المساعد الشخصي الرقمي

مشاهدة النسخة كاملة : راتبك --وين؟موضوع للنقاش


أسرار
02-03-2002, 12:44 AM
هلا والله موضعنا للنقاش هذا الشهر
الراتب والادخار

ماذا يعني لكم الراتب
ماذا يعني لكم الاستهلاك
ماذا يعني لكم الادخار
الزوجه تعمل والزوج يعمل وقبل نهايه الشهر الجيوب فاضيه--لماذا

الشاب يعمل وقبل المعاش التالي تلقاه مفلس 000000ليش؟

البنت تعمل وتستلم راتب مغري ------وليس في حساب الادخار شيء يذكر

الاسواق فاتحه فكها وكانها وحش كاسر والمغريات كثيرة
والتراف والاستهلاك سمة المجتمعات الخليجيه

لماذا نهرول لكل سنتر يفتح ولكل مول يفتح ذارعيه لنا

لماذا الاستهانه بالتوفير ولو مبالغ صغيره-----قد تكفينا الحاجه حين يصيبا حادث يحتاج مصاريف

لماذا نشعر ان رواتبنا لاتكفينا هل هذه حقيقه اما هيه قلة وعي وعدم تنظيم منا

البنوك تعج بالدائنين
السجون ايضا فيها ممن غلبتهم ديونهم وسجنوا

هل البطاقات الماليه لها دور في الاستهلاك اما انها تساعدنا تنظيم مصروفتنا




اخواني اخواتي -------------------ممكن مشاركتم وافادتنا

وطرح امور تساعدنا على االدخار والتوفير --------باسلوب منظم للاستهلاك ووعي جاد باداةر الاموال



من الاقوى الاستهلاك ام الادخار ---



في انتظار مشاركاتكم (معاشك وين؟)
(hi)
+*^^*ماريه*^^*+
02-03-2002, 06:31 PM
امممممممممممم موضوع حلو محرج اسرار(يعني لام تطلعين الفضايح)

شوفي اذكر اول ما توظفت معاشي حليله ماادري شو فيه يخاف مني ... مااري والله وين يروح وين ينخش .... :confused:
المهم انه اول خمس ايام بحححححححححح طار اكون مفلسه :D
صج صج كنت مسرفه واشتري بالهبل وامي مسكينه بح صوتها واهيه تنصح فيني وانا اقول لها خليني بس هل الشهر ... يجي الشهر اللي بعده اوه بس هل الشهر ..... وهلم ما جرا
الحمدلله أخيرا استفدت شويه من معاشي وصار نصه يروح لاقساط السياره ومن يومها وانا شويه (يعني اقل من وايد بشويه) اقتصاديه وصرت احس بقيمه الفلوس اللي اتعب علشانها
فن اداره الميزانيه والفلوس بصراحه صعب جدا الواحد اللي متعود على الاسراف ما يحس بروحه الا لما تخلص فلوسه وفي ناس تضع على عاتقها فوق ما تتحمل علشان المظاهر او لشراء اشياء غير ضروريه او انها تضيع نقودها من دون ان تستثمرها ....
يعني الافق عندهم يكون ضيق ما يفكرون في المستقبل واذا العائله كبرت والعايل كبرت(مش مسرحيه) وكثرت مصاريفهم من وين راح يصرفون عليهم وهل بيظلون طول عمرهم تحت طائله الديون اللي راح تطلع روحهم لحد ما يوفونها
الحمدلله انا اجد نفسي الآن افضل من قبل بس بعد لازمني مهاره في صرف فلوسي وعدم تبذيرها والاهم ان اخطط لاستثمراها وما اعتمد على المعاش فقط مين يدري شو راح يصير باجر صح ;)

تسلمين اسرار موضوع رائع للنقاش ولي عوده بعد سماع آراء اخواني واخواتي

ماريه

(hi) (hi)
الرحـ2000ــال
03-03-2002, 01:23 AM
السلام عليج اختى اسرا
واشكرج اولا على طرحج لهالموضوع
وبالفعل هالموضوع مهم جد ا


وين ايروح الراتب
سؤال ما في حد يقدر ايجاوب علية بالدقة المطلوبة
لانه لو تحسبها انته تشتغل طول الشهر
واول الشهر ايروح تعبك هذا كله في ايام عدودة
وترجع من جديد تشتغل وتتري الشهر نهاية الشهر
ويستمر الحال على نفس الحال
بس لو كل واحد منا وضع له ميزانية معينه لمصاريفة
صدقوني انه بيقدر ايوفر ويستقر ماديا
بس يحتاج شيء من القوة والعزيمة


وعن نفسي انا عندي نظام مالي معين في حياتي
لاني كنت قبل ما اكون الحين استلم الراتب واصرفة
وفكرة فيها وحصلت عمري غلطان
بس الحين الحمدالله على كل حال
كل شيء اوكيه وبديت اشتغل اشغال خاصة فيني غير الشغل الرسمي
وكل يوم والحمدالله لله وضعي يتحسن افضل وافضل من قبل
وبديت اصرف مثل قبل واكثر من قبل لانه المعاش اسمه معاش
وهوة للعيشة بس


والمعذرة
الرحال
أسرار
07-03-2002, 03:27 PM
(hi)
ماريه عفيه عليج

التوفير يريح الانسان حين الحاجه
يعني قرشك الابيض ينفع ليومك الاسود:D

المهم ماريه -----------خبرينا التكنيك الي تستخدمينه

علشان نقدر نووووووووووووووووووووفر شويه :rolleyes:
أسرار
07-03-2002, 03:32 PM
الرحال
ماشاء الله عليك ياليت كل الشباب يفكرون هالتفكير
لانه لابد من اضافه موارد اخرى للدخل خاصة الشباب لان مسئولياتهم اكثر
ومتطلبات الحياة في ازدياد مستمر




(hi) الرحال ما تبا شركاء وياك في الاعمال الخاصه
الرحـ2000ــال
09-03-2002, 12:18 AM
والله مش غلط خلاص راس المال عليج
وانا بكون المدير
أسرار
09-03-2002, 07:36 AM
هلا الرحال

مشكور

يالله عطنا مشروع وبنبتدي فيه(hi)
باربي
10-03-2002, 12:04 AM
موضوعج حلووو

اول شيء خليني اشتغل
و يصير خير
بس انا مع فكره الرحال المعاش مهما كان كبير اخرتها معاش
برايي الواحد او الوحده تستثمر فلوسها
وتدخل في مشاريع مدرووسه

و تسلمين

مع اجمل تحياتي باربــــــي
+*^^*ماريه*^^*+
10-03-2002, 11:02 AM
شوفي اسرار
اول شي احاول دايما لما اسحب فلوس من حسابي
ما اسحب مبلغ كبير حتى وان كنت حاطه في بالي اني يمكن راح احتاج له
عارفه ليه لانه هل المبلغ مادامه طلع من الصراف الآلي راح اصرفه يعني راح اصرفه ... على اشيا احتاجها ولا على اشيا ما احتاجها انا عارفه نفسي مااحب الفلوس في يدي (وسخ الدنيا) ههههههههههههه :p

المهم كل مره لما احتاج شي ضروري جدا اروح اسحب ... وهل الطريقه نفعتني وايد وايد لانه كل ما افكر اني اشتري شي مش ضروري اتعايز اروح اسحب لي فلوس وبالتالي اهون ........ وهل الطريقه تعطيج احساس بالنقود اللي تصرفينها لانه كل مره راح تشوفين كم باقي من حسابج وكم انتي سحبتي وبالتالي تذكرج دايما بالميزانيه المطلوب انج تحافظين عليها وبمعدل الصرف عندج .....

ثاني شي احاول دايما اني اتشري اغراضي اول الشهر بس ...... لباقي الشهر يعني كل شهر اشتري بدله جديده او فستان ...... حذاء شنطه عطر مكياج وغيره وغيره

واذا كنت ابي زود أاجله للشهر الجاي ......... عارف في البدايه كان صعب علي خصوصا انه الاشياء اللي تدخل بخاطر الوحده وايد ........بس بعدين الموضوع يكون عادي جدا وبالعكس يمكن يمر شهر ما تشترين الا اشياء بسيطه...

هاي طرق بسيطه عندي يمكن مش مبينه على داراسات وطرق حديثه .... بس نفعت معاي :D

ماريه
الحالمة
10-03-2002, 08:47 PM
بصراحــة.. ما أدري يا أسرار.. بس أنا لين يومي هذا مش عارفه سالفة طيران الراتب.. تدرين.. أنا عندي مبدأ.. ما دام الفلوس ممكن تسعدني.. إن شاء الله عمرها ما توفّرت.. ولو أن السعادة اللي بتحقق لي اياها قصيرة.. بس الحمدالله..

بس بصراحة في جزء و الحمدالله منها يروح في مكان مضمون و الحمدالله.. مع تعاقدي مع أحد الجهات..
ما عندي أقصاد سيارة.. بس سيارتي دلوعة.. لازم ترفه عمرها بين فترة و فترة.. بس بصفة عامة أنا بقول لج.. أنا إذا ما سحبت من الآلي أول الشهر.. فتأكدي أن الراتب بيبقى لين آخره.. بس مع أول سحبة يطير.. و لين اليوم أتساءل وين يروح..
و الله ما أدري شو أقول لج..
بس ما دام أني أحس بأني مستفيدة و لو من بعيد.. صدقيني هذا يكفيني.. و تدرين خطة كل يوم.. الشهر الياي لازم هالكثر يضل بالتوفير.. ما ينتصف الشهر إلا و أشوف أنه ماله داعي من وجوده في التوفير.. المهم عندي البسمة ما تفارقني..


هذا.. و بصراحة رحــــــال و منكم نستفيد..
أبغي شـــوووووووووور.. و عطنا الخطا اللي لازم نمشي عليها...

بـــــابي..
لا تشتغلين.. ترى بتحنين لمصروفج الشهري.. خلج مثل ما أنت,,, أنا وايد أحن لذيج الأيام.. و بصراحة توفيري كان أكثر عشر مرات...



تحيـــــــــــاتي
الحــــــــالمــــــة
أسرار
11-03-2002, 10:57 PM
هلا باربي
انا معاك الراتب اسمه معاش يعني يصرف للعيش

ولكن الايحتاج منا العمل الخاص راس مال

من وين بيكون اساسه الا من الراتب
فعلشان جذيه نقول نظم نفسك
وراقب مصاريفك


علشان تقدر تزود دخلك بعمل خاص

شرفتينا باربي
أسرار
11-03-2002, 11:05 PM
;) ماريه خطيره

في فن التوفير

صراحه اذا الواحد ماراح السوق سلم على فليساته:D
أسرار
11-03-2002, 11:17 PM
الحالمه هلا
تعرفين انه كلنا لاينا نبا نوفر نقةل هالكلام اذا الفلوس بتريحنا نصرفها ونرتاح


ولكن الي عنده ميه بعيش والي عنده الف بيعيش

اذن الفرق في تنظيم مصروفاتنا

وادخار ما يمكن الاستغناء عنه لوقت الحاجه
(hi)

لابد من الادخار والصبر
تذكر المستقبل 000والمجهول
القناعه كنز لايفنى اي اذا اكتفيت من الشراء فانت ما ملكت ما في السوق
ومن الافضل ادخار الكثير

وهذا يقودنا لتقاعد آمن وشيخوخه مرتاحه ماديه

(h) شكرا لكم
الرحـ2000ــال
13-03-2002, 07:42 PM
عذرا اختى على تاخري في الرد
وبخصوص المشاريع
تراها وايد
مثلا ...
كل واحد يحتاج ملابس يلبسها
والملابس انواع
يا اما اتكون جاهزة او اتكون تفصيل
وكل نوع منها مطلوب طبعا
يعني لو الواحد بدا بمحل ملابس او خياط
اكيد ان شغلة بيمشي والله بيوفقة
بس المهم في كل هذا
هوة
المكان
النوعية
واهم شيء الدعاية
ولو حسبناها صح
اذا الاهل خذو من هالمحل
والاصدقاء
يعني
الزباين موجودين ومافي داعي للتفكير
ومدخول هالمحل شهريا ما ايقل عن ثلاثة الاف درهم صافي
اذا كان مستواه وسط وهذا كحد ادنى طبعا
لانة الطلب على الملابس مستمر طول السنه
ملابس الصيف غير
وملابس الشتاء غير
وملابس المناسبات
وملابس السفر
وغير وغير


هههه
وانا حاضر في المساعدة لمن يحتاج المساعدة

وارجو المعذرة
مع تحياتي
الرحال
أسرار
21-03-2002, 04:17 PM
مشكور اخي الرحال على المشاركه
واكيد الافكار كثيرة وتبا همه وعمل متواصل وراس مال
وبينجح المشروع والي يفشل يحاول مر ه اخرى(hi)