس ما قدرت تتأكد منه..وين ما لفت ويهها بتشوف بدريه موجوده فيه...بس شو هالشي اللي على شبريتهم...اسود..!! لونـه اســود..!

"يا ربي هذي شيلتها...!! فديتك عبادي فديت روحك...يا ربي ليش يسوي جي بعمره ليـــش!

عبدالله: ذكريات ما نروم نعدمها صدقيني..

حصه: بتتعب والله..

عبدالله وفي ويهه رضا: الله يعين..

حصه تتنهد بس ما عرفت شو تقول..

عبدالله مبتسم: زين ابغيج في سالفة مهمه..

حصه: عن شو؟

عبدالله: عنج انتي

حصه وقلبها يدق بعنف خافت ما تدري ليش

عبدالله: بلاج زايغه؟

حصه: مادري عن شو بترمسني.

عبدالله: ترا قلت لج عنج...زين بقولج..شو تبين تعرفين من البدايه ولا من النص ولا اختصر واقولها من اخرها.

حصه مستغربه: شو هي وعن شو بترمسني؟

عبدالله: عن السالفه..تبينها كامله ولا نصها ولا من اخرها.

حصه: يعتمد عن شو بترمس...اذا موضوع مهم قوله كامل واذا تافه هات من اخره..

عبدالله: بقولج عن شو وانتي احكمي

حصه مبتسمه: اوكي قول

عبدالله:عن حمد ولد عمي...
بردت اطرافها وحست بشي غريب..مب حراره ولا تجمد..حست بصفعه قويه على خدها..

حصه: شو فيه؟

عبدالله مبتسم: ما فيه شي بس بغيت اقولج اشياء عنه يمكن ما تعرفينها انتي وما يعرفها حد غيري انا واخته بس..

حصه تبلع ريجها: مثل شو؟

عبدالله: الحين بقولج بس ما رديتي علي تبين مفصل ولا مختصر

حصه تسوي عمرها مب مهتمه وهي من داخل محترقه: اذا بتيلس تقولي عن صياعاته وربيعاته وشغلاته الخايسه تراني الا اعرفها..كلها اعرفها..

عبدالله: هدي هدي حبيبتي..بقولج اشياء مستحيل تخطر على بالج ابد..

حصه: ادري بتقول لي يبغي يعرس ومادري شصار عليه وما عرف شو وما دري شو..

عبدالله: لحوول انتي ما تعرفين تسكتين وتخلينا نرمس شوي

حصه: اوكي ابغي بالتفصيل ارمس..
عبدالله مبتسم: اوكي سمعي..

قبل يبدا عبدالله بالكلام كانت حصه معاه قلبا وقالبا..تبى تلحق على كل كلمة يقولها وينطقبها..ما تبغي شي يفوتها..تحس ان عبدالله اليوم بيريح فوادها اللي طال عذابه وزادت جروحه وما لقت من يداويه..

عبدالله: سمعي يالغاليه...تعرفين حمد وحيد اهله..وكانوا عاقدين عليه الامال ويقولون حمد وحمد وما في مثل حمد..ما دري تذكرين حمد يوم كان في الثانويه واسلوبه كيف كان غير عن الحين..

حصه: اكيد اذكر كان وايد كول وعادي ومب جي بالمره..كان وايد سوالف وضحك واستهبال..كان يغير اليلسه بقعدته وسهراته ببيتنا..والله ايام ما ننساها وفجأه جلب علينا والله العالم شو فيه..

عبدالله: تعرفين يوم خلص الثانويه العامه..عمي قرر انه يسفره بريطانيا يدرس هندسة طيران..

حصه: ادري وسافر.

عبدالله: اول شي حمد ما كان ميوله هندسه طيران كان يبغي أي شي ثاني وما يسافر برا البلاد..كان يبغي يكمل دراسته في أي مكان في الدوله..وكان السفر شي خارج عن ارادته..شي ما يبغيه..اول شي عاند ويبس راسه وحلف ما يسافر لو على موته..بهدل اهله وعذبهم وياه..بس بدون فايده..ابوي حاول وياه وخليفه وعرب من اهلنا بس ما طاع..كان شايل فكرة السفر من باله..وانتي تعرفين مراهق عمره 18 سنه لازم يعند ويسوي اللي في راسه..وما يحلى له الا لما يعاند خلق الله..بس ما قدر انه يسوي شي جدام اصرار ابوه العنيف انه يكمل دراسته في لندن وفي الاخير بعد جهد جهيد استسلم لابوه وسافر لندن..

حصه: حليله!

عبدالله يكمل:مب بس هذا...حمد قبل يسافر كان متحطم ومتضايج وما يهمه شي حواليه..كان حاقد على الظروف اللي فرضت نفسها عليه..

والكل ما يدرون ليش حمد ما يبغي يسافر عكس معظم الشباب اللي يموتون ويسافرون...محد كان يعرف شو فيه الا انا وبس..

حصه بلهفه: ادري انك كنت اقرب انسان له من ربعه واكثر واحد وياه بس عقب مارد من لندن علاقتكم ياها فتور..مدري ليش!

عبدالله يكمل: سمعي وبتييج الرمسه..حمد ما كان يبغي يسافر مب حبا في حد او عشانه ما يبغي يفارج البلاد...ولكن لانه كان يحب وحده صدق من خاطره..انا اعرفه حمد زين..والله يا حصه يحبها حب ما تتخيلين كيف...وهالشي تعرفين كيف بيأثر على مراهق..خصوصا انها اول حب واول تجربه..فكان شي خيالي بالنسبه له...مب مصدق بهالحب ويحس عمره بعالم ثاني..ما بقولج ان البنت ما تحبه..الا كانت تموت فيه..وهو حمد مادري ماقدر ابد اني الاقي كلمه تعبر لج عن اللي كان بخاطره..

حصه كانت تتحطم وهي تسمع رمسة عبدالله ولو انها كانت وايد مسيطره على الوضع ومسويه عمرها عادي...بس قلبها كان ينشوي ويغلي ويحترق وتحس بكتله ناريه تتجول في انحاءه...

عبدالله حس فيها: اكمل ولا يكفي؟

حصه بثقه مصطنعه: شو يكفي كمل انا وياك..

عبدالله: المهم هو ما تخيل عمره يسافر لندن ويخليها في دبي ما تخيل للحظه انه يفارقها..او انه يعيش لو شوي بعيد عنها...انتي ما تعرفين كيف علاقتهم كانت قويه وتقولين لو بينهم حتى اتصال روحاني..وحلف لها ووعدها انه بياخذها بس تصبر عليه شوي...

حصه: من وين عرفها.؟

عبدالله: والله ما عندي فكره كل اللي اعرفه انه تعرف عليها ويرمسها بالتلفون..كيف ؟ لا تسأليني لاني ما جد سألته تعرفين سؤال محرج..

حصه بحزن: اوكي كمل...

عبدالله: وسافر حمد واللي محد كان يعرفه عنه انه ما قدر يصبر بدون جواهر دقيقه كانت تعني له كل شي حياته وعمره..كان ما يتخيل كيف بيعيش بدونها كل هالفتره في لندن..

حصه تقطع رمسته: اسمها جواهر؟

عبدالله مبتسم: هيه روعه صح؟

حصه بقهر: مب وايد...

عبدالله يكمل: المهم البنت وايد تأزمت عقب ما راح..والاتصالات من بينهم شغاله ما عاد شي يقطعها...كان يدرس ويواصل حبه وكمل السنه الاولى معروف لغه...طبعا شي ثاني بتسأليني كيف صبر عنها سنه...بقولج اصلا حمد كان يرد كل اسبوعين في الويكند دبي بالدسه وهله ما يدرون بشي..بس يروح يشوفها ويرد لندن...ومحد كان يعرف بهالشي الا انا بس..حتى بدريه اقرب وحده له ما عرفت الا عقب..

حصه تشهق: ومنو متفيج لمصاريفه ورداته من لندن كل اسبوعين عشانها وكيف ما عرفوا هله..؟

عبدالله: عادي ما يحتاي اقولج عمي شعنده وكيف تجارته...ما يحتاي اخبرج ان حمد هو الوريث الوحيد لكل ممتلكات عمي..فكان بالمليون ما يبخل على حمد ويشوفها شويه في حقه..عمي كان يشوف حمد ثروته كلها...

حصه تضايجت وكلام عبدالله كان يحطمها اكثر بس صبرت لين ما يخلص...

عبدالله: وبعدين تواصلت السفرات والردات وكان حمد في خضم دراسته وفي اوج تقدمه..كان متفوق رغم انه ما كان يميل لهالمجال بس هي بتشجيعها غرست حب الدراسه في نفسه...

حصه: متى كل هاه؟

عبدالله: في بداية السنه الثانيه...عقبها البنت بدت تلعب وتخوره...ملت من الانتظار والصبر وحست انها بحاية حب يديد..وما كانت تدري باللي بيصير بالريال عقب ما تودره...تعلثت بالعرس عشان يخليها حمد وما يتم وراها وراها..لا تنسين ان حمد كان مغترب ومراهق والبنت اول حب بالنسبه له واول تجربه..يعني الصدمه مب صدمتين الا اكثر عن صدمه..وثلاث واربع...يكفي انها الوحيده اللي كانت تخفف عليه غربته وضيجه والوحيده اللي يحبها ووعدها بالعرس بس هي خلته وعرست ولا حفلت به...وهذا حمد ولد عمج شوفي كيف صار!

حصه تضايجت من عنفوان حب حمد للبنت: شو سوا بعدين...؟

عبدالله: ولاشي بدا بالصياعه حفلات وبنات وسهرات ودنيا دنيه واشياء ما تخطر لج على بال...ينتقم من جواهر في الناس...وازيدج تراه ودر الدراسه ورد هني وكره كل شي الناس والبنات والعالم وكان يفج خيانتها في كل بنت ولا يهمه حد ولا جرح مشاعر حد...بس اقولج الصدمه يمكن تكون بسيطه لكل الناس لكن اللي مثلنا يعرف حمد واحاسيسه المرهفه وطيبته وشفافية روحه بيعرف ان الحب اللي في قلبه لازم يتعامل معاه بكل رقه...حمد كله احساس مملكه من الاحاسيس..بس غدرتها جواهر وراحت...

حصه: وليش الناس تكرهه؟

عبدالله: الناس عافت حمد من اسلوبه...ما تشوفين كيف غادي...الكل يشتكي منه ما عنده اسلوب ابد وما يحشم وما يحترم حد...يلعب في بنات الناس لعب..ما يهمه شي...ضيع كل اللي ورثه عن ابوه...واخرتها يالس يشتغل لي في شركه من تمليك قوم خالي بو راشد الله يرحمه...حمد ضيع اللي له واللي عليه والسبه جواهر...لا تقولين لي معقوله بنت تسوي كل هاه..بقولج هيه واكثر عن جي بعد..ترا محد قام يطيق من حمد شي ومحد يتحمله...يا بنت امي وابوي حمد ولد عمنا محتاج لناس تفهمه وتقدر احساسه وتراعي جروحه ووحدته والمه وتعبه مع نفسه...بس للاسف الناس فهمته غلط..واولهم انتي...

حصه تشهق: انا.!!!! حرام عليك...عبدالله انت اكثر انسان تدري والمرحومه وياك من يصبر على حمد وشينه كثري...

عبدالله مبتسم بعفويه: شوفي يا حصه انتي ما تقدّرين حمد وما تحسين فيه..ولو ان اللي بقلبج شي صادق ونابع من اعماقج عمرج ما بتغيرين اسلوبج معاه عشان كلمتين وصخات عقهن خوج ذياب وهو في لحظة غضب...

حصه حست ان عبدالله فاهم كل شي وما ردت عليه..واكتفت بالصمت..

عبدالله يكمل: زين هاللي كنت ابغيج فيه وبس..حبيت اوضح لج حياة حمد كيف كانت وكيف صارت..كلها عذاب بعذاب..والدور الياي والاصعب الله العالم بنشوف يكون على من...

حصه عرفت ان عبدالله يقصدها بالرمسه وان حمد وحياته كلها شي تحت مسؤولية حصه وتحت رحمتها...وان حمد وسعادته وحياته كلها بين ايديها...بس وين ما تقدر تحس شي صعب انها تحبه كل هالسنين وهالعمر كله وتعرف بالاخير انه كان يحب غيرها ويفكر بغيرها..صعب والله صعب..

عبدالله: شو رايج نقوم نشوف البنات اكيد يترين العشا...

حصه انتبهت: اوكي يالله بس خبرنا شو تبى تتعشى..!!

عبدالله: لا العشاء اليوم علي انا عازمنكم...

حصه مبتسمه: كشخه !!! أي مطعم بنسير..

عبدالله: استريحي لا مطعم ولا هم يحزنون...بييب العشا البيت...

حصه حايسه ثمها: اوكي تحريت شي ثاني وقلت يمكن تطورنا..

عبدالله يدزها بمزح من جتفها:التطور مب في التحرر..التطور في التفتح العقلي..

حصه بتطلع من الباب: بس بس ارجوك ماحبك يوم تتفلسف..

ونزلت حصه وعبدالله وياها الصاله ويلسوا ويا البنات الصغار تحت...

المغرب يلست في الميلس اللي خاري ترتب الفواله وتحطها على السفره وخذت فنيان قهوه ومدته له ويلست حذاله..كانت بتطير من الفرحه وحاسه بشي غير...اخيرا وصل..للحين بعدها مب مصدقه ولا مستوعبه شي..تسولف اللي يشوفها يقول من مليون سنه محد كلمها...

حمدان: حشا ما قلت لج كلمه من يوم حدرت..وانتي بالعه رادوا..مب لسان عليج..

سلامه تدزه على جتفه: يالسخيف احمد ربك حد ينشد عنك...

حمدان: الحمدلله والشكر..

سلامه: وليش الحمدلله والشكر انا مينونه ولا مستخفه تتحمد الله في ويهي..

حمدان: لحوول انتي قلتي لي اقول الحمدلله والحين قلتها وتلوميني ليش اقولها..شو ياج..

سلامه تضحك: مادري من وناستي فيك مضيعه..

حمدان: لهالدرجه يعني؟

سلامه تطالع اخوها متعجبه: حمدان والله غادي وسيم غربلك الله...وسيم وايد...

حمدان يتمصخر عليها ويقلدها: وسيم غادي وسيم...!!!

سلامه: ونك تستحي...!! والله وايد شكلك جنتل وحليو بعد..ما شاء الله عليك..الله يعين البنات بس...صدق قلوب العذارى مصايب..

حمدان رفع حواجبه وابتسم: صدق خبله..

سلامه: صدق والله شكلك باللحيه وايد حلو...جي مرتب شكلك ريال صدق..

حمدان عاقد حياته: وقبل شو كنت؟

سلامه تضحك: ماقصد شي والله..بس الحين اكيد أي بنيه تخطف حذالك تقول بخاطرها ويل حالي كم بعيش انا...!!!

حمدان يدزها من جتفها: عيب لا ترمسين بهالسوالف ما يخصج بسوالف البنات الماصخه...فهمتي!!!

سلامه: بس بس الله يخليك...اونك الحين كبير وتفهم..يا شين الاولاد يوم يتفلسفون..

حمدان ابتسم وما رد عليها بس غير الموضوع...

حمدان: وين ريلج؟

سلامه: سار العين ...

حمدان: ليش؟ شعنده في العين؟

سلامه: مادريبه ..

حمدان: وليش ما تخبرتيه.؟

سلامه: شعلي منه يوم يخلص اللي عليه بيرد وين بيروح يعني؟

حمدان: يا برودج!!! هاه ريلج مفروض تتنشدين عنه..

سلامه: عمتي ليلى قالت لي لا اكون حنّانه عشان ما يكرهني..

حمدان: هذي مب حنه هذا يسمونه اهتمام بريلج..

سلامه: زين زين...وشخباركم بعد..؟؟

حمدان: ماشي..تعرفين ابغيج في سالفه..

سلامه: وهي؟

حمدان: عن ابوي...

سلامه تغير شكلها: سلم علي؟

حمدان: لاء شي ثاني..

سلامه بنظرة حزن: ما ينشد عني ابد..

حمدان: ابدا ما ييب طاريج..انتي خبريني شو سالفتكم وبعدين بحاول اصلح من بينج وبينه..اما اني اخوج وماعرف شي مب حاله هذي.

نزلت سلامه راسها ويلست تلعب في ظفورها: احسن انك ما تعرف...

حمدان: برايج..يوم من الايام بعرف منج ولا من غيرج...المهم انا ياي بخبرج شي مضيج علي حياتي اباج تعرفينه...

سلامه: بقولك ليش عمتي فصخت خطوبتها..؟

حمدان: عشان الدبه شيخه ما يبونها...ومن هالسوالف..

سلامه: حليلج يا عمتي والله ما تستاهل...هي زعلانه مني صح؟

حمدان: ما يحتاي الكل زعلان منج..لا تتصلين ولا تسألين حشا بايعه اهلج اللي يشوفج يقول كنا مسوين لج ارهاب ولا جد رفعتي السماعه تدقين علينا..

سلامه تطالعه بنظرات متساءله: ماعرف ليش ماتصل بكم..بس والله متولهه عليكم...

حمدان: ريلج مانعنج منا؟

سلامه شهقت: حشا عليه بالعكس والله ياكثر ما يقول لي بنسير بس......

حمدان يتنهد: سمعي مب هاه موضوعنا ماروم اطول في بيت العرب اكثر عن جي فضيحه..انا لازم اطلع بس مب قبل ما قولج اللي بقلبي..

سلامه: يالله ارمس تراك من الصبح بقول وبقول وما قلت شي...

حمدان: وليش انتي تخلين حد يرمس..كلما قلت كلمه طلعتي لي سالفه يديده..

سلامه حطت ايدها على ثمها: اوكي ما برمس لين ما تخلص الا اذا كان في اوبجيكشن..

حمدان يبتسم: زين موافق...

خبرها حمدان سالفة بو ناصر كامله من اول ما وصل البيت لين ما ظهر من عندهم وهي ساكته وما ردت عليه لين ما خلص...

سلامه مبطله عيونها: اخ عليه ابوي شو يبا بهن فلوسهم..؟ ما يسده اللي عندنا..!!!

حمدان: انا روحي مستغرب..ماحيد ابوي يحب اشياء حد...كيف يفكر جي؟

سلامه: يمكنه تلخبط بالموضوع وما عندهم دليل انها فلوسهم فما عطاهم شي...

حمدان: انا مادري علمي علمج...

سلامه: وسالفة عمتي صدق؟

حمدان: استحيت اتخبرها اصلا مستحيل اقولها ان ناصر كان يبغيها بس هوّن عقب...

سلامه: اصلا عمتي مالها دخل يعني السالفه بين ابوي وبو ناصر مب بين ليلى وناصر..

حمدان: الظفر ما يطلع من اللحم..واكيد ناصر ما بيوقف ضد ابوه عشان حرمه..وتعرفين رضا الوالدين فوق كل شي..

سلامه سكتت..

حمدان: ماعرف ضايج صدري ومادري اقول لمن..انا خبرتج عشان تشلين وياي الحمل بس اعرف انج ما ترومين تساعديني..

سلامه: اساعدك بشو؟

حمدان: يعني ما ترومين توجهيني او تقولين لي لا تصدق او تغيرين شي من اللي اعرفه..انا محتاي حد كبير اسمع منه بالتفصيل...

سلامه: نسيت عمتي..ولا كبرت ما تحتايها انت الثاني...

حمدان: مب بس انا نسيتها..كلنا نسيناها وانتي اولنا ..ولا ما تشوفين عمرج يا انسه..

سلامه: مدام لو سمحت(وتسوي عمرها تصيح) ليتني انسه للحين...شو حياة البنات كشخه مب مقيدات بشي...

حمدان: كل انسان له فتره يعيشها ما تتكرر مرتين ..انتي عشتي فترة حسيتي فيها بالطفوله وشوي من الشباب والطيش..والحين يا دور المسؤوليه..

سلامه: ما شاء الله غادي حكيم...!!

حمدان: التجارب صقلتنا...

سلامه: شو يعني صقلتنا...

حمدان متوهق: يمكن بنتنا..ماعرف شي جي..

سلامه:لا تقول رمسه ما تعرفها توهقني وتوهق عمرك..

يضحكون شوي...

حمدان ينش: يالله من رخصتج الغلا..

سلامه مستغربه: وين وين...!!! ما يلسنا...

حمدان: فديتج عندي شغل وماقدر ايلس مجابلنج هني..

سلامه: الحين الشغل اهم من اختك الوحيده..ما صدق..

حمدان يمشي صوب الباب: حمدي ربج عطيتج من وقتي الثمين هالكثر غيري ما يعبرونج...

سلامه: يا شين الخقه..!!

حمدان: سلمي على احمد وقولي له كان ودي ايلس وياه بس ما باليد حيله..

وشوي الا واحمد واقف على باب الميلس...

حمدان: مرحبا الساع..توني اطريك ولد حلال..

سلامه: والله تونا نرمس عنك..

احمد يوايه حمدان: مرحبا ملايين شحالك يالنسيب..

حمدان: بخير يسرك الحال....علومك انت يا بو شهاب..!!!

احمد: بخير الله يسلمك يسرك حالي والعلوم من جداكم...

حمدان:والله علومنا طيبه تسرك..الا حرمتك تقول في العين مسرع ييت...؟

احمد: كنت بسير العين بس غيرت رايي واجلتها لليمعه اليايه...

حمدان تم واقف يبغي يظهر...

احمد يير حمدان من ايده يبغيه ييلس: تفضل وين تبغي تروح!!؟

حمدان: والله مستعيل والله ودي باليلسه وياكم الا اتخبر سلامي عندي كم شغله لازم اخلصها..

احمد: لا حلفت عليك العشا عندنا الليله...

حمدان: اذا من طباخ سلامي بيلس واذا بتعشوني من برا مابغيه..

سلامه تعض على شفايفها ان حمدان ينجب وما يرمس في هالموضوع لانها ما تعرف المطبخ وين اصلا..

احمد يطالع سلامه مبتسم: هذي زين تعرف تشرب العصير تبغيها تسوي عشا كامل..حشا ما بغيتنا نبات الليله صاحيين..

حرجت سلامه وتغير شكلها مع ان احمد كان يمزح بس ما تقبلت منه هالاهانه جدام اخوها وجلبت الموضوع من مزح لجد..

سلامه بجديه: والله انا ماعرست عشان اشتغل خدامه...في بيت ابوي كل شي ييني لين حجرتي ما فكرت اني يوم من الايام بعرس وبطبخ لحد ما توقعت ان ممكن حد يعاملني كخدامه..

حمدان عاقد حياته: سلامي شفيج عصبتي يسولف الريال..

احمد انحرج وانجرح بس سوا عمره عادي: افا عليج سلامي ما عاش اللي يسويج خدامه...انتي راعية البيت ونحن ضيوفج...

طالعته سلامه بنظرة غرور وطلعت وخلت له الميلس وحمدان تم يتعذر منه ويخبره عن دلعها وطريقتها في المعامله مع الناس وهي متعوده على جي وعمتها مدلعتنها ومن هالسوالف اللي ترطب الجو...عقبها استأذن حمدان وطلع ما يبغي يتم زود وراه شغل ومب فايج يتأخر عنه...الساعه كانت 7:30 المغرب والمكتب للحين ما بند ويبغي يسير شوي يعابل اوراقه ويخلص اللي عليه...

في الجهه الثانيه احمد دخل وسلم على امه واخته فاطمه....ويلس عندهن شوي...وعقبها سار حجرته..كانت سلامه يالسه على طرف الشبريه تقرا في مجله..ومن سمعت الباب اندمجت اكثر ما تبغي احمد يعتذر لها وما تبغيه حتى يرمسها...صدق ضايجها موقفه وما عيبها بالمره رغم انه كان عفوي وسخيف جداً...

سلامه تطالع المجله: اذا ياي تعتذر ..اللي صار صار وما يحتاي تعتذر..والاسف ما ييب ولا يودي..

انصدم احمد من ثقتها: ومن قالج اني ياي اعتذر لج؟

طالعته سلامه باستغراب..

احمد: انا بس ياي عشان اقولج ان اللي تسوينه حركات يهال..وتراني لو اني احبج وانج حرمتي..بس ماسمح لج تحطيني في موقف مقارنه مع حد..

سلامه: وانت يوم تغلط شو تسمي هاه؟

احمد بجديه ولاول مره يرفع صوته: انتي تدرين اني كنت اسولف...ولا تستقوين يوم شفتي اخوج..ادري انج بنت عز واهلج معيشينج احسن عيشه..ما جبرتج تاخذيني..وما ضربت اهلج على ايدهم يوافقون علي..ترا الزم ما علي كرامتي..لا تحاولين تجرحينها يوم من الايام..

سلامه تطالعه وما قدرت تنطق..هذا احمد اللي يموت فيها عصب عليها ورمسها جي..شو باقي الناس بتسوي...توقعته يحن يعتذر..يكلمها لو زعل باسلوب..بس الظاهر انها جرحته صدق...

هو ما حب يطول وطلع وصك الباب وراه...وهي نشت من على الشبريه وما حست بعمرها الا تصيح...وطبعا من صغر البيت ام احمد وفاطمه سمعوا كل شي...بس ام احمد ما خلت فاطمه تتدخل...

فاطمه: يا امايه حرام عليج البنت صغيره ما تعرف شي خليني اطيب خاطرها..

ام احمد: ريال وحرمته لا تتدخلين في حياتهم..هي ما تهون عليه..لا توصينه فيها...وان سرتي لها الحين بتكبرين راسها عليه وبتعاند اكثر وان سرتي له سويتي بالمثل...خليهم على هواهم..

فاطمه: امايه البنت صغيره ما تفتهم لهالمنطق...

ام احمد: من كبرج انتي...ولا عندج خبره..!!

تبتسم فاطمه: خليني اسير لها..

ام احمد: لاء يعني لاء..يلسي كملي التسميع..خليني اشوف حافظه ولا لاء...!!!

وكملت فاطمه لامها وسلامه تمت بالحجره تصيح..واحمد سار الميلس على طول عشان ما يكون قريب منهم لين ما يحس عمره احسن عن قبل...

.................



توها دخلت السياره البيت الساعه 9:30 الليل ووقفت جدام باب الصاله الزجاجي..وانفتح الباب الخلفي من جهة اليمين..ونزلت منه بأسى ..كانت مثقله بالهموم..والحزن مالي نظرتها..ومبين حتى من شكلها انها في نكد وضيج..

جرت الخطوات للصاله..والدريول بطل الباب الخلفي ونزل الشنط..وزقر على الخدامات يشلنها..

دخلت الصاله وكانت خاليه محد فيها غير جينا تنظف السفره ومبين ان توهم مخلصين العشا..تلفتت يمين ويسار تشوف حد موجود بس محد كان في الصاله..تنهدت وطلعت فوق وسمعت صوت ضحكات...تعرف هي هالضحكه..هذا صوت نوره وبنتها ميره..كانت ميره تضحك بصوت عالي وهي شكلها ترمس حد بالتلفون...وكان باب حجرتهن شوي مبطل..

ميره: انزين ابويه نحن بس بنتم يومين وبنرد... لا لا لا تيي اليوم حرام سمر بتيي باجر ابغي اشوفها...والله اني متولهه عليك بس بعد ابغي اتم شوي..
نوره: هاتي التلفون برمسه حشا كلتي له فواده..

مشت سلمى وهي تسمع اختها وبنتها يرمسن ويا ريل نوره..وسارت حجرتها بتغير وبتنزل تسلم على اهلها وبترد لنوره فوق..حست البيت هدوء وتذكرت ان امها خبرتها ان سمر وحصه في دبي...تنهدت ودخلت حجرتها....بدلت وعلى طول دقت عليها البشكاره..

جينا: ماما سلمى..

سلمى: تعالي جينا الباب مفتوح..

دخلت البشكاره وحطت الشنط..

جينا: رتب ثياب داخل كبت ولا انتي بتسوي..؟

سلمى: رتبيهن انتي..انا بسير اسلم على ابويه...وينهم اهلي؟

جينا: بابا مبارك داخل مجلس وماما عايشه داخل حجرتها...

سلمى حطت شيلتها على راسها ونزلت بتسلم على اهلها تحت..وهي نازله سمعت خليفه يرمس في الصاله ويا ساره...

خليفه: طولن البنات يالله متى يردن...!!!

ساره: حليلهن اكيد مستانسات...

خليفه: هيه والله لو تسمعين حس عفاري يطمن...كل يوم تتصل بس عشان تقول انها تولهت علي..

ساره: حليلي ولا جني ربيت وتعبت والحب كله لك بروحك..

خليفه يضحك..وان سلمى نازله من فوق...ونش يوم شافها بيسلم عليها بس شكله حس ان فيها شي..

خليفه: مرحبا الساع مرحبا مليون حيالله هل دبي..!!!

سلمى شوي وتشوف خليفه وانفجرت صياح: خليفه!!!!!!!!

خليفه تغير شكله: بسم الله شفيج سلامي رب ما شر...

سلمى تمت تصيح ما قدرت تنطق...

ساره نشت صوبهم: سلامي فديتج شي بلاج..اليهال بلاهم شي؟ حامد ريلج وين؟ قوليلنا حد متعور ولا شي مستوي؟

خليفه: حشا تقرير تبينها تكتب وين تبينها ترد على هالمقابله وهي توها نازله...

قرب خليفه اخته من اليلسه ويلست وساره سارت تييب لها شي تشربه يهدي نفسها...

خليفه: قولي شي بينج وبين ريلج؟ مع اني متأكد ان هالشي مابيستوي...

سلمى تصيح: طلقني...

صاعقه ونزلت على راس خليفه حس ان حد صفعه ومسح بكرامته الارض...اخته هو ...اخت خليفه بن مبارك تتطلق ومن واحد ما يسوى شرات حامد..عصب خليفه وارتفع ضغطه..

خليفه بصوت عالي: شو السبب ليش يطلقج شو صار؟؟

وسمعت ام خليفه الزعيج بالصاله وظهرت لهم بسرعه وشافت خليفه حذال اخته وهي تصيح..وجنها لقطت شي من الرمسه..

ام خليفه: يا لقعتي جني الا سمعت حد تطلق...شو السالفه يا خليفه..؟

خليفه ينش صوب امه ويحبها على راسها ويقبض ايدها ويمشيها لين اليلسه وكان يبغيها تيلس..

ام خليفه:وخر عني...خبله انا تسحبني ولا شايفني عيوز...وخر بشوف بنتي شفيها...شصار عليها...

خليفه يبتسم ويهز راسه: والله ما قصد شي يمه...الله يهديج بس..!!!

وتوايه ام خليفه بنتها وتسلم عليها وسلمى من شافت امها انفجرت صياح...

ام خليفه: يا حرة فوادي شعنه تصيحين شصار على العيال ...ليكون استوى بريلج شي..

وسلمى تمت تصيح ما قدرت تتكلم..

خليفه: امايه شفيج ما تبين تسمعين الرمسه اقولج تعالي يلسي حذالي وانا بقولج شو مستوي...

ام خليفه تيلس بثقل حذاله: هذو انا يلست ارمس شعندها اختك تبغم من حدرت الصاله...؟

خليفه: اول شي كل شي قضاء وقدر ومافي داعي للولوله وشغل المصريات امايه انتي حرمه عوده والدختر موصنا نبعدج عن الصدمات..يعني خذي الامر ببساطه وان الله له في امره ما يشاء..

ام خليفه وقلبها يدق بقو: ارمس شعندك خلنا من شغل المطاوعه هذا...

خليفه: استغفر الله يا ليتني مطوع قولي استغفر الله...

ام خليفه: يا حرتي منك..ارمس استغفر الله مسويه كبيره انا..!!!

دخلت ساره تحط العصير ويلست قريب من اخت ريلها تهديها شوي..

خليفه بهمس: ريلها طلقها..

شهقت ام خليفه ما ستوعبت رمسة ولدها..ودزته من جتفه..

ام خليفه: فال الله ولا فالك...وليش تفاول على ختك حسبي الله على بليسك..

خليفه معصب: لحوول هذي جدامج رمسيها ما بييب شي من عندي..

ام خليفه شافت رمسة ولدها صدق: يا فضيحتنا بين العرب...يا فضيحتنا اليوم ويا سواد ويهي جدام الحريم..

ساره ما عيبها اسلوب عمتها في الرمسه وطالعت خليفه يسكتها..

خليفه: امايه الله يهديج شو فيج...وشو من فضايح ترمسين عنها...؟

ام خليفه بقهر: ويطلقها ليش؟ حرمه ما يعيبها شي..ليش يطلقها...؟

خليفه: الطلاق وراد بين أي زوجين..خلاص الله ما تمم ويمكن ما يقدرون يكملون ويا بعض...

ام خليفه بصوت عالي: وشعنه ما يكملون ويا بعض...لعبه هي العرس...ياخذها تييب له العيال ويفرها على اهلها ليش؟ شو سوت يطلقها بهالعمر..؟

خليفه محرج بس ماسك عمره: والله نحن بنحطها على راسنا يمه ما بتغلبنا يلستها في البيت..وجان على سؤالج ليش طلقها تقدرين تسألينها هي ما عندي لج اجابه..(ويلف صوب ساره) شليها حجرتها مب زين تيلس هني..

ام خليفه: وليش تسير فوق خلها هني ما تبغي ابوك يعرف بهالنابي اللي يسر...خله يسمع...

وان بو خليفه حادر الصاله محرج...

بو خليفه: غربلكن الله من حرمات صوتكن واصل للشارع...شعندج يالعيوز تزاعجين.؟ حشا من خذتج ماجد سمعت لج حس كثر الليله؟

ام خليفه: ان عيزت فبناتكن وعيالك عيزوبي...ولا انا مابلاني شي...تعال اسمع اخبار عيالك وشوف اخرتها فبيتك...البارحه واحد مظهرينه من السجن والثاني هب راضي يعرس ويبغي يحرق فوادي والثالثه ياييتنك مطلقه تسحب لي خلاجينها البيت...

انفجع بو خليفه وتم يطالع منو اللي تطلق جنه سمع طلاق..

خليفه: يا امي الله يهديج ما تستوي جي الرمسه..ومب جي يكون النقاش...

بو خليفه: شعندكم..؟

ام خليفه تأشر على سلمى: بنتك تطلقت...يا فضيحتنا بين الناس..حرمه قربت من الاربعين وتتطلق وهي بعيالها...وين بودي ويهي من الحريم..؟!!!

بو خليفه: انا راعي فزعه!!!!! وليش تتطلق ان شاء الله؟

سلمى انهارت ما قدرت تتحمل اللي تسمعه...وعلى طول غيبت وما عاد حست بشي..وساره تحاول فيها بس بدون فايده...

خليفه: ساره امري على وحده من البشاكير تييب عطر وماي بارد بسرعه..

ونشت ساره تربع صوب المطبخ وزقرت على ناتالي تييهن الصاله...

وام خليفه دخلت حجرتها وهي تتحرطم وتولول وشاله البيت فوق تحت على راسها...وبو خليفه دخل وراها يهديها لا يستوي بها شي لان قلبها مب حمل صدمات وعادي أي صدمه تجلطها وتموتها...

وفي الصاله نشت سلمى عقب ما غيبت من الصدمه ومن الفجيعه اللي حصلتها من اهلها..حملوها الذنب وهي مالها خص فيه ولا جربوا يخففون عنها ولا يسمعون منها...

خليفه: تستاهلين السلامه محد بينفعج خلي بالج من نفسج..

ساره: خافي الله بحالج انتي حامل وما يستوي تضيجين على عمرج..كل شي يتعوض الا الصحه...

سلمى وهي صدق محطمه: الله يكون بالعون..

خليفه : ساره وصليها حجرتها وان شاء الله باجر بنرمس وياها ونشوف الموضوع...يمكن نقدر نسوي شي...الحين هي وايد تعبانه وما ينفع نرمسها...

ساره: ايه والله وايد تعبانه...

ونشت سلمى وطلعت فوق هي وساره وتلاقت مع نوره على الدري وسلمت عليها بس نوره خذتها من ساره وقالت لها تسير لريلها تحط له العشا وهي بتسير ويا ختها تشوف شو بلاها ومنها يمكن ترمس وياها...

.......................


بندت الليت وغيرت ثيابها ولبست بيجامتها وردت تشغل الليت عشان تظفر شعرها وترقد...كانت الساعه11:00 الليل وهي ما فيها رقاد بس من الملل قررت ترقد لو انها تدري ان في حد بينغص عليها الليله رقادها وهي بنت اخوها الحشره اللي فيها نشاط غير طبيعي...ويايه تربع صوبها...البنت ازعجتهم من يوم قدرت تنطق حرف الشين وهي مسويه لهم ازمه في البيت..ما بقى شي ما دخلت حرف الشين فيه من كثر ما هي مستانسه فيه والغريب بالموضوع انها كلما نطقت به شدت عليه...

شيخه: امي علووثتي مافيها شّششعر...

ليلى:لا اله الا الله..وكل هاللي فوق راسها شو؟ قولي انج بس تبين تقولين شعر عشان تنطقين هالشين اللي ما شفنا خير من يوم نطقتيها...

شيخه: امي انا اثمي شششيخه..

تضحك ليلى: يا حظي والله...ما لقيتي شي بعد فيه حرف الشين عشان تنطقينه...

شيخه تضحك من خاطرها: امي متى بنلوح الجمعيه..(وتحط ايدها على خصرها) انا مب دبه خلاث انا صغيره..

ليلى مبتسمه:خلاص بنروح باجر العصر..اصلا اخر يوم اييلس وياج فيه وعقبها عندي دوام هب فايجه لج..يالله يالله اطلعج الخميس واليمعه...

شيخه: بتلوحين المدرثه...؟

ليلى: أي مدرسه اللي يخليج...بروح الدوام الصبح وبرجع لج الظهر نفس اول..

شيخه مبوزه: ما تلوحين ما تلوحين...

ليلى: زين يوم بسير بشاورج قبل...

شيخه: شششليني معاج...

ليلى تضحك من قلبها: فديت حرف الشين غير يوم يطلع من ثمج عسل والله...

وطاحت خصله طويله من شعر ليلى على ويهها...وشيخه تطالعها مبطله عيونها على الاخر..وليلى ترفع شعرها...

شيخه يرت شعرها من جدام تبغي خصله تطيح لها على ويهها...وليلى تطالعها مبتسمه..

ليلى: لو تيريين لين باجر ما بتنزل على خدج...اطول شعره في راسج ما تيي نص صبعج...

شيخه: امي ليش شعري مب طويل...

ليلى مبتسمه اول مره شيخه تقول جمله كامله بدون حروف يهال مكسره...

ليلى: يا حياتي والله...!!! بعدين يوم تكبرين بيطول وبيوصل لين هني(وتأشر على ركبها) وكل الناس بيقولون شو هالشعر الغاوي ومن هالبنت الحلوه والبنات بيحبونج والخطاطيب بيكسرون بابنا ونحن بنتعب من كثر ما نردهم...

شيخه مستانسه على اللي لقطته من رمسة عمتها: وبنشششّتري اشششياء واايده...

ليلى: هاللي يهمج بس.؟!!!

شيخه: مافي اولاد ثح؟

ليلى: هيه صح...فديت بنت الاصول انا...اووه شواخي تراج ما سمعتينا كيف بتقولين وحش بعد التعديل....يالله قولي وحش..!!!

شيخه استانست انها تذكرت شي فيه حرف الشين: وحشششّ!!!! امي وحشششّ!!!!!

ليلى ميته عليها ضحك..وشوي الا وتلفون ليلى يرن والمتصل رقم غريب بس مب موبايل لكنه بيت...ومب من بوظبي من دبي...

ليلى ردت بس تمت ساكته...

حصه: خلاص عرفنا انج مؤدبه ما تنطقين لين ما يرد عليج اللي اتصل..

ليلى تضحك: حصووه !!! شسوي بعمري من يومي مؤدبه..يالله يالغيره شو تسوي...!!!!

حصه: وايد تصدقين اغار منج..مالت عليج...

ليلى: فديتني لازم تغارين مني...

حصه: شحالج يالدبه...!!!

ليلى: بخير ربي يسلمج وعلومج انتي..

وشوي الا وشيخه متعلقه في رقبتها..

شيخه: امي اليد اكلمها امي...الييد...

حصه: ييبي هالدبه خليني اطفربها شوي..لو التلفون ما ينفع بس لازم اعضها والعوزها شوي...

شيخه: الووو..

حصه: حشا جاموس مب انثى...خلج رقيقه وقولي (وتهمس)الووو..

شيخه تضحك: امي من هذي؟

ليلى: هذي حصه الدبه اللي تعضج دوم...

شيخه: انتي دبه لا تتثلين مله ثانيه بيتنا...لوحي بيتكم..

حصه: حشا والله يا انج خبله صدق ودبه وراسج فاضي....

ليلى ميته عليهن ضحك..وهن يتحرطمن على بعض...

شيخه: امي ما نليدها خليها تلووح..

حصه: يعني انا اللي ميته عليج يالدرام...

شيخه: اتي دلام...

ليلى تير التلفون: هاتي هاتي..حشا قطو وفار..اللي بيسمعج يا حصه وما يعرف عمر شويخ بيتحراكن ضراير...

حصه: يا ليتها ضرتي اسميني ما بخلي وسيلة تعذيب ما بمارسها عليها...

ليلى: اييه خاطرج انتي بس تعذبينها عشان اشربها من دمج...

حصه: افا اهون عليج عشان وحده مفعوصه...؟

ليلى: ما تهونين بس يوم يي وقت شويخ كل شي يهون في الدنيا مهما علت جيمته...

حصه: يا بختها فيج...

شيخه ملعوزه ليلى وتغني على راسها...

حصه: قولي لها تسكت لا يعتزلون المطربين هي وصوتها النشاز...

ليلى: يحمدون ربهم ان شويخ بتخليهم يعتزلون على الاقل بيحترمون عمارهم شوي والله بيرحمنا من ذنوب الاغاني...

شيخه تغني:بارني بارني بارني بارني...

حصه: ياهالبارني اللي طفرنا...تراها تحبه لانه دب شراتها...

ليلى: بارني ديناصور مب دب...

حصه: لونه ما يعيبني عيناوي واخضر...شو هالتناقض العجيب...

ليلى: متفيجه لهالسوالف انتي...

حصه: عيل في شو نرمس...ادري واعرف تبيني ارمس عن شو..!!!

ليلى: يالله دخلي بالموضوع على طول شو صار...؟

حصه: في اشياء وايده مب شي واحد بس...تبيني اخبرج عن الظهر قبل لا يسيير ولا عن عبدالله اخوي..؟

ليلى: كلهن بس ابدي باللي مب مهم وعقبه الاهم...احب الاثاره..

شيخه: امي اليد انام...

ليلى: نامي محد مسكج...ايوه حصه كملي...

حصه: زين كلهن مهمات...من وين ابدا لج...

ليلى: قولي يالله عاد حتى انا بقولج شي وايد حلو...

وخبرت حصه ليلى بالسالفتين كلهن اللي صار على دري البيت واللي قالها عبدالله اخوها عن حمد قبل سنوات...

ليلى: حليله غمضني...!!

حصه: مب كثري والله...

ليلى: يا حنونه...!!

حصه: شفتي عاد...المهم انتي شو صار وياج..؟

ليلى: انتي ترومين تطولين..؟ سمر وينها عنج؟

حصه: ذلفت مادري وين ونها زعلانه وتباني اراضيها ولا تتحراني بتعذر لها..خلها تولي شلت فراشها وذلفت حجرة بنات خليفه..

ليلى: تولي..المهم شو رايج باجر نسير المول نييب لنا كم لبس للدوام.؟

حصه: بنبطي محد يودينا...بيقولون صار لج في دبي اسبوع وراده تتشرين من بوظبي...

ليلى: شفيها بوظبي يا زين لبسها...خلي عنج وتعالي..انا بطلع شيخه امشيها شوي ...ونتلاقى هناك...

حصه: ما بروم والله..انتي من بيوديج..

ليلى: حمدان فديته...

حصه: اووه تطورنا..ويسوق بعد..متى طلعه الليسن..

ليلى: طال عمرج نحن اللياسن تيينا للبيت...

نقعت حصه ضحك: ما تليق عليج الخقه والله...

ليلى تضحك: خلنا نجرب شوي...

حصه: هيه ما خبرتيني شو صار وياج مفرحنج...؟

ليلى بفرح: فهد!! فهد ولد عمتي يانا البيت امس...والله يا حصه ما تعرفين شكثر استانست فيه...حسيت بفرح غريب..

حصه: اممم حلو والله...شو صار وياه شو ياييبنه اصلاً؟

ليلى: مادري والله جي يقول انه خاطف يسلم...بس تعرفين عرس ناصر يوم الاثنين..

شهقت حصه: قولي والله؟

ليلى بثقه: والله!!!

حصه: عزموكم..؟

ليلى: للحين لاء...

حصه: بتروحين؟

ليلى: اكيد لاء...

حصه: بتروحين غصبا عنج..يا ذكيه لازم تثبتين له انه عادي عندج...لازم تخلينه يحس انه ما كان يسوىشي...حسسيه بجيمته..

ليلى: مب انا اللي تعودت ازيف مشاعري...يدري اني احبه ويدري انه مب عادي...ليش اقص عليه واسوي عمري عادي..

حصه: كان يقول انج تحبينه..لكن الحين يدري انه لاء..او يمكنه متشكك..اقطعي شكه باليقين خليه يحس انه ولا شي..

ليلى:مقدر والله..!!

حصه: افا اذا انتي تضعفين جي لمشاعرج..انا شو بسوي؟

ليلى: مب بايدي يا حصه...لو العرس في حوش بيتنا ما حضرته...

حصه: لين يوم الاثنين يصير خير...عندج شي كاشخ تلبسينه...؟

ليلى تبتسم: انتي شكلج واثقه اني بروح...

حصه: غصبا عنج..اصلا ما بسير وحدي لازم نسير رباعه رافعات رووسنا...

ليلى: ان شاء الله ما ندري يعزمونا ولا لاء...اسكتي الحين...

حصه تتثاوب: يالله ياني رقاد من صوتج المتوحش باي...

ليلى: والله.؟ انا الحين صوتي متوحش...بس انتي اللي يسمعج مادري شو يقول..اكيد يشك كناري يغرد..

حصه: فديتني اكيد...

ليلى: يالله يالثقه..المهم بخليج وبوظبي بكبرها تترياج باجر...لا تبطين ترا الشوق ذباح...

حصه: وييه منو قدي انا...خلاص باجر بنتحر وبخليهم يصلبوني على الكاسر..حشا مب حب كل هاه ما روم انا...

ليلى: مشكله اللي ما ينعطون ويه..يالله يالله..

حصه: الله يحفظج مع السلامه..

ليلى: مع السلامه...

شلت ليلى شيخه اللي راقده فوق ريولها وودتها على شبريتها...وهي بندت الليت ورقدت على طول..

........................

"هذي مب ويه حشيمه...صدق ما ينعطن البنات ويه"

كان منسدح يطالع فلم في 2 وقطعوه عشان ينقلون شي ثاني طرا على بال المعدين الحين...ونش من فوق الكنبه اللي منسدح فوقها وعيونه كلها انتظار وكلها لهفه لرد الجميل والانتقام...

"اكيد بتشوف مستحيل اسكت لها"

كان حمد وايد محرج من اسلوب حصه ..وما عيبه ابدا تصرفها العصر ولا تصرفاتها بالمره..

"هاي على شو شايفه عمرها؟!!! مب منها مني انا اللي عطيتها ويه زياده على اللزوم.."

نش بيطلع وتلبس عقب ما قطعوا الفلم...بس قبل يطلع يلس في حجرته...ويلس يقلب شريط ذكرياته من اوله لين اخره..ويت في باله حصه..من يوم عرف الحب وهو ما يشوف فيها اكثر من حرمه يوم من الايام بتكون له كفرض من فروض العايله...عمره ما فكر فيها كحبيبه..وعمره ما راعى مشاعرها..كان طول عمره يعرف انها تحبه وتموت فيه..لو انها ساكته وما تبين...حاولت قد ما تقدر انها تكون واضحه تتحراه ما فهمها بس هو فهمها قبل تنطق بشي وقبل لا تسوي أي شي...

حمد يعرف في داخل نفسه انه ما حب حصه من زمان وان حبه لجواهر كان اول حب واصدق واسمى حب...يعرف انه ما بيحب عقبها ولا بياخذ غيرها...وان خذ حصه بياخذها بس لانها بنت عمه وتعتبر في ويهه..عسب ما يقولون محيرنها ولا خذها...

كان ما يحب حصه بس يبغيها...ليـــش هي بالذات.؟

لان محد يتحمله كثر حصه ومحد يحبه كثر حصه ومحد يصبر عليه كثر حصه..ومحد يفهمه كثر حصه..ومحد بيقدر ظروفه كثر حصه..كل حد بيلومه ليش ضيع كل شركات ابوه وتجارته على اللعب وصار يعتمد على معاشه الا حصه...الكل ممكن ينفيه من الارض الا حصه...كان يشوف في حصه متنفسه لانه خلاص مؤمن انها لا يمكن تجرحه ولا تزعله وبتم طول العمر اسيره في حبه...بس اليوم غير...اليوم صدمته في نفسه وفي توقعاته...صدمته في ذاته وفي افكاره...!!!

هي تقول جرحها...تقول "شاللي ما سويته!!!" "يالله هالكثر شاله بخاطرها"

مايدري من اللي مصخها هو ولا هي؟!!

كيف يعالج موقفه منها...!!

كان طول العمر اللي طاف يقول انها تحبه ومستحيل يضايجها غروره وقسوته....

"شكلي قسيت عليها اكثر من اللازم..وصبرها انتهى...معقوله في الوقت اللي ابغيها فيه تتخلى عني؟؟!!!"

فكر شوي بمنطقيه وتذكر كيف كان يعاملها ولا يزال بالرغم من لينه هالفتره...!!!

"من حقها والله...عمرها ما شافت مني كلمه طيبه...بس ليش جي تغيرت؟ شو صار عليها؟ اكيد سمعت شي ولا حد مخبرنها شي!!!"

تم حمد يفكر هل معقوله ان بدريه خبرتها سالفة جواهر..
"لا لا مب معقوله...لو خبرتها هالسالفه ما بتزعل الحين..اكيد بتزعل من قبل..مب الحين بيطري على بالها الزعل!!!"

فكر في اشياء وايده ممكن تغيرها بس عمره ما تخيل ان ذياب النذل ممكن يكون خبرها شي او ان عبدالله ممكن يكون صارحها..بس ما يتخيل ان حصه ممكن تزعل عشان ماضيه...

" شو تبى به الماضي اهم شي الحين تضمن اني لها مب لغيرها..لا تفكر باللي صار...لا لا اصلا مستحيل تكون تعرف سالفة جواهر...من بيخبرها اصلا!!!!"

سار صوب درجه اللي ممزور اوراق كانت فيها عصارة سنينه وعذابه ودنياه..ماضي جديم..وذكريات اجدم...يالله يالدنيا..من يتخيل حمد اللي تموت في ترابه كل من شافته...يوم فكر يحب ودرته اللي يحبها وكانت بس تتسلى معاه...

جواهر: ماصدق انك ياي من لندن دبي عشاني...مستحيل ما اقدر استوعب هالشي!!!!

حمد وقلبه يدق بسرعه: صدقي انا عشانج عادي اصنع كونكورد...!!

جواهر وبخجل فضيع: يالله علني ما خلى منك...

حمد بحب فضيع: يسدني ارد دبي عشان اسمع هالكلمه كم تسوى...

جواهر بحزن: باجر بترد لندن!!!؟؟

حمد: هيه برد مدينة الضباب بس خلج واثقه انج نوري اللي اشوفبه هناك...

جواهر سكتت...وحمد قطع عليه شريط ذكرياته اخر مكالمه من بينهم...

حمد: انتي متأكده من اللي تقولينه؟

جواهر تصيح: والله مب بإيدي..

حمد حس انها تجذب وهذا مب صياح: جواهر خافي ربج فيني..

جواهر وهي تبغي تبند عنه بسرعه: حمد ليش ما تصدق والله ملجت خلاص..

حمد شوي ويموت: بس لا تذبحيني بس!!!!..كيف قدرتي تتسلين بمشاعري طول هالفتره..!!!

جواهر: حرام عليك يا حمد..تدري اني صدق احبك وما بدي عليك لا تظلمني...اهلي وما برد شورهم ..

حمد بقهر:ما قدرتي ترفضين..!!؟

جواهر بحزن: رفضي ما بيودي ولا بييب...انا بنت مالي راي...

حمد: جواهر ارجوج كلمي ابوج حاولي وياه..والله برد باجر دبي وبخطبج انا بنفسي..ارجوج يا الجوهره لا تقتليني قاصر عمر..افا كيف تهون عليج المحبه...؟!!!!

جواهر حست انها تعذب حمد: حمد ارجوك افهمني اهلي مستحيل يوافقون عليك وانت للحين تدرس...!!!

حمد: وفكرتي فيها بعد...عيل ليش يوم كل يوم نرمس بهالموضوع ما جد قلتي لي من قبل...!!!!! ليش تسوين فيني جي..انا جد غلطة عليج ولا سويت بج شي؟

جواهر: خلاص حمد انا على ذمة ريال ثاني ماروم اخرب سمعتي الله وياك واذكرني بالخير نفس ما انا بذكرك...

حمد صاخ وكان شوي وينفجر صياح بس مسك عمره...

جواهر: بخليك الحين...

ما رد عليها حمد...

جواهر وهي متلومه: حمد بخليك على الاقل قول لي مع السلامه...

حمد تم ساكت...

جواهر عورها قلبها..رغم انها ودرته لانها ملت من بعدها عنه..وصدق اهلها بغوها تعرس وهي ما تبى تتم تتريا زود عن جي...

جواهر وبتصيح: حمد الله وياك..

وبندت التلفون وحمد احترق مكانه..وعاش عذابه والامه واهاته وانتهى به المطاف صايع ما يهمه شي وبعثر اللي له واللي عليه انتقاما من البنات وسيرتهن وزيف مشاعرهن...

ابتسم حمد الحين عقب ما يت على باله جواهر...يشوف جرحه شبه برا...وخصوصا ان النزعه الانتقاميه راحت عنه عقب ما ماتت بدريه..

سار وفج الدرج وطلع اوراقه وشاف ورقه من جريب قصها من مجله كانت كلماتها معبره وتناسب موقفه في الحياه من انسانه حبها وخلته وما يندرا هل كانت تلعب بمشاعره او زوجوها مثل ما تقول غصبا عنها...

فتح الورقه وشاف على صدر الزمن مكتوب..
"عندما يخذلون احساسك الجميل....ويكسرون احلامك بقسوه...ويرحلون عنك كالايام..كالعمر..!! وينبت في قلبك جرح بإتساع الفراغ خلفهم...ثم تأتي بهم الايام اليـــك من جديد...كيف تستقبل عودتهم...وماذا تقـــــول لهــم!!!!!

قل لهم: انــك نسيتهم...وادر لهم ظهر قلبــــك...وامض في الطريق المعاكس لهم...فربما كان هناك...في الجهة الاخرى...اناس يستحقونك اكثر منهـــم...قل لهم: ان الايـــام لا تتكــرر...وان المراحــل لا تعــاد...!!!..وانـــك ذات يوم خلفتهم تماما كما خلفـــوك في الوراء وان العمر لا يعـــود يوما الى الوراء ابــدا...!!!!قل لهم: ان صلاحيتهم انتهت..وان النبض في قلبك ليس بنبضهم..وان المكان في ذاكرتك ليس بمكانهم...وان الزمان في ايامك ليس بزمانهم...ولم يتبقى لهم بك سوى الامس...بكل الم واسى وذكرى الامس...!!!قل لهم: لا تقل لهم شيئاً استقبلهم بصمت...فللصمت احياناً قدره فائقه على التعبير عما تعجز الحروف والكلمات عنه..."

خلص حمد من الورقه وردها مكانها وبعدها الابتسامه ما فارقت ويهه..

"شهرزاد هذي تحفه عقلها داهيه وافكارها واحساسها لا يعلى عليه..يا بخت الامارات فيها"

يت على باله روضه ما يدري ليش لاول مره يبتسم من يطريها بخبث...
" روضه كيف ما يت على بالي..!!! هذي اكيد بتكون الحل..!!!"

ابتسم وسار يبند التلفزيون وبيرقد عشان باجر ينش من وقت ويلحق على صلاة اليمعه من وقت...
....................

والسموحه على التاخير وان شاءالله الاخت الغلا بتكمل لكم باقي هالجزء
لانه وايد طويل ... تحياتي لكم

[الغلا]

السموحه منكم على التاخير والصراحه اخونا البدوي الحبوب ما يقصر ...

وان شاء الله اليوم بنزل لكم الجزء الجديد....


اختكم
الغلا

[الرايقه]

يعطيكم الف عاافيه وما تقصرووون ,,,

[البدوي الحبوب]

تكملة الجزء (26 )

الساعه 10:30 الصبح نزلت البشكاره الاكياس وسارت بهن تحطهن في السياره..وردت البيت تشوف اذا في شي ناقص ولا لاء..وطلعت فوق تشوف غرف البنات خلصن اغراضهن ولبسهن...عشان ينزلن يتريقن قبل يطلعن...


عفرا: حمده تأكدي انج ما نسيتي شي.!!

حمده: كم مره تقولين لي تأكدي...ما نسيت شي والله...

عفرا ردت بسرعه: الا نسيتي وشي مهم بعد يا ذكيه...نسيت كتابي..

حمده مستغربه: انتي يبتي كتابج دبي؟

عفرا: هيه كنت ادرس يوم تطلعون الزراعه برا...

حمده: كم باقي لج؟

عفرا: هاي ثاني مره اعيده...

وان سمر يايتنهن....

سمر: عبدالله يقول انزلن تحت يالله..

ونزلت وخلتهن..

حمده: الحمدلله والشكر هذي شو فيها..رافعه خشمها صار لها يومين..؟

عفرا: مادري بها الظاهر التجربه الاولى شبه فشلت بحاول مره ثانيه...

حمده: أي تجربه...؟

عفرا: يالله انزلي بلا فلسفه...

حمده: عمتي حصه وين؟

عفرا: روحي ازقريها من حجرتها...

ونزلت عفرا وحمده سارت حجرة حصه...

حصه: ادري ادري اني تأخرت يالله اللي يسمع ورانا شي...من بعدها بوظبي...!!

حمده: لا فديتج وايد قريبه هني الا مد النظر..

حصه: شلي الكيسه هذي ماروم لها بروحي عندي اشياء ثانيه اشلها...

وشلت حمده الكيس ونزلت ويا حصه تحت...وتريقوا كلهم وعقبها ركبوا السياره بيوصلهن عبدالله بوظبي...وقبل يطلعون..

عبدالله: دونا لا تفتحين الباب لاي حد يي اوكي...أي حد يي قولي لها بابا برا مافي حد هني...

دونا: ان شاء الله ...

عبدالله: ردي على التلفون مافي مشكله يمكن اتصل بج اوكي؟

دونا: ان شاء الله..

حمده: يالله عمي تعال...

وطلعوا من البيت ودونا صكت البيبان..

وفي الدرب...

حمده: عمي حط الاف ام...

عبدالله: اصبحنا واصبح الملك لله..

حصه: صدقها عبدالله ماشي اغاني الحين يحطون برامج للحوار المفتوح...

عبدالله: شو رايج عفرا؟

عفرا: اللي يعيبكم سووه انا وايد هلكانه صدق بسير ارقد في البيت يومين من التعب اللي فيه..

عبدالله: متى امتحانج؟

عفرا: الاسبوع الياي..يوم الاثنين..

عبدالله: هالاسبوع؟

عفرا: لاء مب الاسبوع الياي. ..اللي عقبه...

حصه: زين بعد تحريت يوم الاثنين هاه..ترا عندنا عرس ما كنا بنخليج تسيرين الامتحان..

عفرا: لا والله ومن قالج اني ببدي العرس على امتحاني..لو عرسج انتي ما بسيرله واخلي امتحاني..

حصه: خيبه!!!

عبدالله: عرس منو ومحد عزمنا للحين..؟

حصه: ناصر بن سعيد ولد خالتيه فاطمه...

عبدالله: خو فهد؟

حصه: هيه...

عبدالله: وليش ما خبرونا من قبل شو هالسنه؟

حصه: ما يهم..ترانا ما نقرب لهم وايد من صوب الرياييل..عسب جي مب لازم نعرف بدري..الا احنا من المعازيم بس..

عبدالله: شو من المعازيم بس..ترا العروس بنت خالنا ومن حقنا ندري من وقت..اصلا هالريال بو ناصر مايعيبني مول مادري راشد كيف وافق على خته تاخذ ولدهم..

حصه مستغربه من عبدالله: اذا الابو مب زين الولد شفيه..ناصر مدير شركتنا والله مافي احسن عنه ريال حشيم ومحترم وما يغلط على حد ويراعي الله والناس...وبعدين تعال اقولك شو دخل راشد وخالي بو راشد بالموضوع..؟

عبدالله: كيف..؟ مب بياخذ بنتهم ليلى.؟

حصه تبتسم: لا فديتك وين ياخذها..خلاص كنسلوا...الحين بياخذ بنت عمته...

عبدالله انصدم: مب كان محيرنها من يوم صغيره؟

حصه: انت قلتها كان...الحين خلاص..

عبدالله: افا شو السبب حليلها بنت خالي كبيره ومب وقته يخليها الحين..لو قبل قلنا ما عليه بس.....!!!!

حصه: شفت عاد رياييل ما منهم امان...

عبدالله: خسه الله مسود الويه..تترياه هالوقت كله ويخليها اسميه ما يعرف المذهب...ولا شرع الرياييل...

حصه مستانسه ما تدري ليش: هالكثر تهمك؟

عبدالله بعفويه: حليلها بنت كبيره ومب كل يوم بييها معرس...وتعرفين اغلب الرياييل يعافون البنت عقب ال27 ويطالعون للصغار..

حصه بنقمه: شقصدك ان شاء الله...

حمده : لا انتي عريسج مضمون...

عفرا: ايه ما يخصج في هالسوالف...

سمر بصوت واطي: محد يباها هذي ام لسان بتاكل ريلها...

حصه صخت من عقب ما رمست حمده..

عبدالله بعدما تغير الموضوع كامل: وين سمر ما سمعت لها حس...؟

سمر: انا هني..

حمده: بتعمى عيونها من كثر مجابل هالقيم بوي...

عبدالله: ما خلت شريط في السوق ما شرته اول البارحه مادري حق شو ثرهن لهالخبال...وين امي عنج..كانت قبل يوم نحن يهال ..قبل تبدا المدارس باسبوع تشل كورنا من الحوش وتدسهن لين ما تخلص المدرسه..عشان ما نلعب في الفريج...

حمده: وليش ما تروحون تشترون كوره من الدكان..؟

عبدالله: نحن مب شراتكم كل شغلنا بالدسه..يقولون اهلنا لا تسوون وما نسوي..

حمده: حليلكم تخافون...

عبدالله: مب نخاف بالعكس نحترم اهلنا ونخاف اننا ما نصونهم في غيابهم ويعرفون عقبها و نفقد احترامنا عندهم..

عفرا عيبها منطق عمها...

عفرا: ليتني عشت زمان اول بوايد احلى عن اليوم..

عبدالله: صدقتي والله...قبل النفوس نظيفه واليوم.......الله يعين بس..

حصه: مب حلو اول ماشي امكانيات والماده معدومه...

حمده: صح وما كنت بكون متعلمه ولا اعرف شي ولا عندي لغه ولا اعرف كمبيوتر ولا تلفون...

عفرا: بس بتكونين عايشه براحة بال واصعب امنيه تتمنينها اليوم بتكون موجوده عندج هذاك الوقت اسهل مما تتصورين..

حمده: شو هي الامنيه اللي ما بقدر احققها هالوقت..كل شي اروم له...الفلوس تييب كل شي..وتوصل لنا كل شي ..لا تقولين الفلوس ما تشتري السعاده وما عرف شو..اصلا السعاده ما تيي الا اذا حققتي كل احلامج..والاحلام تحققها الفلوس..

عفرا: من قالج..راحة البال ما تنشرى بفلوس..والحب ما ينشرى بفلوس...والسعاده ما تنشرى بفلوس...

عبدالله: والناس الصادقه ما تنشرى بفلوس...كل اللي حواليج يا حمده بيكونون طمعانين فيج..محد بيكون حذالج صادق وصافي نيه..

حصه: بس بعد الفلوس لها دور في بناء السعاده..

عبدالله: اكيد لها دور بس مب كبير...

حمده: بالعكس يا عمي...انت لو غني وعندك فلوس وايده..تقدر تتزوج البنت اللي تبغي دون ما يردونك هلها..تقدر تشتري البيت اللي بخاطرك وتبني اللي نفسك فيه..وتسافر أي وقت وكل الناس تحترمك وتطلب رضاك...الاشياء اول ما تنزل في السوق انت اول من يشتريها ..تلفون كمبيوتر اثاث سياره بيت...كل شي بيكون بإيديك..غير هذا ما بيوصل اخر الشهر وانت تحاتي الفواتير والايجارات ومصاريف اليهال...عمي والله الفلوس هي سر الحياه..صدقني ما تروم تصرف نفسك بدونها...والحب ما يوكل عيش على قولة اخوانا المصريين...

عبدالله عيبه قوة اقناع حمده بس ما بيسكت لها: بس لو عندج بيت وسياره وتلفون وكمبيوتر وقدرتي تسددين كل اللي عليج بس ما لقيتي اللي يحبج وتحبينه...ومب شرط يكون ريال او زوج..يعني هلج ما حبوج وقرايبج حسدوج على النعمه وناقمينج شو بتسوين...؟ بتروحين تقولين للناس حبوني وبعطيكم فلوس؟!!!

حمده تبتسم: اكيد لاء..بس سبق وقلت لك بيحترموني...حتى لو كان احترامهم بس لفلوسي ما يهمني المهم الهيبه ونظرة الناس..

عفرا: لا لا يا حمده منطقج وايد ضعيف صدقيني...

حصه: اوكي نضرب مثال حي...عندك خليفه اخوي ما شاء الله عليه كل شي يبغيه يوصل له والناس تحترمه وتحسب له الف حساب ونحن نحبه وكل حد يحبه...ما تعتقد ان هيبته من فلوسه؟

عبدالله: خليفه ينحب صح بس شدراكن ان الناس ما تحاول تقرب منه عشان تبني نفسها؟

حمده: المهم في الاخير الفلوس اهم شي بالدنيا...اذا كانت فلوسي وايده ما بيتم شي في خاطري ولكني بكون ارضيت نفسي..

عبدالله: بعده منطقج ضعيف...بالفلوس ما ترومين تحبين صدقيني الحب ما ينشرا بكنوز الارض...بالفلوس ما ترومين تردين الروح في ميت...بالفلوس ما ترومين تمسحين كل ذنوبج...

حمده: بلى اذا بنيت مسيد وسويت اعمال خيريه..

عبدالله يضحك: غلبتيني..!!!

حصه: يالله اعلن هزيمتك..

عبدالله: ما بعلنها النقاش يطول..بس حبيت اقولكن ان الفلوس عامل مساعد في حياتنا لا غير...ولكنها مستحيل تنهي عذاب يتيم ولا حزن ارمله ولا عذاب فاقد حبيب ولا تقدر ابد انها تعوض عن انسان راح ومستحيل يرد...الفلوس تساعدنا في امور العيش لكنها ما تخدم احاسيسنا صدقني...انا بفلوسي كلها وشركاتي وشركات خليفه ومزارع وعزب ابوي وكل شي تملكه عايلتنا ما روم اعيد لحظه كنت مستانس فيها ويا بدريه...

حمده ابتسمت بعدما غلبها عمها وحصه بعد ما رمست وعفرا كانت في عالم ثاني..

حمده: انا انغلبت الحين...

حصه: انا بعد بس مب يعني اني الغي اهمية الفلوس...

عبدالله: ما قلنا الغيها بس صدقوني عمرها ما شرت احساس...

حصه سكتت وعرفت ان الفلوس صدق ما تشتري الحب...لو الحب ينشرا دفعت كنوز الارض واشترت احساس حمد وقلبه...

"اه ليت لو بيدي الامر...بس ليت عمرها ما بنت بيت..!!!"

سكتوا...بس عفرا ما تعرف في شي مر في خيالها..ما تعرف ليش فكرت فيه...ليش وصل لبالها...محد ذكره ولا قال عنه شي...ليش تتذكره..صح والله يا على بالها...حمـــــدان..كيف وصل لبالها وهم ما طروا شي عنه...بس اكيد في كلمه بالموضوع كامل خلته يي على بالها...كلمه اكيد مع شوي رجوع للوراء بذكرياتها بتتذكر شو صار قبل سنه في المدرسه يوم كانوا صف ثاني ثانوي...تذكرت يوم ردت من البريك للصف وقبل تدخل سمعتهم يرمسون عنها..

فلان: سخيفه ومتكبره ..

فلانه: غناهم فاحش حشى مب ثروه عندهم مخليتنها رافعه خشمها للسما..

فلان:تخيلي ما ترمس من يوم تيي المدرسه لين ما تروح غير ويا الاساتذه والمدرسات..مب غرور هذا!!!!

فلانه: برايها اصلا اخر شي بتستوي مينونه من كثر ما تحس بالوحده..محد يحبها ولا يبغي يرابعها..

حمدان: وانتي ليش متلصقه فيها دوم يوم انج ما تحبينها...؟

فلانه: عشان اضمن مستقبلي..لازم تساعدني واستفيد منها...

حمدان: ويوم انها بتساعدج ليش ما تطلبين منها بنفسج تشرح لج...

فلانه: ماحب ابين لها اني احتاجها عشان ما تذلني..

حمدان: عفرا مب من النوع الي يذل انا اعرفها اكثر منج...

فلانه: هيه وايد...

حمدان: لا يروح تفكيرج بعيد..اصلا هي قريبتي قبل تكون معاي بنفس الصف...وخلوا النقمه وحسد الناس على اللي الله عطاهم..

فلانه: محد قال لها تخق على خلق الله كيفي ما بلعها..يعلها فدا اختها حمده اللي محد يسواها سوالف وربشه والله صدق هاي البنت بس عيبها كسلانه وايد...

حمدان: انا بطلع ما ريد اتم هني ازود عن جي..

وطلع حمدان وشاف عفرا وعرف انها سمعت كل شي..وانصدم يوم شاف نظرة البرود في عيونها...

حمدان: هم ما يقصدون شي...لا تاخذين بخاطرج...

عفرا: لا تحاول تعدل الموضوع انا مب ياهل وفاهمه كل شي على العموم مشكور على دفاعك عني..

حمدان: شو هالرمسه والله ما يقصدون الا سوالف غيره تعرفينها...

عفرا: لا تحلف بالله جذب..انا سمعت وفهمت كل شي بس انا ما يهمني رايهم فيني دامني واثقه من عمري..

حمدان: ومن قالج ان رايهم ما يهم..بدل ما تمين ساكته وتقهرين نفسج..اثبتي لهم انج عكس اللي تفكرين..لا تبنين بينج وبين الناس الف حاجز كوني قريبه منهم وافهميهم عشان يفهمونج...ترا كل شي في الدنيا له قيمه الا محبة الناس قيمتها كبيره ومن خسرها خسر كل شي..خلج مختلفه بكل شي واكسبي محبتهم..ولا تنسين ان كل شي له جماله في الدنيا بس مافي مثل جمال حب الناس ...

وسار عنها حمدان..وهني انقطع حبل افكارها وعرفت ليش اتذكرت حمدان لما قال عمها ان "الحب ما ينشرا بالفلوس"


عبدالله: يالله ما بتنزلين ولا عيبتج اليلسه في السياره..

عفرا انتبهت: وصلنا والله ما حسيت..(وتلفتت) وين البنات..

عبدالله: صباح الليل المشمس.. البنات دخلن البيت وانتي بعدج هني...يالله تلاحقي على عمرج..حمده بتسبقج صوب ابوج يالله سيري لها قبل تستفرد به...

عفرا ابتسمت ونزلت بسرعه البيت بتشوف اهلها وتسلم عليهم...
نشت من وقت وطلعت من الحجره وما دخلت المطبخ تشوف شو مسويين ريوق...وسارت تيلس في الحوش الخالي من الزرع...اللي طوله ما يتعدا ثمان خطوات للبوابه الخارجيه...والوان اصباغه المتآكله..والعفسه اللي فيه رغم نظافته الشديده..وجرتها الافكار لمقارنه غير عادله بين فلتهم وبيت ريلها الشعبي...وبسرعه طردت هالفكره من راسها...ما كانت تبغي تظلم نفسها وتطلع بمقارنه يمكن تعور قلبها اكثر من انها تنقذها...

البارحه ريلها زعل عليها بسبة كمن كلمه يقول انها جرحته..ما عرفت كيف تتصرف..ومب متعوده تعتذر لحد ولا تعرف اصلا كيف تعتذر..كم كثر مر على عرسها... عمرها ما كلفت نفسها واتصلت في ابوها وتخبرته عن احواله...او حاولت تطيب خاطره بكلمتين ينسى فيهن اللي صار...

بدا هبوب حار ييها من الجهه الثانيه ونشت بترد داخل...ونفضت ثوبها من التراب اللي يا عليه...ويوم سارت صوب باب الصاله عشان تدخل تذكرت وين بتسير...!!!!!ريلها زعلان منها وامه اكيد زعلانه من زعل ولدها واخته اكيد نفس الشي..

"يعني وحيده محد بيوقف معاي...كلهم بيكونون ضدي...شو هالنحاسه في بيت ابويه ما عرفت معنى الحب وانتقلت لبيت كلهم بيوقفون فيه ضدي..يعني كيف اعيش ووين الاقي اللي يفهمني.."

ردت داخل ويلست في الصاله وسمعت صوت ام احمد تصلي الضحى في حجرتها...للحين من يوم سكنت هالبيت ام احمد ما جد سولفت وياها وايد..يمكن فاطمه شوي تكون قريبه منها او انها تكلمت معاها كذا مره..لكن ام احمد بحياتها ما جد تعنت تسولف لها او تسوي لها شي...سلامه تحرت ام ريلها كارهتنها او ما تحبها...لكن احمد دوم يقولها ان امه هي اللي مختارتنها له....وشوي وان ام احمد تحاول تفتح باب حجرتها عشان تطلع وهي على كرسيها المتحرك...وطلعت الصاله..وسلامه نشت تسلم عليها..

"جي قالت لي عمتي ليلى اول ما شوف عمتي ام ريلي اسوي"

ام احمد مبتسمه: مرحبا الساع بالغاليه مرة الغالي...

سلامه: كيف اصبحتي يا عمتي ان شاء الله بخير..؟

ام احمد مستانسه: صبحج الله بالخير غناتي شحالج وشحال ريلج.؟

سلامه: بخير فديتج راقد للحين ما نش...

ام احمد: سيري وعي ريلج وين بيبطي على صلاة الجمعه ما بيلحقها متى بيسبح ويغير ثيابه وييلس ويانا شوي..

سلامه بتردد: خليه يرقد شوي بعدين بوعيه توها الساعه 11:00...

حست ام احمد انها متضاربه للحين مع ريلها...فما حبت تزعجها...وما تدخلت تتريا سلامه ترمس لروحها...

سلامه كانت تتريا عمتها ترمس او تقول شي بس عمتها بالمثل كانت هي تترياها وكل وحده مستحيه ومراعيه الثانيه...

ام احمد: ترا فاطمه زهبت الريوق من ساعه سيري تريقي..

سلامه: مالي خاطر بشي..

ام احمد: ليش يا بنتي عسى ما شر..؟

سلامه وشوي تصيح: لاء...

ام احمد: الا في شي وجان تبين ترمسين عديني في مكان امج صح ما تتبدل الام بس ما بقصر وياج وان زعلج احمد ما عليج منه بيذوق العصا بظهره...

استانست سلامه بس حست عمتها تبالغ كيف بتوقف ضد ولدها عشان حرمته...!!!

سلامه: لا احمد ما سوا شي..انا ضايجه شوي ابا اروح بيت يدتي..

استغربت ام احمد انها ما قالت بيت اهلي...

ام احمد: وهلج ما بتزورينهم..؟

سلامه ابتسمت: ترانا فبيت واحد كلنا يعني حوشنا فيه فلتين كبار وحده لنا ووحده بيت يدي الله يرحمه...

ام احمد: هيه فديتج انتوا مسوين فلل في نفس الحوش..؟

سلامه: هيه..وفي فله ما كملوها كانت لعمي سيف الله يرحمه...بس وقفوا البناء فيها ..اصلا ما بنوا الا طابق واحد فيها والطابق اللي فوق وقفوه لان عمي توفى...وقالوا ان هاه حق شيخه يعني ميراثها وايجار الفله الصغيره لها ترا ابويه مسوي لها حساب بالبنك فيه اللي ورثته عن اهلها يعني نصيب عمي سيف من فلوس يدي والبيت كله باسمها بس لانها تحت وصاية ابوي مسوينها تحت اسمه ورعايته..

ام احمد مستغربه اول مره تسمع هالرمسه: كل هاه لشيخه ما جد سمعت..

سلامه: كيف ؟ كل حد يعرف ان البيت اللي ورا فلة يدتي باسم شيخه ومأجرينه هلي وايجاره لحساب شيخه بنت عمي...

ام احمد: بارك الله فيهم والله يعوضهم عن كل اللي يتعبونه فيها..تراها يتيمه ورحمتها واجبه...

سلامه سكتت...

ام احمد: يالله فديتج نشي وعي ريلج خاس رقاد سيري له...

نشت سلامه: ان شاء الله عمتي...

وسارت سلامه حجرتهم وهي متردده كيف ممكن تكلمه خلاص هي مب زعلانه بس هو لا يزعل عليها بعد..جي كانت تفكر...

" يا رب اني اذا رمسته ما يزاعج بويهي..والله اذا زاعج بسير عند عمتي وما برد لهم"

فتحت الباب بشوي شوي...وشافته للحين راقد...وسارت بتوعيه وهي مرتبكه..تخاف يلوفها بكف يطيرها...بعدها ما نست تكفيخ ابوها لها..

قربت منه شوي...

سلامه بسرعه: احمد نش اسبح اليوم اليمعه عشان تلحق على الصلاه..

احمد على طول انتبه وطالعها شوي بعيون شبه مغمضه ورد يطالع المنبه...

سلامه صخت وايد كان بارد..

احمد ينش من على الشبريه على طول..ومن دون لا يرمس دخل الحمام..

سلامه بخاطرها"برايك يعني انا اللي مهتمه..كيفك لا ترضى"

وجهزت له ثيابه وفوطه عشان يسبح ويلست تسحي شعرها وتغير ثيابها....وهو طلع وصلى ركعتين ويلس على الشبريه..

سلامه: اييب لك الريوق..؟

احمد: اذا موجود هاتيه واذا ما شي خلاص...

نشت سلامه ما صدقت رمس بس مستحيل تبين له..صح صغيره وما عندها سوالف ولا خبره بالعرس وصح ليلى علمتها وخبرتها كيف تتصرف..بس بعد في عندها شي او فيها صفه مب بكيف حد يحطها فيها او يشلها عنها..كانت ماخذتنها من ليلى طبق الاصل وهي كبرياءها وعزة نفسها اللي مستحيل يهزها أي شي...كانت في هالشي نسخه مصوره من ليلى..

سارت المطبخ وحطت له شاي واشياء خفيفه للريوق وهي ماره بالصاله شافتها ام احمد وابتسمت..وسارت حجرتهم وام احمد تقول في خاطرها..
"يالله تصلح من بينهم"

دخلت سلامه وحطت لريلها الريوق على الارض عقب ما فرشت له..وهي تصب له الشاي..

سلامه: تعال اتريق..

نش احمد ويلس قريب منها بس ما كلمها...وقرب يتريق وهي تمت صاخه..

"ما يبا يرمسني والله..انا ماحب جي..شو هاه مابغيه يزعل مني هو الوحيد اللي اروم اسولف وياه في البيت ماباه يزعل والله"

احمد: ليش ما تتريقين؟

سلامه: ماريد اكل شي..

احمد: انتي تريقتي؟

سلامه: لا والله..

احمد: يالله قربي..(ويمد لها كوب الشاي الوحيد في الصينيه)

سلامه: مابغيه والله اشربه انته..لو ابغي بنش اسوي لي..

احمد وهو ما يطالعها: اشربي منه شوي..ولاّ تجزين...؟

سلامه في خاطرها" يا ثقل دمك": لا شو هالرمسه تعرف انك غير..

احمد مب مهتم: اوكي..

انقهرت من بروده...بس تمت ساكته..

احمد: امي وين؟

سلامه بضيج: في الصاله..وفاطمه وياها..تبى تسير لهم؟

احمد: هيه اكيد..اهلي هذيل ما يغنيني عنهم شي...

سلامه خلاص طفح الكيل عندها: زين شو سويت لك عشان ترمسني جي؟ ترا والله ماحب..!!!

احمد: ماسويتي شي ..

ونش بيغسل ايدينه...

سلامه: اليوم بتطلع مكان؟

احمد: هيه ليش؟

سلامه : وين بتروح؟

احمد: العين..

سلامه: كم مره لازم تسير العين امس واليوم..انا ماحب اقعد بروحي استحي ايلس ويا عمتي وفاطمه..لا تروح اباك تقعد وياي..

احمد متشقق بس ما يبغي يبين: لاء مباراة العين اليوم ماقدر افوتها...

سلامه: منو اهم انا ولا العين؟ ترا ماشي فرق ايلس شجعهم من تلفزيون الصاله..

احمد: فرق كبير لازم الحضور...

سلامه: خلاص بدربك وانت ساير العين وصلني بيت يدتي...!!!

"لاء...لاء..كل شي ولا بيت اهلها..اخ منها...يالله..الحين انا وني بتغلى..وهي ياتني علىالعوق..ماريد اوديها..ماروم استغني عنها..ماقدر اخليها تسير اخاف تبات عندهم...شو اسوي بها الحين"

سلامه: شفيك صخيت..ما تبغي توديني..؟

احمد: لاء اليوم ما بتسيرين...

سلامه: ليش.؟

احمد: ماقدر اخليج تروحين ماحب ايلس بروحي..

سلامه متشققه بس تكابر: تراك في العين ما بتيلس بروحك حواليك ملايين الناس يعني وين بتحس بالفراغ..

احمد: لاء غير فرق وايد عود...

سلامه تيره بالرمسه تباه يقول ماصبر عنج: كيف فرق عود..؟

احمد حس بخبثها: يعني ماعرفهم وانتي اعرفج...

سلامه انقهرت تحرته بيقول ما يسوونج كلهم ...

سلامه: اها جي يعني..لا الله يخليك ودني بيت يدتي ابا اسلم عليهم وابات عندهم كم يوم..

احمد كل شي عنده ولا سالفة المبيت في بيت اهلها ما يروم ثانيه يخليها حتى ربعه قاموا يزقرونه الديايه من كثر ما يتعلث بالرقاد من وقت وهو اصلا يبغي يرد عشان ييلس وياها ومهما يلس ما يشبع من مشاهدها واغلب المرات ترقد وهو يسولف من كثر ما يتعبها بالسهر...

احمد: لا سلامتج ماشي مبيت في بيت يدتج..انتي الحين حرمه والزم ما عليج بيتج...

سلامه: لا والله انا ابغي اروح ما يخصني...ولاّ تشلني وياك المباراه...

احمد: بتبطين تترييني اوديج الاستاد...لو استخفيت ومشيت حافي ما شليتج للمباراه..واللي اعرفه ان عايلتكم كلها وحداويه حتى اختي المرحومه شجعت الوحده وياكم...كيف بتروحين تشجعين العين وانتي عنابيه!!!

سلامه بفخر: فديتني انا اصلا دمي عنابي..ما يتغير ابد..بس بسير اغير جو...

احمد: تشجعين اللي ريلج يبغي تفهمين...

سلامه: شو هالديكتاتوريه؟ ماريد...القلب وما يهوى..!!!

احمد: بسوي لج غسيل دم وبحوله عيناوي..فاهمه؟

سلامه: بتبطي وانت تبغي تغيره...لو اموت يتم العنابي روحي...

احمد: شو هالولاء الخرافي..؟

سلامه مبتسمه انه يسولف وياها ونسى الزعل بس هي غبيه ذكرته: الله تسولف وياي يعني مب زعلان؟

احمد تذكر توه وغير ملامحه ونه ما يكلمها: انا بسير لامي..رتبي الحجره..

سلامه نشت ومسكت ايده: احمد اسفه اذا زعلتك مب قصدي بس وعد ما بييب طاري اهلي مره ثانيه ولا بحطك في موقف مقارنه.. بس انت لا تتضايق تراني والله ماصبر عنك..اذا زعلت دقيقه احسبها دهر فمابالك تزعل مني وما تبغي ترمسني الا من ورا خاطرك..الله يخليك احمد لا تحرمني من اغلى شي بحياتي...

احمد تفجج وابتسم من قلبه..

سلامه: اذا انت ندمت انك خذتني تراني ما كنت ابيك لا تصدق عمرك اني كنت ميته عليك بس اهلي غصبوني...

نقع احمد ضحك ويرها صوبه...

احمد يضحك: الحين انتي تراضيني ولا تغايضيني...؟


سلامه مبتسمه: الاثنين...يعني اعتذر عن غلطتي واخبرك اني ما كنت اباك بس الحين والله ماقدر اصبر عنك...

احمد: انا كنت اباج ولازلت وبتم وكنت اعتبر خطبتي لج اكبر مغامره في حياتي..بس الحمدلله رسيت على البر..

سلامه وهي تدفن ويهها في حضنه: احبــك....


في ميلس البيت العود كانوا كلهم متيمعين كبار العائله وياها...الكل ما كان راضي على الوضع ولا عايبنهم اللي يصير..اتصلوا به مليون مره بس مايرد عليهم...كان عبدالله رغم حنيته الشديده مب متعاطف وياها ابد ويحس التقصير منها هي ولا ريلها ما يعيبه شي...

خليفه: انتي مب من حقج تتدخلين في خصوصياته..هذا ريال مب ربيعتج تسوين شي من وراه..

عبدالله: الريال ما يداني الحرمه اللي تتعدى خصوصياته..وانتي لو صبرتي شوي يمكن انه بس يبغي يغيضج...ولا ما بيعرس..

سلمى بقهر: شو ما بيعرس والفله اللي في الممزر لمنو؟ بتقولون لي انا..؟ ما بصدق تونا بانين فلتنا ما صار لنا ثمان سنين...من وين هالكرم اللي حل عليه يبني لنا وحده يديده..

بو خليفه محرج: يعرس ما يعرس انتي شعليج...الشرع محلل اربع ولو حط عليج ثلاث تسكتين..من حقه يسوي اللي يبغيه..هو ريال وانتي حرمه ورايه يسد عن رايج.؟ من قالج تتعبثين بتلفونه؟

سلمى: ابويه انت الحين واقف وياه ضدي.؟

بو خليفه: هيه نعم!!! انا واقف مع الحق..والحق للريال...ريلج قربنا به لانه ما يعيبه شي والعرس يصلب الريال تتحريني بصدق انه يغازل.؟ وان غازل انتي شعليج الزم ما عليج بيتج وعيالج..

خليفه: حمدي ربج انه وافق تشتغلين لو غيره بيخليج في البيت بس من طيب اصله اشتغلتي...

عبدالله يتنهد: ليش ما رمستيه بينكم بالتفاهم....؟

سلمى بتصيح: ما شي خلاص انتهى من بينا التفاهم...

بو خليفه: الا انتي اللي ما عندج سنه تقابلين ريلج وتحطين راسج براسه..انتي حرمه وقدرج اقل من قدره المفروض يضربج الكف على ويهج وتعطينه الخد الثاني..

سلمى تصيح: الحين انا يايه استجير بكم وانتوا واقفين ضدي..عبدالله ارمس..

عبدالله: اسمحيلي يا سلمى والله الطلاق مب شي هين..والناس بتاكل ويووهنا طلقها بالثلاث مره وحده اكيد مسويه شي...!!!

بو خليفه: سود الله ويهج الحين الناس ما بتحصل شي ترمس فيه الا احنا والسبه انتي...

خليفه: بتمين هني ولا بتاخذين نص البيت منه.؟

سلمى: بتم هني شو ابى به بيته ماريد ارد في بقعه هو فيها...

خليفه: اوكي بس حبيت اقولج سواء يلستي هني ولا هناك..ماشي سواقه وماشي شغل ولا طلعات حتى تلفونج قطعيه او انا بقطعه احسن...واذا بتمين هني حطي هالشي ببالج..واذا رحتي هناك لا تتحرين الحريه بتكون اكثر...لاني بطرش ذياب صوبج...

سلمى حست بغصه وظلم وتعب..وسكتت..

بو خليفه: اقولج تمي هني ماشي سيره دبي...وعيالج بنشوف امر المحكمه فيهم...خلاص نشي داخل...

سلمى طلعت وهي تجر اذيال الالم والتعاسه...تجر حزن اغلب الظلم اللي ينحط على راس المطلقات وكأن الطلاق ما تكون سببه الا الحريم..طلعت وهي تتمنى الموت قبل أي شي يصير ويقلب عليها حياتها...

وفي الميلس...

بو خليفه: بتسير يا عبدالله تتابع المحكمه في دبي...ما روم اسير انا هناك...

عبدالله: ان شاء الله..

خليفه: يالله ما نصدق نطلع من بلوه تيينا وحده ثانيه...

عبدالله: مب جنه قسينا عليها وخذناها بشراع وميداف...؟

خليفه:يا عبدالله الحرمه ما تنعطى سنعها ولا بتضيع جبيله كامله...وما يحتاي افهمك اكثر...

عبدالله سكت..

بو خليفه:من طول لسانها عافها الريال...

خليفه: محد في خواتي جي ملسونه شراتها الا حصه النكديه...

عبدالله يضحك: ليتها تسمعك..

خليفه: لا دخيلك لو تفج لسانها شو اللي بيفججني منها...؟

بو خليفه: الحين حصه تحسبون لها الف حساب؟ اسميكم رياييل صدق...

عبدالله: حصه لسانها ما ينرام له...الله يعين من بيبتلي بها..

بو خليفه يتعكز بينش: محد يبغيها لسانها مخلنها تخيس ببيت ابوها ولا محد من بنات عربنا يالسه للحين على جبود هلها...

خليفه: البيوت ممزوره يا بويه من البنات بس كل بيت باسراره..

عبدالله: والله لو تسمعكم لتجلب البيت فوق حدر...

بو خليفه: خلني اشوفها وبقولها...

خليفه: زين زيد الحطب ع النار ترانا قاصرين ويع راس..

بو خليفه: انا شرات بناتي سمر وشمسه ونوره ما يبت وغيرهن الا ملاسين ما يرومون لهن الرياييل ...

خليفه: منو الرياييل؟

بو خليفه: منو بعد؟ انتوا اكيد..

عبدالله يهمس: زين انه اعترف برجولتنا شككني الشيبه..

يضحك خليفه ويطلعون من الميلس وبوهم يسير صوب زرعه وخليفه سار بيته وعبدالله رد عند امه..
.......................



اليوم الفير الساعه 6:30 حست بنشاط مب طبيعي وعلى غير العاده نشت ونزلت تحت وحست ببروده غريبه في البيت وبطلت جامات الصاله وشافت سرب طيور واقف على سور البيت وياها نود بارد رطب خدودها الخجلى من الصبح..وابتسمت ابتسامة رضا..وطلعت تتسبح وتجهز عمرها لين ما تمر عليها حصه..مر عليها للحين شهرين وثلاث اسابيع من يوم اجزت..عمر وفتره طويله تحس انها بترد للشغل بقابليه اكثر ونفس متفتحه اكثر...
" بس شو اللي بيصبرني ارتاح في حضوره"

كان وجود ناصر وياها بنفس البقعه هاجس ما خاز عنها...مر الوقت بسرعه وان تلفونها يرن وهي تسحي شعرها..

حصه: صباح الكسل والخمول واللهفه على الرقاد..

ليلى تضحك: خيبه ما عفنتي شهرين ونص وانتي راقده...؟

حصه: مابغي اداوم والله شو رايج ارد البيت..

ليلى: ليش انتي وين الحين؟

حصه: مجابل باب بيتكم المصون...

ليلى: وييه بعدني ما خلصت يبالي ساعه لين ما اربط شعري...

حصه: بنزل اشرب لي شاي عندكم..

ليلى: حيبج انزلي امي في الصاله...

وبندت حصه عن ليلى وهي تمت تتلبس وتخلص نفسها لين ما تنزل الصاله...ولين ما لبست وتحجبت ورفعت شعرها طلعت بثقه وبشحنة امل كبيره ان اللي ياي اجمل من اللي راح...هذي ليلى مستحيل يعرف لها اليأس طريق..وعمرها صدمات الحياه ما زادتها الا قوه ولا اثرت فيها الا لحظتها..عاشت المر وجربته وقاست الظروف الوان بس في الاخير تتم صلبه وقويه وثقتها في نفسها هي منبع سعادتها رغم النظره الحزينه في عيونها...

ليلى: السلام عليكم

حصه نشت بتسلم: مرحبا وعليكم السلام...

ليلى: مرحبا الساع البيت منور...

حصه مستحيه: منور بأهله...

ليلى تطالعها بخبث: يا شين اللي يمثلون .!!!

ام راشد: وييه فديتها بنت عايشه تكبر وتحلى الله يحفظج بسم الرحمن يصونج يا بنتي...

حصه تشققت شوي ويغمى عليها..

ليلى بنقمه: احلوّت...!!! امايه انتي كبرتي وتحتايين نظاره...شو من حلى في هالخسفه...؟

حصه: يالله يالغيره شو تسوي ثرها مب سهله..

ام راشد تضحك...

حصه: يالله تأخرنا وايد نشي..

ليلى تحب راس امها: ادعيلنا فديتج...

ام راشد: الله يوفقكن ويستر عليكن ويغنيكن بحلاله عن حرامه...

حصه تحبها على راسها: يعلنيه ما خلى من هالويه...

وطلعن البنات سايرات الدوام...وفي السياره..

ليلى: فديت شويخ بتوله عليها...

حصه: من كثر ما بنطول؟ الا هي للساعه ثنتين ما ترومين تصبرين.؟

ليلى: فديتها لاء..ماروم اصبر..اسكتي اذتني وكلت فوادي خلاص..الله فتح عليها وقدرت تنطق حرف الشين ما عاد تقول ثاء...بس اذتنا اذيه..

حصه تضحك: ليش شو صار؟

ليلى: تنبش لاي كلمه فيها حرف شين ومن تسمع حد يقول شي به هالحرف تم تعيد وراه وتشد عليه...يختي لوعتنا..

حصه: فديتها والله اشتقت اعضها...

ليلى: حصه تتوقعين تغير شي في الدوام؟

حصه: مثل شو؟

ليلى: أي شي تتوقعين الشركه نفس ما هي ولا غيروا وعدلوا ونظموا وتفلسفوا؟

حصه: مادري؟ الا مشاعل ما تدق لج؟تلفونها مغلق يعني انها في البلاد..

ليلى: هيه تتصل بي بين فتره وفتره تقول شغل اخوها ارف تبغي ترد صوبنا...

حصه: صدق والله؟

ليلى: هيه بس ما ظني يقبلونها عندنا...

حصه: ليش حليلها والله خدومه..

ليلى: مادري يالله انزلي وصلنا...

ونزلن البنات صوب الدوام وليلى تابعت الباركنات اللي على طرف وما شافت سيارة ناصر وارتاحت وايد انه للحين ما وصل...اول ما طلعن كان الممر اللي فوق مشتل بريحة البخور ومبين ان هاه شغل بنات مب رياييل...

حصه: يا سلام شو هالاستقبال الحافل...!!!

ليلى: نزلي النظاره ماشي شمس هني..

حصه: لاء خليني جي...

ليلى: الريحه تجنن طالعه من مكتب مشاعل..اكيد ردت...

وسارن بسرعه ونهن بيسون لها مفاجأه عشان تستانس ومثل المخبل طالعن المكتب...

حصه وليلى يوايجن برووسهن من الباب وبصوت عالي: مشاااااعل..ردينا...

بس يمدحونها الفشله...وحرقة الويه...وان روضه تنش من مكتبها مستغربه من وين هبن عليها هذيل...وليلى وحصه كل وحده يلست تيمع ويهها عقب الموقف المحترم اللي من الصبح صار وياهن...

ليلى: مرحبا الشيخه ..

روضه طالعتها من فوق لتحت: منو انتي؟

حصه ردت لها النظره بالمثل: انتي اللي منو.؟

روضه: عافدات الشركه شرات المخبل وتسألن الموظفات منو ومنو...انتن اللي منو؟

حصه: اييه احترمي نفسج...

ليلى: نحن موظفات هني توها خلصت اجازتنا...ويينا نداوم...

روضه طالعتهن بغرور: اها اوكي خلاص روحن مكاتبكن...

انقهرت حصه وليلى بغت تين من القهر...

حصه بقهر: وانتي منو؟

روضه: موظفه هني...

ليلى: متى عينوج؟

روضه: تحقيق هو؟ انا ياييه اداوم مب اضيع وقتي في السوالف...

خلاص حصه شوي وتفصخ نعالها وتكفخها فيه..وطلعن البنات ووصلن مكتبهن...وهني ليلى ما قدرت تمسك نفسها وانفجرت ضحك..

ليلى تضحك: شكلنا غلط والله...اونه نحن مخبل...!!!

حصه: ريلها المخبول...حشا شو بقت ما حطته بويهها يا ساتر!!!

ليلى: حليلها تلاقينها تبا تبرز جمالها وايدين في الشركه يتخبلون على البنات..

حصه تطالعها بطرف عينها: شو قصدج؟

ليلى مبتسمه: ماشي...

ويلست ليلى على مكتبها وحصه سارت مكانها...

حصه: شفتي كيف رافعه شعرها وين تبا هذي؟

ليلى: كيلو ميك اب حاطه..مالومهم الشباب لو طفشوا من بنات البلاد..

حصه: طال عمرج اصابع ايدينج مب سوا...

ليلى: بس هم ياخذون بالظاهر...حليلها كم تتم عند المنظره الصبح..انا بس اسحي شعري وانش ست الفير...عيل اكيد هي من ثلاث تعابل فيه..

حصه ميته ضحك...

ليلى: بس تبين الصدق ملامحها وايد حلوه...

حصه: وايد تصدقين ما شفت احلى عنها الا بشكارتنا...

ليلى تضحك: استغفر الله انا ما قلت شي يالله يالحش والنميمه اللي ما تيوزين عنها من الصبح...

حصه: ما شاء الله انتي البريئه اللي ما تسوين شي...تقتلين القتيل وتمشين في جنازته...

ليلى: فديتني طيبه...

حصه: وايد..

ليلى: خلاص قولي وراي كفارة المجلس سبحانك ربي لا اله الا انت اني كنت من الظالمين..

وعادتها حصه وراها...وهن يسولفن اللي ما يعرفنه ان في حد كان واقف برا يسمعهن وهن يسولفن...قلبه مقبوض ونبضه يتسارع..

"يالله فديت هالصوت كم يسوى...!!!..لو ما كلمتني مباشره يسدني اسمعه وهالضحكه....يا قلبي على الضحكه...ترد الروح وتشفي الجروح...يالله رجيتك لا تحرمني منها.."

وطاف عنهن وطلع فوق...ناصر قبل يسير مكتبه خذ له جرعة حب من صوت ليلى الدافي اللي حرك الشوق بأوصاله...يدري حبل الود انقطع بس الحب عمره ما يموت...وان مرت عليه الظروف بيقل بس عمره ما يموت...ولا الف خيانه تفنيه...

حصه: تصدقين في حد كان هني...

ليلى: منو ما شفت حد..

حصه: تراج معطيه الباب ينبج ما بتشوفين بس انا لمحت حد خاطف...

ليلى: من بيكون يعني.؟

حصه: لابس كندوره سودا وسفره بيضا...متعصب مب لابس عقال..

ليلى مبتسمه: يالله شو هالكشخه..!!!!

حصه: عريض شوي....

ليلى: يالله متى بيوون الموظفين..خاطري اسلم على اليميع..

حصه برقه فضيعه: اكثر حد تولهت عليه...تتوقعين منو؟

ليلى: من غيره حبيب الغفله حمد..

حصه بنعومه: لاء..

ليلى: حبيب..

حصه بطرف عينها: حبج برص انتي وياه..

ليلى: عيل منو؟

حصه بدلع: اكل الكانتين...

ليلى تضحك: انتي شفيج مستخفه اليوم؟

حصه: مستانسه بس عكرت مزاجي السيده مهرجان...

ليلى: ماشاء الله سميتيها..؟

حصه: هيه وبطرش لحكومة دبي صورتها عشان يحطونها في اعلان عن مهرجان التسوق في دبي ولا مفاجأت الصيف..


ليلى: ردينا للحش...

حصه: بس لا تسوين نفسج شريفة مكه بس بس الله يخليج..

شوي الا وباب المكتب يدق...

تحجبن بسرعه بس ما رمسن لين ما دخلن شعرهن وكانن اوكي..

ليلى: تفضل..

حمد: مرحبا الساع السلام عليكم...

طاح قلبها...ثواني ويغمى عليها..

حصه+ليلى: وعليكم السلام ورحمة الله وبركاته...

حمد يتمصخر: جلوس..

حصه ما فهمت: جلوس وين؟

حمد طنشها: شحالكم شو مسووين ان شاء الله الاجازه بتفيد فيكن وبتردن افضل عن قبل..

ليلى مبتسمه: ان شاء الله...خل ثقتك فينا كبيره..

حصه: يايين بجرعة نشاط اكبر...

حمد: الله يوفقكم يميع...بس لا تنسن عندنا موظفه يديده اسمها روضه بدل مشاعل علمنها وضبطن امور الشغل وياها...

حصه انقهرت بس ما ردت..

ليلى: ان شاء الله بس اقول مب جنها شوي .............(وسكتت)

حمد مبتسم: نحن ما يخصنا في اسلوبها او طريقة تعاملها اهم ما علينا والزمه انظباطها في دوامها..

حصه بغت تين وحست من اسلوبه في الرمسه انها فاهم هالبنت من كثر ما يلس وياها..

حمد: يالله من رخصتكم الحين لا تنسن توصلن اوراقكن لناصر عسب يوقع على اقرار العوده للعمل...

ليلى تبلع ريجها: ان شاء الله..

[البدوي الحبوب]

ونزلت راسها تشوف اوراقها...وحمد طالع صوب حصه اللي يت عينها في عينه..وعطته نظره خلته يكره حياته..وانقهر صدق منها..نظره تقوله فيها بشكل غير مباشر انت ولا شي...

طلع حمد وهو صدق هالمره متحلف يعلمها الادب ويرد لها الصاع صاعين..عشان تعرف كيف تطالعه وتعرف انها تطالع حمد ..هيه حمد..!!! مب أي حد ثاني تقدر تعطيه النظره الدونيه...

وفي المكتب..

ليلى: روضه...اسمها روضه وايد غاوي..

حصه منقهره: شو اسوي لج..؟

ليلى تضحك: بدينا من اول يوم...طنشي يا بوج العمر مره ما ينعاد...

حصه بقهر: شفتي كيف يرمس عنها وجنه يعرفها من مليون سنه..وفاهم اطباعها...

ليلى: اوكي هذوه فاهم اطباعي مب يعني انه يحبني..هذي مجرد تعامل مع الناس في محيط العمل وفهم اطباعهم..

حصه: بس بس بلا فلسفه...

ليلى: تعالي بنروح لها..

حصه: تولي والله ماسير ...

وقبل تنطق ليلى كان تلفون المكتب يدق..

ليلى: مرحبا...

روضه بدون نفس: مرحبتين...اختي ممكن اييكن المكتب؟

ليلى: منو انتي؟

روضه: روضه...

ليلى: حيبج تعالي والله انا وحصه نقول الحين بنسير صوبج..

روضه: ماله داعي انا ياييتنكم...

حصه تنش: انا بطلع...ما يخصني فيكم..

ليلى: شو هالحركات البايخه تمي عن الخبال البنت يايه يمكن تبغي شي...

روضه تدق الباب: السلام عليكم...

حصه وليلى: وعليكم السلام..

روضه دخلت عليهن بويه غير اللي الصبح فيه ابتسامه ورقه شوي...

اشرت بإيدها عليهن وهي تطالع ورافعه حواجبها: حصه وليلى!!!!

حصه: هيه انا حصه...

ليلى مبتسمه: وانا ليلى..كيف عرفتي؟

حصه: منو مخبرنج عنا...منو متوله علينا هالكثر بيسولف لج عنا..

ليلى تخز حصه بنظره: تفضلي يلسي اختي...

روضه تيلس: رمسني حمد وايد عنكم..

هني حصه خلاص شوي وتمسح فيها ارضية الشركه..انقهرت صدق من خاطرها وبكل بجاحه ترمس..

ليلى: ليش تعرفينه حمد؟

روضه : لا بس من الشركه هو الوحيد اللي يرمس وياي الباقين كله ساكتين..كله بصوب وهالتحفه اللي اسمه ناصر بصوب ثاني هذا صنم لا يرمس ولا يسمع بس يقول شكرا كملي شغلج او اذا في مساعده انا حاضر...

ليلى بخاطرها"ويييه فديته!!!"

حصه: وانتي شتبين بهم تتنشدين عنهم وتتبعين اخبارهم..؟

روضه : والله الواحد يعرف العرب اللي يشتغل وياهم...

ليلى: مسكين المدير والله وايد طيب ما يحب يخالط الناس الزم ما عليه شغله...

حصه في خاطرها"حليلج انتي"

روضه: من متى تشتغلن هني؟

حصه: من يوم تخرجنا قبل اربع سنوات تقريباً..

روضه فاجه ثمها: ما شاء الله معمرات في الشركه...

حصه: اصلا الشركه في الاساس شركة ابو ليلى الله يرحمه...يعني تخيلي من متى وهي تعدي بتشتغل بها...

روضه تلف على ليلى: صدق؟

ليلى مبتسمه: فيه شي من الصحه...يعني ملكنا وملك غيرنا..هي اصلا ميراث ابوي وعمتي..

حصه: وليش تشتغلين موظفه عاديه...ليش مب في الادراه...؟

حصه: ومن قالج ان نحن مب في الاداره..نحن مافي اعلى منا هني الا المدير ناصر ونائبه حمد..طبعا غير الخبير دانيال..وبعده اول اداريتيين اللي هن انا ولوليتا..هاللي جدامج..

روضه: والله؟

ليلى: هيه والله...بس ما يهم المنصب اهم شي الاخلاص في الشغل...

روضه وايد عيبتها ليلى ودخلت خاطرها بس حصه ابد ما بلعتها ولا حبتها خير شر..ما تدري ليش تحس انها تكرهها...

روضه: يالله انا بسير مكتبي اترخص عنكن الحين..

ليلى تنش: وين ما تميتي...؟

حصه: خليها يمكن عندها شغل لا تعطلين البنت..

روضه عطت حصه نظره: صدقها عندي شغل..

وطلعت روضه..

ليلى: حليلها...

حصه: حله تحل بطنج انتي وهي...

ليلى تضحك: يالله قومي وصلي اوراقج لدانيال تخبرينه انج رديتي..

حصه تبتسم: انا ما بسوي شي اليوم يالله وصلي اوراقج وتعالي بنرد البيت بصراحه اليوم ماشي شغل ...

ليلى: اوكي خلاص بوصلهن وبرد...

حصه:بتروحين لناصر؟

ليلى: هيه بسير اوصل له ورقتي وبرد...

نشت ليلى بتطلع وخذت اوراقها بتسير لناصر...كانت تمشي وهي تدندن في خاطرها عشان ما تسمح لنفسها تفكر دقيقه شو بتسوي وشو بتقول...طول الدرب والطلعه لفوق وهي مبتسمه وكأنها تشحن عمرها بالثقه عشان ما تنهار...ما تدري هل ممكن انها تضعف وتحسسه بضعفها او انها تكون قويه وتجرحه بتجاهلها...وصلت لباب مكتبه وشافت مكتب حمد مفتوح وسمعت ازعاج عنده وشكله يرمس ويرتب وما تدري شو يسوي...ما حبت تطالع او تخطف صوبه...بس كأنها لقطت شي...هيه لقطت..ومتأكده بعد...هالصوت تعرفه رغم انها تسمعه اليوم لاول مره بس ميزته..

"هذا صوت روضه..شو وداها عنده وهي قالت عندها شغل؟..ادري انه المشرف عليها بس مب من الحين تسير له..متى يا حمد تتوب عن سوالفك"

دقت باب المكتب وياها الصوت من بعيد..

ناصر:تفضل..

ليلى وقلبها يدق بسرعه بطلت الباب شوي: السلام عليكم...

رفع راسه وحط القلم على المكتب ونش وويهه مقتضب: وعليكم السلام..

شافت ناصر..كان لابس كندوره سودا ومتعصب بسفره بيضا...ما يحتاي انها تفكر شو تشوف او شو ممكن يصير بمشاعرها...للحظه حاولت فيها ما يختل توازنها...

ابتسمت ليلىمن قلبها يوم شافته: شحالك ناصر؟

ناصر وقلبه ينتفض اكثر وانفرجت اساريره عن ابتسامة صادقه افتقدها من شهور: بخير ربي يسلمج الحمدلله علىالسلامه تفضلي تفضلي..

دخلت ليلى ويلست..كانت نيتها صافيه وبالنسبه لها انتهت كل احقاد الماضي ومشاعره ومات في قلبها كل الحب وشيعت اخر بقاياها يوم ياهم فهد وزف لها خبر زواج ناصر...خلاص بينها وبين نفسها قررت تنسى وتتجاهل وتعيش حياتها بعيد عن الاوهام...يت لناصر الحين بريولها ناسيه كل شي واي شي ..ما يته غير بقلب مجروح من حبه ونفس صافيه ما عادت تكن له اكثر من مشاعر اخوه...بعدها جمرة الحب في قلبها ما انطفت صح باقي جذوة يغطيها رماد بس مايقدر ناصر ينفخه عشان يعيد لهيبه...خلاص ماله امل...ومع الايام بتنطفي هالجمره وما بيبقى من الحب الا حب الاهل والقرابه والدم اللي يربطها به...

دقيقة صمت وهو يطالعها وهي تبتسم بس ساكته..."يالله فديت هالويه" كانت كلمه يقولها في خاطره مليون مره وهي يالسه وسار ويلس على الكنبه اللي جدامها...

ليلى: شخبارك؟

ناصر: بخير والله نشكر الله على كل حال...

ليلى تمد يدها للطاوله: يبت اوراقي عشان توقعهن اقرار عوده ..

ابتسم ناصر وخذ الاوراق: زين مشكوره ما يحتاي تتعبين عمرج اصلا انا كتبت لج اقرار العوده وحطيته بملفج بنفسي...

ليلى مبتسمه: والله؟

ناصر: هيه والله..

ليلى: كيف عرفت اني ييت؟

ناصر: الصبح خطفت حذال مكتبكن وانتن تسولفن عن مادري شو..بس اظني ترمسن عن كفارة المجلس...

ليلى: يعني انته؟ صح كلام حصه قالت لي ان في حد خطف...

وتذكرت الكندوره السودا...

وسكتوا شوي....

ليلى تنش: الحين انا بسير المكتب..تامرني بشي؟

ناصر نش: وين بعده وقت...

ليلى مبتسمه: مره ثانيه بيلس وياك الحين لازم اسير مكتبي مب من اول يوم اهمال...

ناصر كان بيقول شي بس سكت..

ليلى وبعد الابتسامه ما فارقت ويهها: هيه حبيت اكون اول موظفه تقولك مبروك...

انقبضت ملامح ناصر: من قلبج؟

ليلى من خاطرها: والله من خاطري...(وتبتسم) شو تتحراني شريره بدعي عليك...(وبنبره راضيه بالواقع) تراني ما احب اعارض الاقدار وبالاخير تتم ولد عمتي ما تهون علي لو هنت عليك...واحنا ما قدرنا نرتب اوراقنا في وقتها ويمكن ضيعنا فرص وايده...

ناصر سكت وحس عمره صغير وايد جدام احساس ليلى الصادق وكلامها المنطقي...

ليلى: ما عليه يا ناصر الله يعوضك باللي احسن مني (وتبتسم وهي تضغط على عمرها) موفق ان شاء الله..

ناصر ما قدر ينطق بحرف...

ليلى: قوي قلبك مفروض انت تواسيني مب انا اواسيك..يالله يا معرس خلك متفاءل...

ناصر يتنهد: ماعرف شو اقول..

ليلى تتهرب من دمعه لا تخونها بس بعدها مبتسمه: ناصر يالله انا بسير مكتبي وايد تأخرت...

وطلعت ليلى وهو تم واقف حتى ما قدر يمنعها لا تسير...

"ليش يا ربي؟ من يهدم فينا الامل ويقضي على الاحلام..من يحطم القلوب ومن يحرم الناس من بعضها...معقوله الماده تفني المشاعر...من يقتل الاحساس ومن يعدم الحب ويقضي على المشاعر..."

تنهد ناصر من قلبه ورد لمكتبه...ما يعرف كيف نفسه تضعف ويخسر اغلى انسانه عرفها بحياته..ما يعرف كيف للحين وهو قادر يفرط في شخصيه نادرا ما تكون موجوده بالدنيا..ونادرا ما تكون انسانه بهالزمن تحمل مشاعر ليلى وتكون برهف احساسها...


خانته انسانيته وقوته وما قدر يرفض...باقي يوم واحد ويزفونه جسد خالي من الروح..روح خذتها ليلى قبل 13 سنه وما ردتها ولا بتردها...بيزفونه انسان قلبه عمره ما كان ملكه من يوم ميز الاشياء في الدنيا...هذي هي الدنيا تغير مسارها في اخر اللحظات والخسران الوحيد من معادلتها هو الضعيف بس..
اما ليلى طلعت من مكتبه وهي راضيه كل الرضا عن نفسها...ما تعتبر اللي صار امتهان لكرامتها ولا تعتبره تقليل من شأنها...كل اللي صار كان تصفية للنفوس..وقلب ملفات الماضي واغلاقها بالشمع الاحمر عشان بالمره ما تنفتح ...

قررت ليلى تنهي قصة حب دامت اكثر من 13 عام بنهايه وايد واقعيه ابعد منها للمأساه اقرب منها للامل...صح النهايه تعيسه بس مب بقدر ما كانت جميله...مافي اجمل من ان الفراق يي بين اثنين وينهون اللي بينهم بنيه صافيه واحساس اجمل..صح في جروح بس مصيرها تندمل مهما طالت الايام...

النهايه مب سعيده لكنها جميله لكل الطرفين...والسبب انسانه تعيش بكتله هائله من المشاعر في داخلها..انسانه الحب يستمد قوته وعنفوانه منها...ليلى ما كانت بحاجه لشي كثر ما انها تبين لناصر انها تحمل في حياتها قلب يسامح اكثر مما يحب...ما كانت ناويه ترمسه اليوم وما كانت ناويه لاي شي دخلت بعفويه وتصرفها كان عفوي من شافته بس والله انها راضيه عن نفسها اشد الرضا ومافي شي يضاهي جمال الروح حتى الحب نفسه...

واحلى شي الكلام اللي يطلع على طول من القلب ومب بحاجة لايام عشان تتعود النفس على القاءه

يوم اذن المغرب نزلت الصاله عقب ما نشت من الرقاد...ولقت امها وخلود وحمدان يالسين يسولفون مع مطر وهزاع وفهد عيال عايشه..

ولمحت عايشه بينهم ونزلت مبتسمه وسارت تسلم عليهم...

ليلى: من وين طالعه الشمس اليوم؟

عايشه: يا حبج للمغايض والتنغيز...

فهد(اصغر واحد):امايه مثلج..

ضحكت ليلى: فديتك انا الحمدلله شهد شاهد من اهلها..

ام راشد: تعالي يلسي هني عندي..

وسارت ليلى بدلع ويلست عند امها..

عايشه: هالبنت ما تكبر عوفه عوذ بالله ماخذه دلعنا من يوم نحن صغار...

هزاع: امايه انتي كبيره شتبين بالدلع؟

مطر: هيه يوم انا اتغيض بسبة هالياهل اللي عندج تقولين لي انت كبير ما تتدلع خل البزا لليهال.. وهذي انتي تجابلين خالتي ليلى عشان يدوه تدلعها..

عايشه: وابويه عليكم انا...انا امكم مسرع تبريتوا مني كل واحد خذني بشراع وميداف...

ام راشد: مب منهم منج انتي اللي ما تنشدين عنهم..

فهد يلوي على امه: فديت امي محد يسواها...اطيب ام في العالم..

ليلى: اييه اطيب ام عيل وين راحت امي؟

حمدان يضحك: والله انكم يهال..

ليلى طالعته بنقمه: ارجوك يالشيبه اسكت..

خلود: فهد انت ياهل ما عليه تتدلع بس مطر وهزاع رياييل ما يبونه الدلع..

مطر: شدراج يا خالتي اننا ما نباه...هالدلع فيه وايد منافع نحن بحايتها...مثل تسهيلات الدخول والخروج..واشياء وايد ماديه..

يضحك هزاع...

ليلى: مخبثكم يالاثنين..متفقين في كل شي..

فهد: لازم بعد كلهم ضدي...

حمدان نش: يالله انا اترخص عنكم الحين..

ليلى: وين ان شاء الله..؟

حمدان: المباراه...

ليلى: أي مباراه...؟

حمدان: وتسمين ولاءج اعمى للعنابي..؟ يوم ما تعرفين عنه شي لا تشجعينه...

ليلى: حليلك انت..اليوم مباراة العين مب الوحده..

فهد وهزاع ومطر يطالعون امهم: امايه انتي شو قلتي؟

عايشه تعض على شفايفها وتتوعد ليلى: منو قالكم مباراة العين اليوم..ليلى بنت ما تعرف شي..اليوم مباراة الوحده..

ليلى تضحك: ليش شو السالفه؟

فهد: امي قالت لنا بنسير بيت يدتكم في بوظبي قلنا لها بنشوف مباراة العين بس قالت انها تأجلت واليوم مباراة الوحده..

هزاع: لو صدق اليوم العين بيلعب والله بروح عنكم...

ام راشد: مسود الويه..الحين يدتك اهم ولا هالكوره اللي بيتمون يفرفرونها بريولهم...

استحى هزاع..وحمدان طلع وهو يضحك عليهم..اصلا كان رايح عند ربعه لان اليوم صدق مباراة العين وفي العين بعد بس كان يبغي يشوف ردة فعل ليلى يوم بتتناقر ويا عيال عايشه....وهو طالع شاف ابوه داخل البيت فتجنبه شوي..

راشد: حمدان..

حمدان "لا اله الا الله": لبـــيه!!!

راشد: حد عرب داخل؟

حمدان: بس عماتي ويدتي وامي..

راشد: عايشه عندكم؟

حمدان: هيه..

راشد: من وين طالعه الشمس اليوم؟

وقرب حمدان ووايه ابوه وطلع وراشد دخل الصاله وكلهم نشوا يسلمون عليه...

راشد: مرحبا الساع بالعيناويه كلهم...

هزاع ومطر وفهد: حيالله خالنا العنابي...

راشد يضحك: الله يحييكم..

ويلسوا يسولفون شوي...وكانت لمه ولا اروع مع ان راشد وليلى مب متعودين ييلسون ويا عيال عايشه لانهم نادرا ما يوون بوظبي...صح صغار بس سوالفهم تجنن خصوصا يوم يتفقون مطر وهزاع ضد فهد...وكلهم اعمارهم ما تعدت ال 12 سنه...

خلود: الا وين شيخه..؟

ليلى: خليتها فوق تلبسها البشكاره وييت بسلم على امي ما شفتها من الصبح...

فهد: كبرت ولا بعدها صغيره؟

ليلى: ليش انت متى اخر مره شايفنها...؟

فهد: ماذكر بس اعتقد بعد عيد الفطر...

راشد: والعثره!!!!

ام راشد تطالع عايشه بنقمه...

عايشه: ما يخصني يا امايه هم ما يطيعون ييون بوظبي..شسوي بهم.؟

ليلى: كبرت وايد واحلوت بعد...بس اقولك تراها ما تداني الاولاد بس تحب الشباب الكبار شرات عمها راشد ومبارك وبس..لكن يهال مثلك ما تحب..

هزاع: والله هزأته...!!

مطر: قالوا له ياهل بالويه تستاهل والله..

فهد يطالعهم: امي شوفيهم..

ليلى: يالبزا اللي فيك...!!!

شيخه تزاعج: امي...!!!

عايشه: وصل الونّان...

ونش فهد حذال الدري يبغي يشوفها: الله غاويه هالبنت...

ليلى تطالعه بطرف عينها: اذلف عند امك...ما عندنا بنات للعرس...

فهد: من زينها عاد...درام متحرك...

كلهم ضحكوا في الصاله..

ليلى: اشوفك ميت عليها...

ونزلت شيخه ومشت عدال ليلى ويلست وياهم...

ليلى تدزها بشوي شوي من جتفها: روحي سلمي على عمتج عايشه..روحي حبيها وتعالي...

شيخه: اول ددوه...

عايشه: يالله على المذهب...!!!

وسارت تحب يدتها وردت عند ليلى...

ليلى: الحين سيري سلمي على عمج راشد وحبيه...وراويه فستانج...

وسارت شيخه مستحيه صوب راشد ووقفت بس ما سلمت عليه ولفت بخدها تباه يحبها هو..

راشد يشلها ويضحك وهي يالسه على ريوله: منو هالغاويه ؟

شيخه بدلع فضيع: انـــا...

عايشه: وتقولين فهد مبزاي..؟

ليلى: هذي بنت وبعدين حرام عليكم عمرها ثلاث سنين وفهد عمره 8 سنين فرق كبير...

ام راشد: من وين يبتي سنه زياده..عمرها سنتين بس..

ليلى: فديتج يمه قبل اسبوع كملت ثلاث سنين...

عايشه: وليش ما سويتوا حفله..؟

ليلى: شو هالخرابيط والبدع...؟

عايشه: وما يبتي لها شي؟

ليلى: امبلى ودتيها الجمعيه وتويز ار اص ما خليت بها بقعه...

نزلت شيخه من فوق راشد وسارت عند عايشه..ويلست تعضضها وتحببها..صدق كانت شيخه تخبل مسحيه الشغاله شعرها ومسويه لها فراشه صغيره ورديه على طرف شعرها..ولابسه فستان خفيف وردي قصير..ولما تضحك يذوب كل اللي في الميلس..

هزاع يمد ايديه: امي عطيني اياها شوي؟

وشلتها عايشه وناولتها هزاع اللي يلسها فوق وهي ما رمست..عايبنها ان الكل معجب ويطالع فيها...

مطر: وين ضروسج منو ماكلنهن.؟

شيخه: الوحششششش...

نقع هزاع ضحك...ومطر بغى يموت حذاله من كثر ما هم فاطسين ضحك...

فهد: شو قالت؟

ليلى تغايضه: ما يخصك انت.تفهم..؟

ابتسمت شيخه وضحكت وياهم رغم انها مب فاهمه شي...

مطر: جنها لعبه صح؟

هزاع: غمازاتها تجنن...

فهد: تشبه العرايس اللي في السوق..خالتي ليلى خليها ترمس..

ليلى نشت تيلس عندهم: شيخه غني لهم..

شيخه: لاء..

ليلى: اتطورنا ما شي ماليد..اونه لاء..يالله غني عشان يسمعون هذيك الاغنيه الحلوه..يالله حياتي غنيها...

كانوا يالسين مستمتعين بيلستهم والكبار على ينب يسولفون..وليلى يالسه ويا عيال اختها وشيخه..

مطر: غني وبعطيج حلاوه..

هزاع: يالله غني..

فهد: هي شو حافظه؟

ليلى: مادري بها تخبرها وهي بتغني لك...

هزاع: حد يغني ويغايضها عشان تغني؟

فهد يغايض شيخه عشان ترمس: انا عندي اغنيه وايد حلوه..

شيخه تدزه: لاء انا عندي وحده انا بقول اول...

ليلى: عوذ بالله من الحسد يالله قولي...

شيخه تغني:...في اشششجار دميله بنينا بيتنا.. يهبط الظلام وننام في فراشششنا..

فهد فاطس من الضحك ويصفق لها: الله شو هالابداع شو هالابداع.!!!

اما هزاع ومطر ولا واحد فيهم قادر يرمس او يبطل عيونه من الضحك حتى ان دموعهم سالت من كثر التنقيعات..

ليلى: وليش ميتين ضحك ان شاء الله..

هزاع يضحك: والله ما فهمت شي..

مطر يضحك: الحين الغابه صارت القابه..وخضراء صارت خضلاء...

فهد: هي ليش تشد على حرف الشين مرتين تقول اشجار وفراشنا...وتشدهن..

شيخه: شششششش..

ليلى: توها تعلمت تنطقه عسب جي مب مصدقه..

فهد: شواخي بعد وحده يالله غني..!!

شيخه اونها تعبت: بث بث ..كم مره..لوحي بيتكم..

ردوا يضحكون عليها وليلى تتواجع وياهم بس سوالف كانت ربشه وغيروا جوهم شوي..بس ليلى ما يلست وياهم شوي وسمعت راشد يكلمهن عن سالفة ناصر...

راشد: عزموكم امايه..بتسيرين؟

ام راشد: اكيد بعد ما يبغي لها كلام...لازم اسير..ناصر انا مربيتنه بايديه كيف ما تباني اسير عرسه..ولو يباني ازفه بزفه...

ليلى قلبها يدق بقو: صدق امايه؟

ام راشد تلف صوبها: هيه نعم!! والله بسير اذا الله عطاني عمر...عنبو هذيل اهلنا مالنا بد منهم..جان شي بخاطرهم لا يوونا بس نحن ما بنقطع فيهم..

راشد: وانتي خلود بتروحين؟

خلود: اللي تشوفه..

راشد: ما عندي مانع..وام هزاع؟

عايشه: بصراحه انا عازميني يمكن من اسبوع وعسب جي قلت ببات عندكم لين العرس..

ام راشد: هيه والله هذيل منا وفينا ونحن اولى من الغريب نبارك لهم ونفرح وياهم..

تموا يسولفون وليلى في عالم ثاني..ليش توها اليوم تقول انها صفت الخاطر...ليش تحس بالجرح للحين ينزف؟ ليش تحس بألم فضيع بصدرها...ليش تحس بكآبه وبرغبه عنيفه بالبكاء...

راشد: ليلى..

ليلى انتبهت: يا عونك!!!!

راشد:شحالها سلامه..تكلمينها؟

بهتوا كل اللي يالسين وهم خلود وليلى وام راشد...

ليلى بفرح: بخير ربي يسلمك رغم انها ما تكلمنا...

ام راشد: فديتها والله ولهت عليها..

راشد: ان شاء الله انها مرتاحه؟

ليلى: اكيد مرتاحه مستحيل تكون ضايجه وما ترمس هاي سلامه وانا اعرفها..

راشد: الله يوفقها ويسعدها...

واخيرا نطق راشد وعبر عن اللي في قلبه وسأل عن بنته..هذا هو الاب مهما قسى يحن على عياله..عمرها قسوته ما تطول...وعمره الالم بقلبه ما يثنيه عن محبة عياله..وتسامحه وطيبته وحنية الابوه في داخله مهما عظم ذنبهم وكانت كبيره فداحة اخطاءهم يتم لهم حنين وشوق وحب ما تفنيه الايام والسنين

وفي صالة البيت اللي فوق كانت الاصوات واصله للباب الخارجي من زعيج البنات والحشره...وطلعت لهن سلمى ونوره بس بدون فايده صدق كانت حرب من الخاطر غير عن كل مره...والاصوات بدت تعلى وحتى لدرجة ان حصه عصبت ومسكت سمر من ثوبها من ورا رقبتها ودزتها برا الحجره..

حصه بعصبيه: خلاص نرفزتيني ما عاد اقدر اتحملج طلعي برا..

سمر تصيح: مب كيفج الحجره مب لج انتي بس..

نوره: حصه شو هالظلم اختج صغيره لا تحطين راسج براسها..

حصه: نوره بليز ما كلمتج...

سلمى: حصه الله يخليج تفاهمي بشوي شوي مافي داعي لمد الايد..مافي شي يستاهل..

حصه: خلاص انا اللي غلطانه ما عليكم مني..انا وحده طفح الكيل عندي ما روم اتحمل اكثر عن جي ..انتن شو تتحرني ما عندي صبر..انا لاعت جبدي منها خلاص ماقدر اتحملها..ابا احس شوي بالخصوصيه في حجرتي...

نوره: انانيه والله..

سلمى: مب بس انانيه الا وقليلة ادب ولسانج طويل بعد...

حصه وخلاص معصبه على الاخر: اوكي خلاص..

ونزلت تحت بسرعه وشافت ابوها داش الصاله يتعكز..وطالعها وهو متعجب منها..

بو خليفه: شعندكن محتشرات اصواتكن واصله للشارع...

حصه: ابويه سوري جامات الصاله اللي فوق كانت مفتوحه فالصوت يطلع؟

بو خليفه: وليش منو كان يتواجع؟

حصه: ابويه ابغيك بشي بس ما تردني وتقول الحين تم..

بو خليفه: شو تبين؟

حصه: ابويه انا مب ياهل وخلاص انا ماقمت اتحمل هاي بنتك سمر..بصراحه وباختصار اريد اطلع الحجره الثانيه اللي محد فيها؟

بو خليفه: وينها هذي؟

حصه: اللي عقب حجرة ذياب..وقبل حجرة سلمى..

بو خليفه: محد فيها؟

حصه: لاء...

بو خليفه: ختج صغيره بتزيغ تم لروحها..

حصه: خلاص ابويه اذا ما تبغيني ارقد بهالحجره انا بنزل الصاله تحت هب لازم يكون لي حجره..

بو خليفه: خلاص بنتي سيري الحجره اللي تبين اهم شي ما تختلفين ويا اختج تراها ياهل..

حصه وهي تسير عنه: اوكي ابوي فالك طيب..

وسارت حصه المطبخ وزقرت ناتالي وجينا ينقلن وياها الاغراض...وهي طالعه فوق الدري شافتها امها..

ام خليفه: وين مرحله البشاكير وياج فوق؟

حصه: بننقل اغراضي الحجره الفاضيه...

ام خليفه: وليش؟

حصه: خلاص لا تعبين عمرج وترفعين حق الفيتو انا رمست ابوي من دقايق..

ام خليفه: كيف بترقدين في حجره ما فيها اثاث ولا قطعة فراش..

حصه: ما عليه الليله بس وباجر بسير أي محل اخذ لي اثاث ويا خليفه او حد من البنات..

ام خليفه: وليش بتخلين ختج لحالها...

حصه وهي واصله فوق: اذا تشفقين عليها ازقريها ترقد عندج..

دخلت حصه الغرفه مع البشاكير ونقلن الاثاث وسمر يالسه على شبريتها...ما تحركت وتطالعهن...

جينا تستهبل: ماما سمر اشل ثيابج انتي بعد...؟

حصه معصبه: جينا اشتغلي وانتي ساكته لا ييج كف محترم اعدل فيه تفكيرج..

ناتالي شوي وتضحك: يالله روحي ودي الاغراض..مافي كلام كتير..

جينا: عصبيه وايد..

ونقلن كل اغراض حصه الحجره الثانيه وكانت فاضيه خاليه ما فيها شي غير زوليه يابتها حصه من حجرتهن مع مخدتها ولحافها وبطانيه عشان ترقد عليها وثيابها خلتهن هناك باجر بتييبهن...يوم يحطون لها اثاث الحجره...وبتنقل بالمره كمبيوترها بس تبغي تتأكد اذا كان في فيشة الحجره حراره ولا لاء..ويابت تلفون وجربت ومن جي حست بالراحه انه مافي داعي تييب اتصالات للبيت عشان يركبون لها خط انترنت..

وافتكت بجي من سمر وحست براحه اكبر في غيابها عنها ولو انها الحين ساكنه في خرابه بس اهون عليها من مجابل اختها اللي يابت لها المرض..
........................


في بيت بو ناصر كانت الاستعدادات على اوجها...الكل مشغول ..البشاكير وبو ناصر وام ناصر وحتى فهد...والبيت متغير وقسم ناصر خلص بناءه..وما باقي شي ابداً...يعني استعداد تام...ما ينتظرون غير ليلة العرس...

ام ناصر تيلس: هلكت هلكت تكسرن ركبي...

فهد: سلامتج يالغلا ما تشوفين شر...

ام ناصر: الا وين اخوك ما بين.؟

فهد: راح ويا الشباب يقول يقضي اخر لحظات الحريه...

ام ناصر: ليش بيسجنونه؟

فهد يضحك: ما شاء الله تعرفين تنكتين؟

ام ناصر: الا صدق ليش وين رايحين؟ليكون ساير لي ويا ربعه بيخيمون ببقعه ويرد لي اسود ليلة عرسه..

فهد: من زينه عاد يعني..اسود ولا اخضر ما فرقت من يطالع ناصر الخسف اصلا..؟

ام ناصر: ايه خسف يوم انك ما تروم توصل له...

فهد: بس عن التنغيزات ..سمعي اقولج قررتي تختارين عروسي ولا لاء.؟

ام ناصر تدزه: مب الحين وخر عني...خلني اخلص من عرس اخوك وبعدين يصير خير...

فهد: زين محد يا في بالج..؟

ام ناصر: لاء محد...محد يت للحين في بالي...اصلا ماشي بنات...خلصن اللي اقل من عمرك..كلهن اكبر منك...تستاهل الصغار عرسن وانت الا لعاب هايت توك متذكر تطري العرس...

فهد: ايوه قلت لج انا القي محاضره مب جني قايلج بعرس...وبعدين من كبري انا..الا 29 سنه ماشي فرق بيني وبين المحروس ولدج الا سنه.....هذا اللي استوى شيبة العايله...

ام ناصر: حليله ناصر اخوك محد مثله يطيع هله..

فهد: ديايه تراه..!!!

ام ناصر: وخر عني اقولك ليش تتلصق..يا ثقالتك يا فهد...

فهد يطالعها وهو مستغرب: انا شسويت فيج الحين...كل ما قلت لج سالفه وما عيبتج قلتي لي وخر عني...اصلا انا مب قريب منج...امي مب جي يغيرون السالفه..اونه وخر عني...

ام ناصر متردده: ما غيرت سالفه شو بغير يعني...الحين اللي يسمعك من زين سوالفك...

ويحدر بو ناصر: وين ناصر؟

ام ناصر: مدري وين روح يقول فهد انه رايح للحريه..

بو ناصر: من ولده هذا؟

فهد شوي يالس في النص يتطمش: ولد عرب يمدحونه..قال بيسير عنده قبل العرس عشان ينصحه..

ام ناصر: وليش نحن نصايحنا ما منها فايده؟

بو ناصر بثقه: هيه سمعت عنه هذا..

فهد بصوت واطي: طاخ..

وطلع بو ناصر يعابل الليتات اللي مركبه على البيت..وام ناصر يلست ويا فهد بالصاله...

فهد: ما قلتي لي صدق امايه حد في بالج؟

ام ناصر: لا والله فديتك محد..

فهد ابتسم من قلبه: احسن الحين خليني انا اختار..

ام ناصر تأشر على الباب: هذا الدرب جدامك محد يود ايديك سير وتنقى شرات ما تبى بس لا تضويها عندي..البقعه توسعها..

فهد ينش: اوكي حياتي بنشوف...

طلع فهد وهو مبتسم ما يدري ليش بس قرر شي ما يدري هل بيندم عليه ولا لاء..معقوله يسويها...ما يندار به فهد..تفكيره مراهق وساذج للحين..معقوله بعده يفكر بأشياء غبيه..مالها اساس من الصحه ولا يقدر ينفذ كل اللي في باله...كل شي جايز..
......................

يوم الاحد في الدوام ما داوم ناصر...فكان على حمد انه يقبض دوامه ودوام ناصر..ويجابل كل موظفين الشركه صدق كان مضغوط على الاخر وما قدر انه يسوي شي...صار عنده تراكم فضيع بالملفات..وما عرف يدبر نفسه حتى دانيال اليوم ماخذ اجازه فكان حمد طول اليوم معصب وحالته حاله...بس في مكتب البنات صدق كانن يشتغلن من خاطرهن رغم ان الحزن ما فارق عيون ليلى وبدون محد يسألها الوحيدين اللي كانوا فاهمين شو فيها هم حمد وحصه...اليوم مفروض لو الايام مشت على هواها تكون هي ماخذه اجازه مع ناصر وكل واحد منهم يتزهب بصوب...باجر عرس ناصر اللي مفروض هي تنزف له..بس مع القدر مافي شي اسمه مفروض وواجب..في شي اسمه رضوخ واذعان للقضاء والايمان به...

حصه تتنهد: شكلج مب حلو وانتي حزينه...

ليلى تبتسم: مب حزينه مادري شو بلاني.؟

حصه تنش حذالها وتحط ايدها على كتفها: عادي عادي..الدنيا والله ما تسوى..

ليلى وعبره خانقتنها: ارجوج لا ترمسين وايد عن هالموضوع ولا تواسيني ماريد احسس عمري اني بصيح..

حصه: انا احترم رغباتج كلها بس انتي اختي وربيعتي وحبيبتي وكل شي فما تهونين علي والله..

ليلى تشد على كف حصه: وانتي بعد..بس حصه في مشاعر (وتطيح دمعتها) ما نروم نتحكم بها والله..في اشياء ما نقدر نسيطر عليها صدقيني مهما كابرنا..

حصه وهي مدمعه بعد: شو تبيني اسوي لج بسوي بس خلج طبيعيه..

ليلى: ماشي تكفيني وقفتج كم تسوى...!!!!

حصه تقرص خدها بمزح: فديتــج...

ودق الباب ونزلت حصه اللي كانت يالسه على الطاوله وتحجبن وليلى مسحت دموعها بس اللي دق الباب ما تريا لين ما يأذنن له وحدر على طول..

روضه: صباح الخير...

ليلى وحصه: صباح الورد...

روضه تشوف عيون ليلى: مالو الجميل زعلان؟

ليلى: ماشي بس راسي شوي يعورني..

روضه: سلامتج الغاليه الف سلامه...اييب لج شي تشربينه..ولا تبين بندول..؟

حصه انقهرت: مشكوره خلاص عطيتها بندول..

ليلى تطالع حصه انه عيب خلي البنت بحالها..

روضه تيلس: والله لو ادري انج ضايجه ما ييت يمكن اسبب لج ازعاج..

ليلى: لاء عادي افا عليج نحن خوات...

حصه يلست مكانها وما حبت ترمس وياها..وروضه اصلا ما تداني حصه من يوم شافتها وما تدري ليش هالكره الغير طبيعي صوبها...بس تحس انها لازم تكون قريبه من ليلى او على الاقل تتقرب منها ..صدق كان خاطرها تستوي ربيعتها...وتمت روضه تسولف وليلى تسولف وياها وحصه مشغوله عشان تخلص اللي عليها وتسير تودي شغلها واقرار العوده اللي ما سلمته دانيال امس...روضه تمت شوي وطلعت على طول هي الثانيه بعد مشغوله...

روضه: يالله بسير اخلص شغلي وانتي الغاليه طمنيني عليج..

ليلى: ان شاء الله وما تقصرين يالغلا..

روضه بتردد: عادي اخذ رقمج؟

حصه هني حست ان روضه مصختها وتتعمد تثيرها وفعلا هذا اللي تبغيه روضه رغم انها صدق حبت ليلى..

ليلى ابتسمت مع انها للحين ما عرفت روضه عدل بس ما حبت تحرجها وكتبته لها في ورقه...

ليلى: اترياج أي وقت غناتي...

روضه مستانسه: مشكوره فديتج...

طلعت روضه وليلى قربت الملف بتخلصه...

حصه: لا عاد بصراحه مصختها وانتي مصختيها اكثر...

ليلى نفسيتها تعبانه وما تتحمل اكثر: حصه انتي اللي مصختيها...انتي مب عايبتنج البنت ليش انا ما تعيبني هب لازم اكرهها وياج..

حصه منصدمه: يعني تفضلينها علي؟

ليلى: لحوول انا قلت اني فضلتها عليج...انتي كيف تقارنين نفسج في ناس عاديه..تعرفين مستواج اكبر من جي..

حصه بقهر: لا لا انتي تتعمدين تثيريني عشانها...صدق ما توقعتها منج...

ليلى تنش: حصه شفيج بليز لا تزيديني...

حصه: لا والله...بنت ما تعرفينها واول مره تشوفينها امس واليوم اول مره تسولفين وياها..عادي عندج تعطينها رقمج؟ شو يضمنج انها مب صايعه شو يضمنج انها ماترمس شباب او انها تبى تسوي لج مشاكل..؟

ليلى بعصبيه: انتي شو تقولين؟ انا مب ياهل وانتي توجهيني حركاتج بصراحه وايد غبيه..حصه بليز لا تتدخلين فيني..

حصه: والله؟

ليلى: هيه والله...انا مب ياهل توجهيني ومب لعبه اتسير ع كيف ما تبين بصراحه مليت من هالاسلوب..

حصه: وانا الحين قلت اني اسيرج؟ الحين انا قلت؟

ليلى: قلتي ولا ما قلتي انتهى النقاش فيني اللي يكفيني مب محتايه ويع راس اكثر عن جي...خليني اخلص شغلي وارتاح لو سمحتي..

حصه سكتت ويلست منقهره تفكر شو سوت روضه من بينهن مع انه محد يدري هل السبب روضه؟ ولا تصرف حصه المتسرع...خلصت حصه اللي في ايدها بسرعه وهي معصبه..وطلعت لدانيال على طول...

اما ليلى من قهرها تمت تصيح صدق انقهرت اكثر من اسلوب حصه وحركاتها اللي مرات ما يكون لها معنى...فضلت انها تصيح بعيد عن حصه عشان ما تحس بضعفها ..كبرياءها مسبب لها ازمه من كثر ما تحاتيه...وتداريه على اساس محد يفرح انه يوم من الايام جرحها...

اصلا هي من الصبح ضايجه من اللي يصير لها ونفسيتها زفته من ظروفها وحياتها ونكدها وهمها اللي ما ينتهي..ويت حصه وزادتها بغباءها وتصرفاتها اللي مالها داعي بعض المرات...
.
في الجهه الثانيه وصلت حصه مكتب دانيال ولقت الباب مغلق والجامات منزله عليها الستاير يعني انه مب في مكتبه...وخطفت على مكتب حمد وكانت اول مره تشوفه اليوم..دقت الباب ..

حمد: تفضل...

دخلت حصه وقبل تمد خطوتها الاولى كان بيغمى عليها كانت عادي هالحظه لو جدامها شوزن تفرغه براسها..قهرها واصل حده وزاد الحين...

روضه تنش: اووه حصه.؟

حصه ما قدرت تتحمل: السلام عليكم...

حمد مرتبك:وعليكم السلام..مرحبا حصه..تفضلي...

حصه بعصبيه واضحه: شكرا مافي داعي..وين دانيال؟

حمد حس ان حصه مقهوره من روضه فكان له تصرف ثاني...

حمد مبتسم: دانيال ماخذ اجازه...هاتي اوراقج عندي وليلى اذا لها شي خليها تييبه هني...

حصه ما عرفت شو ترد بس لو قلت كان داخلها نار بكون مقصره في حق مشاعرها واحاسيسها...

روضه بدلع وميوعه: تعالي ليش واقفه ..ليكون مستحيه من حمد...

حصه عشان تقهرها: هذا ولد عمي قبل يكون......(وسكتت ما كملت)

روضه فاجه عيونها: شو هالمفاجأت اللي اسمعها اليوم...

حمد: أي مفاجأت الله يهديج يا روضه...اووه صح (ويطالع حصه عشان يقهرها) انا نسيت اخبرج ان حصه بنت عمي..على كثر ما سولفنا ما يا على بالي...

حصه لو بإيدها عادي تحرقه هو وياها وحطت الاوراق على الكنبه اللي حذال الباب وما وصلتهن للمكتب...

حمد: هاتيهن..

حصه بثقه: فيك ريول نش ييبهن...

حمد يغايض: زين تعالي بناقشج فيهن اذا ناقصهن شي..

حصه:لا خلك ويا ....... روضه خبرها باقي صلات القربى بين هل الشركه...

روضه مبتسمه تبى تقهرها: تعالي حصوه ما يلسنا..

حمد كان مستانس ان حصه شابه ضو على الاقل يبرد حرته فيها على نظراتها اللي مصختها فيها هاليومين...وقبل تطلع حصه صدق عطت حمد نظرة احتقار عنيفه خلته يقول بس علي ما احتاي اكثر عن جي...انقهر هو صدق منها وما عرف شو يسوي لولا روضه والله جان قام يصفعها ويعلمها كيف تحترم اللي اكبر عنها...

حصه ما كان ناقصنها الا ان روضه يكون لها علاقه ويا حمد..روحها ما بلعتها فما زاد الطين بله الا وجود وحده من هالاشكال قريبه من حمد اللي ما يصدق ان بنيه تربع وراه..لو انهم يقولون تاب بس هي طول عمرها تحسبه لعاب وماشي مثله في التمثيل ....

وفي المكتب..

روضه بدلع: شو فيها معصبه.؟

حمد اللي ما يطيق روضه: مادري بس روحي كملي شغلج انا وايد مشغول..

روضه: توك كنت زين ما فيك شي يت هاي بنت عمك وعفست لك مزاجك...

حمد بقرف: زين يالله قومي مب فاضي للسوالف...

وطلعت روضه..حمد ما كان يدانيها وكل هاه بس عشان يقهر حصه ويحسسها انه للحين قادر يلعب باحاسيسها ويبهدلها كيف ما يبغي..يباها بس تعرف شي واحد...انها له واحاسيسها وهي كلها بكمالها ملكه هو....

حمد ما يبغي يسكت لتصرف حصه السخيف وياه ومقرر شي بس ما بيرمس لين ما يسويه...واليوم ان شاء الله معزم عليه وما بيثنيه عنه شي...

تحياتي لكم واتمنى تعذرونا على التاخير

وانتظروا الجزء ( 27 ) مع الاخت الغلا

[الرايقه]

يعطيكم الف عاافيه والله ما تقصرووون ... وانا كتابعتنكم لان القصه وجهودكم تستاهل المتابعه ...
يالله يالغلا فديتج نترياااج ,,,

[الغلا]

لكم مني الجزر الــ 27 ولكن الجزء هذا وايد طويل فراح اقسمه على مشاركتين ....

الحلقه السابعه والعشرون
في بيت بو خليفه العصر...كانت سلمى يالسه في الصاله راضيه بالوضع اللي صار لها وعن قناعه تامه..خلاص انتهى بالنسبه لها كل شي وخسرت كل شي رغم انها مظلومه..بس وين تروم ترفع صوتها في زمن تعيش فيه المطلقه حياه من عصر حجري..يرتفع عليها صوت الريال..وما تروم تتكلم او تنفس او تطالب باقل حق من حقوقها...هي ما طلبت المستحيل ولا طلبت المساواه ولا رفعت صوتها في المحاكم تتريا تكسب قضيه..كل اللي تتمناه اهل تشد فيهم الظهر...هي تعرف ابوها زين ما زين تدري به طيب وحنون بس اللي ما تقدر تتخيله هو تمسكه العنيف بعاداته وتقاليده انحيازه العنيف لصفوف الرجال مهما قسوا وظلموا وسجلوا للمرأه نقاط سودا واضافوا الصفحات البيضاء لسجلاتهم الحافله بالعنف والقهر للبعض ومب الكل طبعا...
سلمى ماسكه موبايلها تتريا ربيعتها تطرش لها مسج تخبرها اذا تعرف حد في الوزاره بيخلص لها اوراقها ويحولها تربية بوظبي عقب ما بتترك التدريس في دبي..يوم انها انتقلت تعيش ويا اهلها..وهي تعابل مسجاتها حدر خليفه...
خليفه: السلام عليكم..
سلمى تحط تلفونها حذالها: وعليكم السلام..
خليفه: وين الناس؟
سلمى: كل حد بحجرته..ونوره روحت بيتها...
خليفه: حصه وين وسمر وين؟
سلمى: حصه بتنزل الحين بتسير السوق..وسمر مادريبها...
خليفه يلس في الصاله: وين امي؟
سلمى: سارت بيت خالتي غاليه..من زمان ما سيرت عليها...
وان حصه نازله..كانت ضايجه من الموقف السخيف اللي حطها فيه حمد اليوم واكثر متضايجه من موقف ليلى...لدرجة انهن في طريق الرده ولا وحده فيهن نطقت بحرف ولا تكلمن ابد..وشكلها عين وصابتهن على كثر ماهن ويا بعض...
خليفه: على وين العزم ان شاء الله؟
حصه من دون نفس: محل اثاث..وخبرت ابوي..اذا عندك اعتراض اجله لبعدين..
خليفه ما عيبه اسلوبها: تكلمي عدل ..
حصه بقوه: زين يوم انك ما تبى تسمع رمستي ليش ترمسني..
سلمى تأشر لها انها تسكت ولا تستفزه...
حصه بتطلع: يالله سلمى نشي..
سلمى تعض على شفايفها انها لا ترمس ما تبى خليفه يدري انها طالعه..
خليفه لف على سلمى: وين انتي الثانيه؟
سلمى: تباني اسير وياها بنختار لها اثاث لحجرتها..
وهني سمعوا صوت حد ياي على الدري وانها سمر واقفه...
خليفه بنظره حاده: استريحي ما عندنا مطلقات يسرحن ويمرحن على كيفهن...هذاك اول في بيت ريلج تتصرفين شرات ما تبين ..الحين نحن مب ناقصين كلام الناس..والباب اللي تييك منه الريح سده واستريح..نحن في غنى عن الذم..
سلمى بلعت الاهانه..اما حصه ما سكتت..
حصه: ومن متى كلام الناس يعني لنا شي؟ ومن متى حد سلم منهم..خليفه مع احترامي لك هذا تفكير رجعي...
خليفه نش صدق ما تحمل رمسة حصه: حصـه!!!
حصه بصوت يذكره بالمستقبل: خليفه انت اخوي وانا احبك..ومحد في هالدنيا يهمني كثرك تدري انك سندي واكثر حد افتخر فيه..انا ماباك تاخذ السالفه على اساس انها ريال وحرمه وتعدم عواطفك..خليفه مب انا اللي اعلمك هالرمسه وانت ادرى مني..لا تظلم اختك وتلاقي باجر اللي يي ويظلم بناتك...انت ما تدري بالاقدار...يهون عليك ان عفرا تنضرب من ريلها ولا يظلمها نفس الظلم اللي انظلمته اختك.؟ ماظني يرضيك ولا ظني عفرا تهون عليك..ولا سلمى حتى...اصلا انت معصب ولا نحن ندري ان محد يحبنا كثرك وان محد يعزنا كثر ما انته تعزنا وتهمك مصلحتنا..صح ولا انا غلطانه اخوي حبيبي؟
بهت خليفه وهو يفكر في عفرا لو صار لها مثل هالموقف شو ممكن يسوي..هو ابو وبناته اغلى ما عنده..وابوه لو اشتط وعصب لانه يحمل نقاوة الماضي وعفويته وقسوته...كلام حصه وايد منطقي وخلاه يستحي من نفسه..اما سلمى حست بعبره خانقتنها وطلعت فوق...وهو تم واقف مكانه..
خليفه يطالع حصه وعقبها طلع برا...ولفت حصه بتروح المحلات بس مع من وهي تدري ان سلمى خلاص مستحيل تروح وياها وشكلها ضاجت وعورها قلبها..فما شافت الا سمر بس لا يمكن تكلمها..وتدري انها بتموت لو قالت لها تعالي من الوناسه لو راحت وياها بس ما بتقول لها عناد..
سمر بعفويه: تبين حد يسير وياج..انا بروح...
حصه مبتسمه: اوكي يالله من الصبح اتلفت ابى حد يسير وياي ..
سمر: بتوديني الجمعيه...؟
حصه بنقمه: بدينا بالتشرط.؟
سمر تضحك: خلاص بروح اغير وبييج الحين..
يلست حصه على الكنب: اوكي بسرعه...
وشوي وان سمر نازله ورغم اللي في حصه من حزن وضيج وعصبيه على اللي صار اليوم الظهر في الشركه بس تغيرت ملامحها من يوم طلعت السوق..على الاقل غيرت جو وقدرت تنفس عن عمرها شوي وتنسى ضغوط العمل..وفي الدرب..
سمر: ليش جي يعاملون سلمى والله تغمضني؟
حصه: مادري تخبريهم..
سمر: اووه عاد لا تطنشين تراني ماحب جي..من متى ما رمسنا..
حصه: شو تبيني اسوي لج يعني؟
سمر: سولفي قولي أي شي..
حصه: تراج تسولفين كيف اقاطع رمستج..ارمسي وانا اسمع..
سمر تبتسم: اوكي بقول نكته..
حصه تطالعها بطرف عينها: ترانا ابطينا من خبالج ..قولي نكته..
سمر: اممم صبري بفكر من زمان محد دق لي وخبرني نكته كل ربعي مسافرات الا انا..كله بسبب عفرا..
حصه: مب بسببها نحن اصلا ما نبغي نسافر هالسنه...
سمر: انزين النكته يت...
حصه: قولي...
سمر: في واحد محشش طلع الفير الساعه اربع بيت ييرانهم ودق الباب عليهم وبطلوا له الباب...قالهم عندكم ثلج..قالوا هيه قال حتى نحن عندنا...
حصه تضحك: حلّوه..
سمر: اعيدها؟
حصه بطرف عينها: لا كثر الله خيرج ما نبى ازعاج...
وتمت سمر طول الدرب محتشره ويا حصه ونست اللي صار من بينهن ياهل ما تنلام ما تروم تشل بخاطرها اكثر من اللي شلت تعرف عمرها ما تصبر عن ختها مهما سوت فيها..بس بالرغم من كل هاه حصه ردت لكآبتها وما قدرت تسيطر على نفسها تحس بتعاسه فضيعه وتشوف الزمن والناس ضدها وكل شي يعاكسها ولا هنت لها عيشه مع كل اللي يصير حواليها..
........................
ليل كانت في حجرتها ويا شيخه تسبحها وتغير ثيابها عقب ما نشت من الرقاد قبل صلاة المغرب بشوي....كانت ليلى تحس بشي غريب ما تعرف شو هو بس احساسها كان بضيج من تصرف حصه اليوم واللي صار وياها في الدوام واللي اكثر مضيج عليها ان العرس ما بقى عليه غير ساعات هالليله...وهي تلبس شيخه كانت تغني ..وشيخه مستانسه وياها...
شيخه: امي انا بغني..
ليلى: لا بس دخيلج خلينا نرتاح شوي..
شيخه بعصبيه: خليني خليني.. وقبل تنطق ليلى كان باب الحجره يدق...
ليلى: منو؟
بس محد رمس..
ليلى: من يالله عاد بلا غلاسه مب فاجه لين ما ترمسون؟ هزاعي ولا فهد او مطر الاهبل..
بس محد رمس...
ونشت ليلى بتبطل الباب وما حست بقلبها الا ينتفض من الفرح وبكل حب ووناسه في الدنيا لوت على سلامه من خاطرها...
ليلى تلوي عليها بقوه: حياتي...!!!!
سلامه وهي متمسكه فيها اكثر: والله وحشتيني موت فديتج..
ليلى تسلم عليها: شو هالمفاجأه اللي تجنن...!!!!
سلامه تبتسم وتطالع براسها داخل الحجره: اوه شواخي البقره هني..اشوف حد استفرد بمكاني.؟
شيخه ابتسمت وبطلت عيونها على الاخر: ثلامه..!!!
وربعت صوبها عشان تشلها..
سلامه تنزل لها تحت وتحبها: ولهت عليج يالدبه وعلى مغايضج..والله..بس مابروم اشلج اخاف ارد لريلي مكسره..
ليلى تضحك وشيخه مستانسه..
ليلى متشققه من الفرح: تيننين بالبرقع والله..
سلامه ونها مستحيه: فديتني من يوم يومي هب بس اليوم...
ليلىتتمصخر: شكلج عيوز من الخاطر..
سلامه:يالله يالغيره شو تسوي ثرها مب سهله..
كانت ليلى بتتشقق ان سلامه يتهم اخيرا..وسحبتها من ايدها ونزلتها تحت ويا شيخه..وفي الصاله محد كان موجود..
ليلى: وين ريلج؟
سلامه: سار عند ربعه..
ليلى: زين ما شفتي حد.؟
سلامه: لا والله اول ما ييت سيده على حجرتج...
ليلى مبتسمه: فديتج انا..
وفي هاللحظه جرس البيت كان يدق وصوت وايد حاد علىالانترفون..وحد يضغط عليه ومبين انه يلعب..
ليلى: شرملى سيري شوفي من اللي على الباب..
وسارت ليلى ويلست حذال سلامه اللي كانت يالسه قريب من يدتها وعايشه..اللي حدرن عليهن ويلسن يسلمن ويسولفن وياها..
عايشه: يالله عاد عقي البرقع نبغي نشوفج..
ام راشد: لا خليها يا زينها فيه...
سلامه: اللي يسمع الحين ما تشوفين شي...؟
عايشه: بس على الطبيعه احلى...
ليلى تيلس: خلوها لحد يضيج بها (وتلوي عليها) هذي حبيبتي..
وشلت سلامه البرقع عن ويهها...
ام راشد: سرتي عند اهلج؟
سلامه: بعدني للحين قلت اسلم عليج انتي وياهم وبعدين اروح بيتنا...
ليلى : بتباتين عندي اليوم مب في بيتكم...
سلامه: لا فديتج بروح بعد شوي البيت ريلي ما يباني ابات...
ام راشد استانست من خاطرها يعني سلامه مرتاحه في بيت ريلها...
دخلت شرملى: ماما ليلى..
ليلى: نعم!!!
شرملى: في ريال برا يقول يريدج..
ليلى: والعثره!!! انا متأكده..؟
شرملى: ايوه يقول وين ماما ليلى.؟
عايشه: منو هذا؟
ام راشد: منو يبغيج؟
ليلى: شدراني...شرملى ما قلتي له منو؟
شرملى وهي تسير صوب المطبخ: يقول اسمه فهد..يجي هني قبل يومين..
هني تيبس الكل بما فيهم عايشه عدا ام راشد اللي شافت الموضوع عادي وليلى حست بشعور غريب للحظه حست الدم يتيمع في ويهها وما قدرت تتحرك من مكانها..
ام راشد: قربي الريال غربل الله بليسكن..
سلامه: وين تقربه..خلي حمدان يظهر له..
ام راشد: حمدان للحين برا ما رد..
ولبست ليلى وقايتها وعايشه ابتسمت"ياي اخيرا بشوفه الاهبل"
وطلعت ليلى عشان تقربه يدخل الصاله....وسلامه ردت تلبس برقعها...بس ليلى دخلته الميلس اللي برا...وعايشه سارت تييب عيالها ولبست وقايتها وسارت ورا ليلى الميلس...
.
.
للحين وهم يالسين في ميلس الضيوف ويا فهد اللي انصعق يوم شاف عايشه..صح ما كان يستهبل بس حس باحساس مثل اللي غارق في بحر الضياع..عايشه كانت عادي تستهبل لدرجة ان ليلى استغربت منها وعيالها وياها مسوين شله استهبال وشيخه كملت عليهم اما سلامه ما طاعت تدخل لان ريلها قالها لا تظهر على حد ابد مهما كانت صلة قرابته بها غير ابوها وحمدان وعمها مبارك..حتى عمر ولد عمها قالها لا تقابله الا اذا حطت البرقع على ويهها...يلست سلامه في الصاله بروحها وعقب يتها ام راشد تيلس وياها لين ما يردن البنات من عند ولد عمتهن..
وفي الميلس اللي خاري..
فهد يضحك: انت الحين ويا راسك اسمك فهد!!!؟
فهد الصغير: هيه عندك مانع؟
بطي: لا سعيد..
فهد يطالعه بنظره: وانت الثاني من سألك حد طلب رايك؟
هزاع: والله تهزأوا كلهم..!!!
عايشه: فهد بس عاد عن الحركات لا تشب الضو من بين عيالي...
ليلى تضحك ومستانسه على الاخر: لا لا خليه...
شيخه: خليه خليه..
طالع فهد شيخه: وانتي الثانيه تخليني على شو؟ انتي فاهمه انا شو يالس اقول؟
شيخه تضحك: شششش
نقع فهد ضحك: تسكتيني؟
ليلى مفتشله: لا والله هي ما تقول ششش يعني اسكت..بس جي علقت على الحرف وتعيده كل يوم..
فهد:اها تحريت بعد..
عايشه: يالله ما بتنش تصلي...قامت الصلاه من شوي..يالله يا عيال نشوا المسيد ويا خالكم..
وطلعوا اليهال يتوضون وعايشه وليلى طلعن وفهد جدامهن...عايشه نزلت وراه وليلى حذالها..وهو تجدمهن شوي..
فهد: انا بسير خلاص سلموا على راشد وحمدان كان خاطري ايلس وياكم بس تعرفون الليله سبيشل في البيت والكل مربوش..ان شاء الله نشوفكم باجر في الخيمه..
عايشه: بتحدر الخيمه..
فهد يضحك: وانتي شعليج؟
عايشه: مالت عليك بس اتخبر شو تتحراني بموت عليك..
فهد يتمصخر: لا انا اللي ماصبر عنج..
ليلى كانت ساكته ردها فهد للتفكير في باجر وهي تجاهد عشان تتناساه وتعيش يومها ليومها..
وسارن البنات عنه بس هو كان يبغي شي وما قدر انه يسير قبل يقوله وحتى ما يقدر يقوله جدام حد..هو راعي العنيه يبا يقولها بنفسه..لف لورا وشاف البنات بيدخلن الصاله وزقر بصوت عالي..
فهد: ليلى!!!
ليلى لفت له: نعم!!
عايشه: سيري شوفي شو يبغي يمكن بيقولج شي عن ناصر..
ليلى: بس اسكتي الله يخليج..
ونزلت ليلى وسارت له وهو كان واقف في نص الحوش..
فهد: ليلى ابغي ارمسج بموضوع..
ليلى مستغربه: وليش ما رمست من الصبح...؟
فهد متردد: شفتي يهال وعايشه اختج وما قدرت ارمس..
ليلى مرتبكه: خير ان شاء الله في شي..؟ لا تخوفني وتطلع تستهبل والله بحرج عليك...
فهد: والله ما استهبل ليلى انا فكرت وايد بالموضوع..وبصراحه قلت قبل ارمس أي حد حبيت تكونين اول وحده تعرف هالشي..سبحان الله ما صار شي يكون الموضوع بيني وبينج ومحد بيدري به..
ليلى صدق مستغربه: لا تخوفني ارمس ..
فهد: اول شي اوعديني ما يطلع الكلام من بينا..وثاني شي حلفي تفكرين على اقل من مهلج ولا تستعيلين..وغير كل هاه حلفي لو صار شي سلبي ما تتغيرين ابد...
ليلى ما تدري ليش انقبض قلبها: اسفه ماقدر اوعدك..شعرفني شعنه بترمس؟
فهد: عيل ماروم اقولج لين ما حصل وعد مسبق..
ليلى: شدراني يا فهد عن شو بتكلمني..كيف اوعدك ؟ معقوله لو كان الشي يخص احساسي اوعدك فيه..بتخبرني منو يروم يتحكم باحساسه؟
فهد انصدم: وانتي شعرفج انه ممكن يكون عن الاحساس؟
ليلى: انا ما قلت انه عنه بس قلته لك على شكل مثال...
فهد: خلاص يا ليلى...تعرفين ان ناصر بيعرس...وادري بشعورج واعرف كل شي تحسين به من يوم عرفتي لين ما تحدد كل شي...ماظني بقالج امل في الموضوع..صح؟
ليلى انقهرت منه: ليش تقول جي...؟
فهد: لا تتضايجين..انا اقولج شي واقعي...
تنهدت ليلى وسيطرت على اعصابها: انزين كمل...
فهد: شوفي باجر بيكون شي غلط تفكرين بناصر وشي غلط (وسكت وطالعها بس رد يكمل) تحبينه...بيكون كل شي غلط لانها بتكون موجوده وما بيحق لج تشاركينها شي ملكها صح ولا انا غلطان..
جرحها فهد في احساسها وادماه...الدم تحس به وما تحس..ويهها صار احمر من الضيج وعيونها جدامه غرقت بدموعها ما تدري ليش فهد يتعمد يجرحها هو طيب ليش يسوي جي..؟
فهد: ادري اني اجرحج برمستي بس شو دراج انها ما تكون يقظه لج..شدراج انها ما تصحيج وانتي غارقه باحلامج؟
ليلى مركزه في عيونه: مادري شو سويت بك عشان تتعمد تجرحني وتسم قلبي بالكلام!!!
فهد ندم: والله مب قصدي..بس حبيت انبهج لانج بنت خالي وعشت فتره وياج وما تهونين علي ومعزتج من معزة نفسي لنفسي..وكبرياءج و أي جرح يجرحه يعتبر جرح في كبريائي انا...
ليلى بنبره عاتبه: عيل ليش جي تقول..؟
فهد بحنيه: ترا قلت لج انبهج...!!!
ليلى: فهد اذا شي بخاطرك اجله لبعدين..صدقني نفسيتي ما تتحمل زود..ارجوك بعدين تعال والله احس بصداع فضيع..
فهد بخيبة امل يتنهد: خلاص يوم ثاني ان شاء الله..
ليلى: اسفه والله بس ما بروم اخذ واعطي وياك وانا بالحاله اسمحلي..بس غصبا عني..
فهد يبتسم: لا عادي بنت خالي ان شاء الله يوم ثاني..
ليلى: الله الله بالسواقه..
فهد يسير عنها: لا توصين حريص..
وردت ليلى صوب البيت..
فهد: ليلى!!!
لفت ليلى: نعم!!!
فهد: بتيين باجر..؟
ليلى بنظره كلها تعب حزن والم وجروح: مادري الله يعلم لين باجر شو يصير...
فهد يبتسم: انصحج تيين..!!! انتي الكسبانه..صدقيني..
ليلى: على خير ان شاء الله بفكر وبتشوفني لو ييت..
فهد مبتسم وطلع عنها وركب موتره وهي دخلت البيت وشافت سلامه يالسه في الصاله بروحها..
ليلى: انتي للحين ما سلمتي على امج؟
سلامه بدلع: لاء..
ليلى: يا ثقالتج!! يالله نشي بنروح بيت راشد...
سلامه بتردد: يكون احسن بعدين..
ليلى: ريلج بيي الحين يالله نشي..
سلامه: منو هناك؟
ليلى: امج بس..
سلامه اللي ارتاحت ان ابوها مب هناك: اوكي عمتي انا بسير بروحي ...
ليلى ابتسمت: على راحتج...
ونشت سلامه وطلعت بتسير بيت ابوها...وليلى طلعت فوق بتصلي...ليلى اللي صدق لو قلت انها صارت بقايا انسانه بكون قصرت بحقها..اللي ياما تحملت وصبرت وعاشت وقاست المر عشان ناصر وردت ورفضت وعاندت الكل واخر شي برخيص يبيع المحبه..والادهى من كل شي انها تقول له انها نست وبتعيش وياه شرات ما تعيش ويا راشد ومبارك..!!! معقوله انهت كل شي ..؟ لا لا ما اظن حب العمر ينتهي بلمح البصر...
بطلت باب الحجره وهي واقفه عند الباب شافت مقبره جماعيه الكتب تحت والعاب شيخه فوق الشبريه وتحتها وكبتها ملعوز وثيابها نصها برا والغرفه غاديه مزبله..
نقلت نظرها في كل مكان تشوف اذا حد في الحجره ممكن يسوي جي بس ما لقت أي حد..وعلى طول سمعت الحشره في حجرة عايشه وسارت بكل عصبيه ونفسيتها التعبانه من الصبح وبطلت باب الحجره وشافت عايشه تصلي وبطي وهزاع يلعبون بلاي استيشن وشيخه وفهد الصغير يالسين يقطعون مجلات يايبينها من حجرة ليلى ويشخبطون على اليدار بألوان شيخه الخشبيه...
ليلى بزعيج: شيخه!!!
شيخه ابتسمت بخوف: مث انا مث انا..!!
ليلى صدق محرجه من الخاطر ودخلت ومسكتها من ايدها ورفعتها عسب توقف: نشي يالله اشوف جدامي..!!!
شيخه عصبت: مالث خث مالث خث..
ليلى تيرها بعنف: امشي جدامي ولا كلمه...
فهد والباقين زاغوا وعايشه كانت تصلي فما قدرت تتصرف...ودخلت ليلى وشيخه الحجره وهي راصه على ايدها بقو وشكلها عورتها..
ليلى بضيج: ممكن اعرف منو بسوي بالحجره جي؟ ممكن اعرف؟
شيخه صخت..
ليلى: انكري قولي مب انتي...يالله ارمسي منو..
شيخه: امي .....
ليلى تدزها لداخل: ادخلي يالله اشوف ردي كل شي مكانه والله يا شيخه بتنضربين وانا صبرت عليج وايد..
شيخه بتصيح: ماليد..
ليلى بعصبيه اكثر: شيخه مب كيفج يالله تعلمي الشي اللي تخربينه انتي تعدلينه وتردينه مكانه...تفهمين..!!
شيخه صاحت..
ليلى بضيج: اقولج اسكتي راسي يعورني مب ناقصه ويع راس زود (وتصارخ) اص ولا كلمه..
سكتت شيخه وهي تشوف عمتها شابه لاول مره ضو وضربتها ..صدق دزتها من على جتفها بقوه صوب الحجره ويوم بتصيح ضربتها على كتفها بقوه..وشيخه ما قدرت تستوعب شي..وقبل تنفجر صياح كانت تجمع ثيابها اللي عفست بهن الحجره وتدخلهن الكبت بشكل مب مرتب بس من الخوف لا تسوي بها ليلى شي..
ليلى بجديه: اليوم بتتعلمين كيف تكونين صدق انثى يوم حد يقولج انتي بنت تعرفين شو يعني ان انتي بنت...
شيخه ما ردت وكانت ماده بوزها شبرين للارض ما توقعت ليلى تتصرف معاها جي..
وليلى اصلا من الصبح محتره وضايجه ومحد في وويهها غير شيخه وكانت اول وحده تحصل وتجمع غضب ليلى...
عقب ما خلصت شيخه ترتيب العابها وثيابها فجت الباب بتطلع..
ليلى اللي يالسه على الشبريه: على وين؟
شيخه ماده بوزها: عند يدووه..
ليلى: مع السلامه ذلفي وصكي الباب..بس لا تييني في الليل تصيحين ماباج..
شيخه صاحت وهي تفتح الباب: انا بعد ماليدث..
ليلى تغايضها: فكه وانا بعد..
وطلعت شيخه مقهوره وليلى فيها اللي يكفيها فطنشتها عشان ترتاح..
.....................
ردت حصه البيت واول ما دخلت سيارتهم الباركنج في البيت نزلت وهي متغشيه مع سمر.....وشافت سيارة ابوها بس موجوده يعني ان خليفه مب موجود في البيت..تنهدت من قلبها وهي رايحه صوب باب الصاله ومن الباب الخارجي تسمع السوالف والحشره والضحك...وكانت تشوفهم من جدار الصاله الزجاجي ولمحت بنات خليفه وهن يضحكن وعرفت اكيد ان حمد موجود ويالسين يسولفون...وقبل لا تدخل فكرت شو بتسوي الحين..ما تريد تشوفه ولا تريد ابدا حتى تسلم عليه...
توكلت على الله وبطلت باب الصاله ودخلت..
حصه من ورا الغشوه الخفيفه: السلام عليكم..
كلهم : وعليكم السلام ورحمة الله..
حمد كان يطالعها بنظره مستغربه من وين يايه هذي؟
ام خليفه: من وين يايه؟
بو خليفه: انا مرخصنها سارت ويا ختها والبشكاره يشوفون اثاث لحجرتها...
استغربت ام خليفه: البشاكير كلهن هنا ما شفت حد سارت وياها...
حمد بنظرات غريبه: عيل وين؟
طالعته حصه بنظره حاقده عليه: ما يخصك..وبعدين يا امايه دامني مستأذنه من ابوي ينتهي الموضوع..
وطلعت فوق وما ردت عليهم...
بو خليفه: حصه انزلي ابغيج...
بس حصه ما ردت على ابوها وكملت رايحه فوق...
سلمى كانت متألمه لحال اختها وحمد انصدم من موقفها وجدام اهلها بعد تحقره وتهينه...لا لا اللي تعرفه حصه مب شي سهل..اللي في قلب حصه مستحيل يكون على شي سهل..
حصه اللي ياما تحملت مستحيل يكون نفذ صبرها على شي هين..مب حصه اللي تتنازل عن حبها لو بكرامة الدنيا كلها...ليش وكيف ومتى كل هاه يصير.؟
كل هذي اسئله تدور في راس حمد اللي ضاع تفكيره من يوم طلعت حصه فوق...
ام خليفه: اشعندها البنت استخفت...
بو خليفه: مادري بها بس يوم يتني العصر شكلها ضايجه وجنه فيها شي..
حمد: يمكنها تعبانه...
حمده: ما شفتها اليوم ابد كانت هذي اول مره اشوفها من امس...
عفرا: فديت عمتي بطلع اشوف شو فيها...
سلمى: خلوها لحد يضايجها تعبانه..
حمده: شو فيها؟
ام خليفه: الا بزا ما فيها شي...سارت الدوام ما تعبت ...الحين بيحل عليها التعب..؟؟
بو خليفه: سمر قومي ازقري ختج..
حمده: يدي تراهن ما يرمسن بعض..
ام خليفه: وشعنه ما ترمسين ختج..ماكله حلالج ولا شو؟
بو خليفه: يالطبانه اللي بينكن حشا مب بين الضراير...
سمر: لا خلاص تراضينا والحين بسير ازقرها...
اما فوق وصلت سمر ودقت الباب..وسمعت صوت صياح حصه لين برا..كانت حصه صدق ضايجه وما فيها حيل تتحمل زود عن اللي صار...من وين بتلاقيها ولا من وين...وسمر عورها قلبها على ختها ومع كل الخوف اللي بقلبها دخلت الغرفه ومن عند الباب..
سمر وهي ماسكه الباب عشان تشرد لو قامت لها حصه: حصه ابوي يبغيج تحت ضروري...
حصه: طلعي برا قولي له ماريد..
سمر: بس هو يقول لا تعذبينه يطلعلج فوق نزلي الحين..
حصه وهي ترفع راسها بس ما طالعت سمر عشان ما تشوفها: قولي له خلاص بنزل..
سمر بتردد: حصه..!!
حصه ما ردت عليها وسارت تغسل ويهها في الحمام..وسمر ما تحركت ابد من عند الباب...
سمر: حصه ادري انج تسمعيني بس مب لازم تردين علي...ترا حمد شكله معصب يوم رديتي عليه وفشلتيه جدام اهلي..
حصه وقلبها يدق بسرعه: هذا ما يخصه فيني خليه يروح يكمل غرامياته في دبي ويخطب له بنات الشوراع ويغازل سكرتيرات المكاتب..ماباه يكون موجود يوم انزل تفهمين..وروحي قولي له هالكلام...
سمر نزلت على طول وحصه تمت شوي وراها تلبس وتحط ثلج على جفونها عشان يخف الورم...
وفي الصاله تحت...
بو خليفه: شو قالت؟
حمد: يمكن راقده..؟
سمر بتردد: قالت...(وسكتت)
ام خليفه: شقالت يا ثقالتج يا سمر..؟
سمر خافت: قالت بنزل الحين...
بو خليفه: حصل خير...
ام خليفه: وشعندها تزاعج صراخها واصل لهني؟
سمر برمسه مقطعه: ترا..ترا هي..انا ..انا اذيتها وتميت العوزها...
خافت سمر تقولهم اللي قالته عن حمد ما تبى حمد يروح..سمر يعيبها ولد عمها كله سوالف وضحك ويربش اليلسه...
"ما بخبرهم اخاف يروح حمد وبعدين محد بيسولف وما بنرتبش..اخاف ما يي بيتنا مره ثانيه وما يسولف لنا..ما بخبره عيب اصلا اني افتن بكل شي واحسن شي اني بس اوصل الرمسه اللي تونس..(وابتسمت)....بس حمد حليله ما سوا شي ..مادري شو تقول عنه حصه بس ما يخصني انا ما شفته مسكين ولد عمي.."
كانت سمر تراجع نفسها شو سوت وشو ما سوت وهل اللي سوته صح ولا لاء...وما حست الا بصوت حصه اللي كان ثقيل شوي من الصياح..
حصه تهوي على راس ابوها وتحبه: مساك الله بالخير...
وهي نازله على راس ابوها تسلم كان حمد يالس حذاله على طول واول ما رفعت راسها يت عينها في عينه على طول وهي غمضت ونزلت راسها وسارت بتيلس حذال امها..
بو خليفه يقبض ايدها ويرها صوبه: تعالي يسلي عندي..
حصه خنقتها عبره مب وقت دلع هي مب ناقصه عاد من يدلعها حد بتصيح..ويرها ابوها ويلست على يمينه..
بو خليفه: شحالج اليوم؟ وشحال الدوام وياج..؟
حصه بصوت مخنوق: زين..
ام خليفه: يالله يالبزا..!!!!
بو خليفه يضحك: تغار امج تغار..
حصه تبتسم عشان ابوها بدون نفس..
بو خليفه : ما بتسلمين على ولد عمج؟
حصه وهي منزله راسها ما تبغي حد يشوف عيونها : تراه وياي في الدوام...
بو خليفه يضحك ويلوي عليها: ترا السلام ببلاش...
حصه تبتسم من ورا خاطرها: شحالك يا حمد..
حمد بنظرات ابرد من صقيع الاسكيمو: بخير الله يسلمج شحالج انتي.؟
حصه وهي بتصيح: الحمدلله..
تموا يسولفون وما حب بو خليفه انه يفتح الموضوع جدام حصه عشان ما يحرجها جدام ولد عمها ماحب يتخبرها شوفيها ومن مضايجها ..خاف شي من امور البيت واستحى يحجرها جدام ولد عمها..وام خليفه نشت عنهم بتسير حجرتها وبنات خليفه تمن ساكتات يوم شافن عمتهن ضايجه صح بينهن رباعه بس بعد يحترمن خصوصياتها..
سلمى: انا بسير فوق...
وطلعت سلمى ولحقتها سمر..وحمد وعفرا تمن يطالعن بعض..يعني شكلهن غلط وهن يالسات من بينهم..وراحن هن بعد...ويوم ما بقى بالصاله غير حمد وحصه وبو خليفه..نش حمد بيروح..
حمد: يالله من رخصتكم بسير البيت انا..
بو خليفه يتسند على كتف حصه وينش: حرام ما تروح وعشاك الليله ويانا..
حمد: لا والله يا عمي ماروم وانا تعبان وايد ...للحين ما رقدت من رديت من الدوام..
بو خليفه: حتى حصه ما رقدت مب لازم بتشبع رقاد ايلس ايلس انا حلفت عليك...
حمد مصر على رايه: لا والله ما تم لازم اسير اليوم كان علي ضغط كبير وما رمت حتى اوقف في البريك المدير معرس وخذنا التايم ماله اليوم هو والخبير..
بو خليفه:لا لا والله بتتعشى ما بتردني وانا بشيبي..
حمد: تخبر حصه لو ما تصدقني والله اني تعبان يا عمي..
حصه تنش: ابويه خله يسير لا تغصبه ييلس اذا ما يبغي...
حمد حس انها ما تباه ييلس ورغم انه يبغي يعاندها بس هالمره تنازل: خلاص عمي والله اني ماروم حلفت بالله..خلاص بييكم ليله ثانيه والله...
بو خليفه: ما بروم لك انا اذا ما حشمتني..
حمد: والله يا عمي ما عاش اللي ما يحشمك بس والله ظروفي ما تسمح...!!!
طالعته حصه بنظره استغراب من تصرفه وهو شاف هالمره عيونها حمر وخدودها مورده من الصياح..
حمد: ان شاء ا لله بييكم بأقرب فرصه لا تزعل يا عمي..
بو خليفه: خلاص لا تتعشى واتريا خليفه الحين بيحدر وبييلس وياك انا بسير اتوضا العشا بيأذن عقب شوي وانت سير تيدد عشان تصلي..مابروم اسير له المسيد الليله ركبتي مادري بلاها تضرب علي..
حمد: سلامتك يا عمي ما تشوف الشر..
وخطف عنهم بو خليفه وحصه بتسير فوق ..بو خليفه دخل الحجره..وحصه طالعه الدري..
حمد بصوت واطي: اييه..!!!
لفت حصه تشوف شو يبغي..
حمد يبتسم: تعالي ابغيج...
حصه ونفسها ما تبغي تشوفه: لاء انا بسير حجرتي...
حمد : حصه تعالي ابغيج بكلمتين وردي..
حصه ردت تنزل: هاه خير.!!!
حمد : تعالي برا اخاف يظهر عمي ويتحراني اقص عليه وما بصلي..
حصه بنظره غريبه: وليش ان شاء الله برا اذا عندك شي قوله هني..
حمد: لا ابغيج توصليني للباب وانا ساير المسيد وبقولج شي ..
تنهدت حصه: اوكي تعال بنسير..
وطلعوا من باب الصاله...ووقفت حصه على الدري الكبير اللي ينزلها حوي البيت وهو نزل يتحراها وراه..ولف يوم حس بها وقفت..
حمد وهو لاف ويهه عليها: تعالي ..
حصه: ارمس هني ماقدر اطلع برا..
حمد يلس على طرف الدري بس بعيد وايد عنها يمكن باقي بينه وبين اخر دريه ثنتين بس وهي على اول ثنتين وبينهن كذا وحده..لفت حصه ايديها مثل اللي يقرا..
حصه: ارمس..
حمد: من وين ييتي؟
حصه استنكرت: انت يايبني هني عشان تتخبرني من وين ييت؟ وانت شعليك؟
حمد: كيف شعلي وانا ولد عمج...!!!
حصه: قلتها ولد عمي..مب اخوي ولا ابوي ولا ريلي...
حمد: اها يعني ولد عمج ما يتدخل فيج..هذا منطقج..الا اتدخل وغصبا عنج بعد...
حصه بعصبيه: وايد ما شاء الله واثق من عمرك....
حمد: اكيد لاني ادري انج بس تقولين هالكلام لي انا ولا ما ترومين تقولين حتى نصه جدام خليفه...
حصه: ما يخصك في اخواني...
حمد بعصبيه اكثر: تراج مصختيها...!!!
حصه بضيج وشوي وتصيح: والله محد مصخها كثرك...ولولا خوفي من اللي بيسوونه اخواني جان قلت لهم على كل استفزازاتك وحركاتك اللي ترفع الضغط وياي...
حمد يمتصخر: ليش تخافين علي..؟
حصه تكابر : ليش اخاف عليك.؟ ياهل انت؟
حمد بصوت هادي: ليش بس يخافون على اليهال..يعني الحين امج ما تحاتيج ؟
حصه ونبرة صوتها بدت تهدا: انا بنت يفرق معاي...وانت ولد ما ينخاف عليك...
حمد مستنكر: ولد؟؟
حصه تضحك: سوري اقصد ريال..
حمد: ايوه يا شيخه اضحكي ما شي يستاهل زعلج صح يعيبني اطفرج بس مب لدرجة الصياح بقص راسه اللي يصيحج..
حصه تشققت: زين انت ما تروم لديايه وتقول لي بتقص راس حد..؟
حمد: افا!!!
حصه: انزين انا بسير داخل الحين سير صلي انته ...ونشوفك بالدوام باجر..
حمد:..انتي شوفيج جي متغيره (وبصوت يمتصخر ويسولف وياها) حد جرح كبرياءج ولا اهانج..(ويبتسم وهو ينكت عليها)
حصه تطالعه هالمره بصدق ومركزه من الخاطر في عيونه هي واقفه وهو يالس: محد جرح كبريائي كثرك..!!!! ومحد اهان احساسي بيوم كثر ما سويت..
حمد انصدم منها من خاطره: هاه؟
حصه تنهدت: انا بسير اصلي...اشوفك على العشا ان شاء الله...
حمد: حصه لحظه...
حصه: نعم خلصنا رمستنا ما ظني بقى شي ما قلناه خلني اروح اصلي لا تستوي شيطان واقف بويهي عسب يأخرني عن صلاتي..
حمد بقهر: لحظه للحين ما قامت الصلاه صبري شوي؟
حصه تلف عليه: ارمس انا اسمعك يالله..
حمد هالمره طفح به الكيل وهي ترمسه كل يوم تنغزه بالرمسه وكل يوم تعيد على مسامعه انه الوحيد اللي ماضيه اسود بهالدنيا وانه الوحيد اللي مخرب وما عنده احساس وانه الوحيد اللي ما يراعي مشاعر حد..وقرر يرمس ويصير اللي يصير...
حمد: سمعي يا حصه...!!!انا هالمره ما بسكت لج ولازم اعرف انتي ليش متحامله علي هالكثر...ترا اذا قلبج اسود بتمين شاله فيه وما بترمسين وان كنتي ناويه خير رمسي عشان يكون في نصح اكثر من بينا هذا اذا كان قصدج تعرفين الصدق..اما ان كنتي ناويه على اشياء ثانيه فما اقولج الا ان نيتج للاسف مب صافيه وقلبج يعرف الحقد وانا كنت اتحراه لاء..
حصه وهي ترمس باستخفاف: وشو تباني ارمسك..عن البنات اول؟ ولا عن اسلوبك الراقي في معاملة الناس ومعاملتي الخاصه؟ تباني ارمس عن سواياك اللي الكل يعايرني فيها...؟ ولا عن مغامراتك والرمسه اللي كل يوم حد يي ويتلذذ في توصيلها لي شخصياً...؟ ارمس قول بشو تباني ابدا ببدا...تباني اعد فيك دواووين ولا تباني اكتب فيك مجلدات واتم ال.......وسكتت..
كانت المؤذن يقيم الصلاه وهي رددت وراه..
حصه: يالله روح صلي احسن لك من تفاهات الدنيا...شكلنا مستحيل نتفق..
حمد للحين يطالعها بقهر بس ما نطق...وهي راحت عنه داخل..
وراح المسيد وهي طلعت فوق تصلي...وانقطعت اللحظه اللي ممكن فيها انهم يفهمون بعض يتصارحون يقول لها وتقول له..لا لا ما يحتاي انها تقوله..هو عارف باللي في قلبها قبل تنطق..لكن هو ..هو المصيبه كيف بيتكلم وكيف بيواجه وشو مبرراته..معقوله تغفر غلطاته؟؟ معقوله تنسى وتسامح..؟ معقوله انها صبرت على كل شي واي شي وحمد استنفذ صبرها واليوم يوم انطعن كبرياءها يترياها تسامح..حتى لو على ماضي؟ معقوله تسامحه على ماضيه ولا تركب راسها وتنتقم لكل ايام العذاب اللي طافت...؟
.........................
اليوم الثاني الصبح راحت ليلى ويا دريولها وحصه ويا دريولهم...اليوم هو عرس ناصر فشي مؤكد انه ما بيداوم وحمد متحلف في حصه وهالمره صدق ما عادت تهمه مشاعرها ومثل ما تتعمد انها ترفع ضغطه وتجرح كبرياءه هو مستعد يسوي المستحيل عشان يخليها تنذل له بشكل لا يمكن تفكر عمرها تسويه..وفي مكتب البنات كانن ساكتات حتى كلمة شحالج ولا وحده نطقت فيها منهن...وكل وحده منهمكه في شغلها وليلى على كثر ماهي محتاجه حصه اليوم تخفف عنها جرحها كانت حصه مكتفيه بهمها ويكفيها اللي فيها..وحتى مافكرت في ليلى ولو لثانيه وحده...ووصل بريك الغدا ولا وحده سارت تتغدا رغم انهن يواعى بس ولا وحده تقدر تروح تتغدا بروحها...وليلى نفسها كانت على ضيجها مسدوده من الخاطر..
وشوي الا وتلفون حصه يدق..
حصه: الو خير..
عفرا اللي تتصل من البيت: هلا عمتي..
حصه: اهلين شو تبين؟
عفرا: ماشي مهم بس انا ابغيج تقولين حق ليلى تعطيج رقم موبايل سلامه لو عندها واذا ما عندها خليها تعطيني رقم بيتهم..
حصه:ليش شو تبينها؟
عفرا: ابغي اعزمها بيتنا تراني ما عرف شي عنها من يوم عرست..
حصه: اوكي بس مب الحين الوضع ما يساعد..
عفرا: اوكي بس الله يخليج عمتي يكون اليوم افضل زين؟
حصه: اوكي عن الحشره بحاول..
وبندت حصه عنها والا بروضه طابه عندهن المكتب...
روضه : السلام عليكم..
ليلى وحصه: وعليكم السلام..
روضه مبتسمه: شحالج ليلى.؟
ليلى: الحمدلله شحالج روضه.؟
روضه: بخير ..مشغوله؟
ليلى: لا والله بس يالسه اراجع الملفات...
روضه: عيل بيلس...
حصه تمت تعابل اوراقها وماهتمت دام ان ليلى راضيه باللي يصير ما يهمها خلاص طفح الكيل كم بتتحمل وفيها من المشاكل اللي يكفيها ومب محتايه تعور راسها زود ويا ليلى..وشوي الا وحصه ناشه بتسير ..
روضه: على وين حصه؟
حصه باحتقار: شغل...
وطلعت...
روضه: شفيها علي؟
ليلى: مافيها شي هي شوي ضايجه ولا حصه مافي اطيب عنها..
روضه: من متى وانتي تعرفينها...
ليلى مبتسمه: حصه تستويلي اللي بينا مب رباعه..نحن اهل قبل نكون ربع...
روضه: والله؟ ما شاء الله يعني حمد يستوي لج..
ليلى مستغربه من ربطها: مب وايد بس نعرفهم..
روضه بتردد: تعرفين يقهرني وايد...!!
ليلى: ليش يقهرج..(وقالت في خاطرها اكيد مأذنها ويتحرش فيها)
روضه بكل صراحه: يختي ما يعطي حد ويه..بس انا ماصدق انه غرور..تعرفين شكل حمد يبين انه راعي بنات وسوالف لكن يوم شفت اسلوبه انصدمت..احس حد في باله..
ليلى انصدمت من صراحتها وانجلبت الايه: مادريبه والله...
روضه بقرف: وهالمدير الغبي ليش مأجز صار له يومين يا شينها من اداره...
ليلى طالعتها بطرف عينها: احم تراه ولد عمتي..
روضه اللي احمرت من الخجل: اسفه مب قصدي..!!!
ليلى مبتسمه: لا عادي حبيبتي..لازم ياخذ اجازه ترا اليوم عرسه ما تعرفين؟
روضه شهقت: قولي والله؟ منو تباه هالبليد...حليلها بتتجمد...
ليلى بنقمه: وليش ان شاء الله؟
روضه: وايد بارد ثلج ويستحي وايد..لاحظت عليه..
ليلى تتنهد: ماشاء الله عليج مسرع حللتي شخصيات الموظفين..
روضه تتعبث بالقلم على الطاوله: ماشي شغله...
ليلى: تغديتي؟
روضه: والله لاء..شورايج نظهر نتغدا برا..
ليلى مبتسمه: اسفه فديتج تبينا ننزل الكافتيريا ما عندي مانع..تراني ماحب اظهر من ورا اهلي..
روضه مستغربه: تراج موظفه وهالشي مب غلط ولايسئ لج..وانتي ما سويتي شي يخوف..
ليلى مبتسمه: مب شرط اللي اسويه يكون غلط..كفايه انه من وراهم..
روضه مستغربه: اوكي اتصلي واستأذني من امج..
ليلى: لا فديتج ماروم ادريبها بترفض مافي داعي احرج عمري وياها..
روضه: حليلج...!!! تعرفين ليلى على طول الفتره اللي طافت عمري مافكرت اقرب من أي حد او اتعرف عليها كانن البنات يبني ويبن يتعرفن علي بس ما جد فكرت في صديقه...والله ما جاملج من اول ما شفتج ارتحت لج وايد وايد فوق ما تتخيلين..
ليلى مبتسمه: فديتج الغاليه من طيب اصلج..
ويدق تلفون ليلى...
ليلى: الوو..
شرملى: ماما ليلى شيخه يصيح يريد يكلم انتي...
ليلى: عطيني اياها...
شيخه تصيح: امي ششششوفيها ما تخليني اثوي اولااان...
ليلى تتنهد: ردينا للالوان..شواخي سمعي الرمسه يوم ارد بضربها الحين لا تلونين لين مارد..تفهمين حياتي..؟
شيخه:ماليييد..
ليلى: لحوول شيخه اقولج سمعي الرمسه ولا بسوي بج اللي سويته البارحه..
شيخه بعصبيه فرت السماعه: ششششرملى كلمي ماما..
شرملى: هي صيح..
ليلى: خليها تولي لا تسوين لها كل الي تبغيه حشا غادين وصيفاتها وهي اميره وممشيه رايها على الكل..
شرملى: انشششششاء الله ماما..
ليلى تضحك: حتى انتي انعديتي من ششش..يالله خلي بالج منها ..لا تأذي امي..
وبندت ليلى..
ليلى: والله هالبنت مشاكل..
روضه مبتسمه: بنت اخوج ولا اختج؟
ليلى: لاء بنتي انا..
روضه شهقت: انتي معرسه؟ يالله عاد عن الطنازه.!!!
ليلى تضحك: ليش ما يبين..؟ انا شكلي كبيره مب صغيره..
روضه: بس ما يبين انج كبيره يعني معرسه...
ليلى تبتسم: لاء لاء هذي بنت اخوي الله يرحمه امها وابوها توفوا في حادث وانا مربيتنها..
كبرت ليلى زود في عين روضه عن قبل وحست ان هالانسانه فعلا تستحق اكثر من الاحترام..والحب والتقدير..هالشخصيه فعلا فذه وفريده..
روضه: ماشاء الله عليج..
وتمن يسولفن ودخلت حصه المكتب وهي شاله ملفاتها...ويوم ما رمست مع ليلى... روضه حست ان بينهن شي وان ليلى وحصه متضاربات...
روضه بهمس: زعلانات؟
ليلى تبتسم وتغمز لها: نتغلى على بعض...
روضه تبتسم: يا حظها فيج..
ليلى تهمس: اسكتي لا تسمعج وتسفرنا...
روضه تكلم حصه: سلمتي اوراق العمل؟
حصه بدون ما تشوفها: الحين بسير لدانيال...
ونشت حصه مره ثانيه وطلعت فوق..وخطفت صوب مكتب حمد وناصر وتنهدت وكملت مشيها صوب المكتب...عسب تسلم اوراقها وتخلص عمرها تبغي تروح البيت...دقت الباب ودخلت...
دانيال: Hi Hessah!!!(مرحبا حصه)
حصه بثقه: Hi sir this is my work I finshed it, u can check it and plz don’t send it 2 me 2day coz I’ll leave the company now
دانيال مبتسم: Oh hessah!!! U can take ur fiels now, no need to check it now if u will leave, tomorrow we will discuss the points in the papers.
حصه مصدومه: Why? Wat happened?
دانيال مبتسم: nothing important but u look very tired, so take more rest today and we will complete the work tomorrow
حصه: that’s fine with me, see u bachr (وقالت باجر بالعربي تستهبل)
دانيال يضحك: Ok good luck (وبلغه مكسره) مأ السلامه..
وطلعت حصه وهي ميته من الضيج والهم اللي على راسها...واللي يزيدها مراره انها بترد المكتب وبتشوف ست الحسن والجمال في المكتب متفيزره جدام ليلى...حتى ليلى صارت تحس انها كريهه وما تراعي مشاعرها...
"حتى انتي يا ليلى اللي اقول يتغير الكل وتمين اصيله تغيرتي..صدق اللي قال ما يتغير الا الحي...حليلى والله..مدري بلاقيها منج ولا من هاللي ما يسوا.."
فضولها ما خلاها تكبح جماح نفسها وخطفت من حذال مكتبه لو انها ما بتحدر بس صارت عاده تمارسها غصبا عنها..حبه صار من ابجديات حياتها لا يمكن انها تمشي او تتحرك او حتى تنام بدون ما تفكر بهالانسان...لكن هو وين وتفكيرها وين..!!!!
وقبل يولد الحلم انجتل...قبل تتنفس الكلمات اختنقت..وقبل يشع الضوء خيم الظلام..وقبل تنطق الشفاه كسا المكان الصمت..ويا صوتها يشق السكون وضحكتها الغجريه تدوي كالرصاص في اذان حصه..تعدمها وتنهيها من الوجود ويهدم كيانها وانسانيتها ويزيد نزيف جراحها يوم تسمع تماديه وياها وقسوته وهو يتعمد يكلمها ويفج باب المكتب عشان تظهر رمستهم..يعورها قلبها كيف يضيع هيبته على بنت شوارع ما تفهم...
روضه بدلع فضيع: والله انك سوالف يا حمد..
حمد اللي كان حاس بوجود حصه: زين شي بقالج من الشغل..ولا بخبرج سالفه ثانيه...
روضه متشققه: وين لو عندي شغل عادي هالسوالف ما تتفوت..
حمد: شو سويتي اليوم؟ ووين رحتي؟
روضه: ما سويت شي خلصت ملفي بسرعه وعقبها خطفت صوب ليلى وبنت عمك...
حمد اللي استانس على سيرة حصه عشان تسمعهم: شخبارهن؟
روضه: صدق ليلى تستوي لكم؟
حمد: انا ما تقرب لي بس من معارفنا هي تستوي لحرمة عمي..
روضه: اها..حليلها وايد طيبه..
حمد: وايد وخلوقه..
روضه بتردد: بس بدون زعل انا ماحب هاي بنت عمك..وايد شايفه عمرها..
اصطنع حمد الضحكه عسب يقهر حصه وهو وده يصفع روضه...
روضه تبتسم: صدق والله تييب المرض مدري على شو شايفه عمرها...؟
حصه اللي برا انقهرت وما رامت تمسك عمرها اكثر عن جي ووقفت حذال الباب وطالعت حمد من فوق لتحت واحتقرت روضه لدرجة انها ما حتى طالعتها...
حصه بقهر: ان ما حشمة بنات عمك وخليتهن بحسبة خواتك..ما بقول غير عليه العوض...!!!
حمد ابتسم عشان يقهرها: هلا هلا مليون بحصه...
روضه ارتبكت رغم كرهها لحصه بس تخاف مرات من ردة فعلها...
حمد: شعندج مشتطه..نحن هني نبدي اراءنا بسهوله مافيه شي يزعل..خلج ديموقراطيه...
حصه باستنكار: خلك ويا زبالتك ديموقراطي..مب وياي انا تفهم!!! على الاقل لو ما بتحترمنا احترم مكان شغلك اللي انت فيه واحترم مسؤوليتك اللي انت قابضنها...حشا عليه ما جد شفت حد مثلك...
وعطته نظره تقوله فيها انت ولاشي انت زباله واقل من زباله بعد...هو في البدايه ما سوا لها سالفه لكنه عقب تلاعن ويته حالاته..ما خلاها في حالها وتحلف لها ان مايابت روضه وياها فايده لا يسوي اللي العن واشد عن روضه....
وصلت حصه مكتبهن وشافت ليلى تيمع اوراقها وشكلها رايحه البيت..عورها قلبها..تبى تقول ليلى انا محتاجه لج حسي فيني..بس ماقدرت ومشت ببطء صوب مكتبها وهي تقول يا رب انها ما تسير البيت يارب...بس ليلى شلت اغراضها واتصلت تلفون...
ليلى: انت وصلت؟
الدريول: انا برا واقف ادا يخلص انزلي...
ليلى:اوكي باشا الحين انا نازله...
حصه بغت ترمس بس ردت ومسكت نفسها لا تحس بشي ولا تسوي شي ما تبغيه..ولا تخاف حتى انها تندم عليه...وليلى طلعت من المكتب وحست ان حصه فيها شي..ووقفت شوي عند الدري..
"ياربي انزل ولا مانزل...فديتها والله شكلها صدق تبى ترمس وتطلع اللي بخاطرها...بس اكيد هي زعلانه(وتنزل من فوق) مافيني على لسان حصه ومابغي احرج عمري وياها...شكلها بتفج زعلها وضيجها فيني..خلني اروح البيت ويحلها الف حلال عقب..."
نزلت ليلى وقلبها يعورها على حصه...بس تكابر لا ترمسها..وحصه نفس الشي كانت ساكته ولا تبغي تتكلم تحس خلاص الكل بدا يتلاعن وكل حد ياخذ دوره في حياتها...حمد اللي طول العمر حبته واخلصت له وتريته وهي تتحراه يدرس وبيرد عشانها ويكلم اهله فيها..اكتشفت انه طول الفتره اللي قضتها تترياه كان يحب من وراها..يعني عمره ما وهبها احساسه وعمره ما فكر فيها اكثر من بنت عم او ان شاء زوجه..عمره ما وهبها مشاعر ولا كن لها أي حب..وفي الوقت اللي سامحته وغفرت له كل ذنوبه..في الوقت اللي حمد قرر يكون لحصه وهي تكون له..الوقت اللي قرر فيه يعيد تكوين نفسه..اكتشفت حصه ماضيه وللاسف الحقيقه المره انها ما تقدر ولا بتقدر تسامحه...لانها الحين مهما حبته وضحت عشانه بتم بقلب مكسور مجروح يحمل جروح الماضي وعذاب الحاضر وغموض المستقبل...
........................
العصر في بيت ام احمد وعلى درج باب الصاله اللي مجابله الحوش...كانت يالسه تشرب كوب الشاي وريلها يالس حذالها ويسولفون..كانت سوالفهم عفويه وكلها دلع ومغايض لين ما يابوا طاري العرس..
احمد: تبين تروحين؟
سلامه: مالي خاطر تصدق..اصلا ماعرف حد ومادري اذا حد نعرفه بيسير...
احمد: بس هذا ولد عمة ابوج..يعني لازم تروحين...
سلامه: بتصل في عمتي بشوف اذا بيسيرون برد وياهم..
احمد: لاء انا بردج هني البيت...(ويمسك صبوعها يلعب فيهن) اخاف تروحين ويغصبونج تباتين...
سلامه استحت: وشو يعني اذا بيت عند اهلي فيها شي؟
احمد: مافيها شي بس ماظني اهون عليج اتم بروحي...
سلامه: مابتم بروحك اهلك بالبيت..وبعدين صبرت كم سنه ما بتروم تصبر ليله...؟
احمد: ماعده من عمري اللي راح..بس احسبه من يوم شفتج..هني بدا عمري..
سلامه تشققت: لا لا عن الحركات والله استحي..
احمد يضحك: تعجبني عفويتج...!! ونقاء سريرتج..
سلامه: شو يعني سريرتي..؟
احمد: أي مدرسه كنتي..؟
سلامه: ما يخصك...تبغي تتطنز علي..
احمد: في حد ما يعرف شو يعني السريره؟ مب قايل خلاص خلج تمين غبيه..
سلامه: انا غبيه؟ عيل انت شو..
احمد بخقه وهو يغايضها: متعلم ومخلص الثانويه ودارس برا ست سنين..ما يكفيج..(ويطالعها بغرور وهو يمزح) قولي حد في عايلتكم جي؟
سلامه بنقمه: زين وشو يعني..ابوي دارس برا وعنده شهاده من جامعة امريكيه وامي خريجة جامعة الامارات وعمتي خريجة ادراة اعمال من جامعة الامارات وعمي خريج هندسه بتروليه وولد عمي بيكمل دراسته برا عسب يدرس طب بعد ثلاث سنوات واخوي من دون لا يدرس عنده كل شي يتمناه..
احمد يضحك: بل عليج كلتيني...بس يدتج مب متعلمه...(ويطلع لسانه يغايضها)
سلامه تدزه من جتفه: شو تباها تتعلم يا ذكي..هاي زين تعرف ترمس..بس والله انها احسن عني وعنك..ذكيه وعاقله وحكيمه بعد..
احمد: انا يدات عيالي بيكونن متعلمات صح؟
سلامه بخقه: يدتهم من امهم جامعيه بس يدتهم من ابوهم لاء..اصلا امك مب متعلمه بس تحفظ..
احمد: يعني امج متعلمه انتي؟
سلامه محتشره: والله انها جامعيه والله من جامعة الامارات متخرجه...حتى هي من اوائل اللي تخرجوا في دفعتها...
احمد بجديه: سلامه انا سجلت لج اوراقج في النهضه...
سلامه مستغربه: شو بسوي؟
احمد مبتسم: تدرسين الثانويه العامه شو بعد؟
سلامه منصدمه: ليش عادي عندك؟
احمد: اكيد حبيبتي شهادتج لازم تكون عندج ولازم تاخذينها وان حبيتي تكملين تعليمج العالي ما عندي مانع..
سلامه مصدومه وبنفس الوقت مستانسه: احلف قول والله؟
احمد يشد على كفها: اكيد حبيبتي انتي تستاهلين زود..
سلامه تمت تطالع احمد وتنهدت وفي خاطرها.
"فديتك حبيبي والله محد يسواك...والله والله والله احبك"
..وكانوا ساكتين ومحد فيهم رمس..وقبل يرمس احمد طلعت فاطمه عليهم..
فاطمه: يا عيني على الرومانسيه ساكتين وتطالعون بعض...ولا كلام العيون اذا حضر تعجز الالسن..؟
سلامه مبتسمه..
احمد: ياهالحشره اسميها الغيره ما تييب الا ويع الراس..هذي شبيفججنا منها الحين...
فاطمه: خلاص من يوم يت حبيبة القلب ونحن صرنا الحشره مادري منو كان يترجاني اسولف وياه وما يخليني ارقد ويقفل باب حجرتي من برا عشان اسهر وياه في الصاله...؟ تتذكر ولا اذكرك بعد..
سلامه: حليله ريلي يحس بالوحده لا تتمننين عليه..
احمد شهق و يسوي نفسه اغمى عليه...لان سلامه بحياتها ما دخلت في نقاش ويا اهله عنه وبحياتها ما دافعت عنه..مب عشان شي بس تستحي من اخته وامه وايد..فهو انصدم وطاح براسه على ريولها يسوي عمره مغمى عليه...
سلامه تضحك وترفع راسه: اييه شفيك؟
فاطمه تضحك: خليه حليله اخوي قلبه رهيف ما يتحمل..وانتي ما قصرتي..
سلامه استحت: زين انا ما قلت شي ليش اغمى عليه؟
احمد وهو فاتح عين ومغمض عين: قالت لج قلبي رهيف ما تسمعين؟
ورد يغمض عيونه وحاط ايده على قلبه..
سلامه تضحك وفاطمه تطالع اخوها بطرف عينها...
فاطمه: بتنش ولا بعدك تحت تأثير ال....
احمد بطل عيونه: انتي شو مشكلتج بالضبط ممكن اعرف؟
فاطمه: ياخي تقهرني حركاتك ترفع ضغطي..يالله نش صدق ما تنعطى ويه وصلنا الحديقه بطلع امي تشم هوا شوي...
احمد: والله؟؟ وليش ما ترمسين من الصبح..
فاطمه: سلامه بتنشين ويانا .؟
احمد يطالعها ويتريا الاجابه...
سلامه ردت تطالع احمد: اللي يبغيه احمد...
احمد ابتسم: ماشي طلعه يلسي وهن يروحن...
فاطمه عقدت حياتها: وليش ان شاء الله ما تخليها تطلع؟
احمد: كيفي حرمتي..(ورد يطالع سلامه ويلس يرفع حياته وينزلها بسرعه مثل اللي يغايض) عشان يفضى لنا الجو..
احمرت سلامه صدق وبغت تعصب عليه: اييه شو تقول انت؟ عيب ..
احمد يضحك: شو عيب حرمتي عادي؟
فاطمه شهقت وويهها احمر: وابويه عليك انا صدق ما تستحي...وليش نحن يوم في البيت قبضناك منها..هذي جدامك من تصبح وتمسي..
وسارت تربع داخل...
سلامه منحرجه: انت شو تخربط فشلتني..
احمد بنقمه: اسمع انتوا؟ مسوي منكر انا ولا ادري..!!
سلامه تنش: زين يالله نش خيست ثيابك..ما فينا على مجابل الغساله بالساعات..
احمد: كم مره غسلتي ثيابي من يوم خذتج..؟
سلامه بثقه: يا حبيبي والله من يوم عرست ما غسلتهن فاطمه غير مره وحده..ولا تخبرها محد يغسلهن الا انا ..هه عندك اضافات؟
احمد وهو مستانس ويمد ايده عشان تساعده ينش: حياتي انتي!! ما عندي اضافات..الا انج كل مايكرو سكند تكبرين في عيني...
سلامه: شو مايكرو سكند؟
احمد يمسك ايدها ويسيرون داخل: انتي كيف كنتي تنجحين في المدرسه؟ ما تعرفين المايكرو سكند...شو هالفقر العلمي الفضيع؟
سلامه بطرف عينها: زين زين اووف يا كرهي للخقاقين..
احمد مبتسم وهو ينغزها بالرمسه: اسمع من يتكلم بس..!!!
سلامه: اوكي انا بسير لعمتي ابى اقولها بنسير عرس ناصر المغرب بيأذن عقب شوي ما بيمدينا نتلبس ونتعدل لين الساعه ثمان ولا تسع..
احمد: حليلج انتي..ليكون بتصبغين ويه امي؟
سلامه تضحك: هيه بحط لها ميك اب عيناوي عشان قوم بو ناصر يروغونها من العرس..
احمد بطل عيونه: يخسون الا هم...ليش يروغون امي؟
سلامه تطالعه بخقه: نسيت ان دمنا عنابي...يا ويلها اللي تحط ميك اب عيناوي...(وتضحك بلؤم) اقولك احمد قول امين...
احمد: امين ..بس ليش؟
سلامه من خاطرها: يا رب يحطون ميك اب اروى عيناوي عشان اول ما يدخل ناصر يطلقها...
احمد نقع ضحك: عوذ بالله منج لا تتمنين لحد الشر ويرد عليج...
سلامه: لا يا حبيبي انا واثقه شو اللي عندي وعارفه كيف اتصرف وشو اللي يرضيك واللي يغثك...
احمد يهز راسه: اوكي يا بنت والله تطورتي...
سلامه: لحوول من يوم يومي متطوره يالشيبه واعلمك بعد..
وقبل يرد احمد وان امه حادره الصاله ويا فاطمه...
فاطمه: انتوا بعدكم تسولفون ما مليتوا حشا هنود ما تتصكر حلوجكم...
احمد: عوذ برب الفلق...
ام احمد تخز فاطمه بنظره: عوذ بالله من فالج...احمدي الله على انهم متفاهمين هب تتسببين لهم..!!
فاطمه مبتسمه: فديتهم والله امايه بس اسولف...لو تشوفينهم برا يالسين يسولفون تقولين كناري..!!
احمد: فديتني كناري انا...
سلامه بهمس: انت كناري؟ هه اشك..
فاطمه سمعتها: هيه والله صدقتي..الا قولي غراب احسن..
ام احمد: فاطمه شفيج على حرمة اخوج مأذيتنها سكتي عنها..
فاطمه عاقده حياتها وسلامه واحمد يضحكون...
وقربوا من بعض ويلسوا كلهم في الصاله قبل يأذن المغرب ويسير احمد يصلي وعقبها سلامه بتخبر عمتها عن العرس وهم معزومين من زمان بس ام احمد تبى حد يسير وياها عرس قوم بو ناصر وسلامه بترمسها عقب الصلاه..
......................
بعدما قررت اخيراً تهزم ضعفها..وبعدما جاهدت انها تسير وتقضي على اخر بصيص ممكن يشع للحظه بالامل..استسلمت لقلم الروج وهي تحطه على شفايفها وترفع نظرها للمنظره وتشوف نفسها بنظره كسيره تودع فيها اخر لحظات العمر..وتقضي على اخر شمعة امل..تبلع ريجها وتحط قلم الكحل الاسود داخل عيونها الوساع...اللي تعيش اعظم قصة حزن نقشها التاريخ في نظرتها..عيونها تحكي الف قصيدة حزينه وتروي اضعافها قصص حزن وفراق والم وموت ووحده...اليوم ليلى بتشيع الحب اللي عاشت على ضوءه 13 سنه..وبغمضة عين يروح...
شرملى تقطع الصمت: ماما ما بتششششلين ششششيخه...
ليلى اللي توها انتبهت ان بعدها موجوده على كوكب الارض: هاه؟
شيخه داخله بسرعه وبشطانه تتعلق في ريول ليلى: امي وديني معاث..
ليلى تنزل لها: حياتي انتي بنت حلوه ومؤدبه وعشان جي بتقعدين عند شرملى وبتتعشين وترقدين من وقت وبييب لج وياي هديه زين حياتي..؟
شيخه: ماليد اليد الوح معاث..ماليد..
ليلى: حبيبتي سمعي الكلام عشان اللي يسمع كلام امه الله يدخله الجنه..وما يروح النار..
شيخه: اووف انتوا تفرتوا بي...
ليلى: عشتوا..طفرنابج؟ ويا ليت تقولينها مثل الناس..بشو طفرناج ويا هالراس..؟
شرملى تشل شيخه: خلاص ماما البسي ثوب انتي وبعدين كلميها ماما كبيره تحت خلصت..
لبست ليلى فستانها الكحلي المايل للسواد ..اللي رغم سمارتها الخفيفه عطاها جاذبيه وهيبه اكثر من قبل..وتدخنت ولفت شعرها بشكل مرتب وايد وما كان في داعي انها تروح عند كوافيره تسوي لها اياه..نزلت تحت وشافت امها في الصاله تتحرطم عليها...
ليلى: ادري حياتي انج معصبه شسوي والله يمه مالي بارض اسير مب لازم والله؟
ام راشد: شو مب لازم الا لازم ونص..انا ما خذتج عشانه ناصر ولد عمتج بس انا باخذج وياي عسب شي ثاني مب لازم اقوله..
ليلى بلهفه: والله تقولين؟
ام راشد: والله ماقول...يالله جدامي حمدان يتريانا برا...
ليلى يلست: ما بسير لين ما تقولين...
ام راشد بضيج: نشي اخرتينا حسبي الله على ابليسج خلنا نسير الحين عسب نرد من وقت البنت بتمي لروحها في البيت من بيتابعها..؟
ليلى: وصيت عليها شرملى بردي قلبج..الحين ليش تبيني اسير..؟
ام راشد تفج باب الصاله: يالله انزلي بنسير...
ليلى تبى تقهر امها وبمزح: اه عرفت ليش بتوديني...؟ قولي انج مليتي مني وتبين توديني العرس وياج عسب يخطبوني..قولي قولي ادري انج قمتي تستحين تقولين للحريم اني للحين ما عرست والله حاسه فيج..
ام راشد تضحك: خلي عنج المنكر امشي يالله..والله ما فكرت في هالسالفه...
وتتقبض ام راشد في ايد ليلى عسب تمشي للسياره لانها ما كانت بتشوف عدل والبقعه مظلمه هذاك الوقت..اما عايشه فسبقتهم من ساعه ويا الدريول..
وركبن السياره مروحات الخيمه...
وفي الدرب كانت خلود وليلى وام راشد يالسات ورا وحمدان اللي يسوق بهن...حط اذاعة بوظبي وسار بهن..كانوا مسوين لقاء ويا شاعر اماراتي ومتصله بنيه تتخبره عن يديده والمذيعه اذته تبغيه يسمعهم وهو متردد بس عقبها وافق وقالهم انه بس بيقول كذا مقطع لانه يبغيها تنزل في ديوانه وما يبى يحرق المفاجأه...
القصيده عدها الشاعر وليلى مندمجه وياه صدق جرحت كلماته احساسها وقلبت موازينها وهي ما تحس بعمرها بتصيح ولكن القصيده صيحتها..حسستها بطعم الخيانه والغدر والطعن من ورا..حسستها بجيمة الحب كيف تنتهي وكيف الناس ما تصون الموده...والريال يعد قصيدته...
والكل ساكتين وحمدان مندمج..
"خلاص يعني الامل فيك مفقود..وانا اللي كنت احسب شعورك عشاني..حاولت ياما لكن الباب مسدود..الله يعوض حبي شوقي وحناني..كنت احسبك في داخلي دوم موجود مهما اروح بعيد تبقى بكياني كانت محبتنا ابد مالها حدود...كنت بحياتي دنيتي والاماني..وانا بقربك عالمي كان محدود كنت احسب اللحظات ويا الثواني...ما مل من شوفك انا كنت ابى زود...وكلما شفتك قلت ربي عطاني..دايم اقول مثلك في هالكون معدود كنت احلف انك انسان ثاني..كنت الامل كنت العطر كنت الورود كنت اللي اشكي له واقوله اعاني..من كثر ما حبيت عيونك السود كتبت لك اشعار واهديت اغاني..ليش الالم ليش الجفا ليش الصدود..بذمتك يعني صار غيري بمكاني..كفي بيبقى لك على طول ممدود ابعد ليالي بس ارجع لي ثاني..صدقني تلقاني مثل اول وزود بالعكس يمكن زاد فيني حناني..اكذب على نفسي واقول .........."
حمدان يبند المسجل: انزلن من هني..اشوف الريال يأشر يقول مدخل الحريم من هني..
ام راشد: انزلي يا خلود فديتج قبضي لي الباب عسب انزل..البنت مدري وين غارقه من الصبح ازقرها وهي مب في الدنيا..
خلود تبتسم: ان شاء الله يا عمتي..
حمدان: عمتي انزلي حشا مب سرحان هذا...
ليلى تعق غشوتها على ويهها: ما كنت سرحانه شفيك انت...؟
حمدان: سلامتج ماشي...انزلي (ويلف ورا يوم سمع صوت حد يهرن له)..
ليلى: شكله حد يعرفك..؟
حمدان: انزلي يالله امي ويدتي تجدمنج..كيف بتدلين بروحج..هذي سيارة احمد ريل اختي..ووراها سيارة قوم يدي مبارك..
ليلى عرفت ان ام خليفه اكيد بتيي لان ام ناصر بنت خالها..وتريت ليلى عمتها ام خليفه لين ما تخطف عسب تسير وياها..وكان اللي يايبهن الدريول وشافت حد وياها..وعرفت انها ساره حرمة خليفه..بس ما يابت بناتها..
وقربت ليلى من ام خليفه ومشت وياها لين باب الخيمه ويوم حدرت عقت غشوتها وسلمت على ام خليفه وساره وهي تسلم على ساره شافت حصه وراها هي الثانيه تعق غشوتها...ابتسمت وقلبها يدق بسرعه وما تنكر انها ولهت عليها..بس حصه ما شافت ليلى عسب جي مشت من الصوب الثاني وليلى حست حد مسك ايدها يرها صوبه...ويوم لفت ورا شافت ام ناصر وانقبض قلبها..
ام ناصر بابتسامه مب من القلب: مرحبا الساع بالغاليه بنت الغالي..
ليلى وقلبها يدق بسرعه واختفت ابتسامتها: المرحب باجي فديتج..شحالج عمتي..مبروك عليكم وعقبال فهد ان شاء الله..
ام ناصر:الله يبارك فيج فديتج...والفال لج ان شاء الله...
ليلى بخاطرها"يا ما حلى الكلام وماصعب الفعل"
ام ناصر: وين امج ما شفتها..
ليلى: ظني تجدمتني وسارت لداخل هي وحرمة راشد..
وسارت عنها ليلى لداخل ويلست على الطاوله ويا امها وخلود ويتهن ام خليفه وساره ويلسن وياهن..وحصه معاهم!!!!
شافت ليلى بس ما سلمت ومحد استغرب لانها وياها كل يوم في الدوام...بس اللي استغربنه انهن ما رمسن من يوم يلسن...وام خليفه ما تطوفها هالاشياء...
ام خليفه تطالع حصه وليلى بطرف عينها: شعندكن كل وحده يالسه بصوب..؟
ليلى استحت وحصه طالعت امها بنقمه..
حصه: مافينا شي يالسين..امايه بنبدا من الحين؟!!!
ام راشد تبتسم: خليهن كملي شو كنتي تقولين..
ويلست ام راشد تسولف لام خليفه وساره ويا خلود..اما ليلى فكانت قريبه من امها وحصه نفس الشي بس محد فيهن رمست..
الزحمه بدت تزيد وحشرة الناس ضاجه المكان واليهال يتناقزون يمين ويسار...وليلى تطالع هني وهناك تشوف العالم والناس ويت عينها في عين وحده يايه صوبهم وتتجدمها حرمه على كرسيها وانها سلامه وام احمد..ويوم اشرت لهن ليلى ين ويلسن صوبهم ونشت ام راشد وباقي الحريم يسلمن عليهم..اما ام احمد قربت صوب ام خليفه وام راشد وسلامه يلست عند ليلى..
ليلى: ما توقعت تيين..
سلامه: وانا ما كنت بيي بس قلت ايي اغير جو ومنها اشوفكم..
ليلى: وين فطامي؟
سلامه: في البيت ما عندنا بنات يروحن اعراس..
ليلى: عشتوا..اسمع من يرمس..
سلامه بخقه: حرمة طال عمرج..
ليلى ما ردت عليها..
سلامه: وين عمتي عايشه؟
ليلى: مادري وين تهيت دوريها اصلا سبقتنا العرس مافيها صبر بتفضحنا هذي...
سلامه: حليلها انفرج اسرها من متى ما يت اعراس..
ليلى ابتسمت...وسلامه انتبهت ان حصه ما تتكلم..
سلامه تطالع حصه: قربي والله ما فينا مرض معدي..
حصه مبتسمه: ارمسي من مكانج انا اسمع ماله داعي اقرب صوبج..
سلامه: شحالها عفاري وحمدووه؟
حصه تذكرت: والله بخير على فكره عفرا تسألني عن رقمج او رقم بيتكم..زين اني شفتج ابا اخذه..
سلامه : ماعندي موبايل بس دقي على البيت أي وقت..
حصه تطلع تلفونها بتسجل الرقم: اوكي عطيني رقمكم..
سلامه تسولف ويا حصه شوي وتلف على ليلى شوي وعرفت انهن مايرمسن بعض..
سلامه ترمس ليلى بصوت واطي: ما كبرتن على هالحركات..؟
ليلى: هي خبله شسوي بها..
وانتبهت ليلى ان تلفونها يدق وشلته على طول وعيون حصه ما نزلتها تشوف من متصل بها..
ليلى مبتسمه: والله؟؟؟حلفي؟؟؟ اوكي ثواني انا بييج للباب لحظات..
سلامه: عمتي منو ترمسين؟
ليلى تنش: بسير شوي صوب الباب وحده بعرفج عليها ويانا في الدوام اسمها روضه يت..
حصه هني انجلطت وصدق بين في ويهها انها حرجت وضاق حالها وما عاد قدرت تتحمل تصرفات ليلى ولا سخافاتها رغم ان ليلى تتصرف بعفويه وما تقصد شي...
نشت ليلى وسارت لروضه ويابتها وياها ويلسن ويا بعض وسلمت على ام راشد وام خليفه والحريم اللي على الطاوله ويوم يت بتسلم على حصه ما نشت لها ومدت ايدها حصه بس..وروضه ما استغربت لانهن اصلا ما يدانن بعض..وتعرفت روضه على سلامه..واندمجن بالسوالف..
وشوي وانترست الخيمه بالاهل والضيوف وحريم المسؤولين ويا بو ناصر وموظفات الشركه اللي وياه ويت مشاعل ويلست وياهم وانمزرت البقعه من كل الناس مب مخلين حد ما عزموه...ويا الوقت اللي بتحدر فيه العروس..كانت ليلى طول الوقت هاديه وتحس عمرها عاديه وتضحك وتسولف ولا يبين عليها أي شي لكن من عرفت ان العروس بتدخل وقلبها انقبض وسلامه وحصه كانن الوحيدات اللي فاهماتنها حصه تدري من سنين وسلامه قالها حمدان..ودخلت اروى اللي كانت صدق ولا اروع وتعجز الحروف في وصفها..حلوه وصغيره وعودها طري والعيون كلها عليها وليلى تحس بالكون يدور حواليها والامل خلاص انتهى..يلست على الكوشه مثل الاميرات والكل نش يسلم عليها والربشه بدت وليلى بدت تعزي نفسها وتشيع اخر رمق لها ممكن تعيش عليه واخر لحظة حب ممكن تقضيها...من اليوم صار ناصر خط احمر يحرم عليها تفكر فيه وتحبه ويحرم عليها تتجرأ تتخيله حتى لها...
حصه كان ودها تنش وتيلس عند ربيعتها تحسسها انها دوم بتكون وياها في الضيق والرخا بس كل وحده فيهن كبرياءها منعها تكلم الثانيه...

[الغلا]

.تابع جزء الــ27
.
في الصوب الثاني من البيت كان ناصر ويا الرياييل ومع ابوه وفهد وناس من عربهم اما راشد ما حضر العرس وحمدان كان موجود بس ما سلم على بو ناصر وتجنب حتى انه يشوفه..ناصر كان متوتر خصوصا عقب ما يلس ويا حمدان شوي بروحهم وكان فهد وياهم..
ناصر متردد: هاه حمدان ييتوا كلكم ولا بعضكم.؟
حمدان اللي فهم قصده: ليش السؤال؟
ناصر: سؤال عادي وبعدين انا مب غريب انا ولد عمتكم..
فهد فهم شو يبغي اخوه..
حمدان بنقمه: نصنا هني والنص الباقي في البيت..
ناصر عرف اكيد ان ليلى محد وهو اصلا كان يبغي يعرف اذا موجوده ولا لاء..فإذا كانت موجوده ما بيحدر الخيمه مراعاة لمشاعرها واحساسها..وان ما كانت موجوده بيدخل وامره لله...
ناصر كان لاخر ثانيه يفكر فيها ويراعي احساسها..كل اللي صار غصبا عنه ومب بإيده..كان يحاول باي وسيله اني يتجنب جرح ليلى باي شكل من الاشكال وهذا بالنسبه له بيكون اضعف الايمان...
فهد: وليش تسأل الشيخ تبغي شي؟
ناصر يطالعه ويلف: لاء مجرد سؤال حاف..
كان فهد وناصر يرمسون ويتحرون حمدان مب فاهم شي ولكنه كان يحترق ويغلي ما يباهم ابدا حتى يتهامسون عن عمته ولا هب عايبنه الوضع..بس ما بيقدر يرمس او يقول شي لانه في نظر الكل ولا يدري بالدنيا...
تلفون ناصر يدق..
ناصر: الحين؟
ام ناصر: ايه تأخرتوا يالله تعال فديتك ادخل عند حرمتك الناس بتروح..
ناصر بتردد: امايه..!!
ام ناصر من الحشره ما سمعته: يالله في داعة الله..
وبندت عنه وهو نش ويا فهد بيدخلون الخيمه...وساروا رباعه داخل ويا ابوه وابو اروى ووقفوا حذال الباب يتريون ام ناصر تقربهم لين ما الحريم يلبسن عبيهن ويتغشن...ودخلوا..وفي اللحظه اللي دخل فيها ناصر شافته ليلى من ورا غشوتها وحصه ودها تقرب منها بس متردده وام راشد تطالع ناصر وفي قلبها الف وفوقها وضعفها امل مقتول راح وما عاد له رده...مب بس ليلى الليله مجروحه ...الكل قلبه مجروح..وكلٍ بهمه مبتلي..ام راشد كانت تتمنى الليله تكون ليلى بنتها والسبب اللي حلفت انها ما تخبر ليلى فيه هو انها ما تبى الناس تقول ان ليلى ما يت يوم ودرها ناصر وان خاطرها كان منه..وما حبت حد يفتح ثمه على بنتها وخلتها تروح وتفرح وتستانس وبجي محد يقدر يمسك شي عليها...
حد ناصر الخيمه وطلع الكوشه ورفع الطرحه عن ويه اروى وحبها على يبهتها ووقف حذالها وبو ناصر وابوها قربوا صوبها وتصوروا ويلسوا شوي وعقبها ظهروا وناصر تم وياها يالسين سألها عن حالها وعقبها تم ساكت ما يبغي ياخذ ويعطي ومايدري ليش احساسه يقوله ان ليلى هني..وفعلا ظنه ما خاب ولا احساسه غلط ..بس ما شافها ولا بيشوفها..
ليلى مكانها انتهت ومن تحت غشوتها استحاله انها كانت تمسك نفسها لانها مهما كان بشر وما بتروم تقبض ولا تعدم احساسها فكانت دموعها رحمه من رب العالمين تغسل بها هموم نفسها وما طال الوقت الا وام راشد ما قدرت تيلس زود واستأذنت منهم ودقن لحمدان اللي ردهن البيت على طول..
طلعت ليلى بسرعه حجرتها تصيح كانت منهاره وقلبها مب وياها وندمها ما بعده ندم على كل لحظه قضتها في حب ولو الوعود تنفع بتوعد نفسها ما يي يوم حتى تفكر في الحب ولا في سنينه..كانت تصيح من خاطرها اللي صار هدم كيانها ومالها طاقه تتحمل اكثر او تستوعب اكثر..اللي صار فيها مب شويه ولا هي قادره تستحمله وشعورها بالعجز في حياتها والضياع سبب لها الم نفسي فضيع ما قدرت تتحمله...رغم صياحها وضيجها ورغم ان الالم اللي فيها يزيد سمعت حس امها برا تزقرها بس ما نزلت وطنشت..وتمت امها تزقرها وصوتها يعلى وحست ان في شي مستوي ..هني ليلى خافت ورغم ورم جفونها وتعبها وضيجها غسلت ويهها وربعت صوب امها تحت وشافت امها واقفه وشكلها معصبه حيل من ليلى..ويوم لمحت عيونها وورمها من الصياح سكنت ملامحها ورمستها بشكل هادي..
ام راشد بضيج: شوفي يا ليلى انا ما عاد فيني صبر والبنت هذي يبالها ضرب لين ما تغدي مثل العالم والناس..
ليلى مستغربه: منو؟
ام راشد بعصبيه: من بعد الشيخه شيخه...
ليلى منصدمه: ليش شوفيها شو سوت حليلها..توج داخله متى لحقت تخرب عليج..بعدين اكيد شيخه راقده هي ما تتم للحين..
ام راشد: جذابه انا جذابه..سيري مكتب ابوج الله يرحمه وشوفيها هناك سيري شوفي..
ليلى: شرملى شرملى...
وسارت ليلى حجرة شرملى ولقتها راقده ومقفله الباب عقبها سارت مكتب ابوها وسمعت حشره تحت الطاوله وصوت اوراق ويوم دخلت شغلت الليت..
ليلى وشعرها وقف من الرهبه: شيخه!!!
شيخه طلعت راسها من ورا الكرسي وبفرح: امي امي!! تعالي ششششوفي انا شششششو لقيت...
ليلى تقرب منها: انتي شو تخبصين مسودة الويه عيب لا تدخلين هالحجره...
شيخه بنقمه: كيفي..
ليلى تشلها: يالله نشي عيب هذا مال يدي مب مالنا..
شيخه: امي شششوفي من هذا؟
وعطتها شيخه صوره صغيره وشلتها ليلى ويوم شافتها انفجرت صياح وما قدرت تتمالك نفسها اكثر..هذي صورة ابوها ..ابوها حبيبها اللي محد حس فيها كثر ما حس فيها وكثر ما حبها..نزلت شيخه ويلست على الارض تصيح..وشيخه مصدومه..
شيخه بخوف: امي من هذا؟
ليلى تبعدها عنها: وخري عني..
شيخه: خلاث امي انا ما بخرب بث لا تثيحين...
ونشت ليلى بتيمع الاوراق المتبعثره هنا وهناك وشلتهن ولقت شيخه مخربطه كل شي ومشخبطه بالحبر على كل شي والملفات مفججه منها والاوراق طايحه من الاظرف ومختبص كل شي فيها...
ليلى تمش دموعها: انتي شدخلج هني ممكن اعرف؟
شيخه تيلس على الارض وتتربع:ششششرملى نامت عني وانا ييت ارثم..(وتمت تسولف) انا ماخاف انا يلثت هني بلوحي..ما عندنا وحششششش انا ماخاف..
ليلى: بس عاد سكتي طفرتيني..
وليلى ترتب الاوراق وترد كل شي بمكانه شافت ورقه مكتوب عليها المحكمه الابتدائيه العليا..وفيها صورة ابوها ومكتوب عليها اثبات وماتدري شو من سوالف المحاكم ودفعها فضولها تكمل وتقرا كل شي...
وانفجعت وهي تكتشف السطور وبان المستور ونشت بسرعه تربع صوب امها وتدق عليها الباب..
ليلى تزاعج: امايه لا ترقدين نشي فديتج...ارجوج امايه بطلي الباب..
نشت ام راشد بسرعه: شعندج بسم الله الرحمن الرحيم شصار عليكم..
ليلى وشيخه واقفات حذال الباب : امايه شوفي شو لقيت (وليلى مبطله عيونها على الاخير) شوفي شو لقيت (وتأشر بالاوراق لامها)
ام راشد عاقده حياتها: وش لقيتي؟
ليلى تير امها من ايدها صوب المكتب: تعالي تعالي براويج...
ام راشد مستغربه: شوي شوي كسرتيني..
شيخه حست انهم لقوا شي مهم وان الفضل لها هي وراحت صوب يدتها اللي يسلت على الكرسي في المكتب..
شيخه داخله عرض: يدووه انا لقيته والله انا لقيته..
ام راشد: شو لقيتي..
ليلى: ماعليج منها تخربط امايه سمعي شو بقرالج وخلي عيونج مفتجه على اخر شي واذنيج ركزيهن بقوه على اللي تسمعين..
ام راشد تتنهد: خلصينا فيه رقاد يالله..
شيخه يلست بتسمع: امي انا اثمع قولي قولي..
ليلى رغم اهمية الموضوع ضحكت من شيخه اللي وياهم على الخط بس مب فاهمه شي..
ليلى: المحكمه العليا الاتحاديه..قرار تنازل وتقسيم شرعي بين الورثه...يقر فيها السيد فلان بن فلان الفلاني(ابو راشد) بتسلميه كافة المستحقات والتبعات الشخصيه للسيده فاطمه فلان الفلاني(ام ناصر) ويتسلم ذلك نيابة عنها زوجها السيد خادم حميد صالح ..
وفي اشاره مكان توقيع بوناصر..
ام راشد: من صدقج يا ليلى؟
ليلى ودموعها تطيح: هيه والله يمه..تخيلي الورقه عندنا كل هالسنين وتونا نشوفها...
ام راشد: سيري زقري راشد حتى لو راقد..خليه يبري نفسه وذمته من شين عمج بو ناصر الله لا يبارك فيه..
ليلى تصيح: لا تدعين عليه يمه..اللي راح راح وما يتعوض..(وتلف صوب اليدار ودموعها للحين تطيح) محد طلع خسران فيكم الا انا..
ام راشد حست ببنتها: سيري يا ليلى زقري اخوج العوض في الله...
وسارت ليلى تربع فلة اخوها ويابته ركض للبيت وحمدان اللي ما يدري كان يالس في صالة بيتهم سار وياهم يتحرا شي مستوي ببيت يدته..
ليلى: راشد امسك هالاوراق وارفع قضيه باجر ان رمت على ريل عمتي..
راشد بعده مب عارف شي: ليش؟
ام راشد: لا قضيه ولاشي خلونا بالستر يا ربي...بس توكل على ربك حسبي الله على اللي مسوينا فينا جذي..
حمدان: شو السالفه؟
ليلى ترمس راشد: لقيت هالاوراق في مكتب ابوي شفها يا راشد..
راشد قرا الورقه ببرود وما علق..وليلى مستغربه.
ليلى: ليش مب مهتم؟
راشد بثقه: انا من الاساس ما اهتميت وجان انتوا مهتمين الحين فهذا دليل انكم ما صدقتوني من الاساس..
ليلى نزلت راسها وحمدان بطل عيونه..الحين تنكشف الحقايق ..يتوضح المستور...يكتشف كل حد مصيبته ولكن بعدما خسروا كل شي...بعدما خسرت ليلى حب حياتها وقضية عمرها اللي حاربت عشانها..وحمدان عقب ماظن في ابوه ظن السوء وام راشد اللي ياما شكت فيه ولو انها ما بينت...
انقطع الصمت وشيخه تير كندورة عمها...
شيخه: عمي راششششد..عمي راشششد...(لاول مره تزقره)
راشد انتبه لها: لبيــــه فديتج؟
شيخه: عمي انا لقيتها...انا لقيتها..
شلها راشد يحبها: تعالي وياي بنسير بيتنا...
شيخه: لاء لاء عيب انا بنام عند امي..
ليلى حست ان راشد يرمس عشان يطلع وما يبغي يتم وياهم..عسب جي حب امه على راسها وطلع وخلاهم وراه يعضون اصابع الندم على الظلم اللي ظلموه والظن اللي ظنوه..
سارت ام راشد حجرتها وحمدان راح بيتهم وهو مب ندم اللي في قلبه الا اشد انواع الندم والصدمات...وليلى شلت الاوراق وحطتهن في درج ابوها وصكرت الحجره وطلعت فوق هي وشيخه ويلست على طاولتها تودع في ليلة زواج حبيب العمر اخر اوراقها وذكرياتها...الحقيقه اللي لو انكشفت من سنين كان العمر ماشي مثل ما تبى...لكن تريد واريد ويفعل الله ما يريد...
" هي بانتظارك ارحل إليها..انحر قلبي بحضرتها..مزق خارطة أحلامي بين يديها..خضب لأناملها بدمي..و أسفك ليالي عمري تحت قدميها..اغتب شوقك الغائب لعيني..و اسكب حكايتي الحزينة بأذنيهاحدثها عني..أخبرها بأنك و أني وأني..مزقني أمامها بلا خجل..هي بانتظارك ارحل إليها..اهدها من اللهفة عينيك..و قبل من الشوق عينيها...و ازرع الورد الأحمر في ظفائرها..و على فمها و اخترع الصيف في دمها..و قدم الربيع لهاو انس الخريف على بابي..و روض الشتاء على شفتيها و راقصها على رفات حلمي..خبئها عندك ما استطعت..و أغمض عينيك عليها هي بانتظارك ارحل إليها اعزف لها أنشودة الحب و راقصها على نشيج بكائي..ضع طوق الياسمين على عنقها و زين صدرها بنجوم السماء و انزفني أمامها قطرة قطـــرة و ارسم وجهها بدمائي و امنحها ذراعيك كي تتوسد و انحر على ذراعيها كبريائي ...قبل عينيها و وجنتيها و أشياء أخرى يقتلني بها خيالي ...هي بانتظارك ارحل إليها طوق خصرها بجنون و املأ أذنيها بدف الهمس..اهتك لها ستر ليلة وداعك ...انت بألف ليلة و دمعة كبرياء خرجت عن حكاية الأمس..و جنون الأمس و موت الأمس ...هي بانتظارك ارحل إليها حدثها عن همومك عن أوجاعك عن أمراضك عن أحزانك عن أشياء كثيرة كانت تعنيني و لا تعنيها و أنصت إلى حكايتها غرامياتها نزواتها و صفق لها كي ترضيها و ضع صورتها الجميلة في محفظتك و احتو الصورة عند الشوق و احتوها....هاتفها صباحا ًهاتفها مساءا ًحاصرها بجنونك المعتاد مشاعرك الجميلة يا حبيبي...!!عذرا اقصد يا حبيبها لا تخفيها..هي بانتظارك ارحل إليها سخر لها القمر إن استطعت و حرك من اجلها الجبال و فجر المحيطات في عيني و حررني من أنياب الخيال و اقتل نفسك بنفسك في قلبي و شوه في داخلي كل الجمال و مزق حكايتنا صفحة صفحة فالذكرى الآن فوق الاحتمال و اقترب منها كالطاووس و كأنك على الأرض آخر الرجال فـــإذا ما اعترضك طيفــي بــاكــيا ًتبخر في الهواء خجلا أو أدفن راسك كالنعامة في الرمال..."
....................
:: بعد اسبوع من عرس ناصر ::
العصر في بيت بو خليفه كانت عفرا يالسه في المطبخ تزهب الفطاير والكيك ويا البشاكير عقب ما عزمت سلامه وفاطمه وقررت اعادة تكوين حياتها من اول ويديد واعادة بعض علاقتها ويا بنات المدرسه يمكن بهالطريقه تقدر تكسب اصدقاء طالما حلمت فيهم واتريت وايد هاليوم اللي بتثبت للكل فيها ذاتها..
كانت عفرا متصله في سلامه من اسبوع وعزمتها تيي بيتهم العصر تيلس وياها وطلبت منها تييب فاطمه وياهن عشان تنمزر القعده بنات..وتحلى اليلسه...حمده بعد كانت مربوشه ويا اختها اللي امتحنت امس وتتريا النتيجه باجر او عقبه..عشان الدوامات بتبدا عقب اسبوعين ولازم الكل يتجهز...
عفرا: ناتالي خلصتي؟
نتالي: يس مدام اشله الصاله؟
عفرا: امم لا حجرة الضيوف احسن لان وياهم بنت اول مره بشوفها..
نتالي: اوكي مدام..
وطلعت البشكاره ورتبت لها الطاوله بشكل انيق وعدلت لها كل شي وعفرا سارت تلبس لها بدله لين ما يوصلن البنات سلامه وفاطمه وفي بيت خليفه...
حمده: اكيد تغيرت سلامي عن قبل..
عفرا: مادري انا ما شفتها من يوم عرسها..
حمده: وييه فديتها والله وحشتني..
عفرا بتردد: تصدقين مستحيه اشوفها مادري ليش..
حمده: عادي عادي تحصل في ارقى العائلات..
وشوي ويسمعن جرس البيت يدق وظهرن يربعن مثل المخبل كلهن برا...ووقفت سيارة سلامه وفيها احمد فردت عفرا شوي ورا وحمده اندست حذال الباب الصغير اللي عند دري الصاله ونزلت سلامه وفاطمه واحمد روح على طول...
يتهن عفرا وسلمت هي وحمده وسارن مجلس الضيوف...ويلسن كلهن ويا بعض..
حمده: سلامي احلويتي..بس متنتي شوي؟
سلامه بدلع: شو متنت حرام عليج والله وزني مثل ما هو..
عفرا: هيه والله صدق ما تغيرتي..
فاطمه مستحيه وساكته..
عفرا: شحالج فاطمه ان شاء الله مرتاحه...
فاطمه بخجل: الحمدلله فديتج شحالج...
وقربت عفرا من فاطمه ويلست تسولف وياها وحمده يلست حذال سلامه وانفردن بالسوالف...
عفرا: شو عندج من شهادات...؟
وخبرتها فاطمه كل شي...
عفرا بأسف: ليش تسوين بعمرج جي؟
فاطمه: الظروف اقوى مننا..
عفرا: تعرفين..انا ان شاء الله بدخل الجامعه الاسبوع اللي عقب الياي بس اتريا نتيجة الدور الثاني(وتبتسم)
فاطمه: عندج دور ثاني في شو؟
عفرا: احياء..
فاطمه: شكلج ما تدانين الحفظ..بس الاحياء وايد سهله...
عفرا: لاء انا احب كل شي بس صارت لي ظروف خلتني ما قدم الامتحان اظني سمعتي عن حرمة عمي اللي توفت..؟
فاطمه: لا والله...
عفرا: امبلى عمي عبدالله حرمته اللي توفت ويا اخوها على طريق دبي في حادث..
فاطمه: هيه تذكرت الله يرحمها..
عفرا تتنهد: هيه هذيك الفتره ما قدمت اخر امتحان...
فاطمه ابتسمت وهي تشوف جدامها تحفه نادره من الجمال والاخلاق وتقول ويني عنها من زمان...تشوف الدرر اللي ترمس بها وما قدرت انها ما تحب عفرا ولو انها اول نظره..وعفرا نفس الشي وايد ارتاحت لها وحبتها لدرجة انها نست وجود سلامه وحمده..
عفرا: انا خاطري ادرس هندسه معماريه بس ماشي هالتخصص في جامعة زايد وانا مابغي اسير العين ماروم افارج ابويه دقيقه..ولو السالفه فيها طموحي وماحب ابعد عن اهلي...
فاطمه: والحين شو بتدرسين..؟
عفرا: امم الحين بدرس اول سنتين في الجنرال وعقبها بتخصص يعني ان شاء الله قولي نظم معلومات هذا طموحي..
فاطمه: كشخه!!!!
عفرا: اقولج تعالي براويج شي فوق..
فاطمه : وين...؟
عفرا: لا تخافين في حجرة عمتي براويج شي...
فاطمه: حد فوق؟
عفرا: لا تخافين محد اصلا بيتنا ما فيه ريال غير ابوي ويدي..
فاطمه تنش: سلامه بسير ويا عفرا شوي؟
حمده: على وين؟
عفرا: بسير حجرة عمتي حصه شوي براوياها شي على الكمبيوتر..
وطلعت عفرا وفاطمه سايرات فوق..ودقت الباب بس محد رد عليها ودقت على تلفون حصه من تلفون الصاله اللي فوق..
عفرا: عمتي وينج؟
حصه: عند امي في الزراعه برا ليش في شي؟
عفرا:عمتي وين مفتاح حجرتج شوي ابغي اراوي ربيعتي شي علىالنت وينج بطلي لنا الباب..
حصه: عفاري المفتاح فوق الباب شليه..
عفرا: اوكي مشكوره..
وبطلت عفرا الحجره ويلست ويا فاطمه وبطلت لها موقع جامعة زايد وخلتها تشوف الكليات والمساقات ونظام الدراسه وتشوف كل شي بنفسها..
فاطمه: شو اسوي بكل هاه؟
عفرا: شو رايج تكملين دراستج وياي..وبنساعد بعض..تراني احب التنافس وانتي قدها..
فاطمه اللي ارتاحات للفكره: والله؟
عفرا: هيه والله؟
فاطمه بخيبة امل: لاء ماقدر..
عفرا: ليش؟
فاطمه: ما بيقبلوني الاولويه للدفعات اليديده..
عفرا مبتسمه: انا بعد مفروض ما يقبلوني بس ابوي بيدخلنا كلنا انا وانتي..(وتغمز لها) اوكي..
فاطمه وقلبها يدق بسرعه: كيف..؟
عفرا استحت: مادري كيف بس بندخل..ما قدرتي للطب في شي غيره...ما عليج الحياه ابوابها ما تنسد جدام اول فشل..وانتي اكبر من الظروف..اظني غلبتج بما فيه الكفايه يا دورج تغلبينها انتي..
فاطمه تشققت وهي تشوف ابواب الامل في عيون عفرا: مادري كيف اشكرج والله انتي فعلا انسانه عظيمه..
عفرا وقلبها يدق بسرعه: لا لا انا اصلا ابى منافسه تنافسني بدراستي عشان احس بطعم التحدي..
فاطمه بثقه: ما بترومين لي صدقيني..
عفرا: وايدين قبلج قالوها وراحت سوالفهم ادراج الرياح..
فاطمه مبتسمه: اوكي بنشوف ..بس برمس اخوي وامي ولو اني ادري ما بيعارضون..
عفرا تنش: صبري دقايق بييب سيدي من حجرة عمتي سلمى براويج حفلة تخرجنا يوم كانا في ثاني ثانوي..
فاطمه: اوكي..
وطلعت عفرا سايره حجرة سلمى وفي هالوقت كانت فاطمه يالسه تتابع الصور اللي حاطينها في موقع الجامعه وتشوف نشاطاتهم ومشاريعهم وكيف مستوى الجامعه الثقافي والعلمي....وسمعت صوت في الحجره وتيبست ما قدرت تنطق..
ذياب مبتسم: لا لا شكلي داخل غلط وهذا مب بيتنا!!! ماحيد القمر يطيع ينزل تحت شو اللي نزله؟ وفي قسمنا فوق؟ شو هالحظ..
فاطمه خافت وردت شيلتها على ويهها رغم انها ما كانت لابسه عباتها ولابسه تنوره وقميص..ما قدرت تنطق من الخوف ولا الاحراج اللي انحطت فيه..
ذياب يطالعها ما شل عينه عنها: اوف تحفه والله!!!!
فاطمه عصبت وما قدرت تتحمل: انت شعندك من دم..شو فيك من احساس..انت كرامتك معدومه..تتحراني بنت شوارع بتعق عليها كلمتين بتيي تتمسح في ريولك..
ذياب يضحك: اخ يا قلبي الصوت والله عذاب..
عفرا بعصبيه: انت ايه شو تسوي هني؟
ذياب اللي انتبه: اووه انتي هني؟ ليكون هذي دكتوره يايه تعالجج؟
عفرا انقهرت منه: اطلع برا يا السخيف..
ذياب يهز راسه: حليلج بعدج ما شفيتي من المرض اللي فيج..
فاطمه يالسه تحترق مكانها ما تعرف منو هاللي حدر عليها وتحرش فيها وما اكتفى بجي بالعكس تحرش في اهل البيت نفسهم..
عفرا: ذياب اطلع لا اخبر ابويه عليك..
طلع ذياب وسار يسبح ويغير ثيابه توه راد من الدوره ولسوء حظ فاطمه انها اول من يستقبل ذياب..
عفرا في الحجره: لا تزعلين والله اسفه..
فاطمه معصبه: انتي قلتي محد في بيتكم..
عفرا: والله محد بس هذا عمي توه راد من الدوره لسوء حظج..
فاطمه: اوف عفس مزاجي..يالله ننزل ابغي ارد البيت..
عفرا بنظره زعلانه: لاء تمي..فاطمه..
فاطمه: اوكي صكي الباب..
عفرا: انزين...
فاطمه: سمعي عفاري انا شفت السايت..
عفرا: اوكي اليوم برمس ابوي عنج واكيد ما بيرد لي طلب وانتي خبري اخوج يجهز لنا اوراقج وانا عقب بتصل فيج وبقولج شو ابى وشو اللي احتايه منج عسب نخلص لج اوراقج ويانا..
فاطمه مبتسمه: خلاص تم...
واتفقت فاطمه وعفرا...عفرا اللي تحس انها رست على بر..وانها يمكن ومب اكيد تكون لقت الانسانه اللي طال البحث عنها...هل ممكن تكون فاطمه اول درجه ترفع عفرا لسلم الحياه الورديه؟ من يدري احلامنا تبدا صغيره وتكبر ونعتقد ان تحقيقها بيكون مستحيل وما ندري ان الدنيا ممكن تفاجأنا بأشياء ما نتوقعها تحقق لنا الاحلام بكل سهوله...اهم شي الاراده والامـــل..
..................
في بيت بو ناصر يالسه ام ناصر مع فهد اللي لا خلى ليلها ليل ولا نهارها نهار يحن ومأذنها يبغي يعرس ومحتر من اخوه وحالته حاله وهي مب رايمه تتفجج منه..
ام ناصر: بس وخر عني قلت لك ماشي عرس بعدها ذبايح عرس خوك ما نشف دمها وتبا تعرس..
فهد: ما قلت بعرس ابغي اخطب يالله البنت بتطير مني..
ام ناصر: انت شعندك مب قلت تباني اخطب لك استريح ما بتختار لو شو ما يستوي..
فهد: اووه عاد امايه مب يايبنها من الشارع والله انها بنت ناس معروفين ويا زينهم تعالي بقولج من هم..
وحدر بو ناصر...
بو ناصر: فهد تعال ابغيك..
فهد: نعم امر ..
بو ناصر: اسمع عقب اسبوع بنسير المحكمه..
فهد: ليــــــــش؟
ام ناصر: بسم الله شعندكم..
بو ناصر: انا عندي كذا مشروع لازم يخلصن وعندي عجز في الماليه وابغي حلالي في اقرب وقت..
فهمت ام ناصر شو يبغي..
فهد: والمطلوب؟
بو ناصر: بنرفع قضيه على ولد خالك راشد..
فهد انصدم وبسرعه: لا لا اسمحلي مب ساير..
بو ناصر: انا راعي سمحه..وليش ما تسير وانا ابوك ما بتعاوني بتعاون من؟
فهد بعصبيه: والله ما سرت لو كان اخر شي اسويه بحياتي..اسمحلي ما اقدر ارفع قضيه على لحمي ودمي..
ام ناصر استانست من رد ولدها..
بو ناصر معصب: كيفك هو..ما تبغي حلال امك يالثور..؟!!
فهد: برايني خلني ثور مب ساير..
ونش عنهم فهد..وقبل يطلع..
فهد: امايه تعالي ابغيج..
وربعت صوبه امه الحين لو يطلب يعرس هاللحظه ما بترده يكفي انه ما بيساير ابوه في منكره..
ام ناصر: تبغي تعرس..الحين بسير اخطب لك.
فهد يضحك: مسرع غيرتي رايج؟
ام ناصر: وييه فديتك يا فهد من يسواك.
فهد: اووه تطورنا..ثره ما يبالج غير كلمتين يدهنن سيرج وبتيين بسهوله..
ام ناصر تدزه: ارمس شتبغي؟
فهد: امايه اليوم ولا غيره اباج تربعين صوب بيت خالتيه عايشه ..
ام ناصر: غربل الله ابليسك عيوز مكسره وين تباني اربع..وليش تباني اسير صوبها شعندهم..؟
فهد وقلبه يدق بسرعه: امايه انا ابغي بنتهم حصه...
ام ناصر تشققت: ويييه فديت روحك هذيل ناس منا وفينا والبنت ما فيها عيب وجمالها ماشي منه انت صدق تبغيها؟
فهد مبتسم: هيه والله؟
ام ناصر بتردد: بس انا بغيت اخطب لك ليلى بنت خالك...
فهد عاقد حياته: شو ليلى؟ شو ابى بها..ليلى ماشوف فيها اكثر من اخت بعدين خافي الله فيني وفي اخوي..كيف تبيني اخطب وحده كان حاط عينه عليها العمر كله واييبها له هني تجابله ليل ونهار..لا لا فديتج ليش اظلمها واظلم اخوي ونفسي..
ام ناصر تتنهد: خلاص يا فهد .حصه حصه..ماشي اخير عنها..باجر بسير صوب امها..
فهد: وابوي؟
ام ناصر: وده بس يناسب قوم مبارك بن احمد..اسميه بيعيد كل يوم في السنه يوم خطب بنتهم..وبس عليه ان خذتوها..
فهد تشقق: زين انا بطلع الحين بسير بيت خالي ..
ام ناصر: لا تسير اخاف ليلى تقول للبنت قبل انا اسير تراها ربيعتها..
فهد: لا تحاتين انا لمحت لليلى اباها ترمس البنت بس ليلى الظاهر ما فهمتني..يالله من رخصتج يالغلا..
ام ناصر: الله الله في السواقه يالله فديتك..الله يحفظك..
وطلع فهد مستانس اخيرا واحد فيهم على الاقل بيسوي شي من الي في باله..اخيرا بيخطب البنت اللي في باله..ما غيرها حصه..يوم بيقرر ياخذ ما يبغي الا هي..
......................
كانت ليلى يالسه الصبح في الدوام وللحين لا هي ولا حصه رمسن ويا بعض...ويتهن روضه الصبح اول ما وصلن..
روضه: حشا هلكت وانا اطبع واسوي برنت ما بغيت اخلص..
ليلى:الشغل شو بنسوي بعد...
روضه: متى بيرد المعرس من اجازته..
ليلى باقتضاب: ما مداه يخلص اول اسبوع..
حصه بقهر: تولهتي عليه؟
ليلى انقهرت من سؤالها..
روضه: انا ولا ليلى؟
حصه: لاء انتي...!!
روضه: وع ما باقي الا اوله على هذا من زينه عاد..محلاها عروسته تجنن ما شاء الله عليها بس الله يعينها عليه صدق طبل..
ليلى بقهر: لو سمحتي قلت لج ولد عمتي ..
روضه: اووبس والله انسى..سوري..
يرن تلفون المكتب..
ليلى: الو
حمد: السلام عليكم..
ليلى: وعليكم السلام اهلين استاذ..
حمد: شحالج ليلى؟
ليلى: بخير الله يسلمك..
حمد: ليلى روضه عندكن؟
ليلى: هيه في شي؟
حمد: انتن اليوم كلكن موجودات صح؟
ليلى: هيه في شي؟
حمد مبتسم بخبث: طرشي روضه صوبي قولي لها حمد يبغيج..
بندت ليلى وهي مستغربه من تصرفات حمد الغبيه..
ليلى: روضه سيري حمد يبغيج...
وقبل تنش روضه دق التلفون مره ثانيه..
حمد: اقولج لا تزقرينها خلاص اصلا انا نازل تحت بمر مكتبها..
ليلى : بس هي عندنا..
حمد مبتسم بلؤم: اوكي يكون احسن..
ليلى: اللي تشوفه..
وبندت ليلى وخبرت روضه كل شي..
حصه احترقت وبلعت الاهانه وقهرها وصل حده شو تسوي وين تروح وين تيي عشان ما تشوف هالانسانه هالكتله من القرف جدام ويهها وين تروح كيف تحمي احساسها لا ينجرح وهي كل شي حواليها يجرحها....طلعت روضه بسرعه متشققه على الاقل بتروح جدام ويه تحبه ولو الرمسه عن الشغل..
ليلى حست في حصه بس ما حبت تتكلم ولا تقول شي واندمجت في شغلها عشان ما تحرج ربيعتها وما تنحرج وياها...
روضه اللي استوت ربيعة ليلى وقريبه منها وحبتها بشكل جنوني وما قدرت للحظه تتخيل انها تفارقها..وحصه اللي كل يوم تزيد من بينهن فجوة التباعد والجفا ولا وحده فيهن ترمس الثانيه...
اما حمد فكان على طول حاب انه يقهر حصه ويزيد قهرها واللي يخليه يعاند اكثر ويستوي نذل بشكل فضيع هو عناد حصه له..وكلما شافها تقهره وتزيد من نظراتها وقلة اهتمامها به كلما زاده عناد ومغايض فيها وقهر لشخصيتها اكثر عن قبل..
شوي وان حمد حدر ودق الباب..
حمد: السلام عليكم..
ليلى وروضه اللي تشققت: وعليكم السلام..
اما حصه فتمت تطبع وما اهتمت..
حمد: روضه خلصتي ملفج وراجعتيه؟
روضه: هيه..
حمد: اقولج هاتيه وتعالي المكتب عندي عندج بلاوي فيه ما خلصتيها..
ليلى: خلاص نحن بنعدله وياها..
حمد يبغي يقهر حصه: لاء احسن اشرف عليها بنفسي..
وتجدمت روضه وطلعت بتييب الملف..
حمد: شحالج حصه..
حصه وهي تطبع: بخير...
انقهر منها وحس انها تتعمد تهينه جدام ليلى..
حمد: خلصتي شغلج؟
حصه وهي مطنشه: يوم بخلصه بوديه لدانيال ماظني انك اللي مسؤول عني..
انقهر حمد صدق من خاطره لانها حتى بنظره ما شافته ولا عطته ويه وحقرته جدام ليلى..وهو طلع وسار مكتبه وهو يغلي بس والله ما يسكت لها..
"كيف تسمح لنفسها هالحصة تطالعني بهالنظرات او تتعامل معاي بهالاسلوب الظاهر انها نست نفسها وايد ...او انا اللي تساهلت معاها اكثر من اللزوم .. بس بما انك يا حمد بديت كمل وان ما رديت اربيج يا حصه ما اكون حمد"
كان هذا هو اللي يدور في راس حمد وهو صدق معصب على حصه وحاير في ردة فعلها... وهو يبتسم ابتسامته الشيطانيه اتصل في ناصر...
ناصر: الو
حمد: الو السلام عليك
ناصر: (يبتسم) وعليك السلام والرحمه مرحبا مليون ... شو لا تقول ان الشغل واقف بدوني..!!!
حمد: افا عليك يا المعرس اكيد بنسد مكانك ... بس بغيت اطرش لك ورقة توقعها ضروري الله يخليك...
ناصر: خير ان شاء الله ... انا موقع اهم الاوراق امس وما اظن بيصير شي يديد او مهم خلال هالاسبوعين...
حمد: لا بس بغيتك توقع على قرار اداري بنقل حصه من قسم دانيال لقسمي واكون مسؤولها المباشر مع ليلى...
ناصر(وهو عاقد حياته): ليش خير ان شاء الله ... هي اشتكت من شي..؟؟
حمد(رد يبتسم بلؤم): لا ابد ما اشتكت ودانيل ما عليه قصور ... بس انت عارف حصه بنت عمي وسمعت رمسه ما عجبتني فحبيت ان تعاملها يكون وياي انا بحيث محد يتجرأ ويقول عليها شي ... او اخبر خليفه وتقعد في البيت ونخسر موظفة مثلها...
ناصر: لا يا حمد ماله داعي واللي تشوفه مره سوه ... واذا تريد بيي اليوم اوقع الورقة...
حمد: لا مايحتاي اتيي انا بطرشها لك بعد شوي مع واحد من دريولية الشركة..
ناصر: خلاص تم .. في شي ثاني في الشغل..؟؟
حمد(ردت ابتسامته وعيونه تبرق): لا سلامتك من تخلص الورقة من قسم الطباعة بطرشها لك...
ناصر : وانا بترياها...
بند حمد عن ناصر وهو في خاطره يقول
" الحين بشوف كيف بتعاملين مع رئيسج المباشر يا حصوه"
... ولانه ما حب ان الخبر يتسرب قبل لا يوقع ناصر على الورقة طبعها بروحه على الكمبيوتر وحطها في ظرف وطرشها لناصر ... وقعد يتريا الورقة وهو يتخيل شكل بنت عمه يوم تعرف باللي سواه ... هيه تطالعه بهالنظرة الخايسة وتترفع عليه هوه حمد اللي ما تمت وحده في خاطره ... تعامله الانسانه الوحيده اللي ما توقع منها هالمعامله بهالطريقة...هي اللي يابت لنفسها وهي تتحمل ماياها..جي كان يفكر وبيتم يفكر بهالطريقه..
.........................
الساعه 9:30 الليل كان باب حجرتها يدق وهي مطنشه وحاطه سماعات بس متعمده ما ترد على اللي يدق الباب...فكرت بوضعها ومن متى هي وليلى ما يرمسن بعض قربن يكملن اسبوعين والسبه هالقرده روضه...يالله كيف في نظرها ليلى تغيرت وما عادت شرات قبل..تنهدت من قبلها والحشره زادت برا...
حصه: والعثره خلاص لحظه وبطلع...
بطلت الباب وان خليفه مبتسم في ويهها...
حصه مستغربه: هلا والله...
خليفه: بدخل اوكي..
حصه تبطل الباب: اكيد تعال..
يدخل خليفه وييلس على الكرسي..
خليفه: شو هالاثاث الغاوي؟
حصه مبتسمه: فديتك انا ماشي احلى عن ذوقك؟
خليفه: هاه ان شاء الله عيبج؟
حصه بفخر: اكيد يكفيني ان خليفه بن مبارك هو يايبنه..
خليفه يضحك: فديتج اختي حبيبتي..تعالي يلسي هني ابغيج..
حصه قربت منه: هاه اكيد السالفه خطيره دام انك ياي بنفسك لين عندي..
خليفه: اكيد..
حصه: تبغي تعرس اسفه ماروم اخليك تحط حد على ساره..
خليفه يضحك: لا انا اللي ماروم مب انتي..ساره ماشي شراتها...
حصه: اكيد يكفي انها ام عفاري..
خليفه: شمعنى..؟
حصه تضحك: انت ادرى..
خليفه: نزلتي اليوم الصاله؟
حصه: لا والله حتى للحين ما شفت امي توني ناشه من الرقاد..
خليفه: اممم..
حصه: اوكي قول اللي عندك..
خليفه: اليوم يت عندنا حرمه وريلها وولدهم..
حصه وقلبها يدق بسرعه: زين...
خليفه: يخطبونج!!!
حصه شهقت: انا!!!
خليفه متردد: هيه..
حصه: لاء انامابغي اعرس..
خليفه: بس امي موافقه ومصره على رايها بعد وشكلها بتقنع ابوي..
حصه سكتت..
خليفه: اقولج من وانتي فكري..
حصه وقلبها يدق بسرعه وتتريا الاسم اللي في بالها....
خليفه: فهد ولد خادم بن حميد..
حصه شهقت وهي مبطله عيونها على الاخر...
حصه: ولد خالتي فاطمه؟
خليفه يهز راسه: هيه...شو رايج؟
حصه متردده:ماروم ارد عليك الحين عطني فرصه افكر..
خليفه حس ان في مجال تفكر: حصه انا مب مرتاح وماريدج توافقين لو تبين رايي..
حصه مستغربه: ليش شفت شي عليه...؟
خليفه: حشا عليه ريال ماشي منه والف من تتمناه بس انا ما بدي على ولد عمج حمد..
حصه اطرافها بردت من الرهبه بس ماقدرت ترد..
خليفه: حصه امي موافقه تقول انها مب مأمنه في حمد ما ياخذ حد غيرج بعدما كبرتي..
حصه: لحوول ردينا على سالفة الكبر هذي؟
خليفه: امج وتفاهمي وياها..بس.......
حصه: بس شو؟
خليفه: للحين اقولج انا مب موافق واتمنى ما توافقين انتي بعد..
حصه مستغربه: ليش؟!!!
خليفه:حمد بالرغم من كل عيوبه ريال ومعدنه اصيل..وما يتخلى عن اهله واللي يحبهم بسهوله...
حصه:وليش هالمقدمه الغزليه فيه..
حصه تبى تعرف ليش خليفه مصر على حمد ومب حبا فيه ومب لانها تبغي توافق على زواجها منه اللي للحين ما رمس فيه..
خليفه:سمعي يا حصه ومابغي الرمسه تطلع من بينا...
حصه مندمجه: اوكي..
خليفه: على ايام صياعة حمد..ظني خبرج عبدالله عن سوالفه...؟
حصه بقهر:هيه..
خليفه: كان حمد يلعب بالبيزات لعب ونحن كنا على وشك الافلاس..رحت له وكلمته وانا على حديده..شوي وندخل السجن من ديوننا والخساره اللي خسرناها..قلت له يا حمد ادخل ويانا شريك في المجموعه عشان تنقذ الشركه من الافلاس..بس والله يا حصه بدون ما يرد علي كتب لي شيك بالمبلغ ورفض يدخل ويانا شريك..وقال ان شركاتنا وشركاتهم وحده وهذا عمه وعياله لو طلبوا روحه ما بتغلى عليهم ما بالهم بالبيزات اللي تروح وتيي..
حصه منصدمه: اوكي..
خليفه: وحاولت معاه عقب يدخل ويانا بس رفض..ورغم افلاسه بس بعده مصر للحين ما ياخذ اللي عطانا...وصدقيني لو طلب يدخل الحين وياي شريك بالنص ما برفض لان الخير اللي انا وبناتي فيه من فضل ربي ثم فضله هو...والله محد يدري بهالسالفه غيري اناوهو..حتى ابوي وعبدالله ما يعرفون عنها..
حصه سكتت وهو سكت..
خليفه: والحين حمد محيرنج اول واحد وهو ولد عمج واولى فيج..وانا مستحيل اخذله في شي الكل يعرف انه ملكه..
عصبت حصه ووقفت: خليفه انا رايك على عيني وراسي..بس انا مب ملك حد..انا انسانه ما انباع وانشرى بفلوس..واذا تحس عمرك مديون بجميل لحمد ولد عمك فرد له فلوسه ولا تقايض مبالغكم فيني...لاني انسانه ولي جيمتي ومب سلعه انباع وانشرى..
وطلعت من الحجره وهو تم حاير ما يدري شو يسوي..بس قبل ينش ردت له...ردت بقلبها الكبير اللي لا يمكن يحب غير حمد..اللي قضت العمر تترياه وتحبه وتبغيه..
حصه: وقول لامي اذا ما هي ما تباني واني صرت كبيره بنظرها ومالي مكان عندهم..ان بيتك واسع وانا بروح لك اذا كانت متملله مني..انا مابا هذا اللي اسمه فهد..ولا ابى اعرس به ولا بغيره...
تشقق خليفه ونزل عند اهله بيبشرهم وهم يتريون منه الخبر...
.....................
الليل في بيت بو راشد يالسه ليلى ويا شيخه في حجرتهن فوق يسولفن وليلى تلعوزها وشيخه كانت شوي مب في المود لكن ليلى طفرتها قد ما تقدر...
شيخه بعصبيه:اتي ما بتخليني بلوح عند يدتي..
ليلى تضحك: روحي ما حبج..
شيخه من خاطرها: انا بروح عند ابوي...
ليلى شهقت: بسم الله عليج فديت روحج يعل يومي قبل يومج..انا ولا انتي..
شيخه: بتوديني الدمعيه؟
ليلى: من عيوني لو تبين المريخ بوديج بس لا تقولين هالرمسه مره ثانيه...
شيخه: ذين امي متى بنام؟
ليلى: الحين يالله تعالي بنرقد...
شيخه تدخل تحت اللحاف: الوحشششش ما بيي؟
ليلى تضحك: لاء...وحششش
شيخه تضحك..
ليلى: قولي شرشبيل...
شيخه: شششششربيل..
ليلى تضحك: هالاسم بيعيبج كله شينات...
دق باب الحجره...
شيخه مصدومه: امي يكمن وحشششش..
ليلى تنش: يقولون يمكن مب يكمن...
شيخه تنش وياها وليلى تلبس وقايتها وقبل تطلع..
شيخه : امي ثبري ثبري..
ليلى بهمس: شو تبين؟
شيخه: بلبس ششششيلتي..
طنشتها ليلى وفتحت الباب وان حمدان واقف..
حمدان: سوري يمكنج راقده..
ليلى مستغربه ان حمدان يا ..يالله كم طول الفتره اللي ما ياها فيها...يمكن فوق الشهرين..بس يي يسلم في الصاله ولا يطلع فوق ابد..
ليلى: ادخل...
حمدان: لاء طلعي الصاله اللي فوق ..
استغربت ليلى وطلعت وياه وشيخه تقلدها في أي شي تسويه..
ليلى: شحالك..
حمدان اللي يحس انه يبعد عن عمته مئات الاميال: بخير الله يسلمج..
ليلى: حمدان انت زعلان مني؟
حمدان بتردد: عمتي انا مب زعلان بس والله خاطري افتح لج قلبي..
ليلى بفرح: والله يا حمدان انك تتم الغالي مهما كبرت وحسيت عمرك ما تحتاي لي تراني بتم في حاجتك والله..
حمدان: والله ما بعدت اقصد اني كبرت وما احتاجج..انتي تمين الغاليه واللي ربتنا وما ننسى افضالج بس انا يوم بعدت الفتره اللي طافت كنت افكر اكون نفسي واعيد تركيب اللي فقدته عقب الدراسه وكونت نفسي بعيد عن شخصيات البيت واكثر حد قربت منه ابوي..
ليلى : وهالشي اللي يسعدني فيك..
حمدان سكت..
ليلى: ارمس وانا اسمعك قول اللي بخاطرك..
حمدان متردد: عمتي بصراحه انا قررت اخطب وحد في خاطري معينه بس مابغي اعرس الحين..
ليلى تشققت: احلف قول والله ياي فديتك واخيرا حد بيعرس وبيتم في البيت..
حمدان: وكل شي بيتم بيكون على ايدج...
ليلى: لو تبى اجمل بنت في العالم مستعده اييبها لك ما تغلى عليك يا حمدان..
حمدان مبتسم: عمتي انا ابغي اخطب عفرا بنت خليفه...
ليلى انصدمت...وحمدان حس فيها..
حمدان: هاه ما تناسبنا...؟
ليلى مبتسمه: لاء والله من قال خلاص ولا يهمك تباني اجس نبض البنيه عند عمتها..
حمدان :لاء...ابغيج تساعديني مع ابوي لاني اخاف يكون مخطط لشي ثاني..
ليلى: مثل شو؟
حمدان ينش: انتي فاهمه..
ليلى: اوكي ما يصير خاطرك الا طيب..يوم ارمس حصه بلمح لها بالموضوع..وبقنع راشد لا تحاتي خله علي..
طلع حمدان وليلى ردت ترقد عقب ما بشرها حمدان بالخبر..
.......................
الصبح كانت حصه جاهزه وبتنزل الصاله تحت وهي نازله شافت ذياب نازل من فوق متسفر ولا اهتمت رغم انها من فتره ما شافته..وهو بعد يوم شافها ما سلم عليها..
وفي الصاله سلمت على امها وابوها اللي تزهبوا بيسيرون من فير الله العزبه..
حصه : يالله من رخصتكم انا تأخرت على دوامي..
كلهم: الله وياج..
طلعت حصه وهم يلسوا ويا ذياب..
بو خليفه: خلصت الحين شو باقيلك؟
ذياب: ماشي غير الكليه بتخرج منها شرطي والله يعين..
ام خليفه:الله يوفقك فديتك انا..
.
.
حصه اللي طلعت بالسياره مع الدريول والبشكاره وصلت الدوام وهي اليوم مستانسه وتحس بفرح غريب...البارحه خطبوها يعني انها مب كبيره وبعده الطلب جاري عليها...اه ليتها تروم تخبر ليلى..بس ما تبغي دام ليلى مشغوله بروضه ما يعني لها أي شي اللي قاعد يصير...
وصلت وشافت ليلى واول ما دخلت المكتب..
حصه: السلام عليكم..
ليلى: وعليكم السلام..
يلست حصه وطلعت فوق بسرعه لانها كانت متأخره وما سلمت امس دانيال اوراقه بس مارد عليها وشكله مب في مكتبه..ومن صباح الله خير سمعت حس حمد ياي من تحت يرمس ويا حد وشكله صوت انثوي وهي تبادله الضحك..
حمد: اوكي طرشي الفايل وانا بشوف اخر الحسابات..
روضه تضحك: ان شاء الله استاذ..
حصه نازله وما سلمت..
حمد: وعليكم السلام..
وروضه راحت عنهم..
حصه طنشته وسارت..
حمد مبتسم بخبث وفي خاطره" بنشوف من يندم انا ولا انتي"
حصه دخلت المكتب وشافت روضه ترمس ليلى ويضحكن وهي انقهرت ..
حصه بضيج: لو سمحتي انا مشغوله اليوم وايد ممكن ما تيين المكتب..؟
روضه انصدمت وطالعت ليلى اللي عطت حصه نظره انه مب من حقها تسوي جي..
روضه: مشكوره يي منج اكثر..
وطلعت..
حصه : باللي ما يحفظج..ما كفوج الرياييل طبيتي على البنات..
ليلى ابتسمت لانها حست حصه انقهرت من روضه صدق..
ويلست حصه تشتغل وطنشت ليلى..بس والله اشتاقت لها تعبها الصمت وتعبت اكثر من الجفا..ليلى بالمثل تحس بس ما تقدر ترمس حصه تحس انها ما تبغيها وان شي بينهن انكسر ما يعتقدن انه بيتصلح..
.
.
وبعد ساعتين بالضبط من الصمت والوجوم وحصه بالرغم من التعب اللي في عيون ليلى وبالرغم من انها تدري بإن نفسية ليلى تعبانه الا انها كانت تكابر وهي رافضه تصرف ليلى مع روضه .. تحس بإن حتى ليلى قررت تخذلها وتبعد عنها ... كانت افكارها توديها واتيبها بين اللي تشوفه كل يوم في مكتب حمد وبين ليلى واللي صاير من بينهن وفي الاخير قررت تكلم ليلى بس قبل لا تفج حلجها دخل موظف عطاهن ورقة...
الموظف: هذا تعميم جديد وصل الحين واستاذ حمد امر نوزعه الحين قبل لا يخلص الدوام...
حصه: هاته اشوف..
الموظف وهو يبتسم بغباء: تفضلي يا انسه...
اول ما قرت حصه التعميم شهقت وبطلت عيونها وقعدت على مكتبها وعيونها على الورقة اما ليلى فيوم شافت الصدمة على ويه ربيعتها نست كل الي انقال وقامت تسألها شو في الورقة بس حصة ما ردت عليها فشلت الورقة ... بس ليلى وهي تقرا التعميم ابتسمت...
ليلى تبتسم: مبروك..!!
حصه وهي منصدمه: على شو؟؟
ليلى: مب هذا اللي تبينه من زمان..؟؟
حصه وهي معصبة وتحاول تمسك اعصابها: كنت اباه اما الحين ما اريده والله ما اريده...
ليلى متفاجأة: ليش ؟؟
حصه: ما اقدر اشوفه كل يوم ولا اقدر ادخل واشوف هالروضه عنده ولا اقدر اشوف بويهه لان لازم اتذكر انه عمره ما حبني وانه يحب وحده غيري .. تتوقعين بقدر اتحمل هذا كله ...
ليلى كانت متفاجأة من رد حصة ... هالحمد شو يسوي بهالبنت ... معقوله في حد يقدر يحب انسان بالرغم من كل عيوبه وبالرغم من انه عارف عيوبه ... حصه انسانه عاقلة ومحترمة بالرغم من عصبيتها ولسانها الطويل الا انها حنونه وما تضعف الا يوم يكون حمد في السالفة...
ليلى: حصه انتي بالضبط شو تبين .. خلاص ما تبينه ولد عمج .. ما تحبينه ؟؟؟
حصه تبتسم بمراره:اموت فيه بس ما ابغيه احس اني عفته ... من كثر ما احبه ما ابغيه .. تصدقين .. او بالاصح تفهمين..؟؟
سكتت ليلى ما ردت على حصه..اما حصه فكانت من داخل تغلي ودها تروح تصارخ في ويه هالحمد ليش يسوي بها جيه..وشو يريد منها لين متى...
"لين متى اتم اتعذب وهو لا حاس وكل يوم يدور وسيلة تعذيب يديده يمارسها علي ... بس مب حصه اللي راح تسمح لك تشمت بها ربيعتك اليديده روضه يا حمد وبتشوف..."
حصه: اظن باقي على الدوام ساعة بتصل في الدريول ايي وخلينا نروح ..(وهي تبتسم بقهر) ما اظن مديرنا المباشر بيرفض...
وفعلا في اقل من ساعة طلعت حصه وياها ليلى من الدوام..ما قدرت تيلس خافت تلقاه وتنفجر في ويهه وتسوي فضيحه في المكتب...
...................
العصر في بيت ام احمد يالسه فاطمه مع احمد وسلامه وام احمد في نقاش عائلي عن دراسة فاطمه وكيف بتكمل..
احمد: انتي متأكده منها؟
فاطمه: هيه والله هي وعدتني؟
سلامه: ما عليك على ضمانتي انا عفاري بنت ناس معروفين وعادي اهلها يسوون أي شي عشان راحة عيالهم..
احمد: وانتي امايه شرايج؟
ام احمد: والله اللي تشوفونه يرضيكم سووه..ولو اني ما بغيت سلامه تتحمل شغل البيت كله حليلها وين تروم له..؟
سلامه: ما عليج عمتي ان شاء الله بروم له واصلا انا بسجل الثانويه العامه مسائي تكون فيها فطيم ردت من الجامعه وتبادلنا الادوار...
ام احمد: الله يوفقكن..
احمد: خلاص اعتمد...؟
فاطمه تتريا رد امها: اللي تشوفه فديتك سو اللي تبغيه..
ويرن تلفون الصاله..وتنش سلامه..
سلامه: بنت حلال والله تونا نرمس عنج..
عفرا تبتسم: يالله اعترفي شو ذميتوا فيني..؟
سلامه: ماحيدج ما تثقين بعمرج..شو اللي فيج ينذم انتي؟
عفرا: تسلمين حبيبتي..امم ..!!!
سلامه: تبغين فاطمه.؟ لحظه بوصل لها التلفون..
نشت فاطمه وراحت عنهم بعيد شوي..
احمد بنقمه: عشتوا تعلمنا حركات يديده..
سلامه: خل البنت في حالها ربيعتها..
احمد: انا شقلت الحين..حتى انتي عدتج من الغباء اللي فيها..
وعند فاطمه وعفرا...
فاطمه: ماروم والله امي بتحشرني..
عفرا: الله يخليج حاولي..روحي كلميها الحين عشان خاطري..
فاطمه: والله انا ودي بس ما بتطيع اعرفها..
عفرا: جربي جربي مره وحده وشوفي..
فاطمه: اوكي لحظه..
فاطمه سارت صوب امها: امايه عفرا بنت خليفه تبغيني اسير لها اليوم بيتهم والله امايه شي ضروري..
ام احمد:قولي لها تيي...كثرت طلعاتج..
فاطمه: امايه عيب والله انا محتايه مفروض اخلص اوراقي عندها...
احمد: ليش ابوها في بيته الوزاره..؟؟
فاطمه: اسكت انت ممكن..
سلامه: لو سمحتي ريلي ما يخصج فيه..
احمد طيح عمره يسوي فيها مغمى عليه..
سلامه تدزه بعيد: مصختها عاد مب كل يوم تعيد الحركه ..اخترع شي يديد..
احمد: والله عطتني بالويه..
فاطمه: هاه امايه البنت تتريا...
ام احمد: خلاص روحي..بس ما بتطولين..
فاطمه تناقز: ان شاء الله فديتج..
وسارت تخبر عفرا اللي بغت تطير من الفرحه واتفقن على انهن يتلاقن العصر في بيت بو خليفه...
........................
في المغرب تلبس وتسفر وتعطر وبيطلع وهذا هو حاله رغم انه ما يطلع قبل بس من الحين كثرت طلعاته وما عاد يطيق البيت ولا القعده فيه..هي ساكته وما رمست بس ما قدرت تتحمل الوضع صار له اسبوع على هالحال الصبح يكون موجود في البيت والعصر لين قرب نص الليل يكون برا..
اروى: الحين انت طالع؟
ناصر وهو يعدل سفرته: هيه تبين شي؟
اروى سكتت...
ناصر: تبين شي؟
اروى: لاء..بس انت ما تيلس في البيت..
ناصر عاقد حياته: انا ريال شو ايلس اسوي؟
اروى تطالعه: ما قلت انك مب ريال بس انا بروحي في البيت..
ناصر: عندج امي سولفي وياها...
اروى تأفف...
ناصر طالعها بنظره: لا تتأففين ما تبين يلسي بالحجره مب لازم ترمسين..
اروى: بس هذي مب حاله عنبو من عرسنا بحياتك ما قلت لي تعالي بنطلع او بنسوي وكله يا طالع يا راقد..
ناصر: انا بيتوتي ماحب الطلعات تبين تطلعين يوم يكون لي مزاج بطلعج..
اروى انقهرت منه بس سكتت ما عرفت شو ترد..شو فيه هالريال...مب طايق يسمع منها كلمه..
اروى: انزين متى بترد؟
ناصر: ماعرف بس بتأخر ارقدي لا تترين..
اروى تتنهد..
طلع ناصر وقبل يصك الباب..
اروى: ناصر..
ناصر بملل: نعم!!!
اروى بقهر: ماشي خلاص...
ناصر صك الباب وطلع..ما يحتاي انه يفكر ليش يعاملها جي..اصلا ما يحبها..ناصر اللي عمره ما فكر يجرح انسان وبحياته ما جرح حد ودوم يراعي مشاعر خلق الله..قدر انه يجرح اروى ويبني فجوه كبيره من بينهم..من اول ليله ما قدر يتفاهم وياها وهي على امل انها يتحسن في ثاني وثالث يوم..بس تشوف الاسابيع تنقضي وهي على هالحال..وكل يوم يزيد عمق البعد من بينهم..
هي عروس مب قادره تتشكى وبيفكرونها تتدلع وهو ريال وللحين ما قدر يحسسها بالحب..الحب اللي تتمناه كل بنت من ريلها..الحب والامان والسكينه..للاسف هو يعرف من قبل ياخذها ان بيظلمها بس في قرارات لازم نتقبلها غصبا عنا..ولازم نطبقها غصبا عنا لانها صارت جزء ما يتجزأ من مجتمعنا...ومن حياتنا...
طلع ناصر وركب سيارته وهو يتذكرها وفتح الدرج اللي جدام بسيارته وطلع منه الصوره الكبيره اللي وياه صورته هو وفهد المرحوم سيف وراشد ومبارك وعايشه وليلى..
ليلى اللي اصرت ذاك اليوم تتصور حذاله..ولازم تكون ماسكه ايده وراشد بغى يذبحها بس طنشته ووقفت حذال ناصر وتصوروا كلهم في حوش بو راشد في حديقة البيت الضخمه..هالصوره ما اختلف في ليلى عن الحين غير شيئين بس..هو ان عمرها في الصوره كان 11 سنه وهو عمره 14 سنه..والشي الثاني ان نظرة عيونها تلمع من البراءه والفرح والامل الواسع بالدنيا..عكس نظرتها الحين اللي كلها يأس وحزن والف قصيدة الم...
ابتسم ناصر وهو يشوف صورتها ويتنهد من قلبه ويالس في سيارته...
" حبيبتي انتي...!!! متى ارد اداوم يالله كم يسوى اني اشوفج حتى لو ما كنتي لي...بصبر على نفسي شوي وان شاء الله بيي يوم بصارحج فيه بكل شي وان شاء الله ما بترديني يا ليلى وانا واثق فيج.."
للحين ناصر مصر ان ليلى بتقبل فيه زوجه ثانيه...كان لاغي وجود اروى وفي حياته ما يتخيل ليلى تبعد عنه او انها تكون لغيره..اصراره عليها مب طبيعي ومصر رضوا ولا ما رضوا انه ياخذها وينتظر بفارغ الصبر اليوم اللي بيجمعه فيها ويعيشوا بالحلم اللي بنوه من ايام الطفوله...
......................
في بيت بو خليفه كانت سلمى تتصل بربيعتها اللي بتخلص لها اوراقها رغم ان ابوها احتشر وحلف ما تشتغل ولا تطلع من البيت وهي مطلقه..بس خليفه عقب رمسة حصه فكر بالموضوع..وحلف انه يوقف ويا اخته وقال لها انه بيخلص اوراقها وخلصها لها وبتدرس في مدارس بوظبي وبتعيش معززه مكرمه في بيت ابوها احسن عن قبل...
في الصاله..
ذياب: وين امي؟
سلمى: مادريبها ظني مسيره عند حد من الحريم..
ذياب:والحشره اللي في ميلس الحريم لمنو؟
سلمى: محد بس ربيعة عفرا يايه تزورها...
ذياب بخبث: منو عندها ربع؟ اقصد من متى عندها ربع؟
سلمى تلف عنه بتسير فوق: والله مادري تقدر تتخبرها..يوم تروح ربيعتها..
طنشها ذياب ويلس في الصاله عشان يوم تخطف فاطمه يشوفها..
وفي ميلس الحريم...
فاطمه: اوف ما بغت امي تخليني ايي..
عفرا: شو قال اخوج وافق ولا لاء؟
فاطمه: هيه الحمدلله خلاص وافق..وبنخلص كل شي..
عفرا: تراني نسيت اخبرج..نتيجتي طلعت ونسبتي 98,4%
فاطمه شهقت: نفس نسبتي والله بس انتي اعلى مني بالاربعه هذي..اللي من عشر..
عفرا: قلت لج لا تتحدين..
فاطمه: مبرووك حياتي تستاهلين بس الجامعه بتكون الفاصل من بينا بنشوف من تييب الامتياز..
عفرا: مب انا اللي يغلبني الامتياز...
فاطمه: انا اقول حرمة اخوي خقاقه طالعه عليج ثرها..
عفرا: ليش؟
فاطمه: انتي ربيعتها..
عفرا: فاطمه انتي اول صديقه اعرفها في العالم كله..
فاطمه: والله؟
عفرا: هيه والله انا دومي وحيده وما عندي ربع هذي قصة عمر وسالفة طويله بعدين يوم نتفيج بخبرج بها كلها..
فاطمه:سمعي انا لازم اطلع الحين مافيني على حشرة امي...
عفرا: حرام ما يلستي...
فاطمه: تعالي بيتنا ترا امي ما بتخليني مره ثانيه ايي اذا ما زرتينا...
عفرا: اكيد بس والله محد متفيج لي..
فاطمه: ابغي اتصل وين تلفون بيتكم بكلم اخوي ييلي.
وهن طالعات كان ذياب يسمع رمستهن..
عفرا: بيوصلج دريولنا مب مشكله...
فاطمه:لا لا اخاف والله ما فيه على المشاكل..
عفرا: أي مشاكل لو تخافين بسير وياج انا..
فاطمه: لاء فديتج مابا وين التلفون انا بتصل لاحمد..
وتم ذياب يجلب التلفزيون..وهي لمحته وعصبت..وعطاها نظره وابتسم بلعانه..
فاطمه ترمس عفرا: انا ما بيي مره ثانيه بيتكم وهذا موجود..
عفرا منحرجه: خلاص انا برمس ابوي اليوم لا تزعلين والله مب قصدي ولا ادري انه هني..
فاطمه: وين التلفون ابا اسير بيتنا...
واتصلت فاطمه في احمد اللي يا وخذها على طول وعفرا تمت تتواجع ويا ذياب اللي فشلها وقهرها لين ما قالت بس..انحرجت صدق من فاطمه اللي بعدها ما عدلت علاقتها فيها وحتى وان بغت تتعدل يي هالذياب ويخرب عليها كل مره...
.......................
في الدوام بعد عرس ناصر اللي كان ماخذ اجازة ... والجو التعيس في مكتب البنات ومن اول يوم تعاملت فيه حصه ويا حمد كمسئوول مباشر لها .. حددت في بالها طريقة تعاملها وياه...
"اوكي يا حمد انا اراويك ..."
قررت ان كل شي او ورقة تريد مراجعة حمد تطرشها له ويا الفراش او ليلى ... وانها ما تجابله او تجابل حبيبة القلب اليديده ... وانها تبعد عن ويع الراس وتحاول تتجنبه قد ما تقدر...اول شي طوف لها حمد بس يوم شاف انها مصختها اتصل في مكتب البنات وردت عليه ليلى..
حمد: وين حصه؟
ليلى: موجوده ليش ؟؟
حمد: وليش ما اتيي تيب اوراقها بروحها مطرشتنها ويا الفراش هاي مب اول مرة تسويها...
ليلى: ليش فيها اخطاء؟
حمد: لا .. بس خليها اتيي..
ليلى: حصه حمد يقولج لازم توديله الاوراق انتي..
حمد: قوليله اني مشغوله الحين عندي وايد شغل اذا يبغي شي روحيله اني الله يخليج...
ليلى ما عرفت ترد على حمد..
حمد: خلاص سمعتها..
وصك السماعة بالقو لدرجة ان حصه سمعت الصوت بس ما اهتمت ... خلاص ما تقدر هي بعد تتحمل ... ولا هو قادر يقبل تصرفها هذا...خاصه ان روضه طفرت به من كثر ما اتيي المكتب وهو عاطنها مجال بس عشان تمر حصه واتشوفها .. طلع من مكتبه وراح مكتب البنات وهو معصب ...
حمد: السلام عليكم..
ليلى وحصه : وعليك السلام والرحمه..
نشت حصه اول ما دش حمد المكتب بتطلع منه..
ليلى: وين بتروحين حصه..؟
حصه: بنزل تحت اودي اوراق لشؤون الموظفين وامر على البنات..
حمد: وليش ما طرشينهن مع الفراش..
حصه: (وعيونها في عيونه) لاني انا اريد اروح...
وطلعت قبل لا يرد عليها حمد وليلى انحرجت من الموقف اللي صار .. اما حمد فحلف انه ما يعديها لها .. فاض به الكيل تحمل حركاتها الغلسه بما فيه الكفايه ومب مستعد يتحمل اكثر ... واللي ما يعرفونه الاثنين ان حصه دخلت الحمام وقعدت تصيح لانها ما قدرت تمسك نفسها اكثر .. فاض بها الكيل كانت في داخلها تحترق وتحس بتمزق نفسها هي بعد تفهم كيف تحبه وما تبغيه ... كيف ما تقدر تتحكم بمشاعرها .. عمرها كله وهي تحب هالانسان ... وهي تحبه كان يحب غيرها .. وهي كانت تترياه وتتحراه يدرس ويفكر فيها مثل ما تفكر فيه كان يفكر في وحده غيرها ..
في مكتب البنات كانت ليلى تتريا حصه اللي تأخرت وتصلت في شؤون الموظفين وقالولها ان حصه ما يت ... اما حمد كان يتصل كل خمس دقايق ويتخبر عنها خاصه بعد ما اتصل شؤون الموظفين وقالوله انها مايت...
طلعت حصه من الحمام وردت المكتب وعيونها حمر من كثر الصياح والتردد اللي تعيشه والضغط اللي حطها فيه خليفه بعد ما خبرها باللي سواه حمد عشانه وعشان ابوهم ...اول ما دخلت المكتب راحت ليلى صوبها وهي معصبة...
ليلى: انتي وين كنتي؟؟
حصه: كنت تحت...
ليلى بعد ما لاحظت عيونها شهقت: انتي كنتي تصيحين؟
حصه: ماشي يرزا اصيحه!!!
وقبل لا ترد ليلى عليها دخل حمد المكتب وهو معصب على الاخر ... الظاهر فعلا انه بيرد يربيها ويخليها تكلمه بأدب...
حمد وهو معصب: وين كنتي ؟؟ (بس حصه رفعت راسها واطالعته بنظرة وما ردت عليه فكمل) اظن اني اكلمج ولا ما تسمعين..؟
حصه:اسمع ... تسأل على أي اساس رئيسي المباشر ولا شي ثاني..؟؟
حمد وهو يطالع في حصه بغضب: ليلى طلعي برع المكتب وصكي الباب...
حصه: لا لا تطلعين...
حمد وهو يكلم ليلى وصوته بدا يعلى: طلعي وصكي الباب لا يصير شي تندمن عليه انتن الثنتين...
طلعت ليلى وصكت الباب وراها لان ما كان فيها على الفضايح ولانها اول مرة تشوف حمد معصب جيه .. اما حصه تقول في خاطرها
"ما عليه يا ليلى تخليني في هالموقف شو اسوي الحين .. يا رب ما اضعف ... يا رب ما اسكت له"
حمد: انتي بالضبط شو مشكلتج ...؟
حصه وهي تلعب في اوراقها: ماشي ما عندي مشاكل...
حمد ير الاوراق من جدامها وفرهن على الارض: اظن اني اكلمج ويوم اكلمج سمعيني واطالعيني...
حصه بعد ما تفاجأت من الحركه وهي معصبه: هه سمعناك خير شو عندك...؟
حمد: اول شي مب جيه تكلمين مسؤولج بالشغل ... وولد عمج ولا ما سنعوج بيت ابوج ... اذا ما رامولج انا برد اسنعج من اول ويديد..
حصه باستهزاء: هاه سمعوا من يتكلم ... الله يخليك روح سنع نفسك اول الله يخليك وبعدين تعال حاسبني..
حمد: انا مب قايلج ما تنزلين من مكتبج يوم داومين ولا تروحين تحت..
حصه: ليش ان شاء الله ... انا موظفه هني حالي حال الباقيات ولا حلال عليك ان الموظفات يقعدن في مكتبك وحرام على غيرك..؟
حمد: شووو؟
حصه: وبعدين خلاص هذاك اول يوم اخذ اوامر من عندك استاذ حمد .. الحين انت ما تأمرني الا في الشغل وبس...
حمد معصب وصوته بدا يعلى: بتم أأمر عليج لين ما تموتين او اموت انا تفهمين وغصبن عليج وعلى طوايفج كلهم بتسمعين اللي اقوله...
حصه: ليش لا اكون جاريه من جواريك ... لا انسى حصه الاولانيه..
حمد بسخريه: لا والله وشو اللي غيرها حصه الاولانيه ... توج حسيتي انه لازم يكون عندج كرامه؟؟
حصه بعصبيه: انا عندي كرامه لكثر عنك مليون مرة...
كانت اصوات حصه وحمد عاليه شوي وليلى تسمعهم برا وتتمنى انه محد ايي من الموظفات ويسمع اللي يصير بين حمد وحصه ... ومستغربه من تغير حصه الغريب على ولد عمها ... هي تحبه وتعرف ان القصة جديمه ومنسايه ليش الحين بتحاسبه على ماضيه ... وهي في افكارها ما حست الا بروضه عدالها...
روضه: استاذ حمد وين رحت له المكتب ما حصلته؟
بس قبل لا ترد عليها ليى سمعت صوت حمد من المكتب وهو يواجع حصه..
روضه: شو يسوي داخل؟؟
ليلى بضيج وعصبيه: وبا بنت عمه يتفاهمون..
روضه: على شو؟
ليلى: سوالف عائليه شوي..!!
روضه: بس نحن في الشغل وما يخصها السوالف العائليه هنيه!!!
ليلى بضيج وعشان بس تعرف روضه:والله واحد وخطيبته كيفهم وين ما يبون يحلون مشاكلهم ... وحمد اكبر مسؤول في غياب ناصر...
انصدمت روضه من اللي سمعته من ليلى ... اما ليلى اللي قصدت تسمعها الجمله يمكن تحل عنهم وتريح هالحصه اللي ما عمرها ارتاحت من حبت حمد .. حتى الفترة اللي تعدل فيها حمد طلع شي من الماضي وخرب عليها حياتها...
ليلى بلؤم: اووه ليش انتي ما تعرفين ان حصه مخطوبه لحمد من يوم كانوا صغار وعشان جيه ما عرست للحين..؟
روضه بألم: لا...
ليلى: على بالي حمد قالج..
روضه: ما يكلمني الا في الشغل...
انصدمت ليلى اذا علاقتهم في حدود العمل ليش حمد يحاول يبين العكس ... ليش يريد حصه تكرهه وتحتقره ... معقول يفكر في انه يبعد حصه عنه ..
اما في المكتب كانت حصه معصبة من اسلوب حمد وياها بس هو معصب اضعاف اضعاف عصبيتها هيه .. لانها ما سكتت وتمت ترد عليه...
حمد: انتي بالضبط شو اللي شايفتنه علي انا اريد اعرف بس؟؟
حصه تضحك باستهزاء:حليلك يا ولد عمي مسكين وبريء امره محد يقدر يمسك عليك شي انت اصلا كلك غلط من ساسك لراسك..
حمد: وتوج تعرفين هالشي ... اني غلط من ساسي لراسي
حصه: لا
حمد: عيل كنت عاجبنج اشمعنى الحين..؟
حصه: يا اخي بكيفي حره غيرت رايي ... الناس اتغير مثل ما انت تغيرت
حمد: حصه اذا ما عدلتي اسلوبج تعامل وياي رئيس لج بالشغل واصطلبتي بتشوفين شي عمرج ما شفتيه من حمد...
حصه: هاه خوفتني..!!!
حمد: حصه ...لا تجبريني اروح اوقع على قرار فصل من الشغل...
حصه: (بتحدي) ما تروم!!
حد: تبين تجربين...؟
حصه: (وهي عيونها في عيون حمد)لا ما يحتاي..(يرت ورقه من على المكتب وكتبت استقالتها وفرتها في ويه حمد) هاي استقالتي...وفرت عليك قرار الفصل...
وراحت صوب الباب بتطلع وحمد لين الحين مب مصدق انها فرت ورقة استقالتها في ويهه وان اللي كانت تكلمه نفسها حصه بنت عمه اللي طول عمره يخسس فيها ويذله .. اما هي فيوم طلعت لقت ليلى واقفه ويا روضه جريب المكتب ... فرفعت واحد من حياتها واطالعت روضه من فوق لين تحت بنظرة وخلتهن ومشت...
بعدها انتبهت ليلى انها واقفه وربيعتها نزلت تحت فدخلت المكتب اول وشافت حمد واقف في مكانه
ليلى: لا تقول انها صدق استقالت
حمد: هيه وهاي ورقة استقالتها
ليلى: لا تقبلها (سكت حمد ما رد عليها وردت ليلى تكلمه بتوسل) ارجوك حمد صدقني انها بداوم بس هيه تعبانه شوي خلها ترتاح هاليومين في البيت
حمد: لحقيها الله يخليج تحت لا تخلينها بروحها... وانا بمر بيت عمي بعدين...
طلع حمد عنها وخلاها في مكتبها..وفي داخله مزيج من الاحاسيس اللي مب عارف يفسرها..وخوف من انه يكون خسر حصه للابد..وكان في داخله اصرار عجيب انه يعرف سالفة حصه كامله حتى لو يسأل ليلى المهم انه يعرف..

[البدوي الحبوب]

تسلم يمينج اختي الغلا وعسى ماننحرم من هالتواصل والمتابعه الجميله

تحياتي لك

[الغلا]

شكرا لك اخوي البدوي على هالتواصل ... ونحن بانتظار الجزء الــ28


اختكم
الغلا

[البدوي الحبوب]

الحلقه الثامنه والعشرون


طلعت ليلى من المكتب بسرعه و نزلت ركض على الدري تبغي تلحق حصه وكانت متأكده في قرارة نفسها ان ربيعتها منهاره ومنتهيه..كانت ليلى ناسيه كل شي حواليها في هاللحظه وما يهمها شي كثر ما كانت تفكر في نفسية حصه ونست كل شي واي شي نست ناصر وجرحها اللي ما برا ونست روضه وحمد ووغادتهم..كل اللي يهمها ربيعتها وبس..
وصلت ليلى لبوابة الشركه الزجاجيه وردت غشوتها على ويهها وربعت برا تطالع يمين ويسار بس ما لقت حصه..

"وينها وينها...؟ يا ربي يا حصه ليتني ما خليتج بروحج..!!!"

بدون وعي طلعت تلفونها واتصلت فيها حتى الرقم ما عرفت تدقه مثل الناس من كثر ما صبوعها يرتجفن..التلفون يدق بس حصه ما ترد..

"يا حصه ردي ارجوج مب وقت هالسخافه"

حصه شافت رقم ليلى وشلته على طول..

ليلى بخوف: حصه وينج غناتي؟

حصه بضيج وصوتها ثجيل من الصياح: هني شو تبين؟

ليلى: حصه فديتج وينج؟ لا تسيرين البيت برد وياج..

حصه: يا غبيه انا في الشركه للحين ما طلعت..

ليلى: وين؟

حصه: عند البوابه بس على ينب..انا اشوفج صبري بييج الحين..

ليلى: اوكي..

وسارت حصه صوب ليلى اللي من شافتها يلست ساعه تهدي فيها وتحاول تريح نفسيتها..

ليلى: ردي داخل احترقنا..

حصه: هذا دريولنا وصل يالله انا بسير..

ليلى: خلاص بروح وياج..

حصه طالعتها بطرف عينها: ردي الشركه مب وقت مغامرات..

ليلى: جب..

وطلعن ويا بعض...سيارة قوم حصه..

حصه: ليش ييتي..؟؟

ليلى: حصه عن الاستهبال سمعيني لا تعذبين عمرج ترايه قلت لج من قبل وبتم اقولج..بعدها امه ما يابته اللي يستاهل دموعج..

حصه كانت مدمعه من ورا نظارتها الشمسيه وما رمست عشان ما تعرف ليلى انها تصيح..

ليلى: حد في بيتكم الحين؟

حصه: ماظن..بوصلج وبرد بيتنا..

ليلى مبتسمه: بروح وياج..

لفت عليها حصه مستغربه: والله؟

ليلى: والله ما عندي غيرج لازم اكون وياج..

صدت حصه الصوب الثاني: تخليتي عني وطلعوا لج ربع يداد..

ليلى بثقه: ما يسوون ظفر من ظفوورج..

حصه تتنهد: مدري الاقيها من من ولا من...!!

ليلى : هونيها وتهون..هذا ولد عمج مالج بد منه...

حصه ما ردت عليها...ووصلن بيت بو خليفه ونزلت ليلى وحصه مع بعض..سايرات الصاله...

ليلى: بترياج هني...

حصه: لاء تعالي وياي فوق ماريد انزل تحت..

ليلى : اوكي..

وطلعن فوق حجرة حصه يالسات على شبريتها..حصه من وصلت فردت شعرها وغسلت ويهها وعقب ما عقت نظارتها شافت ليلى بشاعة الحزن في نظرات حصه..وعمق الجرح في صوتها..

حست من نظراتها ان جرحها لا يمكن يبرى وان حصه المتعاليه باحساسها والمصره على الغلط في حبها لشخص العالم كله ما يحبه انهزمت خلاص والحب اللي بقلبها شكله بدا يذبل..

يلست حذال ليلى وما تكلمت وغصب عنها دموعها ما قدرن يحبسن عمارهن زود في محاجر عيونها...

ليلى بحزن: لا تسوين بروحج جي..حصه والله محد يستاهل..صدقيني للحين مانخلق اللي يسوا دمعتج..

حصه بصوت كله جروح وعذاب: تقولينها يا ليلى بالكلام سهله..لكن ما تدرين بالنار اللي ف قلبي..

ليلى: والله ادري..ادري..حاسه فيج..اللي فيني مب اقل منج..انا عشت 13 سنه على وهم وامل غبي ميؤووس منه..ضاع عمري على كذبه..

حصه: وانتي مب اخس عني..ليلى انتي عشتي الحب مع ناصر وتدرين انه يحبج..ما عشتي تنتظرين مشاعر عمرها ما بتكون لج..

ليلى: شوفي يا حصه تعرفين ان اللي بينا اكبر من كل شي وماظني بقولج شي مب من صالحج صح؟

حصه: ليش عندج شك ان نوايانا صادقه صوب بعض؟

ليلى: انتي اذا شاكه مشكلتج لكن انا الله يعلم اللي بخاطري يا بنت عمتي..

حصه تبتسم: قولي وانا متأكده اني مستحيل ارفضلج طلب لو شو ما تعلق بحياتي..الا شي واحد...

ليلى: اللي هو؟

حصه تصد الصوب الثاني: اني اسامح حمد...!!

ليلى حست ان ربيعتها لا يمكن يبري جرحها أي طبيب: حياتي مافكر في هالسخيف وما يهمني كثر ما تيين على بالي ياللي محد يسواج ومحد اغلى منج الا امي وشيخه وراشد وحمدان وسلامه..

حصه تضحك: ما شاء الله شو هالمرتبه الغاويه اللي حطيتني فيها؟

ليلى استانست لضحكة ربيعتها: حمدي ربج اصلا قلبي فيه زحمه زين لقيتي مكان..

حصه بنظره خبيثه: زحمه شو؟

ليلى: زحمة حب..

حصه: حب من؟

ليلى: حبكم انتوا...الحب اللي لا يمكن تقضي عليه الايام..هالحب اللي ثابت هو حب الاهل ..

حصه تتنهد: هيه والله ماشي مثل حب الاهل هو اللي يدوم وغيره الا سحابة صيف مالها اساس ولا ثبات..تيي تغرينا بالمطر والظل ويوم نربع صوبها تشرد ولا جنها صارت ولا استوت..

ليلى: المهم سمعيني شو بقولج وخليج من البكاء على الاطلال..

حصه: مافي اطلال اصيحها انا لو صحت بصيح نفسي واحساسي المغشوش..

ليلى: محد غشج..الحب اللي حبيتي حمد ما كان بايدج قولي لي من يروم يختار اللي بيحب...والله اللي اعرفه ان نحن ما نسير نقول الله اليوم بحب هذي وبحب هذا..الحب ما يستأذن يا عيوني حد..يي فجأه..

حصه: ويروح فجأه..الحب مثل فقاعة الصابون ما يدوم..

ليلى: يدوم لو عرفنا كيف نحافظ عليه ونخليه متماسك قوي...صدقيني في قصص حب تدوم سنين وسنين وقبل التنفيذ تتدمر..واقرب مثال لج هالبنت اللي جدامج(وتأشر على عمرها) وفي حب ما يي الا بدقايق ويدوم العمر كله يعني فرق مشاعر وعلى حسب الناس..

حصه تتنهد: مادري ماقدر اركز في شي ولا استوعب شي..

ليلى: سمعيني غناتي ..ترا والله ربي يحبج..

حصه: اشدراج؟

ليلى: ليش ما توافقين على فهد؟

حصه : ماعرف...

ليلى: يا غبيه هالخطوبه هديه من رب السما عشان تبدين حياه يديده بعيده عن التافه حمد..

حصه: مادري..

ليلى: شوفي غناتي الحين انتي بعدي عن الشغل وحمد والضغط والمشاكل اسبوعين وودري فكرة الاستقاله هذي..وصدقيني هالفتره بتكون كافيه ان انتي تتخذين القرار المناسب..

حصه: ماريد ارد الشركه..

ليلى: ماظني اهون عليج..بعدين ما عليج انا برمس ناصر اول ما يرد انه يحولج مره ثانيه لدانيال ويكنسل ادارة حمد عليج..

سكتت حصه..وليلى حست انها اقتنعت..

ليلى: شو قلتي؟

حصه: خلاص موافقه..

ليلى مبتسمه وتشد على ايدها: ايوه جي اباج...ما عليج من حد انا احب حصه القويه اللي ما تهزها ريح..لا ريح حمد ولا الف من شاكلته...

حصه: تعالي بنروح المطبخ خاطري اكل شي..

ليلى: لاء انتي روحي انا برد البيت لو تدري امي اني هني عادي تفرني العزبه..

حصه تطالعه بنظرة لؤم: فكه منج...!!

ليلى تضحك: اوكي ماعليه ما عليه...بنشوف بعدين من يدورني..اشك انج اول وحده بتيي تلحقني..

حصه تنش بيطلعن من الحجره: مب من شوي لازم بعد تعرفين غلاتج عندي...

وطلعت ليلى ويا حصه اللي نزلت المطبخ وليلى سارت ويا دريولهم والبشكاره وردت الشركه على طول..
.......................



وهو قاعد في حجرته ويحاسب نفسه على كل شي سواه من رد البيت عشان يستفز خليفه وابوه ويكابر احساسه بان اللي سووه كان في مصلحته وياب نتيجه معاه بس ما يريد يخليهم يحسون بالفخر باللي سووه فيه ... حتى عبدالله اخذله واتخلى عنه وخلاهم ينفونه ... في المكان اللي سماه المنفى اسوه بالشباب اللي كانوا فيه .. حس بجيمته وانه ريال ... حس انهم يتحدونه ولازم يثبت للي معاه انه مب اقل منهم وانه يقدر للتحدي ... مرت عليه ايام كان يتمنى انه ينسحب او يمرض ويعفونه بس كبرياءه كان يمنعه ... كان يشوف شباب يمرضون ويطلعون من الدورة على المستشفيات قبل لا يكملونها وكلهم حزن والم وقهر لانهم ما كملوا ... اللي معاه كانوا ضباط وعسكريين الا هو المتطوع الوحيد بينهم واللي الكل اعجب فيه وهم يتحرونه ياي لانه مختار مب مجبور ... حس بمعنى الرجولة .. وتعلم الوطنية من عيونهم ورغبتهم بحامية هالوطن ... كان بينه وبين نفسه يحس بالعار من اللي كان يسويه ... ومنقهر لانه مااختار بكيفه هالطريج وانهم اختاروله اياه ... ابتسم وهو يذكر كيف يلعوز عفاري بنت اخوه خليفه كل ما شافها واللي مستغرب منه ويتمنى انه يعرفه كيف تغيرت وشو اللي خلاها تتغير ... تجاهله لاخته حصه مب تكبر بس لانه منحرج منها ومن الطريقة اللي كلمها بها ... فعلا العسكرية للرجال وتربي رجال ... ومثل ما يقولون ربعه اللي تعرف عليهم هنيه تعرف منوه اللي معدنه اصيل ومنوه اللي مزيف ومجرد كلام ... يدري ان خليفه سجله في كلية الشرطه واربع سنوات وبيكون ضابط له هيبه ... وكان مستانس ومرتاح للخط اللي حياته تمشي عليها ... بس بالرغم من كل هذا كان يكابر ... كان اكثر وحده يغايضها ويطفر بها عفرا يباها تشتكي لخليفه عشان يعرف ان العسكريه والدورة اللي فروه فيها ما فادت ... تحاشيه حصه اللي بينه للجميع انه وغاده منه وقلة ذوق كانت من الاحراج ليس اكثر ... تحرشه بربيعة عفاري بس عشان تشتكي عند ابوها ويعرف انه بعده راعي بنات .... وهنيه رده تفكيره لربيعة عفاري ... هيه صدق حلوة وغرشوبه بس مب هذا سبب تحرشه بها ... يبغي يطفر بهن لين ما يشتكن ...حتى سمر اللي كانت تخاف منه وما ترمسه كان يواجعها كل ما شافها مجابله التلفزيون او نازلة على الدري ... رن تيلفونه ورد من افكاره هاي كلها وشاف رقم واحد من اللي كانوا وياه في الدورة واستانس ربعه ما نسوه ... وهو قرر انه ما يرد حق أي من اللي كان يعرفهم قبل الدورة واللي صاع وياهم وعلى ايديهم...

ذياب : مرررررحبا ملييييييون ولا يسدن ...

حميد: ولك مثلهن وزد فوقهم عشرة اضعاف

ذياب: ما ينفع تدفعهن بيزات...

حميد: هاهاهاها انت اللي دفع لنا .. انت اللي ماشاء الله اللهم لا حسد ماكلين نص السوق على قولة التجار...

ذياب: هب هباك الله عن تاكل اخواني وابوي ونعلن افلاسنا ونشحت جدام المسايد..

حميد: ياخي قلنا اللهم لا حسد ... المهم انت خلاص من طلعت ما تريد تعرفنا لا تيلفون ولا كلمة حشا مب جنا ربع وتعذبنا مع بعض ... وتزحفنا مع بعض وضغطنا مع بعض..

ذياب: الله يخليك الا هالسوالف ... والله ما احب اتذكر ... وكل ما اشوف ويهك بتذكر..

حميد: ماعليك ... ابغيك تتدرس وتدخل عسكريه ان ما زحفتك يوم بكون اعلى من رتبتك..

ذياب: هاهاهاها ماعليه تريا عاد..

حميد: المهم ما بتمر علينا ... تعال الميلس عندي الليلة عازم الربع كلهم اللي تخرجوا من الدورة..

ذياب: (وهو مستانس إنهم ما نسوه) والله ... خلاص اكيد اني بيي حد يفوت اشكالكم بكنادير وسفر..

حميد: هاهاهاها ... ماعليه عيل بتشوفنا كل ليلة هميه الشباب كل واحد فيهم قرر يعشينا عند ليلة بمناسبة نجاحنا في الدورة..

ذياب: خلاص ويوم بيوصلني الدور ... بيكون عشاكم في ميلس ابوي..

حميد: هاهاها ان شاء الله ... ياللا يا بطل خلنا انشوفك الليلة وناخذ علومك..

ذياب: ان شاء الله...

ابتسم ذياب بينه وبين نفسه ... وقرر انه بعد ما يسبح يقعد ويا امه شوي وبعدين يروح ميلس حميد...

.
.

نزل ذياب من حجرته وحصل عفرا طالعة من المطبخ في بيتهم وسمر تطالع التلفزيون ... وهي من اطالعته خافت منه وتدعي في خاطرها انه يطلع دون ما يكلمها...اما عفاري اللي كانت منقهره من حركاته عطته نظرة ومشت عنه... فابتسم وقرر يتحرش فيها..

ذياب: ماشاء الله الملكة في بيتنا ... هاه حبيبة ابوها المينونه شحالج..؟

عفرااللي تحاول تتجنب ذياب قد ما تقدر) بخير عمي شحالك؟

ذياب: يا ثقالة دمج ومبيخ الكلمة من حلجج...

عفرا: مشكور...

ذياب: هاه الدلوعة ما تشكيتي عند باباتج علي ... ولا خلاص ما يحبج شرات اول ويخاف تنجرحين من الكلمة..

عفرا: لا ما تشكيت ما اريد اغث ابوي واضيج به..عشان شخص ما يسوى ثره زين...

وراحت عفاري عن ذياب قبل لا يرد عليها ... وهو في خاطره يقول..

" يا قوة عينج يا بنت خليفه بس انا وراج لين ما اطفربج"

وشاف سمر وهي قاعده تجلب في التلفزيون وراح حذالها وهو معقد حياته..

ذياب: أي انتي شو تسوين؟

سمر: (وهي خايفه) هاه اطالع التلفزيون..

ذياب: وانتي ما وراج شي غير التلفزيون ذلفي درسي..

سمر: ذياب المدرسة بعدها ما فتحت .. الاسبوع الياي...بس عفرا تروح الجامعه لانهم بادين قبلنا باسبوع..

ذياببقرف) زين تحركي سوي شي ... روحي امشي في الحوش ... روحي عند امج .. لا تغدين بليده..

سمر: زين الحين بروح ...

كان ذياب من داخله ميت من الضحك عليها ... وهي خايفه وقايمه بتروح تمشي مثل ما قالها..

ذياب: اقول.؟

سمر: (بخوف) هاه!!

ذياب: قوليلي نكته...

هنيه صدق فجت سمر عيونها ... وحل مكان الخوف صدمه عجيبة ودهشه ما تنوصف ... ذياب اول مرة في حياته يقولها تقول له نكته ... اول مرة في حياتها يعبرها ... ويوم طال سكوتها...

ذياب: أي انتي شو فيج اتسمرتي جيه ... صدق ما عندي سالفة اتكلم ويا غبيه مثلج..

سمر: انت صدق تبغي تسمع نكته..؟؟

ذياب: قولي بشوف منو يقول نكت احلى انتي ولا ربعي في الدورة..

سمر: انا طبعا...!!!

ذياب: (يريد يقهرها) ما سمعت شي..

سمر: هاه ... تصدق نسيت كل النكت اللي عندي!!!

ذياب: انتي غبية ياللا ذلفي لا اكفخج ... ما اريد اسمع شي...

سمر: (منصدمة أكثر) هاه ... زين زين بروح لا تعصب...

طلع ذياب من البيت وهو يضحك على سمر..وعلى الرعب اللي شافه على ويها قبل لا يطلع..وهو مستانس انه بيشوف ربعه اللي كانوا وياه في الدورة كان نجاحه ساحق وهذا اللي ما خبره ابوه ولا اخوه..كان الثالث على الدورة...يعني تفوق وتحمل اللي الكل راهن على فشله في تحمله والاهم انه اثبت لنفسه انه ريال....

........................

اول اسبوع في الجامعه قبلوا فيه فاطمه وعفرا وكانن طبعا ثنائي ولا اروع..فاطمه اللي ودرت البيت وخلت دراستها وجهه ما يلفت نظرها عنها شي..كانت اكثر ايامها في بيت عفرا بس عفرا ما جد زارتها ولا يوم..رغم ان ذياب مب مخلنها في حالها بس هي قابلته بالعين الحمرا وعلمته اصول المغازل من اولها لاخرها..ومع هذا ما استسلم وتم يتحرش بها ويضايجها مب حبا فيها ولكن غاية في نفسه يبغي يوصل لها...ولكن للاسف ما حققها...

اما سلامه اللي انغمست في شغل البيت..كان جدولها صعب وصعب جدا بعد...كان عليها انها كل يوم تنش الساعه 5:30 تسوي لريلها وفاطمه الريوق وتدخنه قبل يظهر وترتب حجرتها وتكنس الصاله والممرات وتنظف الحديقه وتغسل الصحون وتطبخ الغدا وتيلس ويا ام ريلها وتحفظها القراءن لين ماتيي فطيم وتغسل صحون الغدا عقب ما تتغدا ويا ريلها وامه...وترفع شوي منه طبعا لفطيم لين ما تيي من الجامعه الساعه خمس العصر...

من الساعه خمس العصر تبدا راحة سلامه اللي هي مب راحه وتتلبس ويوصلها احمد النهضه عشان تدرس مسائي وفاطمه ترد خمس ونص وتستلم شغل البيت...لين الساعه 11 طبعا...هالوضع وايد معور قلب احمد لكنه ما يقدر يسوي شي ولا هب قادر يدفع 4000 درهم يقضي فيها تأشيرات واقامه وفيزا دخول الشغاله..غير الفحص اللي يباله الف درهم ومعاشها اللي ما يقل عن 450 درهم شهريا...فكان شي صعب عليه خصوصا بعدما دخلت فطوم الجامعه ومصاريفهم زادت شوي..الحاله كانت وايد كسيفه لكن الحب اللي ربط بين هالاربعه خلى الحياه تكون يسيره وسهله لان القلوب قريبه من بعضها...فما لقوا أي فجوه بينهم وما كان التعب يدل لهم طريج بالعكس كان للتعب لذه وللحب لذه واجمل حب بينهم اللي جمع بين سلامه وريلها....

العصر الساعه 5:15 كانت تربط شعرها اللي تعدا مفقرها عقب القصه اللي كانت متمسكه بها ايام المدرسه وشعرها اللي ما يتعدا جتوفها واليوم طال لين المفقر وطافه بعد...وربطته وكحلت عيونها وابتسمت وهي تشوف نفسها وتحس انها كبيره ..كبيره مب عمرا...لان عمرها للحين بس 18 سنه يعني بعدها زهرة شبابها للحين ما تفتحت عدل..بس تشوف عمرها كبيره قلبا وقالبا...

احمد يدخل مفاتيحه في جيوبه: يالله حبيبي...

سلامه انتبهت: اوكي اصبر بتشيل والبس عباتي...

احمد: يا حبكن للمنظره يالحريم..

ابتسمت سلامه: لولا المنظره ما شفتونا حلوات هالكثر...

احمد بنقمه: الحين انتي حلوه؟

سلامه بطرف عينها: عندك شك..!!؟

احمد: جمالج مقبول ولكن ما تفتنين ولاتذبحين...

سلامه بنقمه: ايه صح...انا مب حلوه..اشوفك ما تحبني..يوم اني مب حلوه ليش تعبت عمرك وخطبتني جان دورت لك على وحده غرشوبه ومزيونه (ونغزته بالرمسه) وصغيره شوي عشان تناسبك ..

احمد: خيبه..انتي محد يناقشج حشا لسانج اشطوله..بس ترايه بقصه لو تمادى...بعدين انتي صغيره ليش تبيني ادور على صغيره...؟

سلامه تلبس عباتها: تراني اقولك يمكن تروم تخطب لك وحده عمرها 14 سنه بعدها ما تفهم شي عشان تلعب من وراها بدون ما تحس..

احمد يضحك: سمعي يالبرنسيسه انا لو ابى العب بلعب بدون ما تحسين ولا تدرين..(ومسكها من خدها) بس من عنده هالدانه ويفكر في غيرها..

سلامه تشققت بس تكابر: احم وراي مدرسه واخرتني..(وتبتسم بفرحه) عيبني لقب البرنسيسه...!!

احمد بخقه: من زمان محد مدح غرورج صح؟

سلامه: الصراحه انا كانوا حواليه ناس دوم يشحنون غروري بنفسي ويمدحوني...صح انت ما تقصر بس غير يوم حد يقولي البرنسيسه صدق اتشقق..

احمد يضحك ويشل عنها ال handbag ويظهرون..وفي الصاله سلموا على ام احمد..

سلامه: عمتي يوم ترد فطامي قولي لها اني حطيت لها الاكل في الثلاجه خليها تطلعه وتسخنه اذا كانت يوعانه..

ام احمد: ان شاء الله..

احمد يسحب سلامه بعبط: يا ذكيه وليش توصين امي مب نحن رايحين نييبها الحين ليش العباله..؟

ام احمد: هيه والله صدق..

سلامه مفتشله: اوكي نسيت يالله بسرعه حمود تأخرنا..

وطلعوا للسياره العاديه جدا...عقب افخم انواع السيايير اللي كانت تركبها سلامه تواضعت لنوعية بسيطه جداً..وما عارضت صح الوضع في البدايه كان صعب بس عقبها ما يهمها شو تركب شو تلبس اهم شي مع من تعيش ومن يحبها ومن لاء..

في السياره كانت تتلمس ايدينها اللي بدت تحس فيهن بخشونه واضافرها بدت تحس بهن هشات سريعات الكسر..بحياتها ما فكرت انها ممكن تقطع بصل او تكوي ثيابها فما بالها بثياب غيرها..عمرها ما فكرت تمسك صابون الصحون وتغسلهن بايدينها الناعمه وما حلمت بيوم تمسك فيه قطع الدياي المدهنه اللي دهنها وريحتها تلوع الجبد..بحياتها كلها ما تخيلت انها تكنس او تغسل او حتى ما توقعت ان هالايدين الناعمه بيوم بتنظف الزراعه من الشجر الميت والورق الطايح على الارض ومن قذارات الطيور وعفن اكياس الزباله...

مسك احمد ايدها وحبها وحس شو فيها...

احمد بحزن: اسف والله بس صدقيني غصبا عني ولو بإيدي بخدمج بعيوني هب بس بخدامه يا سلامي..

سلامه صدق افتشلت وحست كيف ريلها قريب منها لدرجة انه يعرف بشو تفكر وكيف تفكر وما قدرت ترد عليه..

احمد يطلع السياره من البيت: اصبري والله مادري هل بقدر اييبها ولا لاء...

سلامه ابتسمت: مب مشكله نحن للحين مرتاحين وامورنا تمام التمام بس شوي نفكر بالمستقبل .يوم .....(وسكتت)

احمد: يوم شو؟

سلامه: الحين بنروح الجامعه ولا المدرسه..

احمد ابتسم: لا تغيرين السالفه يوم شو؟

سلامه احمرت بس ما قدرت تتهرب من سؤاله: يوم تبدا الامتحانات..

احمد يضحك: يوم تبدا الامتحانات ولا يوم ييون العيال..

ابتسمت سلامه ونزلت راسها: بنروح الجامعه صح؟

احمد وقلبه يدق بسرعه: هيه..

سلامه ساكته...واحمد ماقدر يصبر اكثر..

احمد مبتسم من قلبه: تعرفين ودي في شو؟

سلامه بطرف عينها: شو؟

احمد يضحك: ودي انزل الحين الشارع وايول..

سلامه تضحك: لا دخيلك مافينا على الفضايح...يقولون تخبل الريال..

احمد وقلبه يدق بسرعه: والله فيني هبه وبستخف خاطري ايول عشان خاطر عيونج بس.

سلامه بخقه: ادري تحبني بس لو تبا تستخف استخف في البيت احسن..ترا الشارع مب ملك خاص..

احمد يسحب ايدها ويحطها على قلبه: سمعي شو سويتي فيه...

سلامه وقلبها يدق اسرع: مب انا هو مستخف..

احمد: ذبحتيه وتقولين استخف...ماهذا المنطق...؟

سلامه تضحك: افا يا رجل..ما ذبحتك شسوي يعني ربي خلقني حلوه وانحب..وافتن قلوب الناس...

احمد بنقمه: تفتنين قلبي انا بس مب قلوب الناس...لاني لو اكتشف ان أي قلب انفتن بج عادي اعدمه..

سلامه تشققت: اقولك بس يالله انزل اتريا اختك تحت..اخاف تستخف علينا في السياره وبعدين بقولك..لا تقول لي شي جدام فطيم والله استحي..

احمد بخبث: ان شاء الله...

ونزل احمد عند باب الجامعه يتريا فطيم تظهر لانه وقف السياره شوي بعيد من الزحمه وعقبها بيوصل حرمته النهضه ويرد فطيم البيت....


في صالة بيت ام راشد كانت واقفه ليلى تطالع برا وتشوف حمدان راد من الشركه الساعه 6:30 المغرب وما دخل يسلم عليهم..حمدان وايد تغير ..ما تدري هل للأسوأ ولا للاحسن..صح منضبط ومثابر في شغله وابوه يمدحه بس المشكله انه قطع في اهله وما ينشد عنها...ابتسمت وهي تفكر فيه ايام الثانويه والاعداديه كان متكل معتمد عليها اعتماد كلي ومتمسك بكل شي تقوله ويشوف فيها مثله الاعلى..وهي بالمثل ما قصرت وياه..لكن الحين تحسه استقل..احساسها باستقلاله يحسسها بالراحه بس بالوحده في نفس الوقت...

وتذكرت اخوها اللي ظلمته وظلموه كلهم..معقوله انه للحين شال بخاطره وضايج منهم بس ما يبين..صدق حست انهم طعنوا كبرياءه بس اللي عيبها بالموضوع انه كان مطنش وماهتم لهم ولا عبر السالفه..
شيخه: امي طالعيني امي..

ليلى تشوفها: هاه عيوني..

شيخه: لعبيني..

ليلى تشلها: العبج بشو؟

ام راشد طالعه من حجرتها: نزليها يا ليلى البنت مب خفيفه تشلينها بتكسر ظهرج..

ليلى تحبب خدود شيخه: عادي يتكسر ظهري عشانها..

ام راشد: كيفج..سمعي يا بنتي...

ليلى: يا عونج...

ام راشد: عانج الله..بنسير بيت راشد زين؟

ليلى تتنهد: توني افكر فيه والله..بس ليش نسير..؟

ام راشد: بسير اشوفه شو بيسوي بعمج خادم..

ليلى: عمى بعينه لا تقولين عمي..

ام راشد: خلي عنج المنكر الا عمج ونص..يالله امشي جدامي بنسير لراشد..

ليلى: مب في بيته...

ام راشد: الا في البيت انا ادريبه..

ليلى: شدراج؟

ام راشد: توني خليت تاما تتصل لي وخبرتها ميرنا انه في البيت..

ليلى: اوكي صبري بلبس شيخه نعالها وانتي بكرامه..

ام راشد تتمصخر: لا لا شليها احسن..

شيخه: امي ششششليني ماليد امششششششي..

ليلى تضحك وتغايض امها وهي شاله شيخه: اوكي بشلها مب لازم اتعبها..

ام راشد: البزا ما منه فايده..شوفي كيف انتي غاديه من البزا..

وهن يطلعن من باب الصاله وام راشد متقبضه في ايدين ليلى عشان تتماسك..

ليلى: أي بزا يمه والله اني مظلومه..

ام راشد: بزاج ابوج وسيف لين ما قلتي بس..

ليلى بطرف عينها: وضربني راشد ومبارك لين ما قلت بس..

ام راشد: تستاهلين..محد قالج تعاندينهم..

ليلى: فديته سوافي محد يسواه...الله يرحمه..

ام راشد: خلاص لا تتفدينه..قد فداج..

شيخه: ابويه ثيف...!!

ليلى: درينا انه ابوج..يالله متى نوصل ذبحتيني يا دبه..

شيخه: انا مث دبه..اتي دبه..

ودخلن بيت راشد..الصاله كالعاده هدوء وسمعن صوت خربطه في المطبخ التحضيري..ووايجت ليلى وشافت حمدان يسوي له عصير...

ليلى: هاااي..

حمدان يلف: هايين (وقرب يسلم على يدته وعليها)

حمدان: شحالج يدووه..

ام راشد بنقمه: الحمدلله بخير..

حمدان: افا يالغلا ليكون بس زعلانه مني؟

ام راشد: وليش ازعل منك..يوم انك تدري انك قاطع وما تنشد عني..ليش ازعل منك..القطاعه في هالبيت بالوراثه..متورثنها من عمامك..عمك مبارك ما شوفه الا في السنه مره وعمتك عايشه ان بغت تتسوق في بوظبي خطفت علينا...ما بتدور للقطيعه من بعيد فديتك..

حمدان: فديت روحج يالغاليه من قالج اني ما انشد عنج كل ما ييت قالوا لي تصلي ولا راقده..

ام راشد: لا لا خل عنك المنكر ..يوم كنت تدرس كنت ادمي وتيي تسير علينا والحين من كبر راسك بالشغل ما قمنا نشوفك..خافك الا راشد ولد ناصر وانا مدري...!!!

ليلى تضحك: ولدها من حقها تمدحه وتضرب فيه المثل..

وان راشد يطلع من حجرته وهم واقفين في الصاله..

راشد مبتسم: مرحبا الساع مرحبا مرحبا بالغاليه يا هلا مليون...جنة الدنيا في بيتي وانا مدري..

ويقرب منها يلوي عليها ويحبها على راسها ويحبب كفوفها..وهي لاويه عليه تدعي له ساعه..

ليلى: حليلي من اقرب احبها تدزني بعيد..

حمدان: لازم بعد بجرها هالبزا مب من شوي..

راشد يضحك: تغارون؟ انا ما شوف امي في اليوم غير دقايق وانتوا مجابلينها ليل نهار..حاسدين الفقير على موتة اليمعه..

ام راشد : فديت هالعرضه....ويييه من يسواه بو حمدان...!!!

راشد مبتسم بحنان لامه: الا انتي من يسواج علني افدا هالخشم..

وقبضها من ايدها وقربها صوب الكنبه ويلست وهو يلس حذالها...

ام راشد ترمس ليلى: سيري هاتي لاخوج شي ياكله فديت روحه..

ليلى: الحين انتي يايبتني اطبخ هني ولا ايلس اسولف..

حمدان: كشخه يضيفون راعي البيت...ما شاء الله عليكم..

راشد يضحك: اسكت انت..

ليلى: شو تبى يا خوي حبيبي..

راشد: يلسي انتي وحمدان برمسكم...(ويتلفت) وين شيخه؟

شيخه تربع في الصاله وفوق الدري وفي كل بقعه: انا هنييييييي..

ليلى: لا اله الا الله...

ام راشد: هالبنت يبالها ضرب ...

راشد: حرام عليج يا امايه يتيمه ما تنمد الايد عليها...

ام راشد: اليتم مب عذر التربيه تربيه لليتيم ولراعي الوالدين..

حمدان: يدتي شعندها اليوم محتشره؟

ليلى: علمي علمك..

ويلس راشد قريب امه يسولفون وحمدان قرب من عمته يكلمها...

حمدان: افف ضلوعي تكسرن من الشغل..

ليلى: توك راد ليش ما تسير تستريح.؟

حمدان: لا ماروم عندي كذا شغله ابغي اخلصهن..

ليلى: في البيت ولا برا؟

حمدان: في البيت..(وبهمس) رمستي ابوي؟

ليلى: تباني ارمسه الحين؟

حمدان: لا لا مب جدام يدوه خله بعدين يوم تظهر..

ليلى: اذا ظهرت امي بظهر وياها..

حمدان: لا انا بوصلها وانتي تمي وياه...

ليلى: امك وين؟

حمدان: ظني في بيت ييرانا..

ليلى: زين وخر عني بسير ايلس عند ابوك شوي..

حمدان: شو هالزياره المفاجئه لبيتنا؟

ليلى بهمس: ما تعرف نحن شو سوينا براشد طول العمر اللي طاف..خلنا بلباقه نطيب جرحه شوي..

حمدان حس بقلبه يدق وسوا عمره ما يعرف شي بس تم ساكت..وليلى نشت تيلس حذال راشد..

ام راشد: وشو بتسوي الحين؟

راشد: عادي خليهم على راحتهم ما بسوي شي..

ليلى: وان رفعوا قضيه؟

راشد: خلهم يرفعون شعلي منهم..عندي الاثبات وكل شي..

ليلى: راشد ليس ساكت كل هالوقت..؟

راشد: لاني مره وحده كلمت خوج مبارك وخبرته كل شي ويوم طلب مني الاوارق ما كان عندي شي فما قدر يصدق...اذا اخوك ما يثق فيك ويحترم فيك رجولتك ما عاد تقدر تثق في جنس مخلوق..

ليلى حست بجرح اخوها في كرامته: نحن نصدقك والله...

راشد يكلم ليلى من قلبه: ليلى ابغيج في موضوع بعدين...

ليلى: حتى انا والله..

ام راشد: شعندكم انتوا قولوا اللي تبغونه جدامي..

ليلى: اسرار..

حمدان: ابوي وعمتي لو يتفقون نحن نروح فيها..

ام راشد: يالله انا بروح البيت قومي يا ليلى وصليني الحين بيأذن العشا..

راشد: يلسي فديتج ما يلستي فديتج تعشي عندي الليله..

ام راشد: لا لا ماعرف اتعشى الا في بيتي.يالله يا ليلى نشي..

حمدان: احم..يدوه انا بوصلج..

ام راشد: لا لا ماباك ابغي ليلى..

ليلى تضحك: امي خلي حمدان يوصلج ابغي راشد في موضوع..

حمدان: افا ما تبيني ما عليه ما عليه..باجر بعرس وبسير الفجيره عشان صدق تتولهين علي..

ام راشد: خاف اهل الفجيره ينشدون علي ويتخبروني عن حالي وانت في نفس البيت وما تدري عني وين..الغريب احسن عنك..

راشد: امي اليوم وايد شاله في خاطرها عليك يا حمدان شو مسوي بها مسود الويه..

حمدان: عمتي وعمي ما يسألون عنها وتقول اني نفسهم مب جن ابويه ما ينشد عنج يا يدووه..

ام راشد: اييه ودك انت بس تكون نص راشد..فديته هو الوحيد اللي ما طاع يظهر عني ويبغيني اتم وياه ولا انت وعمامك مالكم امان..عمك مبارك ساقته حرمته يسير دبي وعمتك عايشه التلفون ما ترفعه تتصل بي بعدني حيه ولا ميته..

حمدان: لا اله الا الله اليوم نهايتي على ايدينج يدووه..

راشد ميت ضحك على امه وهي تتناقر ويا ولده وليلى تطالعهم وتضحك وشيخه الله يعلم وين يالسه تنبش وتخرب..

طلع حمدان ويا يدته وليلى نشت هي وراشد بيظهرون الحديقه ييلسون فيها ويتكلمون باللي عندهم...
.
.

في الحوي برا ورغم انه الجو كان شوي مرطب لكن يلست ليلى على الكرسي مجابل راشد اللي اترياها ترمس وهي بنفس الوقت تترياه يرمس..

ليلى: راشد قول اللي عندك..

راشد: انتي قولي اللي بخاطرج يمكن يكون اهم..

ليلى: صح اللي بقوله مهم بس خلني اسمع منك..

راشد متردد: ليلى..!! ما ابغي اطول بالموضوع وخاطري اصلا ما قوله بس حبيت مع الايام اني ارمسج فيه ولو اني ادري ان رمستي الحين مالها معنى ولا جيمه لان اللي صار صار وما عاد للكلام لزمه..

ليلى: قول اللي بخاطرك..

راشد: ليلى اللي صار ببيت عمي خادم اعتبرها مصيبه مادري من وين حلت علينا..ما كان في الموضوع ضحيه غيرج انتي...يمكن الحين الكل يطالع لي بنظره اني السبب باللي صار لج او انج للحين موجوده في البيت العود او أي شي ثاني...مادري كيف كنت بقدر اثبت لج انه ما يخصني بالموضوع ومادري كيف كنت بتعامل معاج عقب عرس ناصر ...ليلى ريل عمتي كان يدري اننا ايتام مالنا غير هالحرمه تربينا..بس اللي ما يعرفه ان ابوي ربى رياييل ما عليهم رمسه يقدرون يطلعون الحق لو من عين الشيطان...

ليلى تتنهد: انا ابد ما لمتك ولا بلومك على أي شي يصير..كان من حقي اشك لان الكل يرمس وما عندي شي ادافع به او اثبت فيه الصدق...بس الحين والله اني بيني وبين نفسي نادمه على كل شي ولو الندم متأخر..وعمري ما بلومك على شي مالك دخل فيه..

راشد: زين بس ترى قوم عمتي يتحرونا ماخذين ميراث عمتي وما عطيناها نصيبها للحين..مع ان ابوي متفق مع عمي خادم وموقعين في المحكمه انها توكل ريلها عنها..بس هو يبغي الحلال مرتين والله يمهل ولا يهمل.

ليلى: انت شو بتسوي الحين؟ ليش ما ترفع دعوى عليهم انت الكسبان صدقني..

راشد: افا يا ليلى وتهون عليج عمتج اللي ربيتي على ايدينها ينعق ريلها بفضيحه في السجن..يهون عليج ناصر وفهد يتمون معايرين بابوهم وهم بلحاهم ..يهون عليج ريل عمتج اللي رباج ويا ابوج ينعق في السجن بشيبه..؟ مب انتي اللي تقولين جي وانا اتحراج ملكة الاحساس...

ليلى استحت من عمرها: بس هو تغير علينا ليش ما نسوي به شرات ما سوابنا..ليش نحترم حياته وهو ما حترمنا؟ ليش نتمي بعيون الناس ما عندنا مذهب ومب راعين حق وماكلين مال الحرام وهو يتم المصلح الطيب اللي ماشي شراته؟ كيف نجابل الناس بويه مظلوم في نظرهم ظالم...؟

راشد: انتي ظالمه؟

ليلى: لاء..

راشد: انتي واثقه من عمرج؟

ليلى: اكيد..

راشد:زين ليش منكده على عمرج..الحق مصيره يطلع اليوم ولا باجر ولا يمكن حتى يوم تكبر شيخه وتصير بعمرج الحين..لا تصيحين شي ما يرد وسمعتنا على العين والراس وما عاش اللي يشكك بها ترا هاييل نفوسهم ضعيفه..

ليلى مرتاحه: انت مرتاح؟

راشد: وراضي عن نفسي كل الرضا ولله الحمد..

ليلى: راشد ما ولهت على سلامه؟

راشد تغير شكله: شو تبين؟

ليلى تبتسم: مابغي شي بس ما ولهت عليها؟

راشد: تتم بنتي وقطعه مني ومالي بد منها حتى لو ما قلت اني اوله عليها..

ليلى حست بالحب الكبير يتدفق من قلب راشد: الله لا يحرمنا منك..

راشد ما يحب هالمواقف فغير الموضوع على طول: انتي شو تبين تقولين؟

ليلى: هيه صح بس لا تحتشر علي ترايه بقولك وانت فكر..

راشد يبتسم: قولي...

ليلى: حمدان يبغي يعرس..

راشد انصدم: لا والله؟

ليلى خافت: شو ما عيبك الموضوع؟

راشد: من قال ما عيبني بس تو الناس..

ليلى: هو مستعيل يخطب يخاف تروح من ايده البنت..

راشد بنظره متسآءله: يعني متفقين ومحددين البنت بس يايين تخبروني عسب اوقع..؟

ليلى مستحيه: لا والله بس هو خبرني وقال لي خاطره فيها وانت كريم وولدك يستاهل...ما بترده في اللي يبغي..

راشد بنظره جاده: ما ظني حد بتناسبه كثر مريم بنت عمه مبارك..

ليلى وقلبها يدق بسرعه وتحس الموضوع تعقد: لاء مب هي..

راشد: عيل منو؟ من اللي بيخطبها وتعيبه وشايفنها قبل..؟

ليلى: هي من اهلنا بس من بعيد شوي..

راشد: من بنات خليفه؟

ليلى انصدمت: كيف عرفت؟

راشد: تراهن وياه في المدرسه..كيف ما عرف..

ليلى منصدمه اكثر: هيه..يبغي بنت خليفه العوده..عفرا...

راشد ابتسم: وليش منصدمه؟

ليلى: لا ولا شي؟

راشد: خلاص برمس امه اليوم وبنشوف ان شاء الله..بس ظني صغيره على العرس..

ليلى تبتسم: اكبر من سلامي بسنه..يعني تروم تعرس..

راشد: بس وراها جامعه مب يالسه في البيت صح؟

ليلى: قلت لك راشد بس خطبه او ملجه والعرس عقب التخرج..

راشد ابتسم: خلاص انا بشوف ام حمدان وعقب برمسه هو وبيني انا وابوها رمسه ثانيه..

ليلى: ان شاء الله...

راشد: في شي ثاني؟

ليلى مستانسه: سلامة راسك حبيبي..

راشد ينش: يالله فديتج انا ظاهر..

ليلى وقلبها يدق بسرعه: الله وياك ..تحمل على عمرك..

راشد: ان شاء الله..خلي بالج من الوالده..

وطلع راشد موتره وروح وليلى سارت لحمدان عسب تبشره ودخلت صالة البيت وشافته ويا امها يالسين يسولفون وشيخه طايحه على ريول حمدان..

حمدان نش من شافها: هاه شو قال؟

ليلى : كم تعطيني؟

حمدان متشقق: يعني بشاره؟ بعطيج الف درهم..

ليلى بطرف عينها: الف؟؟!!! دخيلك يالكريم ..الحين الالف يعقونها في الشارع شو بسوي بها الالف ما تلبس لي شيخه ثوب مثل العالم والناس..

حمدان بطرف عينه: يالبطره...!!

ام راشد: وشعنه تبين الف.؟

حمدان: لا يدووه بعد مب عايبتنها الالف...

ليلى: صدق مالت عليك..يوم ان البشاره بتفر فيها الف بس..كيف تفكر تاخذ بنت خليفه بن مبارك..ما يبونك هذيل يبون حد من ثوبهم..

حمدان يضحك: الله يخليج انتي..هذي اسوق لها حلالي ومالي وهلي كلهم.

ام راشد: وييه من هذي؟ اسميك يا راشد ما يبت خير..

حمدان: شفيها امج علي؟

ليلى: شيختك هذي يالهرم..

ام راشد: من هذي اللي بيسوقنا لها مسود الويه...؟

ليلى: حرمته...شفتي يا امايه اخرة العشره بيسوقنا شرا الذبايح ونحن اللي مربينه وتاعبين فيه..عشان بنيه..


ام راشد: انا اقولج هالولد ما منه خير طالع على عمامه..

ليلى تضحك: تستاهل..

حمدان: ما علينا منكن حريم ما تنلامن...قولي شو قالج؟

ليلى: قال ان مريامي اولى فيك من بنت الغرب..

حمدان عصب: والله مابغيها والله ماخذها..

ليلى : اييه هد اعصابك بعدني ما خلصت..

حمدان: شو بعد؟

ليلى: يوم اقنعته شوي قال لي بيشاور امك ويصير خير ..لو وافقت بيرمس ابوها..

حمدان مبتسم من خاطره ويحب عمته على راسها: فديت خشمج..

ليلى: مالت عليك يا بو الف درهم..لا وبياخذ بنت خليفه مبارك..حليلك ثرك ماتدري انها تنام على ريش النعام والالف تفرها في الشارع فر...ما تبغيها الالف يا شيخ..

حمدان نافخ عمره: ما عليج منها طال عمرج انا بمشي عشان عيونها السوق كله..

ليلى: الحمدلله والشكر.

ام راشد: انتوا ترمسون عن شو؟ من بيعرس..ليكون هالياهل؟

حمدان: عمتي انا طالع تفاهمي ويا امج لو اتم اكثر عن جي عادي انجلط..

ليلى: لا تعذر بامي قول انك مب رايم تصبر وبتسير تحتفل ويا ربعك..

حمدان طالع يضحك: اكيد لازم..خطبت بنت الحسب والنسب..

ليلى تضحك: ما شاء الله ضامن الموافقه؟

حمدان يغمز لها: اكيد من حقي..مب حمدان بن راشد ان ما وافقت علي...

ام راشد: صدق بيعرس؟

ليلى تيلس عندها: يبغي بنت خليفه ولد خالتي عايشه...

ام راشد مبتسمه: فديته ويعرف ينقي والله..

ليلى: تعرفينها؟

ام راشد: ما جد شفتها ويلست وياها بس دامها مناسبتنه خل ياخذها...

ونشت ليلى: امايه بسير فوق اراجع بعض ملفاتي والله ما دقيت شي من امس..(وتمد ايديها) يالله شواخي بنروح فوق...

شيخه تنش وليلى تشلها..

ام راشد: انزلي عقب تعشي وياي..

ليلى: ان شاء الله غناتي..

وطلعت ليلى فوق وام راشد تمت في الصاله تطالع التلفزيون..
......................
الصبح في بيت بو خليفه كانت سمر يالسه تتريق في الصاله ويا حمده وسلمى...وعفرا كانت في الجامعه بعدما بدت تداوم هي وفاطمه هالاسبوع..شوي وان حصه نازله لهن من فوق وويهها شكله غلط على كثر ما تصيح وكثر نفسيتها الزفت والوضع البايخ اللي منحطه فيه والاجازه اللي خذتها عشان خاطر ليلى والاستقاله اللي ماانقبلت من حمد بعدما رمستهم ليلى وقالت لهم انها بتاخذ الاجازه عشان ترتاح شوي..الشي اللي ما خلى حمد يهدا ولا يرتاح وهو بس قلب السالفه عناد..وكبرياء وغرور وانتقام للكرامه..

سمر: حصووه تعالي تريقي..

حصه بدون نفس: ماريد شي..

حمده: عمتي انتي من متى ما كلتي شي خافي الله في نفسج..

سلمى: خليها تسوي ريجيم عشان بالمره تختفي..

حصه طلعت ولا ردت على حد فيهن وسارت الحديقه بتيلس فيها شوي...

حمده: عمتي متى بيوون عيالج؟

سلمى: في الويكند..

حمده: بس هالوقت اللي بتشوفينهم فيه..؟

سلمى بحزن: هيه ترا مدارسهم ومصالحهم العامه في دبي اكثر من بوظبي..والمحكمه قررت يتمون في دبي لين الويكند ويردون بوظبي..

حمده تتنهد: الله يعينج..

ونشت سلمى..

سمر: على وين ؟

سلمى: بغسل ايديه..

حمده: سمر وين يدتي ويدي؟

سمر: راحوا العياده امايه بتسوي فحص تقول يمكن عندها سكر.

حمده تبتسم: ان شاء الله ما فيها..

سمر بخوف: حمده ولهتي على المدرسه؟

حمده: اكيد لاء..وع مادري كيف بتحملها هالسنه كلها..ما عندي حد كل اللي احبهم راحوا..

سمر: ليش منو تحبين..ليكون بينقلون من عندكم ابلات تحبينهن..؟

حمده: وع انا احب مدرسات..؟ هاللي ناقص..انا يالله احب امي وابوي ويدي ويدتي وعفاري وعمامي وعماتي..

سمر: عيل منو تحبين وراح عنج..؟

حمده تتنهد: حبيبتي سلامي مادري كيف بقضي سنه كامله بدونها...حمدان وعفاري محد..المدرسه والله بايخه..

سمر: كم باقي لج سنه؟

حمده: وحده..

سمر بحزن: يا حظج يا ليتني مكانج..تبادليني..

حمده: لو تعقين تحت ريولي مليون ما عدت الايام اللي راحت..انا ما صدقت انجح وافتك تروحين تعيديني سبع سنين ورا ليش؟ تبيني اموت قاصره عمر..

سمر: اقولج حمده...بسألج شي..

حمده: قولي عمتي ..

سمر متشققه: اول مره تزقروني عمتي..كشخه يوم احس عمري كبيره..

حمده تضحك: قولي قولي يالله شو بتسألين..؟

سمر متردده: الحين انت اذا كنتي معصبه وسبيتي عفاري وهي محد وانا اسمع وعفاري ما تسمع..ورحت خبرتها انج قلتي عنها جي وجي..تعتبروني فتّانه..؟

حمده: وييه شو هالحركات مال اول..لا ما بتكونين فتانه ..قولي لي من سب من وانا بخبرج اذا فتنه ولا لاء..؟

سمر: لا ما بخبرج ادريبها فتنه بس انتي فضوليه تبين تعرفين وانا ما بخبرج..

حمده: يا عوافتج...

سمر: تبين تسمعين نكته؟

حمده تنش: لاء..تعالي بنروح نغير جو عمتي حصه شوي...حليلها من خذت اجازه وهي صاكه على عمرها صكه..

سمر: بتروغنا..

حمده تضحك: انتي تنراغين ...بنات خليفه ما ينراغن طال عمرج..

سمر بنقمه: وبنات مبارك محد يروم لهن..بعدين حصه ما تروم تروغنا لان الحديقه مب مالتها..

حمده: يالله نطلع..

وطلعت سمر وحمده سايرات صوب حصه اللي صدق كانت تعيش عالم ثاني من الحزن والكآبه والضيج..

حمده : نحن يينا..

سمر: عشان نونسج..

حصه: اهلين..يلسن..

حمده: ليكون قطعنا حبل افكارج بس؟

سمر: ووقت قيلولتج..

حصه تطالع سمر بطرف عينها: خلي عنج الفلسفه..شو من قيلوله الساعه 11 الصبح..؟

سمر: ارجووج ارجووج ارجووج..خلني اقولج نكته..الله يخليج الله يخليج..

حمده مبطله عيونها: وليش تستأذنين قوليها على طول..

سمر: لاء اول شي استأذن اخاف اقول نصها وتنش لاني ما نشدتها اول وبعدين تخترب وما حصل نكته اقولها..

حصه تنش: يا عوافتكن تييبن المرض..

حمده مسكت ايدها: عمتي دخيلج يلسي والله ارف وملل..

يلست حصه: زين اهدن شوي لوعتن جبدي..وين عفاري؟

حمده: لا انتي مب في البيت...عفرا مداومه بالجامعه..

حصه: اووه والله نسيت..

وقبل ترمس سمر وان ذياب طالع من باب الصاله ياي صوبهن...

ذياب من بعيد شوي: حمدووه تعالي..

حمده بقرف: شو يبغي هذا بعد..

سمر ترتجف: الله يعينج على التكفيخ..

حصه : ليش ضربج...؟

سمر: لا بعده..بس يهدد..تصدقين قالي قبل يومين انه يبغي يسمع نكته..بغيت اتخبل..

حصه: طنشيه...

وعند ذياب وحمده..

ذياب: روحي حطي لي الريوق..

حمده : عندك البشاكير قلهن يحطنه..

ذياب يأمرها: اقولج انتي بتحطينه يالله وصليه حجرتي اريد ارد من الميلس واحصل ريوقي جاهز..

حمده بقهر: والله مب خدامتك...

ذياب يقاطع رمستها: روحي وخدامه غصب عنج يالله..انا عمج وأأمر عليج بالشكل اللي ابغيه تفهمين..

حمده: ظني لو وصل الموضوع لابوي ما بتقول جي..

ذياب بخبث: قولي له ما يهمني..هاللي ابغيه انج توصلين له الرمسه.

حمده: ولانك تبغيه يوصل انا ما بوصله اوكي..ونفس ما قالت لي عفاري بطنش ولا جنك ترمس..

ذياب: ماشاء الله تمشيج المينونه على كيفها..

حمده: والله محد......

ذياب: زين جب ولا كلمه روحي جهزي ريوقي...

حمده سايره المطبخ وتدعي عليه طول الدرب...وهو راح يضحك عليها ومر صوب سمر وحصه وطنشهن..

[البدوي الحبوب]

عقب ما اقنعت ليلى حصه انها تنسى سالفة الاستقاله وتقدم على اجازه مدتها اسبوعين تراجع فيها نفسها وشو تبغي..وتبعد شوي عن حمد اللي بحياتها ما ارتاحت في حبه..وعن روضه اللي بتييب لها المرض على كثر ماهي قاهرتنها..وفي بيت ام راشد الضحى كانت ليلى يالسه في الصاله متملله وشيخه تطالع التلفزيون باقي اسبوع على المدارس ويسجلون شيخه روضه اولى طبعا ليلى كانت تعاني وما تدري كيف ممكن تقنعها او تحبب لها المدرسه ومع هذا بتحاول وياها بكل الاساليب بس عسب تقنعها وتخليها ترتاح لو انها بعيده عنها..

وفي التلفون..

حصه: ليش ما رحتي الدوام؟

ليلى: رحت بس رديت من وقت لاعت جبدي..

حصه: ليش من شو ما عندج حد..؟ لا تقولين انج ولهتي علي...؟

ليلى: لا تصدقين عمرج ما ولهت ولا شي بس ملل انتي محد احس بغربه..

حصه تضحك: الله عليج مادري تحبيني هالكثر...؟

ليلى: شفتي عاد..

حصه: ناصر ما رد ..؟

ليلى ببرود مصطنع: لاء..

حصه: شو تحسين الحين؟

ليلى: تصدقين احس بوحده فضيعه في غيابج..

حصه: بتتعودين..

ليلى: والله ماقدر..اليومين اللي طافن احس عمري مضيعه..

حصه تبى تقهرها: اوكي سيري على روضه..

ليلى فهمت قصدها: فديتها روضه طيبه بس ما تسد عنج.

حصه تبتسم: لا ترفعين ضغطي بطاريها وشخبارج بعد؟

ليلى: ادعيلي بس..كيف بقنع هالبنت تسير الروضه والله انها ازمه..

حصه تضحك: الله يعينكم يالله اعلنوا حالة الطواري في البيت..

ليلى تضحك: اعلناها من زمان شو رايج تكلمينها شوي..

حصه: اكيد يالله ازقريها بطفربها..

ليلى: شيخه تعالي تلفون..

شيخه طنشتها..

ليلى: هييه تعالي اقولج تلفون..

شيخه تلف راسها: منو؟

ليلى بخبث: حصه!!

نشت شيخه تربع لاول مره هي على العاده ما تحب حصه على كثر ما تتحرش فيها بس اليوم تبغيها..وليلى مستغربه..

شيخه تير السماعه: الوو..

حصه: والعثره يالدفاشه قولي (وبصوت ناعم) الووو

شيخه بدلع: الووو

حصه: ويل حالي كم بعيش انا..شو هالانوثه..

شيخه بحزن: حثثثه..

حصه وقلبها يدق بسرعه: عيون حصه وقلبها وروحها واحساسها..انتي اليوم تبين تقضين علي..

ليلى لاحظت حزن شيخه وانها بتقول شي يعور القلب..

شيخه: امي ضربتني..وما خلتني اروح معاها..

حصه: ما عليج منها انا بضربها يوم ايي بيتكم..

ليلى حست بتأنيب الضمير رغم انها بس هزبتها..وشلتها ويلستها على ريولها وهي لاويه عليها وشيخه بالمثل متعلقه في رقبتها ودافنه ويهها في صدرها..

حصه: الووو.

ليلى تشل السماعه: صبري خلني احبها..

حصه: لا حياتي سون فلم هندي عقب... الحين رمسيني..

ليلى: والله انج!!!

حصه: مسودة الويه شو مسويه بها تتشكى منج..تدري بي مناضله لحقوق الاطفال ومارضى عليهم..حتى رشحوني السنه لليونيسيف..

ليلى: لا الله يخليج ما نروم...واللي تسوينه في سمر شو تسمينه..؟

حصه: لكل قاعده شواذ..

ليلى تستهبل: وشو رديتي على اليونيسيف يوم طلبوج؟

حصه: رفضت طبعا وقلت لهم يخلوني اشتغل في البنتاغون...تدرين ليش؟

ليلى انفجرت ضحك وهي جنها تعرف السبب: لاء ماعرف..

حصه: عشان افجر مكتب روضه السخيفه...

ليلى ميته ضحك وحصه وياها..

حصه: الا صدق شو مسويه بالبنت والله شكلج مأذيتنها ليكون ملييتي من دور الامومه؟

ليلى: والله ان شيخه معصبه عشان ما وديتها عرس ناصر ولانها بعثرت الحجره يمكن من اسبوعين بس بعدها ما نست ثأرها..

حصه: هي وين الحين..؟

ليلى: المبزايه يالسه فوقي وجاتمه على انفاسي..اونها تعوض الحنان اللي فقدته وهي تكابر هاليومين..

حصه بصوت حنون: فديتها يا ليلى والله انها تستاهل اكثر من جي..ولا تتحرين عمرج مهما عطيتي بتوفين لانج لو عطيتيها العمر كله ما بتوفينها...

ليلى: ادري والله..بسوي اللي اقدر عليه..

حصه: ما يطلبونها بيت خالها..؟

ليلى: خلاص عقب ما عرس احمد ما يطلبها انشغل بالعروس..بس مرات يوم بيطلعون دبي او يتمشون ياخذونها..تراها ما تحب فاطمه عسب جي ما يخلونها ترقد ببيتهم ويردونها طوالي هني..

حصه: احسن..

ليلى: حصه شو بتسوين في حمد.؟

حصه بضيج: خله يولي لا تييبين طاريه..ترايه عايفتنه اسكتي دخيلج..

ليلى: يعني خلاص ما تحبينه...؟
حصه صخت..

ليلى: قولي ارمسي..

حصه: احبه بس مابغيه..

ليلى: لغز هو ولا شو السالفه...حصه انتي بالضبط شو تبين ؟

حصه تتنهد: مادري والله...الله يعيني..انتي شو موقفج من ناصر الحين؟

ليلى: مادري باجر بيداوم والله يعين..تصدقين بديت اسوي عملية جرد لكل مشاعري ابى انهي كل شي وحتى الماضي مابغي اعيشه..

حصه: شو صار؟ تتوقعين عمرج تقدرين تنسين..

ليلى: الماضي صح يبقى بس ينتهي من البال..لو انهيتي الايام اللي راحت من خيالج وفكرتي شوي جدام يمكن تعدلين كل شي انكسر..وان تميتي تصيحين اللي راح عمرها السعاده ما بتدل لج درب..صدقيني يا حصه..

حصه فكرت بعمق: ااااه

ليلى : انتي تحاسبينه على شي خاص فيه وهي ذكرياته..تراها ملكه هو بس ومحد يقدر يحاسبه عليها..

حصه: مب ملكه يا ليلى والله مب ملكه...الوقت اللي انتظرته فيه وعشت احبه ولحبه وانا على امل انه يوم من الايام يلتفت لي ولا لاحساسي اكتشف انه واهب احساسه وقلبه وكيانه لوحده غيري..خيانة عنيفه في حق احساسي..

ليلى: مب طول عمره يسوي كل شي جدامج ليش هالسالفه بالذات..؟

حصه باحساس كله جروح: ليلى كل سوالف حمد بطاليه ومالها معنى الا هالسالفه...يا ليلى ما فكرتي شو اللي ممكن يخلي حمد يكون جي..صدقيني اللي في قلبه لجواهر كان حب مب سهل كان عنيف لدرجة ان حمد اللي ما يتغير تغير وانتقم من كل وحده عرفها ..شو تسمين هذا؟ يا ليلى انا لو لي حريه مثل حرية حمد انتقمت لكبريائي من كل الرياييل عقب اللي سواه فيني حمد..ليش ما سالتي نفسج؟ تعرفين ليش؟ عشاني كنت احبه بصدق احبه ومابدي عليه حد بس..(وبصوت ضعيف مووت) احساسه عمره ولا عمره بيكون لي..

ليلى اللي تأثرت: حبيبتي والله..حصه لا تتضايجين الله يهون عليج ويكتب لج اللي فيه الخير..

حصه تتنهد: وانتي بعد...

ليلى: بحاول اييج اليوم زين؟

حصه مبتسمه: والله؟

ليلى: وبييب شيخه وياي..

حصه: الله يا ويل حالي انا...

ليلى: والحين لازم اخليج اختي حبيبتي ..عشان اروح اسوي لها شي تاكله من يوم نشت ما كلت شي..

حصه: حطي لها اشياء خفيفه عسب يخف وزنها..

ليلى تضحك: اوكي يالله باي..

.........................
في بيت ام ناصر العصر كلهم يالسين فهد واروى وناصر وام ناصر..كانت يلستهم عاديه نفس كل مره ما فيها شي يديد ولا مختلف عن قبل..كل شي روتيني حتى رمستهم معاده ومكرره وما فيها شي مختلف..في برود فضيع وفتور افضع في كلامهم..

ناصر: ما ردوا لكم خبر بيت مبارك بن احمد ؟

فهد: بعدهم للحين..

ام ناصر: اصبروا عليهم خلهم يشاورون البنيه..

ناصر: هي محيره لولد عمها ؟

ام ناصر: لو يبغيها عرسبها من زمان شو يتريا للحين...؟؟

فهد: لو محيره يعني لازم نتريا لين ما يرخصها ولد عمها..السالفه مطوله..

ام ناصر: وانت شو وراك ..اتريا ترا الصبر من الايمان...

فهد: ايه انتوا خلصتوا وشبعتوا من الدنيا ونحن الحين يوم فكرنا بحياتنا تستكثرون علينا..

ناصر: وانت ما لقيت الا بنت مبارك...؟

فهد: ليش شي بلاها..؟ سامع عنها شي..؟

ناصر: حشا عليها مسنعه وبنت ناس ما عليهم كلام..

فهد: وليش ناقمني يوم ابغيها...؟

ناصر: بس سؤال يعني فيها شي؟

فهد: لا ما فيها شي...

اروى كانت ساكته ما تقدر تناقشهم في مواضيعهم الخاصه..تحس انها شي زايد عن حده وتحس عمرها هي وقطع الاثاث في البيت سواسيه ...على الاقل تقول بخاطرها قطع الاثاث ما يستغنون عنهن بس انا عادي مالي لزمه..

ناصر ما كان يشاركها باي حديث جانبي وام ناصر تلاطفها وتحسسها بالراحه بس هي ما بتحس بها دام ان النص الثاني ما حسسها بشي..

فهد: لو قالوا لي اتريا رخصة ولد عمها عادي استخف..

ام ناصر: الولد مب بخير نش ود اخوك أي دختر يشوفه لنا..متخبل على العرس جنه اول مره يسمع عنه..

ناصر: من زين العرس الحين..بتعرس وبتندم..

اروى حست انها يتعمد يسمعها هالكلام ويقصدها فيه..وفهد نفس الشي حس بشعور بنت عمته..

فهد: بس في ناس تستاهل انك تغير رايك عشانها صح ولا لاء؟

ناصر فهم اخوه: اكيد..اكيد.

ام ناصر تتنهد وما تدري شو تقول..

فهد: الا ما سمعت ابوي شو يقول؟

ناصر: شو يقول بعد؟

ام ناصر: يقول يبغي يرفع قضيه على راشد ولد خالك..

ناصر: بعده ابوي يدق ع السالفه؟

ام ناصر: اقنعه يا ناصر يمكن يطيع لك..

ناصر بقهر: خليه يرفع..احسن خليه يرفع قضيه..

ام ناصر انصدمت: ليش بسم الله؟

فهد عرف ليش ناصر يبغي القضيه ترتفع على راشد..لانه كان يدري ان كل شي من سبب راشد..وانه ما خذ ليلى بسبب راشد..قبل ما كان يبغي ابوه يسوي شي عشان خاطر ليلى بس الحين محد له خاطر عقب ما خسر ليلى..خل راشد يذوق العذاب اللي عذبه اياه..خل راشد يحس بالنار اللي حس بها ناصر...دام انه ما وصل لليلى..طز خل القضيه يرفعونها على راشد..وخله ينعق كم سنه في السجن..ماله لزمه..

ام ناصر: وانا اقول انك بتعاوني..؟

فهد: متأثر الريال خليه..

ناصر: لو ما قدر يرفعها بروحه انا بساعده..هذا حقه المفروض ما يتنازل عنه..

ام ناصر: بس انا مابغي منه شي..

ناصر: انتي موكله ابوي بكل شي خلاص مالج كلمه الحين..

فهد: امايه انتي وكلتي ابوي عنج...؟

ام ناصر: اييه من زمان ايام راشد ما مرض عقب ولده سيف..قبل سنتين ونص يمكن..

فهد: مافي أي اثبات ان ابوي استلم شي من راشد.. او خالي ناصر..

ام ناصر: لا والله يا ولدي وان كان في ترايه مادريبه..تخبر ابوك عنه..

ناصر: لا مافي اثبات ولا شي لانه اصلا ما عندنا شي يعني ابوي وين بيدسه..امايه الحين وقت بيع وشرا والسوق مكتض نحن بحاية راس مال وابوي يبغي حقه باسرع وقت..

ام ناصر: وما عنده ابوك..يعني لازم هالحق..

فهد: يا ناصر فهم ابوي انه بيخسر وايد للمحامين والقضيه في المحكمه..لا تخليه يضيع وقته على الفاضي..حتى ان ربح القضيه تراه بيخسر بيخسر..

ناصر: في تعويض لا تحاتي..

ونش ناصر واروى راحت حجرتها وفهد وام ناصر تموا مبهتين في الصاله..ناصر الطيب الحنون المسالم الحين جلب مره وحده ضد راشد وما عاد قام يتحمل يسمع اسمه ولا طاريه..والله العالم شو ممكن يصير في ليلى من هالسالفه لو توصل لها او تعرفها..

........................

بطلت باب حجرتها بالمفتاح اللي كان محطوط مكانه من يوم ظهرت..انفتحت الحجره وشافتها مرتبه ومدخنه وكل شي مكانه نفس ما خلته...دخلت وصكت الباب وعقت عباتها وشيلتها وابتسمت وتنهدت بنفس الوقت..دباديبها للحين على الشبريه..عرايسها ودفاترها ومذكراتها..محد دق شي من يوم راحت عنهم...فجأه وان عينها انحطت على شي من ذكريات الماضي التعيس...نعم الماضي التعيس..شافته ومن خاطرها غمضت عيونها وفي زبالة الحجره فرت الكوب اللي يخليها تتذكر ايام التعاسه اللي عاشتها والحب الوهمي اللي ليوم واحد ما حسسها بالدفء والامان...الحب اللي للحظه ما حست بلذته الا في قلب احمد وعيونه ونظراته...الحب اللي ما وهبها عبدالرحمن يوم من الايام جزء منه...الحب اللي ما يسوى كلمه حلوه من ثم احمد ولا نظره حنونه منه ولا يسوى ابدا ابدا حضنه ولا ابتساماته...ولا تنسى لمسة ايديه..

"وييه فديته احمد من يسوااه...يعل كل الخلق يفدونه.."

عقت عمرها بدلع على شبريتها...وهي مبتسمه وجرتها الذكريات في هالبيت..صح محد كان يهتم بها ولا يداريها ويتنشد عنها شرات الحين الا عمتها ليلى لكن يظل لبيتها وحشه ونكهه خاصه ولا تعوضها عنه ملايين البيوت..

للحين تحس شي ناقص..للحين ما لقت السعاده اللي تدورها.. عمر سعادتها ما اكتملت حتى وهي في بيت احمد وفي قلبه وفي عيون اهله..عمرها ما استشفت طعم السعاده كلما طرا على بالها غضب ابوها منها وعدم رضاه عليها...

اليوم هي يايه عشان هالشي تبغي تنهي كل شي بايديها وتعتذر منه وتستسمح يمكن ابوها يمكن يرق قلبه ويسامحها من يدري...

الحين المغرب ومحد يدري ان سلامه في بيت اهلها..هي قالت لاحمد يوصلها بيت اهلها وما يرد لها لين ما تتصل فيه..هي تبغي تكلم ابوها ضروري..وهو اقتنع واحترم رغبتها وحاجتها لاهلها..فقرر ما يسألها ليش رغم انه من اول ما خذها يحس ان بينها وبين ابوها شي..مول ما كانت تطريه ولا ترمس عنه الا نادرا ونادرا جداً..بس هذي مهما كان صح حرمته لكن يحترم حياتها الخاصه في بيت ابوها..دام انها ما حبت تقول له عن اللي بقلبها فهو ما يحق له يسألها الا ان فاتحته بالموضوع..

نشت سلامه للمنظره وفردت شعرها..بعده حلو ويجنن شرات قبل عيونها كانت تلمع من كثر الراحه النفسيه اللي تحس بها في بيت ريلها..ردت تلف شعرها ورفعته فوق شوي وطيحت شوي من خصلاتها على ويهها وحست عمرها ردت بنوته صغيره..

بطلت الكبت وشافت بعض بدلها مال ايام الثانويه وطلعت قميص رصاصي غامج وتنوره كحليه..ولبستهن وغيرت الثوب المخور اللي كانت لابستنه من بيت ريلها..تعطرت بعطرها وتعدلت ومسحت الروج من شفايفها ومشت الجحال وحست عمرها عصفوره طليقه..بكل ثقه وامل بحياه اجمل طلعت من حجرتها رايحه بشكل كله براءه يدل على صفاء النفس واحساس بالمسؤوليه اكبر ..طلعت وكلها امل ان ابوها ما يكسر بخاطرها ولا يزعلها..رايحه له بكل الحب والشوق ودها ترتمي بحضنه اللي وحشها رغم ان علاقتها فيه كانت شبه معدومه..

وقبل تنزل من فوق عسب تروح حجرة ابوها سمعت حمدان يرمس بالتلفون في حجرته وريحة دهن العود تفوح منها وطالعه تغطي الصاله اللي فوق والحجره مرتبشه اغاني..

بطلت الباب اللي كان مفتوح شوي وهو كان يالس على الكنب معطي الباب ظهره ويرمس وكان مستانس من خاطره ويضحك ويا اللي يرمسه..

حمدان يضحك: يا ريال ما صدقنا نرتاح لا تذكرنا...

ذياب: يعني ما بتكمل الدراسه؟

حمدان: لا الله لا يقول الحمدلله مرتاح في الشغل الحين يكفيني..مابغي اكثر...

ذياب: اوكي يا يالبزنس مان بغيناك تشرفنا الليله ميلس ابوي..انت والوالد..

حمدان فز قلبه: خير ان شاء الله شعندكم؟

ذياب: عازم الربع اللي خلصوا وياي الدوره وابغي اعزم اهلي ويا ليت تيي انت وابوك..

حمدان مبتسم: اكيد ولا يهمك نحن حاضرين في أي وقت..بس ابوي ما بيي...

ذياب: افا ليش؟

حمدان: والله الوالد في العين..ويمكن يتأخر بس بكلمه احتياط يمكن يرد من وقت..

ذياب: ان شاء الله ما نكون بس عطلنا البزنس مالك؟

حمدان : البزنس يي لين بيت يدي مبارك ويقول بس علي.

ذياب: لحوول نحن محد يذكر الله من يطرينا؟

حمدان: لا اله الا الله الله يحرسكم من العين..

ذياب: هيه جي اباك...يالله يالشيخ بخليك الحين بعزم باقي الشبيبه..تامرنا بشي؟

حمدان: لا ابد سلامة راسك...وصل سلامي ليدي مبارك وعمامي خليفه وعبدالله..

ذياب: سلام يبلغ الله وياك..

بند حمدان من عند ذياب وهو مبتسم...بعد شوي بيكون في بيت عفرا..حتى لو مب في بيتها بيكون في بيت يدها اللي هي اكيد بتكون موجوده فيه..

سلامه تغمض عيونه..

حمدان تحسس ايديها: منو بسم الله؟

سلامه ساكته..

حمدان وقلبه يدق بقو: عطر سلامي بس ماعتقد انها هي..هالايدين الخشنه مب ايدين سلامه..

سلامه بخوف: والله حمدان ايديه صارت خشنه؟ احلف قول والله؟

لف عليها حمدان ونش مبتسم: هلا هلا والله مرحبا بليار هلا بشيخة الحريم هلا بالبرنسيسه..

سلامه توايه اخوها: فديت هالويه يا ربي..

حمدان مبتسم: متى ييتي؟

سلامه: من ساعه بس مندسه في حجرتي لاني يايه لغرض وبروح بيتنا..

حمدان: حلفت عليج سلامي تمي ارجوج والله عندي اشياء وايده ابى اخبرج اياها..

سلامه: ما بيطيع احمد والله..بس شو عندك من العلوم؟

حمدان يمسك ايدها ويرها تيلس حذاله على الشبريه: يلسي بخبرج اشياء ولا تخطر على بال حد..

سلامه: زين ممكن تصك الباب مابغي حد يعرف اني ييت لين ماخلص اللي علي؟

حمدان: لا تحاتين عادي محد بيعرف عمتي في بيتها ما بتيي لاني قلت لها بييها عقب الساعه 11:00

سلامه: وابوي وامي؟

حمدان: لا اهلي ساروا العين ..امي تبغي تزور خالتي مها..

سلامه اللي ياتها خيبة امل فضيعه: يعني ما بشوف ابوي اليوم؟
حمدان مستغرب: ابوي؟ وليش يعني؟

سلامه بحزن: بس..!! ولهت عليه والله..

حمدان يبتسم: لا تحاتين الساعه وحده بيكونون هني..

سلامه بضيج: مابروم اتم لين هالوقت احمد بييني عقب شوي..

حمدان: خير سلامي في شي..ناقصنج شي محتايه فلوس..انا بعطيج..

سلامه لافه ويهها الصوب الثاني عشان ما يشوف حمدان دمعتها: لاء مابغي شي..

حمدان نش الصوب الثاني: ليش تصيحين.؟ احمد ضيج بج؟

سلامه تتنهد: لاء...حمدان انا ابغي ابوي محتاجه له والله..

حمدان بحزن: ابوي يا سلامه مظلوم..ابويه كبرياءه مجروح وانا وانتي وامي ويدتي وعماتي وعمامي السبب..كلنا شاركنا في طعنه يا سلامه والله..

سلامه: شو صار؟

وخبرها حمدان كل شي..

سلامه: فديته حبيبي والله..يعل الله ياخذ ابو ناصر يارب..يعلك الموت يا خادم ولد حميد..

حمدان: امين.

سلامه: فديته بو حمدان والله ظلمناه...ياعلنيه ما ذوق حزنك يا بويه..

حمدان مبتسم: شفيج غاديه شرات العاييز ترمسين؟

سلامه بخوف: حمدان صدق ايديه غاديه خشنه؟

حمدان يتلمس كفوفها: والله غاديه خشنه شكلهم يشغلونج..

سلامه استحت: هيه اغسل صحون واطبخ..

حمدان شهق: البرنسيسه تشتغل؟ افا !!!

سلامه منصدمه: اييه شوفيك لا تحسسني ان فيني شي غلط ترا ما عندنا خدم يعني ما بنخلي بيتنا يعفن ومحد يدقه..

حمدان عصب ونش: يا سلام ونحن يوزناج ولدهم عسب يشغلونج في بيتهم...لا لا هالموضوع ما ينسكت عنه.

سلامه حست ان في ازمه بتستوي: حمدان انا مرتاحه في بيت ريلي رجاء ماباك تعطي الموضوع اكثر من حقه..

حمدان: ليش ما ييب لج خدامه..؟ يوم انه يدري انه ما بيروم يسوي لج اللي كنتي عايشه عليه في بيت ابوج ليش ياخذج؟

سلامه: لحوول انت شفيك تبى تجلبها مشاكل يا حمدان ريلي لازم اخدمه واخدم اهله..اووه علينا ليتني ما خبرتك..

حمدان: انا بقول لابويه..

سلامه بجديه: حمدان!! انا مرتاحه لا تخرب علي حياتي...

حمدان حس انها صدق مرتاحه: قولي والله؟


سلامه : والله مرتاحه بس ايديه احسهن يختربن وهاللي يهمني..

حمدان يته فكره بس ماقالها: اوكي خلاص (ومسك ايدها) يالله نروح بيت يدتي.

سلامه : اوكي بس اصبر بييب عباتي وبغير ثيابي...

حمدان: ليش؟

سلامه: بتصل من بيت يدي على ريلي برد البيت دام اهلي محد مب لازم ايلس..

حمدان: شو تبين ابوي انا بقوله...

سلامه بطرف عينها: تراه ابويه مثلك يعني بينا اسرار..

حمدان يضحك: والله انج طفله...

سارت سلامه وغيرت ثيابها وردت تنزل ويا حمدان وساروا بيت غاليه..هناك يرتاحون اكثر ويحسون بحريه وبفرح اكبر...الحين بيسيرون بيت ليلى ييلسون وياها لين ما تتصل سلامه على ريلها..ولين ما تصير الساعه 8:00 عشان حمدان يسير بيت مبارك بو خليفه...

........................
في صالة البيت وفي اليوم اللي عازم فيه ذياب ربعه على العشا .. قبل لا يروح الكلية بيومين ... قرر خليفه انه يكلم ذياب ... لانه ملاحظ حركاته مع البنات وانه ما يكلم حصه ... والامر انه ما اتصل في عبدالله ولا كلمه زين في الايام اللي كان عبدالله فيهن في البيت ... محارب الكل الا امه وابوه ... وهذا بحد ذاته انجاز بالنسبة لخليفه ... طبع ذياب تعدل ويا امه وابوه ... بعد ما دخل ذياب الصالة حصل اخوه قاعد ايترياه بروحه...

خليفه: هلا ذياب ... الليله عزيمتك...؟؟

ذياب: الليلة الشباب بيوون ...

خليفه: قلت حق الطبابيخ يزهبون لك عشا سنع ... ويذبحون لك ذبايح زينه..؟

ذياب: هيه قلت لهم ...

خليفه: كلمت حمد ولد عمك عشان ايي (هنيه تغير شكل ذياب مب عارف كيف يكلم ولد عمه)...

ذياب: لا ما كلمته ... بس كلمت عبدالله وقلت له اييي ... وكلمت حمدان ولد راشد ... عشان يقول لابوه اييون

خليفه: وليش ما كلمت حمد..؟؟

ذياب: نسيت كلمه انت..

خليفه: ان شاء الله ... بس اقعد ابغيك في سالفة ((قعد ذياب وهو يتساءل في شو بيكلمه خليفه ... يمكن يكون عرف الحين انه الثالث في الدورة ويبارك له ويرفع معنوياته))

ذياب: خير..؟؟

خليفه: ذياب يا خوي ... انت الحين ريال ... وانا بكلمك على هالاساس ... والله يا اخوي اني احبك واعزك وكل اللي سويته لاني ابغي مصلحتك ((وسكت خليفه بس ما رد عليه ذياب فكمل)) انا ادري يا ذياب انك مطفر بالبنات .. وما مخلنهن في حالهن ... وما بقولك شي عشان ما تقول احامي عن بناتي ضد اخوي ... بس انت ريال وعيب عليك هالحركات ... واختك حصه ليش للحين ما ترمسها؟؟

ذياب: خليفه خل حصه على صوب .. انا الحين ارمسك ماعليك من حصه...

خليفه: حصه ما غلطت عليك كثر انت ما غلطت عليها...

ذياب: (يكابر) انا ما غلطت انا قلت الصدق...

خليفه: قلت حقيقه مب من مصلحتها اتعرفها ... وشي جديم ومنساي ((سكت ذياب)) وبعدين شو هالسالفة كل ما سألك حد قلت له انا بنفرك في كلية الشرطة وبتستوي شرطي..

ذياب: هذي الحقيقه...

خليفه: ذياب مب بالساهل قدرت ادخلك كلية اشرطة اللي بتخرج منها ضابط ... عشانك تذللت عند ناس انا اشوفهم جلاب ما يستاهلون ... ولو مب انت جان ما دليت طريجهم لا تفشلني يا اخوي وتفشل نفسك..

ذياب: اذا انت تشوف اني مب قدها ليش تحط نفسك في هالموقف...؟

خليفه: انا ادري انك قدها .. بس عشان تعرف اني احبك واني عشانك بسوي اللي اقدر عليه ولو صار شي مستعد افديك بعمري ... انت اخوي الصغير وانا مالي غيرك وغير عبدالله ... واذا صارلي شي بناتي بيكونن في ذمتك انت واخوك .. خاصه انه ما عندي ولد...

ذياب: بناتك محد بيقوم بهن غيرك وعسى عمرك طويل يا اخوي ... وان شاء الله ما بتسمع عني الا اللي يعجبك...

خليفه: (مرتاح من التغير اللي تغيره خليفه) والبنات اللي مطفر بهن...؟؟

ذياب: (يبتسم) اسولف وياهن ولا الاميرة اشتكت لك...؟؟

خليفه: اميره وشيخه غصبن عنك ...

ذياب: (وهو واقف) معلوم مب حبيبة القلب .... خلاص انا بخليك الحين بروح اتابع البشاكير ... اشوف شو خلصوا من العشا ...

خليفه: ترى الشيخه عفرا تسويلك الحلو بيديها حق ربعك....

ذياب: هاهاهاها الله يعين ربعي الليلة كلهم في المستشفى...

خليفه: الا الهم الشرف ياكلون من ايديها الناعمه...

ذياب: هاهاهاها الله يخليك روح خلها تطلع من المطبخ لا يخرب نعومة ايديها شغل المطبخ...

كانت هاي اول مرة يضحك فيها ذياب ويا اخوه ويقعد يسولف وياه من رد من الدورة ... والاثنين ارتاحوا بعد ما تكلموا ... ذياب ارتاح لان خليفه قاله انه يثق فيه وانه يدري انه ما بيفشله ... والاهم انه يأمنه على بناته ... اللي هم اهم من حياته ... اما خليفه فاستشف من اسلوب ذياب ورمسته انه تغير للاحسن ... كان يسمع الرمسة للاخير وما يقاطع اخوه ويرد بهدوء ... اتصل خليفه في حمد عشان ايي عزيمة اخوه على العشا ... اخوه اللي صار ريال الحين في نظرهم هم الثلاثه حمد وعبدالله وخليفه...

.
.

وفي الليل وقت العزيمه تيمعوا الشباب ورياييل بيت بو خليفه وربع ذياب وكل اللي عازمينهم...وما بقى حد غير حمد اللي توه وصل الحين..

دخل حمد وياه ريال في الاربعينات ... واول ما دخلوا ذياب واللي كانوا وياه في الدورة سكتوا مرة وحده ووقفوا كلهم قبل لا يوقفون الباقين اللي في الميلس ... اللي نشوا هم بعد عشان يسلمون على الريياييل اللي دخولوا .. وبعد ما سلموا كلهم... تموا شباب الدفعه ساكتين...



خليفه: يا مرحبا يا مرحبا ... حيالله من يانا..

بومنصور: الله حيه ... شحالك وينك يا ريال ما تنشاف ... ودرتنا..؟؟

خليفه: تدري بالشغل يا نتابعه يا ضييع!!!

حمد: شو رايك بالمفاجأة؟؟

عبدالله: ابصراحه يا حمد ما قصرت احلى مفاجأة ... من متى ما شفنا بو منصور؟؟

بومنصور: هاهاهاها حلوة الا لكم ... بس ظني الشباب ما استانسوا لشوفي..!!

ذياب: حياك الله سيدي!!

بومنصور: هاهاهاها شفت يا حمد .. قلت لك ما بياخذون راحتهم ويانا ...

حمد: هاهاهاها شو نسوي حبيت افاجئهم!!



كانوا الشباب متشتتين مب عارفين شو يقولون لابو منصور .. وكيف يرحبون به طول الدورة وهم يقولوله سيدي ... ويا دعوا عليه بعض الليالي يوم كان يعاقبهم ... ولا واحد نطق فيهم ... حتى ذياب مب عارف كيف يكلمه ... لو راح الكلية يمكن يكون هناك بعد .. بس خليفه انقذ الموقف...

خليفه: خلاص نحن بنخلي الشباب هنيه ... وبنروح نقعد في البرزة برع الجو حلو ... وبنخليهم اييبون فوالتنا هناك

حمد: ونعم الشور

الشباب كانوا يتمنون في خواطرهم انهم يطلعون خلاص اصلا ملوا من الوقفه ويبون يسولفون ويضحكون ... واول ما طلعوا خليفه وربعه وعبدلله وولد عمهم وبو منصور ... ردوا قعدوا وهم يضحكون على الموقف البايخ ... وكل واحد يقول ليش ما رمسنا نحن مب في مدرسة .. نحن في عزيمة وهو معزوم مثلنا...

في البرزة وهم يسولفون ... يرتهم السوالف صوب الدورة واللي صار فيها ... بالرغم من ان حمد وعيال عمه حاولوا يبعدون عن هالسالفة خوفا من الفضايح اللي ممكن يكون ذياب مسونها بهم...



بومنصور: بصراحه يا بوخليفه ربيت ماشاء الله على عيالك من خليفه لذياب..

بوخليفه: تسلم يا بو منصور ...

احمد: هاه ان شاء الله ما لعوزت الشباب يا بو منصور...؟؟

بومنصور: هاهاهاه لازم انشد عليهم شوي .. عشان نعرف من فيهم الشديد واللي يقدر يتحمل

احمد: اكيد ... ولا ليش يدخلون هالدورات...

بومنصور: عشان يزيدون قدرة تحملهم ... ويتعلمون الانضباط والطاعة حتى وهم ما يوافقون على الاوامر

حمد: زين ان ذياب كمل وتحمل ... ولا هو مبزاي ليش انه الصغير..!!

بومنصور: ذياب ماشاء الله عليه ممتاز ولو ما كان متأخر في الدورة .. وتلعوز اول ما دخل ليش انه مب متعود على العسكرية وحياتها ... ما كان طلع الثالث بس ... الا طلع الاول وعن جدارة بعد واستحقاق...

تفاجأ بوخليفه وعياله وولد اخوه ... في حين الباقين ابدوا اعجابهم بذياب ... حس بوخليفه بالفخر يملأ كل خليه من جسمه وقلبه يدق بسرعه عجيبه ذياب ريال ورفع راسه ... ما اخذله مثل ما توقع الكل انه يسوي ... وكانوا الرياييل يباركون له ولعياله...

حمد: (عشان ينقذ الموقف) هاهاها مب ولد عمي لازم طالع علي..!!

بوخليفه: خل عنك ... طالع على ابوه واخوانه...

حمد: هاهاها افا يا عمي اتخلى عني الحين....!!!



ضحكوا الكل وردوا يسولفون ... بس هالمرة بحماس اكثر ... والفرحه بادية على ويوه هل بيت بوخليفه كلهم ... كان خليفه وده يودر الميلس ويروح يلوي على ذياب ويحبه على راسه ... اما عبدالله اللي ما قدر يقاوب رغبته في انه يشوف اخوه ودر البرزة ... وراح صوب الميلس بيدخل يشوف ذياب .... وهو عند باب الميلس سمع الشباب يسولفون سوالف حلوة ... بعيد عن البنات والنت والخرابيط اللي كان ذياب متعلق فيها...



عبدالله: (يبتسم) هاه مستانسين بعد ما طلعنا الشواب والضابط عنكم..؟؟

حميد: يا ريال ... نحن ما صدقنا نخلص هالدورة ... تييبون شي يذكرنا بها ليش عاد..؟؟!!

عبدالله: هاهاها .. هذا وبومنصور برع يفتخر بكم ويعدد مزاياكم ... ويمدحكم..!!!

ذياب: هاهاها ... ما نعرف نقعد وياه لين الحين ما نسينا ليالينا الجميلة في حظرته ... وعشرت الكيلوات اللي ركضنا اياها..

ضحكوا الشباب وكان عبدالله يطالع ذياب بفخر .. ووده يروح ويلوي عليه ... بس مسك نفسه وطلع من عندهم ورد عند الرياييل...

......................

اليوم الثاني..في الدوام عقب غياب حصه واجازتها اللي طولت...كانت ليلى معابله شغلها وشغل حصه وياها وشوية معطين منه لروضه لان ليلى ما بتروم له بروحها...صح ليلى كانت تقوم بواجبها على اكمل وجه بس ما كان يعوضها عن غياب حصه شي ابدا..كانت صدق منهاره ولو انها ما تبين وحمد طبعا لاحظ هالشي وما قدر يسوي شي وما يقدر يروح بيت عمه ويقول لهم ردوا بنتكم الدوام غصب...

ليلى من داوم ناصر وهي ما تطلع من مكتبها..ولقاءاتها فيه شبه معدومه وتحاول تسوي مثل ما حصه تسوي وتوصل اوراقها ويا الفراش او روضه اللي روحها متملله من مجابل ويه ناصر يوم تروح له..
واليوم وليلى في المكتب دق التلفون وشلته..

ليلى بملل: الو..

ناصر:.........

ليلى: الووو

ناصر: السلام عليكم..

ليلى ببرود: وعليكم السلام..

ناصر: شحالج.؟

ليلى: بخير الله يسلمك اشحالك انت؟

ناصر: الحمدلله بخير..ربي يعافيج..

ليلى: هاه الاوراق فيهن شي.؟

ناصر بسرعه: لا والله ما فيهن شي بس بغيتج شوي؟

ليلى مستغربه: خير ان شاء الله؟

ناصر: الخير كله..ممكن تيين المكتب شوي ابغي اكلمج..

ليلى للحين مستغربه: عن شو؟

ناصر: ما ينفع بالتلفون تعالي مكتبي..

ليلى بثقه: شو رايك تيي انته لان الكل يعرف اني سلمت ملفاتي واوراقي امس ويدرون مالي حايه اسير مكتبك ومافي داعي للرمسه..

ناصر صعق من رمستها: ومن متى وانتي تفكرين جي؟

ليلى بثقه: من زمان...في حد ما تهمه سمعته..؟

ناصر يتنهد ويشوف المسأله صارت صعبه: اوكي..

ليلى: اترياك..

ناصر: خلاص الحين نازل..

فكرت ليلى بألف شي وشي ممكن ناصر يكون يبغيها فيه وشو يبى منها...قالت في خاطرها ليكون بس ياي يصارحني انه بعده يحبني ولا انه مب مرتاح مع حرمته او يبغي فلوسهم...شو يبغي بالضبط...انا للحين ما عرف كيف صار هالانسان معقد ...الله يستر شو يبغي بس...على العموم هي اكيد ما بتسكت له وبتطلع كل قهرها منه لو حتى فكر يجرح كبرياءها اليوم...

شوي وباب المكتب يدق...وعدلت ليلى شيلتها..وتحجبت عدل..

ليلى: تفضل...

ناصر واقف وما دخل: اهلين..

ليلى: مرحبا..تعال ايلس..

ناصر متردد: وين حصه؟

ليلى مستغربه: ماخذه اجازه اسبوعين...

ناصر استانس يعني انها وافقت: يعني بتوافق؟

ليلى: على شو؟

ناصر: خطبة فهد...

ليلى: لا مادري يبالها وقت هذي مسألة عشره وعمر ما تتحدد في يومين..

ناصر: اها تحريتها خذت اجازه ترتاح بها..

ليلى: لا هي تبى ترتاح بس مب عشان انها وافقت حتى موافقه مبدأيه..

ناصر يتنهد: الظاهر كل حد في هالشركه يشتغل ما يحصل اللي يبغيه ويفشل في حياته الشخصيه..

ليلى بضيج: لاء..المهم انت ياي عشان تقول لي هالسالفه..ما كان في داعي تتعنى وتنزل لو قلت لي بالتلفون جان خبرتك..

ناصر انصدم من اسلوبها: ليلى شو فيج..؟

ليلى بضيج ونست نفسها: الا انت اللي شوفيك..ما تراعي شعور ولا احساس حد يعني ياي من فوق تبى تقول لي هالرمسه شو اسويبها يعني..

ناصر استغرب من ليلى اللي مب قادره تيمع رمستها: ليلى !!!

ليلى ارتبكت: هاه خير شو تبغي يا ناصر؟

ناصر: اهدي شوي انا ياي ارمسج بموضوع حساس وايد..

ليلى بهدوء: ارمس انا اسمعك والله..

يلس ناصر على الكنبه اللي جدام طاولة ليلى وعيونها في عيونه ولحظة صمت بس هي ما سمحت لكبرياءها وشموخها ينكسر بنظره فصدت عنه ويلست تتعبث بالكيبورد..

ناصر: انتبهي لي شوي..

ليلى مرتبكه: قول اللي عندك اسمع باذنيه والله مب بعيوني..

ناصر: ليلى ارجوج..

ليلى طالعته شكله شي جايد: اسمعك يا ناصر والله..

ناصر: ليلى انا بعدني ابغيج والله..بعدني ابغيج وشارنج بالغلا كله..افهميني ولا تقاطعيني(وليلى مصدومه وعيونها شوي وتطلع من كلامه) ليلى انا قلت لابوي قبل اخذ اروى اني لازم اخذج سواء رضوا ولا ما رضوا...يا ليلى حياتي جحيم لا يطاق مب عارف كيف اعدل ولا انصف نفسي ولا هالفقيره اللي خذتها...مب قادر اني اعطي لها حتى احساس بالاحترام واحساس بانها تعني لي شي...صح اني جرحتج وسويت شي ما بتسامحيني عليه لو كذبتي وقلتي سامحتك بس والله مشاعرج للحين محشومه والحب اللي بقلبي عمري ما عطيته ولا بعطيه لغيرج..

ليلى مصعوقه من الخاطر ومب قادره حتى تتكلم وتطالعه بس..

ناصر يكمل: يمكن كلامي يكون صدمه بالنسبه لج لكن 13 سنه مابغيها تروح هدر هذا عمر يا ليلى والله عمر..ليلى بصراحه خلني اكون واضح وياج شوي انا ابغيج لي حرمه ثانيه ولا تردين علي الحين وما بغيج تفكرين بمبدأ انتقام او كرامه فكري بحب شوي وبتضحيه..ارجوج حاولي تتفهميني شوي ولا .......

ليلى بغضب اول مره يشوفه ناصر في عيونها: بس بس.!!!! اقولك بس ولا حرف ولا كلمه...(ونشت وطالعته بغضب وعيونها شوي تطلع من القهر) انت شو يالس تقول..صاحي انت ولا شارب شي...انا سمحت لك مره تدوس على كبريائي وتحطم احساسي بس لا تحلم بها مره ثانيه..(وبصوت عالي شوي ومتقطع لانها مب عارفه تيمع) انا ماعرف كيف سمحت لنفسك تفكر فيني جي...يا شيخ ارحمني وارحم نفسك...ترا الزم ما علي كرامتي..ليكون ان شاء الله ابوك قالك تاخذني شفقة علي عسب ما يكون في عايلتكم عانس تنذمون بها..ولا يبا يكسب فيني ثواب...

ناصر مصدوم: شو تقولين؟

ليلى بعصبيه فضيعه: اللي سمعته ولو سمحت اخر مره اقولها لك لا تتجرأ مره ثانيه وترمس وياي او تقرب صوبي..يا ناصر انا اللي مصبرني عليك هو شغلي اللي انا ملزومه فيه..لكن الظاهر انا بخلي لك البقعه بكبرها وما جذبت حصه يوم قالت ان الرياييل كلهم طينه وحده...

ناصر: ليلى بسج عاد...ما حد ياب طاري كرامتج ولا كبرياءج..لاتنسين ان اللي نحن فيه بسبة اخوج ولا جان معرسين من زمان..

هني ليلى ما قدرت تستحمل اكثر وفتحت شنطتها من قهرها وفرت الورقه اللي لقتها شيخه بس مصوره في ويهه..

ليلى: اسكت ولا كلمه وامسك هالورقه وبلها واشرب ميتها على قولة المصاروه..ناصر روح قول لابوك يلعب على غير راشد بن ناصر..طال عمرك مب نحن اللي ناكل الحرام ونطالب بحقوق غيرنا..وجان بيسوي خير خله يروح يرفع قضيه على راشد يا كم طال انتظاري وانا اتريا هاللحظه...

ناصر يقرا الورقه وهو مبهت واحترق ويهه وماعرف يرد..

ليلى: ارمس قول شي ثاني بعد...

ناصر: وليش يوم اخوج واثق من حقه ما رفع قضيه على ابوي عسب يثبت براءته...؟

ليلى بثقه وغرور بنفس الوقت: ابويه ربى رياييل ما ياب ...(وسكتت بس ردت تكمل) يا ناصر يا ولد ابوك اسمعني زين اخوي حشم ابوك لانه ما بغى يبهدل عمته ولا عيالها اللي ربا وياهم...راشد اخوي اكبر من كل اللي فبالكم من افكار...انت خسرت وايد بسبب ابوك فروح له يمكن يعوضك لكن انا لا تفكر فيني ولا تقول بيوم انك ممكن تحصلني اترياك لان هالشي صار ماضي ومب ليلى اللي يتعبها الماضي اللي صار بالنسبه لي رماد مافيه أي امل يرد يحترق..

ناصر نش معصب: ليلى انتي مستحيل تكونين لحد غيري..تفهمين هالشي؟

ليلى تضحك بسخريه: وايد واثق من عمرك(وطالعته من فوق لتحت) تعرف انك اول واخر انسان اسمح له يجرح كبريائي ويدوس عليه..كانت غلطه وعمري ما ندمت كثر ما ندمت عليها..بس صدقني للحين ما نخلق اللي بيعيدها ..وانت بالمثل لا انت ولا مليون غيرك ممكن يجرحني..انا انخلقت عزيزه وكبريائي راس مالي..وانا استاهل اللي صار فيني..لاني تهاونت فيه وانت ما قصرت..بس بعد اليوم انسى..(وتهز راسها بأسف) مستحيل اسمح لك حتى بس تفكر فيني..واستقالتي واصله مكتبك قبل نهاية الدوام..

ناصر نش من مكانه وهو معصب وبنفس الوقت مفتشل وكانت هذي ردة فعل طبيعيه من ليلى اللي صبرت على غباء ناصر وتفاهته وانقياده الاعمى ورا نزوات وغلطات ابوه وصبرت على خيانته وطعنه في مشاعرها لكن انه يتجرأ ويطلب منها الزواج وتكون بديله وثانيه هاللي مستحيل ترضاه..سمحت له بكل شي الا كبرياءها بعيد عن خشمه وخشم الف طايفه من طوايفه يقرب صوبها...كان الزم ما عليها هالكبرياء تحافظ عليه بعدما خسرت كل شي...ولكنها ثبتت لنفسها قاعده انها ما خسرت شي وان ناصر هو اللي خسرها وخسر حبها ووفاءها وحمدت ربها ما تمم بينهم بالخير لانها ما بترضى تعرس بواحد حياته تسير على كيف ما يبغون الناس...

.........................


اليوم اخر يوم لذياب في البيت ... وباجر بيروح الكلية وبيبدا حياته اليديده ... حس بفخر يوم شاف نظرة الاعجاب في عيون ابوه واخوانه وولد عمه ... حس بانه له قيمه وانه انسان محبوب ... وانه بامكانه يكون مصدر فخر لكل من في هالبيت ... وطرت على باله حصه اللي للحين ما كلف على نفسه يروح يشوفها ... وحس بالذنب لحركة النذالة اللي سواها في حمد ... وقرر انه يواجه اخطاءه ويتصرف كرجل ويروح يعتذر لحصه ... الرجولة في انك تعترف بأخطائك مب في انك تكابر بها وتقول انا ريال ويحق لي ... وصل لباب غرفتها ودق عليه ... وقلبه يدق بعنف .... ويوم بطلت حصه الباب اتفاجأت بذياب واقف



حصه: (وهي عافسه ويها) نعم خير في شي

ذياب: هيه اريد اكلمج ... ممكن

حصه: ما من بينا كلام ... وما اريد اسمعك

ذياب: (بتوسل) ارجوج



حنت حصه يو شافت نظرة التوسل على ويه ذياب وما قدرت تقول لا ... خلته يدخل وسكرت الباب ... وقعدت على السرير ويا قعد عدالها ... وهو مب عارف شو يقول



ذياب: (بتردد) زعلانه

حصه: لا ليش ازعل

ذياب: لاني غلطت عليج وقلت كلام غبي مب لازم اقوله وغلط في غلط



انصدمت حصه من رد ذياب ... ذياب اخوها يعترف بغلطه ... وشكله ياي يعتذر والادهى انه يقولها انه كان يقول كلام كله غلط



حصه: لا كنت تقول الصدق .. واذا بدافع عن حمد ما يهمني ... عبدالله قالي كل اللي صار

ذياب: (بندم) بس ما كان لازم اقول شي مر عليه اكثر من عشر سنين ... كانت حركة نذاله مني

حصه: صح ...

ذياب: حصه لاتصعبين الموضوع علي

حصه: ما صعبت شي ... انا ايدت شي قلته ... وبعدين ما قلت شو تريد

ذياب : تعرفين شو اريد

حصه: (بدا قلبها يحن على ذياب وهي رافعه واحد من حياتها) قول شو

ذياب: حصه بلا غلاسه

حصه: لا قول

ذياب: انا اسف زين

حصه: (تبتسم) اممممم يمكن ما اقبل اعتذارك

ذياب: (يبتسم وهو يدري انها لانت ) ويهون عليج اروح باجر وانتي وزعلانه علي ... ما يندرى يمكن اموت وما ارد

حصه: بسم الله عليك ... لا انا مب زعلانه منك سامحتك لانك اول مرة تعتذر لحد وكان لي شرف اني اكون الاولى

ذياب: هاهاهاها حمدي ربج انج الاولى واني اعتذرت ... بس الظاهر بمنح هالشرف لغيرج بعد

حصه: (فاجه عيونها) ليش لمنوه بتعتذر

ذياب: بعد ناس

حصه: لا يكون سمر .... لا الله يخليك خلها جيه هالغبيه تخاف من حد

ذياب: هاهاهاها لا ما عليج خليها جيه .. اصلا هاي ما تزعل وانا استانس يوم اطفر بها

حصه: هاهاها لا حليلها ... بعدين خبرك عتيج سمر تعلمت تزعل ... زعلت علي كم كثر يوم ردينا من دبي

ذياب: لا والله حليلها ليش عاد

حصه: حركات يهال ... ما قلت لي لمنوه بتعتذر بعد

ذياب: ااااه يا لقافتج .... ياللا انا بروح تامريني بشي

حصه: انا اللي بموت من هالادب اللي حل عليك مرة وحده ... ياريت ودوك هالدورة من زمان عشان تعتدل

ذياب: (بجدية) هيه والله ياريت يا حصه

حصه: صح مبروك ... الثالث على الدورة مرة وحده .. ثرك مب هين ذيابوه

ذياب: هاهاهاها شفتي عاد ... اخوج ذيب

حصه: صراحه ذياب حتى انا افتخر فيك ... وبنسى كل شي صار قبل

ذياب: والله

حصه: بس اريد اسألك سؤال

ذياب: شوووه

حصه: انت بتروح الكلية لانك تريد ... ولا لان خليفه مغصب عليك

ذياب: (بعد ما سكت اكثر من دقيقه وهو يفكر شو يقول لحصه) حصه انا اول ما رحت كنت مغصوب ... وكنت كاره خليفه وعبدالله .. كل من في البيت حتى انتي الا امي وابوي طبعا ...

حصه: هاهاها قصورك بعد تكرهم جان مبزينك لين البزا ما بيطلع من عينك

ذياب: (يبتسم) هاهاها .. خليني اكمل

حصه: كمل يا فيلسوف زمانك

ذياب: (بجديه) حصه انا كنت ضايع ما اعرف شو اريد وفي شو بفلح بعد الثانويه صعت وساعدني ان كل اللي اباه عندي يا من ابوي او امي او حتى خليفه ... بس هناك تعلمت شو تعني الحياه .. تعلمت قيمة الرفاهيه ... وتعلمت التحمل ... شفت رياييل يتحملون ... ولسبب بسيط يثبتون لانفسهم انهم قد التحدي ... وانهم يستحقون الرتب اللي هم فيها ... حبيت اثبت لنفسي نا بعد اني مب اقل منهم ولا اقل من خليفه وعبدالله ... وشوي شوي حبيت الموضوع ... وعرفت اني اريد اكون مثلهم ... (ولف عليها وهو يبتسم) بس انتي ادعيلي

حصه: (وهي رافعه يديها) موفق يا اخوي يا ولد امي وابوي

ذياب: هاهاها .. زين انا الحين بسألج

حصه: اسأل

ذياب: شو موقفج من حمد بعد الكلام اللي قلته (تغير شكل حصه بعد هالسؤال ولاحظ ذياب التغير اللي صار لها وحس بفضاعة الجرح اللي جرحه اخته وحس بندم فضيع وكمل) حصه اختي لا تخلين شي من الماضي يخرب الحاظر والمستقبل ... سوي مثلي خلي حمد تحدي يا تكسبينه يا تخسرينه وتخسرين عمرج وتضيعين مثل ما كنت ضايع



وقبل لا ترد طلع ذياب من عند حصه وهي في خاطرها تقول ما تدري يا ذياب بالادهى والاخطر انه مب مجرد ماضي ... وشو يثبت لي انها كانت ماضي ... هذا حب يا ذياب واسألني انا اللي عشت احبه عمري كله وهو كان يخون مشاعري ولا يدري عنها مع غيري ... يوم كنت ما اكتب في دفاتري وكتبي غير اسمه واسرح فيه والمعلمة تشرح ... كان يسرح في غيري وايتمناها...

........................

في صالة بيت بو خليفه دخلت ليلى وحصه واقفه حذال الباب بتستقبلها وكانت وياها سمر وعفرا وحمده اللي اصلا كانن في بيت يدهن العصر...

دخلت ليلى ماسكه شيخه من ايدها تمشي حذالها وقربت حصه من ليلى تسلم عليها والبنات ربعن يتضاربن من تشل فيهن شيخه...شيخه عيبها الوضع ان الكل يبغيها لزقت في ريول ليلى اكثر وسارن ييلسن في الصاله كلهن البنات.. وعفاري سارت المطبخ تييب لهن شي...

سمر حذال شيخه: تعالي ..

شيخه رافعه خشمها: ماليدكم..

حصه تضحك..

ليلى: صبري عليها دقايق وبتغدي زيبق محد يمسكها...خلها تستكشف ويووهكم اول شي..واذا عندكم شي قابل للتكسير والتحطيم..وبعدها بتنطلق..

سمر ماقتنعت وتبغي شيخه تييها الحين: تعالي بلعبج عندي عرايس وايده ودباديب عندي بلاي ستيشن وقيم بوي..

شيخه قاومت كل هالاغراءات...

سمر: يالله يا ربي ليش محد يحبني حتى هالياهل..؟؟

ليلى: فديتج انتي منو ما يحبج يعله فداج..والله سمر بتييج شويخ الحين خليها تتعود عليكم..

حمده: اذا وصلتني بقطعها والله..من الصبح وانا مقاومه رغبة العض والحين بنقض عليها..

حصه: حشا اسد مب بنيه...!!

ودخلت عليهن عفرا وقربت لهن العصير: تفضلن..

ليلى: ما كان في داعي تتعبين عمرج غناتي تعالي يلسي اصلا بروح بعد شوي...

حصه بطرف عينها: ودج!!

ليلى تبتسم: وشخباركم بعد خلاص ما بقى شي على المدارس..

عفرا تمد ايديها لشيخه اللي تتذكر هالويه وتعرف انها شافته في مكان بس وين ماتدري..وشكلها نست انها شافتها في عرس سلامه..ونشت شيخه على طول ويلست فوق ريول عفرا والكل تخبل واولهن سمر اللي بغت تين..

سمر بحزن: الحين انا من الصبح اعرض عليج خدماتي واترجاج واخرتها تروحين تعقين عمرج ع حد ما يباج..

ليلى: ربج بعد...

حصه: هاتيها هالبقره يبالها تفعيص شوي هاتيها...

عفرا شلت شيخه وودتها عند حصه اللي استلمتها واول ما شافتها طالعتها بخبث...

حصه بلؤم: شو اسمج؟

شيخه: شششششيخه..

حصه تضحك لانها اول مره تسمع هالحركه بس ليلى جد خبرتها: قولي مره ثانيه شيخه...

شيخه: ششششيخه...

حصه: قولي شريره...

شيخه: شششششريره..

حصه: قولي قولي...امممم قولي شرشبيل..

ليلى تضحك: والله من كم يوم اقولها قولي شرشبيل..

حصه: قولي يالله..

شيخه: ششششرببيل...

هني البنات ما رامن يووودن اعمارهن وماتن عليها ضحك...

شيخه: شششششش

ونشت عفرا تشلها وهي مستسلمه لايدين عفرا ومب بس جي الادهى انها تكلم عفرا بكل انوثه ودلع..

عفرا: حياتي شو تحبين اييب لج من المطبخ..

شيخه بكل انوثه طالعتها وعقب نزلت عيونها لتحت اونها استحت...

حصه: تقهرني والله خاطري اصفعها شو هالتمثيل..!!!

ليلى تضحك: ياخي ليش منقهره..هي رقيقه لاني عمتها ودفشه على ربيعة عمتها..

حصه: شو هالوراثه المخبصه..

وتمن يسولفن وشوي ويسمعن صوت حذال الباب...

خليفه: هووود هووود

حصه تنش: اهدي اقرب اقرب فديتك...محد غريب..

ليلى ترد غشوتها على ويهها: شو محد هني(ونشت بسرعه وسارت صوب الممر اللي يودي فوق لحجرة حصه وخواتها وذياب)

خليفه عقب ما دخل: محد عندكم..!!! جني الا شفت سياره وفيها حد قبل شوي..؟

عفرا وهي ماسكه شيخه: بنت ناصر بن مبارك عندنا...

خليفه: حليلها وليش ما ترمسن بنظهر عنكن..

حصه: خلاص انت تبغي تيلس ويا امي نحن بنسير عنك فوق اصلا...(ولفت على عفرا) اهتمي ببنت الناس ولا تنقصون أي شي منها خلها ترد كامله بششششحمها ولحمها...

شيخه تضحك...

[البدوي الحبوب]

طلعت ليلى وحصه حجرتها ويلسن هناك والبنات تمن تحت يلاعبن شيخه ويتضاربن بعد منو ترمسها وتيلس وياها اكثر....
اما فوق في حجرة حصه كانت ليلى يالسه وياها..وتقولها كل شي صار اليوم في الدوام وحصه ما قدرت تنطق وكانت مصدومه على الاخر خلاص ما تقدر تستوعب اكثر عن جي من اللي استوا بها...

حصه: ماقدر اصدق والله....!!

ليلى: امبلى صدقي ...خلاص ما رمت اتحمل ما كنت اتوقع توصل به الوقاحه يطلبني حرمه ثانيه..تحريته يحبني ويفكر فيني بس ما توقعت يوم من الايام يجرح كبريائي..

حصه: يستاهل بردتي قلبي فيه..صدق هالرياييل ما فيهم خير...

ليلى: بقولج شي بتنصدمين منه...

حصه: شو بعد؟ لا تقولين عطيتيه كف ما بصدق..

ليلى تضحك: لا لا يا غبيه شو كف وين نحن فلم هندي..؟

حصه: شو انزين..؟

ليلى: بتقولين عني خاينه...

حصه بطرف عينها: شو مسويه خلصينا....

ليلى: قدمت استقالتي..

حصه شهقت: الله ياخذج ليش؟

ليلى بحزن: حصه انا ماقدر اشتغل في مكان ناصر موجود فيه..بصراحه انتي ماتدرين انا شكثر يالسه اقص على عمري وامارس طقوس تعذيب ولا حتى ايام العصور الوسطى...

حصه حست بها: زين بس ليش ما قدمتي اجازه احسن..ليش استقلتي؟ ليش؟

ليلى: المكتب والشركه كل مافيها يذكرني ب 13 سنه ضاعن من عمري في حلم وامل غبي..

حصه بيأس: تبغين تلوميني وانا عمري كله اتحرى ولد عمي يوم بيحب ما بيحب غيري..واتفاجأ بحبه لوحده نفسي اشوفها عشان اعرف شو فيها زود عني عشان تملك قلبه بهالطريقه..على الاقل انتي تدرين انه يحبج اما انا حب من طرف واحد بس..عمري كله ضاع في حب من طرف واحد يا ليلى..

ليلى: حصه ارجوج وافقي على فهد..والله بترتاحين وبتحسين بامان اكبر لانج بتبتعدين عن كل شي ممكن يذكرج بحمد وماضيه وسنينه..صدقيني اكيد بتعيشين حياة يديده كلها وناسه وفرح صدقيني يا حصه..

حصه: مادري والله مب عارفه شو اسوي..مب قادره اوافق عليه مب لاني اتريا حمد لكن لاني بعد كل اللي صار مب قادره اثق في جنس مخلوق حتى اللي عندي في البيت ما يبغوني اخذ حمد عشاني انا..كل حد فيهم له مصالحه الخاصه من موافقتي على حمد..

ليلى: بس حمد ما تقدم ما سوا شي ما له أي خطوات يسويها...يعني مالج امل منه..

حصه: ماعرف يا ليلى والله ماعرف..

ليلى: فهد طيب وحنون وينحب والله...مب لانه ولد عمتي امدحه صدقيني ما بتلاقين حد احسن عنه..

حصه: والله مادري شو اقولج ليلووه خليني افكر وعلى الله يصير خير لين بعدين...

وتمن يسولفن ويتناقشن وكل وحده تبث الثانيه همومها...

.
.
وفي الصاله تحت شاف خليفه شيخه ويا عفرا وسمر يلعوزنها وحمده تطفربها...

خليفه يالس في الصاله: منو هالاميره اللي عندنا...؟

شيخه بدلع وقواة عين: انا...

خليفه يضحك: عفاري هاتيها...

عفرا وهي تسوي عمرها زعلانه: اسفه ماريد..

خليفه يضحك: شو تغارين؟

حمده: لازم تغار تراك تعديت على حقوقها وزقرت هالدبه الاميره...

خليفه يضحك: عفاري واثقه من مكانتها ما تهتز لو باميرات الكون كلهن..

وشوي وان عبدالله حادر الصاله وشيخه تمشي سايره صوب خليفه على ارضية الصاله خطوات كلها براءه ورقه ودلع يوم انفج باب الصاله طالعت صوب الباب برقه وعقبها طنشت وسارت عند خليفه ويلست حذاله...

خليفه تخبل عليها وعبدالله تيبس مكانه...من متى ماشاف يهال في بيتهم...يالله من سنين...اخر وحده تخصهم كانت سمر والحين خلاص سمر قربت تدخل الاعداديه..اما عيال خواته فنادرا ما يشوفهم...

عبدالله مبتسم: الله الله من هالغرشوبه اللي في بيتنا...؟

حمده تضحك: حليلكم ثركم ما جد شفتوا بنات من متى؟

سمر: هيه غراشيب ونحن بنات البياديير..!!

عبدالله يقرب من سمر ويلوي عليها: انتي شيخة البنات كلهن...(وحس بشعره يوقف من الكلمه..هالكلمه ما تطلع من لسان بدريه لعفرا بنت اخوه)

عفرا قلبها يدق بسرعه بس تداركت الموضوع بعقليه: اووه علينا شفيكم على القابي اليوم مستعمرينها..؟

حمده: شفتي عاد القابج يالملكه ما تخلص حليلنا نحن الا الاسم حاف...

عفرا بفخر: يسدج شو عقب الاسم...يكفي انج حمده خليفه..خليفه يسدج بس..

عبدالله طنشهم وسار ييلس حذال خليفه: انا خاطري اتغزل في هالغرشوبه...ياناس بتذبحني..!!

شيخه تطالعه بنقمه ما عيبها...

خليفه يشلها وييلسها فوقه: شو اسمج؟

شيخه: ششششيخه...

خليفه مستغرب: امم صدق شيخه..

عبدالله مبتسم بحنان: تعالي غناتي بحبج..

شيخه: ماليدث..

عبدالله بحنان: افا...انا زعلت خلاص محد يحبني ولا يرمسني..

عفرا: شواخي سيري عند عمي عبدالله حبيه عشان يعطيج حلاوه..

شيخه بطرف عينها وتدافع عن عمرها: انا مث دبه انا مث دبه..

عبدالله انفجر ضحك: فديتج انتي وفديت الدباديب كلهن..

شيخه: عيب عيب انا بنت...

خليفه: اشهد انها بنت ناس وعرب.. المسنعه هذي..انتي بنت..ليت كل البنات مثلج..

عبدالله نش مارام يقبض عمره وشلها من فوق خليفه ويلس يحببها ويلوي عليها وخليفه يلس شوي وعقبها راح عنهم والبنات يلسن عند التلفزيون...

عبدالله: بنت منو انتي؟

شيخه ببراءه: بنت امي..

عبدالله مبتسم: قولي بنت ابوي...

شيخه: لاء انا بنت امي..

عبدالله ابتسم بحنان: من ابوج؟

شيخه: ثيف..

عبدالله عقد حياته ما يعرف حد من اهله بهالاسم: منو سيف؟

عفرا لفت عليه وهو يرمس شيخه: بنت المرحوم ظني ولد خالكم ناصر هاللي اخته مربيتنها...

عبدالله: ماعرفه..

حمده: عمي شبلاك...!! نساي..هذي شيخه بنت سيف ولد ناصر..اللي امه يدتنا غاليه...

عبدالله استغرب: ماشاء الله...منو من عيال خالتي غاليه عنده هالغرشوبه؟

حمده: انا لله قلنا لك الله يرحمه متوفي..وامها وياه...

عبدالله شهق: هيه عرفتهم اللي مسوين الحادث برمضان والله اني نسيت لا اله الا الله..والله مادري شو بلايه مختبص...

حمده بنقمه: مب منك من دبي اللي نستك بوظبي واهلك فيها...يعني بذمتك الحين ما تعرف عيال خالتك..

عبدالله: والله ناسي من متى ما شفتهم..

وانقبض قلبه على هاليتيمه اللي مب داريه بالدنيا ولا بالاقدار ولا كيف ممكن تعيش حياتها بدون اهلها وتتربى بعيد عنهم..

شيخه بعفويه: انا ابوي راح عند الله..انت وين ابوك؟

عبدالله دارت به الدنيا ويرمس عفرا: هاي للحين عايشه في بيت خالتي غاليه...يعني اقصد ويا منو؟

عفرا: والله مادري بس سمعت عمتي حصه تقول ان عمتها هي اللي مربتنها...وقايمه بدور الابو والام...

عبدالله: منو امج؟

شيخه: عيب عيب...

عبدالله يضحك: يالله عاد انا مثل باباه ..منو امج؟

شيخه بطرف عينها وخلاص اونها عصبت عليه: ليلى..خلاث..خلاث ما بقول مره ثانيه..

عفرا: فديتها هاتها عنك شوي..

عبدالله : لا لا خليها الله يخليج..

ويلوي عليها بقوه وتم يحببها وبحنان عمره ما وهبه لغير بدريه..كان متمسك بها لدرجة ان عفرا دمعت ولفت ويهها صوب التلفزيون...

طلع عبدالله تلفونه ويلسها على الكنبه....

عبدالله: يلسي عدل واضحكي لاتتحركين بصورج...

شيخه تضحك مستانسه وصورها عبدالله..وحط صورتها خلفيه لتلفونه..صدق خبلت به من حلاتها وبزاها اللي يذبح..ويلس حذالها يلعب بشعرها...

عبدالله: شعرج حلو منو مسونه..

شيخه تلعب بريولها على الكنبه: امي..

عبدالله يتنهد: عمتج مب امج...

شيخه تبتسم وتنط فوق ريوله: ثورني ثورني مره ثانيه..

ابتسم عبدالله: اصورج بصورج..لو تبين الحين اسير اييب كاميرا فيديو بصورج بها..

شيخه : ثورني..ثورني..
وصورها عبدالله عشان خاطرها بتلفونه كذا مره ..كان هاللحظه مستانس وما يبغي شي يخرب عليه فرحته وقلبه يدق بسرعه من مجابل هالكتكوته.... عقب شلها وطلع بها الحوش..ومسك ايدها ومشاها وياه...بس عفرا ربعت وراه بسرعه..

عفرا: عمي وين رايح ببنت الناس..

عبدالله: بوديها جمعية البطين..هذي قريبه منا بس ثواني..بنروح مشي..

عفرا: لا لا ما بتروح..ما فينا على حشرة امها بتحشرنا توها موصتني عليها الحين بتقول انه ما ينوثق فيني..لا لا هاتها..

عبدالله بطرف عينه: يا عوافتج..!!

عفرا: برايني هات بنت الناس..

شيخه بطرف عينها وقابضه ايد عبدالله بقوه: ماليدث..

عفرا انصدمت: لا والله...يالله تعالي غصبا عنج بتيين مب برضاج..

وطلعت لهن سمر وحمده يشوفن ويطمشن..

سمر: ردي داخل ماشي جمعيه..ما ودونا نحن تروحين انتي..

حمده: يالله يالدبه ادخلي بتسوي ازمه بجمعيتنا...

شلها عبدالله وهو يضحك وهي تطالعهم ببراءه..

شيخه ماده بوزها شبرين: اليد امي..

عبدالله تقطع قلبه وعصب على البنات: والله لولا حشمة ابوي وخليفه يا انه يبالكن ضرب بعقال في ظهوركن مسودات الويه تصيحن الياهل قبح الله مذهبكن..

البنات يضحكن ويربعن داخل وعفرا شلتها منه وودتها داخل وهو طلع سيارته وصورة شيخه لثانيه مافارقت خياله...
.................صح اعتذر امس لحصه في الليل واليوم قبل لا يطلع راح وكلم عفرا وقالت له انها سامحته وبتقنع ربيعتها تسامحه ... بس ظل ضميره يأنبه على حال حصه ... وغدره بحمد وهو ما يدري ... طعن حمد في ظهره ... كان يحس انه لازم يسوي شي .... خوانه حاولوا فيه انهم يوصلونه بس ما طاع حتى حمد كان موجود وبكرم اخلاق قاله بوصلك بس ما طاع ولاحظ الجفا الفضيع اللي بينه وبين حصه ... كان طالع ويا حميد اللي كانت هاي اخر سنه له في الكلية أخو حميد احمد هو اللي موصلنهم وهم في الطريج يسولفون



ذياب: احمد يايب تيلفونك وياك

احمد: هيه نعم

ذياب: وقف السيارة ابغي اتكلم في التيلفون اذا سمحت

حميد: الحين ... شي ما يتأجل يعني

ذياب: لا ما يتأجل

أحمد: شو لا يكون ما سلمت على الحبيبة

ذياب: بلا خرابيط ... اريد اكلم حمد ولد عمي وشيك على الرقم بعدين

أحمد: هاه وقفنا دوك التيلفون



نزل ذياب من السيارة وصك الباب وراه .... واتصل في حمد وهو مب عارف شو يقول لحمد ... وكيف يبرر له موقفه واللي صار... بعد الرنه الثانيه رد حمد



حمد: الووو

ذياب: الووو هلا حمد

حمد: ذياب خير ... صار عليكم شي

ذياب: لا بس بغيت اقولك شي

حمد: خير شوفيك ... لا تقول غيرت رايك

ذياب: لا حشا

حمد: هاه عيل شو فيك

ذياب: حمد ...

حمد: لا تسكت شو فيك .. تراني استهميت

ذياب: (قرر يقول كل شي مرة وحده) تذكر جواهر مالت دبي اللي كنت تحبها يوم كنت صغير ... تراني قلت السالفة حق حصه ... في موقف بايخ ... واهنتها وايد يعني هيه تعرف

حمد: (انصدم وما عرف شو يقول ا شو يرد) متى ؟؟

ذياب: متى شو

حمد: متى قلت لها

ذياب: قلت لها قبل لا ادخل الدورة ... خليفه دخلني الدورة لاني قلت لحصه هالكلام



صك حمد التيلفون قبل لا يرد على ذياب ... وهو مصدوم ... الحين عرف سبب تغير حصه عليه ذياب ... نبش ماضي ميت بالنسبة له في الوقت اللي قرر فيه حمد يعيش الحاضر ويخطط للمستقبل ... حصه تدري ... حصة اللي تحملت كل شي يسويه ... واتحملته بكل عيوبه وتكبره ... ما قدرت تتحمل ماضي انتهى ... قصة حب عفا عليها الزمن ... شو هالجرح اللي نجرحته ... اكيد الالم اللي تعيشه فضيع وهو زاده بحركاته ويا روضه ... بس ليش ما تكلمت ليش ما قالت ... هي اللي غبية ... كان حمد يتألم لألم حصه الفضيع ... بالرغم من كل شي ما حب انها تنجرح هالجرح ... ما كانت تهون عليه ... ولا عمرها هانت عليه ... شو قلت لها يا ذياب شو؟؟؟؟
.
.
كانت صدمة حمد عنيفة ... وفي داخله احساس بالغضب من كل اللي حوله ... حتى حصه اللي استغرب ردة فعلها القصة بالنسبة له انتهت فصولها من زمان .. ليش تنبش الماضي وتحاسبه على شي انتهى ... بدون شعور رد لف بالسيارة بيرد بيت عمه اللي توه طالع منه بعد ما سلموا على ذياب وعبدالله اللي رد دبي... وخليفه اللي قاله انه بيروح المكتب ... يعني البيت فاضي ويقدر يفهم السالفة على راحته ... ومع ذلك كان في داخله غضب ينتظر انه يفجره في ويه الغبية حصه ... شلها في الماضي ليش تريد تحاسبني على حياتي.. ومنو هي عشان تحاسبني على ذكرياتي ... دق جرس الباب ودخل البيت بس ما حصل الا سمر اللي قاعده تطالع التلفزيون ...



سمر: انت رديت ؟؟ شو نسيت شي؟؟

حمد: هيه وين اختج؟؟

سمر بغلاسه: منو حصه ولاسلمى ولا شمسه تراها مايتنا...

حمد: ادري انها ما يت اطري حصه..

سمر بفضول وبعفويه: ليش ما تريد تكلمك

حمد باستغراب: شدراج

سمر: ادري

حمد وهو يحاول اير الرمسة من سمر: ليش

سمر اللي انتبهت انها تكلمت اكثر من اللازم: هاه... لا ماشي بس انا اقول جيه

حمد يطالعها بنص عين : سمر قولي ليش

سمر بتردد ما تريد تخبر حمد باللي صار: ما ادري ... انا بروح ازقرها احسن

حمد: تعالي تعالي هنيه ... اول خبريني شو السالفه

سمر بضيج: اووووووه انا مب فتانه ما بقول شي

حمد باقناع: ما بقول لحد انج قلتي ... بعدين انتي ما تفتنين انا اريد اعرف حصه ليش زعلانه وانا شو سويت

سمر: مب انت ... هذا ذيابووه قال كلام كله جذب

حمد وهو يحس انه وصل للي يبغيه: ايوه هذا ذيابوووه شو قال

سمر بخوف: نسيت قلت لك ما ادري

حمد: سمر قولي لا اعصب عليج

سمر: اوووف كله انا اللي تعصبون علي في البيت ... شو سويت لكم انا محد يحبني

حمد: الحين منو اللي ما يحب الثاني ... انتي اللي ما تحبيني ولا قلتيلي شو قال ذيابووه عشان ادافع عن نفسي

سمر: هيه عشان اكون انا الفتانه ... وتروح تضرب ذياب ويذبحني خليفه

حمد: قلت لج والله ما اخبر حد

سمر تطالعه بنص عين: قال انك تحب وحده من دبي وكنت بتزوجها وان حصه تتمسح بريولك عشان يوم تمل وما تحصل حد يتزوجك تتزوجها ... وانك ما تحبها وانها غبية



حمد من سمع الرمسة اللي تقولها سمر عصب صدق وحست بالشرار يطلع من عيونه لدرجة انها خافت يسويبها شي فربعت صوب الدري عشان تحمي نفسها منه



سمر: والله هو اللي يقول مب انا والله ... انا ادريبه جذاب والله العظيم ما صدقته ... انت ولد عمي وانا احبك ..

حمد وهو يحاول يمسك اعصابه: روحي زقري حصه

سمر: ادري والله ما بتنزل لو اقولها انت تحت ... هي يوم ابوي قالي ازقرها وانت كنت اهنيه قالت لي اقولك اطلع برع بيتنا وسبتك بعد ... بس انا ما قلت لاني مب فتانه

حمد: بعد ... وكل ها ومب فتانه

سمر: انت اللي قلت لي قولي

حمد: زين روحي قوليلها عمي او خليفه يباها

سمر: واذا عرفت اني اجذب بتصفعني

حمد بعصبيه: يا غبية روحي حجرتج وقفلي الباب لين باجر

سمر: بمل بروحي في الحجرة

حمد بدا يعصب : سمر روحي سوي اللي قلت لج عليه

سمر: اوووه زين



راحت سمر فوق ودقت على حصة الباب وقالت لها ان خليفه يبغيها تحت وربعت صوب حجرتها مثل ما قالها حمد وقفلت الباب ... اما حمد كان يغلي من داخل ... مقهور لان يشوف ان سبب تغير حصه عليه سخيف وما يستاهل ... شو تريد بالماضي خلاص..الماضي اللي هو قرب ينساه ... وفي نفس الوقت متألم اذا حصه كانت تحبه صدق اكيد انجرحت من الرمسة ... وتأثرها هذا معناته انه جرحها وجرحها في الصميم بعد ... بس هو طول عمره يخونها وجدامها ويدري انها تعرف ... ليش هالسالفة اللي مسببه ازمة لها ... سالفة جديمة وجديمة وايد بعد ... ليش ما زعلت من الاشياء اليديده اللي صارت في وجودها وحضورها ... نزلت حصه واتفاجأت بحمد مب خليفه اللي يترياها ... وتحلفت لسمر في خاطرها ... وكانت بترد فوق ... خصوصا انها من موقف المكتب وهي ما ترمسه ولا هو يكلمها



حمد: انتي أي ما تعرفين تسلمين (بس حصه ما ردت عليه وكانت بتروح فوق) حصوه نزلي برمسج ولا تجبريني الحقج لفوق ... وتستوي فضيحه لا صارت ولا استوت

خافت حصه ان حمد يسويها فوقفت مكانها على الدري ولفت عليه وقالت: خير شو تريد

حمد: نزلي برمسج

حصه: ما اريد ارمس مرتاحه جيه

حمد: شو تصرف اليهال ها ...

حصه: أي تصرف

حمد بعصبية: انا دريت ان ذياب خبرج عن سوالف جديمة ما كان المفروض يطريها

اتفاجأت حصه واتبريدت مكانها ما عرفت شو تقول منو اللي خبره .. اكيد سمر يوم انها يت تقولها ان خليفه يباها تحت ...بس حمد فهم اللي تفكر فيه وقال: ذياب اتصل فيني وخبرني انه قالج هالكلام

حصه بهدوء وصوت متهدج: زين وبعدين

حمد: وبعدين وياج انتي ... شو هالسبب السخيف والتافه اللي يخليج تجلبين مرة وحده في الوقت اللي تعدلت فيه علاقتنا في بعض... وانتي شلج في شي مات وانتهى تنبشينه

حصه وبدت تعصب: سبب سخيف وتافه .... احاسيسي ومشاعري اللي كنت تلعب بها سبب سخيف وتافه ... عمري اللي مر وانا اتعبد في محراب حبك انت اللي ما كنت تستاهل كل هالحب سبب سخيف وتافه .... المكان اللي رفعتك وعليتك فيه وخليتك تسوى الدنيا واللي فيها وما رضيت عليك بكلمة مع اني اكثر وحده تعرف انك كنت نذل ووغد وحقير سبب سخيف وتافه ... ان موت الامل الوحيد اللي كان يخليني اعيش مثل البشر والناس انك في يوم تحس وانك يوم تحب تحبني انا مب وحده غيري سبب سخيف وتافه... اني اكتشف اني غبية وان قلبك مب لي ولا بيكون لي وانك يوم حبيت حبيت غيري ومستحيل تحبني مثل ما احبك سبب سخيف وتافه ...



كان حمد منصدم من انفجارها ومصارحتها الجريئة له بحبها ... وفي نفس الوقت مفجوع من الجرح اللي انجرحته على يده ... وحس بانه ذبح كل شي حلو داخل حصه كانت تستمده من حبها له وانه فعلا ما كان يستاهل هالحب ... بس قاطعها قبل لا تكمل كلامها



حمد: بس هذا ماضي وانتهى

حصه: وروضه واللي قبلها ماضي

حمد: تدرين ان عمره ما كان حب ولا بيكون

حصه: والحين عرفت السبب لانك تحب وحده غيري وغيرهن

حمد بعصبية: لا تقارنين نفسج بهن .. انتي محشومه عنهن هن

حصه وهي تريد تقهره: مب مهم ... ماعدت تهمني بشي .. ويكون في معلومك فهد ولد خالتي فاطمة اخو ناصر تقدم بيخطبني وامي تحن علي اوافق ... وانا قررت اوافق واظن الحين الكلام اللي بينا انتهى ...



كانت بترد تروح فوق بس ما تدري ان بهالجملة الاخيرة تجاوزت فعلا حدودها ويا حمد اللي الصدمة افقدته كل حدود العقل والتفاهم ويرها من يدها بالقو وهو منفعل ومعصب وصرخ في ويها ...



حمد: شو قلتي عيدي مرة ثانيه

حصه اللي بدت تخاف وهي تحاول تير يدها من يده: اظن انك سمعت اللي قلته وما بعيد

حمد بعصبية: الظاهر انتي ينيتي صدق ... وكيف حد يخطبج وانا ما عندي خبر

حصه: ليش ما احيدك ابوي ولا اخوي عشان يعطونك خبر

حمد: لا انا ولد عمج ومحد يقدر ياخذج اذا انا مب راضي

حصه: لا اقدر اخذ اللي ابغي انا مب باسمك ولا ملكك

حمد: تخسين انتي وياه وطوايفه كلهم .... محد ياخذ شي لحمد تفهمين وانا قررت ان انتي اللي بتكونين لي وماعاش اللي يتعدى على شي يبغيه حمد

حصه وهي معصبه: انا مب لك هذا اولا وثانيا ما رمت لجواهر يوم خذت غيرك ياي تستقوى علي



انصدمت حصه نفسها من جملتها الاخيرة اللي قالتها وهي في منتهى العصبية وبغرض جرح حمد ... اما حمد فسكت وهو متفاجئ ويطالع في ويها ... وفي الاخير ودر يدها وطلع برع البيت وشخط سيارته وراح ... حصه حمدت ربها ان امها مسيرة بيت عمتها غالية ... وراحت فوق وهي تصيح ودخلت حجرتها وقفلت عليها وقعدت تفرغ كل غضبها وضيجها من حمد ومن اللي سوته... اما سمر اللي تندمت على انها زقرت حصه لحمد فنزلت تحت وردت تشغل التلفزيون يمكن تنسى

حمد طلع معصب من بيت عمه وفي خاطره يشوف فهد عشان يضربه ويطلع كل حرته من تصرفات حصه فيه ... بس اول شي اتصل في عبدالله يتخبر عن هالسالفة ..



عبدالله: الو

حمد: صدق يا عبدالله اللي سمعته ...

عبدالله : خير ان شاء الله وبلاك معصب هد اعصابك

حمد: فهد ولد خادم خطب حصه وبتقربوبه..

عبدالله انفجع يوم درى ان حمد عرف ع الخطوبة: هو تقدم بس للحين محد جرببهم ... انت من خبرك

حمد: مب مهم من خبرني ... بس والله يا عبدالله لو ياخذ بنت عمي حد غيري يا اثور فيه وفيها في ليلة عرسهم وانت تعرف حمد يوم يحلف يسوي..

عبدالله كان متاكد ان حمد ممكن يسويها: يا ريال هد اعصابك خليفه قالي ان حصه قالت له ما تبغيه..

حمد: كيف تشاورونها اصلا قبل لا تخبروني هاه؟ ... ولا خلاص مالي مكان ولا قدر ولا جيمه عندكم انتوا عيال عمي

عبدالله: حمد شو هالكلام ... تدري ان محد يسواك

حمد: هيه صح واضح

عبدالله: والله يا حمد محد كان بيوزها لو قلت انت لا ..

حمد: وليش تشاورونها وانت تدري اني بقول لا

سكت عبدالله ما عرف شو يقول او يرد على ولد عمه اللي كمل: شوف يا عبدالله ترد الحين بوظبي وتقول لعمي اني اريد اعرس بعد شهر بالضبط شهر واحد بس يا عبدالله ... وتخبر اختك اني باجر بقدم استقالتها من الشغل وبحول لكم بيزات تجهز منهن للعرس وعشان عمي يسوي العرس ..

عبدالله: والله يا حمد مب حاية بيزات وانت عارف ... وماعليك من تكاليف العرس لو تبغيه باجر نحن حاظرين

حمد: لا لا تخافون مب مفلس مثل ما الكل متصور ... نصيبي من ورث بدرية الله يرحمها بيغطي تكاليف العرس وبيزيد بعد ...

عبدالله: اللي تشوفه

حمد: ابغيك ترد تكلم عمي الحين وانا بخطف عليه في الليل

عبدالله: ان شاء الله

حمد: ولا تنسى خليفه

عبدالله: ان شاء الله



كان عبدالله يساير حمد عشان تهدا اعصابه وبالفعل هدا حمد شوي بعد ما اتفق مع عبدالله على اللي يباه... وبند التيلفون وهو يتحلف حق حصه ... انا حمد تفضل علي واحد ثاني ما اعرف من وين حل علينا ... ذيج الساعه حمد ما كانت حصه ولا غيرها اللي يهمه ... كان كل همه ينقذ كرامته وكبرياءه اللي جرحنهن حصه ويثبت لها وللكل انه حمد يسوي اللي يبغيه ومحد يقدر ياخذ شي ملكه هوه ... وهي ملكه من يوم كان عمره 14 حتى يوم حب جواهر كانت حصه ملك له محد يجرؤ ياخذها دون اذنه وبموافقته....

......................بعدما رد من نص الدرب وهو كان رايح دبي وصل البيت ودخل سيارته الحوش ووقفها وهو يشوف سيارة خليفه وابوه موجودات وارتاح يعني ان الكل موجود..كان قلبه يدق بسرعه ويفكر بالموضوع بشكل ما فيه تروي وكان خايف من ردة الفعل في البيت وشو بيقولون وكيف ممكن يتقبلون الموضوع..توكل على ربه وحدر عليهم ..

عبدالله: السلام عليكم ورحمة الله وبركاته...

بو خليفه: مرحبا الساع وعليكم السلام والرحمه..

ونش خليفه صوبه: مرحبا مرحبا الساع..

ام خليفه: وييه فديت هالويه..يعلني ما خلى منك..

وقرب صوب اهله يسلم عليهم ويلس حذال امه...

عبدالله مستانس: ماشاء الله كلكم هني؟

عفرا: عمي مسرع تولهت علينا...توك طالع..

حمده تضحك: طرده معتبره...

عفرا مفتشله: والله ماقصد..

عبدالله يضحك: والله ولهنا على قعداتكم...

ام خليفه: انت ما تيي ولا نحن كل يوم نقعد..

عبدالله: شحالج سلامي؟

سلمى مبتسمه: بخير فديت ويهك..

عبدالله يلف على حصه: شحالج حصيص..؟

حصه بصوت شاحب: بخير الله يسلمك..شحالك حبيبي.؟

عبدالله حس ان في اخته شي: تمام التمام..شحالج سمووره؟

سمر: الحمدلله..

كانوا كلهم متيمعين خلفيه وحرمته وبناته وسلمى وبو خليفه وام خليفه وحصه وسمر..واستغربوا كيف عبدالله ياينهم الحين وهو العصر طالع من عندهم..بس تحرووه كان يتمشى في بوظبي ورد لهم ولا حد خطر على باله انه جد قرب من دبي بس رده اتصال حمد..

ام خليفه: وليش ما خبرتنا من قبل انك بتتعشى هني..الحين حادر علينا نصايف الليل..

بو خليفه: وين نصايف الليل يا عايشه..بعدها الساعه ما وصلت تسع..

ام خليفه: ما بيمدينا نزهب لك عيشه مثل العالم والناس..الا بتاكل من هالخرابيط اللي يحطنها البشاكير..

خليفه: ليش امايه كنتي ناويه تعقرين له قعود...؟

ام خليفه: يستاهل نذبح له كل اللي في العزبه..الا هو حادر علينا اخر الليل ادريبها حركاته عشان ما يتم ويتعلث بشغله...

عبدالله يسوي عمره بينش: خلاص يالله انا برد يوم بيي بسوي لكم تلفون..

خليفه يضحك: ما عليكم منه يتدلع على امه من متى ما حس بالبزا..

ام خليفه: وييه فديته عبدالله لو يبغي عيوني يفدنه..

خليفه: وين ذياب عنكم ما يسمع هالرمسه..؟؟


عبدالله: لا وين ذياب...؟ ذياب ريال ما عاد يهمه البزا ولا غيره..والله رفع راسنا..

بو خليفه بفخر: هيه والله..

ام خليفه: الله يحفظه وين ما كان ويحرسه من العين ويحميه من حسد عدوينه..

كانت سلمى وحصه ساكتات وعفرا وحمده يسولفن بصوت واطي..

عبدالله يبغي يفهم السالفه عدل: اقول ابويه....انتوا رديتوا على ولد خادم ولا بعدكم...؟

بو خليفه: والله تخبر خوك واختك...للحين ما ردوا لنا خبر..

ام خليفه: انا اقولها تعرس احسن لها..ولد عمها ما نضمنه..

خليفه متردد: حصه ما وافقت..

بو خليفه: وانا ما بغصبها لو ما تبغي هذي حياتها وهي تدري بمصلحتها..

ام خليفه: وتتريا شو للحين..

عبدالله: حصه غناتي شو رايج؟

حصه ساكته..

خليفه: حصه قولي لهم اللي تبينه محد بيغصبج لو ما تبين..

حصه ما ردت..

عبدالله: عيل دام انها ما ردت سمعوا شو بقولكم وشو يايبني بوظبي..

انتبهت حصه واحساسها يقولها ترا حمد بيسويها يا حصه..

الكل انتبه صوب عبدالله..

عبدالله: ابويه ترا حمد ولد عمي من ساعه وحده بالضبط متصل فيني وطلب حصه ويقول لك شهر واحد بس شهر..ويبغي يعرس...

بو خليفه تشقق: والله؟

خليفه اللي بغى يموت من الفرحه: الله يبشرك بالخير..

اما حصه اللي انصدمت وحست بالدنيا تدور بها وعرفت ان حمد بينتقم لكبرياءه غصبا عنها...حست انها ما تروم تسوي شي الا انها ترفضه..

حصه: لا مابغيه والعرس مب غصب..وانتوا بنفسكم قلتوه..

ام خليفه: ما بغيتي ولد خادم وولد عمج ما تبينه ..؟ شو تبين ؟ شو تتريين؟

حصه وهي بتصيح: مابغيه حمد..وما بعرس والله ماعرس..

ونشت بتطلع فوق..

بو خليفه بعصبيه: حصه يلسي..

ارتبكت حصه وخافت وردت مكانها...

خليفه: ولد عمها ابدا من غيره...اتصل بهم ابويه وتعذر منهم...وانتي امايه كلمي خالتي فاطمه وقولي لها ان ولد عمها ما رخصها..

عفرا طالعت ابوها بنظره وهي تعتب عليه ضغطه على عمتها..والوحيده اللي ما رمست هي سلمى اللي كانت ويا حصه في أي شي تقوله لانها مجربه الضغط والحزم والقرارات المصيريه فقلبها كان على اختها..

ام خليفه: دام ان حمد يبغيها لا تبدون عليه..كم كثر ترييناه والحين رمس لا تردونه..لا تخلي بناتك يلعبن بشيبك مبارك وتم بحلوج الناس سيرتك ما تطلع لهم من على لسان..

بو خليفه: لا ما نرد ولد عمها...ليش نرده..وين بتلاقي احسن من ولد عمها...

حصه مقهوره: بس انا مابغيه وانت قلت قبل شوي ما بتغصبني لو مابغي...

بو خليفه بعصبيه: ما بغصبج لو غريب بس ولد عمج ما يعيبه شي ومالج راي في هالموضوع..

عبدالله: تراه يقول يبغي العرس بعد شهر شهر واحد بس..

بو خليفه: تم كل اللي يبغيه..اتصلبه وقله خلاص تم له اللي يبغي..

خليفه مستانس: ونعم الشور..!!

حصه: ليش تغصبوني على ولد عمي وانا مابغيه..هاي حياتي مب حياة حد غيري...

بو خليفه:لو بغاج ولد عمج بدون عرس وبالثياب اللي عليج بيشلج...

حصه: ما كنت ادري بعمري رخيصه عندك..ابويه انا مابغيه تعرفون شو يعني ما بغيه..خليفه حرام عليك ارمس..عبدالله قول شي...

بو خليفه:اسكتي بس..يوم الرياييل ترمس تقطعين الصوت ولا تقولين شي..البزا والبطره الزايده ودريها لا تخليني احس اني غلطة في تربيتج..

حصه صاحت وقلبتها مناحه...وسلمى حذالها تهديها وعفرا بنظراتها تتوسل ابوها يرحم عمتها وحمده قربت منها وسمر يلست حذال امها...الجو كان مشحون وعبدالله متوتر وخليفه مرتاح ويدري ان حصه بتوافق وان ما وافقت بيعرف كيف يقنعها...

ام خليفه وبو خليفه كانت الدنيا مب واسعتنهم من الفرحه ومب مصدقين ان حمد اخير تكلم وقال شي..حتى ان ام خليفه بخاطرها تمت تقول وينك يا ولد فاطمه ما ييت من قبل عسب تخلي حمد يرمس في بنت عمه...

...................

بعد ما بند حمد عن عبدالله .. وبالرغم من ان اعصابه هدت شوي الا انه في داخله مازالت شابه ضو... كيف حد غيره ياخذ حصه الوحيده اللي تقدر تفهمه في هالعالم ... والوحيده اللي ماراح تخذله بعد ما راحت بدرية... يتخلى عن مصدر الامان الوحيد في حياته ... مستحيل بالرغم من كل اللي يصير كان متأكد ان حصه في النهاية له هوه بروحه وبموافقة الكل وبمباركة من المجتمع ... بعد ما كان مستعد يبيعها وما يبغيها والكل انتقد موقفه هذا .. اليوم بعد هوه ما يؤمن انها نصيبه ياخذه غيره ... ومنو فهد ... ومن يكون هالفهد عشان ياخذ حصه بنت مبارك وبنت عمي انا ... كانت افكار كلها تدور في راس حمد ... وبالرغم من هذا كان مرتاح للقرار اللي اتخذه من شوي ... راح يعلم حصه انها ما تتحدى حمد ... وان حمد متى ما يباها ما تقدر تقول غير حاظر وتحت امرك ... وهو يسوق السيارة ما حس بنفسه الا واقف جدام بيتهم او بالاصح بيت امه ... البيت اللي عاش فيه كل ايام طفولته ومراهقته وبداية شبابه ... ابيت اقرب ما يكون الى قصر تربى فيه وهو يحصل كل شي يباه ... نزل من سيارته ودخل البيت.. وراح صوب قسم امه في البيت وسمع صوت التلفزيون وبعد ما دق الباب دخل ... اما امه اللي تفاجأت من وجوده في البيت في هالوقت ما قدرت غير انها ترحب به



ام حمد: حمد ... مرحبا غناتي ... مرحبا بنظر عيني .. اقرب يالغالي

حمد: (يبتسم) شحالج يا الغالية

ام حمد: اييييه يا حمد الظاهر هالغلا الا كلمة تقولها ولا من غابت عين بنت الغالية ... وهالغالية ما شافتك

حمد: تدرين اني مشغول

ام حمد: في شو يا حمد مشغول عن امك ... بالشركات اللي تديرهن ولا بالعقارات اللي اتابعهن

حمد: شفتي هالرمسه اللي ما احب اسمعها وانتي كل ما شفتيني سمعتيني اياها

ام حمد: يا حمد .. رد بيت ابوك وودر عنك هالجحر اللي ساكن فيه ... البيت كبير وخالي علي

حمد: حرام عليج شقتي وسيعه وحلوة الا انتي ما شفتيها

ام حمد: وشو فيه بيت ابوك ما تسكنه

حمد: امايا هذا بيتج مب بيت ابوي ... خلاص انتهينا من السالفه هاي

ام حمد: وبيتي لمنو بعدي .. مب لك ... وانا وكل اللي عندي لمنوه ... ليش انت ما تريد تفهم اني انا بعد محتاجتنك ... وكثر ما يعطيك ولد خادم راتب بعطيك مرتين بس تعال اسكن عندي وجابل حلالي .. بدل هاللي حاطنهم وينهبون بدون حسيب ولا رقيب

حمد: محد ينهب يا ام حمد انا اتابعهم

ام حمد: زين وشله عايبنك الشغل ويا ناصر بن خادم هاه ... تعال بعطيك قد ما تريد بيزات واشتغل بروحك

حمد: اوهوووووووو وبعدين يعني ... تبيني اروح وما تشوفيني الا بعد سنه ولا في العيد ولا بتسكتين عن هالموضوع اللي ما احب اسمعه وبتسمعين شو بقول

ام حمد: انا امك ... وقلبي يحترق عليك ... عايشه بروحي وجنه ما عندي عيال ... لو اموت باجر يشهد الله محد بيدريبي ... حتى الرمسه ما تريد تسمعها مني

حمد: الله يخليج ويطول بعمرج ... بس الله يهداج انا قلت لج ما احب اسمع هالموضوع ... شو تعطيني بيزاتج تبين تفلسين وتعيشين على الحديده ما تدرين اني يمكن العب بها كلها مثل ما سويت بفلوس ابوي

ام حمد: يفدنك البيزات يا حمد بس ارجع البيت

حمد: امايا بتسمعيني ولا اطلع

ام حمد بعد ما يئست منه: اسمعك .. شعندك بتقوله

حمد: انا عزمت اعرس

اتفاجأت ام حمد من رغبة ولدها في العرس ... وصلت لدرجة انها ايست منه وتأكدت ان حمد ما بيسوي شي واحد يفرحها به او حتى يرضيها .... كم كثر حنت عليه هيه وبدرية يعرس وياخذ حصه اللي قربت تعنس من كثر ما اترياه ... بس هوه اللي يعند ويرفض ويأجل الموضوع...



ام حمد بفرحه: هذي الساعة المباركة يا حمد .. ما بغيت يا ولدي ... ايوه خلنا نفرح شوي هالبيت ما شاف فرحه من عقب ابوك ... (ودموعها في عيونها) الله يرحمج يا بنتي كم كثر كنتي تبين تشوفين اخوج يعرس ببنت عمج

حمد يبتسم: خلاص عاد لا تقلبينها تراجيديا ... ولا بغير رايي

ام حمد: بزوالك ان غيرته ... هبابي اروح عند ام خليفه واشوف طلباتهم للعرس وشو يبغون ... والله يا حمد يا اسويلك عرس لا صار ولا ستوى لا اخلي كل هل الامارات من بوظبي لين الفجيرة ترمس عنه

حمد: هاهاهاها لا ما يحتاي ...

ام حمد: وشله ما يحتاي ... كم ولد عندي غيرك بفرح به

حمد: امايا انا كلمت عبدالله اليوم وقلت له بعرس بعد شهر ... وبحول لهم البيزات ويزهبون على كيفهم

ام حمد: وشو بيسد الشهر ... حتى الخيام ما بتزهب بشر

حمد: مب لازم تعزمين اهل الامارات والخليج كلهم ... خفي الريس امايا ما عندي امكانية اسوي عرس من الف ليلة وليله

ام حمد: وش هالامكانية بعد... البيزات موجوده ويا كثرها بعد .. لي ما فرحت بولدي حق شو بيودها

حمد: ماعليه فرحي بعيال ولدج ... الحين خليني اعرس خلال شهر ولا بغير رايي

ام حمد معصبة: عوذ بالله من شرك يا حمد .. حتى فرحتي بك مستخسرنها فيني ... شو سويت بك انا لا اكون عدوتك هب امك .. لا طايع تاخذ من عندي بيزات ... ولا طايع تخليني اسوي لك عرس ... ولا حتى تباني افرح

حمد: امايا الحين الفرح ما ايي الا اذا سويتي العرس اللي تبين ...

ام حمد: هيه ابغي اسوي اللي ابى

حمد: امايا انا بروح اكلم عمي اليوم

ام حمد: وانا بروح اشوف ام خليفه

حمد: لا لا تروحين الحين صبري شوي يوم بقولج روحي روحي

ام حمد: ليش

حمد: بخبرج بعدين

ام حمد: فضيحه في الناس يا حمد كيف ما تباني اسيرلهم وانت رايح تخطب لهم

حمد: أي ناس امايا هذيلا قوم عمي ... وعمي بيخطب لي من نفسه اذا تبين كلميهم في التيلفون وقوليلهم انج بتروحين لهم الاسبوع الياي عشان تشوفين شو تبين انتي وياهم للعرس

ام حمد: لا بروح اليوم

حمد: اوكي روحي انتي وانا مب رايح اخطب وهونت عن العرس

ام حمد: لا حول ولا قوة الا بالله العلي العظيم ... خلاص اللي تبغيه يا حمد .. بس انا ابغيك تسكن عندي بعد العرس ما بتسكن بنت مبارك في شقه منقود عند العرب

حمد: اوهووو انتي من وين تيبين هالتخاريف

ام حمد: صدق جليل حيا ... انا اخرف يا حمد

حمد: زين ما عليه يصير خير خليني اعرس وبعدين بنتفاهم

ام حمد: لا الحين

حمد يبتسم: بشاورها يمكن هيه تريد تسكن بروحها

ام حمد: بنت مبارك مسنعه وما عندها هالسوالف الخايسه

حمد: ماعليه بنشوف



قعد حمد ويا امه شوي ... اللي ما طلعت من سالفة عرسه وكل شوي طلعت له بسالفه وشي تبغي تسويه في العرس ... حس حمد ان راسه بينفجر وخلاص اتضيج من هالطاري الظاهر انه ورط نفسه بس الحين ماشي فكه ... لازم يسوي اللي في راسه ويأدب حصه ... واللي جابرنه يقعد ما امه انه فعلا صار له مده طويله ما شافها وحس انه مقصر فيها ... بس بعد ثلاث ساعات طلع من بيت امه ... وهو بالمرة مرتاح...


((( انتظروا الجرء الي بعده مع الاخت الغلا )))

[الرايقه]

اشكركم على هالمجهوووود الرااااائع بصرراحه ما قصرتوا وهالمره كان الجزء فناااان احلى شي فيه انه طوييييل ...
يعطيكم الف عاافيه ونتريا البقيه ,,,

[البدوي الحبوب]

تسلمين اختي الرايقه على التواصل الجميل

تحياتي لك

[الغلا]

الرايقه تسلمين الغاليه على هالتواصل الجميل منج ...
الصراحه ما اتقصرين ... وانتظري الاجزء اليايه ....

البدوي الحبوب الف الف شكر لك على هذا المجهود الرائع...

انتظرو الجزء الــ 29

اختكم
الغلا

[الغلا]

الحلقه التاسعه والعشرون
كانت حصه في حجرتها تصيح من القهر والعجز اللي تحس به ... ليش الحين بالذات في الوقت اللي خلاص ما عادت لها أي رغبة في حمد يصر ابوها انه يوزها اياه... كانت تحس نفسها رخيصة ومالها قيمة في هالبيت... وكأنها كانت حمل زايد والكل ارتاح انهم بيفتكون منها... شو هالسحر العجيب فيه واللي محبب ابوها واخوانها فيه رغم كل عيوبه... والحين حلا في عيونهم بعد ما كانوا ينتقدونه ... كانت سلمى وياها وتحاول تهديها هيه الثانية لا حول لها ولا قوة .. لو اعترضت او قالت محد راح يسمع لها

سلمى: بس عاد يا حصه ... لو ذبحتي نفسج من الصايح محد بيسمعج في هالبيت تقبلي الواقع
حصه: (وهي تصيح) ما اريد يعني ما اريد ... حتى العرس بالغصب
سلمى: (بمرارة) كل شي في هالبيت بالغصب ... الا انتي ما لحقتي الا على البزا وما شفتي اللي شفناه
حصه: ما يخصني ما اريد حمد ما اريده
سلمى: مب هذا حمد نفسه اللي كنتي تموتين على التراب اللي يمشي عليه ... مب هذا ولد عمج الا عنده يخلص العالم اللي نعيشه ويبدا عالم ثاني وياه
حصه: كان والله كان الحين انا ما ابغيه ولا حتى اطيق طاريه
سلمى: اقولج نصيحة اخت لاختها... حاولي تردين تحبينه خلاص حمد انكتب عليج وبيصير قدرج ونصيبج... مب هذا قرار بو خليفه .. وبو خليفه كلمته ما تنزل الارض عليج وعلى اللي اكبر منج
حصه: شو هالظلم .... حرام عليكم والله ظلم
سلمى: جانج حرمه يوم بيي المليج قوليله ما اريد وخلي بوخليفه يدفنج في حوي البيت

سكتت حصه عنها وردت تصيح بحرقة اكثر من قبل ... وسلمى تطالعها بيأس مب عارفه شو تسوي عشان تسكت ... دق عبدالله الباب ودخل حجرة حصه وشافها وهيه تصيح ... عبدالله استغرب ردة فعل حصة من يوم كانوا قاعدين تحت ... شو اللي غيرها بهالطريقة على حمد ... سالفة جديمة تغيرها بهالطريقة الفضيعه مب قادر يستوعب ان حصه ممكن ترفض حمد بهالاصرار ...

عبدالله: (بعد ما دخل وصك الباب) بعدج انتي تصيحين ما خلصن دموعج
سلمى: (بقهر) حرام عليكم يا عبدالله والله حرام نحن بشر مب لعبة بايدكم مثل ما تبون حركتونا ... ليش عاد جيه
عبدالله (مصدوم) : شياج علي مرة وحده ... انا ياي اشوف حصه بلاها
سلمى: شوف هاي حالتها من قلتوا لها انها بتعرس بحمد...
عبدالله: وليش هذا كله ... الحين الدموع والصايح بيغير شي ... والله لو يقولون دواها من الموت انها ما تاخذ ولد عمها ابوها ما طاع وقال برايها تموت بس تاخذه يوم يباها
حصه: (وهي تصيح) ليش عاد هالكثر انا رخيصه عندكم .. مالي قيمه ولا قدر عند ابوي
عبدالله (بحنيه) لا والله والشاهد الله يا حصه كم تسوين عندي ... انتي حصه اختي حبيبتي بس هالشي مب بيدي ولا بيدج... وبعدين هذا حمد يا حصه... شياج ما تبينه الحين (ما ردت عليه وكملت صايح فكمل كلامه) حمد يا حصه تغير واصطلب وودر الحركات الشينه اللي مكرهه الناس فيه ... حتى عوافته في الناس ودرها
حصه: لا ما ودر
عبدالله: (يبتسم) شدراج
حصه: انا وياه في الشغل واشوف حركاته ويا الموظفات الدون اللي مثله
عبدالله (يضحك) الحين حمد دون يا حصه
حصه: هيه دون وستين دون
عبدالله: اول شي هذا الحمد بيكون ريلج وعيب عليج يا بنت مبارك تسبينه او ترضين تسمعين عليه كلمه ... انتي قبل محد يجرؤ جدامج يقول عليه شي فيه ... الحين انتي اتبلين عليه
حصه: عبدالله والله ما اتبلا عليه
عبدالله: حصه انا اعرف حمد مب من اليوم وامس هاي عشرة عمر ... واعرف مبدئه زين ... شغل يعني شغل ولعب يعني لعب ... عمره مارابع وحده وياه في الدوام ما يخلط بين علاقات العمل وعلاقاته الخاصة
حصه: يمكن هذا قبل تراه ولد عمك ما يتم على حال كل يوم بحال
عبدالله: وولد عمج بعد ... ومشي دموعج خلاص والله ما منها فايده... وحاولي تتقبلين انه بعد شهر بتعرسين بحمد زين
حصه: ما اريد يعني ما اريد
عبدالله (يستفزها) : جان بدموع وبس بتاخذينه... وجان عندج حل ثاني هكوه الدرب وجربي حلولج كلها ... يمكن ربي يوفقج وما تاخذينه

سكتت حصه بعد ما اقتنعت بكلام عبدالله صدقه دموعها ما بتحل شي ولا بتغير من موقف ابوها وامها ولا عبدالله ولا خليفه يقدرون يقولون شي او يردون كلمه لابوها ... بس مازالت مقهورة من موقفهم من الخطوبة ووناستهم على هالعرس ... وما قدرت تيود قهرها في قلبها

حصه بعصبيه: ادري ان دموعي ما بتغير شي ... بس بعد ما بسامحك لا انت ولا خليفه لاني ادري انكم واقفين ويا حمد ضدي
عبدالله: ليش نحن في حرب نوقف ويا حمد ضدج ... حمد ولد عمنا وانتي اختنا ... وما فيها شي لو فرحنا لولد عمنا واختنا
حصه: بس انا مب فرحانه... وانتوا فرحانين لحمد بس... يرضيكم انه يذلني وياخذني غصب
عبدالله: حمد ريال والنعم فيه ... وما افتكر انه في يوم يفكر انه يذلج
حصه بقهر: انه يزوجني غصب عني اكبر اذلال عشته بحياتي
عبدالله: بس حمد ما يدري انج ما تبينه
حصه: حمد اكثر واحد يدري كم كثر اكرهه وما ابغيه ... ولاني اكرهه وما ابغيه هو قرر يعرس الحين
عبدالله: شو هالخرابيط اللي تقولينها يا حصه
حصه بضعف: والله يا عبدالله مب خرابيط ... انا اكرهه تعرف شو يعني اكرهه ...
عبدالله(ينهي الموضوع) الحين انتي هدي اعصابج ورقدي ... باجر وراج بلاوي تسوينها شهر فترة قصيرة عشان اتجهزين ... وعلى فكرة حمد بيقدم استقالتج من الشغل
حصه(بصدمه) شووووو ... من الحين يريد يتحكم بحياتي؟؟
عبدالله: بلاج انتي شو يتحكم ما يتحكم بتكونين حرمته والزم ما عليج طاعته ورضاه
حصه: بس ماله حق يقدم لي استقالتي ولا يريد يطلعني من الشركه عشان يخلاله الجو فيها ويسوي اللي على كيفه
عبدالله (بضيج) : اووووه انتي الكلام وياج الحين ما منه فايده ... يوم بتهدين برد اكلمج

وطلع عبدالله من حجرة حصه اللي كانت بتنفجر من الغيض والقهر ومب عارفه شو تسوي في المصيبه اللي حلت عليها ... كان اكثر ما يذبحها انه انتصر عليها في النهاية وبيزوجها سواء رضت او ما رضت ... وان الكل يتوقع منها انها تنصاع خلاص وترضخ للامر الواقع ... كانت مولعه من داخل ودها تشوفه جدامها عشان تذبحه وتفتك منه... حول كل مشاعر الحب والحنان اللي كانت تحسهن تجاهه لبغض وحقد وكره... وقتل في داخلها اخر امل في انها ترد تحترمه مرة ثانيه ... خصوصا انه رفض يحترم رايها ورغبتها
.....................
مرت فتره طويله من اخر مره زارت فيها سلامه بيت اهلها..من اليوم اللي قالها حمدان ان ابوها وامها في العين وما زارتهم من ذاك اليوم..كانت متغيره هاليومين ويا ريلها وكل شي بحالها معتفس وهو يحاول ويحاول ولكنها رافضه ومصره علىالصمت وكل ما سألها تقوله انا مضغوطه بالشغل والدراسه وبس..فسكت عنها رغم انه يحس ان اللي مسبب لها الالم شي فضيع..حاول كذا مره يحترم صمتها بس ماقدر..ما تهون عليه تم جي..كانت كئيبه وما تاكل مثل قبل وقابليتها للضحك والوناسه قلت رغم انها للحين حبيبتهم الاولى والاخيره..كان موقف ابوها في بالها ومب مرتاحه وما بتحس بالراحه الا اذا جربت ترمسه بس كان خوفها عنيف انه يرفض او يتردد او حتى ما يرضى يقابلها..كم شهر مر من يوم عرست وما دقت بيوم عليه تلفون ولا فكرت تيي تشوفه ولا تسلم عليه وهو بالمثل...
في الصاله الصغيره اللي مجابل الحوي دخلت فاطمه يايبه دلة الشاي ويلست على الارض بتشوف التلفزيون ويا اخوها اللي كان طايح على الارض ومتسند براسه على ريول سلامه اللي كانت ماسكه مجله وتقراها...اما ام احمد فكانت راقده من عقب الغدا...
فاطمه تناول سلامه كوب الشاي: شو تقرين؟
سلامه: ماشي بس اشوف الصور..
فاطمه: ياخي ملل شو هاه متى بيي باجر..
خزها احمد بطرف عينه: محد دخل الجامعه الا انتي.!!! صدق اللي ما يعرف الصقر يشويه..
سلامه تحط المجله على الفراش: الحين شو يخص هالمثل؟؟ المفروض تقولها مفجوع وطاع على عصيده..
فاطمه بنقمه: لا والله...بدل ما تعدلين رمسة ريلج تعلمينه كيف يطول لسانه..
احمد نش ويطالع فاطمه: انتي من وين يبتي طولة اللسان هذي؟
سلامه تضحك..
احمد يلف على سلامه: من قصر لسانج انتي تستهبلين..كل وحده فيكن يبالها منشار يحش لسانها حش..
سلامه: حشا مب لسان رودس..!!
فاطمه: شو يعني؟
احمد: تراج ويه فقر..هاي بنت الهاي كلاس(ويقولها بطنازه) انتي ما تعرفين هالسوالف عشان ما عندج عزبه..
فاطمه طنشته..
سلامه: لحوول ردينا على هالهاي كلاس...
احمد: سمعي فطوم...قومي هاتي اللابتوب مالج ابا اشوفه..
فاطمه: شو تبى فيه.ما فيه شي..
احمد: زين قومي هاتيه ابى اشوفه...
فاطمه: بتخربه..
احمد بطرف عينه: اسمع انتوا..يالغبيه اعرف الكمبيوتر قبل تييبج امج تفهمين..
ورد يحط راسه على ريول سلامه..
احمد يكلمها: وانتي الثانيه بتخبرج تعرفين للكمبيوتر..
سلامه: اكيد منو ما يعرف له..
احمد: اخ منكن ما خليتن شي يالبنات ما تفلسفتن فيه..
فاطمه: تراني ابغي منك شي ولازم تسويه...بصراحه انا اباك تركب لنا خط انترنت في البيت..
احمد يسحب المجله من سلامه ويتصفحها: قصورج والله...
فاطمه بتذمر: والله ما يخصني عندي واجبات وبروجكتات لازم اخلصهن ما يكفيني وقت البريكات في الجامعه..
احمد: مشكلتج...انا لو بتعبث بالفلوس بييب لكن خدامه بدل النكد اللي انتن فيه..
فاطمه: انا مب متنكده ولله الحمد..سلامي انتي متنكده..؟؟
سلامه: اكيد يا عيوني...تعرفيني ما روم لشغل البيت بروحي وخصوصا حزت الغدا الحر يذبحني وفوق كل هاه مكيف المطبخ خربان ماعرف كيف تستحملونه ايام الصيف..مب عيشه والله..
احمد: خلاص بكلم الكهربائي يي يصلحه...وبفكر بموضوع البشكاره...
سلامه: يكون احسن..
ونشت عنهم...
احمد: على وين؟
سلامه: بسير الف شعري تبطل...
احمد: ما يستوي هني؟
سلامه:لاء بسير حجرتي.
وسارت سلامه حجرتها وهي ما تبغي تعدل شعرها ولاشي كل اللي كان يهمها هاللحظه انها تتم بروحها..مب قادره تركز في شي ولا قادره تمشي بحياتها رغم كل مقومات السعاده اللي حواليها...مب قادره تستلذ بحب احمد مثل قبل ولا تحس انها تبغي شي غير انها تنهي كل الخلاف ويا ابوها..مب متحمله فكرة انه مب راضي عليها للحين...يالله كم كثر يصعب عليها هالموضوع...
احمد في الصاله حس ان سلامه فيها شي بس ما يبغي فاطمه تحس فتم وياها شوي عقب نش ساير حجرته بيشوفها...ودخل عليها وشافها متمدده على الشبريه ولاويه على مخدتها بشكل عفوي..
احمد: سلامي!!
سلامه تنش: هلا احمد ليش ييت؟
احمد ييلس على طرف الشبريه: شي بلاج؟
سلامه بتردد: لاء..
احمد يسحب عنها المخده: سلامه طالعيني..
سلامه تبلع ريجها حنية احمد ممكن تصيحها: هاه...
احمد: في شي.؟ حد مضايقنج؟
سلامه تهز راسها انه لاء..
احمد: قولي والله..
سلامه: صدق..
احمد: انزين انتي من كم يوم مب طبيعيه احس شي بلاج..قولي اذا حد زعلج..حرام يا انها فطيم لا اذبحها ذبح البلى..
سلامه: حليلها فطوم ماتقول شي ..(صمت قصير) احمد!!
احمد: امري..
سلامه: عادي توديني بيت ابوي الحين؟
احمد فج عيونه: شفتي والله ان فيج شي وانا والله ماسكت خلني اقوم لهم بتخبرهم من زعلج..فطيم هاي يبالها ضرب..
سلامه تقبض ايده: احمد ارجوك..شفيك لا تستهبل والله اني ضايجه لا تزيدني..
احمد: زين قومي البسي بس ما بتقولين لي ليش تبين تروحين...؟
سلامه تنزل راسها: ماقدر...
احمد: تبين تباتين..؟
سلامه: طبعا لاء..ماقدر اتخيل ليله تمر وانا بعيده عنك..
احمد ابتسم ومسح على راسها: حياتي انتي..
سلامه تنش: يالله اطلع بغير ثيابي..
احمد: عادي انا ريلج خلني اتم..
سلامه تبتسم: يا طفاستك !!! اطلع بغير..
ونش احمد عنها وهي على طول غيرت ثيابها...هاي هي فرصتها الثانيه..ماتدري شو ممكن يصير ومن ممكن تواجه وكيف ممكن يتقبلها..اشياء وايده كانت تدور في بال سلامه قبل تسير تشوف ابوها اللي ما سمعت منه كلمه ولا شافت ويهه من يوم خذت احمد...
طلعت سلامه الصاله اول ما خلصت وشافت فاطمه يالسه تلعب في كمبيوترها...ويوم شافتها لابسه استغربت...
فاطمه: وين رايحه.؟
سلامه: بيت اهلي..
فاطمه: احمد بيوديج.؟
سلامه بخاطرها"عيل الدريول": هيه من غيره..
احمد يطلع من المطبخ: يالله سلامه..
سلامه تكلم فاطمه: قولي لعمتي اني برد ما ببات..
وطلعت ويا ريلها كانت خايفه صدق ومرتبكه ومب عارفه لها ريل من راس...واللي مخوفنها لو ابوها يطردها او يسوي بها شي من يشوفها..كانت الف فكره غبيه تدور في راسها ولا هي عارفه كيف تشبع فضول ريلها اللي هو بنفسه كان متوتر ولا يدري شو سالفة حرمته...
وصلوا بيت ام راشد ووقف احمد السياره جدام الباب العود..وهي قلبها يدق بسرعه..
سلامه: احمد تم هني لا تروح الحين بظهر..
احمد مستغرب: ليش انتي ما بتطولين؟
سلامه: لاء..وجان تبغي تسلم على يدوه اقرب ميلس يدي ناصر لا تحدر ميلسنا..
احمد استغرب اكثر: لا ما بنزل بترياج هني.
سلامه تنزل: اوكي..
ونزلت سلامه اول ما حدرت شافت سيارة ابوها موجوده..وباب صالة بيت يدتها مشرع يعني انهم يالسين في الصاله هذي الحركات حفظتها عن غيب في بيت يدها العود...بس ما راحت بيت يدتها وعلى طول سارت بيت ابوها..
اللي اول ما فجت باب الصاله حست برغبه فضيعه في البكاء...هالبيت يا كثر ما حملت منه من ذكريات والالام وتعب وحزن..يا كثر ما صاحت وضحكت وركضت وسوت اشياء غلط فيه...بس في الاخير خسرت كل شي وتزوجت وكسبت حب ريلها لكنها خسرت شي عظيم وهو رضا ابوها عليها....ما حست بعمرها الا واقفه حذال حجرته..عقت عباتها وكانت لابسه قميص بيج فاتح وتنوره بنيه ومتشيله..لا ميك اب ولا شي الا جحال في عيونها وبس...
قبل تدق الباب تمت تدعي ربها يسهل عليها وترتمي بكل قوه في حضن ابوها ويضعف ويحن عليها...وتعتذر له وتطلب منه يسامحها...توكلت على ربها ودقت الباب..وياها الصوت الغليظ من داخل يسري في كل خلايا جسمها..
راشد: منو؟
سلامه:........
راشد: ادخل الباب مفتوح...
بطلت سلامه الباب وقلبها ينتفض ويدق دق وشوي ويطلع من صدرها..بس الغرفه كانت مظلمه وشكله محد فيها...لكن في نور خفيف من صوب المكتب اللي في غرفته تنهدت وهي تمشي شوي شوي...
راشد: منو هاه؟ حمدان؟؟
دقت سلامه باب المكتب ووقفت جدام الباب وهو يوم شافها انعفس ويهه وحس حد صفعه وجتل كل الاحساس فيه...وعلى طول رد يطالع اوراقه..
حز الموقف في نفس سلامه: السلام عليك ابويه...
راشد بجفاء: وعليكم السلام..
سلامه تقرب منه وتلف من ورا الطاوله بتوايهه وهو نش لها ومد ايده من بعيد عسب ما تقرب توايهه ولمس ايدها بس ما حبها...ويت عينه في عيونها..وشاف شعاع الحب والسعاده والخير والراحه يشع منها..
سلامه حست عمرها بتصيح ما حبها ولا خلاها تحبه..
سلامه بحزن: شحالك ابويه.؟
راشد: مثل ما تشوفين..
ورد يعابل اوراقه ولا اهتم لوجودها...
سلامه بتصيح: انت بعدك للحين شال بخاطرك عليه..؟ والله ابوي انا اسفه وما كان قصدي...
راشد ما رد عليها وكان مندمج في اوراقه..
سلامه تصيح: ابويه طالعني..كلنا نغلط وخير الخطائين التوابين...ابويه حرام عليك انا حياتي مب حياة ولا عيشتي عيشه ولا اهنى بدنيا انت مب راضي علي فيها...
راشد ما هزته كلمه من كلامها وتم يتابع اللي جدامه..
سلامه: ابويه..ارجوك..انت تكرهني ادري بس مب معقوله ما تقدر تسامحني..اذا رب العالمين يسامح ونحن اقل منه ليش ما نسامح؟
راشد طنشها كان يشتغل ببرود فضيع وهي ما قدرت تسوي شي وانفجرت تصيح بصوت عالي مثل الاطفال..صياح هز كيان راشد بس كان اقوى من ان أي عاطفه تهزه...اللي سوته سلامه في نظره مب شويه ولا هو بسهل ومب قادر يسامح وكل مشاعره تضاربت وهو يشوف جسم بنته جدامه ضعيف هزيل صح شكلها مرتاحه بس ايدينها غاديه خشنه وجسمها ضعيف وناحل..بس اهم شي نظرة السعاده اللي في عيونها..هاللي ريحه وهو يدري ان بنته اكيد بتكون مرتاحه ويا احمد...
طلعت سلامه بسرعه من المكتب ولبست عباتها وهي بتنفجر من الصياح ومحد حس انها موجوده وربعت برا وشافت سيارة احمد للحين موجوده وعلى طول طلعت وياه وهي بتنفجر من البكاء...
احمد مصدوم: سلامه شفيج؟
سلامه كانت تصيح صياح وغرقانه بدموعها ولا حتى قدرت تتنفس من الضيج اللي فيها واحمد صدق كان مفجووع على الاخر ومب مصدق شو بلاها حرمته وما يتوقع شو ممكن يكون صار داخل البيت او شو اللي يخليها تصيح هالكثر..وعرف في الاخير ان كل حزن سلامه وضيجها في الفتره اللي طافت يرجع لبيت اهلها...
ما قدر يسوي شي الا انه يمشي بسيارته ويرد البيت..هناك في بيتهم وفي حجرتهم الصغيره يقدرون يتفاهمون اكثر ويفهمون بعضهم ويقدر ياخذ ويعطي معاها افضل من السياره....
................
مرت فتره طويله وحصه على نفس الوضع قررت تعتزل الكل وما تكلم حد من اهلها ولا تنزل تقعد وياهم لا امها ولا ابوها ولا اخوانها ... كانت على اتصال دايم بليلى .. وتسمح لسمر وبنات خليفه يدخلن حجرتها بس... حتى سلمى ما تخليها تدخل عندها لانها تدري اذا ابوها او خليفه سئلوا عنها بتقولهم الصدق وبتخبرهم عن حالها ... تريد تزوجني يا حمد اوكي بزوجك ... بس تحلم تزوج حصه اللي كانت تحبك... حصه الاولانيه خلاص انتهت من حياتي وبدت حصه يديده اذا ما كان بيدي اختار مصيري... وابتعد عنك راح احول حياتك جحيم مثل ما سويت فيني... دخلت عفرا على حصه بعد ما دقت الباب

عفرا: شحالج عمتي
حصه: بخير ... مثل امس ما تغير شي
عفرا (بتردد) : عمتي بسألج سؤال بس لا تزعلين
حصه: سئلي
عفرا: ليش ما تكلمين يدي وتقوليله انج ما تبين حمد.. انتي كبيرة محد يقدر يغصبج وهذا عرس مافيه غصيبه
حصه: (تضحك بمرارة) انتي وين عايشه عفاري ... (تنهدت) باجر بتكبرين وبتعرفين
عفرا: لا قوليلي الحين اريد اعرف الحين
حصه: والله يا عفاري راسي يعورني ومالي بارض
عفرا: مب من شي من الصياح اللي تصيحينه ... ترا الصايح ما يغير شي
حصه: ادري ...
عفرا: على كل يدتي طلعت من البيت وقبل تطلع قالت لي اقولج ان يدتي ام حمد بتي باجر عقب المغرب نزلي سلمي عليها
حصه: ان شاء الله
عفرا: (بتردد) ليش ما تقوليلها انج ما تبين حمد عشان تقوله يغير رايه
حصه: هاهاها عفاري لو طلعت ابوه من القبر وقلت له ما ابغي ولدك ... حمد ما غير رايه .. وعمتي مسكينه يكفيها الويل اللي تشوفه منه
عفرا: انا قلت عمي حمد تغير للاحسن وصار طيب .. بس الظاهر ان ذيل الجلب عمره ما يعتدل
حصه: الله يخليج لا يسمعونج تحت ... هذا الشيخ حمد الحين الكل حاطنه على راسه مب خطب العانس حصه
عفرا: لا عمتي حرام عليج .. لا تقولين عن نفسج جيه
حصه: خليها على الله يا عفاري ... الا بتخبرج ابوج ما تخبر عني
عفرا: هيه سأل عنج
حصه: وشو قلتوله
عفرا: انا قلت له انه هذا ظلم ولا الله ولا رسوله يرضى باللي يصير لج
حصه: وشو قالج
عفرا: سكت ما قال شي
حصه: قالها عبدالله انهم ما يقدرون يقولون شي بعد كلمة ابوي ... بس اللي قاهرني انهم مستانسين ولا حتى متعاطفين معاي
عفرا: وانتي بتستسلمين
حصه: ليش نحن في حرب
عفرا سكتت...
حصه تتنهد..
عفرا: خلاص حمده اختي تحت بس حبيت اسلم عليج وان شاء الله بمر عليج بعدين...بخليج الحين...
وطلعت عفرا ونزلت الصاله تحت تيلس ويا اختها...وفي هالوقت طلعت سمر من حجرتها ونزلت تحت وهي نازله شافت بنات اخوها عفرا وحمده يالسات في الصاله يسولفن ويطالعن التلفزيون..استغربت ان امها محد..على العاده امها وابوها يكونون في الصاله هالوقت متيمعين..
سمر: السلام عليكم..
كلهن: وعليج السلام والرحمه..
عفرا: هاه شو الدراسه وياج؟
سمر: أرف والله..
حمده تبتسم: تدورين على امج صح؟
سمر: هيه..
عفرا: ساروا المزرعه..
سمر: لا والله؟
حمده: هيه ويدتي كانت تبغي تشوفج بس كنتي راقده..تسلم عليج..
عفرا تبتسم..
سمر: اف ليش ما خبروني اروح وياهم...؟
حمده: سمر وين عمتي حصه..
عفرا: مسويه اضراب وحضر دخول لحجرتها وما تبغي تشوف حد ولا ترمس ويا حد...
حمده يتها فكره: اقولكن شرايكن نطلع لها فوق.؟
عفرا: ما بتطيع تفج الباب..
سمر: بنحاول..
عفرا: يالله...
بندن التلفزيون وقفلن باب الصاله بالمفتاح وطلعن فوق...دقن باب الحجره بس محد رمس..
عفرا: عمتي هاي انا عفاري فجي الباب..
حمده: انا وياها..
سمر: وانا بعد..
عفرا تخز سمر بنظره: الحين مستحيل تفج الباب..
سمر: والله مادري شو سويت الحين؟
حمده: اف منج من تدري انج ويانا ما بتفتح انتي ويا نكتج اللي مثل ويهج..
سمر: حرام عليكم...
عفرا: عمتي افتحي الباب..
حصه: شو تبون؟
عفرا: افتحي شوفينا..بذمتج ما ولهتي علينا..؟
بطلت حصه الباب شوي ووايجت براسها: خير.!!
سمر مبتسمه: اختي والله وايد اتولهت عليج..
عفرا تبتسم: بنطول واقفين برا..؟
حمده: انتي كريمه ونحن نستاهل يالله دخلينا عمتي ارجوج..
حصه ابتسمت: حد وياكن؟
سمر: بروحنا..امي وابوي ساروا المزرعه وسلمى وياهم..
حمده بابتسامه عريضه: وقفلنا باب الصاله عشان محد يزعجنا...
عفرا تبتسم: وناخذ راحتنا ونسولف وياج على كيف الكيف..
حمده: مب بس جي...وبعد يينا نسوي بروفات العرس عندج..
حصه تضحك لاول مره ويا بنات اخوها واختها: ماشاء الله عليكن..
فتحت الباب ودخلن كلهن عندها ويلسن على الشبريه والطاوله والكراسي..
حصه: شو كنتن تسون قبل؟
عفرا: ماشي الا رمسه..
حمده: قلنا بنيي نربشج قبل العرس..
سمر: بنرقص؟
حمده: وبندق بعد..!!
عفرا تبتسم: والله؟ محد فينا تعرف تدق...
حمده: اانا اعرف يالله سيرن هاتن لي شي ادق عليه..
حصه: اييه شو تخربطن..مابا دق..عشان يمر ابوكن ويقول ما صدقت اعرس يبت الفرقه قبل العرس..
ضحكن كل البنات..
عفرا: عمتي خلنا نرتبش..
حمده: عمتي الله يخليج اتصلي بليلى...
سمر: هيه اتصلي وقولي لها تييب البقره الصغيره وياها..
عفراتضحك: لو يسمعج عمي عبدالله بيشرحج...
حصه: صبرن بشوفها...
واتصلت حصه بليلى اللي ردت على طول..
ليلى: هلا والله..
حصه: انتي وين؟
ليلى: في البيت..بتطلعين اليوم؟
حصه: تقدرين تيين عندي..؟
ليلى: مب قلتي اليوم ما بتسيرين السوق.؟
حصه: ادري بس تعالي..البنات حشرني يبغنج تيين...
ليلى تضحك: ليش شعندهن..؟
حصه: مادري والله..
سمر تهمس لحصه: قولي لها تييب شيخه..
ليلى: قولي حق سمر ان شيخه مأذتني من الصبح تقول متى بنروح متى بنروح...
حصه: زين هاتيها...وتعالي محد في البيت الا انا والبنات..
ليلى: وين البقيه.؟
حصه: اهلي ساروا المزرعه وخليفه في المكتب وساره في بيتها..
ليلى: وسلمى وعبدالله؟
حصه: سلمى ويا اهلي وعبدالله ويا خليفه..
ليلى: اوكي برمس امي وبيي..
حصه: نترياج...
بندت حصه عن ليلى ولفت عليهن وشافتهن جالبات الحجره فوق تحت..
حصه: شو تسون؟
عفرا: نسوي مساحه عشان الربشه..بنيلس على الارض ما ينفع ندق على الشباري..
حمده: ماشي ندق عليه؟
سمر: الطاوله..
حمده: لاء ابغي شي امسكه..
عفرا تضحك: الزباله..
حمده: والله فكره..
سمر: اخ عليج..
حصه: والله انها نظيفه ما فيها شي بس اعق فيها الاوراق...
ونشت حمده وطلعت الكيس وجلبت السله بدق عليها من ورا...
حصه: الحمدلله والشكر بنات اخوي طقاقات...
حمده: وشو فيها يعني...الطقاقات مالهن رب..الا هن مساكين يدورن لقمة العيش...بس بطريقه مشروعه..
عفرا: الله يالفلسفه..!!
سمر: عفاري دقي حق ربيعتج فطوم وقولي لها تقول حق سلامي تيي..
حمده: وييه فديت هالطاري..فديت سلامي انا..دقي دقي عفاري الله يخليج..
عفرا: زين بدق لهن من الصاله..
حصه:لاء اندوج تلفوني واتصلي بهن..
ودقت عفرا على فاطمه وردت عليها..
فاطمه: هلا والله مليون بالغلا كله..
عفرا: تسلمين تسلمين شكرا..بس مليون قدري؟
فاطمه: خل عنج الطمع..شحالج؟
عفرا: بخير شحالج انتي؟
فاطمه: والله بخير ما خلصت من البروجكت للحين...
حصه: يالله خلصتي رصيدي..
عفرا: عوذ بالله من ابليسج..
فاطمه: عمتج حصه؟
عفرا تبتسم:هيه تقولي اتصلي من عندي والحين محتشره على رصيدها...
فاطمه: احسن خسريها...اليوم مدفوعه باجر ريلها بيطلع لها فاتوره..
عفرا تضحك: هيه وبنسوي لها رنه..ترا ريلها بيدلعها وبيدفع الفواتير..
حصه بنقمه: يالله يالحسد عوذ بالله منكن...
عفرا: انزين فطوم تقدرين تيين انتي وسلامي..؟
فاطمه: ليش؟
عفرا: بس جي محد في البيت ويتنا هفه..
فاطمه: ما بتخليني امي..
عفرا: حاولي كم مره اقولج حاولي..ليش انتي جي تستسلمين بسهوله..؟
فاطمه: ادريبها ما بتوافق لكن بسألها عشانج..لحظات..
وسارت فطوم لامها وعفرا تمت تسولف ويا حصه.
حصه: وين البنت؟
عفرا: سارت تستأذن من امها..
حصه: زين بندي وردي دقي لها خسرتوني..
حمده: ما عليه حموود بيعوضج عن كل فلس..
حصه لاعت جبدها من هالطاري: زين سكتي الله يخليج...
عفرا: الوو.
فاطمه: ما طاعت..
عفرا: قولي والله؟
فاطمه: هيه والله تقول حرمة اخوج تعبانه وايد ولازم اتم في البيت اجابله..
عفرا: سلامتها ما تشوف شر..
فز قلب حمده: فديتها سلامي شو فيها؟
عفرا: تعبانه..
حمده :قولي لها تسلم عليها واني بتصل لها العشا..
فاطمه: ان شاء الله بقولها..
عفرا: ماشاء الله تسمعين حس اختي حمدووه الحشره..؟
فاطمه: هيه والله..يالله عاد ما بخسرج سلمي على اللي عندج..
عفرا: يبلغ ان شاء الله ..في وداعة الله.
فاطمه: باي غناتي...
ما بندت عفرا من عند فاطمه الا وتلفون حصه يرن...
حصه: هاه وصلتي؟
ليلى: ساعه واقفه على الباب قومن فجنه..حسيت بعمري طراره يالله عاد...لا يعفد حد من اخوانج وانا برا...
حصه: من زينج عاد بتذبحينهم..!!
ليلى: ايه بس ودهم يلاقون وحده مثلي...
حصه: يا شين الثقه..عيل لو انتي حصه بنت مبارك شو بتقولين؟
ليلى: بلبس برقع واندس عن الخلق..
حصه تضحك بمصخره: والله ما يطول العنب...
ليلى: حامض عنه يقول..!..قومي بطلي الباب لا ارد البيت يالله..
ونزلت سمر وفتحت باب الصاله وردت تقفله وطلعت ليلى فوق وشافت العفسه عند حصه..
ليلى: شو هاه ليكون غلبتكم الفرقه فقررتوا تسوون الفرقه عائليه..
حمده: شفتي عاد...
عفرا: قال حمد انه ما يروم ييب فرقه تغني بالعرس...مستخسرنها في هالويه...(وتأشر على حصه)
سمر: ونحن انقذنا الموقف وقررنا نسوي فرقه غنائيه عاجله..
حصه بطرف عينها: لو ابى التون جون بييب لي اياه..تفهمن..غصبا عنكن وعنه..
حمده: قصورج بعد التون..
سمر: هيه والله...
عفرا بطرف عينها: ليش تعرفينه انتي..؟
سمر: هيه اللي غنى يوم ماتت ديانا اغنية شمعه في مهب الريح..
حمده تضحك على عفرا: اسميهن القفطات عند عمتي سمر ببلاش...
عفرا: مالت عليكن..عدا ليلى وشويخ الضعيفه...
شيخه نزلت من ايدين ليلى وبدت تشوف شغلها في الحجره وقررت تبدا تستكشف على راحتها...
ويلسن كلهن على الارض وسوالف وارتبشت الحجره بليلى وعفرا اللي سوالفهن ما تنمل..اما حصه فقدرن يطلعنها من جو الاكتئاب اللي دفنت عمرها فيه..
سمر: والحين يا دور النكته..والله بقول نكته...
ليلى تضحك وهي تطالع حصه: بذمتج ما بتولهين عليها؟
حصه تبتسم: كل حد بوله عليه..
حمده: فديتج عمتي والله اني صدق بفتقدج مووت..
عفرا: يالله عاد لا تجلبنها مأساه...!!
سمر: اكره لحظات الوداع..
ليلى تبتسم: منو يحبها اصلا..
ولحظة صمت قصيره قررت حمده تنهيها بطريقتها الخاصه..وبدت تدق على السله اللي عندها...
حمده: سكوووت بنغني وبنرتبش...وبنعيش احلى اللحظات..وبنتوج ليله ولا الف ليله وليله...
عفرا تبتسم:يا سلام..
حمده: يالله بشو نبدا..
حصه تبتسم: سمعينا انتي شعندج..بس لا تسمعينا مآسي..
ليلى: اممم فكرن بأغنيه حلوه...
سمر: مب قبل اقول النكته...
حصه: قولي قلقل الله ضروسج..
سمر تضحك: ما عليه المهم اقول...
ليلى تبتسم: قولي..
سمر: مره واحد سافر بعد الامتحانات بيوم..وقال لربيعه لو انا رسبت في الرياضيات طرش لي مسج وقلي ترا خالد يسلم عليك..ولو رسبت في الكيمياء طرش مسج وقلي ترا حميد يسلم عليك..وهكذا كل ماده بأسم..ويوم طلعت النتايج اتصل الولد على ربيعه وقاله" ترا الشباب كلهم يسلمون عليك"
عفرا تتطنز: هاهاها..
حمده: جديمه..
حصه: قالتها لي مليون مره..
سمر: بقول نكته ثانيه..
ليلى بطرف عينها: مصختيها عاد..
حصه: حسي فيني وجربي...
شيخه: انا بقول انا بقول...
ليلى فجت عيونها: لا ليكون عادتها...؟
حصه تضحك: دواج تستاهلين..الله ما يضرب بعصا..يالله شواخي قولي نكته...
شيخه تضحك: انا بقول نتكه انا بقول..
ليلى ميته ضحك: قولي نتكه اونه نتكه..الحين النكته صارت نتكه..
ومسكت حصه شيخه ويلست تعضضها وتعفصها وتحببها بغت تجتلها...
حمده:هدووووء وانتباااه ورانا عرس...لازم نتدرب من الحين..
ليلى كانت ميته ضحك عليهن وحمده ما سكتت من الصبح تبغي تغني ومحد معبرنها..
عفرا: اييه عبرن اختي شوي من الصبح تباغم خلنها تعبر عن رايها..
حمده: الحمدلله حد عطاني مساحه ارمس..
حصه: قولي يا رئيسة الفرقه شعندج؟
حمده: بغني..خاطري ارتبش يالله..هالفرصه ما بتتعوض...خلونا ندق..
ليلى: شو نغني..؟
عفرا:انا بختار اول..بس خلني افكر...
حمده: خاطري بشي مصري..
عفرا: شو مصري انتي الثانيه خلنا في الخليجي اول..
سمر: هيه والله مصري مصري ابى مصري...
ليلى: خليجي يعني خليجي...
حصه: خليجنا واحد..
حمده: اوف منكن يالله عاد عطني اغنيه...
حصه: انتي دقي وغني ونحن وراج..
ليلى تبتسم وتطالع حصه: حمده انا ابا اختار اغنيه واهديها حق حصوووه...
حصه تطالعها بطرف عينها: شو هي؟
ليلى تبتسم: بتسمعينها الحين..حمدووه تعرفين اغنية العالم الله...
حمده: مال رباب؟
ليلى بفرح: هيه..
حمده: يالله نبدا..
ومسكت حمده السله تدق عليها من ورا وبدت تغني وحصه تسمع شو كلمات الاغنيه..
"العالم الله بكره وش يخفي لنا العالم الله بكره فرحه او شقى..نحلم ببكره ولا نلقى سوا المكتوب..بكره فرقا او لقى من يدري يالمحبوب...اللحظه هذي ملكنا وما سواها قلوب...العالم الله العالم الله...خوفي نتواعد وانا اوفي وتخلف الازمان...تذبل بصدري حروفي ما لقت عنوان..واصرخ باسمك حبيبى والقمر ما يبان...( وتأشر ليلى لحصه تنتبه لهالمقطع)...ناظرني بعيونك حبيبى لا يضيع الوقت..لا تكتم احساسك لا يضيع الوقت..الندم قاسي حبيبي واللي اقسى الصمت...العالم الله...
ودقت حمده دقه اخيره: يالله يكفي حزن عطني شي سعيد يفرفش..
حصه تهمس لليلى: شو هالاغنيه الكئيبه..
ليلى تهمس لها بعيد عن البنات: الندم قاسي واللي اقسى الصمت..يعني عيشي حياتج بدون ندم..ويا ويهج..
حصه: زين يا فيلسووفه..
حمده: منو بيختار..؟
حصه: انا....اريد اغنية هند ابشرك...واهديها حق ليلى...
عفرا: الله اتخبل عليها..
ليلى: يا سلام انا تعور قلبي ماباها..
سمر: انا بنش العب ويا شيخه يوم بتغنن مصري ازقرني..
ليلى تضحك: زين بس لا تخليها تقطع اوراق حصه ما فينا تذبحنا..
كانت شيخه وسمر يلونن ويرسمن والباقي مرتبشين..
حمده تدق وعفرا تغني بصوت يجنن: ابشرك...ابشرك..قلبي نساك ابشرك..دنيا الهوى كل على حاله امير..خلك مع اللي بالمحبه غيرك..وانا لي الله عالم بحالي وخبير...غدرت باللي هام فيك وقدرك...ماعاد في الدنيا ولا الايام خير..اشوف قلبك بالوفا ما نورك..ماصعب على الدنيا مثل موت الضمير..ياما وياما في وعوده سهرك..كل الذي قاله ولا واحد يصير....
عفرا: بس ماعرف اكمل دورن شي ثاني..ياخي شو هالمأساه دورن شي يربش..
ليلى: اقولكن قومن صلن ابرك من هاليلسه وبنرد انكمل..اظني اذن المغرب ونحن في الدق والخرابيط...
ونشن بيصلن كلهن عقب ما يلسن وارتبشن لين ما قالن بس وكله عشان خاطر حصه وعشان نفسيتها الزفت هاليومين....
........................
وصل فهد الخبر وان قوم مبارك بن احمد رفضوهم لان ولد عم البنت رفض وما رخصها...كان وايد مستخف ويضحك على عمره..هذي ثاني مره تخيب اماله..والظاهر ماله نصيب في العرس ولا في البنات...واللي وصل لتفكيره انه ما بيعرس لو شو مايصير...خلاص مل ولاعت جبده..حب عايشه بنت خاله شكثر...كانت اول من دق لها قلبه واول من فكر فيها...للحين بعده يشوف ان حبه لها صح..رغم ان الكل كان يضحك عليه..ما يدري ان الحب مافيه كبير ولا صغير...والحب يوم بيي حد ما يقوله تراني ييت...الا ما يحس بعمره الا في عالم الحب والاشواق والتفكير والروح المعلقه اللي لاهي بين ارض ولا سما...كان احباط فهد عنيف في نفسه...البنت اللي حبها ما قدر لها...والبنت اللي خطبها خطبه تقليديه من اهلها بدون حب ولا مقدمات..خسرها هي الثانيه وما رخصها ولد عمها...
ام ناصر: فهد خلاص يا ولدي ان شاء الله بدور لك احسن عنها..
فهد : خلاص يا امايه اللي صار صار شعلينا هاي الدنيا مالنا في اللي نبغيه نصيب..
ناصر: خل عنك الحنه...مافي شي اسمه مالنا نصيب..دور وبتلاقي يا كثرهن البنات مازرات البيوت..
فهد يتنهد...
ام ناصر: بسك عاد يالله ما كان من حظها بنت مبارك تضويها...
فهد: من حظي ولا حظها برايها راحت والله يعوض..
ناصر: خلاص بندور لك حرمه على كيفنا..
فهد: زين بتبطي ما تلاقي وحده سنعه...
ناصر: لحوول اشفيك منحس..؟
ام ناصر: انا بخطب لك وحده احسن من بنت مبارك واصغر منها وتناسبك بعد..
ناصر: حمد منحس ما حصل يخطبها الا الحين..؟
ام ناصر: هو محيرنها من وهم صغار يوم درا بها بتطير منه خطبها..
فهد يضحك على عمره: الله يعيني على حقدك يا حمد..
ناصر: ليش؟
ام ناصر: شسويت به؟
فهد يتمصخر:هالخطبه اجبرته يتخلى عن عزوبيته..لازم اروح اتعذر من الريال...
ام ناصر: لا تعذر ولاشي..هالريال بطران..محير بنت عمه من كم سنه والحين بس يوم الناس بغتها ذكرها وذكر انه يبغي يعرس بها..
ناصر: حسد..
فهد: بسكم عاد ملينا من هالسيره..وين ابوي؟
ناصر انقبض شكله..
ام ناصر: عند خوانك في بيته الثاني...
فهد: هاه ما شفناه تحرك ولا رفع قضيه شكلها الامور هدت..
ام ناصر: اسكت حسبي الله على ابليسك بتذكره وهو ناسي..
ناصر بقهر: انا ما قلت لكم شي..
ام ناصر: شو؟
فهد: هاه لا تقول تنازل؟
ناصر يطلع الورقه من بوكه: شوف يا فهد..
قرا فهد الورقه وتغير شكله..وبينت الصدمه عليه..وام ناصر مبهته ماتدري شو السالفه..
ام ناصر: شعندكم؟
فهد: مستحيل...ماقدر اصدق؟
ناصر: الا صدق..ليش ما تصدق..وشوف توقيع القاضي تحت..وختم المحكمه..
ام ناصر وقلبها يدق بسرعه: شسالفتكم؟
ناصر: خبر امك خبرها..
فهد يبتسم: لاء قول لها انت..انا كنت واثق من البدايه..انتوا راعين العنيه..
ام ناصر بضيج: شو السالفه ارمسوا؟
ناصر خبر امه بكل شي وما حست الا بدموعها بحر وما قدرت ترمس ولا تقول شي...
فهد:دموع الفرح ولا الهزيمه؟
ناصر يتنهد..
فهد حس في اخوه: يالله عاد هونوها وتهون...(وبصوت واطي) حليلج يا ليلى...
ام ناصر: فديتها والله..
كلهم عرفوا محد انظلم في هالسالفه كثر ليلى ومحد انبخس حقه غيرها..نسوا ناصر وجرحه والمه وضيجه وكبرياءه اللي انطعن وهو يطيع ابوه في معصيه...وظلم للناس...
فهد: وين حرمتك يا ناصر؟
ناصر بضيج: في بيت اهلها...
ام ناصر تشهق: للحين ما يبتها؟
ناصر: لاء..
ام ناصر: عيب عليك..بتكمل حرمتك اسبوعين ما شفتها..شو من مذهب عندك.؟
ناصر: هاي حرمتكم ولا انا مايخصني فيها..اللي علي سويته وعرست بها مثل ما تبون وانتوا تحملوا ذنوبي وذنوبها..
ام ناصر بحزن: يا ناصر خاف الله في نفسك وفي حرمتك..هي مالها ذنب في اللي انت فيه..وانت ما بتقاوي اللي اقوى منك...
فهد: حرام عليك يا ناصر..اروى ما يخصها في شي لاتظلمها وتظلم نفسك...وتظلم عيالك بعدين.
ناصر: مافي عيال مابغي عيال منها..خلاص انا من عقب ليلى مابغي شي من هالدنيا...
فهد: ليلى راحت وانت ما قدرت لها ولا صار لك نصيب..لا تعارض اقدارك وخلك واقعي..بنت الناس راحت في سبيل حالها..
ناصر بحزن فضيع: خسرناهم يا فهد كلهم...
ام ناصر دمعت..
فهد: الله المعوض يا ناصر...مالنا بد منهم..هذيل لحمنها ودمنا...والانسان ما ياكل جتفه..
ناصر: كنا بنسويها..
فهد يبتسم: راشد اصيل والله..
ناصر يتنهد....
فهد: يالله عاد..ما وصيك على اروى حاول تبدا حياتك اليديده وياها وتنسى الماضي...ترا الله بيحاسبك عليها..
ناصر سكت..
ام ناصر: عوض نفسك يا ولدي اللي ما قدرت له..
فهد: هيه والله..من ترك شيئا لله عوضه الله خيرا منه..
ام ناصر: ربك بعد يمكن تحب اروى اكثر من غيرها...
ناصر يبتسم بسخريه: ماظني..
فهد: حاول تبدا مع اروى من اول ويديد...علىالاقل لو ما بتحبها احترمها والاحترام بيولد من بينكم العاطفه..
ناصر ينش: على الله..
ام ناصر: وين رايح فديتك؟
ناصر يمشي دون ما يشوفهم: بسير اييبها من بيت اهلها...
....................
في صالة البيت الرئيسيه يلس ويا بناته وخواته بروحهم....الساعه كانت تقريبا 10:00 الليل عقب ما تعشوا..وباجر الخميس والكل بيكون مأجز..حصه هالمره قررت تنهي عزلتها وتنزل تيلس وياهم في الصاله..بس ما كان قصدها تيلس ويا خليفه وعبدالله او ابوها وامها..الموضوع باللي فيه كان انها تيلس وتغير حكرة حجرتها وتنزل ويا البنات اللي ترجنها للموت انها تنزل تشوف التلفزيون وياهن...
شافت حصه خليفه وسلمت عليه ويلست بس كانت وايد هاديه وما كان بادي عليها أي زعل او ضيج من اخوها..لدرجة انهم يلسوا يسولفون عادي بدون أي حساسيات من موضوع العرس..
العرس اللي حصه تحاول تتجنب الحديث فيه وياهم قد ما تقدر..بس لين متى..؟ وكم بتصبر وهي تعاني بصمت؟؟
كان قرارها الاخير انها ترد عاديه ويا اهل البيت اللي ظلموها وفي الاخير تعرف ان مالها غيرهم ومالهم غيرها...
خليفه: حيالله بالقاطعه...
حصه مبتسمه: شسوي بعد..؟ زعلت تحريت حد بيهتم..يوم كثر الطاف نزلت..
خليفه يضحك: ما عاش اللي يزعلج يا حصه...
حصه: لا تدعي على اللي زعلني..لان بعدني احبهم واباهم يعيشون..ما يهونون علي..
خليفه عوره قلبه عليها..
عفرا: فديت ابويه من متى ما يلس ويانا...
حمده: هيه والله..
حصه: عاد كله بصوب وهالبزايه بصوب ثاني..كل حياتج وله على ابوج..جنه محد عنده ابو الا انتي..
عفرا: ليش منقهرين مني..
خليفه يضحك: شخيتكم عفرا شيختكم...
عفرا تنش وتيلس عنده وتلوي عليه: فديته والله..
حصه تعض على شفايفها: اخ يالقهر...
خليفه يضحك: شعليكم منها...؟
سمر: حليلها حمدوه ما تقول شي..
حصه بطرف عينها: مؤدبه ما تحط راسها براس اللي اكبر منها..
حمده: فديتني شو بسوي بعد..خلاص مكتوب الشقا ليه مع من عشت وياهم..
خليفه: فديتج يا حمدووه انتي اصلا اللي محد مثلج..
حصه: يالله يالله...خليفه بياع رمسه ويا بناتك..اللي يسمع يقول مادري بنات منو؟
سمر: حليلنا...
حصه: عفاري شو مسويه في الجامعه؟
عفرا: شو بنسوي بعد..دراسه وكراف...
حصه: وربيعتج شحالها؟
عفرا مبتسمه: كويسه...
حمده: يختي عليها...
سمر: انا يعيبوني المصاروه وايد...
خليفه: تراج مسمايه على وحده مصريه كانت ربيعة امي قبل...
سمر تشهق: والله؟
حصه: صدق خليفه..؟؟
خليفه: هيه..
حمده تضحك: حليلج...
عفرا: فديتني اسمي حلو الحمدلله ما كان بايخ..
خليفه: انتي كل شي لايق عليج..اللي مب حلو بيطلع حلو عليج...
حصه: بس بس عاد لوعتونا...باجر يوم تعرس عفرا شو بتسوي انت؟
خليفه: فديتها بنتي...ما بخليها تعرس ما روم اصبر بدونها..
عفرا تبتسم..
حمده: عيل بتم عانس عشان ابوها ما يصبر عنها..
سمر: وباجر بتكتب في رأسين للحلال مال المجلات..بنت اماراتيه عمرها 40 سنه تبغي تعرس بأي ريال وما يهم الشكل المهم تنقذوني من العنوسه..
حمده تضحك: ولا بتكتب في مشكلتك لها حل انا ابغي اعرس بس ابويه يحبني ويوله علي فما خلاني اعرس..
حصه تضحك: لا اقولكم بتشترك في برنامج ع الهوا سوا...واتخيلها وهي تتمايل بدلع عاد ما يلوق عليها وهي عيوز..انا ابغي ريلي وسيم ويدلعني ويشبه ابوي ويشتري لي كتب وايد..واكمل دراستي في أي كوكب ثاني..واهم شي اهم شي في ريلي انه يدلعني هذا اهم شي..
عفرا محرجه: تصدقن انكن سخيفات...
خليفه: عفرا بيوونها الخطاطيب من كل صوب ولا بنوافق الا على اللي يناسبها وتناسبه..بنتي ما يلوق لها أي حد..وبخليها تختار وتتنقى من بين فرسانها..
عفرا بخقه: وييه فديت ام يابتك يا خليفه ولد مبارك يا اغلى ابو في العالم...
حصه تبتسم وقررت تفتح الموضوع: خليفه....
خليفه: يا عونج!!!
حصه: عانك الله..تعرف ليلى بنت خالي ناصر...
خليفه مبتسم: هيه شو فيها؟
وتركزت كل الانظار على حصه...
حصه: قالت لي ان اخوها بيي يرمسك في عفرا يبغيها لولده حمدان....
هني قلب عفرا انتفض..حستبه يدق يدق يدق..ما خفت دقاته وتزيد بعنف...كانت تتمنى مليون مره محد يصد صوبها ويشوف شعلة الخجل في ويهها..ولا عذاب الشوق في نظراتها..تحس بعمرها ارتبكت وايد مب شوي..لدرجة انها تحس بحرارتها تزيد...
خليفه يلف على عفرا مبتسم...
حصه: شفيكم؟
خليفه: صدق؟ ولا من سوالفج اللي ما تخلص؟
حصه بجديه: والله العظيم...
خليفه: شو قالت؟
حصه: قالت ان حمدان يبغي عفاري ورمست هي راشد وهو قال ان شاء الله خير وبيرمسك قريب...
خليفه مبتسم ويمسح على راس عفرا: قولي له ماله داعي يي لانه ما يهون علي ارده...
عفرا انفجعت بس ما رمست تتريا شو بيقولون...وحمده تمت مبهته...
حصه مصدومه: افا ليش؟
خليفه بجديه بس للحين ما اختفت ابتسامته: عفاري ما بياخذها الا سعود ولد عمتها شمسه...
حصه مستغربه: والله؟
عفرا نشت معصبه وطالعتهم كلهم بغضب..والكل انتبه لها واستغربوا منها...
خليفه: عفرا؟
عفرا بعصبيه: ايوه خلاص..كل شي تخططون له وتقررونه.. من متى ونحن نقول ونسوي عشان عمتي تعطونها حق من حقوق الله شرعه لها...واخرتها انسانه بهالعمر اهلها للحين يتحكمون بقرارتها ويقررون عنها ويغصبونها على العرس..أي شريعه واي دين اللي يلزمنا بهالشي..والله لا الله ولا رسوله يرضون باللي يصير..
خليفه نش: عفرا...!!!
عفرا انفجرت ما قدرت تتحمل وطلعت وهي تصيح خلاص طفح الكيل..من متى وهي تحاول في خليفه يقنع يدها يلغون عرس حصه بس بدون فايده..كم كثر كلمته وحاولت وياه وخبرته عن حال عمتها ولكنه كان يسكت وما يرد...يعرف انه للحين ما انخلق اللي يحط كلمة بو خليفه الارض...
حصه مصدومه: شو فيها عفاري؟
خليفه سكت ماعرف شو يقول...
حمده تنش: بسير لها...
حصه سكتت ماتكلمت ولا قالت شي..هالموقف هي حاسه فيه وحاسه في عفرا..ياااه يالقهر اللي حسبته وهي تنغصب على شخص تحبه العمر كله وتترياه..ويوم هو بغاها عافته..
موقف عفرا اليوم مب مشابه لها..ولكن الشبه في طريقة العرس وفي طريقة الاجبار...حتى انت يا خليفه...حتى انت المتعلم والمثقف تسوي جي..حتى انت اللي بنقول بتكون سندنا لا ضاقت الدنيا وكشرت سود الايام..توقف ضدنا وبعدك مصر على رايك واشياء اندثرت من ملايين السنين...ليش يا خليفه ليش.؟
وحصه تفكر شافت خليفه ينش ويطلع عنهن...وسمر قامت تيلس عند حصه اللي كانت غارقه بعالمها...
سمر: ليش عصبت عفرا؟
حصه انتبهت: هاه؟
سمر: ليش عصبت عفرا؟
حصه تنش: ماريد روحي سأليها...
وطلعت حصه فوق..ما تدري هل هي سوت الشي الصح ولا لاء..هل هي غلطة يوم قالت لخليفه ان حمدان يبغي ياخذ بنته...بعدين شو فيه حمدان..؟ ولد حبوب ومزيون وريال قبل كل شي يعتمد عليه ويعرف في شغله وما شاء الله اسمه في السوق بدا يطلع ونجمه بدا يبزغ...ليش يرفضه؟؟ كل هاه عشان سعود يبغي عفرا وايتمناها من يوم صغار...؟؟ تنهدت وهي تتخيل ابوها يعرف بالموضوع..وعرفت سلفا انه لا مجال للمناقشه في الموضوع وان بو خليفه لو يدري بالسالفه على طول بيعصب وبيحرج على خليفه..وبيقوله اكيد ما فيها نقاش دام ولد عمتها بغاها اولى من الغريب...وان رخصها سعود فهي من نصيب حمدان..وان رفض فهي من نصيبه..وتدري ان ابوها ما بيخلي خليفه يشاور بنته رضى ولا ما رضى..ولا حتى مهما كانت غلاة عفرا عنده.....
.
.
في الجهه الثانيه وفي فلة خليفه دخل الصاله اللي في الطابق الثاني وسمع عفرا تصيح وتقطع قلبه..وحمده عندها تهديها وما دخل بس تم يسمع شو بتقول وشو بترد عليها..
حمده: وانتي ليش حارقه اعصابج خلج كووول للحين ما صار شي..
عفرا بعصبيه وهي تصيح: شو ما صار شي..نحن وين عايشين الناس وصلت المريخ ونحن للحين على اشياء باليه عفا عليها الزمن...شو ما صار شي وانا اشوف يدي يظلم عمتي وابوي يسوي مثله..وتقولين للحين ما صار شي؟؟ حمده انتي تتكلمين بأي منطق؟
حمده تهديها: زين حبيبتي انتي قولي لابوي مابغيه ماريده..مب كيفكم..
عفرا تتمصخر: مابغيه ماريده....انا من بيسمع لي اصلا...اذا عمتي بتصك الثلاثين ومشى رايهم عليها غصب طيب وما بقى شي وبيزفونها على واحد ما تبغيه..كيف تبيني انا ارمس..لا وجدام يدي بعد...
حمده: ماعليج من يدي..رمسي ابوي..تدرين محد يسواج عنده..صدقيني بكم كلمه بتغيرين رايه..
عفرا: لا رايه ولا راي غيره ...اذا حطوا شي في بالهم ما بيصير الا هو...
حمده: وبتزوجين سعود الدب...
عفرا: والله ماتزوجه....لو اموت ما تزوجه..
حمده: وان غصبوج؟
عفرا: والله بسوي شي محد سواه...بنتحر..
حمده تشهق: تخبلتي...!!
عفرا: مب انتحر الانتحار الصدقي..يا غبيه اقصد يمكن تييني جلطه من الصدمه..
حمده: بسم الله عليج...لا صدق لو غصبج ابوي ومافي مفر من الموضوع شو بتسوين؟
عفرا بثقه وهي تمسح دموعها:ما عليج والله يا اخليهم يعرفون جيمتي...خلني اخلص هالشهر في الجامعه واشوف وضع السالفه في البيت..بتصل بعمي عبدالله وبخبره كل شي وبخليه يحول اوراقي جامعة زايد بدبي وبعيش عنده هناك..
حمده فاجه ثمها: هاه؟ وبتخلينا هني لمنو؟ بتتخلين عن منصبج في قلب ابوي..
عفرا ردت تصيح: هو تخلى عني يوم يبغي يسوي اللي في راسه ويسوقني للي يبغي ولا جني بنته ولا حبيبته..
كسرت عفرا خاطر حمده..اللي تمت ساعه تهدي فيها..وخليفه ما ستحمل دموع عفرا ودخل على طول وحمده نشت...
خليفه: خلينا بروحنا حمدوه..
حمده: ان شاء الله..
وطلعت حمده وصكت الباب...ويلس خليفه حذال عفرا وهي تصيح..ومسح على شعرها..
خليفه بحنان: عفاري...
ما ردت عليه ومسحت دموعها ولفت ويهها الصوب الثاني..
خليفه: يهون عليج تلفين ويهج عن ابوج؟
بس عفرا استمرت في الصمت...
خليفه:انزين خلنا نتفاهم...قولي لي شو بخاطرج...
عفرا انقهرت منه وما ردت وما عطته فرصه يكمل كلامه وهو تم يحاول وياها...بس هي ولا نطقت بحرف واحد..وتمت مغيضه عليه وخلته يرمس لين ما قال بس وكان جوابها الوحيد هو السكوت...
يئس منها خليفه ونش..
خليفه: انا بتفاهم وياج يوم تهدين...
وطلع عنها وهي نشت على طول وصكت الباب..هاللي كان ناقصنها..يوون يحطونها في موقف عمتها حصه..الحين بس يا عمتي حسيت باللي تحسين به..الحين بس حسيت كيف انتي محترقه يوم انج تنغصبين على شي ما تبينه..الحين بس حسيت يوم تنحرمين من ابسط حق من حقوقج..وعرفت شو يعني شعورج يوم تفضلين العزله على مجابل حد ظلمج..الحين بس عرفت شو يعني الظلم واحساسه...شو هالعالم ومن يحسبون اعمارهم وبأي حق يتصرفون ويحطون قوانين لحياتنا..ونحن حياتنا شرعها الله ورسوله...من قالهم ان قوانينهم افضل من اللي اختاره الله...؟؟
شو بنسوي..وشو ذنبنا..خلاص يعني بنات نتحمل ما يانا..والله ما بقدر اقول شي غير حسبي الله ونعم الوكيل هو عالم بي وهو بينصفني..
.................

بعيد عن العالم المشحون بالألم، المتلبد بالحزن..وفي جو اقرب ما يكون الى تقارب روحين وقلبين اجتمعا على الهم في بوتقة واحده...للحظه اجتمعت فيها القلوب لتتشاكى والنفوس لتبث همومها..متناسية بذلك فرق العمر والطبقات والمسافات الزمنيه...بين قلبين تشاركا الهم..واحد منهم ادركه والثاني لا زال قيد الغموض..
كانوا يالسين على دري الصاله اللي برا بشكل اقرب ما يكون للوحه فنيه..هو يالس على يمين الدري وهي يالسه حذاله ريولها ملتصقه فيه و ايده في شعرها تلاعب خصلاته..كانت مستسلمه له بصمت وحنان وحب لا يمكن لقوى الكون كلها وصفه..وفي مشهد اقرب ما يعطي طابع انساني اكثر من كونه عاطفي..كانت تسمعه وهي ساكته لاول مره ما تقاطع حد في حديثه ولاول مره تتكلم بطلاقه وبحزن..كانت تتكلم عن الرحيل وهي ما تعرفه وعن الموت وهي بس تتخيل شو هو..وتتكلم عن الارواح اللي راحت وهي للحين ما تدرك من هي ولا كيف تعيش..وهو كان مستمتع لسوالفها وبنفس الوقت ما كان مقصر في انه يحكي لها عن حبه الاول والاخير ويخبرها عن اغلى شي بحياته وهي تستمع له بكل اصغاء..
عبدالله: كنت وايد احبها بس راحت..
شيخه: خلاث ما بترجع مله ثانيه..؟
عبدالله يتنهد: خلاص ما بترجع..
شيخه ببراءه: هي لاحت عند ابويه ثيف؟
عبدالله يبتسم ويمسح على شعرها: هيه راحت عند سيف..وسعاد!!!
شيخه عقدت حياتها: من ثعاد؟
عبدالله يبتسم: محد...
شيخه سكتت ويلست تلعب في لحيته..
عبدالله: تعرفين شواخي...كنت وايد احبها...هي اول وحده في العالم حبيتها واخر وحده ممكن احبها..ماظني بتيي يوم من الايام حرمه تاخذ مكانها..ولا ظني قلبي قادر يحب مره ثانيه...اول مره يحب قلبي كانت هي اختياره الاول..واول مره ينشغل بالي في حد كان فيها أول شي...بدريه يا شيخه راحت..راحت ومستحيل ترد..وهي اللي وعدتني ماتخلى عني...بس راحت غصبا عني وعنها...(ويتنهد ويحاول قد ما يقدر يمسك دموعه) راحت فجأه حتى الوداع ما ودعتني...ليتني يا شيخه اللي مت بدالها وصاحتني وما شفت فيها يوم اسود...
شيخه اللي مب فاهمه شي: ما بترجع؟
عبدالله بحزن فضيع: مستحيل...
شيخه وهي تطلع فوق ريوله عشان تيلس عليهن: عبدالله عبدالله..
عبدالله: عيون عبدالله قلبه..يا انفاسه انتي..
شيخه: ابويه راح عند الله..
عبدالله: حتى هي راحت عند الله..هناك بعيد خلاص ما بترجع يا شيخه..ما بترجع..!!
شيخه: منو وداها؟
عبدالله: الله خذها ...خلاص خلص وقتها هني ولازم ترجع للي عطاني اياها...
شيخه:...........
عبدالله: ادري ما بتفهمين شي..(يلوي عليها بقو) فديتج..
شيخه تتعلق فيه اكثر: اتي حبيبتي...حناتي...(غناتي)
عبدالله يبتسم: احم..لا تتعدين على حقوق الغير..
شيخه تبادله الابتسامه: نلوح الدمعيه..؟
عبدالله: لاء..
شيخه مدت بوزها: ليششششش؟
عبدالله يضحك: بس كيفي شششرير..
شيخه تضحك: عبدالله...
عبدالله: هاه عيون عبدالله..بس دخيلج لا تزقرين اسمي..اخاف قلبي يوقف من الوناسه...
شيخه: انتوا عندكم وحششششش؟؟
عبدالله: عوذ بالله من هالفال..!! وحشششش ششششو هذا؟
شيخه ميته ضحك وتعدل يلستها فوقه: انا ما لحت المدرسه..
عبدالله: احسن بعد (ويطالع بعيد) خلج هني وياي خلاص يا شيخه ماروم اصبر عنج..
شيخه: تعالي بيتنا هناك عندنا بيت كبير وامي عندها العاب كثثثيره..!!
عبدالله: لا يا شششيخه...ليكون بس تبيني العب وياج..؟
شيخه تبتسم..وقبل تتكلم او هو ينطق كانت ام خليفه تشوف ولدها من جامة الصاله وقلبها يتفطر عليه..ما تدري شو تسوي ولا شو تقول..وشلت عمرها وتوكلت على الله..وطلعت..
عبدالله: مرحبا السااع..يلسي فديتج..
ام خليفه بحنان: لا فديتك انا بسير داخل الدنيا حر برا كيف تصبر انت..
عبدالله مبتسم ويلوي على شيخه: وهذي عندي ما حس لا بحر ولا ببرد..
ام خليفه تبتسم: تحبها يا عبدالله؟
عبدالله: لا تتخبرين يا امايه...
ام خليفه مبتسمه: الله يسهل لك اللي فيه الخير...
عبدالله بحزن عميق: ليتها بنتي من بدريه يا امايه ليت...
ام خليفه تقطع فوادها: فديتك يا عبدالله خل ايمانك بالله قوي...
شيخه: اتي من اثمث...
عبدالله ضحك رغم انه ما يبغي يضحك: اسمها يدووه عايشه..قولي يدوه عايشه..
شيخه تبتسم: يدووه عايشششششه..
تضحك ام خليفه: وييه فديتها..ما خلت من امها شي..الله يرحمها كانت حرمه ماشي منها في الحريم..
عبدالله لاوي على شيخه ومغمض عيونه ويهتز بها: فديتها انا فديتها هالبنت..
ام خليفه: خلاص خذت فوادك هالبنت..بس زين تسوي ..
عبدالله يبتسم: ليش؟
ام خليفه بحنان: خلتك تيلس عندي في بوظبي ليل نهار...
عبدالله: خلاص بتم عندكم..
ام خليفه: مب عشانا ادريبك عشان شيخه ولا نحن ما تيينا غير بالشهر مره..
عبدالله يضحك:انا الحين ما ارقد بالليل واتريا متى يي اليوم الثاني وتطلع حصه السوق وعمتها تييبهاهني..عشقت بوظبي والسبه هالبنت..
ام خليفه: ويوم انك هالكثر متعلق في البنيه وتروح دبي والعصر ترد بوظبي عشانها..خذ عمتها وشل الثنتين وياك دبي..
لف عبدالله عن امه..ما انصدم ولا بين على ويهه أي اعتراض..ليش لاء...شو اللي بيمنعه...صح يحب بدريه للحين وما يصبر عنها..بس شيخه صارت له الهوا والروح ان غابت غابن الثنتين ورد عبدالله ميت مثل قبل يوم خلته بدريه....
.......................
باقي اسبوع عن عرس حصه اللي قررت انها ما تاخذ ملابس واشياء وايده وانها بعد العرس تقدر تاخذ اللي تباه ... وكالعادة كات تروح السوق ويا ليلى اللي امها توسطت عند عمتها غالية عشان اتيي تروح وياها السوق تخلص زهابها ... وكانت تخلي شيخه عند البنات وسمر في بيت قوم حصه ... وتطلع هيه وسلمى ومرات تروح وياهن وحده من بنات خليفه ... الخيام من اول اسبوع بدوا ينصبونها جدام البيت وهالشي حسس حصه انه زواجها من حمد صار واقع لازم ترضخ له ... بس بالنسبة لها كان واقع مر ... الليلة اللي حلمت بها طول عمرها... وكم دعت ربها انه يقرب لها هاليوم ... بعد ما وصل هاليوم صارت رافضة لحمد وتكره حتى طاريه ... في الليل بعد ما ردن من السوق وراحت ليلى بيتهم ... دخل حمد بيت عمه بيسلم على عمته بس حصل حصه بروحها في الصاله ترتب بطاقات العرس ومنو بيعزمون ... فرفع حياته وهو يشوفها

حمد: احم احم ...السلام عليكم
حصه اللي فرت البطايق من ايدها وفزت من مكانها يوم شافته: حمد....!!!! (عقدت حياتها) ليش ما دقيت الباب قبل لا تدش؟؟؟
حمد: الباب مفتوح ...
حصه: زين خير شو تريد الحين؟؟
حمد: هاهاها جيه وحده ترحب بخطيبها واللي بعد اسبوعين بيصير ريلها...؟؟
حصه: قلتها بعد اسبوع بيصير الحين لا...
حمد: وشو باقي عن الاسبوع؟؟
حصه: شدراك شو بيصير في هالاسبوع يمكن اموت ... او يمكن انت تموت ربك بعد..
حمد بعد ما ركز عيونه بعيون حصه وهو يطالعها : تتمنين اني اموت يا حصه قبل لا اخذج؟؟
سكتت حصه ما ردت عليه وهيه تدور داخلها قوتها وكل حقدها وكرها له عشان تقوله هيه ... بس في الاخير مهما بلغ مقدار كرها له ما تقدر تتمناله الموت مهما يكون هذا ولد عمها وهي عمرها ما تمنت موت حد ويوم طول صمتها رد سئلها حمد نفس السؤال
حمد: هاه يا حصه ما قلتي تتمنين اموت ولا اخذج
حصه وهي تحاول تتهرب من الاجابه وتلعب بالبطايق: ما قلت شو يايبنك هالحزة بيتنا
حمد: بعد ما جاوبين السؤال برد عليج
حصه ردت تطالع في عيونه: وانا ما اريد اجاوب على هالسؤال
حمد: ليش تخافين تصدميني بالاجابه او تصدمين نفسج
حصه: بلا فلسفه زايده حمد ... هالدور ما يناسبك ... شو تريد
حمد: ياي اشوف عمتي
حصه: امي في بيت خليفه ... روح شوفها هناك
حمد: خلاص بترياها هنيه
حصه: عيب ما يصير تقعد وياي الحين
حمد: ليش بعدج بنت عمي
حصه: كيفك ((كانت يايه بتنش بتروح فوق))
حمد: حصه ما قلتيلي وين تبين نسكن في شقتي ولا في بيت امي
حصه: افضل اسكن جهنم ولا اسكن وياك
حمد ببرود: ماعليه خلي جهنم حق بعدين ... انا اسألج وين تبين الحين بعد اسبوعين يوم بتصيرين حرمتي
حصه: حمد ليش وانت تدري اني اكرهك
حمد: انتي اللي اجبرتيني
حصه: انا ما اجبرتك
حمد: مرة ثانيه لا تحاولين تتحدين سلطة حمد او تحاولين تهمشين دوره في حياتج
حصه: تعلمت الدرس ... ممكن ننهي هالموضوع
حمد: للاسف لا ... العالم كلها عرفت ان العرس بعد اسبوعين
حصه: يعني ماشي فايده
حمد: لا
حصه: حمد ما اقدر اتحملك ... كيف ترضى تزوج وحده ما تحترمك وتبغضك مثلي
حمد بقصد جرحها وتعذيبها: مب مهم ... اللي احبها راحت وما قدرت عليها مثل ما قلتي ...انتي اللي اروم عليج... وشدراج يمكن شعور متبادل ...

انصدمت حصه من رد حمد بالرغم من كل الجفا والكره اللي تحمله له في اعماقها ما كانت تدري انه هالكلمتين بيجرحنها هالكثر ... عمره ما حبها ولا بيحبها .. لان اللي يحبها من وجهة نظره راحت ... وهي وحده ضعيفه جدامه لا حول لها ولا قوة ... مشت صوب الدري بتروح فوق ... بس وقفها

حمد: ما جاوبتي للحين وين تبين تسكنين
حصه: اذا كان ولا بد من هالشي ... افضل اسكن عند عمتي
حمد يبتسم بلؤم: خلاص باجر بكلم مهندسة الديكور تعيد تأثيث الشقة لاني اريد اسكن الشقة
حصه بعصبية لانها ما قدرت تسيطر على نفسها اكثر: تدري انك اسخف واحد شفته في حياتي... ويوم حظرتك تريد الشقه ليش تسألني؟؟
حمد ببرود: بس عشان اسوي الشي اللي ما تريدينه
اطالعته حصه من تحت لفوق بنص عين وراحت عنه فوق وهي تغلي من داخل ... هالحمد ناوي يجلب حياتها جحيم حتى لو قررت تتقبله ... الظاهر انه مب ناوي يسهل عليها الموضوع ... كانت بينها وبين نفسها تتساءل شو حبيت في هالانسان الوحش ... حمد اللي احبه مات من زمان من يوم رجع هذا من لندن
...................

بدا العد التنازلي ... وبعد اسبوع بتكون حرمة حمد... وطول الايام اللي طافت وهي تحاول تقنع نفسها انها تتقبل هالواقع ... بس للحين مب قادرة تتحمل فكرة انه بياخذها لمجرد انه يذلها ... كم كثر آمنت بقسوة حمد بس عمرها ما تصورت انه ممكن يكون بهالقسوة ... حبها الاعمى له طول حياتها خلاها تغض البصر عن اخطاءه وخلاه يتمادى في هالاخطاء ... تصرفها السلبي معاه وسماحه له انه يذلها ويهينها في كل فرصة حصلها رسخ داخله انها شي من ممتلكاته ... الحين اكتشفت كم كانت علاقتها بحمد غلط ... وكان حبها لحمد ظلم لانوثتها وكبرياءها اللي ما كانت تنكسر الا جدامه ... كل ما ردتها افكارها لهذي النقطة ... تس عمرها انها تكره بزياده وانها ما تقدر تتقبله خلاص ... حتى لو فكرت في يوم انها تغفر له هو الحين يصعب عليها الوضع ولا حتى مفتكر يطلب السماح وكأنه من حقه يجرح فيها مثل ما يريد .... كانت في حجرتها تحاول ترتب في شنطها ... امها اليوم الصبح يابت لها كل الكنادير من عند المخورين ... والحين بس الحين اكتشفت انها ما تحلم وانها بتزوجه ... وهي ترتب كانت تدور في داخلها عن حبها لحمد ... تحاول تحيي هالحب اللي مات ... تدور عن ذرة احترام داخلها ... تريد تبدا حياتها اليديده وهي تحاول ... بالرغم من صعوبة هالشي الا انها في الاخير رضخت واستسلمت ... من تكون هيه عشان توقف في ويه العايلة والمجتمع والتقاليد ... مجرد وحده لا حول ولا قوة لها ... مجرد بنت في عالم ما يعترف الا بقوة الرجل وسيطرته ... دخل عليها خليفه وهي بعدها في عالم ثاني .... خليفه اللي بدا يحن ويتعاطف معاها ... ليش ما يرضى على عفرا ويتساهل يوم يكونن خواته ... كان يحس بالتشتت بين حبه لحصه وحبه لحمد ولد عمه ... بين ولاءه لابوه وتقاليده ... وبين حبه لعفرا بنته ... اللي صار مع عفرا غيره ... بس هوه يدري ان حصه من داخلها تريد حمد واللي صار كان بسبب لحظة غضب وكلمه قالها ذياب في لحظة طيش ... كان واقف وهو يشوفها ترتب اشياءها وسرحانه ... فتنحنح عشان تنتبه له

خليفه: احم احم
حصه: (لفت تشوف من دخل عليها وابتسمت بألم يوم شافت خليفه) هلا خليفه اقرب حياك لو ان الحجرة معفوسه
خليفه: عروس ما تنلامين ... هاه شو الاستعدادات
حصه: (وهي تضحك) ذكرتني بنكتت سمر عن الخروف اللي بيودونه المصلخ
خليفه: هاهاها وشو دخل ها في سؤالي
حصه: انا مثل خروف سمر احس اني انقاد للمصلخ
خليفه: بس عاد يا حصه ... من يوم يومج تدرين انج بتاخذين حمد وما اعترضتي شو اللي غيرج الحين
حصه: خليفه ... حمد ما يريدني لانه يريد يعرس ... حمد يريد يذلني وبس
خليفه: ردينا على هالكلام اللي ماله معنى ... اريد اعرف انتي من وين اتييبين هالكلام الخايس
حصه: ليش ما تبون تصدقوني
خليفه: الريال ما يعرس بحرمه عشان يذلها ... هذيلا انذال اللي يذلون حريمهم
حصه: وحمد طول عمره نذل مب من اليوم وامس
خليفه: (وهو بادي يعصب) حصه عيب عليج ... مب انا اللي بعلمج السنع حمد ولد عمج ... اياني واياج اسمعج اتعيدين هالكلمه .. او تسبينه
حصه: (تنهدت) اريد اعرف انا هالحمد شو مسوبكم ساحرنكم كلكم ... ولا

[الغلا]

ام تشوفون اللي يسويه
خليفه: حمد ريال ... والريال ما ينعاب ولا يتحاسب على ماضيه
حصه: خلاص .. اللي صار صار وكلامي ما بيغير شي من الموضوع انا ادري ...
خليفه: حاولي تسامحين يا حصه ... عمري ما تخيلتج حقوده هالكثر
حصه: حتى هوه ما عطاني مجال اني اسامح ... باجباري اني اتزوجه...
خليفه: يمكن هاي فرصه عشان تعرفينه عدل ... وساعتها بتسامحين صدقيني يا حصه حمد طيب
حصه: حرام عليك يا خليفه عمري كله وانا اعرفه ... الحين ياي تقولي بعرفه عدل بعد العرس.. حمد ما يتغير
خليفه: الله يوفقج يا اختي ... بعدين اريد اشوف فيج فرحة العروس وابتسامتها .. انا حاس انج تذبلين يا حصه
حصه: خليفه انت تقص علي ولا على عمرك ... أي فرحه وانا مغصوبه على واحد ما ابغيه ... انا اتمنى اموت قبل يوم الخميس عشان ما اتزوجه ... وانت تقولي فرحي
خليفه: بسم الله عليج يا حصه ... لا تقولين هالكلام ... وانا متاكد ان الله بيسر لج ويا حمد
حصه: (تغير الموضوع) ذياب ما يا للحين ... شو متى بينزل
خليفه: ذياب محجوز 45 يوم ما بيطلع لين بعد العرس باسبوعين
حصه: (تشهق) وانا بعرس وهوه محد
خليفه: هذا اللي بيصير
حصه: لا والله ما طلعت من بيتنا لين ما يرد ذياب ... شو كيف اصلا ابوي يوافق على العرس وذياب محد
خليفه: ذياب في الكلية .. وهذا مستقبله
حصه: مالي خص خليفه ... ما بعرس اذا ذياب ما حضر العرس ... والله ما اعرس وهالمرة صدق
خليفه: شو تقولين انتي وزعوا البطايق على الناس
حصه: مالي خص .. يكفي اني باخذ هذا ..بعد تباني اعرس واخوي محد ... ما اريد

حس خليفه باصرار حصه هالمرة وعنادها... فعلا تسويها ما بتطلع من البيت اذا ذياب ما حضر العرس وبعدين كيف ما فكروا يأجلون اسبوعين لين ما يخلص ذياب فترة الحجز ... وكيف غاب عن بالهم ... حتى ذياب بيزعل اذا ما حضر عرس اخته

خليفه: بنشوف له طريقة بنيبه يوم العرس
حصه: المهم يكون موجود

مسك خليفه تيلفونه واتصل في حمد ... كيف ما فكروا في ذياب ... لازم يطلعونه على الاقل يوم واحد من الكلية يحضر العرس ويرد ... يدري انهم يقدرون يدبرون هالموضوع وما بيغلبهم

حمد: الو
خليفه: السلام عليكم
حمد: وعليك السلام شحالك خليفه
خليفه: الحمدلله يسرك الحال .... هاه شو الاحوال عندك
حمد: الحمدلله كل شي تمام
خليفه: تعال بتخبرك ذياب للحين ما سويناله ترتيب عشان يحضر العرس
حمد: (يبتسم) من قالك اني نسيته ذياب بيرخصونه يوم الخميس الظهر يحضر غدا الرياييل وفي الليل بيرد الكليه
خليفه: (وهو مستانس) بشرك الله بالخير ... ما تنسى شي يا حمد
حمد: اكيد كم مرة بعرس ... هالمرة وبس ... صح العرس على السريع بس بعد ما نريد نقول ليتنا ما نسينا وليتنا سوينا
خليفه: زين عيل خلنا بنبشر العروس ... حالفة ما تظهر من البيت اذا ما حضر ذياب العرس
حمد: لا شو ما تظهر من البيت ... بنيب لها الدفعه كلها مب الا ذياب بس
خليفه: زين عيل بخليك تكمل شغلك
حمد: خلاص برايك في حفظ الرحمن

بعد ما بند خليفه عن حمد التيلفون خبر حصه ان حمد ما نسى ذياب ورتب موضوعه ... مما زاد من غيضها عليه حتى ذياب ما نساه ... يريد الكل يشهد حفلة انتصاره ... وتحطيمه لكبرياءها ... طلع خليفه عنها .. بس هالمرة ما كانت ترتب كناديرها في الشنط .. كانت تفر كل شي في الشنطه دون ترتيب عشان تطلع شوي من حرتها على حمد وعلى الوضع اللي حطها فيه
................
وصلوا قوم مبارك بن ناصر بوظبي وحطوا رحالهم في بيت ام راشد...كانت فتره طويله تقريبا طول الاجازه ما يووهم الا مرتين او ثلاث..واخرها كانت في عرس سلامه..والحين قرروا ييون يزورون ام راشد ويشوفون الاوضاع ويتسلون شوي في العاصمه...
ام راشد بطرف عينها: الحين يايين..عيب عليك يا مبارك هلكت من كثر ما تيي بوظبي ارحم نفسك..
ليلى تبتسم: والله وتعرف امي تتمصخر..
مبارك مفتشل: افا يا امايه تدرين اني مسافر ويا اليهال والحرمه ما ردينا البلاد الا يوم بدت المدارس...
ام راشد بنقمه: مب عذر..دور لك على خرابيط ثانيه اتعذر بها..يا شين مذهبك..!!!
مبارك مفتشل: فديتج يالغاليه والله محد يسواج...
ام راشد: الا تسواني دبي واللي فيها..بعربها وهنودها..
ليلى تهدي الموضوع: خلاص ياامايه سامحي ..كريمه وهو يستاهل...
ايمان بطرف عينها: وين الناس؟
ليلى بقهر: وليش نحن مب مالين عينج...؟
مبارك: خاطري افهم شي واحد..انتن ليش ما تدانن بعض؟
ليلى: ماقلت ما دانيها بس تقهربي خقاقه بنتك يا مبارك..
مريم تبتسم : حليلها اختي..
وعلى طرف كانت خلود حرمة راشد تسولف ويا شمسه حرمة مبارك...كان حديثهن بصوت واطي عسب مبارك وام راشد يسولفون وما حبن يقطعن سوالفهم...
شمسه: وين حمدان؟
خلود: في البيت راقد...
شمسه: حد يرقد الحين؟
خلود: رد من الشركه ورقد..بتلاقينه بعد شوي هني عند عمته..
شمسه: سلامي ما تييكم..؟
خلود: لاء مرتين يت هني ومره بيتنا..وخلاص..
شمسه: ما تتصل؟
خلود: لاء..
شمسه: كيف حالها ويا ريلها ان شاء الله مرتاحه؟
خلود: الله العالم بحالها..
شمسه: ما تخبرين عن بنتج يا خلود..مب زين جي..تخيلي ريلها مضيج بها ولا مب مرتاحه وياه..
خلود: اذا ضايجه بتتصل على عمتها..عمرها ما فكرت ترمسني ولا تقول لي شي..
شمسه: حسسيها الاول انتي وهي يوم ترتاح لج بترمس..لكن لا تتوقعينها تبدا قبل تحس بالراحه صوبج..
خلود: هي واخوها طول عمرهم بعاد عني وعن ابوهم..مادري تقصير فيه ولا فيهم...يمكن اني كنت مشغوله بحياتي ويا راشد والتهيت عن عيالي..وعمتهم قربت منهم في هالوقت فشافوا فيها البديل...
شمسه: محد يكون بديل عن الام يا ام حمدان صدقيني..
خلود: خليها على الله..
شمسه تنهدت وحمدت ربها ان لا مريم ولا ايمان وامل جي..الحمدلله مليون مره ان بناتي يصارحني وعلاقتي فيهن اكثر من كوني ام واقرب لكونها صديقه...
تمت تسولف شمسه ويا خلود رمسة حريم...وليلى ومريم وخواتها على ينب..ومبارك وامه بصوب ثاني..
ام راشد بهمس: سير لخوك وتعذر منه..
مبارك: امايه انتي من صدقج ترمسين؟
ام راشد معصبه: شايفني جذابه جدامك...حشمني وحشم سني ..
مبارك: محشومه طال عمرج بس امايه ما تدخل العقل..الورقه في بيتنا وما ندري بها..
ام راشد: ترا محد يدري ان ريل عمتك وابوك تفاهموا..
مبارك: يالومي فيك يا خوي..
ام راشد: والله محد متلوم فيه كثري...
مبارك: بيتقبل الوضع؟
ام راشد: رمسه..راشد قلبه كبير يعلنيه ما خلى منه..
مبارك: يا حيه على الاقل حد يحبه..
ام راشد بطرف عينها: والله يسأل عني وما مقصر وياي في شي..الا انت واختك مسودة العين ماتنشدون عني حيه ولا مت..وهاييل عيالكم لاحقينكم..
مبارك: فديتج يا امايه والله انج الغاليه..
ام راشد:شحاله عمر؟ ان شاء الله مرتاح..
مبارك: ادعي له يا امايه..عمر الحين بالثانويه الجويه..
ام راشد: شو يبا بها السما طاير لها..جان يلس له بالارض ابرك له..
مبارك يضحك: كل حد ورغبته محد غصب عليه..
ام راشد: مب كان يبغي دكتور..
مبارك: خلاص هون..حس بوطنيه ويبغي يخدم بلده ويرد له الجميل..
ام راشد بنقمه: شبيسوي هالياهل..بيبطي ما يرد لها هالبلاد ليله زينه قضاها فيها..
مبارك يبتسم: يكفي انه بيفديها بروحه..هالشي يكفي يا امايه..
ام راشد: الله يوفقه يا رب ويفتح عليه..
ولفوا على ليلى اللي كانت يالسه ويا مريم وخواتها..
مبارك: وين شيخه عنج؟
ليلى: مب في البيت...
مبارك: عند خوالها؟
ام راشد: للحين البنت ما يت من بيت العرب؟
ليلى: لا توني مرمسه حصه قالت لي كلمت البنات وقالن بيردن الحين..
مبارك: بنات منو؟
ليلى: هي مب في بيت خالها...سارت بيت عمتي عايشه..
مبارك عاقد حياته: شعندهم؟
ليلى مبتسمه: ولا شي..بس توني رديت من السوق..كنت ويا حصه اللي بياخذها حمد..وخليتها عندهم ويوم رديت ما لقيتها قالوا لي انها ظهرت ويا بنت عمي مبارك الصغيره واخوها عبدالله محلات الالعاب..
مبارك: وكيف تخلين بنتنا في بيوت الناس؟
ليلى مستغربه: عبدالله مب ياهل ريال اكبر عنك..وبعدين شيخه ما ينخاف عليها ويا بنات خليفه كبار ماشاء الله عليهن..
مبارك: ولو ما يعني هالشي انج تخلين البنت في بيوت الناس بدون حد من اهلها..
ام راشد: بيت مبارك مب غرب..الا عايشه بحسبة عمتك ام ناصر..
مبارك معصب: مهما كان ما يحق لج تتصرفين من راسج..وين راشد عنكم؟
ليلى عصبت: والله ما افتكرتوا فيها وهي صغيره محتايه تحس بأبوتكم..يايين ترمسون الحين..
مبارك فج عيونه..
ام راشد: لا تضيج بها يا مبارك..خل اختك في حالها..البنت محد قام بها وشاف حالها الا هي...لا تيون على اخر العمر تاخذون البنت بارده مبرده..
مبارك: حتى انتي وياها يا امايه..؟
ام راشد: انا مع الحق..
ليلى: شيخه شي يخصني انا..انا اللي ببيع العالم كله عشانها..ومحد بيتحملها كثري...
مبارك: لا وراها ثلاث رياييل بيقومون بها من عقبج..بتعرسين وبتخلينها هني ماشي ريال بياخذج ويربي بنت مب منه..
ليلى: بخلي العرس عشانها يا مبارك والله..
مبارك: بتخللين في بيت ابوج وما بيشلها ريال وياه..
ام راشد: بيقولج خليها في بيت يدتها تقوم بها هي وعمامها..
ليلى بثقه: بيبطي يترياني اوافق عليه...بزوال الرياييل..خلاص صبرت وايد ماظني ما بروم اصبر اكثر من اللي راح..
مبارك: سوي لهن تلفون قولي لهن وين..عنبو بنت ياهل ويا عرب للحين نصايف الليل..
ام راشد: يالله بالستر يا مبارك شياك على اختك...
ليلى: توله على التكفيخ من زمان ما ضرب حد..
مبارك تذكر: ولهتي على الضرب صدق؟
مريم: كان ابوي يضربج..؟
ليلى: لاتخبرين يا مريم..شري محد مثله..
مبارك يبتسم لمريم: لانها تستاهل...
ليلى اللي صدق حست عمرها كرهت اسلوب مبارك الوقح وياها وسوالفه عن شيخه وبيت عمتها عايشه..وتدخله السخيف في شيخه اللي عمره ما كلف على نفسه يتخبرها عنها او ييب لها شي مثل العالم والناس..وطنشته رغم انه كان يسولف وياها...
مبارك: يالله من رخصتكم انا بسير اشوف الربع من متى ما ييت لهم بوظبي..
ام راشد: الله وياك...
مريم تنش: انا بطلع الحديقه..
ايمان وامل: ونحن بعد..
ليلى تنش: بسير وياكن...
وتمت ام راشد وحريم عيالها في الصاله والبنات طلعن برا...
مريم: شفيه ابوي عصب؟
ليلى: تخبريه...
ايمان: ما سافرتوا..؟
ليلى: لاء..
ايمان: اف كيف تحملتوا جو البلاد حر..
طنشتها ليلى...
امل: عمتي نروح العزبه...؟
ليلى: في هالحر؟ اكيد لاء..
مريم: منو هاك اللي ياي؟
ليلى تلف: حمدان ..
فز قلب مريم...وليلى لاحظت هالشي وهزت راسها وابتسمت...وحمدان قرب منهم..لابس ومتسفر..
حمدان: مرحبا الساع ببنات دبي مرحبا ببنات عمي شحالكن؟
البنات: الحمدلله بخير..
مريم: شحالك حمدان؟
حمدان مبتسم: بخير يسركم الحال..
ليلى: على وين؟
حمدان: بسير اصلي المغرب وبرد..
ليلى: ما أذن للحين؟
حمدان: الحين بيأذن..
واذن المغرب في هاللحظه..
ليلى فاجه عيونها: حشا ساحر..!!
حمدان يضحك: يالله برايكن..بصلي وبييكم ...(ويغني) سهرتنا الليله خلوها صباحي..
ليلى تزاعج: اييه يأذن عوذ بالله منك..
حمدان: استغفر الله...
مريم: يالله بنسير نصلي..
ودخلن يصلن فوق لين ما يرد حمدان من المسيد...صلت مريم وعلى طول لبست وقايتها ونزلت تحت وشافت يدتها تحاول في الريموت بس ما يجلب القناه...
مريم: شو تبين تحطين يدوه؟
ام راشد: حطي الجزيره بنشوف الاخبار..عنبو ما تنشل القناه من على هالخرابيط..
مريم تبتسم: حليلها شواخي ما شي يسليها الا سبيس تون..
ام راشد: الا البنت خلاص ما تبغينا غاديه هياته ما تيلس الا في بيت مبارك...
مريم بتطلع: حليلها..
ام راشد: وين سايره؟
مريم تفج باب الصاله: بيلس في الحديقه..
وطلعت مريم ويلست على دري الصاله...تطالع برا وتشوف الدنيا..تفكر في ولد عمها اللي ذبح قلبها..وشوي الا وحمدان ياي من صوب الباب..ذابحنها بحلاته وهيبته وطلته..بكلامه ونظرته..وسوالفه..هو من شافها ابتسم ووقف عند الدري وما طلع...
حمدان: صليتي؟
مريم مبتسمه وهي يالسه: الحمدلله..
حمدان: شحالكم وشحالها دبي؟
مريم: والله تسلم عليك...
حمدان: ما عندي وقت والله ايي دبي..
مريم: ليش هالكثر مشغول؟
حمدان: لا تخبرين يا بنت عمي..والله ماشوف ريلي من راسي في هالشغل...
مريم مبتسمه: الله يوفقك...
حمدان: هاه وين درستي؟ الكليه ولا الجامعه؟
مريم مستغربه: انا للحين ما خلصت الثانويه..انا هالسنه ثانويه عامه..
حمدان مستغرب: والله..تحريتج خلصتي..
مريم: لاء ما خلصت...
حمدان: يالله عاد شدي حيلج نبغي نسبه محترمه..
مريم: اكيد عاد لا توصي حريص..
حمدان: نبغي اعلى من نسبة عفرا بنت خليفه..
مريم تغير شكلها: منو هاي؟
حمدان: بنت خال ربيعاتج في دبي..
مريم تذكرت: هيه اللي في بيت يدي مبارك..؟
حمدان مبتسم وقلبه يدق بسرعه: هيه..
مريم انقهرت:ليش كم يابت؟
حمدان: 98,4
مريم فجت عيونها: خيبه!!!
حمدان يبتسم: مريووم تعرفين؟
مريم: شو؟
حمدان: بس لا تخبرين حد..
مريم: شو؟ ارمس..!!
حمدان بفرح: كلمت عمتي تخطبها لي...ورمست ابوي وقال بيخطبها لي قريب ان شاء الله..
مريم انصعقت..خلاص حست بأطرافها تنشل وتبرد..وحست انها مب في الارض..وشي خطف روحها لدنيا ثانيه..ما قدرت تنطق بحرف وعيونها تغيرت ولونها اختلف...
حمدان مبتسم: يالله عاد ادعيلنا يوافق ابوها..
حمدان ابدا ما لاحظ صدمة مريم اللي شوي وتصيح..ولا حس بالجرح الفضيع اللي جرحها..ولا حس انه بهالكلمه هدم كل قلاع الامل في قلبها...بضربة معول وحده حطم حياتها ودنياها واملها اللي تعيش عمرها تنتظره..
حمدان: يالله قومي بندخل الجو رطوبه وايد...
مريم بلعت ريجها ونشت ودخلت ..حمدان يلس على اقرب كنبه عند الباب واترياها تيلس بس هي لبسته وطلعت فوق...وهي طالعه كانن ايمان وامل نازلات..وتخبلن يوم شافن حمدان ويلسن يسولفن وياه...اما هو فكان خبر خير ولا يدري شو سالفتها بنت عمه...
مريم دخلت حجرة ليلى ولقتها تبعثر في كبت شيخه وما تدري شو تسوي..لفت ليلى من شافتها..ونشت على طول..
ليلى مبتسمه: صليتي؟
مريم تطالع في ليلى وانترسن عيونها دموع....
ليلى انصدمت: شوفيج؟
مريم انفجرت صياح وما قدرت تستحمل اكثر..ما حست بعمرها الا يالسه على شبرية شيخه وتصيح صياح من خاطرها..خلاص انتهى صبرها...
ليلى: مريووم شفيج؟ ليكون شي صار بأمايه؟
مريم تصيح: لاء..
ليلى: عيل..؟
مريم تمش دموعها: خلاص ماشي انسي..
ليلى: والله ما انسى..ارمسى شوفيج...؟
مريم تحاول تهدا: ماشي خلاص انسي والله ما بقول شي..
ليلى حست: حمدان قالج شي؟
مريم طاحن دموعها: لاء...
ليلى: انتي عرفتي شي؟
مريم: يعني تدرين؟
ليلى: بشو..والله حيرتيني يا مريم..
مريم: خلاص يا عمتي انسي الموضوع..
ليلى: مريووم عن الحركات الماصخه..ارمسي شي بلاج قولي..
مريم: والله ما برمس..خلاص..
ليلى قررت ترمس وتقول كل شي: حمدان خبرج عن خطبته...؟
مريم طالعتها ولفت عنها...
ليلى تمسك ايدينها: يا مريوم يا حبيبتي..انا اعرف شكثر تحبين حمدان...واعرف انج تتمنينه هو..واعرف انج متأكده انج بنت عمه وما بيطالع غيرج لو انج بعيده عنه...بس مشاعرنا مب ملكنا ولا الحب بإيدنا...انتي تحبينه بس هو ما يدري..وهو يحب وحده غير وهي ما تدري..
مريم صاحت..
ليلى: لا الصياح بيسوي شي ولا بيرده..تعرفين انتي كسبانه شي واحد من هالسالفه كلها..وهو ويع الراس..اشتري راحتج واصبري...
مريم ساكته..
ليلى تتنهد: بعدج صغيره وبتكبرين وبتضحكين على عمرج..مريوم انا اعرف وحده تحب ولد عمتها 13 سنه تخيلي 13 سنه...
مريم طالعتها: والله؟
ليلى: والله...هي تحبه وهو يحبها..
مريم تمش دموعها: شو صار؟
ليلى تبتسم وتطالع بعيونها باب الحجره وتتذكر الضحكه واللعبه والابتسامه والكلمه الحلوه..تتذكر الثوب العنابي والعروس واخت العروس..تتذكر ماضي اندثر ولا يمكن يعود...
ليلى: حبها 13 سنه يا مريم تصدقين؟؟ وخلاها خلاها يا مريم...!!
مريم: معقوله؟
ليلى: كل شي معقول وكل شي متوقع في هالدنيا لا تستغربين من شي ابدا..
مريم: ليش خلاها...؟
ليلى: ماعرف مادري للحين ماعرف شو السبب بس الظاهر غلبته الدنيا واستسلم لها..
مريم: هذا صدق يحب؟
ليلى: انتي تقولين انج تحبين وهالحب اللي تفكرين به ما تعدى الايام ولا الشهور..حبج للحين وليد المشاعر..وما تقدرين اصلا تسمينه حب كثر ما تسمينه انجذاب...مريم الحب اكبر من انج تتكلمين عنه واكبر من انج تصيحينه وتسكتين...الحب يا انج تعيشين له وتصبرين على كل عذابه..يا انج تستسلمين وتخلين كل شي لاهله..
مريم بحزن: عمتي هذا ولد عمي اللي عمري ما فكرته بيطالع بيوم غيري...يا ليتني سمعت خبره من حد ثاني..المصيبه اني سمعته من ثمه هو يا عمتي منه هو...
ليلى بعقلانيه: مريامي لو حمدان يوم من الايام اعتبرج اكثر من اخت وحمل صوبج أي مشاعر او حتى لو مجرد حس باحساس انج تحبينه عمره للحظه ما بيجرحج ولا بيقول لج هالشي وهو يدري بمشاعرج..لكن لا تلومينه حمدان شدراه بمشاعرج وشعرفه شو في خاطرج.؟
مريم: بنت عمه...مفروض....
ليلى تقاطعها: مفروض يحبج؟؟ لا لا يا مريم بنت العم مب واجب على ولد عمها...انتي تبين حمدان ياخذج على اساس انج بنت عمه بس؟؟ما تبينه يحبج ويدلعج ويحترمج..؟ تبين علاقتكم تكون فاتره؟ قولي لي؟
مريم: لاء..
ليلى تبتسم: يالله غناتي الايام جدامج طويله والعمر ياي بتحبين وبتعيشين لين ما تقولين بس من الحب وسنينه..يالله قومي غسلي ويهج وتعالي بننزل تحت خلنا نشوف الجماعه ما ولهتي على سوالفهم؟
مريم: مابغي انزل تحت ماقدر اخذ واعطي وياهم..
ليلى تسحبها من ايدها: يالله بلا دلع انزلي واضحكي ولا تخلين حد يحس بشي..هاه في الاخير يتمي ولد عمج مالج بد من كلامه وسلامه ومجابله....يالله انزلي لا تأخريني بتصل اشوف البنت وين..هياته نصايف الليل ويا حصوه الدبه...
مريم تبتسم: ان شاء الله...
...................
................
عبدالله اللي تعود ايي كل يوم العصر من دبي بعد ما يطلعن خواته السوق ويا ليلى عشان يشوف شيخه اللي كانت ليلى تخليها بيت اهل حصه ... قرر في هالليلة انه ما يرد دبي ماله بارض على السواقه في الليل ... فكان قاعد في الميلس هوه وحمد ... بعد ما طلعوا الشباب وقبل العرس باسبوع تقريبا ... عبدالله خلال الاسابيع الثلاثه الماضية تعود على وجود شيخه في حياته بشكل يومي صارت تشكل له هوجاس ... وكلمات امه بعدها ترن في اذنه فعلا هو يريد يشل شيخه وياه دبي ... بس مستحيل راشد يستغنى عن بنت سيف ويعطيه اياها ومنو بيربيها في دبي ... ماشي الا انه ياخذ عمتها ... حل منطقي هو محتاج شيخه وعمتها محتاجه انها تزوج بعد اللي صار لها من ناصر ولد خادم .... طلعه من افكاره حمد

حمد: ااااي وين وصلت يا ريال من الصبح اكلمك
عبدالله : موجود الا هنيه
حمد: (يبتسم) صدق شو فيك عبدالله انت مب طبيعي ابدا
عبدالله: حمد انت اول واحد بقوله هالرمسه ... والشاهد الله اني اعتبرك اقرب انسان لنفسي
حمد: شعندك قول خوفتني
عبدالله: انا افكر اعرس

انصدم حمد من الجملة اللي سمعها ... عبدالله يزوج على بدرية او بعد بدرية مب قادر يستوعب ... عبدالله اللي كانت بدريه تساوي حياته كلها وفرحته ودنياه يعرس قبل لا يمر على وفاتها سنه ... وين الحب وين الاخلاص ولا مجرد كلمات تنتهي بمرور الزمن واختفاء اللي نحبهم من حياتنا

حمد: وبدريه؟؟

هنيه عبدالله اللي حس بانه حمد صب عليه ماي بارد ووعاه من حلم حلو كان يعيشه ... بدريه احلى ما مر في حياة عبدالله ... بدريه الحب الوحيد اللي اعرفه عبدالله وعاشه ... قمة الفرح وقمة الحزن في حياة عبدالله ... فرحه بوجودها في حياته ... وحزنه لما فقدها ... بدريه عايشه معاه وفي وجدانه عمره ما نساها .. حتى شيخه كان يحكي لبدريه عنها في خياله ... كان يتمنى لو كانت بنته من بدريه ...

عبدالله: شو فيها بدريه يا حمد
حمد: اسف يا عبدالله ما كان قصدي اطريها والحي ابقى من الميت ... بس ما قلت لي منو تريد تاخذ
عبدالله: حمد بدرية الحب الوحيد في حياتي ... من عرفت معنى الحب وانا ما احب غيرها ... اما زواجي ماله علاقه بالحب ... ولا تفكر في يوم اني راح انسى بدرية او احب غيرها مثل ما حبيتها
حمد: بهالمنطق بتظلم بنت الناس اللي بتاخذها
عبدالله: حمد لا اتكلم عن الظلم انت بالذات
حمد: حصه غير
عبدالله: في شو
حمد: لا تغير الموضوع خلنا نتكلم عنك الحين
عبدالله: انا بخذ ليلى بنت ناصر اخت راشد تشتغل وياك على ما اظن
حمد: هيه بس قدمت استقالتها ...
عبدالله: انا بخذها عشان بنت سيف الله يرحمه انا تعلقت في البنيه يا حمد ما اتخيل انه بعد عرسك ما بشوفها
حمد: تقوم تزوج عمتها
عبدالله: هيه اللي تربيها وبشل الثنتين دبي
حمد: في حجرة بدرية
عبدالله: لا طبعا ... حجرة بدرية محراب خاص فيني مستحيل اسمح لاي انسانه تدخله بعدها منو ماكانت ... البيت في دبي كبير وبرتب جناح تحت
حمد: عبدالله بتظلم بنت الناس معاك ... لين الحين انت عايش ونصخ بدرية في صدرك وفي حياتك ...
عبدالله: اسمع يا حمد ... حتى ليلى عاشت 13 سنة تحب ولد خادم وفي الاخير ما صار نصيب... انا ما اطلب انها تحبني ولا اريد هالحب ... انا تكفيني شيخه في حياتي ... اذا انا رضيت بوجود ولد خادم في ماضيها فهي لازم بترضى بوجود بدرية في حياتي....
حمد: قلتها في حياتك مب ماضيك....!!!
عبدالله: انا محتاج لشيخه في حياتي..
حمد: عمرك ما كنت اناني في احتياجاتك ...
عبدالله: انا اساعدها في انها تسوي اللي تباه وتربي بنت اخوها
حمد: بس بتحرمها احساس الامومه

سكت عبدالله ما عرف شو يرد على حمد ... يمكن يحرمها احساس الامومه ويمكن لا ... كان حمد بالنسبة له الاصعب في الاقناع وبعد ما تأكد حمد ان عبدالله مستحيل ينسى بدرية او يطلعها من حياته ... اشفق على ليلى من المستقبل اللي ينتظرها اذا وافقت على عرض عبدالله ... بتعيش مع زوج يسكن عالم ثاني مع زوجته اللي توفت ... عبدالله مازال يقفل على نفسه باب الحجرة مع ذكريات بدرية ... كيف ممكن تتقبل أي حرمة شو ما كانت قوتها وقدرتها على التحمل ... انها تسكن مع انسان عواطفه ومشاعره مع انسانه ماتت عنه وخلته بروحه ... هل بامكان شيخه او حتى ليلى اللي يدري حمد انها ما تقدر تعوض عبدالله بدرية انهم يطلعونه من العالم اللي اختاره لنفسه..!!!؟؟؟
..............
كانت حصه قاعده ويا هلها كلهم ما عادا ذياب اللي كان في الكلية في صالة بيتهم بعد ما استسلمت للامر الواقع ... بالنسبة لها كانت اخر ايام لها في بيتهم ما تريد تفوتها وتندم في يوم انها ما استغلت فرصة وجود الكل في البيت ونزلت تقعد معاهم ... غلبتها طيبتها وحبها لهم.. واتناست انهم هم اللي غصبوها على ولد عمها ... كانوا خليفه وبناته يسولفن ويا عبدالله ... وامها قاعده ويا حرمة خليفه يسولفن عن تجهيزات العرس.. وسمر تدلع على ابوها وتخبره شو سوت في المدرسة ... وهي بروحها تطالع في ويوهم كلهم ... ليش كلهم متحمسين لهذا العرس معداها هيه ... ليش الكل مستانس الا هيه جالبة حياتها جحيم وتحرق في عمرها ولاحد داري عنها .. طلعتها من افكارها امها وهي تسألها

ام خليفه: حصه امايا وين يبتي فستان حق ليلة العرس
حصه: (بضيج) طبعا أجرت ... انا بنت مبارك ... البس فستان مأجر ليلة عرسي .. بس ما اقول غير حسبي الله على اللي كان السبب
بوخليفه: هيه الا كندورة .. دفعيلهم بيزات زياده وخذيه لج .. جان معورنج قلبج ليش انج بتأجرين
سارة: هوه حد لابسنة قبلج
حصه: بعد هذا اللي قاصر ... الله يخليج سكتي عن هالموضوع خلاص ما احب طاريه
عبدالله: هاهاهاها .. اقول حصه سمعت ان حمد يغير ديكولاات شقته .. بتسكنوون فيها؟
حصه: شفت عاد... اخر عمري بسكن في شقه ... ولد عمي المسنع واللي يعرف المذهب بيسكن حرمته في شقة ... عندهم بيت شكبره وطالعه من بيت شكبره وبيسكني في شقه... لا وشقة ايام العربده بعد
بوخليفه: لمي ثمج يا حصه واقصري الشر... عن هالرمسة الخايسة
ام خليفه: وليش ما يسكنج بيت امه .. شكبره البيت وامه قالت لي انها بتجهز لج الطابق الثاني كله لو بغيتي
حصه: ولد عمي المحترم يوم قلتله اريد اسكن عند عمتي ... قالي بنسكن الشقة خساسا فيج
خليفه: لا شو هالرمسة .. حصه لا تبلين على ولد عمج
حصه: طالع... والله ما اتبلى اقول الصدق
عبدالله: يمكن يرتاح في شقته اكثر
حصه: وانا ما برتاح في شقه .. طالعه من بيت هالكبر اروح اسكن شقه ... ما اصبر عن الحوش والنخل في البيت
بوخليفه: ريلج وين ما بيسكن تسكنين وياه ... حتى لو يشلج ويحطج في حجرة البيادير بيت امه تقولين حاضر وان شاء الله
حصه: (بقهر وعشان تسكر هالموضوع) حاضر وان شاء الله

نشت حصه وراحت فوق حجرتها احسن شي تسويه الحين تتصل في ليلى اتشوف متى بتمر عليها بدل هالضيج والقرب اللي تحس فيه كل ما اقترب موعد العرس ... اما عبدالله فنش وطلع من عندهم بيكلم حمد بيشوف شوسالفة الشقة هاي وليش يريد يسكن حصة في الشقة دامها تريد بيت عمتها
.
.

حمد في حجرته قاعد يفضيها لانهم بيغيرون ديكورها واثاثها بعد ما خلصوا الصالات والحجر الباقية في الشقة ... حط ثيابه واغراضه في شنطه ... وفج الدرج اللي فيه دفاتره واوراقه ... وكل ذكرياته وذكريات العذاب والوحده كان يجلب في الدفاتر وهو يبتسم كل ما قرا قصيده او حصل ورقة قاصنها من مجلة او جريده... يجلب في هالاوراق وكل اللي صار له يمر في ذاكرته ويولد على شفايفه ابتسامه وفي داخله احساس بانه يشوف فلم لشخص غيره ... نخلق الالم داخلنا ونعطيه فرصه يكبر وينتشر ويسيطر علينا ... نستسلم له وما نحاول نقاومه... نتغير للاسوء ونرد الاسباب ونقول نتيجة للالم للظلم والخداع ... والحقيقة انه نحن نريد هالتغيير.. نريد نكون اسوأ ... ونريد الجميع والمجتمع يسمح لنا بكل اخطاءنا بحجة ان كان نتيجة للالم ... ونطلب منهم الغفران والنسيان ... فر كل الدفاتر في صندوق وهو يفكر يتخلص منهم عشان يبدا حياة يديده ... بيروح يشعل لهن محرقة على شاطي البحر ويودع ايام العزوبية والحرمان ... فجأة رن تيلفونه وشاف رقم عبدالله ورد عليه

حمد: الو
عبدالله: الو السلام عليكم
حمد: هلا وعليكم السلام والرحمه ... هاه شحالك وشحال عمي
عبدالله: الحمدلله يسرك الحال ... انت وين.؟
حمد: انا في شقتي ... افضي الحجرة باجر بيغيرون اثاثها ... لعوزونا ما ادري متى بيخلصون
عبدالله : ياللا على البركة ان شاء الله
حمد: ما بتي نطلع نتمشى شوي
عبدالله: لا ما اريد اطلع من البيت .. بتي بنت ناصر وبتيب وياها شواخي بنت سيف
حمد: والله انك متفيج
عبدالله: الا صدق ليش بتسكنون الشقة .. ليش ما تقعد عند عمتي
حمد: (يبتسم) ليش حصه مشتكية ما تبى الشقة
عبدالله: لا ما اشتكت بس انا اتخبرك
حمد: اخر شي بردها بيت امي ... لا تحاتي
عبدالله: وليش ما تروحون من اول شي
حمد: عبدالله .. حصه مغصوبه علي .. وانا ما اريد امي تلاحظ هالشي ... خلني اول اتفاهم ويا اختك .. واتطمن انها تقبلت الامر الواقع وبعدين يصير خير ... صراحه ما فيني على حنة امي
انصدم عبدالله يوم سمع كلام حمد .. يعني في الاخير هو يدري ان حصه مغصوبه عليه ومع ذلك ما قال ولا غير رايه... مع ان هذا مب طبع حمد ... معقول كلام حصه صح وهو ما يريد ياخذها الا انها ما تباه
عبدالله: وانت شدراك انها مغصوبه؟
حمد: (يبتسم) حصه ما تفوت فرصة ما تقولي فيها ما ابغيك
عبدالله: تدري انت هذا دلع بنات ... وهي ما تعرف شو تريد
حمد: ماعليك لا تحاتي .. نحن رياييل ما يمشينا كلام الحريم ... اخرتها بتعود
عبدالله: يصير خير ... تامرنا على شي ..
حمد: لا سلامة راسك... بس اذا غيرت رايك وبتطلع كلمني
عبدالله: ان شاء الله.. مع السلامه
حمد: الله يحفظك

بعد ما بند عن ولد عمه رد حمد للي كان يسويه دفاتره وقرار حفلة الاعدام والمحرقة اللي ناوي يسويها لهن ... بس في الاخير تراجع عن رايه .. وقرر يأجل امر المحرقة لاجل غير مسمى ...
..................
عقب سالفة خطوبتها من حمدان وهي ما ترمس ابوها خير شر ولا تسلم عليه ولا حتى قادره تتفاهم وياه..الحين هذا ابوي اللي احبه واعزه واللي عطاني كل شي وميزني عن غيري من الناس..لدرجة انهم يسموني الاميره والملكه والشيخه..اشوفه يتأثر براي يدي ويتحمل قرارته بنفسه...يعني انا وين رحت ووين رايي...كانت عفرا تعيش في تضارب مع نفسها بس ما تروم تشكي لحد ولا تقدر تتكلم..كل شي حواليها يقولها اسكتي ومالج راي...واللي قهرها اكثر هو ان عمتها شمسه ردت من ايطاليا هي وسعود وبطي اما البنات فتمن هناك ويا ابوهن اللي ما قدر يي بسبة ضغط العمل اللي عليه...السبب اللي تجهله عفرا من كل النواحي هو ليش سعود وامه ياين بوظبي ....وفي صالة البيت مع بو خليفه وعياله وكل اللي يالسين....
خليفه: يالله يا شمسه من متى ما شفناج؟
عبدالله: خلها بزي الحرمه..
نوره: حليلها اختي خذتوها بشراع وميداف...
شمسه: شسوي بعد كلوني ماروم اقولهم شي اخواني الكبار...
كانت عفرا يالسه حذال عمتها حصه ساكتات ولا وحده فيهن رمست..وغير جي ان حمده كانت تسولف ويا عمتها سلمى على ينب..وخليفه يطالع عفرا يباها على الاقل تنتبه او تصد له شوي بس يشوفها..كم يحس انه توله عليها وكم حب يكلمها بس هو يتريا الفرصه تيي عسب يتفاهم وياها على كل شي...
شمسه: خليفه وينك؟
بو خليفه اللي حدر الصاله: السلام عليكم..
ونشوا يسلمون عليه كلهم...ويلس عندهم ونطت سمر حذاله على طول..
خليفه: يالبزا..؟؟
شمسه: هاي للحين ما تيوز عن سوالفها؟
سمر: ليش محترين.؟
بو خليفه يضحك: يغارون منج...
شمسه: ابوي مبزي هالسمر..وخليفه مدلع عفاري لين ما يطلع البزا من عيونها...
خليفه: لا عفاري غير ..
عفرا طنشت ..وحصه ابتسمت لها..
بو خليفه: عفاري كبيره وين تتدلع..خلاص...
خليفه يبتسم وقرر يفتح الموضوع عشان عفرا تقتنع وتتأكد ان مالها غير ولد عمتها...
خليفه: انا ما خبرتك ابويا..
بو خليفه: شعندكم؟
الكل انتبهوا...
خليفه: قوم راشد بن ناصر خطبوا عفاري لولدهم حمدان...
انصدمت شمسه وسعود تغير شكله على طول وحس حد صفعه على ويهه..
بو خليفه ببرود: خلهم مكانهم...ما بنقرببهم..وردوا لهم الخبر...
شمسه ارتاحت من قرار ابوها وسعود تنهد براحه..اما عفرا حست ان ابوها يستفزها صدق بالكلام..
حصه: ليش ابويه شو فيهم قوم خالي ناصر...؟
بو خليفه: عداهم العيب يا بنتي بس عفرا لسعود وهالشي عارفينه من متى ان رخصها فهي لولد راشد وان رفض فهي له..
شمسه مبتسمه: لا لا عفاري ما بتسير لحد غريب هني بين اهلها وناسها احسن لها...
بو خليفه: خلاص يا خليفه رد لهم خبر الليله وقلهم ماشي نصيب...
عفرا بقهر: والله مب بكيفكم تزوجوني اللي تبون...
انصدم يدها من كلامها وابوها افتشل وحصه مسكت ايدها عشان تسكت..
عفرا بتصيح: والله انا مب جاريه تسيروني على هواكم وما بعرس لو شو ما سويتوا...
وطلعت وهي تصيح الشي اللي صدم سعود..
بو خليفه: تصيح دم شعليك منها..والله ما تنحط كلمتي الارض...
خليفه سكت والباقين محد قدر يعترض هذا بو خليفه مستحيل حد يرده في أي شي يقرره ومستحيل حد يقدر يناقشه في أي موضوع مهما كان....
الصراع استمر في داخل خليفه...يوقف مع من بنته ولا ابوه...تهون عليه عفاري تتزوج حد مغصوبه عليه...؟؟
والله ما تهون بس هو غصبا عنه وشو بيسوي ما يقدر يتحكم في قرارات ابوه...
.............................

[الغلا]

من يوم سارت بيت اهلها وهي معتفسه وحالتها لله..كسرت خاطر ريلها اللي ذبح عمره يبغي يعرف شو فيها بس بدون فايده ولا طاعت ترمس ولا تقول له شي..حتى المدرسه بالزور اطيع اتسير لها..ما يخليها تغيب وامه تحاول فيه عشان يفهم شو فيها بس هي مب طايعه ترمس وفكر يتصل بحمدان يتخبره بس هي حلفت ان تخبر حد او اتصل على اهلها يا البيت انها ماتيلس فيه دقيقه وترد بيت يدتها....
ام احمد: خاف ان حد ناظلنها يا احمد...؟
احمد: وين ناظلينها ياامايا خلي هالخرابيط الحرمه متضيجه من شي..
ام احمد: زين تخبرها من شو وين انت ما تحس.؟
احمد: شو اسوي والله ذبحت عمري بدون فايده..
ام احمد: سير لها تخبرها شو فيها سير عند حرمتك يا برودك يا احمد..
نش احمد متأفف: والله ماتحبينها كثر ماحبها يا امايه ولاتهمج كثري بس انا عيزت فيها...
سار احمد صوب حجرتهم وهو متأكد انه بيلاقيها يا تدرس يا ساكته ما تقول شي وكل عيونها دموع وضيجه وحزن...بس قرر يلاطفها هالمره ويشوف...
احمد: سلامي ما تعبتي...؟
سلامه بهدوء: من شو؟
احمد اللي صدق بدا يخاف عليها: من هالحال اللي انتي فيه...
سلامه ببرود: مافيني شي...
احمد: زين حبيبي شو فيج ارمسي قولي بيت اهلج ضايقوج؟
وقبل ترد سلامه كان باب الحجره يدق...
احمد: منو؟
فاطمه: افتح انا فطوم..من كثرهم اهل البيت اتخبر منو عند الباب...
احمد: ياهاللسان اللي يباله قص...
فتح احمد الباب ودخلت فاطمه..
فاطمه: سلامي نشي في حد يبغيج عند الباب...
سلامه مستغربه: منو؟
فاطمه: قومي وبتشوفين...مادريبها..
ونشت سلامه وعدلت وقايتها واحمد وراها..
سلامه بطرف عينها: انت وين رايح؟
احمد: وياج؟
سلامه: استح على ويهك تخيل حريم شو تبى انت؟
احمد: اخاف حد يخطفج..
سلامه: احمد عن الاستهبال سير داخل...
طلعت سلامه الحوش واول ما شافت اللي عند الباب ابتسمت من خاطرها...ومدت ايدها تسلم..
سلامه: شحالج؟
شرملى: بخير ماما شحالج انتي؟
سلامه : الله يسلمج..هاه ويا منو يايه؟
شرملى: بس انا وباشا وتاما..
سلامه استغربت: ليش؟
شرملى: بابا راشد سوي سلام ويقول خلي تاما عندج عشان ساعد في شغل بيت...انتي كتير تعبان...
انقبض قلب سلامه..يعني ابوها حس فيها وحس في تعبها وشاف حالها كيف غادي..
سلامه بطرف عينها: شرملى منو؟؟ حمدان ولا ابوي؟
شرملى: والله العزيم بابا راشد يقول...
سلامه وقلبها يدق بسرعه ومب عارفه شو تقول او شو القرار اللي ممكن تتخذه....فتمت تطالعهن...
شرملى: يالله انا لازم يروح...
سلامه: سيري هاتي لي تلفون الدريول بسرعه..
وربعت شرملى ويابت تلفون باشا واتصلت بليلى..
سلامه: شحالج عمووه؟
ليلى: بخير غناتي شحالج؟
سلامه: الحمدلله..
ليلى: من وين تدقين مب جنه تلفون دريولنا..؟
سلامه تبتسم: هيه...بغيت اتخبرج من شي؟
وخبرتها سلامه السالفه اللي استوت الحين بس ما يابت لها طاري زيارتها الاخيره...
ليلى: والله ما عندي فكره خليها عندج لين ما اتخبر راشد..
سلامه مبتسمه: اوكي...
بندت سلامه عن ليلى ووقفت ويا البشاكير شوي وعقبها ردتهن كلهن بيت اهلها...وردت داخل وهي مرتاحه وايد يكفيها احساس ان ابوها طرش صوبها الخدامات...يعني انه حسبها..
وفي حجرتها...
احمد: منو هاييل؟
سلامه : ناس..
احمد: ادري مب حيوانات..بس شو يبون؟
سلامه خبرته كل شي. عن البشاكير..
احمد استغرب وحب يعرف ليش ردتهن: وليش ما خليتيها تساعدج؟
سلامه: احمد ...الاصيل يتمي اصيل ما تغيره الفلوس ولا العز...وانا اقدر اشل بيت بروحي بدون خدامات..صح في البدايه ما عيبني الوضع بس صبرت وقلت يمكن الله يفرجها..والحمدلله ربي عوضني اللي احسن من الفلوس والخدم والحشم..عوضني بك انت وبامي اللي هي امك...وفطيم بالاخت اللي انحرمت منها طول عمري...
ونشت تيلس عداله على الكنبه..ولوت على ايده..
سلامه تغمض عيونها: وانت تغنيني عن كنوز الدنيا كلها..ولا يغنيني عنك بشر..
احمد قلبه يدق بسرعه بس ماعرف يرد عليها..هاي الدلوعه اللي خذها وتحرا بيكون صعب تفهمه وتتأقلم وياه..هذي تأقلمت وفهمته وعاشت بخير وسعاده..
احمد: ما بتقولين لي ليش متضايجه..؟
سلامه تبتسم: انسى ..مافي داعي ..ترا مرات يكون من الافضل اننا ما نتكلم عن الماضي..
احمد مستغرب: شو من ماضي؟
سلامه تبتسم: ولا شي..احمد..خلنا نطلع نتعشى الليله بروحنا...
اول مره تقولها سلامه واول مره تحسس ريلها انها تبغي خصوصيه...وعرف من يوم عرسبها انها اربع وعشرين ساعه تبغي تم ويا امه واخته ومالها بارض تطلع وياه ابد بروحهم رغم انه حاول فيها بلياار مره..
احمد: ماصدق انتي صاحيه..يالله يالله قومي البسي اخاف تغيرين رايج...
سلامه تضحك: ما بغيره يالله نش...
ونشت قبله بس يرها بقوه صوبه...وتم يطالعها عقبها ابتسم..
احمد: يالله البسي بسرعه قبل تيينا فطيم الحشره..
سلامه تضحك: اسكت لا تسمعك الحين وتاكلنا..
لبست سلامه واحمد لبس وطلعوا ويا بعض..كم كثر كانوا محتاجين لهالحظه يتمون بروحهم يعيشون لحظاتهم السعيده والخاصه..مثل عصفورين اجتمعوا على حب بعض...وود بعض وصبروا على الشدايد ونالوا الحب كل الحب...بس السعاده هل ممكن تدوم؟ والحب هل ممكن يستمر...؟ ولا لازم حياتنا ما تخلى من المنغصات..من يدري..هذي هي الحياه....
.....................


الليله كانت الليله الاخيره لحصه في بيت اهلها وباجر ليلة العرس الموعوده..اللي عاشت العمر كله تترياها..ويوم وصلت هالليله عافتها حصه من الخاطر وعافت سيرتها وعافت الدنيا والناس والقدر والعيشه اللي اجبرتها تخضع لهالزواج...كانت تحاول تسلي عمرها وتبتسم وتنسى بس هيهات..كل ما خلت مع نفسها تذكرت وكل ما طلعت الحوي ومرت من عند الحديقه وكلما طلعت السوق شافت الخيام منصوبه جدام البيت تعلن لها انها خلاص باجر بتصير حرمة حمد ولد عمها..في حجرتها عقب ما جهزت كل الشنط ويلست ويا امها وابوها وخذت منهم التوصيات وسوالف الاهل للعروس قبل تعرس.. ووصايا الام بالسنع والاخلاق..
طلعت حصه فوق ما تدري شو من قدر مرسوم لها ولا شو من دنيا تنتظرها...الليله ما شافت ليلى ابد ولا دقت لها من امس...تحس افتقدتها وايد وبتفقدها اكثر عقب العرس...يالله يالعرس شو تسوي..صرت عذر للقطاعه وبعاد الناس والاهل عن بعضهم...
تخيلت حصه ليلى عقب سنه ولا سنتين وكيف بتمر عليهن ايام ما يدقن لبعض وما بتشوف ليلى اللي بتكون تستحي تتصل لحصه وتزعجها وهي عايشه ويا ريلها...
هذي انا بعرس وبخليها...صح ما بنفترق وبنتم كلنا ببوظبي بس والله يا العرس انه يغير ويغير وايد مب شوي بعد...يدق الباب ويقطع المونولوج الروحي لحصه..
عفرا: عمتي رقدتي؟
حصه: لاء ادخلي الباب مفتوح...
دخلت عفرا بس ما كانت بروحها...كانت شاله وياها لحافها ومخده..وابتسمت..
حصه طالعتها مستغربه..
عفرا: برقد عندج اليوم..
حصه : والله؟
عفرا تلف على الباب: تعالن..
ودخلت سمر وحمده كل وحده ماسكه لحافها ومخدتها...
حمده: عادي ولا لاء؟
سمر: اكيد انا ما تبوني..؟
حصه خنقتها عبره: بترقدون هني كلكم.؟
عفرا: اذا ما عندج مانع..!!
حصه بتصيح: لاء عادي يالله فرشن الارض بنرقد كلنا تحت محد يرقد على الشبريه لانه ما بتوسع الا وحده..
عفرا: وهالوحده بتكون انتي..
حمده: اكيد لانج عروس ولازم ترتاحين..
سمر بصوت مخنوق: ولاننا ما بنشوفج مثل قبل...
سمر يتها صيحه وصاحت صدق...هني حصه ما مسكت نفسها ويلست تصيح..حمده عصبت على سمر وطالعتها بنظرة غضب بس ما حست بعمرها الا انفجرت هي الثانيه وتمت تصيح...وعفرا يلست تطالع فيهن بحزن مستغربه من الحاله اللي يتهن..وقربت من عمتها..
عفرا بصوت واطي عشان محد يحس انها بتصيح: عمتي شو هالحركات؟
حصه تمسح دموعها: الله يغربلج يا سمر..
اما حمده وسمر كانن مسويات مناحه لا صارت ولا استوت...
عفرا حرجت: مب منكن من اللي يقول لكن تين وياه..عيب عليكن شو هالحركات السخيفه..الحين زين تصيحنها وهي عروس انتن تبغنها باجر تنش متنفخه من الصياح..؟
حمده تمسح دموعها وتدز سمر: هالسخيفه صيحتني...
سمر تحاول تسكت: انتي سخيفه...
حصه تبتسم: زين بترقدن الحين؟
عفرا: لاء بنسولف شوي وعقب بنرقد..بس لا تخافين ما بنسهرج وايد...
وقبل ترد حصه كان باب الحجره يدق...وطالعن البنات في بعضهن من بيكون يا ترى اللي يايينهن هالحزه...
عفرا: من؟
سمر شردت ورا حصه: يمكنه ذياب.؟
حصه: وييه فديته قومي عني بشوفه...
حمده: قولي من بصوت عالي...
حصه: منو بييكن انصاف الليالي غير اهل البيت..؟
ونشت حصه تبطل الباب ودارت بها الدنيا وهي تشوف عبدالله وخليفه واقفين مبتسمين لها..هني صدق قبل حتى لا تقول لهم دخلوا طاحت بثقلها على خليفه تصيح وصدق هالمره كسرت خواطرهم كلهم ..اولهم عبدالله...
خليفه وقلبه يعوره: انتي للحين يا حصه ما عقلتي..وانا تحريتج بتفهمين..
عبدالله بحنيه: يالله يا حصووه شدي الهمه انتي عروس وهالدموع وفريها للكوشه...
عفرا شافت ابوها ويلست على شبرية حصه وما عطته ويه..وحمده وسمر ردن يصيحن..
عبدالله يستهبل: يالله طلعن برا بنرمس اختنا شوي..
عفرا تطالع عمها: ان شاء الله..بس بنرد لاننا بنرقد هنيه...
عبدالله: ليش ان شاء الله؟
عفرا: بس جي حركات..
عبدالله انتبه على سمر وحمده اللي يصيحن: هذيل اشفيهن..شافن البنت تصيح صاحن..حشر مع الناس عيد ولا شو السالفه..؟
عفرا تبتسم: مادري والله..
وخطفت عفرا حذال ابوها دون ما تعطيه كلمه ولا حتى طالعته وهو مسك حصه من ايدها ودخل وياها الحجره..وطلعن البنات وتم هو وعبدالله وياها...
عبدالله: انا قلت كبرتي على هالسوالف يا حصيص..
خليفه: حصه ما تكبر وتم ياهل اصلا..
حصه تبتسم بدون نفس..
عبدالله : يالله عاد بلا نحاسه ونكد ابتسمي واضحكي انتي عروس..
خليفه: خلها تتغلى علينا..
حصه ساكته وتنهدت..
ويرن تلفون خليفه...
خليفه: مرحبا الساع..يا مرحبا ملايين..
وينش ويأشر لهم ان عنده تلفون مهم وما بيرد لهم..وحب حصه على راسها وطلع عنها...
عبدالله مبتسم: شو نفسيتج الحين؟
حصه منزله راسها: عادي خلاص بتعود..
عبدالله: خلج متفاءله وصدقيني الله بيوصل لج اللي تبغين..
حصه تتنهد: تفاءلت وماياني اللي ابغي؟
عبدالله: عندج ثقه بالله؟
حصه: اكيد..
عبدالله: يقول الله في حديث قدسي على لسان الرسول صلى الله عليه وسلم.."انا عند ظن عبدي بي......"...واثقه من الله لدرجة انه يعطيج الثقه؟
حصه تنزل راسها: مادري...
عبدالله يمسح على راسها: الله يوفقج يااختي حبيبتي والله اني ادعي لج من قلبي...
حصه بصوت مخنوق: الله يسمع منك..
عبدالله يتحنحن: حصه!!
حصه: هاه..؟
عبدالله: ابغيج في سالفة وايد حساسه بس ما بغيها تطلع من بيني وبينج وبين اصحاب الموضوع..
حصه: تم...
عبدالله : لحظات..
وطلع عنها ورد على طول وفي ايده اوراق وظروف كبار...
حصه: شو هاه؟
عبدالله يتنهد: حصه...انا قررت اعرس..
شهقت حصه: وبدريه يا عبدالله؟
جمع عبدالله الباقي فيه من ثقه وقوه وحاول يكون هادي قد ما يقدر..
عبدالله: حصه انا محتاج شي يكون في حياتي ولقيته وماقدر بعدما لقيته اني افرط فيه وهالفرصه ما بتعوض مرتين...
حصه: زين شو اللي حصلته ومن البنت اللي تبغيها؟
عبدالله حط عينه في عيون حصه عشان يعرف ردة فعلها المباشره: ليلى بنت خالي ناصر..
لو كان لعيون حصه مساحه اكبر تنفج بها جان فجتهن زود عن اللي سوت...حتى التنفس ما تنفست ولا أي تعبير غير الصدمه والذهول وحتى لو صح التعبير الصعقه الكهربائيه ممكن تسوي فيها جي..
عبدالله: هاه بلاج؟
حصه: ليلى...!!!؟؟ ربيعتي ما غيرها؟؟
عبدالله يتنهد: هيه...
حصه: كيف ومتى وليش؟
عبدالله: خيبه كيف اجاوب؟
حصه: ارمس جد...
وخبرها عبدالله كل اللي قاله لحمد حرفيا وعن تعلقه بشيخه وانه ما يقدر يعطي ليلى أي حب مثل بدريه..يمكن يكون في احترام لكن الحب ويقصد حب بدريه لا يمكن يكون...
حصه اللي مارضت على ليلى: وهي شذنبها تعيش تعيسه..ما يكفيها اللي ياها..؟
عبدالله: ......
حصه: عبدالله انت مب اناني ليش جي تفكر؟
عبدالله: ماقدر احكم على شي بس يمكن مع الايام احبها...من يدري..؟
حصه: يمكن بعد؟ وعشان شيخه بس؟ حرام يا عبدالله وبعدين ........
عبدالله: هي تعرف اني ما ييب عيال صح؟
حصه: هيه .. بعد بتحرمها من الامومه؟
عبدالله يعطي حصه الاوراق: هذي هالاوراق وعطيهن لها...خليها تعرف كل شي يا حصه هاي كل فحوصاتي ورحلات علاجي..حطينها في ويها امر واقع..قولي لها اني ابغيها وباخذها هي وشيخه وياي دبي..وحسسيها ان مافي ريال بيخليها تشل بنت اخوها وياه ولا بيرضاها ابدا...
حصه تنهدت: شو اسوي انا؟
عبدالله رافع حياته: هذا سؤال بذمتج؟
حصه استحت: اوكي متى؟
عبدالله: متى بتييج؟
حصه: الصبح اول ما يوصلني راعيات الصالون...
عبدالله يبتسم: هالكثر علاقتكن قويه..؟
حصه تبتسم اكثر: هاي ليلى يا عبدالله..اللي ولا انسانه في هالدنيا كلها تسواها عندي..
عبدالله مرتاح: الله لا يحرمكن من بعض..ولا يحرمني من شيخه...
حصه بنظره بارده: لا تسمع حد هالرمسه حرام عليك والله تاخذ العمه عشان بنت اخوها..
عبدالله: الامل بالله مب ضعيف وبامكانها تخليني احبها ..عندج شك في ربيعتج؟
حصه: ويا ويهك..بنت خالك هذي قبل تكون ربيعتي..
عبدالله ينش: يالله عاد ما بنأخرج ارقدي وراج نشه باجر الله يكون بعونج..
طلع عبدالله والبنات دخلن حجرة حصه ويلسن وياها شوي وعقبها رقدن على طول...وهي بندت الليتات كلها وانسدحت على شبريتها في جو مظلم ويت ليلى على بالها...
حصه: ليلى ذاكرتي؟
ليلى: اكيد..وانتي؟
حصه: لاء..
ليلى بجديه: ما بغششج لا تحاولين...
حصه: حرام ليلوه انا ربيعتج..
ليلى: بخبر خالتي عايشه بعد انج ما تدرسين..
حصه: ليلوه..والله ان خبرتي لا اقول انج تتراسلين ويا ناصر بالاشعار..
ليلى شهقت: خلاص والله ما بقول...
حصه بتشفي: جي اباج..بتغششيني...
ليلى تبتسم وتدزها من جتفها: اكيد يا غبيه انا بس كنت اسولف وياج..
حصه بشرانيه: هيه واضح..
نزلت دمعه من القلب على خد حصه وهي تتذكر ليلى..ليلى ربيعتها وتوأم روحها وغناتها...الغاليه والاخت والصديقه...يالله يالدنيا...وين بتودينا عن بعض....!!..ماعرف حياتي مع حمد كيف بتكون ولا كيف بتعامل وياه ولا كيف بيسوبي..اخاف يوم من الايام يمنعني عنها وماروم اقوله شي..ترايه الا حرمه وجدام كل ريال لازم اسكت...
يرت تلفونها من تحت المخده وطرشت مسج لعبدالله...
" شو تسوي؟"
عبدالله اللي كان منسدح على شبريته في حجرته هو وبدريه تحت في بيت ابوها...
"ماشي افكر في شيخه..."
حصه.
"ما عندك سالفه!!"
عبدالله يطرش لها صوره..وترد تطرش له مسج
"حسبي الله على ابليسك فطستني ضحك..شو هالدرام اللي مطرش لي صورته زيغتني وانا عروس"
عبدالله عصب..
"هاي شيختج يالعرووس.."
ضحكت حصه.
"يالله تصبح على خير وراي نشه..وشوي شوي ترا التفكير في الديناصورات يحذرون منه"
عبدالله
" وانتي من اهله...لا توصين حريص.."
تنهدت حصه..ما كان فيها رقاد ولا هي قادره ترقد اصلا...ليلى اليوم ما دقت لها خير شر..ماتصلت بها ولا طرشت مسج..ليش شو فيها؟
طرشت لها حصه مسج..
"لحقتي تتبرين مني..للحين ما عرست.."
اتصلت ليلى..
ليلى بصوت واطي: الو..
حصه تقلدها: انا بهمس بعد..عندي العايله كلها راقده..
ليلى وقلبها يعورها: يودعوونج..
حصه: لا تصيحيني شبعت صياح والله لو يمعوا دموعي عادي تروي لج مزرعه...
ليلى خنقتها العبره من سمعت حس حصه..وما رمست..
حصه: ليكون انتي الثانيه بتقلبينها مأساه...؟
ليلى تمسح دموعها بهدوء:لاء..
حصه: لحوول..اقولج بندي خلنا نسولف بالمسجات احسن...
بندت ليلى واتصلت حصه بامارات كول وطرشت لها اغنيه على طول...
"بعد ماخترت انا حبك على الخلان واغليتك...وبديتك على روحي..تظن انساك لا مقدر..بصبر نفسي يا عمري ولو طال المدى جيتك...لك الاشواق تاخذني ولا يمديني اتصبر.."
ليلى طرشت لها بالمثل...
"مايهم جفف دموعك..ما يهم اضوي شموعك..ما بقى شي يا قلبي يسوا دمعه من دموعك...لا يا قلبي لا تكلم..لا يا قلبي لا تألم..هذا هو اللي تحبه لو نسيته كان ارحم.."
حصه طرشت مسج..
"مثل ويهج الاغنيه.."
ليلى
"يعني حلوه ولا بايخه"
حصه
"شو ويهج في المنظره بايخ ولا حلو..احكمي"
ليلى
"انتي شو تشوفين؟؟"
حصه
"انتي احكمي على نفسج.."
ليلى ماردت وحصه تمت تترياها..وحست ان ليلى زعلت..هي تدري انها بتصيح لو رمستها..وهي ما تبى تضايج عمرها اكثر..ففضلت انهن يبندن عن بعض..ما تبغي تحسس ربيعتها انهن ممكن يتفارقن او يبتعدن عن بعض..
حصه تمت تتريا مسج من ليلى او أي شي بس ليلى ما ردت عليها..
"ليلى انتي زعلتي؟؟"
نفس الشي ليلى ما ردت والظاهر انها صدق زعلت..فدقت لها حصه على طول..وردت ليلى..
حصه: شوفيج ما تردين على مسجاتي؟
ليلى تبتسم: خلص رصيدي..
حصه تضحك: تحريتج زعلتي..؟
ليلى: من شو؟
حصه: غباءنا...
ليلى: انتي اما انا لاء...
حصه: ليلووه..
ليلى تتنهد: هاه؟
حصه: باجر الصبح تعالي من وقت ابغيج في سالفة مهمه..
ليلى: عن شو؟
حصه: قلت باجر مب اليوم..
ليلى: ايه شو هي تعرفيني ماروم اصبر...
حصه: خليها سبرااايز على قولة هاييج ربيعتج الخايسه روضووه..
ليلى تبتسم: حليلها للحين شاله في خاطرج منها؟
حصه: جب انتي...ليكون بس عزمها حمد.؟
ليلى: عادي مثل ما يت عرس ناصر بتيي عرس حمد ليش لاء...بس بتكون مجروحه حليلها..
حصه: يعله ما يبرى..
تضحك ليلى وسولفت ويا حصه شوي وعقب بندت عنها عشان ترقد وبتشوفها باجر في بيت مبارك...
........................
يوم العرس الصبح ... بعد ما تأكد حمد ان كل شي جاهز ومرتب مثل ما يريد ... قرر يروح بنفسه اييب ذياب من الكلية ... واوكل امر التجهيزات الاخير والامور الطارئة اللي ممكن تصير لعبدالله وخليفة عيال عمه ... بعد ما ركب ذياب عداله في السيلرة وهم في الطريج

ذياب: مبروك المعرس عقبالنا يا رب
حمد: وين تو الناس .. بعدك صغير اشبع من الدنيا اول
ذياب: ليش كل الناس حمد يسمحولهم يشبعون من الدنيا ... لا يسمعك الشيبه بيذبحك
حمد: هاهاها ااااه من الناس اللي تغار
ذياب: الا صدق حمد انت بعدك ماخذ على خاطرك .. لاني (وسكت ما قدر يكمل)
حمد: لا خلاص انسى اللي صار صار وما نقدر نرده الحين
ذياب: كيف رضت حصه؟... من اخر مرة قعدت وياها حسيت انها مستحيل ترضى او تسامح
حمد: مب بكيفها غصب عنها ... رضت او ما رضت مب مهم الحين
انصدم ذياب من رمسة حمد وحاول يستوعب شو يقول .. يعني حصه بتعرس غصب عليها الحين ... ولا بتعرس وهيه مب راضية عليه وسأل: كيف يعني
حمد: اللي فهمته
ذياب: بتاخذها غصب ؟؟؟ ...
حمد: ما خلت لي مجال للتفاهم وياها
ذياب: بس
حمد: كنت تريدني اخليها تزوج ولد خادم ... ونقول بعدين ليت اللي صار ما كان
ذياب: لو انت قلت لا مستحيل حد ايوزها لو تمت قاعده بيت ابوها عشر سنين بعد
حمد: وليش اصبر عشر سنين ... من الحين احسن
ذياب: على الاقل ما عطيتها فرصة انها تنسى
حمد: ويضيع عمرنا بزياده ...
ذياب: اكيد الحين تكرهك
حمد: اكثر مما تتصور
ذياب: وبتاخذ وحده تكرهك
حمد: ادري انه تحت هالكره حب اكبر منه .. ولا ما كرهتني هالكثر
ذياب: مب قادر افهمك
حمد: ذياب انت صغير ويمكن اصغر من اني اقولك هالكلام.... بس انا ادري ان حصه مثلي تشبهني في اشياء وايد ... خفت من الطريقة اللي ممكن فيها تنتقم لكبرياءها... وخفت عليها من الحقد اللي بدا ينتشر في قلبها
ذياب: حصه مربايه ومسنعه يا حمد مستحيل تسوي مثلك
حمد: ما تعرف الحرمه عدل يا ذياب ... كل شي الا كبرياءها اذا ضاع حبها ... في داخلها جحيم يحرق الدنيا باللي فيها .. وتحتاج لحد تصب عليه كل غضبها وحقدها ... وبالنسبة لحصه افضل اكون هالحد على أي حد ثاني ممكن بعدين يفضحنا
ذياب: تفكيرك مب منطقي
حمد: ما اقدر اتخيل ان حصه في النهاية تكون لغيري ... حصه طول عمري لي ... يمكن انا ما احبها مثل ما حبتني.. حبها لي استمر من ايام ما كنا صغارفيه براءة ... و فيه جنون حب المراهقه... وقوة حب الشباب ... وانا جربت احب بجنون مرة وفشلت ... ما اقدر اجاريها في هالحب ... بس بعد اكيد لي طريقتي مستحيل اكون ما احبها في النهاية حصة بنت عمي ... وما اريد انلدغ من نفس الجحر مرتين
ذياب: بس اكيد بتكرهك بزياده اذا اكتشفت انك ما تحبها مثل ما تحبك ... اصلا هي تدري انك ما تحبها
حمد: ذياب شو تعلمت في الكلية ... ليش انت حاب الكلية
ذياب: (وهو مب فاهم سبب تغيير حمد للموضوع) لاني اكتشفت اني اريد هالشي ... واني اخدم بلادي
حمد: وليش بتخدم بلادك
ذياب: شو هالسؤال ... لاني احبها
حمد: وقبل ما كنت تحبها
ذياب: اكيد .. انا طول عمري كنت احبها ... بس ما كنت اعرف شو اريد وكيف ارد لها الجميل
حمد: حتى انا حصه بالنسبة لي وطن ... اكيد انا احبها ... ويمكن احبها الحين بطريقة غلط وما اعرف كيف احبها صح .. انت عرفت كيف تحب الدولة صح بانك تخدمها وتحميها ... وانا اتريا الحظة اللي بحب فيها حصه صح ... حصه اللي طول عمرها تحملتني... ودفعت وايد من اعصابها وكرامتها مقابل حبها لي ... انت لقيت فرصة انك تحب الدولة صح ... وانا اتريا هالفرصة ... فهمت علي الحين
ذياب: اقولك شي
حمد: قول
ذياب: ما كنت اكره شي ايام المدرسة كثر حصص الفلسفة ... الله يخليك غير الموضوع وحل مشاكلك بروحك بعدين ... انت بعدك ما عرفت حصه بنت مبارك زين
حمد: هاهاهاهاها ان شاء الله عي ... اوامر ثانيه
ذياب: هيه منو عزمتوا من ربعي
حمد: والله اللي اعرفه عبدالله اخو حميد وكلمته في التيلفون ... وانت كلم اللي تبغيه بالتيلفون
ذياب: خلاص بكلمهم الحين... لو انك سببت لي صداع من رمستك اللي ما فهمت منها شي

وانشغل ذياب بالتيلفون يكلم ربعه.. اما حمد رد بتفكيره هل اللي يسويه صح ام مجرد انانية منه ... ولانه يحب نفسه اكثر من أي شي ثاني في هالعالم
.
.
وصل حمد ذياب بيتهم وراح عنه بيرد الشقة يتسبح ويغير ثيابه ونفس الشي ذياب بس اول شي قرر يروح يسلم على امه ... لانه يدري بابوه الحين صوب خيام العرس ... دخل حجرة امه اللي استانست على شوفه وهو بدريسه ... ونشت لوت عليه وعيونها تدمع

ام خليفه: فديتك يا ولدي شو سوبك... ما عندهم اكل ياكلونك جيه غادي ميت
ذياب: هاهاهاه امايا عندهم اكل .. بس والله ما نشتهي ناكله
ام خليفه: واعلي عليك يا الغالي ... مرة صالختنك الشمس
ذياب: حلو امايا ... الناس يدورونه هاللون
ام خليفه: لين متى بتقعد هنيه
ذياب: برد الكلية الليله ان شاء الله
ام خليفه: وين ترد الليله ... ما بقعد وياك ولا بقدر اخذ علومك ...
ذياب: ياللا ماعليه هن الا شهرين ... عيل ابويا وين
ام خليفه: ابوك صوب الخيام ... اكيد الحين بيرد يبدل كندورته وبيروح
ذياب: عيل انا بروح اسبح بسرعه عشان اطلع وياه يوم بيرد
ام خليفه: ماعليه غناتي .. مرخوص لو اني ابغيك تقعد عندي
ذياب: بنعوضها ان شاء الله.. البنات وين
ام خليفه: عند حصه فوق كلهن ... حتى بنات خليفه
ذياب: خلاص بروح اسلم على حصه والبنات امايا
ام خليفه: روح فديتك روح غناتي ... عسى ر بي يحفظك ان شاء الله

طلع ذياب من عند امه وهو يبتسم.. حليلها امه طول عمرها وهي تدعيله وتدلعه ... راح فوق وهو متوله على حشرة البنات ... بيسلم على حصه قبل لا يطلع ... اكيد بعدين بيكون زحمه عندها ...

وصل ذياب فوق ووقف جدام باب حجرة حصه وهو يسمع اصوات بنات اخوه وخواته كلهن في الحجرة يضحكن ويسولفن ... فكر يدق الباب ولا يفجه ويفاجئهن في الاخير قرر يفج الباب بالقو ويشوف تأثير وجوده على ويوهن ... وفج الباب بالقو وذزه وهو يقول بصوت عالي : انا يييييييت
يوم شافنه البنات .. سكتن كلهن مرة وحده وتفاجئن به مع انهن يدرن انه بيي .. واول وحده صارخت كانت حمده بنت خليفه وبعدها سمر وعفاري قامن يناقزن ويصارخن ... وسلمى وحصه وشمسه يضحكن وهن واقفات بيروحن يسلمن عليه ... بس البنات سبقنهن وقعدن يحببن فيه ويلون عليه

ذياب: خيييييبه شو هالحب كله ... ما ادري منو كان يباني اموووت قبل لا اروح
حمده: بسم الله عليك عمي ... والله تجنن بالدريس ... لو انه لونك غادي خايس .. بس بعد حلو
عفاري: اكيد يشبه ابويا فديته
ذياب: طالع هاي مصدقه نفسها ونه يشبه ابويه فديته ... اييي انتي يا ماما انا احلى عن ابوج الشيبه
عفاري: ودك انت ابوي شيبه ... شباب فديته
ذياب: زين قومن خلني بروح اسلم على خواتي والعروس ((وراح اول صوب شمسه بيسلم عليها))
شمسه: مرحباااا ملايييين ... قالولي ذياب اصطلب وغدا ريال ... بس قلت ما اصدق لين ما اشوف بعيني
ذياب: هاهاهاه ... شو رايج فيني الحين بعد ما شفتي
شمسه: لا زين اصطلبت ... زين ما وديتك ايطاليا
ذياب: اوووووه جان ما رديت ماخذ ايطاليه ... لا جيه احسن
سلمى: شحالك ذياب
ذياب: الحمدلله شحالج انتي غناتي ... شو هالجمال .. شو هالحلاه كلها شو خليتي للبنات والعروس
سلمى: هاهاها الله يجبر بخاطرك يا ذياب .. اللا تعال بلاك غادي اسود
ذياب: تراه قاعدين في الثلج ... كل مكان ثلج ولا نشوف الشمس ... بعد من شوه غادي اسوي
سلمى: استخدم سن بوك ..
ذياب: ماعليه .. وينك يا بو خليفه تسمع بنتك شو تقول
سلمى: لاااا الله يخليك الا بو خليفه
ذياب: ياللا عاد قوموا خلوني اسلم على العروس (( وراح صوب حصه ولوا عليها))
حصه: تو الناس
ذياب: اخلي السلام الكبير للاخر ...
حصه: فديتك يا اخوي ... زين يوم ييت ولا ما كنت بعرس
ذياب: هيه بيخليج حمد ما تعرسين
حصه: هاها ماعليه على الاقل احلم
ذياب: ياللا حصه مبروك ... وترى حمد ريال زين ماعليج من رمستي الخايسه
حصه: الله يستر ... انت شحالك
ذياب الحمدلله بخير ... متوله على البيت وعليكم مووووت
سمر: ذياب ... اقولك نكته

ضحك ذياب وضحكوا كلهم اللي كانوا في الحجرة على سمر ... ما تيوز عن سوالفها ... عفاري وحمده كانن واقفات على طرف يشوفن عمهن يسلم على عماتهن وهن يبتسمن ... وسمر وياهن صح بداخلها رهبه من ذياب بس بما ان الكل كان مستانس بوجوده وفرحان ... حبت تشاركهم وناستهم وما عندها غير النكت تتونس بهن

ذياب: لا مب متفيج الحين .. بروح اتسبح عشان اطلع ويا ابوي يوم بيرد
سمر: حرام والله بقول والله بقول ...
ذياب: بعدين
سمر: محد يسمعني حتى يوم العرس محد يسمعني
عفاري: ماعليه سمر انا بسمعج قولي
سمر: ما اريد
ذياب: قولي ياللا وان طلعت مب حلوة ... تشوفين هالحزام
سمر: هيه شو فيه
ذياب: على ظهرج
سمر(بخوف) لا مااريد ما بقول خلاص
حصه (بتشفي) لا قولي قولي
سمر: امممم مب الحين بعدين
ذياب: لا قولي قولي بسمعج
سمر: لا بعدين بعدين .. روح اتسبح ابوي بيي الحين

كانوا كلهم يضحكون على موقف سمر اللي الكل يترجاها تقول نكته وهي مب طايعه خايفه من تهديد ذياب ... وطلع ذياب وهو بعده يضحك عليهم ... راح حجرته بيسبح وبينزل يسلم على ابوه واخوانه
.................
طلع حمد من شقته بيروح صوب خيام العرس قريب بيت عمه ... بس في الاخير قرر اول شي يمر على امه يسلم عليها ويشوف اخبارها ... هيه بعدها مضيجه منه لانه بيسكن حصه في الشقه .. ولانه ماطاع يأجل العرس وياخذ شي من عندها ... ويدري انها من وراه زيدت بيزات زياده حق ام خليفه تعطيهن حصه ... بس فضل يطنش الموضوع عشان ما يدخل في معركة وياها... ما بند سيارته عشان ما يتأخر داخل ... ودخل صوب قسمها اللي دومها قاعده فيه .. حصل باب صالتها مفتوح فدخل

حمد: امايا ... امايا وينج ؟
ام حمد: (وصوتها ياي من صوب الحجرة) هنيه غناتي ... يايتنك صبر شوي (وطلعت من حجرتها وعلى ويها ابتسامه منورتنه) هلا بولدي هلا بالمعرس ... هلا بشيخ الرياييل...
حمد: هاهاهاها شحالج امايا
ام حمد: بخير الحمدلله ... هاه غناتي قاصر عليك شي تريد شي
حمد: لا امايا ياي اسلم عليج بس قبل لا اروح صوب الخيام
ام حمد: فيك الخير يا غناتي ... عساك موفق وبالمبارك يا الغالي
حمد: هاه انتي شو استعداداتج
ام حمد: شوه من استعدادات بعد ... الا راعيات الصالون بين بعد نص ساعه ... واللي بتحني شعري بتي الحين ...
حمد: هاهاهاهاها فديتهم اللي بييون ايحنون شعرها من الصالون
ام حمد: عيل هذا سؤال يا حمد ... جان اتخبر عن الثوب والكندورة زهبناهن من امس ودخناهن وعطرناهن بعد ...
حمد: حلوة انتي حلوة لو لبستي فستان مب الا ثوب
ام حمد: صدق ما تخيل يا حمد ... وين تباني البس فستان
حمد: ادعيلي امايا الله يوفقني في هالعرس
ام حمد: والله يا حمد ادعيلك كل يوم وفي كل وقت .. ان الله يهديك ويرضى عليك وترد تسكن عندي ... ما ادري شو بيقعدك في بيت الفيران اللي عايش فيه
حمد: ان شاء الله يا ام حمد تامرين امر
ام حمد: (وهي ماسكه وناستها من جملته الاخيره لا يكون كلام مثل كل مرة) صدق ولا الا تبغي تسكتني
حمد: افاااااا عليج .... رضاج يا الغالية رضاج
ام حمد: دومني راضية عنك يا ولدي ... قلبي ما يطاوعني ازعل عليك
حمد: فديت هالقلب الطيب ... ياللا انا بترخص عنج بروح صوب المعاريس ... ومخلي السيارة شغاله ياي اسلم عليج
ام حمد: صبر والله ما طلعت قبل لا اتدخن
حمد: بروح بيت عمي بتدخن هناك
ام حمد: جيه بعدني امك وما ملجت للحين تدخنك حرمتك ... بعدين العود اللي عندي اغوى عن عود ام خليفه... وميودتنه لعرسك ... شله وياك بيدخنون منه الرياييل
حمد: هاهاها ان شاء الله يا ام حمد

قعد حمد عند امه لين ما يابت بشكارتها المدخن ودخنته.... وعطته العود وطلع من عندها وهو مستانس ... بالرغم من كل شي هاي امه وحتى وهو في قمة قسوته وجفاه ايي عندها ويحن وينكسر ... دومك يا حمد معذب اللي يحبونك ... بس ليش ؟؟
***
في بيت بو خليفه ... كانت ام خليفه بعد تدخن بو خليفه وذياب اللي واقف وراه يتريا دوره ... وهم يسولفون ويتخبرون ذياب عن دوامه .. وبو خليفه يخبرهم عن اللي سووه في الخيام

بوخليفه: بس يا ام خليفه ... المليج في الميلس نبغي نملج بنخلص وبنروح عند الرياييل
ام خليفه: زين بدخن ولدي وروحوا
ذياب: حمد بعده ما وصل
بوخليفه: اتصل في ولد عمك شوفه وين
ذياب: ان شاء الله ابوي
أم خليفه: عبدالله وين بندخنه قبل لا يطلع عند الرياييل
ذياب: كان في حجرته يتسبح
ام خليفه: يا كثر ما تحبون هالسبوح ... اللي يشوفكم يقول مب شايفين الماي من سنين
ذياب: تبينا نروح عند الرياييل ريحتنا خامه

وقبل ترد عليه امه دخل خليفه وهو بعد شكله متسبح ومتسبح مرة ثانيه بدهن العود والعطر والعود اللي من دخل احتشر البيت بريحته هوه

خليفه: ياللا ابوي ترا حمد في الميلس ... عبدالله وين
ذياب: بلاكم كلكم تسئلون عنه
خليفه: بنملج الحين
عبدالله: (اللي توه داخل الصاله) انا هنيه ... ياللا نطلع
ام خليفه: تعال ادخن وين بتروح
بوخليفه: دخنيه بعدين الرياييل يتريون
عبدالله: برد لج امايا
خليفه: تعال ذياب بتيب الدفتر حق اختك توقع
ذياب: ان شاء الله

طلعوا من البيت صوب الميلس ... اللي كان فيه مع المليج ... حمد ورياييل من كبار عيلتهم ... بعد ما سلموا وخلصوا ملجه ... ورد ذياب الدفتر اللي وقعت فيه حصه وهي بحس انها خلاص انهزمت جدام اصرار حمد وعناده ... وانه في النهاية اللي يباه صار وصارت حرمته ... اخيرا هيه حرمة حمد الشي اللي كانت اترياه طول عمرها ... ويوم تحقق لها تحس ان جبدها لايعه ومنقرفه منه .... المهم طلعوا الرياييل صوب الخيام ... وحصلوا هلهم وربعم واصلين .. وناس توصل ... بو ناصر وعياله ناصر وفهد كانوا من اول الموجودين ... وبعدهم وصل راشد وولده حمدان ووياهم مبارك واحمد ريل سلامه ... وموظفين الشركة اللي يشتغل فيها حمد وشركة خليفه ... وربع ذياب... بعد ما سلموا على الرياييل وكل خذ راحته ... راح فهد صوب حمد بيبارك له ويتعذر منه

فهد: هلااا المعرس ... بالمبارك يا ريال ...
حمد: (بعده مغيض عليه ومن دون نفس) اهلين ... شحالك فهد
فهد: هاهاها جان الا بعدك زعلان علينا
حمد: لا يا ريال حصل خير
فهد: والله يا حمد والشاهد علي الله ... لو ادري ان خاطرك من بنت عمك وانك تبغيها ما ييت صوبها ... بس انت يا ريال طولت والكل قال انك عايفنها وما تباها
حمد: (ابتسم) حصل خير ... في الاخير بنت عمي مالي بد منها
فهد: المهم ما يكون في الخاطر شي علينا
حمد: ماشي في الخاطر الا كل خير يا فهد لا تشيل هم ((وهم يسولفون يا صوبهم ناصر))
ناصر: مبرووك .. لو ان الادارة بتخسرك اسبوعين لين ما ترد تداوم
حمد: ماعليه انت قد الشغل يا ناصر
ناصر: بس الادراه انعفست علينا باستقالة العروس واربيعتها
حمد: هاهاها قول هذا اللي معورنك استقالة البنات
ناصر: الشغل زاد
حمد: ماعليه بنسويله ترتيب .. ويبالنا نرقي حد من الاقسام الباقية مكان البنات
فهد: اااي انتوا في عرس هب في المكتب ... ناصر ودر الريال في حاله

في مكان ثاني كان حمدان واقف ويا ذياب وربعه يسولفون عن الكلية وشغل حمدان ... ويحاولون في حمدان يدخل الكلية ويا ذياب

ذياب: هيه والله حمدان ... صح كراف بس وناسه
حمدان: ياخي ما اريد وناستي انا في الشغل ويا ابوي
ذياب: (وهو يقلد حمدان) شو وناستي في الشغل ويا ابويا ... غادي ذيل ابوك
حمدان: اااي ذيابووو يوز كله ولا ابوي
حميد: هاهاهاها ... يالولاء
حمدان: والله ابوي محتاجني وياه .. ونحن الحين نريد نتوسع شوي في الشغل ...
حميد: ماعليك ذياب خايف من هالتوسع لا يكون على حسابهم هم
ذياب: هب هباك الله .. انت بتكون سبب افلاس ابوي واخواني
جاسم: اقول ذياب شو الكلية وياك ... اكيد كل الدفعه يهال
ذياب: هيه والله .. يعني ما احترامي لك حمدان بس كلهم قوم بوطعش الا انا
حميد: لو انت داخل ويانا كنت بتخرج هالسنة معانا
حمدان: ياللا ماعليه بتعدي الايام على شو مستعيل
ذياب: هيه والله وانت الصادق بنصبر شو رانا

وكملوا سوالف عن الكلية والضباط والشباب اللي وياهم ... بوخليفه كان قاعد ويا بني عمه مجابل العيالة يسولفون ويضحكون ... وشوي الا الشواب قاموا يرزفون وانتبهوا كل الشباب عليهم وحد منهم قام وياهم ... عبدالله اللي كان قاعد ويا خليفه و راشد ومبارك..كانوا يضحكون على ابوهم وعيال ناصر يضحكون على عمومتهم الكباريه...

عبدالله: وين يبون هذيلا
مبارك: خلهم يعبرون عن شعورهم شوي ... ربشوا الصغاريه
خليفه: جيه يقولولكم وينكم يا اليويله ما شفنا شي
راشد: عمي بوخليفه شباب ما يغلبه شي
خليفه: تشاهد يا بو حمدان لا تصيب ابوي عينك بالغلط
راشد: هاهاها عيني مب حاره لا تخاف يا خليفه
عبدالله: انا بروح اازر ابوي وبشل وياي حمد ولد عمي
مبارك: بيي وياك اازر ولد عمك (وضحكوا وهم رايحين صوب العيالة يبون ايولون
خليفه: (يكلم احمد ريل سلامه) اخبار الشغل وياك يا احمد مرتاح؟؟
احمد: الحمدلله اخر راحه
خليفه: يمدحونك بعد في الدايره اللي تشتغل فيها ... ويقولون فاهم شغلك عدل
احمد: الحمدلله من رضا الله
خليفه: ما بتودر شغل الحكومه
احمد: لا وين اودر شغلي ... الحمدلله مرتاح وبعدين ماشي كثر الحكومه امان وضمانات
خليفه: بنعطيك كثر الحكومه تعال عندنا
احمد: هب سالفة بيزات والله ... ولكن امان اكثر وميزات التقاعد لا صار شي لا سمح الله متوفره في الحكومه.. وبعدين انا مسؤول عن هلي كلهم ما عندي خوان لا صارلي شي لا سمح الله بيتلعوزون
راشد: الله يخليك .. توك شباب ما بييك شي
احمد: بعد الواحد يفكر في هله شوي
خليفه: لو الكل فكر مثلك ما كان حد دش السوق ... وانت مثل ما سمعت موهوب في شغلتك ... تدري ان اللي مثلك ييوون مؤسسات خاصه وينجحون
احمد: هذا برع مب هنيه ... ونحن مالنا غير بلادنا
خليفه: بس نحن نبغي مبرج كمبيوتر يسويلنا برامج يديده للمؤسسات ويربط الفروع ويا بعض ... وكان ممكن الجأ لخبير اجنبي ... بس قلت القريب اولى من الغريب
احمد: بس هذا ما يحتاي اني اودر شغلي ... انت بحاجه للمبرمج فتره محدوده ويوم بيخلص شغله
خليفه: تدري كم ممكن ندفع لهذا الخبير اللي بنيبه ... اول شي تذاكره وسكنه ومواصلاته... وبعدين راتب على عدد الساعات اللي بيشتغلها يفوق ال100 دولار في الساعة ... صح ما بنعطيك مثله ... بس نحاول نساعد المواطنين ونطورهم ... نستفيد منهم ويستفيدون وياخذون خبره زياده
راشد: هالمشروع كم بياخذ من ميزانية المؤسسه ؟
خليفه: حاطيله اكثر من مية الف دولار ... بس ندور العرض الاحسن والاوفر ... مجلس الادارة يبون خبير اجنبي.. بس موظفين عندي كانوا يتكلمون عن وجود مثل هالخبرات في البلاد .. وطروا احمد كمثال

كان راشد يناقش خليفه في موضوع المؤسسات والبرمجه وادخال الكمبيوتر والنت مؤسساتهم ... واحمد غارق في افكاره من ناحية عرض خليفه هوه ما يقدر يودر شغله ... عنده ناس مسؤولين منه ... بس عرض خليفه ممكن يحل له مشاكله... يقدر اييب خدامه لسلامه والبيت ... حرمته تعبت ومحل حالها واخته الحين تدرس ... من تزوج سلامه ما قالت له اريد فستان يديد او ودني السوق مقدره ظروفه ... بس شاف حوستها الصبح وهي تدور شي تلبسه الليله في العرس ... وقررت اخر شي تروح اتييب من بيت ابوها تنورة من تنانيرها مالات الحفلات ... طلعه من شروده راشد وهو يكلمه

راشد: والله يا احمد انا اشوف مثل خليفه ... اذا شغلتكم تدخل بيزات افتح لك مكتب لهنوع من الشغلات ... واذا اشتغلت ويا خليفه بتعرفك باقي المؤسسات
احمد: ما ادري يا عمي .. بس محد يضمن العمر وما اقدر اسوي جيه بهلي وابهدلهم وياي اذا فشلت
خليفه: طيب خلك في شغلك ... وتعال المسا عشان تسويلنا البرامج اللي نبغيها... وشغلك معانا بيكون بالساعة واذا صابت معاك ... اشتغل في هالمشروع ...
احمد: الموضوع يباله تفكير ولازم اشاور بعد
خليفه: فكر يا احمد ... بس لا تاخذ وقت طويل بالتفكير ... كل ما طال تفكيرك كل ما خسرنا نحن بيزاتنا
احمد: على خير ان شاء الله

سكتوا عن الموضوع يوم حمد وعبدالله يوا صوبهم وهم مخلصين يوله ... ويضحكون بيشلون وياهم خليفه عشان ايوول .... وفعلا يروه من يده وتم احمد واقف ويا عمه اللي استغل وجودهم بروحهم وقرر يتخبر عن بنته

راشد: شحال سلامي يا احمد
احمد: الحمدلله يا عمي ... لو انه في شي مضايجنها بس ما تقول
راشد: ما قالت لك شي
احمد: ابدا
راشد: على خير ان شاء الله

وسكتوا بعد ما ياهم حمدان ويا ذياب وقعدوا يسولفون عن اشياء ثانيه..
........................
في الطابق الثاني الكل كان مرتبش عقب غدا الرياييل وجي حوالي الساعه 4:30 العصر والحشره اللي برا والبيت مجلوب فوق تحت بالبشاكير وغير كل هاه ان البنات كل وحده بصوب مب عارفه لها ريل من راس...ورغم كل شي والزحمه بس عفرا ما نست ربيعتها الغاليه على قلبها وقررت تتصل بها وهن كلهن في حجرة حصه.....
عفرا: اقولج فطيم متى بتيين؟
فاطمه: عقب المغرب ويا امايه وسلامه..
عفرا: وينها سلامي؟
فاطمه تتذكر: سلامي راحت بيت اهلها بتيي وياهم..
عفرا استغربت: ليش؟
فاطمه: مادريبها ..
عفرا: زين اتصلي بها وتعالن البيت بينا راعيات الصالون بعد شوي شو رايكن تين تتعدلن ويانا..؟
فاطمه: ما بتطيع امي...
عفرا: ذبحتيني كل ما كلمتج امي وامي..زين روحي جربي وأسأليها شوفي شو بترد..
فاطمه تسأل امها حذالها...
ام احمد: خلاص روحي..ما عندي مانع..
عفرا تصارخ: قلت لج ما بتردني فديتها والله..
فاطمه تبتسم: اوكي بنييكن عقب شوي..
عفرا: وسلامه؟
فاطمه: اكيد بتييكم ويا عمتها ليلى...
عفرا: اوكي باي..
وبندت عفرا عن فاطمه ويلست ويا حصه وحمده وسمر وسلمى وشمسه ونوره..يسولفن وحصه مب وياهن ..بدل ما تنشغل بهمها الليله انشغلت بهمين..هم حمد وهم ليلى....
شمسه: متى بيوصلن مال الصالون؟
نوره: المفروض يكونن هني من متى..بس شو نسوي؟
حصه: دبرن عماركن..انا اللي بتعدلني محجوزه عقبي حق ليلووه..
شمسه: يا سلام نحن خواتج وتبدين علينا ربيعتج..
عفرا: انا لو مكانها بسوي نفس الشي...
حمده: هيه والله وانا بعد..
سلمى: الله يعينا عليكن...
سمر يت تربع: قولوا منو اللي ياااااانا...؟
حصه وقلبها يدق: ليلى....!!!
سمر: صح...اجابتك صحيحه..تستاهلين عليها نكته..
طالعتها حصه بطرف عينها..ونشت بتشوف ليلى اللي يابت وياها شيخه..وسلمت على كل اللي موجودات ويلست وياهن يسولفن ويرتبشن وكل حد ترمس عن قطعتها وثوبها وفساتينهن...وكل شوي سمر حادره بفستان...
حمده: هاي من وين تبدل؟
شمسه: خبله كل شوي تفج الكبت وتلبس الجديم ورا اليديد..
سمر: عشان يقولون الناس اني فصلت اكثر عن فستان..والله شو هاه كان خاطري افصل ليش اشترينا جاهز..؟
حصه: انا العروس ماعترضت عليه تيين ويا ويهج وترمسين...
سمر: خلاص شو نسوي..
شمسه تشل شيخه وتلاعبها وشيخه شكلها مب في المود ومعصبه فبعدت عنها وسارت صوب ليلى ويلست فوقها..
سلمى: يالله شهالبزا يا ليلى ..؟
ليلى: ما عندي غيرها خلني ادلعها..
حصه تبتسم وهي تطالع ليلى..مقبول شكلها وتناسب عبدالله..صح ليلى للحين ما برا جرحها وعبدالله عايش على ذكريات بدريه..بس اكيد عقب سنين من الزواج بيفهمون بعض..ليش لاء..؟؟
دق الباب وردت ليلى شيلتها على ويهها...
سمر: منو؟
عبدالله: سمر حد عندكم...
حصه: قول انك ياي تشوف شيخه ووفر على عمرك الرمسه..
عبدالله يضحك: طلعنها لي برا..
واصلا قبل حد يكلمها من سمعت شيخه حس عبدالله ربعت صوب الباب..
شيخه: انا بفتح انا بفتح..
واول ما فتحته ربعت صوبه وهو شلها يحببها...وسار عنهن بس ما انتبه لشي كثر ما انتبه لشيخه...
عبدالله يحبها ويلوي عليها: فديتج والله تولهت عليج..
شيخه تلوي عليه بقو وتحبه بقوه على خده...
عبدالله: ايوه اعدميني يوم عرس اختي...
وفي حجرة البنات...كانت ليلى يالسه حذال حصه.اللي زقرت عفرا عشان تييها شوي..
حصه تهمس لعفرا: طلعيهن برا شوي ابغي ارمس ليلى..
عفرا: اوكي..بس اقول عمتي ليلى..وين سلامه..؟
ليلى: والله يت تاخذ لها بدل حفلات من ثيابها مال اول ما عندها شي وردت بيت ريلها..
عفرا: اها اوكي..يعني بتيي..
ليلى: اكيد..
ومشت عفرا عند عماتها وبدون ما يحسن ان في شي طلعتهن عفرا ويا سمر وحمده ونشت حصه تقفل باب الحجره بالمفتاح..ويلست حذال ليلى على الشبريه وعيونها في عيونها..
حصه: ليلى...الموضوع اخطر مما تتصورين...
ليلى مبتسمه: شو؟
حصه: ليلى انتي للحين مجروحه من ناصر.؟
ليلى تغير شكلها: ليش؟
حصه: بس سؤال..
ليلى: المفروض انتي اخر من يسألني هالسؤال..
حصه: اوكي ليلوه بقولج شي..ولا اقولج احسن انا ما برمس..بعطيج شي وهو من عند حد اباج تشوفينه وتقرينه عدل وتفكرين بعقلج وعقبها بقلبج..ليلى هذي حياتج وانتي حره فيها..محد يروم يغصبج على شي ما تبينه...
ليلى عاقده حياتها ما تدري شوالسالفه..
حصه نشت ويابت لها الظروف والملفات..ومدت ايدها لها..
حصه: والله العظيم يا ليلى ان محد يعرف بالسالفه هذي غيري انا وانتي وثالث لنا بتعرفينه الحين..
بطلت ليلى الملف وشافت الاسم كامل فوق..كانت اوراق وايده متروسه تحاليل واحصائيات ونسب...تقول ان الامل مب معدوم ولكنه ضعيف والقدره على الانجاب ما تتجاوز 55% ...
ليلى بطلت عيونها على الاخر...
حصه: ويقولج بعد انه يتمنى من قلبه توافقين وما تردينه عشان ما ينحرم من شيخه..
ليلى: حصه!!!
حصه: وفوق كل هاه يقولج تقدرين تاخذين هالاوراق وتعرضينهن على طبيب مختص وهو بيخبرج كل شي عن الحاله وحال المريض بالذات...
ليلى بعدها تحت تأثير الصدمه وما قدرت تنطق...
حصه: يقولج صح ما يعرفج عدل بس يكفي انج تربين هاليتيمه الشي اللي يعني ان قلبج كبير...
قبل تنطق ليلى وقبل تقول أي حرف..كانت تشوف الاوراق وفهمت كل شي...فهمت ان عبدالله يبغيها حرمة له على سنة الله ورسوله وتكون شيخه هي بنتهم اللي ولا واحد فيهم يابها...
ليلى....!! اللي عاشت 13 سنه تحب ناصر..وخسرته بغمضة عين...ليلى اللي فقدت ابوها واخوها وكل يوم حد من اهلها يستوي بينهم شي...معقوله توافق على عبدالله؟؟
شيخه مصيرها تكبر وتعيش حياتها بعيد عن ليلى وعن الناس وبتتزوج وبتكون نفسها...معقوله ليلى تتخلى عن الامومه؟؟ معقوله تتنازل ليلى عن كل شي عشان شيخه وفي الاخير تضحي بحياتها عشان سعادة شيخه وعبدالله...؟؟
معقوله طيبة ليلى وتضحيتها توصلها لهالدرجه...انها تقتل اخر الامال وتقضي على اخر بقايا الحب وتنسى الايام اللي راحت..وتعيش مع انسان بس خذها عشان شيخه؟؟؟
معقوله ليلى اللي ياما ضحت تقوي قلبها هالمره وتدور سعادتها وتتغاضى عن شيخه...ولا بتوافق على العرس وتسعد اثنين بدل ما تتعسهم على حساب نفسها...؟؟؟!!!!
.........................

انتظرو الحلقه الأخيرة مع اخوي البدوي الحبوب ....

والسموحه عالقصور
اختكم
الغلا

[البدوي الحبوب]

تسلمين اختي الغلا على هالجزء الجميل وان شاءالله اني باجر بنزل

((( الحلقه الاخيره من قصه سحابة صيف )))

تحياتي لكم

[الرايقه]

وابويه عليك يا البدوي وليش ما تنزله اليوم .. مافيني صبر والله
على العموم يعطيكم الف عاافيه ونتريااا الحلقه الاخيره بفارغ الصبر ,,,

[البدوي الحبوب]

الحلقة الأخـــيرة

عقب ما قالت حصه لليلى اللي صار تمت ليلى في حالة صمت..ما عرفت شو تقول او شو ممكن يكون ردها..وقررت انها ما تبين أي انفعال او أي صدمه..خلاص صار لازم تتعود ان أي مصيبه يديده في الدنيا لازم تكون من نصيبها قبل كل الناس..واستسلمت بضعف للقدر وغمضت عيونها لدرجة ان حصه حتى ما قالت لها خذي وقتج في التفكير وخلتها على راحتها لين ما تقرر هي بنفسها شو تبغي وفي الاخير بتعرف ان ليلى يوم بتقرر ما بتلاقي حد تشاركه في قرارتها الا حصه...

دقايق ودخلت اللبنانيه اللي بتعدل حصه الحجره..ويلست تفج شعرها عشان التسريحه اللي طلبتها وليلى يلست على الشبريه تسولف ويا حصه وهي في عالم ثاني...

ليلى: ما يباله شعرج من طوله عاد..الحين بتخلص..

اللبنانيه: لاء ما بأدر خلصوا بسرعه..صح أصير شعرها..لكن خفيف وبدوا شغل مشان يثبت.

حصه: الله يعينا على هندستج..

ليلى: زين سكتي يزاها بتتفنن لج فيه وتقولين هندسه حمدي ربج بعد..

حصه: وانتي شو بتسوين.؟

ليلى: كنت ناويه افجه بس مافيني امي تنكد علي وانا بصراحه ابغي استانس فبرفعه عشان الشيخه ام راشد ما تعصب..

حصه تبتسم: حليلها والله..زين سلامه يت؟

ليلى: سمعت حمده تقول ان فاطمه وصلت يعني اكيد وياها..

حصه: شو تقولج عن ريلها مستانسه؟

ليلى تبتسم: عايشين قصة حب..

حصه وقلبها يدق بقوه: صدق؟

ليلى:هيه والله..مبزيها على الاخر..

حصه: ما حملت؟

ليلى: مادري بها بس ما قالت وما ظني انها حامل..

حصه: كم مر على عرسها؟

ليلى: اربع شهور..

حصه: معقوله للحين محد من الحريم تخبرها؟

ليلى: لا والله..بس صبري عليها يالنحسه من الحين بيطيحن بها..عادي هي مره على الدقه وبتجلبها مناحه..

حصه تضحك: تعرفين...قلبي يرقص رقيص..

ابتسمت ليلى: عادي عروس..

حصه بابتسامه: لاء مب جي..بس مادري يا ليلى... بالرغم اني اريد افرح ... اريد استغل انه عرسي وما بعرس غير هالمرة ... واني اعرس بالريال اللي طول عمري اترياه ... بس ما اقدر ... كل هالاشياء تغلفها مرارة... مثل الشي اللي من كثر ما تبينه وخاطرج فيه تعوفينه ....

ليلى : الله يوفقج يا حصيص..

حصه: ليلى سؤال بيذبحني معقول اني الحين ما احب حمد ... واذا الحين انا ما احبه .. عيل شو كان اللي احسه صوبه طول السنين لعب يهال ... اذا مب هذا الحب... شو الحب ؟؟

احتارت ليلى ما عرفت شو ترد على حصه ... هالمرة حصه تتكلم بهدوء او كأنها تفكر بصوت عالي متجاهله وجود اللبنانيه وياهن في الحجرة وانها تسمع كل اللي تقوله ... يمكن رهبة العرس والموقف اللي هي فيه خلتها تقول هالكلام ... حتى اللبنانية حست بارتباك حصه وضياعها وحبت تغير الموضوع فسألت ليلى

اللبنانيه تلف على ليلى: بتأربيلا شي..؟

ليلى ابتسمت: شوي مب وايد..

حصه عطت ليلى نظره حاده: هيه تقرب لي وايد..

ليلى:وايد..

اللبنانيه: وينن اخواتك؟

حصه: عند الباقي يتعدلن..ليش كم عددهن اللي ين وياج؟

اللبنانيه: والله يمكن شي تلات اربع صبايا..

ليلى: بيكفن البنات؟

حصه: هيه عادي الا هن فطيم وعفاري وسلامه وحمده وسمر وخواتي الكبار ثلاث..

ليلى تضحك: شوي هذيل؟

حصه ابتسمت: كثروا مادري كيف...

تمت ليلى تسولف وهي من داخل تحس كل خليه فيها تصدم بالثانيه عقب ما فقدت انسجتها ترابطها وعقب ما لخبطت لها حصه اوراقها..وانتشلتها من عالم تحاول تهرب منه ولكنها غصب طيب ترد له..بس على الاقل الحين بتصبر عمرها لين ما تشوف شو اخرتها ويوم بيخلص العرس وترد البيت..لها مع نفسها وقفه ثانيه...
.
.

برا بعيد شوي عن حجرة حصه بس في الطابق اللي فوق تيمعن البنات في حجرة سمر يتعدلن..اما خوات حصه الكبار سلمى ونوره وشمسه راحن حجرة سلمى بعيد عن البنات وحشرتهن..

وفي حجرة سمر يلست عفرا وفاطمه على الشبريه وخلن سلامه لانها الحرمه تيلس تتعدل قبل ويلست حمده حذالها ويا الحرمه الثانيه اللي تعدلها..

عفرا تسولف لفاطمه:بتفجين شعرج ولاء؟

فاطمه: لاء من طوله عاد..بسوي تسريحه برفعه شوي فوق وانتي؟

عفرا مبتسمه: بفجه...

وتلف على سلامه: متى بتخلصين انتي؟

سلامه: سكتي انتي خلني اتعدل مثل الناس..وراي ريل ابغيه يشوفني انتي ما وراج حد..

نقعت عفاري من الضحك هي وفطوم على قواة عين سلامه..

عفرا: فطوم شو لون فستانج؟

فاطمه: كحلي..

عفرا: انا بطيخي فاتح..

سلامه: انتن ما تشبعن من الرمسه..

حمده تبتسم: خليهن يهال يهال..

طالعت عفرا حمده بطرف عينها ولفت على سمر اللي شافتها مندمجه وتلعب بشعرها لين ما يخلصون..

عفرا: والله محد بيستانس على فج الشعر كثر عمتي سمر..بتتلحف به..

فجت سمر ثمها: هبي هباج الله..تشاهدي لا يستوي بي شي والله ما سامحج..

عفرا تضحك: لا اله الا الله محمد رسوله..

سمر: هاللي ناقصني بعد..روحه راس مالي هالشعر بعد تحسدونه محد بيطالعني..

عفرا فجت عيونها: وليش انتي تترين حد يشوفج؟

سمر: لاء بس اقول يعني محد بيقول سمر حلوه الا يوم يشوفون شعري الطويل الطايح ورايه جنه عباه..

حمده: الحين بيخلص العرس وهو لين رقبتج..محد يحسد المال الا اصحابه..

سلامه تنش: خلصت وحده تيي...

عفرا: فطوم انتي سيري ورا حرمة اخوج انا بيلس عقب ختيه..

ونشت فاطمه ويلست مكان سلامه واستلمتها الحرمه تعدلها...اما سلامه اللي كانت لابسه بدلة حفلات يابتها من بيت ابوها عقب ما جلبت حجرتها فوق تحت في بيت احمد وما لقت شي ينلبس حتى للسهره فكيف للعرس..صح بدلتها حلوه وراقيه وتناسب جسمها الحلو..وبشرتها الصافيه وملامحها الشديدة الجمال..بس الميك اب خلاها تطلع روعه واكثر من روعه بعد..وطالعت المنظره بدلع وهي تبتسم..

سلامه: ما شاء الله علي الله يحرسني من العين..

عفرا بنقمه: الله يالغرور..

حمده مبتسمه: يسوي بلاوي..

سلامه تدور على نفسها بدلع فضيع: والله اني اجنن..مالوم ريلي يوم انه مفتون فيني..

فاطمه: حليله اخوي صدق خبلتي به ما كان جي قبل..

عفرا ما تدري ليش حست قلبها يرجف بقوه..

سلامه: فديتني منو اصلا ما يتخبل من جمالي..صح عفرا..؟

عفرا: هاه؟ هيه صح..

سلامه: انتي مب ويانا..(وغمزت لها) اللي شاغل بالج....

عفرا تغير ويهها وارتبكت: شو تقولين انتي؟

سلامه تبتسم: ماشي...الا متى بتخلصين يا حمده عنبو ساعه يالسه تتعدلين باقي اختج وعمتج للحين ما خلصن..

حمده: زين مب بإيدي والله مب ذنبي اني مب حلوه شراتكن عشان اخلص بسرعه..تعرفين الاشكال اللي مش ولا بد لازم تاخذ اكسترا تايم..

اللبنانيه: حرام عليك لا تؤلي هيك على حالك..والله متل العسل..

حمده تبتسم: الله يجبر بخاطرج بس انا مب حلوه شراتهن عشان جي انتي بتبطين تعدلين ويهي..

اللبنانيه: بيكفي يكون ألبك حلو..شو بدك بالشكل..

سلامه تضحك: هذا قانون المتفاءلين بأشكالهم..يقولون اهم شي القلب ولا الجمال ما يهم..

عفرا: بس عاد والله اختي حلوه تتمنن قلبها ولا ابتسامتها اللي تذبح..

حمده: اقولكن بس ترا اليوم عرس عمتي وماريد اسوي فضايح وافر عمري من الدريشه خلنا ساكتين احسن..

ضحكن البنات وتمن يسولفن لين ما اذن المغرب..فاطمه خلصت التسريحه وما خلتهن يحطن لها ميك اب.. ونشت عشان تيلس مكانها سمر..وحمده خلصت ويلس مكانها عفرا..وسلامه دخلت الحمام تتمسح..

عفرا: ليش ما حطيتي شي بويهج؟

فاطمه: يأذن..بتمسح وبيي عقبج...

عفرا: اوكي خلاص سلامه في الحمام..

فاطمه: ماشي حمام ثاني؟

حمده تمد السجاده بتصلي: امبلى الحجره اللي حذالنا..

عفرا لفت بسرعه: لاء وين تبينها تسير حجرة ذياب.؟

حمده تبتسم: لاء اقصد اللي قبل حجرة حصه..

عفرا: اها اوكي..زين لبسي لج شيلة صلاه وتمسحي وتعالي صلي هني..

طلعت فاطمه وهي رافعه شعرها بتسريحه وايد حلوه وبسيطه تناسب ملامحها الصغيره...ومثل ما وصفت لها حمده الحجر دخلت الحجره اللي بين حجرة حصه وسمر ودخلت الحمام تتمسح...وما شغلت ليت الحجره..عقت شيلتها على الطاوله قبل تدخل الحمام وسارت تتيدد..ابطت شوي في الحمام تحاسب لا يدق شعرها الماي وتروح تسريحتها في خبر كان..

اما في الحجره الثانيه خلصت سلمى وشمسه ونوره تعديلهن ونزلن عند امهن يشوفنها شوي ويساعدنها حليلها من الصبح معذبه عمرها وتسير يمين ويسار وكل حد مشغول عنها بنفسه..

دخل ذياب وشاف عبدالله يالس في الصاله ويا خليفه..

خليفه: هاه وين ساير؟

ذياب: حجرتي ببدل كندورتي واتعطر من الصبح وانا في كراف معيف والله..

خليفه يضحك: حاسب البيت ممزور بنات...

ذياب يستهبل: احلى كلام..

عبدالله: انته خلص واثبت عمرك وجابل كليتك وعقب فكر بالبنات..

شيخه تطالع ذياب: عيب عيب بنات..

نقعوا عليها من الضحك..

ذياب:ما شاء الله من وين ياييبن هالواعظه الدينيه؟

عبدالله: اسكت عنها لا اقوم لك هاي شيختك..

ذياب يضحك: تعالي تعالي..

شيخه: ماريدك..

ذياب: شو يأكلونها هذي؟

خليفه يضحك: اذكر الله لا تسبب للبنت..

ذياب يطلع فوق: اشهد لا اله الا الله..عبدالله امسكها زين..لا تخليها تنط اخاف تنعفس بوظبي..

عبدالله يبتسم وهو يالس وشيخه حذاله تسولف..

خليفه ينش عشان ما يعصب عبدالله ومن عند الباب يغايظ..

خليفه: اقولك يوم يسجلونها في الروضه قول لحصه تقول لعمتها لا تخليهم يلعبونها نط الحبل اخاف تجرف الروضه لحفره تحت الارض...

عصب عبدالله صدق من خاطره ونش بيتكافخ ويا خليفه بالمزح..لكن خليفه ميت من الضحك وشرد عنهم قبل يقوم له يدوس ببطنه..

طلع ذياب فوق حجرته وسمع حشرة البنات فوق وابتسم..ما يدري ليش احساسه يقوله انها موجوده وياهن..حاول يستهبل ويدق الباب اونه ما يعرف ان حد موجود بس رد واستحى من عمره..ما صدق انه رفع من قدر عمره شوي والناس ردت تسوي له اعتبار وكبر فعيونهم..فما فيه يرد يطيح من عيون خواته وبنات اخوه...

اول ما دخل الحجره وقبل يصك الباب بهت مكانه وهو يشوفها واقفه جدام المنظره تنشف ويهها وتسير صوب الطاوله بتتشيل عشان تصلي وهي يوم حست ان في حد لفت ويهها..وصرخت على طول وحطت كفوفها على ويهها عشان ما تشوفه بغباء تتحراه ما يشوفها..

ذياب بلا حاسيه تم واقف ويتنفس بسرعه وقلبه يدق بقو..يعرف انها حلوه وغرشوبه وعذاب بعد وخاطره انه يشوفها مره ثانيه ويا كم كثر فكر فيها وهو في سكن الكليه ويا ربعه..بس ولا حتى في احلامه تخيل انه يشوفها في بيتهم..لا وفي حجرته بعد..والمصيبه انها بلا شيله..

فاطمه اللي تمت ترتجف وبصوت عالي: شو تسوي هني؟

ذياب اللي انتبه: هذي غرفتي..
فاطمه ما سوت شي غير انها شلت كندورة ذياب اللي معلقه جدامها وغطت بها راسها وويهها في موقف بغى يفطس ذياب من الضحك..وهو ما حس ابدا ولا طلع من الحجره..

فاطمه ربعت صوب الحمام وصكت الباب بدون شعور..

ذياب يبتسم: انتي شو تسوين في حجرتي طلعي وراي شغل انا..

فاطمه من ورا باب الحمام: اطلع وانا بطلع وراك..انا مادري ان هاي حجرتك..

ذياب بخبث يبغي يغايظها: ما تدرين ..!! هاه ما تدرين..بيت شكبره ما حصلتي تعدلين شعرج الا في حجرتي..

فاطمه انقهرت: ما عدلت شعري انا يايه اصلي شوف السجاده بعدها ممدوده على الارض..

طالع ذياب وعرف انها ما تجذب وفج باب الحجره ..

ذياب: يالله انا طالع بسرعه طلعي..

فاطمه فجت الباب بشوي وما شافته يعني صدق طلع..اصلا عفرا قالت لي انه تغير وما عاد يسوي حركاته الماصخه..بس كيف بطلع الحين وانا لابسه الشيله لا عباه وكيف بتغشى بشيلة الصلاه..وابوي انا وهالبدله اللي راصه علي رص كيف بظهر بها جدامه..الحمدلله اني للحين ما لبست بدلة العرس ولا جان رحت فيها..على الاقل هاي راصه صح بس ارحم فيها اكمام..

نزلت الحجره من الحمام وتلحفت بشيلة الصلاه ويوم مشت بتسير صوب الباب شافته واقف يترياها برا..وانقهرت بس تلثمت عشان باقي الشيله تغطي صدرها وباقي جسمها..

ذياب مبتسم وهو يتأملها ..حلوه والله انها تجنن..

فاطمه: خوز شوي عن الباب بخطف حجرة خواتك..

ذياب: انزل يعني من فوق عشانج؟ يالله ماريد اتأخر..

فاطمه تتنهد وطلعت تربع برا وسايره صوب حجر ثانيه..وذياب ناقع من الضحك..

ذياب: هيه انتي..ردي مب من هني الحجر تعالي هذي هي الحجره اللي فيها ربعج..

ودخل وصك عليه الباب وهي ردت قافطه حجرة سمر ودخلت عليهن محرجه..

عفرا: انتي وين كنتي؟

فاطمه بضيج: كنت في جهنم..

عفرا: اوه اوه..شو فيج..؟ ليش معصبه؟

فاطمه تيلس عند سلامه وتعق شيلة الصلاه بشوي شوي: مب معصبه..

سلامه: قومي فطيم بدلي ثيابج..

عفرا: ليش بتنزلن الحين؟

سلامه: هيه ليش انتن بتمن لين ما حصه تخلص؟

سمر: اللي بينزل الحين انا بنزل وياه..

سلامه: يالله فطوم غيري بدلتج وتعالي يا سمر ويانا...

عفرا: منو عند عمتي؟

سلامه: اكيد عمتي ليلى من بيكون غيرها..

عفرا: يعني مالنا لزمه نتم فوق..خلنا ننزل احسن..

حمده: اوكي منو بيوصلنا الخيمه؟

عفرا: دقي لعمي ذياب يوصلنا..محد هني الا هو..

سلامه: في تلفون في الصاله اللي برا.؟

فاطمه: هيه شفته توني..

سلامه: سيري اتصلي باحمد قولي له يتريانا برا الحين خلصنا وبنسير الخيمه..

فاطمه: زين خلني ابدل واحط لي ميك اب خفيف..

ودقت عفرا لعمها ذياب اللي رد عليها على طول..

ذياب: هاه الملكه شو تبين؟

عفرا تضحك: فديت روحك انا يا كثر ما ترفع معنوياتي..

ذياب يتبسم: خلصينا شو تبين؟

عفرا: توصلنا الخيمه..

ذياب: استحي على ويهج..دريولكن انا اوصلكن الخيمه..

عفرا: ارجوك عمي ما نبغي نركب ويا الدريول..

ذياب: ليش ان شاء الله؟

عفرا: لانا ما بنتغشى اخاف تخترب عدلتي...وثاني شي متعطرات ما فينا على الريال بعد..

ذياب: ويهج ملون صح؟

عفرا تضحك: وايد..

ذياب تذكر ان فطيم موجوده: كم عدد اللي بيركبون؟

عفرا استغربت بس ما فهمت: امم انا وحمده وسمر..

ذياب حس بخيبة امل: امم اوكي تريني في الصاله الحين بييكن..

وتلبسن البنات وخلصن وفاطمه طلعت تتصل بأحمد من الصاله اللي مجابله الحجر اللي فوق..وطول ما يرد يوم بغت تبند رد عليها..

فاطمه بعصبيه: وينك؟

احمد: هني الا موجود شفيج بسم الله..

فاطمه: يالله تعال ما نبي نتمي هني اكثر..عبلنا على الناس بنسير الخيمه..

احمد: سلامي خلصت؟

فاطمه: هاللي يهمك..هيه خلصت وخسفه بعد..

احمد: جب..

فاطمه: يالله فديتك لا تتأخر..ورانا عرس وروحه للخيمه..

احمد: اوكي..

ما وحى لها فاطمه تبند وترفع راسها وهي بكامل زينتها وتيي عيونها في عيونه اللي ما نزلت للحظه عنها وشوي ويفج ثمه من الدهشه...يدري انها حلوه بس مب هالكثر..

فاطمه بضيج: انت للحين هني..

ذياب يبتسم: بيتنا شو اسوي..مب ذنبي والله..

فاطمه: يالسخيف..ويقولون تغيرت..لا تغيرت ولا شي القطو العود ما يتربى..

ذياب فج عيونه وابتسم: حلوه..حلوه طولة لسانج..

وراحت تربع للحجره مضايجه ومعصبه وشوي وتصيح بس ما تقدر تقولهم انها شافت ذياب..ولبست عباتها هي وسلامه وتغشن ونزلن تحت وعفرا وحمده وسمر صكن الباب وراهن وشافن ذياب واقف في الصاله..

عفرا: انت هني؟

ذياب: هيه ييت اشرف بنفسي على نزول حضرة جنابكن..

عفرا: فديت هالويه انا..

ذياب: نزلن هاه عن ويووهكن بشوف شو مسويات..

عقن البنات غشاويهن..وابتسمن عدا سمر اللي بلا عباه ولا شيله..ياهل حليلها وين من الحين..

ذياب ابتسم: قسم بالله مصخره..

عفرا اللي مبتسمه اختفت ابتسامتها: ليش؟

حمده تضحك ما قدرت تمسك عمرها..

ذياب: شو هالمصخره...انا حرمتي ممنوع تحط هالبلاوي؟

عفرا: يعني مب حلو؟ عمي فديتك قول الصدق مب حلو؟

ذياب اللي حب يذلها شوي: اول حبي ايدي وبقولج حلو ولا لاء..

عفرا حست ان كرامتها تنهان: بتبطي وايد..

ذياب يضحك: مب منج تراج ملكه..تبينا نحب ريولج نحن..

عفرا:محشوم يا عمي..بس صدق مب حلو..

ذياب يلوي عليها من كتفها: والله حلوه..بس مب احلى منها..

عفرا ما تدري ليش حست انه يقصد فاطمه وعلى طول شهقت..وذياب نقع من الضحك ونزلوا على طول السياره رايحين الخيام...

................اول ما وقفن برا جدام البوابه اللي مجابله الحوش..تجدمت السياره شو صوبهن وركبت فاطمه ورا وسلامه جدام وعلى طول بدون تردد عقن غشاويهن عشان ما يخترب الميك اب ولا التسريحه...شغل لهن احمد المسجل على الاف ام وهو مبتسم..

احمد يتنفس: اممم الريحه تجنن..

سلامه: ريحة شو؟

احمد: ريحة عطرج..

فاطمه من ورا: احم احم..

احمد تذكر وحاس بوزه: انتي هني؟

نقعت سلامه من الضحك على ريلها...

احمد: لفي لفي شوي بشوفج..

سلامه: يوم نرد بتشوفني..

احمد: لا الحين..ماريد..عقب العرس كل شي بيكون انعفس..

سلامه: اووه اقولك بعدين مب وقته الحين..

فاطمه: استح على ويهك احمدووه انا وياكم..

احمد يطالعها بطرف عينه: ادري انج ويانا..اللي يسمع مسوي شي ..ناسيه انها حرمتي جدام الله والناس..

فاطمه: درينا عاد اللي يسمع محد عرس غيرك..

احمد وقف السياره: يالله فطيم انزلي..

فاطمه: وسلامه؟

احمد يلف ورا: انزلي اقولج..

فاطمه: ما بنزل بروحي لازم تنزل وياي حرمتك..

احمد بتأفف: انزل ابى اقولها شي..

سلامه: خلاص احمد بنزل شو فيك البنت ما بتنزل بروحها..

احمد: تمي يا سلامه ونزلي فطوم لا تعصبين بي..

فاطمه: انت شو فيك ماقدر انزل بروحي اخاف والله..

احمد: وقفي دقايق عدال السياره والحين بتنزل لج..

فاطمه: شو هالشي اللي ما يحتمل التأجيل.؟

احمد قرر يحرجها: نزلي ابى ابوس حرمتي..

سلامه احترق ويهها وما عرفت شو ترد عليه ونزلت راسها من الفشله..

فاطمه شهقت: وابوي عليك انا وعلى طفاستك..

احمد يبتسم بخبث: يالله انزلي..عيب تشوفين..

وبسرعه فجت فاطمه الباب ونزلت قبل تشوف احمد المتسرع شو ممكن يسوي..

سلامه مستحيه: شو سويت انت..تبغي تفشلني جدام اختك؟

احمد: اسكتي..لفي بشوفج..يالله بسرعه ما عندي وقت..

لفت سلامه وهي لافه شيلتها الساري عليها ووجودها والعدم واحد..

احمد ابتسم: تجننين...!!

سلامه مبتسمه: من ذوقك حبيبي..

احمد قرب منها وحبها بقوه على خدها..وهي هزت راسها مفتشله وردت الشيله على ويهها بسرعه..

سلامه: يالله بنزل اخاف اتم اكثر انزل والميك اب مختفي..

نقع احمد من الضحك وهي متخبلة عليه ونزلت ..خبلت بالريال ويننته ..حليله يهاذي بها ويهويس من كثر ما ذبحته هالبنت..

..............

فضى البيت باللي فيه من البنات الصغار ومحد تم غير الشباب الثلاثه خليفه وعبدالله وذياب..وشيبتهم والعيوز..كانوا تحت مرتبشين وام خليفه تلبست وخلصت..بس قبل تطلع ويا خليفه للخيمه طلعت فوق عند حصه ..لازم ما نخلى من توصيات العياييز قبل العرس..يوم فجت الباب شافتها شبه مخلصه ويالسه على طرف الشبريه وليلى عندها مبتسمه تسولف لها..اول ما شافتها ليلى ابتسمت ونشت على طول واللبنانيه تسأل حصه اذا هذي امها او ام ليلى...

ام خليفه بحنان: خلصتي؟

حصه حست شي يخنقها: بعدني شوي..

ليلى حست ان الجو بدا يتوتر وعرفت لش ام خليفه يايه..فمسكت اللبنانيه وطلعت بها برا وصكت الباب ويلست هي وياها في الصاله..تعرف ان ام خليفه تبغي تقعد شوي ويا بنتها...

اللبنانيه: لسه ما خلصت..

ليلى: خلي امها ترمسها...اخافج الحين تعيدين كل شي سويتيه..

اللبنانيه: ليش شو حصل؟

ليلى وقلبها يدق بسرعه: صدقيني بتصيح انا اعرفها..

اللبنانيه تبتسم: لازم هالدموع..ما في أي بنت بالعالم ما بتبكي ليلة زواجها..في حدا بتتحمل تفارء البيت اللي ربيت فيه وكبرت بداخله..

ليلى بلعت ريجها: هيه والله...

اما في الحجره يلست ام خليفه حذال بنتها اللي لاحظت رجفة ايدينها وتوترها..وحبتها على راسها..

ام خليفه: عروس ما شاء الله يا بنتي الله يحفظج ويحرسج من العين...

حصه تبتسم بمراره: فديتج يا امايه..

ام خليفه: عاد ما وصيج يا حصه على ولد عمج..ما وصيج بالسنع وانتي ادرى به...الحرمه الزم ما عليها بيت ريلها لا تضايجينه..خليه يي لج يدور الراحه عندج..ان ضاج برا البيت ارتاح ان في بيته اللي بتقوم به وتلبي له كل طلباته..

حصه توها حست ان الوقت بدا يكون جدي: ان شاء الله يا امايه...

ام خليفه: وعمتج ام حمد تراها بمقامي ..بتشلج في عيونها وما تعرفين كيف الدنيا مب واسعتنها من الفرحه..تحبج والله يا حصه..

حصه بدت تدمع وساكته..

ام خليفه عورها قلبها على بنتها بس هي حالفه ما تصيح: والبزا اللي فيج ودريه..الحين انتي حرمة ومسؤوله...والحرمه السنعه ما تقول بسوي في بيت ريلي اللي كنت اسويه في بيت ابوي..واقولها لج نصيحه من ام لبنتها..لا تيلسين تقارنين باللي في بيت ابوج لريلج..الزم ما على الريال كرامته..ولا تحسسينه انه مقصر وياج..انتي من الحين تعرفين ظروف ريلج..فنصيحتي لج يا بنتي تصبرين عليه شوي لين ما الله يفتح عليه...

حصه دمعت وقربت منها امها تطيب خاطرها ولوت عليها..

ام خليفه: مشي دموعج يا بنتي..انتي عروس افرحي واستانسي وودري عنج خرابيط البنات...مافي اهل بالدنيا يدورون شقا عيالهم..ونحن ندري ان حمد انسب لج من أي حد ثاني...حصه يا امايا لو ما يدري ابوج واخوانج ان حمد شارنج وما بيقصر وياج ما قربوا به..

وحبتها على راسها ودعت لها...وطلعت من الغرفه ومرت عند ليلى اللي للحين ما سوت شي...

ام خليفه: يالله بالستر يا بنتي...ليش ما تعدلتي للحين؟

ليلى مبتسمه: عمتي..صيحيتيها؟

ام خليفه: والله الا هي ربيعتج مبزايه ومرره على الدقه..سيري يلسي عندها وتعدلن بييكن عبدالله يشلكن عقب شوي..

دق قلب ليلى بسرعه...شو هالطاري يا ام خليفه..عبدالله بيي يشلنا..لا والله ما رحت غير ويا دريولنا لو قص راشد راسي قص..

ودخلت ليلى ويا اللبنانيه وشافت حصه على طرف شبريتها تمسح دموعها بخفه عشان ما تخرب عدلتها..يلست ليلى حذالها وهي تحس قلبها طبول من الدق..وحاولت قد ما تقدر تقاوم انها ما تبكي..

اللبنانيه تخفف جو: له له..خربتي تعبي كلو..الله يسامحك..هلا بدي عيدوا كلو...

ليلى تبتسم: لا الله يخليج..على جي لو عدناها بيأجلون العرس لين باجر...

حصه تبتسم وليلى تطالعها تبادلها نفس الابتسامه..

ليلى: الحين هذي دموع الفرح ولا الحزن..؟

حصه: مادري والله..ليلى شوفي ويهي تشوه صح؟

ليلى: بسم الله من شو؟

حصه : من الضيج مشيت عيوني بإيديه...اخترب الجحال؟

اللبنانيه اللي قربت منها تعدل اللي خربته الدموع: لاء ماخترب الجحال..أربي برتب لك ياه..

يلسن حصه وليلى يضحكن على اللبنانيه كيف ترمس بلهجتنا المحليه...ويلسن يتعدلن وعقبها دخلت عليهن وحده من الحريم اللي ين وياها ويلست تعدل ليلى ويوم قربت تخلصها سمعت حصه ترمس بالتلفون..

حصه: خلصت خلاص...
عبدالله: انزين يالله متى بتنزلين يا حصووه الناس بتروح وامي حاشره الخيمه من ساعه تقولي شوف اختك وين..

حصه: زين لا تحتشرون..حشا يا امايه تطبخ بعمرها..

عبدالله: يالله فديتج انزلن انتي واللي وياج..

حصه ابتسمت..وليلى لفت بسرعه..

ليلى بهمس: قولي له وين شيخه..

حصه: عبدالله تقولك ليلى وين شيخه؟

عبدالله: هني وياي..انزلن وبعطيها اياها..

ليلى بهمس: قولي له يخلي وحده من البشاكير تييبها فوق..ابى البسها...

وخبرت حصه عبدالله اللي طرش شيخه ويا جينا فوق...اول ما فتحت شيخه الباب وقفت تشوف من اللي يبغيها..

ليلى تطالعها بطرف عينها: وين كنتي؟

شيخه تربع صوب ليلى..وليلى ما قدرت تقاوم انها ما تشلها..

شيخه: امي وين فثتاني..؟

ليلى: مافي فستان..ليش تروحين بعيد عني؟

شيخه: ما رحت بعيد..والله هني عند هذاك..(تحاول تتذكر اسمه بس ما قدرت)

حصه: عبدالله..

شيخه تبتسم: عبدالله...!!

ليلى: زين تعالي بلبسج فستانج بنروح العرس..

شيخه: وين العروسه؟

ليلى تبتسم وتأشر على حصه: هذي العروسه..

حصه: عقبالج يالدبه..

تلبست شيخه وليلى لبست عباتها وشيلتها وتغشت..

ليلى: يالله انا بروح..الاقيج عدال باب الخيمه انزين؟

حصه: شو هالحركات البايخه..تمي ويانا وبنسير ويا عبدالله..

ليلى: لا تضحكيني مالي خاطر اضحك..يالله توني متصله بحمدان يي ياخذني..

حصه بطرف عينها: حمدان ولا الدريول..

ليلى: والله حمدان...اصلا الدريول مطرشينه المزرعه ليوا...

حصه: زين...خلاص بس يا ويلج ان خليتيني..

ليلى: لا تخافين...والله بكون اول من يستقبلج..حتى بتصلج قبل..او انتي اتصلي..

حصه: اوكي..

وطلعت ليلى نازله تحت ويا شيخه...عبدالله كان يالس بالصاله وليلى ما عرفته بس هو اكيد بيعرفها..من شيخه..عاد سنه لين ما قدرت تزحف شيخه وتطلعها من الصاله..

شيخه: اليده اليده..

ليلى ما قدرت تقولها اسكتي او شي ما تبغي تحرج عمرها وعبدالله مبتسم..

عبدالله: روحي شواخي روحي..عقب بتيين زين حبيبي...؟

شيخه ابتسمت: انت ما بتلوح معانا؟

عبدالله: بلى بيي الحين..

وطلعت ليلى وشلت شيخه وسارن يركبن سيارة حمدان اللي واقفه تترياهن في الحوش...ووصلها حمدان الخيمه عقب رد مكان الرياييل...

اما في البيت لبست حصه فستانها وكانت تتحرا عمرها بروحها في البيت ويا راعيات الصالون...لكنها اكتشفت ان نوره تمت هي وشمسه وياها...اختهن ما بيخلنها بروحها...ودخلن عندها ولحفنها بشال دانتيل من نفس قطعة الفستان..ولبسنها عباتها عشان يوم بتنزل تحت..من الدريوليه والناس اللي بتكون في حوش البيت...

وهن نازلت على الدري...

عبدالله مبتسم: ما شاء الله..ما شاء الله..

حصه: على شو تقول ما شاء الله وانت ما تشوف شي...

شمسه تبتسم: خليه عبدالله يتخيل شكلج من تحت الغشوه كيف..

نوره:يالله عبادي فديتك قرب السياره تأخرنا وامي حرقت الدنيا هناك..ما تشوف الساعه كم..

عبدالله: اوكي الحين بجدمها لكن يالله اظهرن...

وطلعن حصه ويا خواتها الكبار السياره ووصلهن عبدالله الخيمه..واتصلت حصه بليلى تقولها انهم وصلوا هي وخواتها شمسه ونوره وهن الحين عند باب الخيمه....
..................

بالنسبة لها اللي قاعد يصير حلم ... ما تخيلت انه هذا عرسها وهي العروس والكل قاعد يطالعها وهي تخطي لين الكوشه ... الاضاءة الموسيقى ... الاصوات اللي تسمعها ... تميز منها صوت شمسه وسلمى وهذا صوت ليلى ... بس الحين بالذات مب قادرة تستوعب اللي يصير ... الانظار والابتسامات ... واخيرا وصلت الكوشه ... هنيه طلعها من ذهولها وصول سلمى وليلى عدالها يساعدنها عشان تركب دري الكوشه ...



ليلى: سلمى الله يخليج يودي ايديها وانا برفع ذيل الفستان

سلمى: ياللا حصوه ركبي ... بلاج اتبريدتي مكانج

حصه: هاه ... اوكي بس لا تخلني بروحي

سلمى: (تبتسم وهي تساعد اختها تركب) نحن عدالج بس نبغي الناس تشوفج زين ما بنغطي عليج



كملت حصه مشي على الكوشه بكل هدوء وشوي شوي خوفا من انها اتخرطف بالكعب اللي لا بستنه ... حصه ما كانت قصيرة بس لبست كعب عالي لان حمد كان طويل وما حبت تبان انها قصيرة عداله ... كان شكلها يجنن كل المكياج اللي فيه ما قدر يخفي براءة ملامحها ...عيونها الوساع وبياض بشرتها الناعم وهدوء ملامحها ونظراتها الخجوله..و خصل من شعرها الاسود على اطراف ويها في تناقض عجيب مع لون بشرتها ... كانت تبتسم لا ارادي وتحاول توقف رجفة يديها... على جهة شافت البنات كلهن واقفات عفاري وحمده وسلامة وفطوم وياهن سمر ابتسمت لهن ابتسامه من الخاطر وهن يسولها باي باي ... ومن جهة ثانية يت عيونها في عيون امها وعدالها عمتها ام حمد ... بالرغم من البعد لاحظت ان عيون امها غرقانه دموع... وقد ما تقدر حاولت انها ما اتأثر عشان ما تخترب عدلتها جدام الناس ...

بعد ما وصلت للكرسي اللي حاطينه لها ... ردت الاضاءة في الخيمة بعد ما كانوا مخففينها ومركزينها عليها ... وراحت لها ليلى ويا سلمى عشان يقعدنها



حصه: ليلوه يا ويلج ان رحتي قعدي وياي

ليلى: خبله انتي .. تبين امي اتيي تيرني من شعري تنزلني من على الكوشه

حصه: زين انتي سلمى

سلمى: في خاطري يا حياتي اقعد وياج .. بس بنشوف الناس جان اتدخنت واتعشت ... ومرن عليهم دلال القهوة وسلال الحلاوة

حصه: لا تخلوني بروحي

ليلى: محد بياكلج



كانت ليلى ماسكه ايد حصه وتدور بعيونها في الناس الحاضرة ... شافت زميلاتها في الشغل قاعدات على طاولة وحدة وميزت مشاعل وما قاومت تبتسم لها وبالمقابل مشاعل ابتسمت واشرت لها بيديها ... وعدالها شافت روضه ... من يت عيونها عليها اختفت ابتسامتها



حصه: هاي من دعاها للعرس

ليلى: حصووه عيب عليج ... عرس نائب المدير وما تبينها تحضر... الدعوة وجهت للموظفين كلهم مثل عرس ناصر

حصه: زين ماعليه عشان تعرف انها ما تقدر تاخذ ولد عمي مني

ليلى: هاهاهاها من ساعة كنا ما نباه

حصه: المهم انها ما تاخذه هيه

ليلى: حرام عليج البنت طيبه

حصه: لا تضيجيبي وانا عروس

ليلى: هاهاهاها زين انا بنزل عنج الحين بروح اشوف امايا وشيخه .. ما ادريبها وين

حصه: لمحتها عند سلامي بنت اخوج

ليلى: زين ياللا بخليج

حصه: طرشيلي البنات الله يخليج

ليلى : ان شاء الله



نزلت ليلى من على الكوشه وهي تحاول قد ما تقدر تسيطر على عمرها ما تريد تصيح جدام خلق الله ... ربيعتها تعرس وتاخذ اللي طول عمرها تباه لازم تفرح لها مب تصيحها ... راحت صوب زميلاتها في الشغل وبعد ما سلمت على الموظفات لوت على مشاعل ...



مشاعل: شدعوة ما نشوفكم الا في الاعراس

ليلى: انتي اللي قطعتي ولا تمرين علينا ولا اتخبرين عنا

مشاعل: اخرته اللي مدوخ البنات تزوج بنت عمه (كانت مشاعل تحاول تخفي احساسها وفاجعتها في حبها ... الحب اللي ما خبرت عنه حد واللي كانت تدري باستحالة حصولها عليه .. بس ما تنكر انها حست بألم فضيع يوم تزوج ) تستاهل حصه والله يسعدها وياه

ليلى: الله يسمع منج يا مشاعل ويهدي سرها يا رب

روضه: متى بنروح نسلم عليها ونبارك لها

ليلى: صبرن شوي ... يوم بينزلن الحريم الكبار روحن مرة وحده احسلكن

هند: الله يعينها عليه ... استاذ حمد صعب وما يرضيه أي شي

ليلى: لا باقتناع تام من صوبه ماخذ بنت عمه ولا محد غصب عليه

مشاعل: حمد ما ينغصب على شي ما يبيه

ليلى: هيه هاي



في جهة ثانية من العرس كانت شمسة واقفه ويا امها وام حمد اللي ما قدرت تمسك نفسها من الفرحه وتصيح بنتها بدرية اللي تمنت انها تكون موجوده



شمسه: يا عمتي استهدي بالله ... الله يرحمها ويغمد ر وحها الجنه

ام حمد: ما كان لي في هالدنيا غيرها وغير هالولد ... الله يهديه يا ربي

ام خليفه: يا ام حمد يا وخيتي ... طيش شباب اللي يسويه وفي الاخير بيرد لج ما عليج منه

ام حمد: خليفه وعبدالله كانوا شباب ما سووا اللي سواه

شمسه: الحين الريال معرس والليله فرحته وقاعدات تذمنه ... الله يهنيه ويسعده هوه وحصه

ام حمد: امين يا بنتي امين



كانن البنات على الكوشه ويا حصه ... سمر قاعده عدالها وكل شوي تتعبث بشي مرة ترتب الطرحه ومرة تعدل وردتها ... ومره تطل على ذيل الفستان ... اما عفرا فكانت تسولف ويا فطوم في جهه وحمده تنكت على عمتها



عفاري: فطوم عمي ذياب شافج قبل لا تنزلين

فطوم: (ارتبكت) هاه

عفاري: صدق صدق

فطوم: وانا كنت اتكلم في التيلفون

عفاري: اها زين

فطوم: ليش قالج شي

عفاري: ( تبتسم) لا ما قال شي



وسكتت عن فطوم وردت تسمع حمده شو تخورط على عمتهن ..

حمده: ربيعتي وعرست وعمتي وعرست ... باقي اختي وبيي دوري ... اوف متى افتك منها

حصه: وش له مستعيله على الهم

عفاري: عيل بتبطين جان بتريني ناويه اخذ الماستر والدكتوراه وبعدين اعرس

حمده: لاااااا يا ويلج والله ... لازم يسون استثناء في القاعده واعرس قبلج .. على جيه سمر بتعرس قبلي وهذا شي مستحيل يحصل ((كانن كلهن يضحكن على حمدوه حتى حصه)

سمر: الله بعرس قبل حمدوه .. احسن احسن لا تعرسين عفاري

سلامه: طالع البنات صدق استخفن

حمده: الله يخليج سكتي ثرج مصدقه نفسج ... جان نسيتي بذكرج انج عرستي وانتي بعمري الحين..

سلامه: ماعليه يوم بتحصلين شرات ريلي عرسي ولا اتريين حد

فطوم: وينك يا اخوي تعال اسمع حرمتك اتمدح بك جدام الناس

حمده: خلاص سلامي يوزيني اياه .. مب نحن صديقات وطول عمرنا ويا بعض ناخذ ريل واحد بالمره

سلامه: لا لا لا حدج في كل شي صديقات .. .اما ريلي بعدي عنه احسلج لا اسبب لج عاهه مستديمه

حمده: حشا يا المستقطعه انتي (كانن يضحكن على حوار حمده وسلامه اللي خلا حصه تنسى الرهبه والخوف اللي هيه فيهن ... وشوي الا وكل البنات وياها في الدوام يايات يسلمن عليها)

مشاعل: مبروك يا عمري تستاهلين حمد ... الله يجعله باب خير لج وتسعدين وياه

حصه: مشاعل فديت روحج مشكورة انج ييتي

مشاعل : وانا اقدر افوت شكلج وانتي عروس .. باقي انزوج ليلى

ليلى: (اللي كانت يايه وياهن) من بعدج يا عمري

مشاعل: لا لا ازوجكن اول عشان اضمن تحظرن عرسي لما يصير بالكويت

ليلى: اذا على جيه ماعليه

مشاعل: مبروك مرة ثانيه يا حصه

حصه: الله يبارك فيج وعقبالج بعد ليلى عشان نحظر انا وياها عرسج

وين باقي البنات يسلمن عليها ... وحتى روضه سلمت عليها بالرغم من نظرة الانكسار اللي في عينها الا ان حصه ما قدرت تحبها او تتعاطف وياها



روضه: مبروك يا حصه

حصه: يبارك في حياتج عقبالج

روضه: مشكورة حبيبتي ...

ونزلن البنات كلهن وياهن ليلى ... وحتى قوم عفاري نزلن لأن سلمى قالت لهن ان حمد بيدخل الحين وياه ابوها واخوانها خليفه وعبدالله ... اما ذياب فيوم سئلت ليش ما بيدخل قالولها انه رد الكليه ويا ربيعه ... حزنت انه ما بيدخل ويا اخوانه ... بس نست الحزن وحل محله الرهبه ... يوم شافت من تحت طرحتها حمد بالبشت .. وحذاله ابوها ووراهم خوانها ... كان قلبها يدق بعنف وتتخيل لو كان يحبها كان موقفها الحين غير احساسها بالهزيمة جدامها ولد داخلها مرارة فضيعه ... اكيد الموضوع بالنسبة له عادي .. تحدي واكسبه .. اما حمد وهو ماشي انتبه على امه اللي واقفه على طرف ويا ام خليفه وابتسم لها ... كان وده يوقف ويسلم عليها بس يدري انه المفروض يكمل طريجه ويوصل الكوشه وهي بتي بعدين ... خاصه ان بوخليفه عداله ... وركز نظره على حصه كانت منزله راسها ... بس باين انها حلوة وناعمه ... وصل ورفع طرحتها عن ويها ... لمحت حصه انها شافت في عيونه نظرت اعجاب اختفت بسرعه مما ولد داخلها خوف فضيع من اللي يترياها وتراولها انه تسمعه يقولها مبروك ... حست صوته ياي من بعيد ... وان كل مشاعرها واحاسيسها تخدرت ... طلعها من كل هذا بو خليفه وهو يلوي عليها ويقولها مبروك ... ابتسمت له .. وبعدين يوا اخوانها يسلمون عليها



عبدالله: مبروك يا حصه

حصه: الله يبارك فيك

خليفه: مبروك حصيص

حصه: الله يبارك فيك اخوي

عبدالله : (اللي قرب من حصه بعد ما انشغل حمد بعمه ) كلمتيها

حصه: هيه وعطيتها الاوراق بعد

عبدالله: مشكورة يا حصه

حصه (وهي تبتسم) العفو حبيبي



كانت المصورة تصورهم وهم واقفين على الكوشه ... وشوي وطلعت ام خليفه واتصورت وياهم بعد ما سلمت على حمد ... وبعدها شمسه يت عندهم



شمسه: وين عيالي ليش ما دخلوا وياكم

حمد: اووووه وين ندخل شباب .... نخاف على البنات

شمسه: هاهاها ما تيوز عن سوالفك يا حمد ... عيالي ما يطالعون البنات

خليفه: راحوا ويا خالهم ذياب يوصلونه الكليه

شمسه: اذا جيه ماعليه



سلمى يت صوبهم ووياها ام حمد اللي ساعدتها تركب على الكوشه ... وراحت تلوي على حمد وعيونها تدمع غصب عنها يوم شافها حمد ابتسم لها ...



حمد: امايا انتي دموعج في الحزن والفرح ... انا بعرس ما بموت

ام حمد: بسم الله عليك يا الغالي

حمد: عيل مشي هالدموع الغالية يا ام الغالي

ام حمد: مبروك يا ولدي .. الله يهدي سرك ويريح بالك

حمد: الله يبارك فيج .. عقبال ما تيوزين عيالي ان شاء الله

ام حمد: ان شاء الله يا حمد ...



شيخه تحت كانت محتشرة تريد تطلع الكوشه عند عبدالله وليلى تحاول فيها تقعد بس مب طايعه وقعدت تصيح وشلت البقعه من صياحها ... فيت صوبها عفاري تشوفها



عفاري: بلاها محتشره

ليلى: تبغي تروح فوق عند عمج عبدالله

عفاري: زين خليها تروح

ليلى: وين الريال محتشر تغث عليه

عفاري: هاتيها انا بوديها ... ماعليج انتي

ليلى: لا برايها

شيخه: بلوح.. بلوح.. ماليدث ..ماليدث (وشبصت في يد عفاري)

ليلى: ماعليه ماعليه .. روحي ما اباج

شيخه: ماليدث



شلتها عفاري وراحت ويا ختها فوق عشان يصورن ويا عماتهن وابوهن ... ويوم وصلت صوبهم فجت شيخه ايدها وراحت صوب عبدالله اللي من شافها شلها



عبدالله: مرحبا ملاييين ولا يسدن (ابتسمت له شيخه واستانست انها يت فوق وين الربشه)

شيخه: علوثه

عبدالله: هيه .. حلوه

شيخه: (بخجل) هيه

عبدالله: عقبال ما نيوزج يا بنت سيف



ضحكت شيخه وهي مب فاهمه شي بعد ما خلصوا تصوير... نزلوا كلهم وتم حمد ويا حصه على الكوشه ... عبدالله طلع وياه شيخه لانها ما بغت ترجع عند ليلى ... اما حمد فما اعجبه الوضع قاعد على كرسي والناس كلها تطالعه ... فقام وزقر على شمسه قالها انه يبغي يروح خلاص ... حاولت فيه شمسه بس ما قدرت عليه ... حتى قالب الكيك ما طاع يقصه ... في الاخير اقنعته يروحون البيت يكملون تصوير... وطلعوا من الخيمة على البيت

ليلى وام راشد راحوا وياهم البيت ... اما سلامه وفطوم وام احمد اللي كانت قبلهن في العرس فردن ويا احمد بيتهم ... لان سلامه ما حبت تتأخر عن جيه ... وبدوا المعازيم يروحون ...

في البيت دخلن الحريم والبنات يصورن ويا حصه في الميلس بعد ما خلص حمد تصوير وطلع عند عيال عمه ... حصل شيخه لاصقه في عبدالله اللي كان قاعد ويا خليفه وابوه في الصاله والحرمات على الطرف الثاني منها



ام خليفه: هاه يا ولدي شو عزمت بعدك على شورك

حمد: هيه احسن نروح بيتنا بنرتاح اكثر

ام حمد: شو من بيت هذا ... زين تعال عندي بعدل لك حجرة الضيوف وباجر روح بيتك اللي حاشرنا عليه

حمد: انا ما ارتاح الا في شقتي خلاص يا جماعة الخير

عبدالله: خلوه على راحته لا تضغطون عليه

حمد: (اللي انتبه على شيخه) منو هاي البنيه

عبدالله: (يبتسم) هاي بنت سيف .. شو منو هاي يعني ما تعرفها

حمد: تعالي هنيه

شيخه: لاء عيب ... ماليدث

حمد: يا حافظ عيب الا عندي وفي عبدالله لاصقه هب عيب

ام راشد: محد يروملها يا بوك عمتها مكبره راسها يا ولدي

حمد: هاهاها مب راسها بس الا مكبرتنها بكبرها

عبدالله: هب هباك الله عن تاكل البنت

حمد: لا اله الا الله ...

خليفه: عيل انا اترخص عن اذنكم تعبان بروح احط راسي وبرقد ... يوم بيطلعن بناتي وحرمتي قولولهن اني رحت

عبدالله: ماعليه ان شاء الله



وطلع عنهم خليفه وتموا الباقين يسولفون شوي ... وصد صوب امه اللي كانت قاعده ويا ام خليفه وام راشد

حمد: امايا انتي بتباتين هنيه

ام حمد: لا وين ابات هنيه .. بروح بيتي

حمد: منو بيوصلج الحين

ام حمد: دريولي وخدامتي برع

حمد: لا ما تروحين وياهم الحين ... نشي بوصلج بروحي .. وخلي دريولج وخدامتج يردون

ام حمد: وين توصلني وحرمتك عندك

حمد: بوصلج وبرد وحرمتي ما عليها شر

عبدالله: خل عنك يوم بتروح انت وحرمتك بوصلها انا ... لا تحاتي

حمد: خلاص عيل لا تخليها تروح ويا الدريول

عبدالله: هاهاهاها شو تغار على امك

حمد: تنكت حضرتك ... ما تهون علي تركب ويا دريوليه هالحزة

عبدالله: ان شاء الله

حمد: روح ازقر اختك خلنا نروح خلاص



بعد ما زقر عبدالله حصه عشان تطلع ... بدت المناحه اللي افتتحتها سمر



سمر: خلاص بتروحين

حصه: هيه عشان تفتكين مني

سمر: لا والله احبج والله العظيم

حصه: (اللي بدت تدمع) وانا احبج والله



هنيه سلمى وشمسه ونوره ما رامن يودن عمارهن ... كانت ليلى وهي تحاول تمسك عمرها تحاول تسكت في سلمى وشمسه ... وعفاري تسكت في حمده ...



ليلى: بسكن عاد لو رايحه دبي ولا العين شو بتسون

حصه: (من بين دموعها) تعالي ليلى بسلم عليج

ليلى: (وهي تلوي على حصه وما قدرت تيود دموعها) بسج عاد صايح ... شكلج بييطلع غلط

حصه: (وهي تضحك من بين دموعها) يعني بيتروع احسن بعد

ليلى: (تضحك) والله انج حركات



كان هذا شي مصغر من اللي صار برع ... ليلى طلعت بغشوتها وكانت دموعها همايل تحت الغشوه ... وحصه زادت الريس يوم سلمت على امها وابوها ... وهي في السيارة كانت سلمى تحاول تضبط لها جحالها اللي ساح عشان ما يطلع شكلها غلط ويا ر يلها ...



حمد: ياللا يا سلمى شو تحوفرين هالكثر

سلمى: بلاك مستعيل ... صبر خلني ارتبها شوي

حمد: بتروح البيت وبتمشه كله ياللا خلينا نروح

سلمى: خلصنا ياللا .. وهالله هالله في حصه .. حطها في عيونك

حمد: من عيوني ... ممكن نطلع الحين

سلمى: هيه مع السلامه ... ((صكت الباب ونزل حمد الجامه اللي من صوب حصه ))

حمد: (من السيارة يزاعج على عبدالله) وصل امي هاه لا تنسى ... وبسك من الصبح شاغن هالديناصور



ضحكوا كلهم على حمد اللي حب يغير الجو الكئيب اللي كانوا فيه .. حتى ليلى بالرغم من انها حرجت عليه بس ابتسمت ... وطلع بالسيارة وهو يسمع عبدالله يتحلف له ...

دخلت حصة مع حمد الشقة بعد ما رفض رفض نهائي انهم يباتون بيت عمه او حتى يرد بيت امه على الاقل في اليوم الاول من زواجهم ... كانت هاي اول مرة تدخل شقة حمد اللي تسمع عنها ... كل اللي تدريه انها في بناية عمتها ام حمد ... الديكور بالنسبة لها كان عجيب غريب ... مزج فضيع بين الستايل الحديث والكلاسك ... ومع ذلك طالع روعة ... فعلا حمد سيد التناقضات مب بس في تصرفاته حتى في ستايل حياته كله ... صك حمد الباب وراه وعلى ويه ابتسامه بالرغم من انه حاول انه تبدو سخريه الا انه غلب عليها الطابع الانساني



حمد: شو رايج في بيتنا

حصه: (وهي تجلب بعيونها الصالة الوسيعة للشقة) كلها مفتوحه على بعض مطابخها وصالاتها وغرفة الطعام ... تعال وين حجر النوم (حصه نفسها انصدمت من سؤالها بس حمد ما حس ان السؤال فيه شي او حس وحب يطوفلها اياها )

حمد: فوق ...



ساعتها انتبهت حصه على الدري اللي على طرف كان كله ستيل ... خيف وبسيط وبشكل دائري اقرب ما يكون للعبة من دري صدقي ...



حصه: انت اللي مختار الديكورات

حمد: انا قلت للمهندسة اللي ابغيه بالضبط وهيه سوت

حصه: وين التلفزيون (ضحك حمد غصب عنه من بنت عمه اللي كل شوي دورت شي) أي ليش تضحك ... ما اشوف فيه تلفزيون

حمد: معاريس ما نريد تلفزيون (احمرت حصة من رده بس ما حبت تبين له ان موقفها ضعف حتى لو هو اللي انتصر وخزته بنظرة اما هو رد ابتسم) امزح امزح .. تعالي براويج وين التلفزيون



دخل الصاله ومسك رموت وهوس فص ارتفعت لوحه مجابل وحده من الكنب وطلع تحت التلفزيون ... وهي مبطله عيونها ...



حمد: هاه شو رايج

حصه: خيبه كيف مدخلين التلفزيون في اليدار

حمد: التلفزيون فلات ... وبعدين اللوحه بارزة اصلا

حصه: هيه لاحظت

حمد: بس فوق مب جيه ... شوي اهدى

حصه: اهاااا

حمد: (يبتسم) ما تبين تعقين هاللي لابستنه وتفجين شعرج ... وتمسحين هالاصباغ من على ويهج

حصه: (وهي معصبه وبنبرة عاليه) والله لا لبست هالشي ولا تصبغت بكيفي ... جنه اليوم عرسك

حمد: هيه عرسي بروحي ثره

حصه: انت اللي بغيت

حمد: (وعينه في عينها) وانتي ما بغيتي

حصه: (وبنفس النظرة) لا .... وانت تدري هالشي



كانت عيون حمد في عيونها بس هالمرة ما نزلت راسها ... بعد دقيقه من الصمت راح حمد صوب شنطتها الصغيرة اللي جهزنها خواتها لها ... وشلها بيوديها فوق



حمد: تعالي بوديج الحجرة اذا تبين تبدلين ثيابج واذا ما تبين عادي رقدي تحت باللي عليج



وقفت حصه تحت مب عارفه كيف تلحق حمد هيه منزلاتنها شمسه ونورة خواتها ويريدها تركب هالدري الضيج بروحها بتندبغ على ويها ... يوم حس حمد انها بطت وما لحقته لف بيشوفها وحصله واقفه تحت وهي تطالع الدري ومب عارفه تركب ... هز راسه وهو يبتسم وكمل طريجه وحط الشنطة عند اول الدري ... ورد تحت يساعدها تركب



حمد: هاتي ايدج

حصه: (بعناد) ما اريد يركب روحي

حمد: اوكي برايج



رد حمد بيركب فوق ... وخافت حصه يخليها ويرقد تدريبه حمد نذل يسويها ... ولا بيفتكر فيها خلاص ... بس قبل لا يوصل فوق زقرت عليه



حصه: اااي وين رايح

حمد: تعبان ابغي ارقد ... روحي شوفي التلفزيون اذا تبين ... ترى الكنبة مريحه حق الرقاد ... بس مب منزل لج شي من فوق لاني ما برد انزل

حصه: أي اريد اغير ثيابي ..

حمد: قلت لج بساعدج ما طعتي اتيين

حصه: (بيأس) زين خلاص الحين وافقت

حمد: (بعد ما رفع واحد من حياته) على شو

حصه: ساعدني بروح فوق

حمد: ومنو قالج ان العرض ساري للحين ...

حصه: يعني

حمد: يعني تصبحين على خير ((ورد يركب بيروح فوق))

نش حمد من على السرير وهو يطالعها بنظرة احتقار وردت له النظرة بأقوى منها .... وراح صوب الباب بيطلع من الحجرة ... الظاهر انه ماشي فايده فيها ... ولا يدري كيف ممكن يتفاهم وياها ... ووهق عمره بهالعرس لو خلاها تاخذ ولد خادم مب ابرك له من عوار الراس هذا ... قبل لا يطلع من الحجرة



حمد: انا رايح ارقد حجرتي تصبحين على خير



وراح صوب الحجرة الثانية وصك الباب الباب وراه .... اما حصه تمت قاعده مكانها وهي منصدمه من حمد صح كانت تبغي هالشي .. بس ما توقعت انها اتيي منه يخليها ويروح في ليلة عرسهم .. هالكثر عايفنها وما كانت بالنسبة له اكثر من تحدي فاز به ... يخليها ويروح يرقد ... ردت تفكر شو كان يريد يقول ليش هي الهبله ما خلته يكمل كلامه ... قبل لا يوصلون لطاري جواهر كان يتصرف بشكل طبيعي ... يعني هو وغد بطبعه ما تقدر تغير هالشي وتقدر تتعايش مع هالواقع ... بس انه يخليها ويروح شي عورها في الصميم ... وهي معصبه قامت من على السرير وراحت صوب الباب وهي تقول احسن فكه من ويهك منو اللي يريد يقعد معاك ... تخرطفت اكثر من مرة لين ما وصلت الباب وسكرته وقفلته بالمفتاح بعد وربعت يديها على صدرها وقعدت تنافخ وهي مجابله الباب

اما حمد بعد ما دخل حجرته عق كندورته وفرها على الارض وراح انسدح على الشبريه مع انه كان مغيض على حصه حده ... لو حاول قد ما حاول يتفاهم وياها ماشي فايده عنيده ... او يمكن هوه اللي مرتبك وحالته حاله ومضغوط وما يقدر يتحمل منها كلمه ... كان ناوي يخبرها كل شي .. يقولها الصدق بلاها هيه خبله ما تبغي تسمع ... بس بالرغم من كل هالافكار ما كمل حمد ربع ساعة الا ورقد من التعب والجهد اللي ابذله طول اليوم

[البدوي الحبوب]

اما حصه كانت قاعده على الكرسي اللي في الحجرة وكل انتباها واهتمامها على أي صوت ممكن يصدر من حجرة حمد ... كانت خايفه ومتغير عليها المكان ... صح حمد راقد في الحجرة اللي عدالها بس بعدها ما تعودت المكان... تذكرت فجأة انه حمد ما قالها اللي يبغي يقوله ووردرها وراح ... واشتعل فضولها في نفسها ليش ما قالي شو يريد ... كله مني انا اللي غبية لازم اتنرفز لو سكت لين ما خلص كلامه ... بس بعد هو ما يستحي يكلمني عن غرامياته ليلة عرسي .... اوف منك يا حمد صدق بليد احاسيس وما عندك اسلوب ولا تعرف تختار الوقت المناسب ... سمعت بطنها يسوي اصوات من اليوع ... ما كلت شي طول اليوم غير اللي عطوها اياه الضحى بالغصب ... يت بتوقف بس تخرطفت بجلابية حمد ... ووقفت ورات صوب الباب بطلته بشوي شوي ... وشافت باب حجرة حمد مسكر ... راحت صوبه وقفت تتصوخ بس ما سمعت أي صوت ... ردت حجرتها ... وعقت الجلابية وتمت بالقميص والشلحه مثل ما قالها حمد ... .ونزلت سرعة تحت وهي حافية عشان ما تسوي صوت وراحت صوب المطبخ تدور شي تاكله... حصلت كورن فلكس وحليب .. فصبت وقعدت تاكل يصبر لين باجر ... كان في الثلاجه فواكه بس ما بغت تاكل فروت... صح ما شبعها الكورن فلكس بس سد جوعها مؤقتا... غسلت الصحن اللي كلت فيه ونشفته وردته مكانه وراحت فوق حجرتها ... وردت سكرت الباب بشوي شوي وقفلته ... لفت نظرها صندوق حمد اللي نسى يشله وياه ... وراحت صوبه تشوف شو داخله ... من النظرة الاولى شافت دفاتر مرتبه في الصندوق ... ومجموعة رسايل ... قررت تفتش في الدفاتر فضولها غلبها وقعدت تجلب فيهن ... شد نظرها دفتر صغير من اللي يوزعونهن في الفنادق ... جلبت في صفحاته كانت تواريخ جديمة في نفس الفترة اللي كان حمد يدرس فيها في لندن .. اقل من ربع الدفتر مكتوب فيه ابيات شعر ... وتواريخ مختلفه ... فجت الصفحة الاولى وقرت شو فيها وعرفت الخط انه خط حمد ...



(( 12/10/1992



فديتها من الحين اشتقت لها ... ليت هالطيارة تخترب ورد اقعد وياها كم يوم ... يا كم كثر افتقد صوتها وحلاة ويها وانا هناك



تساوت عندي الدنيا تساوت ..... وهي يومك قريب لي تفــاوت

حياتي عقب نورك مثل لـيل ..... جميع نجومه من ادنى تهاوت

الا يا ناصح بالطب روحـي ..... تـــراها لو لقت طـــب تــداوت

ولكن من يعوضني بخـــــل ... معالـيق الضمـأيـر بـه تـلاوت



خــــالد الفيصل ))



فز قلب حصه في صدرها ما تدري شو اللي يعصره غيره قهر او مرارة في انها ما قدرت تخلي ولد عمها يحبها.. عمرها ما تخيلت ان حمد ممكن يتفدى حد في حياته ... او انه ممكن يحب بهالطريقة ... رغم انه ماضي بس ما تقدر تمنع نفسها من الغيرة وتمنع قلبها من هالاحساس بالمرارة والقهر ... جلبت الصفحة اللي بعدها وقرت اللي فيها



(( 7/11/1992



ياللا متى تنزل هالطيارة ... ما بغيت اوصل فديت هالارض وفديت اللي يحليها ... كيف انا بصبر لباجر ... احتري شوفك يا عمري ...



فز الخفوق وقلت يا عسى خير .... اثر الليالي عاد غايب قمرها

مع شوفته نشوه وفزة وتخدير .... وعيون خلان تعانق نظرها

يفز له قلبي كما فزة الطير ..... والرجل كن اللي تحتها غدرها



خالد الفيصل ))



حصه بالرغم من الغيرة اللي تنهش في قلبها حست بتعاطف ويا حمد وهيه تجلب اوراق الدفتر وتقرا اللي فيه ... كان يحب بس السؤال اللي كان بيذبحها وودها تعرف اجابته هوه للحين يحب جواهر ... واذا يحب جواههر ليش تزوجها ليش يعذبها وياه ليش يستلذ تعذيبها وهيه اللي ما سوت له شي في حياتها كلها ... وصلت لاخر صفحه في هالدفتر ... ومثل كل الاوراق اللي طافت كان كاتب سطرين وتحت هالسطرين ابيات لخالد الفيصل



(( 17/ 4 / 1993



بالرغم من انها كانت امس وياي ... الا اني لليوم احس بلمسة يديها على يدي ... و نصخها في صدري انا ... للحين اسمع صوتها وهي تعد لي احلى ابيات من قصيده لاعظم شاعر



نوى المرواح مصحوب السلامه.... بعد ما ولع القلب بغرامه

تركني وارتحل يا طول ليلي .... متى يرجع لنا ظبي العدامه

خذوله يا اهل المعروف مني ... سلامي له وردولي سلامه

انا لولا الحيا لاصيح باسمه.... ولكني اجنبه الملامه



خالد الفيصل ))



بندت حصه الدفتر ودمها يفور ... كانت وياه ... يلمس ايدها وشو بعد الله يعلم ... انا حرمته ما افتكر حتى يسلم علي مثل العالم والناس ... هالوقت اللي كانت هيه فيه في المدرسة تبات تحلم به ... وتقوم وما شي في العالم غيره شاغل تفكيرها ... تفكيره مع غيرها ... شو كان فيها زود شووو

شلت دفتر ثاني من دفاتره وفجته ... هالدفتر فيه كتابات وشخبطات لنفس هالسنوات اللي كان فيهن في لندن ... صفحات فاضيه وصفحات فيها رسمات وغيرها فيها كلمات وابيات شعر ... اتصفحته كامل ... بالرغم من الطلاسم اللي كاتب بها مذكراته الا انها حست انها تفهم كل كلمه كل رسمه وكل حرف ... حست انه ورا قسوة هالانسان حنان وعطف ... وانه تحت قناع الوغاده انسان حساس ....

حست بيوع مرة ثانيه وعطش ... فقررت انها تنزل تسويلها كوب نسكافيه وتاكل شي عشان ترد تكل استكشاف ذكريات حمد ... وفي داخلها خوف من انه يكشفها ... لو يدريبها يا يردها بيت ابوها نفس الليله ابتسمت وهي تتخيل الموقف ... ونزلت بشوي شوي ...

.....

رفعت اللحاف وفرته بعيد بقوه..ويلست على الشبريه ودفنت ويهها بين كفوفها...وصرخت بصوت شوي عالي"اوووه شو هالحاله يا ناس ابغي ارقد..والله ابغي ارقد.."..نشت ليلى من مكانها وشغلت ليت الاباجوره حذالها ويلست متربعه على الشبريه وحست بصداع بغيض في راسها..تنهدت بقوه ونشت للمكتب تذكرت شي..وين حطته...؟؟ فكرت تنزل تحت اكيد خلته في السياره..هي تبغي تشوفه الحين ما يخصها...بطلت باب الحجره بشوي شوي ونزلت من على الدري بهدوء...كانت لابسه بجامتها القطنيه البيضا ونازله وشعرها مفرود وبعده شوي خرسان ماي..اول ما شغلت ليت الصاله وقبل تمشي للوسط يت عينها على الطاوله اللي في طرف الصاله..وشافت الظرف البني..اكيد امها نزلته او حد من البشاكير...

شلته وطلعت فوق وهي تدعي ربها ان حمدان ما يكون فتحه او شاف شو فيه...دخلت الحجره وصكت الباب وطاحت على الشبريه..وفجت الظرف..وخذت نفس عميق بالنسبه لها كانه كان دهر..كانت تكلم نفسها وهي تفتح هالظرف اللي تحس عمرها مخنوقه وهي تشوفه...

"يا ربي الحين انا كلما طلعت من مصيبه يت لي اللي اشد منها...يعني حتى حد قريب مني ما بلاقي واشاوره...مب حاله هذي...."

تعبت ليلى على كثر ماهي تعبانه..ما تدري تلاقيها من من ولا من...كل ما قالت هانت والايام بدت تحلى..زادت كأبتها وطلع لها حزن يديد تنشغل به....

نشت من مكانها وسارت تييب الهيدفون وحطت الاف ام وسمعت صوت ام كلثوم الساعه 3:00 نص الليل ولاعت جبدها وبندته على طول...بس انتبهت لشي في الاغنيه وردت تسمع مره ثانيه....صح لاعت جبدها من كثر المواويل في الاغنيه واستغربت كيف هذي ما تتعب من مط الحروف والكلام بس عيبتها الكلمات...

"هــذه الدنــيا كتاب انت فيه الفكر...هذه الدنيا ليال انت فيها العمر...هذه الدنيا عيون انت فيها البصر..هذه الدنيا سماء انت فيها القمر...فأرحم القلب الذي يصبو اليك...فغدا تملكه بين يديك...وغدا تأتلق الجنه انهارا وظلا..وغدا تنسى...فلا تأس على ماض تولى..وغدا نسمو فلا نعرف للغيب محلا...وغدا للحاضر الزاهر نحيا ليس الا...

قــد يكــون الغيــب حلــوا انمــا الحاضــر احلــى..."

خذت ليلى نفس عميق وهي تسمع ام كلثوم تمد في الجمله الاخيره...ياااه يا رقتها هالليلى صدقها ام كلثوم... قــد يكــون الغيــب حلــوا انمــا الحاضــر احلــى....!!!

يلست ليلى تسمع رائعة ام كلثوم بس للاسف كانت شبه منتهيه وفقرتها الليليه قربت تخلص...ويلست تتصفح الاوراق..وهجم عبدالله مره ثانيه بقوه عنيفه على افكارها...وغزتها فكرة الزواج...

"انا اريد ازوج؟؟!!!..انا ابغي تكون عندي اسره وعيال...(غمضت عيونها بعمق وهي تفكر) عيال!!! شكلي لازم عن هذي حتى اتنازل...ليـش...!!! فلاح رضيت فيه ويوم درا عن شيخه رفض...وعبدالله ان رفضته هو الوحيد اللي متقبل شيخه....!!! أي تناقض هاللي اعيش فيه...بصيح والله بصيح.."

قرت الاوراق وكيف فحوصاته وتعبه اللي راح ست سنين ورا على الفاضي...ما كانت ليلى يائسه وفي ويهها نظره ما بقول نظرة امل ولا تفاؤل لكنها اغلب الظن ارتياح..مب لعبدالله ولكن لفكرة الانجاب...يمكن ماقدر ييب عيال قبل من المرحومه بدريه..لكنها على اقل تقدير ما يدري بالغيب اللي ما يعلم به الا الله..اممم 55% مب نسبه بطاله..لكنها تتم ضعيفه...يعني معقوله الحين اتخلى عن امومتي واضحي باللي وراي واللي جدامي..واخسر كلمة امايه من ياهل مني انا قطعه من كياني....وعبدالله كيف بيصبر علي وهو للحين عايش على ذكريات حرمته..

في الاخير انا خسرانه وهو خسران...والربحانه الوحيده بالسالفه هي شيخه...انا خسرانه امومتي وهو بينشغل فينا عن ذكرياته ويا بدريه..وانا يا خسارتي في نفسي ..ما ظني احتاج ادور على ريل يقبل فيني وفطرفي بنت يربيها غصبا عنه...

مسكت راسها من القهر اللي ياها..ترفض توافق ترفض توافق..شو تسوي...بس قررت في الاخير انها تحط الاوراق على ينب وتنش تتوضى بتصلي صلاة الفير لانها ما بقى عليها شي.....

ردت حصه فوق بعد ما سوت لها كوب نسكافيه وقفلت الباب وانسدحت على السرير ومسكت دفتر ثالث من دفاتر حمد ... هالدفتر مكتوب عليه من برع مذكرة 94- 95 شدتها اول صفحه في الدفتر ... والكلام اللي مكتوب فيها كانت بدون تاريخ يحدد اليوم ...



(( ليش ليش يا عبدالله .. ليش يا ولد عمي تخبرني اليوم ما يكفيني اللي فيني ... ما يكفيني العذاب اللي انا فيه... والوحده الفضيعه اللي عايش فيها ... ليه الشي الوحيد اللي ابغيه من خاطري ما يصير ... احبها والله احبها ليش ما تقدر تفهم ... ليش ما تفهمهم ... ليش ما تقولها تصبر



ظلمتني والله قوي يجازيك .... باللي بلاني خالق الناس يبلاك

شابهت عدواني وانا طامع فيك.... اقرب قريب لي هقيت انه اياك ))



شغل تفكيرها الكلام اللي في الدفتر اكيد هنيه عبدالله خبر حمد شي عن جواهر ... بس شو هالدعوة يا حمد اذا تقصد بها عبدالله فهكوه تشوفه جدامك شصار من عقب بدريه ... يا خوفي يكون استجابه لدعاك عليه ...

ردت تجلب في الدفتر وايقنت انها الفترة اللي ودر فيها حمد جواهر ... كلامه خربشاته كلها عن الخيانه عن الغدر ... وعن الالم والوحده ... ما حست بعمرها الا فاجه دفتر غيره بنفس المضمون ... كانت عايشه عالم ثاني عالم ترسم فيه بخيالها قصة كامله البطل حمد والبطله بالنسبة لها مجهوله ... حست بداخلها بعد هالكم الهايل من الكلام اللي قرته باشفاق تجاه حمد ... وحسد لهالانسانه اللي قدرت تخلي حمد يحبها هالحب كله ... وحقد عليها لانها تسببت في اللي صار له... كلهم خسروه كلهم والسبه هيه ... طاح من الدفتر وهي تجلب صفحاته ظرف فيه صور... وانتثرت الصور اللي فيه على السرير .... كانت صور حمد في لندن ... لمتهن وهي تسمع الفير يأذن وقعدت تجلب فيهن صورة صورة تتأمل حمد وتشوف اللي وياه ... معظم الصور كانت في حفلات من اللي يسونهن الطلبه هناك... ومعظم الصور وحمد يضحك ووياه بنات شي شكلهن خليجيات وشي شقر ... بالرغم من المرارة داخلها ابتسمت ... يا ويل حالي عليك يا ولد عمي من يوم يومك مخبل بالبنات ... ردت الصور في الظرف وحطته في نص الدفتر ... وردت الدفاتر في الصندوق ... وهنيه انتبهت على الرسايل اللي ما فجتهن... قررت بعد ما تصلي وتوعي حمد للصلاه اترد تقراهن ... شكلهن مب وايد وبتخلصهن بسرعه ... خشت الصندوق تحت الشبريه ... وراحت صوب شنطتها الصغيرة اللي يايبتنها وياها وطلعت منها شيلة الصلاة ولبستها وراحت صوب حجرة حمد توعيه عشان يصلي الفير ... دقت عليه وهي تزقر عليه بس ماكان يتياوب لها ... فجت الباب كله عشان تدخل الاضاءة من الممر وقربت صوب السرير ... كانت تحس برهبه وهي تشوفه راقد ... ما تدري بردة فعله بس ما تقدر بعد تخليه راقد عن الصلاة ... تخاف ربها يحاسبها هي باعتبار انه زوجته وخلته راقد عن الصلاة ... بدت تنادي عليه بصوت واطي بس بعد ما رد عليه ... من التعب مب حاس بالدنيا ... هزته بايدها شوي ..



حصه: حمد ... حمد قوم صلاة اذن الفجر... ياللا قوم حمد

حمد: ( اللي كان بين النايم والصاحي واقرب للنايم) هاه منوه

حصه: حمد قوم ... انا حصه

حمد: حصه منوه

حصه: (وهي تهزه بالقو) اوهوووو قوم انا حصه بنت عمك ... قوم بتصلي

حمد: (اللي انتبه الحين وتذكر انه امس كان عرسه على حصه بنت عمه وبغلاسه) حصه منوه

حصه: حصه بنت عمك

حمد: (بغياض) قولي حصه حرمتك

حصه: (اللي بدت تنرفز) اوهووو بغيت تنش تصلي قوم ... ما بغيت كيفك ... (ولفت بتطلع بس حمد مسك ايدها قبل لا تروح ويوم لفت تطالع يت عيونها في عيونه وشافت على الضوء الخفيف الداخل من الممر ابتسامة لؤم مرسومه على شفايفه )

حمد: قولي حصه حرمتك

حصه: ما بقول وهد ايدي بروح اصلي

حمد: قولي حصه حرمتك وبخليج تروحين

حصه: (اللي يرت ايدها بالقو وبايدها الثانيه مسكت ايده عشان اتخوزها عنها) مب قايله



طلعت بسرعه من حجرته وراحت حجرتها وقفلت الباب ... كان قلبها يدق بقو.. وفي داخلها اتحرطم على حمد .. ونه حرمتك شو اتحرا عمرك بتذلني يا حمد بتشوف منو حصه ... للحين ما شفت شي ... اما حمد فابتسم ورد غمض عيونه شوي... ما يدري ليش يحب يغايضها ويلعوزها... ليش كان يحس بشعور من الرضا يوم يخليها تعصب... رد نش من الفراش وراح يتوضا عشان يصلي ...



حصه بعد ما صلت كانت تريد تقرا الرسايل ... بس ما قدرت ترد تطلع الصندوق من تحت السرير ... كانت تحس بتعب وتذكرت انها من اسبوع ما رقدت مثل الناس... واليوم كملتها سهره للفير مع الجهد اللي بذلته ... وغصب عنها من حطت راسها على المخده راحت في سابع نومه ... وانتهت بالنسبة لها اول ليلة من زواجها

.....................

دخلت حجرتها وهي شبه دايخه من سهرة البارحه وشعرها متناثر على ويهها وطايح على ظهرها...طول وايد عن يوم عرسها..دخلت تراقع في البيبان وهي مسطله رقاد وشافت الشيخ للحين راقد ما عرفت شو بتسوي لين ما ينش وراه صلاه وسبوح..ويبالها ساعه توعي فيه...ياربي الناس تعرس عشان ترتاح وانا عرست عشان ابتلي بريل ما ينش من رقاده...ونطت على الشبريه ويلست عنده..

سلامه: حمووود صلاه نش...

وانجلب عنها الجهه الثانيه وتلحف..

سلامه: قول والله..؟ احلف انت بس...

احمد: سلامه خليني ارقد...

سلامه: ما تبغي تصلي صلاة اليمعه؟

احمد بكسل: ارجوج والله مب رايم اتحرك احس جسمي متكسر...

سلامه بحنان: زين بهمز لك ونش تسبح والله ما حسينا الوقت متأخر..

احمد بدلع: اوكي..

سلامه بطرف عينها: الحين اوكي..

وسحبت اللحاف ويلست تهمز له ظهره وريوله وايديه ورقبته وجتوفه..وهو مسترخي ومفجج راسه..

احمد يلس يمدد ايديه: اااه راحه فضيعه..

سلامه: يالله نش اسبح وراك صلاه...

احمد: زين امايا نشت وفطوم؟

سلامه: عمتي من ساعه يالسه تتريا الاذان الاول..

احمد: وليش ما وعتنا من وقت..

سلامه: هي اروحها متأخره..

قام احمد ودخل يسبح وسلامه طلعت المدخن وقربت العود وجهزت كندورته وسفرته وحطتهن له على الشبريه وسارت عند عمتها لين ما يطلع احمد من الحمام..

سلامه تيلس عند ام احمد: للحين ما نشت فطوم؟

ام احمد: لا والله هالبنت يبالها ضرب قولي لها تنش للصلاه...

سلامه: ان شاء الله عمتي..

وسارت تدق على فطوم وهي تحرطم عليها..

سلامه تدق الباب: فطوم وعثره قومي نشفتي ريجي.؟؟

فاطمه اللي نشت وبطلت الباب وكشتها للسقف: زين نشفت ريجج مب من هني المطبخ هكووه سيري له شربي ماي..

سلامه نقعت ضحك: يا غلاستج يا فطوم..

فاطمه: زين ذلفي بسير اتسبح..انتي ويا هالويه عوذ بالله ما تتعبين انتي..!!

سلامه: هبي هباج الله اخوج ما خلاني ارقد البارحه ساعه يالس يقول لي مب هاين عليه امسح الميك اب عن ويهي ولا اغسل شعري من عقب التسريحه..

فاطمه ميته ضحك: ويه فقر تراه مب شايف خير...اول مره يشوف تسريحه فشعرج من عرستي..

سلامه تضحك وتدزها من جتفها: يعلج تفدينه يالخايسه..

فاطمه: انزين شو قالج شو قلتوا ما قلتوا..

سلامه تضحك: اسرار واليهال ما يعرفونها..يوم تعرسين ماظني بتعطيني تقرير شو تسوين انتي وريلج..

فاطمه: مالت تهبين ازوج واحد مثل احمد..من زينه..

سلامه حرجت: وقسم بالله انج سخيفه..

فاطمه تمت تضحك وسلامه تكفخها على جتفها بعصبيه..وان صوت احمد من بعيد يزقر سلامه...

فاطمه: تلاحقي على ريلج لا يحرق عمره بالمدخن سيري دخنيه..

سلامه ضحكت: سخيفه وخسفه ودمج ثجيل...

فاطمه ترقع الباب بقو وهي ميته ضحك: روحي روحي لريلج يا ماما..

وسارت سلامه وشافت احمد لابس ومتسفر وشكله يجنن...بغت تذوب عليه وابتسمت له...

سلامه: وييه فديت هالويه انا وقسم بالله يذبح..

احمد اتشقق: احم احم...

سلامه تدخنه: اصبر بقرا عليك من الحسد...

احمد: بسج عاد شو هالخرابيط...؟

سلامه: العين حق مسود الويه مب كيفك تنكرها...

احمد: زين شعندج انتي وفطيم تتلاسنن صوتكن واصلن لين هني..؟

سلامه تبتسم: ماشي الا خرابيط اختك ما تعرفها..؟

احمد: امي في الصاله؟

سلامه: هيه اخطف عندها وسلم وانا بسير اسبح عشان اصلي...

احمد: اوكي خلاص..شو الغدا؟

سلامه: مجبوس لحم..

احمد: اوكي خلاص..

وطلع احمد وسلامه صكت الباب بالمفتاح ودخلت الحمام بتتسبح وتصلي...هيه تصلي..عقب ما كانت ما تعرف الصلاه...وعقبها بتسير تحط الغدا هي وفطوم ويجتمعون مره ثانيه على السفره هم وام احمد...

.....................الساعة 11 ونص وهي اتجلب سمعت الاذان يأذن ... وقعدت اتذكر وين هيه... واول ما تنبهت للمكان اللي هي فيه فزت من الرقاد ... ويرت الساعة من على الدرج تشوفها ... 11 ونص يعني هذا الاذان الاول لصلاة الجمعة ... يا ترى حمد نش ولا بعده راقد ... كانت نعسانه وتحس انها ما شبعت رقاد بس قامت بتشوف ولد عمها لا يرقد عن صلاة الجمعه ... بعد ما تغسلت واتشيلت طلعت من حجرتها وراحت صوب حجرة حمد ... فجت الباب وحصلته بعده راقد ... كان في داخلها خوف من انها اتروح صوبه وتفكر في طريقة توعيه بها دون ما تروح عداله بس حمد ما كان راقد مثل ما تتصور وحس بها يوم فجت الباب ... ويوم طولت واقفة جدام الباب.. تكلم



حمد: بتطولين وانتي واقفة جيه ... ولا عايبنج شكلي وانا راقد

حصه: (اللي تفاجئت به واعي) هاه

حمد: شو هاه

حصه: لا بس كنت يايه اوعيك لا تفوتك الصلاة تراه اذن الاذان الاولي ... هبابك تتسبح وتنزل

حمد: اوكي مشكورة



ردت حصه حجرتها وهي مقهورة من اسلوب حمد معاها .... اما هوه فنش بعد ما وعته عشان يدخل يتسبح ويلحق على الصلاة لا تفوته ... بعد ما سمعت حمد طلع من الشقة طلعت هيه من الحجرة ... كانت لابسه تنورة سودا حاطيلها اياها ... بس ما قدرت تلبس القميص لان قصته عريانه شوي ... فتمت بقميص حمد بعد ما رفعت الاكمام ... وربطته من عند الخصر ... نزلت تحت وهي مب عارفه شو تسوي الحين ... هل لازم تطبخ ولا شو بيكون الترتيب ... والمصيبه انها ما تعرف تطبخ وحمد يدري انها مب لين هناك ... تخاف تقعد يسويلها سالفة ليش ما طبخت ... فقررت تتصل في ليلى عشان تعلمها تطبخ شي بسيط .. بعد ما رن رنتين ردت ليلى عليها



ليلى: هلا والله العروس ... هاه صبحية مباركه يا عروسه

حصه: هاهاها ... الله يبارك فيج .. عقبالك يا بت

ليلى: ااااااااه ما اعرف شو اقولج

حصه: قولي قولي ...

ليلى: اول خبريني هاه شو العرس

حصه: والله ما ادري عنه ... شو العرس؟

ليلى: أي حصووووه مب علي انا

حصه: (كانت متردده تبغي تخبرها عن دفاتر حمد ... بس في الاخير قررت انه هذا سر من اسرار حمد ما تقدر تكشفه لحد حتى لتوأم روحها فغيرت الموضوع) تعالي تعالي شو هالحركة الخايسة اللي سويتيها ويا سلمى امس

ليلى: شو سويت ... والله ما سويت شي

حصه: وقميص النوم هاه ... مب قلت لكن حطلي بجاما وكندوره عربية بلبسها

ليلى: هاهاهاها ... بس والله يجنن اكيد طلع عليج جنان

حصه: تهبين والله ما طاح ينبي

ليلى: (شهقت) عيل كيف نمتي

حصه: أي أي لا يروح تفكيرج بعيد .. خذت جلابية من عند حمد

ليلى: وخلاج

حصه: هاهاها مالج خص

ليلى: افااااا من الحين اسرار علينا

حصه: لا يا حبيبتي رقد في حجرته

ليلى: لا لا لا ما اصدق

حصه: كيفج

ليلى: ووينه عنج عريس الغفله

حصه: راح يصلي

ليلى: هيه وانتي قلتي فرصه اكلم ليلووه

حصه: هيه ... ياللا عطيني اخبارج بالتفصيل الممل

ليلى: ااااااه يا حصه شو بقول

حصه: قولي قولي انا اسمعج

ليلى: مب عارفه شو اسوي وشو اريد ... كلامج امس جلب لي كياني ... انصحيني يا حصه شو اسوي ... دليني على الطريج اللي ابغي

حصه: (بجد) والله يا ليلى ما ادري شو اقولج

ليلى: قوليلي شو رايج

حصه: حتى رايي ما اقدر اقولج اياه

ليلى: (بكآبه) ليش

حصه: ليلى انتي مب بس صديقتي انتي اقرب الناس لقلبي والشاهد الله انج شرات الاخت بالنسبة لي ... وعبدالله اخوي لازم اذا تكلمت بمدحه ... وبتكلم من منطلق عاطفتي تجاهه وتجاهج ... كم كثر اتمنى اشوفج وياي كل وقت اشوفج في بيتنا ... بس بعد ما اقدر انكر ان عبدالله فيه عيوب ... هل تقدرين انتي اتحملينها

ليلى: ايوه شو هالعيوب

حصه: كل انسان له عيوب يا ليلى .... وما بذم في اخوي اللي امني على سره

ليلى: ما ادري شو اريد

حصه: فكري استخيري ... استشيري اخوانج راشد ومبارك ... اكثر من يعرفون عبدالله .. خلي عايشه اختج تتخبر ريلها ...

ليلى: اخاف يضغطون علي لو عرفوا بالموضوع

حصه: لا عبدالله ما بيكلمهم لين ما تعطينا القرين لايت

ليلى: يعني

حصه: في هالشي ما بقولج رايي ولا شو تسوين ... هالقرار بالذات لازم ينبع من داخلج وعن قناعه تامه منج

ليلى: ما ادري

حصه: يا غبية الشور في يدج ... محد بيغصبج مش مثل اللي استوى وياي

ليلى: هاهاها حصه انتي تحبين حمد عمرج كله

حصه: كنت احبه

ليلى: لا تكابرين

حصه: ما اكابر ... كنت يعني كنت

ليلى: ماعليه بنشوف

حصه: الا اقول ... ابغي اطبخ شي ... اخاف ايي ويحتشر ليش اني ما سويت غدا

ليلى: (اللي ما قدرت تكتم ضحكتها وانفجرت) هاهاهاهاهاها

حصه: أي ليش تضحكين

ليلى: في عروس تطبخ اول يوم عرس لها

حصه: هيه ترا الخدم والحشم مالين القصر اللي ساكنه فيه اخت ليلى

ليلى: هاهاهاها ولو

حصه: لا والله ... يعني انتي ما تعرفين حمد

ليلى: رغم وغادته ونذالته ما اتخيل يقولج طبخي غدا وهو يعرف انج ما تعرفين تطبخين

حصه: واذا ما طاع يغديني برع

ليلى: اذا ما بغديج برع اهلج او بيت امه بيطرشون لكم الغدا

حصه: واذا ما طرشوا

ليلى: حصووه انا بطرش لج ... ما اتخيلج تطبخين

حصه: ليلوووه عن الطنازة .. طلبتج عون طلعتي فرعون

ليلى: شو بتطبخين بالله عليج

حصه: اسهل شي علميني وانا بطبخ

ليلى: زين شو عندكم في الثلاجه ينطبخ

حصه: ماشي ينطبخ فروت وعصاير وخفايف

ليلى: بالله عليج كيف بتطبخين

حصه: انتي قوليلي شو تبين ... وانا بتصل الدكان هذ رقمه على الثلاجه

ليلى: اممممم

حصه: شووو

ليلى: ادور لج شي سهل ينطبخ بسرعه

حصه: زين قولي

ليلى: ماشي غير عيش مشخول ... ودياي مقلاي

حصه: زين شو اطلب من الدكان



نقلت ليلى حصة الاشياء اللي تحتاجها عشان تطلخ هالوجبه لريلها ... وبندت عنها عشان تتصل الدكان وتطلب الاشياء... وبعد ما بندت عن الدكان .. ردت تتصل في ليلى عشان تعطيها التعليمات ... وكانت ليلى تضحك عليها .. وكل شوي حصه تغيض عليها



حصه: لو مكلمه طباخنا احسن

ليلى: وليش ما كلمتيه

حصه: مسودة الويه استغل الوقت واسولف وياج

ليلى: هيه يالله الحايه الي ردتج

حصه: بس بس جب الحين بتذلنا ((وسمعت جرس الباب يدق )) هذا راعي الدكان وصل بروح احاسبه وبرد لج



بندت حصه عن ليلى وراحت تفج الباب وخذت السامان وراحت صوب المطبخ وردت اتصلت في ليلى



حصه: هاه يا بو العيش والدياي والبهارات ... شو اسوي

ليلى: طلعي الديايه وخلي الثلج يذوب عنها شان تقطعينها .. حطيها في ماي حار

حصه: ببند عنج ويوم بحتاجج برد اكلمج ... خلج ستاند باي لا تروحين بعيد عن التيلفون

ليلى: زين حضرة الشيف حصه ... بالتوفيق

حصه: الله يستر باي



كانت حصه مندمجه في اللي تسويه ... ومتلعوزة مب عارفه كيف تقص الديايه وجبدها لايعه من ريحة الزفر ... وما حست الا وحمد داخل الشقه .... يوم رفعت راسها بتشوفه لقته مبهت قاعد يطالعها وهو رافع حياته وفاج عيونه على الاخر



حمد: شو تسوين

حصه: ارقص ... شو تشوفني اسوي اطبخ

حمد: (انفجر ضحك لدرجة فاجأتها) أي انتي يا الخبله في عروس تطبخ في اول يوم من عرسها

حصه: (وهي بعدها متفاجأة) والله ما اعرف لك ... اخاف اقعد وتقول ليش ما طبختي ... ما انت دوم مناحس وغير عن خلق الله

حمد: هاهاهاها لا عاد ما توصل درجة اخليج تطبخين ... وانا ادري انه ماله خص لج بالطبيخ

حصه: شو تقصد

حمد: ما اريد اتسمم على اول يوم في حياتي الزوجيه

حصه: هب منك من اللي يعبرك ويطبخ لك

حمد: هاهاها روحي روحي بدلي ثيابج بنطلع نتغدا برع

حصه: (متفاجأه) صدق

حمد: هيه الا اذا تبين تاكلين اللي بتطبخينه ما عندي مانع بس انا بطلع اتغدا برع

حصه: لا بروح وياك... بس هذا منو بينظفه

حمد: بخلي الهندي ايي اينظفه من تحت

حصه: اوكي ... صبر بصلي وبغير ثيابي

حمد: ما صليتي للحين

حصه: كنت اطبخ لك

حمد: هاهاها زين روحي ياللا



نزلت حصه بعد نص ساعة وطلعت ويا حمد ... بالرغم من انها معصبة عليه وما تريد تبين له انها خلاص رضت بالامر الواقع الا انها ما قدرت تقاوم العزيمه على الغدا برع ... بحالها هيه يوعانه من امس .. وما كلت شي عليه القيمة ما تقدر تفوت هالعرض السخي من حمد ... وهم في السيارة



حمد: وين تبين اغديج

حصه: أي مكان مب مشكله

حمد: خلاص وبعد الغدا بوديج تحضرين فلم في السنما شو رايج

حصه: (اللي بهت ولفت على حمد تطالع ويهه يمزح ولا جاد) صدق

حمد: هيه الا اذا تبين تردين الشقه

حصه: وشو مناسبة هالعرض الكريم

حمد: اذا ما طلعنا بنقعد مجابلين بعض في الشقة ... وما خلا رجل بامرة الا وكان ثالثهما الشيطان (وغمز لها وهو يتكلم اما هيه ردت لفت عنه وقلبها يدق ويوم طول سكوتها رد يقول) هاه شرايج تروحين ولا

حصه: اكيد اروح ... السبب الاول عشان ما يكون فيه خلوه والسبب الثاني ... خاطري اشوف السنما من داخل .. ما اقدر افوت ادخل سنما حتى لو معاك

حمد: هاهاها لج الشرف تدخلينها وياي .. .غيرج يتمنن

حصه: عادي ببادلهن زين



سكت حمد عنها وهو يبتسم اما هي فسكتت لا يغير رايه ويردها الشقة ما صدقت يطلعها وياه ويغديها ....

....................

نزلت ليلى الصاله عقب ما تاخرت عليها حصه وحست ان حمد يا فما بتقدر تتصل بها مره ثانيه..وشافت امها وشيخه وحمدان في الصاله..

ليلى مبتسمه: صباح الورد والجوري يا حبايب قلبي...

ام راشد: وعليكم السلام ورحمة الله وبركاته.. أي صبح هذا اللي تطرينه الناس صلت والحين حزة غدا

حمدان يضحك: قويه..!!!

ليلى احمرت: مشكوره امايه..

ويلست عدلها ولوت عليها وتنهدت: ااااه حياتي ولهت عليج والله..

حمدان: يالبــــــزا..

ام راشد مبتسمه: فديتج انا شصبحتي اليوم؟

ليلى بدلع: متكسره امايه بموت..

ام راشد: بسم الله عليج غناتي ان شاء الله انا ولا انتي..

شهقت ليلى: بسم الله عليج يا امايه مالي غيرج لا تفاولين.

حمدان مستنكر: اخ يالمنكر اللي في البنات..

ويت شيخه تربع ولوت على ليلى بقوه وتمت تحببها وتتعلق في رقبتها..وليلى نشت من حضن امها وعدلت يلستها وتمت لاويه على شيخه وتحببها في رقبتها..

حمدان: ايوه كملت..انا شكالفني ايي واشوف هالفلم الهندي..ما كفيت نفسي وسرت لي اشوف فلم هنود..

ام راشد: مسود العين..شو هنود بعد..عمتك هذي وانا بحسبة امك..

حمدان يضحك: شو هالعنصريه يدوه شو بلاهم الهنود..حليلهم ناس مثلنا..

ام راشد: لا لا ما يستوي مثلنا نحن غير وهم غير..واييه نحن عرب مب عادي نقول عن عمارنا هنود..

ليلى مبتسمه: حمدان اسكت عن امي لا اكفخك..

ام راشد: يالله بالستر..!! ريال بلحيته تكفخينه ليش...

شيخه اونها معصبه: بضربك انا بضربك..

حمدان يعض شفايفه بقو: فديتها هالبنت فديتها انا..وقسم بالله اموت فيها..

ليلى تأشر بإيدها ان ماله امل: روح روح ما عندنا خطاطيب بنتنا تبغي تكمل دراستها..

حمدان يضحك: ما عليه انتن بس ودكن ايي اخطبها..

ام راشد: لك الشرف والله..

ليلى تضحك لان امها اول مره تدافع عن بنات ضد اولاد: فديتج انتي وقسم بالله انتي شيخة الحريم كلهن..

ام راشد تشققت: لا والله بعد يقول ودنا..الا شيخه شيختك ويا زينها..

حمدان: وتكالب القوم علي..مالي مكان بسير بيت ابوي..

ليلى: ليش تنسحب نحن نسولف والفايز هو اللي يتمي للاخير..

حمدان يضحك: معركه هي..؟

شيخه: نحن بنات وانت ولد يالله قوم بيتكم...

حمدان: طالعوا هاي...عمركم سمعتوا خطيبه ترمس خطيبها جي..؟

ليلى: حمدان يوز عن هالرمسه لو تمي عانس ما خليتها تاخذك...

حمدان : بنسألها وبنشوف...

ام راشد: حمدان يوز عن البنيه ما تيوز هالسوالف..حرام يا ولدي..

حمدان يعاند: شيخه انتي تحبيني؟

شيخه تبتسم ببراءه وتفتح ايدينها على الاخر: احبك وااايد مثل الحديقه والسما وكبر حجرتنا انا وامايه..

ليلى ضحكت من قلبها وهي تلوي عليها وتعفصها..وحمدان حط ايده على صدره ويحس قلبه وقف..

ام راشد: يالله بالستر جان هاي رمستج وانتي بنت ثلاث سنين..عيل لا وصلتي خمستعش شو بتسوي...واييه الحمدلله اني ما بعيش لين ذاك اليوم واشوف العجايب...

ليلى: امايه استغفر الله ما تدرين بالاعمار يمكن تعيشين وتربين عيالها بعد..

حمدان يبتسم: فديتج يدووه يعل يومي قبل يومج...

ام راشد تشققت: فديتك انا وفديت ابوك الغالي..

حمدان: شيخه منو اكثر واحد تحبينه في العالم.؟

شيخه تصارخ بصوت مزعج: امايه...

حمدان: منو امج؟ شو اسمها؟

ليلى خزته بنظره..

شيخه: يا غبي..امي ليلى..(وتأشر على ليلى وتطيح فوقها) امايه حياتي..

حمدان يضحك: اوكي منو ثاني واحد؟

شيخه بدلع: يدووه...

ام راشد مستانسه: واايه يعلني ما خلى من هالويه...لو ابوج عايش جان ما بديتيني عليه..الله يرحمك يا سيف..

تغيرت ملامح شيخه وما تدري كم كثر نست هالاسم وما عاد طرته من سالفة عبدالله...

شيخه تهز جتف ليلى: امي وين ابويه سيف من زماان انا ماشفت صورته....!!!

ليلى وقلبها يدق بقوه: امم يوم نطلع فوق براويج الصوره..الحين هو بيزعل لو راوينا حمدان الصوره..زين حبيبي..

شيخه تبتسم: زين..

ام راشد: قومي شوفي البشكاره خلصت الغدا ولا بعدها..

ابتسمت ليلى وقامت وراحت شيخه وراها على طول وهي تتذكر حصه وشو ممكن تكون سوت بالغدا...هزت راسها وهي تضحك وتتخيل الحرمه خابصه البيت فوق تحت الحين...

....................
طلعوا حمد وحصه من المطعم وركبوا سيارتهم بيروحون السنما مثل ما وعدها ... كانت حصه تحس بالاثارة في هالطلعه اول شي غداها في مطعم وفي بوظبي الشي اللي عمرها ما سوته في حياتها كلها بيت ابوها والحين الاهم قالها بيوديها سنما ... تحس نفسها شرات الياهل اللي ايبولها لعبه يديده كانت في خاطرها وقاعده تستكشفها ...



حمد: هاه أي سنما تبين تروحين ... الماريا مالت الهنود سابقا... او السني ستار في بوظبي مول او اللي في المارينا

حصه: والله شدراني فيهن كلهن ... انت ادرى الاحلى ودني اياها

حمد: هاهاها حصيص بنشوف فلم شو الاحلى هاي ... كلهن سنمات

حصه: على كيفك

حمد: امممم زين خلاص والفلم انتي اختاريه

حصه: (مستانسه) اوكي



رن تيلفون حصه كانت سلمى متصله فيها فردت عليها



حصه: الو

سلمى: الو .. هلا العروس شحالج

حصه: اهلين ... شحالج سلمى

سلمى: الحمدلله بخير ... وينج انتي ما اتصلتي قلنا يمكن راقدين للحين

حصه: لا نحن برا طلعنا انتغدا

سلمى: ادري انكم برا

حصه: كيف عرفتي

سلمى: الدريول تحت عند شقتكم يقول انتوا محد ... يايب قشارج كله وشنطج ... ومب طايع يخليهن تحت لازم تروحين تستلمين ... ويتأكد انه وصلج

حصه: اووووه لازم الحين .. انا طالعه ويا حمد

سلمى: هاهاهاها هذا اللي امس تصيحين ما تبينه

حصه: هي لا يروح فكرج بعيد

سلمى: بويه ردي استلمي قشارج وطلعي بعدين مثل ما تبين

حصه: (اللي تغير شكلها) اوكي ماعليه ((انتبه حمد على تغير ويها ))

حمد: بلاها سلمى شعندها

حصه: (وهي تأضر له يصبر) ياللا باي سلمى ومشكورة على الاتصال

سلمى: اوكي باي

حصه: (بعد ما بندت عن اختها) امي مطرشه قشاري ويا الدريول وهو تحت العمارة ومب طايع ينزل الشنط من السيارة الا يوم يشوفني ويوصلهن الشقة

حمد: يعني انرد الشقه

حصه: هيه اذا سمحت

حمد: خلاص بنرد ... والسنما لاحقين عليها ...

حصه: يعني العرض ساري المفهول

حمد: اممممم هالعرض ساري المفعول لمدة يومين اختاري الوقت وبوديج

ردت حصه تبتسم وسكتت عنه ... وهو كمل سواقه لين الشقة ... ... وصلوا وحصلوا الدريول بعده واقف برع وشنط حصه في البيك اب ... دخلهن هوه والسكيورتي مال العماره لين فوق ... وبعد ما راحوا قعدت حصه تشوف الشنط وهي ضايجه .. يعني عبالة تعديلهن في بيت ابوها وعبالة ترتيبهن هنيه في شقتها ... لاحظ حمد شكلها وانه فيها شي ...



حمد: بلاج حصه

حصه: لو تدري بس لو تدري

حمد: (يبتسم) بشو

حصه: بالعذاب اللي يترياني عشان افضي الشنط

حمد: هاهاهاهاه هذا اللي مسوبج جيه

حصه: طبعا شدراك

حمد: لا ادري لاني انا اللي مفضي حجرتي وراد مرتبنها بعد ما غيروا الديكور

حصه: اوووف الله يعلم متى بخلص

حمد: (بعفويه) بساعدج ... ما يرزى عليج هالضيج كله عشان الشنط

حصه: (متفاجأة) صدق

حمد: ياللا ابدي وبتشوفين

حصه: (بحماس وابتسامتها على ويها) اوكي ياللا



كانت شنطها مازرة الممر اللي بين حجرتها وحجرة حمد .. لان حمد ما خلا الهنود والدريول يدخلون حجرة حرمته... فكان يشل شنطها ويدخلهن الحجرة ... وهي فجت اول شنطه وراحت صوب غرفة الملابس عشان توزع الكباته ... وتقسمهن على اغراضها



حصه: (بضيج) ما بيكفن الكبتات اللي هنيه ... خلني احط عندك على القل الفساتين

حمد: اوكي مب مشكله

حصه: عيل خلنا نبدا هناك ... هات شنطة الفساتين

حمد: هاهاها حمالي عندج انا

حصه: انت قلت بتساعدني

حمد: هلكتيني شو مسويه ثياب لسنة

حصه: لا يا دوب يكفن لشهرين

حمد: ثركن الا مخاسير يا الحريم

حصه: هاه الحين شو بتيب الشنطه ولا

حمد: زين شدراني انا أي وحده فيهن

حصه: (اللي كانت معلمه شنطها وتعرفهن أشرت له) هاي وهاي بعد

حمد: زين روحي بيبهن



طلعت حصه ولحقها حمد وفعلا كان يعلق وياها فساتينها ... وبعد ما خلصوا من حجرته ردت حجرتها وما خلاها بروحها ولا مل مثل ما توقعت حصه ... كان يساعدها وهو يسولف عن كل شي ... حتى هيه اندمجت في سوالفه ونست او تناست الوعد اتحس قطعته على عمرها ... ما كانت تحس به حمد الوغد ... كان انسان ثاني يبتسم يضحك ... ويعلق على ذوقها في بعض الملابس والبدل ويتخبرها منو متنقي لها اياهن ... واشياء يقولها انها حلوة ... كانت مستمتعه باللحظة لاقصى ما يكون ... كان يرتب لها عطورها وكياجها على التسريحه وهي تعلق تنانيرها في غرفة الملابس



حمد: حشا يا حصه ... ما خليتن عطر ... موضتهن بتروح وبينزلن غيرهن يبالج عشر سنين لين ما تخلصينهن

حصه: شو اسوي هاي امي وسلامي .. كل يوم يابن شي

حمد: والمكياج ما بيخترب

حصه: لا ان شاء الله ما بيخترب

حمد: (وهو يرتب) سلامي عليك يا حمد شو هالترتيب الغاوي ...

حصه: هاهاهاها مادح نفسه

حمد: تعالي شوفي بس وبتقولين شو هالهندسه يا ولد عمي

حصه: (وهي تطلع من حجرة وتقلده) سلامي عليك يا ولد عمي شو هالهندسه

حمد: خلاص خلصت هنيه ... شو باقي عندج بساعدج

حصه: تقريبا خلصت خلاص

حمد: باقي شنطتين ياللا بفتح انا هاي وانتي فتحي الثانيه

حصه: (بخوف) لا لا انا بروحي برتبهن خلاص مشكور

حمد: (وهو يفج الشنطه) عشان نختصر الوقت يا الخبله



قبل لا توصل حصه صوبه عشان تاخذ الشنطه عنه فجها ... ورفع حواجبه وهو يشوف شو فيها وعرف ليش حصه ما كانت تبغيه يبطلها ... كانت شنطة قمصان النوم ... اما حصه فويها اتلون مليووون لون... كان ودها تطلع من الحجرة وتخليه... حمد اللي حس ان فترة الهدنه وياها طالت... وانه ما نرفزها من ردوا من برع قرر يتفنن في الوغاده شوي



حمد: اهاااااا عشان جيه ما تبيني افج الشنطه

حصه: (اللي تحاول تعدل على عمرها) لا عادي بس برتبها بروحي خلاص ما تم شي

حمد: يا ترى شو في الشنطه الثانيه (سكتت حصه وما تكلمت وهي تتمنى انه ما يفجها) هاهاهاها يعني هاي شنط ادوات الشيطان اللي يستخدمها في اغواء المساكين اللي مثلنا

حصه: (اللي ما عرفت شو تقول) اطلع وخلني انا بعلق اللي فيها

حمد: لا اسف ... ابغي اشوف حرمتي شو شاريه

حصه: بلا غلاسه

حمد: (وهو يطلع قمصانها ويحرك راسه بعلامة اعجاب ) احمر تدرين حصه بيطلع عليج عذاب ... (وفره وخزها بنظرة لؤم وقعد يجلب في الاشياء الباقيه وهي ساكته.. طلع قميص نوم اسود ) تدرين اكتشفت انج مب سهله

حصه: (اللي بتموت من المستحى وهي معصبه) تدري انك سخيف وتافه اوكي .. بخليلك المكان كله اشبع به وفتش على كيفك



طلعت حصه وهي معصبه ونزلت تحت ما تعرف وين تروح ووين تنخش وكيف بترد تطالع في عيون حمد ... كانت في قمة الاحراج وهو ما رحمها تعمد يحرجها بزياده ... اما هوه فضحك اول ما طلعت ورد اشياءها في الشنطه وطلع بيشوف وين راحت ... الساعة صارت تسع في الليل ... وهو يوعان واكيد هيه يوعانه من ردوا ما كلوا شي ... قرر يطلع اييب عشا عشان تخلص ترتيب قشارها الباقي بروحها ... لقاها في الصالة قاعده على الكنب وشكلها بعدها معصبه وتجلب في قنوات التلفزيون



حمد: (يبتسم) خلاص طلعت روحي سوي اللي تبين

حصه: ما اريد

حمد: هاهاهاها كيفج

حصه: ادري

حمد: زين بروح اييب عشا شوتبين من برع

حصه: ما اريد شي

حمد: (بخبث) متاكده ... اذا ما تبين بكل برع وبرد

حصه: (بتردد) شو بتيب

حمد: هاهاهاهاها من شوي ما كنتي تبين

حصه: اوهوووو بتذلني الحين على العشا

حمد: خلاص .. بروح اييب لنا شي وبرد ... في خاطرج شي معين

حصه: لا

حمد: اوكي.... ياللا باي



بعد ما طلع حمد ردت حصه فوق ورتبت باقي اغراضها ... ونظفت الحجرة اللي كانت معفوسة وطلعت الشنط وحطتهن في الحجرة الثالثة اللي كانت فاضية ... كانت بتطلع ثيابها تدخل تتسبح بس سمعت حمد يزقرها تحت فنزلت بتعشى وياه قبل لا تدخل تتسبح....

............................



عبدالله اللي من قبل عرس حصه باسبوع وهو يالس في بوظبي ما طبها دبي ولا درا عنها...كان يالس في حجرته منسدح على الصوفا وغارق من ريوله لين راسه في الافكار...

"هاللي سويته قرار سليم ولا متسرع؟؟؟(يتنهد) انا صدق ابغيها ولا بس لحظه ضعف طلبتها...؟ كم كثر تأخرت بالرد...!!! وايد من عرست حصه فتره للتفكير في العرس...اه بس...من يقول اني بقدر اعيش عقب بدريه ولا بتقبل حرمه ثانيه غيرها...بدريه!!!(رد يهمس بصوت واطي) احبها والله.."

يلس وعدل يلسته وعقبها فر السفره على الكنبه وسار للشبريه وطاح على بطنه...وايد توله على شيخه بشكل جنوني..مروا ايام ما شافها...يا ليت حصه تمت هني جان ليلى يت تزورها ويابت شواخي...فديتا هالبنت والله ذبحتني...

ابتسم من قلبه وضحك وهو يتذكر شكلها وهي تحاول تشرد من ايدين ليلى وليلى ماسكتنها بقوه...يوم بيطلعن من صالة البيت ليلة العرس...امم وايد وايد اشتاق لها..توله على سوالفها وضحكاتها..اكثر شي توله عليه حرف الشين ..غطى ويهه بايديه وهو يضحك..حليله عبدالله ماعرف يصبر عمره عن شيخه غير بالذكريات...يقطع عليه افكاره صوت دق على الباب وعدل يلسته...

عبدالله: من؟

خليفه من ورا الباب: انا قوم افتح الباب ابغيك..

عبدالله نش وبطل الباب: يا مرحبا الساع...

خليفه مبتسم: اهلين...

عبدالله يفتح الباب: ادخل ايلس..

دخل خليفه ويلس على الصوفا القريبه من الشبريه ومدد ريوله وعبدالله ابتسم وقرب الكنبه الثانيه اللي جدام الطاوله ويلس جدامه..

عبدالله: تعشيت؟

خليفه يتنهد: توني راد من الشركه وللحين ما سويت شي..

عبدالله: وليش ما حطيت راسك شوي تسترخي..

خليفه: اذا سرت حجرتي برقد على طول..وانا مابغي ارقد ابغي ايلس ويا امي وابوي والبنات...

عبدالله: اها..

خليفه: وبعدين ابغيك بموضوع..

عبدالله: تفضل شو؟

خليفه: عفرا يا عبدالله..تصدق من سالفة ولد شمسه ولا بينا سلام ولا كلام..

ضحك عبدالله: تتغلى البنت..!!

خليفه يبتسم: قسم بالله سوتها اكلمها وما ترد علي ورافعه خشمها ولا جني ابوها..تقول ربيعتها..

عبدالله يضحك: ما شاء الله..انقلب السحر على الساحر..

خليفه: شو؟

عبدالله: علمتها الخقه وكبرت راسها وانجلبت عليك تعليماتك...

خليفه: شفت عاد..

عبدالله: شو بتسوي الحين؟

خليفه: ابيك تساعدني..ويا ابوي...

عبدالله: على شو؟

خليفه: انا حاير بين الاثنين..ماريد اغصب بنتي على شي ما تبغيه وبنفس الوقت ماريد ارد ابوي في كلمته..

عبدالله: وانت منو اولى عندك ابوك ولا بنتك..؟

خليفه: وهاللي مصعب علي الموضوع ان لكل واحد فيهم مكانته ومب قادر افرط في أي مكانه لاي حد منهم..

عبدالله يهز راسه..

خليفه: شو رايك؟

عبدالله: مالي راي والله..ماعرف شو اقولك...ماظني بتروم ترد كلمة بو خليفه..

خليفه: سعود اكيد ما بيرخص البنت انا عارفنه ولو رضى شمسه ما بتطيع..ادريبها شاريه البنت بعيونها..

عبدالله: يوم انك تدريبهم متعلقين بكم هالكثر ليش بايعنهم.؟

خليفه: مب انا اللي باخذ سعود...ولا شمسه اللي بتاخذ عفاري..الزواج مب تجاره اتقبل فيها شخصية الطرف الثاني عشان استفيد منه...العرس يا عبدالله انت ادرى شو اكثر شي مطلوب فيه وهو التوافق..

عبدالله: ما قلتوا هالرمسه يوم بتعرس حصه...؟

خليفه: تراك وافقت ويانا...

عبدالله: نعم وافقت وللحين موافق وعفرا تعرس بالطريقه اللي نحن نباها مب بالطريقه اللي هي تباها...يعلم الله شكثر احبها واموت فيها عفاري من بد عيال خواتي..ولكن ما يستوي نعامل عماتها بطريقه وهي بطريقه ثانيه..

كيف بو خليفه يمشي كلمته على بناته ولا يروم لبنات عياله...

خليفه بجديه: هذي بنتي مب اختي...حصه ولي امرها ابوي ومسؤول منها وهو يقرر عنها...يعني بالمثل انا اقرر عن بنتي...فهمت؟

عبدالله يهز راسه: صدقني بيكون الموضوع صعب ويا ابوي..انت ليش ما تجرب تقنع بنتك؟

خليفه: ادريبها ما بتطيع..

عبدالله: انت مبزيها عشان جي ما بتطيع...

خليفه بانكسار: يمكن لو ياك عيال تفهم اللي احسه...

عبدالله اللي حس بكهربه تلسعه حاول يبين انه عادي..يدري باخوه ما يقصد انه يجرحه بس الكلمه صدق هزته بعنف...حاول يكون وايد عادي عشان ما يحسس خليفه بأي شي ويدري ان اخوه بس ياي يشكي له وبيروح عنه..

عبدالله: لا يا خليفه انت جرب ترمس الاضعف..ابوي ما بيطيع وانا اعرفه..

خليفه: زين شو رايك انا بفتح معاه الموضوع وانت ايدني اوكي..

عبدالله يبتسم: تعرف متى بيقتنع؟

خليفه: متى؟

عبدالله: يوم سعود يرخصها...

خليفه: بتقنعه؟

عبدالله: امم انا بطلع وياه أي مكان وبجس نبضه وبشوف..

خليفه يبتسم من خاطره: تسلم لي يا بو حميد والله انك راعيها..

عبدلله اللي استانس لوناسة اخوه: افا عليك اخوان ما بينا هالرمسه..توكل من تبغي ترمس ابوي خبرني عشان اكون موجود..

خليفه مبتسم: ما تولهت على دبدوبتك الصغيره..

عبدالله يبتسم بعذوبه: لا تخبر يا خليفه مب وله..الا ذبحني الوله..

خليفه: سيرلهم تعلث باي شي زور راشد سلم على خالتيه غاليه واطلب تشوفها..

عبدالله يضحك: من متى ما سرت بيت خالتي غاليه الحين تبغيني اسير...ما يستوي عاده بيدرون اني ياي لها..

خليفه ينش: على هواك..يالله انا بسير الحين اغير ثيابي وبدور للشيبه وعيوزه ايلس وياهم شوي..

عبدالله يبتسم: انا بعد بلبس كندورتي وياينكم..

خليفه يطلع: اوكي خلاص..

دخل حمد حجرة حصه بعد ما خلص سبوح وهو ناوي ينهي هالوضع اليوم .. ما يصير جيه معرس ولا جنه معرس ... لازم يكسب ثقتها ... ويخبرها كل شي بنفسه .... كان متردد وحاير في داخله... طلعت حصه من الحمام ... وهي تنشف شعرها ... هالمرة لابسه بجاما قطن من اللي شارتنهن بروحها ... مما اجبر حمد انه يتذكر قمصان النوم ويبتسم بلؤم وهو يشوفها ... قعد على السرير وهو متربع ... خزته وراحت صوب التسريحه



حمد: (بقصد احرجها) واللي في الكبت شارتنه للتخزين بس

حصه: (وهي فاهمة قصده) هيه عجبني على فاترين المحل واشتريتهن

حمد: اذا خاطرج تلبسين لبسي ... عادي انا ريلج

حصه: حمد بلا سخافه وثقالة دم ... شو تريد

حمد: شو شو تريد بعد هاي ... كيفي حرمتي والبيت بيتي



سكتت عنه حصه ولا ردت عليه مافيها على ويع الراس الحين .. تعبانه وتريد ترقد وتريده يروح بتكمل قراية رسايله ... عشان جيه قررت انها ما تستفزه لين ما يروح من خاطره... صح كانت لابسه بجاما بس اريح من لبسها امس .. وما عادت تحس بالرهبه مثل امس ...كانت تنشف شعرها زين ... وبعد ما خلصت قعدت تمشطه متجاهله وجود حمد ومب عارفه تفتح وياه أي موضوع ... كان حمد يطالعها وهو بعد مب عارف كيف يفتح معاها الموضوع دون ما يجرحها مثل امس ... تذكر صندوقه اللي خلاه في حجرتها ... وقرر يسألها عنه



حمد: حصوه وين الصندوق اللي نسيته امس هنيه

حصه: (اللي خافت يشل الصندوق وما تكمل الباقي وفي نفس الوقت ما حبت تبين له انها قرت في دفاتره) اللي كان على الشبريه

حمد: هيه

حصه: خشيته تحت السرير ... (وخى حمد عشان يطلعه بس كان من الجهه الثانيه ... وانتبهت هيه على حركته واتذكرت قميص النوم اللي لين الحين مخشوش تحت السرير وصرخت قبل لا يرفع الفراش) صبر مب من هالجهه انا بطلعه لك



كانت صرختها متأخره وايد لان حمد اللي عقد حياته وير قميص نومها من تحت السرير وهو بعده شكله مب مستوعب بس نظرة وحده لويه حصه المرعوب خلته يعرف انه هالقميص كان في شنطتها امس بالاخص من ريحة العطر والدخون اللي تفوح منه ... كانت صدمته اكبر من صدمتها... شو اتحراني هاي وحش هب ادامي ... وقف وشافت في عيونه كل شر الدنيا وهو يأشر لها بالقميص



حمد: شو ها (( سكتت حصه ما عرفت شو ترد عليه وجرب هوه صوبها )) ارمسي انا اكلمج على ما اظن

حصه: هذا .. (وسكتت ما قدرت تكمل )

حمد: (اللي فر القميص في ويها وهو معصب ويحاول يكتم عصبيته ولا يصارخ بصوت عالي) يكون في معلومج يا حصه ... لو انا ابغيج ما يهمني شو لابسه ولو حتى قاعده جدامي بعباه وشيله... ويوم ما اريدج بعد حتى لو كنتي قمة الاغراء ما يهمني

[البدوي الحبوب]

واطالعها من فوق لين تحت وطلع من حجرتها وصفق وراه الباب وسمعت باب حجرته يتسكر بالقو ... كان قلبها يرقع في صدرها ... صدق حست انه معصب وشوي ويزنطها ... كانت تحاول تبرر موقفها .. وهو بعد شو يتحراها قليلة حيا ... ما تقدر لو شو ما كان تلبس هالشي ... فرت القميص على السرير وقعدت تحاول تهدي اعصابها ووتهدي تنفسها اللي كان متسارع من الخوف ... وتمنع دموعها لا تنزل... حست اليوم بألفه وياه بالرغم من بعض حركاته الا انها كانت قمة السعاده ... بس كل شي انهد والسبب غباءها... كيف نست القميص وما علقته في الكبت وهو محد ... كيف بتعامل وياه باجر ... كيف بيعاملها كل خوفها يرد حمد الاولي ... الوغد اللي ما ينطاق اللي طول عمره يتجاهلها ويحاول يجرحها كل ما يشوفها ... بعد نص ساعه يوم حست بحمد رقد ... طلعت صندوقه وفي خاطرها تقول ... احسن يمكن هاللي استوى عشان اكمل قرايه ... بعض الرسايل كانت مطرشه له لندن لان عليها عنوانه هناك وبعضها دون عنوان بعني باليد ... قسمتهن مجموعتين ... وفجت اول اللي في لندن وبدت تقرا في اول رسالة



(( حبيبي حمد :

أريدك لي وحدي أريد منك أن تكون سيد قلبي وأحلاميوملك مشاعري وحبيأريدكأن تنير لي العالم بحبكأريد معك وحدك الإبحار في بحور الغرام
وأن أجربنيران الحب معكوألا أحترق مع سواكوأن تنصهر ذاتي في وجدانكفأكون جزءمنكوأكون أنا فقط ضلعك الناقص الذي لا تكتمل دونه
أريدك
فمعك وحدكأشعر أن رزانتي سجنا فأنطلق إلى عالم جنونيوأمارس طقوس الجنون اللذيذة معكمعك وحدك للحياة طعم أجملوللجنون طعم أجملوللخطأ طعم أجملأريدك وحدك سيدي

حبيبتك للابد : جواهر ))



انقهرت حصه من الكلام اللي في الرسالة وفي خاطرها قعدت تسب جواهر وتدعي عليها ... علج تحترقين في نيران جهنم يا ربي وحبتج ستين قراده ... ردت الرسالة في الظرف وفجت غيرها بتقراها



(( الى حبيبي وقلبي وحياتي كلها حمد



سأظل أحبك مهما طال بي العمر ...

وستظل أنت حلم حياتي الأوحد ...

فسواك لا أرغب بشيء في هذا العالم ...

وقربك كل ما أتمناه ...

ستظل اللحظات التي عشتها بقربك


من أجمل لحظات حياتي...

بل هي الأجمل ...

وسأتذكر همساتك ورنين ضحكاتك ما حييت ...

فقد كانت تلك الضحكات تفجر الدماء في شراييني ...

لست ممن ينسى ...

ولن أستطيع نسيانك مهما حاولت...

فقد أعاد وجودك في حياتي النبض إلى قلبي...

والربيع إلى فصول حياتي ...

وقد كنت الدواء لكل جروح قلبي وزماني...

وأنت من منحني الأمل في حياتي...

وأنار لي الطريق كي أستطيع الحصول على ما أريد ...

كيف لا أحبك؟ ...

وكيف أنساك؟ ...

وقد كان قلبك عالم لي ...

يتسع لثورات جنوني ...

وغياهب يأسي ...

أحبك بلا مقابل ...

فمن مثلك سيدي يعشق ..

سأظل أحبك مهما طال بي العمر...

ومهما فرقت بيننا الأيام ...

واختلف طريقي عن طريقك ...

سأظل أحبك...



حبيبتك دوما: جواهر))



كانت حصه محرجة وهي تقرا هالكلام ومنقهره منه والعثرة تعثرج ان شاء الله لازم بهالكلام خبلتي بالولد ... والله اني اكتب كلام احلى منه بس مب قليلة حيا اطرشه للرياييل يت بتفج الرسالة الثالثة بعد ما ردت هاي في الظرف وحطتها على جهه



حمد ما قدر يرقد ... كان معصب حده على حصه وورده يطلع يصفعها عشان يبرد فواده منها ... بعد ساعة من التجليب في فراشه قرر يطلع يروح يكلمها ما يقدر يصبر بعد ... وده ينهي كل شي الليلة ... واذا ما تريده بيردها بيت ابوها ... صح فضيحه بس من متى حمد همته الفضايح ... طلع من الحجرة وبطل باب حجرتها اللي نست تقفله وتفاجأ بها فارشه رسايل جواهر وقاعده تقرا فيهن ... حصه ارتسمت على ملامح ويها كل امارات الرعب ... وحست بطبول ترقع مكان قلبها ... هو بهت مكانه وفج عيونه... وشافت على ويهه عصبية الكون كلها ... مما زاد من رعبها ... بس شوي ولانت ملامحه وراح عدالها وقعد على السرير وبكل حنية مسح على الرسايل ... اتضيجت حصه من حركته بس ما قدرت ترمس ... نست الكلام كله

حمد: شو قريتي منهن

حصه: (اللي كانت تريد تجذب وتقوله ما قريت توني باديه أشرت له لا ارادي على اللي قرته) هذيلا

حمد: (يبتسم بألم) شرايج فيهن ... الرسايل تقول انها كانت تحبني صدق (سكتت حصه ما قالت شي مب قادرة ترمس فكمل حمد اللي شل الرسايل اللي بدون عنوان) ما قريتي شي من هذيلا



هزت راسها بعلانة لا فابتسم نفس الابتسامه وهو يتنهد من خاطره ويفتش فيهن ... وطلع من بينهن وحده بطلها وقعد يقراها وهو يبتسم وعطاها اياها تقراها .... شلتها وايدها ترتجف وقعدت تقرا هالمرة ماشي حبيبي حمد



( حمد



هي لحظة حنين


أجبرتني أن أتذكر ليالي الغرام التي قضيناها سوياً...

فاغفر لي سيدي تطفلي ...

واغفر لقلبي الذي مازال باقياً على حبك ...

واغفر لي هيامي وجنوني بك ...

هي لحظة ضعف ...

فقدت فيها السيطرة على عواطفي ونفسي ...

وبلا إرادة وجدتني أتجه لرؤياك ...

وأحاول سماع صوتك ...

فاغفر لي سيدي لحظات ضعفي ...

واغفر لي عجزي عن السيطرة على مشاعري ...

فحبك يسري مسرى الدم في عروقي ولم أستطع منه خلاصا...

اغفر لي سيدي أو لا تفعل فلا أستطيع أن أفعل أكثر ...

لأني بشر ...

ولقدرتي على التحمل حدود ...

ولقوتي حدود...

ولكن لا يوجد لمشاعري وعواطفي حدود ...

فأحببتك بكل مشاعر الأنثى داخلي ...

وأحببتك بكامل قوى المرأة العقلية التي أملك ...

فقتلني جرحك أكثر مما تتصور ...

وأدمى مشاعري لا مبالاتك ...

اعفر لي سيدي تطفلي على حياتك ...

واغفر لي ضعفي تجاه حبك ...

واغفر لي جنوني وطيشي ...

ولكن لا تغفر لي أني أحببتك ...

فحبك لعنة من السماء حلت على قلبي ومشاعري ...



جواهر))



تمت حصه ساكته مب قادره اتكلم ولا حتى مع عمرها مثل ما كانت تسوي من شوي كل ما قرت رسالة ... ورفعت ويها اتطالع حمد ... كانت تدور صوتها وينه تريد تقول أي شي ... تقهرها نظرت الالم في ويهه ... اما هو رفع راسه واطالعها وقرر يخبرها كل اللي ما تعرفه ولا يعرفه غيره



حمد: حصه جواهر اتطلقت بعد ما عرست

حصه: متى ؟

حمد: بعد عرسها بسنتين ... اول سنة ارد فيها البلاد من لندن

حصه: ورجعت لك

حمد: لا

حصه: (بفضول) ليش

حمد: لاني انا ما بغيتها ... ما قدرت اثق فيها مرة ثانيه ... وكنت مجروح منها

حصه: (متفاجأة) انت رديتها

حمد: هيه رديتها ...

حصه: وانت تحبها

حمد: سؤال لليوم اسئله نفسي ... انا حبيتها ؟

حصه: وشو الاجابه

حمد: ماشي اجابه ...

حصه: وكل اللي سويته بعدها

حمد: خيانتها كانت مبرر

حصه: مب فاهمة عليك

حمد: اول شي كرهتها ... وبعدين عفتها ... ما عادت تعنيني ... فقدت كل شي حبيتها عشانه ... كنت احب فيها اشياء انا بس اتصور انها فيها ... بس للاسف كانت تمثل ... اللي يخون مرة يخون الف ...

حصه: بس اللي يحب يسامح ويغفر ... ليش ما سامحتها

حمد: (يبتسم) يسامح ويغفر ... يمكن ما حبيتها عشان اسامحها واغفر لها ... ويمكن حسيت انها استغفلتني وايد وما قدرت اسامح واغفر ... ليش انتي ما تغفرين وتسامحين

حصه: (اللي تفاجأت من السؤال وما خطر انه بيسألها اياه) هاه

حمد: ولا بعد انتي ما كان حب

حصه: انا انجرحت فوق ما تتصور ... صحيت من حلم عيشت نفسي فيه فوق العشر سنوات

حمد: يعني حتى انتي ما كان حب ... كان حلم

حصه: الحلم كان انه الشخص اللي احبه يحبني ... امل عشت عليه سنين طويله

حمد: هالكثر الحب مهم بالنسبة لج

حصه: يوم تحب شخص عمرك كله ... بكل عيوبه وسلببياته بتعرف اهمية انه يحبك ... عمري ما تذمرت من تصرفاتك ... وطول عمري وانا ادور لك اعذار واحط اسباب لك ... بالنسبة لك كنت على هامش حياتك

حمد: وليش حبيتي شخص ما يستاهل وتحملتيه هالكثر

حصه: ما كان بيدي اني احبك او اني ما احبك ... حتى المرات القليلة اللي قررت فيها اني ما احبك ... واقول خلاص انتهيت بالنسبة لي .. الاقي نفسي اغرق اكثر في حبك ... واكتشف اني بعد فترة احبك اكثر من قبل ...



كانت تتكلم بهدوء من داخلها .... ما تدري شو اللي يخليها تعترف هالاعتراف ... بس حست براحه وهي اتكلم وتطلع اللي في خاطرها طول هالسنين ... وكان يسمعها وفي خاطره يمسح على راسها ... انتقم من جواهر فيها ... خان حبها الف مرة ومع ذلك كانت تغفر وتسامح ... وايي الحين يشكك في حبها



حمد: تبين تشوفين صورها

حصه: (متفاجأة) عندك

حمد: (ابتسم) كنتي بتوصلين للظرف اللي فيه الصور قبل لا اييج ...

حصه: محتفظ بهن للحين

حمد: لا يروح فكرج لبعيد ... مجرد ذكرى ليس الا (فج ظرف وطلع صورة وعطاها حصه دون ما يشوفها)



كانت حلوة ناعمة ورقيقة ... شكلها صغيرة اذا كانت هالصور في سنة 92 او 93 فأكيد الحين هيه من عمر حمد ... وغصب عنها في قارنت حصه بين اللي في صورة وبينها ... حصه بعد كانت حلوة ...

حصه: حمد

حمد: نعم

حصه: اذا تباني حرمتك بليييز ما اريد الصور في بيتي

حمد: هاهاهاها

حصه: ليش تضحك

حمد: لاني قررت اعدم كل هالرسايل والصور والدفاتر ... بس حبيت اخبرج اول عن هالفترة كلها

حصه: ما اريد اعرف اكثر من اللي عرفت

حمد: (وهو يوقف) لمي كل هالرسايل ورديها في الصندوق ... باجر يصير خير



طلع حمد من الحجرة وخلا حصه وهي حايره ... وفي داخلها حنين وشوق له ... حبها لحمد عمره ما بيموت بالرغم من كل شي الشي اللي كانت طول عمرها واثقة ومتأكده منه صح ... حمد من داخل طيب وحنون ... يمكن ما قالها احبج .. بس قالها ما يدري اذا كان يحب جواهر ... والامل رد يكبر في داخلها انه بيحبها هي بنت عمه سابقا ... وحرمته حاليا .... لمت كل الرسايل وردتهن الصندوق وخشته مكانه ... وبندت ليتاتها بترقد ...عقب العرس بكم يوم كانوا كلهم متيمعين في صالة بيت بو خليفه...اغلب اللي موجودين كانوا مستانسين الا بعض الناس على حد الاستثناء...كانت للحين معصبه على ابوها وما تكلمه..وولد عمتها هالرزه اللي متفيزر في نص الصاله يسولف وما يبطل نظراته اللي ما تخلص...بس هي كانت صاده وخير شر مب مسويتله سالفه...

شمسه مبتسمه: تعالي عفاري يلسي هني..

ابتسمت عفرا وسارت تيلس حذال عمتها..وخليفه يطالعها..ونشت حمده تيلس على يمين عفرا..

حمده بهمس: انتي لين متى ما تكلمين ابوي..؟

عفرا: والله هو اللي اجبرني اسوي هالشي..

حمده: بس ما يستوي هذا ابوي مب ربيعتج..تزاعلينه..

عفرا: ما راضاني كيف ارضى..

شمسه تكلم حمده: انتي شعندج تتحرطمين على اختج.؟

حمده: والله ماشي بس اسولف وياها عن الجامعه..

شمسه: هيه انزين..وانتي الحين أي صف بتروحين..؟

حمده:ثاني ثانوي..اكيد ادبي بدون اسئله واحراجات..

ابتسمت شمسه ويتهن سلمى ويلست قريب منهن..الاكيد ان الصاله موزعين فيها الكنب بشكل دائره مفتوحه على باب الصاله الرئيسي..وبين نص قوس الدائره في طاوله صغيره تفصل القسم الاول من الكنب عن القسم الثاني..وفيه القسم الاول بو خليفه وعياله خليفه وعبدالله يالسين مع سعود ولد شمسه..والقسم الثاني من الكنب يالسه فيه ام خليفه وسمر وشمسه وسلمى وساره وبنات خليفه عفرا وحمده..

وفي جهة الرياييل..

بو خليفه: انا ساير ارقد وعوني العصر للصلاه..

خليفه: بتسير مكان؟

بو خليفه: كنت ابغي اسير السمحه بس غيرت رايي مافيني على الدرب بسير يوم ثاني ان شاء الله..

عبدالله: تبغيني اسير وياك؟

بو خليفه: بتتيمل لو تسير السمحه لروحك..انا مب قادر اسير..

سعود: خلاص يدي ان شاء الله انا وخالي عبدالله بنسير..

بو خليفه: خلاص خير ان شاء الله..

ونش بو خليفه وام خليفه وساروا حجرتهم يرقدون الظهر والباقين قربوا من الحريم ويلسوا وياهن..حمده وعفرا كانن متحجبات من سعود اما الباقين فعادي يالسين ويا خواتهم...

خليفه : شو تقولون؟

شمسه: ماشي الا سوالف حريم وخبال بنات..

سلمى مبتسمه..

سمر:ملل محد يعرف شو يسوي...

عبدالله مبتسم ويكلم سمر: وانتي هديتي من راحت حصه..خلاص ما عندج حد تغلسين عليه..

سمر: والله ملل من يوم راحت صدق تولهت عليها..

عفرا: هيه والله صدق كم تسوى القعده وياها..

خليفه: عاد حصيص مره غاسله شراعكن لسانها شطوله من جي تحبنها لانها شديده عليكن..

حمده تضحك: هيه والله..

سلمى: لو كانت هني محد بيروم يحش فيها..الا يوم هي محد مستقوين..

عبدالله: اقولكم عندي فكره..

خليفه: قول..

عبدالله: شو رايكم نسير كلنا باجر العصر السمحه..

ساره: شو نسوي في السمحه ان شاء الله؟

عبدالله: بنسير البر وبنويه صوب العزبه شوي.

سعود: عزبة منو هناك؟

عبدالله: ما عليك شو رايكم نسير..

سلمى: امي ما بتطيع..

شمسه: والله ما عندي مانع..

ساره: شو الراي اتفقوا..

عفرا: انا ماريد اروح..

حمده: ولا انا..

سلمى: عيل انا مابغي اسير والبنات ما بيروحن..

عبدالله: يالنحيسات ليش؟

خليفه: اصلا انا متكاسل مالي بارض ادق درب للسمحه..تخبلت انا...!!!

عبدالله: قلنالكم عرض عشان تتطلعون تتمشون وتشوفون الطبيعه...

عفرا: أي طبيعه...هوش وبوش شو نبابهن..نحن مودرن ما نبغي هالسوالف خلاص اطورنا..

عبدالله بطرف عينه: عمامج هذيل..

نقعوا كلهم على عبدالله من الضحك وعفرا افتشلت جدام عمتها واللي قهرها ان سعود ضحك..

عفرا: انا يا عمي؟؟ انا عمامي البوش؟ افا ما توقعتها والله...يجي منك اكثر..

عبدالله: عاد انتي امره عالدقه وبتصيحين..خلاص يا بوج نسولف..

خليفه يطالع عفرا: عفاري...

فز قلبها ولفت عليه: هاه؟

خليفه ينش ويمد ايده: قومي ابغيج برمسه بينا..

عفرا نشت وحمده ابتسمت..

ساره: ما ينفع نسمع؟

شمسه: لا غير اول شي يعرضون الرمسه على كبار الشخصيات وبعدين نحن عامة الشعب بوقت ثاني..

خليفه: اميره ويحقلها تسوي اللي فخاطرها..

طلع خليفه ويا عفرا ماشين صوب فلة خليفه...

خليفه: مب بسج تغلي؟

عفرا: ما تغليت انت جرحتني وانا للحين زعلانه...

خليفه: وشو اللي جرحتج فيه...؟ يوم قلت لج بتاخذين ولد عمتج؟ انتي ناقده عليه شي؟

عفرا: ماعرفه عشان انقد عليه..

خليفه: ليش ما تبينه...؟؟

عفرا تفج باب الفله ويدخل خليفه وعفرا وراه..

عفرا: بس جي مب مرتاحه له والعرس مب بالغصب..

خليفه شغل الليت ويلس على اول كنبه وهي يلست على كنبه ثانيه.بس غير السالفه على طول...

خليفه: هاه والدراسه زينه ولاء؟

عفرا تبتسم: مب انا اللي يسألوني هالسؤال..

خليفه يضحك: لا تكونين مغروره وايد..

عفرا رافعه حياتها: محد مغررني بنفسي كثرك..

خليفه: عفرا...

عفرا: لبيه..

خليفه: تعرفين حمدان بن راشد؟

فز قلب عفرا ورفعت راسها: هاه؟

خليفه: ولد راشد اللي كان وياكن في المدرسه...؟

عفرا وقلبها يدق بجنون: هيه شو بلاه؟

خليفه يبتسم: ماشي..

عفرا خافت: لا صدق ابويه شو فيه؟

خليفه: شو رايج فيه؟

عفرا مرتبكه: زين..ما فيه شي..

خليفه يرها بالرمسه: يعني شو تعرفون عنه بالمدرسه..شاطر كسلان ..مؤدب ولا هاه؟

عفرا وقلبها يتنافض: لاء عادي..ما فيه شي..كان في صفي ثلاث سنين من اول ثانوي لين ثالث...عمري ما شفت منه شي مب زين..

خليفه: انتي تدرين انه خطبج صح؟

عفرا بتردد: هيــــه..

ارتبكت عفرا وحست بالدم يرتفع كله..وكأنها ما بقيت قطرة دم بجسمها الا طلعت لويهها...ما حست بعمرها الا وقفت..

خليفه: شو فيج يلسي..

عفرا متردده: هاه.؟ يلست...انا هني..

خليفه: شو ياج؟

عفرا: ماعرف احس في شي ...

خليفه:شو؟

عفرا: والله ماشي بس انصدمت..

خليفه: لا عادي..انا رمست ابوي لا تحاتين الموضوع..

عفرا: شو قال يدي..؟

خليفه يبتسم: رفض طبعاً...يقولج سعود ولد عمتج اولى فيج...

عفرا وبسرعه : ماباه سعود...مب على كيف يدي انا اللي بعرس مب هو..

انصدم خليفه من ردة فعلها السريعه وهي جدام رمستها ما عرفت الا انها تستحي وتنزل راسها..

خليفه: ليش ما تبينه سعود؟ شي بلاه؟

عفرا قررت تكون جريئه وتعدم خجلها: لا مابلاه شي...ابويه انا قرارتي انت تتحكم فيها لانك انت ابوي..وانا اللي اعرفه انك طول عمرك عطيتني حريتي في كل شي وخليتني اتخذ قرارتي بنفسي...ويوم تفوقت وقدمت لي المدرسه البعثه توقعتك تبارك لي هالشي وتفتخر فيني...بس لاني ما كنت ولد قابلتوا تفوقي على اساس انه شي عادي وانا بس بنت لا اقل ولا اكثر...وسكت لاني ماريد اتمرد ولا اغير قرارات اسره كامله...وسمعت كلام يدي وتنازلت عن حلمي اني اكمل دراستي برا..

خليفه حس بجرح بنته: للحين شاله بخاطرج؟

عفرا تبتسم: لا فديت خشمك والله مب شاله في خاطري..انتوا اهلي وانا بنتكم والظفر ما يطلع من اللحم...كل شي تبونه انا موافقه عليه...(وتلف عنه عشان ما تفضحها عيونها) بس قرارات حياتي انا لازم اتخذها بنفسي..

خليفه يبتسم: مثل شو؟

عفرا: مثل قرارات زواجي او أي شي ثاني يتعلق بحياتي المستقبليه..

خليفه: بس يدج مصر على رايه...

عفرا اللي قررت تستغل دلعها: باباتي حبيبي...

خليفه يقاطعها: عيون ابوج وقلبه..تدللي يا قمر انتي..

عفرا اللي طولت من ابوها ما قدرت تصبر راحت تيلس عنده ولوت عليه بشـــوق..يالله يا عفرا صبرتي وايد عنه..بس البزا مب مقصر فيها..

خليفه يضحك: توج تولهين على ابوج؟

عفرا بدلع: والله ابويه متولهه عليك بس اكابر...انت للحين ما راضيتني..بس انا طوفتها بكيفي..

خليفه يضحك: اوكي بعدين الرضوه الحين ردي لموضوعنا الاولي..قلنا لج يدج مصر على رايه..

يلست عفرا وعدلت يلستها..

عفرا تبتسم و تكمل رمستها بجديه:ابويه حبيبي انت عطيتني حريتي في كل شي والحين يوم يا وقت القرار الاهم وتحديد المصير تمنع عني هالشي؟هذا شي انا ما شرعته ولا طالبت بها..هذا الشي نزل في شريعة الله..والقران والدين عطوني حرية الاختيار والمشاوره...واذا كان يدي يفكر بهالطريقه فأنا متأكده مليون بالميه انك ما تفكر جي...وعمري اصلا ما تصورت انك تفكر جي..

خليفه ماعرف شو يقول لها...

عفرا: ابويه لا تسكت ارجوك...

خليفه: شو تبيني اقولج؟ ما عندي شي ازيده على رمستج...

عفرا: يعني شو؟

خليفه يبتسم: تبينه حمدان؟

عفرا فجت عيونها: هاه؟

خليفه: زين ساعه تدافعين عن حقوق المرأه مستويه لي مناضله...والحين تقولين لي هاه؟

عفرا مستحيه: اللي تشوفه...

خليفه بطرف عينه: كيف اللي اشوفه..انا شفت اللي ابى وهديتي علي مره وحده..

عفرا مستحيه: ما هديت عليك بس قلت لك رايي..

خليفه :تعالي..(ويمد ايده) قربي عندي..

يلست عنده ولوى عليها وحبها على راسها..

خليفه: تبينه حمدان ولد راشد؟

عفرا بصوت واطي يالله تسمعه هي: هيه اباه...

خليفه لوى عليها بقوه: فديت بنتي كبرت والله وصارت تنخطب..

عفرا ما رفعت راسها عن حضن ابوها وهي صدق مب رايمه تتحكم في دقات قلبها اللي بتفضحها الليله...

طلع خليفه من عندها وهو بيرمس ابوه وبيقنعه ان عفرا لحمدان ما غيره لانها هي تبغيه وهو يبغيها ومحد بيغصبها على شي ما تباه...هذي عفرا بنت خليفه..الا الشيخه عفرا بنت خليفه...لو تبى تراب القمر مهر ما يغلى عليها...ولو تبى النجوم يزينون فيها ظفايرها ...يابها خليفه ولد مبارك عشان عيونها...

اما عفرا ما بتقدر تدرس الليله...حمـــــدان يا كم كثر حلمت فيها احلام بريئه عذريه...ما شاركها فيها انسان..يا كم كثر يا على بالها..ويا كم كثر قالت لنفسها اشمعنى هو من بد الناس...بس ما حست صوبه باي حب ولا عمرها انجذبت له باي طريقه الا من عقب ما توفت بدريه..وحست بروح حمدان تقرب منها وذكرياتها تسحبها شوي لورا وتتذكر كل مواقفه وياها في ايام الدراسه...

يمكن اللي تحسبه ما يكون حب..على الاقل بيكون انجذاب وتوافق في الافكار والتفكير..وبعدين يي دور الحب..امم هم تعادلوا تقريبا..هو يفكر فيها وخطبها لانها الانسب..وهي بتوافق لانها ما تشوف في نفسها ميول لاي حد ويكفي انه الوحيد اللي اذا فكرت بالزواج بيطري على بالها...

بس القرار الاصعب للحين ما يا..باقي بو خليفه اللي يباله دهر لين ما يقتنع ويوافق وخليفه عليه الدور الاكبر في الرفض والاقناع جدام ابوه..وصدق بتكون مهمه ابد مافيها سهوله...

.........................


وانتظروا باقي الحلقه الاخيره من قصه سحابة صيف من الاخت الغلا

تحياتي لكم واشكركم على تواصلكم معنا

[الغلا]

شكرا جزيلا اخوي البدوي الحبوب على هالجزء ....

وان شاء الله بنزل الحلقه الاخيره قريب .... بس بعطي فرصه للاعضاء عسب يقرون هالجزء ...

اختكم
الغلا

[الرايقه]

الغلاااا برتكب فيج جريمه يالله عااااد ابا الحلقه الاخيره تعبت وانا اترياااهاا ..
يعطيكم الف عاافيه ,,,

[الغلا]

لكم مني الحلقه الاخيره

خلص دوامه وطلع من المكتب ومر على حمدان..وشافه يالس للحين في مكتبه وشكله مطول ما بيسير..وفكر يروح عنه لكنه تراجع وقرر يشوف ولده ويتخبره جان بيطول ولا على طول بيظهر..ولا شو سالفته بالضبط...
راشد: حمدان..!!
انتبه حمدان اللي كان منكب على اوراقه يعابلهن: يا عونك..
راشد: عانك الله...ما بتطلع؟
حمدان: لا والله باقي لي كم شغله ابغي اخلصهن..تامرني بشي؟
راشد: لا ابدا..بس بغيت اتخبرك متى بتظهر..
حمدان: انت ساير البيت..
راشد: مصدع وراسي يعورني بسير ارقد مب قادر ايلس اكثر من جي..
حمدان: ما تشوف شر ابويه..تبغيني اوصلك؟
راشد ابتسم: لا مب مشكله اقدر اسوق للبيت..
حمدان: الله وياك..
وطلع راشد..وركب سيارته وفي الدرب وهو راد البيت اللي ما كان بعيد وايد عن الشركه...كان صدق مصدع ومب قادر يشوف شي حواليه..يسوق بلا حاسيه..عيونه يحس بذبذبه فيها..وضباب جدامه..وكم مره مال بالسياره وهو يسوق...خلاص يحس ما يقدر يمشي بالسياره اكثر من جي..وكل اللي يقدر عليه ان يوقف الحين على ينب..
خذ نفس عميق وتنهد..وحس احساس كل انسان يوم تثقل المشاكل والهموم عاتقه..مرت على باله الذكريات..ويت الصوره اللي مب راضيه تخوز عن تفكيره..مرت سنينها وعمرها ولحظات حياتها بسرعه خاطفه جدام عيونه..اللحظه الحين تفرض نفسها فرض على راشد..غمض عيونه مستسلم وهو يتذكرها بحذافيرها..
بو راشد: طلعهم يا راشد طلعهم..ابغيك بكلمتين..
راشد: ان شاء الله ابويه..
طلع راشد كل الناس اللي متيمعين في ميلس ابوه وهم قرايبه اللي قراب منه عمومتهم وبيت بو خليفه وريل عمته وعيالها وخواله واهلهم الباجين..هالوقت كان بو راشد يحس بالموت ويحس ان روحه بتسلم نفسها لباريها...طلب من ولد الكبير راشد يطلع الناس يبغي يوصيه على اهله واللي له واللي عليه...طلعو من الميلس وربع راشد بسرعه ييلس حذال ابوه اللي ممدد على طرف في الميلس والناس يايه تخفف عنه وتشوف حاله...
بو راشد بصوت متقطع:ما وصيك على امك وخواتك يا راشد..عليك بالسنع والمريله..
راشد بحزن: لا تقول هالكلام يا بويه الله بيطول بعمرك ان شاء الله وما عليك من حد..
بو راشد بألم: ما وصيك على امك وليلى تراهن بذمتك ليوم الدين..ما وصيك يا راشد..امك وليلى، امك وليلى..
راشد قهرته دمعه وطلعت من مكانها: لا يا بويه استهدي بالله وخل ثقتك فيه كبيره والله بيقومك بالسلامه..
بو راشد وصوته يختنق اكثر: بنت سيف تراها بذمتكم انت ومبارك...يتيمه يا راشد..يتيمه خافوا الله فيها..وقسم ابوها حولوا بيزاته لحسابها في البنك...
راشد مخنوق ويتنهد بحراره ويشد على ايد ابوه اللي رسم عليها الزمن خريطة عمر مضى وراح..وسلم بو راشد الروح وولد يالس حذاله..ما قدر يسوي شي الا انه ينكب على صدره يصيحه..يصيح سنده والعون..يصيح ابوه اللي رباه وكبره..وخلى له اسم يضج هيبه من يطرونه..
انتبه راشد انه في سيارته وشكلها غفوه صغيره خذته وعوره قلبه على نفسه..للحين تمر مواقف في حياتنا مهما كبرنا وحاولنا ننسى تظل فينا طفوله دفينه ما تقدر أي قوه في الزمن تنال منها..تظل فينا طفوله وحنين للماضي وشوق للاهل وللي غابوا..أي مشاغل واي حياه سريعه ما تقدر تنسينا اياها...
حس بالصداع يزيد وايقن انه في حاجه للراحه وقرر يرد البيت ويخلي ليلى تسوي له العشا او خلود ومن عقبها يرقد لين باجر ويرتاح...
في الدرب ما يدري ليش وبقدرة قادر خطرت على باله هالانسانه..رغم انه نادر ما يفكر فيها ونادر ما تيي على باله..بس حن لها..ما ينكر انه للحين يحبها..اصلا عمره ما كرهها..واللي كرهه فيها هو تصرفها..اسلوبها..وتربيتها اللي ضاعت في لحظات طيش ما فكرت شو عواقبها...صح اهملها وما وهبها اللي مفروض تعيشه من حب..ودورت للحب في مكان قذر..بس مب معناة هالشي انها ما تميز الصح من الغلط..انقهر وهو يتذكر تفاصيل اخر مكالمه كانت بينهم على التلفون...
سلامه من داخل الحجره: انزين شو فيها الا هو دور ثاني عادي تقدر تنجح...مب نهاية العالم..
سلامه: انزين اقولك عندي فكره شو رايك تمر بيتنا وانا بحط لك الكتب في الزراعه وخذهن ادرس منهن....
وتسكت بس ترد تكمل: لا عادي بشوف لك يوم محد يكون في البيت او احسن شي في الليل يوم الكل يرقدون بنزلهن لك..
حس بضيج راشد وهو يتذكر اشياء يحاول يطردها من خياله بس مب قادر ابدا انه يبعدها..يحس بكآبه وتعب نفسي..تذكر انه للحين من يوم عرست بنته بحياته ما مر على ام احمد يسلم عليها...هذي في الاول ام حرمة اخوي ومن واجبي اسير عليها بين فتره وفتره..وثاني شي ولدها نسيبي مفروض اني على الاقل اطمن عليها واشوف بنتي من خلالها كيف عايشه..
ابتسم وهو يمسك تلفونه وقرر يتصل بأحمد...
احمد: مرحبا مليوون هلا عمي ..
راشد: المرحب باجي..شحالك يا بو شهاب ان شاء الله مرتاح؟
احمد: الله يسلمك يا عمي ما نشكي باس..شحالك انت؟
راشد: بخير الله يسلمك هاه شو سويت في عرض خليفه؟
احمد: والله للحين بشوف وبشاور الاهل وان شاء الله لنا راي ثاني..
راشد: الله يوفقك يا ولدي ان شاء الله..امم في البيت انت؟
احمد مبتسم: هيه والله..ماشي شغله يالسين نطالع مباريات الدوري..
ضحك راشد: متابع ما شاء الله..
احمد مبتسم: عاد يا عمي لا تتخبرني أي نادي اشجع..بصراحه ماحب النقاشات الحاده..وانا اعرفك قبل اخطب من عندكم واعرف انكم متعصبين فخلنا حلوين بدون اسئله..
مات راشد من الضحك على نسيبه اللي زاغ من مشادته بالرمسه: زين يوم انك تعرف اني متعصب انا والقوم عندي..ان شاء الله ما تختلف مع بنتي بس..
احمد: لا تخبر يا عمي..حرب حرب طاحنه..بس غاسلين لها مخها..
ضحك راشد:اسكت عنها خلها تشجع اللي تبغي..
احمد مبتسم: ما قلت لها شي مخلنها على هواها..الا وين انت الحين؟
راشد: هني الا صوبكم ..والله اتصلت قلت بخطف اسلم على الوالده..
احمد: فيك الخير والله..هي بعد تنشدني عنكم..
راشد: ادري مقصر في حقها بس والله الضغط مب مخلنا نشتغل على راحتنا..
احمد: خلاص يا عمي اترياك في الميلس ان شاء الله..
راشد ابتسم: خلاص انا عندكم الحين..انزل فج الباب...
احمد: ان شاء الله..
بند احمد عن راشد وسار يشوف الميلس اذا مرتب ولا لاء...واول ما دخل فج الدرايش وشم ريحة البخور وشاف كل شي مرتب مكانه..امم فديتها سلامي مرتبه الدنيا..حياتي ما تنسى شي..وهو يرمس عمره سمع هرن سيارة عمه برا وربع صوب الباب بيفتحه..لكن عمه كان اسرع منه ونزل من موتره قبل يفج احمد الباب كله عشان تدخل سيارته البيت...وايهه وقربه ميلس الرياييل..ويلس وياه شوي يسولفون لين ما طلب منه راشد يزقر امه...
راشد: سير ابويه ازقر امك بسلم عليها..
احمد متردد: عمي انت مب غريب..ادخل البيت هي ما تقدر تيي لين هني..
راشد: سولي درب زين..
احمد: لا عادي ميلس الحريم بابه على برا لا تحاتي..
ونش راشد ويا احمد ويلسه في ميلس الحريم لين ما يزقرون ام احمد..اللي دخل عليها احمد وهي تطالع التلفزيون بروحها في الصاله..
احمد: فديت اللي قاعدين لرواحهم..شو تسوين يالغلا؟
ام احمد: ماشي الا اطالع هالتلفزيون..
احمد مبتسم: يالله الغاليه عدلي وقايتج بحدرج ميلس الحريم بو حمدان يبغي يسلم عليج..
ابتسمت ام احمد: ويه فديت هالطاري انا..من متى ما يانا ولد ناصر..حيبه حيبه وين الفواله والقهوه ما تأمر على حرمتك ولا اختك يسونها..
احمد: الحين بوصلج الميلس وساير لهن البقر هاييل وين منخشات..؟
ام احمد: ما شفتهن والله من يوم اذن المغرب..
احمد: اوكي انا بسير وياج الحين وعقب بيي لهن..
دخل احمد امه ميلس الحريم عند راشد عشان يسلم على ام احمد وييلس وياها شوي..ويلس وياهم احمد وتموا يسولفون...
راشد: اسمحيلنا يا ام احمد مقصرين في حقكم..
ام احمد: معذور يا ولدي والله حاسه بكم كل حد لاهي بشغله..
راشد: شحالكم وشحالها سلامه؟
ام احمد: والله بخير الحمدلله نعم ما ربيت يا راشد..
راشد اللي ارتاح: الحمدلله على كل حال..
ام احمد: الا بنتك مادري شفيها ضايجه صار لها فتره بغينا نوديها الدختر مب طايعه..رمسها خافها تطيع لك..
راشد عوره قلبه: ليش شو فيها؟
احمد: مادري يا عمي وسبق وقلت لك في عرس حمد وبنت مبارك ان سلامه شي بلاها بس مب راضيه ترمس..
ام احمد: والله اني خايفه عليها..
راشد حس بنغزه في ينبه وتذكر الموقف الاخير وياها بس ما حب يطول الموضوع فالتزم الصمت احسن حل..
احمد: هي تدري ان ابوها هني؟
ام احمد: نش جدمني داخل بسير ازقرها ..
راشد ما طلب منهم ييبونها..ليش يبون يحرجونه ويخلونه يرمسها..هو ما يبغي ليش الاحراج..الحين من طلب منكم تزقرونها..لا اله الا الله انا روحي مصدع ماريد اتعب عمري زود..احس بعمري ظالمها وظالم نفسي..وما تهون علي..بس شو بسوي لها الحين..

ونش احمد يودي امه بكرسيها داخل وخطف حجرتهم بس ما لقاها..وسار حجرة فطوم ولقاهن يالسات يلعبن في اللابتوب..
احمد: الحمدلله والشكر..استخفت الحرمه..
سلامه: ملل ماعرف شو اسوي يالسه اطالع الفلاش في كمبيوترها وايد حلو..
احمد يا ويلس قريب منها: شو تطالعون؟
فاطمه: قلنا لك فلاش..
سلامه تير ايد احمد: تعال احمد ارجوك اسمع النشيده وايد روعه..
احمد: شو تطوعتي ما تسمعين اغاني؟
سلامه: امم ما قلت بس اسمع ويا راسك لازم تغير الموضوع..
علوا على الصوت وكانت نشيده وايد جديمه..
احمد: مالت عليكن مغبره هالنشيده من متى سامعنها..
ونش من مكانه وسار للباب وتذكر ان ابو سلامه هني ..الله يهدي البنات نسني ليش ياي..
احمد ابتسم: سلامي..تعالي..
ونشت له سلامه ويته..
سلامه : شو؟
احمد لوى عليها من جتفها وابتسم: في حد في الميلس يبغيج..
سلامه ابتسمت: حمدان صح؟
وطلعوا من حجرة فاطمه وساروا حجرتهم...
احمد: غيري هالثوب اللي عليج ولبسي مخور وتعدلي في حد ياي يزورج سلمي عليه..
سلامه عقدت حياتها: وانت؟
احمد: بترياج هني..
سلامه: والله تيي..
احمد: اوكي بس هاتي دلال القهوه والشاي من المطبخ والحقيني..
سلامه: انزين..شو تباني اييب نسيت؟
احمد يبتسم: قلت لج دلال القهوه والفواله..
سلامه: مب مسوين شي..ما نعرف حد بيي...
احمد: مب مشكله الحين هاتي القهوه والشاي بس..يالله عاد لا تستوين ثجيله..
سلامه تلف شعرها وترفعه شوي فوق: زين لا تسب..
رد احمد لها من عند الباب وسحب ايدها: يالله بنطلع ولا بيزيد السب...
تبتسم سلامه: ماظني اهون عليك..
احمد: يا مكرج..تدرين بعمرج غاليه..
سلامه سايره المطبخ وهو وياها: غاليه بس؟
احمد ويطالعها بحب: مب غاليه انتي الغلا نفسه والحب نفسه وكل شي نفسه..
تضحك سلامه: زين ويا ويهك شل وياي الصينيه او الدلال..
وطلعوا ويا بعض ومشت ويا ريلها اللي كان عادي ولا يدري شو بين سلامه وابوها..بس حب انه يسوي لها مفاجأه ما يدري انها ما ترمسه وهو ما يبغيها ولا بيرمسها اصلا لانه مب قادر يسامح...مسكين احمد على نياته ما يدري انه بالمفاجأه يمكن يحطم زوجته او انه يكتشف شي ماله لزمه انه يكتشفه..
دخل احمد الميلس وهو واقف يتريا سلامه عند الباب ابتسم..وهي للحين تمشي وراه...
احمد: اسمحلنا يا عمي تأخرنا عليك..بس بنتك سنه لين ما تتزهب..
تيبست سلامه..للحين كلمة عمي ترن في اذنها..عم ريلي؟ يعني ابوي..!!! لاء...ابوي في بيتنا...شو يعني؟ ليكون بس....
وقبل تكمل حوارها مع نفسها وصلت لباب الميلس وعقد احمد حياته وهو يشوف التردد في نظراتها..وراشد اللي داخل ما تكلم ما قال شي غير انها دخلت الميلس منزله راسها وسلمت وهو نش..
سلامه: السلام عليكم..
راشد غصبا عنه ابتسم: وعليكم السلام..
وحس قلبه يدق بسرعه وبقوه..حس بشي غريب..الحين بنته واقفه جدامه..ضناه وقطعه منه..ما يقدر انه يجرحها مرتين..ما يقدر يعذب نفسه ويدمي احساسه اكثر من اللي صار..وغصبا عن احساسه وكبرياءه وجبروته وقوته وعنفه..
راشد : يا مرحبا الساع بالغاليه هلا ببنتي هلا والله..
سلامه انصعقت ورفعت راسها تتأكد من اللي تسمعه ووخت الارض تحط الصينيه والدلال اللي شلتهن عن ريلها...
للحين بعدها مصدومه من اللي سمعت..لكن الضربه القاضيه يتها الحين يوم رفعت راسها وشافت ابوها مبتسم لها هي..لا والادهى انه فاج ايديه على اخرهن وهو بنظرة عيونه يقولها تعالي فحضني..
لا شعوريا انترسن عيون سلامه بالدموع..مافي وقت للتفكير يا غبيه روحي..قبل ينتهي الحلم بسرعه..الحقي عليه..ابوج يترياج..ربعت له سلامه وطاحت بثقلها في حضنه..تصيح وتصيح وتصيح..وهو مبتسم وعوره قلبه وهو يمسح على شعرها..
احمد اللي واقف عند الباب الحين فهم شو فيها حرمته رغم انه استغرب من موقفهم..عرف انه اكيد في خلاف بينها وبين ابوها..طلع وخلاهم..
كانت سلامه دافنه ويهها وعمرها كله في حضن ابوها...وهو بالمثل لاوي عليها ومبتسم..الحين صدق حس براحه..وهي كانت تصيح بصوت عالي ما قدرت انها تسكت..مب مصدقه ومن متى وهي تتريا هاللحظه..
كان راشد بحنان يمسح على راس بنته..اللي صدق غلطت بس حس انه بالغ في تعذيبها..وحس ان لقصوره سبب في اللي صار لها..كان ساكت وما تكلم ما يريد يزيدها او يعذب نفسه اكثر...وهي ابدا ما نطقت ..كل اللي تسويه انها تفرغ كل اللي في قلبها بهاللحظه..
راشد مبتسم: بس خلاص عاده..انا شيبه لا تصيحيني وياج..
سلامه ابتسمت رغم صياحها وما تخلى عن دلعها رغم صعوبة اللحظات ومشت دموعها: لا تقول عن عمرك شيبه..ولا بكون عيوز انا..
ضحك راشد من خاطره على بنته ولوى عليها اكثر..ويلس وهي يلست حذاله في هاللحظه ينتهي كل شي..وصدق من قال ان ماشي يدوم الا حب الاهل ومافي أي اسطوره في الكون ممكن حد يسميها الحب الابدي..كثر ما يقولونها للعلاقات اللي بين الاهل وبس..خصوصا اذا كانت بين الاهل وعيالهم....
................
"يمه يا يمه اسمعيني...ودي احكيلك همومي..بس لو مره افهميني..يمه من غيرك بيفهم..حزني الساكن بعيني..بس قبله اوعديني..يمه انك تعذريني..يمه ودي احضنـك وابكــي سنيني..
وانسى جرح خافي بصدري دفيني..اجرحينــي عاتبينــي..بس لحظــة..اسمعيني..يمه من غيرك بيفهم حزني الساكن بعيني..يمه ليه هم اظلموني..في هوايه ما انصفوني..كم انا اعطيت لكن..
لا وفوا ولا قدروني..يمه ليه هم عشموني..وفي النهايه يتركوني..طيبتي مع حسن ظني..هم سبب همي وظنوني..يمه جرح اليوم يكبر..يوم هم حيل اظلموني..اجرحيني..عاتبيني..بس لحظه..افهميني..يمه ليه..!!
يمه ليــه انتــي زرعتــي طيبــة العالــم بعينــي؟!!!"
حطت ليلى قلمها على طرف الورقه..وابتسمت...ابتسمت ما تدري مراره ولا سذاجه..لا اغلب الظن انها ما ابتسمت..أصلا شكلها تستهزئ بنفسها...شمعنى هي اختارها القدر تكون محطة تجارب الحزن واهواله...ليش انا من بد الناس مكتوب علي الشقا..وما قد مر علي يوم حسيت فيه بالراحه او اني استانست على خبر او اني تمنيت شي وتحقق...مرت سبعه وعشرين سنه من عمري..ما ذكر اني تمنيت شي وتحقق او اني تخيلت شي وصار حقيقه..مادري هل هو عيب فيني ولا غلط مني...مدري احلامي كبيره وصعب تحقيقها ولا انا منحوسه وحد ناحسني..ودي اعرف شو السبب..خاطري بس افهم شو سبب تعاستي..
اللي اعرفه اني بحياتي ما غلطت على حد..وحتى لو صار ما يطاوعني قلبي حد يطول في زعلته علي..وغصب عني حتى لو غلط انا اروح اراضيه...دومي من رمست غيري مب غرور فيني احس بعمري شفافه في كل شي مشاعري عواطفي واسلوبي...ليش يعني الدنيا ما انصفتني..
تنش من مكانها وتسير تتربع على الشبريه وين شيخه منسدحه وراقده...تمسح على شعرها وتتنهد بتعب...هالانسانه تستحق اني اضحي عشانها ولا لاء...؟ اذا ضحيت عشان شيخه فأنا اشتري سعادتها واشتري عذابي..اسعدها مع انسان مستعد يبيع الكون ويرضيها..انسان يشوفها نظر عينه..واشتري همي بانسان عايش على ذكرى حرمته..ياربي ارجوك محد بيساعدني كثرك..لا تخليني اتم معلقه بأفكاري..
في امل اني احب مره ثانيه؟؟؟ ماظن..!! معقوله اقدر احب حب من اول ويديد عقب كل اللي صار..؟اصلا انا نفسي مب عارفه شو ابغي وشو مابغي..للحين مادري هل اللي انا اسويه صح ولا غلط...ادري للحين ناصر بعده موجود صح انه ماضي بس مب ماضي سهل اني اتخلص منه..وتحضن ويهها بكفوفها ذبحها التفكير..لا حياتها حياه ولا دنياها دنيا..
انا مادري شو ابغي..ابغيه عبدالله ولا مابغيه..!!! في بالي الف تناقض وتناقض..انا مب رايمه افكر بروحي..وينج يا حصه..الله يسامحج وهقتيني وعرستي..لا اله الا الله..الحين انا شو بيفججني من هالصدعه اللي انا فيها..انا شو ابغي بالضبط..شو هالضياع اللي احس عمري فيه..انا مادري اريد احب من يديد ولا اريد اضحي عشان شيخه..ولا انا بس اريد اعرس واعيش حياتي وخلاص بشكل عادي مثل كل الناس..ليش انا مب قادره افهم نفسي ليش....خاطري بس افهم انا شو ابغي واحدده وعقبها يصير اللي يصير والله ما يهمني....
تنهدت من قلبها وسارت صوب الباب ولبست شيلتها ونزلت تحت...الصاله بتيلس ويا امها شوي يمكن تقدر تنسى..ترتاح يهدا بالها شوي..اول ما وصلت تحت شافت امها راقده على طرف اليلسه تحت وهي يالسه مسنده راسها للمخده...للحظه ليلى ما تدري ليش خافت..!! ليش ياها احساس مخيف صوب امها...امي كل شي عاده ولا امايه..ما بقى لي غيرها..وقفت قريب التلفزيون وقصرت عليه..
ليلى بهدوء: امايه..!!!
ام راشد فتحت عيونها بشوي شوي وانتبهت: أذن العصر؟
ليلى خذت نفس قصير: لا يا امايه الساعه بعدها 3:00...انتي ليش راقده في الصاله..؟
ام راشد تعدل شيلتها: والله غفيت وانا اشوف الاخبار..انتي ليش مب راقده؟
ليلى تقرب منها وتحط راسها على ريولها: ملانه..صدعني التفكير..مليت من كل شي..
ام راشد ترفع راس ليلى: قومي فديتج عورتيني في ريولي ما تحمل..
ليلى: ما بقوم امايه انا محد يدلعني ويهتم لي الا انتي..تحملي عشاني..(وتغني) ما بقى لي غير انتي يا غريبه..يا رحيل العمر فيني يا حبيبه..يا رضاها وقف وناظر شوي ..شف غلاها ايش سوا بقلب حي..
ام راشد تبتسم: خلي عنج البزا..خليه لبنت اخوج..
ليلى: انا بدلعها وانتي دلعيني انا..
ام راشد: باجر بتعرسين وريلج بيدلعج انا بزايه ما منه فايده..
ليلى: انا بعرس وبتم هني ما بروح بيت ريلي..
ام راشد: يالله بالستر..وليش ما تبين بيت ريلج؟
ليلى: ماستغني عنج..ماصبر بدونج..ما سوى شي وانتي محد..ماقدر اتنفس وانتي بعيده..
ام راشد: لا خلي عنج المنكر بتعرسين وتروحين بيت ريلج..
ليلى تضحك: الحين يا امايه انا ساعه اتغزل فيج تقلبين علي ليش؟ بعدين منو قالج انه بكيفي اختار وين اسكن..
ام راشد بجديه: ايوه خلج بنت مسنعه وتعرف شرع الله عدل..وين ما يباج ريلج تسكنين بتسكنين..لو في خرابه..
ليلى: قصوره يسكني في خرابه..انا ماقدر اعيش الا في قصور والنخيل مازره بيتي والخضره منتشره في كل مكان..
ام راشد بضيج: قصر شو اللي تبينه...ما تشوفين ربيعتج طلعت من بيت ابوها شكبره قصر..قصر..من طرف الفريج للطرف الثاني وسارت تسكن ويا ريلها في شقه ما قالت ااح ولا واح..
نقعت ليلى من الضحك بغت تموت وما قدرت تسكت...
ام راشد تدزها بعيد: شعليه تضحكين؟
ليلى تضحك: امايه شو يعني اح وواح..
ام راشد تتحرطم: سكتي انتي سكتي..الحين هذي مالها معنى بس يقولونها يعني يبينون انها ماعترضت ابدا..
ليلى تضحك: هاااه فهمت..
ام راشد: قومي عني بسير اتيدد قبل يأذن العصر..
ليلى:انا بعد بسير الحديقه شوي الجو بدا يبرد وشكله السنه مطر ان شاء الله..
ام راشد: اييه يوم بيبيض الديج بتمطر..نحن مقاطعنا المطر من سنين..
ليلى: استغفر الله يا امايه حرام والله..قولي ان شاء الله وبس..
ام راشد تسير صوب حجرتها: ان شاء الله..
تنهدت ليلى من قلبها..ونشت عن امها بتسير الحديقه شوي..على اقل تقدير تقول انها قدرت تهرب شوي من التفكير اللي ذبحها من يوم عرست حصه...
........................

"وجودي والعدم واحد على قلبك وفي بالك..وجودي عادي بعينك وهذا ماتبينته...أبارك لك اذا هذا قرارك ياهنيّالك...أباركلك على همي وهجر ٍ منك أنا شفته...تبين ماتوقعته بعادي صار يحلالك
وخطواتك بدت تقصر ودرب الهجر شرعته...بدى واقعك يتغير طغا مرك على زلالك..طغت شمسك على ظلك قسى قلبك وطاوعته...اذا هذي النهايه ياعسى فال السعد فالك
عسى اللّه يسعد أيامك على درب ٍ تخيرته...بواسي قلبي الشاقي بحبك كان يرضالك...وبمسح دمعتي ويكون لي درس وتعلمته...لك السلوان ياقلبي تصبر خلك بحالك...ترى واجبك سويته حبيته وقدرته...ولا تندم على مافات وكل شي وله وقته..."
خلت المجله مفتوحه على هالصفحه..وتنهدت من قلبها وهي تحس ان الشاعر كتب الكلمات وكأنه يخصها بها..ويقول لها بصحيح العباره انا اشرح احساسج ووضعج في الدنيا..اشرح كيف تعيشين وبشو تحسين..غمضت عيونها بقوه عنيفه تتخيل كيف كانت بتكون الدنيا لو ان الحب كان متبادل..شو ممكن كان بيصير لو الحياه اختلفت شوي..وحبها كثر ما تحبه..كانت تطمع بالحب وتبغي الحب..صغيره ما تنلام عمرها للحين ما عدا العشرين سنه..كيف بتصبر وشو بتسوي..أي بنت في عمرها ما تدور شي كثر الحب وما تتمنى اكثر منه..تتحراه مبتغى سهل او عاطفه سهله تقدر تلاقيها متى ما بغت..ما تدري ان الحب اصعب شي في الدنيا...وما تدري ان الحب هو الشي المستحيل حد يغصب حد عليه..
فتحت عيونها ولفت على سريرها...شافته راقد من الخاطر..اه بس لو ادري بشو يفكر ..ليتني في حلمه..اعرف شو يحس وانا بالنسبه له من اكون..مادري انا الحين اكتشف بوقت متأخر اني رحت للانسان اللي مب مناسب؟...
هزت راسها بأسى خلاص مافي امل الحين هي حرمته ومافي مجال للندم على قرارت ماضيه..ما تريد تتعب نفسها اكثر وتحس انها تبكي على اللبن المسكوب..ما قدرت تسوي شي الا انها تخلي المجله مفتوحه على اتساع الجرح بأعماقها..مافي اقسى على الانثى من تجاهل الرجل لها..اصعب شعور تعيش الانسانه مع رجل ما يقبلها..يمكن الريال لو كرهته الحرمه يقدر يلاطفها ويحببها فيه..يقدر يحبها ويخليها لو على الاقل تحبه وتحترم احساسه..لكن العكس صعب جدا...الرجل ما يقدر يتقبل أي حرمه خصوصا لو كان يحب..يمكن يفكر في تنازلات عشان حياتهم تمشي بخط صحيح بس تنازلات شكليه اكثر منها عاطفيه...
سارت اروى للكبت وطلعت فوطه ووزار وفانيله وسارت تجهز الحمام لريلها ناصر...مب ريلها بشي كثر ما هو ريلها في اوراق المليج واوراق المحكمه وجدام الناس...يعيش حياته وياها بشكل فاتر..ابد ما يرمسها وان رمسها فقط كان يطلب منها شي لنفسه ما يتعدا الشاي والغدا او الثياب..
ينش الصبح وهي وياه عشان دوامه وترد ترقد عقب ما يظهر...يرد من الدوام ويرقد عقب الغدا..يتم راقد للعصر وعقبها يطلع ويا فهد او حمد او أي حد من معارفهم...بس للحظه ما يسأل هالمخلوقه شو تبغي او شو في خاطرها..وهي مالها غير الصبر...
دخلت الحمام وفجت له الماي في المسبح وحطت له اغراضه وكانت تمشي بشوي شوي عشان ما يسمع..للحين تحبه وتراعيه واملها بالله كبير يتغير ويحن عليها..رغم انها بدت تحس بدبيب اليأس في صدرها..
طلعت من الحمام وشافته يالس على الشبريه ونش..عضت على شفايفها..شكلي انا وعيته...!!..طالعها بعيون شبه مغمضه ونزل راسه..وهي تعودت على الوضع ما قالت شي...
اروى: نشيت؟
ناصر في خاطره"سؤال غبي": هيه..
اروى: خلصت لك الحمام..تبغيني اسوي لك شاي قبل تظهر؟
ناصر يرد ينسدح: هيه..
اروى: ان شاء الله..
وطلعت من الحجره وهو تم يتجلب على الشبريه عقب نش من مكانه وسار الحمام لقاها مخلصه له كل شي..بس للحين المسبح مانترس ماي..كان الجو بدا يبرد شوي والناس داخله على اشهر الشتا..طلع من الحجره وسار صوب التسريحه ويلس مجابل عطورهم والمنظره ويطالع ويهه..هو بالاساس ما شاف نفسه كثر ما شاف ليلى بعيونه...ولاول مره قبل يتعمق في التفكير اكثر..هز راسه بقوه...لاول مره يطردها من خياله ويمنعها لا تتمكن في عيونه..نزل راسه بضعف وهو يدري انها محاول خجوله منه انه يبعدها..بس انتبه للمجله وقعد يقلب فيها ويشوف خرابيط الفنانين واخر صرعات الموضه..قلب على صفحة شيخه الجابري وابتسم..من متى وهو يقرا لها..يالله صدق هالانسانه رائعه بمعنى الكلمه..وروعتها تمتد لين ما توصل لشواطئ ربيعتها شهرزاد..
مكتوب فوق بالخط العريض..اخترت لكم وكانت تعتذر فيه عن عمودها الاسبوعي ومنزله لهم قصيده رائعه ما تخلى عن روعة وجمال ذوقها الأخاذ..قرا القصيده..بس ما لفتت نظره كثر ما لفت نظره شخابيط قلم التحديد على الابيات والاكسات على الاطراف والقلوب المكسوره المرسومه بقلم التحديد..قرب صبوعه ومسح الروج اللي كانت اروى تلعب به وهي تقرا القصيده..
وشاف الأبيات وقراها مره ثانيه بعمق واحساس..
للحظه حس بأشياء غصب عنها تصير بداخله ولاول مره يحس بعطف وبإنسانيه..لاول مره يشفق عليها..لو انها مب محتاجه شفقه كثر ماهي محتاجه الحب والاهتمام..
انفتح الباب وهو نش من مكانه على طول وشافها ماسكه كوب الشاي وانصدمت يوم عرفت انه للحين ما تسبح وهو بهت وتم واقف يطالعها..اصلا ما يطالعها شكله راح في عالم ثاني...
اروى: انت للحين ما سبحت؟
ناصر توه يرد لوعيه: للحين ما انترس المسبح..
اروى مستغربه: معقوله؟
وراحت عنه الحمام وشافته مب منترس بس الا طفح على ارضية الحمام بعد..صكت الماي وطلعت له..
ناصر مب مجمع: انترس؟
اروى حست فيه شي: ناصر فيك شي؟
ناصر لف عنها وتنهد من خاطره وسار للحمام..وهي قلبها يدق بقوه بعنف..حست فيه شي..ضايج ..بس اللي خلاها ما تعذب نفسها بالتفكير اكثر..انه مستحيل يصارحها..
طلعت الصاله لين ما يخلص وقبل يطلع اكيد بتبخره شرات كل ليله...يلست في الصاله كالعاده بروحها وشغلت التلفزيون ويتها ام ناصر تقعد وياها...وان بو ناصر حادر..
بو ناصر معصب: وين عيالج؟
ام ناصر خافت: مادريبهم بسم الله شفيك؟
بو ناصر: وين فهد؟
ام ناصر تنش: طلع ويا ربعه سويحان جدا العزب..شي مستوي ارمس؟
بو ناصر والشرار يتطاير من عيونه: مسود الويه ليش قافل تلفونه...ما يعرف ان اليوم موعد الجلسه الاولى في المحكمه..
ام ناصر استجمعت اللي بقى لها: أي محكمه..ليش ما تدري.ما خبروك..يا خادم يوز عن هالحركات وخاف الله لا عاد تطري مال الحرام جدام عيالي..
بو ناصر: وانتي شعندج الثانيه...؟
ام ناصر: خلاص يا ولد حميد خاف ربك في الناس..ما عطاك ناصر الاوراق..
بو ناصر بتردد: اوراق شو؟
ام ناصر: مادريبها يوم يي ناصر تخبره..
بو ناصر كان معصب وام ناصر جدامه فدزها بإيده على جتفها وكانت بتطيح على الكنب لولا ان اروى بسرعه مسكتها...
بو ناصر: وين ناصر؟
اروى بخوف: يتسبح يا خالي الحين بينزل...
بوناصر: سيري ازقريه بسرعه...
وساعدت اروى ام ناصر تيلس عدل..وربعت فوق بتزقر ناصر وهي تركض وما تشوف جدامها من الخوف صدمت في ناصر اللي كان يمشي ويحاول يعقم عقم كندورته..
انتبه لها ناصر وشاف عيونها اللي تتوسله يي بسرعه قبل تنجلب الصاله حرب طاحنه..
ناصر عقد حياته: شو فيج؟
اروى بخوف: ناصر انزل ابوك يبغيك..
ناصر: شو مستوي؟
اروى: مادري ماعرف....تعال بسرعه..
بعدها ناصر عنه وسار للصاله وشاف امه يالسه تصيح وانصعق بس طالع في ابوه اللي واقف عند اليدار متسند ويترياه..
ناصر: هاه ابويه شصاير؟
بو ناصر: انت وين من الصبح وانا اتريا واحد فيكم يي وياي..وبعدين شورقته هذي اللي ترمس امك عنها؟
ناصر بضيج: نروح معاك وين؟
بو ناصر: انت تعرف اليوم شو؟
ناصر يهز راسه: ابويه انا مليت من سوالفك تصدقني؟
بو ناصر ين ينونه مب قادر يطالع لو في ايده شوزن نقعه في راس ناصر وامه الحين..
ناصر يكمل: انا تعبت من كل شي من اسلوبك وتربيتك لي ..تعبت اكثر من طاعتي العميا وانقيادي اللي ماله أي تعبير غير انه ضعف مني وتسلط منك...ابويه خلاص اللي راح راح...وما عاد ابغي اعيش اللي بقى لي من العمر بالشكل اللي عشته...
ولف يأشر على اروى: هذي انا ان ظلمتها بتكون انت السبب...تعرف شو يعني انت السبب...
وسار للتلفزيون ورفع الرسيفر وطلع من تحته ورقة ليلى مال المحكمه..وقرب من ابوه وعطاه اياها...بو ناصر اللي تغيرت ملامحه وانتقلت من العصبيه للخوف والارتباك والالم والصراع الذاتي مع النفس..
ناصر بيأس: عندك أي اعتراض على كلام المحكمه..؟؟ ابويه انا اللي خسرته مب شويه من كابوس كنت معيشنا فيه..شي ماله اساس...كانت احاول ارضيك على حساب نفسي واشوفك راعي حق وخسرت كل شي بإرادتي..انت ما قصرت وياي بس طول عمرك وانت تقتل فيني والحين ما عاد ينفع الكلام...
غطى بو ناصر بإيده على ويهه..وام ناصر تكمل صياحها..واروى على الدرج واقفه متيبسه من اعلان ريلها لمشاعره المكبوته..ما كان بإيدها شي هاللحظه غير سلاح المرأه في الشدايد وهي دموعها اللي انهالت على ويهها بقوه..
ناصر بألم: خسرت للاسف كل شي بسببك يا ابويه..مافي داعي اقلب مواجع انا في غنى عن ذكرها...خسرت وايد وايد عشان ارضيك..خسرت اهم شي انت تعرفه وخسرت عيال خالي وخسرت نفسي لاني طاوعتك في كل شي تبغيه...
ورد يطالع اروى: اروى...
اروى اللي تمت مبهته بس ماردت...
وناصر كمل كلامه: طلعي لمي ثيابج نحن مالنا قعده في هالبيت...
ام ناصر نشت تصيح: وين يا ناصر هالبيت بيتك مالنا غنى عنك وين بتظهر وتخليني بروحي..
ناصر بألم فضيع: انتي مب بروحج..فهد وبو فهد وياج...
وشاف اروى للحين ما تحركت فطلع لها وتجدمها وهي يت وراه..دخلوا وصكوا باب الحجره ويلسوا يعقون اغراضهم أي كلام خبط لزق في الشنط..اروى ما قدرت تناقشه وهو يشوفها تحط الملابس في الشنطه ونصها مبلوله من دمعها..
ناصر: ممكن ما تصيحين؟
اروى مشت دموعها وسارت صوب التسريحه...تلم عطورها وكريماتها..
لفت عليه وهو يالس ينزل كناديره من معاليقهن...
اروى وللحين صوتها مثجل من الصياح: وين بنروح؟
ناصر توه استوعب: أي مكان مب مهم اهم شي نطلع من هني...
اروى: كيف أي مكان..اغراضنا مب شويه..وين بنروح؟
ناصر بجديه: تبغين تمين هني تمي..انا لازم اطلع..
اروى وقلبها يدق بسرعه: خلاص..
ورتبت اغراضها بسرعه وما قفلت اخر شنطه الا وناصر واقف جدامها...
ناصر: خلصتي؟
اروى منزله راسها: هيه..
مسك ايدها...هيه مسك ايدها..وهي تخدرت..للحين ما ستوعبت شو يصير..
ناصر يسحبها وراه: تعالي براويج..
ومشت وياه لين جدام المنظره الطويله اللي حذال الباب..ووقفها عشان تشوف ..تشوف شو؟ ما تدري كل اللي تعرفه انه الحين بيرمس..
ناصر يأشر على ويهها: شوفي هالدموع..(مسحها بكفه) محد يستاهلها..حتى انا..
وسار عنها وخلاها تم واقفه مكانها متيبسه لا تدري علم ولا حلم اللي تشوفه..ما تدري شو صار عليه ريلها..شو اللي انجلب فيه للحظه..شو صار به؟؟
ناصر وخى يشل الشنط: يالله لبسي عباتج..
اروى ساكته للحين وتطالع المنظره..
ناصر: يالله يا اروى بسرعه ابغيج بعد انا في موضوع طويل اظني يا وقته ولازم نرمس فيه..
اروى لبست عباتها وشيلتها ونزلت وياه وهي شاله كم كيسه صغيره وهو شال شنطتين متوسطات فيها ثيابهم..وشاف امه في الصاله مصعوقه..شكله صدق سواها..
ام ناصر: وين يا ناصر...؟ وين فديتك؟
ناصر يقرب منها ويحبها على راسها: امايه خلاص لا تزيديني..القرار اخير ومافي داعي للنقاش...
ام ناصر بتصيح: وتخليني يا ناصر..؟
ناصر يحاول انه ما يحن على امه: امايه ماظني كان يرضيج اللي يصير..لازم اطلع انا ولا تخافين بييج بين فتره وفتره..
ام ناصر تلوي عليه وتصيح..واروى واقفه تبكي في طرفهم ما تدري كيف ضايعه في وسط هالمعمعه..وطلع ناصر وركب سيارته واروى وياه وحطوا اغراضهم في السياره وطلعوا من البيت..على طول شل ناصر تلفونه واتصل بالهيلتون وحجز سويت كامل لمدة اسبوع لين ما يرتب نفسه واوراقه...
وفي السياره..
ناصر: تبغين تكلمين امج؟
اروى: ليش؟
ناصر: تقوليلها انج ظهرتي..يمكن تم تحاتي..
اروى صاده صوب الجامه: ماله داعي ما بيستوي بي شي وانا وياك..
ناصر سكت وما وحالهم يسكتون الا وهم مجابلين الفندق وياهم على طول واحد من العمال يشل شنطهم ويطلعها فوق وهي وقفت وياه شوي عند الاستقبال يخلص اوراقهم ويحط جوازاتهم وطلعوا على طول فوق...
المكان شكله مقبول..شو بتقول بعد فندق ما يحتاي انها تختار شكل اثاثها او اسلوب وطريقة ديكورها..صاله شبه وسيعه حجرة نوم والحمامات وغرفتين على جدام..كبيره شوي واشبه بشقه..
شل ناصر الشنط من جدام الممر وجدمهن داخل الحجره وهي يلست على طرف الشبريه وهو على طول فر السفره والعقال ويلس على الكنبه وطاح بثقل راسه بكفوفه..
اروى تمت تطالعه وهي للحين ما شلت عباتها..عورها قلبها عليه..هالانسان شكله على بعضه كله هموم ومصايب..ما يقدر يفضفض..ليتني بس اعرف بشو يفكر ومن اللي وصله لهالحال..معقوله كان يحب؟ بس شو اللي بيمنعه يكمل حبه...؟ معقوله انظلم؟ مستحيل ينظلم هذا ريال والرياييل في مجتمعنا يظلمون بس ما ينظلمون..
حست بشي داخلها يقولها قومي جربي..كلميه يمكن يسمعج...كوني انتي مصدر راحته وسعادته...يالله تحركي...كانت خايفه من ردة فعله..يمكن يعصب ويثور رغم انه ما جد عصب عليها..بس توكلت على الله وقامت..
يلست قريب منه لدرجة الالتصاق..وتجرأت انها تمسك ايده وتجرب تنزلها من على ويهه..
اروى بكل حنان: ناصر..
صمت قاتل يسري بينهم..وترد تقطعه بكلامها..
اروى تحب ايده وتحضنها: ناصر شوفيك يالغالي؟
ناصر رفع راسه يطالعها: مافيني شي..مرهق بس..
اروى بحنيه اكبر: خلاص هونها وتهون..ماشي يستاهل ضيجتك..اصلا محد متعذب غيرك..ولا كل لاهي بحياته..انت ليش متضايج..؟
ناصر ياخذ نفس عميق ويرد راسه ويسنده على الكنبه: ماعرف..
اروى: انت معور قلبك ومتضايج وحالتك حاله..الحين ابوك درى؟ امك درت؟ اللي انت مضايج عشانه درى؟ محد يدري ومحد يحترق الا انت..فليش تعذب نفسك..انا هني عشان اخفف عليك..ماوعدك اني اشل الهم كله لكن على الاقل نصه احسن من انك تشله كله بروحك...انا مابغيك تقول لي اسرارك او أي شي يخص حياتك..مب لازم تفضفضلي لو كان هالشي ما يريحك لا تسويه...لكن تأكد اني بكون معاك في أي وقت واي لحظه..وصدقني انا موجوده هني عشانك انت..
تتنهد وترد تكمل: يمكن ما تكون العاطفه من بينا متبادله..لكن انا متأكده انك لو ما تحبني كزوجه بتحبني كبنت عمتك..(ابتسمت) يمكن ما يكفيني لكني برضى فيه...ناصر يا عمري والله ما تعرف الضيج اللي ييني من اشوفك متكدر...ابتسم الله يخليك..
ناصر لف عليها يطالعها..امم يمكنها سحرته بكلامها...الحريم بياعات رمسه..لكن مايدري ليش حس انه صادق...انا مب مجبور اخبرها عن جرحي اللي مستحيل يلتئم...مب مجبور اني اخبرها عن الماضي اللي مب لازم تعرفه...بس على الاقل لازم احترمها وماحرمها من رغباتها..
ناصر يطالع في عيونها: انا مب لازم اتكلم معاج عن الماضي...احيانا يكون الماضي سبب في تعاسة العمر كله...لو تبيني ابدا معاج من الاول بكون جذاب..ولو تبيني ناصر كامل بكل اللي تتمنين بعد بكون جذاب...يمكن على الاقل يبالي فتره من الزمن اتعود على وضعي وشو صار لي وعلي...(يبلع ريجه بتعاسه ويمسك ايدها) اوعدج حياتنا بتتغير...يمكن ما تكون بشكل سريع لكن ان شاء الله بشكل افضل من قبل...
اروى وعيونها تدمع: انا بعد ما بجبرك تسوي شي ما تبغيه..بس انا بتحمل واكيد بعد الضيج فرج..
ابتسم ناصر...عيونها مليانه امـــل...ياااه كيف صبوره هالانسانه...مايعرف كيف يتعامل معاها..بس لازم يجبر نفسه ويبرمج حياته تتقبلها..ما يعرف ليش يحس الحين انه محتاج لها..اصلا هي حياته وهي مستقبله..وهي ام العيال..اللي ماله بد منهم...
ابتسمت له اروى من بين الدموع..دموع مختلفه..مب دموع الم..ولا ندم..ولا تعاسه..هذي دموع الحياه اليديده اللي بتبداها..وهذي دموع الامل اللي كبرت نبتته في تربة قلبها...واليوم تجني الثمار..
مسك ناصر ايدها وحبها..ابتسم ابتسامة رضا وقربها صوبه ولوى عليها..اكيد لو فكرتوا هذي اول مره يلوي على حرمته بحب من خذها...بطبيعة الحال بكت هي متأثره..وهو تنهد مرتاح....
.......................

كان تلفون الصاله يدق ومحد شله...رد يدق ويدق..طول في دقه..وانفتح باب الحجره وطلع احمد منه بسرعه وسلامه وراه..وقفوا عند التلفون ورد عليه احمد اللي انعفست ملامحه على طول..
احمد عاقد حياته: انت متأكد؟..شو اسمها؟؟ ياخي يمكن مغلط...زين شو اسم ابوها..
سلامه كانت مستغربه اكيد حد صار عليه شي..قلبها يدق بسرعه..ما حست الا بالشرر يتطاير من عيون احمد ويطالعها بكل حقد..وناولها السماعه..
سلامه بخوف: منو؟
احمد مغطي على السماعه ومبتسم بسخريه:هه ما تعرفين منو؟
سلامه استغربت: اشدراني منو؟
احمد: ارمسي وبتعرفين..
اول ما تكلمت سلامه ياها الصوت البارد اللي برد ضلوعها ...جدد ماضي هي بحاجه انها تنساه..وقرب احمد منها واشر لها تكون عاديه وفج سبيكر عشان يسمع كل شي...
بس سلامه تمت مبهته حتى الحرف مب راضي يطلع من ثمها..يعني محسوده حتى على السعاده اللي نالتها بالحلال...يعني شمعنى انا من بد الناس اتعذب وينكسر خاطري وما شوف يوم حلو..
عبدالرحمن: ليش ساكته؟ هذا ريلج؟
سلامه ما حست الا بدموعها بحر غزير..وهي تشوف الماضي يتجدد..والجرح اللي اندمل مسرع ما انفتح ومسرع ما اسودت الايام في عيونها..يالله يالدنيا..قبل فتره ابوي يرضى علي واليوم يرد لي هذا...يعني بالله شو يبغي مني عقب هالايام اللي طافت كلها..
احمد سحب السماعه وصكر في ويه عبدالرحمن وتم يطالعها بأسف وهو شوي ويكفخها..
احمد يهز راسه بأسف: للحين مب متصور انه كان ممكن يكون لج ماضي..ليش يا سلامه ليش..؟
بس دموع سلامه كانت كفيله انها تخليها تم ساكته بدون رد..وين تروم ترمس عقب اللي سمعه ريلها وعرفه..
سلامه بصوت مخنوق: احمد والله ما رمسته ولا اعرفه..
احم مغمض عيونه بقهر: بس بس قطعيها الرمسه..الحين بس عرفت ابوج ليش غصب علي اخذج قبل تكملين الثانويه..الحين بس حس احمد الغبي بألاعيبج..
دفنت سلامه ويهها بكفوفها وانفجرت تصيح..ليش يا ربي ليش؟؟ ما انفجرت تصيح الا وحست حد يلوي عليها ويهديها عقب اللي استوى لها..بس من اللي ممكن يحن عليها بعد اللي صار...شو تبغي من محبة الناس اذا خسرت احمد..احمد حبيبها وعمرها..احمد اللي عرفت الحب وياه..تخســره..!! هذا اللي ابد ما حسبت حسابه...احمد بالذات..
لفت ويهها وهي تتنفس بسرعه وتشوف حد لاوي عليها بقوه..ريحة العطر مميزه وتعرفها عدل..والحنان المتدفق فاهمتنه زين...
احمد بكل حب: شو فيج حياتي؟ شو مستوي بج؟
سلامه فجت عيونها رغم التعب...
احمد عاقد حياته: شكلج كنتي تحلمين..تعوذي بالله من الشيطان..
سلامه اللي ارتاحت بس قلبها تم يدق بسرعه..ياااه كان كابوس فضيع..غمضت عيونها ودفنت ويهها في حضنه...الحمدلله كان حلم الحمدلله يا ربي..
احمد: شو شفتي في حلمج.؟
سلامه: ماشي خلاص انسى..والله كابوس موتني من الرعب..
احمد: كنتي تهاذين..
سلامه خافت: شو كنت اقول؟
احمد: امم مادري بس شكلج كنتي حزينه وخايفه..
ونش من مكانه وسار يبطل ثلاجتهم وياب لها كوب ماي تشربه وتسترخي..
سلامه: كم الساعه الحين...؟
احمد: الساعه 9:30 الصبح..بتنشين ولا نرد نرقد..؟
سلامه: لا انا وايد تعبانه..ارجوك احمد ابغي اسير العياده..
احمد: اكيد حبيبتي..دقايق انتي خلج هني وانا بييب لج عباتج وشيلتج..
ابتسمت سلامه: لا لا شو تباني اسير جي وانا معيفه من الرقاد خلني اتسبح شوي واغير وبييك الحين..
احمد يضحك: فديتج يا عمري والله انتي اصلا ورده عبيرها ما يخلص..
سلامه بطرف عينها: ايوه اعترف منو ورده اللي بحياتك يالله قول..
احمد: وايدات يالله قومي..
سلامه تنش بصعوبه: اوكي خلاص..
دخلت سلامه الحمام واحمد طلع الحمام الثاني برا وردت تلبس وتسفر وشافها يالسه تسحي شعرها وتلبس جلابيتها الهاديه العاديه وايد..حليلها سلامي..
احمد يمسك ايدها بدلع: يالله حبيبي بسرعه يمكن تكونين حامل..
سلامه ماتدري ليش زعلت من كلامه وما ردت عليه..يعني هو يترياني احمل..مافيه صبر..عنبو ما كملنا خمس شهور..وين احمل من الحين..بصراحه ان شاء الله ما كون حامل..مافيه حد ياخذ من وقت احمد شوي على حسابي...
ما ردت عليه وخلصت لبسها وطلعت وياه برا..
احمد يفتح لها باب السياره: بشو تفكرين؟
سلامه انتبهت: ولاشي..
طلعوا على طول وساروا العياده العامه القريبه من المستشفى المركزي..دخلت على الممرضه واحمد يلس يترياها برا..شوي طولت...وهو تم يتريا برا يقرا الملصقات اللي ملصقه على اليدار..وانفتح باب الحجره وسلامه ما كانت متغشيه...بس شاف شي في عيونها صدمه وزلزله...تصيح ..!! ليش تصيح...؟؟ الا الحرمه انفجرت صياح..!!!
احمد: سلامي شو فيج؟
سلامه تصيح وبعدت عنه شوي وهي مضايجه..وطلعت الممرضه وهي عاقده حياتها..وتطالعهم باستغراب..قلب احمد كان يرجف وما كان يبغي يحط أي احتمالات لدموع سلامه..ويشوف بعيون الممرضه دهشه غلبت على استفساره..
احمد مسك ايدها: سلامي شو فيج؟
سلامه: لا تكلمني ارجوك ..بس خلاص يكفيني اللي فيني..
احمد مصعوق: دكتوره شو فيها؟
الممرضه بضيج: معندهاش مخ؟
احمد استغرب شوي ويكفخها: افا ...!! كيف حرمتي ما فيها مخ؟
ضحكت سلامه رغم صياحها...احمد ما يووز عن خباله..
الممرضه: في حد بيزعل من نعمة ربنا...ياباش مهندس الف مبروك..الست هانم بتتدلع ..الناس بتزغرد من الفرح وحضرة جنابها بتعيط...قال ايه..مش عاوز اخلف دلوأتي..
احمد للحين ما ستوعب شي ما يمع من هذربة الممرضه المصريه اللي عطته كاش بالويه..ياخي هالحرمه ما تراعي مشاعري..ودقات قلبي..ياااااه وينه قلبي..!! شكله طار وما بيرد..
احمد وهو يغمض عيونه ويفجها مصدوم: ممكن تعيدين شوي؟ مب جنج قلتي حامل..ولا انا سامع غلط..؟
الممرضه: يا نهار اسود منيل...مالكم النهارده..في حد يزعل من نعمة ربنا؟
احمد هني فصخ الحيا وودره عنه..ونسى انه في العياده..وربع صوب سلامه يلوي عليها..وهي مفتشله..مسود الويه شو يسوي...الممرضه ماتت عليه من الضحك..
احمد: حياتي انتي..فديتج والله احبج احبج احبج..ياالله يا سلامي الحين تصيحين عشان بيكون عندنا كيوت بيبي شراتج...افا ما تبين نييب عيال..
سلامه بطرف عينها: انت شعليك استانس..محد بيشله الا انا ومحد بيتعب الا انا..واخر شي محد بينسونها الا انا...
احمد بحب كبير: يااااه يا سلامه ما تتخيلين شو ممكن اسويبج لو قلتي مره ثانيه ما تبين عيال..والله لو ايييب عشرين ولد واربعين بنت..ما يتغير غلاج...لو اغدي شيبه بلا ضروس ويفروني عيالي دار المسنين بتمي احبج احبج..
سلامه: قصورهم بعد يفرونك هناك..
احمد يمسك ايدها ويمشون مع بعض طالعين من العياده: ترا بسحبج فطرفي وبنعيش حتى في الدار لرواحنا..
سلامه تمسح دموعها: الحين انت صدق مستانس.؟
احمد متشقق: والله لو في صدري فتحه جان طار قلبي وما رد خير شر..هذا ان ما سوا ثقب ثاني في الغلاف الجوي..
سلامه تبتسم وتحط ايدها على بطنها: مسود الويه يبغي يشاركني في اول سنه لي مع ريلي...
احمد يفتح باب السياره ويرفع عباتها مبزنها على الاخر..وركب جدام وبدا يسوق بهدوء فضيع..
سلامه: ايييه شو فيك...؟ على جي ما بنوصل قبل سنه البيت..
احمد: اووص ولا كلمه...لازم ام سعيد تتدلع اخر دلع...
سلامه: لا والله شو سعيد مب عايبني..انا ابغيه راشد..ليش يعني بأسم ابوك...ماريد..
احمد: اسكتي لا تنفعلين يمكن يطلع الولد عصبي..بسميه سعيد غصبا عنج..
سلامه برطمت: والله مازقره غير راشد...
احمد: بتعقدين الولد وما بيدري شو اسمه...بعدين لا تزعلين ان شاء الله يكونون توم راشد وسعيد..
سلامه خزته بنظره مسكته: الله يخليك اسكت..اثنين..انا يالله يالله متحمله فكرت واحد تبغيهم اثنين حشا لا ما بغيتني اعيش انا..
احمد يبتسم: بيكون سعود العيناوي..فديته وبوديه معاي يشجع العين يالله يا سعيد متى تكبر..
عصبت سلامه: والله بيطلع وحداوي ان شاء الله..كيفك هو تطلع ولدي عيناوي..
احمد: اذا بنت بتكون وحداويه وان كان ولد بيكون عيناوي..
سلامه: والله هو ولدي وانا حملت فيه وكيفي شو مابغي بسوي به..
احمد انفجر ضحك عليها...وهي طالعته وضحكت..توهم حسوا بغباءهم يالسين يتضاربون على الولد وهم ما يدرون انه للحين في علم الغيب...وشوي وان احمد واقف حذال باتشي..
سلامه: وين وين؟
احمد: افا يا ام سعيد...ما تبينا نحتفل الليله؟
سلامه: رد حبيبي ماله داعي..خل عنك حركات نص كم..
احمد: مب مشكله ما عيبج نص كم بنفصل كم طويل..
سلامه: يا ثقالة دمك ..احمد ماله داعي..
بس احمد طنشها ونزل وياب لهم صينية باتشي..وردوا البيت وفتح لها الباب ومشاها لين الصاله...
احمد: اشلج؟
سلامه : لا شكرا الحمدلله عندي القدره امشي..
احمد مسكها بيشلها بس صرخت وفجها: عوذ بالله من هالحس..
سلامه: لا تشلني اخاف اطيح واموت انا والبيبي...
احمد: حياتي انتي يعل يومي قبل يومج انتي وهو...فديته سعيد..فديت عيونه وقلبه..
سلامه: حليلها وان طلعت بنت شو بنسميها؟
احمد: اممم اكيد سلامه..
سلامه تبطل باب الحجره وتعق عباتها وشيلتها: يا سلام عشان تحب سلامه وتتفداها وانا اقول منو وانت تقص علي وتقول انتي وانت اصلا تعني بنتك..
احمد يعق سفرته وعقاله ويحط الصينيه على الطاوله: تخسي الا هي تاخذ ذره من حبي لج..
سلامه متشققه بس تتدلع: زين بعد..
احمد: شو تبين تتريقين حياتي؟
سلامه: مفروض انا اسألك..ليش تسألني؟
احمد بطرف عينه: من اليوم ورايح ماشي مطبخ ماشي غسيل ماشي شغل بيت..من باجر بقدم لاقرب مكتب على شغاله...وبتصل في خليفه وبوافق على عرضه...اممم نحن كبرنا وبنصير عقب تسع شهور خمسه..لا لا شو خمسه..بنستوي سته..
سلامه: ليش منو السادس؟
احمد يتبسم: الخدامه الحلوه..
فرته سلامه بالمخده: خلاص روح عند البشكاره خلها تنفعك...
احمد نقع عليها من الضحك..ما قدر يمسك عمره وعفد عندها يتفداها..وهي بالمثل ما حست بعمرها الا تبتسم له....
سلامه: بنييب خدامه هنديه خسفه وسودا ما تشاهد وريحتها دهن عشان ما تلفت نظرك..
احمد يطالعها: افا وتشككين في ريلج لهالدرجه؟
سلامه تنش: احتياط محد يضمن عمره..كل شي معقول..
احمد برطم..
سلامه: لا تسويلي فيها شيخه بنت سيف كل محد رمسها برطمت ومدت البوز شبرين..
احمد تذكر شيخه..افا يا احمد كيف نسيتها: شيخه فديتها من متى ما يبناها..
سلامه تغير ثوبها: حق شو تييبها حرام عليكم خلوها عند عمتي ما بقى لها الا هالبنت..ما تمنت شي وصار يا احمد يوم ليلى بتعرس انت تيمل وخذ شيخه في شهر عسلها..الحين عاد عمتي حزينه ربيعتها من صوب وظروفها من صوب..لا تاخذون شيخه اذا تبغي تشوفها روح بيت اهلي وزورها..
احمد ما عرف شو يرد على سلامه..بس شكله اقتنع بوجهة نظرها..وطلب منها تطلع تبشر امه واخته بهالخبر السعيد وتخليه شوي بيتصل بخليفه يبلغه بموافقته انه يشتغل مسائي وياهم في الشركه...عسب يحسن ظروفه ومعيشتهم...
......................

بعد ما تغدى حمد ويا حصه في مطعم غير المطعم اللي غداها فيه باليوم اللي قبله ... قرر يوديها السنما مثل ما وعدها .... عروض الظهر السنما تكون فاضيه وما تكون زحمه وبياخذ راحته وياها... وما بيضيج لأن السنما مزحومه شباب ... غير جيه مقرر يدخلها فلم بادي عرضه من زمان وبجيه ما بيكون فيه وايد في القاعه ...

حصه: وين بنروح
حمد: بوديج السنما عشان ما نرد عند الشيطان
حصه: (تبتسم) اوكي ... انا بختار
حمد: لا استريحي ... امس كان ممكن بس لان الموضوع تأجل يوم انا اللي بختار (برطمت حصه ... بس ياللا شي احسن من شي) على فكرة بنروح صوب شمال باجر
حصه: والله ؟؟
حمد: هيه ... بنقعد حول الاسبوع وبنرد ... ياللا عشان ما تقولين ما رحتي شهر عسل
حصه: هاهاها بليييز حمد .. بتوديني شمال وتقولي شهر عسل
حمد: حمدي ربج بوديج ... لا تخليني اغير رايي
حصه: (ترفع يديها) الحمدلله

قامت حصه الصبح وهي مقرره انها تعيش حياتها مع حمد .... والاية الكريمة (( وعسى ان تكرهوا شيئا وهو خير لكم )) تترد على راسها ... عندها فرصه وبتستغلها ... ليش ما تخلي حب حمد مثل التحدي لازم تكسبه ... قالها انه ما يدري اذا كان اللي حسه تجاه جواهر حب او لا ... ومافي وحده يحق لها اكثر من حصه بحبه ... لانها تحبه غصب عنها تحبه ... واليوم راضيه عن هالحب وعن هالشعور وما بتنكره ولا بتحاول تجتل حبها له ابدا ... طول عمرها كانت واثقة من ان حمد يستاهل حبها ... بالرغم من الايام اللي كانت تشك فيها بهالشي ... بس امس ايقنت انه الشخص الوحيد اللي يستاهل تحبه وما غلطت يوم حبته ... تحت العناد والكبر والوغاده .. انسان حساس طيب وحنون تريد تعيش عمرها وياه
اما حمد حس انه استسلم في النهاية ... وراضي بهالاستسلام وبهالهزيمة ... ما يريد يقولها كلمة احبج قالها وايد لانسانه ما استاهلت الكلمه ... والحين يحس انها ما توفي حصه حقها ... كان يريد يحسسها معنى الكلمة... يحسسها بغلاها... وانه بالنسبة له دنيا وعالم ووطن يريد يعيش فيه ويلقى سعادته عندها ....
بالنسبة لهم كانت بداية قصة حب بس هالمرة حب متبادل ... حب بالرغم من كل الظروف استمر وانتصر في النهاية لانها كانت صادقة في حبها ... ولانه كان يريد له انه يفوز عليه ...
......................
وعقب ما رد هو ويا حصه من برا ياه اتصال وطلع على طول من شقته وراح صوب الهيلتون واول ما دخل حصل ناصر يترياه في اللوبي ... وبعد ما سلم عليه وقعد وياه وطلبوا شي يشربونه ... خبره ناصر انه خلاص طلع من بيت ابوه ومب ناوي يرد وانه بيدور شقة يسكن فيها هوه وحرمته

حمد: يا ناصر تخلي بيت اهلك تسكن في شقة ... ما بتحمل من بعد المكان الوسيع تعيش في ضيج
ناصر: اذا انت تحملت كل هالمده انا بتحمل بعد
حمد: راجع نفسك يا ناصر لا تستعيل
ناصر: خلاص يا حمد قرار نهائي مستحيل اغير رايي
حمد: انت حصل شي بينك وبين الوالد او حد من الاهل
ناصر: صدقني يا حمد مب عشان أي شي حصل ... بس ماعدت اقدر اتحمل ابغي اعيش بروحي اسير حياتي بروحي تعبت صدق من اني اكون لعبه في يد الوالد وين ما يبغي حطني
حمد: شوف يا ناصر اذا هيه سالفة خالف ... باجر بتراضى ويا هلك وبترد لهم لا تستعيل على سالفة الشقه
ناصر: لا انا مب زعلان ويا حد فيهم ... وانا ابغيك تساعدني اذا تعرف مكان زين .. لاني مب راد لهم
حمد: البناية اللي انا ساكن فيها .. الشقة اللي مجابل شقتي فاضية ... مثل شقتي دورين ... ومد سكنها قبل لان البناية يديده
ناصر: والاجار كم بيكون
حمد: ما بنختلف ... البنايه للوالده وانا بكلمها
ناصر: (يبتسم ) زين بعد بنياورك .. ما اريد اكثر من جيه
حمد: حياك الله ... متى ما بغيت اتشوفها اتصل عشان اخلي الحارس يفتح لك الباب وتشوفها
ناصر: مشكور يا حمد ... ما قصرت واسمحلي غثيتك وانت معرس يديد ...
حمد: افا عليك يا ناصر ... انت اخو عزيز وغالي
ناصر: مشكور يا حمد ...
حمد: عيل استأذن منك الحين ... الحرمه بروحها في البيت قايلها بنطلع بعد شوي
ناصر: برايك يا حمد واسمحلي غثيتك
حمد: خل عنك هالرمسه ... ما من بينا هالكلام
طلع حمد من الفندق وراح ركب سيارته وفي خاطره يقول ... لو جدمت هالثورة يا ناصر يمكن حصلت اللي تبغيه بس عاد الحين شو الفايده ... ياللا الله يعينك ويساعدك ما بغيت تطلع من تحت ابوك ... شغل الاف ام وحرك سيارته.. وهو في الطريج راد الشقة انتبه على حسين الجسمي يغني وغصب عنه اندمج في الغنيه وفي المقطع اللي يقول فيه " عشقتج والهوى طفل ربى في خافقي المفتون... كبر هذا الطفل واصبح غرامه يسبق سنيني... انا يا امي تراه ما اوفيج مهما يكون... جميلج دين في عمري وربي بج موصيني... ومهما عشت لج وافقي بظل الوافي المديون.... لانج روح في قلبي ودم في شراييني ... " ما حس حمد بعمره الا وهو جدام بيت امه ...محد يقدر ينكر احساسه بحبه لامه .. بالرغم من كل شي يحبها ... بس هوه اللي ما يدري ليش يعذب الناس اللي يحبهم اكثر شي في حياته ... ليش يحب يعاندهم ليش يحاول ينكر حيه لهم ... هالحب الوحيد اللي كان لازم يفتخر فيه... ويخبر العالم عنه كان مكبوت داخله... من يوم عارضوا رغبته وطرشوه يدرس برع وهو يقصد يجرحها ويعاندها ويتعبها... شو هالحب يا حمد... شو هالقسوة ومن وين يبتها ... هذي امك ... راح ابوك وراحت بدرية وما بقى غيرها ... عالمك جنتك ونارك هذا اللي تسويه بها ... نزل حمد من السيارة وفي داخله شوق عجيب لامه ... دخل البيت وراح صوب قسمها اللي كان بابه ملايم وسمع كالعاده صوت التلفزيون دخل وهو يدورها بعيونه وحصلها قاعده جدام تلفزيون ... ابتسم من قلبه ... وهي تفاجأت بشوفته في مثل هالوقت ... توه ما كمل اسبوع من عرس وياي عندها ... اول ما طرى على بالها حصه لا يكون فيها شي

ام حمد: بلاك يا ولدي ... خير ان شاء الله .. عسى حصى ما فيها شي
حمد: (راح حمد صوبها وحبها على راسها وقعد عدالها) مافيني شي ... ياي اشوفج ... ولهت عليج يا الغالية
ام حمد: (فاجه عيونها وتحاول تصدق) حياك الله يا ولدي .. متى ما بغيت ... بس وين حرمتك مخلنها بروحها
حمد: ما بييها شي في البيت
ام حمد: أي بيت يا حمد ... الا زاربنها في هالشقة
حمد: هاهاها امايا شو زاربنها في شقة ... ليش هيه عنز عشان ازربها
ام حمد: محشومة بنت مبارك ...
حمد: محد قال شي .. اكيد محشومه بنت عمي
ام حمد: (وهي تدري انها بتثير غضب ولدها) يا حمد طيع الشور وهات بنت عمك واقعد عندي البيت خالي علي
حمد: )ابتسم بطريقة فاجئت امه) ان شاء الله يا ام حمد ... لو تبين الحين بشلها وبييبها عندج
ام حمد: ( وعلامات المفاجأه على ويها ) اتمصخر علي يا حمد
حمد: هاهاهاها ما عاش من يتمصخر عليج يا الغالية .. كم غالية عندي انا
ام حمد: (وهي بعدها شاكة في رمسة ولدها) اعدل لك الطابق اللي فوق
حمد: اللي تبينه سويه
ام حمد: بتختار الديكور والفرش بروحك ولا انا اختاره لك
حمد: تشاوري ويا حصه بنت مبارك وسون اللي تبنه
ام حمد: وايه علني ما خلى من هالويه يا حمد ... توك ما بردت فوادي يا ولدي... الحين بتصل في عماد اييب حد يعدل لك البيت من فوق
حمد: هاهاها ليش مستعيله صبري شوي
ام حمد: اخافك باجر تغير رايك وتقول لا ما قلت
حمد: شاوري اول حصه خليها تسوي اللي تباه هيه بتسكن فيه
ام حمد: ماعليه بس انت اللي ما يبتها وياك
حمد: خلاص انا وياها بني نسكن هنيه حجرة الضيوف وعدلن اللي تبنه على هواكن
ام حمد: (وعيونها غراقنه دموع من الفرحه) صدق يا حمد .. الله يهديك يا ولدي ويبرد فوادك شرات ما بردت فوادي ... ان ما يشلك البيت يا بو شهاب بحطك انت وحرمتك في عيوني
حمد: معلوم يا الغالية ... بعدين كم غالية انا عندي الا انتي ... امرة اللي تبينه قوليه وانا تحت امرج ... بس رضاج يا الغالية ... هذا اللي بغيه
ام حمد: عمره قلبي ما كان راضي عليك يا حمد يا ولدي ... مالي غيرك في هالدنيا ... احس انه نصخ ابوك واختك في صدرك يا ولدي ... ما تدري كم تسوى عندي دخلتك هاي علي ...
حمد: (وهو يحاول يقبض عمره لا تفضحه دموعه جدام امه اللي ما قدرت اتيود عمرها) بس عاد يا الغالية ما تدرين دموعج هاي كم تسوى ... ولا تراني بغير رايي وبقعد بنت مبارك في الشقة
ام حمد: (وهي تمش دموعها بطرف شيلتها) لا خلاص يا حمد... اخافك الا من تطلع تنسى هالرمسه
حمد: افااااا يا ام حمد ... انا ارد في كلمتي من متى
ام حمد: خلاص متى بتي انت وحرمتك
حمد: بنطلع اسبوع او عشرة ايام صوب شمال ... وبعدين بنرد عندج على طول
ام حمد: ما بيمديلي عشرة ايام اعدل لك الطابق اللي فوق
حمد: صبري يوم بتي حصه خليها تعدله وياج لا تبدين خليها تختار بروحها
ام حمد: ووين بتقعد لين ما ازهب لك جناحك
حمد: لو تباني الغالية ابات انا وحرمتي في حجرة البيدار بقول فالج طيب يا الغالية
ام حمد: لا شو حجرة الزراع ... محشومة بنت مبارك احطها في حجرة الزراع
حمد: هاهاهاها الا بنت مبارك المحشومه ولا انا برايني
ام حمد: انت وياها ... غلاها من غلاك يا ولدي
حمد: خلاص بقعد وياها في حجرة الضيوف لين ما تخلصون لنا الجناح
ام حمد: زين بعد بيمديلي اغير ديكورها واثاثاها لين عشرة ايام
حمد: هاهاهاها يا حبج حق المخاسير يا ام حمد
ام حمد: (وهي تحاول تقنعه انها ما تغيرها عشانه لا يعصب) لا يا عيونها... بس انا امبوني قايله بغيرها .. وين من عشر سنين ما غيرنا شي فيها لو يونا العرب فضيحه الحجرة غاديه جديمه
حمد: ماعليه يا الفالية على راحتج ... بغيتج في سالفة بعد
ام حمد: عيوني لك يا حمد
حمد: شقتي اللي ساكن فيها ... لقيت لها مأجر
ام حمد: ماعليه خله يروح عند عماد وبيسويله الاوراق
حمد: ابغيج تأجرينها على ناصر ولد خادم ... طلع من بيت ابوه وساكن في فندق ويدور شقه .. امبوني بقولج اجريله اللي الشقة اللي مجابلتني .. بس يوم أني بيي اسكن عندج .. اجريله شقتي بفرشها ...
ام حمد: وشحقه ودر بيت ابوه .. منو بيقعد عند امه اسمينكم عيال اليوم ما ادري شو من الشياطين في دمكم
حمد: هاهاها امايا .. الحين انتي تحاتين ام ناصر ...
ام حمد: والله ما تدرون بقلوب اهلكم لين ما تسوون عيال ... ساعتها بتحسون بحرقة القلب على العيال... والعذاب اللي تعذبونا اياه
حمد: هاهاهاها امايا شو بتغدين مصلحه اجتماعيه
ام حمد: انصحه يا ولدي خله يرد عند امه
حمد: ماعليه امه عندها فهد
ام حمد: محد يسد مكان حد من العيال كل واحد وغلاته
حمد: امايا رزق وياج تصكين الباب ليش ... خلاص بنأجر له الشقه
أم حمد: الرزق اللي فيه حراق قلب ام ماباه
حمد: ماعليج هوه متفاهم ويا امه ويوم يبغي يرد بيردلها ... الحين هوه متلعوز في الفنادق ... انتي اجريله الشقه الحين وراعوه بالاجار
أم حمد: خلاص يا ولدي اللي تشوفه لو تبغي امره بنقلط الشقة صوبه بشارة ردتك البيت
حمد: (يبتسم) لا خلج بزنس ومن لا تغلبج العواطف في الشغل
ام حمد: وابوي وشو هاي البزبز مالتك
حمد: (هنيه ما قدر يمسك عمره وشل البيت من ضحكه) ماعليج ما عليج انسي
ام حمد: (وهي مستانسه انها تسمع حمد يضحك ومغيضه لانه يضحك عليها) تضحك علي مسود العين ... قم اطلع روح عند حرمتك ياللا روح
حمد: افااااا يا الغالية .. تروغين حمد .. ان شفتيني عاد غير الحول
ام حمد: لا وين اسبوع او عشرة ايام وبتي هنيه .. هذا بيتك يا حمد وما بتنراغ منه .. الا حرمتك بروحها مب زين مخلنها وتوها ما كملت اسبوع
حمد: خلاص عيل انا استأذن منج ... وان شاء الله بنوصلج قريب
ام حمد: سلم على حرمتك
حمد: ان شاء الله يوصل

نش حمد وحب امه على راسها وطلع من قسمها بس قبل لا يطلع من البيت ما قاوم انه يروح فوق يمر على حجرته القبلية ... ايام مراهقته وطفولته ... هالحجرة اللي ما دخلها من طلع من بيت امه ... مكتبه عليه شوي من كتبه ودفاتره .. تسريحته بالعطور الجديمة مالته .. فج الكبت لقى كم كندورة من كناديره الجدام وبدله مالت السفر ... كانت ابتسامته على ويهه وهو يجلب في اغراضه وذكرياته ترده ايام ما كان هوه وعبدالله دوم في هالحجرة وسوالف واسرار ... حتى بدرية مرت في باله ايام ما كانت اتي توعيه عشان يروح المدرسه .. ابتسامتها وشعرها اللي كان ينزل على ويها ... كم كثر مفتقدنها في حياته ... حياته اللي تغيرت من طلعت منها ... لو كانت موجوده كانت سعادتها به وبحصه اكبر من الكون كله ... يمكن ما سمحت ان الوضع بينه وبين حصه يتدهور هالكثر ... حس بمرارة وضيج في صدره خسر اخته واهماله هوه السبب ... طلع من الحجرة والبيت وركب سيارته ورد الشقة عند حصه بنت عمه الانسانه الوحيده بالرغم من كل الخلافات اللي بينهم اللي يحس بالامان وياها بعد بدريه
.....................

[الغلا]

تابع

دخل خليفه الصاله وشاف ابوه يالس ويا سمر تسولف له عن دراستها وتراويه شهادة التقويم الاول من الفصل الاول وكانت طالعه الثالثه وهو مستانس عليها..ويتمدح فيها ساعه...تحمد ربه خليفه ان محد في الصاله الا سمر ورد شوي ورا وما شافوه ودق لعبدالله وتخبره وينه وعبدالله قاله على طول انه في حجرته..وخبره انه الحين بيرمس ابوه يبغيه يطلع ولا يخلي لابوه فرصه يغصب عفرا على سعود..
دخل مره ثانيه وسلم على ابوه ويلس قريب منه وشاف سمر متشققه..
خليفه: شعندج انتي؟
سمر: يبت الشهاده وطالعه الثالثه..
خليفه بطرف عينه: تقلدين عفاري.!!
بو خليفه: وليش النجاح بس لبنتك..ما يستوي بنتي تطلع شراتي..؟
سمر: هيه انا شرات ابويه..
خليفه: بس ابوج ما يعرف يقرا..كيف طلعتي مثله..
بو خليفه: من قالك..اصلا محد يعرف يقرا مثلي...
خليفه ابتسم: مبروك سمووره..خلصي الفصل الاول بنجاح وبشتري لج احلى هديه..
سمر تتنهد: محد معبرني نكت ومحد يسمعلي وهدايا محد يشتريلي..حصووه كانت الوحيده اذا نجحت تشتري لي هديه..
بو خليفه يضحك: خلاص افا عليج انا بشتري لج هالمره...
خليفه حن عليها: وانا وعبدالله بعد..
واشر خليفه لسمر انها تقوم بيرمس ابوه..وبو خليفه مانتبه..فنشت سمر على طول وطلعت فوق...
خليفه ما درا كيف بيفتح الموضوع ويا ابوه وشو بيسوي الحين...وعبدالله للحين ما طلع من حجرته..هذا شو يسوي للحين..نحن مب رايحين نخطب...
بو خليفه: شخبار الشغل وياك؟
خليفه: والله ماشي كل شي يمشي بهدوء...
بو خليفه:سمعت ان ولد سعيد يشتغل عندكم...
خليفه يبتسم: هيه نعم..وانا عرضت عليه الشغل يوم عرس حمد..ما شاء الله عليه كادر مواطن وعنده شهاده من برا وخبره..وتكاليفه اقل من الخبير..فضربنا عصفورين بحجر..هو يستفيد ويفيد..
بو خليفه: ونعم الراي يا بوي..
خليفه: ابويه..
بو خليفه: شو؟
خليفه: ابغي ارمسك بموضوع شوي حساس..
بو خليفه: شعندك؟
خليفه: عفاري...
بو خليفه حس ان الموضوع ما بيعيبه: شو؟؟
خليفه: ماريد ايوزها سعود....
بو خليفه بضيج: ليش ما تبغي تيوزها ولد عمتها؟ شي فيه؟
خليفه: لا يا بويه مافيه شي بس البنت مابغي انكد عليها واغصبها..
بو خليفه بعصبيه: لعبت براسك البنت ولينته..الحين انت تمشي شور الحريم في بيتك..
خليفه اللي توتر: لا طال عمرك..بس البنت ما طلبت شي غير حق من حقوقها..
بو خليفه: مالها حق..والرياييل تقرر عنها مالها شور على نفسها..يعلها تفدا حصه ان شاء الله ما عاندت ولا قالت شي لا هي ولا خواتها اللي قبلها عرسن اربع محد قالت لي ماريد ولا مالك شور..
خليفه: بس عفرا يا بويه ما تبغي سعود...
بو خليفه: ولا حصه تبغي حمد ولا سلمى تبغي حامد ولا نوره تبغي محمد ولا شمسه تبغي سالم..شوف حياتهن الحين ولا وحده تصبر عن ريلها غير اختك سلمى اللي بهدلت عمرها بطولة لسانها وتدخلها في امور الرياييل..
خليفه يهز راسها وهو يشوف المسأله صعبت وعبدالله السخيف للحين ما شرف...
بو خليفه: ودر عنك شور النسوان وخلك ريال وقرر عن بنتك مب هي اللي تمشيك...
وهني دخل عبدالله الصاله طالع من حجرته...وسلم على ابوه وشاف ويه خليفه وهو يتحلف فيه وبو خليفه على طول من شاف عبدالله زقره..
بو خليفه: تعال اسمع اخوك شو يقول...
عبدالله : خير ان شاء الله شو يقول..
بو خليفه: يقول ما بيوز بنته سعود...ونها ما تبغيه..شو من شور هذا اللي يشاورون فيه الحريم...
عبدالله ييلس حذال خليفه: زين..
بو خليفه: شو زين انت الثاني...يقولك ما بيقربون بالولد لين ما ترضى البنت ولا ما بيخليه ياخذها...
عبدالله: واذا ما طاع يرخصها..؟
بوخليفه: حرام ما خذت غيره...
عبدالله: واذا قلت لكم ان سعود ما يبغيها...
بو خليفه: جذاب يا عبدالله جذاب..سعود ما بيقول هالرمسه انا اعرفه...
خليفه: هو قالك بنفسه؟
عبدالله: هيه والله انا رمسته من يومين في السالفه وقلت له ليش ما يتصل بابوه ويوون يخطبون رسمي ويضمن البنت قبل تعرس وتخليه لين ما يخلص من الجامعه..قال لي مابغيها عقب الموقف الاخير اللي شافه في صالة البيت...يوم رفضته..
بوخليفه بعصبيه: اتصلي به ابغي اشوف بتأكد بنفسي انتوا جذابين..
خليفه يهمس: رياييل بلحانا ويجذبنا وبيصدق الياهل...
ودق بو خليفه لسعود ورمسه...
سعود: والله من صدق يدي مابغيها...
بو خليفه: حد غاصبنك؟
سعود: والله بطيب خاطر مابغيها..خلاص مرخوصه بنت خالي..
بوخليفه انقهر: ما حسك مقتنع؟
سعود: والله عن قناعه يدي مابغيها..مب لشي فيها ولكن خلاص ماشي نصيب..
بوخليفه:خلاص خير ان شاء الله..
بند بوخليفه التلفون وخذ نفس عميق...
خليفه: هاه ابويه شو صار..
بوخليفه: انتوا لاعبين براس الولد..
عبدالله يضحك: والله ابويه لاء..بس هو رخصها وانتهى الموضوع....
بو خليفه: وينها مسودة الويه..
خليفه: في الجامعه خلها ابويه لا ترمسها انا برمسها..انت موافق..
بو خليفه: على شو؟
خليفه: على ولد راشد..؟
بو خليفه: ما بنقول لاء دام ولد عمتها رخصها...
خليفه نش يحب راس ابوه: الله يطولي بعمرك يالغالي..
عبدالله بطرف عينه: وانا.؟ بدينا من الحين بالخيانات...
ضحك خليفه ومد ايده لاخوه ينش..
عبدالله: وين؟
خليفه: نتمشى..
بوخليفه: يا حبكم للهياته..رياييل طول وعرض وللحين ما تخلون عن شغل العيال...
خليفه يضحك: نمشي مع العصر..
بوخليفه ينش بيطلع الزراعه: أي عصر واي مغرب...
تموا يسولفون ويضحكون لين ما وصل خليفه موتره وركب وياه عبدالله وطلعوا من البيت وبو خليفه قام لزرعه يجابله....
.......................
بعد فتره طويله من الصراع مع النفس..وبعد هم طويل مع التفكير...وبعدما قررت تريح نفسها واختارت سعادة غيرها على سعادتها..وبعد ثقتها الكبيره بالله ان الياي احلى وان ربي مثل ما خذ منها وايد فأكيد انه بعبدالله بيعوضها عن كل شي...وهالشي في الاول والاخير يعتمد عليها هي...ان قدرت تكسبه كسبت حبه وان ما تحركت فبروده بيكون ناتج لاهمالها....ثقتها الكبيره بالله خلتها تؤمن ان الله اذا ابتلى عبده بمصايب فهذا دليل حبه له...فلولا حب الله للعبد ما ابتلاه واختبر ايمانه وصبره وثقته فيه...وان الله مخلي هاللي ما يحبهم رغيد مستانسين بحياتهم ويشوفهم وهم لاهين عنه ممتنعين عن ذكره ومستنفرين عن شكره...احساسها بأن الله ما كان مقصر وياها في شي وحفها بالنعم ومنع عنها كرب الدهر وابتلاها بخفيف الالم..دليل على ان الله يخبي لها الاعظم وان ربها صدق لما قال في كتابه بما معناه ان للصابرين بعد كل ضيق مخرجا...
ابتسمت بعمق بعدما صلت صلاة الاستخاره قبل فتره..وحست براحه شديده تجاه الموضوع....باجر اجمل..وباجر احلى والياي اروع...اكيد باذن الله اروع...ام كلثوم قالت في اغنية "اغدا القاك" قــد يكــون الغيــب حلــوا انمــا الحاضــر احلــى..."...امم صح كلامها صح يمكن الياي حلو والمستقبل مخبي لي وايد اشياء حلوه تعويض عن عمري اللي راح وحبي اللي راح والناس اللي احبهم وراحوا...لكن الحاضر اللي بعيشه اكيد اجمل واحلى...اذا تصرفت فيه شكل مابغي واذا مشيت عمري على سعادتي ورسمت يومي ليومي وخليت باجر لله يسوي لي فيه اللي يريد وانا نفسي راضيه ليش ازعل وليش اهتم...اكيد من بعد كل ضيق مخرج اكيد من بعد كل ضيق مخرج...
مافي انسانه في هالكون ممكن تسمع هالخبر قبل حبيبتها حصه...ياااه يا حصه...!! كم كثر تولهت عليج ماتخيلج بعيده...وابتسمت بخجل..لاء بس الحين شكلنا بنقرب اكثر من بعض وبمل من مجابلج...مسكت تلفونها واتصلت عليها...
ليلى: السلام عليكم..
حصه بفرح: يا هلا والله ومرحبا مليون..هلا والله بالغلا والشوق والحب كله..
ليلى ابتسمت: فديتج والله كل هذا لي..لو حمد يسمعج عادي يذبحج..
حصه تبتسم: والله انه يالس حذالي...
ليلى شهقت: انتي وين؟
حصه: نحن سايرين صوب الشمال...بنطلع شوي نستجم...
ليلى: حسنا يا فتاه..
حصه تضحك: شو؟
ليلى بتردد: امم سوري خربت عليكم جوكم الحلو...
حصه: افا عليج من متى بينا اسف ما اسف انا وانتي واحد..صح؟
ليلى: صحين...
حصه: قولي اللي بخاطرج انا فاضيه..صح حمد؟
حمد يسوق: اكيد لاء..
حصه نقعت ضحك وليلى نفس الشي...
ليلى: بالويه بعد..
حصه تضحك: ما عليه ما عليه..
ليلى: احم..حصه...
حصه حست بشي وقلبها دق بقوه: قولي..
ليلى بصوت واطي: امم خلاص وافقت..
حصه شهقت وضحكت من خاطرها بفرح: فديتج انا والله احبج والله..
ليلى تضحك: سكتي عاد..
حمد كان يطالع حصه بطرف عينه: شعندكن؟
ليلى تبتسم: يالله باي كلميني اول ما توصلين او اول ما يظهر عنج..
حصه تبتسم بفرح: اوكي فديتج يالله باي...
بندت ليلى عن حصه اللي كانت بتطير من الوناسه ومب واسعتنها الدنيا من الفرح...
حمد: شو صار؟
حصه بفرح: وافقت...
حمد: على شو؟
حصه: على عبدالله...
حمد ابتسم من خاطره: لا والله؟
حصه وقلبها يدق بسرعه: هيه والله..
حمد: الله يبشرها بالخير...بتصل بعبدالله الحين..
حصه: لا انا بتصل به..انا عرفت قبلك..
حمد بطرف عينه: نلعب نحن..انا قبلك وانت قبلي...يالله عن حركات اليهال..
واتصل بعبدالله وهي مبتسمه تترياه يرد..
عبدالله: هلا والله بالمعاريس اللي من عرسوا ما سألوا...
حمد يضحك: والله انت اللي فاتح لك حضانه ومحد يشوفك..
عبدالله: حرام عليك يا ريال والله ما شفتها من ليلة العرس...
حمد: احسنلك بعد..
عبدالله: شخباركم ان شاء الله مرتاحين..وان شاء الله انك مب مزعل اختي..؟
حمد: افا عليك في عيوني..
عبدالله: اوووه زين اطورنا..نغازل بعد..!!
حصه بهمس: يالله قوله الحين ولا بقوله انا..
حمد: زين زين..يالعيله اللي فيج...
عبدالله: شعندكم تتحرطمون...؟
حمد: بشاره..
عبدالله: شو خير ان شاء الله..!!
حمد: مبروك يالمعرس اليديد وافقت العروس على خطبتكم الموقره..
عبدالله يبتسم: لا والله كيف دريت؟
حمد: توه الخبر مره فرش سامعينه..
عبدالله: وين في الاخبار..؟
حمد: يا ثقالتك..توها متصله تخبر ربيعتها...
عبدالله اللي استانس: عطني حصه..
حصه: مرحبا الغالي هلا والله..
عبدالله: شحالج حصيص..؟
حصه: بخير فديتك والله تولهت عليكم....
حمد: اردج عندهم...
طنشته حصه: شحالك حبيبي ان شاء الله مرتاح..والف الف مبروك تستاهل كل خير..
عبدالله مبتسم: الله يبارك فيج حصووه ان شاء الله ما ضغطي عليها...
حصه: لا وقسم بالله من رضاها وافقت حتى شاورتني ورفضت اعاونها...
عبدالله مرتاح: الله يتمم بخير...
حصه: الله يوفقك يالغالي..
عبدالله: مرتاحه؟
حصه ابتسمت ولفت صوب الجامه: الحمدلله..
حمد: هاتيه هاتيه برمسه..
وير حمد التلفون يرمس عبدالله شوي وعقب بند عنه وتم يسولف ويا حصه اللي كانت تعيش اجمل ايامها واحلاهن مع حبيبها وولد عمها حمد...
.......................

الضحى في بيت بو خليفه والكل رايح راد...كل حد مشغول ولاهي بعمره والبيت اقرب ما يكون تشبيهه لخلية نحل على كثر الحركه والروحات والييات فيه...يلست ام خليفه في مكانها المعتاد وهي تاخذ نفس عميق ويلست عدالها سلمى اللي كانت في الشهر السادس وبدا بطنها يبرز شوي..رغم نظرة الاشفاق اللي في عيون امها الا انها تعودت على الوضع واهلها تعودوا عليها..يعني منو بيتحملها لو اهلها ما تحملوها..وقبل تتكلم أي وحده فيهن كان ذياب داخل الصاله ويلس عدال امه بعدما حبها على راسها وهي بدت موال التفدي والاسئله..
سلمى: مب بسج مبزيتنه وهو هالكبر...؟
ام خليفه: واييه فديته هذا ذياب محد يسواه..
ذياب: احم احم...
ام خليفه: شسويتوا فديتك...؟
ذياب: ماشي كل شي جاهز..
ام خليفه: خلصتوا كل شي.؟
ذياب: هيه امايه خلصنا والحين انا طالع ابدل كندورتي بلحق على الصلاه..
ام خليفه: قم فديتك وشف حد من البشاكير قلها تييب المدخن بدخنك...
ذياب ينش: ان شاء الله...
وقبل يطلع فوق شاف عفرا وحمده داخلات الصاله...عفرا اللي كانت مرتاحه وراضيه كل الرضى عن نفسها..قربن منه وسلمن عليه ...
ذياب يضحك لعفرا: هاه العروس شحالج؟
عفرا تلونت ستين لون: زينه شحالك انت..بعدين انا مب عروس تو الناس..
غمز لها ذياب: اونج تستحين..يالويه..!!!..بعد حتى ريلج مال قوم الخقه والكشخه ورفعة الخشم والراس..
عفرا تبتسم: زين الله يخليك صك الموضوع لا يي يدي ويكنسل السالفه..
مانتبهت عفر وهي تسولف ان ام خليفه تسمعها وهي بكل طلاقه تسولف عن حمدان ..لا وتحاتي بعد لا يدها يفركش السالفه..
ذياب: مسودة الويه...بعد تحاتين يعني مب من شوي سويتي مناحه..
عفرا احمرت: أي مناحه؟
ام خليفه: واييه ثر بنات اليوم الحيا ما يدلنه..
عفرا تتحرطم على عمها: الله يغربل بليسك يبتلي الرمسه..
ذياب يغمز لها ويرها بعيد عنهم وبهمس: اقولج منو عازمين اليوم؟
عفرا بعفويه: يدتيه غاليه وهل بيتها...
ذياب يضحك بصوت عالي: شمعنى هاييل اول ناس تطرينهم..؟
عفرا احمرت وضربت ذياب بخفه على جتفه: والله ما خبرك منو ياي ( وشهقت يوم تذكرت ليش يتخبرها) اه عرفت بعد ليش روح روح والله ماقولك..
وسارت عنه صوب يدتها وهو يضحك عليها...
حمده تبتسم: خلصتي سوالف...؟
سلمى: حشا ياهالعفرا مخبله بالكل...
وبكل ثقه يلست عن يدتها: يدوووه احبج..
ام خليفه بطرف عينها: خل عنج الخبال بتغدين حرمه ودري عنج سوالف وخبال البنات..
عفرا: بعدني للحين ما انخطبت رسمي يا يدووه..تبين تعيشيني برسميه من الحين..؟
ام خليفه: اثجلي جدام الحريم..
حمده تضحك: ويييو هزبوها..
عفرا بطرف عينها: الحين ابوي محد ولا محد بيروم يقرب مني..
ام خليفه:محد مسوبج جي الا هو...
سلمى: فديتها بنت اخوي شفيكم عليها..
عفرا: عمووه ان يبتي بنت سميها عفرا الله يخليج..
سلمى: ان شاء الله..
ام خليفه: لا ان شاء الله ولد..سلمى ما تييب الا عيال شتبى بالبنات وويع الراس..
عفرا: خلصتوا اللي عليكم...؟؟
ام خليفه: هيه خلصنا وين امج وابوج؟
وان ام عفرا وخليفه داخلين الصاله..
ام خليفه: فديتك توني اتخبر عنك...
خليفه: وين عبدالله ما يا؟
ذياب: توني متصلبه يقولي في الخط ياي الحين...
خليفه: زين عيل يالله ذياب ما سبحت بنسير نلحق الصلاه..
ساره:عفاري يبتي الحلو من البيت..
عفرا: هيه طرشت جينا تشل الباقي حمده ماشلت غير صينيه وحده والباقي طرشنا له البشاكير...
ام خليفه: حطيتنه في المطبخ وقسمتن مال الرياييل بروحه والحريم بروحهن..
ساره: هيه يا عمتي خلاص...قومي عفاري بنشيك على الحجره العوده ونشوف شو زهبوا..
عفرا تنش: اوكي...
وسارت عفرا وامها يشيكن على غرفة الضيافه يشوفن كيف كل شي زاهب وحمده يسلت عند عمتها سلمى..والرياييل طلعوا للصلاه...
ام خليفه: وين سمر ما شفتها؟
حمده: مادري توني ييت من بيتنا ما شفت حد...
سلمى: تتعدل فوق من الصبح مب طايعه تخلي حد يربط شعرها...وهي متلعوزه وياه..
حمده: فديتها عمتيه حصه هي الوحيده اللي كانت تلف شعرها...
ام خليفه: والله ولهت على بنتي...
سلمى تبتسم: حليلها نوره كانت تبغي تيي بس ريلها والعيال ما طاعوا وظهروا كلهم دبي..
ام خليفه: مسود الويه..
سلمى: فديتها نوره والله اتصلت بي وتعذرت وقالت لي بتتصل بحصه تتعذر منها...
ام خليفه تنش: قومن قومن يالله صلاه قبل يوصلون العرب...
ونشت ام خليفه سايره حجرتها والبنات سارن يتوضن عشان يصلن الظهر قبل يوصولون المعازيم...
.
.

اما في صالة بيت بو راشد اللي كانوا زاهبين ويالسين في الصاله يتريون الرياييل يوون ياخذونهن عقب ما يردون من الميلس....كانت خلود وام راشد يالسات في الصاله مخلصات وكل شي...
ام راشد: هاتي المدخن يا ليلى...
ليلى اللي نازله من فوق كانت مشرقه اليوم وشكلها يشع بالامل...ماسكه ايد شيخه اللي لابسه تنوره قطعتين تتسكر على ينب...وقميص بحري فاتح وشكلها صدق ستايل شي جنان..رقه واناقه وانوثه...وجمال طبيعي مع براءة يهال..غير الشعر الناعم الملتف طبيعي من الاطراف الاخيره له واللي ما يتعدا اذنيها..
ام راشد ابتسمت: فديتها تعالي تعالي شواخي..
شيخه تتمخطر وتيلس بدلع عند يدتها: انا حلوه..
ام راشد تضحك: يالله يا بنتي كيف كبرت راسج هالعمه..
ليلى يايبه المدخن وتدخن شيلة امها: يحقلها يا امايه حلوه حلوه..
ام راشد: فضحتنا ليلة العرس في بيت مبارك..تقول لحمد مابغيك عيب..ولا عبدالله عادي..
ليلى وقلبها يدق بقوه من طاري عبدالله مب حب بس ارتباك: هيه..مادري..!!
شيخه تير ايد ليلى: امايه سويلي مثل يدووه..
ام راشد: عيب انتي بنت ما تتدخنين هذا بس للحريم والرياييل.
ليلى بطرف عينها: حتى البخور بتقسمون فيه..قربي قربي فديتج بدخنج..اصلا انتي الدخون ياخذ من ريحتج ويقول بس...
وشيخه قربت من امها ورفعت حواجبها تغايض ام راشد..
ام راشد مبتسمه: والله هالبنت مب سهله..
ليلى: طبعا طالعه علي..
شيخه: هذا بس مالنا انا وامي انتي لاء..
ام راشد: برايج خله لج انتي وهي..يا ساتر لسانج يوصل الشارع العام من طوله..
شيخه تمط قميصها: شوفي شوفي انا لابسه ثوب يديد وحلو انتي ما عندج..
ام راشد: خله لج مابغيه هالثياب اللي للركب ما نبغيها..
ليلى تضحك وتناول خلود المدخن: يا امايه بسج حاطه دوبج ودوب البنت..
ام راشد: الا اقولج منو عازمين بيت عمتج؟
ليلى: امم نحن وبيت سلامي وبيت عمتيه وعيالها ناصر وفهد..وعويش ختيه وبنات بو خليفه الكبار..
ام راشد: بس شمسه هني من قبل عرس اختها..
ليلى: لا ترا واحد من عيالها رد من برا ظني اسمه بطي..
ام راشد: هيه ومنو بعد..
ليلى: بس وقوم حصه..
دخل راشد ومبارك وحمدان في هاللحظه...
راشد: هاه خلصتن؟
ام راشد: من ساعه نترياكم...
ليلى: يالله عاد مب حلوه نوصل اخر حد...
شيخه: متى نلوح متى...
مبارك: شعندها هاي محتشره..
ليلى: خلها تحتشر من حقها..
راشد: يالله خلاص قوموا بنطلع..
مبارك: اليوم بتخطبون رسمي لحمدان ..؟
راشد: لا بأجل الموضوع لفتره شوي على الاقل لين ما يكمل حمدان عشرين سنه...
مبارك: هم رضوا؟
راشد: خلاص البنت محجوزه له بموافقة ابوها...
ليلى اللي صدق استانست ماقاومت رغبتها تقوم تلوي على حمدان وام راشد باركت له وخلود بعد استانست ويا ولدها يلوي عليها وهو مستانس...
شيخه: يالله نلوح يالله..
راشد يضحك: اوكي يالله ركبن بنسير...
راشد: ليش مايبت العيال يا بو عمر..؟
مبارك: والله ما رضوا ييون بوظبي كل حد لاهي باللي عليه..
ام راشد: عاد اخوك لا تخبر اعذاره زاهبه..
مبارك: هاي امايه ما تحلى لها قعده دون لا تحش فيني..ما تشوف عويش بنتها..
ام راشد: عايشه فديتها حد رمسها تيي.؟
ليلى: هيه انا كلمتها قالت بيي بس على طول بيروحون بيت مبارك ما بيمرون هني هي وعيالها وريلها..
وركبوا كلهم سايرين بيت بو خليفه اللي كانوا عازمينهم على الغدا على شرف حمد وحصه عقب ما ردوا من الشمال..
.
.
وفي شقة ناصر اللي توه رد من الصلاه دخل الشقه وشاف حرمته توها مخلصه صلاه ويالسه تلف شعرها وهي شبه مخلصه..فعق كندورته وبدلها بوحده ثانيه وتعطر وتسفر...لبس ناصر ثوب اسود ولبس غتره بيضا وعقال..وكان شكله جنان عذاب...وقف جدام التسريحه يعدل نفسه ويتعطر...ويعقم كندورته..
ناصر: هاه اروى خلصتي..
اروى اللي تربط حزام تنورتها: هيه خلصت..اقولك نصوور خالتيه بتيي ولا لاء؟
ناصر: صبري بتصل بها الحين..
واتصل ناصر بفهد ...فهد اللي خطبت له امه بنت من اهل اروى مب صغيره ولا كبيره..باقي لها كورس ووتخرج من جامعة الامارات وبيعرسون الصيف الياي...
ناصر: مرحبا فهد.
فهد : اهلين هاه طلعتوا ولا بعدكم؟
ناصر: والله على وشك..
فهد: والله نحن طلعنا انا والوالده الحين في الدرب..
ناصر: خلاص نتلاقى في ميلس بو خليفه ان شاء الله...
فهد: على خير ان شاء الله..
صكر فهد عن ناصر اللي يلس على الشبريه يتريا اروى تخلص مكياجها..وهي يالسه جدام المنظره وتتجحل..
ناصر: تعرفين منو عازمين؟
اروى: هيه اهلك وقوم خالك الله يرحمه..وهذيلاك ماعرف اسمهم...اللي ماخذين بنت راشد..
ناصر: هيه قوم احمد بن سعيد..
اروى: يمكن..
ناصر: زين والله...
اروى: فهد قال بيي؟
ناصر: قاله هيه..هو وامايه..
اروى نشت تدور عباتها وشيلتها: يعني خلاص ولا بعدهم..
ناصر يبتسم: لاء خلصوا...شو هالكشخه؟
اروى مستانسه: عيبك؟
ناصر: حلو والله جنان ...اصلا انتي حلوه ما يحتاي تسوين شي..
اروى احمرت: اووه ما تحمل..
ناصر يمد ايده لها: يالله نطلع..
اروى: اصبر بتغشى...
ناصر يضحك: اووه ..!! اوكي نسيت من شفتج وقفتي..
اروى مبتسمه: بس عاد مب لهالدرجه..
ناصر: زين مشكله اللي ما يصدقون..
اروى: زين يالله طلعنا....
وطلع ناصر ويا اروى السياره بيسيرون بعد بيت بو خليفه اللي كانوا من اول المعازيم رايحين له...
.
.
وفي الصاله اللي جدام الباب..كانت فاطمه اول وحده واقفه تترياهم يطلعون اما سلامه اللي كانت تتمخطر ما تمشي على حسب اوامر احمد الا بكل خفه واتزان عشان البيبي اللي ياي بالدرب ولوع احمد بجبود هل البيت من كثر الاوامر والتوصيات...
فاطمه مضيجه: احمد شو هالحركات عيب عليك ما تشوف الساعه..
احمد: سكتي انتي اذا تحرطمتي بتيلسين هني..
ام احمد: قصورك مسود الويه اخلي بنتي بروحها في البيت..
فاطمه: فديت روحج انتي محد يسواج يالزعيمه..
احمد: ايوه زعيمه..مسوين لي في بيت حلف..بخبر عليكم امريكا..
ام احمد: مسود الويه عرست وتنكرت...
سلامه: انا لحد ييب طاريي اذا ولدكم خربان فهاي مشكله جديمه لكن لا تتعلثون بي انا..
احمد: ايوه وانتي بعد وياهم..روحي روحي ماباج..ييبي ولدي وعقب سيري انضمي لهم...
سلامه تضحك: انضم لهم ليش؟ عصابة الرداء الابيض مال بوكيمون..
فاطمه تهز راسها بسخريه: يهال والله..
ام احمد: يالله يااحمد فضحتنا في الناس اخر من بيوصل نحن..انت وحرمتك ساعه تتمخطرون..
احمد: وليش انتوا زعلانين..
ام احمد: حرمتك للحين ما خلصت شهرين وانت مسوي الهوايل في البيت...
سلامه تبتسم: والله هالريال بيذبحني عمووه..اخافه في الشهر التاسع يسوي لي سياره في البيت..
ام احمد: مب بعيده يا بنتي..
احمد: عادي اسوي لج طياره ..
فاطمه: وين بتطير عاد من كبر البيت..
احمد: لا طياره ورقيه..
يضحكون على سخافة احمد...
احمد: يالله ازقروا الشغاله حليلها مابتم بروحها في البيت..
سلامه بطرف عينها: وانت شعليك يا حنون متعب عمرك..
نقع احمد من الضحك عليها: يالله يالغيره شو تسوي..
ام احمد: سيرن زقرنها تيي ما بخليها في البيت بروحها...
احمد يغايض: حليلها خلوها تركب جدام..
بطلت سلامه عيونها ويلست على الكنب: والله ماروح..شوفي ولدج عموه وقسم بالله بزعل..
ام احمد: يااحمد يوز عن حرمتك..تغايضها بالبشكاره..
فاطمه: اوووه شفيكم يالله نطلع وقسم بالله مليت..
ام احمد: يالله فاطمه مشي جدامي لو تمينا نسمع سوالفهم ما حضرنا بيت الناس الا الاسبوع الياي..
فاطمه: اووه عاد يالله خلصونا مب حاله ..
سلامه: شعندج انتي محتشره...عفاري وكل يوم تشوفينها في الجامعه شو هالحشره..
فاطمه مرتبكه: امم ..م...مب محتشره انتي شعندج فضيحه تأخرنا على الناس...
ضحكت سلامه...
احمد: اصلا مفروض انتي ما تروحين ..بنت شلج بالطلعات كل يوم والثاني طابه بيت الناس..
فاطمه: يا غبي ادور لك بنوته صغيره..
سلامه تفج باب السياره معصبه: فطوم يوزي عن ريلي..
فاطمه تبتسم بلؤم: اخوي قبل يفكر يخطبج..
ام احمد: فاطمه سكتي عن حرمة اخوج..يا ويلي شو هاليهال اللي الله بلاني بهم..
احمد: نستعيد ذكريات الطفوله...
ووخى يدخل عباة امه السياره ويصك وراها الباب وتريا سلامه تيلس وعقبها صك الباب وراها هي الثانيه وخلى فطوم اللي تعمدت تخلي الباب من جهتها مفتوح...
فاطمه: شمعنى انا...
احمد: ما ناقصني غير هالويه الخسف اصك وراه الباب..
سلامه تطالعها وتضحك: والله تهزأت..
فاطمه: مب مشكله من زينكم يالغربان..
ام احمد: نزلني يااحمد والله انكم استخفيتوا وقعدتوا..متى بندخل على العرب...؟
احمد: يالله يا امايه شكثر مستعيله..لو العروس هالخسفه فطوم ما سويتي جي..
فاطمه: خسفه حرمتك..
سلامه: هو سبج ليش تسبيني..
ام احمد كانت ضايعه وسط سوالفهم وهواشهم الاهبل اللي ما يخلص..بس له طعم حلو لان نواياهم كانت بمزح ومحد فيهم يشل في خاطره على الثاني..
وتحركت سيارتهم وراحوا بيت بو خليفه اللي كانوا ضمن معازيمه بحكم علاقة احمد العمليه بخليفه وحكم الزماله اللي صارت من بينهم...وبحكم قرابة سلامه لبيت بو خليفه من صوب ابوها...فكانوا ضمن الاهل اللي معزومين اليوم في ميلس بو خليفه...
عقب ما تيمعوا كل العوايل في بيت بو خليفه وما بقى حد ما وصل غير اهم الشخصيات اللي مسوين العزيمه عشانهم... وقفت سيارة حمد في الحوش وكانوا اخر ناس واصلين...هو وامه وحصه اللي مستانسه ويا ريلها. شهقت ام حمد يوم شافت السيايير كلها برا وعرفت انها اكيد اخر من بيوصل..
ام احمد معصبه: شوف يا حمد شو سويت بنا اخر من يوصل الحين انا كيف بدخل على الحريم فشلتني يا ولدي الله يهديك...
حمد: لازم كبار الشخصيات تتأخر شوي وما يلتزمون بمواعيدهم..ما تقرين جرايد امايه وتشوفين قوم المجلس الوطني...
ام حمد معصبه: اتمصخر علي مسود الويه..(وحاولت تفتح الباب بس حمد كان قافلهن) حمد فج الباب لا بارك الله في ابليسك...
حصه تضحك: حرام عليك حمد افتح لها الباب تبغي تنزل...
ام حمد: يا حمد استح على ويهك وين بودي ويهي من عمتك والحريم..
حمد يعدل سفرته: اذا حد بس رمش بعينه وقالج شي اتصلي بي بنفدهن كلهن..
حصه: لا والله امايه وخواتي وليلى لا تعدهن مع اللي بتنفد..
فج حمد الباب وامه نزلت على كثر ما تحرطمت عليهم انهم موصلينها هالحزه اخر حد واصل للبيت اما حمد تم ويا حصه شوي في السياره يكلمها وعقبها يت بتنزل بس مسك ايدها...
حصه: هاه شو؟
حمد مبتسم: لا طولين بتوله عليج...
كان شكل حمد غير وهو يقولها انه بيوله عليها...وهي ما حست بعمرها وما تدري ليش انفاسها بدت تتوتر..وهو لاحظ انها ارتبكت...قلبها كان يدق بقوه عجيبه ما يعرفها اللي جرب الحب وعاشه...ما قدرت تسوي شي غير انها تنزل راسها وهو ابتسم وبند السياره وفج عنه حزام الامان بينزل...
حمد مبتسم بعذوبه: اوكي؟
حصه وقلبها يدق طبول بس نزلت راسها: ان شاء الله..
حمد يبتسم ومسك ايدها: اول ما ازقرج طلعي على طول..
حصه تبتسم وهي تحس خلاياها تخدرت: اوكي خلاص..
حمد يغايضها شوي: على طول تفهمين؟
حصه مبتسمه: قلت لك اوكي بس عاد..
حمد: يالله انزلي ما بنطول..ماحب هاللمات اللي تييب لي الصداع..
حصه: خلاص ولا يهمك اتصل بي العصر اوكي..
حمد: ان شاء الله...
فج ايدها ونزلت وهو نزل سار للميلس اما هي فراحت الصاله والارض اللي تمشي عليها مب الارض اللي مشت عليها قبل..ولا القلب اللي بداخلها هو القلب اللي عاشت به الشهور اللي طافت..حصه تعشق تراب حمد وظلت عليه لين مانهزم لحبها وصارت له هواه اللي يتنفسه وحبه اللي بيعيش عشانه..وشاف في حصه اللي عمره ما شافه في جواهر وهو اكيد قلبها الوفي اللي ما يخون...
من وصلت حصه للباب قاموا كلهم يسلمون عليها...ويلست شوي ويا قوم امها وعقبها سارت عند خواتها وليلى وسمر وبنات خليفه...
سمر يالسه عدال حصه: حصووه تولهت عليج..
حصه مبتسمه: والله انا اكثر..مع اني محصله حد ينرفزني بس بعد ماصبر عن مناقرج..
ليلى تضحك: هاللي ولهتي عليها فيه بس..؟
شمسه: ما تكبر حصه صدقوني ما تكبر..
سلمى: ياهل وحليلها..
حصه: مبروك عفاري..
عفرا مبتسمه بخجل: الله يبارك فيج..
سلامه: الخايس حمدان ما خبرني تصدقين ان ابوي قالي البارحه عن السالفه ولا حمدان ولا قالي شي وهو كم مره شايفني..
عفرا بثقه: اسرار زوجيه..
نقعوا عليها من الضحك...
حصه: من الحين مسودة الويه؟
ليلى: وانا اقول ولد اخوي مب من شوي ذايب..
عفرا احمرت: اوووه اووه بس عموه عاده جي تبالغين...
ليلى تطالع سلامه: وانتي الثانيه ما شاء الله حامل وما تخبرين حد..
سلامه ارتبكت واستحت: منو قالج؟
ليلى: ام احمد خبرت امايه..
شمسه مستانسه: مبروك تستاهلين والله..
سلامه: على شو مبروك على المسؤوليه وويع الراس..
حصه: اووه هالمفعوصه مب سهله تبغي تعيش مستقله شوي..
عفرا: على بالها في اوروبا..حبيبتي من تعرسين لازم تبرمجين نفسج تيبين كل سنتين واحد..
سلامه خافت: فال الله ولا فالج..
ليلى تضحك: حرام عليج عفرا زيغتيها...
حصه: وين عفرا خلاص خبره بالعرس..
عفرا فجت ثمها: حرام عليج عمووه والله اسولف بس...للحين خطبه كلام حتى رسميه ماشي..
حصه: بل عليها مستعيله الحرمه..
حمده: الحمدلله حمل وانزاح عن دربي الباقي على الخطاطيب الحين..
سمر: ابى اقولكم نكته..
ضحكت حصه وهي تقرب سمر منها: قولي والله ولهت على نكتج...
سمر: في ضابط يسأل واحد جتل حماته..قاله الضابط شو اسمك؟؟ قال المتهم: ماحب اتفاخر اكتب في السجل فاعل خير...
حصه تضحك: يا ويلج لو تسمعج عمتي...
ليلى تضحك: والله لو يسمعنج العياييز بتروحين فيها..
سمر: ليش شو قلت انا؟
شمسه: حليلها اختي شدراها بالدنيا..
عفرا: خلها بنكتها هاي بتودينا في ستين داهيه..
حمده: حصه انتي وين الحين ساكنه في بيت يدي بو حمد ولا الشقه؟
حصه: لا انا الحين في بيت عمتي وان شاء الله من اخلص ديكورات البيت بعزمكم كلكم بيتنا...
ونشت حصه...
شمسه: وين وين؟
حصه تبتسم: ابى ايلس شوي عند ليلى...
فاطمه قربت من عفرا تسولف لها وتاخذ منها شوية علوم عن سكان الدار..وعفرا كانت فاهمتنها عدل وعارفه سوالفها...اما سمر فتمت ويا ليلى وحصه وسلمى وحمده..وشمسه قامت عند الحريم الكبار..
ليلى بصوت واطي: شو اخباركم..؟؟
حصه وابتسامة حب ورضا واضحه على ويهها: اللي اتمنى..
ليلى مستانسه: الله يوفقج والله فرحانه لج من قلبي..
حصه تبتسم: اممم عبدالله يمكن ييكم الاسبوع الياي..
ليلى وقلبها يدق بعنف ما تدري خوف ولا مستحى بس ما ردت..
حصه تغمز لها: اونج تستحين يالله عاد ربينا ويا بعض درسنا وتخرجنا واشتغلنا ويا بعض..قربنا نعنس ويا بعض..(وتبتسم) خلنا نعرس قريب من بعض ونكمل حياتنا ونربي عيالنا مع بعض..
ليلى بلعت ريجها "عيالنا!!!" بس بسرعه انفرجت بابتسامه امـل: اكيد...وبتييبين ولد حليو شو بتسمينه؟
حصه: حمد.!! ما عندي اغلى من هالاسم..
ليلى تبتسم: اوكي انا بييب بنت وبسميها حصه..ونزوجهم لبعض..
حصه تضحك: بس لا تنسين انا ما بسفر ولدي برا وبخليه يكبر ويا بنتج عشان يحبها من يوم يومه وما يشوف غيرها..
ليلى تضحك من خاطرها: تتفادين الماضي هاه..؟ مسودة الويه..
حصه: وشيخه بتعنس محد يبغيها لان وزنها بيكون على هذيك الايام بالميات..
ليلى بضيج: هبي هباج الله..قولي ما شاء الله..فديتها بنتي كل الخطاطيب بيوونها بس ما بقبل باي حد..غير اللي يطيح قلبها..
حصه: بنشوف...
ليلى: صدق حصووه مستانسه؟
حصه وقلبها يدق بقوه: ما تتصورين سعادتي كيف مستحيل تتخيلين....
ليلى وهي تحس براحه: الله يتمم بخير..
حصه تبتسم لها بثقه ان الياي بيكون اجمل...
وقبل حد منهن تبدا بالكلام كانت البشكاره داخله تناديهن للغدا عشان يحولن صالة الضيوف في الجهه الثانيه....
..............
في ميلس بو خليفه ... وبعد ما سلم على الرياييل كلهم وحصل هزبه من عند عمه بو خليفه ليش انه متأخر .. ابتسم حمد بكل هدوء وراح صوب الشباب ذياب وسعود و عيال شمسه وربعهم ... كانوا يسولفون ويضحكون ... وبالرغم من الشك اللي في داخلهم بنوايا حمد انه ياي يضيج عليهم رحبوبه وقعد عدالهم ..كان وياهم بطي..بطي اللي كاره حمد حده ومب متصور كيف بيتعامل مع هالانسان اللئيم وما ينسى موقفه وياه قبل سنه يوم كانوا رادين من بلجيكا..وكيف خرب عليه اجازته...

ذياب: هلاااا بالنسيب وولد العم
حمد: هاه شو الكليه
ذياب: لا اتخبر وناسه ...
حميد: هاهاهاها اول واحد يقول وناسه على الكراف بعد الحجز
سعود: يخاف يطيح في لسان خالي حمد بعدك ما تعرفه
حمد: (يخز سعود) شو ما يعرف مسود الويه
سعود: لا عمي افااا عليك اقصد حرصك وخوفك على مستقبلنا وسلامتنا وسنعنا واخلاقنا العالية
حمد: هيه على بالي شي ثاني ... تراني المثل الاعلى للجميع في هاي العيله
بطي: هيه امحق مثل
حمد: (عاقد حياته) شو قلت
سعود: ماشي ماشي عمي امدح فيك
حمد: خل عنك اللواته ... اخبار دراستك انت واخوك
سعود: عن نفسي تمام التمام ... لين الحين المعدل ما نزل عن الامتياز
حمد: ريال والنعم فيك تبيض الويه ... وانت يا عريف زمانك
بطي: انا بخلص مدرسة وبيي دبي ادرس في الجامعه الامريكيه مليت من الهياته من مكان لين مكان لاعت جبدي
حمد: زين بعد بس شد حيلك عاد

قام حمد عنهم بعد ما شاف حمدان ياي صوبهم كان قاعد عند ابوه واحمد وخليفه يتكلمون في الشغل ... بس يوم انهم جلبوا الكلام سوالف ثانيه رد عند الشباب ... اللي استلموه تعليق ليش انه قاعد مع الشواب

ذياب: هاه البزنس مان خلصت من الشواب
حمدان: ان ما خبرت عليك عمي خليفه .. شواب هاه شواب
ذياب: من الحين بعد عمي ... اقول انا بعد ازقرني عمي اوكي ولا ياويلك محد بيجرب بك

انحرج حمدان ... والباقين ضحكوا عليه وحمد راح صوب ناصر اللي كان قاعد ويا مبارك وفهد يسولفون ... ابوه قاعد ويا بو خليفه مع الشواب من جهه ثانيه

ناصر: هلاااا بالمعرس شحالك
حمد: الحمدلله
مبارك: خلصت من اليهال .. ضيجت بهم ولا بعدك
فهد: خله يحس نفسه شباب معرس يديد من حقه
حمد: شعندكم انتوا ... بس ياللا عاد ... اقول ناصر اخبار الشغل
فهد: بدينا عاد .. اخبار الشغل وما الشغل ... يابوي يايين نحن نفري عمارنا لا تغثونا بسوالف الشغل
ناصر: لا تخبر يا حمد .. المكان من عقبك معفوس بس الوضع تحت السيطره
حمد: هاهاهاه زين يوم انه تحت السيطره ... اسبوع وبرد لكم ... ما قلت لي رشح لك دانيال الاسماء اللي بتد مكان البنات في الادارة
ناصر: عندي ليست ... بس بترياك وبعدها بنشوف الانسب
حمد: خلاص على خير ان شاء الله

هنيه عبدالله يا صوبهم وبعد ما سولف شوي شل حمد عنهم وراح على صوب وياه ...

حمد: شعندك
عبدالله: باخذ موعد اليوم من راشد عشان نروحله ويا الوالد وتكون ويانا
حمد: ليش
عبدالله: عن الحركات عاد .. شو ليش بعد ... بنروح نخطب عندهم
حمد: هيه ... ومتى نويت ان شاء الله
عبدالله: بالاثنين
حمد: ذياب ما بيكون موجود ... ما بترياه لين الخميس
عبدالله: ياللا عاد .. الا هيه خطبه هب عرس بترياه
حمد: خلاص ماعليه

شوي الا وبو خليفه وقف وكلهم وقفوا معاه وراحوا ايتغدون في غرفة الطعام .... والشباب ورا ضحك وسوالف ...
.
.
بعد ما تغدوا الرياييل وردوا الميلس .. طلع حمد من عندهم ولف من ورا البيت صوب المطابخ واتصل في حصه ... بعد مارن رنتين ردت عليه حصه وهو يسمع حشرة الحريم عندها

حمد: ياللا طلعي
حصه: (شهقت) حمد لا شو الحين .... صبر لين بعد صلاة العصر على الاقل
حمد: انا شو قايلج قبل لا تنزلين من السيارة
حصه: ياللا عاد حمد خل عنك هالحركات الحين
حمد: زين طلعي من الباب اللي صوب المطبخ شوي
حصه: ليش شو تريد
حمد: طالع ... اقولج طلعي
حصه: حمد عيب وفضيحه وين اطلع
حمد: حصوووه قسم بالله اذا ما طلعتي يا ويلج ...
حصه: حمد تعوذ من ابليس ورد الميلس
حمد: والله العظيم اذا ما طلعتي بروح وبخليج هنيه زين

نشت حصه ووايجت من الباب اللي صوب المطبخ وحصلته واقف ابتسمت ورد لها الابتسامه لو انه كان معصب عليها

حمد: مرة ثانيه من اقولج طلعي تطلعين مفهوم
حصه: ان شاء الله ... شو تريد الحين
حمد: ماشي بس كيفي ... حركات
حصه: (تتقمص دوره في الوغاده) قول قول ولهت علي عادي
حمد: صدق ما عندج سالفة ردي ردي داخل ابرك لج

ضحكت حصه ويايه بتدخل بس قبل لا تدخل سمعت صوت عبدالله يزقر عليها فردت سلمت عليه ...

عبدالله: روحي داخل طرشي شيخه بنت سيف
حمد: وين بتشل البنيه الميلس عند الرياييل
عبدالله: لا ياخي بلاك ما بوديها الميلس بشوفها بس
حصه: ما بطيع تفج
عبدالله: بوديها الجمعيه وبردها

دخلت حصه وهي تضحك على اخوها وريلها .... وحمد رد الميلس يوم ما قدر يقنع عبدالله يرد وياه ... اما عبدالله فيوم طلعت له شيخه لوى عليها وشلها بيوديها الجمعية ... ركبها السيارة وطلعوا هوه وياها.....

طلعت شيخه ويا عبدالله اللي صارت له نظر عين وقلب...شيخه اللي على ايدينها فتحت باب امل كبير في عيون عمتها ليلى اللي ضحت لها بالعمر كله..وقبل لا تكبر وتفهم وتعرف هالانسانه شو سوت عشانها وكم كثر ضحت عشان سعادتها...ردت لعمتها الجميل بوقت مبكر ومبكر جدا...شيخه فجت لليلى باب امل كبير من صوب عبدالله اللي اكيد بيسعدها ولو عاش الماضي داخله..لان كل واحد منهم مر بتجربه خسر فيها نصه الثاني..والمجروح ما بيحس به غير اللي جريح مثله...
ليلى اللي تحملت هالسنين اللي طافت كلها وقررت انها تكمل باقي حياتها مثل ما بدتها بتضحيه للي مافي في القلب حد يسوى غلاها وهي بنت اخوها شيخه...الله ما عذب هالانسانه كثر ما هي متعذبه وارسلها في قمة ضعفها الانسان المناسب في الوقت المناسب...
مرت الايام على هالبشر مثل سحابة صيف عبرت حياتهم بشكل سريع وهم شافوها بطيئه جدا..كرهوا فيها انفسهم واعتقدوا ان الحياه تتوقف عند كل مطب وما قدروا ابدا ان كل شي شده وتزول..وكل ضيق بعده فرج وكل كربه وراها ابتسامه وفرح...الحياه مب محتاجه غير ابتسامه رضا وكلمة الحمدلله والصبر والثقه في الله اللي ممكن تولد الراحه مهما جل المصاب وعظمت الكرب..
مشاكلهم كانت سحابة صيف مرت في حياة ذياب في لحظات طيشه وبعده عن دربه الصحيح وعن الاخيار اللي ممكن كان قبل انه يرافقهم..وسحابة صيف في حياة سلامه اللي ابتدتها بخطأ وانحراف وبحث عن مفهوم الحب الخاطئ في المكان الخاطئ...وسحابة صيف في عيون حصه اللي غفرت لحمد كل خطاياه وما قدرت تسامحه على الماضي..وفي لحظه حب صادق واعتراف بالمشاعر وتنازل من الطرفين ينولد من بينهم الحب اللي ما تشوبه الشكوك ولا العواطف الزائفه...
سحابة صيف مرت على الجميع حلوا فيها مشاكلهم ..البعض بطريقه جدا متأخره والبعض الاخر بصبر وثقه وايمان عميق بان الله اذا مااخذ اعطى ضعف ما اخذ...
الحياه صعبه في عيون اللي يلبس نظاره سودا قاتمه..تحجب عنه الرؤيا وتمنعه من التفاؤل والامل..بس حلوه في عيون الواثق من قدرة الله وعطاءه اللامحدود..وبجي يكونوا الناس قسمين..ناس تعيش الحزن بكل تفاصيله وتمنع نفسها من العيش بشكل غير اللي رسمته لنفسها...وناس تعيش الحب والامل والتفاؤل مهما كبر حجم المصاب..وهالناس هي اللي تكون المصايب في حياتها اشبه بسحابة صيف....

قال تعالى" فاصبر على ما يقولون وسبح بحمد ربك قبل طلوع الشمس وقبل غروبها ومن ءانآئ الليل فسبح واطراف النهار لعلك ترضى {130}" سورة طه


وقال عز وجل "فكفى بالله شهيدا بيننا وبينكم ان كنا عن عبادتكم لغفلين{29} هنالك تبلوا كل نفس ما اسلفت وردوا الى الله مولـهم الحق وضل عنهم ما كانوا يتفرون{30} قل من يرزقكم من السماء والارض أمن يملك السمع والابصر ومن يخرج الحي من الميت ويخرج الميت من الحي ومن يدبر الامر فسيقولون الله فقل افلا تتقون{31}" سورة يونس

وقال الرسول صلى الله عليه وسلم في حديث قدسي" انا عند ظن عبدي بي، وانا معه اذا ذكرني، فإن ذكرني في نفسه ذكرته في نفسي، وان ذكرني في ملأ ذكرته في ملأ خير منهم، وان تقرب الي شبر تقربت اليه ذراعا وان تقرب الي ذراعا تقربت اليه باعا وان اتاني يمشي اتيته هرولةً" صحيح للبخاري..
...................
السموحه عالقصور ... وانشاء الله عجبتكم قصتنا

وشكر خاص لاخوي البدوي الحبوب ...

اختكم
الغلا

[البدوي الحبوب]

اشكر كل من تابع معنا هذه القصه

وشكر خاص لاختي الغلا واقولها ماقصرتي والله يعطيج العافيه

تحياتي لكم والله يعطيك العافيه واتمنى مانكون قصرنا معاكم

والسموحه

[الرايقه]

بصراااحه القصه حلوه وااااايد وذوقكم ماشالله راائع جدا لانكم اخترتوا هالقصه المفيده والله عشنا كل كلمه فيها فرحنا وتوترناا وعصبنا وحتى صحنااا حسينا ان اللي في القصه نااس نعرفهم من سنيين وما انكر اني حبيت الابطال ....
البدوي الحبوب ..
الغلاااا ...
ما قصرتواا بذلتوا مجهوود كبير تشكرون عليه ما حرمتونا من الاجزااء وكنتوا اتنزلونها اول باول .. (( اتريا قصه جديده ))
يعطيكم الف عاافيه ,,,

[البدوي الحبوب]

الله ايعافيج اختي الرايقه ومشكوره على تواصلج معانا

وبصراحه انتي بعد ماقصرتي وكنتي دوم اتشجعينا علشان اكمل القصه

تحياتي لك